#العشق_المتمرد
#جمان_فريد
الجزء97
🌟..
الزوز مشولهم جري..
وامهاتهم وافقين يشوفولهم والدموع سيل..
وصلوا فيهم.
حضنوهم ..
بس أيمن..
اللي ليه قريب 4سنوات ماشافهاش..
اكيد حيكون لقائه بأمه غير..
حضنها بكل قوة..عصرها عصر..
دفن وجهه فرقبتها المغطيه بالوشاح...
وانهار بالبكي...يبكي بالصوت..بالعبرة..
يبكي وامه تبكي معاه وتحضن وهي تتحس فيه..
فشعره فرقبته..فظهره..وتعصر وتحضن..
أيمن بعبرته:امي...امي..امي...
زي الطفل الصغير..
وهندا ترد عليه:هاه ياامي..ياروحي..هاه ياكبدي..
امينه ومؤنس بعدوا عن بعض وقعدوا يشوفولهم..
جده مختار..حناه كامله...
من قدام البوابه..غاليه..ومعاها مرام وسميه..
من فوق سطح حوش عبدالله..
حدهم اللي كانت حاطه ايديها ع فمها وتبكي بالعبرة..
من روشن حوش ميلاد..
سعيده منهاره بالبكي وهي تتفرج..ورزان تبكي وهي شادتها...
مشهد الكل قعد يبكي عليه...
مشهد مؤلم..وحلو فنفس الوقت..
بعد ايمن وشد وجه امه بإيديه وقعد يشوف لملامحها اللي استاحش يشوفهم عن قرب..
باسها من خدودها..بعدين باسها ع راسها وطوول...
وهندا شاده فذراعاته وتبكي..
الحاجه فاطمه جتهم وقعدت واقفه بعيد شوي تتفرج ع الموقف..
مافي حد يبي يقطع لحظة هالوصل الفريده من نوعها..
اجمل وصل في الدنيا 💓...
رجع حضنها بقوة..وهي كذلك..
هندا وهي مغمضه عيونها:آاااه..آاااه..ولدي..ايمونتي...
هو يزيد يحضنها ويبكي..
مؤنس كل ماينزلوا دموعه يمسحهم..
وحناه وامه يمسحوا فدموعهم بشارباتهم..
مختار:ايمن ولدي..
بعد بالشويه عن امه شبحلها..خداها فحضنه وهو مغمض عيونه بشده ودموعه يصبوا..
والحاج مختار يشوفله بعيونه الحمر..
ع جية اخته"مختار"..
التفت لأخته وقال:فاطمه...
حضنها وكب ع راسها..
فاطمه:طيب ع سلامتكم ياوخيي..
مختار :الله يسلمك..
بعدها سلمت فاطمه ع كامله وامينه سلام حار...
وايمن ماباش يخلي امه تبعد عن حضنه ..
سلمت عليها الحاجه فاطمه باليد..
شويه ودخلوهم للحوش اللي فيه الأولاد لأن ايمن رفض يخلي امه تبعد عليه ولو شويه💓
🍁🍁🍁🍁
بابا بالله عليك ارفعني غادي بالله عليك..
عبدالسلام حط يده ع راس بنته وقال:حاضر يابابا حاضر بإذن الله غدوة الصبح نرفعك..
ابتسمت من بين دموعها قربت لبوها باست راسه..
وهو حضنها..
وامها واختها يشوفولهم وهما متأثرين...
🍁🍁🍁🍁
خشت للكوجينه وهي تشوفلها..
هندا بإبتسامه:ماشاء الله ع النظام والترتيب..
امينه وهي تتفحص في الثلاجه:والنظافه ماشاء الله..
مؤنس بضحكه:مالا كيف عاد ينعبا علينا في كل شي رانا..
ضحكوا امينه وهندا..
أيمن بضحكه:تعلمت حتى التطييب مكرونه ودشيشه وخشينا توا ع البازين..
ضحكوا..
قدمت هندا لولدها وشداته من خدوده:ايمونه المدلع كبر ولا راجل يهبل ولدي..
ضحك بإحراج ..
وعمته وولد عمته يضحكوا عليه..
طلقت هندا خدوده ووقفت جنبه:ريتيه يا امينه كيف طول ماشاء الله..حطت يدها ع لحيته وقالت..وكيف راح راجل سمح..اكيد قلب ****ع راسه ومعجباته بالألوف..
ايمن بضحكه وعيونه مفنصات:امي!!
ضحكت..
امينه:ماشاء الله عليه غزال وراجل قد روحه وحافظ لكتاب الله الله يبارك عليه..
مؤنس بإبتسامه:فعلا أيمن راجل بكل معنى الكلمه...
ايمن بإحراج:خلاص ياهوو...
ضحكوا عليه..
وامه خشت حضنه وهي تضحك...💕
🍁🍁🍁🍁🍁
في الكوجينه...
سعيده بصوت مبحوح؛لا تريحوا انتم اليوم غداهم وعشاهم علي هلي
غاليه:مافي مع امك حد ياسعيده
سعيده بإبتسامه وهي رافعه حواجبها:واني شنو قاعده ندير ورزان وحدود!!تريحي غاليه سلم وخيتي..
ابتسمت غاليه وقالت:براحتكم..
حطت سعيده طرف رداها ع راسها وهي تقول :هي بالسلامه توا..
غاليه ومرام:بالسلامه..
لفت سعيده ومشت طلعت من حداهم..
راجو لين شافوها فاتت من الروشن..
غاليه:ركزتي ع عيونها كيف رايحات وصوتها؟
تنهدت مرام بألم وهي تهز فراسها بإيجاب..
غاليه بدموع:ربي يفك اسره ياالله بجاه هاالايام الفضيله..
مرام:آمين..
🍁🍁🍁🍁
سمعوا الرجاله واللي هدا سيب خدمته وروح..
انفتحت المربوعه الخارجيه..
وغداهم كان فيها..
مختار:والله في ناس هنى عندنا بيهم معرفه سهلوا علينا حاجات واجد..ومابينا نخبروكم لأن ماكنا نعرفوا شن يصير معانا فالطريق..
هانيبال:مفروض كنتوا تخبروا لهالسبب ياخال..
مختار:اهو هدى اللي صار تو..
عبدالله :ياسيدي الحمد لله ع سلامتكم ..تغدا يامختار تغدا..
مختار بإبتسامه:اهو نتغدوا..
🍁🍁🍁🍁
بعد الغدي..
في كوجينة حوش عبدالله..
رزان وهي تغسل الماعين:فرحانه تقول انتي اللي جاتك امك..
حدهم بضحكه وهي تمصمص:والله حق يارزان فرحتله اكثر من فرحتي لنفسي لما مشيت لماما..
رزان شبحتلها شويه بعدين قالت:حدود..انتي تحبي ايمن؟
ضحكت ووجهه ولا احمر:اكيد مال شنو..وهلبه يارزان مش شويه..
رزان:وهو ؟
حدهم بإبتسامه:مانعرفش..بس هكي نحس ان فيه شي مش عارفه اني نتوهم ولاحق في مشاعر..بس نتمنى ندعي لربي ان يخليه يحبني زي مايحبك عماد واكثر.
