#العشق_المتمرد "اختبار"
#جمان_فريد
الجزء 114القسم الثالت
🌟...
بعد صلت الفجر..
مشت شافت بنتها اللي كانت راقدة ابتسمت لجمال شكلها وهي رايحه في النوم..
قعدت تتأمل فيها شويه..
بعدين مشت لسريرها..
تمددت ..وخدت تليفونها وخشت تكسد ع الفيس لين يجيها النوم..
قعدت تتصفح..
لعند ماجي قدامها مقطع فيديو مكتوب فوقه..
"فرسان الفاتح"..
فتحاته..
قلبها دق بعنف لما شافت صورة معشوقها وهو بالبدله العسكريه..
ايه هو نفسه الفيديو اللي مصممه ولد أخته..
قعدت تتفرج عليه وهي تمسح فدموعها بعنف لأنهم كانوا يحجبوا عنها فالرؤيه بوضوح..
كانت تسمع فصوت فيروز وكلمات الأغنيه..
وتتمنى في هديكا اللحظه بس..
لو تشوفه دقيقه..
تحضنه دقيقه..دقيقه وحده بس..من شوقها الشديد ليه..
تم المقطع..
طول مشت راسلت الصفحه تطلبه منهم وقالتلهم انها زوجته..
المهم تحصل المقطع..
ممكن ماتوقعتش يجي الرد سريع هكي
طول جاها المقطع ع الخاص..
وع طول بدت تنزل فيه وهي تبكي..
قامت عيونها فصورته..
والدموع سيل..
دلال"اااه بس لو تصير معجزة وتطلع حي مانبي من ربي شي تاني بعد هكي"..
شبحت للتليفون لقت التنزيل تم..
ابتسمت من بين دموعها..
وعاودت تتفرج عليه...
بعد تم...
ولت للصفحة الرئيسيه بش بتكتب منشور..
جي قدامها منشور نزلاته رزان..
الآن..
"علمني كيف انساك..ياقطعه من قلبي...ياقلبي كله💔"
دلال غمضت عيونها بشده وهي تبكي بقوة وصوتها مكتوم..
تنت ركابها فوق..
حط ذراعها عليها..ودفنت وجهها فذراعها وهي تبكي..
مش هي بس..
💔💔💔
حتى صاحبة المنشور..
ااه ..
كيف تنسي عشقها ليه؟..
كيف تنساه؟..
قريب ولا بعيد هو هو عندها..
ليه نفس المكانه..شعورها اتجاهه مانقصش حتى شويه..
تذكر فكلام بنت عمتها عنه وهي تضحك وتبكي فنفس الوقت..
⚡فلاش باك..
اهو..سخان...وهو مارت..
جابلي ..فقطان وكنترة ..اهما...
رزان تشوف للقفطان والكندرة والسخان وعيونها مرقرقات بالدموع..
وقلبها ينبض بأسمه..كل نبضه مجنونه اكثر من اللي قبلها..
حميده:حيييي...ليش طلعتيهم!؟
حنين:نوريهم لرسونه..
حميده خدت الفقطان والكندره وهي تشوف لبنت خوها كيف تمسح فدموعها..
ومشت بيهم للدولاب ودستهم..
رزان شبحتلها وقالت:احمم..جابهم..عماد؟..
حميده :ايه..وخدت السخان وطلعت بيه ووراها حنين تجري وهي تقول"متاع مارت...متاع عمات"..
ورزان تتنهد فتنهيدات تحرق فروحها من داخل..
⚡الوقت الحاضر..
تترنم بصوتها المرعوش من البكي في أغنيه لمحمد حماقي ودموعها ينزلوا..
مقدرش انساك..ماقدرش اعيش ولايوم من غير ..حبك..وهواك
ماقدرش انساك..دانا احلى سنين فحياتي..
اللي انا..عشتها وياك..
اما هو🍁💔
فكان يسمع فسيارته..
وهو حاط سماعاته فودانه..
اغنية حبيبة وليد التلاوي"كيف نعيش وانت مش نصيبي"..
ااخ ياعماد..
ياريتك فكرت في إجابه لهالسؤال فكل مرة كنت رافض فيها تتفهم بنية قلبك..
انت بسبب غضبك..
حرمت البنت من بوها..
وعيشتهم الزوز فعذاب مالاش نهايه..
وهاك قاعد تحصد فنتيجة تصرفاتك اللاعقلانيه..
🍃اللي شركته صعب يترقع صعب هلبه..هلبه..🍃
تليفونه رن..
فتح عيونه وشاف المتصل..
الاغلال...اللي غل بيهم نفسه..هي اللي تتصل بيه..
تأفف...
بعدين فتح الخط ورد..
عماد:احمم..ايوه..
سناء:واخييييرا..واخيرا ياعماد!!معقوله من امس مروح لافكرت تكلمني ولاتبعت رساله حتى!!؟
عماد:مافضيتش..
سناء:حرام عليك عماد بجديات من امس لليوم واني ع نار نتصل ماتردش ولا بيت تعبرني وتعاود..واني قلبي يغلي والله حرام..
عماد غمض عيونه وقال:اسف..
سناء بنبرة زعل:اسف ناشفه هكي..
عماد تنرفز؛الدنيا صيام..واساسا واصلا كلامي معاك توا..غلط..
سناء بشي من الأنزعاج:باهي..بعد الفطور كلمني..
عماد بملل:باهي..
سناء:احمم..تصبح ع خير..
عماد؛وانتي من أهله..وصكر..
رجعت اشتغلت الأغنيه بعد تمت المكالمه..
وهو جي بيوخر الكرسي..بش يتمدد عليه..
عينه طاحن ع المرايه..
شافها..
كانت طالعه فم الحوش..
قعمزت ع اول درجة من فوق..
مستغله ان فهالوقت مافي حد فايق كلهم راقدين..
طلعت بش تتنفس مع الصبح وتحاول تهدي نفسها شوي..
شبحت لسيارته..
ولأنها كسابقتها مظلمه ماكانتش تندري عليه انه فيها..
ولاخاطر عليها حتى الخطور...
تنهدت بألم بعدين غيرت عيونها عنها ووجهت انظارها ع الوادي والجبال..
وهي تفكر..وتتنهد..
وهو يراقب فيها..
يشوفلها كيف..
نزلت وشاحها من ع راسها..
ولمت شعرها اللي طاح بعدين رجعت غطاته..
عماد:آااه ياقلبي آااه..نحبها نموت فيها..مادرت فيك اللي درته الا من حبي ليك ..وجعتيني هلبه راك هلبه مش شويه..
ومع هدا..نموت فيك كل يوم اكثر من اللي قبله...💓
ابتسم بعشق..لما شافها حطت يدها ع خدها..وكأنها سرحت..
شويه وشافها تمسح فدموعها..قلبه وجعه..
مش عارف شن جاه..
فتح باب السيارة..
هي انخلعت..
طلع رجله منها وقعد مقعمز ويشوف فردة فعلها من المرايه..
هي كانت مصموته..
تشوف للسيارة بعيون جاحظه وخلاص..
وقلبها بيفر💓..
شويه..
ونزل منها وهو ملتفت ناحيتها ويشوفلها..
هي تقول انصابت بصعقه كهربائيه..
انتفضت من الخلعه..
وطول ناضت..
وهربت منه..
هربت.
خشت للحوش وصكرت الباب
وهي تاخد في انفاسها بصعوبه..
تقول كانت في ماراثون..
مشت لدارها وهي حاطه يدها ع قلبها اللي حاساته بيطلع من صدرها..
وصلت في الدار فتحت باب بالسيف وخشت وصكرتها وراها ودموعها ينزلوا...
اما هو..
ابتسم لما هربت..
اليقين قطع الشك من ناحية حبها ليه..
ماديرش هكي لو ماكانتش تحبه..
🍃ااخ ياعماد فهمت من اللي صار توا بس انها تحبك بصدق!!..🍃
للأسف التصرف بغضب ديما عواقبه غير محموده...ديما..
