#العشق_المتمرد
🍃🍃🍃❤❤
ومر من هداكا اليوم 5ايام...
والقلوب اللي خشت عالم الحب عايشه المشاعر الحلوة والوصل بالنظرات بس..
اول مايجوا...وفي المرواح..
وبدي السرحان يزيد...
والتنهيدات تتبعها تنهيدات...
واللهفه كل صبح تزيد....
وكل منهم عايش في مرحله حلوة من حياته..
والمحيطين بيهم بدوا يلاحظوا عليهم...
🍁الجمعه ..
الساعه6:00مساءا...
كانت اول ايام شهر 10...وقت اللي كانت الدنيا تبدا تبرد من هداكا الشهر...
مقعمزين يتفرجوا ع التلفزيون..
والأم مركزة ع وضع بنتها اللي تغير..
امانه بهمس وهي مقربه من ودن عودة:شن دايرة اختك في المدرسه..
عودة شبحت لاختها وردت بربكه:شن بدير يمي عادي تقرا وتروح..
امانه شبحت لعودة بربع عين حستها ارتبكت : اكيد..
عودة ضحكت بربكه :اكيدين..
شبحت للتلفزيون...
وامها توزع في النظر بين بناويتها..
رفعت حواجبها ونزلتهم وشبحت للتلفزيون..
ومازالت عروبه سرحانه💕💕💕💕💕💕💕💕
🍁🍁🍁🍁🍁🍁🍁
وهو مازال سرحان ومبتسم ع جنب....
والخرفان يبعبعوا بحداه يبوا يتعشوا مساكين وهو واقف وايديه فجيوبه وسااااارح 💕💕💕
لعند ما..
"هانيبااال"..
هانيبال😨...عكرش وجهه ورجع ملامحه للحده وتلفت:نعم..
رمضان:عشيت الشواهي.
هانيبال لف وشبح للخرفان: احمم..تو ان شاء الله..
رمضان : سقد روحك...ومشي...
هو قعد مع بوه بعيونه لين بعد..تنهد ومشي يوتي الكسبه🌾🌾🌾
🍁🍁🍁
مقعمزات حد الفرن مع بنات عمهم..
سعيده: لا ان شاء الله ولد...
غاليه "ماهو نجاه جابتهم تلاته ولاد ع بعضهم😒"..
حميدة: خاطري تجيبي بنت وتجي كيف رمزي..
امال : ماظني مازال تجيب كيف رمزي...
سعيده برفعة حواجب: ليش ياحنه وبعدين خيره توفيق..
غاليه بضحكه:سمح توفيق..لكن مش كيف رمزي اشقر وحتى من عويناته رصاصيات كيف عيون عمتي الله يرحمها...
حميدة:توفيق فيه من ديداي حدهم...
سعيدة وامال شبحولها برفعة حواجب..
سعيدة؛ وشن خلا ربي ماعطاه كان جي يشبه لجداه حدهم..
ضحكوا الزوز...
غاليه بضحكه:شن قالت هي بس ...
امال بمكر: توفيق فيه واجد من خليفه...
حميده وجهها ولااحمر لكن حاولت ادير روحها عاديه...
سعيده: خليفة سمح ما عندكن ماتقولن فيه..
غاليه حست ان في تلقيح فالكلام : كلهم سمحين ياحنه خلاص..ان شاء الله يجيك عيل كيف ماتبيه.
ابتسمت سعيدة: إن شاء الله....
وامال مازال تشبه لحميده فشبحات مكر...
وغاليه مركزة معاها...
******
قاعدة في حوش عزوزتها..
لمة الجمعه مع السلفات والحموات ..
وياآاااه من الحموات اللي زي حمواتها🦂🦂🦂🦂🦂🦂
سم خالص...
هي في الصاله تهدرز مع سلفاتها...
وفي الكوجينه...
نجيه : ماما مريم كولي..
كلت مريم من يد امها الشمعدان"تذكروه اكيد"...
