المتمردين

العشق المتمرد

#رمضان_احلا_مع_جمان_فريد

#العشق_المتمرد
باقي الجزء 65
القسم الاول

🍁🍁🍁🍁
ﺷﻮﻳﻪ ﻭﺟﺎﻫﻢ ﻫﺎﻧﻴﺒﺎﻝ ..
ﻭﻣﺸﻮﺍ ﺑﻄﺮﻳﻘﻬﻢ ﻟﺤﻮﺵ ﻛﻔﺎﻳﻪ ﻭﺍﻟﺼﻤﺖ ﻛﺎﻥ ﺳﺎﺋﺪ ﺍﻟﻤﻜﺎﻥ ..
ﻭﻛﻠﻬﻢ ﺷﺎﻏﻠﻬﻢ ﺍﻟﺘﻔﻜﻴﺮ ..
ﻟﻌﻨﺪ ﻭﺻﻠﻮﺍ ﻗﺪﺍﻡ ﺣﻮﺷﻬﺎ ..
ﻧﺰﻟﻮﺍ ...
ﻭﻫﺎﻧﻴﺒﺎﻝ ﻭﻫﻮ ﻧﺎﺯﻝ ﺷﺒﺢ ﻟﺤﻮﺵ ﺟﻴﺮﺍﻥ ﺍﺧﺘﻪ ..
ﻭﻣﻌﺮﻭﻓﻴﻦ ﻣﻦ ﻫﻤﺎ ﺟﻴﺮﺍﻥ ﺍﺧﺘﻪ ..❤
🍁 ﺧﺸﻮﺍ ﻣﻦ ﺍﻟﺒﺎﺏ ﺍﻟﺒﺮﺍﻧﻲ ..
ﻃﻮﻝ ﻟﻠﺪﺧﻼﻧﻲ ﻭﻗﻌﺪﻭﺍ ﻳﻄﻘﻮﺍ ..
ﻃﻠﻌﺖ ﻛﻔﺎﻳﻪ ﻭﻓﺠﻨﺒﻬﺎ ﻧﻮﺭﻫﺎﻥ ..
ﻛﻔﺎﻳﻪ ﺑﻀﺤﻜﻪ : ﻳﺎﻫﻼ ﻭﻏﻼ ﻭﻛﺮﺗﻮﻥ ﺣﻼ ...
ﺿﺤﻜﻮﺍ ..
ﺧﺸﺸﺘﻬﻢ .. ﻭﺳﻠﻤﻮﺍ ﻉ ﺑﻌﺾ ..
ﻭﻫﺎﻧﻴﺒﺎﻝ ﻃﻮﻝ ﻗﺎﻡ ﻧﻮﺭﻫﺎﻥ ﻓﻐﻤﺮﻩ ﻭﻗﻌﺪ ﻳﻼﻋﺐ ﻓﻴﻬﺎ ..
🍁 ﻗﻌﻤﺰﻭﺍ ﻛﻠﻬﻢ ﻓﻲ ﺍﻟﺼﺎﻟﻪ ..
ﻛﻔﺎﻳﻪ : ﺷﻦ ﺩﺍﻳﺮ ﻋﻨﺪﻛﻢ ﻋﻤﻮﺩﺓ ..
ﻫﺎﻧﻴﺒﺎﻝ : ﻳﻬﻴﺞ ﻫﻮ ﻭﺧﻮﺍﻟﻪ ..
ﺣﻤﻴﺪﻩ : ﺭﻳﺘﻪ ﺍﻟﺼﺒﺢ ﻗﺒﻞ ﻟﻨﻄﻠﻌﻮﺍ ﻣﺘﻐﻴﺮ ﻭﺍﺟﺪ ﻛﻴﻒ ﺭﺍﺡ ﻃﻮﻳﻞ ﻭﻋﺮﻳﺾ ﻣﺎﺷﺎﺀ ﺍﻟﻠﻪ ..
ﻛﻔﺎﻳﻪ ﺑﻀﺤﻜﻪ؛ﺻﺎﻟﺔ ﺍﻟﺤﺪﻳﺪ ﻳﺎﺣﻨﻪ ..
ﺯﻳﻨﺐ : ﺣﺘﻰ ﺣﻤﺰﺓ ﺧﺶ ﻟﺼﺎﻟﻪ ..
ﻛﻔﺎﻳﻪ : ﻭﻣﺮﻭﺍﻥ ﺣﺘﻰ ﻫﻮ ﻟﺤﻖ ﻋﻤﺎﺩ ﻭﻣﺎﻟﻚ ..
ﻧﻮﺭ ﻗﻠﺒﻬﺎ ﺭﻗﺺ ﻣﺠﺮﺩ ﺍﻧﺬﻛﺮ ﺍﺳﻤﻪ ❤
ﻓﻲ ﻧﻔﺲ ﺍﻟﻮﻗﺖ ..
ﺍﻧﻔﺘﺢ ﺑﺎﺏ ﺍﻟﺤﻮﺵ ﺍﻟﺒﺮﺍﻧﻲ ..
ﻛﻔﺎﻳﻪ : ﻣﺎﻟﻚ ...
ﻧﻮﺭ ﺍﺑﺘﺴﻤﺖ .. ﻭﺭﺑﺎﺏ ﻭﺭﺍﻧﻴﺎ ﺷﺒﺤﻮﻟﻬﺎ ﻃﻮﻝ ..
ﻫﺎﻧﻴﺒﺎﻝ : ﻭﻳﻦ ﺳﻌﺪ ..
ﻛﻔﺎﻳﻪ : ﺳﻌﺪ ﻓﻲ ﺗﻮﻧﺲ ﻣﺎﺗﻌﺮﻓﺶ؟
ﻫﺎﻧﻴﺒﺎﻝ : ﻻ ﻭﺍﻟﻠﻪ ﻣﻨﻚ ﻧﺴﻤﻊ .. ﻟﻴﺶ ..
ﻛﻔﺎﻳﻪ : ﺑﻮﻩ ﺗﺎﻋﺐ ﺷﻮﻳﻪ ﻣﺸﻲ ﻣﻌﺎﻩ ..
ﺯﻳﻨﺐ : ﺷﻦ ﺻﺎﺭ ﻓﻴﻪ ..
ﻛﻔﺎﻳﻪ ﺗﻨﻬﺪﺕ ﻭﻗﺎﻟﺖ : ﺍﻟﺒﺎﻳﻦ ﺑﻴﺪﻳﺮﻭﻟﻪ ﻋﻤﻠﻴﻪ ..
ﻛﻠﻬﻢ ﺑﺄﺻﻮﺍﺕ ﻣﺘﻘﻄﻌﻪ : ﺭﺑﻲ ﻳﺸﻔﻴﻪ .. ﻻﺑﺎﺱ ..
ﺳﻤﻌﻮﺍ ﺻﻮﺕ ﺑﺎﺏ ﺍﻟﺤﻮﺵ ﺗﺼﻜﺮ ..
ﻧﻮﺭ ﻗﻠﺒﻬﺎ ﻧﺒﻀﺎﺗﻪ ﺯﺍﺩﺕ ﻗﻮﺕ ..
ﻉ ﺧﺸﺘﻪ ﻫﻮ .. ﺟﺖ ﻋﻴﻨﻬﺎ ﻓﻌﻴﻨﻬﺎ ﻃﻮﻝ ..
ﻧﺰﻟﺘﻬﻢ ..
ﻭﻫﻮ ﻭﺯﻉ ﻧﻈﺮﻩ ﻋﻠﻴﻬﻢ ﻭﻗﺎﻝ : ﺍﻟﺴﻼﻡ ﻋﻠﻴﻜﻢ ..
ﻛﻠﻬﻢ ﺭﺩﻭﺍ : ﻭﻋﻠﻴﻜﻢ ﺍﻟﺴﻼﻡ ..
ﺑﺪﻱ ﺑﺎﻟﺴﻼﻡ ﻉ ﺧﺎﻻﺗﻪ .. ﺑﻌﺪﻳﻦ ﺧﺎﻟﻪ ..
