#العشق_المتمرد
#جمان_فريد
الجزء76
القسم الاول
🌟 ﺍﻭﻻ .. ﺷﻜﺮ ﻟﻴﻜﻢ ﻭﺣﺐ ﻛﺒﻴﺮ ﻉ ﻛﻼﻣﻜﻢ ﺍﻟﺠﻤﻴﻞ 💖
ﺗﺎﻧﻴﺎ ..
ﺍﻧﻲ ﺗﻌﻤﺪﺕ ﻋﺪﻡ ﺫﻛﺮ ﻣﺪﻥ ﺍﻟﺠﺒﻞ ﻟﺴﺒﺒﻴﻦ ..
ﺍﻭﻟﻬﻢ ..
ﺑﺶ ﻣﺎﺗﺒﺪﺍﺵ ﻗﺼﺔ ﺍﻟﻤﺪﻳﻨﺔ ﺍﻟﻔﻼﻧﻴﻪ ﺣﺎﺭﺑﺖ ﺍﻛﺜﺮ ﻣﻦ ﺍﻟﻌﻼﻧﻴﻪ ..
ﻭﺷﻬﺪﺍﺀ ﻫﺎﺩﻱ ﺍﻛﺜﺮ ﻣﻦ ﻫﺪﻳﻜﺎ ﻭﻣﻦ ﻫﺎﻟﺪﻭﺓ ﺍﻟﻠﻲ ﻻﺗﻮﺩﻱ ﻭﻻﺗﺠﻴﺐ ..
ﻫﺎﺩﻱ ﺭﻭﺍﻳﻪ ﻣﺶ ﻓﻴﻠﻢ ﻭﺛﺎﺋﻘﻲ .. ﺍﻧﻲ ﻟﻮ ﺍﺿﻄﺮﻳﺖ ﻭﺫﻛﺮﺕ ﻣﺪﻥ ﻓﻬﺪﺍ ﻹﻥ ﺍﻷﺣﺪﺍﺙ ﻓﻴﻬﺎ ﻣﻬﻤﻪ ﻭﻏﻴﺮﺕ ﻣﺠﺮﻯ ﺍﻟﻮﺿﻊ ﺑﺲ ..
ﻣﺶ ﻣﻦ ﺑﺎﺏ ﺍﻟﺘﻤﺠﻴﺪ ﻳﻌﻨﻲ ..
ﺍﻟﺴﺒﺐ ﺍﻟﺘﺎﻧﻲ ..
ﻫﻮ ﺍﻧﻲ ﻧﺸﻮﻑ ﻟﻠﺠﺒﻞ ﻛﺈﻗﻠﻴﻢ ﻭﺍﺣﺪ ﻭﺟﺒﻬﻪ ﻭﺣﺪﻩ ﻓﻠﻴﺶ ﻧﻘﻌﺪ ﻧﺬﻛﺮ ﻛﻞ ﻣﺪﻳﻨﻪ ﺑﺮﻭﺣﻬﺎ .. ﻛﻠﻬﻢ ﺣﺎﺭﺑﻮﺍ ﻣﻊ ﺑﻌﺾ ﻋﺮﺏ ﻭﺍﻣﺎﺯﻳﻎ ..
ﻣﺎﻓﻴﺶ ﺩﺍﻋﻲ ﻧﻔﻀﻞ ﺍﻱ ﻣﻨﻬﻢ ﺑﺎﻟﺬﻛﺮ ..
ﺛﺎﻟﺜﺎ ..
ﺍﻧﻲ ﻭﻟﻮ ﻻﺣﻈﺘﻮﺍ ﺗﻜﻠﻤﺖ ﻋﻦ ﺷﺨﺼﻴﺎﺕ ﻧﺴﺎﺋﻴﻪ ﻫﻠﺒﻪ ﻣﺨﺘﻠﻔﺎﺕ ﻋﻦ ﺑﻌﺾ ﻛﻞ ﺷﺨﺼﻴﺔ ﺑﺮﻭﺣﻬﺎ ﺳﻮﺍﺀ ﻛﺎﻥ ﻓﻲ ﺍﻟﺮﻭﺍﻳﻪ ﻫﺎﺩﻱ ﺍﻭ ﻏﻴﺮﻫﺎ ..
ﻓﺎﻟﺮﻭﺍﻳﻪ ﻫﺎﺩﻱ ﺗﺤﺪﻳﺪﺍ ..
ﺗﻜﻠﻤﺖ ﻉ ﺍﻟﺠﺮﻳﺌﺔ ﺍﻟﻤﺤﺘﺮﻣﻪ ..
ﺗﻜﻠﻤﺖ ﻉ ﺍﻟﻮﻗﺤﻪ ..
ﺗﻜﻠﻤﺖ ﻉ ﺍﻟﻤﺤﺘﺸﻤﻪ ﺍﻟﻤﺤﺎﻓﻈﻪ ..
ﺍﻟﻐﺎﻟﺐ ﺗﻘﺒﻞ ﻛﻞ ﺍﻟﺸﺨﺼﻴﺎﺕ ﻣﺎﻋﺪﺍ ﺍﻟﻤﺤﺘﺸﻤﻪ ﺍﻟﻤﺤﺎﻓﻈﻪ ..
ﺍﻋﺘﺒﺮﻭﻫﺎ ﻣﺜﺎﻟﻴﻪ ﻭﻣﻤﻜﻦ ﺣﺘﻰ ﻳﺸﻮﻓﻮﺍ ﺍﻧﻬﺎ ﺷﺨﺼﻴﻪ ﻭﻫﻤﻴﻪ ..
ﺗﻤﺎﻡ ..
ﻣﺎﻋﻠﻴﻬﻤﺶ ﻟﻮﻡ ..
ﻷﻥ ﺍﻟﻄﺮﺡ ﺍﻟﻤﻮﺟﻮﺩ ﻓﻲ ﺍﻟﻮﻗﺖ ﺍﻟﺤﺎﻟﻲ ﺳﻮﺍ ﻛﺎﻥ ﻓﻲ ﺍﻟﺮﻭﺍﻳﺎﺕ ﺍﻭ ﺍﻟﺘﻠﻔﺰﻳﻮﻥ ...
ﺍﻭ ﺍﻟﻤﻮﺟﻮﺩ ﻓﻲ ﺍﻟﻮﺍﻗﻊ ...
ﻣﻌﺎﺵ ﻳﺒﻴﻦ ﻏﻴﺮ ﻓﺼﻮﺭﺓ ﺍﻟﺒﻨﺖ ﻟﻸﺳﻒ ﺍﻟﻠﻲ ﻻﺗﻌﺮﻑ ﺣﻴﺎﺀ ﻭﻻﺣﺸﻤﻪ ..
ﺍﻟﻠﻲ ﻳﻄﻠﻘﻮﺍ ﻋﻠﻴﻬﺎ ﺗﺰﻳﻴﻔﺎ " ﺍﻟﺠﺮﻳﺌﺔ .. ﺍﻟﻤﻨﻔﺘﺤﻪ .."
ﻭﺍﻧﻲ ﻧﻘﻮﻝ ﻋﻠﻴﻬﺎ ﺍﻟﻤﻨﺤﻠﻪ ﺑﺒﺴﺎﻃﻪ ..
ﻟﻬﺪﺍ ﻫﻠﺒﻪ ﻣﺎﺣﺒﺬﻭﺵ ﺷﺨﺼﻴﺔ " ﻣﺮﺍﻡ " ﻭﺍﻋﺘﺒﺮﻭﻫﺎ ﻣﺜﺎﻟﻴﻪ ..
ﻭﻣﻦ ﺍﻟﻤﺆﺳﻒ ﺍﻥ ﺍﻟﺼﺢ ﻳﻮﻟﻲ " ﻣﺜﺎﻟﻴﻪ "
ﻭﺍﻟﻐﻠﻂ ﻫﻮ ﺍﻟﺼﻮﺭﺓ ﺍﻟﻤﻘﺒﻮﻟﻪ ...
" ﻣﺮﺍﻡ " ﻣﻮﺟﻮﺩﻩ ﻭﻋﻤﻠﻪ ﻧﺎﺩﺭﺓ ﻧﺎﺩﺭﺓ ﻫﻠﺒﻪ ...
ﻭﺍﻧﻲ ﺑﻄﻼﺗﻲ ﻋﻤﻠﻪ ﻧﺎﺩﺭﻩ ..
ﺟﻤﺎﻧﻪ .. ﻧﺠﻤﻪ .. ﻋﻠﻴﺎ ... ﺣﻨﺎﻥ .. ﺻﺒﻴﺤﻪ .. ﻓﻀﻴﻠﻪ .. ﻧﻮﻣﻴﺪﻳﺎ ..
ﻛﻠﻬﻢ ﺍﺷﺘﺮﻛﻮﺍ ﻓﻲ ﺻﻔﻪ ﻭﺣﺪﻩ "... ﺍﻟﺤﺸﻤﻪ ﻭﺍﻹﺣﺘﺮﺍﻡ " ﻭﺍﻥ ﺍﺧﺘﻠﻔﻮﺍ ﻋﻦ ﺑﻌﺾ ﻓﻲ ﻣﺪﻯ ﺍﻟﺘﺰﺍﻣﻬﻢ ﺑﺎﻟﺪﻳﻦ ..
ﻹﻥ ﺍﻷﺧﻼﻕ ﺗﺠﻲ ﻗﺒﻞ ﺍﻟﻌﺒﺎﺩﻩ ﻓﻲ ﺍﻟﺘﺮﺗﻴﺐ ..
ﻭﺍﻧﻲ ﻫﻨﻲ ﻭﻧﻘﻮﻟﻬﺎ ﺑﻜﻞ ﺛﻘﻪ ﻧﺪﻋﻲ ﻟﻠﻔﻀﻴﻠﻪ ﻭﻟﺘﺮﺳﻴﺦ ﺍﻟﺼﻮﺭﺓ ﺍﻟﺤﺴﻨﻪ ﻟﻸﻧﺜﻰ ﺍﻟﻤﺴﻠﻤﻪ ..
ﻷﻧﻲ ﻣﺆﻣﻨﻪ ﺍﻳﻤﺎﻥ ﺗﺎﻡ ﺍﻧﻲ ﻓﻤﻜﺎﻥ ﻣﺆﺛﺮ ﻭﻟﻴﺖ ..
ﻭﻧﺤﺎﻭﻝ ﻧﺼﻠﺢ ...
ﻭﺍﻟﻤﺼﻠﺢ ﻋﻨﺪ ﺍﻟﻠﻪ ﺧﻴﺮ ﻣﻦ ﺍﻟﺼﺎﻟﺢ ..
ﻻ ﺍﺩﻋﻲ ﺍﻟﻜﻤﺎﻝ ﻓﻴﺎ ﻧﻘﺺ ﻛﺒﻴﺮ ..
ﺑﺲ ﻧﺤﺎﻭﻝ ﻧﻜﻤﻠﻪ ﺑﺎﻟﻠﻲ ﻧﻜﺘﺐ ﻓﻴﻪ ..
ﻭﻧﺴﺄﻝ ﺍﻟﻠﻪ ﺍﻟﺘﻮﻓﻴﻖ ﻭﺍﻟﺴﺪﺍﺩ ...
ﻭﺍﺳﻔﻪ ﻃﻮﻟﺖ ....
ﻧﺤﺒﻜﻢ 💖
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
ﺧﺶ ﺷﻬﺮ ﺭﻣﻀﺎﻥ ..
ﻭﺃﻭﻝ ﺭﻣﻀﺎﻥ ﻳﻤﺮ ﻉ ﺍﻟﻠﻴﺒﻴﻦ ﻣﺎﻓﻴﺸﻲ ﺍﻱ ﺷﻌﻮﺭ ﺍﻳﺠﺎﺑﻲ ..
ﻛﻠﻪ ﺧﻮﻑ ﻭﺗﺮﻗﺐ ﻭﺣﺰﻥ ..
ﺑﺲ ﻛﺎﻥ ﻓﻲ ﺷﻮﻳﻪ ﺃﻣﻞ .. ﻟﻘﺮﺏ ﺍﻟﺨﻼﺹ ..
ﺭﻣﻀﺎﻥ ..2011
ﻛﺎﻥ ﺻﻌﺐ ..
ﻣﻦ ﻧﺎﺣﻴﺔ ﺍﻟﻀﻲ .. ﺍﻟﻜﻬﺮﺑﺎﺀ ﺍﻟﻠﻲ ﺑﺪﺕ ﺗﻨﻘﻄﻊ ..
ﻭﺍﻟﻐﺎﺯ ﺍﻟﻠﻲ ﺑﺪﻱ ﻳﻨﻘﺺ ..
ﻭﺍﻟﺠﻮ ﻧﻮ ﻭﺭﻃﻮﺑﻪ ..
ﻭﻣﻌﺮﻭﻑ ﺷﻬﺮ ﻫﺎﻧﻴﺒﺎﻝ .. ﺍﻏﺴﻄﺲ .. ﻫﺎﺩﻱ ﻃﺒﻴﻌﺔ ﺍﻟﻄﻘﺲ ﻓﻴﻪ ..
