المتمردين

العشق المتمرد

#العشق_المتمرد "اختبار"

#جمان_فريد

الجزء 112 القسم الأول

🌟..
ماليزيا..
كوالامبور...
الساعه 5:00فجرا..
كان متكي فسريره وشاد تليفونه ..
خاش ع الفيس ويتصفح..
جي قدامه المنشور ضيق عيونه وهو يشوفله ..
ناض قعمز...
شاف ساعه تليفونه بعدين قال:عندهم توا 11..
خشت عليه مرته واستغربت فحاله قالت:خيرك هانيبال؟
شبحلها وقال:ترا تعالي شوفي..
مشتله مرام وهي مستغربه وخايفه قعمزت حداه مدلها التليفون..
خداته وشافت المنشور بعدين قالت:هادي صفحة عماد ولد كفايه؟
هانيبال:ايه..
مرام اضايقت ع الآخر وقالت:ليا فترة معاش كلمت حد من غادي ماعندي علم..
هانيبال وهو قارن حواجبه؛واني ماحد خبرني..الجحش نفسه ماقالش..
خدي التليفون منها..وقعد يدور ع رقم عماد لين لقاه واتصل بيه طول..
ومرام ناضت وطلعت من الدار..
🍁🍁🍁🍁
كان متكي ع الكنبه ويشبح فوق بنظرة كلها بؤس..
دموعه ينزلوا...
كان تعيس بكل معنى الكلمه..
رن تليفونه..
غمض عيونه ع باله انها سناء..اتصلت بيه بعد روحوا ماطولش معاها وبش يتهرب منها قاللها نكلمك بعدين...
ولأن طول مااتصلش قال فنفسه هي اتصلت..
فتح عيونه..
قام التليفون اللي كان محطوط ع صدره شاف المتصل..
تجعدت ملامح وجهه من شعور الضيق اللي حس بيه ..
فتح الخط ورد..
عماد:اي نعم ياخال..
هانيبال:باهي اللي قاعد مذكر اني خالك ياجحش..
ضحك وقال؛والله كنت ناوي نخبرك لكن كل مرة تطلعلي حاجه تلهيني..
هانيبال:ياودي ماني لايم عليك خلاص المهم ماتقعدش تبرر بالكذب..قولي..امتى صار وكيف صار وبنت من..
تنهد عماد وبدي يحكي...
بينما برا..
مرام..
كانت حتى هي خاشه عن طريق تليفونها ع الماسنجر تشوف رزان كانهي  فاتحه..
لقتها مصكره من نص ساعه..
تنهدت مرام بألم ..
بعدين بدت تكتب فرساله لرزان..
كتبتها ودموعها ينزلوا..
عايشه هالشعور ومجرباته..
خطروا عليها هديكا الأيام واستذكرتهم بنفس الإحساس اللي كانت تحس بيه وقتها..
بعتت الرساله وهي تمسح فدموعها ع جية هانيبال اللي كان مازال يكلم فعماد..
شافها وهي تمسح فدموعها قعد مركز عليها وهو يقول:ياسيدي ربي يتتم ع خير ويهني..
عماد بإبتسامة ألم:تسلم ياخال..
هانيبال:هي مالا مانعطلش عليك..سلم ع العيله عندك..تصبح ع خير..
عماد:يوصل..وقدامك كل خير..
صكر هانيبال...
ومشي لمرام..
قعمز حداها وهو يشوفلها..
هي شبحتله وقالت:من خطب؟
هانيبال:اخت مرت عمر..
زادت اتألمت مرام..
ولأنها حامل..
حساسيتها بزايد..
انهارت بالبكي..
اتفاجئ هانيبال وقال:خير بلاك!؟
مرام ببكي:وجعتني..
هانيبال:من هي!!؟
مرام غمضت عيونها ودموعها يصبوا..
هانيبال شبحلها شويه بعدين قال:رزان؟!
مرام زادت بكت اكثر واكثر..
هانيبال:تس تس تس..تعالي..حاوطها بذراعه وخداها فحضنه..
مرام تلقائيا وهي تبكي:ماوعره الشعور اللي تحس بيه واعر..واعر...مايعرفه كان اللي حسه..
هانيبال ابتسم وقال؛حستيه قبل؟!
هي سكتت مره وحده..
ضحك ضحكه خفيفه بعدين قال؛تعدي تعدي..فترة وتعدي وهي يجيها نصيبها وسيورها تنسى..
بعدت عنه وقعدت تشوف لعيونه بعيونها المليانات دموع..
حط يده ع بطنها البارزه وقال:مش باهي الزعل لولدك راهو..
مرام؛ولدك حتى انت..
هانيبال بضحكه:من قالك تبريت منه!
مرام رشفت وقالت:راهو الوضع مش متحمل بصاره مشاعر هدين ماتستهترش بيهن..
ركز ع عيونها وهو يشوفلها بنظراته اللي راح قلبها ضحيتهم..
وابتسامته الجانيبه ع وجهه..
هي نزلت عيونها وقالت:نبي نرقد..
ضحك..
بعدين ناض ونوضها معاه وقعد يمشي فيها للدار..
مرام؛نعرف نمشي..
هانيبال:موليه نيرفو راك..
مرام:لا عاديه اني انت اللي تتسهوك واجد..
ضحك هانيبال بعدين قال:غير امتى يعدن هالتلات شهور..
شدت ضحكتها..
هو دغدغدها من جنابها وهو يقول:اضحكي اضحكي..
مرام:ههههههههه..خلاص....ياااااسر...
هانيبال بضحكه:كركوبه..
وخشوا لدارهم 💕💕💕💕
🍁🍁🍁🍁
محادثة فايبر..
(بكل اليوم ماريتها ولا بيت نعدي لحوشهم)
نور
(يعلم الله بحالها توا)
رباب
(نقوللكم حاجه)
غاليه رانيا دلال نور بتتالي ورا بعض
(شنو..قولي..قولي..قولي)
رباب
(سلفي اصيل حاط عينه عليها)
غاليه
(كيف عرفتي؟)
رباب
(مؤنس قالي)
دلال
(امه بروحها تبيها ليه..كلمتني عليها مرة فعرسك)
نور
(مش هدا نفسه اللي امه كلمت ماما عليا؟)
رباب
(عمتي طلعت فاهمه غلط)
نور
(اها)
دلال
(امينه وولادها مش محتاجين شهادتي واصيل بالذات ماشاء الله عليه فالح واجتماعي وقد روحه)
رانيا
(خالتي وينك)
غاليه
(نفكر كان خطبها ورداته رزان)
دلال
(بعدين نجازف ونجيكم بسيارتي نعطيها طريحه ونروح)
رباب
(وكليني اني بالمهمه بدال ماتجازفي😂)
دلال
(خلاص هيا ليك😂)
رانيا
(😂😂)
نور
(ترفضه علاش وع خاطر منو..خلاص تلوح البلي وراها وتشبح القدام وتشوف حياتها)
غاليه
(ياريت ادير هكي..ياريت من بعد اليوم ترجع لعقلها وتفكر فمستقبلها بس)
🍁🍁🍁🍁
《خيرك ماتعيديش ياسيده ملعقه..