ﻭﺑﻨﺎﺕ ﺧﺎﻻﺗﻪ ..
ﻭﻳﻦ ﻭﺻﻞ ﻓﻲ ﻧﻮﺭ ... ﻛﻌﺎﺩﺗﻪ ﺷﺪ ﻉ ﻳﺪﻫﺎ ..
ﺍﺑﺘﺴﻤﺖ ﻭﻫﻲ ﺗﺸﻮﻓﻠﻪ ﻭﻫﻮ ﺭﺩﻫﺎ ..
ﻭﻛﻔﺎﻳﻪ ﻣﺮﻛﺰﻩ ﻭﻣﺒﺘﺴﻤﻪ ..
ﻃﻠﻖ ﻳﺪﻫﺎ ﺑﺎﻟﺴﻴﻒ ﻭﻣﺸﻲ ﺣﺪﺍ ﺧﺎﻟﻪ ..
ﻫﺎﻧﻴﺒﺎﻝ : ﺷﻦ ﺟﻮ ﻳﺎﺩﻛﺘﻮﺭ ..
ﻣﺎﻟﻚ ﻭﻫﻮ ﻳﺤﻮﻝ ﻓﻲ ﺑﺎﻟﻄﻮﻩ : ﺍﻟﺤﻤﺪﻟﻠﻪ .. ﻗﻌﻤﺰ .. ﺷﻦ ﺍﺧﺒﺎﺭﻛﻢ ﺍﻧﺘﻢ ..
ﻛﻠﻬﻢ ﺭﺩﻭﺍ : ﺍﻟﺤﻤﺪ ﻟﻠﻪ ..
ﻣﺎﻟﻚ ﻭﻫﻮ ﻳﺸﻮﻑ ﻟﺤﻤﻴﺪﻩ؛ﻧﻮﺭﺗﻲ ﻳﺎﻣﻴﺪﺍ ..
ﺣﻤﻴﺪﻩ ﺑﻀﺤﻜﻪ : ﺍﻟﻨﻮﺭ ﻧﻮﺭﻙ ﻳﺎﻣﻨﻮﺭ ..
ﻭﺍﺿﺤﻪ ﺗﻠﻘﻴﺤﻪ ..
ﺿﺤﻜﻮﺍ ﺍﻟﻠﻲ ﻓﻬﻤﻮﻫﺎ ..
ﻭﻧﻮﺭ ﻗﺮﻳﺐ ﺗﺒﺨﺮﺕ ..
ﻣﺎﻟﻚ ﺑﻀﺤﻜﻪ : ﻳﺎﻭﺩﻱ ﺗﺴﻠﻤﻲ ..
ﻗﻌﺪﻭﺍ ﻳﻬﺪﺭﺯﻭﺍ ﻣﻦ ﻫﻨﻲ ﻭﻣﻦ ﻫﻨﻲ ..
ﻭﻣﺮﺓ ﻣﺮﺓ ﻣﺎﻟﻚ ﻭﻧﻮﺭ ﻳﺘﺒﺎﺩﻟﻮﺍ ﺍﻟﻨﻈﺮﺍﺕ ..
ﻛﻠﻬﺎ ﻧﻈﺮﺍﺕ ﺣﺐ ﻭﺷﻮﻕ ..❤
ﺑﻌﺪ ﺷﻮﻳﻪ ..
ﺟﻲ ﻣﺮﻭﺍﻥ ..
ﺍﻟﻠﻲ ﺑﻌﺪ ﺧﺶ ﻭﺳﻠﻢ ﻗﻌﻤﺰ ﻳﻬﺪﺭﺯ ﻣﻌﺎﻫﻢ ﻋﺎﺩﻱ ﺟﺪﺍ ﺟﺪﺍ ..
ﻓﻲ ﻋﺰ ﺍﻟﻬﺪﺭﺯﺓ ﺟﺖ ﻋﻴﻨﻪ ﻉ ﻧﻮﺭ ﻟﻘﺎﻫﺎ ﻣﺮﻛﺰﺓ ﺑﻨﻈﺮﻫﺎ ﻉ ﻣﺎﻟﻚ ﺍﻟﻠﻲ ﻛﺎﻥ ﻣﻨﺴﺠﻢ ﻓﻲ ﺍﻟﻬﺪﺭﺯﺓ ..
ﺷﺒﺢ ﻟﺨﻮﻩ ﺷﻮﻳﻪ .. ﺑﻌﺪﻳﻦ ﺍﺑﺘﺴﻢ ﺑﺈﺳﺘﻐﺮﺍﺏ ..
ﻭﻛﻞ ﻣﺎﻳﺠﻲ ﻣﺎﻟﻚ ﻳﺸﻮﻑ ﺟﻴﻬﺘﻬﺎ ﻛﺎﻧﺖ ﺗﻐﻴﺮ ﻓﻌﻴﻮﻧﻬﺎ ..
ﺿﺤﻚ ﻣﺮﻭﺍﻥ ﺿﺤﻜﻪ ﺧﻔﻴﻔﻪ ..
🍁 ﺍﻟﻤﻬﻢ ..
ﻗﻌﺪﻭﺍ ﻟﻠﻌﺸﻲ ...
ﺗﻌﺸﻮﺍ ..
ﻭﺧﺸﻮﺍ ﺍﻟﺒﻨﺎﺕ . ﻏﺴﻠﻮﺍ ﺍﻟﻤﺎﻋﻴﻦ ..
ﺗﻘﺎﺳﻤﻮﺍ ﺍﻻﺩﻭﺍﺭ .. ﻭﺣﺪﻩ ﺗﻐﺴﻞ ﻭﺗﻤﺼﻤﺺ ..
ﻭﻭﺣﺪﻩ ﺗﻤﺴﺢ ﺍﻟﺮﺧﺎﻣﻪ ﻭﺍﻟﻐﺎﺯ ..
ﻭﻭﺣﺪﻩ ﺗﻜﻨﺲ ﺍﻟﻜﻮﺟﻴﻨﻪ ﻭﺗﻨﺸﻔﻬﺎ ..
ﻃﻠﻌﻮﺍ ﺭﺑﺎﺏ ﻭﺭﺍﻧﻴﺎ ﺍﻟﻠﻲ ﻛﺎﻥ ﻋﻠﻴﻬﻢ ﺍﻟﻤﻬﻤﺘﻴﻦ ﺍﻻﻭﻻﺕ ..
ﻭﻗﻌﺪﺕ ﻧﻮﺭ ﺍﻟﻠﻲ ﻛﺎﻧﺖ ﺗﻨﺸﻒ ﻓﻲ ﺍﻟﻜﻮﺟﻴﻨﻪ ..
" ﺭﺑﻲ ﻳﻌﺎﻭﻥ .."
ﺟﻤﺪﺕ ﻓﻤﻜﺎﻧﻬﺎ ..
ﻣﺎﻟﻚ ﻭﻫﻮ ﺟﺎﻱ ﺣﺪﺍ ﺗﻼﺟﺔ ﺍﻟﻤﻴﺔ ﻳﺼﺐ ﺑﺶ ﻳﺸﺮﺏ : ﻗﻠﻨﺎ ﺭﺑﻲ ﻳﻌﺎﻭﻥ ..
ﻧﻮﺭ : ﺗﺴﻠﻢ ..
ﻗﻌﺪ ﻳﺸﺮﺏ ﻭﻫﻮ ﻳﺸﻮﻓﻠﻬﺎ ..
ﻫﻲ ﺧﺸﺖ ﻓﺒﻌﻀﻬﺎ ﻣﺴﻜﻴﻨﻪ ..
ﺣﻂ ﺍﻟﻄﺎﺳﻪ ﻭﺿﺤﻚ ﺑﻌﺪﻳﺖ ﻗﺎﻝ : ﺍﺭﺧﻲ ﺭﻭﺣﻚ ﻧﻮﺭ ..
ﻧﻮﺭ ﻗﻌﺪﺕ ﺗﺸﻮﻓﻠﻪ ﻭﻭﺟﻬﻬﺎ ﺍﺣﻤﺮ ..
