المتمردين

العشق المتمرد

#العشق_المتمرد

#جمان_فريد

الجزء 102 القسم الرابع..

🌟..
⚡فلاش باك..
قبل رمضان ب 10ايام..
كانت مقعمزة في الصاله قدام التلفزيون..
عاصبه محرمه ع راسها ورافعه حاجبها وسارحه..
هو قاعد واقف يشوفلها..
ابتسم وهو يحرك فراسه ايمين ويسار..
بعدين خش..
وجي قعمز حداها..
هي شبحت للتلفزيون وقرنت حواجبها في بعض..
الهادي:سومه..
مابتش ترد..
الهادي :قاعده زعلانه حبيبتي ؟!
شبحتله بنفس الملامح وقالت:وشن رايك انت ؟
ضحك وقال:اني تعرفيني مايهونش عليا زعلك..
طلع يده اللي كانت مدسوسه وراه..ووجهها ليها..
كان فيها هديه ملفوفه..
هي شبحتلها وقالت:هدى شنو؟!
الهادي بإبتسامه؛هدي ترضايتك ياحب عمري..
شبحتله بعدين خدت الهديه..وطول فتحتها..
لقت فيها عطر..
طلعاته وقعدت تشوفله بعدين شبحت للهادي وابتسمت بتهكم وقالت:اصليه ولامقلده؟!
تلاشت ابتسامته وهو يشوفلها..
حركت يدها اللي فيها العطر وهي تشوفلها وقال تهكما:تعرف كم حقه العطر هدى؟!!!250دينار..لكن هدى من منظره الباين مايفوتش 50دينار..صح؟!
مجموعه ملامح تصارعت للبقاء ع وجهه..
حزن
ألم
ضحك..
غضب..
اخر شي استقر وجهه ع ملامح الإستغراب الشديد.
حطت العطر حداه وشبحتله وقالت:اني كان تبي ترضيني حق..حسن وضعنا حسن من حالنا خلينا نعيشوا كيف هالناس اللي عايشه..مش نقعدوا ديمانشوفوا شن عندهم وحني فاقدينه..
هو يمرر فنظره ع ملامحها وهي تتكلم..
معاش فيها اي شي ليه علاقه بالماضي..
مافيش شي يشبه سميه اللي عرفها وحبها من 20سنه فاتت..
ولاحاجه..
حتى قلبه خلاص معاش زي قبل..
غير هو قاعد يشبح للصغويرة اللي بيناتهم يحاول يضحي ويتحمل ويفوت ع خاطرهم..
بلع ريقه وقال بهدوء:سميه...حبيبتي..كل حد في الدنيا هدي ربي قاسمله مقسوم مش حيطول اكثر منه ولاحيجيه اقل منه..اللي يقنع باللي عطهله ربي هو اللي يعيش مرتاح ياسميه...ركز بالنظر فعيونها وقال..اقنعي ياسميه وارضي بنصيبك من الدنيا..
ضحكت تهكما وشبحت للتلفزيون شويه..
بعدين ناضت وقفت وهي تقول:النصيب..كان حطيت عقلي فراسي ماكانش هدى نصيبي..
ومشت من حداه...
مش اول مرة تقول الكلام هدا..مش اول مرة تلقح عليه هالتلقيح..
وهو كان يفوت ويفوت ويفوت...
بس هالمرة...
كل اللي يربطه بيها شعره وهي اختارت تقطعها..
ناض ومشي لحقها لدار النوم..
لقاها طلع في دبشها بش بدوش..
هي حست بوجوده قالت:تعرف قديش ليا ماشريت دبش حوش متاع صيف؟شبحتله وقالت وهي تاشر بصباعها السبابه والوسطى..عامين...
الهادي:رفعتك كم مرة انتي اللي ماتبي تاخدي..
رفعت حواجبها وقالت:وين رفعتني ياقهرتي ؟!لمحلات الهرتش والحوايج المبهدلات اللي حق التوته فيهن ماتفوتش 25..
نلبسهن مرة اتنين بعدين يعدن فيها مع الغسل في الغساله..
ااااخ عليك طياح سعد سعدي...
غير ياريتك خليتني نولي لخدمتي اقلها طلعت فيها مانصرف بيه ع روحي..لكن انت صكرت راسك..
طبعا كيف تبي تثبت انك راجل الحوش كان مادرت هكي..
ضيق عيونه وقعد يرمش فيهم وهو يقول:شنو؟؟
لفت لدولابها بلا مبالاة وكملت تقول:اااه غير ياريتني ماعديت للمة مرت خوي وانقهرت اكثر ما اني مقهورة..
"انتي طالق"
جمدت فمكانها والتفتتله ببطئ وهي تشوفله بعيون جاحظة النظر..
الهادي بحده:وتي روحك هيا ..اشر بيده ايمينه وهو يقول..لحوش هلك..
وهي مازال تشوفله وترعش مع بعضها...
هو شبحلها من فوق للوطا ..نظرة واحد عايف..وكاره..
وهي مازالت واقفه فمكانها تشوفله بصدمه لعند مااختفي من قدامها..
⚡الوقت الحاضر
علاش ياهادي ياوخيي ليش هكي؟
شبح لكفايه اللي سألاته ..
