باقي الجزء66
#العشق_المتمرد
#جمان_فريد
🍃🍃🍃
ﻋﺪﺕ ﺍﻳﺎﻡ ﺭﻣﻀﺎﻥ ﺍﻷﻭﻟﻰ ..
ﻛﺎﻧﺖ ﻋﺎﺩﻳﻪ ..
ﺑﺲ ﻉ ﺍﻟﺒﻌﺾ ﻛﺎﻧﺖ ﻛﻠﻬﺎ ﺣﺰﻥ ..
ﺭﺍﻧﻴﺎ ..
ﻭﻳﺎﻗﻠﺒﻲ ﻉ ﺭﺍﻧﻴﺎ ..
ﻗﺎﻋﺪﻩ ﺗﺪﻋﻲ ﻗﺒﻞ ﺍﻟﻔﻄﻮﺭ ..
ﺳﺎﻋﺔ ﺍﻹﺳﺘﺠﺎﺑﻪ ﺍﻥ ﺭﺑﻲ ﻳﺠﻌﻞ ﺭﻣﺰﻱ ﻣﻦ ﻧﺼﻴﺒﻬﺎ ﻭﻻﻳﻜﺘﺒﻬﺎ ﻭﻻﻳﻜﺘﺒﻪ ﻟﻐﻴﺮ ﺑﻌﻀﻬﻢ ..
ﻛﺎﻧﺖ ﺣﺎﺳﻪ ﺭﻭﺣﻬﺎ ﻧﺎﻗﺼﻪ ﺑﺪﻭﻧﻪ ﻧﺎﻗﺼﻪ ﻫﻠﺒﻪ 💔
ﻭﻫﻮ ﺍﺣﺮﻑ ﻣﻨﻬﺎ ..
ﻣﺶ ﻣﺴﺘﻄﻌﻢ ﺷﻲ ﻣﻦ ﻏﻴﺮﻫﺎ ..
ﺣﺎﺱ ﺭﻭﺣﻪ ﻣﻘﺒﻮﺭ ﻭﻫﻮ ﺣﻲ ...
ﻣﺶ ﺣﺎﺱ ﺑﺮﻭﺣﻪ ﺣﻲ ﺍﺻﻼ ..
ﻭﻟﻬﺎﻟﻠﺤﻈﻪ ﻣﺎﺯﺍﻝ ﻣﺶ ﻣﺴﺘﻮﻋﺐ ﺍﻟﻠﻲ ﺻﺎﺭ ﻧﻬﺎﺋﻲ ..
ﻭﻏﺎﻟﻴﻪ ﺷﺎﻳﻠﻪ ﻫﻤﻪ ﻫﻠﺒﻪ ..
ﻭﻛﺎﻧﺖ ﻳﻮﻣﻴﺎ ﺗﺎﺧﺪ ﻓﻲ ﺍﺧﺒﺎﺭﻩ ﻣﻦ ﺗﻮﻓﻴﻖ ﺍﻟﻠﻲ ﻛﺎﻥ ﻳﻤﺸﻲ ﻳﺰﻭﺭﻩ ﻓﻲ ﺷﻘﺔ ﺧﺎﻟﻪ ﺣﺴﻦ ..
ﺑﻴﻨﻤﺎ ﺳﻌﻴﺪﻩ ..
ﻣﻄﻤﻨﻪ ﻋﻠﻴﻪ ﺑﻌﺪ ﻋﺮﻓﺖ ﻭﻳﻨﻪ ﻭﺑﺮﺩﺕ ﻗﻠﺒﻬﺎ ﻉ ﺍﻵﺧﺮ ...
ﻭﺭﺯﺍﻥ ﻣﺶ ﻣﻬﺘﻤﻪ ﺑﻜﻞ ﻟﺸﻲ ..
ﻋﺎﻳﺸﻪ ﺟﻮﻫﺎ ﻭﻛﻞ ﻳﻮﻡ ﺗﺘﻔﻨﻦ ﻓﻲ ﺍﻟﺘﻄﻴﻴﺐ ﻭﺗﻔﺘﻠﻚ ..
ﻭﺗﺒﻌﺖ ﻟﺤﻨﺎﺗﻬﺎ ﻭﺟﺪﻭﺩﻫﺎ ...
ﺍﻳﻪ ﺣﻨﺎﻫﺎ ﻓﺎﻃﻤﻪ ..
ﻣﺎﻫﻮ ﻟﻤﺎ ﺟﻲ ﺭﻣﻀﺎﻥ ﻣﺸﺖ ﻛﺒﺖ ﻉ ﺭﺍﺳﻬﺎ ﻭﺍﺳﺘﺴﻤﺤﺖ ﻣﻨﻬﺎ ﻭﻋﺴﻠﺖ ﻓﻲ ﺍﻟﻜﻼﻡ
ﻭﻓﺎﻃﻤﻪ ﻣﻊ ﺍﺣﻔﺎﺩﻫﺎ ﻣﺎﻋﻨﺪﻫﺎﺵ ﺍﻟﺮﻭﺡ ﺑﺎﻟﺬﺍﺕ ﺻﻐﺎﺭ ﻭﻻﺩﻫﺎ ..
ﻓﻲ ﻟﻴﻠﻪ ..
ﻓﺎﻃﻤﻪ : ﺍﻧﺘﻲ ﺑﻨﺖ ﻧﺠﺎﻩ ﺍﻟﺼﻐﻴﺮﺓ ﻭﻻ ..
ﺑﻠﻘﻴﺲ ﺑﺈﺑﺘﺴﺎﻣﻪ : ﺍﻳﻪ ﻳﺎﻋﻤﺘﻲ ﻳﺎﻓﺎﻃﻤﻪ ..
ﻓﺎﻃﻤﻪ ﺑﻀﺤﻜﻪ : ﻗﻮﻟﻲ ﺣﻨﺎﻱ ﺷﻦ ﻋﻤﺘﻲ ..
ﺑﻠﻘﻴﺲ : ﺍﻟﺤﻖ ﻣﺎﻳﺒﺎﻧﺶ ﻋﻠﻴﻚ ﻭﺣﺎﺳﻪ ﻛﻠﻤﺔ ﺣﻨﺎﻱ ﻇﻠﻤﺎﺗﻚ ..
ﺿﺤﻜﻮﺍ ﻓﺎﻃﻤﻪ ﻭﺭﺯﺍﻥ ..
ﻉ ﺟﻴﺔ ﻏﺎﻟﻴﻪ ﻗﻌﻤﺰﺕ ﺣﺪﺍﻫﻢ : ﺍﺷﺮﺑﻲ ﺍﻟﻨﺴﻜﺎﻓﻴﻪ ﻭﻛﻮﻟﻲ ﺍﻟﻜﻨﺎﻓﻪ ﻣﺘﺎﻋﺎﺗﻚ ﺧﻴﺮﻙ؟ .
ﺑﻠﻘﻴﺲ ﺍﺑﺘﺴﻤﺖ ﺑﺨﺠﻞ : ﻫﺎﻧﻲ ﻧﺎﻛﻞ ..
ﻭﻗﻌﻤﺰﻭﺍ ﻫﺪﺭﺯﻭﺍ ﻭﺿﺤﻜﻮﺍ ﻭﻏﻴﺮﻭﺍ ﺟﻮﻫﻢ ..
ﺑﺮﻏﻢ ﺍﻥ ﻏﺎﻟﻴﻪ ﻛﺎﻧﺖ ﺟﺎﺑﺪﻩ ﺭﻭﺣﻬﺎ ﻣﻦ ﺭﺯﺍﻥ ..
ﻟﻜﻦ ﺭﺯﺍﻥ ﻣﺎﺩﻭﺭﺗﺶ ﻫﻠﺒﻪ ..
ﺑﻌﺪ ﺿﻴﻔﻮﻫﺎ ﺍﻟﺤﻠﻮ .. ﻭﺿﻴﻔﻮﻫﺎ ﺍﻟﺤﺎﺭ ..
ﺣﻠﻔﺖ ﺑﺎﻟﻠﻪ ﺗﻨﻮﺽ ﺗﻐﺴﻞ ﺍﻟﻤﺎﻋﻴﻦ ..
ﻭﻓﻌﻼ ﻧﺎﺿﺖ ﻭﻣﻌﺎﻫﺎ ﺭﺯﺍﻥ ..
ﻏﺎﻟﻴﻪ ﺑﻀﺤﻜﻪ : ﺟﻮ ﻋﻠﻴﻬﺎ ﻛﻴﻒ ﺍﻣﻬﺎ ..
ﻓﺎﻃﻤﻪ ﺑﻀﺤﻜﻪ : ﺻﺢ ..
ﻓﻲ ﺍﻟﻜﻮﺟﻴﻨﻪ ..
ﺑﻠﻘﻴﺲ : ﻋﻤﺘﻚ ﻧﻌﻴﻤﻪ ﻋﻨﺪﻫﺎ ﻭﻟﻴﺪ ﻭﺍﺣﺪ ..
ﺭﺯﺍﻥ : ﺍﻳﻪ ..
ﺑﻠﻘﻴﺲ : ﻭﺯﻳﻨﺐ ..
ﺭﺯﺍﻥ ﺑﺈﻣﺘﻌﺎﺽ : ﺯﻭﺯ 😑
ﺑﻠﻘﻴﺲ : ﻭﻛﻔﺎﻳﻪ ..
