#رمضان_احلا_مع_جمان_فريد
#العشق_المتمرد
الجزء الخامس
طرابلس..
صوت دق ع باب حوش
طلعت من الكوجينه وماشيه تفتح
فتحت
خشت بنتها اللي فعمر 6سنوات تبكي بالعبرة..
سكرت الباب وهي تسأل فيها: خيرك رباب!!؟
رباب ببكي :عمتي..هناء..لزتني..
زينب : علاش شن درتي؟!
رباب ببكي : تعاركنا ..اني هنيده..هي ضربتني كف واني ضربتها...جت عمتي هناء ضربتني كف..ولزتني...هي يما ضربتني الأولى هي...وحطت ايديها ع عيونها وقعدت تبكي بالعبرة..
زينب عيونها تعبوا دموع ..
زينب صغارها خط أحمر ماتبيش من يقربهم ولايجي جيهتهم
صح لو غلطوا تعاركهم بس من فوق نفسها..
يابال توا وبنتها انضربت ظلم..
لأن عماتها يديروا في الفرق بين صغار خواتهم وخوتهم وتحديدا صغار زينب..
مشت خدت جلابيه ولبست محرمه ربطتها وطلعت من الدار
خدت رانيا من قدام التلفزيون وطلعت بيها ورباب معاها مشت لجارتها اللي قدامهم خلت عندها رانيا..
وطول بعدين توجهت لحوش شيابينها اللي كان في الشارع اللي وراهم..
وصلت فيه طقت ع الباب..
شويه وانفتح..فتحه سلفها الصغير..
طول خشت وفيدها بنتها....قعدت ادور فعزوزتها لقتها متكيه في الدار خشت عليها..
زينب: عمتي...شوفي وجه رباب ياعمتي..شدت بنتها وورت خدها لعزوزتها ..شوفي صوابع هناء ع وجهها..
مبروكه قعمزت : تعالي بنيتي..
قعمزت رباب في حجر حناها..
ع خشة هناء واختها نجيه..
هناء: تستاهل من شطانتها وقلة ادبها..
زينب التفتت : بنتي هاديه مش قليلة ادب ولا عندها ع العراك زي غيرها..
نجية برفعة حاجب:شن قصدك انتي ترا...
زينب تجاهلتها : ياهناء صغار يتعاركوا مع بعض لو بتعاركي عاركي الزوز ولو بتضربي اضربي الزوز...
هناء : بنتك ضربت هنيده كف ..
رباب : والله هي الأولى ضربتني..
هنيده : كذابه انتي الأولى ضربتيني ياكذابه..
رباب قعدت تبكي ...
نجيه: اسمعي احني عماتهم وهادوا بناتنا نضربوهم ونضربوا عليهم..
زينب وهي تبلع فريقها من حرق الدم:ماقلت شي لكن مش بالظلم..
هناء: ظلم شنو ترا ...والنبي صكري فمك..
زينب :احترمي نفسك ياهناء مش من ندك تدوي معاي هكي..
مبروكه : خلاااص اسكتوا ياااسر يااااسر...وانتي خودي بنتك وروحي وفكينا من المشاكل ع كلام فاضي...
زينب شبحتلها شويه بعدين قالت: باهي باهي ياعمتي..
خدت رباب وطلعت بيها..
سمعوا الباب تصكر..
مبروكه شبحت لهنيده : مني ضرب الأول انتي ولاهي..
هنيدة :هي ..
مبروكه : هنيده!
نجيه : امي..
مبروكه : ضمي فمك انتي..
هناء : هنيده ضربت الأولى...
مبروكه شبحت لهناء..
هناء: لسان الفرخه رباب طويل قعدت تعزر فيها بجبهتها ..
هنيده :ايه ياحنينه ديما تعزر فيا..وبدت تبكي..
نجيه :طالعه لأمها لسان وقلة احسان..
مبروكه ؛ باهي تعالي هنيده تعالي ..
جتها هنيده..حضنتها مبروكه وقعدت تمسح ع شعرها : بنيتي هنيده احلى وحده..
