المتمردين

العشق المتمرد

#العشق_المتمرد "اختبار"

#جمان_فريد

الجزء108 القسم الأول..

🌟..
الآهة..
التنهيده..
والدموع الحاره اللي تنزل ع القلب تزيد تقوي ناره..
الروح لاعارفه تطلع ولاتقعد..
مرار العذاب هدا كله مولي عليها...
وآه من اللي صاير لعماد توا..
آه من اللي يحس بيه توا..
الراجل قلبه تحطم..
ادمر بكل معنى الكلمه..
ع قد ماكان ميت لهفه ع لحظه لقائه بيها ورجوعها ليه ورجوعه ليها...
ع قد ماندم اشد الندم ع هدا كله..
💔يسوق في الطريق..
ايديه اللي شادات الدومان كان يرجفوا من الغضب..ومن الغيره ومن الصدمه..
ودموع عيونه مابوش يوقفوا بكل..
خلوا الرؤية تصعب عليه ..
وقف السيارة ع تركينه..
وهو مازال شاد الدومان ..
والدموع مازالت تنزل بإنهمار من قهرته وحرقة قلبه..
نزل ايديه حطهم ع رجليه..
واتكى براسه ع الكرسي..
غمض عيونه..
وبدت الأفكار السوداء ترفعه وتجيبه..
"ردت اللي جوها ع خاطره مش ع خاطرك انت..
غبي انت اللي مازال تفكر انها باقيه عليك..
غبي انت اللي درت المستحيل ومازال دير ع خاطرها تي هادي وحده انانيه انانيه تفكيرها كله فنفسها..
ايه..
الجو اللي كانت اديرلك فيه كله بش تردك كان  مسرحيات
هي بس تبي من يقعد يدلل فيها ويرضي غرورها..
وتوا لقت من ينفع لهالمهمه اكثر منك شن مازال بدير بيك يامغفل..
تستاهل"
فتح عيونه..
مسح دموعه بعنف وقال:خلاااص..خلاص..خبط كفوفه فبعض وقال...من هاللحظه  المخلوقه هادي معاش تعنيلي شي نهائي..ماضي اسود وبنلوحه ورا ظهري ..غلطه ولازم نصلحها خلاص...كل شي انتهي..
خدي نفس عميق..
وزفر بقوة..
وكيف جاي بيشغل السيارة شاف باكو الهديه اللي ملوح حداه ع الكرسي..
خداه بعصبيه ولوحه من الروشن..
بعدين طول شغل السيارة وتحرك...
🍁🍁🍁🍁
كنت قريب من هنى قلت نخطم ونشوف الجامعه هنى وبالمرة نشوف بنت الخال ونطمن عليها..
رزان ابتسمت بجديه وقالت:مشكور..لكن معليش سامحني فالكلام اللي بنقوله تو..جيتك ليا غلط فغلط ولو شافك حد توا من العيله مش حلوه فحقك وفحقي..الجرأة كويسه بس بحدود لو تعدت حدها تولي حاجه تانيه ..
هو ابتسم بإعجاب وقال :امم..عارفها..احمم..وزع نظره حواليه وقال..اسف واجد وحقك ع راسي..شبحلها وقال..المهم انك بخير وامورك تمام وجاوبتي في امتحانك كويس!؟
رزان تنهدت بعدين نزلت عيونها لوطا وهي تهز فراسها بإيجاب..
اصيل بضحكه:ok..اني توا بنعدي..ضيق عيونه وقال..اه ايه كان بتروحي تو..نروح بيك عادي..
رفعت عيونها فيه وهي تفنص بصدمه..
اصيل:ههههههه...امي وحناي معاي فالسيارة..
رزان رخت عيونها وقالت؛سلملي عليهن وماتزيد تعطل عليهن اكثر من هكي..
ابتسم ابتسامه جانبيه وهو يهز فراسه بإيجاب بعدين قال:تمام..لينا لقاءات واجده...سلام توا..
رفع يده مشيرا بالتحيه..
بعدين مشي..
ورزان شقلبت عيونها بملل بعدين مشت لصاحبتها تغريد..
تغريد بضحكه:خيرك..
رزان:تصرفاته بايخه..
تغريد:اصيل صح..اللي نقدك من البقرة..
رزان :والباين بيذلني باللي داره..
تغريد:ههههه..حرام عليك..وبعدين والله سمح وشخصيه..
