المتمردين

العشق المتمرد

#رمضان_احلا_مع_جمان_فريد

#العشق_المتمرد

الجزء 41

ﺍﻟﺴﺎﻋﻪ 1:00 ﻟﻴﻼ ...
ﺍﻳﺎﻡ ﺭﺑﻲ ﻧﺎﻋﻢ ﻋﻠﻴﻨﺎ ﺑﺎﻷﻣﺎﻥ ..
ﻛﺎﻧﺖ ﺣﻔﻼﺕ ﺍﻷﻋﺮﺍﺱ ﺗﺴﺘﻤﺮ ﻟﻠﺴﺎﻋﻪ 3 ﻟﻴﻼ 🍃...
ﻣﺆﻟﻢ .. ﻟﻤﺎ ﺗﻘﻌﺪ ﺗﺤﻜﻲ ﻉ ﺍﻳﺎﻡ ﺣﻠﻮﺓ ﻉ ﺍﻧﻬﺎ ﻣﺎﺿﻲ ﻭﺳﻂ ﺣﺎﺿﺮ ﻛﻠﻪ ﻣﺮﺍﺭ 🍁
ﺍﻟﻤﻬﻢ ...
ﻓﻬﺪﻳﻜﺎ ﺍﻟﺴﻨﻪ 2008 ﺍﻭﺍﺧﺮ ﺷﻬﺮ ﺍﻱ ﺍﻟﻨﺎﺭ ...
ﻛﺎﻧﺖ ﻋﺮﻭﺑﻪ ﻭﺍﻗﻔﻪ ﻫﻲ ﻭﺍﻟﺒﻨﺖ ﺍﻟﻠﻲ ﻣﻌﺎﻫﺎ ﻉ ﺍﻟﺴﻴﺎﺭﺓ ﺍﻟﻠﻲ ﺩﺍﺭﺗﻬﺎ ﻓﻴﻬﻢ ﻓﻲ ﻭﻗﺖ ﻏﻠﻂ ...
ﺳﻤﻴﺮﺓ : ﺷﻨﻮ ﺻﺎﺭ ﻣﻌﺎﻙ ..
ﺣﻤﺪﻱ : ﻻﻻ ﺣﻜﺎﻳﺘﻬﺎ ﺗﺒﻲ ﻭﻗﺖ .. ﺷﺒﺤﻠﻬﻢ .. ﻣﺎﻓﻲ ﺣﺪ ﺑﻴﺠﻲ ﻳﺮﻭﺡ ﺑﻴﻜﻢ؟ !
ﺳﻤﻴﺮﺓ ﺑﺨﻮﻑ : ﻻ ﻳﺎﺧﻮﻱ ﻣﺎﻓﻴﺶ ..
ﺷﺒﺢ ﻟﻌﺮﻭﺑﻪ ﻟﻘﺎﻫﺎ ﻻﻫﻴﻪ ﺑﺘﻠﻴﻔﻮﻧﻬﺎ ..
ﺣﻤﺪﻱ : ﻳﺎﺍﺧﺘﻲ ..
ﺳﻤﻴﺮﺓ ﻧﺨﺼﺘﻬﺎ : ﻋﺮﻭﺑﻪ ..
ﻋﺮﻭﺑﻪ ﺷﺒﺤﺘﻠﻬﺎ : ﺷﻮ ..
ﺣﻤﺪﻱ : ﻋﻨﺪﻙ ﺣﺪ ﻳﺮﻭﺡ ﺑﻴﻚ ..
ﻋﺮﻭﺑﻪ ﺣﺮﻛﺖ ﺭﺍﺳﻬﺎ ﺑﺎﻟﻨﻔﻲ : ﻻ .. ﺑﺲ ﻛﻨﺖ ﻋﻢ ﻃﻤﻦ ﺍﻫﻠﻲ ﺑﺎﻟﺒﻴﺖ ..
ﺣﻤﺪﻱ ﺍﺑﺘﺴﻢ ﺍﺑﺘﺴﺎﻣﻪ ﺧﻔﻴﻔﻪ ﻭﻗﺎﻝ : ﺷﻔﺘﻮﺍ ﺍﻟﺴﻴﺎﺭﺓ ﺍﻟﻠﻲ ﻭﺭﺍﻛﻢ ..
ﻋﺮﻭﺑﻪ ﻭﺳﻤﻴﺮﺓ ﺍﻟﺘﻔﺘﻮﻟﻬﺎ .. ﻭﺭﺟﻌﻮﺍ ﺷﺎﻓﻮﻟﻪ ..
ﻣﺪ ﻟﻤﻔﺘﺎﺡ ﻟﺴﻤﻴﺮﺓ : ﺗﻘﺪﺭﻭﺍ ﺗﺮﻭﺣﻮﺍ ﺑﻴﻬﺎ ﺗﻮﺍ ..
ﺷﺒﺤﻮﺍ ﻟﺒﻌﺾ ..
ﺳﻤﻴﺮﺓ : ﻣﺎﻓﻴﺶ ﻏﻴﺮ ﻫﺎﻟﺤﻞ ..
ﺣﻤﺪﻱ ﺑﻀﺤﻜﻪ : ﺧﻼﺹ ﺧﻮﺩﻱ ﺍﻟﻤﻔﺘﺎﺡ ..
ﺍﺑﺘﺴﻤﺖ ﺳﻤﻴﺮﺓ : ﻟﻌﺮﻭﺑﻪ ﺍﻟﺴﻴﺎﺭﺓ ..
ﺣﻤﺪﻱ ﺍﺑﺘﺴﻢ ﻭﻫﻮ ﻳﺸﻮﻓﻠﻬﺎ : ﺗﻔﻀﻠﻲ .. ﻳﺎﻋﺮﻭﺑﻪ 💖..
ﻋﺮﻭﺑﻪ ﺷﺒﺤﺘﻠﻪ ﺷﻮﻳﻪ .. ﺑﻌﺪﻳﻦ ﻣﺪﺕ ﻳﺪﻫﺎ ﻭﺧﺪﺕ ﺍﻟﻤﻔﺘﺎﺡ : ﺷﻜﺮﺍ ... ﻓﻴﻚ ﺑﻜﺮﺍ ﺗﺠﻲ ﻟﻠﻤﺼﻮﺭ ﻭﺗﺴﺘﻠﻤﺎ ﻣﻨﻲ ..
ﺣﻤﺪﻱ ﺑﻀﺤﻜﻪ : ﺍﻧﺘﻲ ﻏﺪﻭﺓ ﺍﻥ ﺷﺎﺀ ﺍﻟﻠﻪ ﺗﻌﺎﻟﻲ ﻟﻠﻮﺭﺷﻪ ﻣﺘﺎﻋﻲ ﻓﻲ ****** ﻭﺗﺎﺧﺪﻱ ﺳﻴﺎﺭﺗﻚ ...
ﺳﻤﻴﺮﺓ ﺑﻀﺤﻜﻪ : ﺗﻤﺎﻡ ﻋﻄﻴﻬﺎ ﺭﻗﻤﻚ ﺑﻴﺶ ﺗﻠﻘﺎﻙ ..
ﻫﻲ ﺷﺒﺤﺖ ﻟﺴﻤﻴﺮﺓ ﺑﺘﻔﻨﻴﺼﻪ ...
ﻭﻫﻮ ﺷﺎﻓﻠﻬﺎ ﻭﺍﺑﺘﺴﻢ : ﺗﻤﺎﻡ ... ﺳﺠﻠﻲ ﻋﻨﺪﻙ ..
ﻋﺮﻭﺑﻪ ﻭﺟﻬﻬﺎ ﻭﻻ ﺍﺣﻤﺮ ﻟﻘﺖ ﺭﻭﺣﻬﺎ ﺍﻧﺤﻄﺖ ﻓﻲ ﺃﻣﺮ ﻭﺍﻗﻊ ﻭﻛﺎﻥ ﺗﻠﻘﻰ ﺗﺨﻨﻖ ﺳﻤﻴﺮﺓ ...
ﻋﺮﻭﺑﻪ : ﻟﻴﺒﻴﺎﻧﺎ ﻭﻻ ﻣﺪﺍﺭ 😳..
ﺣﻤﺪﻱ ﺑﺈﺑﺘﺴﺎﻣﻪ : ﻋﻨﺪﻱ ﺍﻟﺰﻭﺯ ﻭﺑﻨﻌﻄﻴﻬﻮﻣﻠﻚ ..
ﺷﺒﺤﺘﻠﻪ ...
ﻫﻮ ﻣﺎﺯﺍﻝ ﻣﺤﺎﻓﻆ ﻉ ﺍﺑﺘﺴﺎﻣﺘﻪ ..
ﺭﺟﻌﺖ ﻧﻈﺮﻫﺎ ﻟﺘﻠﻴﻔﻮﻧﻬﺎ ﻭﻗﺎﻟﺖ : ﺑﺎﻫﻲ ..
ﺣﻤﺪﻱ ﺑﺈﺑﺘﺴﺎﻣﻪ ﺭﻓﻊ ﺣﻮﺍﺟﺒﻪ ﻭﻗﺎﻝ : ﺍﺣﻤﻢ 092..
ﻭﺳﻤﻴﺮﺓ ﻣﺮﻛﺰﺓ ﻋﻠﻴﻬﻢ ﻭﻣﺒﺘﺴﻤﻪ ...
ﺍﻣﺎ ﻋﺮﻭﺑﻪ ﻛﺎﻥ ﺣﺎﺳﻪ ﺑﺈﺣﺮﺍﺝ ﺷﺪﻳﺪ ...
🍁🍁🍁🍁🍁🍁🍁🍁🍁
ﺍﻳﻪ ﻳﺎﺳﺘﻲ ... ﻭﺭﺍﻧﻲ ﻣﻦ ﻋﻴﻠﻪ ﺣﺎﻟﺘﻬﺎ ﺍﻟﻤﺎﺩﻳﻪ ﻣﺘﻮﺳﻄﻪ .. ﻟﻜﻦ ﺍﻏﻨﻴﺎﺀ ﺑﺎﻟﺴﻤﻌﻪ ﺍﻟﻄﻴﺒﻪ ﻭﺍﻟﻔﻌﻞ ﺍﻟﺒﺎﻫﻲ ..
ﻣﺠﺪﻭﻟﻴﻦ ﺑﺈﺑﺘﺴﺎﻣﻪ : ﻭﺍﺿﺢ ﻣﺶ ﻣﺤﺘﺎﺝ ﺗﻘﻮﻝ 💖..
ﻫﺎﻧﻴﺒﺎﻝ ﺍﺑﺘﺴﻢ : ﺍﻳﻪ ﻗﻮﻟﻲ ﺷﻦ ﺟﻮ ﺍﻟﻌﺮﺱ ..
ﻣﺠﺪﻭﻟﻴﻦ : ﺍﻣﻤﻢ .. ﻣﺎﺷﻲ ﺣﺎﻟﻪ ...
