Chapter 44
Yamin AungJuly 21, 2023
အပိုင်း (၄၄) ကြက်သား အာလူးဟင်း
ညစာကို အိမ်ရှင် မိသားစုနှင့် ဧည့်သည် ခုနှစ်ယောက်က အတူ စားလိုက်ကြသည်။
စင်သီယာက နွေးထွေး၍ တက်ကြွသော မိန်းမ တစ်ယောက် ဖြစ်ပြီး သူမ၏ ခင်ပွန်းဖြစ်သူ မာလင်က ဟာသဉာဏ်ရွှင်သူ ဖြစ်သည်။
ဆုယောင်တို့နှင့် ပထမဆုံး အကြိမ် တွေ့ဖူးခြင်း ဖြစ်သော်လည်း မာလင်က ဧည့်သည်များကို ဧည့်ခံရန်အတွက် ဝိုင်ပုလင်းများ ထုတ်လာခဲ့သည်။
စင်သီယာ၏ နွေးထွေးစွာ ဖိတ်ခေါ်မှုကြောင့် ဆုယောင်က စင်သီယာ ဘေးတွင် ဝင်ထိုင်လိုက်ပြီး ဆုယောင်၏ ဘေးခုံက နေရာလွတ်နေခဲ့သည်။
စုန့်ရန်က ဟင်းပွဲများကို ဝိုင်းချပေးပြီးနောက် ဆုယောင် ဘေးမှ နေရာလွတ်ကို ကြည့်ပြီး ဝင်ထိုင်ရန် ပြင်လိုက်သည်။
သို့သော် ချောင်မန်လင်းက အရင်ဦးအောင် ဝင်ထိုင်လိုက်ပြီး "ခေါင်းဆောင်၊ ဝိုင်းလုပ်ရတာ ပင်ပန်းသွားပြီဆိုတော့ မြန်မြန် ထိုင်လိုက်တော့လေ" ဟုပြောလိုက်သည်။
ထိုအခါ မျက်နှာချင်းဆိုင်မှ လင်းရန်ချီက လက်ပြလိုက်ကာ "ဟုတ်တယ် ခေါင်းဆောင်။ ဒီကို လာခဲ့" ဟု လှမ်းခေါ်လိုက်သည်။
ထိုအချိန်တွင် စုန့်ရန်က စားပွဲခုံကို တစ်ချက်ကြည့်လိုက်သောအခါ နေရာလွတ် မရှိတော့ဘဲ လင်းရန်ချီနှင့် ဟဲယွမ်ဟန်၏ ကြားထဲတွင်သာ နေရာလွတ် ကျန်တော့သဖြင့် ထိုနေရာသို့သာ သွားထိုင်လိုက်ရသည်။
ထို့နောက် အဖွဲ့သားများက သူ့ကို ပစ်မှတ်ထားနေသည်ဟု စိတ်ထဲမှ ထင်ကာ ထူးဆန်းသွားသည်။
ဆုယောင်၏ အာရုံက ခေါက်ဆွဲဆီသို့သာ ရောက်နေသဖြင့် ပတ်ဝန်းကျင်ကို သတိမထားမိလိုက်ပေ။
ကျန်သည့် အဖွဲ့သား ငါးယောက်က တစ်ယောက်မျက်နှာ တစ်ယောက် ကြည့်လိုက်ကာ တိတ်တခိုး ပြုံးလိုက်ကြသည်။
စုန့်ရန်ကို ရင်းနှီးမြှုပ်နှံသူအဖြစ် သိလိုက်သောအခါ အဖွဲ့သားများက စိတ်လှုပ်ရှားသွားကြသော်လည်း နောက်ဆုံးတွင် ဆုယောင်ကိုသာ ဝိုင်း၍ ကာကွယ်ပေးကြမည်ဟု ဆုံးဖြတ်လိုက်ကြသည်။
