المتمردين

العشق المتمرد

#العشق_المتمرد

#جمان_فريد

الجزء 83

قاعة الإمتحان..
فاتت نص ساعه..
وهو مقعمز حاط رجل ع رجل ويراقب فيها هي بس ومسيب مهمه مراقبه باقي الطلبه ع زميله..
يبي يشد عليها اي لقطه..لشي فباله يبي ينفذه..
هدا امتحان نهائي للماده..
50%من معدل الماده منه هو...
وهي فعز انهماكها في الإجابه..
بتمد يدها للمحايه بش تاخدها..
زلقت ورقة الآسئله اللي كانت شادتها بيدها ..
شدتها قبل اطيح..
وهي هكي دارت حركه..
القناص استغلها بسرعه..
زين الدين:انتي ياطالبه..
الطالبات والطلبه قام عيونهم فيه..
رانيا قعدت تشوفله..
زين وهو يوزع فنظره ع الطلبه اشر بيده ع مكان معين:جيبي بضاعتك وتعالي هني..
انصدمت رانيا في المكان..
طاولته اللي مقعمز فيها..
قدامها كرسي..
يبيها تجي دير امتحانها ع طاولته وهي مقعمزة قبالته مباشرة..
هي برغم تجاهلها ليه بس ملاحظه انه يديرلها فحركات مش ولابد..
وهالمرة كثر ع ماوصوه...
رانيا:مادرت شي..
هو غمض عيونه بنفاد صبر وقال بحده مع صوت عالي وهو يأشر بصبعه ع الطاوله:قلت تعااالي هني..
الأستاذ يشبحله ومش قادر يدخل..
والطلبه يشوفوا لرانيا وخلاص..
رانيا :اني مادرت شي..
شبحلها بنظره تخوف..
هي تشبحله بتحدي..
زين الدين:تعرفي كان ماجيتيش.. الماده هادي تكملك عمرك فكلية الهندسه ماك مصفتيها..
رانيا طارتلها خلاص...
رانيا بحده :مش ع مزاجك هي..
اتفاجئوا الطلبه والأستاذ التاني بجرأتها فالرد..
اما هو عجباته اكثر واكثر...
زين الدين ابتسم بكبر:ع مزاجي..تبي تكملي امتحانك هني كملي ماتبيش ..اشر بيده لباب القاعه..وقال...توكلي...
شبحتله بغل..
ناضت خدت ادواتها وحطتهم فالشنطه بعصبيه..
لبست شنطتها..
وطول توجهت طالعه من القاعه..
هو بانت ع وجهه ابتسامه غرور خفيفه وجه كلامه للطلبه وهو يقول:الهوا بوراقيكم...
برا..
مانزلتش دمعه..
ع قد مااستفزها القناص...
رانيا :جعنها لاصفت...
ومشت قعمزت في الواجهه واتصلت بحمزة يجي يروح بيها..
🌴🌴🌴🌴🌴🌴🌴🌴
في الطريق..
يسوق وهو كله خوف وألم..
فجنبه ولد اخته دموعه معبيات عيونه وقلبه موجوع..
وراه خالته اللي تبكي بصمت..
وفي جنبها امها اللي تدعي ودموعها ينزلوا..
طول الطريق ولا كلمه...
لعند ماوصلوا للمستشفى..
درس..
نزل عماد..
ونزلت غاليه ومشت طول للباب التاني فتحاته وساعدت امها في النزول..
وهانيبال نزل حتى هو..
وكلهم توجهوا لداخل..
🍁اول ماوصلوا وين مايديرولها في العمليه..
لقوا الصديق واقف وواضحين الخوف والحزن ع وجهه ..
قدمتله فاطمه تمشي بسرعه:شن ترالها ياوليدي؟
الصديق بألم:الله غالب ياعمتي..
هانيبال:شن صارلها بالزبط..
الصديق:مانيش عارف ياهانيبال حدي روحت بناخد من الحوش حاجه لقيها ملوحه في الدار والبنيه حداها تعيط..
غاليه :وينها حنين..
الصديق:عند اختي حوا..
شويه وطلع الدكتور..
قدملهم وهو يشوفله بخوف ولهفه..
الدكتور:الحمد لله مافيش اي مضاعفات وربي يعوض خير إن شاء الله..