ﻫﺎﻧﻴﺒﺎﻝ ﺑﻀﺤﻜﻪ : ﻭﻟﻴﺶ ﺗﻘﻮﻟﻲ ﻓﻴﻬﺎ ﻫﻜﻲ ..
ﻣﺠﺪﻭﻟﻴﻦ : ﺍﻟﻨﺎﺱ ﻫﻤﺎ ﻋﻨﺪﻫﻢ ﻟﻜﻦ ﺫﻭﻕ ﻣﺎﻓﻴﺶ .. ﻫﻜﻲ ﺗﺤﺴﻬﻢ ﻣﺎﻳﻌﺮﻓﻮﺍ ﺷﻲ ﺧﺎﺷﻴﻦ ﻉ ﺍﻟﺘﻄﻮﺭ ﻣﺘﺎﺧﺮ ... ﻫﻤﺎ ﻣﻦ ﺯﻟﻴﻄﻦ ﻭﻟﻴﻬﻢ 15 ﺳﻨﻪ ﺑﺲ ﻓﻲ ﻃﺮﺍﺑﻠﺲ ﻭﻣﻊ ﻫﺪﺍﻣﺎﺯﺍﻟﻮ ﺑﻌﻘﻠﻴﻪ ﻗﺪﻳﻤﻪ ﻓﻜﻞ ﺷﻲ ..
ﻫﺎﻧﻴﺒﺎﻝ ﻗﺮﻥ ﺣﻮﺍﺟﺒﻪ ﻭﻗﺎﻝ : ﻭﺍﻧﺘﻲ ﻫﺪﻱ ﻧﻈﺮﺗﻚ ﻉ ﻧﺎﺱ ﺍﻟﺪﻭﺍﺧﻞ ..
ﻣﺠﺪﻭﻟﻴﻦ ﺍﺳﺘﺎﻗﻀﺖ ﻟﺮﻭﺣﻬﺎ ﺷﻦ ﻗﺎﻟﺖ : ﻻﻻ .. ﺍﻧﻲ ﻧﻘﺼﺪ ﺍﻟﻨﺎﺱ ﺍﻟﻠﻲ ﻣﺸﺘﻴﻠﻬﻢ ﺑﺲ ..
ﻫﺎﻧﻴﺒﺎﻝ : ﺗﻢ ... ﺑﻨﺼﻜﺮ ﺗﻮﺍ ﺗﺼﺒﺤﻲ ...
ﻭﺻﻜﺮ ﻋﻠﻴﻬﺎ ..
ﻣﺠﺪﻭﻟﻴﻦ ﻗﺮﻳﺐ ﻣﺎﺗﺖ .. ﺭﺟﻌﺖ ﻋﺎﻭﺩﺕ ﻋﻠﻴﻪ ﺍﻛﺜﺮ ﻣﻦ ﻣﺮﺓ ﻣﺎﺭﺩﺵ ﻟﻌﻨﺪ ﻣﺎﺻﻜﺮ ﺗﻠﻴﻔﻮﻧﻪ ﻣﺮﺓ ﻭﺣﺪﻩ .
ﻣﺠﺪﻭﻟﻴﻦ : ﺣﻤﺎﺭﺓ ﺣﻤﺎﺍﺍﺍﺭﺓ ﺣﻤﺎﺍﺍﺍﺭﺓ ... ﺣﺪﻓﺖ ﺍﻟﺘﻠﻴﻔﻮﻥ ﻭﺩﻣﻮﻋﻬﺎ ﻧﺰﻟﻮﺍ ....
🍁 ﻣﻦ ﺟﻬﺔ ﺗﺎﻧﻴﻪ ...
ﻛﺎﻥ ﺍﻟﻌﺎﺷﻖ ﺍﻟﻤﺘﻤﺮﺩ ...
ﻣﻘﻌﻤﺰ ﺑﺮﻭﺣﻪ ﻓﻲ ﻋﺰ ﺍﻟﺼﻘﻊ ﺑﺮﺍ ...
ﻧﺎﺭﻩ ﻭﺍﻟﻌﻪ ﻣﺶ ﺣﺎﺱ ﺑﺸﻲ ﻏﻴﺮ ﻧﺎﺭﻩ ﺍﻟﻠﻲ ﺗﺤﺮﻕ ﻓﻴﻪ ..
ﻳﺠﺎﻫﺪ ﻓﻲ ﻧﻔﺴﻪ ﺑﺶ ﻣﺎﻳﻜﻠﻤﻬﺎﺵ ...
ﻣﺸﻜﻠﺔ ﺭﻣﺰﻱ ... ﺍﻟﻌﻨﺎﺩ ﻭﺗﺴﻜﻴﺮ ﺍﻟﺮﺍﺱ .. ﻭﺍﻟﻐﻴﺮﺓ ﻋﻨﺪﻩ ﻗﻮﻳﻪ ...
ﻭﻛﺎﻥ ﻗﺎﻝ ﻛﻠﻤﻪ ﻟﻮ ﻳﻤﻮﺕ ﻣﺎﻳﻮﻟﻲ ﻓﻴﻬﺎ ...
ﻫﺪﻳﻜﺎ ﺍﻟﻠﻴﻠﻪ ﻣﺮﺕ ﻋﻠﻴﻪ ﺣﺮﻓﻪ ﺑﻜﻞ ﻣﻌﻨﻰ ﺍﻟﻜﻠﻤﻪ ..
ﺑﺲ ﻛﺎﻥ ﻓﻲ ﺭﻗﻢ ﻏﺮﻳﺐ ﻳﺘﺼﻞ ﺑﻴﻪ .. ﻣﺎﺑﺎﺵ ﻳﺮﺩ ...
ﻃﻴﺮﻫﺎﻟﻪ ﻣﻦ ﻛﺜﺮ ﺍﻹﺗﺼﺎﻻﺕ ﺻﻜﺮ ﺗﻠﻴﻔﻮﻧﻪ ﻣﺮﺓ ﻭﺣﺪﻩ ...
🍁 ﻭﻣﻌﺸﻮﻗﺘﻪ
ﻛﻤﻠﺖ ﻟﻴﻠﻬﺎ ﺑﻜﻲ ... ﺣﺎﺳﻪ ﻫﺎﻟﻤﺮﺓ ﺭﻣﺰﻱ ﻣﺴﺘﺤﻴﻞ ﻳﻠﻴﻦ ﻣﻌﺎﻫﺎ ﻣﻬﻤﺎ ﺩﻳﺮ ... ﻭﺧﺎﻳﻔﻪ ﺑﺘﻤﻮﺕ ﻣﻦ ﺍﻟﻔﺮﺍﻕ ﻷﻧﻬﺎ ﺗﻌﺮﻑ ﺭﻣﺰﻱ ﻛﻮﻳﺲ ﻓﻲ ﺣﺎﺟﺎﺕ ﺯﻱ ﻫﺎﺩﻱ ﻣﺎﻳﺮﺣﻤﺶ ...
💕💕💕💕💕💕
ﺑﺲ ﻓﻲ ﻣﺼﺮﺍﺗﻪ ﺍﻟﺤﺐ 💖
ﻛﺎﻧﻮﺍ ﻓﻲ ﻋﺸﺎﻕ ﻋﺎﻳﺸﻴﻦ ﺣﺒﻬﻢ ... ﻋﺸﻘﻬﻢ .. ﺷﻮﻗﻬﻢ ﻭﻣﺸﺎﻋﺮﻫﻢ ..
ﻭﻛﻞ ﻭﺍﺣﺪ ﻓﻴﻬﻢ ﺑﻴﻤﻮﺕ ﻉ ﺍﻟﺘﺎﻧﻲ ﻭﻣﺶ ﻗﺎﺩﺭ ﻳﺨﻠﻴﻪ 💕💕
ﺭﻳﺘﻮﺍ ﻟﻤﺎ ﻣﻠﺤﻢ ﺑﺮﻛﺎﺕ ﻳﻘﻮﻝ ..
ﻭﺍﻧﺎ ﻭﺍﻧﺖ ﻳﺎﻧﻮﺭ ﺍﻟﻌﻴﻦ ..
ﺭﻭﺡ ﻭﺳﺎﻛﻨﻪ ﺑﺠﺴﺪﻳﻦ ...
ﻫﻮ ﻫﺪﺍ ﺍﻟﻠﻲ ﻧﻘﺼﺪﻩ ....
ﺍﻟﻠﻲ ﻋﺎﻳﺸﻴﻨﻪ ﻋﻤﺎﺭ ﻭﺩﻟﻮﻟﺘﻪ 💕💕💕💕
💓💓💓💓💓💓💓💓💓💓💓💓💓💓💓💓
ﺗﺎﻧﻲ ﻳﻮﻡ ﺍﻟﺼﺒﺢ ...
ﺍﻟﺴﺎﻋﻪ 10 ﺻﺒﺎﺣﺎ ...
ﺧﻼﺹ ﻋﻤﺎﺭ ..
ﻋﻤﺎﺭ : ﺍﺧﺮ ﺑﻮﺳﻪ ﻗﺒﻞ ﻧﻄﻠﻌﻮﺍ 💓..
ﺿﺤﻜﺖ ﺩﻻﻝ : ﺑﺎﻫﻲ ...
ﻭﺑﺎﺳﻬﺎ ...💓 ﻭﻛﺎﻟﻌﺎﺩﺓ ﻣﺎﻳﻔﻜﻬﺎ ﻛﺎﻥ ﺑﺎﻟﺴﻴﻒ ..💓
ﺩﻻﻝ ﺑﻀﺤﻜﻪ : ﻫﻴﺎ ﺧﻼﺹ ﻻﺯﻡ ﻧﻄﻠﻌﻮﺍ 💓
ﻋﻤﺎﺭ ﺗﻨﻬﺪ ﻭﻗﺎﻝ : ﻭﺍﻟﻠﻪ ﻣﺎﻛﻨﺖ ﻫﻜﻲ ﻭﺍﻟﻠﻪ .. ﺷﻦ ﺩﺭﺗﻲ ﻓﻴﺎ ﻗﻮﻟﻴﻠﻲ 💓💓💓
ﺩﻻﻝ ﺑﻀﺤﻜﻪ : ﻭﺍﻟﻠﻪ ﺍﻟﻌﻈﻴﻢ ﻣﺎﺩﺭﺕ ﺣﺎﺟﻪ ﺣﺘﻰ ﺯﻭﺍﺟﻲ ﻣﻨﻚ ﺑﻤﺪﺍﻫﻤﻪ ..
ﻋﻤﺎﺭ ﻟﻒ ﻋﻠﻰ ﺭﻗﺒﺘﻬﺎ ﺫﺭﺍﻋﻪ : ﻭﻧﺪﻳﺮ ﺍﻛﺒﺮ ﻫﻜﻲ ﺑﺶ ﺗﻜﻮﻧﻲ ﺟﻨﺒﻲ .. ﺍﻧﺘﻲ ﺭﺍﺍﺍﻙ ﺟﻨﻴﺘﻨﻲ ﻓﺎﻫﻤﻪ .. ﺩﺭﺗﻲ ﻓﻴﺎ ﺍﻟﻠﻲ ﻣﺎﻳﻨﺪﺍﺭ ..