رزان :اخطاني..
عماد:قولي كل عام وانت بخير ياطرف العيله قبل..
رزان عكرشت وجهها:ماناقصك والله
عماد:يجيك يوم ونقصه لسانك..
رزان :غير جرب انت وشوف شن يصير فيك..خاوتاته وفاتت من حداه..
لكن هوفيسع سبقها ووقف فم البوابه..
رزان شبحتله بحده:خيرك انت بارد ماتحسش بكل..شنو هدى ياربي..
عماد:شن اللبز اللي مدايرتيه فعيونك هدا راك قاعده ماطلعتيش من الدحيه..بري امسحيه تحركي..
رزان :والله شن دخلك سيدي ولاخوي..
عماد بضحكه:راجلك..》
تشوف لصوراه فتليفونها كل مرة تحط ع وحده وتجي قدامها ذكرى من الذكريات البعيده والقريبه..
لعند ما وقفت عند صورة ليه كانت حلوه بالمره واخدها لما مشي رحله للجبل..
قعدت تشوف فتفاصيل الصورة وكيف واخدينهاله..كان يجنن بكل معنى الكلمه..
تفاصيل الراجل بشكل..
نظرة عينه..ضحكته..وقفته..طوله عرضه..لبسه..شكله..
كلها لما تكون مميزة ومجتمعه بتميزها فراجل واحد تعشقه مراة..
عيون المراة هادي مستحيل يشوفوا غيره..ولايقدروا يشوفوا ان في حد احسن منه ولاافضل فنظرها..
عماد مش بس ظاهره مميز..
حتى رجوليته..اخلاقه...عفويته..بساطته مع قوة شخصيته
حنيته اللي مالهاش زيي..
هدا كله مستحيل يخلي رزان مازال تشوف لراجل تاني ولاتقدر اصلا..لان الكل حيكون فمقارنه معاه..
ولأنه مميز..شبه مستحيل تلقى زيه..
ولانها تعشقه..لايمكن تشوف لغيره من الاساس..
رزان بصوت مبحوح تتكلم مخاطبه الصورة:
ماكنت نحساب يجيني يوم ونحب حد كيف ماحبيتك انت وانت بالذات..ضحكت بعدين قالت..قبل واجد كنت نسمع فيهم يقولولي عماد يحبك اكثر من روحه..عماد يحبك اكثر ماانتي تحبيه..انت نفسك اكثر من مرة لمحت بهالشي..
واني نفسي كنت نقول لروحي فهالكلام..
لعند ماجي هالوقت..وبانلي ان مافي حد فالدنيا هدي حيحبك اكثر مني حبيتك اكثر ماحبيتني..اكثر حتى من نفسي حبيتك..غلطت معاك صح بس غلطتي هدي من قوة حبي ليك..بس انت مابيتش تشوف هالشي ولاتفهمه مابيتش...
🍃لعند ماخداها النوم وهي تكلم فصورته وتبكي..
بين كلام الحب..الشوق..العتاب..حتى التهزيب.....
وبين كل هالمشاعر كانت دموعها كالعاده فإنهمار مستمر..قعدت هالحال لعند مااجبرها النوم ع انها ترتاح ولو شويه من عذابها..
رقدت ..لكن الدموع مازالت تنزل بروحها..🍃
🍁🍁🍁🍁
تاني يوم..
الساعه 2:00ظهرا..
الرجاله كلهم في الجامع..
والنساوين لاهيين بالغدي كما هي العاده المعروفه عندنا كليبين لازم التريس يروحوا من الجامع يلقوا الغدي واتي..
غاليه كيف طفت ع الغدي لما رن تليفونها ..
مشت للدولاب وطلعاته منه ..
شافت الرقم ابتسمت..
فتحت الخط وردت..
غاليه بإبتسامه:السلام عليكم..
مرام:وعليكم السلام..شنو حالك غاليه وحال العيله..
غاليه:الحمد لله يامرومه شنو حالك انتي وحال هانيبال..
مرام:الحمد لله كويسين..هانيبال ياحنه طالع هو وجماعه ليبين هنى زرده..
غاليه بضحكه:داير صحاب واجد غادي..
مرام:ماشاء الله يمشي ويتعرف حتى ع عرب مش بس ليبين..
غاليه بضحكه:اشيه..
ضحكت مرام بعدين قالت:شن حالكم ياغاليه شن حال عمتي والبنات وعويلتهم..والولاد وعويلتهم..
غاليه:الحمد لله اوكل منهم بخير..انتي قوليلي شن دايرة مع الحمل..
مرام بإبتسامه:تمام الحمد لله..وليد راهو..
غاليه:ماشاااء الله..انتي توا في السادس ولا..
مرام:ليا اسبوع خاشة السادس..
غاليه:باهي باهي تحلي عويناتك ع خير يارب..
مرام:آمين..تسلمي..مبروك ع ولد كفتيه..
غاليه تلاشت ابتسامتها وقالت:الله يبارك فيك..
مرام:اخت لمياء قالوا..
غاليه:ايه..
مرام:خطبتهاله كفايه؟.
غاليه:احمم..لالاهو قال يبيها..
تبدلت ملامح مرام للضيق وقالت:علاقه يعني؟
غاليه:ممكن..
تنهدت مرام وسكتت..
غاليه ابتسمت بألم وقالت:نصيب..
مرام بألم كذلك وردت وقالت:ايه نصيب..
🍃🍃🍃🍃
ويقولوا موعرها كلمة نصيب💔..
نصيب رزان تعيش هالألم..
قعدت اسبوع..محبوسه فدارها..
تطلع بس للحمام..
مادير فشي غير انها تصلي..
كان كلت تاكل بإجبار من امها..