رزان تقول قلبها غص بنبضاته..
حست بألم شديد..وعيونها تعبوا دموع..قعدت تكد بإنفعال..
حدهم لاحظتها:رزان...في حاجه صايره بيناتكم..متعاركين؟؟
تصنعت رزان ابتسامه وردت تقول:لالا امورنا تمام..بس احيحم..مستاحشاته ليه شهر ماجي..
ابتسمت حدهم:اهو جايك العيد تو تشوفيه لين تملي منه..
هزت رزان راسها بإيجاب وهي مبتسمه بمجامله...
🍁🍁🍁🍁
تفضل..
عماد وهو يشوف لبوكس هدايا مغلف:حلو..يعطيك الصحه..
الراجل:تسلم.
عطاه عماد الفلوس..وسلم وطلع بالبوكس الصغير...
ركب سيارته..
حط البوكس جنبه..
حول الطاقيه من ع راسه
مسح حواجبه..وساوا شعره..
بعدين..
خدي تليفونه..وضرب ع رقمها..
حطه ع وذنه بيد واليد التانيه شد بيها الدومان..
نادى ..مرة اتنين في الثالته انفتح الخط..
ابتسم وقالت:عمري💓
رزان :هلا شن جو..
عماد:بيك احلو ياحلو ياسكر..
تصنعت الضحكه..
عماد بإبتسامه:شن يدير قلبي💓
رزان :امم توا كيف كملنا غسل اماعين اني وحدهم..ايه ماقتلكش عرب سرت جدي مختار وحناي كامله وبنته وكنته جو اليوم!
عماد بمفاجأة:معقوله!
رزان:والله مع القايله هكي..
عماد برفعة حواجب:باهي الحمد لله ع سلامتهم وطيب في ايمن ومؤنس..
رزان:ايه ياريتك شفتهم لما تلاقوا شن داروا والله بكيت لين قلبي تقطع...
عماد:بعيد السو ع قلبك ياقليبي انتي..باهي قولي ياروح الروح..وين قاعدين توا..
رزان شاده دموعها بالزور:فشقة خالي حسن ..
عماد:اممم..تمام...المهم بنية قلبي اني غدوة بإذن الله جاي..
رزان:باهي تجي سالم..
عماد بتكشيخه:من سالم؟
رزان غصب عنها ضحكت :عليك بارد..
ضحك وقال:المهم تضحك ياسمح ومعاش تبكي..نبيك ديما تضحكي تبصري تلعبي تهجي تغني ترقصي تهبلي..نبيك بس فرحانه بسسس..
كتمت تنهيده حرقتها فقلبها قالت فنفسها"لو كنت تبيني هكي ما كنت درت فيا اللي درته وخليتني نبكي كل ليله"..
عماد:رزونتي...الو..
رزان:معاك..
عماد:قولي يالله..
رزان :يالله..
عماد:قولي تاني يالله..
رزان :ياالله..
عماد:قولي تالت ياالله..
رزان بضحكه :ياالله..
عماد :العام الجاي اني نشوط فالروس وانتي حداي تنظفي في البطن ياااارب..
حطت يدها ع فمها والدموع عبوا عيونها حولت يدها وقالت بضحكه مخنوقه:يااارب..
ابتسم بعشق وقال:غير امتى يجي اليوم اللي يجمعني بيك يارزان..امتى بس..والله ماعاد عندي صبر خلاص..نبي بالي وقلبي يرتاحوا..نبيك تعيشي معاي فحوشي فحياتي فقلبي..نحطك فعيوني من داخل..نحبك ندللك نفرحك نرعاك نعيش ونموت حداك...
💓هو كل كلمه كل حرف طالعين من وسط قلبه من داخل حروف صادقه وربي عالم بصفاء نية صاحبها لما قالها💓
🍁بس للأسف هي اللي تبي تصدق مش قادره تصدق مع هدا كلامه وصل لقلبها الموجوع...وزاده على مابيه..تقول انحط ع الجرح ملح🍁
فوق طاقتها اللي قاعده اتحس بيه..
بدون سابق انذار...
انهارت بالبكي...
قلبه قعد يخفق بشده من الخوف:رزان!!
والبنت وين تسمع اسمه من فمها تشهق بالعبرة..
حط يده ع راسه وقعد يوخر فيها للخلف وهو حاس بقلبه يتمزق:رزونتي؟خيرك ياقلبي...قلت حاجه وجعاتك...رزان ردي..
هي تبكي وخلاص مش قادره ترد..
قلبه يتقطع التقطيع من خوفه عليها عصب وقال بصوت عالي:رديي الهم ردييي..
رزان فنصت قرنت حواجبها وقالت بصوت عالي:ماتكشخش عليا..
عمادبنفس العصبيه: لا بنكشخ ونعيط واللي يعجبني نديره..
رزان خافت لكن عيطت حتى هي:لااا ماتعيطش عليا لوسمحت..
شد ضحكته لكن كمل يكشخ:لا بنعيييط ونعيييط ونعيييط ونكشخ ونقلب الدنياا ع راسك ونعطيك حتى طريحه..
هي زبطاته يتسهوك رشفت وقالت:عليك بارد..
عماد:هههههههههههه..
هي ابتسمت غصب عنها لما سمعت ضحكته ع قد ماهي حلوة بالذات البحه زايده ع الهم هم 💓..
عماد بضحكه:ااااه..نحببببك..نموووت فيك نحبك..
بلعت ريقها وقعدت ساكته..
ابتسم بعدين قال:باهي قوليلي علاش بكيتي هكي..
رزان:احمم..استاحشت رمزي..منين اليوم ريت موقف ايمن وامه وكيف امي بكت واجد لما شافتهم نفسيتي تعبت..
تنهد وقال:معليشي ياعمري..سيوره يطلع وتفرحوا بيه ادعوله بس..
رزان:هو هدا مالينا إلا الدعاء..يكفي..
"رزااان"..
رزان:شويه مااامااا..
عماد بإبتسامه:باهي خلاص ياعسل بري شوفي عمتي شن تبي تو نكلمك في الليل تمام؟
رزان:احمم...باهي..باي توا..
عماد:نحبك...تشاو..
صكرت عليه وتنهدت من وسط قلبه تنهيدة وجع...
ناضت ومشت وعقلها وقلبها مازالوا في صراع مستمر💔
🍁🍁🍁🍁🍁
الساعه 5:30عصرا..
مقعمزة جنبه ع اللاب..
خاشه ع قروبها في الفيس..تنزل في وصفات سلايط جديده للعيد وتتبيلات خاصه..
تخصصها وفنها اللي تبدع فيه..شغفها زي ماقالت..
من حبها لهالشي تمرست فيه وقرت واطلعت وخشت دورات لين ولت شيف..
هو جنبها يشوفلها..
كيف لامه شعرها بطريقه فوضويه بس حلوة..يتأمل فيها كيف منسجمه انسجام تام مع اللي دير فيه فجأة..
غزلان وهي تشوف للاب:ماما رمضان ياسر تلفزيون خلاص برا شد كتاباتك الساعه 5ونص..
رمضان :حاضر..