ﻣﺎﻟﻚ ﻗﺪﻡ ﻭﺍﺗﻜﺎ ﻉ ﺍﻟﺮﺧﺎﻣﻪ ﻭﻫﻮ ﻳﻘﻮﻝ : ﺗﻮ ﺍﻧﺘﻲ ﺗﺘﺤﺸﻤﻲ ﻣﻦ ﺍﻟﺸﺒﺎﺏ ﻛﻠﻬﻢ ﻫﻜﻲ ﻭﻻ ﻏﻴﺮ ﺍﻧﻲ ﺑﺲ .
ﻧﻮﺭ : ﺍﺳﺎﺳﺎ ﻣﺎﻧﺘﻌﺎﻣﻠﺶ ﻣﻊ ﺷﺒﺎﺏ ..
ﻣﺎﻟﻚ ﺑﻀﺤﻜﻪ : ﻓﻬﻤﺘﻴﻨﻲ ﻏﻠﻂ .. ﺍﻧﻲ ﻗﺼﺪﻱ .. ﺍﻧﻲ ﻋﻨﺪﻙ ﻏﻴﺮ ﻋﻨﻬﻢ ..
ﻧﺰﻟﺖ ﻧﻮﺭ ﻋﻴﻮﻧﻬﺎ ﻭﻫﻲ ﺗﺸﻮﻑ ﻟﻠﺴﻴﺎﻗﻪ ..
ﻣﺎﻟﻚ ﺍﺑﺘﺴﻢ : ﻭﺍﺿﺢ ﺍﻧﻲ ﻋﻨﺪﻙ ﻏﻴﺮ ﻋﻨﻬﻢ ..
ﻧﻮﺭ ﺍﺑﺘﺴﻤﺖ ﺑﺨﺠﻞ ..
ﻣﺎﻟﻚ : ﻧﻮﺭ ﺍﻧﺘﻲ ﻋﺎﺭﻓﻪ ﺍﻟﻠﻲ ﻓﻴﺎ ﻭﻻ ﻣﺶ ﻋﺎﺭﻓﻪ ..
ﺯﺍﺩﺕ ﺩﻗﺎﺕ ﻗﻠﺒﻬﺎ ﻗﻮﺕ ﺍﻛﺜﺮ ﻭﺍﻛﺜﺮ ..
ﻣﺎﻟﻚ : ﻧﺴﺄﻝ ﻓﻴﻚ !
ﻧﻮﺭ : ﺍﺣﻤﻢ .. ﺷﻦ ﻓﻴﻚ؟
ﻣﺎﻟﻚ ﺑﻀﺤﻜﻪ : ﻓﻴﺎ ﺍﻧﺘﻲ ﻳﺎﺳﺘﻲ ..
ﻧﻮﺭ ﻓﻨﺼﺖ ﺑﺈﺑﺘﺴﺎﻣﻪ ﺧﺠﻮﻟﻪ ﻭﻫﻲ ﺗﺸﺒﺢ ﻟﻮﻃﺎ ..
ﻭﻗﻒ ﻉ ﺣﻴﻠﻪ ﻭﻗﺎﻝ : ﻧﻮﺭ .. ﺍﻧﻲ ﻣﻌﺎﻙ ﻧﻴﺘﻲ ﺻﺎﻓﻴﻪ ﻭﺻﺎﺩﻕ ﻭﺑﺈﺫﻥ ﺍﻟﻠﻪ ﺗﻜﻤﻠﻲ ﺍﻟﺜﺎﻧﻮﻱ .. ﺑﻨﺨﻄﺒﻚ ..
ﺍﺗﻔﺎﺟﺌﺖ ﻉ ﺍﻵﺧﺮ ﻭﻫﻲ ﺗﺸﺒﺤﻠﻪ ..
ﺣﻂ ﺍﻳﺪﻳﻪ ﻓﺠﻴﻮﺑﻪ ﻭﻗﺎﻝ : ﺗﺒﻲ ﺗﻘﺮﻱ ﻃﺐ ﻭﻻ ..
ﻧﻮﺭ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﻣﺎﻟﻚ ﺑﺈﺑﺘﺴﺎﻣﻪ : ﻛﻮﻳﺲ .. ﻫﻲ ﻛﺎﻧﻚ ﻛﻤﻠﺘﻲ ﺍﻃﻠﻌﻲ ﻗﻌﻤﺰﻱ ﻓﻲ ﺍﻟﺼﺎﻟﻪ ..
ﺍﺑﺘﺴﻤﺖ ﻭﺣﻄﺖ ﺍﻟﺴﻴﺎﻗﻪ ﻓﻤﻜﺎﻧﻬﺎ ﻭﻃﻠﻌﺖ ..
ﻫﻮ ﺍﺑﺘﺴﻢ ﺑﺘﻨﻬﻴﺪﻩ ﻭﻃﻠﻊ ﻭﺭﺍﻫﺎ ..
🍁🍁🍁🍁🍁
ﺑﻌﺪ ﺣﻮﺍﻟﻲ ﺭﺑﻊ ﺳﺎﻋﻪ ...
ﻫﺎﻧﻴﺒﺎﻝ ﺭﻭﺡ ﺑﻴﻬﻢ
ﺣﻤﻴﺪﻩ ﻣﻊ ﺯﻳﻨﺐ ﻭﺑﻨﺎﺗﻬﺎ ﻟﺤﻮﺷﻬﺎ
ﻭﻧﻮﺭ ﻟﺤﻮﺷﻬﻢ ..
ﻭﻋﺎﺑﻲ ﺑﻴﻮﻟﻲ ﻳﺒﺎﺕ ﻓﻲ ﺣﻮﺵ ﻛﻔﺎﻳﻪ ..
ﻭﻳﻦ ﻭﻻ ..
ﻃﻖ ﺍﻟﺒﺎﺏ ..
ﺍﻧﻔﺘﺢ ﻭﺗﻔﺎﺟﺄ ﺑﺎﻟﻠﻲ ﻓﺘﺤﻠﻪ ﺍﻟﺒﺎﺏ ..
ﻛﺎﻥ ﻋﻤﺮ ..
ﻟﻒ ﻭﺧﺶ ﻃﻮﻝ .. ﻭﻫﺎﻧﻴﺒﺎﻝ ﺧﺶ ﻭﺻﻜﺮ ﺍﻟﺒﺎﺏ ..
ﻋﻤﺮ : ﺧﺎﺵ ﻧﺮﻗﺪ ﻳﺎﻛﻔﺎﻳﻪ .
ﻛﻔﺎﻳﻪ : ﺗﺼﺒﺢ ﻉ ﺧﻴﺮ .. ﺑﺎﻥ ﻋﻠﻴﻬﺎ ﻫﺎﻧﻴﺒﺎﻝ ..
ﻗﺎﻟﺖ ﺑﻀﻴﻖ : ﻷﻣﺘﻰ ﺑﺲ ..
ﻫﺎﻧﻴﺒﺎﻝ : ﻋﺪﻱ ﺍﺭﻗﺪﻱ .. ﺗﺼﺒﺤﻲ ﻉ ﺧﻴﺮ ..
ﺣﺮﻛﺖ ﺭﺍﺳﻬﺎ ﺍﻳﻤﻴﻦ ﻭﻳﺴﺎﺭ ﻭﻣﺸﺖ ﻃﻮﻝ ﻟﺪﺍﺭﻫﺎ ..
ﺍﻣﺎ ﻫﺎﻧﻴﺒﺎﻝ ﻗﻌﺪ ﻣﻘﻌﻤﺰ ﻓﻲ ﺍﻟﺼﺎﻟﻪ ﻭﻳﺸﺒﺢ ﻟﻠﺒﺎﻟﻜﻮﻧﻪ ..
🍁 ﻓﻲ ﺩﺍﺭ ﺍﻷﻭﻻﺩ ..
ﻣﺮﻭﺍﻥ ... ﻭﻣﺎﻟﻚ ..