رانيا كانت معاها جي فخاطرها وزي اي عيل فسنها تصرفت هالتصرف..
جت لعمتها : عطيني..
نجيه دفتها : بري غادي ...
رانيا حرجت من الحركه..ولما تحرج تهاجم طول..
رانيا ودموعها معبيات عيونها : بلي...ياماااال ياأوووأووو...
"بري ياحمار ياهوهو"..
نجيه فهمتها: تعالي جاي ياقليلة الربايه..
فاتت تجري رانيا خشت الصاله جت ورا امها..
ونجيه هادة ...جبدتها من ورا امها..
زينب:غير شن دارت يانجيه..
سلفتها نجيمه :خيرها يانجيه..
شحت رانيا من ذراعها:فرخه قليلة ربايه...وقرصتها بغل..
رانيا قعدت تعيط..
ناضت زينب زي المجنونه دفت نجيه وخدت بنتها وقعدت تقول بعياط: حراااااام عليك حراااااام...
طلعت العزوز تجري من دارها...والبنات جوهم...
مبروكه تشبح لرانيا كيف تبكي بعياط وامها حاضنتها وتبكي: شنو في خيركم...
نجيه :اسمعي يام من الأخير لما اني نجي خليقة زينب وفرخاتها معاش نبي نشوفهم ولا والله الحوش معاد نعفسه..
هناء: شن درتي تاني وحني مانعرفوا نلتموا معاك ع خير..
زينب : مادرت شي اني ياهناء وانتي تعرفي..واشرت ع الموجودين بسبابتها..وكلكم عارفين..
انتصار حماتها :ايه عارفينك وحده لسانها ملوي ع رقبتها...
زينب :بارك الله فيك..ومشت خدت جلابيتها وشاربتها ولبستهم وخدت بناتها وبتطلع..
عزوزتها : كان بتجي مرة تانيه تعالي فيوم البنات مايجوش فيه..
وقفت وقالت : حاضر ياعمتي...وخدت بناويتها وطلعوا..
رباب كانت تشبح لعماتها بحقد..ورانيا مسكينه قاعدة تشهق بعبرتها...
طول الطريق كانت شادة دمعتها..
هدا حالها مع عزوزتها وحمواتها...
اللي هما نفسهم عمتها وبنات عمتها ...
زي مايقولوا وين دمك وين سمك...
وع الغالب هالمثل ينطبق علينا جميعا..
وصلت لحوشها فتحاته وخشت هي وبناتها...وصكرت الباب..
حمزة كان يكتب في الواجب في المربوعه سمع صوت رانيا تبكي..
جاهم...
حمزة : خيرها رانيا ياامي..
زينب : تعاركت مع الصغار..برا كمل واجباتك..
ومشت خشت لدارها....
🌴🌴🌴🌴🌴🌴🌴🌴🌴🌴🌴🌴🌴
محمد اكتب هيا..
محمد بتذمر:باااهي...
الهادي يدهور في الجردينة ومحمد مقعمز حداه ويكتب في الواجب...
جاه ميلاد :هادي
التفتله : نعم..
ميلاد: تعال شوي
قدمله الهادي وهو مستغرب :خير
ميلاد:مانحصلش عندك سلف 50دينار...
الهادي :والله كلهن...كلهن 30دينار اللي نتكسبهن...
ميلاد مط شواربه بضيق..
الهادي:تبيهن خودهن...
ميلاد: لالا خليهن معاك تو نتصرف...
الهادي :وحق الله وحق الله ماضال الا واخدهن..خليك هنى..
طول مشي ركب فوق يجري..
وميلاد حاس بإحراج شديد..الحكايه ضايقة عنده وتحشم يطلب من نساباته..
وسعيده ماترحمش..تبي كل شي ومن احسن الأنواع..وكان قصر تشغله الدسكه متاع البكي وياقهرتي وياعازتي والحوش وما الحوش...
وهو حاس بإنه عاجز ومقصر معاها..
نزل الهادي وجاه: خود..