هزوا روسهم بإيجاب والألم مسيطر عليهم..
عماد بخوف:يعني هي توا حالها باهي..
الدكتور:ايه اطمنوا العمليه مادارتش اي مشاكل صحيه تانيه..
غاليه بألم:الحمد لله ع كل حال..
الدكتور: هي لازم تقعد هنى اسبوع..
عماد مرر نظره ع المستشفى ماعجباش الوضع..
راجا لين الدكتور مشي..
مشي لراجل خالته وقال:في عيادة فطرابلس نعرف صاحبها لو فيها كيف ترفعها غادي..
شبحله الصديق شويه بعدين قال :باهي..
🍁الصديق
اللي عيون فاطمه كانت عليه تشوفله وقلبها مقبوض حاسه انه متألم ومحبط..واضح انه كان يراجي في العيل بشوق..
فرص بنتها قاعده تقل....
والجاي مخوفها...
🍁🍁🍁🍁🍁🍁
سمعوا خواتها باللي صار..
انصدموا وبكوا عليها بكي تقول هما اللي فقدوا العيل بالذات كفايه..
🍁وين جابها راجلها لطرابلس
للعيادة اللي قاله عليها عماد
كلهم مشوا غادي
حتى حميد ومرته
وضعها كان يقطع القلب..
كانت اغلب وقتها ساكته يدوب ترد كان كلموها..
كان مسيطر عليها الإحباط..اليأس...الحزن...
القنوط..
القنوط بالذات هدا شعور يحسس صاحبه ان كل شي انتهي خلاص..
لاعاد في امل..
ولايمكن مازال الحظ يضحك..
ومعاش رحمة تنزل ...
خلاص..
ع قد ماقالولها من كلام فيه مواساه للأسف ماحد قدر يهون عليها ولوشويه..
اللي مخوفها جمودها ..
ردة فعلها جامده..
حسوها ماطلعتش اللي فقلبها ...
وزادو خافوا عليها اكثر...
🍁🍁🍁🍁🍁
كلا بنات عمي بختهن بالهون..
سعيده:تي هي حميده ماصدقت تزوجت ودارت عيل بعد راح عليها الوقت..وشوفي شن قاعد يصير فيها..
امال:تو تشوفي راجلها يمشي يمشي وياخد عليها..
سعيده:من الأول واضحه..
عزيزة:خلينا منهن توا..والهوا فموضوعي كيف بينفتح مع خوتكن..
سعيده:خليهم عليا تو نعرف كيف نكلمهم..
عزيزة:خايفه من خليفه يعفس فيا.
سعيده:تس مايديرهاش..
امال بضحكه:لكن تعرفي باهي اللي صار هكي بيش جاك خطبك المنجوه متاعك..
ضحكوا الثلاته..
وكانت بنت خوهم ورا الحيط تسمع فيهم..
حدهم فنفسها"ديما واقف معاكم الحظ انتم "
تنهدت بضيق..
ومشت وهي مضايقه ع اللي صار لحميده ووجعتها هلبه.
جايه بتخش لدارها تقرا..مافيش نيه..
غيرت تفكيرها وتوجهت جهة الدروج..
ركبت فوق...
كان الجو لطيف....
خدت نفس وقعدت ادور فيه...
وقفت لما سمعت صوت يتلى في القرآن..
كانت سورة الأعلى..
تلفتت ايمينها..
لقاته شاد مصحف صغير ومقعمز فتركينه ويسمع.
قعدت تتأمل فيه وخلاص...
💓إن هذا لفي الصحف الأولى صحف ابراهيم وموسى💓
شبح للمصحف وقال:تمام هكي..
هبت نسمه..
حركت شعره نزلت خصله منه ع عينه وخرها بصوابع ايده اللي تخللوا شعره للخلف..
هي كبنوته فهداكا العمر..
التفاصيل هادي تجذبها وتلعب ع اوتار المشاعر عندها..
مازال تشوفله..
لعند ماهو..
صكر المصحف بالسوسته "سريته"..
تنهد وقال:الجو سمح ناقصه شرمولة مؤنس وجلفين دلاع..ابتسم..
هي ابتسمت لما ابتسم..
غير عيونه ايساره..
شافها ..
تفاجأ..
هي سرعان ماأستاقضت..
