المتمردين

العشق المتمرد

#العشق_المتمرد 'اختبار"

#جمان_فريد

الجزء 107 القسم الثاني

🌟..
واقف حدا السيارة وهو يبربش فتليفونه..
اصيل:شكللهم مازالوا معطلين..
"اااااااااااه ..تعاااالولنااااا"
قام عيونه وهو فاتحهم ع وسعهم..
"شنو فيي؟!"
شبح يمينه لقي حسن واقف فوق السطح ...
.....
يجروا التلاته والبقرة وراهم....
ويعيطوا ع طول حسهم..
وصلوا ممر فم البوابه..لقوا لمياء فطريقهم..
غاليه بصوت عالي:خششيييي..
لمياء وهي مخلوعه لفت وطول جري للبوابه خشت..
خشت بعدها سعيده..
لكن رزان ماقدرتش تغير اتجاهها وتخش..
قعدت تجري وتعيط والبقرة وراها..
لعند ماطلعت من الجهة التانيه..
سعيده بعيطه:بنتي!!
طلعت تجري..
وغاليه من الخلعه داخت ولمياء قعدت تعاني فيها.
🍁رزان لما كانت تجري
عترت فطوبه مكسرة..
جت طايحه ع يدها..
والبقرة جايتها..
لولا تدخل اصيل اللي جاها يجري..
وهو يجري نزل يده خدي تراب من الوطا..
وبسرعه حدفه ع عيون البقرة..
بدت تنقز فمكانها..
بدون مايحسب حساب لشي..
نهض رزان ورفعها لسيارته..
فهاللحظه..
البقرة بسبب حالتها زادت هاجت..
ووخرت ع سعيده اللي كانت تبي توصل لبنتها..
ضربتها برجلها طيحتها..
اصيل وهو يحط فرزان فسيارته..
انخلع لما عيطت رزان وهي تقول:
"ماااااامااااا"
كادت البقرة وقتها ترفس سعيده..
اللي كانت مقعمزة تشوفلها ومستسلمه لمصيرها..
تشهدت سعيده وقتها ودموعها ينزلوا..
واصوات العياط معبيه الدنيا...
عياط بنتها..
وبنت خوها اللي كانت تشوف من فوق السطح..
ورباب من البلاكونه..
وسميه من روشن الكوجينه متاع حوشها...
اخترق اصوات العياط هادي..
صوت رصاصه..
خلت البقرة فثواني..
تجي طايحه بقوة ع الأرض...
كلهم ابصارهم توجهت ناحية اللي اطلق هالرصاصه..
هو نزل كلاشنه ومشي يجري لأخته..
وقف عندها..
حسن:سعيده!
سعيده معاش قدرت تتماسك زياده ع طول فقدت وعيها..
🍁🍁🍁🍁
الساعه 7:30مساءا..
نهار اسوود!؟؟
غاليه ببكي:توا التريس يتعاركوا برا وصايرة حال ياكفايه..
كفايه بخوف:كان مايبدوا فبعضهم بالسلاح؟!
غاليه:هدى اللي مخوفني ..وفوق هكي ماني عارفه شن صار مع رزان وامها اللي قاعدات في المستشفى لتو..نتصل بالأولاد مافي واحد بي يرد عليا..
كفايه بقلق:يلطف بيكم ربي ياكبدي عليك مصيبه غبرة وخلاص..
ع خشة سعد ومعاه عماد..
سمعوا اخر كلامها الزوز خافوا..
سعد :شن في!!؟
كفايه:باهي غاليه كان صارت حاجه خبريني.
غاليه:باهي باهي..
صكرت كفايه بعد صكرت غاليه..
شبحت لراجلها وقالت بخوف:تذكر البقرة اللي حكتيلك عنها..
سعد:راك تقولي خشت لقطعة ماليك!؟
هزت كفايه راسها بإيجاب وهي تمسح بإيديها ع فخادها..
عماد بخوف:ايه..وشن صار!؟
كفايه بلعت ريقها وقالت:هاجت فجرة سعيده ورزان وغاليه..
عماد قلبه قريب وقف..
كفايه:قريب راحوا فيها سعيده وبنتها..
عماد بهلع:كيف..رزان..خيرها...شن دارتلها..تكلمي يااام...
قال اخر كلمه بصوت عالي وعصبيه شديده..
كفايه تشبحله وعيونها معبيات دموع:في المستشفى مش مع...
مالحقتش تكمل كلمتها الا وعماد طالع من حداهم يجري..
ناضت امه ولحقاته مع بوه..
سعد:وين ياولد الدنيا ليل..
عماد فتح الباب وهو يقول بعصبيه:فوتوووني..
طلع وقربع وراه الباب..
سعد رفع ايديه شويه بعدين رجع نزلهم وخبط رجليه بقلة حيله..
