المتمردين

العشق المتمرد

#العشق_المتمرد

#جمان_فريد

الجزء81

💕بنبه ع حاجه مهمه..
اعمار كل من....
2012
رزان.....حاليا عمرها 17سنه
رفقه كذلك 17سنه..
أيمن 17سنه..
حدهم الشخصيه الجديده عمرها 15سنه...
كل مانخشوا سنه احسبوا العمر لأن في منكم قاعد فسنة 2008😂...
💕💕💕💕
تاني شي..
بنبدا كل جزء في بدايته ندير..🌟 بش تعرفوا ان هادي بدايته..
واخيرا..
نحبكم💕
💕💕💕💕💕💕💕💕💕💕💕💕💕💕💕💕💕💕
🌟...
"مرام!"
هانيبال وهو يشوف لدولاب الكوجينه:ايه مرام..
كفايه بإبتسامه:من زمان عاجبتني..
زينب :واني من زمان متمنيتهالك..
هو ابتسم..
غاليه :باهي انت امتى ناوي..
هانيبال شبحلها وقال:مازال ندوي اني وخوها في الموضوع قبل..
زينب:ربي يقدملك اللي فيه الخير..
هانيبال هز راسه بإيجاب وهو طالع يقول:باهي عدن ارقدن واقطعن القرمه...
مشي...
غاليه بفرحه:الحمد لله..
حميده:مازال مودة احلى بواجد وصغيرة..
زينب:هانيبال يبي وحده عاقله وواعيه ومرام تناسبه اكثر..
غاليه:اول مرة فحياته يختار صح اصلا..
كفايه:صدقتي..
سكتت حميده ومعاش شاركت في الحوار لأن الموضوع مش عاجبها..
🍁🍁🍁🍁
عيب مالك مفروض تمشي غدوة..
مالك:ماعنديش جو ليهم بكل..
نور: مالك خيرك هكي مولي..
مالك: يانور اني هكي اللي يديرلي حاجه توجعني معاش نقبله..
نور: مافي حد دارلك شي..وصاحب الشان بروحه غادي ومابطلش عليهم مشي وجي..
مالك:عماد طيب هلبه..
نور: وانت؟
مالك :اني كل شي عندي محسوب طيب مع الطيب واللي يديرلي باهي نردهوله واللي يغلط فيا او فشي يخصني مانسامحاش..
نور: مالك طبعك هدا غلط ولازم يتغير..
مالك ضيق عيونه:نور ..مش ملاحظه انك فالمده الاخيرة قاعده طلعي فيا ماننفعش بالسيف..
نور: اني !!!
مالك :ايه ..الكلام اللي بيني وبينك كله مولي عراك وبس..
نور: لأنك تعاند وماتقبلش النصيحه..
مالك قرن حواجبه وقال بحده:مافيا شي عاجبك ماغير اذمي فيا بس ولامرة مدحتي ولاقلتي فحقي كلمه طيبه..
نور بصدمه:اني..
مالك بعصبيه:ايه انتي مالا امي..
نور عيونها تعبوا دموع :باهي باهي..
صكرت عليه وصكرت التليفون..
مالك:آلو...نووور..حول التليفون من ع وذنه وعاود اتصل بيها لقاه مقفل..
حدف التليفون ع السرير...
وولا للاب وقعد يضغط ع أزراه بعصبيه..
🍁اما هي فكانت تبكي...
لين خشت عليها اختها..
شافتها تبكي..
قدمتلها..وقعمزت معاها...
دلال بصوت مبحوح:نور..
نور مسحت دموعها وقعدوا عيونها لوطا..
دلال:صاير بينك وبين مالك حاجه..
نور تنهدت بألم..
دلال :احكي نوارة..
نور شبحتلها وقالت:صعب طبعه هلبه يادلال مش عارفه كيف نتفاهم معاه..
دلال:شن صار بيناتكم بالزبط..
نور رشفت وقالت: فيه طبايع خيي..حقود يادلال...
دلال:قصدك مامشاش لحوش جدي..
نور :ايه..
دلال:اممم..
نور:هو واخد موقف ع خاطر اللي صار بين امه وخالاتي وخالي محمد وقاعد واجعه الكلام اللي انقال ع عماد المشكله عماد ديما غادي من بعد اللي صار وعلاقته بيهم زادت تقوت وهو قاعد مقاطعهم ع خاطره..كل مانجي ننصحه ينط فيا ويقعد يكشخ ويعيط ويقولي انتي اطلعي فيا ماننفعش..
تنهدت دلال وقالت:طبعه حاد مايقبلش النصيحه بأسلوب التوجيه..نعرفك اسلوبك لطيف حاولي وانتي توجهيله فالنصيحه تقوليله كلام حلو..
نور ووجهها احمر:كلام حلو زي شني !!؟
دلال ارتسمت ع ملامح وجهها الباهته ضحكه وقالت:فاهمتيني انتي..يعني لو ماتبيش تقولي كلام حلو..دلعي اسمه..ملوكي راهو كدا كدا وخليك لطيييفه لأبعد حد تو تشوفي كيف يقبل منك..
تنهدت نور وقالت:تو نشوف..
ابتسمت دلال وناضت:هيا نوضي ارقدي.
نور ابتسمت :باه..وناضت مع اختها...
🌴🌴🌴🌴🌴🌴🌴🌴
تاني يوم..
الساعه 9:30صباحا..
طلعت من الدار
صكرت بابها بالمفتاح...
ومشت فطريقها...
"وين ع خير من صبح ربي "..
وقفت وشقلبت عيونها..
والتفتت :بنمشي لحوش جدي رمضان..
عزيزة:من امتى هالغلا..
قعدت واقفه تشبح لعمتها بإمتعاض..
عزيزه:تعالي خشي معاي عاونيني ع العصيده..
حدهم بالتمييع:ماااانعرررفش..وماااا نبيييش..
عزيزة برفعة حاجب:تكلمي كويس ياقليلة الأدب..
حدهم شبحتلها من فوق للوطا بعدين قالت وهي تنادي:حناااااااي..
عزيزة فنصت..
حدهم:ياحن..ناااااااي.
عزيزة تشوفلها بنفس النظره  وخلاص..
ع جية جداها :خيرك شنو في ليش صوتك عالي هكي ع صبح ربي..
حدهم بادب وهدوء:تو مش انتي حنينه قلتيلي امشي لحوش جدي رمضان..
جداها:ايه عدي..
شبحت حدهم لعزيزة بمكر..
عزيزة:وكيف يمي من بيعاوني فالعصيده..
حدهم الجده:اول مرة اديريها بروحك ماهو..عدي بلا سم اناثي ديري عصيده خوتك وخلي بنت خوك فحالها..شبحت لحفيدتها..عدي بنيتي عدي..
قدمت حدهم باست حناها ع راسها وقالت:يطول فعمرك ويخليك ليا حنينتي..
الجده بضحكه:ويحفظك يا حدود..
شبحت لعمتها برفعة حاجب وهي مبتسمه بخبث..
ولفت ومشت..
عزيزة بغضب:اللي ديري فيه غلط يمي غلط..
حدهم بحده:اسمعي..هني روحك ماتخلنيش نعدي لخوتك نقوللهم يبرمولك....خشي تحركي ديري شغلك..
عزيزة مطت شواربها لداخل بعصبيه...ومشت للكوجينه وهي تغلي غلي..
حدهم:ساد شتتوهم بين هني وغادي وحرمتني منهم ..ومشت خشت داخل..
في نفس الوقت..
بعد طلعت حدهم من الحوش..
كانت ماشيه وهي تغني...
وين غمزلي جيته ..وين غمزلي جيته..
قلبي متحير خليته..
سمعت باب حوش تقربع ..
شبحت ايمينها لقت ايمن طالع ..
هو شبحلها بطرف عينه..
هي شبحتله من فوق للوطا وشقلبت عيونها ومشت..
ايمن برفعة حاجب :مريضه ..
ومشي كمل طريقه لمربوعه حوش رمضان الخارجيه..