ﻣﺮﻭﺍﻥ ﻛﺎﻥ ﻳﺸﻮﻑ ﻟﺨﻮﻩ ﻛﻴﻒ ﻣﻘﻌﻤﺰ ﻭﺭﺍ ﺍﻟﻠﻼﺏ ﻗﺎﻝ : ﻣﺎﻟﻚ ..
ﻣﺎﻟﻚ : ﻫﻤﻤﻢ .
ﻣﺮﻭﺍﻥ : ﺑﻨﺴﺄﻟﻚ ﺳﺆﺍﻝ ﺟﺎﻭﺑﻨﻲ ﻋﻠﻴﻪ ﺑﺼﺮﺍﺣﻪ ..
ﻣﺎﻟﻚ : ﺍﺳﺄﻝ ..
ﻣﺮﻭﺍﻥ : ﺗﺬﻛﺮ ﻟﻤﺎ ﻗﺘﻠﻲ ﻧﻮﺭ ﻋﻨﺪﻫﺎ ﺣﺪ ﺗﺎﻧﻲ ..
ﻣﺎﻟﻚ ﻋﺪﻝ ﺗﻘﻌﻤﻴﺰﺗﻪ ..
ﻣﺮﻭﺍﻥ : ﻫﺎﻟﺤﺪ ﻫﺪﺍ .. ﺍﻧﺖ؟ !
ﺗﻠﻔﺖ ﻣﺎﻟﻚ .. ﺷﺒﺢ ﻟﺨﻮﻩ ﺷﻮﻳﻪ ﺑﻌﺪﻳﻦ ﻗﺎﻝ : ﺍﻧﺖ ﺷﻦ ﻻﺣﻈﺖ ..
ﻣﺮﻭﺍﻥ : ﻻﺣﻈﺖ ﺍﻧﻬﺎ ﻣﺎﻳﻠﺘﻠﻚ ﻫﻠﺒﻪ ﻋﻴﻮﻧﻬﺎ ﻋﻠﻴﻚ ﻃﻮﻝ ﺍﻟﻮﻗﺖ .
ﻣﺎﻟﻚ ﺭﺟﻊ ﺷﺎﻑ ﻟﻼﺏ ..
ﻣﺮﻭﺍﻥ ﺍﺑﺘﺴﻢ ﺑﻌﺪﻳﻦ ﻗﺎﻝ : ﻭﺍﻧﺖ ﺗﺤﺒﻬﺎ ..
ﺗﻨﻬﺪ ﻣﺎﻟﻚ ﻭﺍﺣﺘﻔﻆ ﺑﺴﻜﻮﺗﻪ ..
ﻣﺮﻭﺍﻥ : ﻫﻬﻬﻬﻬﻬﻬﻬﻬﻬﻪ ..
ﺗﻠﻔﺘﻠﻪ ﻃﻮﻝ ...
ﻣﺮﻭﺍﻥ ﻫﺪﺍ ﺿﺤﻚ ﻭﻗﺎﻝ : ﻣﺎﻓﻴﺶ ﻣﺸﻜﻠﻪ ... ﺍﺻﻼ ﺑﺎﻫﻲ ﺍﻟﻠﻲ ﺻﺎﺭ ﻫﻜﻲ ﻣﻦ ﺍﻟﺒﺪﺍﻳﻪ ..
ﻣﺎﻟﻚ ﺷﺒﺤﻠﻪ ﺑﺘﻀﻴﻴﻘﺔ ﻋﻴﻮﻥ ..
ﻣﺮﻭﺍﻥ : ﻧﻮﺭ ﻣﺶ ﻟﻴﺎ ﻣﻦ ﺍﻷﻭﻝ ..
ﻣﺎﻟﻚ : ﺑﺎﻫﻲ ﺧﻼﺹ ..
ﻣﺮﻭﺍﻥ : ﻫﻬﻬﻬﻬﻬﻬﻬﻪ .. ﻭﺍﻟﻠﻪ ﺍﻟﻌﻈﻴﻢ ﻳﺎﻣﺎﻟﻚ ﺑﺪﻳﺖ ﻧﺸﻮﻑ ﻓﻴﻬﺎ ﺯﻱ ﻧﻮﺭﻫﺎﻥ ﺑﺎﻟﺰﺑﻂ ..
ﺭﺟﻊ ﺷﺒﺢ ﺍﻟﻘﺪﺍﻡ ﻭﻗﺎﻝ : ﺗﻤﺎﻡ .. ﺻﻜﺮ ﻉ ﺍﻟﻤﻮﺿﻮﻉ ..
ﺍﺑﺘﺴﻢ ﻣﺮﻭﺍﻥ .. ﻭﺍﺗﻜﻰ ﻉ ﺳﺮﻳﺮﻩ .. ﻭﻃﻮﻝ ﺟﺖ ﻓﺒﺎﻟﻪ ﺭﻓﻘﻪ ❤
ﺍﻣﺎﻣﺎﻟﻚ ﻓﺎﺿﺎﻳﻖ ﺷﻮﻳﻪ ﻣﻦ ﺍﻟﺤﺪﻳﺚ ﻣﻦ ﺑﺎﺏ ﺍﻟﻐﻴﺮﻩ ﻻﺍﻛﺜﺮ ..
🍃 ﻣﺸﺎﻋﺮ ﻣﺮﻭﺍﻥ ﻛﺎﻧﺖ ﻋﺎﺑﺮﺓ ﻭﻋﺪﺕ ﻉ ﺣﺎﻟﻬﺎ ﻭﺍﻧﺘﻬﺖ ﻭﻫﻮ ﻛﺎﻥ ﻋﺎﺭﻑ ... ﺑﺲ ﺣﻴﻘﻌﺪ ﻳﻐﺎﺭ ﻋﻠﻴﻬﺎ ﻣﻦ ﺧﻮﻩ ﺑﺰﻳﺎﺩﻩ ﺍﻛﺜﺮ ﻣﻦ ﻛﻞ ﺣﺪ 🍃
ﻓﻲ ﺍﻟﻮﻗﺖ ﻧﻔﺴﻪ ..
ﺧﺎﻟﻪ ﻛﺎﻥ ﻣﻘﻌﻤﺰ ﺑﺮﺍ ..
ﻓﻲ ﺍﻟﺼﻘﻊ ...
ﻳﺸﺒﺢ ﻟﺒﻼﻛﻮﻧﺘﻬﺎ ..
ﺗﺮﺩﺩ ﻫﻠﺒﻪ ﻳﺘﺼﻞ ﺑﻴﻬﺎ ﺑﻌﺪ ﻟﻘﺎﺀ ﺍﻟﻴﻮﻡ ..
ﺍﻟﻠﻲ ﺍﻧﺘﻬﻲ ﺑﺠﻮﺍﺏ ﻋﺮﻭﺑﻪ ﺍﻟﻠﻲ ﻛﺎﻥ ..
" ﻧﺒﻲ ﺷﻮﻳﺔ ﻭﻗﺖ ﺑﺶ ﻧﻔﻜﺮ .."
ﺑﺲ ﺍﺧﻴﺮﺍ ﺣﻮﻝ ﻫﺎﻟﺘﺮﺩﺩ ﻉ ﺟﻨﺐ ..
ﻭﺍﺗﺼﻞ ﺑﻴﻬﺎ ..
ﻧﺎﺩﻯ ﻣﺮﺓ ﺗﻨﻴﻦ ﺗﻼﺗﻪ ... ﺑﻌﺪﻳﻦ ﺍﻧﻔﺘﺢ ﺍﻟﺨﻂ ..
ﻭﺑﺪﻱ ﻫﺎﻧﻴﺒﺎﻝ ﺑﺎﻟﻜﻼﻡ ... ﺑﺼﻮﺕ ﻣﻠﺤﻦ ..
ﺍﺭﺿﻰ ﺑﺎﻟﻨﺼﻴﺐ ..
ﺍﺭﺗﺎﺡ ﻟﻠﺤﺒﻴﺐ ﺍﺭﺿﻰ ..
ﺍﺭﺿﻰ ﺑﺎﻧﺼﻴﺐ ﺍﺭﺗﺎﺡ ﻟﻠﺤﺒﻴﺐ ..
