#رمضان_احلا_مع_جمان_فريد
#العشق_المتمرد
الجزء الحادي عشر
متكيه ع الكرسي وشاده خدها: آااه...سم ياسالمه قاعد يوجع..
سالمه: قاعده تحسي بدوخه..
عروبه:لالا..لكن حنكي..حسيته انكسر..
سالمه بضحكه: حتى هي يد هانيبال..
ضحكت غصب عنها بعدين قالت :آه...
شويه
وانفتح الباب وخشت المسؤوله عن قسم البنات في المدرسه..
ابله ابتسام:شن عروبه حبيبتي احسن توا..
عروبه هزت راسها بإيجاب...
ابتسام : باهي..الشاب اللي ضربك برا مصبي..
عروبه 💓😳..
ابتسام: قال نبي نتأكد من حالتها ...
عروبه : احمم..قوليله كويسه..
الأبله مشت فتحت الباب: ترا تعال..
قلبها بيطلع من مكانه 💓..
وقاعده شاده خدها..
وسالمه تضحك..
خاش وكان لابس سوريته لكن مفتوحه..
قدملها : ترا حولي يدك شوي...
شبحتله وحولت يدها...
هو يشوف في خدهاويتفحص ع اساس: مافيك شي ...شبح للأبله ..يدوب يدي مست وجهها..دلع زايد..
الأبله ضحكت..
هي تشبحله برفعة حواجب..
هو قاعدين عيونه في الأبله: صحيتي..
ولف وطلع وصكر وراه الباب وخلا عروبه مصدووومه..
وسالمه تضحك..
ابله ابتسام بضحكه:هاه عروبه تقدري تولي لمدرستكم..
عروبه هزت راسها بإيجاب...
ناضت : شكرا ابله ابتسام...
ابتسام :العفو...
طلعت عروبه مع سالمه وصكروا الباب..
عروبه :عليك صحة وجه ويقول يدوب مست وجهي.. تي هي تقول طاحت عليا بلوكه مش يد بنادم..
سالمه تضحك وخلاص..
"بس بس"..
وقفوا الزوز ..
شبحت يمينها..
لقاته متكي بيد ع الحيط واليد التانيه فنصه قاللها بتهكم: مش قتلك مش ليكن الحاجات هدينا..ومكانك الكوجينه..
عروبه قعدت تفنص وخلاص..
هانيبال: كف واحد قريب قلك للدار الآخره..
ضحكت سالمه..
نخصتها عروبه : عدي في حالك 💓
هانيبال ابتسم بتهكم وهو ماشي قاللها : لما تروحي خودي مكعب ثلج ومشي ع خدك..وكل ماتشوفيه اذكريني..
رقصلها حواجبه ودار حركه بإبهامه 👍 وكمل طريقه يمشي بكل كبر...
هي لاعرفت تنغاظ منه ..ولاتحبه...ولاتسبه...ولا تهبل علي تصرفاته 💓💓💓💓خشت بعضها عندها💫💫💫💥
سالمه بضحكه : هيا.
عروبه شدت خدها ومشت طول وسالمه وراها....
*****
مروحات للحوش..
سعيده حست بدوخه شدت فيد غاليه..
وقفوا..
غاليه:سعيده خيرك!؟
سعيده: مش عارفه حسيت بدوخه..
حميده: فاطرة الصبح..
سعيده وهي تبلع فريقها: ايه اني وميلاد فطرنا جميع..
غاليه:باهي اهو قريب نوصلوا وحده وحده عليك...
قعدوا يمشوا دبه دبه لعند ماسعيده خلاص ..
سعيده: وووك خلاص مش قادرة..
حميده : حي علينا ..غير شدي روحك وراس سعيده..
سعيده تاخد فنفس بصعوبه :مش قادرة..
شويه..
وخطمت سيارة خليفه شافهم وقف..
خليفه وعيونه فحميده: خيركم..
حميده: سعيده دايخه😳..
فتح الباب ونزل من السيارة...وجي لأخته..تعالي هي.
شدها وقعد يدب بيها لين وصل للسيارة وركبها...
خليفه:اركبن..
غاليه :لاخلاص قريب نوصلوا..