ﺑﺲ ﻓﻲ ﺍﻟﻠﻲ ﻛﺎﻧﺖ ﻛﺒﻮﺩﻫﻢ ﻣﺤﺮﻭﻗﻪ ﺯﻳﺎﺩﺓ ﻋﻦ ﺣﺮﺍﺭﺓ ﺍﻟﺠﻮ ..
🍁 ﺩﻻﻝ ..
ﺍﻟﻠﻲ ﺍﻭﻟﻬﺎ ﺭﻣﻀﺎﻥ ﻣﻦ ﻏﻴﺮ ﻋﻤﺎﺭ ..
ﺭﺟﻊ ﺗﺠﺪﺩ ﺣﺰﻧﻬﺎ .. ﺗﻌﺒﺖ ﻫﻠﺒﻪ ..
ﺭﻗﺪﺕ ﻓﻲ ﻋﻴﺎﺩﻩ ﺗﻼﺗﻪ ﺍﻳﺎﻡ ..
ﻭﺻﻐﺎﺭﻫﺎ ﺑﻴﻦ ﺃﻣﻬﺎ ﻭﺍﺧﺘﻬﺎ ﻭﺑﻮﻫﺎ ..
ﺑﻮﻫﺎ
ﺍﻟﻠﻲ ﻣﺶ ﻋﺎﺭﻑ ﻛﻴﻒ ﻳﺪﻳﺮ ﺑﻴﻦ ﺑﻨﺘﻪ ﻭﺑﻴﻦ ﻣﻬﻤﺘﻪ ﻛﺜﺎﺋﺮ ﺍﻟﻠﻲ ﺣﺘﻄﻠﺐ ﻭﺟﻮﺩﻩ ﻓﻲ ﻗﺎﺑﻞ ﺍﻷﻳﺎﻡ ﻓﻲ ﺃﺣﺪ ﺍﻟﺠﺒﻬﺎﺕ
ﻣﺶ ﺟﺒﻬﺔ ﻗﺘﺎﻝ .. ﺟﺒﻬﺔ ﺗﺎﻧﻴﻪ ...
ﻭﻫﻮ ﺗﻮﺍ ﻋﺎﻳﺶ ﺃﺻﻌﺐ ﺃﻳﺎﻡ ﻭﺳﻂ ﻫﺎﻟﻀﻐﻮﻁ ﺍﻟﻠﻲ ﻧﻌﻴﻤﻪ ﻗﺎﻋﺪﻩ ﺑﻜﻞ ﺍﻟﻄﺮﻕ ﺗﺤﺎﻭﻝ ﺗﺨﻔﻔﻬﻢ ﻋﻨﻪ ..
ﻷﻧﻪ ﻣﺮﻳﺾ ﺿﻐﻂ ﻭﺧﻮﻓﻬﺎ ﻋﻠﻴﻪ ﺑﺰﺍﻳﺪ ..
🍁 ﺍﻟﺨﻮﻑ ..
ﺍﻟﻠﻲ ﻛﺎﻥ ﻣﺴﻴﻄﺮ ﻉ ﻛﻔﺎﻳﻪ ﻭﻋﻴﻠﺘﻬﺎ ..
ﻗﺪﺍﻡ ﺍﻟﺘﻠﻔﺰﻳﻮﻥ 24 ﺳﺎﻋﻪ ﻳﺘﺎﺑﻌﻮﺍ ﻓﻲ ﺍﻷﺧﺒﺎﺭ ﻭﻳﻦ ﺗﺠﻲ ﺳﻴﺮﺓ ﺟﺒﻬﺔ ﺍﻟﺠﺒﻞ .. ﻛﻠﻬﻢ ﻗﻠﻮﺑﻬﻢ ﺗﻮﺻﻞ ﻟﺤﻨﺎﺟﺮﻫﻢ ..
ﻣﻌﺎﺵ ﻭﺻﻠﺘﻬﻢ ﺍﺧﺒﺎﺭ ﻋﻨﻪ ﻧﻬﺎﺋﻲ ..
💓 ﻫﻮ ﻛﺎﻥ ﻳﻘﺎﺗﻞ ﻣﻊ ﺻﺤﺎﺑﻪ ﻣﻦ ﻗﻠﺒﻪ ...
ﺗﻌﺮﻓﻮﺍ ﻋﻤﺎﺩ .. ﻳﺸﻮﻑ ﻓﻲ ﺻﻮﺭﺓ ﺳﻴﻔﺎﻭ ﻗﺪﺍﻣﻪ ﻭﻳﻦ ﻳﻘﺎﺗﻞ ..
ﻳﺨﻄﺮ ﻋﻠﻴﻪ ﺳﻴﻔﺎﻭ ﻭﻳﻦ ﺗﺸﺘﺪ ﺑﻴﻬﻢ ﺍﻟﺤﺎﻝ .. ﻭﻳﺰﻳﺪ ﻳﺜﺒﺖ ﺍﻛﺜﺮ ﻭﺍﻛﺜﺮ ﻉ ﺍﻧﻪ ﻳﺎﺧﺪ ﺑﺜﺎﺭﻩ ﻭﻳﺤﻘﻖ ﺍﻟﻠﻲ ﻛﺎﻥ ﺳﻴﻔﺎﻭ ﻳﺒﻲ ﻳﺤﻘﻘﻪ ..
ﺍﻣﺎ ﺗﻴﻔﺴﺎ ﻓﻜﺎﻥ ﻳﺤﺎﺭﺏ ﻷﺟﻞ ﻫﻮﻳﻪ ﺿﺎﻳﻌﻪ ﻭﻣﻄﻤﻮﺳﻪ
ﻳﺤﺎﺭﺏ ﺑﻜﻞ ﻣﺎﻓﻴﻪ ﻓﺠﺒﺮﻭﺕ ﻭﻇﻠﻢ ﺍﻟﻄﺎﻏﻴﻪ ﺍﻟﻠﻲ ﻳﺎﻣﺎ ﺩﺍﺭ ﻓﻴﻬﻢ ...
ﻋﻼﺀ ﻛﺎﻥ ﻳﺤﺎﺭﺏ ﻭﻫﻮ ﻛﻠﻪ ﺃﻣﻞ ﺍﻥ ﺑﻼﺩﻩ ﺗﻮﻟﻲ ﺍﺣﺴﻦ ﺑﻌﺪ ﺍﻟﻘﺬﺍﻓﻲ ﻓﻲ ﺑﺎﻟﻪ ﺍﻥ ﺍﻟﻌﻘﺒﻪ ﺍﻟﻮﺣﻴﺪﻩ ﺍﻟﻠﻲ ﻭﺍﻗﻔﻪ ﻓﻲ ﻭﺟﻪ ﻧﻬﻮﺽ ﻟﻴﺒﻴﺎ ﻭﺍﺯﺩﻫﺎﺭﻫﺎ ﻫﻮ ﺍﻟﻘﺬﺍﻓﻲ ﻭﻧﻈﺎﻣﻪ ﺍﻟﻔﺎﺳﺪ .
ﺭﺍﻓﻊ ﻛﺎﻥ ﻳﺤﺎﺭﺏ ﻓﺎﻟﻠﻲ ﻭﺻﻠﻪ ﻟﻬﻨﻲ ... ﺍﻟﻠﻲ ﺷﺎﻳﻒ ﺍﻧﻪ ﺣﺮﻣﻬﻢ ﻣﻦ ﺍﺑﺴﻂ ﺣﻘﻮﻗﻬﻢ ﻛﻤﻮﺍﻃﻨﻴﻦ ﻓﺪﻭﻟﻪ ﻏﻨﻴﻪ ﺯﻱ ﺑﻼﺩﻧﺎ ﻋﺎﻳﺸﻴﻦ ﻣﺤﺘﺎﺟﻴﻦ ﻭﺍﻟﻘﻠﻪ ﺧﻠﺖ ﻧﻔﻮﺳﻬﻢ ﺍﻟﻀﻌﻴﻔﻪ ﺗﺎﺧﺪﻫﻢ ﻟﻠﺤﺮﺍﻡ ..
ﺑﺲ ﺍﻷﻫﻢ ﻋﻨﺪ ﺭﺍﻓﻊ ﺍﻧﻪ ﻳﺤﺎﺭﺏ ﺟﻨﺐ ﺭﻓﻴﻖ ﻋﻤﺮﻩ ..
ﺫﻭﺍﻟﻔﻘﺎﺭ ﺍﻟﻤﻨﺼﻮﺭﻱ ﺍﻭ ﺍﻟﺠﺎﺳﺮ ...
ﺻﺎﺣﺐ ﺍﻟﻨﻔﺲ ﺍﻟﺘﻮﺍﻗﻪ ﻭﺍﻟﺸﺨﺼﻴﻪ ﺍﻟﻄﺎﻣﺤﻪ .. ﺍﻟﻠﻲ ﻟﻸﺳﻒ ﺑﺮﻏﻢ ﺍﻧﻪ ﺣﺎﻭﻝ ﻳﺤﻔﺮ ﺍﻟﺼﺨﺮ ﻓﻄﺮﻳﻖ ﺍﻟﺤﻼﻝ ... ﺑﺲ ﻣﺎﻛﺎﻧﺶ ﻗﻮﻱ ﻛﻔﺎﻳﻪ ﺑﺶ ﻳﻜﻤﻞ ﻓﻴﻪ ﻭﺍﺗﺠﻪ ﻟﻠﺤﺮﺍﻡ ﺑﺶ ﻳﺤﻘﻖ ﺫﺍﺗﻪ ..
ﺯﻱ ﻫﻠﺒﻪ ﻓﻬﺎﻟﺒﻼﺩ ..
ﺣﺎﺭﺏ ﺑﻜﻞ ﺣﻘﺪ .. ﺍﻟﺸﺨﺺ ﺍﻟﻠﻲ ﺣﺮﻣﻪ ﺑﻮﻩ .. ﻭﺧﻼﻩ ﻳﻌﻴﺶ ﺣﻴﺎﺓ ﺻﻌﺒﻪ .... ﺣﻴﺎﺓ ﺑﻐﺪﺩ ﻭﺃﻳﺎﻡ ﺳﻮﺩ ...
ﻭﺣﺮﺑﻪ ﻛﺎﻧﺖ ﺣﺮﺏ ﺍﻧﺘﻘﺎﻡ ..
ﻭﺿﺮﺍﺭ ﺍﻟﻠﻲ ﺍﻧﻀﻢ ﻟﻠﺮﻛﺐ ﻣﺆﺧﺮﺍ ﺑﺶ ﻳﻜﻮﻥ ﻟﻴﻪ ﻣﻜﺎﻥ .. ﻣﺎﻛﺎﻧﺶ ﻓﻲ ﺧﻂ ﺍﻟﻨﺎﺭ ﺑﺲ ﻛﺎﻥ ﻳﻮﺟﻪ ﻭﺷﺒﻪ ﻭﺍﺳﻄﻪ ﻟﻠﺪﻋﻢ ﺍﻟﻠﻮﺟﺴﺘﻲ ﻣﺎﻛﺎﻧﺶ ﻳﺒﻲ ﻳﻤﻮﺕ .. ﻳﻌﻨﻲ ﻟﻮ ﻛﺎﻥ ﻳﺒﻲ ﻳﻤﻮﺕ ﻣﺎﻛﺎﻧﺶ ﻧﻘﺰ ﻣﻦ ﺳﻔﻴﻨﺔ ﺍﻟﺠﻤﺎﻫﻴﺮﻳﻪ ..
ﻭﻫﻠﺒﻪ ﻳﺤﺎﺭﺑﻮﺍ ﻭﻛﻞ ﻭﺍﺣﺪ ﻟﻴﻪ ﺍﻫﺪﺍﻓﻪ ..
ﺍﺷﺘﺮﻛﻮﺍ ﻛﻠﻬﻢ ﻓﻲ ﺷﻲ ﻭﺍﺣﺪ ﻭﻫﻮ ﺍﻟﻘﻀﺎﺀ ﻉ ﺍﻟﻘﺬﺍﻓﻲ ..
ﻭﻣﺎﺑﻌﺪ ﺍﻟﻘﻀﺎﺀ ﻋﻠﻴﻪ ... ﻛﻞ ﻭﺍﺣﺪ ﺣﻴﻐﻨﻲ ﻉ ﻟﻴﻼﻩ ...
ﻭﻳﺎﻟﻴﻞ ﺑﻌﺪ 17 ﻓﺒﺮﺍﻳﺮ ... ﻣﻄﻮﻟﻚ ..
🍁🍁🍁🍁🍁
\5 ﻫﺎﻧﻴﺒﺎﻝ ... ﺍﻏﺴﻄﺲ ..
ﻉ ﻣﺎﺃﺫﻛﺮ ﻛﺎﻥ ﻳﻮﻡ ﻗﺼﻒ " ﻣﺎﺟﺮ "
ﺍﻟﻠﻲ ﻗﺎﻟﻮﺍ ﻣﺎﺕ ﻓﻴﻪ ﻭﻟﺪ ﺍﻟﻘﺬﺍﻓﻲ " ﺧﻤﻴﺲ ."
ﺍﻟﻘﻂ ﺍﻟﻠﻲ ﺑﺴﺒﻌﻪ ﺍﺭﻭﺍﺡ ...
