المتمردين

العشق المتمرد

#العشق_المتمرد. "اختبار"

#جمان_فريد

الجزء 105

🌟..
واقفه فم الباب ..
حاطه يد فنصها..ويد ع قفص الباب..
تشبح في باب الكونشيلو..
بنظرة شر صافي..وحاجبها مرفوع..
في الحوش اللي فجنبها...
كانت عزوزتها واقفه في الروشن وتشوف لنفس الباب بنظرة إزدراء..
الزوز ركزوا ع الفتحه تحت الباب لما سمعوا صوت السيارة وقفت...
شويه..
وانفتح باب الكونشيلو..
هو فتحه..
ماباش يشوف لمرته اللي واقفه تستنى..
طول ولا للسيارة وركب..
ودخلها...
فجنبه..
كانت تشوف من روشن السيارة للحوش..
والجنان...
لعند ماجت عينها ع ضرتها..
ضيقت عيونها بخوف..
شبحتله بسرعه لما قال..
"انزلي"..
رجعت شافت القدام..
لضرتها..
خدت نفس..
وفتحت باب السيارة..ونزلت ببنتها..
بعد نزلت..
عيونها توسعوا لما شافت منظر..
كان الصدمه الأولى اللي تتلقاها..
او الصفعه الأولى...
شافت في التركينه من الجنان..دار نومها ملوحه ..
وصورتها حداها مكسورة..
التفتت طول للصديق..
الصديق:تعالي هي..
هزت راسها بإيجاب وهي تشوفله بعيون نظراتها مصدومه مليانه دموع...
مشت ببنتها وراه..
وهما ماشيين.
"ترا دقيقه!"
وقفوا الزوز..
الصديق شبح لحميده..
اللي كانت تشوف لحليمه بنظره حاده..
حليمه :احمم..اسمعي..من توا لازم تعرفي مكانك هنى شنو بالضبط..
حميده شبحت للصديق..
اللي كان حاط ايديه ورا ظهره ويشوف لحليمه بنظره فيها شي من الخوف ..
حليمه بصوت عالي:اشبحيلي هنى حبيييبتي..
شبحتلها..
حليمه بإبتسامه سخريه:انتي هنى ..بش تربي بنتك بس بس بس..فغير هكي ماتفكريش..تغيرت ملامح وجهها للحده وقالت بوعيد..ولو فكرتي فغير هكي...حنوريك وجهي اللي اعوذ بالله منه..
شبحت للصديق مرة تانيه..
لقاته منزل عيونه بدون مايدير اي ردة فعل..
قعدت تشوفله بنظرات استغراب شديد..
حليمه:وتو يللا عدي اركبي..
الصديق:هيا...ومشي طول للدروج..
رجعت شبحت لحليمه..
رفعت حليمه حاجبها وهي تشوفلها بنظرة تخوف..
ضمت بنتها ومشت طول للدروج..
قعدت حليمه واقفه لوطا وتراجي..
🍁وحميده تركب ببنتها ع دروج شامنت..ماكانش فيه "قرقطون"...فكرت في بنتها يعني لو جت بتنزل لوطا الدروج حيكون خطره كبير عليها..
تنهدت بضيق..
شبحت قدامها..
لقت راجلها يفتح في باب الحوش اللي كان حديد شبه مصدي..
وصلت فيه ووقفت وهي تشوفله..
الصديق:خشي..
بلعت ريقها وخشت..
اول ماخشت قعدت تقصف مع بعضها من الصقع..
وعيونها يشوفوا للي بان عليها من الحوش..كله قاعد شامنت في منه بلوك بس مش مليس...
هو كمل طريقه قدامها وقال:تعالي..
مشت وراه...
ماشيه وخلاص..
هي قاعده مصدومه..
الوعود اللي سمعتها والكلام اللي انقال ماكانش هكي!!!
وقفت في دار لما قال..
الصديق:هدي الدار تقعدي فيها انتي وبنتك...اشرلها ع بساط وقال..فرشيه..والفراشات تلقيهن في الدار الأخرى..
الكوجينه اول ماخشيتي خليتيها ع ايسارك..فيها مايسدك انتي وبنتك..
هي تشوفله وخلاص..
وهو يتكلم ويهرب بعيونه عنها..
قاطعاته وقالت بصوت مخنوق:مش هكي !
شبحلها وقال:شنو!؟
حميده :احم..انت مش..هكي..مش هكي قلت..ماقتش..
"صدييييييق"..
انخلعوا الزوز..
الصديق بربكه:هيا جاي جاي..
ومشي طول وطلع من الحوش..
صوت باب الحوش اللي تقربع بقوة خلع حنين..
امها ضمتها ودموعها ينزلوا وهي تقول بصوت يدوب طالع:مافي شي..ماما..مافي شي🍃
لوطا..
حليمه:اخر مرة تركب فهمت..هي كان تبي حاجه تنزلك هنى تمام!؟
الصديق:تمام تمام غير انتي ماتحرقي اعصابك..
حاوط كتافها بذراعه وخش بيها للحوش..
وصكر الباب...
في الحوش اللي فجنبهم..
سالمه:ههههههه..ياجايات ايام سود ع روسهم كلهم..جعلهم ماولوا ان شاء الله ينحرقوا بعضهم..