رزان تهكما:ربي يخليه لهله..
تغريد ضحكت وقعدت ساكته..
قعدوا ساكتات الزوز..
ورزان مركزه بنظرها ع جهه معينه ومازال تراجي..
رزان بعيون معبيات دموع"بالله ماتخيب املي حبيبي تعال 💔"
شبحتلها تغريد لقت دموعها ينزلوا..
تنهدت بألم وقعدت ساكته..
🍁🍁🍁🍁
طول الطريق وهو سارح ويذكر فكلامها ليه واسلوبها معاه زادت خشت راسه اكثر واكثر واعجابه بيها زاد عن قبل..
فرس اصيله حق فنظره..
وتستاهل التعب ع خاطرها..
وصل في القطعه..
وخش..
كامله:والله كان قعدنا فحوشنا خير ماغير بنفلوشوا الناس معانا تو..
اصيل بضحكه:مايجي ياحناي نجوا هنى مانطقوا فيهم  وبنتك تشوف ولدها وكنتها..
كامله التفتت لبنتها تقول:ترا قوليلي ولدك شنو وراه؟
ضحك أصيل..
امينه بضحكه:قول لجداك شنو وراك هي..
هو قعد مبتسم وساكت..
كامله شبحتله بربع عين وقالت:إن شاء الله خير..
ضحكت امه وهي تشوفله كيف مبتسم ووجهه مولي احمر..
درسوا قدام الحوش..
نزلوا...ونزلوا معاهم حاجات جايبينهم..
دف اصيل الكونشيلو ..
وخشوا حناه وامه...
كملوا طول للعمارة..
وركبوا مع الدروج..
وصلوا فشقة مؤنس...
كامله:عليك مواقف..
اصيل بضحكه:جداااي...!
طقت امينه ع الباب وهي تضحك..
شويه وفتحت رباب كانت لابسه ملاية الصلاة..
استقبلتهم بإبتسامه حلوة وهي تقول:مرحبتين مرحبتين..
الزوز ابتسموا بإستغراب..
كامله :مرحب بيك..
وسلمت عليها...
بعدين سلمت عليها عزوزتها..
بعد سلموا ع بعض وتحمدتلهم رباب بالسلامه..سألتها امينه عن حالهم مرة تانيه..
رباب:الحمد لله فخيار الخير..
اصيل:شنو حالك مرت خوي..
رباب:تمام..الحمد لله ع سلامتك..
اصيل :الله يسلمك..
رباب:تفضلوا خشوا..خشوا..
كامله وامينه:يزيد فضلك..
خشوا..
رباب:تفضل اصيل..
اصيل:يزيد فضلك..بنعدي للضراري فقهوتهم ونجوا بعدين مع بعضنا..
ابتسمت وقالت:تمام..
اصيل:ماتبو شي؟
رباب:سلامتك..
اصيل:تمام..سلام...
رباب:بالسلامه..
هي خشت وهو مشي...
🍁🍁🍁🍁
الأسبوع كله بتقعدوا ولا؟
نعيمه وهي تغسل في الماعين:ايه..
عبدالسلام:تمام العشية بإذن الله بنطلع ناخد اللي تبوه..
نعيمه :باهي..
عبدالسلام:كان اذكرتي شي مهم تبوه قوليلي عليه..
نعيمه:إن شاء الله..
🍁🍁🍁🍁
صندوقين مشروب وشكل عصاير..
خيري:وشن تاني..
زينب:البضاعه المعروفه المهم مايسد اسبوع..
سند:يام تو نجيبها اني القضيه..
زينب شبحت لخيري لقاته يسجل في الحاجات ويحسب:قالت باهي..
🍁🍁🍁🍁
كانت واقفه قدام المخزن تشوف في السبيزة اللي جابها سعد بش يرفعوها معاهم..
سعد:كله تمام مافي شي ناقص؟
كفايه:لالا..التفتت وشبحتله بإبتسامه وهي تقول:سلمك جياب وعليك حجاب..
ضحك سعد..💕
🍁🍁🍁
🍃هالمرة هما مركزين ع الجانب هدا بسبب الوضع الإقتصادي للبلاد اللي بادي يدهور...
صعود الدولار...وسقوط الدينار..
والغلا المتصاعد...مايبوش يكلفوا اهلهم فقعدتهم طول عطلة نص السنه...🍃
🌴🌴🌴🌴🌴
الساعه 2:30ظهرا..