🍁🍁🍁
هي وين وصلت وقفت فم البوابه..
طقت الباب طقه..
حدهم:ابله غاليه..
غاليه من الكوجينه:تعالي حدود..
ابتسمت وخشت حولت كندرتها..
وقفت فم الكوجينه وقالت بإبتسامه:صباح الخير..
غاليه ابتسمت وقالت:صباح النور خشي..
خشت حدهم وهي متحشمه بعض الشي..
غاليه:من بكري نراجي فيك..
حدهم ضحكت وقالت:مازال ماناضش منهم حد..
غاليه:امي بس لتو..
حدهم:شكلهم سهروا..
غاليه بضحكه:ايه هي تعالي نبدوا..
حدهم :باهي..
وبدوا الزوز يديروا في العصيده..
ويهدرزوا ويضحكوا ....حدهم دمها خفيف وخشت قلب غاليه من قبل تحبها..وتوا زادت..
وهي حدهم امها وصتها تكون مع غاليه وتتردد ع حوش عيت رمضان ..
🍃ماتبيش بنتها تحس بالوحده بعد ياخدوها منها🍃..
💕غاليه:ايوه هكي شدي المغرف ..
حدهم:هكي؟
غاليه:ايه كويس هي ابدي عصدي كيف ماوريتك..
وبدت حدهم تعصد وغاليه تساعد فيها..
ع خشة هانيبال لما شافها وخر:غاليه..
غاليه ضحكت:تي غير خش خش..
هانيبال:منو؟
غاليه :حدود بنت حسن..
حدهم ضحكت..
خش عليهم وهو مبين راسه يدوب شبحلها وهو يضحك وشبح لغاليه:امتى كبرت هكي ..
ضحكت غاليه..
حدهم بإبتسامه:كيف حالك خالي هانيبال..
هانيبال بمزح؛الحمد لله ياحنه..
ضحكت حدهم..وغاليه ابتسمت.
شبح للروشن وقال:جيل مستعجل..كبرتوا قبل وقتكم وكبرتونا معاكم..عن شكلكم مرة وحده...
ضحكوا غاليه وحدهم..
هو ضحك وقال:مازال..
غاليه:هي شويه بس..
هانيبال وهو ماشي:باهي اني داخل..
غاليه :باهي..
حدهم :احلا واحد في رجاله عيت جدي وعيلتكم..
غاليه بضحكه:كلهم يقولوا فيها هانيبال اسمحهم..
حدهم بضحكه:عمامي اني بالذات مفروض مايمشوش معاه فشارع واحد..
غاليه ضربتها ع كتفها وهي تضحك..
حدهم تحسست الضربه..وبعدين كملت تعصيد وهي تضحك..
💕وشويه شويه..
بدي اللي هدا ينوض..
والهدوء انقلب لضجه..
بس كانت هالضجه محببه..
هدرزة..
ضحك..
صغار يلعبوا..
في الصاله..
عماد مقعمز متربع..ويوزع في الألعاب..
عماد:و هادي لفؤاد..
خداها وهو فرحان..
عماد :وهادي لرمضان..
خداها حتى وعيونه يلمعوا بالفرحه..
عماد :وهادي لأختي المشفشفه..
نورهان :شعري مواسي..
ضحكوا امها وحناها وخالاتها ومرت خالها ..
عماد بضحكه:باهي يامواسيه..خودي..
خدت منه اللعبه...
عماد:وهااادي..لقوصي..
اللي فصاله كلهم انفجروا بالضحك..
حميده:هههههههه..ياحيوان..
هو يضحك قال:عجباتك..
قصي:نبي الحمراء..
عماد:تبي السيارة الحمرا..باهي..خدي السيارة الحمرا ومدها لقصي..وقال..هات هديكا..
قصي :لا..
ضحك عماد برفعة حواجب..
وقصي مشي بالسيارات  يجري للكوجينه..
قعدوا يضحكوا..
عماد حرك راسه ايمين ويسار وهو يضحك:تعالي حنونه..
جاته حنين يدوب ادب ع رجليها عطاها لعبه..
وخدي منها بوسه..
وحميده تشوفلهم بإبتسامه..
شويه..
خشت عليهم حدهم بالصفرة وهي تقول :وسع وسع اهو جي ****ماشاء الله عليه..
ضحكوا..
كفايه بضحكه:تهبلي زي امك..
ابتسمت حدهم..
حطت الصفرة...وقالت :قربوا..
ومشت..
عماد:سقدونا حتى حني...
التفتت :هي شويه بس..
وكملت طريقها للكوجينه..
كفايه:خيرك ماتاكلش مع الرجاله في المربوعه..
عماد:يااام تعرفيني مانعرفش ناكل حدا حد..وهادي عصيده يام مانقشش فيها بيد وحده ناخد نصها ونخليهم مايلحقوا ع شي..
ضحكوا...
كفايه:مع العصيده ماهناك روح عنده..
فاطمه :خليه ع كيفه...
ابتسم وهو يشوف للصغار..
شويه وجاته رانيا بالصفرة:هاك عماد..
خداها منها وناض بيها؛صحيييتي..
وطلع قعمز فم الباب...
هي ابتسمت ومشت قعمزت..
جت بعدين حدهم بصفرة..قعمزوا عليها البنات بس...
وبدوا ياكلوا ...
ويهدرزوا من هني وهني...
رباب:تهببببل مرام...
رانيا :يارب اتم ع خير ياارب..
غاليه :يااارب..
......
فاطمه:كان هو ماقالش عليها اني قتله..
زينب :عاجبتك يمي..
فاطمه:هي بس اللي تصلح بيه..بنية مولات عقل كبير..
سميه:لكن مش هداكا الجمال..
حميده؛الحق مقارنه بعروبه و مجدولين الله يرحمها فرق كبيير..
زينب وكفايه قعدوا يشوفوا لحميده..
سميه:هو هانيبال ماشاء الله عليه مفروض اللي ياخدها تكون كيفه..
انزعجت فاطمه من كلامهم وقالت:وليش شن ناقصها بنت عبودة مافيها مايتلوح..غير ما تلبزش فوجهها  كيف بنات هالوقت..والله مافيها مايتخلا..
زينب:صح كلام امي وبعدين هانيبال شن دار بيه الجمال الاولى طلقها الله يرحمها..والتانيه فسخ منها وسيبها رغم الدنيا كلها تحكي بقصة حبهم.
كفايه:كله كلام فاضي اهم شي يكونوا متفاهمين ويتلايموا مع بعض بس..
سكتوا سميه وحميده...والزوز مش عاجبهم الكلام..
شويه..
بعد كمل عماد..
خش بالصفره من الباب القدامي..
ع خشة رزان من فم البوابه وفيدها زي ماتعودت كل ميلود قعد عصيده...
ابتسم لما شافها وقلبه فرفح💕
اما هي شقلبت عيونها ...وشبحت القدام فنصت لما شافت حدهم متربعه ع الصفره تهدرز وتاكل..
هو لاحظها...
رفع حاجبه وقال وهو يخش:اما عصيده ياحدهم..يعطيك الصحه وخلاص..
ابتسمت حدهم بخجل..
رزان شبحتله وقلبها ولعت فيه النار..
كفايه:قصدك انتي ياحدهم اللي درتيها..
حدهم بإبتسامه:عاونتني فيها ابله غاليه..
غاليه ابتسمت..
زينب:زي العسل..
حدهم بإبتسامه؛صحه..
رزان قريب تموت..
عماد وهو يشوف لرزان: صواني ممسوحه..لين عرفتوها عصيده ولا..
ابتسم بإستفزاز:ماعندنا وين نحطوه قعمزي ع صونيتك بروحك...
هما ضحكوا
رزان تشبحله بحده وعيونها مليانات دموع..
لفت ومشت..
كفايه:عماااد!!
ناضت حناها :رزان بنيتي تعالي اني ناكلها ...
ولحقتها..
وعماد يضحك..
وزينب ورباب وحدهم مبتسمات بشماته  عاجبهم الموقف..
فم البوابه..