رافضه تكلم حد ولاتبي من يكلمها..
كل مايجيها حد ادير روحها راقده..
ماعندهاش حيل حتى للفضفضه..
حاولت امها تفتح معاها حديث لكن هي طول تسكر فيه قبل ينفتح..
بوها وخوها...
كانوا فاهمين..ويظاهروا بالعكس..
بس بوها تحديدا ....قلبه كلاه عليها مش عارف شن يدير هو حتى مايقدرش يسأل امها خيرها ولاامها تقدر تتكلم مع بوها فحاجه زي هادي..
ومع هدا..
كان يبي يدير شي لبنته..
فيوم..
طق باب الدار..
رزان كانت فايقه لكن ماتبيش ترد..
"رزان".
فزت فزان..
وناضت من سريرها..
حست بدوخه..لكن كملت بطريقها للباب وفتحاته..
ميلاد قعد يتفحص فوجهها بنظره وهو يقول:بعد العصر وتي روحك..
رزان :ليش؟!
ميلاد ابتسم وقال:بنرفعك للشرشارة انتي وقصي..
ابتسمت وقالت:ماخاطري سيدي..
ميلاد:كان ليا خاطر عندك تعدي معانا..
تنهدت رزان وهزت راسها بإيجاب وقالت:حاضر..
ميلاد:خلاص..الخمسه..تكوني واتيه..
رزان:حاضر..
مشي ميلاد..
وهي قعدت معاه بعيونها لين طلع من الحوش من الجهة القداميه..
ابتسمت...بعدين خشت دارها وصكرت الباب..
حست بشعور حلو اختلط بشعور الحزن اللي مسيطر عليها بدد منه شويه..
🍃ديما الأب مواقفه الحلوة غير..بالذات مع بنته...اي موقف حلو يديره الأب لبنته يخليها تلقائيا تحس بالأمان🍃
🍁وجت الساعه 5:00..
وطلع ميلاد ببنته وولده بالسياره من القطعه..
وبعدها بوقت..من البلاد كلها متوجهين لترهونه وين مافي عين الشرشارة..
غيرت جو مع بوها وخوها الصغير..
هدرزوا ع هلبه حاجات..
ع المكان اللي هما فيه..
ع قرايتها..
حتى ع عمامها وخوالها..
وقرموا سعيده شويه قرمة بين البنت وبوها ضحكت رزان من قلبها ع كلام بوها عن امها وبعد يطلع اللي فخاطره يقوللها "البنت سر بوها راهو.."
رزان ردت عليه وقالت" الولد مش البنت.."
ميلاد يرد ويقول" معناها عديت فيها.."
ورزان تضحك..
اول مرة يصير تقارب بهالشكل..
هو يحب بنته هلبه ومكانها غير عنده لكن علاقتهم ببعض العلاقه الشبه وحده عند كل عائلاتنا الليبيه..محدوده هلبه..
بس لأنه وضعها هالمرة خوفه حس انه لازم يتقرب منها ويخفف عنها بطريقته..
🍃هلبه آباء زي ميلاد موجودين فحياتنا يحس ببنته ويزبط ان فيها شي..حتى لو ماقدرش يقرب منها ويعرف اللي فيها او يخفف عنها يقعد واكل همها🍃
🍁🍁🍁🍁
في اليوم نفسه..
كان عماد ماشي مع تيفسا هما ومجموعه من صحابهم للجبل تحديدا في مدينه رحيبات فمكان اسمه (نانا تالا) ..
منطقه فيها بحيرة كبيرة تتوسط احد الجبال.. منظرها مميز وجميل جدا..
قضوا فيها وقت حلو..واذكروا رحلة العين الزرقاء فمدينة جادو وهدرزوا ع صحابهم اللي كانوا معاهم فهديكا الرحله وين ديارهم وشن دايرين فالدنيا..
برغم الأجواء الحلوة اللي كانوا عايشينها الا ان عماد كان ظاهريا يبتسم ويضحك وينكت..والداخل ماعالم بيه كان ربي..
وتيفسا اللي ولا حافظه كويس ولاحظ حالته..
استغل فرصه فيها باقي الشباب لاهيين بالشوا والهدرزة..
خدي عماد ع تركينه بش يتكلم معاه..
عماد :إن شاء الله خير!؟
تيفسا تنهد وقال:عماد ياصاحبي..فالأول مابيتش ندخل فخصوصياتك ولانقول دير وماديرش..لكن توا الحق مش قادر نشوفك هكي ونقعد نتفرج بس..
عماد بضحكه:غير علاش تقول هكي؟!شن صاير!؟؟
تيفسا ابتسم وقال:عماد..
عماد ضحك وقال؛حالي عال العال واموري كلها تمام ماتخممش فيا..
تيفسا شبحله شويه بعدين قال بحزم:عماد استعجلت باللي درته خايف تسبق بنت خالك وتنخطب قبل..واخترت نسيبة خالك قصدا ...
عماد:تيفسا..
قاطعه وقال:بغض النظر عن هدا كله راهو ماحد حيعاني من اللي درته اكثر منك انت...حطيت روحك فموقف خطيت خطوة كان وليت فيها حتكلفك هلبه ياعماد..
عماد قاطعه وهو يتكلم  بعصبيه ويحرك في ايديه :اسمع اسمع..تمام ايه اني سبقت اوكي..واخترت اخت مرت خالي قصدا..بش نقهرها..نقهرها كيف ماني منقهر..وقاعد ننقهر..وماحد حاس باللي اني نحس بيه غيري اني هدا علاش وسامحني فيها ياصاحبي مانبي حد يدخل هادي حياتي واني حر فيها...تمام!!
ابتسم تيفسا بأسف وهو يشوفله وهز راسه بالموافقه..
عماد:كويس..فات من حداه ومشي للاولاد..وتيفسا لحقه وهو يحرك فراسه ايمين ويسار
🍁🍁🍁🍁
خدي منها تيشرت وبدي يلبس وهو يقول:حاولت نريح ضميري...من ناحيته
ايناروا بحزن:قداش وجعتني رزان
تيفسا:حتى هو يوجع ..🍃
🍁🍁🍁🍁
عماد:مواضيع قديمه وتمت..
سناء:عارفه..كل اللي نبيه ان وجودي بعدين في عيلة عمتي كفايه مايديرش حساسيات بس..وبصراحه فرحت هلبه لما سمعت ان خالك ميلاد كان موجود فالفضانيه..وارتاحت نفسيتي اكثر لما عرفت ان بنته عندها موضوع وقريب يتم والحمد لله الناس اللي جايينها باهيين يعني كل حد حيكون مرتاح فحياته..
