المتمردين

العشق المتمرد

#العشق_المتمرد "اختبار"

#جمان_فريد

الجزء110...القسم الأول

🌟..
بنبرة صوت اشبه بالعياط قالت وهي متفاجئة:
كذاااااابه!!!
سناء وهي تضحك بهستيريا:هههههههه...اني بروحي مش مصدقه!!
لمياء بدهشه:فالحه يافرخه طلعتي افلح من اختك بوين..
سناء:ههههههههه..ريتي ولا..
لمياء:باهي شن قلتيله؟!
سناء بغرور مصطنع:احمم..قتله عطيني وقت نفكر..
لمياء برفعة حواجب:بالله!!؟
سناء:مالا شنو حبيبتي تبيني نبينله اني طايحه عليه وماصدقت...بس تعرفي هو شن قال!؟قالي بالله ماطولي..
ابتسمت لمياء برفعة حاجب وقالت:ايه ماطوليش..
سناء:اكيد..وانتي ردي بالك اطلعي شي توا..
لمياء:ok..
سناء ضحكت بفرح وقالت:ياااربيييي مش مصدقه يالموشه..
لمياء:هههههههه...
🍁🍁🍁🍁
ماشيه هي وزميلتها في الممر والزوز يشربوا في القهوة ويهدرزوا...
فضيله:لالا رديته طبعا..قصدي نصبر سنين عمري هدي كلها بش في الأخير ناخد واحد متزوج زوز واني التالته ونخش في ضجيج ليه اول ماليه اخر!!؟لالا..خليني هكي خير اريحلي..نخدم بمعاشي معززه مكرمه فحوش بوي حتى كان خوتي مرة مرة يلقحوا عليا هما ونساوينهم طز...المهم عايشه ع كيفي وحرة نفسي..
غاليه رشفت من القهوة وهي مبتسمه بعدين قالت:امك شن رايها..
تنهدت فضيله وقالت:امي خايفه عليا ديما تقولي اني ماني دايمتلك يابنتي خايفه عليك من بعدين..
غاليه تبدلت ملامح وجهها للحزن وقالت:هدى كلام امي اللي ماتقدر تقولهلي لكن نشوف فيه فعيونها وين نلقاها تشبحلي..
تنهدت فضيله وقعدت ساكته..
وكذلك غاليه..
كملوا طريقهم وهما ساكتات وشبه سرحانات..
بعدين فاقت غاليه من سرحانها ع صوت بنية صغيرة تكلم فأمها..
شبحتلها وابتسمت..
بعدين غيرت عيونها عنها ويوجوا ع حد خلاهم ينفتحوا ع وسعهم..
وقفت..
فضيله وقفت معاها وهي تشبحلها..
هي شبحت لفضيله وقالت بربكه:اني بنعدي..لقسم الباطنه عندي حاجه..فوق..سلام توا..
لفت ومشت بسرعه..
وفضيله لحقتها بعيونها وهي مستغربه فيها..
بعدين شبحت القدام وكملت طريقها وهي مستغربه..
لفت انتباهها واحد خطم من حداها بسرعه خاطفه ..
ضيقت عيونها بإستغراب لفت وجهها شويه وهي تشوفله كيف يمشي بسرعه..
رفعت حواجبها وهي ماطه شواربها للأسفل بتساؤل بعدين شبحت القدام وكملت مشي..
.....
"غاليه..غاليه"..
هي تمشي بسرعه وخوف ومتجاهله ندائه..
وعيونها يشوفوا هني وهني للناس اللي حواليها..
هو غمض عيونه بنفاد صبر..
بعدين فتحهم وسرع خطواته..
لين قطع عليها طريقها..
ووقفها وهو يقول:عيب هكي..
هي شبحتله بحده وقالت بصوت واطي بعض الشي:واللي ادير فيه انت شنو!؟شن جابك اصلا من طرابلس لهنى؟وكيف تجي من غير ماتقول؟!وكيف تجي للمسشفى كيف!؟..
نجم الدين بضحكه:هدي هدي..شن هي الكارثه اللي درتها؟؟!اعتبريني مريض وجاي للمستشفى صادف ممرضه وقفها بيسألها عن حاجه..تصير ولا ماتصيرش قولي..
شبحتله شويه بعدين قالت: تفضل..ع شنو تبي تسأل؟
نجم بضحكه:عن قسم القلب..
رفعت غاليه حاجبها وغيرت عيونها عنه وهي تحاول تخفي ابتسامتها وقالت:عندكم مستشفى كبير فتاجوراء بهالإسم..
نجم بإبتسامه:علاجي مش عندهم..
ابتسمت بملل بعدين قالت:اسمع حني هنى مش كيف طرابلس..نعرفوا بعضنا زين..مافي حد في المستشفى هدي مايعرف سلالتي كلها من اول جد..وحتى اني نعرفهم كلهم..معنى كلامي..مانبي مشاكل..فهمت..
ابتسم بعدين وزع نظره ع المكان وقال:فهمت..شبحلها..ساد هكي المهم ريتك..
غاليه هزت راسها بإيجاب ومشت فاتت من حداه طول..
وهو قعد معاها بعيونه اللي يحكوا عن هلبه مشاعر غالية مانعاته يعبر عنهم..
🍃مش حرام الواحد يحب وحده اكبر منه بسنين..لامنطق يرفض ولا دين يحرم..
لكن عقلية مجتمعات متخلفه زي مجتمعنا هي اللي شرعت تحريم هالإرتباط..دارته غير منطقي واشبه بالحرام..
وحييي ع اللي ياخد وحده اكبر منه ان شاء الله بشهر ولا اتنين...
وكأنه ارتد..والله بمعنى الحرفي للكلمه ردود افعال الناس اتجاه هالشي...
برغم انه المثال والقدوة اللي مافيش بني آدم بكماله تزوج مراة اكبر منه بحوالي ربع قرن...
مافي حد من قومه استهجن هالشي ولا عايره بيه..يعني حتى في الجاهليه الشي هدا خل نقولوا نسبيا مش مرفوض..