وكفايه بخوف وهي تمسح فكفوفها ببعض من التوتر قالت :ياحليلي اني وخلاص..
🌴🌴🌴🌴🌴
في المستشفى..
الدكتور:الشابه الصغيره صارلها كسر فالذراع..وجروح في منطقة الركبه لرجليها الزوز..وبالنسبه لأمها..فحنديرولها صور اشعاعيه ع العمود القفري بش نتأكدوا من وجود الكسر اوعدمه..
توفيق خبط بيده ع جبهته..
اصيل حط يده ع كتف توفيق وقال:إن شاء الله مافي شي..
الدكتور:نتمنوا..ع العموم لاباس عليهم..
ومشي..
رد عليه اصيل:لايوريك باس..
التفتت لتوفيق وقال وهو يمسح ع كتفه:مافي شي إن شاء الله..
توفيق:الكسر في العمود الفقري مصيبه يااصيل..
اصيل:الله يكفينا شر المصايب..خليها ع الله وإن شاء الله حتجي بسيطه وقول اصيل قالها..
توفيق:يااارب..
🍁🍁🍁🍁
ارواح بشر كانت حتزهقن بقرتكم هدي..مستوعب انت!؟
محرز ولد برقه:هدى مايبرر اللي درتوه فرزقنا..
ميلاد بغضب:شن تقول انت شن تقول!!؟عيالي وبنتي قريب عدوا فيها..وتقول مايبرر!!
حسن بنفس الغضب؛الذنب راكبكم كله بقرة مريضه هايجه تعدت ع حياش الناس اكثر من مرة وضرتهم ومادرتولها حل..تحملوا نتيجة هزوتكم..
جارهم:عندهم الحق يامحرز الناس اللي ضرتهم واجد وع قد مانبهناكم شي لامصنتين دوة ولامعدلين..
ميلاد وهو يأشر:اني توا..اني...مفروض نشكي فيكم..
جمعه "اب بلقيس":عندك كامل الحق..
هز محرز راسه بإيجاب وهو يوزع فنظره عليهم وقال:باهي..بااااهي..شبح لخوته وقال..هيا..
ولف ومشي وخوته وراه وتوجهوا لبوابة االقطعه الخلفيه..
ميلاد:فستين داهيه..
🍁🍁🍁🍁 
في الطريق..
يسوق باقصى سرعه..
السيارة ع وشك تتحول لطيارة..
تعارك مع خلق الله فالطريق...وفي اللي طنشهم ع قد ماسبوه المهم يوصل..
اول ماخش بسيارته للبلاد اتصل بخاله..
نادى مرتين بعدين انفتح الخط..
عماد:هاه محمد..شن صار!؟
محمد:توا كيف روحت ولقيت الدنيا منقلبه عماد:باهي..واللي فالمستشفى!؟
محمد:توا بنعدي غادي اني وخالك وميلاد ونشوف شن صار فيهم..
عماد هز راسه بإيجاب وهو يقول:باهي باهي..
صكر ..ولوح التليفون ع الكرسي اللي جنبه..
سمع صوت كلاكس..
شبح قدامه كانت شاحنه جايه..
بسرعه..
تجاوزها ونجي بلطف الله..
زفر بقوة..
بلع ريقه وكمل طريقه...
🍁🍁🍁🍁
رفقه..
كانت رفقه مركزة مع شيتها تقرا..
التفتت لأمها وقالت:نعم ماما؟
خشت لطيفه وهي تقول:شن جو..
رفقه:مليح..
قعمزت لطيفه ع سرير بنتها وقالت:ماهدرزتيش ع مشوار امس..
رفقه رجعت شافت للشيت وقالت:مش مهم..
لطيفه بشي من الربكه:انتي قبل مادرقي فشي كل شي تحكيلي فيه..
شبحتلها وقال:اني نحكيلك في المهم بس وطلعتنا امس مش مهمه..
لطيفه:اممم باهي..
ناضت وقفت وهي تقول:تبي تتعشي؟
رفقه بإستغراب:ايه بعدين شويه ندير ماناكل..
لطيفه بإبتسامه؛لا اني تو نديرلك..شن خاطرك!؟
رفقه وهي رافعه حواجبها:شاورما..
لطيفه:اممم..باهي تو ندير للكل..
ومشت طول طلعت من دار بنتها..
رفقه:ماما باديه تتغير...ضحكت..بعدين ولت تشوف للشيت متاعها وهي تحرك فراسها ايمين ويسار..
🌴🌴🌴🌴🌴
وصل للمستشفى..
درس السيارة ونزل بسرعه..
طول خش للمستشفى..
سأل عنهم في الإستعلامات دلوه وين..
وبسرعه توجهلهم..
....
بارك الله فيك ياولدي ربي يحفظك..
اصيل بإبتسامه احراج:واجبي ياخال..مش بجميلي..