تشوف للصفرة المشكله بين وجبه رئيسيه وموالح وهي مستغربه..
ركزت عليها كنة بنتها وقالت بضحكه:اصيل خبر مؤنس بالجيه..
ضحكت امينه..
كامله بضحكه:هالولد هدى مايدير شي عشوائي كله مخططله زين..
امينه بغرور مصطنع:قولوا ماشاء الله ع وليدي..
ضحكوا كامله ورباب..
بعدين رباب مدت يدها للكاشيك اللي قدام كامله خداته ومدتهولها:تفضلي ياجداي..
كامله خدت الكاشيك:يزيد فضلك..
ابتسمت بعدين درات نفس الحركه مع عزوزتها..
وهي تقول تفضلوا..
بدوا يتغدوا..
ورباب تراقب فردود افعالهم ..
وهما ياكلوا بشهيه..واضح عجبهم تطييبها بس هي مش حتستريح لين تسمع شهادتهم..
هما والرجاله اللي ياكلوا في المربوعه متاع الشقه..
🍁🍁🍁🍁
الساعه 5:00عصرا...
مدام حصلوا حوش معناها بيحولوا..
رزان وهي تلف في الكنافه:باهي انتي ماقدرتي تعرفي منه شي؟
حدهم وهي تشوفلها:ايييه لينا توا شهور وشهور ماكلمناش بعض بكل يدوب نظرات من بعيد وخلاص..
رزان تنهدت وقالت:سيورك تعرفي..
حدهم بحزن:والله من بكري صدري ضايق وخلوقي مطبقه كيف بنتحمل بعده مش عارفه..
رزان وقفت شغلها..
رفعت ذراعها اليمين وقعدت تمسح فدموعها بيها..
حدهم مسحت دمعتها وقالت:روزي..
رزان رشفت وقالت:قديش كنت متأمله يجي اليوم..مش عارفه كيف قلبي حسني انه بيجي وبيفاجئني وبنرجعوا لبعض وكل شي يرجع كيف قبل..لاااحسن بواجد..ويرجع يخطبني ويحدد العرس ونتزوجوا ونعيش معاه لأخر يوم فعمري..والله كله..رشفت وكملت تقول..كله اليوم الصبح تفائلت بيه وتخيلته..بس للأسف طلعت ...
حطت ذراعها ع عيونها وقعدت تبكي..
حدهم وهي ادمع قربتلها حضنتها وهي تمسح ع ذراعها بدون ماتقول كلمه..
🍁🍁🍁
من نهارتها واني منافستها..
امال:غلط ياسعيده هكي..انتي لازم تتقربي منها وتحاولي تقنعيها انها تحول ولد عمتها من راسها وتنساه..
سعيده بحزن:لاياامال بنتي مستحيل تقتنع نعرفها..بنتي هدي ياامال فاهمه عليها كويس..تحبه واجد راهي..ماتبي تسمع شي يقوللها انتي مانكش ليه ولاهو ليك..تصكر فوذانها ع كلام هدى..
امال:مال خليها تو لين ياخد غيرها وهي تقعد تتفرج..
سعيده تنهدت بضيق وقالت؛اني هدى اللي مخوفني..خايفه لو دار هكي البنت تصيرلها حاجه..
امال:مايصيرلها شي تبكي نهارين تلاته ومع الوقت تنسى..
سعيده سكتت وهي تفكر فبنتها وقلبها واكلها عليها..
شويه وامال قالت:ايه..حق عيت عمك لعند تو مايعلموا بعركة الهادي والصديق؟!
سعيده:الرجاله بس يعلموا..
امال؛اها..باهي ولعند توا مافي اخبار عن حميده..
شبحت سعيده لأختها وقالت:تس..
امال:نقولك راهو وصلني كلام..
سعيده بإنتباه وهي قارنة حواجبها:كلام شنو!
امال:ع عيشة حميده..سودا نوده ممرمده..ضرتها دايرة فيها الويل..
سعيده رفعت حواجبها ..
امال:وحده عدت عزي سالمه وقاتلي ع اللي شافاته..قات حميده كيف الكلبه تخدم فيهم..وضرتها حاطه كراع ع كراع ومقعمزة...
سعيده شبحت فالفراغ شويه بعدين قالت:عليك كاينه دارتها فروحها..
