بعدها بأيام أنا غير معتكفة الشمبرة نخمم في حل حاولت شحال من مرة نحبس الدوا جربت نهار وزوج وثلاث بصح نضعف ونرجع تقولولي جوليا علاه مقويتيش روحك وكملتي حبستيه نقولكم مش ساهلة أنا ما كنصوميتش الدوا بإيرادتي أنا كلش بدأ تاع بسيف عليا ديجا بديتو بغبرة ومن بعد ايريكا و غيرها ، ملقيتش شكون يشجعني ويوقف معايا مجربتوش وجعاها كيفاش ، مجربتوش المونك تاعها تاعها كيفاش كي حبست يومين كنت قريب ناكل لحمي ، نخبط راسي في الحيط الحمة تطلعلي حتى نولي نقطر شعري نقلع فيه من الجلدة ونهبطو في يدي. كبة كيما الخيط الله لا يشوف فيها مؤمن وربي يعفو على كلً مبلي بهادو المهلوسات . ملقيتش حل اصيل بعيد حتى التلفونو مقفول عشرين يوم كاملين التخمام كلاني وليت جلدة على العظم والله من كنت نوزن 68. بالاك وليت 50 كيلو عينيا ساغني حمرين وجهي عاد ازرق كيما الرجال هذوك لي يضربو لادروق. في الدار صح واحد ما بقا يدور بيا بصح كامل متجنبيني كأنهم خايفيين لا يغلطو معايا في حاجة وانا نروح نشكيهم لأصيل يعني بمعنا اصح متقيين شري لأني حسب رأيهم ضامن اختي ودرت المشاكل في دار ومن لي جيت عندهم ولات ديما المشاكل ، أصلا ساعات تصدقو منتلاقاهمش بالثلاث أيام غير مرت خالي و ريمة يجيو لعندي الباقي كل واحد وين لاهي ، مسلم الخدمة داتلو كامل وقتو غير يطل ساعات كل مرة كيفاش يا يلقاني راقدة يا أنا نلعب روحي راقدة . حتى لنهار لي فضلي الدوا كالعادة عيطلي قالي راني نستنى فيك قدام داركم لقديمة جيبي الدراهم وأرواحي نتفاهمو على واش حكينا آخر مرة . لبست حوايجي وانا نشوف في روحي رايحة باه نزيد ندمر حياتي بيديا . كملت لبست وخرجت رحت ديراكت لشمبرة اصيل وربي كي حبني نتكشف بدأت من هنا أنا موالفة قبل ما نفتح الكوفر تاعو ونجبد الدراهم نغلق الباب ونبقا نعس خايفة ادا يشوفني كاش واحد . بصح هاد المرة دخلت بلا ما نغلق الباب بالمفتاح مفهمتش إذا نسيت ولا ربي حب يكشفني ، فتحت الكوفر وراني نهز في الدراهم ونخبي تحت التريكو لي لابساتو حتى تفتح الباب ودخلت مرت خالي وحيد عليا وانا بهذيك اللقطة . بقات هيا تشوف وانا نشوف علامات الاستفهام يخرجو من رأسها قاتلي جوليا وش راكي ديري وهادو الدراهم وش راكي ديري بيهم ؟؟؟ باه نخمم في كذبة ونقولهم مقدرتش بكيت وبكيت وهيا تشوف ومشوكية بقا ت غير جوليا وش كاين وشبيك غلقت الباب وجات عندي رميت وش كاين في يدي وطحت على ركايبي فشلت كرهت حبيت نحكي نفرغ قلبي واحد يسمعني بلا ما يلومني ولا يعاتبني بلا ما نخاف . بقات غير تسقسي وتسقسي وانا نبكي . ملقيتش إذا نجاوبها ونقول الصح ولا وس ندير . حتى نطقت قتلها طأطأ تعيشي اوقفي معايا اوقفي معايا غير المرة هاذي راني ضعت وحياتي ضاعت مبقاتليش حيات تعيشي اوقفي معايا . تخلعت قاتلي وشبيك يا بنتي متحرقيليش قلبي احكي وش كاين راكي طلعتيلي لاطونسيو اهدري . قتلها أوعديني توقفي معايا وما تحكي حتى شي لأصيل حتى نلقى حل تعيشي طأطأ علابالي يسمح فيا ويرميني برة تعيشي . عيطت عليا اهدري خرجتيلي قلبي يعطيك غمة وش من مصيبة درتي راح تهبلينا اهدري ً كلامها صواب شحال من مصيبة درت من لي جيت عندهم ، سكتت شغل فاقت مع روحها وش قالت مسحتلي وجهي قاتلي احسبيني أمك . قتلها أوعديني متقولي حتى حرف لأصيل . قاتلي وعدك اهدري ابنتي اهدري راكي ركبتيلي السكر . ماعندي حتى خيار. واحداخر حكيتلها كلشي من لول لي تالي ما خبيت عليها حتى حاجة . عادت تندب وتقولي هذا كامل صرا ومتقوليليش علاه يا بنتي هلكتي روحك وهلكتبنا معاك ، روحي يا فطيمة ربي يرحمك أنتي هانية وخليتينا البومبة يا ربي استرها وأسترنا يا كون يسمع اصيل موتك تكون على يدو راه مش غير موتك يقتلك ويقتلو ويقتل روحو وراكم يا ربي شا ندير في هاد الموصيبة لي طاحت على داري ، اياكي ثم اياكي يلعب الشيطان براسك وتغلطتي تقولي كلمة لأصيل . وقفت مسحت وجها وبقات رايحة جاية عليا تخمم وانا غير ساكتة وقاعدة نخمم هادي يماه ودارت هكذا كان قتلو هو راه دفنني وكمل . وقفت فوق راسي قاتلي نوضي شفت معاها . قاتلي شاركتي تشوفي فيا نوضي جيبي هذوك الدراهم وامشي قدامي تروحى عندو نتفاهمو معاه هيا .