عماد بلع ريقه اللي تقول نار نزلت لجوفه تحرق فيه بعدين قال:ايه..صح..احمم..هو اني الحق مانعرفش هلبه عن اخبارها..ضيق عيونه وقال..يعني هو خلاص موضوعها تم؟
رفعت سناء حاجبها وقالت:ع كلام لمياء قالت سمعت انه قريب يتم وانهم يراجوا رزان تكمل امتحاناتها بش يديروا حاجه رسميه...يللا كل واحد ماياخد غير نصيبه و ربي يهني الجميع...
هو كان مغمض عيونه وساكت..قلبه يوجع فيه وجع حقيقي نبضه كان قوي بزايد..لدرجة انه حط يده عليه بعدين قال لسناء:ايه..صح..فتح عيونه وقال..تمام..اني حاس روحي تاعب نبي نرقد..
سناء:عندك حق تعب الطريق مشي وجي اليوم..ارقد حبيبي وارتاح..
عماد؛ماتبي شي..
سناء:سلامتك بس..بايات..
عماد:تشاو...وصكر..
لوح تليفونه تلويح ع الكنبه..
ومشي قعمز ع السرير وهو حاط يد ع قلبه والتانيه ع حافة السرير...كان موجوع بقوة...
انطرح ع السرير ورجليه لوطا غمض عيونه والدمعه طول نزلت..
قعد يمسد بيده مكان قلبه...وهو يتنفس بسرعه..
💓يقولوا لما تجمع طرفين مشاعر حب قويه اي طرفين..
مثلا احد الوالدين مع احد ابنائهم..
اخ وخوه او اخته ..
لما تكون درجة الحب كبيره...يصير بيناتهم زي الإرتباط القلبي أوالروحي..
يعني لما احد الطرفين تصيرله حاجه التاني يحس بيه..
وهما الزوز يحبوا بعض حب شديد رغم حالة الفراق اللي عايشينها..
ولهدا..
قلب رزان حس بيه وقتها بدون ماتفهم هي السبب..
🍁كانت مقعمزة مع حناها وامها وبنت خالها ونساوين خوالها خليفه وسليمان كانوا يهدرزوا ع عرس صابر خو مرام اللي بيبدا اخر اسبوع ف4..
هي كانت منسجمه معاهم وناسيه همها..لعند ماجاها شعور غريب طبقلها خلوقها..
انسحبت تلقائيا من حداهم وطلعت برا..
حطت يدها ع صدرها وتحاول تاخد انفاسها لحظات وبدت تبكي وهي مش فاهمه شن جاها وعلاش هكي تحس..
قعدت بضع دقايق..
اول ماالنوم خدي عماد..
هي بدت تهدا شويه شويه وهالشعور بدي يتحول..
ناضت من مكانها ومشت وين مافي اللاوندينو اللي برا..غسلت وجهها وبعدين خشت..
لما خشت حدهم وامها لاحظوا اثار البكي ع ملامح وجهها الزوز تنهدوا بضيق ورجعوا للهدرزة وهي تسمع فيهم وتحاول تنسجم من جديد وتشارك..
🍁🍁🍁🍁
مقعمزة في الدار ومصكرة ع روحها وتهدرز بالتليفون..
غاليه:هههههههه..
نجم الدين بضحكه:معاناة الخال الصغير مع صغار خواته معاناه مابعدها معاناه..
غاليه بضحكه:هما اللي يعانوا منك مساكين مدايرلهم رعب..
نجم:كان مانديرش هكي يهدوا الحوش ع اللي فيه..
ضحكت غاليه..
نجم بضحكه:وكان انهد حق..صغار خواتي اني يطلعوا من تحت الأنقاض ويكملوا لعب..شياطين بسبعه ارواح
غاليه بضحكه: القطاطيس بسبعه ارواح..
نجم ضحك وقال:ادققي هلبه انتي فكل شي..
غاليه ابتسمت ..
برا..
في الدار التانيه..
نبيها غدوة تركب تعاوني..
حميده؛تو انتي من عازمه غير خوك..
لمياء :بوي وخوتي الزوز وراجل خالتي اللي يسكن هني..
حميده:اممم..
لمياء:وينها هي؟
حميده شبحت لباب الدار بعدين شبحت للمياء وقالت: تخيط فسروال التوته اللي لابستها ...
لمياء رفعت حاجبها وقالت:قصدك فالدار التانيه..
حميده:امالا شن بتخيطه فالصاله وهي مش لابسه شي من لوطا؟!
لمياء ضحكت بعدين قالت:ايه حقه وصلت ورقة الإخطار لراجلك ولا مازال..
حميده تنهدت بعدين قالت:اتصل حميد امس وقال توصله اليوم...
لمياء:زعمه يطلق من اول جلسه..
حميده بضيق:ياااارب يطلق ونفتك..
لمياء:كان انتي هكي تبي آمين..
حميده بحده:اكيد هكي نبي ومانبي غير هكي..
لمياء هزت راسها بإيجاب..
ع خشة غاليه ؛لمياء..امتى جيتي..
لمياء:ماليش 5دقايق نازله..سألت عليك..
قاطعتها حميده وقالت:تبيك تعاونيها فعزومة هلها..
غاليه:قصدك خوك بيجي معاه حد؟
حميده:سيدها وخوتها وراجل خالتها..
قعمزت غاليه وقالت:اها..باهي مش مشكله..شن تبي اديري..
خدت نفس لمياء وبدت تقول شن بدير..
وحميده وغاليه متفاجئات..
كسكسي وامبطن وعصبان وشيش طاووق..
....
تعرف من توجب السفتوله..
غاليه؛وتبيني اني نطيبه كله هي بس تبي ادير الشيش طاووق قالت فنانه فيه..
كفايه؛فنانه فطياح سعدها..
غاليه بضحكه:اخت كنتك راهي..
كفايه بإنزعاج:والنبي معاش اذكريني ...
غاليه ابتسمت بتنهيده وقالت:الله غالب نصيبات..
كفايه:لا مش نصيبات ولدي اني متلف..
ضحكت غاليه..
كفايه تنهدت وسكتت شويه بعدين قالت؛غويليه..معاش في جديد ع رزان..
غاليه؛ليش تنشدي عنها؟
كفايه؛هكي وخلاص..
