#رمضان_احلا_مع_جمان_فريد
#العشق_المتمرد
الجزء الثاني..
الساعه 11صباحا..
هانيبال وحميد يذبحوا للضيوف اللي جوهم
عادة عند الحاج رمضان..حتى منين بناويته يجوا لازم يذبحلهم احسن كبش من السعي اللي عنده...
ميلاد كانت عنده صواره قاعده عنده من لما طلع دورة لبريطانيا...
هو خريج المعهد العالي متخصص زي مايقولوا في الهندسه الكهربائيه وطلع ع حساب الدولة وقتها للدورة...
المهم..
قعد يصور في الأجواء..وهادا تاني عرس ليهم يتوثق بالصور بعد عرس نعيمه..
صوره صوره...
ميلاد: خليه يلهى..
حميد : اهو لاهي مع خالك خودلهم صورة وكانك ع الضي متاع الصوارة قوللهم نصور محمود وعمار واقفين تالاهم..
ميلاد: باهي 😁..
وفعلا صور..
بس لارمضان ولامختار لاهيين بيهم كانوا هايمين بالهدرزة...
شوية و...
🔊🔊🔊🔊🔊🔊🔊🔊🔊
كلاكسات قلبت الدنيا..
عمتهم مبروكه اخت الحاج رمضان وعزوز زينب فنفس الوقت وصلت...
جابها ولدها الكبير مع بوها...
طلعوا الكل في الإستقبال كالعاده..
💕بعد استقبال كبير للعمة اللي جت..
قعمزت وبدت تشرب في القهوة وحلويات...
مبروكه: الحصار دارها فينا
فاطمه: حتى هنى الحال صعبه..خطرن عليا ايام الشر..
مبروكه: لا وين ايام الشر ياكبدي هذاكا الوقت قريب كلينا الرشاد...الحمد لله توا خير وربي مايوصلنا لحال ايام الشر
"مبروكه عايشه في طرابلس وخدت اللكنه متاعهم"..
في الكوجينه..
كفايه :وراس زنوبه فكينا من المشاكل واطلعي قعمزي مع عزوزك..
نعيمه: زينب اطلعي خير ماتجيك امك وتسمعي منها كلمتين..
حميده وغاليه يشوفولها..
زينب خدت مالقي الميه من وراها كان معبي للنص شرباته قريب كله...بعدين طلعت...
كفايه : بيني وبينكم عمتي نار..
نعيمه: نار ونويرة هي وبناويتها..
غاليه : لكن زينب لسانها كي..
حميده: زينب ماتبدا ع حد كان مابدو عليها..
🍁اما برا كانت زينب مقعمزة ع أعصابها ومرة مرة عزوزتها تعطيها شبحات نص عين..
🍃فات باهي النهار.
والتجهيزات ع قدم وساق...
نصبوا زوز خيم نساوين ورجاله..
كان مختار جايب فرقة شعريه وغناوي للعرس هديه منه لولد اخته..
وكان ناوي عمار يلقي قصيده ويغنيها في العرس..
قال عليها لهانيبال..
هانيبال: اسمع كلام ع الراجل هذاك مانبوش..
عمار بإبتسامه جانبيه: عارف...كلامي في القصيده كله عنكم وعن *******ورجالها...
هانيبال ابتسم: كويس..رفع حاجبه..وحتى اني عندي ماكاتب وبنقوله..
عمار : هههههههه...نصيحه مني اهمد وماتقول شي ..
هانيبال ضحك بإحراج وضربه ع كتفه بوكس: وحق الحاج امحمد ماضال اللي قايل..
عمار ردله الضربه: ماتحلفش بغير الله..
*****
البنات في المخزن اللي ورا الحوش ومعاهم مرت خوهم وبنات عمهم يضموا فيه بش بيطبوا فيه اليوم اللي بعده...
زينب: امال اول الثانوي السنى..
امال بإبتسامه: ايه..
نعيمه بضيق : ياريت عقلية سيدي زي عقلية عمي..
سعيده بغرور: سيدي طالع وخاش وعارف الدنيا مش كيف عمي اللي ماطلعش من هنى غير مرة وحده فحياته..
زينب بضحكه: اللي يسمعك ياسعيده يقول مقطع كرعيه ع مصر ومالطا...هي كلها بنغازي..