ﻛﻞ ﻣﺮﺓ ﻳﻘﻮﻟﻮﺍ ﻣﺎﺕ ﻭﻳﻄﻠﻊ ﺣﻲ ..
🍃 ﻟﻶﻥ ﻣﺶ ﻣﺼﺪﻗﻪ ﻗﺼﺔ ﻣﻮﺗﻪ ﻭﻻ ﺧﺸﺘﻠﻲ ﺭﺍﺱ 🍃
ﻓﻬﺎﻟﻴﻮﻡ ﺗﺤﺪﻳﺪﺍ ..
ﺭﺍﻧﻴﺎ ﺗﻌﺒﺖ ﻫﻠﺒﻪ ...
ﻣﻦ ﻏﻴﺮ ﺻﻴﺎﻡ ﺻﺎﻳﻤﻪ ...
ﻭﺍﻷﻳﺎﻡ ﺍﻻﺧﻴﺮﺓ ﺍﺣﻼﻣﻬﺎ ﺑﺮﻣﺰﻱ ﺑﺪﺕ ﺗﺰﻳﺪ ﻭﻣﻨﻬﺎ ﻛﺎﻥ ﻛﻮﺍﺑﻴﺲ ..
ﻭﻭﺻﻠﺖ ﺑﻴﻬﺎ ﺍﻟﺤﺎﻟﻪ ﺍﻧﻬﺎ ﺗﻨﺼﺎﺏ ﺑﺎﻟﺤﻤﻰ ..
ﻓﻲ ﺍﻟﻠﻴﻞ ﻭﻗﺖ ﺍﻟﺴﺤﻮﺭ ﺧﻮﺗﻬﺎ ﻭﺑﻮﻫﺎ ﻃﺎﺭﻭﺍ ﺑﻴﻬﺎ ﻟﻠﻤﺴﺘﺸﻔﻰ ﻭﻣﻌﺎﻫﻢ ﺭﺑﺎﺏ ﺍﻟﻠﻲ ﻛﺎﻧﺖ ﺑﺘﻤﻮﺕ ﻣﻦ ﺍﻟﺨﻮﻑ ﻋﻠﻲ ﺍﺧﺘﻬﺎ
ﺣﺎﻭﻟﺖ ﺗﺨﻔﻒ ﻋﻨﻬﺎ ﺑﺲ ﻟﻸﺳﻒ ﺭﺍﻧﻴﺎ ﻣﺎﻛﺎﻥ ﻓﻲ ﺷﻲ ﻳﻘﺪﺭ ﻳﺨﻔﻒ ﻋﻨﻬﺎ 💔..
ﺍﻟﻤﺴﺘﺸﻔﻰ ﺍﻟﻠﻲ ﺭﻓﻌﻮﻫﺎ ﻟﻴﻪ ..
ﻛﺎﻧﺖ ﺟﺎﻳﺎﺗﻪ ﻫﻠﺒﻪ ﺣﺎﻻﺕ ﻣﻦ ﺍﻟﺠﺒﻬﺎﺕ ﻭﻣﻦ ﺿﺤﺎﻳﺎ ﺍﻟﻘﺼﻒ ﻳﻮﻣﻬﺎ ...
🍁 ﺭﺑﺎﺏ
ﻛﺎﻧﺖ ﻓﻲ ﺍﻟﻤﺴﺘﺸﻔﻰ ﻣﺎﺷﻴﻪ ﺍﺩﻭﺭ ﻓﻲ ﺗﺮﻛﻴﻨﻪ ﺗﻜﻠﻢ ﻓﻴﻬﺎ ﺍﻣﻬﺎ ﺍﻟﻠﻲ ﺍﺗﺼﻠﺖ ﺑﻴﻬﺎ ﻭﻳﻦ ﺳﻤﻌﺖ ﺑﺒﻨﺘﻬﺎ ..
ﻭﻛﺎﻥ ﻭﺿﻊ ﺍﻟﺘﻐﻄﻴﻪ ﺷﻮﻳﻪ ﺗﻌﺒﺎﻥ ..
ﺭﺑﺎﺏ : ﻳﻤﺎ ﻧﺴﻤﻊ ﻓﻴﻚ ﺭﺍﻩ .. ﺍﻟﺘﻐﻄﻴﻪ ﻋﻨﺪﻙ ﺍﻧﺘﻲ ﻣﺎﺗﺼﻠﺤﺶ ..
" ﺭﺑﺎﺏ .. ﺍﻟﻮ ... ﺍﻟﻮﻭﻭﻭ "
ﺭﺑﺎﺏ : ﺗﺲ .. ﻭﺍﻟﻠﻪ ﻧﺴﻤﻊ ﻓﻴﻚ ...
ﻓﺼﻞ ..
ﻧﺰﻟﺖ ﺭﺑﺎﺏ ﺍﻟﺘﻠﻴﻔﻮﻥ ﻣﻦ ﻉ ﻭﺫﻧﻬﺎ ﻭﻫﻲ ﺗﺸﻮﻓﻠﻪ ﺑﺄﺳﻒ ..
ﺗﺄﻓﻔﺖ ..
ﺑﻌﺪﻳﻦ ﻟﻔﺖ ﻭﻛﻴﻒ ﺟﺎﻳﺔ ﺑﺘﻤﺸﻲ ..
ﻳﺨﻄﻤﻮﺍ ﻗﺪﺍﻣﻬﺎﺟﺮﻱ ﺑﺒﺎﺭﻳﻼ ﻓﻴﻬﺎ ﻭﺍﺣﺪ ﺭﺟﻠﻪ ﺷﺒﻪ ﻣﻘﻄﻮﻋﻪ ﻭﻣﺤﺮﻭﻕ ﻭﻣﻨﻈﺮﻩ ... ﺍﻟﻠﻪ ﺍﻟﻤﺴﺘﻌﺎﻥ .. ﻳﺮﺛﻰ ﻟﻪ ..
ﻭﺣﻨﻲ ﻭﻗﺘﻬﺎ ﺣﺎﺟﺎﺕ ﺯﻱ ﻫﺎﺩﻱ ﻣﺎﻧﻌﺮﻓﻮﻫﺎﺵ ﺣﺘﻰ ﻟﻤﺎ ﻛﻨﺎ ﻧﺸﻮﻓﻮﺍ ﻓﻴﻬﺎ ﻓﻲ ﺍﻟﻤﺴﻠﺴﻼﺕ ﻭﺍﻷﻓﻼﻡ ﻭﺣﻨﻲ ﻋﺎﺭﻓﻴﻦ ﺍﻧﻪ ﻛﺬﺏ ﻭﺗﻤﺜﻴﻞ ﻧﻐﻄﻮﺍ ﻓﻌﻴﻮﻧﻨﺎ ..
ﻳﺒﺎﻝ ﺗﻮﺍ ...
ﺭﺑﺎﺏ ﺷﺎﻓﺎﺗﻪ ﻉ ﺍﻟﺤﻘﻴﻘﻪ ...
ﻭﻣﻨﻈﺮ ﺯﻱ ﻫﺪﺍ ﻣﻤﻜﻦ ﻳﻄﻠﻊ ﺍﻟﺒﻨﺎﺩﻡ ﻣﻦ ﻋﻘﻠﻪ ...
ﻋﻴﻄﺖ ﻉ ﻃﻮﻝ ﺭﻗﺒﺘﻬﺎ ..
ﻭﺿﺮﺑﺎﺕ ﻗﻠﺒﻬﺎ ﺗﺴﺎﺭﻋﺖ ﻫﻠﺒﻪ ...
ﻭﺣﺴﺖ ﺭﻭﺣﻬﺎ ﻣﻌﺎﺵ ﻋﻨﺪﻫﺎ ﺣﻴﻞ ...
ﻃﻮﻝ ﺩﺍﺧﺖ ...
ﺗﻠﻘﺘﻬﺎ ﻭﺣﺪﻩ ﻣﻦ ﺍﻟﻀﺎﺑﻄﺎﺕ ﺍﻟﻠﻲ ﺳﻤﻌﺖ ﺻﻮﺕ ﻋﻴﻄﺘﻬﺎ ﻫﻲ ﻭﻭﺍﺣﺪ ﻭﺍﻗﻒ ﻣﻌﺎﻫﺎ ..
ﻣﺸﻮﻟﻬﺎ ﺍﻟﺰﻭﺯ ﻳﺠﺮﻭﺍ ...
ﻭﺍﻟﻀﺎﺑﻄﻪ ﻟﺤﻘﺖ ﻋﻠﻴﻬﺎ ﻗﺒﻞ ﻟﻄﻴﺢ ﻉ ﺍﻷﺭﺽ ..
ﻣﺆﻧﺲ ﺑﺨﻮﻑ : ﺧﻠﻴﻚ ﻣﻌﺎﻫﺎ ﻳﺎﻧﻮﺍﻝ ﻟﻴﻦ ﻧﺠﻲ ..
ﻭﻣﺸﻲ ﺟﺮﻱ ...
ﻭﻧﻮﺍﻝ ﺗﺤﺎﻭﻝ ﺗﻔﻴﻘﻬﺎ ..
ﺑﺪﺕ ﺗﻔﻴﻖ ﺷﻮﻱ ﺷﻮﻱ ..
ﻟﻴﻦ ﺟﻲ ﻣﺆﻧﺲ ﺑﺎﻟﻤﻴﻪ ﻓﺘﺤﻬﺎ ﻭﻋﻄﺎﻫﺎ ﻟﻨﻮﺍﻝ ..
ﺧﺪﺗﻬﺎ ﻭ ﺻﺒﺖ ﻣﻨﻬﺎ ﻓﻴﺪﻫﺎ ﺍﻟﺘﺎﻧﻴﻪ ﻭﻣﺴﺤﺖ ﺑﻴﻬﺎ ﻭﺟﻪ ﺭﺑﺎﺏ ..
ﺭﺑﺎﺏ ﺍﺳﺘﻌﺎﺩﺕ ﻭﻋﻴﻬﺎ ..
ﻭﻗﺎﻟﺖ : ﺑﻨﺮﺟﻊ ..
ﻣﺆﻧﺲ ﻃﻮﻝ ﺑﺪﻭﻥ ﺗﺮﺩﺩ ﻭﻻﺩﻭﺭ ﻫﻮ ﻣﻦ ﻳﻜﻮﻥ ﻭﻻ ﻣﻜﺎﻧﺘﻪ ﻭﻻﺍﻟﻮﺿﻊ ﺍﻟﻠﻲ ﻫﻮ ﻓﻴﻪ ..
ﺟﺎﺑﻠﻬﺎ ﺳﻄﻞ ﻗﺮﻳﺐ ﻋﻠﻴﻪ ﻛﺎﻥ ﺷﺒﻪ ﻓﺎﺿﻲ ﻗﺮﺑﻬﻮﻟﻬﺎ ..
ﻧﻬﻀﺘﻬﺎ ﻧﻮﺍﻝ ..
ﻭﺑﺪﺕ ﺭﺑﺎﺏ ﺗﺮﺟﻊ ..
ﻫﻮ ﻗﻠﺐ ﻭﺟﻬﻪ ..
ﻭﻧﻮﺍﻝ ﺣﺘﻰ ﻫﻲ ﻣﻊ ﻫﺪﺍ ﻗﻌﺪﺕ ﺷﺎﺩﻩ ﺭﺑﺎﺏ ..
ﻉ ﺟﻴﺔ ﺑﻮﻫﺎ ﻭﻣﻌﺎﻩ ﺧﻮﺗﻬﺎ ﺳﻨﺪ ﻭﺣﻤﺰﺓ ..
ﺍﻧﺼﺪﻣﻮﺍ ﻭﻳﻦ ﺷﺎﻓﻮﺍ ﻭﺿﻌﻬﺎ ﻭﺣﺎﻟﺘﻬﺎ ..
ﻣﺸﻮﻟﻬﺎ ﺟﺮﻱ ..
ﺧﻴﺮﻱ ﺑﻬﻠﻊ : ﺧﻴﺮﻫﺎﺍﺍ !!
ﻣﺆﻧﺲ : ﻣﺎﺗﺨﺎﻓﺶ ﻳﺎﻋﻤﻲ ﺧﻴﺮﻱ ﻣﺎﻓﻴﻬﺎ ﺷﻲ ..
ﺣﻤﺰﺓ : ﻛﻴﻒ ﻣﺎﻓﻴﻬﺎ ﺷﻲ ﺍﻟﺒﻨﺖ ﺑﺘﻤﻮﺕ ..
ﻧﻮﺍﻝ : ﻣﺎﻓﻴﻬﺎ ﺷﻲ ﻏﻴﺮ ﺧﺎﻓﺖ ﺑﺲ ..
ﺭﺑﺎﺏ ﻭﻗﻔﺖ ..
ﻋﻄﺘﻬﺎ ﻧﻮﺍﻝ ﺍﻟﻤﻴﻪ ...
ﺧﺪﺗﻬﺎ ﻭﻣﺸﺖ ﻉ ﺗﺮﻛﻴﻨﻪ ﻭﻫﻲ ﻣﺤﺮﺟﻪ ﻉ ﺍﻵﺧﺮ ..
ﻣﺸﻮﻟﻬﺎ ﺳﻨﺪ ﻭﺣﻤﺰﺓ ...