رزان وهي تمسح فدموعها:مش خاشه لين هو يطلع..
فاطمه:تو انتي ماتعرفي عماد وبصارته..
رزان ودموعها ينزلوا ورا بعض:يطلع نخش..
هو شبحلها لما خش للكوجينه..
كان مبتسم ...
حاس انها تغار...وتحديدا عليه..
الموقف عادي تقدر اطنش زي عادتها وماتعدلش...
لكن هالمرة تحسست وبكت لأنها غارت..
غارت عليه هو..
حط الصفرة..
ومشي للاوندينو يغسل في ايديه ويشبحلها من الروشن كيف دموعها ينزلوا وتمسح فيهم بيد واليد التانيه شاده بيها الصونيه..
حول يده من تحت الشيشمه...
صكرها..
ومشي طلع من الكوجينه..
ومنها لفم البوابه..
عماد:ترا شويه حناي..
حناه حولت وهي تقول :عماد..
ضحك..
وقف قدامها وخدي منها الصونيه..
هي فنصت وقعدت تشبحله:هاتها..
قعمز وحول المغطى وقال:ماشاء الله ماشاء الله..
...بسم الله... وبدي ياكل..
ضحكت فاطمه..ومشت خشت داخل..
رزان:مصح وجهك..
هو شبحلها وغمز..
وجهها ولا احمر:والله ماتحشم..
هو ولا ياكل ومش معبرها..
رزان طارتلها:جيبها..
هو ولا مدور..
رزان تشوفله كيف ياكل وقلبها ماباش يهدا 💕
لكن كانت معصبه منه ع الآخر..
قالت بغضب:سم..باهي..
ولفت بتخش..
وقفت لما سمعاته قال..
"منك انتي نرضى بكل شي"..
قلبها فر💓...
ومشت خشت بسرعه..
وهو كمل ياكل وهو يضحك💖...
🍁🍁🍁🍁🍁
مصر...
القاهره...
في احد احيائها الراقيه..
تحديدا..
احدي البنايات ...
في شقه فالدور الثالث...
توحشتهم يامختار قلبي نار عليهم..
مختار:ياودي حالهم باهي وفي امان ..
كامله ببكي:نبي نشوفهم تربح دبرلي كيف نعدي غادي ولاهما يجوني..
مختار: توا صعب لاهما يقدروا يجوا ولاانتي تقدري تعدي..
كامله حطت ايديها ع وجهها وهي تبكي تقول..
"حسبنا الله في اللي شتتنا..شتتهم ياربي كيف ماشتتونا"
تنهد مختار بألم..
غير عيونه ايمينه..
جوا ع صورة ليه هو وعمار واحفاده وقلبه مفطور من الألم..
🍁🍁🍁🍁🍁
حتى في طرابلس ..
كانت هي تشوف لصورته المعلقه ع الحيط في دارها اللي خدتها ليها ولصغارها..
صورته كانت ملتقطه من الأحتفال بالعيد الاربعين..
كان ببدلته العسكريه..مقعمز ومصورينه بدون علمه..
كان فتقعميزته فنظرته ..
فشكله بالطاقيه اللي ع راسه..
فيه شبه كبير من القذافي ايام شبابه...
ابتسمت وقالت:طلعت تعشقه اكثر مني...اخترت تموت معاه مش معاي..
ضحكت وهي تقول:نضحك معاك..ابتسمت...عارفة عشقك ليا فوق كل عشق زي ماكنت تقولي ديما...
"ماما"
شبحت لوطا:شني ماما..
جواد:تكلمي فبابا..
ابتسمت وعيونها معبيات دموع ..نزلت لمستواه وقالت:كليت عصيده..
جواد:تعالي كولي معانا..
تنهدت بإبتسامه:باهي..
وقفت ع حيلها..مدت يدها لولدها.
شدها ...
ومشت طلعت معاه وهي تهدرز عليه..
🍁🍁🍁🍁
الساعه 3:00بعد الظهر...
ريتها كيف تسمسمت وطول خشت الدار...
سعيده رفعت حاجبها..
امال:صكرتها بالمفتاح فوقها..
عزيزة:من نهار جت وهدي حركاتها..حتى من دبشها اني اللي نغسل فيه وهي تاكل وتمسح فإيديها وترقد بنت الكلبه..
ناضت سعيده وتوجهت لدارها
وخواتها ناضوا وراها..
وصلت في باب الدار..
حطت يد فنصها واليد التانيه طقت بيها ع الباب: حدووود..افتحي..
لارد..
امال:تسكترد العقرب..
عزيزة :حركات امها..
خبطت سعيده ع الباب:حدووووود..افتحييي..
لارد..
سعيده:الكلبه..
قعدت تحرك في المانيليه وتخبط ع الباب..
امال:محقرها
زادت سعيده تخبيط
انفتح الباب..
طلعت من الدار..وفاتتهم التلاته ومشت للكوجينه..
خشت..
وقعدت تلم في الماعين ع بعض..
وهما واقفات التلاته في الباب ويشوفولها وهما مستغربات..
ع خشة حسن للحوش:السلام عليكم..
قدم..
بانت عليه الكوجينه..
لقي خواته واقفات في الباب..
قدم..
وشاف من وراهم بنته حاصله في الماعين بروحها..
حسن:السلام عليكم...خيرها البنت قاعده في الكوجينه بروحها...
شبحوله خواته..
حدهم وهي قايمه الطنجره وتسحسح فالدموع :عادي بابا مافيها شي..
هو لما شاف دموعها..
فنص فخواته:ياشيطانات انتن ..
دف عزيزه وخش لبنته..
حول من يدها الطنجره ولوحها في اللاندينو..
جبدها من يدها:اطلعي هيا..
حدهم وهي تمسح فدموعها :عادي بابا حوش جدي حوشي عادي نعول فيه حتى كان بروحي..
حسن:بروحك عينك..مش جايبك هنى خدامه..
جبدها وطلعها...
فاتت من حداهم
كانت موطيه عيونها لما جت حدا سعيده قامتهم فيها بنظره مكر..
سعيده مصدومه وخلاص..
ع خشه جدها وجداها..
حدهم الجده:خيركم ..
حسن وقف...
وكملت حدود مسرحية الدموع..
حسن:تعرفي يمي كان بناتك مايخطنش بنتي ماضال الاواخد وجهي اني وياها واني قلت..
ومشي بيها للدار..
وعماتها مصدوووووماااات...
عبدالله:خير دعوتكن انتن خير بلاكن...طيرتن امها تبن انطيرنها حتى هي..
حدهم:لا يطيرنها ويطيرن سيدها معاها..اشرت بسابتها مهدده...كان مازلتن درتلها شي تاني مانقبل وحده فيكن تخشلي حوش..
ومشت طول لحقتهم..
عبدالله:بديرن المشاكل شدن خرباكن..
ولف ومشي...
شبحوا لبعض التلاته..
امال:مش قتلكن هدي بنت راويه كيف امها..
سعيده بتضييقة عيون وهي تشوف للفراغ:فاتتها غادي..
ع طلعت حسن بعصبيه من الحوش..
وامه وراه...
عزيزة: وعاد امي من غير شي مع حسن ماتعرف حد..
سعيده:اصلا هي كانت اكثر من يكره راويه..
امال:هي قالتها قبل ماكنتش نبيها توصل للطلاق..
سعيده:اطلقت خلاص وعدت فحالها..وبنتها هدي تو نبرملها غير صبر عليا بس..شبحتلهم..بنعدي لحوش عمي نشوف عماد قال بيعدي زيارة لرمزي..
امال بألم:وليدي قديش استاحشته..
ارتسمت ع وجه سعيده ملامح الحزن..
حطت طرف رداها ع راسها وطلعت من حداهم..
امال بحزن:ربي يفك اسره ياربي...
عزيزة:آمين...تو تعالي معاي نغسلوا هالشقف
امال برفعة حاجب:ااه هالعقرب...
.....
حاطه في ودانها السماعات وتغني وترقص..
حدهم:وين ماغمزها قتلني ..وين ماغمزها قتلني..