ماردش..
زينب:باهي شن السبب؟
شبح لزينب بعدين غير نظره عنها وشبح لغاليه اللي كانت تشوفله بألم وعيونها مليانات دموع..
تنهد وقال:تحملت واجد فوق الحد تحملت..لعند هنى وخلاص..
التلاته قعدوا يشوفوله بنظرات حزن ع حاله..
اما هو ابتسم ع جنب وقال:امتى يطيب غداكن رني عليا ياغاليه..
لف ومشي طلع..
غاليه خبطت بيدها ع خدها وقالت:حي ع امي كان تعلم حي..
خواتها شبحولها وحسوا بالخوف اللي تحس بيه غاليه حاليا
🍃امهم ع قد مااظاهرت قدامهم انها متماسكه بعض الشيء لكن من داخل كانت تاكل فروحها وهي تخمم فكل واحد فيهم..
حميده وحالها هي وبنتها..
الهادي ووضعه اللي مازال مجهول بالنسبه ليها..
هانيبال وغربته وبعده عنهم
بناتها اللي سيبوا حياشهم هاربات من هول الحرب ومش عارفه شن بيصير في اللي خلوه وراهم
تخمم فحال ميلاد اللي كل يوم لتالي من اللي صار لولده  معاش زي قبل بكل..حاسه ان فيه شي هو مايبيش يقوله..
تخمم حتى في حميد اللي دار عيليتين هل ياترى حيقعد حاله مستقر هكي ولا يجيه نهار وتلحقه المشاكل حتى هو ؟
واجعها عمر وحظه ونصيبه..
حتى الأحفاد..
وأولهم حفيدهم الكبير اللي ليه اربع سنوات بعيد عنهم ومش معروف اذا كان فعلا حيوليلهم حي يمشي ع رجليه ولامحمول ع الأكتاف فتابوت..
وفخطيبته بنت بنتها اللي مش عارفه لو صارت فيه حاجه هي شن حيصير فيها...
ولا بنت بنتها الأرمله الصغيرة الأم لتلاته صغار كيف حتقدر تتحمل مسؤولية تربيتهم؟وهل تقعد عمرها كله من غير زواج!!؟ولو جي نهار وتزوجت شن بيصير فصغارها؟!
واخرهم اللي صار بين ولد بنتها وبنت ولدها اللي مش فاهمه للهالحظه علاش صار هكي بيناتهم..
رغم انها عارفه زي مالكل عارفين انهم يبوا بعض بشدة.!!
وكله كوم...
وغاليه كوم تاني..غاليه هي اكثر حد شايله همه من بينهم كلهم..
خايفه عليها من الوقت..
خايفه عليها من الوحده..
خايفه عليها هلبه هلبه...
ناري ع قلب الأم..الجده..قداش حامل ومتحمل...
من زمان لتوا...
🍁🍁🍁🍁
الساعه 6:15مساءا..
تتجول بعيونها في المكان بنظرات فيها إزدراء غيرت عيونها لبنتها وقالت:امتى يصير منها شقتكم ؟
لمياء وهي تصب في القهوة في الفناجين:7شهور تانيات وتكون تامه
ع خشة اختها عليهم:حيي قصدك بتجيبي وانتي ساكنه هني؟!
لمياء بضحكه:لا ياغبيه نخش شهري مع خشتنا لشقتنا..
سناء بضحكه:كان هكي باهي..
نادرة قدمت وخدت فنجان وهي تقول:سلفك اللي برا يكمل فحوشه..
لمياء:ايه..
رشفت من الفنجان وقالت:شكله راقد ع خميرة باهيه..
لمياء:حاسه ان حتى مرته تعاون فيه من منحتها..
سناء :باهي هو شن يدير غادي كان هي ماشيه تقرا؟
نادرة:يطيب ويغسل فالماعين..
لمياء وسناء:ههههههههههههه
لوطا...
فم البوابه..
مصح وجوههم..
نعيمه:امها جايه تشوف وين ساكنه..
كفايه:ماتصبرش لغدوة ؟!
زينب:اني هالعيله مانزلوليش من هني..واشرت ع رقبتها..
نعيمه:زيك واحرف..
كفايه:اص اص محامية عيلتهم جايه..
شدوا ضحكتهم..
ع جية حميدة ومعاهم غاليه وغزلان..
لأول مرة تلبس ردي بتمشي تقعمز معاهم حدا الفرن..
زينب بإبتسامه:يهبل طالع عليك..
ابتسمت غزلان بخجل وقالت:تسلمي..
غاليه بإبتسامه:هي نعدوا..
كلهم بأصوات متقطعه:هيا..
مشوا مع بعض وهما يهدرزوا..
طلعوا من ممر فم البوابه سمعوا دوشه..
شبحوا يمينهم لقوا الشباب ملتمين في ساحه فاضيه في بداية القطعه..
غاليه بضحكه:بيلعبوا كورة..
كفايه:هههههه..خطرت عليا اخر مبارة..
ضحكوا..
وكملوا طريقهم وكفايه تحكي بإختصار لغزلان عن المباراة اللي قالت عنها..
فم بوابة الحوش القديم..