ﺩﻻﻝ : ﻫﻬﻬﻬﻬﻬﻪ ﺑﺎﻫﻲ ﺭﻗﺒﺘﻲ ﺍﻧﺴﻜﺮﺕ ..
ﺿﺤﻚ ﻭﺣﻀﻨﻬﺎ ﺑﻘﻮﺓ : ﻧﻌﺸﻘﻚ ﻧﻌﺸﻘﻚ 💓💓💓💓
ﺩﻻﻝ ﻣﺒﺘﺴﻤﻪ ﻭﻗﻠﺒﻬﺎ ﻳﺪﻕ ﺑﻘﻮﺓ ...💓💓
ﺑﻌﺪ ﻋﻤﺎﺭ ﻭﺗﻨﻬﺪ : ﻫﻲ ﺑﺎﻟﻠﻪ ﺍﻃﻠﻌﻲ 💓
ﺩﻻﻝ : ﻫﻬﻬﻬﻬﻪ ... ﻓﺘﺤﺖ ﺍﻟﺒﺎﺏ ﻭﻃﻠﻌﺖ .. ﻭﻋﻤﺎﺭ ﻭﺯﻉ ﻧﻈﺮﻩ ﻉ ﺍﻟﻐﺮﻓﻪ ﻭﺍﺑﺘﺴﻢ ... ﺑﻌﺪﻳﻦ ﻃﻠﻊ ﻭﺳﻜﺮ ﺍﻟﺒﺎﺏ ...
🍁🍁🍁🍁🍁
ﻃﺮﺍﺑﻠﺲ ...💓
ﻓﻲ ﺍﻟﻄﺮﻳﻖ ..
ﺳﻤﻴﺮﺓ ﺑﻀﺤﻜﻪ : ﻳﻌﻨﻲ ﺿﺮﻭﺭﻱ ﻧﻌﺪﻱ ﻣﻌﺎﻙ ..
ﻋﺮﻭﺑﻪ ﺑﻨﺮﻓﺰﺓ : ﺍﻧﺘﻲ ﺍﻟﻠﻲ ﺣﻄﻴﺘﻴﻨﻲ ﺑﻬﻴﻚ ﻣﻮﻗﻒ ﺑﺪﻙ ﺗﺮﻭﺣﻲ ﻣﻌﻲ ﻏﺼﺐ ﻋﻨﻚ ..
ﺿﺤﻜﺖ ﺳﻤﻴﺮﺓ ...
ﻋﺮﻭﺑﻪ ﺷﺒﺤﺘﻠﻬﺎ ﺑﻨﺺ ﻋﻴﻦ .. ﺑﻌﺪﻳﻦ ﺭﻛﺰﺕ ﻓﻲ ﺍﻟﻄﺮﻳﻖ ...
ﻟﻌﻨﺪ ﻣﺎﻭﺻﻠﻮﺍ ﻓﻲ ﻣﻜﺎﻥ ﺍﻟﻮﺭﺷﻪ ..
ﻋﺮﻭﺑﻪ ﺗﺸﻮﻑ ﻟﻠﻴﺎﻓﻄﻪ : ﻫﺎﻱ ﻫﻲ ﻣﺎﻫﻴﻚ ﻭﺭﺷﻪ ﺍﺑﻨﺎﺀ ﺍﻟﺰﻟﻴﻄﻨﻲ ..
ﺳﻤﻴﺮﺓ ﺑﺈﺑﺘﺴﺎﻣﻪ : ﺍﻳﻪ ...
ﺩﺭﺳﺖ ﻋﺮﻭﺑﻪ ﺣﺪﺍ ﺍﻟﻮﺭﺷﻪ ... ﺧﺪﺕ ﻧﻔﺲ ﻭﻓﺘﺤﺖ ﺍﻟﺒﺎﺏ ﻭﻧﺰﻟﺖ ...
ﻭﻫﻲ ﻣﺎﺷﻴﻪ ﺗﺸﻮﻑ ﻟﻠﻮﺭﺷﻪ ﻛﻴﻒ ﻛﺒﻴﺮﺓ ... ﻭﻓﻴﻬﺎ ﺣﺘﻰ ﻟﻮﺍﺩﺟﻮ ..
ﻗﺪﻣﺖ ﺍﻛﺜﺮ ﻭﻫﻲ ﻣﻨﺤﺮﺟﻪ ﻭﻣﺮﺗﺒﻜﻪ ﻓﻲ ﻧﻔﺲ ﺍﻟﻮﻗﺖ ...
ﻟﻤﺤﺖ ﺳﻴﺎﺭﺗﻬﺎ ...
ﺟﺎﻫﺎ ﻭﺍﺣﺪ ....
: ﺗﻔﻀﻠﻲ ﻳﺎﺍﺑﻠﻪ ..
ﻋﺮﻭﺑﻪ : ﺍﺣﻤﻢ .. ﺍﻟﺴﻴﺪ ﺣﻤﺪﻱ ﻣﻮﺟﻮﺩ ..
: ﺍﻳﻪ ﺗﺒﻲ ﻧﺎﺩﻳﻪ ..
ﻋﺮﻭﺑﻪ : ﻭﺍﻟﻠﻪ ﻳﺎﺭﻳﺖ ..
ﻣﺸﻲ ﺍﻟﺸﺎﺏ ﻃﻮﻝ ...
ﻭﻫﻲ ﺍﻟﺘﻔﺘﺖ ﻟﻠﺴﻴﺎﺭﺓ ﻟﻘﺖ ﺳﻤﻴﺮﺓ ﺗﺘﻜﻠﻢ ﺑﺎﻟﺘﻠﻴﻔﻮﻥ ...
ﺷﻮﻳﻪ ﻭﺟﺎﻫﺎ ﺣﻤﺪﻱ ...
ﺣﻤﺪﻱ : ﺻﺒﺎﺡ ﺍﻟﺨﻴﺮ ..
ﺍﻟﺘﻔﺘﺖ : ﺻﺒﺎﺡ ﺍﻟﻨﻮﺭ ..
ﺣﻤﺪﻱ : ﻭﺍﻟﻠﻪ ﻟﻮ ﺍﻧﻚ ﺧﻠﻴﺘﻴﻬﺎ ﻟﻐﺪﻭﺓ ﺑﺪﺍﻝ ﻣﺎﻧﺘﻲ ﺟﺎﻳﻪ ﻣﻦ ﺻﺒﺢ ﺭﺑﻲ ﻓﻨﻬﺎﺭ ﺍﻟﺠﻤﻌﻪ ..
ﻋﺮﻭﺑﻪ : ﺍﻟﺴﻴﺎﺭﺓ ﺍﻣﺎﻧﻪ ﻣﺎﺑﺌﺪﺭ ﺧﻠﻴﺎ ﻣﻌﻲ ﻛﺜﻴﺮ .. ﻭﺍﺫﺍ ﺳﻴﺎﺭﺗﻲ ﺻﻠﺤﺘﻪ ﻭﺟﻬﺰﺕ ﺍﺑﺪﺍ ﻣﺎﻓﻲ ﺍﻟﻮ ﻟﺰﻭﻡ ﺍﻧﻮ ﺍﺿﻞ ﺳﻴﺎﺭﺗﻚ ﻣﻌﻲ ﺍﻭ ﺳﻴﺎﺭﺗﻲ ﻣﻌﻚ ..
ﺣﻤﺪﻱ ﺿﺤﻚ ﻭﻣﺴﺢ ﻉ ﻟﺤﻴﺘﻪ ﺑﻌﺪ ﻭﺯﻉ ﻧﻈﺮﻩ ﻉ ﺍﻟﻤﻜﺎﻥ .. ﺷﺒﺢ ﻟﻌﻴﻮﻧﻬﺎ ﻭﻗﺎﻝ : ﺗﻤﺎﻡ ..
ﻋﺮﻭﺑﻪ ﻟﻤﺎ ﺟﻮ ﻋﻴﻮﻧﻪ ﻓﻌﻴﻮﻧﻬﺎ ... ﻭﺷﺎﻓﺖ ﻟﻮﻧﻬﻢ ...
ﺟﻴﺖ ﺑﻴﻦ ﻋﻴﻮﻧﻬﺎ ﻋﻴﻮﻥ ﺗﺎﻧﻴﻪ ... ﻟﻬﺎﻟﺤﻈﻪ ﺗﺄﺛﻴﺮﻫﻢ ﻋﻠﻴﻬﺎ ﻫﻮ ﻫﻮ ..
ﻣﻨﻴﻦ ﺧﻄﺮ ﻋﻠﻴﻬﺎ ..
ﺧﻄﺮ ﻋﻠﻴﻬﺎ ﺍﺧﺮ ﻣﺮﺓ ﺭﺍﺗﻪ ﻓﻴﻬﺎ ...
ﻗﻠﺒﻬﺎ ﺍﻧﻘﺴﻢ ..💔
ﺩﻣﻮﻋﻬﺎ ﻋﺒﻮﺍ ﻋﻴﻮﻧﻬﺎ .. ﻧﺰﻟﺘﻬﻢ ﻃﻮﻝ ..
ﻫﻮ ﻭﺟﻬﻪ ﻭﻻﺍﺣﻤﺮ ﻣﻦ ﻧﻈﺮﺗﻬﺎ ... ﺗﻨﺤﻨﺢ ﻭﻟﻒ ﻭﻣﺸﻲ ﻳﺠﻴﺒﻠﻬﺎ ﺳﻴﺎﺭﺗﻬﺎ ...
ﻭﻫﻲ ﻗﺎﻋﺪﻩ ﺗﺠﺎﻫﺪ ﻓﺪﻣﻌﺘﻬﺎ ...
ﺷﻮﻳﻪ ﻭﺟﺎﻫﺎ ﺑﺎﻟﺴﻴﺎﺭﺓ ...
ﻧﺰﻟﺖ ﺻﺎﺣﺒﺘﻬﺎ ﻣﻦ ﺍﻟﺴﻴﺎﺭﺓ ﻣﺘﺎﻉ ﺣﻤﺪﻱ ...
ﻭﺣﻤﺪﻱ ﻧﺰﻝ ﻣﻦ ﺳﻴﺎﺭﺓ ﻋﺮﻭﺑﻪ ..
ﺟﺎﻫﺎ ﻭﻣﺪﻟﻬﺎ ﺍﻟﻤﻔﺘﺎﺡ .. ﻭﻫﻲ ﻣﺪﺗﻠﻪ ﻣﻔﺘﺎﺣﻪ ...