غاليه:مظنها حتى هي قربت حكايتها ولد امينه طلع قايل لعيلته انه يبيها..
كفايه برفعة حواجب:الولد بروحه طلع يبيها يعني مش امه بس!؟
غاليه؛ايه..
كفايه بحزن:تعرفي حتى جية ميلاد للفضانيه عادي هكي مش بلاش..
غاليه:خلاص ياكفايه كل حد عدا ع حاله وشاف نصيبه ومصيرهم ينسوا..
كفايه بضيق؛امممم..
هدرزوا شويه تانيه بعدين نهوا المكالمه...
كفايه بعد صكرت سرحت بتفكيرها..
استاقضت ع صوت ولدها وهو يقول..
"يام"...
شبحتله :نعم ولدي..
عماد قعمز ع الكرسي بتعب وقال:جعان..
كفايه ناضت وهي تقول:راجي شويه..
كيف جت امه تطلع شد يدها..
شبحتله...
عماد وهو يشوفلها بنظرة تساؤل ممزوجه ألم:يام..حقه بنت خوك بيتم فيها السرتاوي!؟
كفايه شبحتله بحزن وهي تقول:ايه....حتى هي بتشوف نصيبها زي ماأنت درت..
غير عيونه عن أمه وطلق يده وقال :باهي يام بري ديريلي ماناكل..
تنهدت امه ومشت طلعت من حداه..
اما هو طول مسح عيونه بعنف قبل ماينزلوا ..بعدين وخر شعره للخلف وهو يوزع فنظره حواليه ويحاول يتجاهل الوجع اللي يحس بيه..
🌴🌴🌴🌴
الساعه 9:30..
غطت بنتها بعد رقدتها..
بعدين ناضت بتمشي للكوجينه سمعت صوت عراك..
مشت للروشن وقفت فيه وهي تسمع..
حميده بتهكم:رجعت بهيمه لعادتها القديمه..
ومن روشن حوش رمضان..
لروشن كوجينة حوش الهادي..
اللي طالعه منه الأصوات..
منها طول للصاله..
سميه ببكي:لعند امتى قولي لعند امتي بنتحمل معاملتك هدي... من لما وليت واني فالاستكراد والإهانات..معامله مافي حد يتحملها..واني قاعده نتحمل ونفوت ونساير نحاول نثبتلك فكل وقت اني تغيرت واجد ع خاطرك واني تعلمت من اللي فات...نحاول نبينلك ان انت عندي اهم من كل شي ولولا هكي ماكنت وليتلك ياهادي حتى بعد طلقتني..لكن مافيش فايده انت ماتبي تشوف شي..ولاشي..
الهادي بنفاذ صبر:انتي تبيها صريحه هكي..تمام..اني مارديتك الا عشان صغارك اللي راقدين داخل عشانهم هما وبس..وكانك ع اللي فبطنك تو راهو غلطه فلحظة ضعف لااكثر وانتي تعرفي..
سميه بصدمه:و11سنه من عمري معاك قبل وين عدن؟!
الهادي ببرود:انشدي روحك ..
ومشي فات من حداها ناوي يطلع..
وقف فمكانه لما سمع صرختها..
تلفت مفجوع..
لقاها حاطه يدها ع حزامها وهي تعيط بوجع..
وجهها شحب لونه..
وهي متمكشه فبعضها وتتألم بقوة وتعيط..
وجعاته هلبه...
جاها طول شدها وهو يقول بخوف:خيرك ..شن جاك..
وسميه تصرخ بصوت عالي وتتوجع بشده..
صغارها فاقوا مخلوعين من النوم..
وباب الحوش كان يطق بقوة..
واللي كان يطق عليه الحاجه فاطمه وهي تقول بهلع:حل يا عبدالهااادي..حل..عبدالهاااادي..حلو الباااب..
ع طلعة بناتها يجروا من الحوش..
ونزلت لمياء من الدروج..
فهالوقت كيف درست سيارة عمر..
شاف الوضع قدامه خاف هلبه..
فتح الباب ونزل يجري..
فنفس الوقت ..
فتح الهادي الباب وهو يقول؛محمد قاعد؟!نبي سيارته.. السيااارة..
عمر؛اني هنى واهي سيارتي كان تبيها..
يدوب شبحله الهادي بعد خش داخل يجري..
خشوا معاه غاليه وامه..
شويه وطلعوا بسميه وهي تأن من الألم..
قعد يمشي فيها الهادي بمساعده غاليه لين ركبوها السيارة من الخلف..
عمر:تقدر تسوق ولا نرفعكم اني؟
الهادي :نقدر نسوق..
مدله عمر المفتاح خداه الهادي وركب طول وشغل السياره..
لحظات وطلعت حميده لغاليه بالعبايه :هاكي وعدي معاهم..
غاليه خدتها لبستها ومشت طول تجري ركبت جنب خوها..
تحرك الهادي طول..
حميده:يستر الله..
لمياء:شن جاها يالطيف؟!
حميده شبحت للمياء بعدين غيرت عيونها لولاد خوها اللي كانوا يبكوا ومعاهم حناهم ..
فاطمه؛مافيها شي امكم شوي وتروح..
حميده:هي تعالوا يمي خشوا داخل..
الحاجه فاطمه بدون ماتعبر حميده خدت الصغار ومشت هيا وياهم للحوش..
اما لمياء مشت ركبت لشقتها..
وحميده..
مشت وهي مضايقه قعمزت ع الركابه...
🍁🍁🍁🍁
هدي هي..
الصديق خدي من يد حليمه ورقة الإخطار وقعد يقرا فيها بعدين قال:من وقعها عني؟
حليمه؛واحد من خوتك اليوم جي للحوش معاه راجل شكله زبون للحوش..
الصديق شبحلها وقال:اممم..
حليمه:نشور عليك شور؟
الصديق:شن هو؟
حليمه:اول جلسه بعد 10ايام..ماتعديش..
الصديق:تو انتي مش تبيني نطلقها بسرعه؟
حليمه :اكيد..بس فكرت بيني وبين نفسي فكلامك قبل عن حكاية الورث وفلوس الدولار..انت مش تبي تقنع خوك اللي قاعد برا يتنازلك عن حقه لأن انت عندك عيلتين وهو ربي ناعم عليه وعاطيه مش محتاج بكل لحقه من الورث وقلت ان لمح ان بيتنازل عن حصته ياليك يا لشعبان وانت اولى من شعبان كيف ماقلت عندك عيلتين..