خداهم بالسيف ووجهه فلون تاني: ماقعدلك شي...
الهادي ابتسم:مش مشكله صغارك اولى بيهن..
ابتسم ميلاد :تو نردهملك قريب..
الهادي هز راسه بإيجاب وهو مبتسم..
مشي ميلاد...
والهادي تلفت ع محمد لقاه يلعب :محممممد...
🍁🍁🍁🍁🍁
الساعه 10ليلا...
"زيييينب"
طلعت من الدار وجاته للصاله..
زينب:شنو...
خيري وهو يوريلها فذراع رانيا :شن هدا؟..
زينب ماتبيش المشاكل ردت وقالت بربكه: بنتك موليه شيطانه طلعتني عن طوري قرصتها..
رباب : لالا عمتي نجيه..
زينب قدمت بسرعه وصكرت فم بنتها..
ناض خيري خدي رباب من زينب: قولي يابابا شني..
رباب:عمتي نجيه قرصت رانيا ...
خيري شبح لزينب:علاش ماتبيش تقولي..
زينب:معاش عندي حيل للمشاكل ياخيري عييت..
خيري تنهد وقال : باهي ..دخلي البنات ورقديهم...
زينب هزت راسها بإيجاب :باهي..وبالله خيري شوف حمزة كان راقد من غير غطا غطيه..
خيري: باهي غير خشوا ارقدوا ..
خشت زينب اللي فداخلها غصة هيا وبناتها للدار..
وخيري مشي للمربوعه يشوف ولده ..غطاه كويس وقعمز ع المندار وهو يفكر يحط حد لخواته وتصرفاتهم مع زينب وصغاره...
🍁🍁🍁🍁🍁🍁
عروبه شن تكتبي..
صكرت الكتاب وهي متلخبطه :شي..
عودة بضحكه: قريتي وصار اللي صار...
عروبه ابتسمت بخجل: باهي ضمي فمك..
عودة تنهدت بإبتسامه: عروبه...تحبيه💕
عروبه: ارقدي واسكتي 😳
عودة بتوسل :بالله عليك عروبه احكي ...
عروبه: شن بنحكي يافاضيه😳..
عودة : واااااااك عروبه درهتيلي كبدي..قولي نحبه شنو فيها!!!
عروبه غمضت عيونها وقالت في مرة وحده :ايه نحبه تريحتي ...💓
عودة: ههههههههههه...منظرك مش عادي..🤣😂😂
عروبه فتحت عيونها ووجهها نار من الخجل: الحق مش فيك..
رقدت وعطتها بالظهر وتغطت وقلبها 💓💓💓💓...وتضحك بكتمان..
عودة : راك تنسي غدوة البسي المحرمه الزرقا الكحلي..ههههههههه
عروبه تضحك ع الهزاز...وعودة كملتها تسهويك وضحك..
*******
الساعه12ليلا
راقدات في الدار وامهم في وسط الحوش حدا المسدة..
غاليه..
غاليه: همممم...
حميدة : نايضه..
غاليه : لا..نرد عليك من الحلم..
حميدة:باهي ياصامته اسمعي.
غاليه :هممم..
حميدة:بقولي بنات عمك مستاقظات لينا ولخوتهن..
غاليه فتحت عيونها : ويستاقظن شنو يعني..
حميدة : مش عارفه ..حسيتهن كيف اللي مش عاجبهن..
غاليه: طز فيهن ومادورهينش المهم خوتهن...
حميدة تنهدت: واه منه خوهن💓💓
ضحكت غاليه :حميدا اليوم بعتلي شكلاطة ورد مع رمزي..
حميدة ناضت:ياكلبه !!!وماتقولي.
غاليه بضحكه: كليتها بسرعه هانيبال كان في الحوش معاش عرفت كيف نديرلها..
حميدة: يبعتلك مرة تانيه دسيلي.
غاليه : لاياحنه قولي لخلوفه يجيبلك..عطتها بالظهر ..