خليفه بحده : قلت اركبن...
تحشموا الزوز ومشوا ركبوا من الخلف..
هو ركب وصكر الباب: نقلك للمستشفى.
سعيده بتعب :لالا قلني لأمي..
خليفه:متأكده.
سعيده : ايه ياخليفه هيا..
خليفه :باهي ...شغل السيارة وتحركوا..
كانت حميده جايه وراه "قاصدتها 😁"..
هو عدل المرايه قعد يشوفلها وهي مرة مرة تشوفله بنظرات حب ممزوجه بالخجل وكانت يدوب تبتسم..
غاليه لاحظتهم ابتسمت وشبحت جهة الروشن..
وسعيده وهى فعز تعبها مركزة عليهم وتسحن ...
*****
💕في المرواح..
غزاله بضحكه : نحلف عليك ماقاعده شاده خدك هكي غير ع خاطر يد هانيبال جت عليه..
عروبه ضربتها :حيوااانه...
عودة : ههههههه...خساااارة فاتني..
سالمه :احممم...مصبين ويشوفوا هنايا..
عروبه نزلت يدها ومابتش تشبحله..
سليمان بضحكه: تلحق..
هانيبال وهو يشوفلها : عدوا...
مشوا سالم وسليمان وعمر وهما يضحكوا...
اما هو حط يده فجيبه ويده التانيه شاده الشنطه..وقعد يشبحلها..
قدم خطوتين..
عودة : جاي هنا...
قلبها خلاص....💓💓💓💓💓💓💓.
هي ماتبيش تشبح جيهته..
هو مشي وين مالافه وجهها..
فنصت لما شافته...
قعد يشبحلها وهو مضيق عيونه ويشبحلها..
والعيون عسليه تبرق في الشمس..
وكله مع بعضه يبرق..😍
قعدت تشبحله زي المسبوهه💓💓💓..
هو مط شواربه بإزدراء وحرك راسه ايمين يسار..
حول يده من جيبه وقال : والله منظرك بالمحرمه خير ..
ربي يهدي..
وفات من حداهم وهو يقول "ربي يهدي"...
عودة وسالمه وغزاله :ههههههههه..
عروبه بصدمه:هدى شنو بالزبط..تافه ولامتخلف ولابارد ولاشنو؟!!!!
سالمه : هدى يهبل...
عروبه :💓...
🍁هو كمل ماشي وابتسامته ع وجهه...
وحاس بسعادة عمره ماحس بزيها فحياته❤
ومن وراه بمسافه..
امال مروحه وتسحن قريب تموت"هدى يبيها ولاكيف!!..غير والله تحلم ...عسلنا مايطلعش برا🔥😡"...
****
الساعه 2بعد الظهر..
فتح باب الشقه وخش..
صكر الباب..
عبدالسلام : نعيمه ..نعيمه...
استغرب مافيش حس..
قعد ينادي: دلال...دلوله....
مافيش رد..قعد يدور في الشقه مالقي حد..
فنص عيونه بغضب: وين مشوا هادم!!!...
الحقييييرة...ديما نقوللها ماتطلعيش من دون اذني ..لكن باهي غير تروح المسخه..
قعمز فوسط الحوش يراجي..
.....
باه هو شن حاله توا..
اخت جارتها : حاله احسن روحي انتي توا لحوشك ..صحيتي وبارك الله فيك.
نعيمه ابتسمت : الجيران لبعضهم..
ابتسمت المراة..
وهي خدت بناتها وولت للشقة..
طلعت المفتاح وفتحت الباب...
وخشت..
دلال سبقتها تجري لقت بوها فوسط الحوش: بابا..
نعيمه غمضت عيونها بشدة..
عبدالسلام ناض: وين كنتي ياهانم..
نعيمه بانت عليه وفغمرها بنتها ردت :كنت فحوش جارتنا اللي قدامنا..
عبدالسلام : ومن قالك اطلعي!!!
نعيمه :ماهو ر...
عبدالسلام بصوت عالي : لاماهو لا ماهوات...انتي مراة مافيش منك فايده..مافيش..لكن اني تونعرف كيف نديرمعاك.