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
بعد مرور عشرة أيام...
🍁جامعة طرابلس..
كلية الهندسه..
الساعه 10:00صباحا..
ماشيات مع بعض في الباحه ويهدرزوا..
رانيا بأسف:خالتي غاليه قالت خالي الهادي معاش بي يخش عليهم الحوش بكل..
دلال بحزن:قالت سميه نفسيته تاعبه واعصابه ديما راكبات ماينقربش..
رانيا بألم: مالا خالي محمد قداش وجعني قالت قاطع الماكله بكل ومايشوفوش فيه..
دلال:تي غير باهي اللي نجي منها خالي ميلاد..
رانيا بوجع:معاش اذكريني باللي صارله..
دلال:كان لاقدر الله صارت فيه حاجه خالتك هادي مازال تعيش مرتاحه!!
رانيا بكره:معاش تجيبلي سيرتها..من نهار انتلفت قالت خالتي لااتصلت ولادورت بكل..
دلال:مايبولها دوارة لا جعلها ولت..
رانيا:ايه..مادام باعت خوتها ع خاطر واحد حقير زي الصديق معاش تلزمهم..
دلال:غبيه..مش فاهمه ان الراجل والولد يتعوضوا لكن الخو ما يعوضه شي..
شبحت رانيا لدلال خطر عليها حمزة اللي ليها 5سنين مقاطعاته..قلبها وجعها ع الآخر..
تنهدت بضيق بعدين شبحت القدام..
وقفت فمكانها...
دلال التفتت لقتها واقفه قالت:خيرك؟!
رانيا بعيون مدمعه قالت:شوفي!
شافت دلال وين ماتشبح رانيا..
تفاجئت..
الزوز شافوا زين..
مقعمز فتركينه..
مدرق وجهه بإيديه ويبان يبكي..
قلبها كان يتقطع منظره وهو يبكي مؤلم..
الشخص القاسي الجاد لما ينزلوا دموعه يقطع القلوب من الشفقه عليه
لأن السبب اللي بكاه اكيد حيكون قوي فوق طاقة
تحمله اللي وصله لمرحله البكاء..
دلال بحزن:عنده الحق كل مايجي هني يقعد يذكر في كل شي صار..
رانيا دموعها نزلوا وين اذكرت هداكا اليوم بكل تفاصيله..
هو..
مسح دموعه...
خدي نفس..
بعدين ناض وقف..
جو عيونه عليها..
نظرة عيونه تغيرت للغضب..
بعدين غيرهم عنها ومشي..
وهما الزوز يشوفوله..
تنهدت رانيا بألم..
ع جية بنية تقرا معاهم ..
:صباح الخير يابنات..
الزوز ردوا :صباح الخير..
ورانيا تمسح فدموعها..
البنت وهي تشوف لرانيا كيف تمسح فدموعها قالت:شكلكم سمعتوا!
شبحولها الزوز بإستغراب..
دلال:بشنو؟
البنت:بأم الأستاذ زين..توفت..
رانيا غمضت عيونها بشده..
دلال:لاحول ولاقوة الابالله!!
البنت:كان تشوفوا خوي لما روح من عنده كيف كان يبكي قال لما مشي للجنازة بوه وخوته لزوه ..حملوه ذنب موتها حتى هي..
رانيا فتحت عيونها وقالت:شن هدا!!؟قلوبهم شنو هادم معقوله!!هادي ساعتهم هو شن ذنبه!!..
البنت بحزن:الله غالب هدا اللي صار..
دلال:تس..مسكين..
رانيا وزعت نظرها ع المكان ودموعها ينزلوا..
بعدين مشت بعدت من حداهم وهي تبكي..
ودلال قعدت تشوفلها بحزن..
البنت:ربي يكون فعونه مسكين...
🍁🍁🍁🍁
ماشاء الله..كله حلو..
نور وهي توري فالصور لتالا:هدا يوم الحفله..
تالا:تبارك الرحمن..
نور وهي تأشر ع الصورة:هادم تطييب حوش اما الباقي جاهز..
تالا:تبارك الرحمن..تصدقي عجبتني فكرة الصاله المتنقله..
نور:طالعه من وقت طويل..اللي مايقدرش ع ايجار صاله ولا مايديروش عراسهم في الصالات يديروا فيها هي..حلوة الحق..
تالا بإبتسامه:ايه..المهم ربي يهني رباب ويسعدها..
نور:آمين...ايه قوليلي خديتي شيتات اللي فاتك كله..
تالا:ايه..
نورابتسمت وقالت:كويس..ايه قوليلي شن جو الجبل غادي ولمة اختك..
تالا:صقع صقع سميتري..ولمه تعب فتعب..
نور:باهي خيرها ايناروا ماسكرتش راسها ودارتها فالصاله؟
تالا:ام راجلها حكمت..
نور بضحكه:مادام الحكايه فيها ام الراجل ماعندها مادير..
ضحكت تالا..
بعدين..
سكتوا شويه وهما يشوفوا حواليهم..
جت عين نور ع منظر عصرلها قلبها..
مالك جاي من بعيد هو ونفس البنت يهدرزوا ويضحكوا..
ووراهم حمزة ماشي بروحه..
وهاللقطه تحديدا مخليه نور متأكده مليون في الميه ان في شي بين مالك والبنت..