ﻟﻴﻪ ﺑﺘﺨﺒﻲ ﺣﺒﻚ ... ﻫﻮ ﺍﻟﺤﺐ ﻋﻴﺐ ..
ﺍﻧﺎ ﻗﺪﺭﻙ ﻭﻧﺼﻴﺒﻚ ..
ﻭﻧﺼﻴﺒﻚ ﺣﻴﺼﻴﺒﻚ
ﻣﺎﺗﻤﻴﻞ ﻳﺎﺣﺒﻴﺒﻲ ﻭﻣﺎﺗﺰﻋﻠﺶ ﺣﺒﻴﺒﻚ ..
ﺳﻜﺖ ..
ﺭﺩﺕ ﻫﻲ ﺑﺼﻮﺕ ﻣﺒﺤﻮﺡ : ﻧﺤﺒﻚ ❤
ﺗﻨﻬﺪ ﺗﻨﻬﻴﺪﻩ ﻃﺎﻟﻌﻪ ﻣﻦ ﺍﻋﻤﺎﻕ ﺍﻋﻤﺎﻗﻪ ..
ﻋﺮﻭﺑﻪ ﺣﺴﺘﻬﺎ ﻓﻮﺳﻂ ﻗﻠﺒﻬﺎ 💓
💓💓
ﻟﻴﻠﺘﻠﻬﺎ ﻣﺎﺭﻗﺪﻭﺵ ﺑﻜﻞ ﻭﻫﻤﺎ ﻳﻬﺪﺭﺯﻭﺍ ﻉ ﺑﻌﺾ ..
ﻫﺪﺭﺯﺓ ﻣﺎﻓﻴﻬﺎﺵ ﻗﻴﻮﺩ .. ﻫﺪﺭﺯﺓ ﺍﻟﻤﺸﺎﻋﺮ ﻫﻲ ﺍﻟﻠﻲ ﻣﺘﺤﻜﻤﻪ ﻓﻴﻬﺎ ..
ﻛﻴﻒ ﺍﻟﻤﻴﺖ ﺍﻟﻠﻲ ﺭﺟﻌﺘﻠﻪ ﺍﻟﺤﻴﺎﺓ ﺑﻌﺪ ﺩﺍﺭﻭﻟﻪ ﺍﻧﻌﺎﺵ ..
ﻛﺎﻥ ﺣﺒﻬﻢ ..
ﻫﺪﺭﺯﺓ ﻣﺨﻠﻄﻪ ﺑﺪﻣﻮﻉ .. ﺣﺐ ﻓﺮﺡ ﺣﺰﻥ ﻭﺷﻮﻕ ﻭﻋﺘﺎﺏ ..
ﻫﺪﺭﺯﺓ ﻛﺎﻥ ﺍﺟﻤﻞ ﻭﺍﻫﻢ ﺟﺰﺀ ﻓﻴﻬﺎ ..
" ﺑﻨﺨﻄﺒﻚ .."
ﺧﻼﺹ ﺳﺎﺩ ﺍﻟﻮﻗﺖ ﺍﻟﻠﻲ ﺭﺍﺡ .. ﻭﺍﻟﻌﻤﺮ ﺍﻟﻠﻲ ﺿﻴﻌﻮﻩ ﻭﻫﻤﺎ ﺑﻌﺎﺩ ﻋﻦ ﺑﻌﺾ ...
ﻫﻲ ﻃﻮﻝ ﺭﺩﺕ ..
" ﻣﻮﺍﻓﻘﻪ ..." ﺩﻭﻥ ﺍﺩﻧﻰ ﺗﺮﺩﺩ ..
🍃🍃🍃
ﺑﺲ ﻃﺒﻌﺎ ﺍﻟﺤﻜﺎﻳﻪ ﻣﺶ ﺳﺎﻫﻠﻪ ﻫﻜﻲ ..
ﻛﺎﻥ ﻋﻠﻰ ﻫﺎﻧﻴﺒﺎﻝ ﻣﻮﺍﺟﻬﺔ ﺑﻮﻩ ﻭﺍﻣﻪ ...
ﻭﺍﻗﻨﺎﻋﻬﻢ ﺑﺎﻟﻤﻮﺿﻮﻉ ...
ﻓﺘﺢ ﻣﻌﺎﻫﻢ ﺍﻟﻤﻮﺿﻮﻉ ... ﻭﺧﻼﻟﻬﻢ ﻣﻬﻠﻪ ﻟﻠﺘﻔﻜﻴﺮ ..
ﻓﻲ ﻟﻴﻠﻪ ..
ﻓﻲ ﻣﺮﺑﻮﻋﺔ ﺍﻟﺤﺎﺝ ﺭﻣﻀﺎﻥ ..
ﺭﻣﻀﺎﻥ : ﻉ ﻛﻴﻔﻪ ..
ﻓﺎﻃﻤﻪ : ﻳﻌﻨﻲ ﺑﺘﻌﺪﻱ ﺗﺨﻄﺒﻬﻠﻪ ..
ﺭﻣﻀﺎﻥ : ﻣﺎﻻ ﺷﻦ .. ﻣﺎﺯﻟﺖ ﻣﺎﻣﺘﺖ ﺑﺶ ﻭﻟﺪﻱ ﻳﻌﺪﻱ ﻳﺨﻄﺐ ﺑﺮﻭﺣﻪ ..
ﻓﺎﻃﻤﻪ : ﻣﺎﻧﺤﺴﺎﺑﻚ ﺗﻘﺒﻞ ﺑﻜﻞ ..
ﺭﻣﻀﺎﻥ : ﻭﻛﺎﻥ ﻗﺖ ﻻ ﺑﻴﻮﻟﻲ ﻓﻜﻼﻣﻪ .. ﺍﻧﻲ ﺍﺩﺭﻯ ﺍﻟﻨﺎﺱ ﺑﻮﻟﺪﻱ ﻳﺎﻓﺎﻃﻤﻪ .. ﻭﺑﻌﺪﻳﻦ ﻫﻮ ﻛﺒﻴﺮ ﻭﻋﺎﻗﻞ ﻭﺯﻱ ﻣﺎﻳﻘﻮﻟﻮﺍ ﻋﻘﻠﻪ ﻓﺮﺍﺳﻪ ﻳﻌﺮﻑ ﺧﻼﺻﻪ ..
ﺗﻨﻬﺪﺕ ﻓﺎﻃﻤﻪ ﻭﻗﺎﻟﺖ : ﻣﺎﻋﻨﺪﻱ ﻏﻴﺮ ﺍﻧﻲ ﻧﺪﻋﻴﻠﻪ ﺭﺑﻲ ﻳﺠﻌﻞ ﺧﻴﺮﺗﻪ ﻓﻴﻬﺎ ..
ﺭﻣﻀﺎﻥ : ﺁﻣﻴﻦ ..
🍃🍃🍃🍃
ﻭﺃﻧﺘﺸﺮ ﺍﻟﺨﺒﺮ ...
ﻭﻛﻞ ﺍﻟﻌﻴﻠﻪ ﻋﺮﻓﺖ ...
ﻫﺎﻧﻴﺒﺎﻝ ﺣﻴﺨﻄﺐ ﻋﺮﻭﺑﻪ ﺍﻟﻔﻠﺴﻄﻴﻨﻴﻪ ...
ﻭﺍﻟﻠﻲ ﺯﺍﺩ ﺧﻼ ﺍﻟﻤﻮﺿﻮﻉ ﻳﻜﺒﺮ ..
ﻫﻮ ﺍﻧﻪ ﻫﺎﻧﻴﺒﺎﻝ ﻗﺮﺭ ﻳﺮﻓﻊ ﻣﻊ ﺍﻣﻪ ﻣﺮﺕ ﻋﻤﻪ ﻭﻋﻤﺘﻪ ﻣﺒﺮﻭﻛﻪ ..