ومشي بيطلع
نعيمه دموعها طاحوا : غير اسمعني شويه..
مادورهاش وطلع وصكر وراه الباب بالمفتاح...
تنهدت بألم ودموعها ينزلوا...شبحت لبنتها..لقتها تبكي..
واللي فغمرها بدت تعيط...وهي قعدت تبكي معاهم💔..
🌴🌴🌴🌴🌴🌴🌴🌴🌴🌴🌴🌴
حامل..
سعيده بفرحه : متأكدة يمي..
حدهم: ياخايبه جايبه زوز قبل يعني ماتعرفهينش الأعراض هادينا..
سعيده : ايه جايبه قبل بس اول مرة يصيرلي هكي ديا..
حدهم: بعدين يجي ميلاد عدي عايني انتي وياه..
يسمعوا فصوت تقربيع في الكوجينه..
سعيده : هدي خيرها من لما جت وهي تقربع..
حدهم: مندري ع بلاها الأسود هي الأخرا..
سعيده:😒
****
واقفه ع المرايه..
وتمشي ع خدها بمكعب تلج زي ماقاللها ادير💓💓💓
كانت سارحه ومبتسمه..
<< ترا حولي يدك شوي...
مافيك شي ...شبح للأبله ..يدوب يدي مست وجهها..دلع زايد..>>
ضحكت ..ركزت ع التلجه اللي ذابت..
زي ماذاب قلبها فيه..وفنظرات عيونه ليها...
وكلمته لما قال
<< والله منظرك بالمحرمه خير>>
💕💕💕💕💓💓💓
قعدت تشبح لشعرها في المرايه وهي تبتسم ..
بعدين تنهدت ...
وقعمزت ع السرير خدت شنطتها فتحتها وقعدت اطلع فكتاباتها وهي تتنهد💓💓💓💓
****
الساعه 3:00..
انفتح باب الشقه..
خش: هي تفضل ياحميد..
سمعت اسم خوها..
خبطت بيدها ع وجهها :حشم بيه ياربي!!
حميد:نعييمه...
ناضت مسكينه وبطنها توجع فيها...
طلعت من الدار ومشت للمربوعه..
خشت لما شافت خوها..
فقدانها للأمان خلاها تجري وتحضنه..
حميد قلبه انفطر وحضنها..
عبدالسلام: ماديريش الجو هدا غالطه وجبت خوك نشهد فيه عليك.
حميد : تشهد فيا !!!!شن شايفها دايره..اختي ونعرفها الغلط ماديراش..
نعيمه تشبح لخوها وحست بقوة عجيبه...
عبدالسلام : طالعه من غير شور راجلها..عندك باهي انت هدا؟!!
حميد شبحلها: شن طلعك من دون ادن راجلك..
نعيمه مسحت دموعها وقالت:جارتي اللي قدامنا راجلها تعب مشت معاه للمستشفى وطلبت مني نقعد مع الصغار المراة طلبتني ماقدرتش نردها..واهو قدامكم الحوش واسألوا...
حميد شبح لعبدالسلام بنظره حاده..
عبدالسلام ارتبك وقال : مش اول مرة نروح ومانلقهاش..
نعيمه : هي كلها مرة بنتك كانت تعيط تبي تلعب مع بنت جيراننا اللي تحتنا رفعتها...وبعدين قولي انت امتى تقعد في الحوش بش ناخد اذنك ديما وانت عند امك..
عبدالسلام : احترمي نفسك..
حميد:عبدالسلام..اسمع جاي فوتنا هلبه ومشينا هلبه لكن لهني وياسر...نعيمه...شن تبي توا...
نعيمه تشبح لعبدالسلام اللي يبان خايف: نبيك تمشي معاي لحوش اهله...
نبي نشهدهم عليه..
حميد شبحله بحده..
عبدالسلام:صار هكي..
نعيمه بحده: ايه هكي..
عبدالسلام: باهي يانعيمه...
🍁🍁🍁🍁🍁
وفعلا مشوا لحوش اهله..
وبوه وخوه الكبير عاركوه لين عييوا..
وهدده حميد لو تكرر اللي داره اخته مش حتقعد عنده..