تحبها وتحبك وبعدين!!!..
بيناتكم حواجز كل مالها تعلى وتزيد صلابه وهدها شبه مستحيل...
رجليه رفعوه للمربوعه الخارجيه كانت فاضيه وقتها..
خواله..محمد راقد فشقته..
وهانيبال في المربوعه الدخلانيه..
خش داخل..
وانطرح ع واحد من فرشاتها وغمض عيونه وهو يحاول يرقد..
🍃🍃🍃🍃
فاتوا يومين..
فيهم رفعت كفايه موسم سناء بروحها..
وفرحة سناء بالموسم نستها تغيب عماد عن يوم زي هدا..
لكن لمياء لا ..طارتلها منه هلبه وتبي تحصل فرصه بش تكلمه وتعاتبه لكن ماتقابلتش هي وياه نهائي..
وكذلك رزان قعدت حبيسة الحوش معاش بت تطلع منه بكل الا مرة وحده مشت فيها مع امها لحوش جدها عبدالله..
خلت عماد متشوق لشوفتها..حتى لمحه راضي بيها..
وحتى اللمحه ماقدر يلحق عليها..💔
🎆
والإستعدادات في العيد هاليومين ع قدم وساق..
واحلى استعدادات ديما اللي يديروا فيها نعيمه وكفايه..
نعيمه اللي قعدت ليلتين مقعمزة تخدم ع سفرة مقروض وصفرة غريبه وصفرة كعك مالح محشي بالتمر بمساعده بناتها وآسيا اللي كانت تبلبز حداهم..
وكفايه..
كذلك مقروض وكعك ملون وكعك حلقوم....
ليلة العيد الزوز قسموهم بين حوش شيابينهم وحوش ماليهم..
وحطوهم في حافظات منفصله..
صكرت حافظه الكعك بالتمر بعد كملت حطانه وهي تنادي:معمر..عمورة..
جاها يجري من الدار وهو يقول:نعم خالتي..
نور :حبيبي انت..ارفع هادي حطها في المربوعه قدام المكيف..
معمر قام الحافظه وقال:باهي..
ومشي بيها طول للمربوعه..
نور مشت طلعت من الكوجينه طول لدار اختها اللي كانت مفتوحه لقتها تحدد فالبدالي العربيه متاع ولادها..
نور:بعد تكملي دلوله تجبديلي شعري..
دلال وهي تحدد:باهي ياحصله..
ضحكت نور ومشت لدارها..
خشتلها وخدت التليفون من ع السرير وقعمزت تشوف فيه..
لقت مجموعة رسايل من صاحباتها تهنئة بالعيد..
ولقت وحده من مهند ..
نور بضيق:تس..
فاتتها مابتش تقراها..
بعدين مشت خشت ع الفيس..
لقت مجموعه رسايل واصلينها ع الخاص مابتش تشوفهم..
ولقت غاليه مدايرتلهم تاق بمنشور ع العيد كلهم ولاد وبنات..
ابتسمت وخشت علقت ودارت لايك..
بعدين قعدت تتصفح..
ويقابلها منشور فصفحة مالك اشارتله بيه اسراء..
وكان عبارة عن صورة فيها وجبات سريعه وعسلة وزلابيه وعصائر وكاتبه فوق "اخر سحور مع احلى قروب.."
الإشارة كانت ليه ولناس تانيه..
وكانت تقصد بيه سحور ليلة امس..
خشت طول للتعليقات وهي تغلي..
لقت مالك معلق..
(احلى شي الزلابيه والعسله 😉)
خشت ردت عليه اسراء..
(ايه احلى شي 💖)
رد عليهم واحد تاني..
(وحتى الطابونه احلى شي😜)
رد مالك
(ههههه..ايه منورة هي واللي جابها)
ردت اسراء
(هههههه)
ردت وحده
(اسراء ماكلت كانت العسله والزلابيه يادكتور مالك 😉)
اسراء دارت لايك لردها..
ومالك مادار شي..
مسحت دموعها نور وهي تقول:اخيي عليك يامالك..نزلت من عيني..
طلعت من المنشور ..لقت اشعار جايها..
فتحاته انصدمت..
لقت مهند دايرلها تاق هي مجموعه تانيين يهني بالعيد..
هي ضحكت طول..
حست وكأنه قلبها برد..
مليون في المية مالك شافه..
🍁وايه شافه...
كان حاط قبضة يده ع فمه وهو يشوف للمنشور بنظرة عيون كلها غضب وحواجبه مقرونات وواحد منهم مرفوع..
طول مشي للخاص تبع نور وقعد يكتبلها فرساله..
نور..
جت بتطلع من الفيس فجأة جاها اشعار الرساله..
خشت شافتها..
(نور اقسم بالله نولي مجرم والله نولي مجرم انتي مازال ماتعرفنيش يانور..لو ماقطعتيش تعاملك مع اللي اسمه مهند ندير عبيتر مايندار)..
نور بتفنيصه:ويهدد فوقها التافه!..
بعصبيه طلعت من الماسنجر..
ومشت طول لسجل المكالمات..
حولت الحظر من ع رقمه واتصلت بيه..
نادى مرتين..
بعدين انفتح الخط..
نور بإبنفعال:شن دخلك انت شن دخلك..شن علاقتك بيا من تكون بش تبعتلي رساله زي هادي حدك ولد خالتي بس ماليكش اي حكم عليا فاهم؟!..
مالك بحده:لا مش فاهم..واني مش ولد خالتك بس وليا حكم عليك تبي ولاماتبيش..انتي لمالك يانور اطيري اتجنحي تكلبي ورب العزة ماواخدك واحد غيري..
برغم تسارع نبضات قلبها حبا 💓..
لكن ردت بقسوة:احلف ع روحك وعيش نفسك فهالوهم..
قاطعها وقال:وهم عينك..واسمعي جاي جو الصغار متاع بتغيظيني بيه ومش عارف شنو راهو فاهمه كويس..
ضحكت بسخريه:بنغيظك بيه !!؟يادكتور لو مش مركز راهو هو اللي دارلي تاق بالمنشور مش اني هدا اولا وتانيا انت معاش تعنيلي شي بش نغيظك ولا نعبرك اساسا..
سكت مالك وهو فقمة الغضب..
نور بعصبيه وهي تحرك فيدها:برا حاسب روحك قبل وشوف شن في ع صفحتك بعدين تعالى حاسبني..اساسا...اساسا معاش ليك حق تحاسبني بكل..
وصكرت عليه وهي ترجف ودموعها ينزلوا..
اما هو..
بعد صكرت عليه..
ارتسمت ع وجهه ابتسامه حلوة وهو مازال قارن حواجبه..
وقال:مش معبرتيني وتشوفي في المنشورات ع صفحتي!!
اصلا لو كلامك حق يابشيشة راك حذفتيني من الأصدقاء قداش ليك..
ضحك..
بعدين كتب رساله sms...
وبعتها..
نور وهي مقعمزة ع السرير وتبكي بصمت..
سمعت صوت نغمة الرساله..
شافت التليفون وفتحتها لقاته باعت..
(نحبك يابشيشة مالك بس💖)..
قلبها يرفرف💓..
لكن بملامح وجهها غضبانه قالت:مصح فنزوزتك..
حطت رقمه في الحظر ولوحت التليفون ع السرير..
🍁🍁🍁🍁
فسيارته المدرسة قدام وحده من المحلات..
كان مقعمز ولاهي بتليفونه..
(لالا طلعت امس وخديت كل شي)
مروان
(يقين خيره اسلوبك مولي هكي؟)
يقين
(خيره اسلوبي عادي)
مروان
(لا مش عادي..فوق من نفسك تكلمي فيا)
معاش ردت..