ﻭﻣﺮﺍﺓ ﺗﺎﻧﻴﻪ ﻳﻌﺘﺒﺮ ﻓﻴﻬﺎ ﺑﻨﻔﺲ ﺍﻟﻤﻜﺎﻧﻪ ﻣﻌﺎﻫﻢ ..
ﺍﻟﻤﺮﺍﺓ ﻫﺎﺩﻱ ...
ﺍﻡ ﺻﺪﻳﻘﻪ ... ﺿﻮ ...
ﻣﺮﺿﻴﻪ ...
ﺃﻡ ﻣﺮﺍﻡ ...
🍁 ﻫﻴﺎ ﻧﻔﺴﻬﺎ ﺍﻟﻠﻲ ﺍﻧﻀﺮﺏ ﻉ ﺧﺎﻃﺮﻫﺎ ..
ﺿﻮ : ﺍﻳﻪ ﻳﻤﻲ ﻫﻲ ﻧﻔﺴﻬﺎ .. ﻭﺭﺍﻫﻮ ﺑﻴﺪﻳﺮﻭﺍ ﺧﻄﻮﺑﻪ ﻭﻓﻀﺎﻧﻴﻪ ﻓﻲ ﻧﻔﺲ ﺍﻟﻴﻮﻡ ..
ﻣﺮﺿﻴﻪ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺿﻮ : ﻫﺎﻩ ﺷﻦ ﻗﺘﻲ ﻳﻤﻲ ..
ﻣﺮﺿﻴﻪ ﺑﺈﺑﺘﺴﺎﻣﺔ ﺃﻟﻢ : ﺍﻳﻪ ﺑﻨﻌﺪﻱ .. ﻫﺎﻧﻴﺒﺎﻝ ﻛﻴﻒ ﻭﻟﺪﻱ ..
ﻣﻦ ﺟﻬﺔ ﺗﺎﻧﻴﻪ ...
ﻛﺎﻧﺖ ﻉ ﺻﻼﻳﺘﻬﺎ ...
ﺑﻌﺪ ﻛﻤﻠﺖ ﺻﻼﺓ ﺍﻟﻌﺸﻲ ..
ﺭﻗﺪﺕ ﻋﻠﻴﻬﺎ ﻭﻗﻌﺪﺕ ﺗﺒﻜﻲ ﻭﺗﺒﻜﻲ ... ﻭﺗﺮﺩﺩ ﻓﻲ ﺁﻳﻪ ﻭﺣﺪﻩ ﻣﺎﺑﺘﺶ ﺗﻔﺎﺭﻕ ﻟﺴﺎﻧﻬﺎ ...
" ﻭﻋﺴﻰ ﺍﻥ ﺗﻜﺮﻫﻮﺍ ﺷﻴﺌﺎ ﻭﻳﺠﻌﻞ ﺍﻟﻠﻪ ﻓﻴﻪ ﺧﻴﺮﺍ ﻛﺜﻴﺮﺍ .."
🍃🍃🍃🍃
...2010\3\20
ﻳﻮﻡ ﺍﻟﻔﻀﺎﻧﻴﻪ ..
ﻓﻲ ﺣﻮﺵ ﻛﻔﺎﻳﻪ ...
ﻛﻔﺎﻳﻪ : ﻟﻴﻬﻢ ﺣﺪﺍﻳﺎ ﺗﻼﺗﻪ ﺳﻨﻴﻦ ﻗﺮﻳﺐ ﻭﻣﺎﻧﻌﺮﻓﺶ ﺍﻥ ﻋﺮﻭﺑﻪ ﺟﺎﺭﺗﻲ ..
ﺯﻳﻨﺐ : ﻧﺼﻴﺐ ﺳﺒﺤﺎﻥ ﺍﻟﻠﻪ ...
ﻛﻔﺎﻳﻪ : ﺯﻋﻤﻪ ﺗﻜﻮﻥ ﺧﻴﺮﺗﻪ ﻓﻴﻬﺎ ..
ﺯﻳﻨﺐ : ﻣﺎﻻ ﻋﻼﺵ ﺻﺎﺭ ﻫﺪﺍ ﻛﻠﻪ ..
ﺗﻨﻬﺪﺕ ﻛﻔﺎﻳﻪ ﻭﻗﺎﻟﺖ : ﺻﺪﻗﺘﻲ .. ﺑﻌﺪﻳﻦ ﺿﺤﻜﺖ ﻭﻗﺎﻟﺖ : ﺑﺪﻳﺘﻲ ﺗﺘﻮﺣﻤﻲ ...
ﺯﻳﻨﺐ ﺑﻀﺤﻜﻪ : ﺍﻳﻪ .. ﻋﻠﻴﻚ ﻋﺎﺭ .. ﻭﺍﻟﻠﻪ ﻣﺎﻗﺎﺩﺭﺓ ﻧﻘﻴﻢ ﻋﻴﻮﻧﻲ ﻓﺤﻤﺰﺓ ..
ﻛﻔﺎﻳﻪ : ﻫﻬﻬﻬﻬﻬﻬﻪ ﺫﻛﺮﺗﻴﻨﻲ ﻓﺤﻤﻠﻲ ﺑﻨﻮﺭﻫﺎﻥ ..
ﺿﺤﻜﺖ ﺯﻳﻨﺐ ..
🌴🌴🌴🌴🌴🌴🌴🌴
ﻏﺎﻟﻴﻪ ...
ﻃﻠﻌﺖ ﻣﻦ ﺍﻟﺪﺍﺭ ﻭﻓﻴﺪﻫﺎ ﺯﺑﻮﻥ ﺍﻟﻠﻲ ﻛﺎﻥ ﻣﻐﻄﻲ ﺑﺎﻟﻨﺎﻳﻠﻮ ..
ﺧﺪﺍﻩ ﻋﻤﺮ ﻭﻃﻠﻊ ﺑﺎﻟﺰﺑﻮﻥ ﻃﻮﻝ ﻟﺴﻴﺎﺭﺗﻪ ...
ﻭﻃﻮﻝ ﺣﻄﻪ ﻓﻲ ﺍﻟﻜﺮﺳﻲ ﺍﻟﺨﻠﻔﻲ ﻭﺗﺴﻘﺪﻭﺍ ..
ﻛﺎﻧﻮﺍ ﺳﺎﺑﻘﻴﻦ ﻋﻤﺮ ﻭﺭﻣﻀﺎﻥ ...
ﺍﻟﺤﺎﺟﻪ ﻓﺎﻃﻤﻪ ﻭﺳﻌﻴﺪﻩ ...
ﻳﻌﻨﻲ ﺍﻟﻠﻲ ﺑﻴﻤﺸﻮﺍ ﻣﻦ ﺍﻟﻨﺴﺎﻭﻳﻦ ..
ﻓﺎﻃﻤﻪ ﻭﺣﺪﻫﻢ ﻭﻣﺒﺮﻭﻛﻪ ﻭﻣﺮﺿﻴﻪ ﻭﻣﻌﺎﻫﻢ ﺯﻳﻨﺐ ﻭﻛﻔﺎﻳﻪ ﻭﻧﻌﻴﻤﻪ ﻭﺳﻌﻴﺪﻩ ..
ﺍﻣﺎ ﺍﻟﺮﺟﺎﻟﻪ ..
ﺭﻣﻀﺎﻥ ﻋﺒﺪﺍﻟﻠﻪ ﺧﻮﻩ .. ﻣﺨﺘﺎﺭ ﻧﺴﻴﺒﻪ ﻭﺍﻟﺤﺎﺝ ﻋﺒﻮﺩﻩ ﺟﺎﺭﻩ .. ﻧﺎﺳﺒﺎﺗﻪ ﻋﺒﺪﺍﻟﺴﻼﻡ ﻭﺧﻴﺮﻱ ﻭﺳﻌﺪ .. ﻣﻴﻼﺩ ﻭﺣﻤﻴﺪ .. ﺿﻮ ﺻﺎﺣﺐ ﻫﺎﻧﻴﺒﺎﻝ ﻭﺧﻮﻩ ﺻﺎﺑﺮ ..
ﺍﻣﺎ ﻋﻦ ﺍﻟﺼﺪﻳﻖ ﻭﻋﻤﺎﺭ ...