وكملت احتفالا بإنتصارها في اولى جولاتها...
🍁🍁🍁🍁🍁
واقفه ورا واحد من رواشن حوشهم..
شبه مدرقه..
تشوف في امها وبوها كيف واقفين عليه ويكلموا فيه..
المحبوس بين ضلوعها ينبض بكل قوة...
وهي مش قادره تتحكم فيه..
مش قادرة تمنعه من الإحساس بيه..
من الرجفه وقت حضوره..
من الشوق لما يغيب..
من الحزن لما يمشي بعد كان حاضر..
زي اللحظه هادي اللي سلم فيها ع امها وبوها..
بعدين جاته امه وسلمت عليه..
بعدها هو توجه لسيارته..
فتح الباب وركب..
صكر الباب..
هي تنهدت ..
شغل السيارة..
شافاته كيف اشر بيده لامه وبوها وامه يحي فيهم..
بعدين تحرك...
هي قعدت مع السيارة بعيونها لين اختفت..
تلقائيا تنهدت...
بدون إرادة منها..
حست بشعور اجتاحها لما مامشي..
هي مش فاهماته...
🍁شعور الوحشة🍁
استاقضت ع صوت بوها وامها خاشين وهما يهدرزوا..
ميلاد:نقولوا إن شاء الله..
سعيده؛بجاه النبي ..
قدمتلهم:شن في..
سعيده بإبتسامة أمل: قال عماد مرات يديروا عفو في احتفالات فبراير..
ابتسمت بفرح:حقه..
ميلاد؛نقولوا إن شاء الله يابنتي..
سعيده ورزان:إن شاء الله...
🍁🍁🍁🍁🍁
الساعه 4:30 مساءا..
تسقدوا البنات وروحوا....
ومع العشيه..
سميه رفعها الهادي لحوش اهلها...
الناس قاعدين يمشوا عليهم ويجوا..
🍁والحاجه فاطمه مشت تزور وحده من جارتها ليها وقت عليها..
والولاد اللي هدا تسقد ع حاله..
قعدت غاليه بروحها في الحوش..
ماعندها مادير..
مكسده..
تتفرج ع التلفزيون بملل..
تحس بضيق شديد بعد يفرغ الحوش بعد كان معبي..
تنهدت..وقعدت تغير..وهي تقول:اه كان تخش عليا توا رزان..ولاحتى حدهم...
افففف...
حطت الريموت كنترول..ع مندار المسند بحداها..
واتكت..
رن تليفونها بنغمة رساله..
خداته من حدا المخده..
وشافت الرساله وفتحتها..
(كيف أنام...
وانت الأرق الذي يملأ ليلي)
فتحت عيونها ع وسعهم..
شافت المرسل..
رقم غريب..
غاليه بتساؤل:منو هدى؟
زادت ركزت في الرقم..
طلعت من الرسائل مشت لسجل المكالمات..شافت اخر مرة كلمها فيها صاحب الرقم الغريب..
كانت من حوالي شهر..
هو نفسه الرقم؟
رجعت للرساله..شافت الرقم..
صح..
هو نفسه..
ناضت قعمزت وعاودت قرتها من جديد...
(كيف أنام..
وانت الأرق الذي يملأ ليلي)
يدوب بانت ع وجهها ابتسامه خفيفه..
بس فيسع تلاشت..
حطت التليفون تحت المخده..
ورقدت عليها وغمضت عيونها بالسيف...
🍃🍃🍃🍃🍃🍃
وجي اليوم اللي بعده...
ومشي عماد شاف رمزي..
وضعه هالمرة افضل..لأنه متوصي عليه...
طمنه ع احبابه..
وروح..
وصل اخبار رمزي هاتفيا لأهله..
وبعدين توكل للمطار...
بيدا رحله مكوكيه زي مايقولوا لأكثر من بلاد بش يرجع نشاط خدمته من جديد..
🍁وخطب عمر لمياء..
والزوز كانت فرحتهم لاتوصف..
مشت فاطمه ومعاها زينب وكفايه..
استغربت كفايه لما عرفت صلة القرابه اللي بين لمياء وليلى جارتهم...
كيف..كان يبي ليلى...وخطب لميا؟؟
حطت هلبه اعذار من ضمنهم انها ممكن تكون ملخبطه من البدايه..
المهم..
اتفقوا ان العرس يكون بعد يكمل عمر حوشه..
وهو عطاهم عامين وهما وافقوا..
وبيديرلها بيان كبير مع الصيف..
💔مصعب حالة ليلى لما وصلها الخبر..
اكثر شي وجعها طعنة الغدر اللي تلقتها من اقرب انسانه ليها كيف هكي عادي جدا عندها حتى تتزوجه ولاكإن في شي..
بكت ..بكت..بكت...لين كبدها طابت..
ودعت من قلبها وقالت..
"ياالله نيتي تاخدهم"...
🍁موضوع الخطبه..
اللي هانيبال واخيرا حصل ضو اللي روح من طرابلس بش يفتحه معاه..
تواعدو يتلاقوا في الليل..
وجي هانيبال مع الساعه 9:30 مساءا..
تعشى هالمرة..
وهداكا الشعور الغريب معاش ولا غريب..
شعور يخليه يحس انه ياكل من تحت ايدين مرته..
مرته!!
الله يامرام..
يلي قاعده تنشفي في الكوجينه توا..
لو تندري حبيب عمرك..
اللي درتيله كل شي من قلبك..
وانتي مش مستنيه اي مقابل..
اه لو تعرفي..
انه بعد شوي بيفتح موضوعك انتي وياه...
ويقول لخوك نبي اختك ع سنة الله ورسوله..
🍃بعد فقدت الأمل..جاها المطلب..سبحانه ماأعظم شانه🍃
💖💖💖💖
وهدي طاسة الشاهي وشربناها..افتح موضوعك يابو صاحب..
هانيبال هالمرة مش عارف علاش مرتبك..
وملخبط..
واول مرة يحس ان هالموضوع فعلا صعب..
ومش ساهل..
بس كعادته قوا قلبه واندفع...
هانيبال:يابوصاحب..نبيك نسيب..
ضو انصدم وقعد ساكت..
هانيبال:ونسبة عيت الحاج عبودة تنشرا بالذهب..عيله غنيه ع التعريف واحسن الناس يتمنوا نسبكم..
ضو ساكت ولاكلمه..
هانيبال حاس بخوف من داخله اول مرة يحس بيه بس اظاهر بالعكس:خيرك ساكت؟
ضو رفع حواجبه وقال:والله فاجئتني الحق..ماتوقعتش نهائي ان هدى الموضوع اللي تبي تكلمني فيه..
هانيبال:باهي شن قولك..
ضو:اليوم تحديدا قبل نروح من طرابلس زميل ليا في الكليه كلمني ع نفس الموضوع..
في شي انصهد فصدره لما سمع كلام صاحبه..
لقي روحه مندفع فجأة وهو يقول:اني لو منك نختار اللي نعرفه اللي متربي اني وياه في مكان واحد اللي عارف طبعه واخلاقه وهله ومش خافي عليا شي من حياته..
ايه..
اني تجاربي اللي قبل فشلت وانت اكثر واحد عارف الأسباب ياضو...في المرتين اختياراتي كانت غلط...
وهالمرة نقولها واني واثق من كلامي..
لأول مرة نختار صح..
ضو مش عارف شن يقوله..يعز هانيبال وعنده خوه واكثر ..بس مرام اخته وهو خايف عليها ..
خايف لوهانيبال يجيه نهار ويرخي بيها ويفوتها..
وقتها حتما حيخسره..
ضو:خايف نخسرك..
هانيبال:ماتخسرنيش حتكسبني اكثر واكثر..
ضو:اختي مانقدرش نفرط فيها..
هانيبال:اختك ولأنها اختك نفرط فروحي ولانفرط فيها..
ضو سكت وهو يشوفله..
وهانيبال يشوفله بإصرار..
يحارب ع خاطرها كإنه...
هو حس روحه هكي قاعد يدير..
ضو تنهد وقال:والله شن بنقولك.
