#رمضان_احلا_مع_جمان_فريد
#العشق_المتمرد
الجزء16
ودعوا بعض بنظرات عيونهم اللي توعد فبعض بلقاء قريب..
هي ركبت السيارة مع اختها وتحرك عمها....
وهوقعد مع السيارة بعيونه لين اختفت...
كمل ماشي هو وولد عمه...
سليمان بضحكه:من امتى تعرف تمتل انت!؟
هانيبال: من اليوم😒..
ضحك سليمان...
هانيبال شبح القدام وهو يفكر: تو من هما هدوما أيبك وشجرة الدر..؟!!
سليمان بضحكه: تسأل فيا😂
هانيبال وهو يشبح القدام: انت غير اقرا قرايتك قبل ..
سليمان :هههههههههه..
هانيبال: باهي ماتعرفش حد عنده كتب ويقرا..
سليمان :مافيش غير جمعه ولد عيت رجب..
هانيبال هز راسه بإيجاب..
🍁🍁🍁🍁
صدقيني ياسميه لو ع الهادي ياقعادك تراجي..
سميه :بالله عليك فردوس الكلام هدى معاش تقوليه..
فردوس : اني نفتحلك فعيونك ع مصلحتك ياغبيه..
الهادي شن عنده قوليلي..ولو بيكون روحه زي مايقولوا قديش يبي...وكم سنه يقعد يلمهن..غير هكي انتي وياه نداد
لو تزوجتيه مع الوقت تكبري قبله ويدور غيرك الرجاله هنى ماشاء الله مشهورين بالتعدد..
سميه كلام فردوس قعد يلعب فعقلها لكن قلبها كان رافض تماما:اني نحب الهادي وهو يحبني وصادق معايا وعطيته وعد نستناه عمري كله ومستحيل نولي فكلامي معاه..ومشت وخلتها.
تنهدت فردوس ومشت.
كملت طريقها لين وصلت فشخص..
يونس:هاه شن صار معاك.
فردوس :مسكرة راسها ..
يونس هز راسه بإيجاب ولف ومشي..
🍁🍁🍁🍁
خشوا للحوش سمعوا صوت هدرزة ودوشة صغار...
ابتسموا بفرح....
عروبه : سامي ....
خشوا بسرعه ...
وصلوا في الصاله....
سامي ضحك لما شافهم وناض فتح ايديه..
وهما طول جروا لحضنه...
قداش فاقدين هالحضن..حضن الأب..والأخ....
في ظروف اجبروا يعيشوها بعاد عن بعض لفترات طويله🍃..
بعدوا من حضنه..
والخوت التلاته دموعهم كانت تنزل...وامهم تأثرت..
مناسك "زوجته": ماأشتئتولنا💖💖
التفتوا عليها هي وصغارها..
نعمان عمره 4سنوات..وهديل عمرها سنتين..
زوجة سامي سوريه..
بعد احضان وسلام حار يعبر عن شوق طال امده..💕
خشوا البنات ع السريع بش يبدلوا..
سامي وعيونه مدمعات :كبرن واجد ماشاء الله💗
هديل : اي والله واحلوو كتير كمان يخزي العين..
امانه بأبتسامه وهي تحضن فأحفادها : حتى هالحلوين هدوما كبروا وراحوا يهبلوا الله يحفظهم..وقعدت تبوس فيهم..
داخل..
مسرحيه؟!!
عروبه بضحكه: ايه وقام يده بعد شافني قمت يدي..
عودة بضحكه: عليك جو..
عروبه بإبتسامه هيام: احلى شعور حسيته اليوم..قتلك امس كان احلى يوم فحياتي ..لكن لا اليوم هو احلى يوم فحياتي💖
ضحكت عودة...
💕كل يوم مع اللي يحبه القلب يكون احلى من اللي قبله..
لين يولي هو نفسه احلى حاجه فحياتنا...ومن غيره حياتنا..
لاليها..
لون...ولاطعم....🍃
🍃🍃
ويمر باقي اليوم...
ع عروبه وهي عايشه جو لمه عائلي مايعيشوش فيه ديما..
كان يغتنموا في كل تانيه ليهم مع بعض بش يشبعوا من بعض وكان الجو ولا أحلى💕💕
💕💕اللمه نفسها اللي عايشها هانيبال وهما مقعمزين في وسط الحوش بعد تعشوا...
ويسمع لهدرزة خوته وخواته وامه....
