المتمردين

العشق المتمرد

#العشق_المتمرد

#جمان_فريد

الجزء102 القسم الأخير

🌟..
الساعه 3:00ليلا..
《 :انت هكي تظلم فيا راك..تقول فكلام ممكن تندم عليه بعدين..》
رشف وقال:علي شن بنندم..مسح دموع عيونه بيد وحده وقال..ماعندي علاش نادم..احمم..اصلا اني مفروض نحمد ربي..
وخر شعره بيده للخلف وهو يهز فراسه بإيجاب ويقول..ايه مفروض نحمد ربي اللي فكني منك..بلع ريقه وقال..ايه..فكني منك..
《 كلام فاضي..تقول فيه من ورا قلبك..》
غمض عيونه ونزلت من وحده منهم دمعه وهويقول من أعماق قلبه المجروح:آاااااااه...آاااااه منه قلبي هدا آاااااه..
فتح عيونه..
ورجع مسح دموعه بعنف..وخر الكرسي للخلف تمدد عليه..
غمض عيونه ولف ذرعانه الزوز عليهم محاوله منه انه يرقد وينسى اللي صار ولو شوي..
💔💔💔💔💔
《 بالنسبه ليا اني هي صفحه ومزقتها خلاص..كنت غافل وربك وقضني وردني عن ضلالي..》
راقده ع جنبها وهي تشوف لصورته فتليفونها ودموعها ينزلوا وهي تقول بصوت يدوب طالع :عارفاتك..تكذب..مافي كلمة قلتها من قلبك...من زعلك كله قلته..واني والله عاذراتك..
《 لأن نظرة من عيني هلبه ع وحده زيك》
ضحكت من بين دموعها وهي تقول بنفس نبرة الصوت:خايف يجوا عيونك فعيوني..خايف تشوف دموعي..خايف تضعف...وتنسى زعلك كله فلحظه..
معذور والله معذور ..شن مادرت فيا اني نستاهل..
لكن كنت نبيك تعرف..اني..نحبك واجد..واااجد..
بصوت مخنوق..واااا..جد...
حضنت التلفون وقعدت تبكي..
وياقداش ذرفت دموع عذاب رزان..دموع معاش بت تم..ولابت توقف..
《 ومن الحاجات اللي فاهمهم انك توا تبي ترقعي عملتك وتصلحي اللي درتيه بش يرجعلك الجو المليح اللي كنت معيشوهلك..هدايا ودلع ودلال..》
قالت وهي مازالت حاضنه التليفون بعد اذكرت كلامه هدا:وجعتني منك واجد..وجعتني..لكن بيش نثبتلك اكثر اني مش هكي..لو حق فعقلك هالفكرة عني..
ناضت قعمزت..
حطت تليفونها ع الكامدينو..
وقفت ومشت لدولابها...
🍁🍁🍁🍁
تاني يوم..
الساعه 9:30صباحا..
واقف يشوف لكيس كبير لونه ازرق..غير عيونه لخالته وقال:هدا شنو؟
غاليه :هدين الحاجات اللي جبتهلها كلهم مش ناقصه منهم حاجه ..
مدتله كيسه صغيره فيدها وقالت:هدي فيها خاتم الذهب والسلسله..
قعد يشوف للكيسه اللي فيها الذهب ..
فيها الدبله اللي جابهالها بش تلبسها لما تطلع..
بش اللي يشوفها يعرف انها ملك خاص..
بس للأسف توا هي حره..
يعني لو في حد تمناها معاش يتردد..
طول يجي ويدق بابها..
صدره انصهد من النار اللي ولعت فقلبه..
لكن قال فنفسه بتكرار..
"ماتعنيلي شي..ماتعنيلي شي"
رمش عيونه بسرعه وقال:خليهم عندك..
غاليه برفعة حواجب:ماعندي ماندير بيهم..
عماد وهو يهرب بعيونه عن خالته:لوحيهم..ولعي فيهم النار ديري بيهم اللي بديريه..
ولف ومشي..
غاليه:لوحهم فطريقك..
وقف..
غاليه:بش تطمن اكثر انها مستحيل مازال تمس منهم حاجه..
التفت لخالته..
غالية برفعة حاجب:وتعرف ان عينها شبعانه..
قعد يشبح لخالته..
حس ان الكلمه اللي قالها كانت موجعه هلبه..وماوجعتش رزان بس...