🍁🍁🍁
حوش ارضي هو...تلات ديار وحمامين حشاك وصاله ومربوعه ومطبخ..
فاطمه:مساحته كويسه..
كامله:ايه..
فاطمه:عتبة خير إن شاء الله..
ع خشة غاليه بصفرة النسكافيه ووراها لمياء بمترد الحلويات..
والست سميه كعادتها زي الضيفه..
فرقوا غاليه ولمياء ع الموجودين بعدين قعمزوا..
امينه:والله بنتي رباب اليوم دارتلنا غدي ماشاء الله..
كامله بإبتسامه:سلم ايدياتها غدي مقوم..
رباب ابتسمت بخجل وهي تقول:صحتين..
وغاليه تشوفلها بإبتسامه
فاطمه:طياب رباب سمح ماشاء الله عليها تهنن ع مؤنس..
امينه رشفت من النسكافيه بعدين قالت:امم..ماشاء الله زايد وزنه..
كامله:ايه لاقوة الا بالله حتى اني لاحظت وجهه منور ماشاء الله..
رباب قريب اطير من الفرحه..وابتسامتها الخجوله ماتحولتش من ع وجهها..
سميه تشبحلها تفصل فلبسها وفي ايديها شن لابسه من ذهب..
اما لمياء هرمون الحسد ارتفع وبدت تقول وهي تضحك:حتى اني فالشهور الأولى من الزواج قالوا ان عمر هدا وين بان..قبل كان ضعيف زي التل...قولتلهم مش منه طول اليوم صفرة ماشيه وصفرة جايه..ع رقيق وغليظ وحلو..وغيره..
كامله بإبتسامه :ماشاء الله..يعطيك الصحه..
امينه اكتفت بإبتسامه..
بس عاد ابتسامتها ما تشبهش ابتسامات غاليه ورباب وسميه..
التلاته مبتسمات بالسيف وهما مفنصات..
اما الحاجه فاطمه..اللي كانت شاده سبحتها وتسبح...
قالت بصوت عالي شوي:سبحاان الله..بعدين انخفض صوتها وهي تردد فنفس صيغة التسبيح..
زبطوها رباب وغاليه وسميه..
حاولوا يتمالكوا انفسهم بالسيف بش مايضحكوش..
اما غاليه ناضت بهدوء ومشت طلعت من الدار...
وطول انفجرت بالضحك..
🍃لمياء..مركزة بس دايرة روحها عبيطه...🍃
🍁غاليه لما خشت للكوجينه كانت مازال تضحك..
ع خشة رزان وفيدها حافظه كبيرة لقتها تضحك..
ضحكت وقالت:خيرك؟
غاليه بضحكه:مرت عمك..تزلز في ديارها..
رزان:ههههههه...
قربت غاليه من رزان وهي تشوف للحافظه قالت:كنافه؟.
رزان ابتسمت وقالت:ايه..درت كميه كبيرة عشان عماتي غدوة جايات..
وحطت الحافظه ع الرخامه..
غاليه تنهدت بضيق عارفه كويس رزان ع خاطر من دايرتها..
شبحت رزان لعمتها وقالت:برنامج غدوة ان شاء الله كله جاهز..
غاليه؛حصلتي الكاميرا؟
رزان بإبتسامه:ايه وصيت عليها خالي سليمان وجابهلي..
غاليه:انتي بتصوري..
تعبوا عيون رزان دموع وهي تقول:ايه..
غاليه :احمم..باهي...حطي من الكنافه فمترد وتعالي للدار..
رزان:حاضر..
طلعت غاليه من حداها...
وهي مشت طلعت مترد من الدولاب..
مسحاته..بعدين جت بيه حدا حافظتها فتحتها حطت الغطا ع الرخامه..
بعدين بدت اطلع منها...
وهي تشوفلها خطرت عليه ذكرى..
اخر مرة كلي فيها من ايديها...
《 هو فنص وقال وهو يمضغ:علا..ش تضحكي!!
زادت ضحكت..
دارلها حركه بخشمه..
ضحكت تاني..
بعدين شبح القدام وكلي الطرف اللي فيده ..》
ضحكت...
بعدين..
تنهدت تنهيدة ألم مصاحبتها دمعه..
مسحتها..
ورجعت كملت باقي شغلها..
🍁بعد كملت..
غطت الحافظه ودستها..