وهو يلاعب في الصغار اللي ملتمين حواليه...لكن عقله كان يسرح مرة مرة في شجرة الدر💕
عكس سرحان الهادي ..
اللي حس ان حبيبته متغيرة معاه اليوم وتتعامل معاه فوق من نفسها..سألها وإجابتها ماأقنعتاش لما قالت تعبانه من الخدمه...
اول مرة هكي تتعامل معاه...وهالشي خلا جو ينقلب 180درجه...
كانوا الأولاد قدامه يلعبوا..
ورمزي كان معاهم...
عمر كان مقعمز يبصر ويضحك زي عادته..
عمر : والله شبحتي فيك شبحه انت بتجي كيف عمك هانيبال..
هانيبال شبح لرمزي اللي كان يشبحله ..ابتسم وغمزله ورمزي ردله الإبتسامه..
غاليه بضحكه؛شن اللي خلاك تشبهه بيه؟
عمر: يتشابهوا فحاجه..فيهم حنانه لكن لساناتهم حارة..
كفايه بضحكه: رمزي لسانه حار...
عمر:مش تشوفيه صغير هكي ومتكمش فبعضه قدامكم راهو غير متحشم بس..
ضحكوا..ورمزي زاد تحشم...
حميدة: باهي وعماد كيف مني؟
عماد: اني بروحي مازيي حد..
ضحكوا كلهم....
هانيبال بضحكه: لاياغالي وراس كيفو انت كيف الشرموله بين امك وخالك عمر...
كلهم:😂😂😂😂😂😂
كفايه بضحكه: يجي فرفوشي وضحاكي مش معقد زي بعض الناس..
هانيبال:😒
حمزة بضحكه : باهي واني...
عمر:لاانت كيف خالك الهادي طيب لين درويش وقلبه خفيف..
طبعا بصارة عمر معروفه ثقيله في بعض الأحيان وكلهم يمشوله عادي لأنهم تعودوا عليه..
بس اللي صار هالمرة مع الهادي شي ماصارش قبل بكل ...
عمر كان مقعمز قريب عليه..
يمده بكف..صوته يصدح في الصاله...
لحظه صمت ..كانوا فيها كلهم مصدومين ومش مصدقين اللي صار...
عمر كان يشبحله بتفنيص...
الهادي ناض وقف:واحد تافه...ومشي طول طلع من حداهم.
وهانيبال معاه بعيونه....
بعدين التفت لخواته : هدى خيره...
زينب بصدمه:شن جاه !!؟
عمر بعد وزع نظره عليهم ناض وطلع من فم البوابه...
فاطمه:حتى هو بصارته مالغة الولد هدى..
حميده: لكن مش لدرجة يضربه يمي..
هانيبال وهويشوف لمروان ورانيا اللي كان يلعب فيهم:تصير تصيرعادي...
🍁🍁🍁🍁
وعدت هديكا الليله...
زي كل الليالي...بهدوئها وصفائها..
هديكا الأيام حسنتهم الوحيده هي الهدوء اللي كانت تعدي بيه...
وبصراحه هالحسنه بكل الحسنات🍃...
وطلع صبح يوم جديد..
🍁الساعه 11صباحا...
يوم الجمعه..
البنات بيروحوا العشيه...
قعدوا يوتوا فحوايجهم وحوايج صغارهم..
كفايه : حميدة ...
حميدة كانت تتفرج التفتتلها:نعم...
كفايه قربت منها وهي تمشي ع ركابها:خودي..
حميده بضحكه::المكياج اللي عطيتهولنا فعرس حميد قاعد..
كفايه:خودي واسكتي..هدا حاجه صح ره...
حميده :والله واجد ياكفايه..جبتيلنا لبسه لبسه اني وغاليه ومكياج والله واجد..
كفايه : شن هو اللي واجد بالله عليك!!البسوا واهتموا برواحكم شويه..
حميده ابتسمت وهزت راسها بإيجاب..
ناضت كفايه بتولي للساكو:وبعدين مازلتوا تمشوا للدورة ولا؟
حميده بضحكه؛ قديش لينا عليها الله اعلم مازال تقبل بينا ولالا اللي معانا فاتونا تو..
كفايه:لالا انتم جيران ماطلعكمش تو ادبرلكم..ايه قوليلي امتى عرس مجبورة بنت عيت رحومه؟
🍁في الكوجينه...
غاليه :كوليها هيا قبل امك تجي..
رمزي واقف ع الروشن من برا: هههههه..
غاليه ضحكت..