مروان
(يقين)
يقين
(عارف خيرني انت يامروان )
مروان
(يقين..بجديات بديت نتعود عليك)
يقين
(لا انت قاعد تعبي بيا فالفراغ اللي خلاته بنت خالك يامروان)
مروان بتذمر:اففف..اففف..اففف..
🍁🍁🍁
كانت مقعمزة ع سريرها..رافعه راسها فوق ومغمضه عيونها..
فتحتهم لما سمعت نغمه رسالة ماسنجر..
نزلت راسها للتليفون شداته وفتحت الرساله..
عدنان الطير..
(وينك يااختي!؟)..
ضحكت وقالت
(لهيت شويه)
عدنان..
(ديما لاهيه علينا انتي)..
رفقه
(الدنيا عيد عدنان راهو)
عدنان
(عارف..وكل سنه وانتي طيبه للمرة المليون..ايه شن رايك في الهديه)..
رفقه ابتسمت وقالت
(حلوة..مشكور)...
🌴🌴🌴🌴
واقفه تتفرج ع سفر الحلويات المحطوطات جنب بعض فوق الرخامه..
غاليه بضحكه:بتيفور هدى..
مرام بضحكه:ايه..
غاليه:تعرفي يحبه من ايام كان في الاعدادي عشق بالنسبه لهانيبال..
مرام بإبتسامه:ايه..يفضله ع الحلويات كلهم..
"اللي ديري فيه انتي بروحه"..
ابتسمت بخجل وهي تشوف للروشن..
وغاليه تشوفلها بإبتسامه..
هو كان مبتسم وهو يشبحلها بعدين قال لغاليه:تعالي شوي غاليه..
غاليه بإبتسامه:حاضر..
ومشت طلعت من الكوجينه..
مرام شبحتله ..
غمزلها وبعتلها بوسه طايره..
ضحكت بخجل شديد..
ضحك..ووخر من ع الروشن والتفت لغاليه مدلها كيس وقال:هاكي..
خدتها غاليه وقالت:شن هدي؟..
هانيبال :خشي داخل وشوفيها تعرفي..
فات من حداها ومشي.
هي خشت داخل..
فتحت الكيسه..
لقت لبسة اطفال وباكو لعبه..
ابتسمت من قلبها وعيونها معبيات دموع..
مشت بيها طول للدار..
وصلت فيها وخشت:حميده شوفي شن جاب هانيبال..
ارتسمت ع وجه حميده ملامح المفاجأة..
قعمزت حداها غاليه..
فتحت الكيسه وطلعت منها بلوزة حلوة هلبه لونها وردي مرسوم عليها فراشات.. وسروال جينز ..وباكوا فيه لعبه..
وكارونه وتوكات..
حميده دموعها نزلوا وهي تشوف فيهم..
غاليه:من كيفها حنونه السنه ادير باللي عندها عرض ازياء..
حميده حطت يدها ع فمها وقعدت تبكي..
غاليه شبحتلها..
حطت يدها ع ركبة اختها :خوت راكم مهما صار..
غطت حميده وجهها بيدها وقعدت تبكي بشده..
وغاليه تمسح فدموعها اللي نزلوا وهي مبتسمه..
ناضت بعدين ومشت للكوجينه..
خشت للكوجينه لقت مرام لاهيه بتليفونها..
غاليه؛خشي قعمزي وارتاحي مرومه اليوم صبيتي واجد راك..
مرام بإبتسامه:باهي..انتي خلاص معاش عندك شي اديريه..
غاليه بإبتسامه:تس..
مرام هزت راسها بإيجاب ومشت طلعت من حداها..
غاليه التفتت لصفر الحلويات وخدتهم بالوحده دستهم في الدولاب..
بعدين خدت تليفونها من الدولاب..
ومشت طلعت بيه من الكوجينه وقعمزت بيه فم البوابه..
لقت مجموعه رسايل جايين ع الفايبر..
وكلهم رسايل تهنئة..
وفي وحده لرباب كاتبه فيها
(خالتي متاعيني وصلوا لحوشهم من ساعه)..
ابتسمت غاليه..
بعدين طلعت من الفايبر واتصلت بأمينه..
وحصلتها كلمتها وعطتها تكلم مرت خالها وخالها..وتحمدتلهم ع السلامه..نشدها مختار عن اخته قالتله راقده وسألاته لو يبي تنوضها رفض وحلفلها ماديرها..
بعد كلمت خالها نهت المكالمه..
ومشت للفيس تكسد عليه...
ويقابلها منشور يعكر جوها..
يعكر نبض قلبها فجأة..
كان ع صفحة نجمي..من صاحب يهني فيه ع العيد والخطوبه..
خشت التعليقات وقعدت تقرا..
كلهم يباركوله وهو يرد عليهم ويقول للعزابيه منهم عقبالكم..
صح غاليه مش متأمله منه شي..
ولا حاطه فبالها ان ممكن حتى فالخيال ممكن يصير بيناتهم شي..
ولا فكرت تتعامل معاه ع أساس ان في بيناتهم شي
لكن لما قرت اللي قراته حست بوجع..
انوجعت هلبه...وفهمت سبب قطع نجمي ليها الفترة الأخيره..
ابتسمت وعيونها معبيات دموع..
طلعت من الفيس وبدت تكتبله فرساله sms..
🍁🍁🍁🍁
صحيتي بنيتي رواسي..سلمي ع اميمتك..قدامك كل خير..
نجمييي..يانجمي..
خش من البلاكونه وجاها....
امه:هاك كلم خطيبتك..
خدي التليفون من امه حطه ع وذنها ومشي للبلاكونه..
نجم الدين:هاه..
رواسي:بيبي بنصكر توا مشغوله..غدوة الصبح نكلمك اوكي..
نجم تنهد وقال:باهي..
رواسي:كل عام وانت معايا بيبي..باي..
نجم:باي..
صكر قبل لتصكر..
تفاجأ بعد ماصكر برساله جاياته من غاليه..
قلبه اللي كان وضعه طبيعي قبل ليشوف الرساله بدي يدق بقوة..
فتح الرساله..
(كل عام وانت بخير..
ومبروك عليك الخطوبه وربي يتمم ع خير..)..
هو انحرق قلبه من برودها ولا مبالاة اللي عندها..
طول بدي يكتب في الرد...
🌴فم البوابه..
متكية راسها ع الحيط وهي تشوف ايمينها..
للأضويه اللي تبان من بعيد..
بنظرات كلها حزن..
سمعت نغمة الرساله..
بلهفه شبحت للتليفون..
وفتحتها..
(مشكورة..
ومعليشي ياريت معاش تتواصلي معاي مرة تانيه..عارفه وضعي توا..اعذريني..سلام)..
عيونها اللي تعبوا دموع..عاودوا قروا الرساله اكثر من مرة..
طاحوا دموعها..
قلبها الطيب..انكسر..
وللمرة التانيه..
بس هي هالمرة ماكانتش عارفه علاش حستها اقوى من اللي قبلها..
برغم انها مش متأمله شي..وماكان في بينه وبينها ولاشي اخطا علاقة صداقه وان بدت ظاهريه هكي..
بس مش عارفه علاش حست بوجع كبير..
معقوله كانت تحبه وهي مش حاسه؟!
ولاهي انوجعت لأنها حست بروحها كانت مجرد نزوة لشاب صغير سن طاشت مشاعره..
او مجرد تكسيده..
او ..او ..او...
بإختصار..
غاليه انجرحت جرح جديد فمشاعرها وكرامتها...🍃
🍁🍁🍁🍁🍁
يوم العيد..
الصبح..
اهلا اهلا بالعيد..مرحب مرحب بالعيد..
حميده وهي تلبس فبنتها الكارونه:هيييي هيي هييي..
حنين بإبتسامه؛هيي هيي هيي..
ضحكت حميده..
بعدين خدت العطر الخاص بحنين وبختلها منه وقالت:محلاها بنتي السمحه اللي تهبل..
حنين:شعري حلو..
حميده:وااجد..غزاله بنتي..