وخدت المترد ومشت بيه للدار..
وصلت فيها..
اول ماخشت وطلقت السلام..
امينه عيونها عليها..
حطت المترد ع الطاوله بعدين مشت سلمت عليهم..
وولت خدت المترد وقعدت تفرق..
زادت امينه اعجبت بيها بعد عرفت انها هي اللي دايرة الكنافه..
المهم..
بعد هدرزة طويله منوعه..
جي وقت مرواح كامله وامينه..
ع قد مادارو فيهم يقعدوا هما رفضوا رفض قاطع..
بس قبل يطلعوا..
امينه:غير كان مافيها احراج..لو تلفين طرفين كنافه بنتي عجبتني واجد..
رزان ابتسمت وقالت:حاضر..
ومشت طلعت للكوجينه..
ولمياء تراقب في هدا كله بتركيز...
🍁🍁🍁🍁
الساعه 12:00ليلا..
لولا ظروف الخدمه كنت غادي غدوة اول واحد..
مروان وهو لاهي بتليفونه:حتى اني ..
مالك:ماقدرتش تاخد اجازة..
مروان:تس..وغير هكي الكورس والامتحان المؤجل وقصه..
مالك قعد مركز عليه شن يدير وهو يقول:في جديد مروان؟!
شبحله وقال:جديد شنو؟!
مالك:يعني..انت ورفقه..
وجه مروان تغير رجع لهي بالتليفون وقال؛خلاص ..فوتتها ليا وقت..
مالك:في وحده تانيه؟
مروان هز راسه بإيجاب..
تنهد ومالك ورجع لهي باللاب متاعه..
شويه جاته رساله..
شاف تليفونه..فتحها..
(حاول تجي)
اشرقت ابتسامة فرح ع وجهه وتلقائيا قال:ع خاطرك نجي ونجي ونجي..
شبحله مروان برفعة حواجب..
زفر مالك بقوة بعدين ضحك..
وبدي يكتب فرد..
ومروان يضحك وهو يحرك فراسه ايمين ويسار..
بعد بعت الرد..خطر ع باله سؤال..
مالك:عماد بيمشي؟
مروان:لا..
ابتسم مالك بتهكم..ورجع شاف للاب توب...
🍁🍁🍁🍁
شي..صداع من الخدمه بس..
سناء:خديت بنادول..
عماد :اممم..
سناء:باهي حاول ترقد بالك ترتاح..
عماد:تس تس مانبيش نرقد نبيك تهدرزي عليا..
ابتسمت سناء برفعة حاجب وقالت:بتمشي غدوة ل****
عماد بضيق:تس..
سناء:هو حني ماشيين لخالتي خميس وجمعه وبنعدوا ع لمياء...يعني لو فيها كيف نشوفوك غادي..
عماد:مش عارف...
سناء:باهي ع راحتك...وسكتت.
عماد:هدرزي..
سناء بضحكه:باهي..ايه عماد بنسألك..
عماد:اسألي..
سناء:السراته اقاربكم حق تكلموا في بنت خالك..رزان؟
بعد التليفون شويه..
وهو مغمض عيونه بشده..
وجعه قلبه فعلا...مش بس وجع معنوي..وجع حقيقي..
سناء:عماد..الو..عماد!؟
فتح عيونه ورد التليفون ع وذنه وقال:احمم..مانعرفش..
سناء :اها...اني سألت هالسؤال لأن لمياء قالت انهم جو اليوم والعشيه شربوا فحوش جدك قهوة..ورزان دارت كنافه ع خاطرهم..وقبل يروحوا عطت لوحده اسمها امينه تقريبا بنت خال عمتي كفايه..عطتها حصة ولدها...
قلب عماد قاعد يتفتفت..
عماد:احمم..سامحيني بنصكر ضروري..
سناء:راسك ؟
عماد:ايه..تشاو..وصكر عليها...
قعد يتنفس بصعوبه..
وتزيد اعصابه تركب وهو يسمع فأخر ماقالت سناء يرن فوذنه..
ورجع شاف المشهد اللي راه فالنهار بين عيونه...
وصل لأقصى مراحل الغضب..
....
مروان:مالك في حاجه بنسألك عليها في الباثو..
مالك التفت :شن هي..
"هااااااااااااااااااااااااااااااااع"..
مرافق هالصيحه..صوت شي انكسر..