ورانيا تاكل في الشكلاطه بنهم...
غاليه بمزح: سمحه رانيا يارمزي؟..
رمزي شبحلها وبعدين نزل عيونه ووجهه ولا احمر..
غاليه : هههههههه..شبحت لرانيا..حلو رمزي يارانيا..
رانيا وفمها ملبز بالشكلاطه :ايه حلو..
هو تحشم وضحك..وغاليه تشبحلهم وتضحك..
بعدين قعدت توزع فنظرها عليهم بإبتسامه وتقول فنفسها"محلاهم الصغويرة ..."شبحت فوق "يارب سخرلنا الحال اني وحميدا قريب يارب"..
🍁في مكان تاني من نفس الحوش..
فدار الحاجه فاطمه..
"طبعا ماحجتش هي بس يفاولولها بيها"..
فاطمه:يابنتي من فمها لودني ..
زينب بتساؤل.:باهي كيف يمي سعيده تمشي وتقول متسميات ع خوتي؟
فاطمه: اني هدي اللي مش فاهمتها...كيف غيروا كلامهم ولاهنا يبن شي الولاد مايبوش ..مطت شواربها بتساؤل ..ماني عارفه!
زينب:تبي الحق يمي الموضوع كله ع بعضه مانبيشي والله لاحدهم ولابناتها حيديروا فيهم طيب..
فاطمه تنهدت...سكتت شويه بعدين قالت: انتي ماتقولي شي خل لين نتيكدوا وبعدين ساهل..
سكتت زينب وهي تخمم في حال خواتها..
امها ماتعرفش انهم يبوا ولاد عمهم...فبالها انهم يعرفوا بحكايه الأتفاق بين رمضان خوه...اللي مااطبقش ع خواتهم وبما ان ماقعدش غيرهم اكيد حيطبق عليهم..
🍁🍁🍁🍁🍁
واقفات في الكوجينه يديروا في الكبه..وورق الدوالي "ورق عنب"...
مناسك بضحكه:يعني هو حلو؟
عروبه ابتسمت بخجل ؛ايه..
مناسك :احلى من اخي فايز..
عروبه بضحكه:نوسه!!
مناسك بضحكه: طيب اتركينا من اخي هلأ وئليلي..عم تحكوا مع بعض..
عروبه اذكرت اللي صار امس وابتسمت : امس اول مرة نتكلموا فيها..
مناسك : ئلك شي والله مافي احلى من هالمرحله ومشاعرا الحلوة وبتمنى من ئلبي انك تكوني مبسوطه ع طول..
عروبه بإبتسامه:تسلميلي❤
ضحكت مناسك..
سمعوا صوت دوشه..
مناسك: هدول بيت عمك صبري..
عروبه ملامح وجهها تبدلت للضيق وين خطر عليها هايل..
مناسك مصمصت ايديها ومسحتهم بالفوطه وطلعت بتسلم..
تنهدت بضيق ودارت نفس الشي حتى هي وطلعت وحاسه وكإن في جبل قاعد ع قلبها...
🍁🍁🍁🍁
الساعه 5عصرا...
البنات بيتسقدوا ...
ولما كانوا يطولوا في مدة القعاد لازم يدمعوا في المرواح..
سلموا ع بوهم هما ورجالتهم...
رمضان برغم ان مش قريب عليهم...لما يجوا يتونس بيهم وبصغويرتهم ويحسهم بدوشتهم ماليين الدنيا...
فاطمه وهي تحضن فزينب: ردي بالك من روحك يابنية روحي ماتنسيش راك حامل..
زينب ودموعها ينزلوا قالت بصوت مخنوق:حاضر يمي..
....
هانيبال وهو قايم رانيا: تعالي مرة اخرى باهي..
رانيا : باهي..
رباب شدت يده :حتى انت تعالى خالو زي ماخالو حميد يجينا ..
ضحك هانيبال: ان شاء الله...
....
محمد: خليتهالك القرايا..
حمزة بضحكه: بتسقط وبتعاود..
محمد بلامبالاة: عادي..
عماد: ايه عادي هلبه يعاودوا..
رمزي:حمير هدوما ..
محمد :ماهناك حمار هنى غيرك..
رمزي : 😒
عماد وحمزة: 😂😂..
🍁عمر كان قاعد واخد موقف من اللي صار الليله اللي قبلها وبالذات ان الكف كلاه قدام صغار خوه وخواته...قعد حدا الزريبه وماباش يمشي يسلم عليهم..