حميدة: سمممم ياكلبه....
********
سرت💓...
مكالمه هاتفيه☎️
هندا حبيبتي...وراسك شهر العسل نديره نديره...
هندا بزعل: انت تمشي فيها عليا يامحمود قلت بتعدي تشوف امورك في التشيك..وتروح ع قرب العرس..وبعد العرس نطلعوا لمصر شهر عسل برغم اني كنت نبي غيرها لكن ع خاطرك تنازلت وتو تقولي حتى مصر مافيش؟!!
محمود: ياعمري حتى التشيك سمحه وفيها اماكن حلوة غير نتزوجك وتشوفي بروحك..
هندا ساكته وتسحن..
محمود: هنودتي...
هندا :امممم..باهي..بس هاه مازلت زعلانه ودبر كيف تراضيني..
محمود بضحكه: اني اللي نعرف ياحب محمود انتي
هندا ضحكت بخجل💓...
....
في دار تانيه من نفس الحوش..
💓عمار...
كان مقعمز يقرا....شويه وطلع كتابه..وقعد يفكر
فراسه هلبه حاجات يبي يديرهم...ومش باله القرايه زي ماحلمه فإنه يكون ضابط عسكري ليه رتبه كبيرة في "قوات الشعب المسلح" مسيطر ع تفكيره...
تنهد وقال: غير امتى تعدي هالسنه...
🌴🌴🌴🌴🌴🌴🌴🌴🌴🌴🌴🌴
🌅وطلعت يامحلا نورها...
شمس الشموسه ..يلا بينا نملا ونحلب لبن المعوزة ههههههه
غاليه كانت تغني وهي ماشيه تحلب العنز...
طلع من الحمام الخارجي..
شافها كيف خشت للزريبه..
كمل مشي وهو يمسح في وجهه..
شبح القدام لقي امال جايه من الفجورة لحوش اختها ..
ضحكتله وقالت:صباح الخير ..
هو وبصوت مبحوح :خير..
لحقاته : هانيبال...شويه بس..
هانيبال وقف بدون مايشبحلها: شن تبيي!؟
امال : احممم..بنقولك..البنت هديك...الفلسطينيه..
هانيبال شبحلها بحده.
امال: راهي تبي ولد عمها وهو يبيها ومخطوبين لبعضهم قالتهالي اختها و.....
هانيبال بعصبيه:ضمي فمك ضمي ضمي وهو يأشرلها بيده ومشي وخلاها....
هي ابتسمت بمكر...وولت لحوش اختها...
ع طلعة غاليه من الزريبه كانت تشوف فيهم...واستغربت...
🍁🍁🍁🍁🍁🍁🍁🍁
حلوة عودة🙈
عودة: قمممممر 💕💕💕💕
عروبه ابتسمت بخجل..
طلعوا هما الزوز...
وامهم وراهم..
امانه: كان تعقلي كيف اختك وتتحجبي..
عودة: يااااارب ابعتلي من يحجبني..
عروبه فنصت ونخصتها..
امانه: كيف يبعتلك من يحجبك؟!
عروبه بربكه : قصدها صاحبات كيف صاحباتي..
امانه : ااه..
عودة: ياربي عطيني صاحبات كيف صاحباتها..
صوت كلاكس🔊...
عروبه تجبد فيها : اطلعي اطلعي..
طلعت عودة وهي تضحك...💕
🍁🍁🍁🍁
ماشين بطريقهم للمدرسه..
سليمان : يشكر فينا لحسن وقال يخدموا صح..
هانيبال ساكت..
سليمان شبحله لقاه سارح وملامح وجهه تبان عليهم العصبيه..
سليمان:خيرك هانبيال..
هانيبال بصوت مبحوح :شي..
سليمان : خيره صوتك من بكري لاحظت فيه البحه..
هانيبال حط يده ع رقبته: شكلها بردة..
وصلوا للمدرسه..
كانت عروبه بتخش..
استنت كالعادة تستفتح دوامها بنظره منه ..بس هالمرة تجاهلها وخش..