ناض ومشي طول خش لداره..
شويه وجتها بنتها فيدها اللعبه وقفت عليها :ماما ركبيها..
غزلان سيبت اللي فيدها وخدت لعبة بنتها وقعدت تركب فيها بعد كملت..خودي ماما..
سهى:ماما امتى نلعب بالآيباد..
غزلان:شويه تانيه ماما...
سهى:باهي..
مشت سهى..
وغزلان رجعت لهت بخدمتها.
هو ابتسم وقال:غزيله..
ابتسمت وشبحتله:نعم حبيبي..
حميد بإبتسامه طلع من جيبه مفتاح وقام يده وهو يوريلها فيه..
غزلان ضحكت..
حميد بضحكه:علاش تضحكي؟!
غزلان:مشيت مشيت وخديتها..
حميد:سيارتك ليها وقت من 2011عندك..
ابتسمت ورجعت شافت للاب بدون ماتعلق..
حميد:حسيتك مافرحتيش؟
غزلان شبحتله:بالعكس فرحانه بيها هلبه..
حميد شبحلها شويه بعدين :غزلان..بنخبر اهلي..
قعدت تشبح للاب شويه وهي ساكته بعدين قالت:شن بتقوللهم؟
حميد:شن بنقوللهم؟بنقوللهم اني متزوج ليا 10سنوات وعندي صغار من حقهم يعرفوا اماليهم..
شبحتله وقالت:وهما حيقبلوا؟
ضيق عيونه وقال:علاش مايقبلوش؟
تنهدت وقالت:خايفه من نظرة المراة خطافة الرجاله وخرابة البيوت..خايفه ينحكم عليا حكم مسبق من قبل مايعرفوا كل شي..
حميد:مش مخلي حد يحكم عليك حكم ظالم..اني حنوضح كل شي..
غزلان:ولطيفه..
حميد ضحك وقال:لطيفه...تعرف...
انصدمت غزلان ...عيونها جحظوا فيه وهي تشوفله :كيف؟؟
حميد ابتسم وقال:ايه تعرف....
⚡فلاش باك..
مقعمزين ع صفرة البازين اللي ياكلوا فيه بالكاشيك..
من باب النظافه والذوق..
لطيفه وهي تاكل:وزنك زايد هلبه ياحميد..
حميد بضحكه:شكلك تبي من يسايرك فالرجيم..
ضحكوا رفقه واويس.
لطيفه بإبتسامه وهي تشوف للصونيه:لا غير لاحظت هالشي مؤخرا..شكلك تاكل برا هلبه..
هو شبحلها شويه اول مرة تركز ع شي يخصه هكي رجع شاف للصونيه وقال:ايه..
ابتسمت وهزت راسها بإيجاب وكملت ماكله..
⚡الوقت الحاضر..
غزلان:لمحت بأنها تعرف لكن ماواجهاتكش شن معناها.
حميد:معناها مش مهم..عادي عندها زايد ناقص..
غزلان :معقوله؟؟نحس فيك تبالغ في النهايه هي مرتك اكيد حاجه زي هادي تأثر فيها..
حميد بضحكه:لطيفه مايأثروش فيها الحاجات هادي نهائي ياغزلان..
رجعت شافت للاب وهي مازالت مصدومه وتفكر فكلامه..
🍁🍁🍁🍁
ع بعد مسافه من هالحوش..
الشارع اللي قدام الشارع اللي فيه حوش غزلان..
جنب حوش لطيفه...
حوش اختها عواطف..
مقعمزين في الجنان عواطف تشرب في القهوه ولطيفه تشرب في الشاهي الأخضر..
لطيفه:كان نقولك قداش يدخل عليا في الشهر..3000دينار..
عواطف وهي تشوفلها :امم..كويس بكل..
لطيفه:تعرفي نتكتك فراسي هكي نخش ع موضوع الملابس ومش اي ملابس الماركات العالميه..بس نبي ناخد شيرة ولد حماتي قبل..
عواطف:ولد كفايه.
لطيفه بعد رشفت من الشاهي:ايه..
عواطف تشوفلها وخلاص..
وهي تشرب في الشاهي وتفكر..
لطيفه:يومتها تلاقيت اني وثريا بنت عمتي..
عواطف بتضييقة عيون:وين ريتيها؟
لطيفه:فاسبوع رحاب صاحبتي..
عواطف:قداش لينا عليها..
لطيفه:ايه..تعرفي حكتلي ع حياتها فتركيا وع الوضع غادي وقالتلي ان في هلبه ليبين واخدين شقق غادي وعندهم في تركيا املاك..تعرفي خطر ع بالي حتى احني ناخدوا شقه وين نمشوا غادي نقعدوا فيها بدال الإيجارات..وبالمرة لوصار ماصار في هالبلاد المقربعه نلقوا وين نهربوا..
عواطف:ديما تحسبي فيها القدام..
لطيفه بضحكه:اكيد حبيبتي مانتحملش ننحط في مأزق ونقعد حايرة..
عواطف حطت فنجان القهوة ع تركينه وقالت:لطيفه..
لطيفه :همم..
عواطف:لطيفه وخيتي في حاجه نعرفها وليا وقت داستها بس خلاص والله ماعاد متحمله لازم نقولهالك..
لطيفه بتضييقة عيون:قولي..
🍁🍁🍁🍁
الخيانه مانقبلهاش بكل تعرف يامروان لونكتشف انك تخون فيها نمسحك من حياتي مسح..
مروان يسمع وقلبه واجعه عليها عارف موضوع بوها ويبي يهيئها نفسيا ليه عارف ان العيد هدا مش حيعدي ع خير دام انكشفت قصة بوها للعيله:ماعندي علاش نخونك يارفقه اني نحبك هلبه وانتي تعرفي..نحب هدوئك وطيبتك وعفويتك كل شي فيك نحبه واهتمامك بيا مخليني مش قادر نشوف غيرك بكل..
ابتسمت بتهكم وقالت:مشكلتكم تدووا هلبه وافعالكم تخالف دوتكم كلها ..
مروان:ايه في اللي هكي بس مش الكل واني مش منهم اطمني..
رفقه تنهدت وقالت :إن شاء الله.."إن شاء الله ماتطلعش زي خوك"
مروان من حده اجاباتها شك انها تعرف..بس فضل السكوت مادام هي ماقالت شي مباشر..وبدي يتسلل فداخله خوف ع علاقتهم ...
🍁🍁🍁🍁
"ههههههههههه"
رفعت اختها حواجبها وهي تشوفلها خافت عليها تكون ردة فعلها ناتجه عن الصدمه..
عواطف:لطيفه!!
لطيفه هدت ضحك وقالت وهي تهز فراسها بإيجاب:عارفه..
عواطف بصدمه:عارفه!!
لطيفه وهي مبتسمه هزت راسها بإيجاب..
عواطف:كيف؟؟قصدك كنتي حاسه ولاشنو؟
لطيفه:صدفه..
عواطف :صدفه!!
لطيفه :ايه..ليا حوالي شهرين نعرف..