ﺧﻴﺮﻱ ﻭﻫﻮ ﻳﺸﻮﻑ ﻟﻤﺆﻧﺲ : ﻏﻴﺮ ﻓﻬﻤﻨﻲ ﺷﻦ ﺻﺎﺭ ﻳﺎﻭﻟﺪﻱ ..
ﻣﺆﻧﺲ ﺑﺄﺳﻒ : ﺷﺎﻓﺖ ﺣﺎﻟﺔ ﻭﺍﺣﺪ ﻣﻦ ﺍﻟﺠﺮﺣﻰ ...
ﺧﻴﺮﻱ ﻏﻤﺾ ﻋﻴﻮﻧﻪ ﺑﺸﺪﻩ : ﺣﺴﺒﻨﺎ ﺍﻟﻠﻪ ﻭﻧﻌﻢ ﺍﻟﻮﻛﻴﻞ ..
ﺍﻟﺘﻔﺘﺖ ﻧﻮﺍﻝ ﻟﺮﺑﺎﺏ ﻭﻗﻌﺪﺕ ﺗﺸﻮﻓﻠﻬﺎ ﻛﻴﻒ ﺧﻮﺗﻬﺎ ﺣﺪﺍﻫﺎ ﺍﻟﻠﻲ ﺷﺎﺩﻫﺎ ﻣﻦ ﻳﺪﻫﺎ ﻭﺍﻟﻠﻲ ﻳﻤﺴﺢ ﻉ ﻇﻬﺮﻫﺎ ..
ﺧﻄﺮﻭﺍ ﻋﻠﻴﻬﺎ ﺧﻮﺗﻬﺎ ﺍﻟﻠﻲ ﻓﻘﺪﺗﻬﻢ ﺍﻟﺰﻭﺯ ﻓﻲ ﻗﺼﻒ ﺍﻟﻨﺎﺗﻮ ﻉ ﻣﻌﺴﻜﺮ ﺍﻟﻴﺮﻣﻮﻙ ..
ﺩﻣﻌﺘﻬﺎ ﻧﺰﻟﺖ .. ﻃﻮﻝ ﻣﺴﺤﺘﻬﺎ ..
ﻗﺪﻡ ﺧﻴﺮﻱ ﻟﺒﻨﺘﻪ ...
ﺧﻴﺮﻱ : ﺭﺑﺎﺏ .. ﺑﻨﺘﻲ .
ﺭﺑﺎﺏ : ﺍﻧﻲ ﻛﻮﻳﺴﻪ ..
ﺧﻴﺮﻱ : ﺑﺎﻫﻲ ﺗﻌﺎﻟﻲ ..
ﺷﺪ ﻳﺪﻫﺎ ﻭﺧﺪﺍﻫﺎ ﻣﻌﺎﻩ ﻭﺧﻮﺗﻬﺎ ﻭﺭﺍﻫﻢ ..
ﻟﻤﺎ ﻓﺎﺗﺖ ﺣﺪﺍ ﻣﺆﻧﺲ ﻳﺪﻭﺏ ﺭﻓﻌﺖ ﻋﻴﻮﻧﻬﺎ ﻓﻴﻪ ﻟﻘﺎﺗﻪ ﻳﺸﺒﺤﻠﻬﺎ ﺑﻄﺮﻑ ﻋﻴﻨﻪ ..
ﻧﺰﻟﺖ ﻋﻴﻮﻧﻬﺎ ..
ﻭﻛﻤﻞ ﺑﻴﻬﺎ ﺑﻮﻫﺎ ﺍﻟﻄﺮﻳﻖ ﻭﺧﻮﺗﻬﺎ ﻭﺭﺍﻫﻢ ..
ﻭﻣﺆﻧﺲ ﺑﻌﻴﻮﻧﻪ ﻣﻌﺎﻫﻢ ..
ﻧﻮﺍﻝ ﺭﻛﺰﺕ ﻋﻠﻴﻪ ﺍﺑﺘﺴﻤﺖ ﻭﻗﺎﻟﺖ؛ﻳﻘﺮﺑﻮﻟﻚ ..
ﺷﺒﺤﻠﻬﺎ .. ﻫﺰ ﺭﺍﺳﻪ ﺑﺈﻳﺠﺎﺏ ﺑﻌﺪﻳﻦ ﻗﺎﻝ : ﺗﻌﺎﻟﻲ ..
ﻣﺸﻲ ﻭﻣﺸﺖ ﻧﻮﺍﻝ ﻭﺭﺍﻩ ..
🌴🌴🌴🌴🌴🌴🌴🌴🌴🌴🌴🌴🌴
ﺗﺒﻜﻲ ﻭﺗﻨﺪﺏ ﻭﺗﻘﻮﻝ : ﺣﻲ ﻋﻠﻴﺎ ﺑﻨﺘﻲ ﺣﻲ ..
ﻏﺎﻟﻴﻪ ﺑﺄﻟﻢ : ﺧﻼﺹ ﻳﺎﺯﻳﻨﺐ ﺗﺮﺑﺤﻲ ..
ﺯﻳﻨﺐ ﺑﺒﻜﻲ : ﻛﻴﻒ ﺗﻘﻮﻟﻴﻠﻲ ﺧﻼﺹ ﻛﻴﻒ .. ﺑﻨﺘﻲ ﺑﺘﻤﻮﺕ ﻓﺠﺮﺗﻪ ﻳﺎﻏﺎﻟﻴﻪ .. ﺣﻴﻲ ﻋﻠﻴﺎ ﺍﻧﻲ ﺣﻴﻲ ..
ﺧﺸﻮﺍ ﻋﻠﻴﻬﺎ ﺍﻣﻬﺎ ﻭﻫﺎﻧﻴﺒﺎﻝ ..
ﻫﺎﻧﻴﺒﺎﻝ : ﺑﻌﺪ ﺍﻟﻔﺠﺮ ﺗﻜﻮﻧﻲ ﻭﺍﺗﻴﻪ ...
ﻣﺴﺤﺖ ﺯﻳﻨﺐ ﺩﻣﻮﻋﻬﺎ : ﺑﺎﻫﻲ .. ﺑﺎﻫﻲ ..
ﻫﺎﻧﻴﺒﺎﻝ : ﺷﻦ ﻗﺎﻟﺘﻠﻚ ﺭﺑﺎﺏ ..
ﺯﻳﻨﺐ ﺑﺒﻜﻲ : ﻣﺎﺳﻤﻌﺖ ﻣﻨﻬﺎ ﺷﻲ ﺍﻟﺘﻐﻄﻴﻪ ﺯﺍﺩﺕ ﺍﻟﻬﻢ ﻫﻢ ..
ﻫﺰ ﺭﺍﺳﻪ ﺑﺈﻳﺠﺎﺏ ﻭﻗﺎﻝ : ﺧﻼﺹ ﻧﺘﺴﺤﺮﻭﺍ ﻭﻧﺼﻠﻮﺍ ﺍﻟﻔﺠﺮ ﻭﻧﻌﺪﻭﺍ ..
ﻭﻃﻠﻊ ﻣﻦ ﺣﺪﺍﻫﻢ ..
ﻓﺎﻃﻤﻪ ﺑﻌﺘﺐ : ﻋﺎﺭﻓﺘﻴﻬﺎ ﻣﺮﻳﻀﻪ ﻭﺗﺎﻋﺒﻪ ﺑﻨﺘﻚ ﻭﻣﺨﻠﻴﺘﻬﺎ ﺑﺎﺳﺒﻮﻋﻴﻦ ..
ﻏﺎﻟﻴﻪ : ﻳﻤﻲ ﻣﺶ ﻭﻗﺘﻪ ..
ﺯﻳﻨﺐ : ﻻ ﻭﻗﺘﻪ ﻧﺴﺘﺎﻫﻞ ﺷﻦ ﻣﺎﻗﺎﻟﺖ ﻋﻠﻴﺎ ﻧﺴﺘﺎﻫﻞ ..
🍁🍁🍁🍁🍁🍁
ﻏﻴﺮ ﻋﻼﺵ ﻣﺘﻌﺐ ﺭﻭﺣﻚ ﻳﺎﻭﻟﺪﻱ؟ ..!
ﻣﺆﻧﺲ : ﻣﺎﻓﻴﻬﺎ ﺗﻌﺐ ﻳﺎﻋﻤﻲ .. ﻏﻴﺮ ﺑﺴﺮﻋﻪ ﻟﺤﻘﻮﺍ ﻣﺎﺯﺍﻝ ﻧﺺ ﺳﺎﻋﻪ ﻉ ﺍﻵﺫﺍﻥ ..
ﺧﺪﻱ ﺧﻴﺮﻱ ﻣﻨﻪ ﺍﻟﺸﻜﺎﺭﻩ : ﻭﺍﻟﻠﻪ ﺳﺤﻮﺭﻧﺎ ﺧﻠﻴﻨﺎﻩ ﻓﻤﻜﺎﻧﻪ ..
ﻣﺆﻧﺲ : ﺍﻟﻤﻬﻢ ﺗﻮﺍ ﻳﺎﻋﻤﻲ ﻟﺤﻘﻮﺍ ﺗﺴﺤﺮﻭﺍ .. ﻭﺍﻱ ﺣﺎﺟﻪ ﺗﺒﻴﻬﺎ ﻣﻨﻲ ﺭﻥ ﻋﻠﻴﺎ ﺑﺲ ﺗﻠﻘﺎﻧﻲ ﻗﺪﺍﻣﻚ ..
ﺧﻴﺮﻱ ﺑﺈﺑﺘﺴﺎﻣﻪ : ﺑﺎﺭﻙ ﺍﻟﻠﻪ ﻓﻴﻚ
ﺍﺑﺘﺴﻢ ﻣﺆﻧﺲ ﻭﻗﺎﻝ : ﺍﻟﺴﻼﻡ ﻋﻠﻴﻜﻢ ... ﻭﻟﻒ ﻭﻣﺸﻲ ...
ﻉ ﺟﻴﺔ ﺣﻤﺰﺓ ﻭﻣﻌﺎﻩ ﺳﻨﺪ ..
ﺷﺒﺤﻠﻪ ﺣﻤﺰﺓ ﺷﺒﺤﻪ ﺳﻢ ..
ﻣﺆﻧﺲ ﻣﺎﺭﻛﺰﺵ ﻋﻠﻴﻪ ..
ﻭﺻﻠﻮﺍ ﻓﻲ ﺑﻮﻫﻢ ..
ﺣﻤﺰﺓ : ﺷﻦ ﻳﺒﻲ ﻫﺪﺍ؟
ﺧﻴﺮﻱ ﺑﻘﺮﻧﺔ ﺣﻮﺍﺟﺐ ﻭﻧﺒﺮﺓ ﺣﺎﺩﻩ : ﺣﻤﺰﺓ .. ﻓﻜﻨﻲ ﻣﻦ ﺍﻟﺪﻭﺓ ﺍﻟﺰﺍﻳﺪﻩ ..
ﺣﻤﺰﺓ ﺷﺒﺢ ﻟﺒﻮﻩ ﺑﺤﺪﻩ .. ﺑﻌﺪﻳﻦ ﻟﻒ ﻭﻣﺸﻲ ..
ﺳﻨﺪ ﺷﺒﺢ ﻟﻠﺸﻜﺎﺭﺓ : ﻫﻮ ﺍﻟﻠﻲ ﺟﺎﺑﻪ ..
ﺧﻴﺮﻱ : ﺑﺎﺭﻙ ﺍﻟﻠﻪ ﻓﻴﻪ ﺍﻟﻮﻟﺪ ﻫﺪﺍ ﺩﻳﻤﺎ ﺻﺎﺣﺐ ﻭﺍﺟﺐ ..
ﺳﻨﺪ ﻫﺰ ﺭﺍﺳﻪ ﺑﺈﻳﺠﺎﺏ ..
ﺧﻴﺮﻱ؛ﻫﻲ ﺗﻌﺎﻟﻰ ﻧﻤﺸﻮﺍ ﻷﺧﺘﻚ ﻧﺘﺴﺤﺮﻭﺍ ﺣﻨﻲ ﻭﻳﺎﻫﺎ ﻗﺒﻞ ﻟﻴﺬﻥ ﺍﻟﻔﺠﺮ ..
ﻣﺸﻲ ﺧﻴﺮﻱ ﻫﻮ ﻭﺳﻨﺪ ﻭﻳﻦ ﻣﺎﻣﻮﺟﻮﺩﻩ ﺭﺑﺎﺏ ..
ﺍﻣﺎ ﺣﻤﺰﺓ ﻧﺰﻝ ﻗﻌﻤﺰ ﻟﻮﻃﺎ ..
ﻛﺎﻥ ﻳﺸﻮﻑ ﻓﻲ ﺟﻤﺎﻋﺔ ﺍﻟﻜﺘﺎﻳﺐ ﻣﻨﺘﺸﺮﻳﻦ .. ﻭﻧﺎﺱ ﺗﺨﺶ ﻭﺗﻄﻠﻊ ..
ﻓﺠﺄﺓ ..
ﺍﺳﻤﻊ ﺻﻮﺕ ﺍﻧﻔﺠﺎﺭ ﻗﻮﻱ ﻧﺎﺟﻢ ﻋﻦ ﺍﻟﻘﺼﻒ ..