هي استغربت واضااااايقت لين خلاص والدموع تجمعوا فعيونها...
🍁🍁🍁
طول الدوام وكلام امال يلعب فراسه...
ويقول لروحه ..هدا علاش يجيها ...اكيد ولد عمها اولى بيها..
مش حتفضل الغريب عليه...
ومن هالكلام اللي يحرقله فقلبه...
🍁اما هي كانت مضايقه هلبه..الحركه اللي صارت الصبح وجعتها خلت عيونها يدمعوا..متعودة بيه في الأيام اللي فاتوا مايخشش الا لما يشوفها..علاش دار هكي هالمرة؟!!...
🍃ومافات هالدوام ...
لين هما الزوز تعبوا من حرق الدم والتفكير...
في المرواح...
طالعه هي واختها والبنات..
عروبه بزعل :واني شن يدريني ياسالمه مش عارفه خيره..
غزاله : مرات صايرة معاه مشكله..
عودة: صح مش ديما بيكون رايق..
في هالوقت..
هو طلع وقبضة يده ع فمه ويكح بقوة...
عروبه قلبها انعصر....
سالمه : كحته قويه شكله مريض...
انصدموا وين شافوها ماشيتله...
سليمان :تروح ادهن رقبتك بالفيكس وتغطا وارقد..
"هانيبال"...
💕نسي الكحه ومايجي منها..ونسي رقبته ونسي هو مني اصلا لما سمع اسمه بصوتها...
وياااه ع رجفة قلبه...اول مرة قلبه يرجف هكي.
رجفة القلب مش ساهله..ومش اي حد يرجفله القلب💓..
بدون مايشبحلها : نعم..
عروبه: آاا..رقبتك..ديرلها ليم عصر..وشاهي اخضر ساخن..
شبحلها بكبر: ومن طلب نصيحتك..
انصدمت فرده..
هانيبال: عدي لصاحباتك وتحشمي مش كل شويه جايه هنى
عروبه قعدت ترعش مع بعضها دموعها طاحوا وقالت بصوت نبرته مخنوقه:والله ماينفع فيك الخير...ولفت ومشت وهي تبكي بالعبرة...
هو كان يلقى يقص لسانه الأحرف ...
قعد يشبحلها كيف مشت لصاحباتها وهي حاطه ايديها ع وجهها وتبكي بالعبرة..والبنات يهدوا فيها..
الموقف الكل كانوا يشوفوله..
شبه المدرسه بدت عارفه ان في شي بين هانيبال وعروبه شن هو بالزبط مش معروف...
من كثر مابكت معاش قدرت توقف وتستنى خدت اختها ومشت تروح ع رجليها ولحقوهم البنات...
سليمان :مشكله لسانك ياهانيبال والغطرسه اللي عندك..
حط هانيبال يده ع فمه بإشارة منه لولد عمه انه يسكت ومشي طول...
وسليمان تنهد ولحقه..
عمر جاهم يجري شد سليمان: هزبها؟!
سليمان : خوك وعارفه...زعيم في الغطرسه والتكبر...
عمر: وبعدين يقعد حارق روحه ونادم..
🍁🍁🍁🍁🍁
انتي اختي ع عيني وع راسي..لكن زينب مرتي..وصغارها..صغاري يانجيه صغااااري..يعني صغاركم..
نجيه عيونها لوطا وتهز فرجلها...
خيري ناض: بتصلحي من نفسك كان بيها بتقعدي هكي نقولهالك من توا راك بتخسريني...فكري فالكلام...
ولف وطلع .....
وهي قعدت فمكانها لين سمعت باب الحوش تسكر..
ناضت طول ومشت للتليفون الأرضي ضربت ع رقم حوش ماليها..نادى مرة ونص..بعدين انفتح الخط...
نجيه: الو.....ايه نجيه ياهناء..ريتي اللفعه مرت خيري شن دارت......