عواطف:شهرين!!؟
لطيفه تنهدت وقالت:ايه..مرة مروحه من الخدمه بكري.قبل نخش الشارع لمحت سيارة حميد خاشه الشارع اللي ورانا..استغربت هو قايلي انه بيمشي لواحد صاحبه فعين زارة!!
الفضول خلاني نتبعه..تبعته...ولقيته درس سيارته قدام واحد من الحياش..
انفتح الباب تلقائي وخش بسيارته داخل..وطبعا الحكايه ماتبيش ذكاء وضحت عندي طول .
عواطف برفعة حواجب:كيف!!؟قصدي عادي يعني؟مافهمتش؟؟
لطيفه:بتصدقي صدقي بتكذبي كذبي..بس اني مش شايفه في الموضوع مشكله..
عواطف:شن هوااااا!!!؟؟؟؟؟
لطيفه بضحكه:قصدي يعني مانقص عليا شي لما تزوج عاايشه احسن عيشه..فحوشي الأمرة الناهيه نخدم نصرف نسافر خاشه مشاريع وناجحه فيها بدعمه هو بحد ذاته..واللي نقوله عليها يقول باهي ولامرة اعترض..قصدي يعني شن نبي اكثر من هكي..
عواطف:لطيفه تبردي ع روحك انتي ولاشني؟؟!!
لطيفه بضحكه:اقسم بالله ندوي من جدي...
عواطف:باهي ونظرة الناس ليك ؟!!
لطيفه:الناس اللي تحكي عنهم بالذات اللي زعميتهم صاخفين عليا مثلا ولا واجعتهم..حالي خير من حالهم مليون مرة نصهم يتمنى ربع العيشه اللي اني عايشتها..وحده نعرفها عايشه هي وراجلها عيشه كلها نكد ومشاكل قالت والله قريب ناخدله بش نفتك منه ومن دوشته..
عواطف:كلام وخلاص راهو..
لطيفه :تس..مش كلام..عواطف وخيتي في نساوين اخر همهم الراجل ورضاه..بالنسبه ليا اني انسانه مكتفيه بذاتي اكتفاء تام بعد النجاحات اللي نجحتها فحياتي والمحيط اللي وليت فيه اللي خلا معارفي من الناس المهمه اللي ليها قيمتها ونظام حياتي اللي ماشي صح بدي عندي التفكير في الامور هادي بلا معنى..
عواطف:كيف بلامعنى ياوخيتي شن تقولي راجلك وعلاقه وحب ومش عارفه شني؟!!
لطيفه بضحكه:العلاقه والحب عشناهم وفات خلاص..توا تفكيرنا كله لازم يكون في صغارنا ومستقبلهم والمحافظه ع الإستقرار المادي والإجتماعي هدا بس اللي ينفع فهالزمان..اما الباقي كله دوة فاضيه لاتزيد فيا ولاتنقص..واني مش من النساوين اللي تهتز ثقتهم بنفسهم لو الراجل خدي عليهم ولاشاف لغيرهم..سلامته هو حر..اما بش نكمل عمري واني نسحن عليه ونحرق دمي..تستس..مش حنستفيد شي..
عواطف:اني مصدومه بصراحه وكلامك مااقنعنيش لايمكن نتحمل نظرة الناس وكلامهم عليا ولا نقبل الخيانه..
لطيفه بضحكه:من هما الناس..اللي رجالتهم يخونوا فيهم ع النت ولافالعمل..ولا اللي رجالتهم يهيجوا فتونس وتركيا والمغرب ...ولا اللي تبدا راكبه حداه وعيونه يدهوروا ايمين وايسار ولا دايرلها قدر ولااعتبار..
حميد قاعد افضل منهم كلهم فنظري..احترمته لما درق لانه يبي يحافظ ع وجودي مع صغاري..وماخشش الدغاريق بش ياخد حاجته اللي ممكن مالقهاش عندي...
عواطف:معترفه انك مقصره؟
ضحكت وقالت:ممكن..
عواطف:ياكبدي واني ليا فوق 3سنين واني نسحن ع خاطرك حتى شبح راجلك مش طايقاته وساكته ع خاطر صغارك تطلعي انتي في الاخير هكي تفكري!!
لطيفه:ههههههههه...
عواطف بضحكه:يعني انتي توا تبيه يصارحك ولالا..
لطيفه:عادي جدا..المهم هو يجي يقولي اني مانقوله شي..
عواطف:باهي كان قالك تطلبي الطلاق؟
فنصت وقالت:تي شن نهدرز من الصبح اني؟؟غبيه قالولك نطلق ونخسر حياتي ...لا حبيبتي عاجبتني حياتي هكي ومرتاحه فيها ع الأخر..ماعندي علاش نطلق..ونقعد اخر عمري ملقبه بلقب المطلقه..لالالا هكي خير بمية مرة...
عواطف بإبتسامه تعجب:سبحانك ياربي!
لطيفه:ههههههههه
🍃عجبتني هاللطيفه 🍃
🌴🌴🌴🌴🌴🌴🌴🌴
ماشاء الله ع ربايتهم وع اخلاكهم حرام مايوم ريت منهم عيب حتى صوتهم مانسمعوه كان وين يقروا كوران"القرآن" ربي يبارك فيهم..
كامله وامينه وهندا :تسلمي ..بارك الله فيك..
سعيده بإبتسامه:مش غريب عليهم معروفين من هما وشن اصلهم..
ابتسموا..
كامله :مش خير منكم..
سعيده وامها:سلمك..تسلمي..
امينه:السموحه اللي جنبك هدي رزان؟
رزان ابتسمت بخجل..
سعيده شبحت لبنتها بإبتسامه:ايه..
امينه:تبارك الرحمن كبرت وراحت كيف الغزاله..
رزان بخجل:تسلمي..
هندا :والحلوة هدي؟
حدهم وجهها ولا احمر..
سعيده:هدي بنت خوي الكبير حسن ..حدهم..
هندا:سميت جداها.
ابتسموا ..
سعيده:ماشاء الله عليها فالحه وقد روحها وقاعده مع حناها وتخدم فيها بقلب ورب..وشاطره فقرايتها..
حدهم شبحت لعمتها..
هندا:ربي يحفظها..
كلهم:تسلمي..
كامله:والله..حني ان شاء الله ناويين القعدة اسبوع...بعدها بنولوا فعطلة نص السنه..بيش بنديروا بيان لبنت زينب..
تفاجئوا..
سعيده:ماشاء الله..ربي يتمم ع خير..
التلاته قالوا:آمين..
.....
بيان!!!
مؤنس:فاتحه وبيان..
رباب ضحكت بصدمه..
مؤنس بإبتسامه:فرحتك ولاصدمتك؟
رباب بضحكه:الزوووز..
ضحك..
رباب:يعني انت ناوي تفتح الموضوع مع بوي في العيد..
مؤنس:اني وجدي..
رباب متفاجئة هلبه وفرحانه فرح كبير💓
مؤنس:الو..
رباب بإبتسامه:معاك ياغالي..
ابتسم مؤنس وقال:
💚إمعاك وبس..
في وطن خالي ماأحدانا حس
ياريتني توا معاك وبس..
💓حطت يدها ع قلبها وهي مبتسمه بحب وتسمع..