ﺧﺪﺍﻩ ﻣﻨﻬﺎ ﻭﻫﻮ ﻳﺸﻮﻓﻠﻬﺎ .. ﻟﻜﻦ ﻫﻲ ﺧﺪﺕ ﺍﻟﻤﻔﺘﺎﺡ ﻣﻨﻪ ﻭﻋﻴﻮﻧﻬﺎ ﻓﻲ ﺍﻟﻤﻔﺘﺎﺡ ...
ﻋﺮﻭﺑﻪ : ﻣﺸﻜﻮﺭ ...
ﺣﻤﺪﻱ ﺍﺑﺘﺴﻢ : ﺍﻟﻌﻔﻮ ...
ﺳﻤﻴﺮﺓ : ﺑﺎﺭﻙ ﺍﻟﻠﻪ ﻓﻴﻚ ..
ﺣﻤﺪﻱ ﻭﻫﻮ ﻳﺸﻮﻑ ﻟﻌﺮﻭﺑﻪ : ﻭﻓﻴﻚ ﺑﺎﺭﻙ ﺍﻟﻠﻪ ..
ﻋﺮﻭﺑﻪ ﻣﺸﺖ ﻃﻮﻝ ﻟﻠﺴﻴﺎﺭﺓ ..
ﺳﻤﻴﺮﺓ ﺍﺑﺘﺴﻤﺖ ﺑﺮﺑﻜﻪ : ﺳﻼﻡ .. ﻭﻣﺸﺖ ﻟﺤﻘﺖ ﻋﺮﻭﺑﻪ .
ﺭﻛﺒﻮﺍ ﺍﻟﺴﻴﺎﺭﺓ ...
ﻭﺗﺤﺮﻛﻮﺍ ﻃﻮﻝ ...
ﻭﻋﻴﻮﻥ ﺣﻤﺪﻱ ﻣﻌﺎﻫﻢ ... ﺗﻨﻬﺪ ... ﺑﻌﺪﻳﻦ ﺍﺑﺘﺴﻢ ..
ﻭﻭﻟﻰ ﻟﻮﺭﺷﺘﻪ ...
🍁🍁🍁🍁🍁🍁🍁
ﻧﺎﺱ ﻭﺍﺟﺪﻩ ﺟﻮ ﺍﻣﺲ ﻭﺳﺄﻟﻮﺍ ﻋﻨﻚ ..
ﻋﻤﺎﺭ : ﻫﻮ ﻫﺎﻟﻴﻮﻡ ﻳﺎﺑﺎﺗﻲ ﻓﻀﻴﺖ ﻓﻴﻪ ﻟﻨﻔﺴﻲ ﺍﺳﻜﺘﺮﺗﻮﻩ ﻋﻠﻴﺎ ﻭﻻﻛﻴﻒ ...
ﻣﺨﺘﺎﺭ : ﻳﺎﻭﺩﻱ ﻣﺎﻗﻠﻨﺎ ﺷﻲ ... ﻟﻜﻦ ﺍﻧﺖ ﻋﺎﺭﻑ ﺍﻥ ﻫﺪﻱ ﺣﺎﻟﺔ ﻭﻓﺎﺓ ﻭﺍﻟﻠﻲ ﻣﺎﺕ ﻋﻤﻚ ﻭﻧﺎﺱ ﻭﺍﺟﺪﻩ ﻣﻬﻤﻪ ﺗﺠﻲ ﻭﻧﺎﺱ ﻣﻦ ﻣﻌﺎﺭﻓﻚ ... ﻏﻠﻂ ﻳﺠﻮﺍ ﻣﺎﻳﻠﻘﻮﻙ ..
ﻋﻤﺎﺭ ﻫﺰ ﺭﺍﺳﻪ ﺑﺈﻳﺠﺎﺏ ﻭ ﻣﻼﻣﺢ ﺍﻟﻐﻀﺐ ﺑﺎﻳﻨﺎﺕ ﻉ ﻭﺟﻬﻪ ﻭﻣﺎﺑﺎﺵ ﻳﻨﺎﻗﺶ ﺑﻮﻩ ﺍﻛﺜﺮ ﻣﻦ ﻫﻜﻲ ... ﻭﺣﺘﻰ ﻣﺨﺘﺎﺭ ﻣﺎﺑﺎﺵ ﻳﺰﻳﺪ ﺍﻟﻜﻼﻡ ...
ﻫﻮ ﻋﺎﺫﺭ ﻭﻟﺪﻩ ﻋﺮﻳﺲ ﺟﺪﻳﺪ ...
ﻟﻜﻦ ﻓﻲ ﻧﻔﺲ ﺍﻟﻮﻗﺖ ﻓﻲ ﺍﻟﺘﺰﺍﻣﺎﺕ ﺗﺎﻧﻴﻪ ﻓﻲ ﺣﻴﺎﺗﻪ ﺍﻭﻟﻰ ﺑﻮﻗﺘﻪ ﺣﺎﻟﻴﺎ ...
ﺩﺍﺧﻞ ...
ﻛﺎﻣﻠﻪ : ﻟﻮ ﻗﻌﺪﺗﻲ ﻓﺤﻮﺷﻚ ﻳﺎﺑﻨﺘﻲ .
ﺩﻻﻝ : ﺣﺴﻴﺘﻬﺎ ﻏﻠﻂ ﻳﺎﻋﻤﺘﻲ ﻣﺎﺗﺠﻴﺶ ..
ﻛﺎﻣﻠﻪ ﺑﺈﺑﺘﺴﺎﻣﻪ؛ﺑﺎﻫﻲ ﻛﻼﻣﻚ ﺻﺢ .. ﻟﻜﻦ ﺍﻧﺘﻲ ﻋﺮﻭﺱ ﻭﻓﺎﻝ ﻣﺶ ﺑﺎﻫﻲ ﺧﺸﻮﺷﻚ ﻟﻠﻌﺰﻭﺍﺕ ﻭﺍﻧﺘﻲ ﺣﺘﻰ ﺍﻟﺸﻬﺮ ﻣﺎﺗﻤﺘﻴﻪ ..
ﺩﻻﻝ : ﻛﻠﻪ ﻗﻀﺎﺀ ﻭﻗﺪﺭ ﻣﻦ ﺭﺑﻲ ... ﻭﺭﺑﻲ ﻣﺎﻳﺠﻴﺐ ﻛﺎﻥ ﺍﻟﻔﺎﻝ ﺍﻟﺒﺎﻫﻲ ..
ﻛﺎﻣﻠﻪ : ﺧﻄﺮﺗﻲ ﻋﻠﻴﺎ ﺣﻨﺎﻙ ﻓﺎﻃﻤﻪ ..
ﺩﻻﻝ ﺍﺑﺘﺴﻤﺖ ..
ﻛﺎﻣﻠﻪ ﺑﺄﺑﺘﺴﺎﻣﻪ : ﻭﻧﻌﻢ ﺍﻟﻤﺮﺍﺓ ﻭﺍﻟﻠﻪ ..
ﺩﻻﻝ : ﺗﺴﻠﻤﻲ ﻳﺎﻋﻤﺘﻲ ..
ﻓﻲ ﺗﺮﻛﻴﻨﻪ ﺗﺎﻧﻴﻪ ..
ﺍﻣﻴﻨﻪ : ﺍﻣﻲ ﺗﺤﺐ ﺩﻻﻝ ..
ﺳﻠﻴﻤﻪ : ﺍﻟﺒﻨﻴﻪ ﻃﻴﺒﻪ ﻭﻣﺆﺩﺑﻪ ﻣﺎﺷﺎﺀ ﺍﻟﻠﻪ .. ﻣﺶ ﻛﻴﻒ ﺍﻟﻠﻔﻌﻪ ﻫﺪﻳﻚ ﻏﻴﺮ ﺷﻮﻓﻴﻬﺎ ﻛﻴﻒ ﺗﺸﺒﺤﻠﻬﻢ ..
ﺍﻣﻴﻨﻪ : ﻣﺨﻮﻓﺘﻨﻲ ﻭﺍﺟﺪ ﻳﺎﺳﻠﻴﻤﻪ ..
ﺳﻠﻴﻤﻪ : ﻣﺎﻋﻨﺪﻫﺎ ﻣﺎﺩﻳﺮﻳﻠﻬﻢ ...
ﺍﻣﻴﻨﻪ : ﺭﺑﻲ ﻳﺒﻌﺪ ﻋﻠﻴﻬﻢ ﺷﺮﻫﺎ ..
ﻧﻮﺭﻳﻪ : ﺍﻟﺤﻤﺪ ﻟﻠﻪ ﻉ ﺳﻼﻣﺔ ﻋﻤﺎﺭ ﻳﺎﺩﻻﻝ ..
ﺩﻻﻝ ﺷﺒﺤﺘﻠﻬﺎ : ﺍﻟﻠﻪ ﻳﺴﻠﻤﻚ ..
ﻏﺎﺩﺓ : ﻗﺪﺍﺵ ﻭﺟﻌﺘﻴﻨﻲ ﺍﻟﺤﻖ .. ﻛﻞ ﻣﺮﺓ ﺣﺎﺟﻪ ... ﺍﻥ ﺷﺎﺀ ﺍﻟﻠﻪ ﻋﻘﺎﺑﻬﺎ ﺧﻴﺮ ..
ﻫﻨﺪﺍ ﺍﺑﺘﺴﻤﺖ ﺑﺮﻓﻌﺔ ﺣﺎﺟﺐ ..
ﺩﻻﻝ : ﺍﻟﺤﻤﺪ ﻟﻠﻪ ﻉ ﻛﻞ ﺣﺎﻝ .. ﻗﻀﺎﺀ ﻭﻗﺪﺭ ... ﺍﻟﻤﻬﻢ ﺍﻟﻬﻨﻲ ﻭﺍﻟﺮﺍﺣﻪ ..
ﺣﻤﻮﺍﺗﻬﺎ ﺍﺑﺘﺴﻤﻮﺍ ...
ﻭﻫﻨﺪﺍ ﻭﻏﺎﺩﺓ ﻣﺎﺗﻮﺍ ﻣﻦ ﻏﻴﻈﻬﻢ ..
ﻧﻮﺭﻳﻪ ﺷﺒﺤﺖ ﻟﺒﻨﺘﻬﺎ ﺑﺮﻓﻌﺔ ﺣﺎﺟﺐ ...
ﺭﻛﺰﺕ ﻋﻠﻲ ﻧﻈﺮﺗﻬﺎ ﻭﺧﺎﻓﺖ ﻉ ﺩﻻﻝ ...
ﺍﻳﻪ ﺧﺎﻓﺖ ﻋﻠﻴﻬﺎ ﻷﻧﻬﺎ ﺗﻌﺮﻑ ﺑﻨﺘﻬﺎ ﻛﻮﻳﺲ 🍃...
🍁🍁🍁🍁🍁🍁🍁🍁
ﺍﻟﺴﺎﻋﻪ 3:00 ﺑﻌﺪ ﺍﻟﻈﻬﺮ ...
ﻣﻨﻴﻦ ﺗﻌﺮﻓﻬﻢ ﻭﻳﻌﺮﻓﻮﻫﺎ ...
