المتمردين

العشق المتمرد

#العشق_المتمرد "اختبار"

#جمان_فريد

الجزء 104 القسم الأخير..

🌟..
مقعمز فسيارته..
منزل المرش متاع بابه ويشبحله..
كيف مقعمز وهو حاط لابها ع رجليه..
بصوابعه يلعب ع ازاره..
يشد فيه بيده مرة مرة..
لابها متاعها هي..اللي ديما تستعمل فيه..
ومعاها في اغلب اوقاتها..
هو نفسه ماشدش حاجه تخصها هكي زي ماهدا داير..
من هو هدا من هو ؟!!
اللي حصل فرصه يوقف عليها ويكلمها ويبتسملها ويسمعها ويخدمها؟!!
يشوفله وهو منقهر ع الأخر..
ليه 25دقيقه مقعمز في السيارة ويراقب...
ويراجي شن مازال بيصير..
عيونه غيرهم جهة الباب اللي جنب اصيل شافه انفتح وطلع منه واحد من ولاد محمود..
مختار:اصيل!خيرك مقعمز هنى؟!
اصيل وهو لاهي باللاب:بكل تغطية النت هنى ياراجل حاله..
مختار:ليبيا كلها تغطية النت فيها بالهون..
اصيل تهكما:انجازات المباركه وين؟
مختار بضحكه:المهم الطاغية مات..
اصيل ضحك نص ضحكه..
مختار ضحك ومشي كمل طريقه للمربوعه الخارجيه..
وعماد يدوب شبحله بعدين رجع شاف لأصيل..
فهاللحظه اصيل قام عيونه جو فعيون عماد..
عماد غير عيونه لتليفونه..
اصيل قعد يشوفله شويه بعدين رجع لهي باللاب..
كمل..
اصيل بضحكه:هكي تمام التمام..سكت شويه وهو يفكر بعدين ابتسم ابتسامه ماكرة بعض شي ودار حاجه معينه في اللاب بعدها صكره..
وعماد يشوفله..
🍁🍁🍁🍁
في حوش ميلاد..
واقفات في الممر يهدرزوا..
حدهم بضحكه:جريء الدعوة..
رزان:فوق الجرأة..ماني عارفه كيف بناخد الجهاز توا..
حدهم بإبتسامه:نمشوا مع بعض..
رزان:حي عليا كان يشوفونا!
حدهم:علاش حني شن بنديروا !!؟وبعدين اصيل مش غريب هي تعالي..
شبحتلها رزان بقلق..
حدهم:هيا عاااد!
تنهدت رزان وهزت راسها بإيجاب..
ابتسمت حدهم ومشوا مع بعض..
برا..
كان اصيل واقف ويبربش في تليفونه ومرة مرة يشوف جهة حوش ميلاد..
ابتسم لما شافها طالعه..
وعماد فتح عيونه ع وسعهم وعلى وجهه ملامح الغضب..
رزان:عديله انتي خوديه منه حدهم..
حدهم ضحكت وقالت:باهي..
نزلت حدهم بروحها من الدروج..
ومشتله..
هو زبط اللي صار..
قعد يشوف لرزان وهو مبتسم ع جنب..
جاته حدهم:مرحبا..
اصيل:اهلا..معليش قوليلها تجي لان في نقاط  بنوضحهن لها
بش تعرف شن درت في البحث وتفهمه..
تلفتت حدهم لرزان واشرتلها تجي..
رزان بتذمر :عليك نهار احرف هو..تس..
حدهم اشرتلها مرة تانيه..
عماد وهو يشبح لأصيل:تي هدا من يحساب روحه!؟
نزلت رزان مرغمه..
ومشتلهم..
وقفت حدا حدهم وقالت:ممكن اللاب والكتاب لو سمحت..
هو ابتسم..
تلفت ومشي خدي اللاب اللي كان حاطه ع البلوكه وجاها..
فتحه وقال:خزنتلك برامج تستفيدي منهن فقرايتك..
وجهه جيهتها وقعد يشرحلها ع كل برنامج وشن يدير..
عماد يبي ينزل من السيارة ويمشيلهم بس تمالك اعصابه ع قد مايقدر..
ع طلعة عمر من ورا القيطون شافهم..
قرن حواجبه ومشي جيهتهم طول..
عماد لما شافه ابتسم من قلبه..
قعد معاه بعيونه لين وصل فيهم..
عمر:شن في إن شاء الله خير!؟
رزان لون وجهها انخطف وحدهم شبحتلها بربكه..
اصيل:نساعد في بنت خالي ميلاد فحاجه تخص قرايتها..عندي خلفيه ع تخصصها حبيت نخدمها..
شبحلها عمر وقال:باهي عدوا خشوا للحوش..
اصيل بإبتسامه:ممكن لحظه ياخال بس بنوضحلها اخر نقطه..
رزان وحدهم شبحوله برفعة حواجب ..
عمر شبح لرزان شويه بعدين قال :باهي..