اما فمجتمعنا الراقي الحضاري اللي كل افراده وصلوا لدرجة الكمال ...ماتجيش ...ماتركبش..صعبه..مش حلوة...
كبيرة عليه..مع السنين تزيد تكبر وتريح عزوز وهو يقعد فعز شبابه..
ومن هدا الكلام الكثير الكثير اللي الكل عارفه ومار بيه..
لكن تعالوا للآية المعكوسه..
يعني لو كان الراجل هو اللي اكبر منها بعشرات السنين...
عادي..يربيها ع ايديه..ياخدها صغيره بش يستمتع بحياته..
وياكثرهم مواليد السبعينات من الرجال..
اللي سيبوا بنات جيلهم...ونقزوا هوب...ع مواليد الألفينات..
وامهاتهم وخواتهم بكل صحة وجه ماشيين يخطبولهم وهما يضحكوا وفرحانين..
🍃مجتمع معاق 🍃
ولأن غاليه عارفه كويس وين عايشه وعارفه انه من المستحيلات يصير شي رسمي بينها وبين نجم لهدا كانت تصد فيه بإستمرار..فوق هكي هي ماعندهاش ثقه فصدق مشاعره...معتبره اللي يدير فيه طيش وبس..
لكن للأسف...ماكانش طيش....
كانت مشاعر حقيقيه....
🍁🍁🍁🍁
نزل من السيارة..نزل الحاجات اللي جابهم...
بعدين مشي فتح الباب..
وطبس ع الشكاير..كل مرة يدخل حاجه داخل..
لفت انتباهه اصوات الصغار وهما يلعبوا جاي من جنان حوش اهله..
شبح جيهتهم لقي بنته تلعب معاهم..
وشاف وحده من البنات جت ناحيتها..
:حنين سيدك جي..
البنت التفتت شبحتله..طلقت اللي فيدها ومشت تجري للحوش ..
هو ماأهتملهاش نهائي قعد يدخل في الحاجات لين وصل بيهم فالباب الدخلاني للحوش...
طق الباب..
شويه وفتحت حليمه...
الصديق:شن جو..
حليمه وهي حاطه يدها ع بطنها :تعبانه..
الصديق وهو يدخل في الحاجات :نقلك للمستشفى؟
حليمه  وهي تمشي وراه:لالا مش لهالدرجه..بس مانيش قادره نطيب الغدي..عدي قول لهديك اطيبه..
الصديق وهو يحط في الحاجات ع الرخامه:من هديك؟
حليمه ضحكت وقالت:الكلبه حميده..
الصديق:باهي..
حليمه ابتسمت ومشت ولت لدارها..
وهو كمل تستيف الحاجات..
شويه وطلع من الحوش بعد صكر الباب..
ومشي طول لحوش اهله..
اشر لوحده من بنات اخته يجوه..
جاته البنيه:نعم خالي..
الصديق:عدي قولي لحميده قالك خالي الصديق طيبي الغدي..
البنيه:حاضر..
ومشت تجري خشت داخل..
وهو مشي متوجه بطريقه للباب يفكر في الكلام اللي دار بينه وبين خليفه..
⚡فلاش باك..
الصديق:بصفتك من جاي تحكي في الموضوع هدى ولا في حد باعتك..
خليفه:لاحد لاسبت..اني جيتك من كيفي..راهو عندي علم  بالعيشه اللي عايشتها بنت عمي وعارف انك ناوي اطلقها لكن اجلت الحكايه هدي لسببين..الورث اللي بتقسموه بعد يروح خوك من السويد شهر 5..ولين ينزلن فلوس بطاقه الدولار وتاخد حصتهم..كلامي صح ولا غلط..
الصديق ضيق عيونه وقال:وانت منين جبت هالكلام؟
خليفه:من وين جبته جبته..المهم توا عندي ليك عرض.
شن رايك اطلقها تو..واني مستعد نعطيك اللي تبيه...
الصديق شبحله من فوق للوطا بعدين قال :اني ماني بحاجة فلوسك..عدي فحالك ورد بالك تعاودها وتجي وتكلمني بكل...
فات من حداه ومشي بطريقه لمحلات الخضرة..
⚡الوقت الحاضر..
ركب سيارته وهو يقول:من وصله الكلام ؟!..
صكر الباب وشغلها وتحرك وهو مازال يفكر..
🍁🍁🍁🍁
حولت ملاية الصلاة بعد ناضت من مصلاها..
طق باب دارها..
دلال:خش..
انفتح الباب..
خش جواد وصكر الباب وراه..وجي لأمه..
دلال وهي تشوفله بإبتسامه:صقري شن يبي..
جواد قعد يشوفلها بحزن..
دلال تلاشت ابتسامتها..
قعمزت ع روس صباعها مقابلاته وقالت:خيرك زعلان حبيبي؟
شبح لصورة بوه بعدين شبح لأمه وقال:امي بوي من الأزلام؟..
تبدلت ملامح وجه دلال للحده وهي تقول:من قالك القطاف هدا؟
جواد:باهي حقه بوي من المجرمين اللي قتلوا في 17فبراير..
دلال قعدت تغلي غلي قالت لولدها بغضب تحاول تكبته:بوك كان ضابط في الجيش دافع عن بلاده وحماها من الأعداء ومات ع خاطرها..بوك بطل ياماما بطل..
جواد:باهي علاش الأبله متاع العربي قالت بوك من الأزلام والمجرمين اللي قتلوا الأبرياء في 17فبراير..هكي قالت قدام ولاد صفنا كلهم ياأمي..
دلال حضنت ولدها  وبدموع تنزل قالت:امك ماتكذبش عليك ياجواد..
قاماته..
ومشت قعمزت ع السرير وقعمزاته جنبها..
خدت تليفونها من الشنطه..
فتحت النت..وخشت ع الفيس..
قعدت ادور ع صفحه معينه..لقتها..خشت ع منشور كانوا يتكلموا فيه عن عمار كأحد الضباط اللي دافعوا عن البلاد واستشهدوا في سبيلها..