💚إمعاك وحيد في وطن خالي ع العيون بعيد..
نا وانت تبقالي حلال أكيد..
إنزيدك غلا وعنك غلا ماندس..
💓تنهدت بإبتسامه وقلبها يرفرف فعالم الحروف الموزونه اللي تسمع فيها بإحساسه وصوته الراكز الهادي...
💚معاك نروق..
من بسمتك تطفي لهيب الشوق
في وطن مامعانا ولا مخلوق...
إتحس بحناني وانا بغلاك نحس..
تنهد وقال....
ياريتني توا معاك وبس 💚
رباب بفرح:هههههههههه..مش عارفه شن نقول..
مؤنس بإبتسامه:جايات ايام إن شاء الله نقولوا فيهن كلام واجد مدسوس ..مازال عندي ما نقول.. انتي حتى الشعر خليتيني نجيده..
رباب بإبتسامه كلها فرح وحب:بعدين عندي هلبه كلام هلبه غير يجي وقته بس..
ضحك مؤنس وقال:باهي توا نبوا ندحروا الشيطان..
رباب :عطيه مايرفعه..
مؤنس:هههههههه...
رباب بضحكه:باهي توا..سلملي ع الكل وعمتي وصللها سلامي خص نص..
مؤنس :بعدين نعطيك تكلميها شن رايك؟
رباب بإبتسامه:ياريت..
مؤنس:خلاص بعد العشي ان شاء الله..
رباب :إن شاء الله..انسوك اهلك ياغالي...بالسلامه..
مؤنس؛الله يأنسك..في امان الله...
صكرت رباب وهي تضحك من الفرح..
خشت عليها رانيا ضحكت بإستغراب وقالت: خيرك؟
رباب بضحكه فرح:مؤنس يبي يديرلي بيان ويقرا الفاتحه..
رانيا ابتسمت وهي متفاجئه:الله !!
رباب :ههههه..والله..💓
🍁🍁🍁🍁
الساعه 9:30ليلا..
ركبت فوق السطح وهي لابسه ماليه لأن الجو مصقع..
كان عندها احساس قوي هو اللي مخليها ركبت..
وين وصلت فوق..
فتحت الباب..
خشت..
قعدت تمشي..شبحت ايمينها..ضحكت..
مشت تجري طول...
وقفت وقالت بفرحه وحماس وهي تحرك فإيديها :فرحتلك فرحتلك فرحتلك هلبه هلبات..
ايمن بضحكه:لهالدرجه!!
حدهم بضحكه:والله اكثر حتى مافرحت لنفسي لما مشيت لماما..
ايمن قعد يشبحلها بإبتسامه حلوة وماعلقش بكلمه..
هي لأول مرة تشوفه يشبحلها بنظرة حلوة زي هالنظره..
تحشمت وتلقائيا نزلت عيونها وهي مبتسمه بخجل..
هو ضحك وغير عيونه عنها وقال:خلاص عدي انزلي صقع..
هي قامت عيونها وشبحتله وقالت:باهي..باي..
ايمن :قولي بالسلامه شن باي هدي!!؟
ضحكت وقالت:باهي بالسلامه..
ضحك..
هي ابتسمت ولفت ومشت وهومعاها بعيونه لعند ماوصلت في الباب تلفتت شبحتله هو غير عيونه..
هي ابتسمت وبعدين شبحت القدام..طلعت وصكرت الباب..
اما هو تنهد وهو مبتسم بفرح وحاس بسعاده لاتوصف..لف طول ومشي بينزل...
🍃ومن اللي عايشين فسعاده بعد شوق آلام وحزن..
للي بدي يعيش فضيق بعد طول آمد من السعاده..
تغير الحال من السعاده للتعاسه..اصعب مرحله يمر بيها الإنسان..
زي المرحله اللي توا عايشها سعد🍃
في المربوعه..
سعد:متغيرة هلبه امك ياعماد..معاش زي قبل بكل قليل ماتضحك وديما تخمم وتتجنب فيا طول الوقت ولما نفتح معاها موضوع ولانهدرز يدوب ترد بكلمه وقص مش فاهم خيرها؟!
عماد:باهي راجعت نفسك بالك داير حاجه زعلتها منك..قلت كلمه مش قاصدها هكي يعني..
سعد:ابدا والله نهائي ع قد ماراجعت نفسي مالقيت شي..حتى اني سألتها قالت مافي شي نفسيتي ملخبطه الفتره هادي..
عماد حس ان اللي امه فيه سببه قصة خاله حميد..عكست عليها سلبا..وخطرت عليه رزان وردة فعلها ع القصه وكأنهم خدوا موقف من الرجاله..
سعد:فشن تفكر..
شبحله عماد :مش عارف شن نقولك..مرات تكون صايرة حاجه فحوش جدي غادي مضايقتها..
سعد؛عمرها مادرقت عليا حاجه ضايقها..
عماد:لكن خصوصيات حوش اهلها ماتدويش معاك فيهم..
سعد تنهد وقال :صح...االمهم عندي ماتكونش زعلانه مني فشي والباقي إن شاء الله ربي يفرج ويهدي النفوس..
عماد :إن شاء الله...
🍁كفايه..
فهالوقت كانت ادير في الحلويات في الكوجينه ودموعها ينزلوا...
اثرت فيها قصة خوها لدرجه انها تخيلت سعد مداير زي مدار خوها...من غير شي صحابه اللي هدا بدي ياخد ع مرته وهي خايفه من تأثيرهم عليه يابال خوها يطلع مدايرها..حتى لو كان فباله الفكره ومانفدهاش توا حيتشجع اكثر وينفدها..
ولأن كفايه تحب راجلها هلبه لايمكن تتحمل شي زي هدا ولابأي شكل 💔..
🍁🍁🍁🍁
تاني يوم...
الساعه 10:00صباحا..
خشت سيارة عبدالسلام للقطعه..
درس..
انفتح الباب اللي جنبه ..
نزلت دلال بآسيا..
مشت للباب الخلفي..فتحاته..نزلوا ولادها..
دلال:بالشويه ماما..
سكر جواد الباب..
بوها كان نازل مشي طول لهانبيال اللي كان واقف يراجي فيهم..
سلموا ع بعض..
بعدها سلمت عليه دلال وقالت:وينه عمي..
"دلال"..
دلال بلهفه:عمي..
مشتله طول بآسيا..وصلت فيه وشدت راسه وكبت عليه..
بعدت ودموعها ينزلوا:حمد لله ع سلامتكم..
مختار وهو مبتسم:الله يسلمك يابنتي..شبح لآسيا..السمحه كبرت ماشاء الله لاقوه إلا بالله..
جاه عبدالسلام:حاج مختار..
مختار:اههلاااا..
وسلموا ع بعض بالأحضان..
والولاد يشبحولهم..
عبدالسلام:حمد لله ع السلامه..
مختار:الله يسلمك..
بعدوا عن بعض..
عبدالسلام:كيف حالك كيف حال صحه..
مختار: الحمد لله فخير ونعمه..كيف حالكم انتم..
عبدالسلام:الحمد لله..
هانيبال وهو واقف حداهم ومشبك ايديه ورا ظهره:جواد ومعمر سلموا ع جدكم..