ابتسمت هناء وطلعت ونجيه لحقتها..
نجيه : حق عزرتها هالعبده"بشرة رباب سمرا زي الهنود"
هناء بضحكه: تس..بنتك اللي عزرتها قالتلها ياعبده..
نجيه : هممم..ههههههههههههه..
"اللي نحكي فيه واقع مرير وصااااير"...
🍁زينب لما روحت لقت راجلها جي ..
مسحت دموعها منين رت مداسه"سباطه".
شدت رباب: ردي بالك تقولي لبوك حاجه وكان قالك ليش تبكي قوليله تعاركت مع الصغار وخلاص باهي؟!
رباب هزت راسها بإيجاب ...
.وخشوا داخل..
لقاته في الصاله..
خيري : وين كنتي؟
زينب: مشيت لحوش العيله شوي وجيت..
خيري : خيره وجهك؟
زينب : خيره؟...
خيري : يبان اصفر..
زينب: لالا عادي مافيه شي..خل نخش نحطلك الغدي..
ومشت طول وهو معاها بعيونه...اللي توسعوا بصدمه لما شافها مجرد وصلت لباب الكوجينه طاحت من طولها ..
رباب عيطت هي واختها تبكي..
وهو ناضلها يجري...
****
صوت بكاء طفله صغيرة..
وهي مقعمزة تتفرج ع الراديو اللي تكسر .
نعيمه وهي تندب : عطيك مايرفعك يادلال يابنتي..شن نقوله اني شن ندير توا...
برا..
كيف خش راجلها مروح من العمل..
شم ريحة شياط...
مشي طول للكوجينه وطفا الغاز..
عبدالسلام: المراة الحرفه اللي بلاني بيها ربي..
طلع من الكوجينه لقي دلال تعيط..
جاها قامها : خيرك بابا..
دلال : ضربتني..ماما..
مط شواربه لداخل بغضب وتوجه لدار النوم..
عبدالسلام: علاش ضربتيها..
نعيمه قلبها طاح: كسرت الراديو..
عبدالسلام شبح للراديو بغضب نزل دلال وقال: والله ماحد يستاهل الضرب هني غيرك انتي كان مش حالة فمك ره مانكسرش ولا غداك شاط..
نعيمه خبطت يدها ع وجهها: شاط؟
عبدالسلام؛ نوضي نوضي اطلعي من قدام وجهي جدري يفصلك بين سوطاش..
ناضت تبلع فريقها ودموعها طاحوا ومشت طول للكوجينه وهي تبكي..
ودلال وراها تشوفلها وتبكي..
جتها شدتها من رجلها...
نعيمه بنرفزة : بري غادي..
دلال :معاش تبكي..
نعيمه نزلت لبنتها وحضنتها بقوة وقعدت تبكي : نبكي من الهم ياماما من بختي الأسود..
شويه وطلع من الدار : بنمشي نتغدا عند امي ...
وطول توجه للباب وطلع...
لما سمعت الباب تصكر بتقربيع...
قالت:مشيه بلا رجعه....
*****
كفايه ..وراس كفايه جيبيلي فلفل..
كفايه بضحكه: باهي ياباير...
خدت فلفل من الثلاجه.. وطلعت من الكوجينه..
وجتهم وقعمزت تاكل..
كفايه: مش باهي الفلفل هلبه هلبه ياوداد..
وداد حماتها : مايحلاش الكسكسي من غيره..
تبرة عزوزتها : هادي وداد زي بوها الفلفل في كل شي خاش..
كفايه ضحكت بعدين قالت: بنقولك عمتي بنضم الكوجينه ونقلبها.
تبرة : لالا هلبه عليك ساد دار الخزين غدوة تجي سلفتك وضمها...
كفايه : مريم حامل ومثقلة ماتقدرش خليها عليا اليوم..
وداد:تهبلوا كيف متفاهمات..
تبرة بضحكه :الله وحد عليهم ..
كفايه ضحكت ...