ﺣﻤﺰﺓ : ﻏﻴﺮ ﺍﻣﺘﻰ ﻧﻔﺘﻜﻮﺍ ﻣﻨﻜﻢ ..
ﻓﻲ ﻧﻔﺲ ﺍﻟﻮﻗﺖ ..
ﻃﻠﻊ ﻣﺆﻧﺲ ﻫﻮ ﻭﻧﻮﺍﻝ ﻣﻦ ﻣﺒﻨﻰ ﺍﻟﻤﺴﺘﺸﻔﻰ ﻭﻛﺎﻧﻮﺍ ﻳﺘﻜﻠﻤﻮﺍ ..
ﻣﺆﻧﺲ : ﻧﻮﺍﻝ ﺧﻮﺩﻳﻬﺎ ﻣﻨﻲ ﻧﺼﻴﺤﻪ ﺍﻃﻠﻌﻲ ﺍﻧﺘﻲ ﻭﺍﺧﺘﻚ ﻭﺍﻣﻚ ...
ﻧﻮﺍﻝ : ﺗﺒﻴﻨﻲ ﻧﻬﺮﺏ ﻭﻧﺨﻠﻲ ﺗﺎﺭ ﺧﻮﺗﻲ ! ؟
ﻣﺆﻧﺲ : ﺗﺎﺭ ﺧﻮﺗﻚ ﻳﺎﺧﺪﻩ ﺭﺏ ﺍﻟﻌﺎﻟﻤﻴﻦ ..
ﻭﻗﻒ ﻭﻛﻤﻞ ﻳﻘﻮﻝ ﺑﺤﺰﻡ .. ﻧﻮﺍﻝ ﻟﻮ ﻻﻗﺪﺭ ﺍﻟﻠﻪ ﻃﺎﺣﺖ ﻃﺮﺍﺑﻠﺲ ﻭﺧﺸﻮﻫﺎ ﺣﺘﺼﻴﺮ ﺣﺎﺟﺎﺕ ﻻﻳﻤﻜﻦ ﻟﻌﻘﻠﻚ ﻳﺘﺼﻮﺭﻫﺎ .. ﻓﻲ ﺍﻟﻠﻲ ﻳﺒﻮﺍ ﻳﻨﺘﻘﻤﻮﺍ ﻭﻫﺪﻳﻢ ﺗﻮﻗﻌﻲ ﻣﻨﻬﻢ ﻛﻞ ﺷﻲ .. ﻛﻞ ﺷﻲ ﻳﺎﻧﻮﺍﻝ ..
ﻭﺯﻋﺖ ﻧﻈﺮﻫﺎ ﺣﻮﺍﻟﻴﻬﺎ ﻭﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ...
ﻭﺭﺟﻌﺖ ﺷﺎﻓﺖ ﻟﻤﺆﻧﺲ .. ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﻣﺆﻧﺲ : ﺍﺭﺟﻮﻙ ﻳﺎﻧﻮﺍﻝ ..
ﻧﻮﺍﻝ ﺑﺈﺑﺘﺴﺎﻣﺔ ﺃﻟﻢ : ﺣﺎﺿﺮ .. ﺗﺼﺒﺢ ﻉ ﺧﻴﺮ ..
ﻣﺆﻧﺲ : ﻗﺪﺍﻣﻚ ﻛﻞ ﺧﻴﺮ ..
ﻛﻴﻒ ﺟﺎﻳﻪ ﺑﺘﻤﺸﻲ ﻭﻗﻔﺖ ﻭﻗﺎﻟﺘﻠﻪ : ﺍﻳﻪ .. ﺑﻨﻘﻮﻟﻚ ..
ﻣﺆﻧﺲ ﺿﻴﻖ ﻋﻴﻮﻧﻪ ﺑﺘﺴﺎﺅﻝ ..
ﻧﻮﺍﻝ ﺑﺈﺑﺘﺴﺎﻣﻪ : ﺍﻭﻝ ﻣﺮﺓ ﺍﻟﻴﻮﻡ ﻧﺸﻮﻓﻚ ﺑﺸﻜﻞ ﺗﺎﻧﻲ ..
ﻓﻬﻢ ﻋﻠﻴﻬﺎ ﻭﻏﻴﺮ ﻋﻴﻮﻧﻪ ﻋﻨﻬﺎ ﻭﺷﺒﺢ ﻟﻤﺠﻤﻮﻋﺔ ﺿﺒﺎﻁ ﻭﺍﻗﻔﻴﻦ ﻳﻬﺪﺭﺯﻭﺍ ..
ﺿﺤﻜﺖ ﻭﻗﺎﻟﺖ : ﺭﺑﻲ ﻳﺤﻤﻴﻚ ﻳﺎﻣﺆﻧﺲ ...
ﺍﺑﺘﺴﻢ ﺑﺪﻭﻥ ﻣﺎﻳﺸﻮﻓﻠﻬﺎ ﻭﻫﺰ ﺭﺍﺳﻪ ﺑﺈﻳﺠﺎﺏ ..
ﻭﻫﻲ ﻟﻔﺖ ﻭﻣﺸﺖ ﻃﻮﻝ ..
ﻏﻴﺮ ﻋﻴﻮﻧﻪ ﻟﻴﻬﺎ ﻭﻗﻌﺪ ﻳﺸﻮﻓﻠﻬﺎ ﻭﻫﻲ ﻣﺎﺷﻴﻪ ﻟﻴﻦ ﺍﺧﺘﻔﺖ ..
ﺗﻨﻬﺪ ﺑﻀﻴﻖ .. ﺑﻌﺪﻳﻦ ﻣﺸﻲ ﻟﻤﺠﻤﻮﻋﺔ ﺍﻟﻀﺒﺎﻁ ..
🍁🍁🍁🍁🍁🍁
ﺧﺸﺖ ﻣﻦ ﻓﻢ ﺍﻟﺒﻮﺍﺑﻪ ..
ﺷﺒﺤﺖ ﻟﻠﻜﻮﺟﻴﻨﻪ ..
ﻟﻘﺖ ﻋﻤﺘﻬﺎ ﻓﻴﻬﺎ ﺗﻐﺴﻞ ﻓﻲ ﺍﻟﻤﺎﻋﻴﻦ ..
ﺭﺯﺍﻥ : ﻋﻤﺘﻲ ..
ﻏﺎﻟﻴﻪ ﺷﺒﺤﺘﻠﻬﺎ : ﻣﺎﺭﻗﺪﺗﻴﺶ ..
ﺭﺯﺍﻥ : ﺻﻠﻴﺖ ﻭﻣﺎﺟﺎﻧﻴﺶ ﻧﻮﻡ ﻗﺖ ﻧﺠﻴﻚ .. ﺧﻴﺮﻩ ﻋﻤﻲ ﻫﺎﻧﻴﺒﺎﻝ ﻋﺪﺍ ﺑﺴﻴﺎﺭﺗﻪ ..
ﻏﺎﻟﻴﻪ ﺭﺟﻌﺖ ﺗﺸﻮﻑ ﻟﻼﻭﻧﺪﻳﻨﻮ : ﺭﻭﺡ ﺑﻌﻤﺘﻚ ﺯﻳﻨﺐ ﻟﻄﺮﺍﺑﻠﺲ ﺭﺍﻧﻴﺎ ﻣﺮﻳﻀﻪ ﻭﺭﻗﺪﻭﻫﺎ ﻓﻲ ﺍﻟﻤﺴﺘﺸﻔﻰ ..
ﺳﻜﺘﺖ ﺭﺯﺍﻥ ﻭﻣﺎﺑﺘﺶ ﺗﺴﺄﻝ ﻋﻨﻬﺎ ..
ﺑﻌﺪﻳﻦ ﻗﺎﻟﺖ : ﺣﻮﻟﻲ ﻋﻤﺘﻲ ﺧﻞ ﻧﻐﺴﻞ ﻋﻨﻚ ..
ﻏﺎﻟﻴﻪ : ﺗﻮ ﻧﻜﻤﻞ ﺑﺮﻭﺣﻲ ..
ﻗﺪﻣﺖ ﺭﺯﺍﻥ ﻭﻭﻗﻔﺖ ﺣﺪﺍﻫﺎ ﻭﻗﻌﺪﺕ ﺗﻐﺴﻞ ﻭﺩﻑ ﻓﻲ ﻏﺎﻟﻴﻪ ..
ﻏﺎﻟﻴﻪ ﺍﺑﺘﺴﻤﺖ .. ﻣﺼﻤﺼﻤﺖ ﺍﻳﺪﻳﻬﺎ ﻭﺧﺮﺕ ..
ﺑﻌﺪﻳﻦ ﻣﺸﺖ ﻗﻌﻤﺰﺕ ﻉ ﺍﻟﻜﺮﺳﻲ ..
ﺭﺯﺍﻥ : ﻣﺎﺯﺍﻝ ﻣﺎﺭﻭﺣﺘﺶ ﺍﻟﻤﺘﻠﻔﻪ ﻫﺪﻳﻚ ..
ﻏﺎﻟﻴﻪ : ﺍﻧﺘﻲ ﻟﺴﺎﻧﻚ ﻫﺪﻯ ﻳﺒﻲ ﺗﻘﺮﻳﺾ ..
ﺭﺯﺍﻥ ﺑﻀﺤﻜﻪ؛ﺍﺩﺭﻩ ﻓﻲ ﺍﻟﻜﺒﺪ ﻣﺎﻧﺰﻟﺘﻠﻲ ﻣﻦ ﺭﻗﺒﻪ .. ﺍﻟﺤﻖ ﻛﻼ ﻋﻴﺖ ﺟﺪﻱ ﺭﻣﻀﺎﻥ ﺍﻟﻠﻪ ﻳﺮﺣﻤﻪ ﻭﻋﻴﺖ ﺟﺪﻱ ﻋﺒﺪﺍﻟﻠﻪ ﻣﺎﺟﺘﻬﻢ ﻛﻨﻪ ﻣﺴﻘﻤﻪ ..
ﻏﺎﻟﻴﻪ ﻣﺎﻗﺪﺭﺗﺶ ﺗﺘﻤﺎﻟﻚ ﻧﻔﺴﻬﺎ ﺑﺮﻏﻢ ﻛﻞ ﺷﻲ ﺍﻧﻔﺠﺮﺕ ﺑﺎﻟﻀﺤﻚ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻪ ..
ﺍﻟﺘﻔﺘﺖ ﺭﺯﺍﻥ ﻭﺷﺒﺤﺘﻠﻬﺎ ﺑﺈﺳﺘﻐﺮﺍﺏ .
ﻭﻏﺎﻟﻴﻪ ﻣﻴﺘﻪ ﺑﺎﻟﻀﺤﻚ ﻟﻴﻦ ﻋﻴﻮﻧﻬﺎ ﺩﻣﻌﻮﺍ ..
ﻭﻣﻴﺰﺓ ﻏﺎﻟﻴﻪ ﺍﻧﻬﺎ ﺗﻀﺤﻚ ﺑﺪﻭﻥ ﺻﻮﺕ ..
ﺭﺯﺍﻥ ﻣﺎﻗﺪﺭﺗﺶ ﺗﻘﺎﻭﻡ ﺣﺘﻰ ﻫﻲ ﻭﻗﻌﺪﺕ ﺗﻀﺤﻚ ..
ﺭﺍﺟﻌﺖ ﻧﻔﺴﻬﺎ ﺷﻦ ﻗﺎﻟﺖ .. ﻓﻨﺼﺖ ﻋﻴﻮﻧﻬﺎ ﻭﺳﻜﺘﺖ ..
ﻭﻏﺎﻟﻴﻪ ﺯﺍﺩﺕ ﺿﺤﻜﺖ ﻟﻴﻦ ﺷﺪﺕ ﺟﻨﺎﺑﻬﺎ ..
ﺭﺯﺍﻥ ﺍﻟﺘﻔﺘﺖ ﻟﻼﻭﻧﻴﺪﻳﻨﻮ ﻭﻗﺎﻟﺖ؛ﻃﺒﻌﺎ ﻣﺎﻋﺪﺍ ﺍﻣﻲ ..
ﻏﺎﻟﻴﻪ ﻧﺎﺿﺖ ﻣﻦ ﻣﻜﺎﻧﻬﺎ ﻭﻫﻲ ﺗﻀﺤﻚ ..
ﻫﺪﺕ ﺷﻮﻳﻪ ﻭﻗﻌﺪﺕ ﺗﻘﻮﻝ : ﻫﻬﻬﻪ .. ﺇﻥ ﺷﺎﺀ ﺍﻟﻠﻪ ﺧﻴﺮ ﻳﺎﺭﺏ ... ﻫﻬﻬﻪ
ﻭﺭﺯﺍﻥ ﻛﻞ ﻣﺎﺗﺠﻲ ﺿﺤﻜﺘﻬﺎ ﺑﺘﻐﻠﺒﻬﺎ ﺗﺸﺪﻫﺎ ..
ﻏﺎﻟﻴﻪ : ﻭﻭﺍﻙ ... ﻋﻄﻴﻚ ﺍﻟﻬﻨﻲ ﻳﺎﻓﺮﺧﻪ ﻟﻴﺎ ﻭﻗﺖ ﻣﺎﺿﺤﻜﺖ ﻫﻜﻲ ..