حطت ع الصورة وورتها لولدها وقالت بعد رشفت:هاه شوف صورة بابا هني..
هاه اقرا شن كاتبين فوق..
جواد يقرا:بطل..من..ابطال..الجيش..الليبي..عمار مختار ****
مسحت دموعها وقالت:ريت حبيبي ريت..بوك بطل...
فتحت ع التعليقات وقالت؛هاه شوف شوف الناس هادي كلها تدعي لبوك الشهيد..بوك بطل يابابا بوك قال اني ماشي نحارب بش ترجع بلادنا لأيام زمان مرتاحه مافيهاش قتل ودم وموت...مافيهاش حروب تخلينا نسيبوا حياشنا ونهربوا..باش مايهربش علينا الضي..وتنقطع علينا الميه..بش نقدروا نطلعوا وندهوروا وحني مش خايفين من حد يخطفنا..ولاتجينا رصاصه طايشه تقتلنا...انهمروا دموعها وهي تشوف لصورة عمار...وقالت..
"بوك كان يقاتل بش ماتنبعاش ليبيا وتقعد ديمه مصيونه"
مسح جواد دموع امه وقال:معاش تبكي ماما..
شبحتله وابتسمت من بين دموعها..خدت يده وباستها بعدين حضناته بقوة...
والولد كانوا عيونه ع صورة بوه المعلقه ع الحيط وهو يشوفله بإبتسامة فخر...
🌴🌴🌴🌴
مافي حد عاجبه حال البلاد تو ..لكن هدى مايعني اني نترحم ع ايام زمان..
محمد بضحكه:شن عشتي وريتي منهن ايام زمان يارزان..
رزان:اللي نشوف توا في ****كله يخبر عن ايام زمان ياعمي..ايام زمان لما كنت ديما نازل فيه وفضراريه وانت تقول كلوا حقنا فبلادنا..كسروا فلوسنا ع متعتهم..وخلونا ناكلوا الربي..هدى كان كلامك وكلام رمزي..راهو كنت نسمع فيكم وكلامكم قعد فعقلي وبعد كبرت فهمته..
محمد:باهي ما قلنا شي..لكن اللي قاعد يصير تو عاجبك؟
رزان بضحكه:ماهو تو كنت نقولك ماحد عاجبه اللي قاعد يصير تو..اني ياعمي..نبي احسن من قبل وتوا...
ابتسم محمد وقعد ساكت..
وهي ابتسمت بعدين شبحت للروشن وسرحت بذكرياتها...
⚡فلاش باك
حبي اني مامشيش نحارب لمصلحة نفسي..اني مشيت نحارب بش ناخد بتار صاحبي وامثاله..وفي نفس الوقت تمنيت لو بعد الثورة يتغير الحال للأحسن..لكن للأسف اللي تمنيته ماصارش..
رزان:يعني نادم؟
عماد ابتسم وقال:نهائي ياعمري..مش نادم بكل..لكن زي مايقولوا مش كل مايتمناه المرء يدركه..
ضحكت رزان..
عماد بضحكه:هو مش هكي بالزبط لكن قريب منه..المهم المقصود وصل...
رزان بضحكه:وصل وصل💓
⚡الوقت الحاضر..
نزلت منها دمعه بدون ماتحس..مسحتها طول لما سمعت عمها يقول:هي انزلي ..
مسحتها بدون ما يحس بيها..وفتحت الباب جت بتنزل قال محمد..
محمد:بالله عقبولي من غداكم..عمتك اليوم خدمه عابيه ع منال العالم اطيب السمسام..
ضحكت رزان وقالت:حاضر..
نزلت وصكرت الباب..
ومشت بطريقها لحوشهم..
🍁🍁🍁🍁
الساعه 4:00قبل العصر..
طاب الغدي اللي طيباته من وسط قلبها فكوجينها..
رز بالبصله وحداه كفته..
كانت ريحته تجيب من وين وين...
ريحته..
اللي اخترقت انفه لما جي خاطم من حدا دار الدروج..
ريحته مش بس خلاته يشتهي الاكل..
ريحته خلاته يحس بشعور مش مفهوم بالنسبه ليه..شعور وكأنه قديم قديم هلبه وليه وقت...
شبح لباب الدروج..
قدم..
خش..
شبح للدروج شويه..
بعدين بدي يركب جري..
وصل في الباب...
طق..
داخل..
تي لا يا ^%%*¥..
حميده وهي ماشيه بتفتح الباب سمعت بنتها كيف سبت الدين تأففت وقالت:خلطة بنات حواء بتفسدها..
وصلت في الباب وفتحاته..
رعشت لما شافاته..
الصديق قعد يشوفلها للحظات بعدين قال:جعان..
حميده بربكه:احمم..توا كيف سقيت..قصدي جايه بنسقي..
قعد مركز بنظره ع ملامحها..
وكأن قلبه قاعد يقاوم اللي هو فيه..
القلب محل كل شي ..وفيه ذاكره تفوق ذاكرة العقل فالقوة..
هو مش قادر يذكر من عيشته معاها شي ولاقادر يذكر هي شن تكونله اخطى من انها مرته وعنده منها بنت..
الشعور تبدل من حب لنفور وبغض ونسيان..
بس مازال القلب داس هلبه حاجات مرة مرة يطلع منها شي يسير..
حميده بلعت ريقها..
"نبي نخش"..
هي طول وخرت من ع الباب وهو خش..
وحميده ردت الباب..
....
طلعت من دار النوم ..
كيف ناضت..
كان فيدها تليفونها تتصل بيه مايردش..
حليمه:افففف..وين عدى هدى ..جعانه ال£€€₩
قعدت تمشي لين وصلت الروشن وقفت فيه حولت الستار لقت سيارة الصديق موجوده..
قرنت حواجبها..
بعدين مشت طول للباب فتحاته وطلعت...
جت حدا السياره..
وقعدت تشبح هني وهني..
بعدين عاودت اتصلت بيه..سمعت صوت التليفون جاي من السيارة..
شبحت من الروشن لقاته محطوط ع الكرسي..