تلقائيا بعد شافاته رفع حاجبه..
شقلبت عيونها ولفت وتباعدت...
هو ضيق عيونه ومط شواربه بإزدراء..
ناض..
ومشي طول نزل لوطا...
هي سمعت تخطيف الشباشب..
تلفتت..ومشت بسرعه وادرقت ورا الخزان شافاته كيف نزل..
ابتسمت:صح طاووس لكن يهبل...ويطلع عليه الغرور..ضحكت ..ختسلمه...هههههه...
تغير جوها تماما انفتحت نفسها ع القرايه..
وطول مشت نزلت وهي تغني..
شو واثق بحالو وشو قلبو قوي...
وقلبي من جمالوا دايب مكتوي..
🍃🍃🍃🍃🍃
بعد 10ايام بالزبط..
روحت حميده من طرابلس طول لحوش اهلها..
طلبت امها من راجلها هالطلب وهو وافق..
اول ماخشت للحوش لاقتها بنتها..
لما شافتها..
كانت تشوف في كنز...
حاجه ثمينه ..
لا..حاجه لاتقدر بثمن..
قلبها من البدايه كان حاسس انها مش حتجيب غيرها..
مشتلها تجري..
نزلت ع ركابها وحضنتها بقوة وقعدت تبكي بالصوت..
وياناري البنيه خافت ..
قعدت تبكي مع امها..
فاطمه تمسح فدموعها بطرف رداها ومقهورة لين خلاص ع بنتها..
اما غاليه بتموت من البكي طلعت من حداهم وخلتهم..
صوت عبرات حميده كانوا يسمعوا فيه هانيبال وعمر ومحمد التلاته مخنوقين لين خلاص..
بس اكثر من تأثر فيهم محمد..
انوجع هلبه...
كل ماتنزل دمعه منه يمسحها بسرعه..
🍁فاطمه ماقدرتش تتحمل..
قدمت لبنتها وحضنتها ..
فاطمه:خلاص يابنية روحي خلاص..مقدر من ربي يابنتي مقدر ومكتوب..
ع خشة سعيده ورزان ومعاهم حدهم الجده وحدهم الحفيده...
حميده ببكي:شن دايرة تحته ربي يمي..شن دايرة قوليلي...ليش يدير فيا هكي...ليش..
فاطمه:يابنتي ماتقوليش هكي حرام عليك..هدى ابتلاء يابنتي ابتلاء...
حميده بقهر:آاااااه يمي آااااه..مقهورة يمي ع روحي مقهورة..
كلهم تأثروا هلبه...
سعيدة قلبها وجعها ع الآخر..
فهديكا اللحظه بس خطر عليها خوها خليفه واللي دارته فيه وفيها..
حتى خوها مش متريح فحياته..
اساسا هو ومرته ديما فمشاكل وياما صار بيناتهم..حتى في الحمل صبريه عطلت...بعد سته سنين بش حملت وجابت..
بس مع هدا كانت تحاول ترضي ضميرها لما تقول فنفسها...
"نصيبه ونصيبها"..
🍁🍁🍁🍁🍁
ابتلاءات من الله..
هانيبال:عارف..بس في ابتلاءات ساعات فوق طاقة البنادم..
مرام:هانيبال ربي مافيش ارحم منه ومايكلف حد فوق قوته صدقني حميده حتتعادها وترجع كيف قبل بس هي تبي ترتاح نفسيا وجوها يتغير...
هانيبال:هدى ليش جيبناها عندنا..
مرام:ربي يصبرها ويعوضها خير..
تنهد هانيبال وقال:آمين..
مرام مضايقة هلبه ع خاطره وتبي تخفف عنه :هاني..
ابتسم:جديده هدي..
مرام بضحكه:اسمك نطقه يدهش..
هانيبال برفعة حواجبه: حتى اسمي مش عاجبكوو!؟
مرام:هههههههههه...مش هكي..بس تحسه ثقيل شويه ع اللسان..
هانيبال:جيبلي حاجه وحده عاجباتك انتي ..
ضحكت:والله واخد عليا فكرة غلط..
هانيبال بإبتسامه :بالعكس فكرتي عنك صح..
هي ابتسمت وقالت:شن هي فكرتك عني؟
هانيبال ابتسم وقال:مراة تملى العين..