تلفت عبدالسلام وشبح لأحفاده؛سلموا ع جدو مختار..
جواد:جدي مختار بو بابا عمار..اللي علم ماما تركب الحصان..
مختار شبح لدلال ..
دلال بإبتسامه ودموعها مابطلوش نزول:ايه هو ماما جدو مختار ..
جواد مشاله طول..
قعمز مختار ع روس صوابعه وخدي ولد ولده فحضنه وقعد يشم فيه ويبوس ويقول:اهلا ياجدي اهلا..
معمر قعد شاد فرجل جده عبدالسلام..
دلال:عموري سلم ع جدو مختار هيا..
طلق عمار رجل جده عبدالسلام ومشي لجده مختار..
مختار:ماشاء الله ماشاء الله..كبرنا ورحنا تريس..
حضنهم الزوز مع بعض..
ودلال تشوفلهم بألم...
🍁🍁🍁🍁
مقعمزة في الصاله مع صغارها وخالتها وحناها تراجي امتي يخشوا عليها عزوزتها وحماتها..
غاليه:حالهم باهي..
دلال:ايه الحمد لله..ويسلموا عليكم هلبه..
طق باب فم البوابه..
كامله :السلام عليكم..
دلال فزت طول جت واقفه..
فاطمه:خشوا ياكامله..
خشوا..
مجرد بانت كامله ع دلال مشتلها دلال بسرعه وكامله جتها بسرعه...
وصلوا فبعض..دلال حضنتها بكل قوه وانهارت بالبكي..
وكامله ضمتها بقوة وبكت معاها..
وامينه وغاليه وفاطمه يشبحولهم ودموع تنزل..
والصغار يتفرجوا ومش فاهمين شي..
بس آسيا لما شافت امها كيف تبكي..
بكت معاها..
قربت لأمها وشدت جلابيتها وهي تبكي..
وخروا هي وكامله عن بعض وشبحولها..
طبست دلال ورفعتها وهي تقول بصوت باكي:خلاص ماما خلاص..شبحت لكامله..ريتي اسيا ياعمتي حفيدتك..
كامله وهي مبتسمه ببكي:ماشااااء الله ع بنية الغالي والغاليه..ربي يبارك ع بنتي السمحه..
اسيا بدت تسكت..
قربتها امها لحناها..ولأنها مش من النوعيه اللي تستغرب طول مشت لحناها..
كامله تلقتها هي تقول:مرحبتين بنور العين..مرحبتين ببنت الفارس والريمه مرحبتين..
دلال قلبها يتقطع تقطيع لما تسمع سيرته.. شبحت لأمينه قالت:امينه..
ابتسمت أمينه من بين دموعها..ومشتلها حضنتها بقوة...
🍁🍁🍁🍁🍁
كما هو معروف..
يوم التاسع من ذي الحجه اغلب الناس تصيمه..
ويكون اشبه بيوم رمضاني بإمتياز..
فحوش عيت رمضان الفطور..
لهدا التموا الكناين مع غاليه وبدوا يطيبوا...
ودلال قعدت مع حماتها وعزوزتها ومعاهم حناها يهدرزوا هدرزة طويله بعد فراق دام سنين..
دلال:جواد بدي يتعلم ركوب الخيل..
حناه كامله وهي تمسح ع راسه:ماشاء الله ع الفارس..
جواد:وخشيت الجامع..
كامله وامينه :ماشااااء الله..
جواد:ووصلت فسورة العلق..
الزوز:تبارك الله...ماشاء الله .
دلال بإبتسامه:ماشاء الله نبيه وذكي ويحفظ بسرعه..
معمر:حتى اني نقرا فالحدانه.. "الحضانه"..والأبله عطتني هديه ع خاطر ولا..حفظت الأرقام..والحروف..
ضحكوا..
كامله بضحكه:ماشاء الله ماشاء الله سلم ولدي الشاطر..
معمر:جدو عبسي قال..ولا..لما نكبر زي جواد..نركب حصان..
كامله :تعالى ياسمح تعالى ..
مشالها يجري وحضناته وقعدت تبوس فيه..
وهما يشوفولهم بإبتسامه..
امينه:ربي يحرسهم
دلال:آمين 💖
🍁🍁🍁🍁
الساعه 5:00عصرا..
كان عماد كيف واصل للبلاد..
درس ع كم محل خدي منهم بضاعه..
وكمل طريقه للقطعه...
مع 5:15وصل للقطعه..
خش من القدام ...
درس سيارته ونزل..
لقي محمد وعمر قدامه..
عماد:اوووووو..
ضحكوا ..
وقدموله وسلموا عليه وساعدوه ينزل الحاجات..
وهما ماشيين للحوش من جهة فم البوابه..
عماد:طيب فيهم والله فرحتلهم..
محمد:من اللي مافرحلهم؟
عمر:اي والله...اهو عيدهم يولي عيدين..
عماد بإبتسامه:ايه..
وصلوا بداية الممر كانت رزان طالعه من فم البوابه..
لما شافها عماد قلبه فرفح 💓..
اما هي قلبها وجعها💔..
محمد:مافي حد في الكوجينه..
رزان:لا..
عماد:شن جو..
رزان:تمام..
ومشت طول لأنها متحشمه من عمامها...
وعماد معاها بعيونه..
محمد:هييييه....
هو غير عيونه وضحك بإحراج وقال فنفسه"اللهم اني صايم"💓
خش وخواله وراه مبتسمين...💕
🍁🍁🍁
قرب المغرب..
وكلهم التموا في حوش الحاج رمضان..
حتى حدهم وحناها..
واكيد هندا حتحضر..
اول ماخشت عليهم..
سلمت ع الكناين..
بعدين جت لدلال...
تصافحوا بس مصافحه...
ومشت بعدها قعمزت حدا مرت خالها..
طول التقعميزة ولا وحده فيهم بت تشبح للتانيه ولا وحده
فيهم قابله وجود التانيه معاها فنفس المكان بس الظروف حكمت..
🍁🍁
آذن المغرب..
وفطروا...
وبعد الصلاة وتوا العشي..
كان رز مبوخ..
ومبطن..وشيش طاووق..وفليفله..وبوريك الجبده..
مع سلاطه ومشروب
بعد العشي
روحت سميه لحوشها ..وقعدوامعاهم مرام وسعيده
كملوها هدرزة لعند الساعه 12في الليل..
هندا وامينه روحوا لولادهم وكامله قعدت باتت مع دلال واحفادها..
🍁🍁🍁
هاكي ياحنه..
رزان:مايملش هدى من جيبان الهدايا؟!
غاليه بتفنيصه:مصح وجهك وخلاص!!الحق ماهو فيك الحق في هو اللي فكل شي مقدمك حتى ع روحه..اسمعيني هنى مانكش راغبه الولد قولي اما بيش تعامليه المعامله الحقيرة هدي لا..الراجل دايرلك قيمه وحاطك فوق راسه وانتي تمرمدي فيه..