نزل هانيبال رانيا بش تمشي مع اختها لأمهم...
لما نزلها..مشت لأمها بعدين التفتت...
رانيا وهي تأشر بيدها 🖐: باي غاليه..باي حميته...باي هاني..باي حنا فاتمه..
هما يضحكوا ويأشرولها بإيديهم..
ورمزي يشوفلها وبضحك..
هي شبحتله: باي لمزي..
فرح من قلبه وردهالها 🖐....
خدتها امها قامتها في غمرها ....
كفايه : هي بالسلامه...
كلهم بأصوات متقطعه : بالسلامه..
خيري وسعد بأصوات متقطعه: هي السلام عليكم...بالسلامه..
ردوا عليهم كذلك
ركبوا سياراتهم...
وبدوا يتحركوا السيارات ورا بعض..وهما داخل السيارات يأشروا 🖐🖐🖐🖐🖐🖐🖐🖐...
لعند طلعوا السيارات من القطعه..
🍁مارين بيه الشعور هدا..يعني لما خواتكم او اقارب ليكم يعزوا عليكم يجوا يقعدوا عندكم فترة ويروحوا ..
مش تحسوا بشعور فراغ كبير يخلوه لما يروحوا...
شعور اشبه بالوحشه...
هذا اللي حسوه هما مجرد شافوا السيارات طالعين
القطعه....
كل حد مشي ع حاله...
بس الهادي كان جوه مازال معكر...مشي للزريبة بش يعشي السعي...
خش لقي عمر داخل...
اول ماعمر شافه ناض وفات من حداه وطلع طول من الزريبه...
الهادي طنشه اللي فيه مكفيه🍃...
🍁🍁🍁🍁
من جهه كلامها صح ومن جهه خطا..
نجاح "اخت سميه":باهي انتي شنو توا..
سميه بحيرة؛مش عارفه شن جاني حسيت روحي...زي اللي مش طايقاته..
نجاح:سميه ردي بالك تلعبي بمشاعره ولا تعشميه ره العشم مش بس فالولايا...
سميه تنهدت بألم:بصراحه يانجاح اني وين حسبتها بالعقل نظرتي تغيرت ..شوفي حني كم بنت 8...وسيدك مش ملحق علي طلباتنا ومعيشتنا باهي للي نخدموا اني وانتي..يعني لو تزوجنا نخففوا عليه الحمل..
نجاح:ديري اللي ديريه لكن ماتعشميش الولد ماتعامليشي هكي تبي تقطعي علاقتك بيه قوليها طول بدون لف ودوران...
تنهدت بضيق وسكتت وهي تفكر .....
🍁🍁🍁🍁
الساعه 8:30مساءا...
هادي ياسيدي مراة جبارة ...
كانت جاريه ..شراها سلطان اسمه نجم الدين ايوب...وكانت مفضله عنده ..عشقها ياسيدي وتزوجها...وولت تحكم معاه وتطلق...
لعند جي نهار وراجلها السلطان مات...باك تحسابها عيطت ولا شركت ولاخبطتت..لالا..وقتها كان الجيش الإسلامي يواجه في الجيش الصليبي الفرنسي..
درقت خبر موته لعند انتصر الجيش..وكانت فهالفترة توقع في قرارات ومراسيم وممشيه امور الدوله كلها..بعد انتصر الجيش اعلنت خبر موته...ونصبوها هي السلطانه وسمهوها"عصمة الدين"..
هانيبال: باهي واللي سماه ايبك وين من هدى كله..
ضحك جمعه وقال: هدا ياسيدي حكمت لمدة 80يوم لعند سمع بيها الخليفه المستنصر..خليفة المسلمين وقتها وخلا شيخ الإسلام هداكا الوقت يصدر فتوى ان المراة مايجوزش انها تحكم وتتولى امر رعيه...
هانيبال:عنده حق...وبعدين..
جمعه :ياسيدي رضخت للأمر الواقع ...وتنحت ..وتزوجت السي ايبك اللي تسأل عنه...
هانيبال بإنتباه اكثر : باهي!
جمعه: وقعدت تحكم وتطلق معاه حتى هو ..بس ماكانتش راضيه واجد عن اللي يدير فيه وكانت بيناتهم مشاكل..لعند ماسمعت تزوج عليها.
هانيبال برفعة حاجب:ايه!..
جمعه: قررت تقتله..
هانيبال بصدمه: ايه!!!