اصيل حك مقدمه انفه بظهر سبابته وهو مبتسم وكمل شرح لرزان..وتفرع في شرحه لبعض الأمور اللي خلت عمر حتى هو يركز معاه..
عمر:يعني هكي كنتوا مسكرين النت ع البلاد ؟!
ضحك اصيل وقال:تقدر تقول هكي..
رزان:باهي شكرا..جهازي والكتاب معليش..
ابتسم ومشي..
خدي الشنطه حط فيها اللاب..
والكتاب معاه ومدهوملها..
خدت رزان ومشت طول هي وبنت خالها..
وعمر معاهم بعيونه..
بعدين تلفت لأصيل اللي غير عيونه عن رزان مجرد ماشبحله..
عمر:قاري حاسب انت؟
اصيل بإبتسامه:لا..لكن مطلع..وتقدر تقول فوقتنا هدى مفروض الكل يكون عندهم خلفيه عليه..
ضحك عمر وقال:النقالات خلن عندنا خلفيه عن حاجات واجده..
اصيل:بالنسبه ليا اني التليفون جهاز للتواصل والخدمه بس سواء كان اتصال عادي ولا بالإنترنت..اما بش يكون بأهميه اللاب توب عندي واي شي يخص الحاسب مستحيل..
عمر بضحكه:الهدرزة معاك صعبه..
اصيل بضحكه:لا والله ابدا تبيني ندوي معاك فأي شي حاضر..انا بتاع كلوا..
ضحك عمر وقال:تعدي للمربوعه..
اصيل بإبتسامه:كنت ناوي نعديلها بعد نكمل بحث بنت الخال ميلاد..
عمر بإبتسامه:تعال باهي..
اصيل بإبتسامه:هي..
ومشوا مع بعض وهما يهدرزوا ومرة مرة عمر يضحك وهكي لعند ما فاتوا من ورا القيطون..
هدا كله كان يشوف فيه عماد..
وهو مشتعل بنار الغيرة الشديده..
اللي خلاته يحس بالبغض اتجاه اصيل...
🍃ولأول مرة عماد يكن مشاعر كره اتجاه حد ماتسببلاش بأي أذى مباشر 🍃
🍁🍁🍁🍁
دارو الغدي
سيد المائدة اللييبه..
الكسكسي..ومعاه عصبان ومبطن..
قبل يجهز الغدي..
كانت كامله ببناتها وكنتها في حوش ميلاد..
هدرزوا شويه ..
بعدين جابولهم الغدي..
والبنات يعولوا ويجروا هني وهني..
وعيون امينه ع رزان ومتأسفه عليها هلبه اللي انحازت..
صح نور ناشطه وفالحه وهلبه يتمنوها..
لكن رزان بزايد عليها في كل شي..
🍁🍁🍁
عند الرجاله..
عماد كان اغلب الوقت مركز ع اصيل هلبه..
كيف يهدرز وشن يقول..
من اول مرة جي فيها ففاتحة خوه وهو مركز عليه كيف لافت انتباه الجميع بأسلوبه وكلامه وشخصيته..
وهالمرة زاد ركز عليه لأن لفت الأنتباه هدا ممكن يتعدى حدود المربوعه اللي هما فيها ويوصل لحدود قلبه هو وياخد منه اعز مايملك..
مختار:اني من زمان واخد تقاعد ماعندي ليش نجري ورا الخدمه والتعب وعندي تريس يضربوا الحيط يهدوه..
عبدالسلام بإبتسامه:ربي يحفظهم..شبح لأصيل..برغم صغر سنه لكنه قد المسؤوليه..
ابتسم بإحراج..
ميلاد:كلهم هكي..كيف اللي قاعدين هنى ولا اللي فالغربه تريس وقد ارواحهم..
مؤنس:بارك الله فيك ياخال..
اصيل:شهادة نعتزوا بيها..
شبحله عماد برفعة حاجب..
ميلاد:ماقلت كان الحق..وخيري وعبالسلام ينحسدوا ع نسبتكم..
عماد قلبه انقبض وهو يشوف لخاله..
مختار بإبتسامه:بارك الله فيكم..ساد توا من المدح خلونا فغدانا..
ضحكوا..
وكملوا غدي وهدرزة..
بينما عماد ناض..
الهادي:خيرك؟!
عماد:خلاص الحمد لله..ديما عامر إن شاء الله..
خاله وولد خاله تجاهلوه تماما..
وهو مشي طلع وعيون بوه وخوته وخاله محمد معاه...
🍁🍁🍁
بعد طلع برا..
عيونه جو ع حوش خاله..
بلع ريقه وهو يشوفله بنظرة غضب ممزوجه بالخوف..
بعدين تنهد بضيق..
ومشي كمل طريقه للجردينه..
خش داخل..
عيونه جو ع شجرتها...
مشالها ..
وقف قدامها..غمض عيونه وهو يتنفس هواء مكان بنت قلبه تحبه هلبه..وغالب وقتها تكون فيه..
فتح عيونه...
التفت وقعد يدور جت عيونه ع رشاده كبيرة..