"كيفو جيبي ليم عصري"..
كفايه:هي تفضل هي الليم العصري شن يدير بيه مع الكسكسي غريب ولدك هدا ياعمتي..
وداد: مخروم ليم عصر هدا..
كفايه: مع الكسكسي عاد!!
"نسممع فيييك ره"..
كفايه ضحكت : اهو نايضه هي..
ناضت وعزوزتها وحماتها يضحكوا..
كفايه وسعد طنجره ولقت مغطاها جوهم مليح وديما متفاهمين حتى لما يتزاعلوا يقعدوا يناشبوا في بعض لين يولوا لبعض..
💓محلاها العلاقة الزوجيه اللي من هالنوع لاتكبر لاتطنيش لاتحسس💓
🌴🌴🌴🌴🌴🌴🌴🌴🌴🌴🌴🌴🌴
حاطين رجليهم في لايان مية وملح..
فاطمه: العفو ياربي غير امتي بديتوا انتم من تو الفلقه..
عمر : عادي يمي بش ناخدوا ع الوضع..
فاطمه : تو انت يامضلول واخده عليك وعلي الطرايح اللي تاكل فيهن ..لكن هانيبال؟!!شن جاه..
هانيبال عيونه فرجليه متحشم من امه..
عمر: مرات يمي مش اخر مرة ره حطي فبالك..
هانيبال ضربه برجليه الميه تنطرت ودارت صوت..
فاطمه: ربي يهديكم اكبروا ...
ومشت وخلتهم...
هانيبال:ياجرو تقول لحد نعفس في بطنك..
عمر بضحكه: باه ياودي ..لكن بنقولك..
هانيبال شبحله ..
عمر: البنت مش صافيه راهي..
هانيبال شبح للميه ووجهه بدي يولي احمر: كيف يعني؟
عمر بضحكه: قصدي طاحت..
هانيبال شبحله برفعة واجت ووجهه احمر:طاحت؟!
عمر : ههههههه...قريب كلاتك بعيونها ..
رجع شاف للميه وقلبه 💓: باهي ضم فمك ضم بلا قطاف فارغ
عمر مركز ع وجهه : باهي قولي ليش وجهك راح كيف الطمطمه!
شبحله بحده وبعدين بدي يضرب فيه برجليه وعمر يردله فيهم ويضحك والميه تتنطر هني وهني وهما انبلوا والمخزن راح حاله 😂..
*****
مقعمزة قدام المرايه تشوف للتوكه❤..
<< انتي...اني ياحقيرة تعيطي عليا وتهزبيني تعرفي راجل مايتجرأش يدير معايا اللي درتيه مش بنت..>>
ضحكت..
<< غلطت عارف وعاقبوني باللي تبوه..>>
<< المدير : داير فيها بطل!!
هانيبال: ليش اللي يغلط كيف غلطي يولي بطل!!>>
تنهدت من وسط قلبها💓....
<< شن اسمك..
جاوب: هانيبال...>>
هي بعيون يلمعوا تنهدت مرة تانيه وقالت : هانيبال❤
"وبدينا نتنهدوا ونقولوا في اسمه بحنيه"..
تلخبطتت عروبه شدت التوكه بإيديها الزوز من الإحراج..
عودة قعمزت ع السرير: والله عارفه من الأول..
عروبه شبحتلها وجهه نار من الخجل: شن عارفه!!؟؟
عودة بضحكه: بصراحه هو سمح وشخصية وطويل وعريض..
عندك علم انك واصله لعند نص ذراعه لما صبيتي حداه في الإدارة..
عروبه 💓💓💓: وانتي وين ريتينا؟!!
كنت واقفه في الباب لما خشت عليكم ابله ابتسام انفتح الباب وشفتكم واقفين قدام المدير...بعدين جت ابله هاديه ورفعتنا الفصل اني والبنات..
عروبه رجعت شافت للتوكه..
عودة: بس من جد منظرهم يوجع وهما مروحين اليوم..