توفيق:لا بجديات يااصيل تعبت واجد..اليوم جيت من المطار طول هنى تجري بيش اتم موال حوشكم..وبدل ماتروح ترتاح لقيت روحك تجري من جديد..
محمد حط يده ع كتف اصيل:عدي روح..حتى خوك نشد عنك..
اصيل وزع نظره عليهم ..بعدين هز راسه بإيجاب وقال:تمام..تو نروح..غير بالله نوصيكم كان احتجتوا حاجه طول بلغوني بالله..
ضحك ميلاد وقال:ياودي باهي غير عدي تريح..
ابتسم اصيل ومد يده وصافح ميلاد وقال:ان شاء الله لاباس ع العيله..
ميلاد صافحه بإيديه الزوز وقال:لايوريك باس..
اصيل حط يده التانيه ع يد ميلاد وهو مبتسم..
🍁وهو من بعيد شوي عيونه ع ايديهم المتصافحه وقلبه قاعد ينحرق...وهو يتخيل فهلبه حاجات..
برغم انه كان جاي مندفع بخوفه ولهفته وناسي كل شي بس اللي يشوف فيه توا رجع ذكره ونوض عليه جرحه..
قعد يسطر بقوة اكثر من قبل..
طول توارى ع الأنظار لما شاف اصيل جاي..
اصيل وهو ماشي رن تليفونه..
شاف المتصل فتح الخط طول ورد..
اصيل:إي نعم..............ياودي هاني مروح بعد اطمنت عليهم....ههههههه..
قعد معاه بعيونه اللي كلهم غضب لين اختفي من قدامه..
نار الغيرة كانت تاكل فيه ماكله..تاكل فروحه مش بس قلبه..
بلع ريقه وهو مغمض عيونه بشده ..
بعدين فتحهم ومشي بيولي من حيث أتى..
🍁🍁🍁🍁
خش للحوش..
لقي ولده كيف جاي بيطلع..
حميد:خير ياطير..
قيس بضحكه:والله هني فراس الشارع مع مؤيد ومعاذ والحتره..
حميد برفعة حاجب:الحتره!؟
ضحك قيس وقال:قصدي عبدالودود يابوي تعرفه
حميد:اها..ايه اذكرته..تمام..الساعه 10ونص تكون هني..
قيس:تم ياراس..حاضر
وفات من حدا بوه اللي كان يشوفله بإستغراب بعد طلع ولده قال:ياراس!!..
بعدين..
ضحك وهو يحرك فراسه ايمين ويسار...
مشي خش داخل شم ريحة الشاورما ابتسم وتوجه للكوجينه..
خش...
اتفاجأ..
حميد:لطيفه!!
التفتت وهي مبتسمه:ياهلا..
حميد برفعة حواجب:غريبه انتي اديري فيها بروحك..مش صحيه راهو!؟
لطيفه بضحكه:زيد تسهوك خود راحتك..
حميد خش وهو يقول:مش تسهويك..استغربت بجديات..
لطيفه بإبتسامه:تغيير..
حميده:تغيير؟!
لطيفه شبحت لسيخ الشاورما وهي تقول:وياما مازال حتشوف..
حميد مط شواربه للأسفل وهو مستعجب بعدين قال:ايه..بنقولك..اليوم صارت مشكله فالبلاد..
لطيفه سيبت اللي فيدها وشبحتله:اليوم كنت عند اختك نعيمه ماقالتلي شي!!
حميد:ع الغالب ماتعرفش..
لطيفه:باهي قولي شن صار....
حميد تنهد بعدين قال:اللي صار....
🍁🍁🍁🍁
نزل من سيارته..
صكر الباب بعصبيه..
توجه جهة ممر فم البوابه..
خش...
وصل في البوابه طق الباب طقتين وقال:غاليه..
شويه..
جت غاليه وهي لامه روحها بشال من الصقع ومربعه ايديها..
وقفت عليه وقالت:عماد..
عماد:شن صار بالزبط..
تنهدت غاليه وقالت:يوم احرف هو ربي مايعاوده..خشت علينا البقرة وهي هايجه ..وقتها كنا حدا الفرن..
هربنا نجروا وهي فجرتنا..
اني ومرت خالك وبنتها...تنهدت تاني وقالت..اني وسعيده فلتنا منها وخشينا للحوش لكن رزان لا قعدت تجري وهي فجرتها..قالولي انها عترت طاحت ولولا اصيل الله يربحه راهو انظر شن دارت في البنيه..
عيونه تعبوا دموع وهو يشوف لخالته بحده سألها :هو اللي رفعها للمستشفى!؟..
غاليه ضيقت عيونها وهي تشوفله:ايه نقلهن جميع هي وامها ماكان في حد غيره هو وحسن وقتها حسن لهي باللي صار والتريس اللي جو وماكان في غيره حد يرفعهن..