ﺭﺯﺍﻥ ﺗﻜﻬﺮﺑﺖ ..
ﺑﻠﻘﻴﺲ : ﺍﻳﻴﻪ ﻭﻛﻔﺎﻳﻪ ﻛﻢ ﻋﻨﺪﻫﺎ ..
ﺭﺯﺍﻥ ﻭﻭﺟﻬﻬﺎ ﺍﺣﻤﺮ ..3:
ﺑﻠﻘﻴﺲ ﺑﻀﺤﻜﻪ : ﻭﻣﻨﻬﻢ ﻫﺪﺍﻙ ﺍﻟﻠﻲ ﺭﻳﻨﺎﻩ ﻣﻊ ﻋﻤﻚ ﺍﻟﻄﻮﻳﻞ ﻭﺍﻟﻌﺮﻳﺾ .. ﻭﺷﻌﺮﻩ ﻃﻮﻳﻞ ﺻﺢ ..
ﺭﺯﺍﻥ : ﺑﺎﻫﻲ .. ﺻﺢ 😳
ﺑﻠﻘﻴﺲ : ﺍﻋﺘﺮﻓﻲ ... ﺗﺤﺒﻴﻪ ..
ﺗﻜﺴﺮﺕ ﻓﻴﺪﻫﺎ ﻃﺎﺳﻪ ﺍﻟﺸﺎﻫﻲ ﻭﺍﻧﺠﺮﺣﺖ ..
ﺑﻠﻘﻴﺲ ﺑﻔﺠﻌﻪ : ﺧﻴﺮﻙ ..!!
ﻃﻠﻌﺖ ﺍﻳﺪﻫﺎ ﻣﻦ ﺍﻟﻐﺴﺎﻟﺔ ﺍﻟﻠﻲ ﻭﻟﺖ ﺑﻠﻮﻥ ﺍﻟﺪﻡ ..
ﺑﻠﻘﻴﺲ : ﺣﻴﻲ ﻳﺪﻙ ...
ﺭﺯﺍﻥ ﺗﺸﻮﻓﻠﻬﺎ ﻭﺗﺘﺄﻟﻢ ..
" ﺍﻟﺴﻼﻡ ﻳﺎﻗﻮﻭﻭﻡ .."
ﺍﻧﻔﺰﻋﺖ ﻭﻗﻠﺒﻬﺎ ﻗﺮﻳﺐ ﻃﻠﻊ ﻣﻦ ﺻﺪﺭﻫﺎ ..
ﺑﻠﻘﻴﺲ : ﺧﻞ ﻧﻄﻠﻊ ﻟﻌﻤﺘﻚ ﻧﻘﻮﻟﻠﻬﺎ ..
ﺷﺪﺗﻬﺎ ﺑﻘﻮﺓ؛ﻻ ... ﻣﺎﺗﺴﻤﻌﻴﺶ ﻓﻲ ﺻﻮﺕ ﻭﺍﺣﺪ ﺗﻮﺍ ..
ﺷﺒﺤﺘﻠﻬﺎ ﺷﻮﻳﻪ ..
ﺑﻌﺪﻳﻦ ﺩﻓﺘﻬﺎ ﻭﻃﻠﻌﺖ ..
ﻭﺭﺯﺍﻥ ﻭﺭﺍﻫﺎ ﻃﻮﻝ ..
ﻟﻘﻮﺍ ﻏﺎﻟﻴﻪ ﺣﺎﺿﻨﻪ ﻋﻤﺎﺩ ..
ﺭﺯﺍﻥ ﺍﺩﺭﻗﺖ ﻭﺭﺍ ﺑﻠﻘﻴﺲ ..
ﺑﻠﻘﻴﺲ ﺑﻀﺤﻜﻪ : ﻳﻤﻮﺕ ﺷﻴﺒﺎﻧﻲ .. ﺍﺣﻤﻤﻢ .. ﻏﺎﻟﻴﻪ
ﻗﺮﺻﺘﻬﺎ ﺭﺯﺍﻥ ﻭﻫﻲ ﻣﺪﺭﻗﻪ ﻭﺭﺍﻫﺎ
ﺑﻠﻘﻴﺲ : ﺃﻳﻴﻲ
ﺷﺒﺤﻮﻟﻬﺎ ﻏﺎﻟﻴﻪ ﻭﻋﻤﺎﺩ ..
ﺑﻠﻘﻴﺲ ﺑﺮﺑﻜﻪ : ﺭﺯﺍﻥ ﺍﻧﻜﺴﺮﺕ ﺍﻟﻄﺎﺳﻪ ﻓﻴﺪﻫﺎ ﻭﺍﻧﺠﺮﺣﺖ ..
ﺣﻂ ﻋﻤﺎﺩ ﺍﻟﺸﻨﻄﻪ ﻭﻗﺪﻡ : ﺭﺯﺍﻥ ..
ﻫﻲ ﺗﺮﻋﺶ ﻣﻊ ﺑﻌﻀﻬﺎ : ﻋﻄﻴﻚ ﻣﺎﻳﺮﻓﻌﻚ ﻳﺎﺑﻠﻘﻴﺲ ..
ﺣﻮﻟﺖ ﺑﻠﻘﻴﺲ ..
ﻭﻫﻮ ﺟﻲ ﻗﺪﺍﻣﻬﺎ : ﺗﺮﺍ ﻳﺪﻙ ..
ﺟﺖ ﻭﺭﺍﻩ ﻏﺎﻟﻴﻪ : ﺍﺳﺘﻨﻰ ﻧﺠﻴﺒﻠﻚ ﺍﻟﻔﺎﺷﻪ ﻭﻟﺼﻘﺔ ﺍﻟﺠﺮﺡ ..
ﻋﻤﺎﺩ ﻭﻫﻮ ﻳﺸﻮﻑ ﻟﻐﺎﻟﻴﻪ : ﺗﻤﺎﻡ ..
ﻓﺎﻃﻤﻪ : ﻛﻴﻒ ﺍﻧﺠﺮﺣﺖ ﻳﺪﻙ ..
ﺭﺯﺍﻥ : ﻋﺎﺩﻳﻪ ..
ﻋﻤﺎﺩ ﻳﻘﻠﺪ ﻓﻴﻬﺎ : ﻋﺎﺩﻳﻪ !! ﻋﺎﺩﻳﻪ ﻋﻴﻨﻚ ..
ﻓﻨﺼﺖ ﻓﻴﻪ ..
ﻫﻮ ﺿﺤﻚ ..
ﻭﺑﻠﻘﻴﺲ .. ﻣﻘﻌﻤﺰﺓ ﺣﺪﺍ ﻓﺎﻃﻤﻪ ﻭﺗﺸﻮﻓﻠﻬﻢ ..
ﺟﺎﺑﺘﻠﻪ ﻏﺎﻟﻴﻪ ﺍﻟﺤﺎﺟﺎﺕ ﻭﻋﻄﺘﻬﻤﻠﻪ .. ﻭﻫﻲ ﺗﺸﻮﻓﻠﻪ ﺑﺮﺑﻊ ﻋﻴﻦ ..
ﻋﻤﺎﺩ : ﻫﺎﺗﻲ ﻳﺪﻙ ..
ﻗﻌﺪﺕ ﺗﺸﺒﺢ ﻟﻴﺪﻫﺎ ..
ﻫﻮ ﺷﺪﻫﺎ ﺑﺮﻭﺣﻪ ﻭﻗﻌﺪ ﻳﺪﺍﻭﻱ ﻓﻴﻬﺎ ..
ﺧﻄﺮ ﻉ ﺑﺎﻟﻬﺎ ﻣﻮﻗﻒ ﺷﺒﻴﻪ ﺑﻴﻪ ﻣﻦ ﺳﻨﺘﻴﻦ ...
ﻫﻮ ﻗﺮﻳﺐ ﻋﻠﻴﻬﺎ ﻫﻲ ﺣﺎﺳﻪ ﺭﻭﺣﻬﺎ ﺑﻄﻴﺢ ﻣﻦ ﻃﻮﻟﻬﺎ ..
ﻏﺎﻟﻴﻪ : ﻭﺟﻬﻚ ﺍﺻﻔﺮ ..
ﺷﺒﺤﻠﻬﺎ ..
ﺭﺯﺍﻥ ؛ﺧﻔﺖ ﺑﺲ ..
ﻋﻤﺎﺩ ﺑﻀﺤﻜﻪ : ﻗﺼﺪﻙ ﺍﻧﺘﻲ ﺗﺨﺎﻓﻲ ! ؟
ﺿﺤﻜﺖ ﻏﺎﻟﻴﻪ ..
ﺭﺯﺍﻥ ﺑﺤﺪﻩ : ﺗﻘﻌﺪ ﻃﻮﻝ ﻋﻤﺮﻙ ﺑﺎﺭﺩ ﻭﺛﻘﻴﻞ ﺩﻡ ..
ﻫﻮ ﺑﺈﺑﺘﺴﺎﻣﻪ : ﻉ ﻓﻜﺮﻩ ﺍﻧﺘﻲ ﺍﻟﻮﺣﻴﺪﻩ ﺍﻟﻠﻲ ﻫﻜﻲ ﺭﺍﻳﻬﺎ ﻓﻴﺎ .