مشالها..خداها قامها..
ورفعها حطها تحت الشجرة ..
وقعمز...
🍁🍁🍁🍁
في الكوجينه الخارجيه وهما يغسلوا في الماعين..
رزان:الله اعلم ع شنو ناويه هالمصديه..
ضحكت حدهم وقالت:والله حتى اني خاطري نعرف..
نور:ههههه..تي والله لما تهبله..
رانيا بلؤم:يستاهل..
رباب وهي تستف في الصفر:يااارب ردله اللي داره فيا..
البنات:هههههههههه..
🍁🍁🍁🍁
والله نفكروا ناخدوا حوش هنى نقعدوا فيه لما نجوا..
فاطمه:وليش ياكبدي تاخدوا حوش و قلوبنا قبل حياشنا واسعات..
كامله بإبتسامه:بارك الله فيكم يافاطمه..لكن حني ان شاء الله ناويين وين نجو نقعدوا 15 شهر واجد راهو..وحني نبوا ناخدوا راحتنا وانتم تاخدوا راحتكم..
امينه بإبتسامه:وتجونا ونجوكم..
ابتسموا..
فاطمه:ربي مايقطعنا عن بعضنا..
كامله بإبتسامه:لا خلاص توا بدل المرة تناسبنا مرتين ربي مايبي كان يربطنا فبعضنا بزياده..
بعضهم بأصوات متقطعه:ايه..صح..ربي يديم الود..
🍁🍁🍁🍁
يامسمومه ليش مادسليش من الورد متاعها!؟
رزان:ننسى..
عماد:ديما عندك منسي اني..
رزان:لازم تقلبها دراما..
عماد بضحكه:مافيش فايده فيك لفعه وقلبك صوان..
🍃كان يذكر فوحده من المكالمات اللي صارت بينه وبينها فيوم من الأيام🍃
شبح للشجرة وقعد يتأمل فيها كيف كبيرة وحلوة والليم اللي فيها حجمه كبير ومنظره مميز..
ابتسم بألم..لما يفكر فالسبب..اهتمامها بيها...
الإهتمام اللي تمنى لو يحصل عشره "بضم العين"..
"كان تحكي تفضفض ترتاح"
عماد:شن تبيني نحكي؟
مالك وهو يشوف لعينه المليانه دموع:تحكي عن اللي واجع قلبك ومدخل عليه الحزن..ومغيرك كليا..
تنهد عماد وقال:يعني بتفهمني انك مش عارف!؟
مالك:نعرف القصه لكن مانعرفش شن اللي داراته فيك بالزبط..
عماد قعد ساكت وماباش يرد..
مالك شبح للشجرة وقال:دامك مش قادر تنسى..
"سامح وافتح صفحه جديده"
ابتسم عماد تهكما وقال:سامح!!عييت واني نسامح وتفوت لعند ماحسابوا سماحي ليهم ضعف وذل..
مالك شبحله وقال:معاك ان هي غلطتت تمام..لكن غلطها هدا شن شكله شن اسبابه وبعد غلطت عرفت روحها غالطه واعترفت وحاولت تعتذر ولالا..
عماد يسمع بس..
مالك:اني عندي علم بالتفاصيل..واللي حكالي نور..نور اللي في يوم من الأيام ماكانتش اطيق تسمع اسم رزان..تخيل تنازلت وكلمتني بس ع خاطرها..تعرف شن معناه هدا!؟معناه البنت فعلا..تحبك..
ضحك تهكما وقال:تحبني كيف تحبني ترا قولي!؟
اشر بسبابته ع الشجرة وقال..جيتها هني..هني جيتها..حتى بعد اللي ريته واللي عرفته كذبت كل شي ومابيتش نصدق غيرها..
هي شن دارت كسرتني يامالك ع خاطر نفسها..خافت نسيبها ناضت بدت هيا وسيبت..للأسف.. هادي ماتحبش كان روحها وبس..
مالك شبحله شويه بعدين قال:يعني خلاص..امل مافيش بكل..
عماد بلع ريقه وقال:نهائي..
مالك هز راسه بإيجاب بعدين شبح للشجره وقال:باهي مادام هكي..علاش انت هني؟
هالسؤال كان زي قبضة اليد اللي كمشت قلبه وشدت عليه بقوة...
ناض..
ولف ومشي طول طلع من الجردينه..
مالك بأسف:ان شاء الله ماتندم ياخوي..
🍁🍁🍁🍁
الساعه 5:30عصرا..
مقعمز مع خوها ويهدرزوا لعند ماطق باب المربوعه..
ناض خوها ومشي طلع..
هو ساوا شعره..
وياقة السوريه متاعه..
وشبح لسرواله..
حرك كتافه..وحط ايده ع يد الكنبه..
ورسم ملامح الجديه الممزوجه بالكبر ع وجهه..
انفتح الباب..
شبحله..
خشت ..
كانت لابسه قفطان لونه ازرق ملكي...
كم طويل..
ضابط ع جسمها..وفيه حزام حوالين الخصر وزي السلسله لونه ذهبي..