عروبه بمكابرة : لايوجع لاشي يستاهلوا وهو اكثر منهم ياريتهم كسروله كرعيه...
وناضت بالتوكه من حداها وطلعت من الدار ...
عودة بضحكه: وحق الله طاحت فيه ع زومتها 😂..
*****
الساعه 5عصرا...
طرابلس....
خليني اني نديرها ...
خيري : قعمزي انتي واسكتي...
مشي للكوجينه بش يطيب الكبده...
لمرته الحامل واللي دمها ناقص....
زينب جاته وقالت بضحكه :والله ماحسيت بروحي..
خيري وهو يغسل في الكبده: اهمال يازينب زي العاده ديما هامله روحك..
ابتسمت: اسفه..
شبحلها وضحك وحرك راسه يمين ويسار
زينب وهي تشوفله"ع خاطرك مستعده نتحمل كل شي❤"
خيري بعصبيه مصطنعه : شن واقفه تشبحيلي بري قعمزي قلنا ..
ضحكت وطلعت من حداه مشت لبناتها اللي كانوا يلعبوا قعمزت حداهم وتنهدت وقعدت تتفرج ع التلفزيون...
****
في الليل....
غاليه : بري بسرعه بسرعه جيبي منها طمطمه وتعالي..
حميده : والله يركبني اني القمل عادي؟!!
غاليه : انتي لابسه محرمه عادي..
حميده : وانتي مش لابسه محرمه؟!!
فاطمه بعصبيه: تي تحركن ياكلبات....
حميده تأففت : هاني ماشيه..
طلعت وتوجهت لباب الحوش وهي طالعه خطموا قدامها عمر يجري والهادي يجري وراه...
حميده: قد مايعطي باللطف...
كملت طريقها شبحت فوق لقت هانبيال مقعمز ع الحاشيه فوق السطح ويشبح فخوته كيف يتجاروا ويضحك..
ضحكت وكملت للحوش ..خشت..
حميده: سعيده...
"في الكوجينه"...
مشتلها وخشت..
حميده : عندك طماطم..
سعيده: في الثلاجه ..
حميده مشت للتلاجه فتحتها خدت منها كم طماطمه...
سكرت الباب وشبحت للروشن وانصدمت..
سعيده شبحتلها : قصدك ماريتيشي..
حميده ترعش ووجهها من لون اللي شادته في ايديها..
خليفه بضحكه: شنو حالك يابنت عمي..
حميده وهي ترعش: الحمد.. لله ..
طلعت تجري طاحت منها طماطمه مالاحظتش...
كملت جري ...
ويجي يهفها عمر اطيح ويطيح الطماطم..
هانيبال من فوق : عمر ياثور...
عمر: هيا طلعت قدامي
الهادي جاها: حميده...
ناضت وهي تبكي وجبهتها دم...
جاهم خليفه ومعاه سعيده..
خليفه بخوف : ياساتر ياساتر خيرها...
سعيده: جبهتها دم...
شويه وجاهم هانيبال اللي نزل فيسع من فوق: تعالي حميده...
شدها وقعد يمشي بيها وهي تبكي وخليفه يشبحلها: متبوش تنتوره ولافاشه؟؟
الهادي : عندنا ..ولحق هانيبال وحميده...
سعيده قعدت تشوف لخوها كيف ملهوف وخايف وبدت تسحن..
سعيده : هيا تعال...
خليفه شبحلها وهز راسه بإيجاب ومشوا مع بعضهم لحوشها وهي تشبحله مرة مرة برفعة حاجب وتسحن ...
داخل...
فاطمه :وانتي وين عيونك...
هانيبال وهو يداوي فيها : الفرخ عمر هو الغالط..
عمر :والله ماريتها..
هانيبال : اللصقه ياهادي..
مدهاله الهادي ..
وحميده تبكي..
هانيبال : ياسر بلا دلع فرخات مافيك شي..
غاليه : ايه حميده ساهله...
حميده ببكي : ماه مش فروسكم..
هانيبال : ضمي فمك...وصبي عدي امسحي خشومك..