🌴🌴🌴🌴🌴🌴🌴🌴🌴🌴🌴🌴🌴
في الوادي...
ركبوا الشيابين النخل بش يلقطوا التمر هدا وقته..
ولهالسبب القذافي سما شهر 10 بشهر التمور...
"كانت عاجبتني تسميته للشهور"...
المهم...
الحاج رمضان كان راكب ع وحده منهم...كمل الجهه اللي كان ينزل منها في التمر...
جاي نازل ...
رجله زلقت ...ويجي طايح عليها...
رمضان: اووووووه...وووووووك..
وجوه الشيابين يجروا...
الحاج صالح:قتلك اربط عليك حاجه وانت راقي لكن انت ماتسمعش في الكلام...
شويه ...
وجابوله سيارة وركبوه ورفعوه للمستشفى...
🍁🍁🍁🍁🍁🍁
الساعه 2:30ظهرا...
مازال راقده في سريرها ومتغطيه وتبكي ..
جرح قلبها اللي يحبه💓 واهانها مش ساده الأهانه الأولى تلحق عليها هادي..
وقلبها هي مازال صغير ع هالقسوة..ساد مارت من قسوة الدنيا...
برا..
امانه: تس ..في بداية السنى وبديرلي هكي هدي فعقابها تموت من غير سو!!
عودة: غير المدرسه كيف باديه بعدين تتعود..
امانه :اللي يسمعك يقول في اول ابتدائي..
عودة : خلاص يمي وراسك تتغدي ..عروبه تو ترقد وترتاح وبعد تنوض تاكل..
تنهدت امانه وقعدت تاكل بالسيف..
🍁🍁🍁🍁🍁
وحتى هو ماداق الزاد...
ولاقدر يرقد...
كان يسب فروحه...بالذات انه كان غبي لما صدق كلام امال..
عارف انها تبيه واكيد كذبت عليه في اللي قالاته عنها..
البنية جاته ملهوفه وخوفها عليه باين فعيونها..
وهو خلا غيرته وغضبه يعموه ويقابل هاللهفه والخوف بالإهانه والتجريح💔....
قطع عليه سرحانه عمر لما خش عليه في الدار ...
عمر: عمك صالح جي توا وقال سيدك في المستشفى..
فز طول ووقف:خيره!!!
عمر: طاح من النخله ع رجله وانكسرت...
فات طول هانيبال من حداه ونزل لوطا يجري وعمر لحقه...
لقي ميلاد واقف مع الحاج صالح..
خش يجري لبس سوريه عربيه وبعدين طلع معاهم ومشوا كلهم للمستشفى...
🍁انكسرت ساق الحاج رمضان وجبسوها وقعد في المستشفى يومها..
والناس بدت تسمع وتجي...
🍃اتصل ميلاد من حوش عمه...
بخواته وخوه وبلغهم...
ووصل الخبر كذلك لخاله مختار...
اليوم هداكا كلهم تلبكوا...والناس مابطلوش جي لليل...
تاني يوم...
من الساعه 11الصبح..
جو البنات التلاته ...ولحق عليهم حميد...
🍁كلهم ملتمين في الصاله..
زينب ببكي :ربي يهديه وخلاص مازال فيه صحه للحاجات هادي..
نعيمه ودموعها ينزلوا: سيدي والعناد عاد قد ماينصحوه شي
فاطمه : خلاص توا اللي صار صار الحمد لله غير جاته كسر في الساق مش في الحوض..
كفايه:ووك عليا ..لاالحمد لله...
فاطمه : هيا صبن تحركن ديرن الغدي ..
ناضوا البنات ومعاهم الكناين يحوسوا..
يدوب صار تجاذب لأطراف الحديث..
وزينب وسعيده بيناتهم هدوء حذر😁..
🍃بعد الغدي ..
عبدالسلام بيتسقد عنده مهمه في مصراته بيقعد فيها اسبوع
"ضابط امن"...
حميد: باهي كان ماقدرتش تو نروح بيهم..