ﻛﻤﻞ ﻟﻔﺎﻥ ﺍﻟﻔﺎﺷﻪ ﻭﻭﺧﺮ .. ﻭﻫﻲ ﻳﺪﻭﺏ ﺗﺸﻮﻓﻠﻪ .
ﻭﻏﺎﻟﻴﻪ ﺭﻛﺰﺕ ﻣﻌﺎﻫﺎ ..
ﻋﻤﺎﺩ : ﻣﺮﺓ ﺗﺎﻧﻴﻪ ﺑﺎﻟﻔﺎﺱ ..
ﺭﺯﺍﻥ : ﺷﻨﻮ !!!
ﻋﻤﺎﺩ ﺑﻀﺤﻜﻪ؛ﻻﺑﺎﺍﺍﺱ .. ﻻﺑﺎﺱ .
ﻭﻏﺎﻟﻴﻪ ﺗﻀﺤﻚ ..
ﺭﺯﺍﻥ ﻃﺎﺭﺗﻠﻬﺎ : ﻫﻴﺎ ﺑﻠﻘﻴﺲ ..
ﺑﻠﻘﻴﺲ ﻧﺎﺿﺖ ﻭﻫﻲ ﺗﻀﺤﻚ ..
ﻋﻤﺎﺩ ﺑﻀﺤﻜﻪ : ﺗﻲ ﻏﻴﺮﻻ .. ﻏﻴﺮ ﺍﻗﻌﺪﻱ ..
ﻟﺒﺴﻮﺍ ﻓﺮﺟﻠﻴﻬﻢ ﻭﻃﻠﻌﻮﺍ ..
ﻋﻤﺎﺩ ﻭﺭﺍﻫﻢ : ﺍﻟﺘﺎﻟﺘﻪ ﺑﺎﻟﻠﻮﺯ ﻳﺎﺑﻠﻘﻴﺲ ..
ﻋﻀﺖ ﻏﺎﻟﻴﻪ ﻉ ﺷﺎﺭﺑﻬﺎ ﻭﻫﻲ ﺗﻀﺤﻚ ..
ﻋﻤﺎﺩ : ﻏﻴﺮ ﻛﺎﻥ ﻋﺎﺭﻓﺘﻴﻨﺎ ﻭﺑﻌﺪﻳﻦ ﻫﺠﻴﺘﻲ ﻳﺎﻣﻠﻌﻘﻪ ﻫﺎﻧﻢ ..
ﺑﻠﻘﻴﺲ ﺑﺘﻤﻮﺕ ﺑﺎﻟﻀﺤﻚ ﺑﻜﺘﻤﺎﻥ ..
ﻭﺻﻠﻮﺍ ﻓﻲ ﺑﺎﺏ ﺣﻮﺵ ﻣﻴﻼﺩ ..
ﺭﺯﺍﻥ : ﻭﺍﻟﻠﻪ ﻣﺎﺗﺤﺸﻤﻲ ﺗﻀﺤﻜﻲ ﻣﻌﺎﻩ ﻋﺎﺩﻱ ..
ﺑﻠﻘﻴﺲ ﺑﻀﺤﻜﻪ؛ﺗﻲ ﻭﻳﻦ ﺿﺤﻜﺖ ﻣﻌﺎﻩ ﺿﺤﻜﺖ ﻗﺪﺍﻣﻚ .. ﻟﻜﻦ ﻭﺍﻟﻠﻪ ﺍﻧﺘﻲ ﻗﻄﺎﻋﺔ ﺍﺭﺯﺍﻕ ﺑﺎﻫﻲ .. ﻗﺒﻞ ﻳﺒﻲ ﻳﺘﻌﺮﻑ ﻋﻠﻴﺎ ..
ﺭﺯﺍﻥ ﺑﻌﺼﺒﻴﻪ ﻣﻤﺰﻭﺟﻪ ﺑﺎﻟﻐﻴﺮﻩ : ﻳﺘﻌﺮﻑ ﻋﻠﻴﻚ ﺍﻟﻤﻮﺕ ﺑﺎﻫﻲ ..
ﻭﻣﺸﺖ ﺧﺸﺖ ﻟﻠﺤﻮﺵ ﻭﻫﻲ ﻣﻌﺼﺒﻪ ﻉ ﺍﻵﺧﺮ ..
ﻭﻭﺭﺍﻫﺎ ﺑﻠﻘﻴﺲ ﺗﻀﺤﻚ ..
🍁🍁🍁🍁
ﻏﺪﻭﺓ ﻳﺎﺣﻨﺎﻱ ﻣﺘﺴﻘﺪ ﻟﺘﺮﻛﻴﺎ .. ﺑﻨﻜﻤﻞ ﺭﻣﻀﺎﻥ ﻏﺎﺩﻱ ﻭﺑﻨﻌﻴﺪ ﻏﺎﺩﻱ .. ﻗﻠﺖ ﻧﺠﻲ ﻧﺸﻮﻓﻜﻢ ﺗﻮﺍ ﻭﺧﻼﺹ ..
ﻓﺎﻃﻤﻪ : ﻭﺷﻦ ﻋﻨﺪﻙ ﻓﻴﻬﺎ ..
ﻋﻤﺎﺩ ﺑﻀﺤﻜﻪ : ﻭﺍﺧﺪ ﻭﺣﺪﻩ ﺗﺮﻛﻴﻪ ﻏﺎﺩﻱ ..
ﻓﺎﻃﻤﻪ ﺑﺼﺪﻣﻪ : ﻧﻬﺎﺭ ﻣﻐﺒﺮ !!
ﻏﺎﻟﻴﻪ : ﻫﻬﻬﻬﻬﻪ .. ﻳﺒﺼﺮ ﻳﻤﻲ ...
ﻓﺎﻃﻤﻪ : ﻻ ﻫﺪﻯ ﻳﺪﻳﺮ ﻛﻞ ﺷﻲ ﻣﺎﻧﺴﺘﻐﺮﺏ ﻋﻠﻴﻪ ﺣﺎﺟﻪ ..
ﻋﻤﺎﺩ ﺑﻀﺤﻜﻪ : ﺩﻳﻤﺎ ﻣﻈﻠﻮﻡ ﺍﻧﻲ ..
ﻏﺎﻟﻴﻪ ﺑﻀﺤﻜﻪ : ﻓﻬﺪﻱ ﺑﺲ ﻣﻈﻠﻮﻡ ﺭﺍﻙ ..
ﺿﺤﻚ ﺑﺈﺣﺮﺍﺝ ..
🍁🍁🍁
ﺷﻮﻳﻪ ﻭﻃﻠﻌﺖ ﺑﻠﻘﻴﺲ ﺑﺘﺮﻭﺡ ... ﻭﻣﺸﺖ ﻣﻌﺎﻫﺎ ﺭﺯﺍﻥ ﺗﻮﺻﻠﻬﺎ ..
ﺑﻠﻘﻴﺲ : ﺍﻟﻠﻲ ﺟﺎﻳﻪ ﻉ ﺧﺎﻃﺮﻩ ﻣﺎﺻﺎﺭﺵ ﻣﻨﻪ ..
ﺭﺯﺍﻥ ﻭﻫﻲ ﺗﺸﺒﺢ ﺍﻟﻘﺪﺍﻡ : ﻻﺻﺎﺭ ..
ﺷﺒﺤﺖ ﺑﻠﻘﻴﺲ ﺍﻟﻘﺪﺍﻡ ﻓﻨﺼﺖ ..
ﻧﺰﻟﺖ ﻋﻴﻮﻧﻬﺎ ﻟﻮﻃﺎ ﻭﻉ ﺍﺳﺎﺱ ﺗﺘﺤﺸﻢ ..
ﺧﻄﻢ ﻣﻦ ﺣﺪﺍﻫﻢ ﻣﺤﻤﺪ ..
ﻭﻛﺄﻥ ﻣﺎﻓﻲ ﺣﺪ ..
ﺑﻠﻘﻴﺲ : ﺷﺒﺤﻠﻲ ..
ﺭﺯﺍﻥ ﺑﻀﺤﻜﻪ : ﻭﻻ ﻋﺒﺮﻙ ..
ﺑﻠﻘﻴﺲ ﻭﻗﻔﺖ ..
ﺍﻟﺘﻔﺘﺖ ﻭﺷﺒﺤﺘﻠﻪ ﻭﻫﻮ ﻳﻤﺸﻲ ..
ﺑﻌﺪﻳﻦ ﺍﻟﺘﻔﺘﺖ ﺍﻟﻘﺪﺍﻡ ﻭﻗﺎﻟﺖ : ﺑﺎﻫﻲ ﻳﺎﻣﺤﻤﺪ ﻛﺎﻥ ﻣﺎﻃﻴﺤﺘﻚ ﻉ ﻭﺟﻬﻚ ﻣﺎﻧﺒﺪﺍﺵ ﺑﻠﻘﻴﺲ .. ﻭﻣﺸﺖ ﺑﻌﺼﺒﻴﻪ ..
ﻭﺭﺯﺍﻥ ﻭﺭﺍﻫﺎ ﺗﻀﺤﻚ ... ﻭﺻﻠﺘﻬﺎ ﻓﻢ ﺍﻟﻘﻄﻌﻪ ..
ﻭﻭﻟﺖ ..
" ﺑﻴﻨﺎﺗﻬﻢ ﺳﻮﺭ .."