رقبته سبعه..بس مش كاشفه الصدر..
كانت لابسه الدبله وحديده رقيقه فيدها..
وطالقه شعرها اللي كان طويل لعند اسفل ظهرها اسود زي الليل ومفرود..
دايرة جزء بسيط منه نازل ع كتفها ..
والباقي ورا ظهرها ومدايرة مكياج خفيف وحلو..
بلقيس بإبتسامه:السلام عليكم..
هو تلخبط كيانه كله..
قرن حواجبه وغير عيونه عنها وقال بشي من الحده:وعليكم السلام..
ابتسمت..وقدمتله..
وقعمزت جنبه...
زاداته على مابيه ..
قريبه عليه وريحة عطرها اربكتله حركة التنفس..
بلقيس:شنو حالك...
محمد بدون مايشوفلها :احمم الحمد لله..انتي شنو حالك وحال هلك؟..
بلقيس:الحمد لله..شنو حال عمتي والعيله..
محمد:كويسين ..
بلقيس بضحكه:يجروا ويوتوا للعرس..ربي يتمم ع خير..
محمد:آمين..
هي ابتسمت لما ركزت ع لون وجهه الأحمر..
نزلت عيونها للسوريه بعدين قربت يدهامنه وحطتها ع ياقة السوريه وقعدت تساوي فيها..
هو تفاجئ من حركتها..
نزل عيونه ليدها بعدين رفعهم فيها..
كانوا ملامحها مميزة ع الآخر وحلوة..
جذباته لين خلاص..
ذهبتله شريته..
بعدت يدها وشبحتله بضحكه وقالت:شكلك طالع مستعجل..
تلاشت ابتسامتها تدريجيا..
لما شافاته قرب منها..
وبدون اي مقدمات..
باسها💕
هي انصدمت..
اما هو فكان منسجم ع الآخر نسي نفسه تماما...
لعند ماحط يده ع خصرها..
ومس حزام القفطان..
استاقض...
بعد شويه وهو يشوف لعيونها الذبلانه اللي كانت تشوفله..
وخر بسرعه وقال بعصبيه ممزوجه بالإحراج:استغفر الله استغفر الله العظيم..
ادنى وقعمز بعيد عنها شوي وهو يقول...ماني جاي ع خاطر هكي اني..استغفر الله العظيم..اعوذ بالله من الشيطان الرجيم..
بلقيس شاده ضحكتها بالسيف..
مسح بيده ع وجهه وقال:هو اللي يدير مراة مازال يمشي القدام!!..لكن الله غالب..شر لابد منه..
بلقيس بدت تضحك ع الهزاز..
شبحلها بطرف عينه وقال:مش كل شي ضحك وتسهويك ..شبح القدام وقال..اني جاي لحاجه مهمه..
بلقيس بضحكه:شنو هي؟
محمد وهو قارن حواجبه قال:نسيت امها فمرة وحده..اعوذ بالله من الشيطان الرجيم..
ضحكت بكتمان..
قعد يحاول يذكر شويه لعند ماقال:ايه..جاي نحكي معاك فموضوع السكن...اسمعي يابنت الناس..
كيف ماتعرفي اني شاري شقه قاعد ندفع فحقها ونحاول بعدها نكملها ..لهدا بعد العرس كان سخر ربك..بنسكنوا في الشقيقه اللي ساكن فيها خوي عمر لين توتى الشقه ..بإذن الله مش اكثر من خمسه شهور  حتقعدي فالشقه اللي فوق السطح..
بلقيس بإبتسامه:مافيش مشكله المهم..معاك انت..
محمد قلبه دق بعنف الشديد وهالشي خلاه يعصب ويقول:خليك جديه شويه وتصرفي بعقل..
بلقيس بضحكه:واني والله جديه وكلامي عين العقل نعيش معاك حتى فدار مع هلك ..
محمد:ماتقولي كلام كبير عليك..
بلقيس بإبتسامه:مش كبير عليا..ولاهو واجد ع هلك اللي ياما تمنيت نكون منهم وفيهم..وراهو مش كلام بس..والوقت يثبتلك..
هو من داخل قلبه بيفر من قوة مشاعره💓
بس من برا شاد روحه كويس..
محمد:باهي توا ناخدها منك كلمه ماتوليش فيها..
بلقيس:لو وليت فيها نستاهل اللي ديره فيا..
هز راسه بإيجاب..
بعدين شبحلها..
ابتسمت...
ساوا تقعميزته...بحيث نصه الفوقاني يجي مقابلها ضم صوابعه لبعض وحطهم ع الكنبه قدامه وهو يقول:من اليوم وبرا غادي..اني المسؤول عنك..مصروفك..قعد يعد ع صوابعه..مايخص قرايتك..دبشك..رصيد..اي شي يخصك اي شي عليا اني..تبي شي..الو محمد نبي كدا كدا..اي حاجه تبي تقضيها..لاتحيري سيدك ولاخوتك..