مالا علاش حمزة يخلي فيهم بروحهم!!؟
تالا:بنت دكتور معروف طلعت..
نور بدموع:يتهنى بيها..
تالا:شن تقولي نور؟!عاديين نحس فيهم..
نور ودموعها ينزلوا :لا مش عاديين بكل ياتالا كان عاديين علاش حمزة يخلي فيهم بروحهم..
تالا وهي تشوف لحمزة:مرات مافيش بيناتهم دوة عادي..
نور ضحكت بتهكم وقالت: يللا مش مهم خلاص معاش يعنيلي شي مالك هدا..
تالا قعدت تشبحلها بضيق..بعدين غيرت عيونها لحمزة ..
لقاته يشبحلها..
نزلت عيونها وابتسمت ابتسامة خجل خفيفه..
وهو كذلك ابتسم..
شويه ووقف مالك والبنت اللي معاه..
مالك:خلاص مالا انا تو نزيد نكلمه ونشوف شن يصير..
اسراء بإبتسامه:ok..باي توا..
مالك ابتسم وقال:سلام..
مشت اسراء..
ومالك تلفت لحمزة:خيرك ماتسايرش فينا..
حمزة بضحكه:لإني شخص غير مرغوب فيه..
مالك ضيق عيونه وقال:كيف غير مرغوب فيك!؟مافهمتش.
حمزة :هههههه..ياسيدي اسراء ماتبي تاخد وتعطي كان معاك انت..وصلت؟!
مالك شبحله بإمتعاض وقال:اني وياها اصدقاء لاأكثر..
حمزة ضحك وهز راسه بإيجاب..
مالك غير عيونه عنه وهو يحرك فراسه ايمين ويسار..بعدين قعد يدور بعيونه لين جو ع نور..
قعد يشوفلها بلهفه وحب وابتسامه حلوة ارتسمت ع وجهه..
اما هي غيرت عيونها عنه وناضت وهي تقول:هيا تالا..
تالا وهي تشوف لحمزة:باهي..
ناضت تالا ومشوا مع بعض..
نور مطنشه مالك اللي قعد معاها بعيونه..
وتالا وحمزة يتبادلوا في الإبتسامات..
بعد اختفوا من قدامهم..
تنهد مالك وقال:هيا حمزاوي..
ضحك حمزة وقال:هي..
لفوا الزوز مع بعض ومشوا طلعوا من الكليه..
🍁🍁🍁🍁
الساعه 11:00صباحا..
لازم كل شي نوقف عليه بروحي الزفت..مافيكم واحد ينعبا عليه!!
منير:عماد صارت تلخبيطه منهم هما حني ماليناش دخل..
عماد بعصبيه:تعرف لو كنت غادي التلخبيطه هادي ماصارتش بكل..
منير شبح لزميله بضيق بعدين غير عيونه لعماد وقال:عماد مش اول مرة تبعتنا لشي وتعبا علينا فشي ياما من شي تميناه ع اكمل وجه ويخي درناه فوق ماتبي ولامرة قصرنا ولا درنا حاجه ناقصه..الا هالمرة والغلط فيها مش منا حني..
عماد غمض عيونه وتنهد..بعدين قال:باهي..بروا لخدمتكم..
الزوز شبحوله شويه..
بعدين طلع منير وهو مضايق وزميله وراه..
عماد فتح عيونه..
وزع نظره حواليه..
بعدين مسح بإيديه ع وجهه ..
تلفت شاف كرسي..وخر خطوتين وقعمز عليه..
طلع تليفونه من جيب كبوطه..
وضرب ع رقم محدد..
عماد:هاه بوي..فاضي؟.........نبيك فحاجه...
برا..
:متغير هلبه..
منير:صايرة معاه حاجه ماكانش هكي بكل..
:الوقت هدا الناس كلها تحت الضغط بالذات اللي يخدموا في التجاره..وضع الدولار وغيره..
منير بضيق:يستر الله وخلاص..
داخل في المخزن..
عماد:اممم..تمام خلاص..تو نشوف....إن شاء الله......توصي شي؟!! تسلم ياغالي...السلام  عليكم.....صكر بعد صكر بوه..
وناض..
مشي طلع من المخزن..
ركب تلاته درجات..
وخش المحل..
عيونه جت ع الشباب اللي يخدموا عنده اضايق..
قدملهم ..
وصل فيهم..حط ايديه ع كتافهم وقال:سامحوني..غير الفترة هادي جوي مش صافي..
منير ابتسم وقال:معذور يامعلم ولايهمك..
:ماتحطش فبالك..
خبط كتافهم بإيديه...
بعدين نزل ايديه ومشي طلع من المحل..
🌴🌴🌴🌴🌴
واقفات في الدار ويهدرزوا..
غاليه بضيق:اتصل امس ينشد حاس ان في حاجه من اسئلته نعرفه..
لمياء:معقوله يكون سامع حاجه!؟
غاليه:تس.. هانيبال كان سامع ما يسأل..
لمياء:مرات محمد اشبح كيف كلمه وهو حس من طريقة كلامه ان في شي..
غاليه :مرات هكي صح..
لمياء:باهي حاولتي تتصلي بيها..
غاليه بتفنيصه:حلفولي خوتي ولا نسيتي!!