نور بصدمه:وعلاش يارزان تقوليله هكي ؟!!
نزلوا دموعها وعيونها لوطا ومابتش ترد..
رفقه بدموع:كله مني اني اني السبب فكل شي..
رزان رشفت وقال:معاد تلومي روحك سادك ماجاك..
نور مررت نظرها عليهم وقالت:اسمعوا مروان وعماد لازم يعرفوا اللي صار بالتفصيل لازم تتوضحلهم الصورة كامله..
رفقه :باهي كيف بس اذا الزوز دايرين رواحهم مايعرفوناش..
تنهدت نور وقالت:زي حالكم حتى اني مالك متجاهلني مرة وحده...اففف..لولا اللي صار بيني وبينه كان هدا قتله يدخل في الموضوع ويتفاهم مع خوته..
"ووووووه"
نور التفتت وقالت:يلعبوا في الكورة..شبحتلهم وقالت..تعالوا نتفرجوا..
شبحولها الزوز بضيق وعيونهم مليانات دموع..
نور برفعة حاجب:خليكم ديما فوجوههم خلوهم ديما مشغولين بيكم..
شبحوا لبعض..
نور :تي هيااا تعالوا..
شبحولها شويه بعدين هزوا روسهم بإيجاب..
ابتسمت نور..
مشوا مع بعض للمستراح اللي قدام الحوش القديم..
كانوا فيه رباب ورانيا ودلال والبنيات الصغار فجهه..
والولاد الصغار برواحهم فجهة تانيه..
هما التلاته مشوا للجهة اللي فيها البنات..
رزان بالذات كانت متردده هلبه..
نوعيتها زي ماتعرفوا فيها كبر...ماتبيش تبان هي اللي دور فيه وهو مش معبرها..
لكن في نفس الوقت كانت تبي ادير شي ع خاطره هي اللي خسراته وهي اللي لازم ترده..
هو ياما تنازل ع خاطرها تمسكا بيها..
وهي توا تبي تتنازل ع خاطره تمسكا بيه ..
وعماد يستحق منها اكثر من هكي..
💓وقفت مدرقه ورا البنات وتتفرج من فراغ بسيط..
تشوفله ومركزة ع هيئته..
لابس شورت رصاصي لعند الركبه وتيشرت ابيض رقبته سبعه باينه سلسلته زين وهو يجري
كان موخر شعره من القدام بشي يلبسوا فيه الشباب ولاعبين الكورة تحديدا بالذات لما يكون شعرهم طويل ونازل ع العيون..
ابتسمت ..وغيرت انظارها لرجليه لقاته لابس سبيدروا ابيض خفيف..من غير شخشير..
تموت فتفاصيله المميزة حفظتها حفظ وديما تحب تركز عليها..
كانت الكورة عنده وكان يلعب بيها لعب محترف..
تخطاهم كلهم لعند ماوصل في المرمى وسجل هدف..
عيطت نورهان وهي تقول:خوياااا خوياااا وووه وووه ..
شبحلها وبعتلها بوسه طايره بيده هي مدتله خدها ع اساس جت فيه..
ضحكوا عليها البنات..
من فوق ..
يهبل يالموشي..
لمياء:باهي ياسرك دوة وتفلحني وديري حاجه..
سناء بضحكه:تو بعدين نوريك شن درت..
فنصت لمياء:شني!؟؟بعدين عينك توا توا توريني..
سناء وهي تشوف لعماد كيف يلعب:فوتيني ترا..
شبحت لمياء وين ماتشبح ضحكت:باهي ياستي خودي غايتك توا..
غيرت عيونها عن اختها..
وشبحت لوطا جهة البنات لقت رزان مدرقه وتتفرج..
رفعت حاجبها وبعدين شبحت لعماد وقالت فنفسها"حتقعدي تتفرجي عليه من بعيد من هني وبرا غادي"
🍁🍁🍁🍁
وين المشكله لو مرة مرة يجيبك واحد من الولاد تقعدي حتى نهارين تلاته؟!!
زينب:صح غاليه...فرصة..
كفايه:نقول حتى للاولاد يجيبوك..
غاليه بتردد:تحسوها صعبه..
غزلان:علاش صعبه؟!!
نعيمه:غاليه باب رزق وانفتحلك ماتسكريشي سلم وخيتي..
غزلان:زي ماقالت نعيمه..انتي لو تشوفي كمية الرسايل اللي جتني وكلهم يبوا من شغلك..
حميده كانت تسمع وساكته..
مش عاجبها...
وخافت..
خافت لو تاخد غاليه ع مشي لطرابلس وتخالط وتعرف ناس وممكن يجيها نصيب وتمشي وهي تقعد بروحها...
خافت ياخدوا عليها هي اللي تخدمهم واطيب وتغسل واضم ويعبوا عليها كيف ماعابيين ع غاليه وتنسى نفسها زي ماغاليه نست نفسها..
ايه هي تبي تطلق لكن ماتبيش حياتها توقف..
ركزت ع غاليه زين..حستها زي اللي بتقول باهي..
طول تكلمت..
حميده:صعب..
شبحولها..