غاليه ضحكت وحميده ناضت من حداهم..
ناض هانيبال ومشي للحمام..
"هانيبال جاف ولسانه حارمع خواته..لكن حنين وقت يحتاجوه ومش غير خواته اي حد يحتاج مساعده مايقدرش يرده ولا يوقف يتفرج عليه ومايديرله شي بش يساعده"
🍁ليلتها...
خليفه مسكين ماقدرش يرقد يبي يعرف شن صار فحميده ومش عارف كيف يطمن عليها...
اما هي..
غاليه بضحكه: عليك هبله..
حميده :شافني بهالمنظر والقفطان متاع امي منظري يبشر بعام الفقر...
غاليه؛ كان يبيك حق يرضى بيك كيف ماكان شكلك..
حميده :قصدك انتي عادي يشوفك حميدا بالمنظر هدى؟
غاليه : حيه عليا!!
حميده :هاه ريتي..وبدت تبكي مرة تانيه ..عليك حشمه عليك عار...
....
حميدا وخليفه في المربوعه..
حميدا: خيرك؟..
خليفه : خيرني؟
حميدا : من بكري وانت ادور هنى وغادي وماتقعمزش خمس دقايق ع بعضهم..
خليفه: شي خليني...وتمدد ع الفراش..
حميدا :خليفه..تعرف نفكر امتى حسن يتزوج بيش نتزوج حتى اني..
خليفه : سيدك وتعرفه لازم ياخد الكبير قبل بعدين حني..
حميدا؛ نفكر ناخدها من طرابلس ونعدي نسكن غادي..
خليفه بصدمه : كيف؟؟
حميدا شبحله: خيرك تعيط؟
خليفه بصدمه: كيف تاخد من طرابلس؟؟وبنت عمك؟!!
حميدا : من بنت عمي؟؟
خليفه ناض قعمز: حميدا ماديراش جوك هدى فاهمني..
حميدا بلامبالاة : بنات عمي يقعدن بنات عمي وربي يبعتلهن نصيب كويس..
خليفه: حميدا صدمتني راك!!
حميدا: اني راجل متعلم ونبي وحده كيفي متعلمه مش وحده يدوب تعرف تكتب اسمها..
خليفه: باهي دامك ماتبيهاش ليش جو النظرات والحركات متاعك عشم ولايا هدى!!
حميدا :ايااه ياشيخ انت ..ترا بالله اندمر الغالط اللي يهدرز معاك ..
وعطاه بظهره ورقد وخلاه مصدوم وموجوع على بنت عمه غاليه..
🍁🍁🍁🍁🍁🍁
تاني يوم..
الساعه 7:30صباحا..
في السيارة...
عروبه : عمو حطنا هنى..نبوا نتمشوا شويه..
عودة ابتسمت..
عمها : تمام ..اساسا الطريق مش طويله من هنى لعند غادي..
وقف السيارة..
عروبه بإبتسامه : شكرا عمو..
ابتسم عمها..
نزلوا الزوز...
وعمها مشي..
عروبه شبحت لأختها لقتها تضحك غيرت وجهها عنها وهي شاده ابتسامتها...
من جهة تانيه..
هانيبال: دلع ياسليمان والله دلع كرعيا من امس امورهن تمام ومافيهن شي..
سليمان بتهكم: ماه انت الرجل الأخضر مش كيفنا..
هانيبال:😒...
فاتت من حداهم سيارة عم عروبه اللي هانيبال حفظ شكلها وصوتها..
قلبه تلخبط بالمرة ...
وجهه تغير من الشعور اللي حسه بلع ريقه..
وصلوا للمدرسه..
بانت عليه جايه مع اختها وصاحباتها معاهم كانوا يضحكوا..
هي شعرها كان مطلوق وريح بسيطه تحرك فيه..
منظرها خلا قلبه يدق بعنف💓💓..
سليمان: وراس روماريو تفكنا من المشاكل ع صبح ربي.