حطت يدها ع قلبها اللي قريب طار من مكانه..
قعدت ساكته..
هانيبال وهومبتسم برفعة حاجب:شكلك دختي..
مرام :احمم..قاعدة نفكر في الكلمه..
هانيبال:حتى هدي بتفكري فيها !!
ضحكت مرام..
هانيبال بإبتسامه وهو قارن حواجبه؛نقدر نقولك ان ضحكتك  عاجبتني..
مرام ضحكت بخجل وقالت:تقدر..
هانيبال بإبتسامه:وسمحه ونبي ديما نسمعها..
مرام:هههههههه..
هانيبال:ووين نسمعها قلبي مش عارف شن يصيرله..
مرام:هههههههههه...خلاص باهي..
هانيبال :ههههههههه...خلاص نخلوا الباقي بعدين..
مرام:ههههههه..
هانيبال بإبتسامه: ربي يحفظك ويخليك لهاني..
مرام تضحك وهي مش مصدقه..
وفرحانه بطير..
لتوا...حاسه انه حلم..
هانيبال اللي توا يكلم فيها ويتغزل بيها هانيبال!!
الحلم المستحيل..
ولاحقيقه..
ونصيب..
وقضاء وقدر ....
🍃فرحة مرام ياالله 🍃
🍃🍃🍃🍃
واهي ايام ..
وبتعدي...
ع كل البشر بأحوال مختلفه...
حاليا...الأسبوع الأخير من شهر شعبان
تاني اسبوع من شهر 7..
كفايه وسعد ومعاهم نورهان مشوا للعمره...
والأولاد التلاته ناويين يرمضنوا عند خوالهم..
لما سمع بيهم حمزة..خدي اجازة حتى هو بش بيمشي غادي...
غاليه كانت اكثر من فرحان بجيتهم..
تبي من يجي يغير جوهم ويملا عليهم الحوش..
وهما من لما كانوا صغار ماليينه بدوشتهم..
وحتى لما كبروا...
بس يقعد في حد خلا مكان لايمكن غيره يقدر يعوضه..
🍃رمزي🍃
وآه من غيابك يارمزي..
مخلي مكانك يارمزي...
عرجون الفل ناقصه الورده يارمزي...
ليلة اللي بيجوا الولاد غاليه كانت توتي فعشاهم وتبكي..
لمتهم هادي حيبان فيها فقدان رمزي هلبه..
🍁🍁🍁🍁
الساعه 8:00مساءا..
وصلوا سيارتين..
خشوا للقطعه...
سيارة حمزة...
وسيارة عماد ومعاه خوته...
كلكسوا اول ماخشوا..
غاليه طلعت من فم البوابه وهي تضحك..
ووقفت فبدايه ممرها...
ع طلعة رزان وجية حدهم من حوش جدها .
رزان"عطيك مايرفعك"..
حدهم فاتت من حداها وهي مطنشتها..
ووصلت وين مافي غاليه وتشوفلهم معاها...
نزلوا مالك ومروان..
مروان لابس شورت جنيز وتيشرت رصاصي..وفيده شنطه..
مالك سروال جينز..وتيشرت ابيض في الأسود..
نزل حمزة وهو لابس سوريه نص كم وسروال جينز..
واخر من نزل عماد بعد شيك ع السيارة من داخل..
صكر باب السيارة..
كان لابس تيشرت ابيض وشورت قهوي..
وشنطة ظهر.
وفي شنطة فيده..
قدموا لخوالهم عمر ومحمد والهادي يسلموا عليهم..
حدهم:نحس فيهم كان يرضعوا فعسل مش حليب..
غاليه:ههههههههه..
رزان شبحتلها شبحه ناريه ..
وبدت تغلي..
بعد سلموا ع خوالهم..
سبقهم عماد لغاليه..
كان يمشي..
ويشوف لرزان..
وهي متجاهلاته..
وصل فيهم ..
عماد بإبتسامه:غلوشي..وحضنها..
هي تضحك:حمد لله ع سلامتك..
عماد بعد:الله يسلمك...
مد يده لحدهم:شن جو..
حدهم صافحاته بإبتسامه :تمام...حمدلله ع سلامتكم...
عماد بضحكه:الله يسلمك ياشفشه..
رزان كانت تشبح لإيديهم..