حميده وهي تمرر فنظرها عليهم:صعب واجد انتوا تعرفوا ان غاليه مسؤوله ع العيله كلها وهي اللي تعاون في امي كيف تبوها تعدي لطرابلس وتقعد فيها غادي بالأيام؟!
غاليه :هو هدى اللي نفكر فيه..صعب حق..صعب واجد..
حميده وهي تأشر بصبعها ع غاليه:هاه ريتوا طلعت تفكر نفس تفكيري..
غزلان فنفسها "وشن قاعده اديري انتي!؟"
زينب بضيق:لكن حرام فرصه زي هادي اضيع..
حميده: اللي جابها يجيب غيرها..
شبحوا نعيمه وكفايه لحميده بإمتعاض..
غزلان:باهي نقولك حل..تجي خميس وجمعه بس تخدمي كم طلبيه..هالنهارين هادوا..شبحت لحميده..ماكمش غالبين فيهم انتي ولمياء ياحميده..
نعيمه:صح..لمياء ديما لوطا ولتوا ماقسمتش تعاوني انتي وياها..
زينب وكفايه قعدوا يشبحوا لحميده وواضح من نظراتهم ليها انهم موافقين لكلام غزلان ونعيمه..
شبحت حميده لغاليه اللي كانت تشوفلها بنظرة مترقبه..
خلاص حميده انحطت فموقف صعب..
مش فصالحها لو قعدت متمسكه برأيها قدامهم..
هزت راسها بإيجاب وقالت:كان هكي باهي..
ابتسمت غاليه بفرح..
وخواتها ابتسموا لفرحتها الباينه فعيونها..
غزلان بإبتسامه:تمام بعد تهدا الأوضاع بإذن الله نسقوا مع بعض اكثر..
غاليه بإبتسامه:إن شاء الله..بعدين ضحكت وقالت..نسيت الخبزة..ولفت تجري للفرن بش اطلعها منه..
كملوا باقي هدرزتهم ع خدمة غاليه مع غزلان..
حميده مابتش تشارك في الحديث نهائي قعدت بس تشبح مرة مرة لغزلان فشبحات حقد..
حطتها فراسها...
🍁🍁🍁🍁
مقعمزة قبالتها تشوفلها كيف تتكلم بالتليفون وتسمع شن تقول..
نادرة بصدمه:لااالااا!!.........حييي.......يانااااري وجعتني وجعتني مسكينه!!!...........لاحول ولاقوة إلا بالله......ربي يشبح فيها..تصنعت تنهيدة الم وقالت...باهي كميله صحيتي...سلمك نشاده.....بالسلامه...يوصل يوصل...بالسلامه..صكرت ونزلت تليفونها وقعدت تشبحله بأسف مصطنع..
فاطمه بتضييقة عيون:إن شاء الله خير؟!
نادرة شبحتله وقالت متصنعة الحزن:بنت خال راجلي مسكينه جاها الخبيث..
فاطمه غمضت عيونها بشده بعدين فتحتهم وقالت:لاحول الله ربي يجيرنا ويشبح فيها مسكينه..
برا..
ياوخيتي سلمه لام الحاجات الحلوة كلها..
لمياء بضحكه:كان مش شادتك راك نقزتيله..
سناء ضحكت وقالت؛شديني زين..
ضحكت اختها..
لوطا..
كانت نور تراقب فمالك وهو يلعب بعيون عبتها دموع..استاحشاته هلبه هلبه..وتوقعت لما تتلاقى معاه في العيد تشوف لهفته عليها وشوقه ليها لكن مع الأسف ماشافتش غير التجاهل..
التجاهل اللي مروان حتى هو ماشي بيه مع رفقه مش بس تجاهل الراجل مش طايقها بالمرة..ونظرته فيها تغيرت 180درجه...
بإختصار..طاحت من عينه..
وهي حاسه بهالشي حاسه ان مروان كرهها وبرغم هكي ماقدرتش تلومه..
حتى رزان ماقدرتش تلوم عماد على أي شي يديره معاها لأنها لو كانت مكانه ودارلها اللي داراته فيه لايمكن مازال تشبح فوجهه..
هييييي...خوياااااا خويااااا وووه وووه...
هدف تاني سجله هالمره مالك اللي كان يلعب في الفريق التاني..
عماد:خنفوسه خلي عندك طارقه..
ضحكوا..
نورهان برفعة حاجب:حتى ملوكي خويا..
ضحك مالك وبعتلها بوسه طايرة بيده وهي دارت نفس شي مدت خدها وكأنها تلقتها..
مالك وهو يضحك غير عيونه عنها جو فعيون نور..هي طول غيرت عيونها ودارت روحها ماتشبحلاش..
ابتسم بعدين رجع لهي باللعب..
كانت رانيا تتفرج عليهم لكن اللي تشوف فيه قدامها مش المباراة اللي قاعده تنلعب حاليا..
اللي كانت تشوف فيه مباريات قديمه لعبوها فنفس المكان كان بطلها بلا منازع ...الأصفر💓..
دموعها ينزلوا وهي تمسح فيهم وتحاول تتماسك ع قد ماتقدر..
بينما دلال وهي قايمه فغمرها آسيا رجعت بيها السنين لسنه 2008..