الصديق ساكت ويسمع بس..
حليمه:وحصتهم من الدولار لو طلقتها قبل تنزل ادير كتيب ع حالها وبنتها هي اللي حتكون مسؤوله عنها حتنزل معاها فيه ياخدوها برواحهم..وتولي من نصيب خوتها بحجة انهم بيصرفوا عليهن بيها....من اولى انت ولا هما..
الصديق:تو مش هدى كلامي من الأول وماكانش عاجبك؟!
حليمه بضحكه:فكرت فيه كويس وعجبني..
الصديق:باهي ع قصة فلوس الدولار هدي مش مطلقها بكل..
حليمه فنصت وقالت؛حني نبوا اللي بينزلن توا بس عشان بنغيروا الآثاث بيهن..بعدين معاش عندنا بيهن عازة..
الصديق:وكان طالبت بحقوقها!
ابتسمت بخبث وقالت:مفكرة فيها الحكايه هدي كويس ولقيتلها حل...
🍁🍁🍁🍁
تجري بيها وهي ع الكروسه..
سميه ببكي:العيل..بيطيح..
فضيله:ان شاء الله لا..
غاليه :اهي جت الدكتوره..
الدكتوره:مافيش نزيف؟
فضيله :لالا..
من بعيد شويه كان واقف يشوفلهم لعند ماادرقوا من قدامه..
مسح بيده ع وجهه بعدين قال:استغفر الله العظيم...
🍁🍁🍁🍁
باهي ترا قوللي لعند امتى هالحال بيخش الاربعين خلاص..
هاجر:حاله ماينسكت عليه راهو..
فايزة:ماهوش صغير لما يبي يتزوج تو يتزوج..
مرضيه :عاجبك حاله انتي عاجبك!؟امتى يخطرله يتزوج بالله لما يوصل الخمسين؟!حتى صغار كان جاب مايلحق يربيهم؟
فايزة:يمي هو ادرى بمصلحته..هو ادرى..حاجات كيف هدي مفروض ماندخلوش فيهن..
مرضيه:هدا واني نقول انتي الكبيرة نكلمها تعقله توقضه توعيه ع روحه..طيح سعدي وخلاص ..
فايزة قعدت ساكته وهي تشوف لأمها بطرف العين..
وهاجر شاده ضحكتها..
واللي يتكلموا عنه...
فطرابلس💓..
مقعمز ع طاولة مكتبه..
قدامه اللاب مفتوح .
وكتب مفتوحه..
هو مش لاهي بولا شي من هادو...
كان حاط رجل ع رجل...
حاط سمعات فوذانه..
ويسمع من التليفون فأغنيته المفضله..
وهو يفكر فيها بين عيونه ملامحها..
تصرفاتها اسلوبها فالكلام..
عمره مالفتاته انثى ع قد ماشاف ومر عليه..
اي يعجبه جمال خارجي مبهر للعين للحظات وتفوت..
لكن قلبه ماقدرت ولا وحده تلفته..
لأنه من النوعيه اللي يهتم بالجوهر القشرة الخارجيه ماتهماش هلبه..
وهو لمح شي بسيط من جمال دلال لفته للوهله الاولى..
بس اللي خلاه يطيح فحبها هو جوهرها ....
حول السماعات...
نزل رجليه..وقدم للاب..
قعد يدور كان عندها حساب ع الفيس..
ضو:مرات مش بإسمها البروفايل..
قعد يفكر شويه..بعدين خطرت عليه اخته..
مشي لحسابها وخش عليه..
طول لقائمة الأصدقاء..
قعد يدور ويدور...لعند ماوقف عند حساب كان اسمه..
"ريمة الفارس الشهيد"..
غمض عيونه بشده..
بلع ريقه..
ضم شواربه لداخل..
بعدين عض ع سفلي بشي من الغيظ..
فتح عيونه وطلع طول من الحساب من الفيس كله..
صكر اللاب بقوة...
وناض مرة وحده وطلع من داره...
🍁🍁🍁🍁
مازال قلبي شايلك بين الجوانح طير..
يجوب الفضاء الواسع وبيك يطير..
لآخر مدى في العمر..لآخر مدى فالعمر..
حبيبي...
🍁حتى هي كانت حاطه السماعات وتسمع فأغنية لمحمد حسن..رمز عشقهم..
وتسمع فأكثر اغنيه كان يحبها فارسها💔..
تشوف للصورة ودموعها ينزلوا..
ومازال عقلها يبي يصدق...انه حي...
اما قلبها مصدق وفات..اصلا ماصدق..
طق باب الدار..
مسحت دموعها وهي تقول:خش..
انفتح الباب وخش بوها..
ناضت وقفت وحولت السماعات..
عبدالسلام ركز علي عيونها لكن تجاهل عمدا وقال:بابا امتى تكملي الفصل هدا؟
دلال رشفت وقالت:اخر 5..
عبدالسلام:امم..اني وامك ناويين العام  هدا نمشوا عمرة قبل رمضان نقعدوا اسبوع ونروحوا..شن رايك بابا تمشي معانا..
هي حست برغبة شديده فالمشيه هادي قالت بحماس:اخر اسبوع فخمسه امتحاناتي..نمشوا فنصه..
عبدالسلام هز راسه بإيجاب وهومبتسم قال:كويس..صغارك واختك يقعدوا عند عمتك آمنه..
ابتسمت دلال:تمام بكل..
ضحك بوها بعدين قال؛ماتبي شي بابا..
دلال بإبتسامه:سلامتك بس بس..
ابتسم بعدين فتح باب الدار وطلع..
هي تنهدت بإرتياح..
بعدين شبحت لصورته وابتسمت..
🌴🌴🌴🌴
مقعمزة فوق السطح ..
الجو كان لطيف وحلو..
كانت مخصصه كل يوم لماده تقرا فيها...شهادة ثانويه السنه هادي لازم تشد...
والإمتحانات قربت..
هو كان واقف ويشوفلها..
كيف دايرة طاوله وكرسي..وقدامها مق كبير وصفرة يبان فيها ماكله..
وهي تبان لابسه توته..
وعليها جاكه خفيفه وطويله..
ووشاح محطوط حط..
و4لامبات فوق السطح فاتحتهم..
تقرا ومنسجمه ع الآخر..
كان خاطره يكلمها..لكن متحشم..قريب يصكر سنه ماصارش بينه وبينها دوة..