هانيبال:قول نفتح الموضوع مع العيله ونرد عليك..
ضو بضحكه:انت شكلك كان تلقى تقرا الفاتحه توا..
انحرج هانيبال وحس روحه بالغ هلبه..
بس تلقائي اللي داره..
نزل عيونه وهو قارن حواجبه وقال:شن قولك..
ضو ابتسم:لأنك صاحبي لإني نعرفك كويس..نفتح الموضوع مع العيله ونرد عليك..
شبحله وابتسم ع جنب..
💖💖💖💖💖
طلع من حوش صاحبه..
وهو متأمل ...
مش عارف علاش حاس من داخل براحه بشي يشبه الفرح..
مش عارف علاش حاس انه ملهوف..
على شني ؟...
هو مش قادر يلقى إجابه للسؤال...
في نفس الوقت
هي كانت مقعمزة ورا اللاب توب تقرا...
حاطه يد تحت خدها التانيه تضغط عليها في الأزرار ومنسجمه مع البحث اللي دير فيه...
🍁🍁🍁🍁🍁🍁
يرن تليفونها...
متجاهلاته...
اختها تشوفلها قالت؛ردي نور..
نور:لا لين يشعف..
دلال:يابنتي ليك اسبوعين مشردتيه هدا غير لما يشوفك في الكليه وانتي تتجاهلي فيه...صدقيني يانور اللي ديري فيه كله فاضي كله...وربي مايجيبلك نهار تندمي فيه ع كل لحظه كنتي فيها بعيده عنه ومجافتيه..صوتها انخنق وقالت..كل لحظه..
ناضت من بحداها وطلعت من الدار..
نور قعدت تشوف للتلفزيون ودموعها ينزلوا..
ومالك مازال يتصل وهي فايتاته..
🍁الزفت..
وحدف التليفون ع طول يده..
جابه ع الحيط..ومنها طاح مفترش..
مروان:خيرك..
مالك بعصبيه:فوت امي.. ناض وهو طالع من الدار يقول..تفووو ع الحب وع اللي يحب.
فتح الباب وطلع وقربعه وراه..
مروان قعد يضحك بصدمه..
رن تليفونه..كانت رفقه...
رد :هاه حبي...ههههههه..تي والله انتي عسل ومافي منك..
ايه ياعمري ..طالع توا...
فتح الباب متاع الدار وطلع...
نزل لوطا...
وهو ماشي:يام بنمشي لحوش خالي..
كفايه من الصاله: مربوحه..
ضحك ومشي للباب فتحه وطلع...
في نفس الوقت خش مالك ع امه الصاله..
مالك: عطيتي تليفونك يام..
مداته وهي تقول:خيرك..
خداه وقعمز:بنت اختك رزتني في اللي عندي..
ضحكت :تستاهل..
شبح لأمه وهو يضرب ع الرقم..
امه ضحكت وهي تشوفله وترقص فحواجبها..
رجع شاف للتليفون وهو يحرك فراسه يمين ويسار..
وكفايه تغني:يضرب الحب شو بيزل يضرب الحب..
ضحك وناض من بحداها..
كفايه:اللي عاجبوا ينضم لينا واللي مش عاجبو يفللل يضرب الحب..
مالك برا يضحك..
وع وذنه التليفون ومازال ينادي...
انفتح الخط..
نور: عارفاتك انت راهو ورديت بش نقولك برا هدرزع اللي قعدت واقف عليها 40دقيقه وانت تضحك وتهدرز ومتجاهلني تمام...وصكرت عليه..
هو قعد يضحك..
عاود مرة تانيه..
نادى هلبه بعدين انفتح الخط..
نور:شن تبي..
مالك:نحبك 💓
نور وجه انحمر:تحسابني بنفوتهالك بالكلام الحلو...احلم..
مالك:نموت فيك💓
نور قلبها يرفرف بس لابد من المكابرة:جرب تكون فمكاني وتشوفني واقفه ع واح...
مالك بحده:نقلبها ع راسك وراسه..
نور: حلال عليك؟!
مالك:نور ماطلعنيش من طوري ..ماتخلنيش نستجرم ..ندوي مني جد..ردي بالك تستفزيني فحاجات زي هادي..ماعنديش ياأمي ارحميني..ايوه..
نور:حتى اني..وصكرت عليه..
هو غمض عيونه بشده..
نزل التليفون..ولف ومشي للصاله وحطه ع الطاوله حدا امه وطلع وهو معصب.
كفايه:اييه ياوليداتي..هو اللي يخش هالسريب مازال يرتاح..
🍁🍁🍁🍁
ايه والله...مازال يرتاح..
فرقة راحته...
مشكلة مؤنس الوحيده انه مايبيش يدير علاقه مع رباب خارج الإطار الشرعي..
الولد يبي يخطب طول..
بس اللي زي شبه مستحيل ينعطى..
بعد كان نسبه يتمنوا فيه تمنايه..
توا صعب هلبه..
هو شبه هارب..ومتخفي..ووضعه مش مستقر من اللي بيعطيه بنته!!
ايام العز...
كانت لغيره وماطالها...
ولما ولت بروحها..
جارت عليه الأيام..
وبرضو مايقدرش يطولها..
مش عارف كيف يدير!!
كل مالها تملكه اكثر واكثر وهو مش قادر يحولها من باله نهائي
بالذات بعد اخر موقف..
وين يذكره يضحك وينسى همه..
مؤنس:اااه.. قديش مشقيني بعدك...
🍁🍁🍁
بس شقا البعد اللي فقلب ايمن..
هو شقا بعده عن امه وخوته...
هو نفسه شقا حدهم...
اللي برغم انها عايشه بالطول والعرض فحوش جدها...
بس مافي شي قدر يغنيها عن وجود امها..
كل ليله اول ماتحط راسها ع المخده وهي تبكي..
🍃امها اجبرت انها تتزوج لأن خوتها مش متحملينها هي وصغارها...🍃
🍁🍁🍁🍁
تاني يوم...
في المدرسه..
الساعه 11:00 صباحا..
في الساحه...
باهي ليش ماتناديها تقعد معانا..
رزان:مانحبهاش..
بلقيس:عيب بنت خالك..تحشمي...ناضت..ومشتلها..
رزان تبدلت ملامح وجهها للأمتعاض..
شويه وجت بلقيس هي وحدهم..
بلقيس :اني والمصديه بنت عمتك صاحبات..
حدهم شبحت لرزان كيف رافعه حاجبها ورجلها تهز..
تجاهلت..
حدهم:تقري تانيه تانوي حتي انتي؟
رزان :ماتبيش ذكاء..
بلقيس ضحكت:هي سألت لأنها لاحظت اني نبان اكبر..
حدهم :تفهمي ع الطاير يابلقيس..
شبحت رزان لحدهم..
وحدهم تشوف لبلقيس ومتجاهله رزان...
بلقيس بضحكه:باهي تعالي قعمزي..
قعمزت حدهم حداها..
وقعدوا يهدرزوا وانسجموا مع بعض..
ورزان طول الوقت ع اعصابها...
🍁🍁🍁
وحتى وقت المرواح روحوا مع بعض ع رجليهم..
وصلوا للقطعه وخشوا..
بلقيس:الطريق امان كيف قبل ماعندهم من شن يخافوا..
حدهم:صح..
ع جية محمد ومعاه توفيق..
كانوا طالعين من جهة حوش ميلاد..
بلقيس قلبت وجهها عنه..
هو مادورهاش كمل طريقه هو وولد خوه لين وصلوا فيهم..
بعدت عنهم بلقيس..
محمد:ماكلمكم حد فالطريق..
رزان من فوق نفسها؛لا..
حدهم:الأمور ميه ميه..والجو اطلع طول..
ضحكوا محمد وتوفيق.
محمد بضحكه:باهي تمام كملن طريقكن..
قام عيونه..
بلقيس غيرت عيونها..
لبس نظاراته ومشي هو وولد خوه..
ورزان مشت هي وحدهم لبلقيس..
رزان بضحكه:شن جد عليك..