والمباراة اللي صارت في الجهة التانيه من القطعه ضحكت من بين دموعها وهي تذكر فلعب عمار اللي مالاش علاقه بلعب كرة القدم نهائي..
استاقضوا الزوز ع صوت صياح رباب وهي تقول..
"سنوووودي"
شبحوله لقوه يجري ويصفق لروحه لأنه سجل قول..
روان كانت تشبحله وتصفق بالقوة..
ومش هي بس..
دلال بضحكه وحواجبها مرفوعات:شوفوا اسو امتى صفقت؟!
شبحوا لأسيا لقوها تصفق..
هي شافتهم لقتهم يشبحولها..
غطت عيونها بإيديها طول..
كلهم:ههههههههههه..
رانيا وهي تضحك تحركت شويه كشفت رزان..
اللي عماد وهو يشوف جيهتهم عينه طول جت عليها..
تضحك وهي تشوف لأسيا..
بعدين قرصتها من خدها قرصه خفيفه وباست صوابعها اللي قرصت بيهم خد اسيا..
هو قعد يشبحلها وخلاص لعند ما..
نورهان بعيطه:خويااااااا..
شبحوا كلهم جهة الاولاد اللي يلعبوا..
محمد وهو يشوف لنورهان:ريحي روحك خبطة بالكورة راهي مش صاروخ حراري..
نورهان بتشقليب عيون:لا هدا خويا ماتضرباش..
عماد ضحك وقدملها..طبس عليها ووراها وجهه..
ورزان طول ادرقت ورا رباب..
قعدت نورهان تتفحص فوجه خوها قالت:كويس مافيش دم..
شبحت لخالها وقالت:براءة..
كلهم:هههههههههههههههههههه..
محمد بإزدراء:عزوز القايله..
نورهان شقلبت عيونها..
عماد يشوف لحركاتها..وقلبه يدق بقو قوه💓..
يدوب شبح بطرف عينه للجزء الباين من قفطانها وهي مدرقه ورا رباب..
بعدين وقف ع حيله ولف ومشالهم وهو يقول:هي..
واستأنفوا لعب..
هي بينت راسها من جديد وقعدت تشبحله ودموعها طول طاحوا..
ورفقه تشوفلها بحزن..
🍁🍁🍁🍁🍁
حوالي نص ساعه تانيه وتمت المباراة..
والولاد مع بعضهم مشوا يدوشوا..
واللي هدا شد دوره قدام الحمام الخارجي..
اما النساوين..
حميده وكفايه وغزلان ولو للحوش..
وقعدوا نعيمه وزينب مع غاليه..
زينب بصدمه:لزتها ؟!
غاليه هزت راسها بإيجاب وهي متأسفه..
نعيمه:هدا علاش ماجتش عيدت..
غاليه:لاقت امي فم الحوش عيدت عليها وعدت..
زينب:هو اني نعذر حميده بس فنفس الوقت سعيده خلاص معاش زي قبل انهدت هد بعد اللي صار لرمزي واني بصراحه معاش حاسه جيهتها بأي شي غير انها مسخفتني لاني ام وحطيت روحي فمكانها سادها اللي هي فيه..
نعيمه:صدقتي..وفي النهايه نصيبات..النصيب والموت واحد مايقدر يمنعهم حد كان ربي
غاليه:وحتى اني هكي نفكر..لكن تعرفن لحمي كشش من دعاها ع رزان خايفه ربي يستجيب
زينب:والله من لما تفركش موضوعها واني قلت فنفسي ان حساب سعيده بدي
غاليه دمعتها غلبتها وقالت بنبرة صوت باكيه:لاياربي لا..اني والله مافي قلبي حاجه ع حد ولاليا حق عند حد..ياربي لا..حطت يدها ع وجهها وانهارت بالبكي..
ونعيمه ناضتلها وعيونها مدمعات حضنتها وهي تقول :إن شاء الله مايصير لها شي..
اما زينب فقعدت توزع فنظرها ع المكان وهي ترشف وتمسح فدموعها..
🍁🍁🍁🍁
واقف زي الحرس..
دلال:حد يتبرع يفهمه انه راجلها..
رانيا بضحكه:خايفه نهار الدخله يخش معاهم الدار..
البنات:هههههههههههههه..
في الجردينه..
مؤنس :ع خاطرك ياشقيقة القلب بنفوت الحركات اللي يديرفيهن..
رباب بإحراج:اسفه حبيبي بس خوي هكي عقليته ..
مؤنس بإبتسامه:معاش تتأسفي مني الا فحال غلطتي بس..
ابتسمت وقالت :حاضر💕..
وحمزة واقف حدا شجرة السرول ويراقب فيهم..
فات من حداه سند وهو شاد ضحكته..
شبح لاخته وراجلها حرك راسه ايمين ويسار وهو يضحك..بعدين كمل طريقه لمستراح الحوش القديم..
رانيا:نهارك كيف مدوش وطالع فالريح!!
سند وهو يشوف لأسيا ويضحك :تي وينها الريح!!قدم لآسيا..تعالي ياشمحه..
جاته طول قامه فغمره وقال:كبرتي ياشفشه..
اسيا حركت راسها ايمين ويسار نافيه وهي تقول:لااا ني بيبي..