ايمن"ع اساس مش حرام اللي قاعد ادير فيه تو..تملي فعيونك منها راك.."..
حدهم:اففففف...ياربي..
اتكت ع الكرسي وهي فاتحه ايديها وقالت:ماتيت اني..
شد ضحكته..
هي عدلت تقعميزتها بعدين خدت طرف بيتزا وكلاته ففم واحد وهي تشوف لكتابها بغيظ
وهو يضحك بكتمان
بلعت...
بعدين حطت ايديها ع وشاحها وحولاته..
هو طول غير عيونه..
قعدت تساوي فشعرها وهي تقول:زعمه نقصه ع العرس ولانخليه هكي..
هو يسمع وبس..
لمعوا عيونها وهي مبتسمه بأندهاش:نقصه ونصبغه..
"عينك"..
شبحت ايسارها بخلعه..
طول غطت شعرها وهي تشوفله بعيون جاحظات..
ايمن بدون مايشبحلها قال بعصبيه: ماتمديش يدك عليه ولاتقربيه ولاديري شي فروحك..ردي بالك خليك كيف ماإنتي..ايوه.. ولف ومشي طول بسرعه للباب وهو معصب..
فتح الباب ونزل..
وهي قاعده جامده فمكانها💖..
💞💞💞💞💞💞
بالله شن قصده رزونه!!
رزان بضحكه:ياغبيه واضح قصده قصي يفهمه..
حدهم بفرح :ههههههههههههههه..حطت ايديها ع وجهها وهي تضحك..بعدين حولتهم وقالت..خل نمشي نقول لماما..
ومشت تجري طلعت من الكوجينه..
ضحكت رزان..بعدين تحولت ضحكتها لإبتسامة ألم..
🍁🍁🍁🍁
الألم..
كانت تحس بيه غاليه وهي تشوف لحال خوها ومرته..
الحمد لله العيل مازال موجود..
وحال سميه ولا كويس..وروحوا فنفس الليله..
لكن الدكتورة اكدت ان اللي صارلها نتيجة توتر وانفعال..
قعدت تشوف لخوها من المرايه لأنها مقعمزة وراه فالسياره.
كان يبان مضايق هلبه..
ومرته تشوف للروشن..بانوا عليها دموعها..
وجعتها حتي هي..
شبحت غاليه للروشن وقعدت تفكر..
بعدين فتحت عبايتها وطلعت تليفونها من جيب التوته..
وخشت ع الرسايل وقعدت تكتب..بعد كملت بعتتها..
رن تليفون الهادي بنغمة رساله..
خدي الهاتف من ع "تابلو" السيارة..
عين فالطريق وعين فالتليفون..
فتح الرساله وقراها..
بعدين شبح للمرايه..
غاليه ابتسمت برجاء..
هو ابتسم..
رد التليفون لمكانه وكمل الطريق لعند ماوصل فم القطعه..
الهادي:انزلي غاليه..
سميه شبحتله بعدين التفتت لغاليه ..
غاليه ابتسمتلها وفتحت الباب ونزلت..
صكراته ومشت..
سميه بخوف:بترفعني لهلي؟..
ضحك وقال:ظني فيا خير لمرة وحده فحياتك..
هي سكتت وعيونها عليه تحاول تفهم شن صارله فجأة..
وخر بالسيارة
بعدين لف بيها وتحرك..
....
خشت للحوش وهي تحول فعبايتها..
لقت امها مقعمزة فالصاله ..
فاطمه:روحتوا؟
غاليه؛اني بس..
حميده وهي واقفه فباب الدار ووراها لمياء:راك تقولي قلها لهلها!!؟
ضحكت وقالت؛لالا....
لمياء؛مالا وينهم..
غاليه بضحكه:وين نعلم ع الهادي اني..وخشت للدار وهي تضحك..
فاطمه ابتسمت وناضت وهي تقول:قولولي يابنت خشي ارقدي خيرلك..
ضحكوا حميده ولمياء ..
بعدين التفتت لمياء لغاليه وقالت:المهم عيلها حاله باهي..
غاليه:ايه زي ماخبرتكم ع الهاتف مغص بس..
لمياء هزت راسها بإيجاب وهي مبتسمه وعيونها تعبوا دموع..
🍁🍁🍁🍁
الساعه 10:00ليلا
يدهوروا في السيارة ...
ساكتين الزوز ماقالوش ولاحرف...
هي كانت تشوفله...
وهو يشوف القدام...ملامح وجهه تبان مرتخيه وهاديه..
ابتسمت وتشجعت تتكلم...
سميه بعيون مدمعه:اني والله نحبك وانت تعلم..مهما يصير ياهادي اني مانقدرش من غيرك والله..
الهادي ابتسم وهو يسوق وبدي يغني..
عبدو حابب غندورة غيرا مابدوا
سميه..
وهالغندورة الأمورة علئانه بعبدو...
الزوز: ههههههههههههههه..
الهادي بضحكه:ااااه عليك ايام
سميه:احلى ايام💖
فاللحظه هيا اذكر الهادي ايام زمان كلها وقعد كل مرة يسترجع ذكرى هو وسميه..قعدوا ساعه ليلتها فالسيارة وهما يهدرزوا ويضحكوا..
بعدين توجهوا للقطعه..
وصلوا لحوشهم..
نزلوا الزوز..
الهادي فتح الباب وقال:هي خشي..
سميه بإبتسامه:جيب الصغار..
ابتسم الهادي وبغمزة عين قال:خليهم يباتوا حدا حناهم الليله..
ضحكت بخجل وخشت داخل..
الهادي بضحكه قال:شويه وجاي..
رد الباب..
بعدين مشي للسيارة دار رنه لعمر..
شويه وبان عليه عمر...
قدمله الهادي وهو يمد فمفتاح السيارة:نردوهلك في الفرح..
ضحك عمر وهو ياخد منه في المفتاح وقال:المهم الأمور تمام..
ابتسم الهادي وقال:عال العال..هي تصبح ع الخير..ولف ومشي لحوشه..
عمر رد وهو مبتسم:قدامك كل خير..
قعد لين خوه خش وصكر باب الحوش..
تنهد براحه ولف ومشي حتى هو لحوشه..
🍃آااخ قداش محلاها الأخوه..محلاها هالنعمه..
خوك وقت اللي ضيق بيك تلقاه اول من يجيك بش يجلي غمتك..ولما اطيح تلقى يده اول يد تنمد بش ترفعك..