وكأنهم طولوا وهما يسلموا ع بعض.
نار قلبها الوالعه...
خلتها ادير حركه لأول مرة فحياتها اديرها لعماد..
مدت يدها ..
هو شبحلها متفاجئ.
وغاليه تفاجئت اكثر منه .
طلق يد حدهم وسلم عليها...
شد ع يدها هلبه...
هي قلبها طير طاير💓
في تنهيده تبي تطلع وهي تكتم فيها بالسيف..
عماد:شن جو..
رزان بالسيف ردت؛تمام..
حدهم وغاليه يشوفولهم...
عماد ماباش يحول يده...
غاليه:هيييي..هووووو..
هو استاقض..
طلقت يدها...
هو شافلها..
بعدين نزل يده وحطها فجيبه..
هي عيونها قعدوا لوطا..
وهو انحرج..
ع جية مالك وحمزة ومروان..
غاليه بعتب:باااهي والله اللي خطرنا علي حضراتكم وجيتونا وريناكم..وتناااازلتوا..يابشاوات..
ضحكوا بإحراج..
عماد شبح لرزان من فوق للوطا..
كانت لابسه شورت للركبه..
بس التشيرت كان طويل وموديله واسع..
لكن سيقانها باينات..
جي قدامها ودرقها..
هي لأنها ملعقه معاش بانت 😂..
فنصت :هييه.. حول..
هو ولاكأنه يسمع..
حمزة بضحكه:والله والله خدمه..
غاليه:باهي انت خدمه ..مروان امتحانات..السي الدكتور كان فاضي..
مالك ابتسم بإحراج..
عماد شبح وراه..مالقاش رزان..
شبح جنبه لقاها واقفه..
جي قدامها مرة تانيه .
رزان:امتى تبطل براده امتى..
عماد بحده:بري البسي حاجه محترمه نبطل براده..
حدهم انتبهلهم..
رزان؛مادخلكش..
عماد:باهي صكريه راسك زيدي.
رزان:انتاا..مااا دخلكش..
عماد تنرفز:شوفي بنت خالك اصغر منك وشن لابسه..
حدهم ابتسمت بمكر ورجعت شبحت للولاد وغاليه..
رزان اضايقت لين خلاص:معاش تقارني بحد..
عماد:لابنقارنك لما نشوفك اديري فالغلط..
رزان :تعرف..نكرهك في الدم..
ومشت للحوش...وهو معاها بعيونه لين خشت..
ابتسم وقال:احسن..
قدم لخالته وخوته..
وقعد يهدرز ويبصر كعادته..
🔥💓
رزان لما روحت جت بتحلف ماهي موليه.. بس لما خطرت عليها حدهم..
غيرت رايها...
مشت زيها زي البنت الطيبه لدارها..طلعت توته مستورة..
بش بتلبسها وتولي..
🍃🍃🍃🍃
عدوا اول عشرة ايام..
كانوا حلوات هلبه..
برغم حرارة الجو..
وانقطاع الكهرباء اللي يستمر لساعات..
بس هما كانوا دايرين جو مليح...
في ليله من الليالي..
غاليه قالت لحدهم ورزان يجوا يسهروا معاها..
وقالت رزان بتنادي بلقيس وافقتها غاليه..
الساعه 11:00..
خشت للقطعه وفيدها حافظه..
كانت لابسه عبايه ووشاح...
رنت ع رزان طلعتلها..
في الوقت اللي كانوا فيه الولاد مقعمزين في المستراح اللي قدام الحوش بعد روحوا من صلاة التراويح..
محمد:بالله العزيز الدايم بالله العزيز الدايم الا بعتهله ب7000..
عمر:من يومك واحد لخباط..
عماد بضحكه:شكلي طالعله..
محمد بإزدراء:كلا انت وخالك هدى نماذج معفنه..
ضحكوا الزوز بصوت عالي...
مالك بضحكه؛مادورهمش ياراجل احكيلي اني نصدقك عادي..
زادوا ضحكوا...
مروان بضحكه:رقتله راهو خلاص..
ناض:كمشة كلاب..كلب اللي يقعمز معاكم.
حمزة :تي غير لا لالا حرجت حمودي.
قعدوا يضحكوا...
خش داخل وهو يسب فيهم..