حليمه برفعة حاجب:زعم عدا لحوش هله؟..
مشت طول غادي..لقت الحوش مصكر
طقت..طقت ماحد فتح..
لفت عليه كله وهي تشوف من الرواشن يبان مافيه حد..
الحوش فاضي..
قعدت تفكر وتسأل فنفسها الراجل وين مشي..
لحظات..
وفنصت..
بعدين مشت بسرعه ولت لحوشها..
وصلت فباب الدروج وخشت طول..
وقعدت تركب بسرعه...
وصلت في الباب وهي داهشه..
سمعت صوته داخل..
المراة شيطانها ناض...
قربعت الباب برجلها..
وطول مشت بإندفاع وغضب للدار..
وقفت في الباب لماشافتهم مقعمزين مع بعض ع صفره وياكلوا..
هو يوكل فبنته والبنيه المقعمزة فحجر امها بتررد تاخد منه لما تقوللها امها ..
"كولي من بابا"
الكلمه هادي خلت حليمه تنجن وقالت بصوت عالي وفيه نبرة عياط..
"شن اديييييير هناااااااا"
انخلعوا التلاته..
والصديق سيطر عليه شعور شديد بالخوف طلق الكاشيك وناض..
حليمه قدمت لحميده وعطتها كف بكل غل وغيظ..
الكف صدم حميده..
حليمه:يا*&^₩ يا^%&¥يا&)¥¥₩ %$%)₩..
حميده الشتم الأخير طلعها عن طورها..
حولت بنتها من حجرها..
وناضت وردت لحليمه الكف باحرف منه..
حليمه فنصت فيها..وقدمتها وقعدت تضرب وحميده تضرب..
والبنيه تضرب مع امها..
والصديق يرعش..
لحظات...
ويقدم...
يدف حميده يجيبها طايحه..
وقال بصوت يخوف:تضربيها مرة تانيه نطلع روحك..
حليمه قعدت تشوفلها برفعة حاجب وهي داهشه..
بعدين شبحت لصفرة الغدي..
مشت من ورا الصديق لصفرة الغدي كفت الغدي ع الوطا..
بعدين قعدت تعفس عليه بشبشبها بغل غلها..
وحميده تشوف بصدمه ودموعها تنزل..
شبحت لحميده بحقد..
بعدين بطلت ومشت طول بطريقها للكوجينه والصديق وراها..
شافت الطنجره والكسكاس ع الغاز..
ضربتهم بيدها طيحتهم لوطا..
وهي داهشه من قوة الغضب..
خدت طنجرة البصله..
وكفتها حتى هي...
شبحت للمنظر بنظرة كلها غل...
ومشت طلعت من الكوجينه وهي تقول:تعال انت..
والصديق وراها زي الظل..
حليمه بصوت عالي:والله نكرهك فجلدك كان مازال جيتي يالا راجلي يا%$&£..
وخدت الصديق من يده وطلعت بيه من الحوش..
وخلت حميده ترجف وتبكي وبنتها حداها تبكي ..
حميده ببكي:ياااارب..ياسرني..ياسرني ياربي...💔
🍁🍁🍁🍁
الساعه 7:00مساءا..
مقعمزات مع بعض في الدار يتفرجوا ع مسلسل تركي..
رزان جاها اشعار طلب صداقه...
شافاته..
غاليه:ديما ناسية نتك مفتوحه..
رزان ضحكت..
حدهم:حييي شافهم!!
غاليه ركزت ع اللقطه وقالت:عدت فيها..
رزان:اسمعن..
الزوز :امممم..
رزان:واحد باعتلي طلب مسمي روحه.. طاغي النظرة السرتاوي
شبحولها الزوز
غاليه:ترا خشي ع صفحته..
خشت رزان عليها صورة بروفايله كانت صورة المعتصم القذافي..
بعدين بدت تشوف في باقي الصفحه..
كانت منشورات باللغة انجليزيه..
واحد منهم..
فيه صورة لمجموعه رجال لابسين بدالي واقفين قدام مبنى ضخم..
دققت فالصورة ...
رزان بصدمه:هدى كيف عرف حسابي!!؟.
غاليه وحدهم ضيقوا عيونهم وقالوا:منو..
رزان:اصيل..
ضحكت حدهم..
وغاليه ابتسمت وهي متفاجئة قالت:ترا وريني..
مدتلها رزان التليفون وملامح وجهها تبدلت للإمتعاض..
خداته غاليه وقعدت تقلب فيه وحدهم تشوف معاها..
غاليه:ماشااااء الله..
حدهم:باين عليه حاجه كبيرة..
غاليه :عليك طرف..
حدهم:شخصيته تجنن..
غاليه :شوفي شوفي اللي يسلم عليه راجل اجنبي..
حدهم:شوفي علم امريكا..
غاليه بضحكه:اضررررب..انتي تشوفي كيف مصبي قدامه بعزة وعظمه....سرتاوي ياكبدي..
حدهم بضحكه:خيتي سلمهم..💓
شبحت غاليه لرزان وورتها صورته وهي تقول؛تعرفي يافرخه انتي كان خطبك وترديه..نخنقك بإيديا..
حدهم:تبيها والله الغبيه كان دارتها..
رزان جبدت تليفونها وقالت:بنرده قبل يخطب حتى..
حدهم مطت شواربها للأسفل بإستياء..
غاليه:حماره اقسم بالله حماره..والله ماتبي الا طريحه باااهيه..
رزان قعدت تتصفح ومتجاهله كلامهم..
غاليه:ادير فروحها طرشه..
حدهم:خليها خليها...تو تجي لكلامنا..
رزان ناضت ومشت طلعت من حداهم..
غاليه حركت راسها ايمين ويسار بضيق..
وحدهم تنهدت بحزن..
🍁🍁🍁🍁
تاني يوم...
الساعه8:30صباحا..
خشت للمدرسه..
وطول بطريقها لغرفة الإدارة..
وصلت ..
طقت الباب..
"ادخل"..
فتحت دلال الباب..
دلال:السلام عليكم صباح الخير..