عبدالسلام صافحه : بارك الله فيك..ولاباس ع الحاج مرة تانيه ..هي السلام عليكم...
ركب سيارته وتسقد...
وطلع من القطعه...
وولا حميد.. كيف جاي بيخش المربوعه..
ميلاد: ياريته حتى صبا عليه في المستشفى..
حميد: بالله ماتكلمنيش عليه بكل..
🍁🍁🍁🍁🍁🍁
مقعمزة ع السرير وتخمم ....
عروبه : حي كان مايكون مريض واجد ورقد في المستشفى..
عودة بضحكه: حالتك عجيبه والله..
عروبه بإنزعاج: وااك عودة بطلي صماته مش وقتك...
عودة: باهي ليش ماسألتيش حد من صحابه..
عروبه: ايه بش يقول عليا كلام ملخبط😒
عودة: باهي اسكتي ماتوجعليش راسي تربحي...
وطلعت من حداها..
وعروبه مازالت تخمم فيه ونست تماما كل وجعها منه همها حاله وبس..
🍁🍁🍁🍁
الساعه4:00عصرا
في الجردينه..
يشبح لولد عمه مرة مرة ...
ع راس لسان الكلام...ويبلع فيه..
بعدين معاش قدر قربله...
هانيبال: احمم..سليمان..
شبحله بضحكه: ايه جت ..
هانيبال برفعة حواجب ووجهه مولي احمر: من هي ؟!
سليمان :هههههه...خالتي برقه...
هانيبال:😒..
سكت وسليمان يضحك..
بعدين قال: احمم..وشنو حالهم..
سليمان بضحكه: كويسن ياسيدي ماماتوش..
ضربه ع ذراعه..ومازال سليمان يضحك..
خشت للقطعه سيارة مرسيدس..
ابتسموا سليمان وهانيبال وقدمولها..
هانيبال بصوت عالي : خالي مختااار...
وكمل القدام..
وحميد وميلاد والنسابات ناضوا طلعوا من المربوعه ومشوا يرحبوا بيه..
هانيبال: فارسها...
عمار: زعيم..
وحضنوا بعض..
الهادي : محمود..وخداه بالحضن..
محمود : لاباس ع عمي رمضان..
الهادي : لا يوريك باس...
.....
خشت حميده تجري : خالي مختار جي...
فاطمه : مختار..ناضت وطلعتله بسرعه...
زينب : هي للكوجينه بسرعه...خل نسقولهم غداهم العصر قريب والناس بتبدا تجي..
سعيدة شقلبت عيونها وناضت..
ولطيفه ناضت...وكانت تراقب في الوضع بصمت...
🍁🍁🍁🍁🍁
الساعه 6العشيه...
واقفين في الجردينه..
عمار :والله اهو ندف فيها..لنقاني ع قولت الشراقه ماعندي ليها جو..
هانيبال بضحكه :هي هالسنه وتفوت تحمل..
عمار تنهد: نتحملوا قاعدين..
...
رمزي :خود اللي من غاديكيا ياحمزة..
حمزة قطف التفاحه: من يبي تاني..
مالك:لالا خلاص كلنا خدينا..
ع جية عمر: سمسام انت وياه..لاتقولوا نتفكروا خالنا بتفاحه..
محمد:مكمله حد غيرك..
عمر : اسكت انت😒..
مالك ضحك وقال:خود هادي زايده..
خداها عمر؛ ياودي زعيم ياولد انت من يوم يومك..
ضحك مالك وكلهم شبحوله بغيرة..
" صغار كانوا كله طبيعي وبريء💕"..
❤وبراءة الصغارة حلاوتها فشقاوتهم..
زي شقاوة رانيا ودلال اللي استغلوا انشغال امهاتهم بالضيوف..
وقعمزوا ع شناطيهم وطلعوا منها المكياج ولوطوا وجوهم
روج ع ظل ع بودرة ع كريمه ...
وعاد مناظرهم خيااال...
خلوا الدنيا مفركسه ..وطلعوا من الدار ...