أمال: مش شويه بنغازي يازينب ره الحياة والناس فيها منفتحين واجد مش كيف هنا..
سعيده: عشنا فيها 10سنين مش شويه وتعلمنا فيها حاجات واجده ورينا اللي عمركم ماريتوه..
كفايه : خيرك سعيده !!رانا ففرح تبي مشكله ولا كيف؟!!
نعيمه: خلاص خلاص فكونا من القطاف الزايد واخدمن وانتن ساكتات..
زينب وسعيدة عطوا لبعضهم شبحات زي السم واللي هذا لهت بحاجه...
برا ...
كانت غاليه جايه للمخزن لمحت من بعيد حميدا اللي كان واقف ع سيارته..
ابتسملها ويدوب رفع يده واشر🖐
هي ابتسمت ويدوب ردتها وهربت للمخزن...
"هكي يتواصلوا بالعيون والإشارات بس مافيش بيناتهم دوة"
خشت للمخزن وبلعت ابتسامتها...
لقتهم يضموا أو بالأحرى يقربعوا...
للي هذا فشت أعصابها في الماعين
جت حدا حميده نخصتها..
حميده بهمس: تو نقولك بعتالي..
هزت راسها بإيجاب بعدين قالت بهمس وهي مبتسمه: ريت حميدا..
حميده ابتسمت نفس الإبتسامه: حتى اني ريت خليفه ..
ابتسموا الزوز..
وعيون سعيده كانت عليهم وشبه فاهمه ع شنو يبتسموا"مانوليش سعيدة بنت عبدالله كان خليت خوتي ياخدوكن"...
كملوا شغلهم وطلعوا...ومشوا من المخزن خشوا من البوابه للحوش...
البنيات كان يلعبواداخل..والولاد برا يلعبوا زرابيط وكورة ...
اما الشباب طلعوا يدهوروا هني وهني بسيارة مختار
يكوشوا بيها زي مايقولوا...😁
روحوا مع المغرب....
هانيبال بعد غير خش للحوش...
"غاااليه..ياغااليه"..
طلعت تجري للسقيفه: نعم..
هانيبال: المخزن مافيه حد؟
غاليه: ايه فاضي..
هانيبال هز راسه بإيجاب ولف وطلع...
في المخزن..
اياااه علينا عاد وين عديت بيها!!
امال ادور ع حديدتها الذهب راحت منها..
شويه وانفتح الباب انخلعت..التفتت لقت هانيبال قلبها فر فران..
هانيبال برفعة حاجب: شنو عندك هنى؟
امال قدمتلها وقلبها دقاته قوية لين خلاص: ندور ع حديدتي طاحت مني..
هانيبال بدون مايشوفلها : عدي وتو ندورها اني ونبعتها مع خوك ..
امال قربتله مشاعرها كانت قويه لين خلاص وهي بتهبل عليه هبال: انت ماتحسش؟
هانيبال شبحلها بقرنة حواجب: شنووو؟؟؟!!
امال بجرأة وعيونها مليانات دموع: هانيبال اني نحبك..
جاته صدمه فجرأتها وصلت عنده للشيطان الرجيم..
تتوقعوا شن دار؟!!
المخزن صدح فيه صوت كف قوي لايقرا ولايكتب..
هانيبال بغضب : غير ماهوش وقته ومانبي مشاكل كان هدا وحق الله وصلت كلامك لسيدك وخوتك ...انتلفي...اطلعييييي..
طلعت تجري وهي ترعش ودموعها سيل ...
وهو قعمز وقاعد يغلي غلي من الموقف..
اللي صدمه انها بنت عمه ..مصدوم فربايتها كيف توقف ع شاب وتقوله كلام زي اللي سمعه..
فكر انها حتقرا في المدرسه وخاف تبدا تتعرف ع الولاد وادير في العلاقات وتقرقز بيهم...
مطلعش من المخزن إلا لما هدي ونسي علاش جاه مرة وحده..
كان يبي يراجع الأبيات اللي كاتبها ع رواق وبصفاء ذهن لكن اللي دارته امال لاخلا فيها رواق ولاصفاء ذهن..
هي تماسكت لما خشت للحوش وكانت تتهرب من خوتها لين خشت دارهم قعدت تشوف فوجهها من المرايه لقت اثر الكف
ودموعها ينزلوا...