بلقيس:الإستكراد علاج عمك الوحيد..
حدهم بضحكه:قصدك معجبه بمحمد..
بلقيس تنهدت وقالت :قولي ميته فمحمد..
حدهم:ههههه يهبل هو..بس يقعد هانيبال احلا واحد..
بلقيس:هانيبال غير جي كبير واجد كان هدى رميت عليه الشبكه من زمان..
حدهم:ههههههههه...
رزان كان تلقى تعطي حدهم طريحه...
وصلوا في باب الحوش..
حدهم:باي..
بلقيس بضحكه:بااي...
وخشوا هي ورزان لحوشهم..
كملت حدهم طريقها وهي تغني..
تصدق بمين بعدنا ويدوب ماعداش يومين..
لقيتك واحشني وحشة سنين..
وصلت باب حوش جدها...
شبحت ايمينها لقت ايمن نازل من السيارة ومؤنس معاه..
قعدوا عيونها معاه..
كان فمشيته غرور واضح..
قعدت تشوف فيهم لين خشوا داخل..
حدهم:ماحاسب فروحه..
خشت وصكرت الباب..
مشت بتخش من جهة الكوجينه..
وقفت لما سمعت عمتها عزيزة تهدرز بالتلفون وتضحك..
باين هلبه انها تكلم فواحد..
فلاش باك...
والله العظيم امك ماكلمتها كلامي كله مع عزيزة بس..
حسن وهو يضرب فيها:تبيني نكذب اختي ونصدقك باكلبه..امي اللي يوصل فيها نقص راسه..
وقعد يجلد فيها بالسبته وهي تعيط..
وحدهم تبكي وخوتها الأولاد يرعشوا..
طلعت من الحوش بش تستنجد بعماتها و حناها..
وقفت في الباب الفاصل لما سمعت عزيزة تقول..
عزيزة:تستاهلي ياكلبه هدا اللي يخليني نحطه فراسي كان مازال مشي القدام..
الوقت الحاضر..
مسحت حدهم دمعتها..
"كيف خشيت والله"
لما سمعت صوت عمها خاش للحوش..
رفعت حاجبها..
ولفت ومشتله..
كيف صكر خليفه..
قدمتله حدهم وقالت:عمي..
خليفه:اهلا عمي..شن جو..
حدهم بخوف:مش عارفه خيرها عمتي عزيزة تكلم فروحها زي المهبوله..
خليفه:شن تقولي!!
حدهم:غير برا اسمعها شن تقول..من جهة الكوجينه..
مشي خليفه وهو مرتاب..
وحدهم وراه...
وصل في الباب..
وسمع..
"حبيبي خيرك توا عطيتك بوسه خلاص عاد"..
خليفه عقله طااار..
خش الكوجينه...
عزيزة من الخلعه تليفونها طاح..
قدملها زي الوحش:يا وسخه..
عزيزة:خ..ليفه..
ويجبدها من شعرها ويطيح فيها ضرب..
وهي تعيط ع طول رقبتها..
.....
مؤنس:ياستير..
ايمن:شكلها عركه...مالناش علاقه..
مؤنس:ايه اكيد مسائل عائليه...
هي بسرعه كول ووتي روحك بنولوا ..
ايمن:تمام..
....
حدهم كانت تسمع في عياط عمتها انغام موسيقيه تنطرب عليها تبدل فحوايجها وعادي جدا..ولاكإنه في شي..
وبرا..
سعيده تحز وامها تحز وبالسيف بش قدروا يفكوها منه وهو مازال يتحلف فيها...
🍁🍁🍁🍁
طرابلس...
طالع من المصرف ...
ع خشتها هي..
هو ماشافهاش..
هي اللي راته..
لحقاته ونادت..
"هانيبال"..
هو وقف وتلفت ..شافها...
ابتسم..
وهي ابتسمت...
قدمتله..وهو جاها...
مدت يدها:شنوحالك..
هانيبال صافحها:الحمد لله..شنو حالك انتي..
عروبه :الحمد لله...
طلقوا ايدين بعض..
هانيبال:شنو حال هلك واللي تعرفيهم ويعرفوك.
عروبه بضحكه:الحمد لله..اوكل منهم كويسين..وانت..
ضحك وقال:اوكل منهم بخير والحمد لله..غير الله يرحم سيدي..
تلاشت ضحكتها:امتى؟
هانيبال وهو يوزع فنظره ع المكان:شهر6 اللي فات..
عروبه تنهدت بضيق بعدين قالت بحزن: عظم الله أجرك..الله يرحمه ويغفرله..
هانيبال تنهد وقال:آمين...ابتسم وكمل يقول..شنو دايرة فهالدنيا..
عروبه بإبتسامه:عايشين الحمد لله..
هز راسه بإيجاب وهو يشوفلها بإبتسامه..
عروبه :جيت تسحب..
هانيبال:ايه...
عروبه:مروح توا..
هانيبال :إن شاء الله..
شبحتله شويه بعدين قالت:باهي ممكن تجي معاي المصور توا..في حاجه ليك قعدت عندي نبي نعطيهلك..
هو ابتسم وقال:تمام..
عروبه شبحت للمصرف :حتى غدوة إن شاء الله..
ضحك..
وهي ضحكت..
مشوا مع بعض...
هي لسيارتها وهو لسيارته...
هي لما شافت السيارة اتفاجئت:شريت وحده اخرى مبارك..
هانيبال بضحكه:الله يبارك فيك..
ركبت سيارتها وهي تضحك..
وهو كذلك...
شغلوا سيارتهم...
تحركت عروبه الأولى..
وهو لحقها...
هو كان مبتسم براحه..
ومن داخله فرحان..
ليش فرحان؟؟
ماحسس اتجاهها بنفس الشعور الأول...
حس شوفتها عنده عاديه زي اي حد معرفه قبل..
هانيبال بضحكه:بنت عبودة شن دارت !!...هههههههههه...
🍁اما هي..
فكانت حاسة براحه حتى هي..
لسبب واحد انه هو مش حاقد عليها او واخد منها موقف..
وتعامل معاها عادي جدا..
🍃وهو هدا اللي يبوه الزوز..صح سيبوا بعض لكن التقدير مازال موجود🍃
🍁🍁🍁
وصلت للمصور...
درست وهو وراها..
فتحت الباب ونزلت فنفس الوقت اللي نزل فيه هو...
جاها..
هي فتحت باب المصور ووخرت وهي تقول:
تفضل..
هو خش :بسم الله..
خشت وراه..
وصكرت الباب..
عروبه:تفضل قعمز..
ابتسم وقعمز..
عروبه حطت شنطتها وخشت داخل..
هو قعد يدور بعيونه في المكان..
لحظات وطلعت..
فيدها صفرة صغيره فيها طاسة عصير..
هانيبال:غير ليش ياودي...
ضحكت:خود واسكت..
هو ضحك وخدي الطاسه..
وهي قعمزت مقابله والصفرة فيدها..
خدي رشفه من العصير وقال:ماشيه امور خدمتك..
عروبه:حتى اني مش ملحقه..تعرف هدا يوم راحتي الوحيد..
هانيبال بضحكه:بعد عطوهم المنح كثرت الأعراس..
عروبه بضحكه:ربي يزيد ويبارك..
ضحك ورجع خدي رشفه تانيه من العصير..
عروبه : وانت..
حط الطاسه وقال:الحمد لله بدت تترادع وتتيسر
هزت راسها بإيجاب وقالت:الحمد لله..
ناضت :لحظه وجايه..
هز راسه بإيجاب..
خشت داخل..
شويه وطلعت فيدها ظرف لاهو كبير ولاهو صغير..
قدمتله ..ومدتهوله..
هو خداه وهو مستغرب...
فتحته وطلع اللي فيه..لقاها صورة ليه هي خداتهاله..ابتسم..
عروبه:ماقعدش منك شي غيرها..
شبحلها وقال:عروبه...اسف..
هي ضحكت: حتى اني اسفه..تنهدت ...بس هي هكي حكاية النصيب..