لمياء:مهما كان تقعد اختك واختهم..
غاليه بألم:وخيرها هي مافكرت فينا حني خوتها وخواتها؟!
سكتت لمياء بعدين قالت:ربي يسامحها ع هالعمله السودا وخلاص..
غاليه تنهدت وسكتت..
شويه وقالت..
غاليه:بنعدي ندير الغدي..
لمياء:خليني اني نديره..
غاليه:لا والله ماك دايره حاجه..
ومش طلعت من الدار ولمياء وراها..
🍁🍁🍁🍁
الساعه 1:00ظهرا..
طق باب المكتب..
هو كان سارح استاقض لما سمعه وقال:تفضل..
انفتح الباب شويه..
وخشت..
هو لما شافها رغم حالة قلبه اللي مايقدرش يسيطر عليها فوجودها..
الا انه رسم ع وجهه ملامح البغض..
رانيا بتوتر:نقدر نخش؟!
زين بحده:شن تبي؟!
رانيا:احمم..استاذ نبي نكملك شويه..
زين:خارج نطاق القرايه لا..
رانيا قدمت ووقفت قدام مكتبه مباشره وقالت:عظم الله اجرك في الوالده..
زين:اطلعي..
رانيا بدموع:بالله عليك خليني نحكي اللي عندي نبي نرتاح..
زين برفعة حواجب:ترتاحي!!ابتسم تهكما...واشرلها بيده وهو يحرك فصوابعه القدام والخلف بحركه سريعه..
دموعها نزلوا وقالت:استاذ ارجوك..
هو شاف دموعها عيونه رمشوا فيسع وغيرهم عنها وقال بصوت عالي:تطلعي بإحترامك ولانطلعك بفضيحه..
هي انصدمت..
زين:اطلعي..
ضمت شواربها لداخل بأسف..شقهت وقعدت تبكي ولفت فيسع وطلعت..
هونزلت من عينه دمعه فيسع مامسحها..
ناض من ورا مكتبه..
وخدي اللاب متاعه وطلع من مكتبه متوجه لإحدى القاعات بش يعطي محاضرة...
🍁🍁🍁🍁
خش للحوش وهو فقمة التعب..
يبي يرقد وبس بعد جري نص نهار بين الميناء والمحلات..
وهو ماشي بيركب سمع امه تهدرز بالتليفون وهي تقول..
كفايه:اهو تو بيعطوا عادي!!
غاليه:مش عاطيين هما ياكفايه..
كفايه:باهي لما يعطوهم موعد يجوا يخطبوا شن معناه هدا ياغاليه..
سكتت غاليه..
كفايه:من الاول عقلي قالي في شي تاني..شكلها اللا زبيده مش عاجبها ولدي ولاشايفاته مش من مقامها..تي ولدي اني ينشرى بالذهب خسارة فيها شيطانه الرجيم..
غاليه:كفايه بشوي خيرك !!اللي يسمع يقول عطوها..
كفايه:بيعطوها ياغاليه بيعطوها وتو تشوفي..اني والله لولا انه هو يبيها راهو والله ماقبلته هالموضوع كلا ولدي اني حرام فيها العقرب هادي...لكن معليشي فيها خيره والطيبون للطيبات..تو تشوف كيف ربي حيكسر قلبها كيف ماكسرت قلب ولدي..
وصكرت ع غاليه..
غاليه غمضت عيونها بنفاد صبر وقالت:استغفر الله وخلاص..
🍁🍁🍁🍁
ليش تعطوهم موعد هاه قولي!!..استقبليهم بروحك...
وشدت شنطتها ومشت بسرعه لدارها وامها وراها..
سعيده:المراة اصرت تحشمت منها..
وقفت رزان في الباب والتفتت لامها وقالت برفعة حواجب:تحشمتي!؟ هزت راسها بإيجاب وقالت..باهي..
فتحت باب دارها وخشت وسكرتها وراها..
سعيده بضيق:تس...افففففف..
ولفت ومشت ولت للكوجينه..
🍁🍁🍁🍁
مكالمه هاتفيه..
دلال وهي ماشيه لكليه العلوم:لاماما اني بنروح مخر..ايه عندي للاربعه..توزع في نظرها وتمشي...لالا ماتغيري شي خليهم ع لبسهم هدا الجو مازال ماصقعش هلبه............اممم...شن دايرة...ضحكت وقالت..تو هدا سؤال ماما مدايرة كسكسي بالحوت وتقوليلي نخليلك ولالا....هههههه..وصلت في الكياس..ايه باهي....لالا ماواكله شي بكل في الجامعه اليوم ع خاطره..
قصت الكياس الأول.....قولي لبابا مايتعبش روحه مافي شي يخوف..
كيف بتقص التاني وهي مش منتبهه..
انفجعت لما سمعت صوت سيارة شدت فرينو..
شبحت جنبها وعيونها مفتوحات ع وسعهم..
من التليفون نعيمه كانت تنادي بخوف:دلاااال..
دلال بلعثمه:ها..ماما.هاه..
ومشت كملت طريقها وهي ترعش..
نعيمه بخوف:شن صارلك!!؟
بلعت دلال ريقها وقالت:شي ماما شي...مافيا شي...
نعيمه:اكيد بنتي..