رزان دموعها طاحوا قالت:عمتي خيرك؟
غاليه بعصبيه:قاهرني اللي ديرله فيه...من تحسابي روحك وليتي..راهو يتحملك يتحملك وبعدين يفوتك مافيه يجبره يتحمل الإهانه لكرامته اكثر من هكي..
💔كلام غاليه زاد وجعلها قلبها كسره اكثر ماهو مكسور ..
رزان ام سبعه لسانات ماقدرتش ترد بحرف..
حدها اتكت بتعب ع الدولاب وحطت ايديها ع وجهها وقعدت تبكي بالعبره..
انصدمت غاليه:رزان!!
ع خشة دلال بدير لبنتها رضاعه خافت لما شافت رزان بهالحاله..
دلال وهي تقدملهم:شن في؟!
غاليه:عطيني قصه فلساني كثرتها عليها..
رزان حولت ايديها من ع وجهها قالت بالعبرة:بعيد..السو..وقعدت تمسح فدموعها ومازال تشهق بعبرتها..
دلال :رزونه خيرك حبيبتي؟
رزان تحاول تسكت عبرتها وهي تمسح فدموعها وماردتش بكلمة..
غاليه بحزن:رزونه كان في حاجه حبيبتي مادسيها تكلمي احكي..
دلال:معليشي ..حاجه تخص عماد؟
نزلت رزان عيونها وهي تمسح فذقنها من الدموع..وكذلك ماردتش..
دلال:متعاركين؟
غاليه:لا حتى اهو كيف عادته فكل جيه لازم يجيبلها حاجه..
دلال بإبتسامه:ياوخيتي سلمه قداش حنين ويحبك يابختك بجديات..يابنتي المصرواة يقولوا الراقل الحنين رزء..
ابتسمت بألم..
غاليه بضحكه:والله انتي حظك من السمي يارزونه اللي واحد كيف عماد نصيبك..راجل مقوم وقلبه كبير ويموت ع تراب كرعيك موت..غير شن تبي غير شن يرضيك يديره...
دلال ابتسمت..
رزان وعيونها لوطا؛وكان طلع هدى كله كذب..وطلع يخون فيا..ولا نسيتوا شن كان قبل..
دلال؛ايييه يارزان مازال تفكري هكي انتي!!اسمعي راهو ماشي يجبره يدير هدا كله بش يكذب عليك..وكانك ع زمان هداكا كان ايام المراهقه صغير وطايش لكن توا تغير هلبه عماد ..
غاليه:طلعي من راسك الوساوس والشك يابنتي ماتفسديش ع روحك واضيعيه من ايديك..
دلال:زي ماقالت خالتي اقتليه الشك هدا..
رزان"ماهو انتم ماتعلموا بشي ياريت نقدر نقوللكم لكن عارفه غاليه حدير مشكله كبيرة "
هزت راسها بإيجاب وسكتت..
دلال بضحكه:باهي ترا ورينا شن جابلك؟
غاليه بضحكه:ياقصقاصه..
ضحكت دلال ..
ابتسمت رزان مجامله..
بعدين خدت البوكس..
حولت الغلاف..
وحولت بعده مغطى البوكس..
شافت شن في..
توسعوا عيونها بإنبهار..
شافوا معاها دلال وغاليه وتفاجئوا:محلااااااهاااا..
هي طول خطر ع بالها بوست دارتله مشاركه في الفيس من مده لصور فيهم الكرات الزجاجيه "كرات التلج" ودايره فوقها قلب..
فعلا كان خاطرها تاخد وحده زيهم..مكانتش حاطه فبالها ان هناك من يراقب فيها بعيونه العاشقه ويدور ع اللي خاطرها فيه بش يجيبه لحد عندها..
رزان"ياربي بنهبل...اللي يدير فيه هدى نبيه يفرحني بس مش قادرة نفرح واني نتخايل فكيفها عند غيري زي الخاتم"
دلال:روعه روعه تجنن..
غاليه ضربتها ضربه خفيفه ع كتفها:وتبيه يمل من جيبان الهدايا..
ضحكت دلال وهي ضحكت نص ضحكه وقلبها من داخل موجوع💔
🍃مع اللي عرفاته واللي راته..راته مش بس سمعاته صعب عليها تقتنع بعكسه ومازالت مصرة انها تعذبله قلبه زي ماعذب قلبها وخلاه ديما موجوع 🍃
🍁🍁🍁🍁
اول ايام عيد الأضحي ..
سنة 2013..
كماهو معروف بأجوائه الحلوة..
بعد صلاة العيد بمدة زمنيه معينه..
بدوا بذبح الأضاحي..
هالمرة...
ضحيه الحاجه فاطمه..
ضحيه ميلاد..
ضحية الهادي..
ضحية هانيبال..
ومعاهم ضحيه الحاج مختار...
وضحيه واخدها مؤنس...
كلهم ذبحوهم حدا شجرة السرول الكبيرة..
وطبعا الرجاله معروفين وقت الذبح يلبسوا اسوأ ماعندهم..
المبقع بالوركينه ولا اللي نايشه زواق ومعاش يلتبس يندس لنهار عيد الأضحى...
عكس هانيبال اللي فكل عيد لازم يلبس قامجو ازرق داكن..
💖بعد كملوا ..
خدوا ليان كبير حطوا فيه المعاليق..
قامه عماد..
ومشي بيه للحوش القديم وين مافيه النساوين..
عماد كان لابس سروال امريكي من عام الغبارة..
وسوريه عسكريه داسها من ايام الجبهه..
وطاقيه ع راسه لابسها بالعكس لونها احمر..
عماد:غاليه..
من داخل:هي شويه بس..
ثواني وطلعت غاليه فتحت فردة الباب التانيه شبحتله وضحكت وهي تقول:طرحات..
عماد وهو خاش بالليان :صقع عليك.
ضحكت غاليه..
حط الليان ع الركابه في السقيفه وقال لغاليه:شن قالت ع الهديه؟
غاليه ؛قصدك ماكلمتهاش..
عماد:اتصلت بيها لكن شكلها رقدت..
غاليه اضايقت بزياده لكن ابتسمت ابتسامه تخفي ضيقها:عجبتها واجد قريب هبلت فيها..
ابتسم..
بعدين قال:نقصهالكم بعدين انتم قرضوها..
غاليه بإبتسامه :باهي..
خدي الموس وبدي يحول في الروايا والقلوب والكراجيم ع تركينه..
ع خشة رزان..
لما شافها تلخبط ناش ابهامه بالموس قعد ينزف..
هي لما شافت جرحه عقلها طار من مكانه وقلبها قريب وقف..
رزان بهلع :حي عليا دم حي عليا!!
عماد قعد يشوفلها وقلبه جن بنبضاته..💓
وغاليه مفنصه بضحكه..
طول رزان طلعت..
البنيه نست كل شي غير شافت جرح صغير فصبعه..
مشت للحوش..
خشت شويه..بعدين طلعت بقطن ولصقة جرح وسبيريتو..
تجري من الخوف..
وصلت الحوش القديم..
لقاته حاط صبعه تحت الشيشمه ..
وغاليه حداه..
هي جاته:هات يدك ترا..
هو يشوفلها وقلبه والعه فيه النار..
كيف واقفه قدامه ويشوف فعيونها الخوف عليه باين واضح..