ابتسم تهكما وقال:بطل..!
غاليه قرنت حواجبها بإستغراب..
ضحك عماد وقال:جوو والله..
غاليه:خيرك عماد؟!
عماد حط ايديه ورا ظهره وقال:تو بالله هادم مش عندهم بلاد؟!! ليش مايولولها!
انصدمت غاليه فسؤاله
"وليش ياسيدي قاعدين فحوشك؟!"
هو تلاشت ابتسامته الساخره لما شاف جداه جايتاه وهي تشوفله بنظره حاده..
غاليه بربكه:مش قصده يمي..
فاطمه بعصبيه:لاقصده ونص..شنو..تلز فيهم من حوشك ولامن ارضك!؟ياريتهم غير قاعدين فحوشنا هم..!
عماد نزل عيونه لوطا وهو محرج ع الآخر من حناه..
غاليه:يمي راك فهمتي غلط..
فاطمه:لا فهمته صح..يبي ريحة خوي يلتزوا من هنى ويقول يعدوا لبلادهم!!لاياباب حتى هدي بلادهم غصب عنك وعن اللي يقول غير هكي..ايام زمان ايام كنت انت عيل ماتفهم شي..خوي مامنعه عني شي ولا صكر فوجهي بابه رغم انه وقتها الدنيا كانت مع بعضها تغلي
عماد غمض عيونه وفتحهم بعدين قال وهو رافع يده اللي ضام صوابعها لبعض:اسمعيني شوي ياحناي..
قاطعته بعصبيه وهي تقول:ساد اللي سمعته...وبإزدراء كملت تقول..راك مولي خيي عليك..خييي..
غاليه شبحت لعماد..
ارتسمت ع وجه عماد ابتسامة صدمه بعدين قال:صح..صدقتي..عماد توا ولا خي عليه..واععيي..وماينفعش ومعاش يسوى خلاص..صدقتي ياحناي صدقتي..ومشي طلع من حداهم..
فاطمه لفت ومشت ولاعبراته..
اما غاليه لحقاته وهي تنادي عليه..
وعماد مش قادر يسمع شي غير كلمة حناه اللي قاعده ترن فوذنه ولا قادر يشوف غير المنظر اللي شافه في المستشفى..
وصل سيارته فتح الباب وركب..
صكر الباب..
شغلها وتحرك طول..
وغاليه واقفه تشوفله بحزن ..لين مشي وطلع من القطعه..
🍁طول الطريق..
حاس روحه مخنوق وموجوع..
تخلطت عليه من جميع النواحي..
هو توا في أصعب حالاته..
لما فقد رزان..
حس روحه فقد كل شي معاها..
هو من عشقه الشديد ليها..
حس خسارتها بالدنيا...
برغم ان بيده يقدر ينهي كل هالعذاب..
بس خسارة الكرامه وجعها اكبر من أي خسارة..
لهدا هو مش قادر يتراجع..
🍃🍃🍃🍃
خضعت سعيده للتصوير الإشعاعي ع العمود الفقري وتبين انه مافيش اي كسر...
كل اللي صارلها كسر فرجلها لأنها لما جت مقعمزة قعمزت عليها..ورظوظ بسيطه فقط..
طلعوا من المستشفى هيا ورزان ...
وكل وحده مجبسه فيها حاجه....
ومن اول يوم الناس بدت تمشي عليهم وتجي..
طبعا البنات اكتفوا بمكالمات هاتفيه ليتحمدولهم ع السلامه..
ماعدا لطيفه اللي جت مع حميدومعاها بنتها..
🍁🍁🍁
ياقلبي ياروزي..
رزان ضحكت وقالت:ياربي وين يخطر عليا الموقف نقعد نضحك بدموعي..رغم اني فوقتها قريب متت من الخوف
رفقه بضحكه:صح هو بصراحه يضحك..اني لما قالتلي عليه ماما لاعرفت نضحك ولانزعل عليكم..
رزان:هههههههههه وووك عليا يارفقه خطرت عليا عمتي غاليه وهي تعيط وتقول اجرررن..يمين يمين..قدام قداام..تعاااالولناااا .
رفقه:هههههههههههه..
هدت رزان ضحك بعدين قالت:لكن الحمد لله اللي جت على هكي..
رفقه بإبتسامه:ايه الحمد لله..باهي قوليلي شن صار على خاطر قتلت البقرة..
رزان:قصه وشكلها بتكبر..رغم ان خالي حسن قال ندفعلهم حقها لكن مابوش..امهم هي اللي مسكره راسها..تصدقي عيطت عليها ودارت عزي..
رفقه:او ماي قاد!!لهالدرجه!!
رزان:متعلقه بيها ع الآخر..
طق باب دار رزان..
رزان:خش..
انفتح الباب ..