دلال قعمزت ع مرشبيدي عالي وقالت:اكيد ماما والله مافيا حاجه...هي سلام توا...
صكرت..
وهي تتنفس بسرعه من قوة فجعتها..
قلبها كان يدق بقوة شديده..
التفتت..
لقاته درس سيارته..
وطول فتح الباب ونزل صكره وجاها بسرعه..
التفتت القدام..
وصل فيها وقال بشي من الخوف:أسف جدا سامحيني..
رفعت عيونها فيه وقالت:انت اللي سامحني..طالعتلك في البخت..مصيبه ونازله عليك..
ضحك ضحكه خفيفه وقال فنفسه"ياريت كل المصايب كيفك":ماتقوليش هكي..اني اللي ماركزت فطريقي زين..
ابتسمت وناضت..
وهو يشوفلها بنظرة عيون بتاكلها💓
برغم انه يدوب يبان وجهها من طريقة لبسها للشاربه..
بس كان جاذب لأبعد حد بملامحها طفوليه الناعمه..
شبحتله..ضيقت عيونها ونزلتهم..
هو ارتبك..
تنحنح وقال:وين ماشيه!؟
دلال:بنلاقي اختي هني..
هز راسه بإيجاب وهو مبتسم..
هي قالت:نستأذن ...السلام عليكم..
لبست شنطتها زين ومشت بسرعه...
وهو معاها بعيونه....
تنهد من قلبه وتلقائيا قال..
قل للمليحة إن ثغرك فاتن..
ذاب الفؤاد لمبسم متكلم..
الوجه بدر والعيون كأنها..
سهم يداوي موضع المتألم..
ابتسم لما اختفت من امام ناظريه المسحورتين..
🍃وآه منك ياضو تأثيرك مش حيكون هين🍃
🌴🌴🌴🌴🌴
مقعمزة في مكان من باحة الكليه هي وياه..
تشبحله وهو مقعمز ساكت..سارح بفكره..
مركزه ع نظرة عينه كلها ألم..
ابتسمت وقالت
"محمد"..
ضم شوابه لداخل..غمض عيونه وفتحهم..بعدين شبحلها وقال:مش عارف كيف بنعديها ...
تبدلت ملامح ابتسامتها للحزن..
غير عيونه عنها وقال بوجع:منقهر قهره..قهره..مخليتني نحس اني...مانسوى شي..
بلقيس:محمد..
محمد:مش عارف كيف نمشي بين الناس مش عارف مش عارف....الناس هنى يعرفوا بعضهم كويس مافي حد حاله مدرق ع التاني..تلقيهم توا يدووا بينا في المرابيع عقاب ليل يعدوا بينا فقهوتهم وشاهيهم..
ولد رحيم مسح بعيت رمضان الوطا..
بنتهم..
بنتهم هي اللي ضحكت عليهم الناس..
بغيظ شديد قال:كيف بنعديها ..كيف كيف ياربي!!
حط ايديه ع وجهه وهو يقول:كيف..
مسح بإيديه ع وجهه ونزلهم..
حطهم ع رجليه..
هي شدت يده..
شبح ليدها..
ضمت يده بين ايديها..وهي تشوفله قالت:مانعرفش شن نقولك بيش نخفف عنك..بس يامحمد..حط فراسك ان اختك حتى لو غلطت وغلطها مش ساهل في النهايه مادارت حرام..
مافي شي يخليك متحشم من الناس..الناس هدي وهنى بالذات ماعندهم الا القطاف وبس..تلقاهم يقطفوا في كل وقت ع كل حد..ماحد سالم من حد..
يعني انت كان بديرلهم راس مال حتتعب واجد...انتم معروفين من..وهما يعرفوكم زين..وانتم عارفين ارواحكم يامحمد انتم عارفين ارواحكم...ماتخلوا حد ياخد فيكم فرصه..
شبحلها شويه ..بعدين ضحك وقال:طلعتي تعرفي تدوي..
بلقيس ضحكت وهي تقول:اني مافي حاجه مانعرفها..يابختك بيا..
شد ع يدها بقوة وهو يشوف لعيونها..
بلقيس وهي تتوجع بضحكه:اااي..كسرتلي...صوابعي..
خفف مش شدته..
وقعد يشوف لعيونها بنظرة حلوة هلبه..ياما تقول وتحكي ياما كلام هو مايعرفش يقوله بلسانه..
هي ابتسمت بخجل وقالت:مانكش مفطرني..
محمد ابتسم وناض ونوضها معاه:قوليلي وين الكافتيريا ياهامعه..
ضحكت وقالت:بسرعه بسرعه عدي من هنى طول..
مشي وهو يضحك ويحرك فراسه ايمين ويسار..
وهي تضحك بفرح لأنها نجحت بالتخفيف عنه..
💕💕💕💕💕💕💕💕
🍁🍁🍁🍁🍁🍁🍁
بس في اللي ربي منعم عليه بسكن 💓
وفي اللي باليه بمصدر للهم والغم...
🍁خش للحوش..
وهو ماشي للدار..
وقف لما سمعها تقول..