ﺭﺯﺍﻥ ﺷﻘﻠﺒﺖ ﻋﻴﻮﻧﻬﺎ ﻭﻫﻲ ﻣﺒﺘﺴﻤﻪ ..
ﻭﻃﺒﺴﺖ ﻛﻔﺖ ﺍﻟﺼﻔﺮﺓ ﺗﺤﺖ ﺍﻟﺮﺧﺎﻣﻪ ..
ﺑﻌﺪﻳﻦ ﺷﺒﺤﺖ ﻟﻌﻤﺘﻬﺎ ﻭﻗﺎﻟﺖ؛ﺍﺣﻤﻢ .. ﺷﻦ ﺣﺎﻝ ﺩﻻﻝ؟
ﻏﺎﻟﻴﻪ ﺗﻼﺷﺖ ﺍﺑﺘﺴﺎﻣﺘﻬﺎ؛ﺍﻫﻮ ﻣﺎﺷﻲ ﺣﺎﻟﻬﺎ ..
ﺭﺯﺍﻥ؛ﻣﺼﺨﻔﺘﻨﻲ ﻭﺍﺟﺪ ..
ﻏﺎﻟﻴﻪ : ﺍﻳﻪ ﻭﺍﻟﻠﻪ ﺣﺎﻟﻬﺎ ﻳﺼﺨﻒ ..
ﺭﺯﺍﻥ : ﺍﻣﻢ .. ﺑﺎﻫﻲ ﻣﻌﺎﺵ ﻛﻠﻤﺘﻮﺍ ﻋﻤﻲ ﺣﻤﻴﺪ ..
ﻏﺎﻟﻴﻪ؛ﻭﻟﻴﺶ ﺍﻧﺘﻲ ﻣﺎﺗﻜﻠﻤﻴﺶ ﻓﺮﻓﻘﻪ ..
ﺭﺯﺍﻥ : ﻟﻴﺎ ﻳﻮﻣﻴﻦ ﻣﻦ ﻏﻴﺮ ﺭﺻﻴﺪ .. ﻣﻌﺎﺩ ﻧﻌﻠﻢ ﻋﻠﻴﻬﺎ ﺷﻲ ..
ﻏﺎﻟﻴﻪ : ﻛﻠﻤﻨﺎ ﺍﻣﺲ ... ﻣﺎﺑﻴﻬﻤﺶ ..
ﺭﺯﺍﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﺑﻌﺪﻳﻦ ﻗﺎﻟﺖ : ﻭﻋﻤﺘﻲ ﻛﻔﺎﻳﻪ ..
ﻏﺎﻟﻴﻪ : ﻟﺒﻜﺮﻱ ﺷﻮﻳﻪ ﻛﻨﺖ ﻧﻜﻠﻢ ﻓﻴﻬﺎ ﻋﺪﺕ ﻟﺮﺍﻧﻴﺎ ﺍﻟﻤﺴﺘﺸﻔﻰ ..
ﺭﺯﺍﻥ ﺍﺑﺘﺴﻤﺖ ﺑﺘﻬﻜﻢ : ﻃﻴﺒﻪ ﻭﺍﺟﺪ ﻋﻤﺘﻲ ﻛﻔﺎﻳﻪ ..
ﻏﺎﻟﻴﻪ ﺑﺮﻓﻌﺔ ﺣﺎﺟﺐ : ﻫﺪﻳﻦ ﺧﻮﺍﺕ ﻓﺎﻫﻤﻪ ... ﺧﻮﺍﺍﺕ
ﺭﺯﺍﻥ : ﺑﺎﻫﻲ ﺑﺎﻫﻲ .. ﺧﻼﺹ ﻳﺎﻛﻠﻤﺘﻲ ﻭﻟﻴﻠﻲ ..
ﻏﺎﻟﻴﻪ ﺷﺒﺤﺘﻠﻬﺎ ﺑﻨﺺ ﻋﻴﻦ ..
ﺭﺯﺍﻥ ﺍﺑﺘﺴﻤﺖ ﺑﻌﺪﻳﻦ ﻗﺎﻟﺖ : ﺑﺎﻫﻲ .. ﻫﻲ ﻋﻤﺘﻲ ﻛﻔﺎﻳﻪ .. ﻣﻌﺎﺵ ﺳﻤﻌﺖ ﺷﻲ ﻋﻦ ﻭﻟﺪﻫﺎ؟
ﻏﺎﻟﻴﻪ ﺑﺈﺳﺘﻐﺒﺎﺀ : ﺍﻳﻦ ﻣﻨﻬﻢ ..
ﺭﺯﺍﻥ ﺑﺸﻲ ﻣﻦ ﺍﻟﺮﺑﻜﻪ : ﺗﻲ ﻫﺪﻯ ﺍﻟﻠﻲ ﻋﺪﺍ ﻟﻠﺠﺒﻬﻪ ..
ﻏﺎﻟﻴﻪ : ﻣﻦ ﺍﻟﻠﻲ ﻋﺪﻯ ﻟﻠﺠﺒﻬﻪ ..
ﺭﺯﺍﻥ ﺑﺮﻓﻌﺔ ﺣﻮﺍﺟﺐ : ﻟﻴﺶ ﻫﻮ ﻓﻲ ﻏﻴﺮ ﻋﻤﺎﺩ ﻳﺤﺎﺭﺏ ..
ﺍﺑﺘﺴﻤﺖ ﻏﺎﻟﻴﻪ : ﻗﺼﺪﻙ ﻋﻤﺎﺩ ﺍﻧﺘﻲ ؟
ﺭﺯﺍﻥ ﻭﺟﻬﻬﺎ ﻭﻻﺍﺣﻤﺮ : ﻟﻴﺶ ﻳﻌﻨﻲ ﻓﻲ ﻏﻴﺮﻩ ..😳
ﻏﺎﻟﻴﻪ ﺗﺼﻨﻌﺖ ﺗﻨﻬﻴﺪﻩ ﻭﻗﺎﻟﺖ؛ﻭﻟﻴﺶ ﺗﺴﺄﻟﻲ ﻋﻨﻪ ﻳﺎﺣﻨﻪ ..
ﺭﺯﺍﻥ ﺑﺈﺭﺗﺒﺎﻙ : ﻫﻜﻲ ﻭﺧﻼﺹ 😳
ﻏﺎﻟﻴﻪ ﺍﺑﺘﺴﻤﺖ ﺑﻌﺪﻳﻦ ﻗﺎﻟﺖ ﺑﺄﻟﻢ : ﻣﻌﺎﺵ ﻳﻨﺪﺭﻭﺍ ﻋﻠﻴﻪ ﺷﻲ .. ﻭﻟﻌﻨﺪ ﺗﻮﺍ ﻣﺎﺯﺍﻝ ﻣﺎﻳﻌﻠﻢ ﻻﺑﺠﺪﻩ ﻭﻻ ﺑﻮﻟﺪ ﺧﺎﻟﻪ ... ﻭﻳﺎﺍﺭﺑﻲ ﻣﺎﺗﺨﻠﻲ ﻣﺼﻴﺮﻩ ﻛﻴﻒ ﻣﺼﻴﺮﻫﻢ ..
ﺣﻄﺖ ﻳﺪﻫﺎ ﻉ ﻭﺟﻬﻬﺎ ﻭﻗﻌﺪﺕ ﺗﺒﻜﻲ ..
ﺭﺯﺍﻥ ﺩﻣﻮﻋﻬﺎ ﻏﻠﺒﻮﻫﺎ .. ﻃﻮﻝ ﻃﻠﻌﺖ ﻣﻦ ﺣﺪﺍ ﻏﺎﻟﻴﻪ ﻭﻣﻨﻬﺎ ﻟﻔﻢ ﺍﻟﺒﻮﺍﺑﻪ ﻭﻣﺸﺖ ﺗﺠﺮﻱ ﻟﺤﻮﺷﻬﻢ ﻭﺩﻣﻮﻋﻬﺎ ﻳﻨﺰﻟﻮﺍ ..
ﺧﺸﺖ ﻟﻠﺤﻮﺵ ..
ﻭﻃﻮﻝ ﻣﺸﺖ ﻟﺪﺍﺭﻫﺎ ﻭﺻﻜﺮﺗﻬﺎ ﻋﻠﻴﻬﺎ ..
ﻭﻣﺸﺖ ﻟﺴﺮﻳﺮﻫﺎ ..
ﻃﻠﻌﺖ ﺗﻠﻴﻔﻮﻧﻬﺎ ﻣﻦ ﺗﺤﺖ ﺍﻟﻤﺨﺪﻩ ..
ﺧﺸﺖ ﻉ ﺍﻷﺳﺘﺪﻳﻮ ...
ﺣﻄﺖ ﻉ ﺻﻮﺭﺓ ﺭﻣﺰﻱ ...
ﻭﻗﻌﺪﺕ ﺗﺒﻜﻲ ﺑﺎﻟﻌﺒﺮﺓ ...
ﺣﻀﻨﺖ ﺍﻟﺘﻠﻴﻔﻮﻥ ﻭﻗﻌﺪﺕ ﺗﺒﻜﻲ ﺑﺤﺮﻗﻪ ﺷﺪﻳﺪﻩ ..
🍁 ﻭﺍﻣﻬﺎ ﻓﻲ ﺍﻟﺪﺍﺭ ﺍﻟﻠﻲ ﺟﻨﺒﻬﺎ ..
ﺩﺍﺭ ﺭﻣﺰﻱ ﻭﺗﻮﻓﻴﻖ ..
ﺭﺍﻗﺪﻩ ﻉ ﺳﺮﻳﺮﻩ ﻭﻫﻲ ﺣﺎﺿﻨﻪ ﻗﺼﻲ ...
ﻭﺗﻮﻓﻴﻖ ﻳﺸﻮﻓﻠﻬﺎ ..
ﻛﻴﻒ ﺩﻣﻮﻋﻬﺎ ﻳﻨﺰﻟﻮﺍ ﻭﻫﻲ ﺭﺍﻗﺪﻩ ..
ﻭﺣﺘﻰ ﻫﻮ ﺩﻣﻮﻋﻪ ﻧﺰﻟﻮﺍ ﻣﻌﺎﻫﺎ ...
🍁🍁🍁🍁🍁
🌠 ﻭﺍﻗﻔﻪ ﻓﻲ ﻣﻜﺎﻥ ﺍﺷﺒﻪ ﺑﺎﻟﺼﺤﺮﺍﺀ ﺍﻟﺠﺮﺩﺍﺀ ..
ﻗﻌﺪﺕ ﺗﺸﻮﻑ ﺣﻮﺍﻟﻴﻬﺎ ..
ﻓﺘﺤﺖ ﻋﻴﻮﻧﻬﺎ ﻉ ﻭﺳﻌﻬﻢ ﻟﻤﺎ ﺷﺎﻓﺘﻪ ..
ﻛﺎﻥ ﻭﺍﻗﻒ ﺑﻌﻴﺪ ..
ﻫﻲ ﻗﻌﺪﺕ ﺗﻨﺎﺩﻱ ﺑﺼﻮﺕ ﻋﺎﻟﻲ
" ﺭﻣﺰﻱ .."
ﺑﺲ ﻫﻮ ﻣﺎﻳﺴﻤﻌﺶ ﻓﻴﻬﺎ ..
ﻓﺠﺄﺓ ﺑﺎﻥ ﺍﺳﺪ ﺟﺎﻱ ﻧﺎﺣﻴﺘﻪ ..
ﻣﺎﺗﺖ ﻣﻦ ﺧﻮﻓﻬﺎ ﻗﻌﺪﺕ ﺗﻨﺎﺩﻱ ﺑﻌﻴﺎﻁ ..
" ﺭﻣﺰﻱ .."
ﻫﺠﻢ ﺍﻷﺳﺪ ﻉ ﺭﻣﺰﻱ ..
ﻃﻴﺢ ﺭﻣﺰﻱ ﻭﺑﺮﻙ ﻋﻠﻴﻪ ..
ﻭﻫﻲ ﺗﻌﻴﻂ ﻉ ﻃﻮﻝ ﺭﻗﺒﺘﻬﺎ ... ﻭﺗﻨﺎﺩﻱ ﻓﻴﻪ ..
ﺳﻜﺘﺖ ﻓﺠﺄﺓ ﻟﻤﺎ ﺭﺍﺗﻪ ﻛﻴﻒ ﺩﻑ ﺍﻷﺳﺪ ﻋﻨﻪ ..
ﻭﻧﺎﺽ ﻗﻌﻤﺰ ..
ﺍﻷﺳﺪ ﺑﻌﺪ ... ﻭﻗﻌﺪ ﻳﺸﻮﻓﻠﻪ ..
ﺑﻌﺪﻳﻦ ﻗﺮﺑﻠﻪ ﻣﻦ ﺟﺪﻳﺪ ..
ﻟﻜﻦ ﻣﺎﺍﻧﻘﻀﺶ ﻋﻠﻴﻪ ..
ﻗﻌﺪ . ﻗﺮﻳﺐ ﻋﻠﻴﻪ ﻭﻳﺸﻮﻓﻠﻪ ..
ﺭﻣﺰﻱ ﻳﺸﻮﻓﻠﻪ ﻭﺑﺲ ..