والكل كان مشغول عنهم...
طلعوا من فم البوابه...
👭وين ماتاخدهم رجليهم بيمشوا...
في الجردينه...
عمار:بتجي وكرعيك فوق راسك..بيني وبينك ياهانيبال..
هانيبال بضحكه: باهي وانت حمقت..
عمار : انت ياراجل ترقي فيهن..
...
عمر:بركت عليه بطحته بطح كان مش من الولاد اللي معاي ره مات بين ايديا.." يكذب😂"..
رمزي : يستاهل الكلب...
حمزة بضحكه:وكان جابلك خوته.
عمر: وخيرني من غير خوت!؟والله كف من خالك هانيبال يدخله غيبوبه..
رمزي :شن هي الغيبوبه..
مروان:ايه شن معناها ؟
حمزة :ترا قول..
محمد: والله ماعارف فيها حاجه يكذب عليكم من بكري..
عمر قام رشادة ومحمد فات يجري..
والولاد يضحكوا....
عمر:جروووو...
لوح الرشادة وجاي بيطلع من الجردينه..
عمر بصدمه:حيييي عليكن حيييي شن دايرات فعمركن انتن..
الولاد ضحكوا..
وحمزة جي شد اخته: شن هدا!!!..
ركزوا هانيبال وعمار ع اللي صاير حداهم...
هانيبال : شن دايرات هدينا..
عمار ركز وضحك...
قدم هانيبال وهو لحقه..
شدهم هانيبال الزوز من يديهم: شن هدى شن اللي دايراته هدى..
رانيا راسها لوطا وخايفه..ورمزي يضحك عليها بشماته..
لكن دلال لسانها اطول منها: متياج..
عمر: هههههههه...من توا يافرخه..
هانيبال:متياج صار..هاتي يدك هنا...شد يدها بيضربها..
خداها منه عمار وقامها: والله ماك ماسها..حاسب امهاتهن
هانيبال: صح ..لكن حتى هني لازم يتأدبن..
عمار : دلال والله مانك قاربها ..حلفت تم..
هانيبال فنص فدلال بمزح: يامعفنه انتي ديما تفلتي..
خافت دلال وحطت وجهها فرقبة عمار..ضحك..
قام هانيبال رانيا وهو يضحك: معاش اديرن هكي مرة تانيه عيب..
دلال بحواجب مقرونه :انت خيي..
عمر: طاح سوقك..
هانيبال برفعة حواجب: هانيبال خي يادلوله..
دلال هزت راسها بإيجاب بطريقه طفوليه ..
هانيبال؛ امال عدي دوري من يلعب معاك ويجيبلك شكلاطه..
عمار : قوليله عدي انت وشكلاطتك عمار يجيبلي..
دلال بفرحه:حقه!!؟؟
ضحك عمار وهو يهز فراسه بإيجاب..
دلال شبحت لهانيبال :انت خيي..عمال حلو..
عمار :اااه ياقلبي...وباسها...
هانيبال : باهي يادلوله باهي..اني صاحبتي رانيا بس رانيا هي الزعيمه..عطيني بوسه..مدتله خدها باسه..مدلها خده باسته..عدي خلاص معاش نحبك..
هي غارت من رانيه..وبش تغيظ هانيبال باست عمار..
ضحكوا كلهم..
عمار: هههههههههه اخرتي بنروح بيها عارف..
هانيبال بضحكه:الشيخ والشهود قبل..
عمار : ههههههههههه...شبحلها..نراجوها تكبر وامرنا لله..💕
🍁🍁🍁🍁
في الكوجينه..
خشت فضيله بنت جيرانهم...وقفت حدا غاليه..
فضيله: غاليه تعدوا للدورة..
غاليه: لينا يومين ماعدينا تشبحي اللي صاير..
فضيله:اممم صح...باهي بنسألك..
غاليه :اسألي..
فضيله:حق انتن متسميات لولاد عمكن؟!
....يتبع...