شبحلها وقال ويأشر ع نفسه..انتي توا ع ذمتي ع ذمة راجل مايرضى حد يتحمل مسؤولية مراته غيره حتى لو كان سيدها ولا خوتها..
هي كانت فرحانه بيه هلبه هلبه..💓
ابتسمت ابتسامه حلوه وعيونها معبيات دموع وقالت:نحبك واجد..واجد..
هو رمش عيونه وغيرهم عنها وقال:شوف اني فشن نخرف وهي شن هي تهتري...
ضحكت بلقيس وقالت:حناي وين نضحك ونبصر واجد لين نصمتها تقعد تدعي عليا جعنك تاخدي راجل وين تضحكي يهزبك..ولأنها من  نسل الصلاح ربي استجاب دعائها..
هو كان يقاوم فنفسه مايبيش يضحك نهائي..
بلقيس بضحكه:رد بالك راهو جدودي من الصلاح بتزودها معاي تحمل مايجيك..
شبحلها بحده بعدين ناض:صبي عدي ناديلي خوك..
هي ابتسمت وقالت:حاضر..
محمد غير عيونه عنها ومن داخل صايرة فيه حاله..
شبحلها تاني وقال:تحركي!..
هي ضحكت وقالت:باهي..
قدمتله..
وهو يشوفلها..
وقفت قدامه وهي تشوف لعيونه بنظرات حلوة..
لخبطاته من جديد..
قربت باساته من خده...
هو غمض عيونه من قوة الشعور اللي حس بيه..
شد يدها..
هي بعدت وشبحتله ..
هو كاد يضعف من جديد..
لكن وخر وقال بعصبيه وربكه:قلنا عدي نادي خوك..قلنا..
سحبت يدها من يده ومشت توجهت للباب وطلعت منه وهي تضحك..
اماهو..
ابتسم ع جنب وهو قارن حواجبه..
وقلبه مازال يدق بقوة💓
🍁🍁🍁🍁
الساعه 7:00مساءا
طبت بنتها ومشت بيها للحوش..
اسيا:نبي..العب
دلال:من بكري وانتي تلعبي خلاص ياسر..
اسيا بزعل:حلاش..
دلال:ليل ماما خلاص..شبحت فوق..شوفي هاه ظلام..
اسيا طرمت شواربها بزعل
دلال ماعبرتهاش..
خشت بيها لحوش خالها...ع طلعة رزان..
رزان بضحكه:خيرها السمحه زعلانه؟!
دلال:تبي تقعد برا الشعشبونه..
ضحك رزان وقرصت خد اسيا قرصه خفيفه..وطلعت ماشيه بطريقها للمخزن بتجيب منه حاجه وصتها امها عليها..
حدا فم بوابه الحوش القديم..
تمام يامنير..بإذن الله غدوة جاي نتم الموضوع....اوكي....باهي...خلاص انت كلمه وقوله عماد جاي وتو يتفاهم معاك....ايه...
كان يتكلم ويوزع فنظره ع المكان..
ثبت انظاره عليها لما شافها جايه للمخزن..
هي كيف جايه بتخش حست بوجود حد في المكان..
قامت عيونها...
شبحاته..
هو:اوكي...تشاو..وصكر...
وهو مازال يشوفلها..
هي ..
كانت تشوفله..
انفاسها متسارعه..
وقلبها قريب يطلع من صدرها ويمشيله..
وعقلها يفكر..
هادي فرصه ولازم تستغلها..
التفاهم وجه لوجه افضل..
طول قدمتله...
قعد يشوفلها..
هو كذلك استغل الفرصه..
وقفت قدامه وقالت بعيون مدمعه:عماد..
هو حط ايديه ورا ظهره وشبكهم في بعض..
رفع حاجبه وهو يشبح القدام وقعد ساكت..
رزان :بالله المرة هدي حاول تفهمني..اسمعني وافهمني ارجوك..
هو مادارش اي ردة فعل..
رزان بلعت ريقها وقالت:اني غالطه نعترفلك بيها مرة تانيه ومليون مرة..بس والله العظيم كل اللي درته كله لأن قلبي انجرح..لأني..لأني نحبك واجد ..ماتحملتش اللي سمعته..عشت شي ربي بس اللي يعلمه...ماتحملتش فكرة انك تخوني ولا قدرت نعديها..من قهري درت اللي درته..
عماد بضجر:نفس الدوة..نفس الكلام تعاودي فيه مافي شي جديد..اساسا مهما تقولي معاش ينفع خلاص تعبي فروحك ..
رزان رفعت حواجبها ودموعها ينزلوا وقالت:ياربي..كأنك مش عماد اللي نعرفه بكل..عماد اللي قلبه كبير وطيبته يوزعها ع الناس ومازال تبد..عماد اللي علمني اني حاجات واجده..علمني نحب دون مقابل..نسامح ومانشيل فقلبي ع حد...ونخلي كل شي ع ربي..انت اللي يوم من الأيام قتلي ان اللي نحبهم لو غلطوا فيا نعطيهم مليون فرصه..وين عدا كلامك هدى..ولا كان مجرد كلام وخلاص!!