ﻭﻫﻲ ﻣﺎﺷﻴﻪ ﻭﻣﻜﻤﻠﻪ ﻃﺮﻳﻘﻬﺎ ..
ﻛﺎﻧﺖ ﺗﺸﺒﺢ ﻟﺮﺟﻠﻴﻬﺎ ﻭﻫﻲ ﺗﻤﺸﻲ ..
" ﻟﻮﻟﻮﻟﻮﻟﻮﻟﻮﻟﻮﻟﻮ .."
ﻗﺎﻣﺖ ﺭﺍﺳﻬﺎ ﻟﻘﺎﺗﻪ ﻭﺍﻗﻒ ﻣﻊ ﻣﺤﻤﺪ ﻳﻀﺤﻜﻮﺍ ﻭﻳﺸﻮﻓﻮﻟﻬﺎ ..
ﻫﻲ ﺷﻘﻠﺒﺖ ﻋﻴﻮﻧﻬﺎ ﻭﻣﺸﺖ ﺑﺴﺮﻋﻪ ..
ﻭﻫﻮ ﻳﻀﺤﻚ ﻋﻠﻴﻬﺎ ..
ﻣﺤﻤﺪ ﺑﻀﺤﻜﻪ : ﻣﻦ ﺑﺪ ﺍﻟﺒﻨﺎﺕ ﺍﻟﻠﻲ ﻋﺮﻓﺘﻬﻦ ﻛﻠﻬﻦ ﻣﺎﺧﺸﺖ ﻋﻘﻠﻚ ﻛﺎﻥ ﺭﺯﺍﻥ؟
ﻋﻤﺎﺩ؛ﻣﺎﺗﻘﺎﺭﻧﻬﺎﺵ ﺑﺤﺪ .. ﻫﺎﺩﻱ ﺑﻨﻴﺔ ﻗﻠﺒﻲ ..
ﻣﺤﻤﺪ ﺿﺤﻚ ﺑﺼﺪﻣﻪ : ﺣﻲ ﻋﻠﻴﻚ .
ﻋﻤﺎﺩ ﺍﺑﺘﺴﻢ ﺑﺈﺣﺮﺍﺝ : ﺑﺠﺪﻳﺎﺕ ﻭﺍﻟﻠﻪ ﻧﺤﻜﻲ .. ﺍﻟﺒﻨﺖ ﻫﺎﺩﻱ ﺧﺸﺖ ﻓﻴﻪ ﻣﻦ ﻭﻫﻲ ﺻﻐﻴﺮﻩ ﺑﻘﺮﻳﻨﺎﺗﻬﺎ ﻭﻛﺒﺮﺕ ﺩﺍﺧﻞ ﻗﺒﻞ ﺗﻜﺒﺮ ﺑﻴﻨﺎﺗﻜﻢ ..
ﻣﺤﻤﺪ : ﻋﻤﺎﺩ .. ﺑﺠﺪﻳﺎﺕ؟ !
ﻋﻤﺎﺩ ﺑﺈﺑﺘﺴﺎﻣﻪ؛ﺍﻗﺴﻤﻠﻚ ﺑﺎﻟﻠﻪ .. ﻧﺒﻴﻬﺎ ﻣﻦ ﺟﺪ ﺟﺪﻱ .. ﻏﻴﺮ ﺗﻜﺒﺮ ﺷﻮﻳﻪ ﺗﺎﻧﻴﻪ ﻣﺎﺿﺎﻝ ﺍﻻ ﺧﺎﻃﺒﻬﺎ ﻃﻮﻝ ..
ﺍﺑﺘﺴﻢ ﻣﺤﻤﺪ ﺑﻤﻔﺎﺟﺄﺓ ..
ﻋﻤﺎﺩ ﺗﻨﻬﺪ ﻭﻫﻮ ﻣﺒﺘﺴﻢ ﻭﻳﻮﺯﻉ ﻓﻨﻈﺮﺓ ﻉ ﺍﻟﻤﻜﺎﻥ ..
🍁🍁🍁🍁
ﻛﺎﻥ ﻓﻲ ﺍﻟﻤﻘﻬﻰ ..
ﻳﺸﻮﻑ ﻟﺘﻠﻴﻔﻮﻧﻪ ..
ﻗﺎﻣﻪ .. ﻭﺍﺗﺼﻞ ...
ﻧﺎﺩﻱ ﻣﺮﺓ ﺗﻨﻴﻦ ... ﺑﻌﺪﻳﻦ ﺍﻧﻔﺘﺢ ﺍﻟﺨﻂ ..
ﻫﺎﻧﻴﺒﺎﻝ : ﺷﻨﻮ ﺣﺎﻟﻚ ..
ﻋﺮﻭﺑﻪ : ﻛﻮﻳﺴﻪ ..
ﺻﻜﺮ ﻃﻮﻝ ﻭﺣﻂ ﺍﻟﺘﻠﻴﻔﻮﻥ ﻉ ﺍﻟﻄﺎﻭﻟﻪ ﻭﻛﻤﻞ ﺣﺴﺎﺑﺎﺗﻪ ..
ﻭﻋﺮﻭﺑﻪ ﺿﺤﻜﺖ ﻭﺣﻄﺖ ﺍﻟﺘﻠﻴﻔﻮﻥ ﺣﺪﺍﻫﺎ .. ﻭﻛﻤﻠﺖ ﺗﻔﺮﻳﺞ ﻉ ﺍﻟﺘﻠﻔﺰﻳﻮﻥ ..
🍁 ﻋﻨﺪﻩ ﻫﻮ ..
ﺭﻥ ﺗﻠﻴﻔﻮﻧﻪ ..
ﻛﺎﻥ ﺭﻗﻢ ﻏﺮﻳﺐ ..
ﺭﺩ ﻃﻮﻝ ...
ﻫﺎﻧﻴﺒﺎﻝ : ﺍﻟﻮ ...... ﺍﻟﻮﻭﻭﻭﻭﻭ ..
ﻻﺭﺩ ..
ﺭﺟﻊ ﻗﺎﻝ : ﺍﻟﻮﻭﻭ .. ﺗﺲ .. ﻭﺻﻜﺮ ﻃﻮﻝ ..
🍃🍁🍃🍁🍃
ﻫﻲ ﺻﻜﺮﺕ ﻣﻨﻪ ﻭﻛﺎﻧﺖ ﻣﺒﺘﺴﻤﻪ ﺑﺪﻣﻮﻉ ..
ﻣﺠﺪﻭﻟﻴﻦ : ﻳﺎﺍﺍﻩ ﻗﺪﺍﺵ ﺍﺳﺘﺎﺣﺸﺘﻪ ...💓
ﺭﻥ ﺗﻠﻴﻔﻮﻧﻬﺎ ﺍﻧﺨﻠﻌﺖ .. ﺷﺎﻓﺖ ﺍﻟﺮﻗﻢ ﻛﺎﻧﺖ ﻣﺮﺕ ﺧﻮﻫﺎ ..
ﺭﺩﺕ : ﻫﻴﺎ ﺻﻔﻮﺍ ﺷﻮﻳﻪ ﻭﻧﺎﺯﻟﻪ .. ﺑﻨﺨﺶ ﺍﻟﺤﻤﺎﻡ ﺣﺎﺷﺎﻙ ﺷﻮﻳﻪ ﺑﺲ ....... ﺗﻤﺎﻡ .... ﻭﺻﻜﺮﺕ ..
ﺗﻨﻬﺪﺕ ﻭﺣﻄﺖ ﺗﻠﻴﻔﻮﻧﻬﺎ ﻉ ﺍﻟﻜﺎﻣﺪﻳﻨﻮ ..
ﻭﻧﺎﺿﺖ ...
ﻃﻠﻌﺖ ﻣﻦ ﺍﻟﺪﺍﺭ ... ﻭﻣﺸﺖ ﺑﻄﺮﻳﻘﻬﺎ ﻟﻠﺤﻤﺎﻡ ...
ﻭﻫﻲ ﻣﺎﺷﻴﻪ ...
ﻛﺎﻥ ﻓﻲ ﻛﻮﺭﺓ ﺯﻱ ﺍﻟﻤﻄﺎﻃﻴﻪ ﻟﻮﻟﺪ ﺧﻮﻫﺎ ﻣﻠﻮﺣﻪ ﻓﻲ ﻃﺮﻳﻘﻬﺎ ﻫﻲ ﻣﺎﺭﻛﺰﺗﺶ ﻓﻴﻬﺎ ..
ﻋﻔﺴﺖ ﻋﻠﻴﻬﺎ ...
ﺯﻟﻘﺖ ... ﻋﻴﻄﺖ ﺑﺼﻮﺕ ﻋﺎﻟﻲ ...
ﻭﺟﺖ ﻃﺎﻳﺤﻪ ﻉ ﺣﺎﺷﻴﻪ ﺩﺭﺟﻪ ﺑﻴﻦ ﺍﻟﻤﻤﺮ ﻭﺍﻟﺤﻤﺎﻡ ...
ﺍﻟﻀﺮﺑﻪ ﺟﺖ ﻉ ﺭﺍﺳﻬﺎ ﻣﻦ ﺍﻟﺨﻠﻒ ..
ﻟﺤﻈﺎﺕ ﺑﺴﻴﻄﻪ ﺑﺲ ...
ﻭﻭﺍﻓﺘﻬﺎ ﺍﻟﻤﻨﻴﻪ ...