المدير:وعليكم السلام..صباح الخير..تفضلي..
قدمت دلال وهي تقول؛اني ولية امر الطالب جواد عمار مختار *****..
المدير:بشن نقدر نخدمك..
دلال:استاذ..اني لما سجلت ولدي وبوي سجل خوي في المدرسه هادي..كنا واثقين انهم حيطلعوا من وهما ناشئين النشئ السليم علميا وتربويا بناءا ع اللي سمعناه عن مدرستكم وعن نظامها وعن الكادر التعليمي فيها..لكن مع الأسف طلعنا غالطين..
ضيق المدير عيونه وقال:ممكن تتفضلي تقعمزي وتوضحيلي اكثر..
دلال قعمزت..وبدت تحكي للمدير عن اللي سمعاته من ولدها..
🍁🍁🍁🍁
توصل بيها الوقاحه انها ترد ع تليفونه!وبعدين شن هالدلاله اللي بيناتهم لدرجة انها تقدر تاخد تليفوته وترد عليه!!
تاله :مرات كان في العمليات او مشغول ولاناسيه..
نور ببكي:لا كان فعمليات ولا فهم اسود..الفالح كان هو وياها في مقهى..ماشي يطلب وهي تراجي قالتهالي بكل صحة وجه..مالك ماشي يطلبلنا ماناكلوا بعدين كلميه...
حطت ايديها ع وجهها وقعدت تبكي..
تاله قعدت تمسح ع ظهر نور ومضايقه ع الآخر مش قادره تواسيها لأن اللي سمعاته من نور فورلها دمها حتى هي..
شويه وجاهم حمزة بسرعه..
كان كيف جاي شبحهم..وخاف لما شاف بنت خالته تبكي ..
حمزة بخوف:خيرك نور..
تاله قعدت تشوفله..
نور مسحت دموعها وقالت ببكي:حمزة من هي.. اسراء؟!
تنهد بعدين شبح لتاله ورجع شافلها:بنت صاحب العياده اللي نخدموا فيها..
نور بلعت ريقها وقالت:شن..تبي من مالك..شن في بيناتهم..
حمزة:اصدقاء بس..
نور ابتسمت بتهكم وقالت:اصدقاء!!
تاله شبحت القدام لقت مالك جاي بسرعه..
وقف عليهم وقال بخوف شديد:خيرك نور!!؟
نور شبحتله بحده وقالت:من هي اسراء؟توا تقولي شن تكون بالنسبه ليك..
تنهد مالك بعدين شبح لحمزة..
حمزة شبح لتاله واشرلها بحواجبه..
فهمت عليه تاله خدت حاجاتها وناضت ..
مشي حمزة مشت معاه..
نور:جاوب يامالك..
مالك بهدوء:زملاء..
نور:أصدقاء..
مالك هز راسه بإيجاب وقال:بس..
نور بتهكم :وبس صار..بس..عادي جدا عندك تصادق بنات وانت محرم عليا نتعامل مع زملاء معاي ع القرايه..
مالك:تو بالله شن دخل هدا فهدا..
نور بغضب:لادخل ونص..وحضرتها صديقتك المحترمه ترد حتى ع تليفونك!!شن شكل هالصداقه!؟..
مالك بإستياء:نور ماتخليش نظرتك محدودة للأمور..
نور ضحكت بسخريه..
مالك:البنت بوها يكون دكتور كبير عالمي..وصاحب العياده اللي نخدم فيها يعني الحكايه فيها فايده ليا..ممكن يانور نوصل لمواصيل انتي ماتتصوريهاش معاه..
نور :قصدك انت تستغل في البنت!
مالك قرن حواجبه وقال:شن القطاف اللي تقطفي فيه هدا تعرفيني هكي انتي!؟قصدي اني قاعد محافظ ع علاقتي بيهم كعيله لأنهم حينفعوني مستقبلا..راهو حتى بوي يعرفه وامي تعرف مرته وبنته..وعزمناهم مرة عندنا وهما عزمونا عندهم..يعني الموضوع مش زي ماانتي فسرتيه..
نور؛وباهي علاش ماعرفتنيش عليها؟!
مالك:كنت نبي نمهدلك..عارفك مش حتتقبلي الموضوع طول ..
نور شبحتله شويه بعدين قالت:حتى اني مالا نبي نصادق مهند المعيد هني فالكليه نلقاه في الإمتحانات..
مالك بغضب:نووور..
نور:ههههه..ياعليك حاله..
مالك:بكل يانور بكل طلعتي عقلك صغير وتفكيرك محدود..
نور بصدمه:صار اني طلعت هكي في الاخير!!تمام تمام يامالك..اني من اللحظه نهيتك من حياتي..
غمض عيونه بنفاد صبر وقال:نووور..
قاطعاته وقالت؛تحمملت هلبه وفوتت هلبه ياسر سادني..لهني..وانتهينا..
وطول لفت ومشت.
شبحلها مالك شويه بعدين لف ومشي حتى هو وكان فقمة الغضب..
من بعيد شوي..
حمزة:الباين الوضع زاد تعقد..
تاله:صح..
شبحلها حمزة وقال:نستاذن..ومشي طول..
وتاله قعدت معاه بعيونها لين اختفي..
بعدين تنهدت ومشت ادور ع نور..
🍁🍁🍁🍁
طلعت من المدرسه بملف ولدها وهي تذكر فالكلام اللي قالاته ابلة العربي..
《ماحد يلومني راني فاقده احبابي حتى اني ومحروقه..بوي وراجلي وولدي..قتلوهم كلاب القذافي
المدير:شن الكلام اللي تقولي فيه ياابله هدا..حني فمدرسه مش ساحة حرب..ولا مكان انتقام وتصفية حسابات..
للاسف للأسف خيبتي املي ياأبله..اني مضطر نفصلك..وجودك فيه خطر ع المدرسه..