بس بعدين حطت يدها ع خدها وغمضت عيونها وقالت:حتى لو بالضرب المهم يده لمست خدي...ابتسمت وتنهدت..والله بعد هالكف طحت فيه اكثر واكثر💓...
"ماتستغربوش وتقولوا معقوله كان في بنات هكي زمان؟!!
كان في واحرف من هكي خلوني ساكته🤐"
****
مقعمزة وتشوف للتوكه...
جتها اختها وقعدت تشوفلها..
عودة: منك جد عروبه!!
عروبه بحقد: اه بس لو نشوفه مرة تانيه والله العظيم نمسح بيه الوطا...شبحت فوق..ياربي نشوفه مرة تانيه..
عودة بضحكه: قلبك قلب جمل..
عروبه بنرفزة: مش وقت صماتك انتي الأخرا..
عودة بضحكه: باهي تعالي اطلعي معانا برا امي قالت بنتعشوا برا الجو سمح..
عروبه ناضت : باهي..عدي..
شبحت للتوكه وشبحتلها وضحكت ..لفت وطلعت...
وهي شبحت للتوكه جت بين عيونها شبحته فار دمها...خدت التوكه وحطتها في القجر بعصبيه ...زفرت بقوة ..بعدين طلعت...
***
مقعمزين في الجردينه..
يشوف لولد عمته وحسه مش مزبوط بكل : هانيبال؟
شبحله : هاه..
عمار: خيرك ؟
هانيبال : شي..
عمار ضيق عيونه : ماتبيش تحكي!
هانيبال غير عيونه عنه...
عمار: نغير الموضوع..
هانيبال شبحله : ياريت..
عمار ابتسم ع جنب:شنو حالهم عيت عمك؟
هانيبال غمض عيونه بنفاد صبر وفتحهم..
عمار بقرنة حواجب: متعارك انت وواحد من ولاد عمك؟
هانيبال: افففففففف...
عمار : لا الحكايه كبيرة!!
هانيبال: عمار نقولك..نقدروا نخشوا سرت عادي؟
عمار ابتسم لإنه غير الموضوع:ايه مادام خالكم مختار..
هانيبال ابتسم: نبيي نركب ع الخيل..ونشوف الجموح كيف كبر..
عمار بإبتسامه جانبيه: مرحبتين ومرحبا..
ضحك هانيبال...
🌅تاني يوم...
الصبح الساعه 7:00..
طالعه غاليه من فم البوابه متوجهه للمخزن بش تجهزه وتوتيه بالسبيزة متاع التطييب...
كانت رافعه شكارة دقيق شعير..
فتحت الباب وخشت..
مشت بالشكارة وحطتها حدا صندوق زيت ..
وقفت ع حيلها وشدت ظهرها ويجوا عيونها ع الحيط توسعوا بصدمه..
غاليه: نهار احرف!!!
كان مكتوب ع الحيط اللي كان من غير زواق..
مكتوب عليه بالفحم..
(هانيبال..نحبك)
ضربت بيدها ع خدها وقعدت تندب ...
مشت تجري صكرت المخزن وخشت لخواتها...
فاتت من حدا امها ومرت عمها وعمتها اللي كانوا يفطروا ويهدرزوا شبحتلهم ع جنب بعدين خشت للكوجينه..
غاليه: تعالن للمخزن شوفن العار...
كفايه ونعيمه طول طلعوا وغاليه لحقتهم..
رجعت شافت للعزايز لقتهم مش لاهيات..
وشافت للصغار يلعبوا ويجروا ورا بعضهم...
هي طلعت وطلعوا وراها وقعدوا يلعبوا فم البوابه..
وهي مشت للمخزن خشت لقت خواتها يشبحوا للحيط بصدمه..
غاليه: هدي امال ..
كفايه شبحت لأختها وهزت راسها بإيجاب...
مشت طلعت من المخزن ووقفت وهي تشوف فم البوابه:عماد تعال...
جاها عماد يجري : نعم..
كفايه : برا شوف خالك هانيبال كان لقيته نايض قوله تبيك امي في المخزن ضروري...هاه شن تقوله؟!
عماد :تبيك امي في المخزن ضروري...
كفايه : شاطر..ضرباته ع الكتفه بخفه وقالت..برا..
وطار عماد يجري..
خشت كفايه للمخزن مرة تانيه..