ﻫﻲ ﻗﻌﺪﺕ ﺗﻌﻴﻂ ﻭﺗﻨﺎﺩﻱ ﻓﻴﻪ ..
" ﺭﻣﺰﻱ .."
ﻟﻜﻦ ﻫﻮ ﻣﺎﻳﺴﻤﻌﺶ ﻓﻴﻬﺎ ...
ﻟﻌﻨﺪ ﻣﺎﺷﺎﻓﺖ ﺍﻷﺳﺪ ﺍﻧﻘﺾ ﻋﻠﻴﻪ ﻣﻦ ﺟﺪﻳﺪ ..
ﻫﻲ ﻃﻮﻝ ﻓﺘﺤﺖ ﻋﻴﻮﻧﻬﺎ ..
ﻭﻫﻮ ﻗﻌﺪﺕ ﺗﻌﻴﻂ ﺑﻬﻠﻊ ...
ﺣﻀﻨﺘﻬﺎ ﺍﻣﻬﺎ ﺑﻘﻮﺓ : ﺭﺍﻧﻴﺎ ﻣﺎﻣﺎ .. ﺧﻼﺹ ﻳﺎﻣﺎﻣﺎ .. ﺑﻨﺘﻲ ﺧﻼﺹ .
ﺭﺍﻧﻴﺎ ﻟﻤﺎ ﺷﻤﺖ ﺭﻳﺤﺔ ﺍﻣﻬﺎ ..
ﻗﻌﺪﺕ ﺗﺴﺘﻜﻴﻦ ﺷﻮﻳﻪ ﻭﺷﻮﻳﻪ .. ﻭﺭﺟﻌﺖ ﻏﻤﻀﺖ ﻋﻴﻮﻧﻬﺎ ..
ﺯﻳﻨﺐ ﺑﺒﻜﻲ : ﺣﻲ ﻋﻠﻴﺎﺍﺍ .. ﺍﻃﻠﻌﻲ ﻧﺎﺩﻱ ﺍﻟﺪﻛﺎﺗﺮﺓ ﺗﺤﺮﻛﻲ ..
ﻃﻠﻌﺖ ﺭﺑﺎﺏ ﺗﺠﺮﻱ ..
ﻟﻘﺖ ﻗﺪﺍﻣﻬﺎ ﺣﻤﺰﺓ : ﻧﺎﺩﻱ ﻉ ﺩﻛﺘﻮﺭ ﻳﺎﺣﻤﺰﺓ ..
ﺣﻤﺰﺓ : ﺧﻴﺮﻫﺎ !!
ﺭﺑﺎﺏ : ﺩﺍﺧﺖ ﻭﻻ ﻣﺶ ﻋﺎﺭﻓﻪ ﺷﻦ ﺻﺎﺭﻟﻬﺎ ..
ﺣﻤﺰﺓ ﻣﺸﻲ ﻃﻮﻝ ﻳﺠﺮﻱ ..
ﻭﺭﺑﺎﺏ ﻭﻗﻔﺖ ﻭﻫﻲ ﺣﺎﻃﻪ ﻳﺪﻫﺎ ﻉ ﺻﺪﺭﻫﺎ ﻭﻫﻲ ﺗﺘﻨﻔﺲ ﺑﺼﻌﻮﺑﻪ .. ﻭﺗﺒﻠﻊ ﻓﺮﻳﻘﻬﺎ ..
ﻭﺯﻋﺖ ﻧﻈﺮﻫﺎ ﺣﻮﺍﻟﻴﻬﺎ ..
ﻭﻗﻔﺖ ﺍﻧﻈﺎﺭﻫﺎ ﻉ ﺍﺧﺮ ﺍﻟﻤﻤﺮ ..
ﻟﻘﺖ ﻣﺆﻧﺲ ﻭﺍﻗﻒ ﻭﻳﺸﻮﻓﻠﻬﺎ ﻭﻫﻮ ﻣﻀﻴﻖ ﻋﻴﻮﻧﻪ ..
ﻫﻲ ﻗﻌﺪﺕ ﺗﺸﺒﺤﻠﻪ ﻭﺑﺲ ..
ﻫﻮ ﻃﻮﻝ ﻗﺪﻣﻠﻬﺎ ..
ﺭﺑﺎﺏ ﺗﺸﺒﺤﻠﻪ ﻛﻴﻒ ﺟﺎﻱ ﻟﻌﻨﺪ ﻣﺎﻭﻗﻒ ﻋﻠﻴﻬﺎ ..
ﻣﺆﻧﺲ : ﺻﺎﻳﺮﺓ ﺣﺎﺟﻪ ..
ﺭﺑﺎﺏ ﺑﺨﻮﻑ : ﻣﺶ ﻋﺎﺭﻓﻪ ﺍﺧﺘﻲ ﺧﻴﺮﻫﺎ ..
ﻉ ﺟﻴﺔ ﺣﻤﺰﺓ ﻣﻊ ﺍﻟﺪﻛﺘﻮﺭ ﻳﺠﺮﻭﺍ ﻭﺧﺸﻮﻟﻬﺎ .. ﻭﺭﺑﺎﺏ ﻟﺤﻘﺘﻬﻢ ..
ﻭﻣﺆﻧﺲ ﻗﻌﺪ ﻭﺍﻗﻒ ﻗﺪﺍﻡ ﺍﻟﺒﺎﺏ ..
🍁 ﻗﻌﺪ ﻳﺘﻔﺤﺺ ﺍﻟﺪﻛﺘﻮﺭ ﻓﻲ ﺭﺍﻧﻴﺎ ..
ﺑﻌﺪﻳﻦ ﻗﺎﻝ : ﺭﺍﻗﺪﻩ ﺑﺲ ..
ﺯﻳﻨﺐ : ﻣﺘﺄﻛﺪ ..
ﺍﻟﺪﻛﺘﻮﺭ ﺷﺒﺤﻠﻬﺎ ﺑﺮﻓﻌﺔ ﺣﻮﺍﺟﺐ ..
ﺣﻤﺰﺓ : ﺗﺒﻲ ﺗﻄﻤﻦ ..
ﺍﻟﺪﻛﺘﻮﺭ : ﺍﻃﻤﻨﻮﺍ ﻣﺎﻓﻴﻬﺎ ﺷﻲ ﺭﺍﻗﺪﻩ ﻓﻘﻂ ﻻﻏﻴﺮ ..
ﺣﻤﺰﺓ ﻗﻌﺪ ﻳﺸﺒﺤﻠﻪ ﺑﺈﺳﺘﻐﺮﺍﺏ ﻣﻤﺰﻭﺝ ﺑﺎﻹﺯﺩﺭﺍﺀ ..
ﺍﻟﺪﻛﺘﻮﺭ ﻣﺎﺩﻭﺭﺍﺵ : ﺧﻠﻮﻫﺎ ﺗﺮﻗﺪ ﻭﺍﻃﻠﻌﻮﺍ ﻣﻦ ﺣﺪﺍﻫﺎ ..
ﻭﻣﺸﻲ ﻃﻠﻊ ﻣﻦ ﺍﻟﻐﺮﻓﻪ ...
ﺭﺑﺎﺏ : ﻫﺪﺍ ﺧﻴﺮﻩ؟
ﺣﻤﺰﺓ ﺑﺘﻬﻜﻢ : ﺍﻟﺒﺮﻓﺴﻮﺭ ﻣﺎﻋﺠﺒﺎﺵ ﺳﺆﺍﻝ ﺍﻣﻲ ..
ﺯﻳﻨﺐ : ﻫﺎﺗﻮﺍ ﺩﻛﺎﺗﺮﺓ ﻫﺎﺩﻭﺍ ... ﻃﻴﺢ ﺳﻌﺪﻫﻢ ..
ﺣﻤﺰﺓ : ﻣﻬﻨﺔ ﺍﻟﻄﺐ ﻓﻠﻴﺒﻴﺎ ﻣﺎﻳﺨﺪﻡ ﻓﻴﻬﺎ ﻛﺎﻥ ﺍﻟﻤﺮﻳﺾ ﻭﺧﻮﻩ ..
ﺗﻨﻬﺪﺕ ﺯﻳﻨﺐ ﻭﻗﻌﺪﺕ ﺗﻤﺴﺢ ﻉ ﺭﺍﺱ ﺑﻨﺘﻬﺎ ﺍﻟﻠﻲ ﻛﺎﻧﺖ ﻫﺎﺭﺑﻪ ﻣﻦ ﻧﻮﻣﻬﺎ ﻋﻦ ﻛﻞ ﺷﻲ ..
ﻭﻛﺄﻧﻬﺎ ﺗﺘﻘﺼﺪ ﺗﺮﻗﺪ .. ﺑﺶ ﺗﺸﻮﻑ ﺣﺒﻴﺐ ﺭﻭﺣﻬﺎ 💔
🍁🍁🍁🍁
ﺗﺸﺒﺢ ﻟﺒﻨﺘﻬﺎ ﻭﻫﻲ ﺗﺮﻗﺪ ﻓﻲ ﺑﻨﺖ ﺧﺎﻟﺘﻬﺎ ..
ﻭﺧﻮﻫﺎ ﺑﺤﺪﺍﻫﺎ ﻳﺘﻜﻠﻢ ﻭﻫﻲ ﺗﺴﻤﻊ ﻓﻴﻪ ..
ﻫﺎﻧﻴﺒﺎﻝ : ﺷﺎﻓﺘﻬﺎ ﺟﺖ .. ﻃﻮﻝ ﻋﺪﺕ ﺣﺘﻰ ﺳﻼﻡ ﻋﻠﻴﺎ ﻣﺎﺳﻠﻤﺖ ..
ﺷﺒﺤﺘﻠﻪ ﻧﻌﻴﻤﻪ : ﺍﻟﻜﻼﻡ ﺍﻟﻠﻲ ﺍﻧﻘﺎﻝ ﻉ ﻭﻟﺪﻫﺎ ﻭﻋﻠﻴﻬﺎ ﻫﻲ ﻭﺑﻮﻩ ﻣﺶ ﺳﺎﻫﻞ ﻳﺎﻫﺎﻧﻴﺒﺎﻝ ..
ﻫﺎﻧﻴﺒﺎﻝ : ﺑﺎﻫﻲ ﻣﺎﻗﻠﻨﺎ ﺷﻲ .. ﻟﻜﻦ ﺍﻟﺤﺎﻝ ﺣﺎﻝ ﺭﻣﻀﺎﻥ ﻭﺍﻟﻤﻮﺕ ﻳﺪﻭﺭ ﺑﻴﻨﺎ ﻣﻦ ﻛﻞ ﺗﺮﻛﻴﻨﻪ .. ﺍﻟﻮﺍﺣﺪ ﻣﺶ ﺿﺎﻣﻦ ﺭﻭﺣﻪ ﻳﺎﻧﻌﻴﻤﻪ ﻳﻌﻴﺶ ﻟﻠﺴﺎﻋﻪ ﺍﻟﻠﻲ ﺑﻌﺪﻫﺎ ﻭﻻﻳﺘﻮﻛﻞ ..
ﻧﻌﻴﻤﻪ : ﻧﻘﻮﻟﻚ ﻭﺧﻲ .. ﺍﺧﺘﻚ ﻣﻀﻐﻮﻃﻪ ﻫﻠﺒﻪ ﻭﻧﻔﺴﻴﺘﻬﺎ ﺗﺎﻋﺒﻪ ﻭﺍﻱ ﺷﻲ ﺍﺩﻳﺮﻩ ﻣﻌﺬﻭﺭﺓ ﻓﻴﻪ .. ﻭﺍﻟﻠﻪ ﻟﻮ ﻛﻨﺖ ﻣﻜﺎﻧﻬﺎ ﺭﺍﻧﻲ ﻫﺒﻠﺖ .
ﻟﻜﻦ ﻛﻔﺎﻳﻪ ﻃﻠﻌﺖ ﻣﺮﺍﺓ ﻗﻮﻳﻪ ﻭﺍﻳﻤﺎﻧﻬﺎ ﻗﻮﻱ ..
ﻫﺎﻧﻴﺒﺎﻝ ﺑﺘﻀﻴﻴﻘﺔ ﻋﻴﻮﻥ؛ﺷﻜﻠﻚ ﻧﺰﻟﺘﻲ ﻣﻦ ﻣﺴﺘﻮﻯ ﺍﻟﻘﻄﻂ ﻟﻤﺴﺘﻮﻯ ﺍﻟﺠﺮﺫﺍﻥ ..
ﻧﻌﻴﻤﻪ : ﻫﻬﻬﻬﻬﻬﻬﻬﻬﻪ ..
ﻫﺎﻧﻴﺒﺎﻝ ﺑﻀﺤﻜﻪ : ﺟﺮﺫﺓ ﻣﻌﻨﺎﻫﺎ ..
ﻧﻌﻴﻤﻪ ﺑﻀﺤﻜﻪ : ﺍﻳﻪ ﻳﺎﻃﺤﻠﺐ ..
ﻫﺎﻧﻴﺒﺎﻝ : ﺩﻻﻝ ﺗﻌﻠﻢ !
ﻧﻌﻴﻤﻪ ﺗﻼﺷﺖ ﺿﺤﻜﺘﻬﺎ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ .
ﺗﻨﻬﺪ ﺑﺄﻟﻢ ﻭﺳﻜﺖ ..
ﺑﻌﺪﻳﻦ ﻧﺎﺽ .. ﻧﺎﺿﺖ ﻣﻌﺎﻩ ﻭﻫﻲ ﺗﻘﻮﻝ : ﻭﻳﻦ !!
ﻫﺎﻧﻴﺒﺎﻝ : ﻣﺮﻭﺡ ..
ﻧﻌﻴﻤﻪ : ﻧﻬﺎﺭﻱ ﺗﺠﻲ ﻟﻬﻨﻲ ﻓﻨﻬﺎﺭ ﺭﻣﻀﺎﻥ ﻭﻣﺎﺗﻘﻌﺪﺵ ﻟﻠﻔﻄﻮﺭ ..
ﻫﺎﻧﻴﺒﺎﻝ : ﻣﺎﻓﻴﻬﺎ ﻛﻴﻒ ﻳﺎﻧﻌﻴﻤﻪ ..
ﺷﺒﺢ ﻟﻨﻮﺭ .. ﻫﻲ ﺑﺎﻟﺴﻼﻣﻪ ﻳﺎﺟﺮﺍﻧﻪ ..
ﺍﺑﺘﺴﻤﺖ ﻧﻮﺭ : ﻳﺎﺭﻳﺖ ﺗﻘﻌﺪ ﺧﺎﻟﻮ ..
ﻫﺎﻧﻴﺒﺎﻝ : ﻣﺮﺓ ﺗﺎﻧﻴﻪ .. ﻭﻣﺸﻲ ﻭﻧﻌﻴﻤﻪ ﻭﺭﺍﻩ ﺗﻘﻮﻝ
" ﺭﺑﻲ ﻳﻬﺪﻳﻚ .."
ﻧﻮﺭ : ﺟﻮﺍﺍﺩ ﺧﻠﻲ ﺧﻮﻙ ..
🍁 ﻭﻓﻲ ﺍﻟﺪﺍﺭ ﺍﻟﻘﺮﻳﺒﻪ ﻉ ﺩﺍﺭﻫﻢ ..
ﻛﺎﻧﺖ ﺩﻻﻝ ﺭﺍﻗﺪﻩ ﻣﻦ ﺍﻟﺘﻌﺐ ..
ﺣﺎﻣﻞ ﺑﺒﻨﻴﻪ ﻛﻴﻒ ﺧﺸﺖ ﺷﻬﺮﻫﺎ ﺍﻟﺴﺎﺩﺱ ..
ﻭﻛﻞ ﺍﻟﻠﻲ ﻳﺸﻮﻑ ﺣﺎﻟﺘﻬﺎ ﻳﺴﺘﻐﺮﺏ ﻛﻴﻒ ﻣﺎﺯﺍﻝ ﺍﻟﺒﻨﺖ ﻗﺎﻋﺪﻩ ﻋﺎﻳﺸﻪ ﻓﻲ ﺑﻄﻦ ﺃﻣﻬﺎ ﻟﺘﻮﺍ ...!
🍃🍃🍃🍃🍃
ﻭﺗﻤﺮ ﺍﻷﻳﺎﻡ ..
ﺑﻌﺪ ﻃﻠﻌﺖ ﺭﺍﻧﻴﺎ ﻣﻦ ﺍﻟﻤﺴﺘﺸﻔﻰ ..
ﻭﺟﻮﺩ ﺍﻣﻬﺎ ﺣﻮﺍﻟﻴﻬﺎ ﻃﻮﻝ ﺍﻟﻮﻗﺖ ﻏﻴﺮ ﻣﻦ ﺣﺎﻟﺘﻬﺎ ﺷﻮﻳﻪ ﻟﻸﺣﺴﻦ ..
ﻗﻌﺪﺕ ﺧﻼﻝ ﺃﻳﺎﻡ ﺭﻣﻀﺎﻥ ﺍﻟﻤﺘﺒﻘﻴﻪ ...
ﻣﺘﻤﺴﻜﻪ ﺑﺎﻟﻌﺒﺎﺩﻩ ﻭﺍﻟﺪﻋﺎﺀ ..
ﺩﻋﺎﺋﻬﺎ ﻛﻠﻪ ﻟﺮﻣﺰﻱ 💔..
🍁 ﺯﻱ ﺩﻻﻝ ..
ﺍﻟﻠﻲ ﻣﺎﺑﻄﻠﺘﺶ ﺩﻋﺎﺀ ﻟﺮﺍﺟﻠﻬﺎ ﻭﺑﻮﻫﺎ ..
ﺍﻏﻠﺐ ﻭﻗﺘﻬﺎ ﻉ ﺳﺠﺎﺩﺓ ﺍﻟﺼﻼﺓ ...
ﻭﻧﻮﺭ ﻭﻧﻌﻴﻤﻪ ﻣﺘﺤﻤﻠﻴﻦ ﻣﺴﺆﻭﻟﻴﺔ ﺍﻟﺼﻐﺎﺭ ﻣﻊ ﺑﻮﻫﺎ ..
ﻣﺎﻳﺒﻮﺵ ﺣﺎﻟﻴﺎ ﻳﻀﻐﻄﻮﺍ ﻋﻠﻴﻬﺎ ..
ﺑﻴﺨﻠﻮﻫﺎ ﻟﻴﻦ ﺗﺠﻴﺐ ﻭﺑﻌﺪﻳﻦ ﻟﻜﻞ ﺣﺎﺩﺙ ﺣﺪﻳﺚ
🍁 ﻭﻏﻴﺮﻫﻢ ..
ﻋﺎﻳﺶ ﻫﺎﻷﻳﺎﻡ ﻭﻣﺘﻤﻠﺢ ﺯﻱ ﻣﺎﻣﺘﻤﻠﺤﻴﻦ ﺍﻟﻠﻴﺒﻴﻦ ﻛﻠﻬﻢ ﻓﻲ ﻏﺮﺏ ﺍﻟﺒﻼﺩ ﻭﺟﻨﻮﺑﻬﺎ ...
ﺍﻷﻭﺿﺎﻉ ﻭﻟﺖ ﺻﻌﺒﻪ ﻟﻠﻐﺎﻳﻪ ..
ﺑﺎﻟﺬﺍﺕ ﻓﻲ ﺍﻟﺰﺍﻭﻳﻪ ﻭﺯﻭﺍﺭﺓ ..
ﻫﺮﻭﺏ ﺍﻟﻀﻲ ﻭﻧﻘﺺ ﺍﻟﻐﺎﺯ ﻭﺍﻟﺒﻨﺰﻳﻨﻪ ..
ﻓﻲ ﻃﺮﺍﺑﻠﺲ ﺍﻟﻨﺎﺱ ﻃﻮﺍﺑﻴﺮ ﻃﻮﺍﺑﻴﺮ ..
ﺣﺘﻰ ﺍﻟﺨﺒﺰﺓ ..
ﺃﻭﻝ ﻣﺎﺑﺪﺕ ﺍﻻﺣﺪﺍﺙ ﺍﻟﻌﻤﺎﻟﻪ ﻫﺮﺑﻮﺍ ﻭﺑﺪﻭﺍ ﺍﻟﻠﻴﺒﻴﻦ ﻳﺨﺪﻣﻮﺍ ﻓﻴﻬﺎ ﺑﺮﻭﺍﺣﻬﻢ ..
🍃 ﻧﺬﻛﺮ ﻣﺮﺕ ﻋﻠﻴﻨﺎ ﺍﻳﺎﻡ ﻓﺮﻣﻀﺎﻥ ﻣﺎﻧﺪﻳﺮﻭﺵ ﺍﻻﻓﺤﺎﺟﻪ ﻭﺣﺪﻩ ﺑﺴﺒﺐ ﻧﻘﺺ ﺍﻟﻐﺎﺯ ﻭﻫﺮﻭﺏ ﺍﻟﻀﻲ ﻟﺴﺎﻋﺎﺕ ﻃﻮﻳﻠﻪ ﻓﻲ ﺍﻟﻨﻬﺎﺭ ..
ﻭﻓﻲ ﻣﻦ ﻣﺪﻥ ﻛﺎﻧﻮﺍ ﻧﺎﺳﻬﺎ ﻳﻄﻴﺒﻮﺍ ﻉ ﺍﻟﺤﻄﺐ ﺣﺘﻰ ﻓﻲ ﺍﻟﻘﻬﻮﺓ 🍃
ﻓﻲ ﻋﺰ ﻫﺎﻟﻈﺮﻭﻑ ﺍﻟﺼﻌﺒﻪ ﻛﺎﻧﺖ ﺍﻟﺠﺒﻬﺎﺕ ﻭﺍﻟﻌﻪ ﻧﺎﺭ ..
ﻭﺑﺮﻏﻢ ﺍﻟﻔﺘﻮﻯ ﺍﻟﻠﻲ ﺻﺮﺣﺖ ﻟﻠﺜﻮﺍﺭ ﺍﻟﻤﻘﺎﺗﻠﻴﻦ ﺑﺎﻹﻓﻄﺎﺭ ﺍﻻ ﺍﻥ ﺍﻏﻠﺒﻬﻢ ﻉ ﺟﻤﻴﻊ ﺍﻟﺠﺒﻬﺎﺕ ﻛﺎﻧﻮﺍ ﻳﻘﺎﺗﻠﻮﺍ ﺻﺎﻳﻤﻴﻦ ..
ﺍﻟﺠﻤﻴﻞ ﻓﻲ ﻫﺪﺍ ﻛﻠﻪ ..
ﺍﻥ ﺣﺮﺍﺋﺮ ﺍﻟﻤﺪﻥ ﺍﻟﺜﺎﺋﺮﺓ ﻛﺎﻧﻮﺍ ﻳﻄﻴﺒﻮﺍ ﻟﻠﺜﻮﺍﺭ ﻭﻳﺒﻌﺘﻮﻟﻬﻢ ..
ﻛﺎﻧﻮﺍ ﻳﺤﺴﺴﻮﺍ ﻓﻴﻬﻢ ﺑﺒﻨﺔ ﺭﻣﻀﺎﻥ ﺍﻟﻤﺘﻌﻮﺩﻳﻦ ﻋﻠﻴﻪ ﻭﻫﺎﻟﺤﺮﻛﻪ ﺍﻟﺤﻠﻮﺓ ﻛﺎﻧﺖ ﺗﺮﻓﻊ ﻣﻦ ﻣﻌﻨﻮﻳﺎﺗﻬﻢ ﻭﺗﻔﺮﺡ ﻓﻴﻬﻢ ..
ﻛﺬﻟﻚ ..
ﺍﻣﻬﺎﺕ ﻭﺍﺧﻮﺍﺕ ﺍﻟﻤﻘﺎﺗﻠﻴﻦ ﻓﻲ ﺍﻟﻄﺮﻑ ﺍﻷﺧﺮ ﻛﺎﻧﻮﺍ ﻳﺪﻳﺮﻭﺍ ﻓﻲ ﻧﻔﺲ ﺍﻟﺸﻲ ﻟﻮﻻﺩﻫﻢ ﺍﻟﻤﻮﺟﻮﺩﻳﻦ ﻓﻲ ﺍﻟﺠﺒﻬﺎﺕ ..
🍁 ﺑﺲ ﻛﻔﺔ ﺍﻟﺤﺮﺏ ..
ﺑﺪﺕ ﺗﺮﺟﺢ ﻟﺼﺎﻟﺢ ﺍﻟﺜﻮﺭﺓ ﻭﺍﻟﺜﻮﺍﺭ ..
ﺟﺰﺀ ﻣﻦ ﺛﻮﺍﺭ ﺍﻟﺠﺒﻞ ... ﺍﻟﺰﻧﺘﺎﻥ ﻭﺍﻟﻤﺪﻥ ﺍﻻﺧﺮﻯ ﻓﻲ ﺍﻟﺠﺒﻞ ..
ﺗﺤﺮﻛﻮﺍ ﺑﺈﺗﺠﺎﻩ ﻃﺮﺍﺑﻠﺲ ..
ﻭﺳﻴﻄﺮﻭﺍ ﻉ ﺑﻠﺪﺓ ﺍﺳﻤﻬﺎ ﺑﺌﺮ ﺍﻟﻐﻨﻢ ..
ﻭﻫﺎﻟﺘﻘﺪﻡ .. ﺧﻼ ﺍﻟﻮﺿﻊ ﺑﺪﻱ ﻳﺒﺎﻥ ﻭﺍﺿﺢ ﺍﻛﺜﺮ ﻣﻦ ﻗﺒﻞ ...
ﺍﻟﻌﺪ ﺍﻟﺘﻨﺎﺯﻟﻲ ﺑﺪﻱ ..
🍃 ﻭﺟﺒﻬﺘﻲ ﺍﻟﺰﺍﻭﻳﻪ .. ﻭﺯﻟﻴﻄﻦ ..
ﻛﺎﻧﻮﺍ ﻭﺍﻟﻌﺎﺕ .. ﺑﺘﻘﺪﻡ ﺛﻮﺍﺭ ﺍﻟﺠﺒﻞ ﻭﺛﻮﺍﺭ ﻣﺼﺮﺍﺗﻪ
يتبع
