قالي يا جوليا علاه راح تنوضي الحرب علينا وعليك قالوا تعيش مسلم أوقف معايا مش بيدي تعيش متخلينيش وحدي أنا اختك . حط يدو على شعري وانا محضناتو قالي علابالك بيا أنا ديما معاك ظالمة ولا مظلومة بصح في هادي منقدرش منخدعش خويا أنا انتي علابالك وكامل علابالنا وش كاين بينك وبين اصيل علاه لخدع هذا جوليا كان يسمع يحرق علينا الدنيا مزال ما شفتي هبالو تاع الصح . نطقت يماه قاتلو لمحبة مش بسيف أمسلم جوليا عندها لي تحبو ومن كأنو صغار وهما مع بعض منوقفوش في طريقها ولي دارو خوك معاها برك كي يماها وصاتو عليها قبل ما تموت . ليوم ان شاء اللله تكونً خطبتها وكلشي راح يكون كيما حابة جوليا ياك هكا جوليا . زيرت على على تريكو تاع مسلم بين يديا وهزيت راسي بايه ياريت واحد يحس بيا قلبي شاعلة فيه النار خممت في قاع الحلول نقتل روحي . نهرب . نقول كلشي وخلي لي يصرا يصرا . بصح معنديش الكوراج باه نديرهم . نهايتي باينة كيفاش راح تكون با في جبانة يا في سبيطار مهابل يا مفضوحة بين ناس ونتوارا بالصبع . قاتلي مرت خالي اطلعي وجدي روحك مبقاش بزاف ساعتين ويوصلو الناس دوك تجيك ريمة تعاونك . طلعت وانا دموعي على خدي ستة سبعة وصلت لشمبرتي قلبي راح يحبس من العصرة لي فيه هادي نهايتي هكا الحاجة لي تبدّا بالحرام تكمل هكدا مدام أنا جيت بالحرام باينة راح تكون حياتي هكدا ، شفت مع روحي في المراية وضحكت وش كنتي حاسبة يا جوليا راح تفرحي وتبدلي حياتك من جديد موحال انتي مكتوب ليك الهم والغم والشقا حياتك كاملة . مسحت دموعي وفتحت الخزانة جبدت حبة دوا بلا ما نقول وش من دوا راكم علابالك أنا راح نحطها في فمي تفتح الباب دخلت اسمهان لحقت عليا هازتها في يدي بقات تشوف معايا تبسمت معاها قتلها راكي ربحتي وانا خسرت كلشي حلفتي وراح يصرا وش كنتي حابة بصح علابالك على قد ما اذيتيني عمري ما نتمنالك الشر ان شاء الله تتزوجي .. هبطت راسي وحبست الهدرة شوي وشفت فيها مع لي يبغيه قلبك أنا مبقاش بزاف وتتهناي مني نروح ومتزيديش تشوفيني نتزوج بعلي ضحكت ولا بالاك نموت متدريش ولا نحرق ولا منعرف كيفانش راح تكون حياتي المهم انتي كوني هانية على الأقل وحدة فينا تفرح في حياتها بعد وش فوتنا في حياتنا خلي ماما ترتاح في قبرها بعد ما تشوف وحدا فينا دارت وش كانت حابة . دورت عطيتها بظهري بقات واقفة في بلاصتها ما قالت حتى كلمة شوي وخرجت وانا كملت شربت الحبة تاع الدوا ودخلت للدوش دوشت وخرجت لقيت ريمة تستنى فيا موجدة سيشوار وليسار غير خرجت شافت فيا وتبسمت فوق من قلبها . في ساعة وجدت روحي مكياج شعري مسشور ومطلوق لابسة غوب طويلة في الأزرق بقيت نشوف مع روحي المراية صح ضعفت بزاف وفصالتي تبدلت بصح مزال زيني طاغي وعينيا حكاية أخرى الحزن مغيم عليهم شحال كنت نستنى في النهار هذا بصح مع اصيل . بصح للقدر رأي آخر . نطقت ريمة قاتلي ان شاء الله متكونيش غالطة في حسابك برك وتبقاي حياتك كاملة نادمة وخرجت بقيت قاعدة نستنى حتى سمعت صوت الطموبيلات جاو . بعد نص ساعة طلعت عندي ريمة قاتلي راهم يعيطولك اهبطي يستناو فيك ً. هبطت درجة وكل درجة مصيري يتكتب. وصلت دخلت عليهم للصالة كامل قاعدين من غير خواتات اصيل ووسيم علبالي غاضهم الحال علجال اصيل بلي أنا خداعة ونلعب بالرجال . شفت مع مسلم وجهو ميتفسرش علابالي راه قاعد برك كي بكيت وحاولتو ميخلينيش .رحت سلمت على لي جاو اختو ومرت خوه ويماه لي تشوف. فيا دوبل وقالبة شنايفها وقعدت مقابلتهم علي يشوف فيا ويتبسم الفرحة خارجة من عينيه وصل لي حاب عليه نطق قالو يا عمي أنا راني قابل باي شرط راح تقولوه لوكان نجمة من السما وجوليا علابالها شحال نحبها وميت عليها ومذابيا في اقرب وقت نديرو العرس أنا راني واجد من كلشي . نطقلوا خالي وحيد تنهد وقالو حنا طالبين غير الهنا والعرس بالعقل حتى يفوت عام ولا عام ونص علاه راك مزروب مزالكم صغار ديرو خطبة والفاتحة حتى يكون ولدي اصيل حاضر باه تندار . قالو علي معليش عمي لي تساعدكم المهم دير خاتمي في يدها برك وبلي راهي تاعي والباقي معليش . قالو خالي مالا نصلى على النبي والطفلة مدامها قابلة راهي ليك . جبدت يماه الخاتم من ساكها وقدم هو دارهولي من بعد قعدو شوي وراحو وانا كيما الجثة تقول عليا نتفرج على فيلم