غاليه: علاش نادتيه؟
كفايه : اصبري لين يجي..
نعيمه: كان تفكينا من المشاكل..
كفايه: لاهناك مشاكل لا سو...
شويه وجاهم هانيبال..
هانيبال ووجهه منفخ من النوم: صباح الخير..
ردوا عليه : صباح الخير..
كفايه اشرتله بيدها: ترا تعالى..
قدملها وهو قارن حواجبه بإستغراب...
اشرتله ع الحيط...شبحله ...
خواته يشبحوا لعيونه اللي نظراتهم ولت تخوف..
كفايه: بينك وبينها شي امال؟
هانيبال بتضييقة عيون: شن تقطفي انتي!!!الفرخه هدي بالذات مانحبلها شبح وجه لكن باهي.. اني حذرت قبل وماسمعت..
نعيمه : وراس هنيوه فكنا من المشاكل خل العرس يعدي ع خير..
هانيبال هز راسه بإيجاب وملامحه كلها غضب: تم هالدوشه يصير خير ارجن شوي...
طلع من المخزن..
كفايه: الحمد لله يارب اللي مافي بينه وبينها شي سادتنا مصيبه وحده..
نعيمه: خايفه يدير مشكله..
خش وفيده سطل زواق صغير: ماهناك مشاكل يانعيمه..
قدم وقعد يزوق في الجزء اللي عليه الكتيبه وهو يزوق قال: مايطلع منكن شي لحد..
كلهم ردوا : باهي..حاضر...
هذا كله وحميده وزينب متنخات بالنوم😪😴 ..
الساعه 11 صباحا..
حي ع امها حي!!!
حميدة بصدمه: الحقيرة هدي!!!
غاليه: الحمد لله اللي ريتها قبل يجوا نسوان راهو قعدنا قرقوز...
زينب: متأكدات هانيبال مايبيهاش؟
غاليه: راح كيف الغول لما راها..
زينب: والله غلطة ميلاد معاد تتعاود لوع جثتي..
حميده: هانيبال بنات عمك كلهن مايحبهنش..تريحي..وهيا اطلعن للناس..
في المخزن...
كان معبي بالنساوين والجيران اللي كانت عندهم المناسبه
لمه ليهم كلهم ع كل شي تقول عرس للكل...
زمان مش توا🍃
مبروكه: اني والله قبل بنحرش بوها مرة وحده لكن قصرت المشاكل وقلت نكلم امها ...الأم هي اللي تربي..
وجه فاطمه متغير ووجعتها كلمة مبروكه الأخيره: ماعليكش فيها تو نوريها..
الحوار كانت تسمع فيه سعيدة...
غطت كازان طبيخه البازين وهي مبتسمه بخبث...
ولفت ع وحده من الجيران: عمتي سالمه بنعدي نجيبلك الدقيق...
وطلعت طول..
نعيمه لاحظتها وشبحت لشكارة دقيق الشعير اللي كانت في المخزن بإستغراب...
هي طالعه لقت حمواتها جايات راجت لين فاتوا غاليه وحميده ...
سعيده بضحكه: عمتي نازله فيك يابنت عمي..
وقفت زينب وشبحتلها برفعة حاجب: تكلمي فيا؟!
سعيده: متعاركه انتي ونجيه بنتها؟
غمضت عيونها بشده وفتحتهم..
بعدين لفت وولت للحوش...
خشت للدار وصكرت عليها....
وسعيده ولت للمخزن وهي مبتسمه بمكر...
وزينب داخل تحرق وتدعي ع حماتها وعزوزتها...
🍁هذاكا اليوم مشت العزومه ع خير ودارو الشي اللي يشرف...
وكانت فاطمه مواطيه عينها ع بنتها زينب وزينب زبطتت امها صدقت فيها كلام عزوزتها..
مع الأسف فاطمه كانت زي راجلها ماتعرفش ادافع ع بناتها ودير فالحق ديما عليهم..
وكله خوف من شبح الطلاق..اللي كان اشبه بالعار...
🍃🍃
فاتوا يومين ع نفس الوتيرة...
وجي نهار الكسوة ...
الكسوة بتمشي لطرابلس ...
من الساعه 2متسقدين النساوين الكبار وزينب بس من المتزوجات...