مدلها يده شدتها..
جسمه كله رجف وقلبه زاد هبل هبال💓
هدا كله وغاليه تتفرج وهي مبتسمه...
كملت ولفت لصقه الجرح ع صبعه..
وهو يشوفلها وخلاص💓..
طلقت يده..شبحتله..
وهو يشوفلها..
غاليه:ترا سلم ولدي تسقد من هنى هي عندنا مانديروا..
ضحك..
ورزان ضحكت بخجل..
عماد شبحلها وقال:صحيتي..💓
رزان:سلمك..ومشت خشت داخل..وهو معاها بعيونه..
غاليه:هيا قلنا..
ضحك وقال:باهي ياغلوشه باهي..
ولف ومشي طلع .
وغاليه تضحك..
برا..
هو كان ماشي وفي شعور حلو ورهيب متملكه كان سعيد سعيد بكل معنى الكلمه
لما يشوف خوف ولهفة الإنسانه اللي يعشقها عليه طبيعي جدا يكون حاس وقتها انه اسعد خلق الله 💓
🍁🍁🍁🍁🍁
دارو غداهم بازين بالمعاليق..
البازين بالمعاليق طعمه غير...💕
ومن بعد ماتغدوا وكملوا حوسة غداهم بدوا بالعصبان..
بالنسبه لهندا وامينه وكامله كانوا من داخل فرحانات هلبه..لأنهم استاحشوا اجواء الأعياد فبلادهم اللي سيبوها مرغمين...
....
الرجاله كلهم تعاونوا ع تقطيع اللحم وتكيسيه..
كل واحد وخروفه..
وطبعا هانيبال والهادي خلوا طابق ع تركينه..
وتشاركوا مع العيله فلحم الشوا...
ومهمة تشويط الروس استلموها عماد ومحمد..
والشوا عمر وتوفيق ومؤنس..
وايمن كان يساعد فيهم ع التقطيع..
🍁🍁🍁🍁
عند النساوين..
امينه عيونها ع رزان عجبتها هلبه فوق جمالها رزينه وفالحه فكرت فيها لولدها أصيل...
ودق الحديد وهو حامي عند عيت مختار وراته 💕
في المجمع..
ورزان وقتها مش موجوده..
امينه: وخيتي سعيده
سعيده وهي تحشي في المصارين:نعم..
امينه:بنتك اما سنه فالقرايه..
سعيده:اول جامعه السنه..
االكل ركزوا..
امينه؛الحق البنت عجبتني واجد ماشاء الله منين ريتها طول فكرت فيها لولدي..
شبحوا لسعيده..
سعيده بإبتسامه؛يشرفنا نسبكم ياأمينه..لكن البنيه ولد عمتها عاطي فيها كلمه..
ابتسموا غاليه ومرام...
امينه انحرجت:اها سامحيني ماكانش عندي علم..ربي يكمل عليهم بالخير..
سعيده:تسلمي..
🍁🍁🍁
برا ..
فتحت الباب..لقاته هو شاد صونية الشوا..
عماد بغضب:خير عمك مش لابسه حاجه ع دماغك..
رزان:مايشوف فيا حد انت غطيت كل شي..
عماد:باك تبيني نوسعلك!!
رزان:باهي خلاص ماصار شي جيب الصونيه..
عماد:رزان ماتخلنيش نوريك وجهي التاني ايوه اسمعي الكلام..شفاشيفك غطي امهم بمحرمه بوشاح بخرقه بمصيبه اللي هواا...
رزان خافت منه شكله يخوف وهو معصب:باهي..هات..
مدلها الصونيه...خدتها...
شد يد الباب:هي بري..
لفت ومشت وهو صكر الباب بعصبيه..
رزان"ليش خفت منه هكي الهم!!!يللا مش مشكله هكي احسن "
🍁🍁🍁🍁
وعدا باقي اليوم..
وطيبوا عصبانهم وتعشوا..
وقعدوا يشوا للساعه 11في الليل..
وكمل الجو بالهدرزة الحلوة..
برغم وجود دلال الا ان هندا انسجمت معاهم..
ودلال كانت طول الوقت متجاهله وجودها تماما..
وفات اول يوم العيد ع خير...💕
🍃وجي تاني يوم...
مع الساعه 11:00صباحا..
وصلوا..
حميد وكفايه الأولين..
كفايه تعكر جوها بزياده وين رت خوها..
لما جت تعيد عليه كان خاطرها تعطيه كفوف..
ووين جت تعيد ع مرته من كتر ماكانت واجعتها سلمت عليها سلام حار..خلت لطيفه تستغرب..
...
رفقه:روزي..وحضنوا بعض..
رفقه؛كل سنه وانتي طيبه ياقلبي..
رزان:كل عام وانتي بخير حبيبتي..
بعدوا عن بعض..
رفقه؛شن جو..
رزان بحزن:باهي..
شدت يدها رفقه..ورزان شدت عليها..
🍁🍁🍁🍁
بعدهم..
وصلوا..
زينب ونعيمه وحميده..
اللي راجلها عيد وتسقد طول وحجته كانت ان عنده خاله ببمشي يشوفه..
الكل بدي يلاحظ انه مش مزبوط..
واكثر من دقق هالمرة هانيبال وقلبه انشغل..
🍁🍁🍁
الوضع هالمرة كان مختلف..
كلهم عارفين سر يعتبر خطير يخص اشخاص معينين معاهم وهالسر كشفه غالبا حيهدد حياتهم المستقرة بالضياع..
وكتمه اصعب..
نظرات الشفقه محاوطه لطيفه ورفقه..
ونظرات الريبه محاوطه حميد اللي حس انهم مش مزبوطين وتعاملهم معاه فيه شي مش مريح..
🍁🍁🍁
كفايه كانت اكثر وحده موجوعه على لطيفه لين خلاص وين تشوفها يبدا خاطرها تبكي..
🍁🍁🍁
في نفس الوقت..
رباب وزينب كانوا مع كامله وامينه اغلب الوقت وامينه فرحانه برباب ع الآخر..
بس مابتش تفتح موضوع البيان والفاتحه لين الرجاله يفصلوا في الأمر..
اول النهار عدا طبيعي جدا بروتين معروف في هكدا مناسبات..
🍁🍁🍁🍁
الساعه 5:30مساءا..
في الجردينه..
حدا شجرة الليم متاع رزان..
الكبير رمضان يقرا سنه رابعه..عمره 9سنين..
واللي بعده باسم عمره 6سنين يقرا صف أول..
والصغيره سهى عمرها 4سنين..
تنهدت الحاجه فاطمه؛يهديك الله ياولدي ليش قعدت ساكت السنين هدينا كلهن؟.
حميد:الوضع كان حساس يمي ماقدرتش نخبر حد بس توا تسهلت وبالذات بعد الصغار كبروا معاش نقدر ندرق اكثر من هكي..
فاطمه:ولطيفه..
حميد:تعرف..
فاطمه بصدمه:كيف؟؟
حميد بضحكه:والله..
فاطمه قعدت تشبح لولدها بنظرات مصدومه وهو يضحك..
باقي الحلقة 97👇