هانيبال بإبتسامه:صدقتي..نصيب..ونصيبي غير قسمتك..
ابتسمت:صح نصيبي غير قسمتك..بس هيا ايام حلوة عشناهن ماينتسنش..
هانيبال:صح....
عروبه :ربي يسعدك يارب من كل قلبي نقولها..
هانيبال بإبتسامه:وليك مني نفس الدعوة..
هزت راسها بإيجاب وهي مبتسمه...
هو ناض...
ناضت معاه..
مد يده:نسمع عنك كل خير إن شاء الله..
صافحاته:حتى انت...
ابتسم وطلق يدها وقال:السلام عليكم ..
هي ردت:وعليكم السلام..
قعدت معاه بعيونها لين فتح الباب وطلع..
وصكره وراه...
عيونها تعبوا دموع...
فشي من داخلها ضايقها هلبه..
بس في نفس الوقت ارتاحت من ناحيته..
انفتح الباب..
"السلاااام عليكم"
عروبه:ههههههههههه..
حمدي بضحكه:خيرك؟!
عروبه هدت ضحكه وحركت كتافها وهي تقول:شي..
هو رفع حاجبه وصكر الباب..
وهي مازال تضحك..
هو ضحك معاها برغم انه مش فاهم شي..
🌴🌴🌴🌴🌴🌴🌴🌴
الساعه 4:30 عصرا
في الدار...
رزان:عطاها طريحه قريب قتلها..
غاليه :عليك غبيه معاش لقت وين تهدرز..
رزان:عابيه ع الحوش فاضي مافيش كان جداي بس..
ع خشة حدهم..
حدهم:السلام عليكم..
رزان شقلبت عيونها بملل..
غاليه بإبتسامه:وعليكم السلام..
قعمزت حدا غاليه:شن جو غلوشه..
غاليه:الحمد لله..وانتي شن درتي في المدرسه اليوم..
حدهم:اهو قاعده ناخد عليها..
غاليه:كويس..
حدهم شبحت لرزان:ايه بكري نسمع فعياط ماتعرفيش شن في؟
شبحتلها برفعة حواجب:في نفس الحوش وماتندريش..
حدهم:لا الحق يدوب سمعته واني كيف بياخدني النوم رقدت طول..وسألتك توا قلت اكيد الأخبار عندك مايفوتك شي تحبي القصقصه..
غاليه شبحت لحدهم برفعة حواجب..
رزان بحده:ايه مايفوتني شي ونعرف كل شي والاخبار تجيني لعندي ماندورش فيهن..
حدهم بإبتسامه مستفزة:امم..باهي..شن صاير..
رزان :عزيزة كلت طريحه من خليفه..
حدهم:اووبس..
ضحكت غاليه..
حدهم:معليشي خوت يتعاركوا ويتصالحوا..
رزان رفعت حاجبها..
وغاليه ضحكت وقالت:تنوضن معاي نديروا كعك مقلي..
حدهم ابتسمت بفرح:الله !!..ناضت..هي نوضي..مدت يدها لغاليه..
غاليه وهي تضحك مدت يدها ليها..
نوضتها حدهم ...
غاليه:تعالي رزان..
ناضت رزان وهي تسحن سحن..
حدهم جبدت غاليه:هيا غلوشه..
غاليه :ههههههه غير بالشوي..
وطلعوا ووراهم رزان واعصابها راكبات..
🍁🍁🍁🍁
يشرب في القهوة..
شبح لأمه وقال:وين مرام..
مرضيه:فدارها تقرا..
ضو:مرااام...يامراااااام..
مرضيه:قول شن تبي اني تو نديرلك..
ضو:نبيها فشي ضروري يخصها..
استغربت مرضيه..
ع جية مرام:ناديتني..
ضو :ايه..قعمزي..
قعمزت وهي مستغربه..
مرضيه:شنو في؟
ضو :خير إن شاء الله..مرام..احمم..في واحد كلمني عليك..
هي تحشمت ونزلت عيونها..
ضو:واني نعرفه كويس كويس يامرام..
هي حست بصدرها اطبق...
مرضيه:صاحبك؟
ضو :وعز الصحاب..
هي ضيقت عيونها بإستغراب..
وقلبها فجأة نبضاته تسارعت..
مرضيه:عز صحابك..هانيبال ولد حياة رمضان الله يرحمه!
زاد قلبها سرع من نبضاته..
"ايه هو"
قامت عيونها فخوها...
وامها شبحتلها طول...
هي بلعت ريقها وقالت بصوت يدوب طالع..
"هانيبال!"
ضو:ايه..
مرضيه بفرحه:ياوالله نهار مبروك مسعود قديش تمنيت هالنهار من زمان..تمنيته فهاجر وإيمان..لكن نصيبهن فغيره..وتوا جي للصغيره..ربي يبيه نسيبي..
مرام تشوف لأمها بصدمه..
ضو ضحك:لهالدرجه تعزيه يمي..
مرضيه:هانيبال مافيش حوش فالقبيله مايتمناه نسيب راجل خدوم واللي فيده مش ليه ومحترم وخدام ع راسه..ومن نهار تصاحبت انت وياه حالك تغير..
ضحك ضو..
بس مرام ..
مازال مش مستوعبه..
ولا مصدقه..
ولافاهمه شي..
للحظه حست روحها زي اللي دايخه..
استاقضت ع صوت خوها يقول..
ضو:مرااام..
شبحتله..
ضو:وين عديتي..
مرام شبحتله شويه وقالت:معاكم..
ضو:شن قلتي..
مرام :احمم..مش عارفه..الموضوع غريب شويه..
ضو بإستغراب:كيف غريب؟
مرام: ليش توا ؟
ضو:شن ليش توا؟
مرام:احمم..قصدي يعني شن خطر عليه..
مرضيه:شن الأسئله اللي تسألي فيهن هدين؟.
مرام سكتت وهي تشوفلها وفنفسها شي من الريبه..
ضو:مش عاجبك الموضوع..
شبحتله وقالت:مستغربتله بس..
ضو: تصدقي حتى اني كيفك..لكن فرحني الموضوع..اللي نعرفوه خير من اللي مانعرفوشي..
مرضيه:هي هدي..
مرام نزلت عيونها وهي تشوف لإيديها المشبكات فبعض..بعدين رفعتهم فخوها وقالت:نبي وقت نفكر قبل..
لأول مرة ماترفضش طول زي عادتها...
امها ابتسمت..
ضو:باهي خودي وقتك..
مرام:اسبوعين..
رفع حواجبه..
مرضيه استغربت..
رن تليفون ضو..
هي شبحتله..
وقلبها من قوة نبضاته بيتقلع من مكانه..
ضو ابتسم:يموت شيباني..
ناض..وطلع من حداهم..
وهي معاه بعيونها..
كانت انفاسها تتسارع..
ودموعها معبيات عيونها.
برا...
ضو:هاه يازعيم..
هانيبال:شن جو..
ضو:مليح..
هانيبال:شن صار معاك..
ضو:امم..تو بس فتحت معاهم الموضوع..
ابتسم ع جنب وقال:شن قالوا..
ضو:يبوا اسبوعين يفكروا..
هو ضيق عيونه بإبتسامه...
ضو: شن قلت..
هانيبال:اسبوعين اسبوعين..مافيش مشكله..
ضو ابتسم...
🍃🍃🍃🍃🍃🍃
اسبوعين...
مرام...
في كل يوم كانت في تدرجح بين الرفض والقبول..
برغم عشقها ليه...
إلا إن صوت العقل كان أعلى ..
مخاوف هلبه انتابتها..
واحد طلق وحده بكل سهوله لأن شاف اللي يحبها صدفه..
وحتى بعد وصل في اللي يحبها خلاها حتى هي ...
هدا مش ينخاف منه؟
يعني اللي يحبها خلاها بسهوله هكي..
كيف هي..
خافت تكون عنده مجرد خيار فرضه الوقت..
خافت تعيش معاه مجرد كماليه من كماليات الحياه بالنسبه ليه..
خافت يجي نهار يجرحها ويشوف لغيرها..