ابتسم تهكما وقال:البركه فيك..
ضيقت عيونها والدموع ينهمروا منهم..
عماد:حتى انتي علمتيني...علمتيني مانعطي فرصه لحد وصل فكرامتي واهاني..ولا نسامح حد يستغفلني ويضحك عليا..
ويستخف بيا..واهم حاجه علمتهالي اني مانفضل حد ع نفسي..
بانت ع وجهها ملامح اليأس والعجز بكت وهي تقول:عماد..عماد..
معاش قدرت تقول كلام تاني مش قادرة تقول شي..
عماد بقسوة:انسيه عماد..طلعي من راسك عماد..فوتيه عماد خلاص..كان في..وتوا معاش في ..ياريت ياريت معاش تحاولي تكلميني مرة تانيه ولا بأي شكل..مانبيش ندير حركه خيي ونمشي لبوك وخوك ونقوللهم شدوا بنتكم..
انصدمت بقوة في الكلمه...
مش هي بس..
حتى دلال..
دلال اللي ولت ادور ع مداس بنتها حدا مكان الفرن وصدفة سمعت نقاشهم وماقدرتش تمشي..
دلال بصدمه:ماحقره!
زادو توسعوا عيونها لما سمعت رزان تقول..
رزان بتحدي:حط عينك فعيني وتكلم ترا..
قلبه ارتعش..
كان عارف روحه اضعف من انه يتحمل دموع عيونها..
لكن نبرة التحدي اللي كانت واضحه فكلامها خلاته يتحداها..
وينزل عيونه ويشوف لعيونها..
برغم اللي صار فيه لما شافهم..
لكن لما اذكر نظرة عيونها اللي كانت كلها قسوة هداكا اليوم المشؤوم....قسى قلبه بكل قوة وقال:كان هادي مشكلتك هاه حطيتهم فعيونك ونقولهالك انتي اكبر غلطه غلتطها فحياتي ونادم عليها اشدالندم ولا يمكن مازال نكررها مرة تانيه..
هي..
كانت حاسه وكأنه واخد قلبها ويمزق فيه بسكاكين كلماته اللي كانت قمه فالقسوة..
ابتسم تهكما وقال :ع الله تكوني فهمتي بس..
هي تشوف لعيونه بضعف...
وهو يبادل فيها بنظرات كلها قسوة وكبر..
بعدين لف ومشي..
وهي معاه بعيونها..
هو يمشي..وهي قاعده تموت بكل معنى الكلمه من داخل..
لأنها تأكدت خلاص ..خسراته...
حتى لو كان في منه اتجاهها مشاعر واضح انه يبي يقتلها..وينهيها..
لما اختفي من قدامها..
كانت حاسه بروحها حتنهار..
حطت يدها ع الحيط اللي جنبها بش تشد روحها ع قد ماتقدر وماطيحش..
تقعد رزان اللي تحاول تحافظ ع شي من قوتها وتتماسك..
"درتي اللي عليك"
رمشت عيونها بصدمه لما سمعت الصوت..
شبحت جنبها..
دلال:درتي اللي عليك خلاص...ساد..
رزان بنبرة باكيه:مادرت شي قدام اللي هو داره يادلال..
دلال:اللي نعرفه ان اللي داره اي راجل مفروض يديره يجري فجرة البنت اللي يبيها ويدير كل شي بش يكسب قلبها يعني عماد مازادش شي عن المفروض..
غلطتي..مفروض تصلحي غلطتك..وحاولتي تصلحي واعتذرتي بدل المرة اتنين وتلاته خلاص
رزان غيرت عيونها عنها وقعدت تشوف للطريق اللي مشي منها..
دلال:الراجل بطبيعته هكي يارزان يحب يتعب ع الحاجه اللي يبيها..ولما المراة تبدا هي اللي تجري فجرته وادور فرضاه تلقائيا حيكبر راسه ويتكبر..
رزان شبحتلها شويه..شيئا فشيئا بدت ترتسم ع وجهها ملامح البكاء...
حطت ايديها ع وجهها وانهارت بالبكي وهي تقول بالعبره:نحبه..نحبه يادلال..
دلال حضنتها وقالت بحزن:عارفه..عارفه..
🍁🍁🍁🍁
حي ع المصديه..تو بدسي عليا وبديري اسرار..
بلقيس بضحكه:مش اسرار هدين ياغبيه..خصوصيات..خصوصيات...
حدهم بضحكه:باهي ياخصوصيات انتي المهم اللقاء كان حلو..
بلقيس بهويام:احلى حاجه صارت في عمري كله...
حدهم :ههههههه..ياستي ربي يهنيك..وعقبالنا حتى حني 💕
بلقيس بضحكه:لا انتم مازال عليكم قاعدين بيبيات..
حدهم :ياكبيرة انتي..
بلقيس:ههههههههه
🍁🍁🍁🍁
شنووو!!!؟
ايمن :وطي حسك يمي !
هندا بصدمه:مازلت بيبي راك..