سميه:مانقدر نكلمه من نهار اخته دارت عملتها فيهم وهو مش طايق روحه..............لالاوخيتي فكيييني فكييني مش ناقصه هم..................شن تبيهم يديرولها يمنعوها عن راجلها كانهي تبيه.!!!.......................تعرفي يانجاح وكان سيدها حي راهو ردها من الاول بكل من لما قات تبي تطلق.....لكن خوتها ماطلعوا كيف سيدهم.............الله غالب وخلاص..
هو..
كان يسمع في الكلام..
وكأنه رصاص يخش لمسامعه...
زاد انقهر اكثر...وتألم اكثر..
وحقد ع أخته أكثر وأكثر..
بهدوء انسحب ومشي طلع من الحوش...
🍁🍁🍁🍁🍁
الساعه 5:30عصرا...
واقفه حدا عمتها اللي كانت تخلص في الخبزة من الفرن..
كانت تتنهد كل شويه..
غاليه بعد كملت قامت الصونيه وقالت:فضفضي..
رزان بحزن:ريتي بالله امي وعمايلها
غاليه مشت وهي تقول:امك تحشمت من المراة قدامي كانت تكلم فيها وتقول البنت ماتبي والمراة صكرت راسها
رزان وراها تقول بنبرة باكيه:باهي توا يعني...كان يعني
غاليه خشت من فم البوابه
وطول خشت للكوجينه..
حطت الصونيه ع الرخامه وقالت:كان عماد يعلم ..
نزلت دمعه من عين رزان:هدى وين بيزيد يكرهني ياعمتي..
غاليه ابتسمت وحطت يدها ع خد رزان وقالت:رزونه حبيبتي..
قاطعتها وقالت:ماتقولي انسي ماتقوليها...
غاليه :مش قايله انسي..لكن بنقولك حاجه وحده بس..عماد مش كيف قبل...
قلبها انقبض بقوة من كلمة عمتها....
شبحتلها شويه وبعدين قالت بألم..
"ولا أني كيف قبل ياعمتي"..
رزان ببكي:مانيش كيف قبل...بكل..
حضنتها غاليه وهي تمسح ع شعرها وتقول:خلاص..خلاص..بنتي...💔
ورزان تبكي فحضنها بالعبره...
🍁🍁🍁🍁🍁
لااااالااااا!!!
سناء بضحكه:زي مانحكيلك توا...
لمياء:تطورات خطيره هادي مادام حتى عطاك الرقم!!
سناء:امم بس طبعا حندير فيها جو الثقل في الأول بعدين نخش بقوة واندفاع..
لمياء بضحكه:حلووو هلبه...باهي قولي عرف انك انتي نفسها اللي ع الفيس..
سناء :طبعااااا..ويخي مرة مرة نخش نهدرز عليه شويه..
لمياء:طلعتي مش ساهله بكل يافرخه...استمري استمري..
سناء:ههههههههه...
🍁🍁🍁🍁
"يامجنون مش انا ليلى ولا بنسمة هواك مايله..
عايزني اقول بحبك ليه..بحبك بس مش قايله
ياااا يامجنون"
عماد:هههههههههه..توانتي هكي قلتيها ياملعقه..
رزان بضحكه:ماقت شي اني غنيت بس..
عماد:باهي باهي..كتري منه الجو اللي ديري فيه هدا..كله ع الحساب..مسجل..
رزان ضحكت وقعدت ساكته..
عماد:مسمومه...غدوة عيد راه..عيدي عليا بيها تربحي فيا اجر..
رزان بضحكه:لأن غدوة عيد عدي ارقد شويه بش تعدي للصلاة ناشط..تصبح ع خير...
🍁وقف تسجيل المكالمه لهني..
حط يده ع جبهته وهو مغمض عيونه بألم..
كيف بيفرط بيها هكي بالساهل كيف؟!!
كيف يفرط فيها أصلا!!
هادي قرعته من الدنيا زي مايقول اللسان الشرقاوي الحلو..
هادي حصته من الحياه..
هادي مفروض ماتكونش غير ليه..
انزرعت في قلبه وردة..يوم عن يوم كبرت فيه..
وهو تبناها...
ولايمكن يفرط فيها..ويخليها لغيره..
لغيره!!
يموت لو رزان خداها واحد غيره...
فتح عيونه..
وحول السماعات من وذانه..
وناض من السرير..
توجه لباب الدار فتحه..
وطلع..
طول مشي للدروج ونزل..
وخش لأمه في الصاله..
كان مندفع وهو خاش وقف مكانه لما لقي بوه معاها..
شبحوله الزوز بإستغراب..
هو ارتبك..
تنحنح بعدين قال:ترا امي شويه..اشر براسه للباب وقال..نبيك شويه..شبح لبوه..بعد اذن بوي طبعا..
سعد مط شورابه للأسفل وهو يهز فراسه بإيجاب..
ناضت كفايه وهي مستغربه..
طلع عماد طلعت وراه..
مشوا لعند ماوصلوا لنهاية الممر..
عماد بربكه:يام..احمم..يما...ااا..بلع ريقه وقال..مش عارف كيف..
كفايه بخوف:راك تقولي في حد من خوالك صارتله حاجه!!
عماد حرك راسه ايمين ويسار نافيا وقال:لالالا..مافي شي..بس..حك حاجبه وقال دفعة وحده..بنت خوك حق انخطبت!!؟
كفايه بغضب:وانت شن دخلك تنخطب ولا حتى تنحرق ..