ﺯﻳﻨﺐ : ﺑﻨﻴﺔ ﺻﺎﺣﺒﺘﻬﺎ ﺩﻟﺘﻬﻢ ﻋﻠﻴﻬﺎ ..
" ﺍﻟﻜﺬﺑﻪ ﺍﻷﺷﻬﺮ ﻭﺍﻷﻛﺜﺮ ﺭﻭﺍﺟﺎ "😁
ﺧﻴﺮﻱ ﻫﺰ ﺭﺍﺳﻪ ﺑﺈﻳﺠﺎﺏ ﻭﻫﻮ ﻳﺸﺒﺢ ﻟﻠﺘﻠﻔﺰﻳﻮﻥ ...
ﺯﻳﻨﺐ : ﺷﻦ ﻧﻘﻮﻟﻠﻬﻢ ..
ﺧﻴﺮﻱ : ﻗﻮﻟﻴﻠﻬﻢ ﻳﺘﻔﻀﻠﻮﺍ ... ﻣﺎﺩﺍﻡ ﺭﺩﺕ ﺍﻻﻭﻟﻴﻦ ﻉ ﺧﺎﻃﺮ ﻣﺎﺗﻌﺮﻓﻬﻤﺶ .. ﻣﺮﺍﺕ ﻳﺼﻴﺮﻟﻬﺎ ﻣﻦ ﺍﻟﻠﻲ ﺗﻌﺮﻓﻬﻢ ..
ﺯﻳﻨﺐ ﺷﺒﺤﺘﻠﻪ ﺑﺘﻔﻨﻴﺼﺔ ﺣﺴﺎﺗﻪ ﻳﻠﻘﺢ ...
ﻗﻌﺪﺕ ﺗﻔﻜﺮ ﻭﻫﺪﺍ ﻭﻳﻦ ﺯﺑﻄﺖ ﺍﻟﻘﺼﻪ .. ﺷﺒﺤﺖ ﻟﻠﺘﻠﻔﺰﻳﻮﻥ ﻭﻫﻲ ﻣﺼﺪﻭﻣﻪ .. ﻭﺧﻴﺮﻱ ﻳﺸﻮﻓﻠﻬﺎ ﺑﺮﺑﻊ ﻋﻴﻦ ..😒
ﺩﺍﺧﻞ ...
ﺭﺍﻧﻴﺎ ﺭﺍﻗﺪﺓ ﻭﻣﺘﻐﻄﻴﻪ ..
ﻭﺭﺑﺎﺏ ﺗﻔﻜﺮ ﻭﻣﺘﻮﺗﺮﺓ ﻫﻠﺒﻪ ...
ﺷﻮﻳﻪ ﻭﺭﻥ ﺗﻠﻴﻔﻮﻥ ﺭﺍﻧﻴﺎ ..
ﻓﺰﺕ ﻃﻠﻌﺎﺗﻪ ﻣﻦ ﺗﺤﺖ ﺍﻟﻤﺨﺪﻩ ﻟﻘﺖ ﺍﻟﻤﺘﺼﻞ ﺩﻻﻝ ..
ﺭﺩﺕ ﻃﻮﻝ ﻭﻫﻲ ﺗﺤﺖ ﺍﻟﺒﻄﺎﻧﻴﻪ ..
ﺭﺍﻧﻴﺎ ﺑﺼﻮﺕ ﻣﺒﺤﻮﺡ : ﻫﻼ ﺩﻟﻮﻝ ..
ﺩﻻﻝ : ﺣﺒﻴﺒﺘﻲ ﺭﺍﻧﻴﺎ ﻳﺎﻋﻤﺮﻱ .. ﺷﻦ ﺣﺎﻟﻚ ..
ﺭﺍﻧﻴﺎ : ﺯﻱ ﺍﻟﺰﻓﺖ ...
ﺩﻻﻝ : ﻣﺎﻳﺮﺩﺵ ..
ﺭﺍﻧﻴﺎ : ﻻ ..
ﺩﻻﻝ ﺑﻐﻀﺐ : ﺍﺳﻤﻌﻲ ﻓﻮﺗﻴﻪ ﻣﺮﺓ ﻭﺣﺪﻩ ﺗﻌﺮﻓﻲ ﺷﻦ ﺍﻟﻠﻲ ﺧﻼﻩ ﻳﻮﻟﻲ ﻫﻜﻲ .. ﻃﻴﺒﺘﻚ ﺍﻟﺰﺍﻳﺪﺓ ﻭﺍﻧﻚ ﺩﻳﻤﺎ ﺗﻔﻮﺗﻴﻠﻪ ﻭﻛﺎﻧﺖ ﺷﻌﻔﺘﻴﻪ ﻣﺮﺓ ﻭﺍﺗﻨﻴﻦ ﺭﻩ ﻣﺎﺯﺍﺩﺵ ﺗﻔﺮﻋﻦ ..
ﻋﻤﺎﺭ ﻃﻠﻊ ﻣﻦ ﺍﻟﺪﺍﺭ ﻭﻣﺎﺷﻲ ﻟﻠﻜﻮﺟﻴﻨﻪ ﻭﻗﻒ ﻟﻤﺎ ﺳﻤﻌﻬﺎ ﺗﺘﻜﻠﻢ ..
ﻭﻫﻲ ﺍﻃﻠﻊ ﻓﻲ ﺣﺎﺟﺎﺕ ﻣﻦ ﺍﻟﺘﻼﺟﻪ ..
ﺩﻻﻝ : ﻛﻠﻪ ﺍﻻ ﻛﺮﺍﻣﺘﻚ ﻣﺎﺣﺪ ﻳﺴﻮﺍﻫﺎ ﻳﺎﺭﺍﻧﻴﺎ .. ﺍﺳﻤﻌﻲ ﻣﻨﻲ ﻭﺩﻳﺮﻱ ﺍﻟﻠﻲ ﻗﺘﻠﻚ ﻋﻠﻴﻪ .. ﻭﺍﻟﻠﻪ ﻭﺍﻟﻠﻪ ﻟﻮ ﺍﻧﻲ ﻣﻨﻚ ﻭﻋﻤﺎﺭ ﻳﺪﻳﺮﻟﻲ ﻫﻜﻲ ﻣﻌﺎﺵ ﻣﺎﺯﺍﻝ ﻳﺤﻠﻢ ﺑﻴﺎ ﺣﺘﻰ ﺍﻟﺤﻠﻢ ...
ﺭﻓﻊ ﺣﺎﺟﺒﻪ ﺍﻻﻳﺴﺎﺭ ...
ﺩﻻﻝ : ﺧﻼﺹ ﻳﺎﻋﻤﺮﻱ .. ﺗﻤﺎﻡ ﺣﺒﻴﺒﺘﻲ .. ﻓﻜﺮﻱ ﻓﻨﻔﺴﻚ ﺑﺲ ﻭﺍﻟﻠﻪ ﻣﺎﻧﺎﻓﻌﻚ ﻭﺍﺣﺪ .. ﺍﻳﻪ ......... ﺍﻳﻪ ﻭﺍﻟﻠﻪ ﻓﺮﺣﺘﻠﻬﺎ ﻫﻠﺒﻪ ..
ﺍﺑﺘﺴﻢ ﻭﻫﻮ ﻳﺮﻛﺰ ﻉ ﻣﻼﻣﺤﻬﺎ ﻛﻴﻒ ﺗﺒﺪﻟﺖ ﻣﻦ ﺍﻟﻐﻀﺐ ﻟﻠﻔﺮﺡ ..
ﺩﻻﻝ : ﺭﺑﻲ ﻳﺘﻤﻤﻠﻬﺎ ﻉ ﺧﻴﺮ .... ﻻﻻ ﻣﺎﻧﻘﺪﺭﺵ ﺗﻌﺮﻓﻲ .. ﻋﻢ ﺭﺍﺟﻠﻲ ﻭﺍﻗﻒ ﺍﻟﻤﺘﻮﻓﻲ ....... ﻫﻬﻬﻬﻬﻬﻬﻪ .. ﺍﻳﻪ ﺭﺍﺟﻠﻲ ﻣﺎﻻ ﺷﻨﻮ ..... ﻫﻬﻬﻬﻬﻬﻬﻬﻬﻪ .... ﻻﻻ ﻓﻲ ﺍﻟﺪﺍﺭ ﻫﻮ ﻭﺍﻧﻲ ﻓﺎﻟﻜﻮﺟﻴﻨﻪ ........... ﺗﻨﻬﺪﺕ ..... ﺷﻦ ﺑﻨﻘﻮﻟﻚ ﻳﺎﺭﻧﻮﺷﻪ .. ﻣﺶ ﻓﺎﻫﻤﻪ ﻣﺶ ﻋﺎﺭﻓﻪ ﻛﻴﻒ ﻧﻮﺻﻔﻠﻚ .. ﺑﺲ ﺗﺼﺪﻗﻴﻨﻲ ﻟﻮ ﻗﺘﻠﻚ .. ﻓﻲ ﻓﺪﺍﺧﻠﻲ ﻟﻴﻪ ﺷﻌﻮﺭ ﺣﻠﻮﻭﻭﻭﻭ ﻭﻳﻬﺒﻞ ...
ﻋﻤﺎﺭ .💓💓💓💓💓💓💓
ﺩﻻﻝ : ﻫﻮ ﻓﺮﺽ ﻋﻠﻴﺎ ﻛﻞ ﺷﻲ ... ﺣﺘﻰ ﻣﺤﺒﺘﻪ ﻳﺎﺭﻧﻮﺷﻪ .... ﻫﻬﻬﻬﻬﻬﻬﻪ ... ﻣﺎﺗﻘﻮﻟﻴﺶ ﻫﻜﻲ ﻣﺶ ﺑﺎﻟﻤﺪﻩ ﻫﻲ ... ﻭﺍﻟﻠﻪ ﻳﺎﺭﻧﻮﺷﻪ ﻟﻮ ﻣﻬﻤﺎ ﻧﻮﺻﻔﻠﻚ ﻋﻤﺎﺭ ﺣﺘﻘﻮﻟﻲ ﺗﺒﺎﻟﻎ .. ﺑﺲ ﺣﻨﺨﺘﺼﺮﻫﺎ ﺑﺲ ﻓﻲ ﺟﻤﻠﻪ .. ﻣﺎﻓﻴﺶ ﻭﺣﺪﻩ ﺗﻌﺎﺷﺮ ﺭﺍﺟﻞ ﺯﻱ ﻋﻤﺎﺭ ﻭﻣﺎﻃﻴﺤﺶ ﻓﺤﺒﻪ 💖.
