Chapter 94
Yamin AungSeptember 17, 2023
အပိုင်း (၉၄) ခြင်္သေ့ခေါင်း အသားလုံးနှပ်
ရန်ယိဖန်းက ဆုယောင်အတွက် စိတ်ပူပန်နေသော်လည်း အမှန်တကယ် တွဲနေကြပါက တားနိုင်မည် မဟုတ်ပေ။
ထို့အပြင် ယနေ့ လူတွေ့စစ်ဆေးခြင်းက ပို၍ အရေးကြီးသဖြင့် ရန်ယိဖန်းက လမ်းတစ်လျှောက်လုံး စကားမပြောတော့ဘဲ မောင်းလာခဲ့လိုက်သည်။
လူတွေ့စစ်ဆေးမည့် နေရာသို့ ရောက်ခါနီးမှ ဆုယောင်၏ မျက်နှာမှ တင်းမာမှုများ ပျောက်ကွယ်သွားသည်။
ဓာတ်လှေကားက ဖြည်းဖြည်းချင်း အပေါ်ထပ်သို့ တက်နေသည့်အချိန်တွင် ဆုယောင်က သူမ သရုပ်ဆောင်မည့် ဇာတ်ကောင်ကို နှလုံးသွင်းမှတ်ယူနေခဲ့သည်။
ဆုယောင် ယနေ့ရောက်လာသည့် လူတွေ့စစ်ဆေးပွဲက နတ်သမီးပုံပြင်ကို အခြေခံထားသည့် စိတ်ကူးယဉ် ဇာတ်လမ်းတွဲ ဖြစ်သည်။
မူလဇာတ်ညွှန်းတွင် ဇာတ်ဆောင် အမျိုးသမီးစားဖိုမှူးက ဖွံ့ဖြိုးတိုးတက်ပြီးခေတ်မှ နတ်သမီးတိုင်းပြည်သို့ ရောက်သွားကာ စားဖိုမှူးအလုပ်ကိုသာ ရွေးချယ်ခဲ့သည့် အကြောင်းကို ရေးသားထားသည်။
ဇာတ်လမ်းတစ်ပုဒ်လုံးကို ဖတ်ပြီးသူတိုင်း "မိုက်သည်" ဟူသော စကားတစ်ခွန်းသာ ထွက်လာခဲ့ကြသည်။
ထိုကြောင့် ထိုဇာတ်လမ်းက အမျိုးသမီး သရုပ်ဆောင်များကြားထဲတွင် အလွန် ရေပန်းစားသွားခဲ့သည်။
"တင်း တောင်...!"
ဓာတ်လှေကားက ခလုတ်နှိပ်ထားသည့် အထပ်သို့ရောက်သောအခါ အသံမြည်ပြီး တံခါးပွင့်သွားခဲ့သည်။
ဆုယောင်က ရန်ယိဖန်း၏ နောက်မှ ဟောခန်းထဲသို့ လိုက်သွားလိုက်သည်။
ဟောခန်းထဲသို့ ရောက်သွားသည်နှင့် ဆုယောင်က အလွန်စိတ်လှုပ်ရှားလာခဲ့သည်။