وان بوه مش حيرضى في بنته الشك فأخلاقها..
روح حميد وهي قعدت عند متاعينها يحاولوا يلينوا بيناتهم..
اساسا خدوا ع الوضع..
حياة نعيمه وعبدالسلام هذا روتينها...🍃...
*****
الساعه 5:30مساءا...
كان لابس ومتأنق خش لخوه اللي كان يقرا..
الهادي: هانيبال..
شبحله..
الهادي : تعدي معاي للمصور..
هانيبال بضحكة استغراب :ليش؟!
الهادي بضحكه: خاطري نصور..شن رايك تعدي تصور..يجي يوم وتحتاجها وغمزله..
هانيبال ضحك بإحراج💕...
الهادي ابتسم : هاه شنو؟
هانيبال تنهد : اممممممممم.....بااااهي.
وناض وهو يقول: استناني شوي...
ضحك الهادي ومشي هانيبال يوتي فروحه...
💕بعد لبس وطرح وتأنق...
طلع من الحوش..
حميدة: الله وحد..
غاليه بضحكه:سلمه ياربي...
ومشوا حدا الفرن..
هو ماشي لحوش ميلاد...
قابلوه سعيده وامال ماشيات للحوش..
امال وقفت في مكانها 😍..
سعيده :ماشاء الله عليه الفرخ هدى ياريت هالعقارب ماهن خواته...شبحت لأختها..تحركي..
امال بهيام: اخبطهولي😍❤❤❤❤❤❤❤
جبدتها سعيده 😒وخشت بيها من فم البوابه...
نزل الهادي..
الهادي : مشكله ياراجل انت..
هانيبال ابتسم : تي هيا...
ضحك الهادي ومشوا مع بعض...
💕💕💕💕💕💕
مشوا للمصور..
خدالهم كم صورة..من جو صور زمان الخلفيه غروب...
وجردينه...والجو هداكا😂...
💕💕💕💕💕💕
وفعلا الوقت كان غروب..
وهي كانت تتفرج ع الغروب وتفكر فيه...
وقلبها طاير بالمشاعر الحلوة اللي يحس بيهم..
محلاهم المشاعر هيا في السن هادي وفي هداكا الزمان الجميل حب صافي وبريء ....
💕💕💕💕
هو لما طلع من المصور...تخيل لوجي نهار واحتاج الصورة بش يعطيهالها...
لمجرد انه تخيل ان وصل معاها لهالمرحله..
قلبه قعد يضرب في صدره بعنف شديييييييد...💕💕💕💕
❤❤❤❤❤❤❤
الساعه 9ليلا..
ارسم زهرة ارسم بستاان..
حميده:صبي اقلب وجهك نبي نتفرج..
عمر: ارسم زهرررررررة ارسم بستااااااااان..
قعدت تشبحله شويه وهو يغني بصوت عالي ويستفز فيها..
ريشاته من شعره: وهاااااااااا..هاه.هاه هاه...
عمر: ياكلبه..ياجروة...اااي..يلعن....جدري...
طلقاته...وناضت تجري..
طلعت من الدار...
وهو ناض فجرتها..
خدي شبشب وحدفها بيه..
سكرت ع روحها باب الدار القبليه...
عمر: وحق الله مانك مفوتيه ياجروووة..
ومشي للدار خدي كراساته وطلع..
فاطمه كيف كملت صلاة: عووود بالله منكم حتى صلاة ربي مش مهنيني فيها...عودو بالله منكم..
طلعت حميده مطنشة كلام امها وولت بتتفرج البت مقطوع وجايبين النشرة متاع الجماهيريه اللي تقعد ساعتين ونص وكلها الأخ قايد التورة فعل ودار ومشي وجي..واتصلوا بيه واتصل بيهم 😒..
المهم..
خشت غاليه للدار: خيرك انتي وياه.
حميده:فرخ حقير خوك تعرفيه..
شويه وخش محمد : غاليه نبي ناكل..
غاليه : هونا خبزة الفرن والشنينه..
طلع من حداهم محمد..
غاليه شبحت للتلفزيون: لابسة تركيبه اليوم..