وهما يضحكوا زي المهسترين..
بلقيس وهي ماشيه مع رزان جهة البوابه:خزي عليهم رقوهله..
رزان:ياحنه عليا..
بلقيس شبحتلها بربع عين وقالت:مصديه..
ضحكت رزان...
خشوا..
شافوا للكوجينه لقوا محمد واقف ع دولاب ويبان ياكل..
ابتسمت بلقيس..
رزان:عمي شدير...
التفت وفمه معبي..
فنص ورجع التفت قدام..
ضحكوا الزوز بكتمان. 
مدت بلقيس الحافظه لرزان:خل بنخش داخل..
خدت رزان الحافظه دخلتها...
ومحمد ياكل ووجهه احمر..
حطتها رزان ع الدولاب ومشت طلعت.
هو حرك عيونه جهة الحافظه قعد يشبحلها هلبه..
بعدين خداها...
فتحها....
سهفه منظر مخدة الباشا اللي كانت دايرتها بلقيس..
خدي طرف كلاه...
محمد بإبتسامه:اممم..تمام...كمل طرف..
لحقه التاني...
جي عند التالت وصكر الحفاظه..
محمد:ساد هكي..
ردها لمكانها....
ومشي طلع وهو ياكل في ثالت طرف...
🍁🍁🍁🍁
فهالليله في من فاطر عند نساباته زي الهادي..
وفمن ساهر عندهم..
زي هانيبال..
اللي مرام ماخلت ماطيبتله ودارتله..
موالح...
بيتفور..
كيكه مصقعه..
ووحتى من العصير طبيعي هي دايراته...
وعمنا هانيبال ماخلا شي..
الصايم في الغالب بطنه تتعب من كثر الايكال..
الا هو..كان يقول فنفسه هل من مزيد المهم من ايديها..
🍃طيبت هالمرة بشعور مختلف..وهو كلي بشعور مختلف
شعور حلو بالمرة🍃
هانيبال مع مرام حس روحه ولاإنسان تاني..
لأول مرة يعرف شن معناها كلمة💓 هني💓
لأنه هالمرة مقتنع تمام الأقتناع بإختياره..
🍁🍁🍁🍁
مع الساعه 12:00..
جت حميده لحوش اهلها..
كانت تبان عاديه زي قبل ..
تهدرز وتاكل ووضعها متحسن..
حميده:قصدك من طرابلس؟
رزان وهي تاكل في البيتزا:امم..
حميده:مواليد كم..
رزان:من ند عمي هانيبال..
غاليه: بتسكن غادي معناها..
رزان؛ايه فعين زارة..
حدهم:لكن شيييييييين..
ضحكوا غاليه وبلقيس..
رزان والضحكه غالبتها:واجد..
حميده:مش مهم..المهم تلحق تتزوج وتجيب صغار خير ماتقعد قعدتي وقعدت عمتك غاليه..
انصدموا فكلمتها...
شبحوا لغاليه..
غاليه غمزت...
"بمعنى عاذرتها بسبب اللي هي فيه هكي تقول"..
هما رجعوا شافوا لحميده اللي كانت توكل فبنتها..
غاليه:المسلسل هدى احداثه ممله ويدره الكبد..
بلقيس:حتى اني ماحبيته..
حدهم:في واحد تاني احلا..ترا ابله غاليه الريموت..
مداته غاليه لحدهم..
ورزان مزال تشبح مرة مرة لغاليه..
الدمعه محبوسه فعينها..
بس تضحك وتهدرز عادي..
رزان تحس فغاليه هلبه..وتفهم عليها وكلمه حميده تقول انقالتلها هي انوجعت منها ع الآخر..
خلتهم لاهيين بالتلفزيون والبنات بتعليقاتهم كانوا يضحكوا فغاليه..
وناضت رفعت الصفرة..
حميده:جيبيلي طاسة مية رزان..
رزان وهي ماشيه:باهي..
طلعت من الدار ووصلت للكوجينه..
خشت بالصفرة حطتها ع الرخامه..
ومشت للطرمس بتصب ميه..
وهي تشبح للطاسه..رفعت عيونها اللي توسعوا..
كردة فعل ع ريحة العطر الرهيبه اللي عبت المكان..
اختفت الطاسه من ايديها...