دلال:لا ارجوك يااستاد نسألك بالله العلي العظيم ماتفصلها..يكفيها انذار..شبحتلها وكملت تقول..وتنبيه ع انها معلمه وظيفتها خطيرة مش ساهله بكل..راك تشاركي فينا فتربية صغارنا..وجيل يتربي ع الحقد حتى في المدرسه نقطعوا منه الأمل مرة وحده...ساد اللي قاعد يصير فالبلاد توا ساد تحريض ع الكره وزرع الفتن والحقد فالتلفزيون ع مواقع التواصل في الشارع في كل مكان حتى في جمعتنا العائليه.. هدا اخضر هدا مخطط...هدا مع الكرامه..هدا مع الفجر...تخوين ع الفاضيه وع المليانه وصلت بينا انا طعنا فأعراض بعض فشرف بعض... لوين نبوا نوصلوا لوين...ساد..ياسرنا خراب..ساد ياسر..
"راكم قاعدين تقتلوا في بلادنا بالبطيئ..وهي من غير شي منهدة"...》
وصلت في باب سيارتها..
مسحت دموعها وخدت نفس عميق..بعدين فتحت الباب ركبت سيارتها..
صكرت الباب وشغلتها وتحركت..
🌴🌴🌴🌴
الساعه 12:30قبل الظهر..
المطر كانت تصب..
وهي نازله من الدروج تضحك بفرح وجوها فوق الريح..
خشت للحوش..
وقعدت ادور بعيونها وهي تمشي..
شبحت لدار عزوزتها لقتها راقده فيها..
ابتسمت بعدين كملت للكوجينه..
لقت غاليه كيف باديه طيب..
لمياء:والله ماك حطتيه ع نار اني بنديره..
غاليه ابتسمت بربكه وقالت:غير ليش الحلف..
جت حداها لمياء وهي تضحك دفتها وقالت:خلاص حلفت..زيدي غادي..
استسلمت غاليه..
ولمياء بدت اطيب وهي مبتسمه ..
غاليه:جوك مليح اليوم..
لمياء بضحكه:نحبه جو المطر هدا..
غاليه :امم..صح حلو..
لمياء:نحسب الهادي..
غاليه:احممم..ايه..
لمياء:عليك دلع تدلع فيه هالسميه لتوا قاعده تتوحم!؟
غاليه:وحمها ديما واعر..
لمياء:في اللي يحبوا يبالغوا..
غاليه:امم..ممكن..
لمياء:بنقص فلفل اليوم بش تاكل عمتي..
غاليه ابتسمت مجامله..
وتفكر بينها وبين نفسها فخوتها اللي عابيين عليها اطيب هي اليوم..
🍁🍁🍁🍁
مقعمزة ع الكرسي تتكلم بالتليفون..
دلال:ايه بابا سحبت ملفه.......تو ندورله ع خير منها.........ماتعبش روحك بابا ارجوك انت مش ملزم...........................باهي..باهي بابا اني اسفه سامحني.....اسفه.......باهي.....دموعها عبوا عيونها....حاضر..مع السلامه..
صكرت من هني دموعها نزلوا من هني..
حطت يدها فجيب البالطو..
طلعت الرساله "الوصيه"
وقعدت تقرا فجمله وحده بس..
( ..ربي عويلنا يادلال كيف ماتربيت وتربيتي..وخليك قويه..راني عليك عابي...)
مسحت دموعها وهي تاخد في انفاسها بسرعه..
"السلام عليكم"..
رفعت عيونها فيه وقالت:تراقب فيا؟!
ضو بإبتسامه:ايه...هي ابدي افصلي..
نزلت عيونها وضحكت غصب عنها...
هو فرح هلبه لأنه ضحكها..
ابتسم وقال:نقدر نقعمز..
دلال طبقت الرساله ودستها فجيبها ..
بعدين حطت شنطتها وحاجاتها جنبها..وقالت:تفضل..
بإبتسامه قال:شكرا..بعدين قعمز...
ضو:احمم..صايرة معاك مشكله..
دلال قعدت ساكته شويه بعدين قالت:ايه..
من جهة تانيه فنفس الكليه..
رانيا:شن رايك..
زين الدين بتفكير:اممم.. مبدئيا كويس...لكن بنقولك..رانيا نشطي روحك واخدمي ع المشروع بسرعه ماعندكش مواد خلاص..قعدلك بس المشروع لازم خلال الفصلين هادم تكون مكملتيه ومناقشتيه..
رانيا بضحكه:حاضر..
زين حط ايديه ورا ظهره وقال:شن يضحك فيك توا؟!
رانيا وهي تحاول تشد ضحكتها:شي..
شبحلها بنص عين..
وهي تضحك...
غصب عنه ضحك وهو يحرك فراسه ايمين ويسار..
منظرهم الزوز...
كان يوحي بحاجات تانيه غير انهم طالبه واقفه ع استاذها المشرف ع مشروعها ومحور حديثهم بس المشروع..
يوحي بحاجات تانيه بس..
لتوفيق..
اللي كان ع بعد مسافه منهم..
واقف ع خطيبته والزوز يشوفولهم..
اريج:وقفتهم عاديه ياتوفيق..
توفيق:عاديه!؟..لا..مش عاديه بكل يااريج بكل..خلاص توا بعد انحبس رمزي وصار فيه اللي صار باينه معاش يملا عينها الهانم..
شبحتله اريج وقالت:توفيق!!
شبحلها وقال:خلاص فوتي..ايه مع من بتروحي..
اريج وهي تشوفله بضيق:خالي.
توفيق:تمام..عدي لبنات خالك ..
اريج تنهدت وقالت:حاضر..
لفت ومشت وهي تشوف لرانيا وزين كيف خشوا مع بعض داخل..
التفتت لتوفيق لقاته يشوفلهم بنظرات حاده..
تنهدت بضيق بعدين شبحت القدام وكملت طريقها لبنات خالها..
🍁🍁🍁🍁
الساعه 2:30بعد الظهر..
مروح من الخدمه تعبان وجعان وحالته حاله..
وصل فم البوابه لقي الهادي واقف قدامه.
محمد:خيرك مصبي هنى؟
الهادي:مرت خوك داخل..