🍃 ﺍﻳﻪ ﻣﺎﺗﺖ ﻣﺠﺪﻭﻟﻴﻦ ...
ﻣﻘﺪﺭﻟﻬﺎ ﺗﻤﻮﺕ ﻓﻲ ﻫﺎﻟﺴﺎﻋﻪ ﻭﻫﺎﻟﻠﺤﻈﻪ ﺗﺤﺪﻳﺪﺍ ... ﻫﺎﺩﻱ ﺳﺎﻋﺘﻬﺎ .
ﻓﻲ ﺍﺣﺪ ﺍﻳﺎﻡ ﺷﻬﺮ ..8 ﺭﻣﻀﺎﻥ ...2010..
ﻓﻲ ﺳﺎﻋﻪ ﻣﺎ ... ﻳﺠﻲ ﺁﺟﻠﻬﺎ .. ﻭﺗﺮﺟﻊ ﺍﻷﻣﺎﻧﻪ ...
ﺗﺨﻴﻠﻮﺍ ﻟﻮ ﺍﺳﺘﻤﺮﺕ ﻣﻊ ﻫﺎﻧﻴﺒﺎﻝ ﻭﺗﺰﻭﺟﻮﺍ ... ﻭﺟﺎﺑﻮﺍ ﺻﻐﺎﺭ ..
ﻭﻓﺠﺄﺓ ﻳﺎﺧﺪﻫﺎ ﺍﻟﻤﻮﺕ ﻓﻲ ﻟﺤﻈﻪ ...
ﺗﺨﻴﻠﻮﺍ ﺣﺠﻢ ﺍﻷﻟﻢ ﺍﻟﻠﻲ ﻛﺎﻥ ﺣﻴﻌﻴﺸﻪ ..
ﺣﺘﻰ ﻟﻮ ﻣﺎﺣﺒﻬﺎﺵ .. ﺗﻘﻌﺪ ﻣﺮﺗﻪ ﻭﺍﻡ ﺻﻐﺎﺭﻩ ..
ﺗﺨﻴﻠﻮﺍ ﻟﻮ ﻗﻌﺪ ﻳﺮﺑﻲ ﻓﻲ ﺻﻐﺎﺭ ﻳﺘﺎﻣﻰ ﻛﻴﻒ ﺣﻴﻜﻮﻥ ﺷﻜﻞ ﻣﻌﺎﻧﺎﺗﻪ ..
ﺗﺨﻴﻠﻮﺍ ﻭﺗﺨﻴﻠﻮﺍ ...
ﻛﻠﻪ ﺧﻴﺮﻩ .....
ﺩﺧﻮﻟﻬﺎ ﻟﺤﻴﺎﺗﻪ ﻛﺎﻥ ﻟﺴﺒﺐ .. ﻭﺍﻧﻘﻀﻰ ﻭﺭﺍﺡ ..
ﺑﺲ ﻳﻘﻌﺪ ﺍﻟﺴﺆﺍﻝ ﻫﻨﻲ ...
ﻭﻗﻊ ﺍﻟﺨﺒﺮ ﻋﻠﻴﻪ ﻟﻤﺎ ﻳﻌﺮﻓﻪ ﻛﻴﻒ ﺣﻴﻜﻮﻥ؟ ...
🍃🍃🍃🍃🍃🍃
ﻭﺳﺒﺤﺎﻧﻪ ..
ﻳﻜﻮﻥ ﺍﻟﻮﺍﺣﺪ ﻳﻀﺤﻚ ﻭﻳﻠﻌﺐ ﻭﺟﻮﻩ ﻣﻠﻴﺢ ..
ﺧﻼﻝ ﻟﺤﻈﻪ .. ﻳﻄﻴﺢ ﻳﻤﻮﺕ ...
ﻛﻠﻨﺎ ﻋﺎﺭﻓﻴﻦ ﺍﻟﻤﻮﺕ
ﻻ ﻧﻌﺮﻓﻮﻟﻪ ﻣﻮﻋﺪ .. ﻭﻻﺳﺎﻋﻪ .. ﻓﻠﺤﻈﻪ .. ﻓﻄﺮﻓﺔ ﻋﻴﻦ ..
ﻳﺠﻲ ... ﻭﻣﺎﻳﻌﻄﻴﺶ ﻓﻲ ﺍﻟﻐﺎﻟﺐ ﻓﺮﺻﻪ ﻹﻧﺴﺎﻥ ﺑﺶ ﻳﻮﺩﻉ ﺍﺣﺒﺎﺑﻪ ..
🍁 ﺍﻳﻴﻴﻪ ...
ﻣﺎﺣﺪﻋﺎﺭﻑ ﺳﺎﻋﺘﻪ ﺍﻣﺘﻰ ﻭﻻﻋﺎﺭﻑ ﺷﻦ ﻣﺪﺭﻗﻠﻪ ﻓﻲ ﺍﻟﻘﺪﺭ
ﺯﻱ ﺍﻟﻘﺬﺍﻓﻲ
ﺍﻟﻴﻮﻡ 2010\9\1 ﺍﻟﻌﻴﺪ 41
🍁 ﻧﺬﻛﺮﻩ ﻓﻲ 2009 ﻓﻲ ﺍﻟﻌﻴﺪ 40
ﻭﻫﻮ ﻳﺘﺼﺪﺭ ﺍﻟﻤﻮﺟﻮﺩﻳﻦ ... ﺑﻠﺒﺎﺳﻪ ﺍﻟﻌﺴﻜﺮﻱ ﺍﻟﻤﻤﻴﺰ ..
ﻭﻓﻲ ﻳﺪﻩ ﺍﻟﻌﺼﺎ ﻣﺘﺎﻋﻪ ..
ﻳﺘﻔﺮﺝ ﻉ ﻣﻠﺤﻤﺔ ﻓﺎﺭﺱ ﻭﺭﺟﺎﻝ
ﺑﺄﻧﻔﻪ ... ﻭﻛﺒﺮ
ﻇﻦ ﺍﻥ ﻟﻦ ﻳﻘﺪﺭ ﻋﻠﻴﻪ ﺍﺣﺪ
ﺣﺘﻰ ﻓﻲ ﺍﻟﺤﻠﻢ .. ﺣﺘﻰ ﻓﻲ ﺍﻟﺨﻴﺎﻝ
ﻣﺎﻛﺎﻧﺶ ﻣﻤﻜﻦ ﻳﺘﻮﻗﻊ ﺍﻧﻪ ﺑﻌﺪﻫﺎ ﺑﺴﻨﺔ ﻓﻲ ﻧﻔﺲ ﺍﻟﻴﻮﻡ ﺣﻴﻌﻴﺶ ﺣﻴﺎﺓ ﺍﻟﻬﺎﺭﺑﻴﻦ ﻣﻦ ﺍﻟﻘﺪﺭ ﺍﻟﻤﺤﺘﻮﻡ ..
ﻭﻟﻤﻦ ﺍﻟﻤﻠﻚ ﺍﻟﻴﻮﻡ ..
ﻟﻠﻲ ﺭﺑﻲ ﻳﺒﻴﻪ ..
ﻛﺎﻧﺖ ﻟﻴﺒﻴﺎ ﻛﻠﻬﺎ ﺗﺘﻔﺮﺝ .. ﻉ ﺍﻹﺣﺘﻔﺎﻝ ..
ﻭﺍﻟﻤﻠﺤﻤﻪ ..
ﻭﻳﺸﻮﻓﻮﺍ ﻓﻲ ﺍﻟﻔﻨﺎﻧﻴﻦ ﺍﻟﻠﻲ ﻳﻐﻨﻮﺍ ..
ﺍﻛﺜﺮ ﺳﺆﺍﻝ ﻳﺴﺄﻟﻮﺍ ﻓﻴﻪ ﺍﻓﺮﺍﺩ ﺍﻟﺸﻌﺐ ﻭﻫﻤﺎ ﻳﺘﺎﺑﻌﻮﺍ ..
" ﺯﻋﻤﻪ ﻗﺪﺍﺵ ﺩﻓﻌﻮﺍ ﻟﻠﻔﻨﺎﻥ ﻓﻼﻧﻲ ﻭﺍﻟﻔﻨﺎﻧﻪ ﺍﻟﻔﻼﻧﻴﻪ "
ﻣﺎﻫﻮ ﺣﻨﻲ ﻣﻌﺮﻭﻓﻴﻦ ..
ﺩﺃﺑﻨﺎ ﻣﻦ ﺳﻨﻴﻦ ﺧﻠﺖ ..
" ﺧﻴﺮﻧﺎ ﻟﻐﻴﺮﻧﺎ .."
ﻫﻮ ﺑﺼﺮﺍﺣﻪ ..
ﺑﺠﺪﻳﺎﺕ ... ﻗﺪﺍﺵ ﺧﺪﻱ ﺣﺴﻴﻦ ﺍﻟﺠﺴﻤﻲ ﻭﻫﻮ ﻳﻐﻨﻲ ..
ﻳﺎﻟﻴﺒﻴﺎ ﻳﺎﻟﻴﺒﻴﺎ ﻳﺎﻟﻴﺒﻴﺎ ﻳﺎﺟﻨﻪ ...
... ﺍﻟﻤﻌﺬﺭﺓ ﻳﺎﻟﺠﺴﻤﻲ ..
