Chapter135
အပိုင်း(၁၃၅) ဇာတ်သိမ်း
ဓာတ်ပုံများ တက်လာသောအခါ အင်တာနက်ပေါ်တွင် မှတ်ချက်များဖြင့် စည်ကားသွားခဲ့သည်။
အချို့က ဓာတ်ပုံထဲမှ လူကို ဆုယောင်၏ ရည်းစားဟု ပြောနေကြပြီး အချို့က ဆုယောင်၏ စပွန်ဆာဟု ပြောဆိုနေကြသည်။
ထင်မြင်ချက် အမျိုးမျိုး ရေးသားကြသော်လည်း သိချင်သည့် မေးခွန်းက ထိုယောက်ျား မည်သူနည်းဟူသည့် မေးခွန်းတစ်ခုတည်းသာ ဖြစ်သည်။
ထိုအချိန်တွင် ယောင်ရန်စုံတွဲ ပရိသတ်များက စုန့်ရန်၏ အရပ်အမောင်း၊ ပုခုံးအကျယ်၊ ခြေထောက်အရှည်နှင့် မေးရိုးထင်းထင်းကို ကောင်းကောင်း သိနေကြသဖြင့် ထိုယောက်ျားကို စုန့်ရန်ဟုသာ တစ်ထစ်ချ ယုံကြည်နေကြသည်။
"အား...!!! သေပါပြီ။ ဒီအတွဲက တကယ်ကြီး တွဲနေကြတာပဲ"
"အရင်တစ်ခေါက်က သူတို့ ရုပ်ရှင်ရုံမှာ ဒိတ်နေကြတာ တွေ့တယ်။ ဒိီလိုနေ့မျိုး ဖြစ်လာမယ်ဆိုတာ ငါသိနေတယ်။ ဒါပေမယ့် ဒီလောက်ကြီး စောလိမ့်မယ်လို့ မထင်ထားဘူး"
"ခစ်ခစ်....ခုတော့ သတင်းထုတ်ပြန်ဖို့ကိုပဲ စောင့်ရတော့မယ်"
"ငါအရင်က သူတို့တူတူ ရိုက်ခဲ့တဲ့ ရသစုံရှိုးကို ပြန်ကြည့်တာ အချိုလေးတွေ အများကြီး တွေ့လိုက်ရတယ်။ စုန့်ရန်က ဆုယောင်ဆို အထူးအလေးပေးပြီး ဆက်ဆံတာ။ တစ်ယောက်က မာမာကြောကြောနဲ့ နောက်တစ်ယောက်က နူးနူးညံ့ညံ့လေးဆိုတော့ လိုက်ပါတယ် နှစ်ယောက်သား"
"ဆုယောင် နောက်ဆုံးရိုက်ခဲ့တဲ့ "ကွာရှင်းပြီး ရက်(၃၀) ရသစုံရှိုးမှာ ချန်ချင်းတို့အိမ်က ဆုယောင်ပြန်သွားတဲ့အခန်းမှာ စုန့်ရန်ရဲ့ကားကို တွေ့လိုက်ရတယ်"
စုံထောက်အများအပြားက သူတို့ရှာဖွေ တွေ့ရှိထားသော စုန့်ရန်နှင့် ဆုယောင်တို့၏ အကြောင်းများကို
အင်တာနက်ပေါ်တွင် ပြန်လည်ဝေမျှခဲ့ကြသည်။
ယောင်ရန် ပရိသတ်များက ပို၍ပျော်ရွှင်လာလေလေ စုန့်ရန်နှင့် ဆုယောင်တို့ အတည်ပြု ထုတ်ပြန်သည့် သတင်းကို ပို၍ ကြားချင်လာလေလေ ဖြစ်သည်။