وخشوا حدهم وبلقيس وتغريد..
بلقيس:هههههههه ضحايا جنون البقر..
ضحكوا..
رزان بضحكه:عطيك بقرة تنطحك..
بلقيس :ماخلااص ماتت..
كلهم:ههههههههههه..
بعدين قدموا لرزان سلموا عليها..
وقعمزوا حداها وقعدوا يهدرزوا..
تغريد:اني عديت حكيتلهم ع اللي صارلك واجلوهن للاسبوع الجاي..
رزان بإبتسامه:نجيلي صاحبتي السمحه..
ضحكت تغريد..
حدهم:اسمعي راهو اني اللي اتصلت بيها وخبرتها.
ورشمت عيونها بغرور مصطنع..
رزان بضحكه:ونجيلي بنت خالي السمحه..
ضحكوا..
بلقيس:عليك جو مصدي ديري فيه
ضربتها حدهم ع كتفها..
ضحكوا تاني...
برا...
ليش متعبه روحك وجايه !؟
نجاة بضحكه:جيت نشوف كراعك المكسورة كيف ماشفتي كراعي المكسورة..
النساوين الموجودات شبحوا لبعض..
سعيده بإبتسامه صفرا:ديما دمك خفيف يانجاة بمناسبه ومن غير مناسبه..
نجاه بنفس الإبتسامه:عارفه حبيبتي ديما يقولولي فيها..
لطيفه وغاليه شبحوا لبعض وهما شادين ضحكتهم..
ولمياء تشرب فالعصير وتوزع فنظرها علي نجاة وسعيده..
وسميه حطت في فمها طرف الشكلاطه وشربت وراه العصير وهي تبتسم بتهكم...
وحده من جاراتهم:برقه ماظني تسكت ع اللي صار لبقرتها..
سعيده:اعلى مافخيلها تركبه..
فاطمه:هما الغالطين هما اللي راكبهم الحق..
نجاة:ايه..بقرتهم ماخلت حد فحاله..وهاكن تشوفن شن دارت..
النساوين باصوات متقطعه:صح..صدقتن..عندكن الحق..
لمياء حطت طاسة العصير وقالت:عمي رجب راجل خالتي قال بيخش فيه الموضوع وان شاء الله يوصلوا للحل..
وحده من الجارات:قصدك رجب **** عضو المجلس راجل خالتك؟
لمياء :ايه راجل خالتي..وديما يخش فقضايا زي هادي ويحلها ولا مرة خش فمشكله الا وحلها وصالح بين الطرفين..
الحاجه فاطمه مطت شواربها بملل وهي تشوف لسبحتها وتسبح..
سميه"راجل خالتي انننن..."
سعيده"بدينا"
لطيفه"ياالهي..لاتطاق"
غاليه تشوفلهم وهي شاده ضحكتها لأن من نظراتهم وملامح وجوههم عارفه انهم نازلين فيها مع انفسهم..
حدهم ام سعيده:نقولوا إن شاء الله يخلصنا ربي ع ايديه من المشاكل..
لمياء:ان شاء الله..
برا...
محمد وهو يتكلم بالتليفون:لعند اليوم الجماعه مجتمعين فصالة القبيله............القصه كلها في امهم ياراجل.........ههههههه..اما انت ياهانيبال..........ههههه.........ايه؟.......
قعد يتحرك بالتليفون وهو يوزع فنظره حواليه...لعند ماطاحت عينه ع مراه سمينه لابسه جرد حني جايه تمشي بسرعه ..
محمد:خيرو جت!؟........حي حي.....ايه...
وصلت فمحمد ووقفت وهي تقول بغضب:وينهن؟!
محمد اشر بيده ع حوش خوه ميلاد وهو مرتبك..
شبحت جهة الحوش بعدين مشت بسرعه..
محمد :غير صلي ع النبي ياخالتي برقه..
وبرقه ماشيه ومش معبراته..
من التليفون..
"عدت خيرو لحوش خوك؟!"
محمد وهو يشوفلها كيف خشت قال:عدت...
🍃وماهي الا لحظات وتعالت.الاصوات..
صياح وتكشيخ..
ولحسن الحظ فضيله وصلت في الوقت المناسب..
فضيله:خالتي!!
برقه:الله ماني معديتها واللي درتوه فبقرتي لما نرده..
حدهم وامال بنتها تشد فيها:عدي بلطي البحر...عزوز متلفه..
برقه بتفنيصه:من هي المتلفه يامكركبه ياشبرلو..
وقدمتلها بتضربها غير شدوها غاليه وفضيله..
فضيله:وراس خالتي روحي تربحي..
نزلت راس فضيله من قدامها وقالت؛ولدك حسن هدى كان ماندمناه ع قتلته فيها مانولي برقه ياشبرلو..
حدهم بسخريه:هيييي ريتك لاحقه بقرتك ...
