لبسنا حوايجنا ورحنا عندو بقيت نستنا في دارنا كيما موالف حتى طبطب فتختلو دخل غير دخل وشاف طاطا تخلع وشاف فيا قالي هاذي وش دير هنا قتلو حكيتلها كلش علابالها بكلش ، قالي صار هكدا وشاف معاها قالهاًحكاتلك . قاتلوا الله يرحمٌ لي جاباتك اخطي طفلة ونعطيك وش تحب ياك هيا خدعاتك وأنت رجعت حقك وش راك باغي منها دوك ، بعدها احسبها أختك . قالها نحبها الله غالب يا تكون ليا يا تموتً معندهاش حل آخر ًقاتلو بصح هيا مراهيش باغية تكون ليك لمحبة متجيش بالسيف لمحبة بالسياسة وكل قلب وش يهوى يا ولدي اسمع مني أنا كبيرة ونعرف انت معدنك طيب واصلك باين روح في حالك وكلشي مسامح فيه أخطيها برك الطفلة ضاعت لي يحب صح ميديرش شا درت انت . قالها منقدرش الله غالب فوق من جهدي وإذا طامعة تكون لولدك نقتلهم لزوج ونقتل روحي وراهم جوليا ليا وندير عليها الحرب . عادت تبكي قاتلو يهديك ربي يا ولدي ديرهاً ختك حرام عليك لي راك دير فيه راه منكر . قالها أنا ثاني راني نتعذب وهيّا بعيدة عليا ، هيا علابالها يا تكون ليا يا نقتلها . شافت فيا لقاتني نبكي قاتلوا خلاص راهي ليك سمانة الجاية ارواح تخطبها . قالها راكي تتمسخري ولا تحكي صح قاتلوا والله صح راني حلفت بصح كلش يموت هنا نخطبها من خالها كيما قاع لبنات جيب يماك وداركم وارواح . ضحك قالها كيما تبغي هيا يكون تجيبلها النجوم من السما . أنا تشوكيت قتلها طأطأ شا راكي تقولي أنتي قاتلي اسكتي راح تقبلي ولي صرا يبقا سر بينا أنتي تحبيه من وقت كنتي صغيرة وهو يحبك تقولي لخالك راني قابلة . قتلها بصح قاتلي لا بصح لا والوا أنتي غلطتي تتحملي غلطتك وحدك . تعرفو واش معناها بقيت بالشوك فمي مفتوح ونشوف معاها هيا تاني سمحت فيا الخدلان لي عشتو في دقيقة هاذي يخليني نخمم أنا شكون عندي في دنيا هاذي يوقف معايا حتى واحد من بعد ماما مكان حتى واحد . سكتت قدم عندي عليلو حطلي صاشي فوق لاتابل كانت في دخلة قالي هاذ الدوا مش قاوي بزاف مع لوقت تقدري تحبسيه ، قدمت عندو طأطأ مدتلو الدراهم قاتلو آخر مرة تزيد تجيبلها هاد الخماج مبقاتش تشربو . حكم الدراهم وخرج . كي خرج هو دارت عندي قاتلي جوليا افهميني مليح وش راح نهدر أنا قتلوا بلي راح تقبلي وراح تقبلي بيه حتى نلقى حل ونشوف كيفاش نحكي لأصيل ولا لمسلم المهم تقبلي بالخطبة برك باه مبقاش يهدد حتى نلقاو حل. أصلا كشما بقا عندي حل آخر قبلت بفم ساكت مدام كتافي باردين نبقا لعبة بين الرجلين حتى للموت . فاتت سمانة وصلت الجمعة ليوم لي راح يجيو يخطبوني فيه كان مسلم مكانش خدام في ولاية بعيدة وصل الجمعة الصباح غير دخل لقا لبنات يوجدو يماه تطيب في سفر وتحط تصنف وتعاود . وانا قاعدة في الدرج جثة بلا روح تعرفو الجثة هكاك تخمامي كامل كان يسمع اصيل وش يدير . كان تضحكو عليا كنت نخمم نهرب ههههه بصح عند شكون نروح علابالي كان نخرج يأكلوني برة إذا بين اهلي وناسي وممنعتش كيفاش راح نمنع وانا وحدي . جا سلم عليا وسلم على طأطأ ولبنان وسقيتها قالها وش كاين يما غير الخير عدنا عرس وانا معلاباليش . قاتلوا ليوم الشوفة تاع جوليا كاين ناس جايين يطلبوها من بوك لمزيل جيت يلقاوك حتى انت واقف معاهم خوها تبين وجهك . دهش شاف معايا وعاود شاف معاها قالها يما وش هذا لي راكو ديرو فيه شكون هادو لي جايين ومنين خرجو هادو وصيل علابالو . نطقت ريمة كانت تطبق في لي بابي سيرفينا وتستف فيهم فوق لاتابل قاتلوا لا تسقسي لا والوا هذا تعرفو جوليا من بكري وهيّا لي قاتلوا ارواح متفاهمين حنا برك لي كنا ناكلوا في رواحنا وحدنا . شاف معايا قالي صح تعرفيه انت هذا لي جاي درتلوا براسي إيه قالي واصيل . سكتت وهبطت راسي . أصلا كنت على حافة حاكمة روحي ولا نوض نكسر كلشي ونرمي روحي من كاش بالكو نموت ونتهنى. شاف معايا وحد شوفة عاود هز الكابة تاعو لي كان جا بيها وقال أنا نرجع منين جيت خير . وجا خارج غير وصل للباب لحقتواً نجري حضنوا على قوة جهدي نبكي قتلوا مسلم أنا ختك متخلينيش تعيش . تنهد وزما الكآبة من يدو وعنقني قالي علاش جوليا علاش راح تنوضي الحرب علينا وعليك .