ناضت وشدت يدها وقالت:تطلعي توا لخوالك وتعيدي عليهم كلهم وتبوسي يدهم باهي..
حنين:باهي..
حميده:بإبتسامه..هي عدي ماما..
حنين مشت طلعت تجري..
وصلت فم الحوش لقت حناها واقفه برا وميلاد واقف عليها يعيد..
مشتله حنين ووقفت قدامه وهي مادة يدها قالت بكل براءة:كل عام وانت بخير..خالو..
شبحتله فاطمه..
هو ابتسم وقعمز ع روس صوابعه خدي يد حنين وباسها وقال:كل سنة وانتي طيبه ياسمحه..
قربت من يد خالها وباستها..
فاطمه بإبتسامه:سلمها ياربي نجيها..
ميلاد مسح بيده ع شعرها وهو مبتسم..
داخل..
خشت حميده للكوجينه..
لقت غاليه واقفه ع بكرج القهوة وهي تمسح فدموعها..
حميده بخوف:خيرك غاليه!؟
غاليه:شي..احمم..ترا حميده وتي الفناجيل..
شبحتلها حميده شويه بعدين مشت دارت اللي قالتلها عليه وهي تفكر فيها..
ع خشة مرام:تسلم عليكن امي..
الزوز ردوا:سلمها وسلم من جاب سلامها..
مرام شبحت لصفر الحلويات اللي ع الرخامه.. مشت طول خدت المترد وبدت تستف الحلويات فوسطه..
لحظات..
وخشت لمياء..
وهي جايبه فيدها صفرة حلويات حتى هي قالت بإبتسامه:صباح الخيرات..كل عام وانتم بخير..
شبحتلها غاليه بإبتسامه:كل سنه وانتي طيبه..
هي مشت حطت الصفرة ع الرخامه حدا مرام..
مرام مدت يدها تحسابها بتعيد عليها..
فاتتها ومشت لغاليه..
مرام احسنت الظن وقالت فنفسها انها ماشافتهاش..
عيدت لمياء ع غاليه وهي مركزة ع عيونها كيف حمر ومنفوخات...بس دارت روحها ماشافتش..
بعدين مشت لحميده وعيدت عليها..
وخلت مرام اخر وحده..
بعد عيدت عليها قالت:هاتي عنك..
جبدت المترد وقعدت تحط في الحلويات ومرام تشوفلها بإستغراب..
ع خشة هانيبال وهو يقول:غاليه..
التفتت لمياء وهي مبتسمه ابتسامه عريضه قالت:هنيوة..كل عام وانت بخير..
البنات انصدموا..
ومرام اتفاجئت...
اما هانيبال..
قرن حواجبه وشبح لغاليه وقال:غاليه احسبي ولاد عمك خليفه وحسن..وهو طالع كمل يقول..مرام رني عليا لما يكملوا..ومشي..
شبحت غاليه للمياء وقالت:لمياء هانيبال مش كيف خوتي الأوخرين..حطي حدود معاه فالتعامل..
لمياء وجهها ولا اسود من قوة الإحراج ..
مرام وهي تشوفلها برفعة حاجب:اكيد حاكيلك عمر عن طبعه ..
لمياء شبحتلها وقالت:شي مشي فلساني وخلاص..
مرام:معليشي..
حميده كانت تراقب فيهم وهي ساكته ..
اما غاليه خدت البكرج ومشت تصب في القهوة..
ولمياء خدت المترد ومشت بيه للصفره وهي تحاول تتمالك اعصابها..
بس فداخلها تسب وتلعن فهانيبال ومرته..
🍁🍁🍁🍁
ايييه حنون السمحه ايييه..
هدا عمر يلاعب في حنين يحدف فيها فوق ويشدها لما تنزل وهي تضحك..
فاطمه:راهي اطيح ياولد..
عمر ضم حنين لحضنه وهو يضحك:حناك خافت خلاص..
وحنين تضحك..
فؤاد:واني عمي..
عمر:امشي عدي عديي رحت راجل راك..
رمضان:واني..
عمر:حتى انت..
الولاد الزوز زعلوا من عمهم ولفوا ومشوا لحوشهم..
فاطمه:ليش هكي ياولد!
عمر:ولاد هادوم لازم يتربوا ربايه تريس مش رباية مفرخ..
شويه وطلع الهادي..
الهادي:خيرك ياعمر مع الولاد..
عمر التفت:خيرني معاهم؟!..
الهادي:بدير الفرق بينهم وبين هديك الفرخه!؟..
عمر التفت لأمه..
وفاطمه ناضت ومشت لعمر..
الهادي:هادوم صغاركم ياعمر راهو..
عمر لأمه:يمي ردي انتي..
فاطمه :نزل البنيه..
عمر نزلها ع خاطر امه..
البنيه بعد نزلها عمر..
مشت طول لخالها الهادي..
وعمر وفاطمه يشوفولها..
وصلت فيه ومدت يدها وقالت؛كل وانت بخير خالو..
الهادي..
شبح لأمه ..
بعدين شبح لولاده وقال؛عدوا لحناكم..
ولف ومشي للمربوعه..
البنيه نزلت يدها وهي مازال تشوفله..
وفؤاد يشبحلها..
جاها طول عمر وخداها طبها فغمره وهو يقول؛مريض..
ومشي المكسور خاطرها للجردينه..
وفاطمه بعد كانت مع البنيه بعيونها شبحت لولاد ولدها وقالتلهم :تعالوا وليداتي تعالوا...
🍁🍁🍁🍁
وفات نهار اول يوم العيد عادي..
وجو سعيده وبنتها عيدوا وروحوا طول...
اما باقي الكناين ..
سميه قعدت لين تغدت بعدين روحت..
ولمياء مش ناويه تروح الا بعد المغرب..
كان تركيزها كله ع غاليه وجوها الملخبط..
لمياء"شكلها متعاركه هي وصاحبها.."
وهما مقعمزين فالدار..قعدت توزع فنظرها ع التلفزيون وغاليه..
وتفكر تشبع فضولها بأي طريقه..
لمياء:غاليه..
فاقت غاليه من سرحانها وشبحت للمياء..
لمياء:غاليه نبي نشوف صور انواع الحلويات اللي في محل غزلان..مرت خالي بدير لمة وتبي تحجز فحاجه صح..وبما إني غدوة ماشيه لطرابلس بنتلاقى اني وياها نوريهملها..
غاليه هزت راسها بإيجاب ومدتلها التليفون بدون ماتحسب حساب لأي شي..
بعدين ناضت وقالت؛خل نعدي نخمم ع العشي..
ومشت طلعت..
لمياء ابتسمت بمكر..
وفتحت طول ع الرسايل..
اول رساله كانت من نجمي..
فتحتها وقعدت تقرا فيها..
بعدين شافت رسالة غاليه ليه..
لمياء"فاتها !"..
بعدين قعدت ادور كان في غيرها مالقت شي..
غاليه كانت تمسح اول بأول بس هادي من اللي صار فيها امس نست تمسحها..
طلعت لمياء من الرسايل ومشت للصور وقعدت تختار بعشوائيه وهي تشوف للحلويات بإزدراء وتقول بهمس: غزلان فنانه فالحلويات غزلان تفتلك...غزلان وغزلان...كله حاجات عاديه..
🍁🍁🍁🍁
تاني يوم...
الساعه 11:00صباحا..
من الفجر غادي..
زينب:وشن جوهم..
رباب:يهبل يما بالذات عمتي محلاها كيف تعامل فيا..
دلال بإبتسامه:امينه عسل معاملتها واسلوبها وطيبة قلبها..
نعيمه:ايه امينه طيبه هلبه..دلال بكري بوك قالي بعد العصر بنمشوا غادي..
دلال:إن شاء الله..
في الكوجينه..
حي عليها!!
حميده بضحكه:قريب ماتت..
رانيا بضحكه؛ياريتني حضرته الموقف..