ضحكوا..
سند بضحكه:قاعده ترضعي فالرضاعه..
اسيا:ايه..
سند:باهي امتى تكبري..
اسيا شبحت لأمها..
دلال وهي تحرك فيدها حركه دائريه قالت:مازاااااااال..
اسيا شبحت لسند وقلدت حركة امها وقالت:ماجااال..
كلهم:هههههههههههههههههههه..
سند بعد ضحك خدي يدها وباسها بعدين قال:ماشاء الله ربي يحفظها ..
دلال بإبتسامه:تسلم..
ع جية رباب وهي قالبه وجهها..
مشت قعمزت حدا رزان وهي معصبه..
كلهم شبحولها وهما شادين ضحكتهم..
سند وهو مبتسم طبس عطي اسيا لأمها خدتها وقال:بااااي اسو السمحه..
اسيا:باااااااي..وهي تأشر بيدها..
هو ضحك بعدين لف ومشي..
راجوه لين يبعد ..
رباب:طارتله مؤنس من حركات دراه الكبد اللي ينقاله حمزة..
دلال:زودها..
نور:خلاص هانت كلهم شهر ونص..
ارتسمت ع وجهه رباب ابتسامه عبيطه وهي ترمش فعيونها قالت:شهر ونص بس؟!الله يابنااات..
هما:ههههههههههههه..
🍁🍁🍁🍁
قولي والله!!
نادره:كميله سلفة مرت خال بوك هي اللي قالتلي..
لمياء برفعة حاجب:نيتي خدتها..
نادره بإبتسامه شماته:حتى اني قلتها تفتري عليك وتشهدر بينا في العيله كلها واخرتها توصل حتى في متاعين راجلك تبي تخربلك حوشك الشيطانه..
سناء:ايه..وتوا الكل اكيد عرف شن جاها ولازم يعرفوا انها نية لمياء..
لمياء شبحت لسناء وقالت:صح..شبحت لأمها وكملت تقول..بش يعرفوا الكبير قبل الصغير في العيله ان اللي دارته فيا ليلى لقاته..
نادره برفعة حاجب:ماتوصيش حريص..
🍃والله في هكي والله واسوأ بهلبه...بهلبه 🍃
🍁🍁🍁🍁
الساعه 9:00ليلا...
مقعمزين في الصاله يهدرزوا..
نادره؛والله ماتستاهلي ياحميده يابنتي ذهبه وهو اللي خسرك..
لمياء:ديمه نقول فيها لعمر..
حميده بنظرة كبر تحاول تخفي بيها إنكسارها:الله غالب هدى حظي...
نادره:ومن هي بنت ستين كلب هادي اللي ذهبتله شيرته وخداته من عيلته..
لمياء:وحده من بنات الحرام اللي مايخافوا ربي..
دلال:الله ينتقم منها..لكن خلونا مانوصلوش فحاجات زي هادي بنات حرام مابنات حرام..قذف محصنات هدا..
امها وخالاتها ومرت خالها عجبهم الكلام..
اما حميده رفعت حاجبها..
وسناء شبحت للمياء اللي انقمصت ووجها راح اسود..
نادرة بإبتسامه:ماشاء الله عليك..صدقتي صدقتي..بس الواحد من الحمقه يطلع  كلام مرات مش راد باله منه..
لمياء ابتسمت مجامله وقالت :عندك الحق دلوله..استغفر الله العظيم واتوب اليه..
حميده بحده:في النهايه كل وحده تاخد راجل من حوشه ومن صغاره جعنها تلقاه ..
غزلان شبحتلها..
والبنات شبحوا لبعض..
ونادرة وبناتها شبحوا لغزلان برفعة حواجب.
ع خشة رباب وبعدها رانيا بصفر العشي..
غزلان اضطرت تبلع موس وتسكت زي مايقولوا..
⚡بس لحظه فوسط هالجمعه هادي..
وين غاليه؟..
ورفقه؟؟..
كفايه:غاليه وين ورفقه وين..
رباب شبحت لرانيا وقالت:في الكوجينه مازالوا يقسموا في العشي..
رانيا ابتسمت بربكه وقالت:تعشوا انتم هما تو يتعشوا برواحهم بعد يكملوا..
كلهم استغربوا..
ماعدا لمياء اللي حست ان غاليه ممكن ادير شي يخرب عليها كل اللي خططتله واللي قاعده تخططله..
🍁🍁🍁🍁🍁
في الحوش القديم...
غاليه بحزم:اسمعي رزان خليك عاقله بالله عليك شن مقال انتي..مشت غاليه يدها ع فمها..بمعنى تقعدي ساكته..
رزان هزت راسها بإيجاب وقلبها يدق بقوة شديده من الخوف..
غاليه:وانتي رفقه كل اللي عندك كله تقوليه باهي؟
رفقه هزت راسها وهي تقول:حاضر..
سمعت صوت باب الحوش انفتح
رزان بطنها وجعتها وزاد قلبهاقوة في النبض
"غاليه"
شدت ع قبضة يدها بالقوة وبلعت ريقها اللي كان طعمه امر من الحنضل..
غاليه:تعال عماد..
يسمعوا فخطواته تقرب..