"روماريو لاعب برازيلي..وهانيبال يعشق منتخب البرازيل🇧🇷"..
هانيبال : امشي امشي 😒
كل منهم وصل للباب متاع قسمه..
هي شبحاته..
قعدت واقفه تشوفله وقلبها يرقص رقيص💓💓💓
قرن حواجبه ولبس طاقيته وشقلب عيونه وخش وخش وراه سليمان...
غزاله : هههههههه عروبه خشي..
عروبه بإحراج : تاااافه ومتخلف 😣..لمت شعرها بستريشه وخشت وهما خشوا وراها ويضحكوا...
*****
الساعه العاشرة صباحا..
سرت..
بنعدي ناخد عمار من المدرسه واني ماشي..
كامله: القايد وصل الصبح..
مختار :ايه...
كامله : باهي امتى مروحين..
مختار : في الليل..
كامله : باهي عدي مربوحه...
طلع مختار ...وتوجه لسيارته ركبها وتحرك....
مشي للمدرسه...كلم الغفير وهو في السيارة...
مشي الغفير..
حوالي 7دقايق وعمار كان جاي..
ركب السيارة: السلام عليكم ..
مختار بإبتسامه : وعليكم السلام..
عمار: ان شاء الله خير ياباتي؟!
تحرك مختار وهو يقول:القايد جاي اليوم ل*****
عمار ابتسم بفرح...
مختار بضحكه : لما عزمني ****خطرت عليا وقلت لازم تعدي معاي..
عمار بفرحه : ايه بس ياباتي مش لابش حاجه تناسب جيته..
مختار بضحكه: بالعكس هدى اللبس اللي لازم يشوفك بيه..
عمار ابتسم وشبح القدام...
"عمار يشوف في معمر قائد ورمز نضال وغير هكي هو منهم وهالشي مخليه يحبه بزياده
في ناس هكي عمرها ماشافت عيوبه ممكن لإنهم عاشوا في وضع مايخليهمش يشوفوا فيه غير الحسنات وممكن ماينلاموش🍃"...
*****
الطالب سليمان عبدالله ولي امرك لوطا..
سليمان : هدى حسن...شبح لهانيبال..الليل نتلاقوا ونخبرك شنو يصير .
ابتسم هانيبال وهز راسه بإيجاب ..
وسليمان خدي شنطه المعبيه كتابات عطوهولهم اليوم وطلع...
المدرس : ودلوقتي خليكم معايا هنا...
....
الأبله تشرح وهي مش معاها بكل تفكر فيه وخلاص..
مش قادرة اطلعه من بالها لثانيه وحده..
خداها من نفسها من اول مرة شافاته فيها وتوا لما جمعهم.القدر فمكان واحد زايد سيطر علي كل شي فيها
الابله: وتوا اكتبوه اللي ع سبورة بسرعه...
استاقضت وركزت ع كراستها وبدت تكتب....
🍃🍃🍃
وفات الوقت وجي وقت المرواح...
البنات طلعوا..
وهي كالعاده تراقب في باب الولاد...
شويه وفاتت من حداهم امال تمشي عادي ..
فجأة انقطع حزام الشنطه ..
امال بصدمه: حي عليا ياهمي كيف ندير!!؟افففف...
حضنتها وقعدت تمشي بيها ع طلعته هو وسالم شافها...
لقاتها تعاند فيها..
" امال رقيقه وبالنسبه ليه قزمه 😁"..
قدملها...
هانيبال بدون مايشوفلها : جيبيها..
هي لما سمعت صوته وقفت وشبحتله وقريب اطير من الفرحه: مانبيش نثقل عليك..
هانيبال مدلها شنطته: ارفعيها معاك وهاتي شنطتك..
ابتسمت..
هو حط شنطته جنبها..وخدي منها شنطتها اللي مدتها وقال: تحركي روحي..
ابتسمت ولفت ومشت وقلبها يرقص من فرحته...
وهو ولا لصاحبه..