فنص محمد:راك تقول هي اللي طيبت الغدي؟
ع جية غاليه:خيركم؟
محمد اشرلها تقدم..
قربت منهم..
محمد بهمس :من داير الغدي..
غاليه بضحكه وبنفس الهمس:لميا..
الهادي :ايااه..
محمد:نهارات سود وخلاص..
غاليه بتفنيصه:وطوا حسكم..
الهادي:ليش تخلي فيها اطيب؟
غاليه:هي خشت عرضت خداماتها شن بنقوللها..
محمد:قسما بالله بتجينا انيميا فجرتها..جت جت..
كانت لميا جايه بالصفرة: ها حميده روحت
محمد ابتسم مجامله:ايه..
لميا: تبي غداك توا..
محمد :لااااا..
فنصت غاليه..
لميا:علاش؟
محمد بربكه: تاعب بنرقد قبل..
لميا بإبتسامه :اها باهي..وانت ياهادي تغديت..
الهادي ابتسم مجامله:ايه الحمدلله..صحيتي..
لميا:ماعنديش في جميل وخيي راكم عيلتي..
التلاته مع بعض :بارك الله فيك..
ابتسمت وخشت بالصفرة..
محمد بحركه الشفايف؛دحي..وقعد يحرك فيده حركه دائريه..
ضحكت غاليه وقالت بنفس الطريقه:باهي.
الهادي بهمس وهو يبربش فتليفونه:خل نقول لسميه تعقبلي من غدي حوش هلها...
من الكوجينه..
لميا:غاليه..حتى العشي خليه عليا..
خبط محمد بيده ع وجهه ولف مشي...
والهادي :خل نعدي غادي بالمره..
ولف طول مشي ...
وغاليه تضحك بكتمان..
لميا:هاه شن قلتي ياغاليه..
غاليه:احممم..ع راحتك..
🍁🍁🍁🍁
الساعه 8:30مساءا..
نزل من الدروج بشي من التردد..
كان ماشي وكأنه منقاد....
لشي مايبيش يديره ويبي يديره فنفس الوقت..
وصل في الصاله..
خدي نفس...
بعدين خش.
لقي امه بروحها مقعمزة تخيط فغلافات مخاد..
عماد:يما..
شبحتله وقالت:امم..
عماد:نبيك في موضوع..
وقفت خياطه وهي تشوفله قالت:موضوع شني؟
قعمز وقال :احمم..نبي نخطب..
🍁🍁🍁🍁
خلاص اني مليت وعييت يادلال خلاص..
دلال:كل مرة تقولي هكي وبعدين تولوا لبعض..
نور وعيونها المنفخات مليانات دموع:لالا المرة هادي بجديات خلاص..طاح من عيني يادلال..
دلال شبحتلها بحزن..
نور بنبرة باكيه:قبل لما نتعاركوا كان يحرق فتليفوني بإتصالاته..اما المرة هادي حتى رساله مابعتش..واضح ماصدق..
دلال شبحت لتليفون اختها وقعدت ساكته..
نور رشفت بعدين قالت:طلع مالك مايحب غير نفسه..تخيلي لو بعد تزوجنا استمر ع هالشي!!غمضت عيونها وقالت..تستستس..لايمكن نتحمل والله مانقدر..
دلال:من هالناحيه عندك حق..قصدي لو يعني هو هكي تفكيره..بلاش منه خير..
نزلوا دموع نور وهي تهز فراسها بإيجاب بعدين مسحتهم..
ع خشة اسيا وفيدها صلصال:بيشة..بيشة.. وقفت قدامها..ديريلي حوته بيشه..
نور شيئا فشيئا زادت ملامح الحزن ع وجهها وبدت تبكي..
اسيا بزعل:خييييرك بيشة!؟
دلال جبدت بنتها وحضنتها وقامتها وهي تقول:هي تعالي نطلعوا برا واني نديرلك حوته..
اسيا قعدت تشوف لخالتها وهي تبكي..
لين صكرت امها باب الدار..
🌴🌴🌴🌴
تاني يوم..
الجمعه..
الساعه 11:00صباحا..
مصكرة ع روحها الدار وتتكلم بالتليفون..
ابتسمت بتهكم وقالت:مش قتلك ياكفايه..
كفايه:يانهاري الاسود خلاص معاش لقي تموا البنات..معقوله..يخطب هديكا المسلفعه اللي مافيها ماينشبح!!
غاليه تهكما:نصيبه..
كفايه:غاليه..تعرفي من قبل ولا؟
تنهدت غاليه وقعدت ساكته..
كفايه بضيق:تعرفي شن قالي لو مامشتيش خطبتهالي نبعت عماتي!!شوفي كيف شاد فيها!!مش بلاش ياكبدي مش بلاش مدايرتله خطين هادي..
غاليه:لاخطين لاعشرة...هو اللي يبي وهو اللي اختار خليه يتحمل مسؤولية اختياره..
🍁🍁🍁🍁
يتحمل مسؤولية اختياره....
ياكم من اختيارات اخترناها..
كنا اضعف من انا نتحملوا مسؤوليتها..
🍁ماما حنين اني بنخش ندوش باهي..
حنين:باهي..
حميده:اقعدي عاقله..
حنين :باهي.
ابتسمت حميده بعدين طلعت من حداها ومشت للحمام...
بعد لحظات من دخول حميده للحمام..
البنيه ناضت..
جت بتمشي للكوجينه لكن لما شافت باب الحوش مردود غيرت رايها..
فتحت الباب وطلعت..
بدت تنزل من الدروج وهي شاده في الحيط لين وصلت لوطا..
طلعت من دار الدروج...
شافت حليمه واقفه فالجنان تسقي فالعطر..
البنت حاقده عليها هلبه من قبل وزاد الحقد بعد رتها تضرب في امها اخر مرة..
مشت طول خدت حصوات من ع الأرض..
وبدت تحدف في حليمه بيهم..
جو زوز ورا بعض ع راسها..
حليمه بوجع:آااي..حطت يدها ع راسها من الخلف والتفتت..
شافت حنين..