نور:حتى اني جو تناديهم بتصغير الإسم مش خاشتلي دماغ مهما كان هادوا سلافها..
رانيا :صح..
حميده:يللا...المهم اليوم وغدوة بنفتكوا منها..
رانيا :حصلت فيها غير خالتي كفايه ..
ابتسمت حميده بتهكم..
ونور لما انذكر اسم خالتها كفايه خطر عليها ولدها شدت دمعتها بالسيف..
🍁في نفس الوقت..
كانت ماشيه وهي لابسه عبايه لونها كان مزيج بين الأسود والنبيذي..كانت حلوة هلبه..
شاده فيد بنتها اللي كانت لابسه بدله قونه حلوة وشعرها الطويل مرفوع وخصلتين طوال نازلات ع وجه ومزيناته..
وراها..
ولادها التلاته..
اللي كانوا لابسن عربي.."الكاط"..
الكبير لون كاطه ع ابيض..
الوسطاني ع الرصاصي..
والصغير ع الزيتي..
💕كفايه وولادها..
وخنفوستهم 💕..
كفايه:الجو اليوم باهي..
عماد:امم..
مالك:خالي حميد شكله مازال ماجاش..
مروان ساوا بسابته نظارته وهو رافع حواجبه..
وصلوا للممر وخشوا...
ع طلعة غاليه..
ابتسموا..
وهي ضحكت قالت:ياااه خطرن عليا ايام زمان كنتي وين تجينا تخشي علينا وهما وراك زي توا..
قدمت كفايه لأختها وهي تضحك قالت:كل عام وانتي بخير..
غاليه :كل سنه وانتي طيبه..
ع طلعة حميده:ماشاء الله ماشاء الله..فرساني..
ضحكوا..
مروان بضحكه:ياااه قداش ليا ماسمعتهاش منك..
ضحكت وفتحت ايديها والتلاته جاوها..
باسوا راسها مع بعض وهي تمسح ع ظهورهم..
داخل .
رانيا:بتطلعي تسلمي..
نور رفعت حاجبها وقالت:ايه وين المشكله..
ومشت طلعت...ورانيا لحقتها وهي تضحك..
مالك لما راها جايه قام نظاراته وحطهم ع راسه..
وهويشوفلها كيف تسلم وتعيد ع امه..
بعدين..
عيدت ع عماد ومروان..
ومالك كأنه خيال..
طارتله ع الآخر لذلك فكر يحرجها..
مالك؛خيرك ماتعيديش..
نور وجهها ولااحمر وهي تشوف لخالتها عرفاته يبي يحرجها..ردت عليه وقالت؛عيدت عليك غير انت مش مركز..
شبحوله كلهم..
وهو يشوفلها هي..
غاليه بضحكه:هي خشوا..
خشوا كلهم داخل ومالك عيونه ع نور اللي مصرة اطلعه من عقله..
اما عيون خوه وهو خاش يعيد ع خالاته والبنات كانت ادور فمعشوقتهم اللي ميتين شوق ولهفه لشوفتها لكن للأسف مش موجودة..
🍁🍁🍁
هاه عمتي نقدر نجي؟..
غاليه:عدوا للمربوعه اللي برا كلهم..
رزان:باهي عمي حميد مازال ماجاش..
غاليه:ع وصول توا..
رزان:خلاص نراجيه لين يجي..ايه وامي توا جايتكم..
غاليه تنهدت وقالت:باهي..سلام توا..
رزان:سلام..
وصكرت غاليه من هني..
خشت سعيده من هني...
🍁🍁🍁🍁
وهو يسوق فسيارته العائليه المريحه اللي شراها خصيصا لهالسبب..
كان يشوف في المرايه لنساوينه الزوز المقعمزات وراه بالزبط..
بنته الكبيرة اللي كانت مقعمزة جنبه كانت تشوفله وهي شاده ضحكتها..
وهو كذلك نفس الشي اللي كان يشوف فنساوينه كيف كل وحده تشبح للروشن وهي رافعه حاجبها..
في النص كانت مقعمزة سهى..
وفي الخلف الأولاد اللي كانوا متفاهمين احلى تفاهم عكس امهاتهم..
خش للقطعه..
لمحه محمد وهو خاش للحوش..
ضحك..
وخش داخل..
شبح لخواته وهما يهدرزوا قال:عائلة الحاج متولي وصلوا..
كلهم:ههههههههههههههه..
فاطمه بضحكه:اسكت
ومحمد يضحك وخلاص
برا..
درس حميد ونزل
ونزلت رفقه بعدين غزلان ولطيفه..
والصغار..
طلعلهم محمد وقدم لخوه وعيد عليه..
بعدين عيد ع نساوين خوه وبنات خوه..
غزلان ورفقه ولطيفه ومعاهم سهى..
خشوا للحوش..
كلهم اول ماشافوهم جايات مع بعض..
كتموا ضحكه لو طلعت كانت حطتهم فموقف محرج..
بس كلهم نجحوا فتمالك انفسهم..
وعيدوا عليهم عادي جدا وكأنه امر طبيعي ومتعودين عليه..
بعدين قعمزوا وبدوا الهدرزة..
ماعدا غاليه اللي خدت رفقه معاها للسقيفه..
غاليه؛عدي جيبي رزان واقنعيها تقعد هنى معاكن..
رفقه هزت راسها بإيجاب..
حطت الوشاح ع راسها وطلعت..
وهي ماشيه .
خش مروان للممر وهو قايم الحافظات متاع الحلويات..
هي تجاهلاته تماما..
وفاتت من حداه وكأنها ماتعرفاش..
وهو حاول يظاهر بهكي..
وكمل طريقه لين خش للحوش..
🍁لما وصلت لحوش عمها وقفت وشافت ايمينها ركزت ع سيارات ولاد عمتها تأكدت ان عماد مش موجود..
بعدين مشت خشت للحوش..
لحظات..
وطلعت رزان مع رفقه..
ومشوا لحوش جدهم..
خشوا..
رزان عيدت ع عماتها ونساوين عمها..
قعمزت 3دقايق بالزبط وناضت..
كفايه اضايقت ع اخر..
وامها كذلك..
وباقي الموجودين فهموا عليها ومابي حد يكلمها..
ماعدا رفقه اللي غمزت لنور..
والزوز مشوا طلعوا وراها..
لحقت عليها رفقه وشدتها من مرفقها:رزان..
رزان التفتت وقالت:خيرك..
نور؛بتقطعي حوش جدك ع خاطره؟!..
رفقه؛حتى وهو مهناش ماتبيش تقعدي؟..
رزان قعدت تشوف للفراغ بحزن وهي شاده دموعها..
رفقه:روزي..
رزان حست بروحها مخنوقه..
حولت وشاحها وقعمزت وحطاته حداها وهي تقول:مانبيش ننحط في موقف خيي مانبيش..
نور:زي قبل يارزان خليك..اعتبري عماد مجرد ولد عمتك بس..
رفقه؛مثلي ياستي تمثيل وعيشي الدور كله يمشي..ولا تقعدي بروحك فالحوش مبومه..
نور:ياسرك نكد وتعالي..قربت منها وخدت يدها وقعد تجبد فيها وهي تقول..هيا عاد..
رفقه ضحكت ودارت زي نور وهي تقول؛هيا نوضي خشي بالطيب خير مانحدفوك داخل حدف..
ضحكت غصبت عنها..
وناضت معاهم..
ضحكوا..وخشوا هما وياها داخل..
💕هو اللي كان يراقب من ورا الحيط..
كان مبتسم بعشق..وقلبه يرقص من فرحته لأنه راها..
تنهد..
بعدين مشي بصندوق المشروب اللي كان قايمه..
مشي خش بيه داخل..
شاف اللي داخل مالقاش رزان مقابله..
اضايق..وخش بالصندوق للكوجينه..
حطه..
وين جي طالع..
التفت ع امل يشوفها..
لكن شي..مازالت مش موجوده..