جمعه : بعتتله مع وحده من الجواري يجيها..وهو ماصدق عدالها طول..ويستقبلنه جواريها بالقباقيب..وطاحوا فيه ضرب لعند مات..
هانيبال بصدمه: عن فيتها مرة وحده!!
جمعه: هههههههههه...طبعا بعد مات طلعت خبر موته وقالت طاح من ع الحصان ومات..بس دوروا وراها وعرفوا ان هي اللي قتلاته..
هانيبال: شن دارولها..
جمعه :مش معروف بالزبط كيف ماتت..بس اشهر قصة عن موتها ان مرات ايبك الأولى هي اللي خدت حق راجلها منها ولانقولوا حقها هي ههههههه...المهم..جابتها...وطلقت عليها الجواري وضربوها بالقباقيب لين ماتت..
هانيبال: عليك قصة ياراجل..شنو هدى.؟!
جمعه :تحسابها قصة حب انت؟!
هانيبال وجهه ولااحمر:هدى اللي خطر عليا..
جمعه ابتسم:عندك علم احسن شي دارته المدرسه مسرحيه تتكلم عن قصة كيف هدي بش تعلمكم ان الحب مش موجود غير في الخرفات والقصص الخياليه..
هانيبال شبح هلبه لجمعه بعدين هز راسه بإيجاب..
🍁🍁🍁🍁🍁
تاني يوم...
في المدرسه...
المسرح...
عروبه بضحكه:عادي يعني هو تاريخ في النهايه..
هانيبال:قصة تحرق دم...اخرتها نمتل دور واحد نهايته طريحه بالشباشب...
عروبه : هههههه...رفعت حاجبها وقالت.عادي تقدر تتراجع وغيرك ياخده..
هانيبال رفع حاجبه اليسار: ياخد عينك...وزع نظره ع المكان ..وبعدين عادي حتى انتي بتموتي بنفس الطريحه..
عروبه :هههههههههههه..
هو شبحلها وقعد يتأمل فيها وهي تضحك..
هي رفعت عيونها فيه جو فعيونه ..هدت ضحكتها وقعد تتأمل فعيونه..بعدين قالت:لكن اني مش كيفها..هي ماكانتش تحب ايبك..
هو قلبه بدت نبضاته تقوى اكثر واكثر وهو يشوف لعيونها..
عروبه : شجرة الدر اللي هي اني...تحب ايبك اللي هو....اللي تختاره الأبله ...ورمشت عيونها..
هانيبال:فيك كف كيف كف هداك اليوم.
عروبه :ههههههههههههه..
هانيبال 💓💓💓
نادوهم بعدها المسؤولين عن المسرحيه..
واختبروهم...وانذهلت عروبه فتمثيل هانيبال كانت متاخده بيه لين خلاص 😍😍😍😍😍💓💓💓💓💓
وكأن ربي ماخلقش زيه في الدنيا💓....
🍃🍃🍃🍃
ويمر يوم...ووراه يوم..ويتبعه يوم...ووراه يوم..
بالزبط 4ايام....
كانت الحياة ماشيه...
عروبه وهانيبال في بداية مشوار حبهم كانوا الزوز عايشين احلى الأيام...ماكانوش يحصلوا فرصه يكلموا فيها بعض الا في المسرح او حصة الرياضه...💕
🍁لكن الهادي 🍁
كان عايش وضع ملخبط..تغير سميه عليه معذبه..
والمشكله انها متذبذبه فتعاملها معاه مرة تبعد ومرة تقرب..وكل مايجي يسألها خيرك شن صاير معاك..زعلتك في حاجه...
كانت ترد بأنها مضغوطه نفسيا وعندها مشاكل في حوشهم..
وهو قلبه قابضه ومش مصدقها عكس مابينلها ...
🍁🍁🍁🍁🍁
في مكان تاني..
فوسط ليبيا...
السمحه 💓سرت💓
اللي برغم حبي الشديد لهالمدينه عمري مازرتها وتمنيت لو مرة نمشيلها..
ان شاء الله تهدا وتروق ويجي يوم ونمشيلها💕...
المهم...
💓عمار...
كان متجهز للسباق اللي حيقام في شرق البلاد وبإعتباره اصغر المتسابقين كان حاس بتحدي كبير .. لازم يثبت نفسه بين المنافسين...
ويكون اهل للمنافسه..
واقف في المزرعه ع خيله "الجموح" ويهدرز عليه وهو يمسح ع وجهه بحنان..
عمار بإبتسامه: نبيك تكون قدها وترفع راسك صاحبك..