فنصت فيها..
جت حنين بتهرب..
لكن انطلقت وراها زي شيطانة الرجيم..
ماتقولش حامل وبدت مثقله..
لحقت عليها وشدتها من رقبة القفطان وهي تقول:ع من تحدفي فالرشاد يابنت &%£¥..
وجبدتها بقوة وهي متوجه لباب الحوش..دفاته وخشت بيها وهي تقول تو نوريك والبنيه تعيط وتقول..
"ياماما"..
وصلت بيها للكوجينه..
خشت بيها وصكرت الباب..
بعدين طلقتها وهي تقول:تو نوريك انتي وامك يا&$%#..
وصلت في الغاز..
ولعاته..
وخدت من شباك الكواشيك كشيك..
وحطاته ع النار..
والبنيه تشوفلها وترعش مع بعض..
شويه وطفت الغاز وجتها...
وهي تفنص فيها وتقول:تو نربيك ياكلبه..
والبنت ترعش مع بعضها..
....
طلعت من الحمام بعد كملت دوش وهي تنادي..
حميده:حننو..حنين...حنونه...
وصلت في الدار مالقت حد..
خافت..
ولت بتمشي للكوجينه..
شافت الباب مفتوح..قريب ماتت من خوفها..
طول طلعت من الحوش..ونزلت من الدروج وهي تجري..
سمعت عياط بنتها..
قلبها قريب وقف..
وين طلعت من دار الدروج..
سمعت الصوت جاي من حوش ضرتها..
خشت تجري زي المجنونه..
وتبعت صوت عياط بنتها لين وصلت للكوجينه..
فتحت الباب..
لقتها شاده يد البنت وتكوي فيها..
جن جنون حميده...
خشت بإندفاع..
ضربت حليمه ع يدها بقوة طاحت الكاشيك وطول مدتها بكف صوت صدح في الحوش..
بعدين خدت بنتها وقامتها..
حليمه بعياط:نهاااارك اللييي دورييي فيييه..
وخدت المغرف..
طلعت حميده تجري ببنتها وهي فجرتهم..
تخبط حميده بالمغرف ع ظهرها..
حميده عيطت من قوة الألم لكن قعدت تحمي فبنتها وتجري..
لعند ماطلعت من باب الحوش..
ع خشة الصديق بسيارته..
وقفوا وهما يشوفوله..
لوحت حليمه المغرف..
هو في السيارة يشوفلهم بإستغراب..
فتح الباب ونزل..
وبدت حليمه بهستيريا تعيط وتقول:معااااد نبيهااااا تقععد هنااااا طلعهااااا..طلقهاااااا..
هو قعد يشوفلها..
وحليمه تخبط ع وجهها وتعيط..
هو طول مشي لحميده قعد يدف فيها ويقول:عدي لمي دبشك..عدييي لمي دبشك.
حميده بصدمه:وين بنعدوا!!..
حليمه:لجهننم الحمراااااااا..
الصديق وهو يرجف:عدي..عدي هياااااا..
هي ماتت من خوفها ركبت تجري ببنتها وهي تبكي بالعبره وبالخوف..
من هول اللي هي فيه ماحستش ببنتها اللي تبولت عليها..
خشت للشقه..
وهو وراها يقول:هيا لميه هياااا..
حميده وهي بالعبره:ووي..ن..ب..نعدوا..وين..
الصديق:مادخليش بيك مادخليش..
ومشي خش للدار..
طلع ساكوا دبشهم..
لان ماعندهاش دولاب حوايجها قاعدات في الساكو..
لوحه قدامها..
"انزززززززل".
طول مشي طلع من حداهم..
وحميده فحالة صدمه..
مش مستوعبه اللي قاعده تمر بيه ابدا..
>>>>>>>>>>>>>>>>>>>>>>>>
نزلت من الدروج وفحضنها بنتها اللي دافنه وجهها فرقبتها وتبكي..
وصلت لوطا...
ماكان في حد..
قعدت تشوف للباب وهي مش عارفه شن ادير..
لازم تطلع لايمكن تقعد اكثر ..
باهي وين تمشي وين...!!
قطع عليها تفكيرها صوت الباب اللي انفتح..
طلعت حليمه:هياااا..سقديييي اطلعيييي..
هي مابتش تشبحلها..
كانت تشبح لشي تاني..
جهة دار نومها الاولى المكسرة والملوحه برا قصدا..واللي يقصد هني..ضرتها..
وفجنبها صورتها المشقوق مرشها...
مشت جيهتها..
وصلت فيها نزلت بنتها..
وخدت الصورة..
فكت الكاترو...
وطلعتها منه..
وحليمه جتها تجري..
جبدتها من عبايتها وهي تقول:اطلعيييي..
حدفتها..جت حدا ساكوها..
قريب طاحت حميده لكن شدت روحها..
خدت الساكو..
بعدين طبست قامت بنتها اللي جتها تجري..
ومشت ناحية باب الكونشيللو..
وحليمه تدعي عليها..
تدعي وتدعي..
وحميده عروق قلبها يدعوا ...
وصلت فباب الكونشيلو..
حطت ساكوها..
فتحت الباب وطلعت ببنتها..
وبعدها خدت الصاكو..
وطلعت..
وصكرت الباب..
ومازال ضرتها تدعي..
اما راجلها فكان يتغدا فدار النوم..والباب مصكر عليه والتلفزيون صوته عالي..
وهي مازالت واقفه في الباب..
مش عارفه كيف ادير..
شن بدير كيف تتصرف..
وين تمشي...!!
وين.؟؟؟!!..
بعد بضع دقايق من التفكير..
خدت نفس..
وطلعت تليفونها من جيب الساكو..
حنين بعبرتها:ما..ما..وين..نعدوا!؟..
خدت حميده يد بنتها وباستها..
بعدين ضربت ع رقم معين..
وحطت التليفون ع وذنها...
نادى..نادى...نادى..
وبعدين انفتح الخط...
ورد صاحب الرقم اللي اتصلت بيه يقول...
"حميده!؟"

....يتبع...ض