ﻫﻮﻳﺴﻤﻊ ﻭﻗﻠﺒﻬﺎ ﻓﻲ ...💓💓💓💓💓💓100000
ﺩﻻﻝ : ﺗﺴﻠﻤﻲ ﻏﻼﻱ 💖 ﻭﺭﺑﻲ ﻳﻬﺪﻱ ﻫﺪﺍﻛﺎ ﺍﻟﻤﻨﺠﻮﻩ .... ﻫﻬﻬﻬﻬﻪ ... ﺗﻤﺎﻡ ... ﺗﻤﺎﻡ .... ﺳﻠﻤﻲ ﻉ ﺧﺎﻟﺘﻲ ﻭﺭﺑﺎﺏ ... ﻳﻠﻼ ﺑﺎﻳﺎﺕ .... ﺑﺎﻱ ... ﺻﻜﺮﺕ ... ﺗﻨﻬﺪﺕ ﻭﻧﺎﺿﺖ ﺗﻜﻤﻞ ﺑﺎﻗﻲ ﺣﻮﺳﻪ ﺍﻟﻜﻴﻜﻪ ...
ﺑﺲ ﺗﻜﺘﻔﺖ ﻓﻲ ﻣﻜﺎﻧﻬﺎ 💓💓💓..
ﺗﺴﻤﻊ ﻓﻲ ﻭﻫﻮ ﻳﻬﻤﺲ ﻭﻳﻘﻮﻝ : ﺑﺎﺧﻠﻪ ﻋﻠﻴﺎ ﺑﺎﻟﻜﻼﻡ ﺍﻟﺤﻠﻮ ﻭﺍﻧﻲ ﻧﺴﻤﻌﻠﻚ ﻓﻴﻪ ﺍﺷﻌﺎﺭ 💓
ﺩﻻﻝ : ﺑﻨﺪﻳﺮ ﺩﻭﻧﺎﺕ ..💓💓💓
ﻋﻤﺎﺭ ﻏﻤﺾ ﻋﻴﻮﻧﻪ ﺑﺸﺪﺓ ﻭﻗﻌﺪ ﻳﻀﺤﻚ : ﺍﺍﺍﺥ ﻳﺎﺭﺑﻲ ﻛﻴﻒ ﻧﺪﻳﺮ ﻣﻌﺎﻩ ﺩﻟﻨﻲ ... ﻋﺮﻓﻨﻲ ..
ﺩﻻﻝ ﺗﻀﺤﻚ ﻭﺧﻼﺹ ..
ﻋﻤﺎﺭ ﺗﻨﻬﺪ ﻭﻗﺎﻝ : ﺑﺎﻫﻲ ... ﺍﻟﻤﻬﻢ ﺳﻤﻌﺘﻪ ﻣﻨﻚ ﺣﺘﻰ ﻟﻮ ﻣﺎﻗﻠﺘﻴﻪ ﻭﻋﻴﻨﻚ ﻓﻌﻴﻨﻲ 💕💕..
ﺩﻻﻝ : ﺑﺎﻫﻲ ﺑﻌﺪ ...
ﻋﻤﺎﺭ ﻃﺒﻊ ﺑﻮﺳﻪ ﻉ ﺭﻗﺒﺘﻬﺎ ..💕 ﺑﻌﺪﻳﻦ ﺑﻌﺪ ﻭﻗﻌﻤﺰ ﻉ ﺍﻟﻜﺮﺳﻲ ..
ﻋﻤﺎﺭ : ﺍﻳﻪ ﺷﻦ ﻗﻠﺘﻲ ﺑﺪﻳﺮﻱ ..
ﺩﻻﻝ ﻭﻫﻲ ﺍﻃﻠﻊ ﻓﻲ ﺍﻟﺤﺎﺟﺎﺕ ﻣﻦ ﺍﻟﺪﻭﻻﺏ : ﺩﻭﻧﺎﺕ ..
ﻋﻤﺎﺭ : ﻭﺷﻦ ﺷﻜﻠﻬﻦ ﻫﺪﻳﻦ ...
ﺟﺎﻭﺑﺖ ﻭﻫﻲ ﺗﺤﻂ ﻓﻲ ﺍﻟﺤﺎﺟﺎﺕ ﻉ ﺍﻟﻄﺎﻭﻟﻪ : ﺗﻮ ﻧﺪﻳﺮﻫﺎ ﻭﺗﺸﻮﻑ ﺷﻜﻠﻬﺎ ..
ﻋﻤﺎﺭ ﺑﺈﺑﺘﺴﺎﻣﻪ : ﻧﺮﺍﺟﻮ ..
ﺩﻻﻝ ﻗﻌﺪﺕ ﺗﺘﺤﺮﻙ ﻗﺪﺍﻣﻪ ﺑﺄﺭﻳﺤﻴﻪ .. ﻭﻫﻮ ﻫﺎﻳﻢ ﻓﺘﻔﺎﺻﻴﻞ ﺗﻔﺎﺻﻴﻠﻬﺎ .. ﺑﺤﺮﻛﺎﺗﻬﺎ ﻭﺳﻜﺎﻧﺎﺗﻬﺎ ...
ﻛﻞ ﺷﻲ ﻓﻴﻬﺎ ﻳﻌﺸﻘﻪ ﻛﻞ ﺷﻲ 💓💓....
ﺣﺎﺱ ﺍﻥ ﺷﻌﻮﺭﻩ ﺍﺗﺠﺎﻫﻬﺎ ﺟﺎﺭﻑ ﻫﻠﺒﻪ .. ﻋﻤﺎﺭ ﺑﺎﺩﻱ ﻳﺘﻌﻠﻖ ﺑﻴﻬﺎ ﻟﻴﻦ ﺧﻼﺹ ..💖
ﻣﺎﻫﻮ ﻫﻮ ﻋﺎﺵ ﻣﺮﺍﺣﻞ ﺣﻴﺎﺗﻪ ﺑﻌﻴﺪ ﻋﻦ ﺍﻟﻤﺸﺎﻋﺮ ﻫﺎﺩﻱ ... ﻭﻣﻤﻜﻦ ﻓﻲ ﻣﺮﺣﻠﻪ ﺍﺭﻏﻢ ﺍﺭﻏﺎﻡ ﺍﻧﻪ ﻣﺎﻳﻔﻜﺮﺵ ﻓﻤﺸﺎﻋﺮﻩ ﺑﺴﺒﺐ ﻇﺮﻭﻓﻪ ﺍﻟﻤﻌﺮﻭﻓﻪ ..
ﺑﺲ ﻋﺎﺩ ﻳﻌﻨﻲ ﺍﻟﺤﺐ .. ﻣﺎﻋﻨﺪﺍﺵ ﻛﺒﻴﺮ ﻏﻴﺮ ﺍﻟﻠﻪ ..
ﻭﻛﺎﻥ ﺟﻲ .. ﻻﻳﻌﺮﻑ ﻇﺮﻭﻑ ﻭﻻﻏﻴﺮﻩ .. ﻳﺨﺶ ﻃﻮﻝ ﻭﻫﻮ ﻗﺎﻓﻊ ﺑﺎﺏ ﺍﻟﻘﻠﺐ ﺑﺮﺟﻠﻪ .. ﻭﻳﻘﻌﻤﺰ ﻣﺘﺮﺑﻊ ﻓﻮﺳﻄﻪ ﻭﺍﺧﺪ ﺭﺍﺣﺘﻪ ..
ﻭﻋﺎﺩ ﻛﺎﻥ ﻋﺠﺒﻪ ﺍﻟﻤﻜﺎﻥ .. ﻳﺴﺘﻌﻤﺮﻩ .. ﻟﻴﻦ ﻳﻤﻠﻜﻪ ...
ﻭﻣﻌﺎﺵ ﻳﻄﻠﻊ ﻣﻨﻪ ﺍﻻ ﻓﻠﺤﻈﻪ ﺍﻟﻤﻮﺕ ...🍃💕
ﺩﻻﻝ ﻭﻫﻲ ﺗﺤﻂ ﻓﻲ ﺍﻟﺴﻜﺮ ﻓﻲ ﺍﻟﺼﻮﻧﻴﻪ : ﺗﺤﺐ ﺍﻟﺸﻜﻼﻃﻪ ﻭﻻ ﺍﻟﻌﺴﻞ ...
ﻋﻤﺎﺭ ...💓💓💓💓💓💓
ﺭﻓﻌﺖ ﺷﻌﺮﻫﺎ ﻭﺭﺍ ﻭﺩﻧﻬﺎ ﻭﺷﺒﺤﺘﻠﻪ ﻭﺿﺤﻜﺖ : ﻳﺎﻫﻮﻭ ﻧﻜﻠﻢ ﻓﻴﻚ ﺗﺤﺐ ﺍﻟﺸﻜﻼﻃﻪ ﻭﻻﺍﻟﻌﺴﻞ ..
ﻋﻤﺎﺭ : ﺍﻧﻲ ...💓💓💓.... ﺍﻧﻲ ﻧﺤﺒﻚ ﺍﻧﺘﻲ ﺑﺲ 💓💓💕
ﺩﻻﻝ : ﻫﻬﻬﻬﻬﻬﻬﻬﻪ ...
ﻋﻤﺎﺭ : ﺗﻌﺎﻟﻲ ﻳﺎﻋﻤﺮﻱ ﺍﻧﺘﻲ ﺗﻌﺎﻟﻲ ..💓
ﺍﺑﺘﺴﻤﺖ ﻭﺳﻴﺒﺖ ﺍﺍﻟﻠﻲ ﻓﻴﺪﻫﺎ ﻭﺟﺎﺗﻪ ...
ﻋﻤﺎﺭ : ﻗﻌﻤﺰﻱ ﻫﻨﻰ ".... ﻉ ﺭﺟﻠﻪ .."
ﺿﺤﻜﺖ ﻭﻗﻌﻤﺰﺕ ...
ﻋﻤﺎﺭ ﻭﻫﻮ ﻳﺸﻮﻑ ﻟﻌﻴﻮﻧﻬﺎ ﺑﻌﺸﻖ : ﺍﺣﻀﻨﻴﻨﻲ 💓💓💓
ﺩﻻﻝ ﺍﺑﺘﺴﻤﺖ ﻭﺧﺪﺍﺗﻪ ﻓﺤﻀﻨﻬﺎ ...
ﻭﻫﻮ ﻏﻤﺾ ﻋﻴﻮﻧﻪ ﻣﻌﺎﺵ ﺣﺲ ﺑﺸﻲ ﻏﻴﺮﺑﻴﻬﺎ ﻫﻲ ﺑﺲ 💓💓
💖 ﻣﺎﺗﺴﺘﻐﺮﺑﻮﺵ ...
ﻟﻤﺎﺍﻟﺮﺳﻮﻝ ﻋﻠﻴﻪ ﺍﻟﺼﻼﺓ ﻭﺍﻟﺴﻼﻡ .. ﻓﻲ ﺍﺧﺮ ﻟﺤﻈﺎﺕ ﻋﻤﺮﻩ ﻳﺨﺘﺎﺭ ﻳﻤﻮﺕ ﻋﻨﺪ ﺯﻭﺟﺘﻪ .. ﺣﺒﻴﺒﺘﻪ ﺍﻟﻠﻲ ﺣﺒﻬﺎ ﺑﻘﻮﺓ ...