لأن في الغالب اللي يخونوا...
هما اللي تزوجوا تقليدي..ويكون عندهم ماضي...
لو صار وخداته...
واللي خافت منه حصل..
مش بس حتنكسر..
حتخرب علاقة العيلتين ببعض...
وصحبته هو وخوها تدمر...
🍃كل يوم كانت عايشه فصراع ..
برغم انه خواتها اللي طاروا من الفرحه كانوا مستغربين فيها وحاولوا يقنعوها لكن هي مش مقتنعه ومتوجسه هلبه...
في يوم...
درس بسيارته قدام المدرسه..
نزل...
وخش داخل..
ماشي ويدور بنظره فيها..
نفسها المدرسه اللي قري فيها ولت بس للبنات..
ضحك ..وهو يمشي..
وقف فجأة..
:خايفه ياأبله خايفه بنموت..
مرام بضحكه:مش حرب هدي راهو امتحان عادي كيفه كيف الإختبارات متاع الشهر غير هما عطوه اكبر من حجمه..وانتي ياخلود شاطره ماينخافش عليك..دامك قاريه ودايرة واجبك ربي مستحيل يضيع جهدك..
خلود:باهي يا أبله عدي معاي..
ضحكت:حاضر ..شدت يدها..ومشوا..الخوف والتوتر الزايد ينسوا المعلومات..خليك ريلاكس عاديه..حتى اني اليوم عندي امتحان وقاعده نضحك وجوي مليح وضاربتها ع الحيط دامني قاريه ماعندي من شن نخاف..
ابتسمت البنت وخدت نفس..
ضحكت مرام..
هو يمشي وراهم بمسافه...
ويسمع فيها...
وفي شي قوي جاذبه ليها مش قادر يوقف..
لعند وصلت البنت للفصل..
وصت عليها الأبله...
بعدين لفت بتمشي..
وهي تشوف لساعتها...
نزلت يدها..شبحت القدام..
وقفت فجاه :هييييي..
شهقت وهي حاطه يدها ع أعلى صدرها..
وعيونها متوسعات..
هو ضحك ع ردة فعلها..
وجهها ولا احمر...نزلت يدها وقعدت تساوي بالتانيه فوشاحها بإحراج..
حالتها هادي وصلت لهانيبال معلومه خلاته مليون في الميه ضامن ردها بالموافقه..
ابتسم بعدين وقال:تعرفي فصل رزان..
مرام:احمم..ايه..
هانيبال:نبي ناخدلها اذن بنروح بيها..
مرام:الإذن لازم تاخده من لوطا قبل..من الإدارة..
ابتسم ع جنب وقال:صح..
هي مشت لين وصلت فيه..فاتت من حداه وهي تقول:تعالى..
هو مشي وراها..
ومرة مرة عيونه عليها..
اما هي فكانت متماسكه بقوة..
لعند مانزلت...
نزل وراها..
وصلت لوطا..
كملت تمشي وهو وراها..
وقفت واشرت بصبعها :غادي الحجره المقابله..
التفتت وانصدمت..
كان قريب عليها..
ويشوف للحجرة..بعدين شبحلها:كويس..
نزلت عيونها بإرتباك:تمام..
طول فاتت من حداه ومشت وهي ملخبطه ع الآخر...
هو ابتسم وهو يشوفلها..
بعدين تنهد وشبح القدام ومشي لحجرة الإداره...
🍁🍁🍁🍁
(رحم الله امرئ تعلق بحنان صوتك)
"هدى مريض نفسي ياربي..."
جتها رساله تانيه..
(لاتختبري اصرار من له قلب ان هوى طغى)
غاليه:ههههههه..يضحك والله..ابتسمت..لكن كلامه حلو..
تنهدت وقالت..ربي يهديه وخلاص..
دارت تليفونها صامت وحطاته في الدولاب..
رن ..
بس ماكانش هو كانت حميده...
لين فصل..
🍁حميده ببكي:وينك ياغاليه هالمعيشه السودا..
ع خشة الصديق..
الصديق:خيرك شن في ليش تبكي؟
حميده:امك مافيش فيها فايده ياصديق..شوف بنتك المليكه شنو دارتلها شوف..
قدم وشاف يد بنته وانصدم...
كانت مخبشه والبنيه وجهها لين مستزرق من البكي..
قريب هبل...
طول مشي ...
حميده حضنت بنتها:غبيني بنيتي مليكه ياناس شن ذنبها بس..
الصديق لما وصل في امه ماخلا ماحطلها وقال انه معاد خاشلها حوش وطلع عنها ...
وسالمه طلعت وراه للجنان تدعي:اقطع خلفك ياحميده..يرزيك فبنتك ياحميده بجاه النبي..
هو طلع وقربع الباب وراه وهي مازال تدعي..
سالمه:يكرهك فجلدك كيف ماكرهتي ولدي فيا ياشيطانه..
وحميده تسمع في الدعي وتبكي هي حاضنه بنتها بيده..
واليد التانيه حاطتها ع بطنها..
🍃ايه..حميده حامل..ومتكتمه هالمرة وماقالت لحد من خوفها متوجسه من كل شي ولت كل شي🍃
🍁🍁🍁🍁🍁🍁
مقعمزة ع كرسي من كراسي الكليه..
وفيدها شيت..
هو جي قعمز حداها..
هي تجاهلاته..
"بشيشة".
ولا معبراته..
"بشيشتي يامسمومه"..
ولاكإنه موجود..
وراها التليفون:باركيلي شريت تالت تليفون ليا من لما ولينا مع بعض..
شدت ضحكتها..
مالك بضحكه:اضحكي اضحكي..
ضحكت..
مالك:اااه ياقلب مالك المتملح فجرتك..بنخطبك راهو..
شبحتله :لالا مازال..بابا حيردك يامالك ..
مالك:غير خليني نجرب حظي..
نور:يامالك بابا حالف ماهو عاطيني قبل نتخرج مستحيل يحنت..بالله عليك مالك ماتحطش نفسك معاه في موقف ..
هو تنهد وشبح حواليه وقال:باهي اللي خشيتي الصيدله..
ضحكت نور..
شبحلها برفعة حاجب:اضحكي اضحكي ..
نور:ههههههههه...
هو ضحك وقال:بشيشة مسمومه..
ابتسمت بخجل..
🍃🍃🍃🍃
عدوا يومين...
في الليله الأخيره لمهلة التفكير...
في المربوعه..
ضو:هاك خديتي اسبوعين كاملات وانتي تفكري والراجل يراجي شن نرد عليه غدوة..
مرام بحزم:قوله مافيش نصيب...
ضو:علاش...
شرحتله مرام اسبابها...
هو اقتنع لأنه كان متخوف من نفس الشي..
حده رد عليها بكلمه وحده بس...
ضو برفعة حواجب:براحتك...
خدت نفس وناضت..
طلعت من المربوعه..
وطول توجهت للدار..
خشت سكرتها عليها ودموعها نزلوا..
مرام :هكي احسن...
🍁في الوقت اللي كان فيه هو الملهوف يعرف ردها اللي كان واثق مليون في الميه انه بالموافقه..
يراجي امتى يطلع صبح تاني يوم..
وطلع...
زاد استنى لين جت العشيه..
صلى العصر وتسقد طول لحوش صاحبه..
في الجنان...
ضو:والله شن بنقولك يابوصاحب نسبك نتمناه لكن..نصيب مافيش..
ارتفعوا حواجبه وقال:علاش؟؟؟
ضو:بصراحه ومانبيكش تزعل ولاتاخد مني موقف..قالت هو طلق وفاسخ وهدين حاجات تحتهن خطوط واجد..وبصراحه اكبر وسامحني...قالت اكيد العيب منه مش منهن..
هانيبال:هي هكي قالت..
ضو هز راسه بإيجاب..
هانيبال شبحله شويه بعدين قال:فيها كيف يابوصاحب نجيكم غدوة ...نتكلم معاها؟...
ضو مسح بيده ع لحيته وهو يشوف لباب الحوش..بعدين شبحله وقال:تو ?