ايمن برفعة حاجب:هدي اخرتها طلعت فنظرك بيبي!؟
ضحكت هندا وقالت:مش هدى قصدي ماما..اني قصدي ان الحاجات هدي حبيبي مازال بكري عليها..
ايمن :بكري شنو !!يمي اني نبي ندير حاجه رسميه مانبي نخون صاحب الفضل عليا بعد ربي ولا نبي نخون القرآن اللي حفظته.
هندا ضحكت وقالت:تحبها ماما؟
ايمن قريب تبخر من الإحراج غير عيونه عن أمه وقال:يمي شن الأسئله هدي يمي..وبعدين معاد تقولي ماما  ما ماما هدي..
ومشي طلع من حداها وهي تضحك عليه..
🍁🍁🍁🍁
طلعت من الحوش فيدها ملاية الصلاة..
ومشت بطريقها  للحوش القديم ..شبحت جنبها لقت خوالها محمد والهادي واقفين يهدرزوا..
بعدين شبحت القدام وكملت طريقها..
وصلت فم البوابه وخشت وتوجهت لدار خالاتها زمان..
خشتلها..
دلال:هاك رزونه..
ناضت رزان ومشت بخطوات متعبه شويه..خدت الملايه من دلال وبدت تلبس فيها..
دلال طلعت من حداها ومشت خشت للكوجينه..
شبحت للروشن لما سمعت صوت خالها محمد يقول..
محمد:مستحيل ياهادي شن تقول انت!؟
الهادي:مش عارف..مش متريح يامحمد..انت ريته اخر مرة لما تلاقينا فسوق السعي كيف يضحك بهزوة وين يشبحلنا..
محمد:ياراجل بلعاني يستفز فينا ..حركات فروخ..
تنهد الهادي وقال:ان شاء الله يطلع هكي يامحمد وماديرها فينا اختك..
محمد بثقه:مستحيل..اني نعرفها حميده كويس..ماتهونش عليها نفسها ولاهلها يهونوا عليها..حط يده ع كتف خوه وقال..اطمن من ناحيتها وماتخليش هالندل يشككك فأختك..
الهادي هز راسه بإيجاب بعدين قال:تعال نعدوا للمربوعه..
محمد:هي
ومشوا مع بعض..
دلال من ورا الروشن:زعمه اديرها وتوليله !؟
شويه وطلعت رزان من الدار وقالت:هيا دلال..
دلال شبحتلها وابتسمت بعدين قالت:هاه شنو تمام توا؟
هزت رزان راسها بإيجاب..
جتها دلال وحاوطتها بيدها ومشت هي وياها..
🍁🍁🍁🍁
بتردهااااا!!؟
الصديق:وطي حسك..
حليمه بصوت عالي:لايابابا ماتولي الا ع جثتي..
الصديق:تي اسكتي خل نفهمك..
حليمه:لالاا اني مانفهم..ماتولي يعني ماتولي ياصديق..
الصديق:حليمه!
حليمه بتفنيصه :صديييق!!
الصديق باس راسها وهي تحاول تبعده..حضنها وقال:تعالي معاي الدار نفهمك..
شبحتله شويه بعدين قالت:باااهي..
ابتسم وخداها ومشوا للدار..
🍁🍁🍁🍁🍁
هديكا الليله كان الكل مشغول بالترتيبات للعرس اهل العريس والعروسه..
اهل العريس اللي بيديروا عرسهم وين ماساكنين ولادهم..
وفي ناس من سرت بتجي تحضر..
كانوا برا الرجاله يشوفوا مساحه مناسبه بش ينصبوا فيها خيمة الرجاله..
نظام خيم اوروبيه..
وبعد حوالي ساعة حددوا المساحه..حتشمل حتى جزء من ارض عيت عبدالله..وبطلب من الحاج عبدالله نفسه..
مختار:بارك الله فيك ياحاج..
عبدالله:رانا عيله يامختار ومؤنس ليه سنين معانا راح ولدنا حتى حني راهو..
ضحك مختار وقال:اكيد ولا ليكم فيه خلاص..
من بعيد شوي..
مؤنس:لا عاد ياسليمان واجد هكي ياراجل..
سليمان:لا مش واجد بكل قول شوي..
مؤنس ابتسم بإحراج وقال:مش عارف شن نقول..
سليمان بضحكه :ماتقول شي..
....
نعرف شركه غادي عندهم المحرك متاعها..
الهادي:الحكايه تبي..
اصيل ابتسم وقال:نخدمكم بعيوني..
ميلاد ابتسم:لا ياولدي..تسلم ماتعب روحك ندبر..
اصيل:مالا والله لما نجيبه ياخال وماك حاط فيه قرش..
انصدموا الهادي وميلاد..
اصيل بإبتسامه:نحنث تكسب إثمي..
ابتسم ميلاد بإحراج وقال:ربي يهديك ياولدي وخلاص..
اصيل بإبتسامه:الحمد لله ديما هاديني للباهي..
ضحك الهادي وقال:والله خشيت خاطري واجد..