ﺍﺧﺮ ﻟﺤﻈﻪ ﻟﻴﻪ ﻛﺎﻧﺖ ﻓﺤﻀﻨﻬﺎ ...
ﻧﺤﻜﻲ ﻉ ﺭﺍﺟﻞ ﻻﻗﺒﻠﻪ ﻭﻻﺑﻌﺪﻩ ... ﻭﺍﻟﺤﺐ ﻭﺻﻞ ﻋﻨﺪﻩ ﻷﺳﻤﻰ ﻭﺍﺭﻗﻰ ﺍﻟﻤﺮﺍﺣﻞ ...
ﺍﻋﺮﻓﻮﺍ ﺍﻥ ﺍﻟﻠﻲ ﻳﺤﺐ ﻫﻜﻲ .. ﻫﻮ ﺭﺍﺟﻞ ﺑﻜﻞ ﻣﻌﻨﻰ ﺍﻟﻜﻠﻤﻪ 💖
💕💕💕💕💕💕💕💕💕💕💕💕💕💕💕💕
🍃🍃🍃🍃🍃🍃🍃🍃🍃🍃🍃🍃🍃🍃🍃🍃
ﻳﻤﺮﻭﺍ ﺑﺎﻟﺰﺑﻂ 7 ﺍﻳﺎﻡ ...
🍁 ﻭﺣﻤﻴﺪﻩ ﻭﻏﺎﻟﻴﻪ ﻳﻮﺗﻮﺍ ﻟﺤﻔﻠﻪ ﺍﻟﺒﻴﺎﻥ ... ﻭﻳﻮﻡ ﺍﻟﻔﺎﺗﺤﻪ ...
ﻛﺎﻧﺖ ﻏﺎﻟﻴﻪ ﻣﺨﻠﻴﻪ ﺍﻏﻠﺐ ﺍﻟﺸﻲ ﻋﻠﻴﻬﺎ ﻭﻣﺶ ﻣﺨﻠﻴﻪ ﺍﺧﺘﻬﺎ ﺗﻤﺸﻲ ﺗﺤﻤﻲ ﺍﻟﺨﺒﺰﺓ ﻓﻲ ﺍﻟﻔﺮﻥ ﺑﺶ ﻣﺎﻳﻨﺼﻬﺪﺵ ﻭﺟﻬﻬﺎ ...
ﺍﻣﺎ ﺣﻤﻴﺪﻩ ﻓﻜﺎﻧﺖ ﻣﻬﺘﻤﻪ ﺑﺮﻭﺣﻬﺎ ﻓﻲ ﺍﻟﻔﺘﺮﺓ ..
ﻉ ﺍﻟﻤﺎﺳﻜﺎﺕ ﻭﻛﺮﻳﻤﺎﺕ .. ﻭﺍﻫﺘﻤﺎﻡ .. ﺑﺮﻏﻢ ﺍﻧﻬﺎ ﻣﻦ ﺩﺍﺧﻞ ﻣﺘﻮﺗﺮﻩ ﻉ ﺍﻷﺧﺮ .. ﻭﺍﺣﻴﺎﻧﺎ ﻣﺎﺗﺼﺪﻕ ﺍﻧﻬﺎ ﻓﻲ ﺍﺧﺮ ﻫﺎﻟﺸﻬﺮ ﺣﺘﻜﻮﻥ ﻉ ﺫﻣﺔ ﺭﺍﺟﻞ ..
🍁 ﻣﻦ ﺟﻬﺔ ﺗﺎﻧﻴﻪ ﻛﺎﻧﺖ ﺳﻌﻴﺪﻩ ﻻﻫﻴﻪ ﺑﻤﻮﺍﻝ ﺍﺧﺘﻬﺎ ﺍﻣﺎﻝ .. ﻣﺪﺍﺑﻴﻬﺎ ﺗﺘﺰﻭﺝ ﺍﻣﺎﻝ ﻗﺒﻞ ﺣﻤﻴﺪﻩ ﺑﺄﻱ ﺷﻜﻞ .
ﻭﻓﻌﻼ ﺑﻌﺪ ﺯﻧﺎﻥ ﻉ ﺳﺎﻟﻢ ... ﺣﺪﺩ ﺍﻟﻌﺮﺱ ﻓﺸﻬﺮ 6 ﻭﻫﺪﺍ ﻭﻳﻦ ﺗﺮﻳﺤﺖ ﺳﻌﻴﺪﻩ ..
💔 ﺑﺲ ﻭﻟﺪﻫﺎ ﺭﻣﺰﻱ ﻣﺶ ﻣﺮﺗﺎﺡ ﺑﻜﻞ ..
ﺭﺍﻧﻴﺎ ﺧﺪﺕ ﺑﻨﺼﻴﺤﺔ ﺩﻻﻝ ﻭﻻﻋﺎﺩ ﻋﺒﺮﺍﺗﻪ ﻭﻻﺩﻭﺭﺍﺗﻪ ﺑﻜﻞ ﻭﻫﻮ ﻗﺮﻳﺐ ﻳﻬﺒﻞ ﻣﺴﺘﺎﺣﺘﺸﻬﺎ ﻫﻠﺒﻪ .. ﻭﻣﺶ ﻋﺎﺭﻑ ﺷﻦ ﻳﺪﻳﺮ ..
ﻭﻓﻲ ﻓﻨﻔﺲ ﺍﻟﻮﻗﺖ ﻣﺎﻳﺒﻴﺶ ﻳﺘﻨﺎﺯﻝ ...
ﻛﺬﻟﻚ ﺑﺪﺕ ﺗﺠﻴﻪ ﺭﺳﺎﻳﻞ ﻣﺠﻬﻮﻟﻪ ﻭﻛﻠﻬﺎ ﺍﺷﻌﺎﺭ ﻭﺭﺳﺎﺋﻞ ﺣﺐ ..
ﻫﻮ ﻧﺼﻬﻢ ﻣﺎﻳﻔﺘﺤﺶ ﻓﻴﻬﻢ ﻭﻣﺶ ﻓﺎﺭﻗﻪ ﻣﻌﺎﻩ ..
🍁 ﺯﻱ ﻣﺎﻣﺶ ﻓﺎﺭﻕ ﻣﻊ ﻫﺎﻧﻴﺒﺎﻝ ﺍﺗﺼﺎﻻﺕ ﻣﺠﺪﻭﻟﻴﻦ ﻭﺍﻟﺮﺳﺎﻳﻞ ﺍﻟﻠﻲ ﺗﺒﻌﺖ ﻓﻴﻬﻢ .. ﻭﻣﻜﻤﻞ ﺣﻴﺎﺗﻪ ﻋﺎﺩﻱ ﺟﺪﺍ .. ﺻﺢ ﺍﻧﺠﺪﺑﻠﻬﺎ ﻟﻜﻨﻪ ﻋﻮﺩ ﻗﻠﺒﻪ ﻣﺎﻳﺘﻌﻠﻖ ﻉ ﺣﺪ 💔
💔 ﺑﺲ ﻫﻲ ﻗﻠﺒﻬﺎ ﺗﻌﻠﻖ .. ﺣﺎﺳﻪ ﺭﻭﺣﻬﺎ ﺑﺘﻬﺒﻞ ﻣﻦ ﻏﻴﺮ ﻣﺎﺗﻜﻠﻤﻪ .. ﻭﺗﺴﻤﻊ ﺻﻮﺗﻪ ﻧﺎﺩﻣﻪ ﺍﺷﺪ ﻧﺪﻣﻪ ﻉ ﻛﻞ ﺣﺮﻑ ﻗﺎﻻﺗﻪ ﺭﻏﻢ ﺍﻧﻬﺎ ﻣﺎﻗﺼﺪﺗﺎﺵ ﻫﻮ ﺑﻴﻪ ﺑﺲ ﻣﻊ ﺍﻷﺳﻒ ...
ﻣﺎﺯﺍﻝ ﻣﺎﺗﻌﺮﻓﺶ ﻃﺒﻊ ﻫﺎﻧﻴﺒﺎﻝ .. ﺑﺎﻟﺬﺍﺕ ﻣﻦ ﻣﺎﻧﺎﺣﻴﺔ ﺍﻟﺘﺤﺴﺲ
ﺍﻟﻠﻲ ﻛﺎﻧﺖ ﺗﻌﺮﻓﻬﺎ ﻋﺮﻭﺑﻪ ﻛﻮﻳﺲ ....
💓 ﻋﺮﻭﺑﻪ ﺍﻟﻠﻲ ﻟﻌﻨﺪ ﻫﺎﻟﻠﺤﻈﻪ ﻗﻠﺒﻬﺎ ﺣﺎﻟﻒ ﻻﻳﺤﺐ ﻭﻻﻳﻠﺘﻔﺖ ﻟﺤﺪ ﻏﻴﺮﻩ ... ﻭﻛﻞ ﻳﻮﻡ ﺗﺪﻋﻲ ﻉ ﻫﺎﻳﻞ ..
ﺑﺎﻟﺬﺍﺕ ﻓﻲ ﻫﺎﻟﻴﻮﻡ ﺍﻟﻠﻲ ﻋﺮﻓﺖ ﻓﻴﻪ ﺍﻧﻪ ﻃﻠﻊ ....
🍃 ﻫﺎﻳﻞ ...
ﺍﻧﺤﺒﺲ ﻓﻘﻀﻴﺔ ﻧﺼﺐ ﻭﺍﺣﺘﻴﺎﻝ ... ﻭﻗﻌﺪ ﻣﺪﻩ 6 ﺳﻨﻴﻦ ﻓﻲ ﺍﻟﺴﺠﻦ ﻭﻃﻠﻊ ﻣﻨﻬﺎ ﺑﺎﻟﻤﻌﺎﺭﻑ ...
ﻛﺎﻥ ﻣﺠﺮﻡ ﺷﺎﻣﻞ ﻭﺍﻟﻠﻲ ﺯﻳﻪ ﻫﻮ ﺗﻜﻮﻥ ﻋﻼﻗﺎﺗﻬﻢ ﺑﺮﻭﺱ ﻛﺒﻴﺮﺓ ﻓﻲ ﺍﻟﺪﻭﻟﻪ ﻣﻮﺟﻮﺩﺓ ...
ﺳﻮﺍ ﻛﺎﻥ ﺑﻄﺮﻳﻘﻪ ﻣﺒﺎﺷﺮﺓ ﺃﻭ ﻏﻴﺮ ﻣﺒﺎﺷﺮﺓ ...
💕 ﺑﺲ ﺍﻟﺤﻴﺎﺓ ﻛﺎﻧﺖ ﻣﺎﺷﻴﻪ ﺣﻠﻮﺓ ﻫﻠﺒﻪ ﻣﻊ ﻋﻤﺎﺭ ﻭﺩﻟﻮﻟﻪ ...
ﻭﻓﻴﻮﻡ ..