عروسة حميد ممرضة تعرف عليها فطرابلس لما كان يقرا في العسكريه ولما تخرج خطبها..
حيعيشوا فطرابلس ..
لكن حيدخلوا في المدينه متاع حميد...لأن بوها كان شارط هالشرط..وخداله دار في الحوش اللي يسكن فيه ميلاد وهذا اللي مخلي سعيده بطير...
لأنها حتبات هي وصغارها كم يوم فحوش بوها..
....
حدهم: شن جاك ياودي من الأول عارفه وع عينك ركبوا دار النوم..
سعيده بعصبيه: تقهر يمي كنت ساكته ومشيتها فبالي نهارين مش اسبوع !!
حدهم: خلاص توا اسكتي هو نهارين هواسبوع سواسوا..
خبطت سعيده خدها: ماهو من بختي الأسود بختي...
خش سليمان: خير بلاها هدي!!؟
سعيده ناضت وطلعت من حداهم وخوها معاها بعيونه: اللهم جيرنا..شبح لأمه..يمي وين سوريتي العربيه..
حدهم اشرت بيدها وهي معصبه:توقها في المربوعه..
هز راسه بإيجاب وطلع من حداها...
🍃مع المغرب..
كانوا عرب الكسوة مروحين وقالبين الدنيا بالكلاكسات..
الرجاله جوهم مليح ومافيش منه ...
اما النساوين..
زينب وهي تحول في الصدرة: شايفين ارواحهم خشوم في السمي..يحسابوا كانهم طرابلسيه خلاص وصلوا..
حولت الردي وقعدت في القمجه...خالتها عيني عينك تقول فيها وهي تشوف لحوايج الكسوة "البدو طلعوا متحضرين"..
كفايه بحمقه: قولتولهم الدبش والكنادر من سوريا؟!
زينب بضحكه :ماأرتحتش لين قلتها..وجوههم راحت كن كيف الليمه..
"حميد سافر لسوريا وجاب الدبش جاب حتى لخواته وكانت حاجه واااو وقتها"...
💕💕💕💕💕
في الليل..
كانت اجواء ولا في الخيال...
فرقة شعبيه وشعر وغناوي مشهورين بيهم عرب هديكا المدينه ومختار هو اللي جابهم لأنه يعرفهم...
والنساوين داخل دربوكه وغني..
مازال ماوصلش فيه المسجل..والمنظومه مافيش وقتها...
بس كانت تنقام الأفراح بأحسن واحلا مايكون ..
غني البوطويل اللي كانت فاطمه فنانه فيه هي وجاراتها..
الأجواء كانت غايه في الروعه...
في عز انسجام النساوين مع الأجواء والدربوكه والغني..
وقفوا لما سمعوا صوت الشاعر وهو يغني بشعره..
قعدوا يسمعوا ..
كانت اشعار فخر بالقبيله ..
طبعا عيب اشعار الغزل وقتها الأ بحدود محدودة جددددا😁..
كان الكل يسمعوا ومعجبين بالكلام والصوت والإلقاء..
وبدي الكشك وكان مسموع ...
بعد تم الشاعر ناض عمار..
وهو لابس العربي والكشابيه ع كتافه والزماله ع راسه..
كان ملفت هلبه للرجاله يبان عليه عاقل ورزين وقوي شخصيه وهيبته متجليه...
ماكانش يطنش فخشمه ع الناس عكس الراجل اللي يحب يقلده..بس سماته الظاهريه كانت حقيقيه ماهيش تصنع..
وقف ع المايك حيا الحاضرين وراجل عمته وولاد عمته وكان كلامه باللكنه البدويه الصافيه...
رمضان كان معجب بيه هلبه..
وهانيبال كان عاجبه بس يغار منه بعض شيء غيرة طبيعية مش حسد..
بدي يلقي في أبياته باللحن ..
وفعلا كان شاعر..ع الوزن والقافيه وكلماته قويه..
تغنى بشعره في المدينه اللي هو فيها بكل معالمها وناسها..
وقال ابيات في المناسبه وبيت في العريس..
والكشك شغال👏👏👏👏👏👏👏👏👏👏👏👏👏
رمضان: عرفت تربي يامختار..
مختار بإبتسامه: مايتخيرش عن ولاد عمته..
بعد كمل عمار الشعار اللي كانوا موجودين اثنوا ع موهبته هلبه...