ﺍﻧﺖ ﻣﻘﺘﻨﻊ ﺑﺎﻟﻠﻲ ﺗﻐﻨﻲ ﻓﻴﻪ ..
ﻻ ﻏﻴﺮﻗﻮﻝ ﺩﺭﺕ ﺩﻭﺭﺓ ﻉ ﺍﻟﺒﻼﺩ ﻭﺷﻔﺘﻬﺎ ...
ﻟﻮ ﻗﺎﺭﻧﺖ ﺑﻴﻨﻬﺎ ﻭﺑﻴﻦ ﺑﻼﺩﻙ ...
ﺣﺘﻌﺮﻑ ﻭﻗﺘﻬﺎ ﺍﻥ ﻫﺎﻟﻜﻠﻤﺎﺕ ﺑﻼﺩﻙ ﺍﺣﻖ ﺑﻴﻬﺎ ..
ﺑﻼﺩﻙ ...
ﺍﻟﻠﻲ ﻓﻴﻮﻡ ..
ﻓﻲ ﺳﻨﺔ ...1975 ﺟﻲ ﺯﻋﻴﻤﻬﺎ ﺍﻟﺮﺍﺣﻞ ﻟﻄﺮﺍﺑﻠﺲ ﻭﺍﻧﺒﻬﺮ ﺑﻴﻬﺎ ..
ﺟﻲ ﺑﺶ ﻳﺪﻳﺮ ﻋﻤﻠﻴﻪ ﻉ ﻋﻴﻮﻧﻪ ..
ﺍﻧﺘﻮﺍ ﻣﺴﺘﻮﻋﺒﻴﻦ ...
ﺟﻲ ﺑﺶ ﻳﺪﻳﺮ ﻋﻤﻠﻴﻪ ﻉ ﻋﻴﻮﻧﻪ ﻓﻲ ﻟﻴﺒﻴﺎ ...
ﺭﻭﺡ ﻭﻫﻮ ﻳﺘﻤﻨﻰ ﻟﻮ ﻳﻮﻡ ﺍﻹﻣﺎﺭﺍﺕ ﺗﻮﺻﻞ ﺷﻮﻳﻪ ﻣﻦ ﺍﻟﻠﻲ ﻭﺻﻼﺗﻪ ﻟﻴﺒﻴﺎ ..
ﻭﻗﺘﻬﺎ ﺍﻷﻣﺎﺭﺍﺕ ﺻﺤﺮﺍ ...
ﺧﻼﻝ 35 ﺳﻨﻪ ...
ﺍﺻﺒﺤﺖ ﺟﻨﻪ ﺣﻘﻴﻘﻴﻪ ...
ﻭﻟﻴﺒﻴﺎ ﺧﻼﻝ 40 ﺳﻨﻪ ...
ﺇﺯﺍﻟﻪ ﻟﻐﺮﺽ ﺍﻟﺘﻄﻮﻳﺮ !!!
ﻭﺍﻟﻠﻠﻴﺒﻲ ﻟﻮ ﻛﺢ .. ﻳﻄﻴﺮ ﻟﺘﻮﻧﺲ ...
ﻛﻨﺎ ﺧﻼﻝ 40 ﺳﻨﻪ ﻧﻤﺸﻮﺍ ﺑﺨﻄﻮﺍﺕ ﺛﺎﺑﺘﻪ ﻟﻠﺨﻠﻒ ..
🍃 ﺍﻟﺒﻌﺾ ﺣﻴﺸﻜﻚ ﻓﻲ ﺣﻀﺎﺭﺓ ﺍﻹﻣﺎﺭﺍﺕ ﻭﻣﺼﺪﺭﻫﺎ ... ﺑﻼﺵ ﻣﻨﻬﺎ ﻭﺷﻮﻓﻮﺍ ﻟﻤﺎﻟﻴﺰﻳﺎ ... ﺍﻟﻠﻲ ﻓﻲ ﻋﺸﺮﻳﻦ ﺳﻨﻪ ﻗﻔﺰﺕ ﻗﻔﺰﺓ ﻋﺎﻟﻴﻪ ﺟﺪﺍ ...
ﻭﺣﻄﻮﺍ ﻓﻲ ﺑﺎﻟﻜﻢ ..
ﻭﻻ ﻭﺣﺪﻩ ﻓﻴﻬﻢ ﻋﻨﺪﻫﺎ ﺭﺑﻊ ﻣﻦ ﺍﻟﺜﺮﻭﺍﺕ ﺍﻟﻠﻲ ﺗﻤﻠﻜﻬﺎ ﻟﻴﺒﻴﺎﻧﺎ🍃
🍁 ﻳﺎﻟﻴﺒﻴﺎ ﻳﺎﺟﻨﻪ ..
ﻟﻢ ﺗﺼﺪﻕ ﻫﺪﻩ ﺍﻟﻌﺒﺎﺭﺓ ﺇﻻ ﺑﻌﺪ ..2011
ﻟﻮ ﻗﺎﺭﻧﺎ ﻟﻴﺒﻴﺎ ﺑﻨﻔﺴﻬﺎ ...
ﻟﻴﺒﻴﺎ ..2010 ﻟﻴﺒﻴﺎ ...2020
ﻭﺑﻜﻞ ﺻﺪﻕ ..
ﻟﻴﺒﻴﺎ 2010 ﻓﻌﻼ ﻛﺎﻧﺖ ﺟﻨﻪ 💔🍃
🍃🍃🍃🍃🍃🍃
ﻭﻋﺪﻱ ﻳﺎﺍﻳﺎﻡ ﻋﺪﻱ ..
ﻭﺧﻮﺩﻱ ﻣﻦ ﺍﻋﻤﺎﺭﻧﺎ ..
ﻓﻲ ﺷﻬﺮ ..11
ﺧﺪﺕ ﺍﻻﻳﺎﻡ ﻣﻦ ﻋﻤﺮ ﺑﻮ ﻃﺎﺭﻕ ... ﺍﻟﻠﻲ ﺑﻌﺪ ﺍﻟﻌﻤﻠﻴﻪ ﺧﺶ ﻏﻴﺒﻮﺑﻪ ..
ﻗﻌﺪ ﺗﻼﺕ ﺷﻬﻮﺭ ...
ﻭﺗﻮﻓﻰ ...
ﻫﻮ ﻣﺎﺕ ..
ﻭﻣﺎﺗﺖ ﻣﻌﺎﻩ ﺍﺣﻼﻡ ﻭﺍﻣﺎﻝ ﺭﺑﺎﺏ ...
ﺭﺑﺎﺏ ﺍﻟﻠﻲ ﻛﻞ ﻣﺎﻝ ﺍﺣﺴﺎﺳﻬﺎ ﺍﻥ ﻃﺎﺭﻕ ﻣﺶ ﻟﻴﻬﺎ ﻳﺰﻳﺪ ﻳﻜﺒﺮ ﺍﻛﺜﺮ ﻭﺍﻛﺜﺮ ...
ﻣﺸﺖ ﻫﻲ ﻭﺍﻫﻠﻬﺎ ﻟﺒﻨﻐﺎﺯﻱ ﻋﺰﻭﺍ ...
ﻭﻛﺎﻥ ﻭﺿﻊ ﺍﻟﻌﻴﻠﻪ ﺍﻟﻨﻔﺴﻲ ﺻﻌﺐ ﻟﻠﻐﺎﻳﻪ ..
ﺍﻟﺒﻨﺎﺕ ﻣﺶ ﺻﺎﺑﺮﺍﺕ ﻗﺮﻳﺐ ﻳﻬﺒﻠﻮﺍ ﻉ ﺑﻮﻫﻢ ...
🍁 ﻣﺶ ﻏﻴﺮ ﺍﻟﺒﻨﺎﺕ ...
ﺣﺘﻰ ﺍﻷﻭﻻﺩ ..
ﻭﺑﺎﻟﺬﺍﺕ ﻃﺎﺭﻕ ...
ﺍﻟﻠﻲ ﺧﺶ ﻓﻲ ﺣﺎﻟﺔ ﺣﺰﻥ ﺷﺪﻳﺪ ﺑﻌﺪ ﻭﻓﺎﺓ ﺑﻮﻩ ..
ﻭﺷﺒﻪ ﻗﻄﻊ ﺭﺑﺎﺏ ﻣﺮﺓ ﻭﺣﺪﻩ ...
ﻭﻫﻲ ﻋﺎﻃﻴﺎﺗﻪ ﻋﺬﺭﻩ ...
🍁🍁🍁🍁
ﺍﻭﺍﺧﺮ ﺷﻬﺮ ...12
ﻣﻊ ﺑﺪﺍﻳﻪ ﻫﺒﻮﺏ ﺭﻳﺎﺡ ﺍﻟﺘﻐﻴﻴﺮ ﻉ ﺍﻟﻌﺎﻟﻢ ﻛﺎﻣﻞ ..
ﺑﺴﺒﺐ ﻛﻒ ...
ﺍﻫﺎﻧﻪ .. ﺍﺳﺘﻌﺒﺎﺩ ... ﺍﺫﻻﻝ ..
ﺍﻟﺒﻮﻋﺰﻳﺰﻱ ... ﻣﺎﺗﺤﻤﻠﺶ ﻛﻤﻴﺔ ﺍﻟﻘﻬﺮﺍﻟﻠﻲ ﺷﺎﻓﻬﺎ ..