طلع برا..
وقدم طول للوشاح..
خداه..ومشي وهو مبتسم..
قربه لأنفه وقعد يشم فريحتها..
بعده وقال:اااخ ياقلبي ااخ ااخ..💓..
ومشي بيه طول لسيارته بدون مايلاحظه حد..
🍁🍁🍁🍁
الساعه 1:00ظهرا..
في المربوعه الخارجيه الرجاله الكبار هدرزة ع وضع البلاد بس..
اما المربوعه الداخليه..
الولاد كانوا منطرحين وراقدين..
روتين رمضان وتأثيره..
بس الباين انه مأثر عليهم كلهم ماعدا واحد فيهم..
سند وهو شاد ضحكته وقف حداهم..
و دار تليفونه ع وضعية السلفي..
خدالهم صورة وهو معاهم يضحك..
وهما رايحين في النوم..
بعد خداها شافها وقعد يضحك بكتمان..
ع منظر عماد بالذات وهو راقد..
طول نزلها الصورة ع الفيس والأنستا ودارلهم كلهم تاقات.
وكتب فوقها..
سلفي قدام وحده من المقابر الجماعيه..
ونشر ..
بعدين شبحلهم ..
ضم شواربه لداخل وهو يشد فضحكته..
وبهدوء انسحب من المربوعه...
وطلع...
🍁🍁🍁🍁
واقفات في الكوجينه يهدرزوا..
نهارها معجعج!!
غاليه ضحكت..
نعيمه:مصح وجهها وخلاص..
زينب بضحكه:غير جت مرت خوه كان لطها كف..مجرائها..
نعيمه:باهي مرام شن ردت فعلها..
غاليه:طارتلها..قاتلها اكيد عمر مخبرك عن طبعه..
كفايه ؛شن ردت هي؟..
غاليه:قاتلها ماشيه فلساني..
زينب:قصدي مش عارفه كيف امها مش معلمتها مش موريتها ان في حدود بين الكنه وسلافها!..
غاليه:ربي يهدي وخلاص..
نعيمه:اي والله..
سكتوا شويه..
بعدين قالت زينب:شن صار فحماتك نعيمه قاعده حرجانه..
نعيمه بضحكه:جي ردها ليلة العيد..
ضحكوا ..
في الدار..
رباب:بنجيب هني
لطيفه:كان تجيبي فطرابلس خيرلك يارباب..
رباب:علاش..النساوين قاعدين كل يوم يجيبوا هني..
لطيفه:انتي قلتي مرات بالعمليه وفطرابلس أمنلك..
رباب:حتى هني في عيادات باهيه مرت خالي..
غزلان حست ان رباب منحرجه..
ورانيا كذلك..
دلال:ايه صح عندها لبكري خالتي حميده تحكي ع وحده من الجارات هني جابت بالعمليه وامورها تمام..وبضحكه قالت..مش عملية قلب هي..
لطيفه:ع راحتها فالنهاية..اني حبيت ننصح بس..
رباب:مشكورة..
غزلان قعدت ساكته طول النقاش ماتبيش تقول شي مخالف لضرتها بش ماتشدهاش عليها وتشكي منها لحميد..
🍁🍁🍁🍁
آسيا:من جابهالك؟..
روان:بابا..
شبحت اسيا لحنين وقالت:وانتي من جابهالك..
حنين؛خالو هاني..وانتي..
اسيا:جدو..شبحت لروان وقالت..من شرالك حوايج العيد؟..
روان؛بابا..
اسيا:وانتي..
حنين:واجد واجد جابولي..حموتي..وخالو هاني..والمارت..
اسيا :مارت؟!!
حنين:ايه عمات..
اسيا:اه...اني جدو شرالي زوز..
روان ببراءه:انتم..ماعندكمش.. بو ؟
اسيا وهي تمسح ع شعر لعبتها حركت راسها ايمين ويسار بالنفي..
حنين:اني عنتي..هو شرير..ومايحبناش..
اسيا شبحت لحنين:شرير؟!..
حنين:ايه زي الأشرار اللي فالرسوم..
قعدوا يشبحولها اسيا وروان..
وهي تنتف فشعر لعبتها لما قعدت تحكي عن بوها..
هداكله كان ع عيون جواد
الطفل اللي عقله سابق عمره..
روان:فسدتيها..
حنين ضربت روان ع يدها بقوة..
روان حطت يدها ع ذراعها ودموعها طول نزلوا..
مجد:علاش ضربتيها؟..
حنين:مادخلكش..
اسيا:حرام..
حنين:لاا احسن..
مجد يشوف لروان كيف تبكي قال:انتي وحده شيطانه ياحنين..
حنين:برا يا &$^*¥¥"سبت الدين"..
اسيا حطت يدها ع فمها..
مجد:قليلة ادب..
حنين قعدت تشوفله بغضب وفمها متقوس ودموعها ينزلوا..
مجد:خزي عليك ياشيطانه..
حطت حنين ايديها ع عيونها وقعدت تبكي..
جواد:مجد ..
مجد؛ضربتها وسبت..
جواد:خلاص حنين معاش تبكي..
وحنين مازال تبكي..
اسيا وقفت وقالت؛لالا عيب انتم خوات..معاش تتعاركوا..
مجد:اتبع فنور..
اسيا شبحتله بقرنة حواجب:اصص يامزعز.."مزعج"..
جواد بضحكه:مزعج مش مزعز ياجبنة صفرا..
روان وحنين ضحكوا ع اسيا ونسوا انهم كانوا يبكوا..
اسيا بغضب؛نو نخبر فيك ماما..
ومشت بعصبيه لامها..
والبنات يضحكوا عليها وجواد ومجد يشوفولهم..
"جواااااد"..
جواد ضحك ومشي لأمه...
ومجد وراه بش يدافع عنه قدام دلال...💖
🍁🍁🍁🍁
الساعه 2:30ظهرا..
في الكوجينه..
كانت غاليه تسقي في الغدي والبنات يعاونوا فيها..
خشت عليهم رفقه تجري بتليفونها وهي تضحك قالت:شوفوا العار!
طلقوا اللي في ايديهم وجو حداها..
وقعدوا يشوفوا..
غاليه :حييي هدي مش مربوعتنا؟
رانيا بضحكه:وهادو مش ولادنا؟!
رباب:ههههههههه عماد ههههههههه..
ركزوا عليه غاليه ورانيا وقعدوا يضحكوا..
ورزان كان تمصمص في الكواشيك وعندها فضول شديد تشوف..
ع خشة دلال اللي قالت وهي تضحك:ريتوا سند شن داير!!
غاليه التفتت وقالت بضحكه:حي عليه منهم حي..
......
ماشي هاد زي الوحش وفيده تليفون وهو يتحلف..
محمد بغضب:نهاره اسود اليوم..
عماد:غير يطيح فيدي..رفع سبابته وقعد يقول..اسمع حمزة خليك بعيد..
حمزة بغضب:بعيد شني تي اني بندير فيه احرف من اللي فروسكم الحيوان ضحك عليا قروب القرايه والخدمه..
مالك بضحكه:الحمد لله من يوم يومي نعرف نرقد حتى رقادي فيه هيبه..
شبحوله بنص عين..
وحمزة قال:عماد...
عماد:ليك الإذن..
ومالك يضحك وخلاص..
وصلوا في باب المربوعه الخارجيه..
فتح محمد الباب..
كلهم شبحوله..
محمد وهو يشوف لسند اللي كان مقعمز بين حسن وميلاد:تعال ترا..
سند وهو يحاول يشد ضحكته:عندي موضوع مهم ندوي فيه مع الخال حسن..
محمد:معليشي ياحسن 5دقايق..
حسن:مافيش مشكله..
ميلاد:عدي شوف خالك..
خيري:تي نوض تحرك..
سند وزع نظره عليهم..بعدين بلع ريقه وناض وهم مبتسم بربكه قال:حاضر..