دفت برقه بنت اختها وغاليه بكل قوتها..
ومشت لحدهم وبدوا يضاربوا..
ولان جهامة برقه ضخمه كادت تتمكن من حدهم..
لولا وجود بناتها معاها..اللي كانوا يدافعوا عن امهم ..
سعيده رغم انها مكسورة لكن ناضت تضرب مع امها بقيلتها..
فاطمه:عليك عار عليك كشايف!!
بلقيس بضحكه:شوفوا امي كيف تضرب حتي هي..
ركزوا ع نجاة وسعيده الزوز كيف يضربوا فبرقه بقيلاتهم..
البنات ضحكوا بكتمان..
وبعد جهد جهيد..
بش قدروا الجارات يحزوا برقه عن حدهم وبناتها..
وطلعتها بنت اختها بش تروح بيها..
برقه وهي تحط فطرف جردها ع راسها:والله تندموا الله والله دمها ماهو رايح هبي وتوتشوفوا..
فضيله:خلاص ياخالتي تربحي..
برقه رفعت قفا يدها وقالت:تصكري فمك انتي تو ولاكيف!!
فضيله:باهي حاضر صكرته فمي وهممم...ضمت شواربها لداخل..
وهي شاده فدراع خالتها وتمشي فيها..
من بعيد شوي الولاد يتفرجوا ..
محمد وعمر ومؤنس والهادي..
فاتوا من حداهم..
الولاد غيروا عيونهم عنهم..
بس الهادي كان يسرق فالنظر لفضيله..
وقفت برقه وشبحتلهم..
هما فنصوا..
برقه:وينه هداك الاصفر؟!
محمد بربكه:طار.. قصدي سافر..
برقه بحده:والله دم البقرة ماهو ماشي هكي وتو تشوفوا..
فضيله قريب تتبخر من الإحراج..
مشت برقه وفضيله وراها...
راجوها لين بعدت بعدين...
عمر:ليش نشدت ع هانيبال؟!
الهادي بضحكه:مش ناسيتله تكشيخه عليها نهار تعاركت مع امي..
محمد:ليها 7سنين القصه هدي!!؟
الهادي:لو يعدن 20سنه برقة ماهي ناسيتها..
مؤنس:ع هكي الوضع خطير حق..
عمر:هي تأثر واجد ع ضراريها..خايف من اللي يديروه بعدين لعيت عمي عبدالله..
الهادي:يستر الله...
🍃وفعلا لاسباب زي هادي ظلت عداوات قائمة لسنين..وهالشي شائع بين الناس فمدن الدواخل تحديدا اللي نظامها قبلي.. وياما من حوادث صارت سردها يصدم اللي يسمعها🍃
🍁🍁🍁🍁
شويه..
وروحوا الجارات..
وكان اخر من روح نجاة وبلقيس وكانت معاهم تغريد اللي حوشها في الشارع اللي وراهم..
قبل يطلعوا من القطعه..
محمد شافهم..
مشالهم طول..
محمد:عمتي..عمتي..
بلقيس ابتسمت بفرح..
وقفوا التلاته..
نجاه؛محمد..شنو حالك..
محمد بإبتسامه:الحمد لله ..انتي شنو حالك وحال كراعك؟ ليش طالعه من الحوش ع كرعيك راهو هكي تزيد تتأزم..
نجاة بإبتسامه:كله هالنهار....وبعدين الحق ماقدرت نشد كراعي ع مرت خوك بعد اللي صارلها هي وبنتها..
محمد:بارك الله فيك..وتو تعالي اركبي السيارة نوصلك..
نجاة بضحكه:علي هالخطوتين!!
محمد:يأثرن واجد هالخطوتين ماتهزيش عليهن..
شدت بلقيس ضحكتها..
وتغريد تشوفلها وتشوفله..
نجاه:باهي مادامك مصر خلاص..
محمد قرب منها ويدوب شدها وقال لبلقيس:روحي مع صاحبتك ع كرعيك..
انصدمت بلقيس..
وهو مشي بنسيبته ركبها السيارة..
وركب بعدين شغلها وتحرك..
بلقيس بصدمه:ريتيه!؟
تغريد بضحكه:مايبيش يركب وحده غريبه عليه فسيارته هدى قصده..
بلقيس شبحت لتغريد شويه بعدين ابتسمت وقالت؛عسل انتي تصدقي..
ضحكت تغريد..
شدت بلقيس يدها وقالت:هي تعالي..
تغريد بضحكه:باهي..
ومشوا مع بعض وهما يهدرزوا...
فات من.حداهم محمد بسيارته بعد وصل نسيبته ..
قال لبلقيس:فييسععع..
بلقيس قعدت تمشي بسرعه ومعاها تغريد وهما يضحكوا..
وكيف وصلوا لفم حوش بلقيس..