حميده: ماعجبتني وحتى التخليله مش مساويه..
غاليه:شوفي قصتها كيف مشفشفه..
"يعلقوا ع مديعات النشرة زمان كانوا يلبسوا في العربي بدله كبيرة وبدله صغيرة وتركيبات😧"..
غاليه: ريتي خليفه بكري..
ابتسمت حميدة بخجل: يهبل😍...
غاليه ابتسمت بتنهيده : امتى ياربي بس اني ناخد حميدا وانتي خليفه ونديروا حوش وعيله وصغار ونقعدوا نجوا هنى زيارات كيف حميده وكفايه ونعيمه..
تنهدت حميده وسرحت..💕
"صبن ديرن لخوكن ماياااكل صبن"..
غاليه خبطت ع ركابها : ياربي غيرامتى بسسسسسسسس..وناضت وطلعت من الدار..وحميده تضحك عليها..
******
خشت للدار..
لقت اختها واقفه ع المرايه تقيس في محرمه..
عودة بصدمه: عروبه!!!!؟
انخلعت: خيرك تعيطي..
عودة : قصدك بديري زي ماقال...
عروبه : منو اللي قال😳..
عودة : ووواااك من جو الإستغباء متاعك..عروبه ردي بالك حاجه كيف هدي ماديرهاش ع خاطر حد من البشر..
عروبه : والنبي تسكتي اني كنت نقيس فيها وخلاص..
حطت الشاربه..ع الكرسي وتمددت فسريرها ورقدت..
وعودة قعمزت وضحكت بقلة حيله ع اختها اللي راحت فيها💕💕💕💕💕💕💕
حاااامل!!!
سعيده : خيرك انخلعت!؟؟.
ميلاد : استغربت بس !
سعيده : وكيف استغربت 😒
ميلاد: وانتي خيرك شديتي فالكلمه..المهم توا كيف عرفتي..
سعيده : اعراض بانن عليا ..ونبي غدوة الصبح تقلني للمستشفى..
ميلاد: باهي...تصبحي ع خير..
عطاها بظهره ورقد..
هي دارتله الحركه هادي 👐...
بعدين عطاته بظهرها ورقدت...
⛼⛼⛼⛼⛼⛼
ليل..وهدوء الليل...
بالذات فهديكا المدينه مافيش احلا من الليل...
كانت العيون فيها مغمضه وراقده لسبب واحد..
بش يفوت الوقت ويطلع الصبح..
وتتلاقى اصحاب القلوب المحبه ❤❤
واللي باديه تحب❤..
وخل نقولوا الليل ماباش يطول عليهم..
والصبح جاهم بسرعه...بش يشوف لهفتهم للقاء..
ويجمعهم ببعض...
❤❤❤❤❤❤❤❤
كانوا ماشيين مع بعض ويهدرزوا...
سليمان :عادي نعدوا جميع..
هانيبال: والله ماني عارف..عمري ماعديت للشرق..
سليمان: خليها اول مرة ع خاطر عمار..
تنهد هانيبال :إن شاء الله خير..
وصلوا للمدرسه..
شاف جيهة البنات..جاي بيخش سمع السيارة..
تلفت..
انفتح الباب ونزلت...
هو توسعوا عيونه من اللي شافه...
كانت لابسه شاربه لونها ابيض ودايرتها بطريقه حلوة...
قعد جامد فمكانه وسرحان فيها..
عودة: حي ياعروبه كان تشوفي كيف يشبحلك...
عروبه : اسكتي حاسه روحي بندوخ وكرعيا يرعشن..
"عروووبه"..
التفتت لقت صاحباتها يجروا سلموا عليها وباركولها ع الحجاب...
هو يشوفلهم وبس..
ضحك سليمان وخش وخلاه....
غزالة: بركاتك ياشيخ هانيبال..
سالمه : بياكلها بعيونه ..
هي يدوب شبحتله...
هو ابتسملها ع جنب...وكمل خش داخل..
هي تنهدت...❤❤❤ وخشت...
البنات ضحكوا...ولحقوها....
....يتبع....
عارفتها قصيرة لكن راسي مصدع شوي 😧