قدم لخاله محمد وهو مركز ع الغضب اللي فعيونه قال وهو يضحك بخوف؛مرحب بالجنه جت تدنى..
وصل فيه..
محمد حط يده ع كتفه وطلعه برا..
وصكر الباب..
ويتلقاه خوه...
يجبده مع رقبته وهو ضاغط..
وسند ميت بالضحك..
حمزة:تخفف فدمك ..
محمد بتهكم:يامتاع المقالب..
اما عماد فكان يخض فشيشه مية مخلطه بالتراب..
بعد كمل جاه وقال:مقبرة جماعيه صار..
سند فنص وقاال:لااالاالالااااا..
فتح الشيشه وصبها ع راسه...
🍁🍁🍁🍁
هههههههههههههههههههه...
رباب بضحكه:ههههههه ياربي وووك..بنجيب خلاص..هههههه
دلال بضحكه:انتي غير شوفي شن مكتوب فوقها!!
نور بدموعها:يانااااري عليه هههههههههه...
رانيا بضحكه:سند كله الا شعره..
ضحكوا ..
غاليه بضحكه:باهي اللي جاته ع هكي..
ع خشة مروان وهو يضحك:غاليه..
رفقه تجاهل تام تشبح للصورة وتعلق وخلاص..
غاليه بضحكه:حضرت شن داروله..
مروان بضحكه:تس كنت فالسيارة لما مشوله..بعدين الحمد منظري كان عادي بيناتهم..
رباب:صح انت ومالك عاديين..حمزة ومحمد وعماد هما اللي فضيحه..بالذات عماد ههههههههههه..
ضحكوا كلهم..
غاليه بضحكه؛تعال ارفع الصفرة هدي واضبح ع الباقي..
مروان :باهي..وقدم للصفرة خداها وطلع..
وبعده طول طلعت رزان...
هي فاتت من باب المروحه من هني..
خش عماد من فم البوابه من هني..
طول للكوجينه..
وخالته والبنات يناشبوا فيه ويعلقوا عليه وهو كان يضحك مجامله يحساب روحه بيلقاها في الكوجينه بس للأسف..
هاربه كالعاده..
......
ع الغدي..
رباب تحكي لأمها:صوروه وكتبوا فوق صورته..حصريا القبض ع أحد المرتزقه المتسللين..
زينب وهي تضحك؛ياناري ولدي..
اسيا حداهم كانت تسمع قالت:ضربوا سنودي؟!!.
دلال بضحكه؛يبصروا عليه سنودك ياحنه..
ضحكوا..
اسيا:حي عليهم كان ضربوه..والله..نضربهم برشادات..
ضحكوا عليها..
كفايه بضحكه:ماغالي علينا سنودي..
دلال:شبه يوميا يكلم فيا ع خاطرها يقولي عطيني بنيتي نكلمها💕..
زينب:حتى منين طلعنا للسوق خدالها حاجات راهو..
اسيا:حقه!!؟..وينهم..
ضحكوا عليها..
دلال :تغدي توا واسكتي..
اسيا قرنت حواجبها وقعدت تاكل بغضب..
وهما يضحكوا عليها..
🍁🍁🍁🍁
العشيه..
الساعه 6:00مساءا..
تسقد عبدالسلام بنعيمه والحاجه فاطمه ودلال والصغار لحوش عيت الحاج مختار
وصلوا غادي واستقبلوهم كعادتهم بحفاوة وحرارة..
في المربوعه..
مختار الحفيد؛قصدك الطرف هديكا سرتاويه!..
عبدالرزاق بضحكه:ماشاء الله عليها كبرت..
اسيا اشرت عليهم وقالت:هادو منو؟
الحاج مختار؛ماتعرفيهم؟..
اسيا وهي تحرك فسبابتها بالنفي:لالا...
عبدالرزاق بضحكه:هي كلها مرة وحده اللي رتنا فيها..
مختار الجد قال بإبتسامه :هدوم ولاد عمك محمود..
اسيا ركزت ع كلمة عمك:عمك؟!
معمر:عمي محمود مات من زمان ..
ايمن وخوته تبدلت ملامح وجوههم للحزن..
اسيا:حتى هما ماعندهمش بابا..
مختار الجد شبح لعبدالسلام..
عبدالسلام :اسو حبيبتي احكي لجدك ع ببغاء..
اسيا ارتسمت ع وجهها ملامح الدهشه وقالت؛حييييي..انتصل بعمو مروان جدو شوفه عطاه ميه ولالا..
ايمن بضحكه:انتصل!!
ضحكوا..
واسيا نزلت عيونها لوطا بخجل..
داخل...
كانوا امينه وهندا مع نعيمه والحاجه فاطمه يهدرزوا..
وفي الكوجينه..
دلال مع عزوزتها..
دلال بتردد؛عمتي..
كامله اللي كانت واقفه ع الغاز وهي اطيب فالقهوة التفتت:نعم..
دلال:احمم..عمتي..معاش دورتوا..
كامله شبحت للبكرج بحزن وقالت:عمك قالي اقطعي الأمل..
دلال قلبها انقسم لما سمعت الكلمه..
ملامح وجهها كانت مزيج من الغضب والألم..
الأمل اللي فداخلها هي بادي يكبر..رافضه تخليه يموت ورافضه تقطعه..
ركزت ع عزوزتها كيف مسحت دموعها..
غيرت عيونها عنها وكملت تجهيز الصفره..
🍁🍁🍁🍁🍁
"يسبح له مافي السماوات والأرض وهو العزيز الحكيم"..
مختار الجد:ماشاء الله تبارك الله..تعال ولدي تعال..
ناض جواد لجده ..
حضنه مختار بقوة وهو يقول؛تبارك الله..
أيمن:بارك الله فيك ياعمي عبالسلام مربيهم احسن تربيه..
ابتسم عبدالسلام..
مختار الجد؛صدق..وصدق عمه لما قالي قبل يعدي لو صارت فيا حاجه خليها عند باتها وردوا بالكم تاخدوا العويل منها..عرفت توا ليش قال هكي..
عبدالسلاك تنهد بإبتسامه الم وقال:الله يرحمه..
كلهم قالوا بعده؛الله يرحمه..
معمر بغيره؛حتى اني بنخش الجامع راهو..
آسيا شبحت لجدها عبدالسلام:واني ؟..
ضحكوا..
عبدالسلام بضحكه؛حاضر ياجدو كان تبي تخشي ندخلك..
اسيا:ايه نبي نبي..
مختار بضحكه:تحسابيه ملاهي..
اسيا شبحتله بحده..
هو رفع حواجبه..
اسيا بحده؛نعرفه جامع يقروا فيه في القران..
كلهم:ههههههههههه..
مختار عض ع شاربه وهو يضحك..
🍁🍁🍁🍁
فم البوابه..
رانيا تتكلم بالتليفون؛تمام استاذ......عيدك مبارك....سلام...
وصكرت..
كيف جايه بتخش..
"رانيا"..
شبحت ايسارها لقت خالها حميد جاي من بعيد..
حميد؛بالله بنتي ضبحي ع مرت خالك..
رفعت رانيا حواجبها وهي تضحك قالت؛اما وحده..
حميده ضحك واشر بصوابعه السبابه والوسطى..
ضحكت رانيا وقالت؛شويه بس..
مشت خشت داخل..
وصلت للصاله اللي كانوا ملتمين فيها كلهم..
رانيا:غزلان..
شبحتلها وقالت:نعم..
رانيا:احمم..خالي ..واشرت براسها جهة البوابه..
لطيفه شبحت لغزلان بحده..
وغزلان ناضت ومشت..
فاتت من حدا رانيا..
ورانيا مشت قعمزت حدا خالتها غاليه وهي تشوفلهم كيف يشوفوا للطيفه..
شوي طلعوا رفقه مع رزان من الدار وهما يضحكوا..
رفقه؛صورة الولاد وهما راقدين انتشرت في القروبات..