كان مراد واقف في الباب..
سمع اصواتهم..قام راسه عيونه جو ع تغريد..
انسبه فيها قعد يشوفلها وخلاص..
هي تحشمت غيرت عيونها لاخته وقالت:تصبحي ع خير..
ومشت..
بلقيس وهي تشوف لخوها:قدامك كل خير..
مراد وهو يشوف لتغريد:صاحبتك هدي!؟
بلقيس وهي مبتسمه ورافعه حواجبها:ايه صاحبة جديده..
ابتسم..بعدين التفت لأخته...
واخته تشوفله وهي مبتسمه ابتسامه شغب..
ع جية خوهم الكبير:خيرك مصبيه هنى..
خافت بلقيس وخشت تجري
مراد تلخبط بالمره :بتعدي توا؟
:مال غدوة مراد ابتسم بإرتباك صكر الباب ومشي مع خوه..
🍁🍁🍁🍁
تشوف في التعليقات ع منشور اشارتلها بيه حدهم تتحمدلها فيه بالسلامه..
ماكانش عندها نيه ترد ع ولا تعليق..
كان صدرها ضايق هلبه ومخنوقه بدمعتها..
توقعت تلقاه فوق راسها في المستشفى...
توقعت اللي صار ينسيه الزعل ويكون سبب فرجعتهم..
لكن للأسف..ماجهاش منه حتى مسج..
"رزونه...روزي"..
شبحتلهم بعيونها المعبيات دموع وقالت:لاسأل لادور لاقال نجي..ودموعها نزلوا...
الزوز تنهدوا وماردوش عليها بولا حرف..
ماعندهم شي يقولوه بش يواسوها بيه..
بإختصار..
معاش يبوها تتأمل فيه ومنه اي شي..
🍁🍁🍁
الواحد ع قد مايديرلهم كان جاه نهار وغلط غلط مش مقصود يطلع ماينفعش بكل ولاكإن دارلهم فعمره حاجه باهيه..
سناء:نقولك السبب..لأن الطيبه لازم تكون مع الأشخاص الصح ياعماد مع ناس تعطيها وتعطيك فنفس الوقت فهمتني..
تنهد وقال:صح..عندك حق..
سناء:هو اني مانعرفش انت من تقصد لكن بننصحك..الناس هادم لازم تلغيهم من حياتك مرة وحده وادور ع الناس الصح ناس الباهي ينفع فيها..
عماد:صح..مزبوط..
🍁وكمل مع سناء هدرزة ساعات متواصله..
هو كان يبي يهرب من اللي هو فيه يبي يهرب من تفكيره وانشغاله بيها..خايف مرة تانيه يضعف ويمشيلها طول من كثر ماواكله قلبه خوف عليها..
ماخداش ع خاطره من حناه نهائي..عارفها وعاذرها وعاطيها كل الحق..ومعترف انه فعلا مولي "إخيي" ع قولتها..
مش منه رغما عنه ولاهكي💔🍁
🌴🌴🌴🌴
مقعمزين يتعشوا ويهدرزوا..
رباب:مامشيتش اليوم حسيت روحي تاعبه رقدت..
مؤنس برفعة حواجب:حامل!!
رباب:هههههههههه..لالا ماحلنا نهاري...
مؤنس بضحكه:كم لينا متزوجين؟
رباب:سكرنا 20يوم لكن عاد حتى لو كنت حامل مايبانش توا..مجرد ارهاق ..اصلا اني لما يتغير عليا الجو والمكان ديما هكي يصيرلي..
مؤنس شد يدها وقال:شقيقة قلبي...مرتاحه معاي؟
رباب بإبتسامه:ماتبيش سؤال مؤنس اكيد مرتاحه معاك وهلبه مش شويه..
مؤنس:خايف تكوني مش مرتاحه في العيشة هنى..مش كيف طرابلس كيف هنى اني اللي نعرف...وغير هكي بعدتك عن هلك...
رباب بضحكه:والله مافي حاجه من الدوة هادي بكل..اول شي اني نعشق **** ونحبها اكثر من طرابلس..واني توا حدا اهل امي يعني اهلي مافيش  فرق..وبعدين انت توا وليت اهلي كلهم..
ابتسم وقام يدها وباسها من داخل وطول وهي تشوفله بنظرة كلها حب..
بعدين نزلها وقال:هي تعشي..وكولي زين ماتندري مرات يطلع حق في حد داخل..
ضحكت رباب...
وبدوا يتعشوا..
🍁🍁🍁🍁
الساعه 1:00ليلا..
ع الفايبر..