التفتت قعدت تشبحله وهو يشرب فيها..
مابتش تجادل ولاتتكلم..
مشت خدت غيرها..
وهو يشوفلها..
لعند ماولت للطرمس بش تعبيها..
عماد:اشبحيلي هني..
رزان:والله ماوقتك..
عماد:نحكي جد..
تنهدت وشبحتله ؛هممم..
عماد بضحكه:بقرة..
رزان شدت ضحكتها وهي تشقلب فعيونها..
عماد حط الطاسه وضم ايديه لبعض وقال:جايبلك حاجه خليتها مع غاليه ورتهالك..
رزان وهي تشوف للطاسه:اممم..
عماد:عجباتك؟
رزان:امممم..
عماد:حلوة؟
رزان:اممممم..
عماد: انتي بقرة..
رزان:امممم..فنصت ..
عماد: ههههههههه..
هي شدت ضحكتها وهي تشوف للطاسه..
ع خشة حميده..
رفعت حاجبها وقالت:متنا من العطش..
شبحولها...
انحرجت رزان..
عماد ضحك بإحراج وقدملها:شن جو ميدا..
حميده :تمام انت شن جوك..
عماد:مليح..
حميد:عقلت ولامازلت تعب فبنات الناس..
هو رفع حواجبه ..شبح لرزان..لقي وجهها انقلب..
شبح لحميده وجاوب:ايام الطيش الجو هدا بطلناه من زمان توا وحده بس عبت العين وفاضت..
رزان يدوب ابتسمت وقلبها يرقص💓..
حميده:اممم..كويس..ربي يكملك بعقلك..
عماد ابتسم مسح بيده ع شعر حميده وطلع..
هي التفتت لرزان ومشتلها..
خدت منها الطاسه وقالت:اسمعي ردي بالك تخليه يضحك عليك..اللي فيه طبع مايغيره عماد عينه زايغه راهو ويتعبك..
رزان صدرها اطبق ع الأخر..
لحظه القبول واللين اللي حستها اتجاه عماد فيسع اختفت..
حست روحها مخنوقه وهي تشوف لحميده كيف طالعه من الكوجينه..
نزلت دمعه فيسع مسحتها..
وبدال ماتولي داخل..
طلعت وروحت للحوش..
🍁🍁🍁🍁
صكرت المصحف بعد كملت قرايه..
رفعت ايديها فوق وغمضت عيونها وبدت تدعي..
(اللهم ياربي يامفرج الهموم يامنفس الكروب..ياالله فك اسر رمزي يارب عاجلا غير آجل..يارب كون معاه فسجنه يارب زي ماكنت مع سيدنا يوسف..قويه واحميه وابعد عنه كل شر يارب...)
خنقتها العبرة وكملت تدعي بنبرة باكيه..
(ياربي..ياربي ..ياربي ارجوك..اجعله من نصيبي واجعلني من نصيبه ياربي ياربي ماتكتبني لغيره ياربي ياربي ارجوك ياااربي)
نزلت ايديها حطتهم ع وجهها وقعدت تبكي بالعبرة...
اختها اللي كانت مقعمزة في الصاله مقابله دارهم ..
تشوفلها بحزن..
رجعت بعدها شافت للتلفزيون وهي شادة دموعها..
💓ماكانش عندها ادنى العلم..
ان في حد يتضرع ويدعي ع خاطرها..
مؤنس..
دعائه باللكنه البدويه المميزة
(الأقسام عليك ياربي..اجعلها من قسمي ويسرلي امري معاها)
مش عيب لما يدعي راجل دعاء زي هدا..
الراجل هو اللي يدير هكي اصلا..
هو طالب رباب من ربي...وربي مايردش يد انرفعتله بالدعاء والسؤال..
يستحي سبحانه وتعالى💓
🍁🍁🍁🍁
ويغضب لما يشوف قلوب انسكرت بسبب كلام مؤذي او فعل مؤذي..
رزان صح آذت ..
واقرب الناس ليها..
حرقت قلوب ..وفرقت محبين..
ويمكن هي قاعده اذوق من اللي داراته قبل..
بس لو نبوا نشوفولها بعين تانيه..
بنظره مختلفه..
حنلقوا ان افعالها كلها كانت ادير فيها وهي فسن صغير
يعني بفعل مؤثر ما...