ﺍﻟﻠﻲ ﺧﻼ ﺍﻟﺒﻮﻋﺰﻳﺰﻱ ﻳﺤﺮﻕ ﻧﻔﺴﻪ ﻣﺶ ﺍﻟﻜﻒ ﺑﺤﺪ ﺫﺍﺗﻪ ..
ﺑﻞ ﺗﺮﺍﻛﻤﺎﺕ ﻣﻦ ﺍﻟﻘﻬﺮ ﻭﺍﻟﺬﻝ ﻭﺍﻟﺤﺎﺟﻪ
🍃 ﻭﻧﻌﺖ ﺍﻟﺒﻮﻋﺰﻳﺰﻱ ﺑﺎﻟﻌﻤﺎﻟﻪ ﻫﻮ ﻋﻼﻣﻪ ﻉ ﺳﻔﺎﻫﻪ ﻭﺍﻟﺒﻼﻫﻪ🍃
🍁 ﺍﻟﻜﻞ ﻛﺎﻥ ﻳﺮﺍﻗﺐ ﻓﻲ ﺍﻟﻮﺿﻊ ﻓﻲ ﺗﻮﻧﺲ ...
ﺍﻟﻌﺎﻟﻢ ﺍﻟﻠﻲ ﺑﺮﺍ ..
ﺍﻟﻠﻲ ﻗﺎﻟﻮﺍ ﺍﻥ ﺍﻟﺜﻮﺭﺓ ﻣﻦ ﺗﺨﻄﻴﻄﻪ ..
ﻫﻮ ﻧﻔﺴﻪ ﻛﺎﻥ ﻣﺘﺨﺒﻂ ﻣﻦ ﺍﻟﻠﻲ ﺻﺎﺭ ..
ﻣﺜﻼ ﺳﺎﺭﻛﻮﺯﻱ ... ﻛﺎﻥ ﺿﺪﻫﺎ ﻓﻲ ﺗﻮﻧﺲ .. ﺳﻜﺖ ﻓﻲ ﻣﺼﺮ ﺟﻲ ﻣﻌﺎﻫﺎ ﻓﻲ ﻟﻴﺒﻴﺎ ..
ﺍﻭﺑﺎﻣﺎ .. ﺳﻜﺖ ﻓﻲ ﺗﻮﻧﺲ .. ﺟﻲ ﺿﺪﻫﺎ ﻓﻲ ﻣﺼﺮ .. ﺟﻲ ﻣﻌﺎﻫﺎ ﻓﻲ ﻟﻴﺒﻴﺎ ..
ﺍﻟﺘﺨﺒﻂ ﻫﺪﺍ ﺳﺒﺒﻪ ..
ﺍﻥ ﺍﻟﺼﻮﺭﺓ ﻋﻨﺪﻫﻢ ﻣﻦ ﺍﻟﺒﺪﺍﻳﺔ ﻣﺎﻛﺎﻧﺘﺶ ﻭﺍﺿﺤﻪ ..
ﺑﺲ ﺑﻌﺪﻳﻦ ﻭﺿﺤﺖ .. ﻭﺑﺪﻭﺍ ﻳﻠﻌﺒﻮﺍ ﻉ ﺍﻟﻤﻀﻤﻮﻥ ..
🍁 ﺑﻌﻴﺪﺍ ﻋﻦ ﺍﻟﺴﻴﺎﺳﻪ ... ﻭﻏﻤﻬﺎ ...
2010\12\25
💕 ﺣﻤﻴﺪﻩ ﺟﺎﺑﺖ ﺑﻨﻮﺗﻪ ...
ﺳﻤﺘﻬﺎ ﺣﻨﻴﻦ ...
ﻛﺎﻧﺖ ﺗﺸﺒﻬﻠﻬﺎ ﻫﻲ ﻫﻠﺒﻪ ...
ﻃﺒﻌﺎ ﻭﻟﺪﺗﻬﺎ ﻓﻲ ﺍﻟﺠﻼﺀ ... ﺑﺎﻟﻌﻤﻠﻴﻪ ..
ﻭﺍﻟﻜﻞ ﻓﺮﺣﻮﺍ ﺑﻴﻬﺎ ﻗﺮﻳﺐ ﻃﺎﺭﻭﺍ ...
ﻭﻣﺎﺧﻠﻮﺍ ﻣﺎﺟﺎﺑﻮﻟﻬﺎ ﻭﺩﺍﺭﻭﻟﻬﺎ ..
ﺑﻌﺪ ﺻﻜﺮﺕ ﺷﻬﺮ ...
ﺭﻓﻌﻮﻫﺎ ﻟﻤﺼﻮﺭ ﻋﺮﻭﺑﻪ ..
ﺻﻮﺭﺗﻬﺎ ﻫﻲ ﻭﺍﻣﻬﺎ ﻭﺧﺎﻟﻬﺎ ﻣﻌﺎﻫﻢ 💕...
ﺑﻌﺪ ﺻﻜﺮﺕ ﺷﻬﺮ؟
ﻳﻌﻨﻲ ﺣﻨﻲ ﺗﻮﺍ ...
ﻓﻲ ﺍﻭﺍﺧﺮ ﻳﻨﺎﻳﺮ ...
ﻭﻣﺼﺮ ﺗﺤﺮﻛﺖ ..
ﻭﺟﻤﺎﻋﺘﻨﺎ ﺧﺎﻓﻮﺍ ...
ﺍﻟﻮﺿﻊ ﻣﺎﻳﻄﻤﻨﺶ ..
ﻉ ﺍﻟﻴﻤﻴﻦ ﻭﻋﻦ ﺍﻟﺸﻤﺎﻝ ... ﺛﻮﺭﺗﻴﻦ ..
ﻣﻌﻘﻮﻟﻪ ﻣﺎﻳﻄﻮﻟﻨﺎ ﻣﻨﻬﻢ ﺷﻲ . ؟
ﻃﺎﻟﻨﺎ ﺍﻛﺜﺮ ﻣﻤﺎ ﻃﺎﻟﻬﻢ ﺑﻤﻴﺔ ﻣﺮﺓ ...
🍁🍁🍁
ﺩﻻﻝ ﺍﻛﺜﺮ ﻭﺣﺪﻩ ﻗﻠﺒﻬﺎ ﻛﺎﻥ ﻭﺍﻛﻠﻬﺎ ﺗﺘﻔﺮﺝ ﻭﺧﺎﻳﻔﻪ ﻟﻴﻦ ﺧﻼﺹ ..
ﺣﻄﺖ ﻳﺪﻫﺎ ﻉ ﺻﺪﺭﻫﺎ ﻭﺣﺎﺳﻪ ﺑﻘﺒﻀﺔ ﻗﻠﺐ ﻗﻮﻳﻪ ..
ﻭﺍﻟﺼﺪﺭ ﻣﻄﺒﻖ ﻉ ﺍﻵﺧﺮ ...
ﺳﻤﻌﺖ ﻋﻴﻄﺔ ﻣﻌﻤﺮ ﺍﻧﺨﻠﻌﺖ ..
ﺷﺒﺤﺘﻠﻪ ﻟﻘﺎﺗﻪ ﻳﺘﻼﺣﻖ ﻓﻲ ﻟﻌﺒﺘﻪ ..
ﻧﺎﺿﺖ ﻭﻫﻲ ﻗﻤﺔ ﺍﻟﻀﻴﻖ ﻗﺮﺑﺘﻬﺎﻟﻪ ..
ﺳﻤﻌﺖ ﺻﻮﺕ ﺿﺤﻚ ..
ﺍﻟﺘﻔﺘﺖ ﻟﻘﺖ ﻋﻤﺎﺭ ﻭﺟﻮﺍﺩ ... ﻳﺘﻔﺮﺟﻮﺍ ﻉ ﺍﻟﻼﺏ ﻭﻳﻀﺤﻜﻮﺍ ...
ﻗﻌﺪﺕ ﺗﺸﻮﻓﻠﻬﻢ ﻫﻠﺒﻪ ..
ﺑﻌﺪﻳﻦ ﻭﻟﺖ ﻗﻌﻤﺰﺕ ﻭﻫﻲ ﺗﺸﻮﻓﻠﻬﻢ ..
ﻋﻤﺎﺭ ﺻﺢ ﻛﺎﻥ ﻳﻀﺤﻚ ..
ﺑﺲ ﺣﺎﻟﻪ ﻛﺎﻥ ﺯﻱ ﺣﺎﻟﻬﺎ ﺑﺎﻟﺰﺑﻂ 🍃
🍁🍁🍁🍁🍁
ﺭﺍﺍﺍﺍﻧﻴﺎﺍﺍﺍ
ﺭﺍﺍﺍﺍﻧﻴﺎﺍﺍﺍ
ﺭﺍﻧﻴﺎ : ﻧﺴﻤﻊ ﻓﻴﻚ ﻳﺎﺭﻣﺰﻱ ﻭﻳﻨﻚ ...
ﺭﺍﺍﺍﺍﺍﻧﻴﺎﺍﺍﺍﺍ .