عيونهم مركزات ع باب الدار..
شويه وبان عليهم..
عماد عينه جت ع رزان طول وخر وقال:ربي يهديك ياخالتي ربي يهديك..
مشت طول غاليه طلعتله..
رزان بصوت مخنوق:ريتيه يارفقه!
رفقه شدت ع يد رزان وهي تشوفلها بحزن..
برا..
غاليه:تعرف كان ماتخش تو تنساني مرة وحده..
عماد بضيق شديد:علاش تحطي فيا فمواقف زفته علاش بس..
غاليه ابتسمت بتوسل:غير هيا خش وراسي..
غمض عيونه بشده وبلع ريقه ..بعدين فتح عيونه وأشر بيده لباب الدار..
غاليه مشت خشت..
شبحولها الزوز ..
وهو خش بعدها دون مايشبح لوحده فيهم..
مشت غاليه وقفت قدامهم..
وهو قعد واقف فمكانه..
ايديه ورا ظهره ويشبح القدام وحاجبه مرفوع.
ورزان تشوفله ودموعها ينزلوا ..
غاليه :في حاجات انت ماتعرفهنش..ومش واضحات عندك واني نبيك تعرفهن قبل بعدين تتفاهموا بينات بعضكم..
شبح لغاليه وقال بتهكم وهو يرمش فعيونه وقارن حواجبه:حاجات زي شني؟!
شبحت غاليه لرفقه..
رفقه شبحتله :احمم..تقريبا من سنه فاتت..
وقعدت رفقه تحكي في القصه من البدايه.
وهو بنفس وضعيته..
غاليه تشبحله..
ورزان تشوفله بوجع ممزوج بالخوف والدموع ورا بعض ينزلوا..
بعد طول سرد من رفقه للقصه..
رفقه:اني فهمت غلط من البدايه ونقلت اللي سمعته وفسرته تفسير غلط من الأول..
عماد ضحك بتهكم وهو يحرك فراسه ايمين ويسار..شبح لغاليه وقال :بدال ماتواجه تتفق هو وياها يلعبوا عليا لعبه مسخه زي...سكت وهو مغمض عيونه وبشده وقال...اني والله الموضوع هدا..فتح عيونه وهو يشوف لخالته..صكرته ومعاش نبي نفتحه ولانجيبه فدوه حتى..بالنسبه ليا اني هي صفحه ومزقتها خلاص..كنت غافل وربك وقضني وردني عن ضلالي..
رزان مسحت دموعها وقالت بحده:انت هكي تظلم فيا راك..تقول فكلام ممكن تندم عليه بعدين..
ضحك سخريه وعيونه معبيات دموعه قال لغاليه وهو يأشر ع رزان:ريتي من يتكلم عن الظلم..لا وفوقها تو تندم..
رجع يده وقال بغضب..انتي وحده ..وقحه..
انصدموا غاليه ورفقه..
رزان بصدمه:حرام عليك الكلام اللي تقول فيه!!بلعت ريقها وقالت..حتى بعد اللي سمعته ماتفهمتش ليش اني درت اللي درته!!
قاطعها وقال:مانبيش نفهم..
رزان بصوت عالي:لا لازم تفهم..
عماد بصوت اعلى:قلت مانبيش نفهم..ياما حاولت فيك بش تفهميني فوق كل اللي درته معاك مابيتي تفهمي مني شي تبيني توا اني نفهمك!!لا اني فااهمك وفاهمك كويس..
ومن الحاجات اللي فاهمهم انك توا تبي ترقعي عملتك وتصلحي اللي درتيه بش يرجعلك الجو المليح اللي كنت معيشوهلك..هدايا ودلع ودلال..
حطت يدها ع فهمها ومن صدمتها عيطت عيطه مكتومه وشبحت لعمتها..
غاليه ضيقت عيونها بصدمه شديده مش مصدقه اللي تسمع فيه.
اما رفقه من صدمتها ضيقت عيونها وانفتح فمها شويه من هول اللي سمعاته..
عماد بإصرار:ايه ايه..ماديريش روحك مصدومه..
حولت يدها من ع فمها وقالت بنبرة ترجف:كلام فاضي..تقول فيه من ورا قلبك..
عماد بضحكه سخريه :عليك وهم معيشه روحك فيه..
رزان:باهي اشبحلي وانت تتكلم..
عماد قلب زادت رجفة قلبه اكثر واكثر قال :مانبيش..
رزان:لا اشبحلي..
عماد :لا مانيش..
رزان :ترا علاش.
عماد :لأن نظرة من عيني هلبه ع وحده زيك..
رزان قلبها انكسر ...تهشم...
وروحها انجرحت جرح فالعمق موجع هلبه..
وجرح الروح اقسى جرح..
شبح لخالته وقال:من هاللحظه لازم انتي تعرفي اكثر من غيرك ان بنت خوك هادي معاش تعنيلي شي حتى بنت خال مانيش حاسبها..
ولف ومشي طول..
رفقه بغضب:والله لما تندم...والله..
غاليه بصدمه:لاحول ولاقوة الا بالله!!
رزان فهاللحظه قطع عليها اللي هي فيه حاجه فكرت فيها طول لما طلع من حداهم..