(ياريت صوروكم 😂)
غاليه
(دلال ياشمايتيه 😑)
دلال
(😂😂😂)
رانيا
(بري ارقدي فرخة دلال وراك امتحان غدوة)
دلال
(من التوتر مش جايني نوم)
غاليه
(قريتي باهي؟)
دلال
(ايه قاريه فيه ليا وقت من قبل مايصير اللي صار)
غاليه
(معناها ماعندك ليش متوتره خليها ع الله وبس)
دلال
(ايه ..ونعم بالله)
رانيا
(شن جو ربوبه خالتي؟)
غاليه
(كويسه وفخيار خيارها ماتخمموش عليها)
رانيا
(دوم يارب)
...
رن تليفون غاليه...
قعدت تشوف للرقم هلبه..
بعدين خدت نفس...وفتحت الخط..
وحطاته ع وذنها..
غاليه:اسمع....
قاطعها وقال؛انتي اللي اسمعيني..اني مانبي شي غير شي واحد اني مانخسركش ياغاليه..يعني لو ممكن زي ماقلتي كان يريحك..اعتبريني واحد من ولاد العيله كان تبي تمام...اعتبريتي صديق..صداقه لااكثر..
ضحكت غاليه بعدين قالت:اني بإذن الله كان تلاقيت مع اختك مرة تانيه ننصحها ادورلك عروس لابد ولازم وكان تبي نساعدها ماعندي مشكله..
نجمي بضحكه:تمام..بس بشرط..تكون زيك..
سكتت غاليه وهي مبتسمه...
نجمي؛آلو..
غاليه:باهي توا الوقت متأخر مرة تانيه نهدرزوا إن شاء الله..
ابتسم وقال:تمام..تنهد بعدين قال..تصبحي ع خير..
غاليه:قدامك كل خير...وصكرت..
ضحكت...
بعدين ولت لمحادثه الفايبر..
لقت البنات يسألوا عنها...وبعدين اللي هدا قالت بترقد..
ضحكت..
وطلعت من الفايبر..
حطت التليفون ع مسند ورقدت..
🍁🍁🍁🍁
تاني يوم..
الساعه 11:00صباحا..
في دار مسكر..
كانوا الحماوات وكنايتهم داخلها..
يتحاسبوا..
حميده:اني اللي عليا درته وماقصرت بكل معاها...
عفاف:ايه بأمارة ماماتت وماحد يعلم عنها...وانتن زوز حداها مش حتى وحده..
حليمه:والله ياماما امكن انتن ملزومات بيها شرعا انتن اولى..وشرعا اني ملزمه بحوشي وراجلي بس...
عيشة :حتى حني عندنا حياش ورجاله..
حليمه:شن فيه حوشك ياعيشه بناتك وعطتيهن كلهن وراجلك 24ساعه وهو في ******..وانتي ياعفاف شن عندك  كيفك كيف عيشة بالزبط...الوحيده المعذورة حوا صغارها مازالوا صغيرين وسته ماشاء الله مش شوي..اما انتن ماليكن عذر بكل...ضحكت سخرية وقالت..تحتى لما بعتنالكن امكن تقعد عندكن نهارين حرقتن هاتف الصديق وانتن تتصلن تبنه يرفعها...ماتحملتن امكن تبن من الكنه تتحملها!!...عليك حاله..
ومشت فتحت الباب وطلعت من حداهم..
عفاف:ماطيحنا ربي كان في العقرب واختها..
حميده شبحتلهم بحده بعدين مشت طلعت حتى هي...
وهي ماشيه لحوشها سمعت بنتها تبكي..
فنصت..
مشت تجري وهي تبع فالصوت...
قلبها كان حيوقف...
وصلت من وين مايطلع الصوت..
لقت الولد نفسه شاد بنتها ويبوس فيها بطريقه مقرفه من خدها.. وهي تعيط..
حميده بدون وعي..
جاته ..
هبطت ايديها بقوة ع ظهره وهي تقول:يامسخ ياولد ^%^¥..
وجبداته بقوة حدفاته بعيد جي طايح..
ومشت خدت بنتها طبتها ومشت تجري بيها للحوش..
وصلت فالدروج وركبت تجري خشت الشقه..
وصكرت وراها الباب بالمفتاح وهي ترعش مع بعضها...
🍁في نفس الوقت...
في السوق...
كان الهادي ماشي يشري فخضرة وبضاعه ليه ولأهله..
وهو يوازي في البطاطا..
سمع صوت حد...يعرفه كويس..وكبده عليه دم..
قام راسه وشبح ايمينه..
لقي الصديق واقف يهدرز ع واحد..
قعد يشبحله بحقد..
والصديق وهو يتكلم قعد يوزع فنظره ع المكان..
جت عينه فعين الهادي...
رفع حاجبه وابتسم تهكما بعدين غير عيونه للراجل اللي معاه..
الهادي قداش ليه يبي يفش غله مليان قلبه ع الآخر..
لوح شكارة البطاطا من يده وتوجهله مندفع بغضب شديد..

...يتبع..