عماد بفزة:يااام...خيرك!!
كفايه:حي عليا مازال انت مش راضي فيها حتى بعد اللي داراته..
غمض عيونه بنفاد صبر وقال:غير جاوبيني ايه ولا لا..
كفايه بإمتعاض:بتنخطب...
عماد وهوشاد ع قبضة يده بالقوة:امتى؟!
كفايه:اندري ع دعوتها اني..
هز راسه بإيجاب وهو فقمة الغضب ولف ومشي..
كفايه بحزن:يعوضك ربي خير منها..
🍁ركب يجري ...
وصل فداره..
خش..
وخدي تليفونه من ع السرير..وخر شعره بيده للخلف..
حط التليفون ع وذنه بعد ضرب ع رقم محدد..
نادى نادى...
بعدين انفتح الخط..
عماد:غاليه!
غاليه وهي تشبح لرزان كيف تتفرج ع التلفزيون:ايوه..
عماد:امتى بيجوا يخطبوها..
رزان التفتت وقالت:السلطانه مريم حتى هي كبدت فبالي بيك...ضحكت ورجعت تتفرج..
عماد برفعة حواجب:تافهه...بلاقلب...انانيه...زفته..
غاليه بتفنيصه:بقولي بعد اسبوعين..
عماد سخرية:وهي طاربه وجوها مليح!!كلا اني..اني كلب الكلاب نستاهل مكثر...
وصكر فوجه غاليه..
لوح تليفونه ع السرير..
ومشي طلع من داره...
🍁غاليه "ياعليك حال حالكم"
رزان:من كان يكلم فيك!؟
غاليه:وحده معاي في المستشفى..
رزان:اها...رجعت شافت للتلفزيون...عطيه جدري عليك شخصية شخصيته بالي...
غاليه:عطيه بلي يرفعه وخلاص..
التفتت رزان لعمتها وهي تضحك
تحسابها قالتها من باب الإعجاب...
🍁🍁🍁🍁🍁
ماما اما احلى الوشاح هدا ولاهدا؟!!
مقعمزة قدام التلفزيون سارحه ومش حاسه اساسا بوجود بنتها بحداها..
عقلها ليه مده مشغول..
معادتش زي قبل بكل..معاش تفكر الا فراجلها..
..راجلها..
اول حب فحياتها...
الحب اللي ليها فترة راكناته فزاوية المهملات فعقلها وقلبها..
رجعه بقوة وجود شريكه ليها فالأنسان اللي تحبه..
لما شافتها..وشافت تأثيرها عليه..
وشافت انه مايقدرش يكتم اتجاهها مشاعره ..
حتى لما كانوا مع بعض اخر مرة وين روح بيهم جميع..
صح ركب لطيفه جنبه وغزلان وراه..لكن اغلب الطريق عيونه ع مراية السيارة ويبتسم..
وهي لاحظاته وحست بشي واجعها هلبه هلبه..
"ماااااماااا"
استاقضت وشبحت لبنتها بتضييقة عيون..
رفقه:ليا ساعه واقفه نكلم فيك وين كنتي؟!
ابتسمت لطيفه مجامله وناضت:شي ماما تاعبه شويه بنمشي نرقد...
وخشت فاتت من حداها..
ورفقه معاها بعيونها وهي مستغربه فيها وفحالها المتغير..
🍁🍁🍁🍁
تو فرايك شي زي هدا وقته!؟
غزلان بضحكه:وقته ونص..
ابتسم حميد وجاها مسح بيده ع شعرها وقال:نحبك ..
هي ضحكت وقالت:غدوه عندنا طلعه بكري راهو..
حاوطها بإيديه وقال:وين المشكله..
هي قعدت تشوف لعيونه بإبتسامه..
وهو راح مع هالإبتسامه لعالم تاني💕💕💕💕
🍁🍁🍁🍁🍁
الساعه 12:00ليلا...
ايوه عماد...
عماد هو حاط ذراعه ع عيونه ويتكلم بصوت ناعس:خير خالتي..
غاليه:نوضتك من نوم؟!
عماد:احمم..مش مشكله...شن في ؟
غاليه:امم..بنقولك حاجه بخصوص موضوع رزان بك.....
قاطعها بعصبيه وقال:معاش تجيبلي سيرتها بكل بكل..معاش دخلي بيها ولا بمواضيعها تنخطب تنحرق إن شاء الله ماتولي ماتعنيلي شي هي فحالها واني فحالي..تصبحي ع خير..
وصكر عليها..
غمض عيونه وتأفف بعدين قال:ماصدقت رقدت الزفت...ربي يهديك ياخالتي..
🍁🍁🍁
غاليه وهي تشوف للتليفون:ربي يهديكم وخلاص..
حطت تليفونها ع مسند المندار..وولت رقدت...
🍁🍁🍁🍁🍁
تاني يوم...
الساعه 2:00بعد الظهر..
احسن شي درتوه انكم مامنعتوهاش..
الهادي :كيف !!
حميد:ايه...بش غدوة ولابعد غدوة ماتقولش خوتي هما اللي وقفوا فطريقي ومنعوني نولي لراجلي...حتى انتم بتقولهالكم فوجوهكم بعدين..