شدت يد عمتها وقالت بهلع:بيعدي بالسيارة..بيعدي بسيارته ياعمتي...بيعدي بسيارته..
فهمت عليها غاليه..
نفضت دراعها من يد رزان ومشت طلعت جري..
برا..
فعلا عماد كان ماشي لسيارته وهو مايشوف فشي قدامه..
مازال قلبه يرجف..
ودموعه يحبس فيهم بقوة مستخسرهم فيها..
انفزع لما شدت غاليه ذراعه..
غاليه:وين بتعدي فهالليل..
عماد بغضب:لجنهم الحمراء..خليني فحالي تربحي..
غاليه بصوت واطي:ماتعديش بسيارتك..
عماد وهو يحاول ينفض يده منها :مادخلكش بأمي ندير اللي نديره..مالكش علاقه..
ع جية محمد ومروان من بعيد لاحظوا ان الوضع مش طبيعي..
محمد:شنو في؟!!
مروان مشالهم بسرعه..
ومحمد لحقه وهو مستغرب..
غاليه بدموع:وراس عماد خلاص اني اسفه..سامحني اني الكلبه اني الحقيرة..
عماد دموعه نزلوا غير عيونه عنها وقال بصوت مخنوق :حاشاك..
وصلوا فيهم مروان ومحمد..
الزوز قالوا:شنو في؟!خيركم!!
غاليه شبحت لمحمد بتوسل..
محمد شبحلها شويه بعدين جي لعماد شده من ذراعه وقال؛تعال معاي..
مشي مع خاله بالسيف ومعاهم خوه للجردينه..
قعدت غاليه معاهم بعيونها اللي مازالوا يذرفوا فالدموع..
من الجهة التانيه قدام الباب الخلفي لحوش ميلاد..
خشت رزان للحوش ..
ورفقه كملت طريقها لحوش جدها وهي تمسح فدموعها..
لاقت عمتها جاية ..
قعدوا يشوفوا لبعض بحزن..
جتها رفقه خشت حضنها..
وغاليه حضنتها..وخشوا هي وياها لممر فم البوابه..
فحوش ميلاد..
سعيده كانت فدارها لما سمعت صوت باب تقربع..
طلعت منها وهي مخلوعه..
مشت كم خطوة..لين وصلت باب دار بنتها..
سمعتها تبكي بقوة...
قلبها انفطر...ودموعها نزلوا...
ماقدرتش تخشلها وتسألها خيرها لأنها عارفه شن في..
رجع قلبها انقبض وصدرها ضاق..
ومشت بسرعه لدارها خشت..وصكرتها عليها..
🍃عن الظلم..
حتى لو تبت ورجعت...وندمت..
لابد تتحاسب..
حتى لو سامحك اللي ظلمته..
يقعد حق الله..
اللي حرم الظلم على نفسه وجعله بيننا حراما..
لابد ولإقامة العدل كل ظالم يتحاسب ع ظلمه لو مش توا في الآخرة..
وغادي الحساب عسير ومداه طويل...🍃
🍁🍁🍁🍁
لكن الظالم اللي كل يوم يزيد قوة عين..
لان قصر فهمه خلاه يشوف ان كل اللي قاعد يصير معاه يرفع فيه فوق اكثر واكثر..
ومابعد هالإرتفاع..الا سقوط مدوي...
🍁كانت تقرا في القرآن وتبكي..
من يوم عرفت اللي فيها وهي زادت تقرب لله اكثر واكثر..ماتبيش تقنط من رحمته ولاتبي تستسلم للشيطان اللي يقوللها ربي خلاك...
ربي وقف مع عدوك ضدك رغم انك مظلومه..
ترا قولي علاش انتي هدا حالك..
ولمياء هداكا حالها..
وينه ربي عنك وعنها؟!!
هي كانت تطرد فكل هالوساوس بآية
◇ولا تحسبن الله غافل عما يعمل الظالمون إنما يؤخرهم ليوم تشخص فيه الأبصار◇
صكرت المصحف..
لما سمعت تلفونها رن بنغمة رساله..
خداته وفتحت الرساله
(خداتك نيتي ياليلى..اللي درتيه فيا ربي يحاسب فيك عليه..واللهم لاشماته)..
ليلى غمضت عيونها بشده..
دموعها نزلوا..
وقالت :حسبي الله ونعم الوكيل فيك دنيا وآخره..
ع خشة اختها عليها..
شافت حالتها..وركزت ع التليفون..
قدمت بسرعه وجبداته من يدها وشافت الرساله قرتها وقالت:ياحقيرة يابنت الكلبه يامسخه..
وايديها يرعشوا وهي تحاول تتصل..
واول ماحطت التلفون ع وذنها الخط انقطع..
اختها قالت بعصبيه:المسخه هادي دارت حظر..
ليلى نفسيتها من غير شي في الحضيض ..
وتوا زادت تأزمت اكثر واكثر..
حطت ايديها على وجهها وقعدت تبكي بشده..
واختها حضنتها وقعدت تبكي معاها وتقول:
"ربي ياخد الحق..يمهل ولايهمل...يمهل ولايهمل ياليلى..يمهل ولايهمل"..

...يتبع...