توسعوا عيونهم بخوف وهما يشوفوا لبعض..
مروان طول ناض طلع..
ومالك وراه..
وبسرعه مشوا لداره..
لما وصلوا سمعوه يقول..
"يخش عليا حد مخطره الاحرررف"..
ع جية بوه وامه..
كفايه بخلعه:شن في!!
مالك بهدوء:شي..الباين جوه مش تمام تعرفوه انتم لما يتعكر..
سعد قعد يشبح لمالك ..
"بروا ارقدوو خلوني فحاالي"..
كفايه تشوفلهم ودموعها معبيات عيونها..
سعد حط يده ع كتفها وقال:تعالي كملي نومك تعالي..
شبحتله شويه..
هو شد ع كتفها..
ومشي هو وياها لدارهم..
والولاد..كل واحد فيهم ولا لداره..
💔اماهو..
فكان مقعمز ع السرير ورجليه لوطا..
وهو يشوف عند رجليه لصورتها الممزقه اجزاء زي مامتمزق قلبه ..وقطرات دموعه تنزل عليها..
🍁🍁🍁🍁
خايفه يالمياء..
لمياء بإبتسامه مكر:ياغبيه علاش تخافي!!؟تو تشوفي شن يصير بعدين وتفرحي لما توصلي للي تبيه..
سناء برفعه حاجب:امممم..زعمه!؟
لمياء؛مش زعمه..اكيييييد..
سناء ضحكت وقالت:ياااارب...
لمياءبضحكه:إن شاء الله...
سناء:ايه بنقولك غيرت اسمي ع الفيس..
لمياء:درتيه اسمك..
سناء؛ايه..بس علاش انتي تبيني ندير هكي !؟قصدك هي تراقب فيه ع الفيس؟
لمياء:مليون في الميه
🍁🍁🍁🍁🍁
محادثه ع الفايبر..
(رفقه جاوبيني تربحي..هدي نفسها سناء اخت لميا؟!)
رفقه وهي تشوف لصورة بروفايل سناء ع الفيس..
كانت مترددة تجاوب بس بعد شويه قررت..
(ايه نفسها)
نزلوا دموعها وملامح وجهها كلها ترتعش..
هي كلها مع بعضها ترجف..
(رزان)
معاش جاوبت رزان..
اتصلت بيها رفقه وهي خايفه..
ردت عليها..
رفقه بخوف:روزي؟!
رزان وهي مبتسمه بألم من بين دموعها قعدت تقول:عادي..مش مهم..هو توا عايش فترة صعبه..ضايع فيها..تو بعد يرجع لوعيه..يسيب هدى كله ويجيني..معليشي لازم نصبر..ونتحمل نتيجة افعالي..
رفقه قعدت ساكته وقلبها واجعها هلبه عليها..
رزان بصوت مخنوق:صح ولا!؟
رفقه بألم:صح..💔
🍁🍁🍁🍁🍁
تاني يوم..
الساعه 9:45صباحا..
طلعت من الدار بعد صكرتها بالمفتاح..
لقت محمد يراجي فيها..
محمد:تمام كله واتي..
غاليه:كله..مزال اللي وصيتك عليه بس..
محمد:تمام..
"صباح الخير"..
شبحوا الزوز للباب القدامي لقوا لمياء خاشه وهي مربعه ايديها وتضحك:صقع سميتري..
غاليه:ايه اليوم صقع..
محمد:كان هرب الضي في الليل نشغلوا مولد هانيبال..
غاليه:تمام..
محمد:هي اوينا تو..
ومشي طلع من فم البوابه..
لمياء وهي تضحك بحماس:كل شي واتي؟
غاليه بإبتسامه:ايه..
ع خشة رباب من فم البوابه :حدددد..صقععع..
وصلت فيهم نزلت برنوس بالطوها وقالت:كله واتي؟
غاليه بضحكه:ايه ياربي واتي..والله ع حماسكم هدى خايفه تفضحوا الحكايه..
لمياء ورباب وهما يضحكوا حركوا روسهم ايمين ويسار بالنفي ويقولوا:لاالاا..
هي ضحكت ومشت للكوجينه..
وهما وراها...
ع خشة الحاجه فاطمه:تشن هالصقع ياكبادي خايفه ع الصغار من المرض..
غاليه:بنشغلوا مولد هانيبال كان هرب في الليل..