صهل الجموح..
ضحك عمار : ايوه هكي نبيك متحمس ومطلوقه فيك النار..انت اقرب رفيق لعمار وانت اللي تفهم عمار اكثر حتى من باتي نفسه...
صهل مرة تانيه الجموح وقرب وجهه من وجه عمار..
عمار حضنه وباسه من بين عيونه...
بعد وقعد يمسحله ع وجهه مرة تانيه وقال بصوت حماسي: مستعد؟!!..
صهل الحصان بحماس..
ضحك وقال بصوت حماسي: زيد تحدا زيد...هههههههههه💓
🌴🌴🌴🌴🌴🌴🌴🌴🌴🌴🌴
الحصة الأخيرة...
رياضة..
بعد مباراة هي ماشاركتش فيها..
واقف عليها وبيناتهم مسافه ...
عروبه : الشرق!!
هانيبال ابتسم ع جنب: ايه الشرق..
عروبه بضيق:قصدك مش جاي المدرسه السبت؟!
هانيبال ركز ع الماليه اللي لابستها فوق البدله: الجو صقع سميتروا وانتي لابسه هكي؟!
عروبه :مش مهم توا..قولي مش جاي السبت..
هانيبال: كيف مش مهم ياعنز ..تاخدي برده ..
عروبه برفعة حاجب :ايبك !!
هانيبال بضحكه:ياشجرة الدر انتي ان شاء الله الإثنين نجي..
عروبه بصدمه : شنو!!!!!!
هانيبال يضحك: وطي حسك يامتلفه..
عروبه عيونها تعبوا دموع: عدي وخليني..ومشت من حداه ..
هانيبال : هههههه..وكيف جاي بيلحقها..
"هياااااا ياطلبه"..
هانيبال: وقتك ياصباح..."تنطق بسكون الصاد..وفتح الباء... بمعني ياكشخه ولا يامنظر ع حسب مانعرف😅"
ووقفوهم طابورين...
البنات ردوهم لساحتهم بش يطلعوا منها والولاد..طلعوهم من ساحتهم..
💓وعروبه مضايقه لين خلاص..دموعها ينزلوا وتمسح فيهم..
💓هو طلع وشافها وقعد يشبحلها وهي مابتش تشوف جيهته بكل...
سليمان : تعدي ولا تلحق...
هانيبال شبح لجيهتها شويه ...تنهد...بعدين لف ومشي مع ولد عمه..
🍁عودة: عدا..
التفتت وقعدت تشوفله وهو ماشي وعاطي بالظهر...
لين اختفي..حطت يدها ع وجهها وبدت تبكي..
سالمه:عروبه بلا هبال مش مهاجر هو..
غزاله: كلهن هالنهارين ولا التلاته...
عروبه حولت يدها وقعدت تمسح فدموعها وهي ترشف ومابتش ترد عليهم...
لعند وصل عمها وركبت السيارة وتحركوا...
🍁🍁🍁🍁🍁
بنعدي للشرق..
سميه وهي تخدم ع الآله: تمشي وتجي سالم..
الهادي معاش تحمل معاملتها الباردة: خيرك سميه..قولي خيرك ارجوك يابنت الناس..شن اللي غيرك هكي بس!؟؟
سميه قلبها كان واجعها هلبه ردت بدون ماتشبحله: ماخيرني شي ياهادي ظروف صايرة معانا في الحوش مخليتني مش طايقة حد..
الهادي شبحلها شويه بعدين قال: ع العموم باهي توا
... واني هالفترة نبعد وانتي فكري كويس واني نفكر وبعد نروحوا يصير خير...
لف ومشي...
كان يستنى يسمع صوتها تنادي اسمه لكن للأسف كمل طريقه وماسمع منها شي..
هي قاعده مضاااايقه ع الآخر...
كلام صاحبتها لعب فعقلها لعب...واثر فيها...
وبرغم هدا مش قادرة تاخد قرار ...
ولاقادرة تنهيها معاه.....
🍁وهو كمل دوامه غصب عنه ماقدرش يستأذن لأنه واخد اجازة تلاته ايام لازم يكمل هاليوم كامل ..
قعد يخدم بغل وقلبه من داخل موجوع...
.....
سمعتهم بوداني..
يونس بإبتسامه فرح: باهي..نبيك تزيدي تحاولي معاها فترة اجازته...
فردوس ابتسمت:و بإذن الله نجيبلك الموافقه...
....يتبع....