مش منها ليها...
فداخلها قلب رافض القسوة اللي تتعامل بيها والشر اللي تفعل فيه..
وهالقلب قعد يقاوم فقيود الحقد اللي تقيد فيها..
لما دق اول مرة فحياته..
دق لقلب صافي طيب هلبه..
قلب ماشافتش من صاحبه الا كل شي جميل..
ارغمها ارغام..على حبه..
ايه رزان تحب عماد..
تحب عماد؟!
لا..
رزان تموت فعماد..
مش بس تحبه..
بس القيود اللي قاعده محاصرة قلبها الصغير مخليها تقاوم في شعورها اتجاهه..
وتوا قليبها هدا انكسر بالكلام اللي سمعاته..
💓هالكلام ظالم فحقه..
هو ميت عليها..
الدنيا كلها كوم...ورزان كوم تاني بالنسبه لعماد.
الحاجه الوحيده اللي مخليه عماد يكون سعيد حقيقة مخلياته شغوف بالحياة اكثر واكثر...
بتعبير ابسط..
عماد عايش ع خاطرها...
🍃فاتوا باقي ايام رمضان معاش لمحها فيهم حتى اللمحه..
هي معاش طلعت من الحوش من هديكا الليله..
وهو كان واثق ومتأكد انه بسبب كلام..."حميده"..
ولأول مرة عماد يشد فقلبه من حد...
....
يوم25رمضان..
الساعه 4:00قبل العصر..
ولاد كفايه بيولوا لطرابلس لأن بوهم وامهم مروحين فنفس اليوم من العمرة...
بس قبل ليروحوا..
عماد:غاليه ارجوك حاولي تجيبها بأي شكل...
تنهدت غاليه وقالت:باهي راجيني شوي..
طلعت من الكوجينه ..
وهو واقف يراجي ع نار..
مشت غاليه لحوش خوها..
وهي توا..
في دار رزان..
رزان:لا..
غاليه:حرام عليك يارزان ترجاني راهو..
رزان قلبها واجعها عليه لكن كلام حميده مازال يرن في وذنها..
غاليه:رزان !!..
تنهدت..
وناضت :هيا باهي.
ابتسمت غاليه..
.....
متكي بيده ع الحيط سرحان في الفراغ..
ويستنى..
لين فجاة خشت..
غاليه قعدت برا تراقب..
نزل يده وعيونه مازال لوطا..
عماد:خيرك اختفيني..
رزان :مااختفيتش عادي..
تنهد وقال:رزان اسمعيني..واني صايم نحلفلك بالله اللي عمري ماحلفت بيه وحنتت..وقعد يعد ع صوابع ايديه.. ان قلبي مافيه وحده غيرك ولانعرف وحده غيرك..اقسملك بالله من نهار حسيت بيك اقسم بالله لاكلمت ولاشبحت..
اشربصبعه ع عينه وهو يبعد فيه ويقرب..ريتي الشبحه الشبحه..عيني ماقدرت نقيمها فغيرك..تبيها بالفلاقي..
راك كبيدتي ..قلبي...بنتي فاهمه اقسم بربي مافي غيرك يارزان..
هي كان تلقى تحضنه...
تخش فقلبه اللي يحبها كل هالحب وتعيش فيه..
شن تبي تاني...
بس مع هدا مازال تكابر....
شبحلها شويه بعدين قال:حتى لو ماتبيش تردي المهم سمعتيني..وكلامي وصل مكانه..
"قصده قلبها"..
رن تليفونه..
شبحله وقال:هي فأمان الله.. فات من حداها بدون مايقيم عيونه فيها وطلع سلم ع خالته...
وطلع من الحوش كله...
خشت غاليه لرزان...
رزان قعدت تشوف لعيون عمتها..
ابتسمت غاليه بحب..
بسرعه قدمت رزان وحضنت غاليه بقوة وقالت:نبي نقولك سر ماطلعيشي بكل عمتي..
غاليه:قولي..
رزان دفنت وجهها فرقبة عمتها وقالت بخجل...
"نحبه"..
غاليه:ههههههه..ماني عارفه من الأول..
ضحكت رزان...وزادت حضنت اطيب واحن حضن فالدنيا..
حضن امها التانيه..
"غاليه💓"...

....يتبع...