هزت راسها الحاجه فاطمه بإيجاب وقالت:باهي..
بعدين شبحت لغاليه وقالت:كله واتي!!؟
شبحوا لبعضهم بعدين :ههههههههههههه..
غاليه بضحكه:اخر وحده كنت نتوقعها تسأل هالسؤال..
فاطمه:عاد كان بديروا هالعبيتر اوكل منكم ماعندي مانقول غير نديره معاكم وخلاص..
التلاته :ههههههههههههههه..
لمياء بضحكه:عسل يافطومه..
ابتسمت الحاجه فاطمه من فوق نفسها..
شويه..
وتجي سميه خاشه بولدها:صباح الخير..
ردوا عليها بعدين قالت فاطمه..
فاطمه:وين عديتوا من الصبح..
سميه بضحكه:وصلنا فؤاد..وبعدين عدينا شوفنا نتيجه تحاليلي..
وجه لمياء انقلب..
غاليه:ايه وشن صار..
سميه وهي متحشمه قالت:طلعت حامل..
ابتسمت الحاجه فاطمه..
رباب:ماشاء الله..ولينا عيت الحوامل
ضحكت غاليه وقالت:تحلن عويناتكن ع خير يارب
ابتسموا وقالوا بأصوات متقطعه:آمين..
وفاطمه عيونها ع بنتها اللي كانت تضحك صح بس لمعة الدمعه واضحه فعيونها..
فاطمه"ياارب..اجبر بخاطرها ياالله"..
سميه:ايه..قولن..كل..
التلاته قالوا:واااتي وااتي..
ضحكت سميه...
رمضان:حناي نبي شنينه..
ضحكت غاليه وقالت:تعال نعطيك..
خداته من يده ومشت بيه حدا الشيشه بش تعطيه..
وهما قعدوا يهدرزوا حداها...
🍁🍁🍁🍁
لالا روزي مش جايين..
رزان:ليش خسارة؟!
رفقه بضحكه:هدا ياحنه بابا بدي يخش في مرحله صعبه جدا من حياة اي راجل معدد..
ماما تبي تمشي..وابله غزلان حتى هي..
وهو عارف وواثق مليون في الميه ان الحكايه مش حتعدي ع خير..فقال..مافيش مشي الزوز..
رزان:ههههههه..
رفقه:بس طبعا حميدوا المسيطر حجز للزوز يسافروا لتركيا..
تلات ايام الاولى من اسبوع العطله مع ماما..
وتلاته التانيات مع ابلة غزلان..
طبعا تلات هدا يوم off بش يريح راسه..
رزان:هههههههههه..والله جووو..
رفقه بضحكه :مش عادي...
🍁🍁🍁🍁
حطت قدامه صفرة القهوة وقالت :تفضل..
اصيل:صحيتي يامن من..
امينه ضحكت وهي تشوفله..
اصيل:كنافه!؟شبحلها وقال..تعرفيني الجو هدى ع الصبح مانحبه..
امينه:اها نسيت..خدت الصونيه وقالت..خل نفطر عليهن اني وجداك..عجبنها من امس..ماشاء الله عليها الحق..رزان هدي صغيرة صح بس فالحه فلاحه...
هو ضيق عيونه بإبتسامه وقال:لحححظه..من دايرها؟!
امينه :رزان..
بهدوء سحب الصونيه من يدها وقال:فوتيه الفطور اليوم..
امينه بصدمه:كييف انت تفوت الفطور!!؟
اصيل وهو مبتسم ابتسامه جانبيه:ساده الكنافه.
امينه:هههههههههه..ياوالله عليك حال..تقول يسحرن فيكن بنات *****..ومشت
اصيل بصوت عالي وهو يشوف للكنافه:الفخر *****
🍁🍁🍁🍁
مقعمزات فالصاله يشربوا فقهوة الصبح مع بعض..
غاليه قامت عيونها وشافت للساعه ع الحيط..
الساعه 10:00بالزبط..
فجأة..
صوت الكلاكسات قلب الدنيا..
ضحكوا مع بعض..
والحاجه فاطمه وهي تعطي لرمضان فتمرة قالت:اهن جن..اهن جن.. وردات جناني وصلن...
ابتسمت غاليه وقالت:بالله عليكن بالله عليكن ماتخربن عليا..
هزوا روسهم بإيجاب وهما يضحكوا..

...يتبع....