رزان:كاتبين فوقها..شاب ليبي يلتقط سليفي لأقاربه وهم فالغيبوبه..
كفايه؛بعيد السو عليهم من الغيبوبه..
رباب بضحكه:خالتي يقصدوا النوم اللي يكبس ع الناس بعد رمضان لما يتغير عليهم الروتين..
كفايه:عارفه..لكن رعشت منين سمعتها..
زينب ضحكت وقالت:وحده فيكم تنوض تفرق الشاهي..
رفقه :اني..
مشت لعمتها حدا العاله..
ورزان قعمزت وفيدها التليفون فجنب خالتها حميده..
حطت راسها ع كتفها..
وحميده شبحتلها وابتسمت..
"السلام عليكم"..
جمدت رزان..
حميده بهمس:خليك عاديه..
رزان قعدت ع نفس وضعيتها وهي تحاول تتماسك..
واللي حواليها توجهت انظارهم ليها..
عماد مشي طول قعمز حدا خالته زينب..
ومحمد اللي جي معاه مشي قعمز حدا حنين وروان وقعد يناشب فيهم..
عماد عيونه اللي كانوا يدوروا طاحوا عليها..
قريب طار من فرحته..
ملامح وجهه بانت فيهم الفرحه..
وغاليه وامه مركزين عليه..
تنهد وقال :الجو قنين اليوم..
زينب:ايه برودة..
غاليه:شهر7ديما هكي فيه نهارات باردة..
وصلت رفقه فعماد ومدتله الشاهي..
درقت عليه رزان..
عماد:مانبيش..
رفقه شبحتله بحده بعدين مشت لعمها محمد..
وهو عيونه الملهوفه عليها..
وهي مازالت بنفس وضعيتها..
رزان"لازم نحسسه انه مش مهم عندي خليك عاديه كيف ماقالت عمتك"..
خدت نفس..وساوت تقعميزتها وقعدت تقلب في التليفون عادي وعيونه عليها..
وصلت فيها رفقه..
خدت رزان طاسة شاهي احمر وكعكه ملونه وبدت تشرب وتاكل عادي..وهو يشوفلها..
رفقه بعد كملت تفريق جت بتولي بالصفره حدا عمتها..
عماد قال؛ترا جيبيها جاي..
رفعت رفقه حواجبها..ومشتله مدتهاله..
قعد يدور بعيونه فطاسة شاهي احمر من بين الخضر مالقاش..
خدي كعكه ملونه وقال:زنوبيا كان مازال في شهر احمر صبي..
شبحوا غاليه وحميده لرزان اللي وجهها ولا احمر..
اما رفقه فكان خاطرها تضربه بالصفرة ع راسه..
محمد:سمعتن بولد عمكن سليمان؟..
رزان شبحت لعمها بخوف..
كلهم قالوا بأصوات متقطعه:خيره؟..
محمد بضحكه:خدي ع مرته..
انصدموا كلهم
ولطيفه انحرجت..
ع خشة غزلان وهي مبتسمه..
شبحولها..
وهي مشت قعمزت حدا كفايه..
زينب بصدمه ممزوجه بالفضول:غبارته المغبرة..مرته شن ناقصها بش يدير هكي..
حميده:موضه موليه الحكايه..
محمد كيف جاي بيتكلم..
غاليه اللي كانت تبي تغير الموضوع قالت بصوت عالي:سمعتوا بولد برقه!!..
شبحولها كلهم:خيره!!
غاليه بضحكة مرتبكه:بيدير عمليه ع كراعه..
ضيق محمد عيونه..
غاليه:مرات يبتروها..
كفايه:اللطف!!؟ليش؟
غاليه:ماندري..
محمد:منك نسمع..
غاليه هزت راسها بإيجاب وهي فقمة الإرتباك..
والبنات شادين ضحكتهم زبطوها كذابه..
فجأة..
رن تليفون كفايه..
شافاته وهي تضحك..
تلاشت ضحكتها ووجهها تغير..
حطت طاسة الشاهي..
وتنحنحت بعدين فتحت الخط وردت:ايوه.........الحمد لله..............تسلمي...........اممم..
كلهم قعدوا يراقبوا فيها حسوها ملخبطه..
وعماد كان يمضغ ببطئ وهو يسمع..
وزعت كفايه نظرها ع البنات وقالت:هي شوي..
مدت التليفون لزينب وقالت؛سناء بتعيد عليك..
تلقائيا رزان شبحت لعماد..
لقاته يشبحلها بضيق ممزوج بالغضب..
هي غيرت عيونها عنه ودارت روحها عاااااديه...
ولاكإن الامر يعنيها..
بس اللي داخل ربي بس اللي يشوف فيه💔..
🍃ماأصعب التظاهر بالقوة والثبات وحني من داخل قاعدين ننهاروا وندمروا🍃
قعد هداكا التليفون يتناقل بين زينب وحميده وغاليه وكل وحده فيهم كانت تجامل مجامله..
وعماد عيونه ع رزان وبس..
رفقه تبي ادير شي بس ماقدرتش حتنفهم حركتها...
وغاليه نفس الشي..
فهالوقت التصرف المنقذ لرزان جي مش شخص غير متوقع..
"رزان"..
رزان:سيدي ولا؟..
غاليه:صبي فيسع..
ناضت رزان بسرعه مشت لفم البوابه..
وعيون عماد عليها..
ميلاد:عدي لحوش جدك عبدالله بنت خالك روحت..
رزان:حاضر..
ميلاد:خيره شعرك عريان؟!..
رزان ماعرفتش شن تقول وشاحها معاش لقاته ع قد مادورت عليه وانحطت فموقف خلاها تنسى تلبس حاجه ع راسها..
ميلاد مط شورابه لداخل بغضب بعدين قال؛غاليه..
شويه وجاته..
غاليه:نعم..
ميلاد:عطيها وشاح تلبسه..
حولت غاليه اللي ع كتافها وعطتهولها..
خداته وهي تسمع فبوها يقول:اخر مرة تقعدي هكي ..واخر مرة تجي هنى والزفت هدى قاعد..
رزان بصوت مخنوق :حاضر..
ميلاد:تحركي قدامي..
مشت رزان وهي شاده دمعتها بالسيف وبوها وراها..
غاليه تنهدت بضيق والتفتت..
جت عينها فعين عماد..
حركت راسها ايمين ويسار وخشت للكوجينه..
مشت للطرمس ..
خدت الطاسه وصبت ميه وقعدت تشرب وهي مضايقه ع الآخر..
بعد شربت حطت الطاسه والتفتت لقت عماد واقف فالباب وهو عاقد حواجبه قال:خيره خالي..
قدمت غاليه وقالت:عماد..لما تكون رزان هنى معاش تخش..
عماد قعد يشوفلها بنظرة عين حاده مليانه دموع..
كملت غاليه تقول:معاش تخلي سناء تغيب عن بالك..ماتخليهاش هي اللي ذكرك ديما انك خاطبها..
غير عيونه عن خالته وشبح للروشن..
بعدين لف وطلع مرة وحده..
اما غاليه تنهدت ومشت طلعت من الكوجينه..
🍁🍁🍁🍁
كيف عرفتي انها عندهم..
لمياء بضحكه؛كنت نكلم فغاليه ونسأل فيها ع الأجواء وقلتلها من في هي سمتلي اللي قاعدين كلهم..
سناء بضيق:زعما عماد كان حداهم..
لمياء:ماسمتلي حد من الولاد..لكن ماظنيش كان معاهم..
سناء؛إن شاء الله..
لمياء بإبتسامه؛ماتخمميش واني معاك وراس رويسك ياسنو لما نخليك تنسيه رزان وسنينها..غير اصبري عليا..
...يتبع..
"اي تعليق بنلقى فيه كلام يقول انها ولت مملة واحداثها بطيئة بنحظر طول ماحد جابرك تقريها وتكسريلي رقبتي بتعليقك"