وهو ماشي شبح لجهة البنات لقاها واقفه تشوفله هي واللي معاها غير عيونه وقلبه رجع تلخبط ..
وصل في صاحبه سالم وعمر معاهم اللي كان مع عروبه ع الخط....
عروبه بصوت مخنوق :شكله حتى هو يبي بنت عمه..
غزاله : ايه شكله هكي..
عودة شبحت لأختها لقت عيونها معبيات دموع ..
شويه ووصل عمها..
مشوا للسيارة..
ركبوا...
وعروبه فمها يتقوس وسكراته بشده بش ماتبيكش...
واختها اللي مقعمزة وراهم لاحظتها...
🍁🍁🍁🍁🍁
هانيبال وامال وصلوا للقطعه..
امال : خلاص هانيبال هاتها..
هانيبال : عدي قدامي..
أمال ابتسمت وهي مش عارفه وين تحط فرحتها تشوف فيه كيف حاضن الشنطه قالت فنفسها "ياريتني مكانك😍"..
تنهدت وكملت طريقها وهي تمشي معاه..
فاتوا من حدا حوش عمها..
شافتهم حميده من روشن الدار القبليه تفاجئت : حي غبارة...
ولفت ومشت طول لغاليه..
خشت للكوجينه ..
حميده : خوك مروح مع أمال من المدرسه..
غاليه : من خوي!!!
حميده : هانيبال...
غاليه بصدمه : كيف؟؟!!!..
ع خشت عمر.: السلام عليكم ياقوم..
شداته حميده : شن عنده هانيبال مع الفرخه امال؟!!
غاليه : تكلم هيا!!
عمر بضحكه: شنطتها انقطعت ساعدها بس...
حميده خبطت ع رجليها : خلاص ع هانيبال السلام..
غاليه : ياغبيني وخلاصصص..
عمر : هههههههههه عليك مهبولات...نقوللكن..
حميده وغاليه شبحوله..
عمر بصوت واطي: خوكن مش شورها..شور عرب اخرين..
رفعوا حواجب بإستغراب وقالوا مع بعض : هانيبال!!!
عمر : ايه هانيبااال...
خدي طاسه وطلع برا عبا طاسة ميه من الطرمس ويشرب فيها..
وحميده وغاليه يشبحوا لبعض وهما مبتسمات بإستغراب..
....
هاتي..
امال بنظرة عيون دبلانه: شكرا واجد..
خدي منها الشنطة بقوة بعد عطاها شبحه ناريه 😂
ومشي..
هي تنهدت وخدت شنطتها وقامتها وهي تشم في ريحته فيها وقريب تهبل 💓💓💓💓💓💓
******
الساعه 6مساءا..
من لما روحت وهي خازنه في الدار راقدة ع اساس تاعبه
لكن هي كانت طول الوقت تبكي...
سن مراهقه طبيعي المشاعر تنجرف بقوة هكي..
كانت تنحرق بالغيره ..
مش رايح من عيونها منظره وهو شاد شنطتها ويعطي فيها فشنطته...
كانت تبي ادير اي شي بش تبرد ع روحها ..
برغم ان مافي شي بيناتهم ولا اي شي...
بس هي كانت في هاللحظه تتصرف بمشاعر وكأنها مراة وراجلها خانها...
"معروفين مشاعر المراهقين ديما اوفر 😁"...
شويه وناضت..
مسحت دموعها وطلعت من الدار...
شافتها اختها اللي مقعمزة تتفرج ع التلفزيون في الصاله كيف ماشيه جهة وسط الحوش..
وقفت عروبه ع طاولة التليفون...
وقعد تلف في ارقام التليفون وحده ورا التاني وهي فقمة العصبية...
حولت صبعها ...
قعد ينادي ينادي...لين انفتح الخط...
عروبه : الو ابله عاطفه شنو حالك........الحمدلله......شنو حال عمي والباقي......اممم....الحمد لله.....كويسين........سلمك ابله عاطفه.......ابله عاطفه بنقولك...هايل قاعد............باهي ترا عطيهلي....
....يتبع....