ضحك اصيل وطبطب بيده ع صدره..
وميلاد يشوفله ويضحك..
....
مالك :كاسرلي رقبتي كسرة..
حمزة بضحكه:علاش!!
مالك وهو يشوف لأصيل بإمتعاض:مش عارف من يحساب روحه..مش زي خوته
حمزة:تبي الحق اني العيله هادي كلها ماكنتش طايقهم لكن مع الوقت بديت نتقبل فيهم..بالذات اصيل جوه يعجب فيا..
مط مالك شواربه بإزدراء..
قدام المربوعه..
يشبحله وهو يشوف لأصيل قاله:امتى تولي..
عماد:التلات الجاي
محمد:ان شاء الله..
عماد:هادم مطولين هني!؟
محمد؛مني!؟
عماد شبحله:جماعة سرت..
محمد برفعة حواجب:شن قصدك؟
عماد شبحله وقال:قصدي خلاص ساد *****هكي كبرها يدوروا وين يقعدوا فيها برواحهم..
محمد:شن تقول انت!!؟
عماد شبحله شويه..بعدين شبح لأصيل..
لقاه يضحك وهو حاط يده ع كتف توفيق..
عماد:شي انسى..ولف ومشي ...
ومحمد معاه بعيونه اللي يشوفوله بإستغراب..
🍁🍁🍁
تاني يوم..
الصبح..
الساعه الثامنه صباحا..
رفقه:حاجه بسيطه ماتتلاحظش..
رزان بملل مدت وجهها لرفقه وقالت:همم..
ضحكت رفقه ورسمتلها عيونها بالأيلاينر..
بعد كملت..
شبحت رزان للمرايه...
رفقه بضحكه:طالعه عسل..
ابتسمت رزان مجامله..
لبست شنطتها متاع اللاب..
وخدت شنطة اليد وطلعت من الدار..
ورفقه ولت رقدت..
برا..
رزان وهي طالعه تلاقت مع مرت عمها..
رزان :صباح الخير..
غزلان بإبتسامه:صباح الجمال..شن الحلاوة هادي كلها ع الصبح..
ابتسمت رزان بخجل وقالت:تسلمي..
جي قصي يجري:هيا قالك توفيق..
رزان:هاني طالعه..سلام مرت عمي..
غزلان:في حفظ الله..ومشت للكوجينه..
مشت رزان...
فاتت من حدا الصاله..
كانوا فيها امها وعمتها نعيمه ومعاهم دلال نايضين..
شبحتلهم وابتسمت وهما ابتسمولها...
قعدت دلال معاها بعيونها وقالت فنفسها..
"كان نعرف شن صار بينك وبينه بش تنازلتي لهالدرجه"
🍃دلال تعرف بقصة تانيه غير القصه الحقيقيه..
ماحد يعرف اللي صار بالزبط..
غير رفقه ومروان وغاليه وحدهم وبلقيس..ونور اللي اضطرت تقول لمالك..
القصه المعروفه عند الباقي..
ان رزان سمعت كلام عن عماد وصدقاته وسيباته طول ولما عرفت ان اللي سمعاته مش مزبوط ندمت وتبي تصلح غلطها وتحاول ترجعله🍃
🍁🍁🍁🍁
برا..
كان توفيق واقف ع سيارته ومعاه خاله حسن  يهدرزوا..
في الوقت نفسه اللي كان جاي فيه عماد لسيارته..
الوقت نفسه..
اللي طلعوا فيه مؤنس واصيل من الحوش..
الوقت نفسه ..
اللي نزلت فيه رزان من الدروج..
اصيل لما شافها ابتسم من قلبه شبح لخوها وقال؛صباح الخير خديوي ..
شبحله عماد بعدين التفت ..
لقي رزان جايه لسيارة خوها..
توفيق بضحكه؛صباح الخير..هي نطلعوا..
اصيل وهو يسرق فالنظر لرزان وهي تفتح في باب السيارة:اكيد..
مؤنس:بتسوق انت..
اصيل ضحك:Ok..
فجأه..
فاتت من قدامهم سيارة عماد..
حرق العجل ومشي بسرعه ...
كلهم شبحوا للسيارة بإستغراب..
ورزان مابتش تشوف نهائي..كانت تحاول تتماسك ع قد ماتقدر..
مشوا مؤنس وأصيل للسيارة..
اصيل:خيره هدى!؟
مؤنس:الله اعلم..هي اركب..
ركب اصيل..ومؤنس مشي ركب..
شد اصيل الدومان وهو يراجي فسيارة توفيق امتى تتحرك..
تحركت..
قعد يشوف لرزان بإبتسامه جانبيه حلوة..
اصيل:مادارت فالسراته *****هدي..
شبحله خوه وضحك بإستغراب:من اي ناحيه..
اصيل شبحله وقال: ايسار القفص الصدري ياشيخ..
مؤنس ضيق عيونه  بشك وهويشوف لخوه...
اصيل ضحك وتحرك طول وراهم...

...يتبع فالتكمله للجزء 104 بإذن الله...