واللي لما يشوفك تعيس يدير كل شي يقدر عليه بش يسعدك..🍃
وهادي كانت غاليه اللي حاولت تساعد خوها بش يكون سعيد ومرتاح..
لما بعتتله رساله فحواها
(تحبك راهي..ماتكسرش خاطرها)..
💖رساله للحموات..
شن بيصيرلك لو درتي زي غاليه..
شن بينقص منك لو شفتي خوك ومرته فحال خصام وساعدتي بش ترديهم لبعض؟!
شن بيصيرلك لو مدحتي من قلبك مرت خوك قدامه..لو نقلتيله عنها كل كلام حلو؟!..
وليش..
ليش تفرحي لما تلقي خوك ومرته متعاركين؟!
ليش تفرحي لما يخوك يهزب مرته قدامك؟!!
ليش تتعمدي ذميها قدامه تتفنني فإظهار عيوبها لين تكرهيها فيه؟!!
ليش تنقهري لو ريتيه متفكرها بحاجه حلوة ولايمدح فيها قدامكم انتم اهله؟!!
ارجوكم ارجوكم..اتقوا الله في أنفسكم وفبنات الناس..
خلك همك الوحيد انتي كحمي ان خوك يكون سعيد فحياته ومرتاح مع زوجته..
مادخلكش بيهم وين مشوا وشن داروا وشن خدالها وشن قاللها وكيف يعامل فيها..
ماتقارنيش بينك وبينها..
انتي اخته وهي مرته...
وكل وحده ليها معامله تخصها..
اني وخوي توا نتعاركوا وياما يصير بيناتنا ينزل عليا بطلباته احيانا..لما نقوله جيبلي شكلاطه فلانيه واي شي من هدا القابيل يفوتني ومايجيبليش ممكن نزعل لكن فيسع نفوت..
ولو في المستقبل القريب لقيته دار العكس مع زوجته لايمكن نحقد عليها ونقول اشمعنى؟!..
يكفي نشوفهم متفاهمين وبس وخوي مرتاح وحياته مستقرة..
ونحط قدام عيوني ان اللي نديره حنلقاه لو مش عند العباد عند ربي وربهم حتما حنلقاه 💖
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
تاني يوم...
الساعه 2:30بعد الظهر..
كانت رزان في الجردينه تسقي فشجرة الليمون نست تسقيها الصبح قبل تمشي للكليه..
وهي تحط فالطوبو تحت الشجره ..
"هي تفضلوا تفضلوا"..
رزان فنصت وهي تقول بهمس:حي عليا!!؟
ناضت والتفتت وهي مدرقه ورا شجرة الكرمه تشوف..
لقت عمها عمر معاه رجاله يستقبل فيهم..
....
عمر:تفضل عمي مصباح تفضل عمي رجب..تفضلوا ياشباب..
وكلهم يردوا بأصوات متقطعه:يزيد فضلك..
ركبوا الدروج..
وهما راكبين رن تليفون ابراهيم:لحظه تو نجي..
عمر:تمام..
وركب ورا باقي ضيوفه..
وهو فتح الخط ورد: آلو..الو..تس مافيش تغطيه..
نزل من الدروج..
وهو يقول:آلو..رياض..
وقف قدام الحوش شبح للجردينه فتح فمه بش بيقول آلو..
ماقدرش يقولها..
رزان اللي كانت كيف جايه بتطلع من الجردينه وهو طلع فوجها فجأة...
من الفجعه هربت تجري..
وهو قعد معاها بعيونه المبهورات لين اختفت من قدامه..
وصاحبه اللي عيي وهو يقول
"آلو..ابراهيم.."صكر لما فقد الأمل من اكمال المكالمه..
هو شيئا فشيئا ابتسم..
نزل التليفون من ع وذنه بعدين لف ومشي للدروج..
قعد يركب وهو يضحك بإستغراب فشعوره اللي يحس بيه حاليا..
🍁🍁🍁
نادى عمر ع خوته الهادي ومحمد وميلاد جو بس الهادي ومحمد..
كانت عزومه الغدي حلوة بالمرة..
طبعا ماهو لمسة غاليه السحريه فيها..
بعد الغدي ..
حطت لمياء الشاهي ع النار..
وهي واقفه ع اللاوندينو تغسل الماعين..
"لموشه"..
التفتت وهي مبتسمه قالت:رهيما..
ابراهيم جي وقف حداها وقال:شجو..
لمياء:تمام..
ابراهيم:مرتاحه هني..قصدي ف*****
لمياء هزت راسها بإيجاب وهي مبتسمه..
ابراهيم؛عمر شن جوه معاك..
لمياء :كويس هلبه..
ابراهيم ابتسم وقال:كويس..احمم..لمياء..
لمياء:اممم..
ابتسم وهو يعض ع شاربه بعدين قال:بكري اول ماجينا...شفت بنيه..
رفعت حاجبها بإبتسامة استغراب وقالت:بنيه؟!
ابراهيم وهو مبتسم بإحراج؛ايه..عيونها خضر..
رفعت حواجبها وقالت:عيووونهاا خووضر!!
ضحك وقال: شكلك عرفتيها..
لمياء بإبتسامه؛اكيد..بنت سلفي الكبير
🍁🍁🍁🍁
الساعه5:00عصرا
واقفات ورا البرسيانه يراقبو..
غاليه بضحكه:هداك هو خوها...وبصوت منغم قالت...الدكتووور ابرااااهيم..
حميده:هييييي ان شاء الله هداك هو اللي لابس فانليه تركوازيه ع سروال ابيض ورابط شعره؟!
غاليه بضحكه:باهي شكله تو غفته رابطها..كان ريتيها وهي مشفشفه شن تقولي!!؟؟..
حميده:واني اللي نتخايل فيه كيف تيم الحسن ع قد ماتوصف فيه!!؟
غاليه:هههههه..هدى رابح صقر بغفه..
ضحكت حميده...
🍁🍁🍁🍁
مقعمزة قدام اللاب متاعها تقرا...
قطع عليها قرايتها تليفونها اللي رن..
خداته وهي تشوف للاب بعدين شافتله لقت المتصل رقم..
قرنت حواجبها وضيقت عيونها وهي مستغربه..
فتحت الخط وحطاته ع وذنها بدون ماتقول شي..
"آلو..رزان"
رزان بإستغراب:ايوه منو معاي؟
ضحكت وقالت:معاك ايناروا مرت تيفسا صاحب عماد اذكرتيني؟!

...يتبع...