ﻓﻜﻞ ﻭﺍﺣﺪ ﻣﻨﻬﻢ ﻣﺴﺎﻓﺮ ﻟﺨﺪﻣﺘﻪ ...
🍁 ﺧﺸﺖ ﻏﺎﻟﻴﻪ ﺩﺍﺧﻞ
ﺣﻤﻴﺪﻩ : ﻋﺪﻭﺍ ..
ﻏﺎﻟﻴﻪ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺳﻤﻴﻪ : ﻉ ﺧﻴﺮ ﺇﻥ ﺷﺎﺀ ﺍﻟﻠﻪ ﻳﺎﺭﺏ ﻭﻳﻜﻮﻥ ﻗﺴﻤﻪ ﻓﻴﻬﺎ ..
ﺭﺩﻭﺍ ﻭﻗﺎﻟﻮﺍ : ﻳﺎﺭﺏ ..
ﺣﻤﻴﺪﻩ : ﻫﺎﻙ ﺣﺒﻴﺒﻲ ﻓﺆﺍﺩ ﺍﻟﻜﻴﻜﻪ ..
ﺧﺪﺍﻫﺎ ﻓﺆﺍﺩ ﻭﻗﻌﺪ ﻳﺎﻛﻞ ...
ﺷﺒﺤﺖ ﺣﻤﻴﺪﻩ ﻟﺴﻤﻴﻪ؛ﺷﻦ ﻣﺎﺯﺍﻝ ﻣﺎﺗﺒﻴﺶ ﺗﺤﻤﻠﻲ ﻣﺮﺓ ﺍﺧﺮﻱ ..
ﺳﻤﻴﻪ : ﺍﺳﺘﻐﻔﺮ ﺍﻟﻠﻪ ... ﺍﻧﻲ ﺣﺎﻣﻞ ﺍﺻﻼ ..
ﻏﺎﻟﻴﻪ ﺍﺗﻔﺎﺟﺌﺖ : ﻭﺧﻴﺮﻙ ﻣﺎﻗﻠﺘﻲ ..
ﺳﻤﻴﻪ : ﻋﺮﻓﺖ ﺍﻣﺲ ﺑﺲ .. ﻭﺍﻟﻠﻪ ﻣﺎﻭﻗﺘﻪ ﻭﻻﻋﻨﺪﻱ ﺧﻠﻮﻕ ﻟﻠﺘﻌﺐ ﻭﺍﻟﻤﻌﺎﻧﺎﻩ ﻣﺎﺻﺪﻗﺖ ﻓﺆﺍﺩ ﻛﺒﺮ ..
ﺣﻤﻴﺪﻩ؛ﻗﻮﻟﻲ ﺍﻟﺤﻤﺪ ﻟﻠﻪ ﻳﺎﺳﻤﻴﻪ ﺍﺷﺒﺤﻴﻠﻲ ﻭﻗﻮﻟﻲ ﺍﻟﺤﻤﺪ ﻟﻠﻪ ..
ﺳﻤﻴﻪ : ﺍﻟﺤﻤﺪ ﻟﻠﻪ ﻉ ﻛﻞ ﺣﺎﻝ ﺑﺲ ﻭﺍﻟﻠﻪ ﺗﻌﺐ ﻭﻣﻌﺎﻧﺎﻩ ﺻﺪﻗﻴﻨﻲ ﺑﻌﺪ ﺭﺑﻲ ﻳﻌﻄﻴﻚ ﺗﻮﻟﻲ ﻟﻜﻼﻣﻲ ..
ﺣﻤﻴﺪﺓ ﺍﺑﺘﺴﻤﺖ ﺑﺄﻟﻢ ...
ﻭﻏﺎﻟﻴﻪ ﺗﺸﻮﻓﻠﻬﺎ ﺑﺤﺴﺮﺓ ﻭﻛﺎﻧﺖ ﺧﺎﻧﻘﺘﻬﺎ ﺍﻟﻌﺒﺮﺓ ..
ﻃﻮﻝ ﻣﺸﺖ ﻟﻠﻜﻮﺟﻴﻨﻪ ...
🍁 ﺧﻨﻘﺔ ﺍﻟﻌﺒﺮﺓ ...
ﺗﺤﺪﺩ ﻓﺤﻮﺍﻳﺞ ﺧﻮﺗﻬﺎ ﺍﻟﻠﻲ ﺑﻴﻤﺸﻮﺍ ﻟﻠﻔﻀﺎﻧﻴﻪ ..
ﻭﺍﻟﻌﺒﺮﺓ ﺧﺎﻧﻘﺘﻬﺎ ...
ﻣﺮﺍﻡ ﺑﻨﺒﺮﺓ ﺑﺎﻛﻴﻪ : ﻋﺴﻰ ﺍﻥ ﺗﻜﺮﻫﻮﺍ ﺷﻴﺌﺎ ﻭﻳﺠﻌﻞ ﺍﻟﻠﻪ ﻓﻴﻪ ﺧﻴﺮﺍ ﻛﺜﻴﺮﺍ ... ﻋﺴﻰ ﺍﻥ ﺗﻜﺮﻫﻮﺍ ﺷﻴﺌﺎ ﻭﻫﻮ ﺧﻴﺮ ﻟﻜﻢ ...
🍃 ﻭﺍﻟﻠﻪ ﻳﻌﻠﻢ ﻭﺃﻧﺘﻢ ﻻﺗﻌﻠﻤﻮﻥ ...🍃
🍁🍁🍁🍁🍁🍁🍁
ﺍﻟﺴﺎﻋﻪ 8:00 ﻣﺴﺎﺀﺍ
ﺷﻦ ﺭﺍﻳﻚ ..
ﻋﻮﺩﺓ : ﺗﺠﻨﻨﻲ ﺗﻬﺒﻠﻲ ..
ﺍﻧﻔﺘﺢ ﺍﻟﺒﺎﺏ ﻭﺧﺸﺖ ﻣﺮﺕ ﺧﻮﻫﺎ : ﻳﻴﻲ ﻳﺨﺰﻱ ﺍﻟﻌﻴﻦ ﺑﺘﺠﻨﻨﻲ ..
ﻋﺮﻭﺑﻪ : ﺣﻖ ﻣﻨﺎﺳﻚ؟
ﻣﻨﺎﺳﻚ ﺑﺈﺑﺘﺴﺎﻣﻪ : ﺍﻳﻪ ﻭﺍﻟﻠﻪ ﻗﻤﺮ ﺑﻄﻴﺮﻱ ﺍﻟﻌﻘﻞ .. ﻳﻠﻼ ﺍﻟﺠﻤﺎﻋﻪ ﻧﺎﻃﺮﻳﻦ ﺑﺮﺍ ..
ﻋﺮﻭﺑﻪ : ﻫﻲ ﺷﻮﻱ ﺑﺲ ..
ﺍﻟﻘﺖ ﺍﺧﺮ ﻧﻈﺮﻩ ﻉ ﺭﻭﺣﻬﺎ ﻓﻲ ﺍﻟﻤﺮﺍﻳﻪ ..
ﺑﻌﺪﻳﻦ ﻗﺎﻟﺖ : ﻳﺎﺭﺏ ..
ﻣﻨﺎﺳﻚ : ﺍﻳﻪ ﺷﻮ ﺭﺍﻳﺤﻪ ﺗﺤﺎﺭﺑﻲ ﺍﻧﺘﻲ ..
ﺿﺤﻜﻮﺍ ..
ﻋﻮﺩﺓ : ﻧﺎﺿﺖ ﻣﻴﺴﻢ ...
ﻣﺸﺖ ﻟﺒﻨﺘﻬﺎ ﺍﻟﻠﻲ ﻛﺎﻧﺖ ﺭﺍﻗﺪﻩ ﻉ ﺳﺮﻳﺮ ﺧﺎﻟﺘﻬﺎ ..
