غير خرجو من دار علي ودارهم بقاو نسا خوالي يحكيو ويفتحو في حوايج لي جابوهم لاتارت وقفطان بصوالحوا الورد وانا غير قاعدة. نشوف جا قعد بجنبي مسلم وتنهد يشوف معايا قالي راكي مرتاحة دوك جوليا متوقعتكش هكدا علابالكي وش درتي ولالا فسدتي حياتك بيدك . شفت فيه قتلوا خليني في حالي مسلم أنا حابة هكدا . قالي بصح عينيك يقولو راهم يقولو العكس أنا راني معاك برك بيسك محال نسمح فيك بصح علابالي بلي راكي تغلطي في غلطة حياتك وش راح نقول معليش. كملي فيها نشوفو وين راح توصلي مسحلي على شعري ونايض راح جيهة الباب راح يخرج هو راح يفتحو والباب تفتح شفت آخر عبد توقعتو يجي اليوم وفي هاد اللحظة بالذات دار عندي مسلم يشوف معايا وكآمل لي في الصالة سكتو جاتهم لحظة ادراك وش رح يصرى . قالو مسلم اصيل اهلا خويا مقتليش بلي راك جاي ليوم سلم عليه ودخل قالوا ليوم طلقوني علابالك شاف قالي ارجع يسحقوك هنا . كمل داخل ويشوف مع مسلم ويحكي راحت مرت خالي عندو تجري هيا وريمة يسلمو عليه شحال تمنيت أنا ثاني نروح نجري عندو شحال توحشتو بصح كلشي فوق يدي كمل سلم عليهم من بعد شاف معانا وباقي يشوف في الحوايج فوق الطابلة قال ليماه ماما شكون لي تخطبت عدنا وخزر مع ريمة يضحك قالها متقوليليش انتي يا فلوسة نقتلك علابالك تخطبني وانا مكانيش. نطقت مرت خالي الوسطاني وقاتلوا لا جوليا لي تخطبت ليوم . تلفت عندي يشوف وحبس في بلاصتو يشوف معايا كون نقول كلمة مشوكي قليلة عليه جمد يشوف فيا . ندمت وخفت وغاضني دموعي نزلو يديا يرجفو راح نطيح من وقفتي علاه يا ربي جا ليوم علاه يا ربي علاه لازم يشوف كلشي بعينيه عض على شواربو ومسح وجهو يديه يرجفو اكثر مني حبات العرق على جبينو يلمعوا عينيه حمارو تحسيه راح يتفلق . ما قال حتى كلمة جيست هز راسو وهز الكابة تاعو ودار طالع لشمبرتو كامل كنا نشوفو في ردة فعلو ممكن كنا متوقعين ردة فعل خلاف كنت متوقعة يعيط عليا يضربني يسبني يبرد قلبو ويجن عليا بصح ردة فعلو هادي قسمتني اكثر يا ريت ضربني احسن من نظرة الخذلان والخدع لي شوفتها في عينيه . محسيتيش بروحي غير وانا لحقاتونحكيلو كلشي وخلي لي يصرا يصرا علاه عليا نعذب في روحي ونعذب فيه معايا هو ميستاهلش وش راه يحس مستحيل نسكت . حبستني مرت خالي حكمتني قاتلي جوليا خليه . قتلها طأطأ تعيشي خليني نحكيلوا كلشي علبالي مستحيل يسمح فيا منقدرش نبعد عليه تعيشي منقدرش بلا بيه قاتلي جوليا اسكتي حبيتي يهبل احملي واسكتي انتي لي وصلتينا لهنا تحمّلي مسؤولية أفعالك انتي لي حبيتي . قتلها ندمت طاطا خلي يدير فيا وش يحب تعيشي حاسة قلبي راح يحبس . قعدت في الأرض قدام باب شمبرتو طبست عندي حكمتني وجهي قاتلي جوليا ياك تحبيه خليه في حالو هو يستاهل وحدة خير منك وحدة صافية كيما قلبو راح ينساك متخافيش راح ينسى ويكمل حياتو وأنتي كملي حياتك بعيد عليه علابالي ادا قلتيلو كلشي راح يروح يقتلو ويكمل حياتو في الحبس ولدي ونعرفو مستحيل يسكت إذا حكيتيلو راح يدير حاجة تخلينا نتدمرو كامل ياك تحبيه وتحبيلو لخير كملي حياتك وخليه في حالو متخافيش راح ينساك وأنتي راح تنسايه درك روحي لشمبرتك روحي يالله روحي . وقفتني ووصلتني لباب شمبرتي فتحتلي الباب دخلتي وهيا راحت غير راحت طحت وفي الأرض مقدرتش علاه يصرالي هكا علاه نحبو منقدرش منقدرش حاسة روحي راح نموت دخلت للدوش رجعت كلشي وليت نرجف كي الورقة اول مرة نحس روحي صح راني محتاجة لريان خرجت من الدوش قريب راح نزحف في الأرض هزيت تلفون عيطلها هزت عليا قتلها تعيشي ريان أرواحي عندي مقدرتش حاسة روحي راح نموت وطيشت التلفون من يدي ورجعتً للدوش كملت نرجع في كلشي علابالي بلي راهي حاكمتني بانيك أتاك مي معرفتش نتصرف وحدي شوي وسمعت ريان دخلت مع مسلم وريمة . فاتت عندي بقات تهدي فيا وضربتلي إبرة في ذراعي . حطوني في سريري رقدت ديراكت . بعدها معلاباليش شحال بقيت وانا راقدة غير فتحت عينيا لقيتو قاعد مقابلني والدخان في يدو .