وهانيبال تراجع عن انه يلقي لأن بعد عمار من الصعب يجي بعده حد وينافسه..
الساعه 12ليلا..
البنات في روشن الكوجينه..
حميده: اللي مصبي ع هانيبال..
ريلا بنت جيرانهم: اللي لابس زماله بيضا وكشابيه سودا؟
غاليه: ايه هو..
فضيله جارتهم: عليك راجل ..
حميده بضحكه: نداد هو وهانيبال..
فضيله:ماشااااء الله..
"شن عندكن معلقات في الروشن!!"
البنات😨😨😨😨😨
جارتهم سدينه: هيا كملن شغلكن بلا $##%اناثي..
وجوههم تغيرت من الكلمه وقريب ماتوا ومشوا للماعين..
برا...
نعيمه تساوي فدلال اللي دارت عيطه وراسها والف سيف خالها هانيبال يشوف قفطانها..
دلال: اوج..
كفايه: ههههههههههه...تعالي نديرلك..
نعيمه : ووك عليا بتمقرسلي من توا في الحوش ماخلت عليا مكياج ..
كفايه وهي دريلها في الروج الأحمر...باستها ع خدها وقالت:سلمها وسلم أوجها والفيلو اللي لابساته..شبحت لأختها...فصلاته حماتك؟
نعيمه بضحكه: ايه..
دلال: نمجي ل هاني "نمشي"..
كفايه : تعالي..
خدتها من يدها وطلعت بيها من الباب..لمحت محمد: حميدة ..محمد..
تلفت وجاهم...
محمد: خيرك؟
كفايه: وصلها لهانيبال..
محمد : باهي..هي تعالي دلوله..
خداها من يدها ومشي بيها..
وكفايه تضحك: ندادها راقدات هالمعفنه ..سلمها ياربي ..خشت للحوش...
هانيبال: ماكنتش واتي..
عمار بضحكه وهو يغمز بعينه: واني مصدقك..
هانيبال غير عيونه عنه ووجهه احمر...
لمح دلال ابتسم من قلبه ..
شبح عمار وين مايشبح...ابتسم..
محمد: تبيك..
هانيبال بإبتسامه: ماشاء الله ماشاء الله شن هالسماحه والقفطاين ..قامها..والدنادين"خراصات"..والمكياج والشعر..
ودلال بضحكه طفوليه خجوله تأشرله ع القفطان..
هانيبال: سمح واجد ياسمحه انتي ..وباسها من خدها..
وعمار يشوفلهم ومبتسم ع جنب قال: ربي يحفظها ويصونها..
هانيبال شبحله بإبتسامه: تسلم..
"هانيباال"..
هانيبال : سيدي يبيني نوخر الطرطوري..."تراكتور"..
شبح لعمار وقدملها : ترا شدها شوي..
عمار اتفاجأ مش متعود هلبه ع الصغار..
خداها من هانيبال..وهانيبال فات يجري
وهي تشبحله وهو يشوفلها ابتسم: سمحه انتي..
ابتسمت بطفوليه..
عمار: ترا ياسمحه قولي عمار..
دلال تضحك بخجل طفولي وقعدت ساكته..
عمار بإبتسامه: هيا..ع..ما..ر
دلال ساكته..
عمار بضحكه: هيا ياسمحه ..
دلال: عمال...
عمار : ههههههههههه....ماشاء الله ماشاء الله ...
جاهم هانيبال ضحك وقال: اندمجت معاك..
عمار بضحكه: ماشاء الله عليها...
هانيبال: تعالي ياخالو ...جاته وخداها..هي ديري باي لخالو عمار..
شبحتله وحركت يدها 🖐...
هو ابتسم وخدي يدها وباسها..
طول هانيبال جبدها: نشبح فيها يدك اللي فجيبك..
وفات طول..
وعمار يضحك عليه..
قعد معاهم بعيونه لين ولا بيها للحوش ودخلها..ولاله مرة تانيه...
من جهة تانيه..
نعيمه بتوسل: يهديك ربي كيف نروح صبح نهار الصبحه كيف؟
عبدالسلام: هذا اللي عندي بتروحي معاي باهي ماتبيش حوش بوك ووصلتيله...
ومشي وخلاها..
وهي تسبح فدموعها حدا المخزن....
...يتبع....