ﺭﻓﻌﺘﻬﺎ ﻭﻫﻲ ﺗﻘﻮﻝ : ﻣﺎﺗﺒﻴﺶ ﺧﻄﺒﺔ ﺧﺎﻟﺘﻚ ﺗﻔﻮﺕ ﻋﻠﻴﻚ ﻳﺎﺟﺤﺸﻪ
ﻉ ﺧﺸﺔ ﻓﺮﻳﺎﻝ : ﻳﻴﻲ ﻋﻤﺘﻮ ﻗﻤﺮ ﻳﺎﺗﺆﺑﺮﻳﻨﻲ ..
ﺿﺤﻜﺖ ﻋﺮﻭﺑﻪ ..
ﻣﻨﺎﺳﻚ : ﻟﻚ ﻳﻠﻼ ﺍﻫﻞ ﺍﻟﺴﻠﻄﺎﻥ ﺍﻳﺒﻚ ﻧﺎﻃﺮﻳﻦ ..
ﺿﺤﻜﻮﺍ ..
ﺑﻌﺪﻳﻦ ﻃﻠﻌﻮﺍ ..
ﻛﺎﻧﺖ ﻋﺮﻭﺑﻪ ﻣﻊ ﻛﻞ ﺧﻄﻮﺓ ﺗﺨﻄﻴﻬﺎ ﻗﻠﺒﻬﺎ ﻳﺰﻳﺪ ﻳﺪﻕ ﺑﻘﻮﺓ ﺍﻛﺒﺮ ..
ﻟﻌﻨﺪ ﻣﺎﻭﺻﻠﺖ ﻓﻲ ﺍﻟﺼﺎﻟﻮﻥ ..
ﻋﺮﻭﺑﻪ : ﺍﻟﺴﻼﻡ ﻋﻠﻴﻜﻢ ..
ﺷﺒﺤﻮﻟﻬﺎ ﻭﺭﺩﻭﺍ ﺍﻟﺴﻼﻡ ..
ﻓﺎﻃﻤﻪ ﻭﺍﺧﺪﻩ ﻣﻨﻬﺎ ﻣﻮﻗﻒ ﻭﻻ ﺑﺄﻱ ﺷﻜﻞ ﻣﺎﺗﻘﺪﺭﺵ ﺗﻘﺒﻠﻬﺎ ﺍﻟﻠﻲ ﺻﺎﺭ ﻟﻮﻟﺪﻫﺎ ﺯﻣﺎﻥ ﺑﺴﺒﺒﻬﺎ .. ﻛﺎﻥ ﻣﻤﻜﻦ ﺗﻔﻘﺪﻩ ﻣﻦ ﻭﺭﺍﻫﺎ ﻫﻲ ..
ﻭﻣﻊ ﻫﺪﺍ ﺳﺎﻳﺮﺕ ﻭﺧﻼﺹ ..
ﻫﻮ ﻣﺶ ﻏﻴﺮ ﺍﻣﻪ ﺑﺲ ﺣﺘﻰ ﺧﻮﺍﺗﻪ ..
ﺑﺲ ﻉ ﻋﻴﻮﻥ ﺧﻮﻫﻢ ﻻﺯﻡ ﻳﺒﺎﻧﻮﺍ ﻓﺮﺣﺎﻧﺎﺕ ﻓﻬﺎﻟﻠﻴﻠﻪ ..
ﺳﻌﻴﺪﻩ ﻛﺎﻧﺖ ﺗﺸﺒﺤﻠﻬﺎ ﺑﺘﻜﺒﺮ .. ﻣﺎﻋﺠﺒﺘﻬﺎﺵ ﺑﻜﻞ ..
ﻗﻌﻤﺰﺕ ﺣﺪﺍﻫﻢ .. ﻭﺑﺪﻭﺍ ﺍﻟﺒﻨﺎﺕ ﻳﻬﺪﺭﺯﻭﺍ ﻋﻠﻴﻬﺎ ﺷﻮﻳﻪ ﺷﻮﻳﻪ ..
ﻫﻲ ﻛﺎﻧﺖ ﻣﺘﻮﺗﺮﺓ ﺷﻮﻳﻪ ﻟﻜﻦ ﺣﺎﻭﻟﺖ ﺗﺘﻐﻠﺐ ﻉ ﺗﺘﻮﺗﺮﻫﺎ ..
ﻭﻣﻦ ﺩﺍﺧﻞ ﻣﺶ ﻣﺼﺪﻗﻪ ﺍﻟﻠﻲ ﻗﺎﻋﺪ ﻳﺼﻴﺮ ..
💓 ﻭﻻﻫﻮ ﻛﺎﻥ ﻣﺼﺪﻕ ..
ﻛﺎﻥ ﻣﻘﻌﻤﺰ ﻓﻲ ﺍﻟﺒﺎﻟﻜﻮﻧﻪ .. ﻣﻘﺎﺑﻞ ﺑﺎﻟﻜﻮﻧﺔ ﺣﻮﺷﻬﺎ .. ﻭﻣﺒﺘﺴﻢ ﺑﻌﺸﻖ .. ﻭﻣﺶ ﻋﺎﺭﻑ ﻭﻳﻦ ﻳﺤﻂ ﻓﺮﺣﺘﻪ ﻓﻬﺎﻟﻴﻮﻡ ...
💕💕💕💕💕
ﺍﻟﺴﺎﻋﻪ 12:30 ﻟﻴﻼ ..
ﻣﻘﻌﻤﺰ ﻓﺴﻴﺎﺭﺗﻪ .. ﻳﺘﻜﻠﻢ ﺑﺎﻟﺘﻠﻴﻔﻮﻥ ..
ﻫﺎﻧﻴﺒﺎﻝ : ﺍﻟﻨﺼﻴﺐ ﻏﻼﺏ ﺭﻳﺘﻲ ..
ﻋﺮﻭﺑﻪ ﺑﻀﺤﻜﻪ : ﻭﺍﻟﻠﻪ ﻟﻌﻨﺪ ﺗﻮﺍ ﻣﺎﺻﺪﻗﺖ ..
ﻫﺎﻧﻴﺒﺎﻝ ﺑﻀﺤﻜﻪ : ﻻ ﺻﺪﻗﻲ ﺻﺪﻗﻲ ﺧﻼﺹ ﻃﺤﺘﻲ ﻓﻲ ﻗﺒﻀﺔ ﻫﺎﻧﻴﺒﺎﻝ ..
ﺿﺤﻜﺖ ﺑﻌﺪﻳﻦ ﺑﺪﺕ ﺗﻐﻨﻲ ..
ﻛﻞ ﺷﻲ ﻣﻜﺘﻮﺏ
ﺗﺒﻘﻰ ﻳﻮﻡ ﻣﻐﻠﻮﺏ ﻭﺗﺒﻘﻰ ﻳﻮﻡ ﻏﺎﻟﺐ
ﻗﻠﺒﻲ ﻣﻬﻤﺎ ﻳﺘﻮﺏ ﺍﻟﻌﻴﻮﻥ ﺑﺪﻭﺏ
ﻭﻗﻠﺒﻲ ﻓﻴﻚ ﺩﺍﻳﺐ
ﻫﺎﻧﻴﺒﺎﻝ : ﻳﺠﺮﻯ ﺍﻳﻪ ﻳﻌﻨﻲ ﻟﻮﺗﻄﺎﻭﻋﻨﻲ ..
ﻭﺗﻜﻮﻥ ﺍﻟﻤﺤﺒﻮﺏ ..
ﻫﺎﻙ ﻃﺎﻭﻋﺘﻲ ﺷﻦ ﺻﺎﺭ ﻓﻴﻚ ..
ﺿﺤﻜﺖ ﻋﺮﻭﺑﻪ ...
ﻭﻛﻤﻠﻮﺍ ﻫﺪﻳﻜﺎ ﺍﻟﻠﻴﻠﻪ ﻛﻼﻡ ﻓﻲ ﺍﻟﺤﺐ ...
ﻣﺎﻳﺘﻤﺶ 💓💓💓💓...
.... ﺍﻧﺘﻈﺮﻭﺍ ﺍﻟﻘﺴﻢ ﺍﻟﺜﺎﻧﻲ ..