ﺣﺎﺿﻨﺎﺗﻪ ﺑﻘﻮﺓ ﻭﻣﺎﺗﺒﻴﺶ ﺗﺨﻠﻴﻪ ...
ﻋﻤﺎﺭ : ﻋﻤﺮﻱ ﻛﻠﻪ ﺍﺳﺒﻮﻉ ﻫﻮ 💓
ﺩﻻﻝ ﻭﻫﻲ ﺷﺎﺩﻩ ﻓﻴﻪ : ﺗﻘﻮﻝ ﻓﻴﻬﺎ ﻋﺎﺩﻱ ... ﻫﻲ ﺳﺎﻋﻪ ﺑﺮﺩﻉ ﺳﻨﻪ ﻭﻟﺖ ﻋﻨﺪﻱ ...
ﻋﻤﺎﺭ : ﺍﻧﻲ ﺷﻦ ﻧﻘﻮﻝ .. ﺍﻟﻠﻲ ﻋﻨﺪﻱ ﺍﻟﺪﻗﻴﻘﺔ ﺑﺮﺩﻉ ﺳﻨﺔ ...
ﺩﻻﻝ ﺑﺪﺕ ﺗﺒﻜﻲ ..
ﻋﻤﺎﺭ ﺑﻀﻴﻖ : ﺩﻟﻮﻟﺘﻲ ... ﺩﻻﻝ ...
ﺩﻻﻝ ﺑﻌﺪﺕ ﻭﻗﻌﺪﺕ ﺗﺸﻮﻓﻠﻪ ...
ﺣﻄﺖ ﻳﺪﻫﺎ ﻭﺭﺍ ﺭﻗﺒﺘﻪ ﻭﻗﺮﺑﺎﺗﻪ ﻟﻴﻬﺎ ﻭﺑﺎﺳﺎﺗﻪ ..💕
ﻭﻫﻮ ﺍﺳﺘﺴﻠﻢ ﻟﻴﻬﺎ ﺍﺳﺘﺴﻼﻡ ﺗﺎﻡ ﻭﺯﺍﺩﻩ ﺷﻐﻔﻪ ﺑﻴﻬﺎ ...💓
ﻗﻄﻊ ﻋﻠﻴﻬﻢ ﺻﻮﺕ ﺗﻠﻴﻔﻮﻧﻪ ﺍﻟﻠﻲ ﻳﺮﻥ ...
ﺑﻌﺪﺕ ﻋﻨﻪ ﺑﺎﻟﺴﻴﻒ ﻭﺩﻣﻮﻋﻬﺎ ﻧﺰﻟﻮﺍ ..
ﻫﻮ ﺧﺪﻱ ﻧﻔﺲ ﻭﺑﻌﺪ ﺷﻮﻳﻪ ﻭﺭﺩ ...
ﻭﻫﻲ ﺗﺸﻮﻓﻠﻪ ....
ﺣﻮﺍﻟﻲ ﺩﻗﻴﻘﺘﻴﻦ ﻭﺻﻜﺮ ....
ﻭﺟﺎﻫﺎ : ﻫﻲ ﻳﺎﻋﻤﺮﻱ ﺑﻨﺤﻄﻚ ﻓﺤﻮﺵ ﻫﻠﻲ ﻭﺑﻨﻌﺪﻱ ﻃﻮﻝ ..
ﺩﻻﻝ ﻣﺴﺤﺖ ﺩﻣﻮﻋﻬﺎ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ...
ﺑﺎﺱ ﺭﺍﺳﻬﺎ ...
ﻭﺧﺪﺍﻫﺎ ﻣﻦ ﻳﺪﻫﺎ ﻭﻃﻠﻌﻮﺍ ﺍﻟﺰﻭﺯ ....
🍃 ﻃﻮﻝ ﺍﻟﻄﺮﻳﻖ ﻭﻻﻛﻠﻤﻪ ...
ﻫﻲ ﻛﺎﻥ ﺑﺘﺘﻜﻠﻢ ﺑﺘﺒﻜﻲ ﻭﻫﻮ ﻣﺎﻳﺒﻴﺶ ﻳﺘﻜﻠﻢ ﺑﺶ ﻣﺎﺗﺒﻜﻴﺶ ..
ﻭﺻﻞ ﻗﺪﺍﻡ ﺣﻮﺵ ﺍﻫﻠﻪ .. ﻟﻘﻲ ﻭﻟﺪ ﺍﺧﺘﻪ ..
ﻧﺰﻟﻮﺍ ﻫﻮ ﻭﺩﻻﻝ ﻣﻦ ﺍﻟﺴﻴﺎﺭﺓ ...
ﻋﻤﺎﺭ : ﺍﺻﻴﻞ ﻃﻠﻊ ﺷﻨﻄﺔ ﺧﺎﻟﺘﻚ ﺩﻻﻝ ﻣﻦ ﺍﻟﻜﺮﺳﻲ ﺍﻟﺨﻠﻒ ..
ﺍﺻﻴﻞ ﺑﻀﺤﻜﻪ : ﻭﻳﻦ ﺧﺎﻟﺘﻲ ﺍﻧﻲ ﻭﻳﺎﻫﺎ ﻧﺪﺍﺩ ..
ﻋﻤﺎﺭ ﻓﻨﺺ ﻓﻴﻪ .. ﻭﺩﻻﻝ ﺷﺪﺕ ﺿﺤﻜﺘﻬﺎ ..
ﻫﻮ ﺷﺒﺤﻠﻬﺎ ﺑﻄﺮﻑ ﻋﻴﻨﻪ ﻟﻘﺎﻫﺎ ﺗﻀﺤﻚ ﺭﻓﻊ ﺣﺎﺟﺒﻪ ﺍﻹﻳﺴﺎﺭ ﻭﻫﻮ ﻣﺒﺘﺴﻢ ...
ﻃﻠﻊ ﺍﺻﻴﻞ ﺷﻨﻄﺔ ﺩﻻﻝ ﻭﻫﻮ ﻳﻀﺤﻚ ..
ﻋﻤﺎﺭ : ﺧﺸﻲ ﻫﻲ ..
ﺩﻻﻝ : ﺍﺳﺘﻮﺩﻋﻚ ﺍﻟﻠﻪ ...
ﻋﻤﺎﺭ ﻟﺒﺲ ﻧﻈﺎﺭﺍﺗﻪ : ﻋﻴﻨﻚ ﻣﻦ ﺭﻭﺣﻚ ..
ﻟﻒ ﻭﺭﻛﺐ ﺍﻟﺴﻴﺎﺭﺓ .. ﻭﻫﻮ ﻳﺸﺒﺢ ﺍﻟﻘﺪﺍﻡ ﻗﺎﻝ : ﺧﺸﻲ .. ﻫﻴﺎ ..
ﺧﺸﺖ ﺩﻻﻝ ﻭﺩﻣﻮﻋﻬﺎ ﻳﻨﺰﻟﻮﺍ ...
ﻭﻫﻮ ﻃﻮﻝ ﺗﺤﺮﻙ ﺑﺎﻟﺴﻴﺎﺭﺓ 💔💓...
......
ﺟﺖ ﻫﻲ ...
ﺍﻳﻤﻦ : ﺍﻳﻪ ﺣﻄﻬﺎ ﺑﺎﺗﻲ ﻭﻋﺪﺍ ...
ﻫﻨﺪﺍ : ﺗﻤﺎﻡ ... ﺷﺒﺤﺖ ﻟﻮﻻﺩﻫﺎ ... ﺗﺒﻮﺍ ﻧﺮﺩﻭﺍ ﺑﺎﺑﺎ ﻟﻴﻨﺎ ﻭﻳﻘﻌﺪ ﻣﻌﺎﻧﺎ ﺣﻨﻲ ﻭﺑﺲ ﻭﻻ ...
ﻭﻻﺩﻫﺎ؛ﺍﻳﻪ ...
ﻫﻨﺪﺍ : ﺧﻼﺹ ﺩﻳﺮﻭﺍ ﺍﻟﻠﻲ ﻗﻠﺖ ﻋﻠﻴﻪ ﻛﻠﻪ ﻛﻴﻒ ﻣﺎﺍﻧﻲ ﻗﻠﺖ ﺑﺎﻟﺰﺑﻂ ...
🍁🍁🍁🍁🍁🍁
ﻧﻜﻤﻠﻮﺍ ﻓﺤﺪﻭﺩ ﻋﺎﻷﺳﺒﻮﻉ ..
ﻋﺮﻭﺑﻪ : ﺍﻳﻪ .. ﻭﻻﺗﻨﺴﻲ ﺍﻟﻌﺮﺱ ﺍﻟﻠﻲ ﺑﺪﻭﺍ ﻳﺒﻠﺶ 2\21
ﺳﻤﻴﺮﺓ : ﺍﻛﻴﺪ ..... ﺍﻟﺤﻤﺪ ﻟﻠﻪ .. ﺑﺪﺍﻳﻪ ﻣﺒﺸﺮﺓ ..
ﺍﺑﺘﺴﻤﺖ ﻋﺮﻭﺑﻪ ...
ﺳﻤﻴﺮﺓ؛ﺧﻞ ﻧﻌﺪﻱ ﻧﺠﻴﺐ ﺷﻲ ﺣﺎﺟﻪ ﻧﺎﻛﻠﻮﻫﺎ ..
ﻋﺮﻭﺑﻪ : ﺑﺴﺮﻋﻪ ﻷﻧﻲ ﺟﻮﻋﺎﻧﻪ ﻛﺘﻴﺮ ..
ﺳﻤﻴﺮﺓ : ﺧﺴﺎ ﺍﻟﺠﻮﻉ ..
ﺿﺤﻜﺖ ﻋﺮﻭﺑﻪ ...
ﻣﺸﺖ ﻃﻮﻝ ﻃﻠﻌﺖ ﺳﻤﻴﺮﺓ ... ﻭﻋﺮﻭﺑﻪ ﻻﻫﻴﻪ ﺑﺨﺪﻣﺘﻬﺎ ....
ﺷﻮﻳﻪ ﻭﺍﻧﻔﺘﺢ ﺍﻟﺒﺎﺏ ...
" ﺍﻟﺴﻼﻡ ﻋﻠﻴﻜﻢ .."
ﻓﺘﺤﺖ ﻋﻴﻮﻧﻬﺎ ﻉ ﻭﺳﻌﻬﻢ ﻟﻤﺎ ﺳﻤﻌﺖ ﺍﻟﺼﻮﺕ .. ﻷﻧﻬﺎ ﺗﻌﺮﻓﻪ ﻛﻮﻳﺲ ...
ﻗﺎﻣﺖ ﻋﻴﻮﻧﻬﺎ ﺑﺒﻂﺀ .... ﻭﺍﻧﺼﺪﻣﺖ ﻣﻦ ﺍﻟﻠﻲ ﺷﺎﻓﺎﺗﻪ ...
... ﻳﺘﺒﻊ ...