فاطمه وهي تمسح ع شعر حفيدتها اللي مقعمزة فحجرها:حتى اني مامنعتها لهالسبب..هي ماهي صغيره اللي تختاره تتحمل مسؤوليته..
محمد وهو يهز فراسه بإيجاب:باهي..باااهي..لكن هاه من تو اني ماليا بيها دخل ولااني خاشلها فحاجه لو شن يصيرلها..
الهادي: واني ماسحها من حياتي بكل..
ابتسمت الحاجه فاطمه لأنها عارفه من داخلها انه مجرد كلام فلحظه غضب عارفه ولادها كويس..
حميد:باهي زي ماتبوا..اني عن نفسي نتمنى ان حالها يتعدل ويكون قرارها سليم..هو هدا اللي نبيه بس..
ابتسم محمد تهكما..
والهادي قعد يشبح في الفراغ برفعة حاجب مش عاجبه الكلام..
داخل..
غاليه بإبتسامه فرح:الله اليوم!!
غزلان بإبتسامه:ايه اليوم..
لمياء بإبتسامه صفرا:بطول عمرها..
غزلان من فوق نفسها:شكرا..شبحت لغاليه وقالت:وين نديروه...
غاليه وهي تفكر:اممم..مافيش غير الصاله..
غزلان بإبتسامه:حلو...باهي خل بنمشي نعزم سعيده ورزان..
غاليه هزت راسها بإيجاب وهي مبتسمه..
ابتسمت غزلان بعدين حطت وشاحها ع راسها ومشت طلعت من الكوجينه..
قعدت معاها لمياء لين شافتها فاتت من الروشن بعدين قالت:تو هو وقته العيد ميلاد هدا واحني فهالحال!
غاليه بتضييقة عيون:علاش خيره حالنا..حالة وفاة يعني لاقدرالله!!
لمياء :مش قصدي..لكن الوضع مازال متوتر..
غاليه:ولانه هكي هي دارت الحركه هدي بيش تغير جونا..بارك الله فيها..
لمياء ابتسمت وقال:ايه صح..صح...كان من هالناحيه عندك حق.."درويشه"..
🍃هي مش درويشه لكن امثالك بسبب نواياهم الخبيثه يشوفوا في الناس كلها زيهم🍃
🍁🍁🍁🍁🍁
طلعت من المحاضرة وهي منهكه ع الأخر..
توجهت طول لخارج الكليه...
قعمزت برا بش تشم هوا..بعد نص ساعه حتبدا محاضرة تانيه...
دلال:ياريتك معاي يارنوشه...
تنهدت وقعدت توزع فنظرها حواليها...
شويه وقفت عليها وحده مدتلها صفرة بكلاوة وقالت:تفضلي.
دلال ابتسمت بإستغراب :شن المناسبه..
ضحكت البنت بفرح ودموعها نزلوا.
اللي معاها قالت:بوها طلع حي!!
ضيقت دلال عيونها وهي تشوفلهم..
البنت وهي تحكي بلهفه:لينا سنين نحسابوه استشهد في القصف ع رتل العز...وقعدت تبكي..
صاحبتها بدموع:طلع حي..كلمهم من يومين وقال انه قاعد في الجزاير..
دلال قعدت ترجف بكل مافيها..
دموعها نزلوا سيل..
ناضت بالسيف وقفت وقالت بصوت يدوب طالع:حي!!
البنت رشفت وقالت:الحمد لله يستاهل الحمد الحمد لله...تفضلي اختي..
دلال قعمزت بهده وهي تتنفس بسرعه..
شويه شويه بدت تبكي...
وبكاها ولا بالعبرة..
البنات بصدمه:خيرك!!
🍁🍁🍁
حاولوا معاها لين هدوها..
وقفت بكي لكن معاش قدرت تتكلم..
قعدت بروحها مقعمزة تفكر في اللي سمعاته..
لحظات..
وناضت ..
وقعدت تمشي وهي تفكر..
قبل قالوا انه مات..وطلع حي...
بعدين رجعوا قالوا انه مات..
بس ماكانش في إثبات مادي لهالشي..
هي عرفت بس انه مات وخلاص..
بس الدليل وين...
مافيش دليل عندها...
باهي لو طلع حي...
هو وينه توا...
وينه عنهم...
وينه...
دلال وهي ماشيه تشوف حواليها بتوهان..
"وينه؟!"...
🍃غريق وتعلق بقشه..من غيره هي عايشه بلاروح مش حاسه بطعم الحياة من غيره...اي امل ولو كان صغير يقول ان روحها ممكن ترجعلها مستعده تصدقه وتتشبث بيه🍃
وهي ماشيه ومش عارفه وين ماشيه..
حاسه برجليها ثقلوا...
وحست بدوخه..
وعيونها يتصكروا بالسيف..
فتحتهم بالزور..
حاولت تمشي خطوه تانيه ماقدرتش..
ارغمت نفسها..
حركت رجلها القدام خطوه وهي تشوفلها..
انخبطت بشي..
خلاها توخر...
قامت عيونها فيه وشافتله..
ضو بخوف:دلال...
هي الرؤيه شبه انعدمت عندها..
معاش حست بشي...
والجبل اللي حاول يصمد طول هالسنين انهار فهاللحظه...

...يتبع...