ﺗﺒﻊ ﻓﻲ ﺍﻟﺼﻮﺕ ﻭﻫﻲ ﻣﺴﺘﻐﺮﺑﻪ : ﺭﻣﺰﻱ ﺧﻴﺮﻩ ﺻﻮﺗﻚ ﻫﻜﻲ ﻣﻜﺘﻮﻡ . ؟
ﺭﺍﺍﺍﺍﺍﺍﺍﺍﻧﻴﺎ
ﻭﺻﻠﺖ ﻟﻤﺼﺪﺭ ﺍﺍﻟﺼﻮﺕ ...
ﻛﺎﻥ ﺑﻴﺮ ...
ﺭﺍﻧﻴﺎ : ﺭﻣﺰﻱ؟
ﺭﺍﻧﻴﺎ ... ﺧﻠﻴﻨﻲ ﻓﻲ ﺑﺎﻟﻚ ..
ﻗﻌﺪﺕ ﺗﺸﻮﻑ ﻟﻠﺒﻴﺮ .. ﻛﺎﻥ ﻋﻤﻴﻖ ﻭﻛﻠﻪ ﻇﻼﻡ .. ﻣﺎﺗﺸﻮﻑ ﻓﻲ ﺣﺪ ..
ﻧﺎﺩﺕ ﺑﺄﻋﻠﻰ ﺻﻮﺗﻬﺎ : ﺭﻣﺰﻳﻴﻴﻴﻴﻲ ...
ﻫﻮ ﻳﺮﺩ؛ﺧﻠﻴﻨﻲ ﻓﻲ ﺑﺎﻟﻚ ...
ﻭﻫﻲ ﺗﻌﻠﻲ ﻓﺼﻮﺗﻬﺎ ﺍﻛﺜﺮ : ﺭﻣﺰﻳﻴﻴﻴﻴﻴﻴﻴﻴﻲ ...
ﻻﺭﺩ ..
ﻗﻌﺪﺕ ﺗﻌﻴﻂ ﻭﺗﻘﻮﻝ : ﺭﻣﺰﻳﻴﻴﻴﻴﻴﻴﻴﻴﻴﻴﻴﻲ ....
ﻭﺗﻌﺎﻭﺩ ﻓﻴﻬﺎ ﻭﺗﻜﺮﺭ ....
ﻟﻌﻨﺪﻣﺎ ...
ﺭﺍﻧﻴﺎ ... ﺭﺍﻧﻴﺎ ... ﻧﻮﺿﻲ ..
ﻧﺎﺿﺖ ﻣﻔﺰﻭﻋﻪ ﺷﺒﺤﺖ ﻷﺧﺘﻬﺎ ﺷﻮﻳﻪ ..
ﺑﻌﺪﻳﻦ ﻭﻟﺖ ﺭﻗﺪﺕ ﻭﻋﻄﺘﻬﺎ ﺑﺎﻟﻈﻬﺮ ...
ﺗﻨﻬﺪﺕ ﺭﺑﺎﺏ ﺑﻀﻴﻖ ﻭﻭﻟﺖ ﻟﻔﺮﺍﺷﻬﺎ ...
🍃🍃🍃
ﺑﻌﺪ ﻳﻮﻣﻴﻦ ..
🍁 ﻛﻴﻒ ﻳﻌﻨﻲ؟
ﻃﺎﺭﻕ : ﻳﻌﻨﻲ ﺭﺑﻲ ﻳﺒﻌﺘﻠﻚ ﺍﻟﻠﻲ ﺍﺣﺴﻦ ﻣﻨﻲ ..
ﺿﺤﻜﺖ ﺑﺼﺪﻣﻪ : ﺗﺒﺼﺮ ﺻﺢ .. ﻣﻘﻠﺐ ﻣﻦ ﻣﻘﺎﻟﺒﻚ ..
ﻃﺎﺭﻕ : ﻻﻋﺎﺩ ﻓﻲ ﺑﺼﺎﺭﺓ ﻭﻻﺿﺤﻚ .. ﺍﻧﻲ ﻳﺎﺭﺑﺎﺏ ﺧﻼﺹ .. ﺑﻌﺪ ﺑﺎﺗﻲ ﻣﻌﺎﺵ ﻋﻨﺪﻱ ﺭﻏﺒﺔ ﻓﻲ ﺷﻲ ﻏﻴﺮ ﺍﻧﻲ ﻧﻘﻌﺪ ﻷﻣﻲ ﻭﺧﻮﺍﺗﻲ ﺑﺲ .. ﻫﻦ ﺑﺤﺎﺟﺘﻲ ﺍﻛﺜﺮ ﻣﻦ ﺍﻱ ﺣﺪ ..
ﺭﺑﺎﺏ ﺑﻠﻌﺖ ﺭﻳﻘﻬﺎ ﻭﻗﺎﻟﺖ؛ﻣﻌﻠﻴﺸﻲ ﻃﺎﺭﻕ ﺍﻧﺖ ﺗﻮﺍ ﻧﻔﺴﻴﺘﻚ ﺗﻌﺒﺎﻧﻪ .. ﻋﺎﺩﻱ ﺍﻧﻲ ﻣﺴﺘﻌﺪﻩ ﻧﺼﺒﺮ ﻋﻠﻴﻚ ﻣﺎﻓﻴﺶ ﻣﺸﻜﻠﻪ .. ﻧﻮﻗﻒ ﻣﻌﺎﻙ .. ﻟﻴﻦ ﺗﺘﻌﺪﺍ ﻫﺎﻷﺯﻣﻪ ..
ﻗﺎﻃﻌﻬﺎ ﻭﻗﺎﻝ : ﺭﺑﺎﺏ .. ﺭﺑﺎﺏ .. ﺍﻣﻲ ﻭﺧﻮﺍﺗﻲ ﻣﺎﻋﻨﺪﻫﻢ ﺣﺪ ﻏﻴﺮﻱ ﺧﻮﺗﻲ ﺍﻷﺧﺮﻳﻦ ﺍﻟﻠﻲ ﻫﺪﺍ ﻣﺘﺰﻭﺝ ﺑﻤﺴﺆﻭﻟﻴﺎﺗﻪ .. ﻭﺍﻧﻲ ﺑﺎﻟﻨﺴﺒﻪ ﻟﻴﻬﻦ ﺑﻮ ﺍﻟﻌﻴﻠﻪ ﺍﻟﺘﺎﻧﻲ ... ﺍﺳﻒ ﻣﺎﻧﻘﺪﺭﺵ ﻧﻌﻄﻲ ﻭﻗﺘﻲ ﻭﺣﻴﺎﺗﻲ ﻏﻴﺮ ﻟﻴﻬﻦ ﻫﻦ ﻭﺑﺲ ..
ﻗﻌﺪﺕ ﺗﺸﺒﺤﻠﻪ ﺑﺠﻤﻮﺩ ..
ﻃﺎﺭﻕ : ﺳﺎﻣﺤﻴﻨﻲ ... ﻭﺭﻳﻲ ﻳﺠﻴﺒﻠﻚ ﻧﺼﻴﺐ ﻳﺴﺘﺎﻫﻠﻚ ﻳﺎﺭﺑﺎﺏ ...
ﻟﺒﺲ ﻧﻈﺎﺭﺍﺗﻪ ﻭﻟﻒ ﻭﻣﺸﻲ ..
ﻭﺧﻼﻫﺎ ﻭﺍﻗﻔﻪ ﻳﻀﺮﺏ ﻓﻴﻬﺎ ﺍﻟﺼﻘﻊ ...
ﻭﻣﺶ ﻣﺴﺘﻮﻋﺒﻪ ﺑﺘﺎﺗﺎ ﺍﻟﻠﻲ ﺻﺎﺭ ...
🍃 ﻃﺎﺭﻕ ﻓﻲ ﻫﻠﺒﻪ ﺯﻳﻪ .. ﺳﻴﺒﻮﺍ ﻭﻓﺴﺨﻮﺍ ﻉ ﺧﺎﻃﺮ ﻧﻔﺲ ﺍﻟﺴﺒﺐ
ﻭﻣﻤﻜﻦ ﺣﺰﻧﻪ ﻉ ﺑﻮﻩ ﺯﺍﺩﻩ ﻉ ﻣﺎﺑﻴﻪ 🍃
ﺭﺑﺎﺏ ﻳﻮﻣﻬﺎ ..
ﺭﻗﺪﺕ ﻓﻲ ﺍﻟﻤﺴﺘﺸﻔﻰ .. ﺻﺎﺭﻟﻬﺎ ﻫﺒﻮﻁ ﺣﺎﺩ ..
ﻣﻦ ﻗﻮﺓ ﺍﻟﺼﺪﻣﻪ ..
🍁 ﺗﻌﺎﺭﻙ ﻫﺎﻧﻴﺒﺎﻝ ﻣﻊ ﻃﺎﺭﻕ ..
ﻭﻛﻤﻞ ﻋﻠﻴﻪ ﻋﻤﺎﺭ ...
ﻭﺍﻧﺘﻬﺖ ﺍﻟﻌﺮﻛﻪ .. ﺑﻘﻄﻊ ﺍﻟﻌﻼﻗﻪ ﻧﻬﺎﺋﻲ ..
🍃 ﻭﻣﺎﻫﺎﺩﻱ ﺇﻻ ﺑﺪﺍﻳﻪ ﻟﺘﻮﺍﻟﻲ ﺍﻻﺣﺪﺍﺙ ﺍﻟﺼﻌﺒﻪ 🍃...
🍃🍃🍃🍃
..2011\2\1
.... ﻳﺘﺒﻊ