نزل عيونه للكيسه..مشالها خداها..وخدي اللي فيد خالته ومشي بدون مايشبحلها..
هي قعدت معاه بعيونها وحالهم واجعها ع الآخر..
عارفه ان مافي حد فيهم طايبه عليه حياته من غير التاني بس انجبروا يختاروا الفراق..
كبرياءا...
🍁وصل فسيارته..
حط فيها الكيسه فالكرسي الخلفي..
وسكر الباب بقوة..
لبس نظاراته..ومشي ركب..
صكر الباب بقوة كذلك..
شغل السيارة وتحرك...وهو يحرق فالعجل..
💔هي كانت تشوفله من الروشن..
ودموعها معاش يبوا يفارقوها من يوم فارقها..
فم البوابه..
كفايه طلعت مالقتاش قالت بخوف:ياواقي من الطريق..
غاليه بألم:ماتخافي عليه من الطريق..خافي عليه من نفسه..
كفايه بحزن:خايفه وهلبه..غير كان نعرف شن صار بس..
التفتت غاليه وخشت وهي تقول:اللي صار صار..
تنهدت كفايه بألم وخشت وراها..
🍁🍁🍁🍁
الساعه 2:00بعد الظهر
ماشيه في الحوش وهي تشوف فيه قالت بصوت عالي شوي:كويس ..ومريح..
وصلت في الكوجينه ووقفت في الباب..
نادرة وهي تشوف في الغدي:والله مفرش ماناقصاته حاجه..ونظيف..هكي يقول..قالتها وهي ضم فصوابع يدها اليسار وتفتح فيهم..
لمياء بإبتسامه:بارك الله فيه عمي الزروق..
نادرة غطت الكسكاس وقالت:ايه والله..
مشت لمياء من قدام الكوجينه متوجهه للدار اللي فيها اختها
وصلت فيها وخشت لقتها لاهيه بالتليفون
لمياء؛التغطيه كويسه؟
سناء وهي لاهيه بتليفونها:باهيه
قعمزت حداها تشوف فيها شن دير لقتها خاشه ع القوقل..
شبحتلها وقالت بملل؛باهي لعند امتى بتقعدي هكي تخنبي فقطاف من ع المنتديات وتنزليه مناشير وتراجي منه ف لايك..
سناء بضحكه:لموشه ماتستهنيش باللي ندير فيه...
نزلت تليفونها وشبحت لأختها وقالت..اني نزل في بوستات يمسوا حالته شي هكي يعبر عن اللي يحس بيه ومافيش منشور نزلته لتوا الا ودارلي عليه لايك..وصدقيني هدا حيحرك فيه شي حتى لو فضول اتجاهي..
لمياء برفعة حاجب وهي مبتسمه :وطبعا هو توا نفسيته تاعبه ومجروح ويبي حد يفضفضله..
سناء:هههههه..قربتي
لمياء بضحكه:إن شاء الله تشد معاك..
سناء:يااااارب..وتوا اطلعي من حداي خليني نلهى
بشغلي..
لمياء ناضت وهي تضحك وتقول:الهي الهي....ويارب اخرة شغلك هدا دبلتين وفيلو وبدله رسميه..
سناء بهويام:اااااه..يااارب..
لمياء:ههههههههههه..
وكيف جايه بتطلع من الباب رن تليفونها شافاته:حييييي رهيمااا..
نطت سناء من مكانها وجتها..
لمياء فتحت الخط والمايك وقالت:مكلوب..
ابراهيم:بايرة..
ضحكوا الزوز..
ع جية امهم وهي تضحك بفرح:ابراهيم!!
ابراهيم:نويدرة..
نادرة بضحكه:ياسفتول يامعفن ياخامر هدا وين تتصل وتعيد ياجرو..
التلاته:هههههههههه...
ابراهيم بضحكه:انشغلت امس..ايه قولولي بوي معاكم..
نادرة: لا بوك قعد عند عمك في تاجوراء..
ابراهيم؛وانتم من معاكم؟!
لمياء:عامر يارهيما ماتخممش وبعدين حتى عمورة ولا ولدكم راهو..
ضحكوا..
ابراهيم بضحكه:كلمني امس قالك..
لمياء بإبتسامه؛ايه
🍃طبعا هي اصرت ع عمر يكلمه بإعتباره خوها الكبير وليه قدره..حسب ماهي مفهمه الجميع🍃
🍁🍁🍁🍁
بس في اللي مايحتاجش حد يتكلم عنه بش يديرله قدر.
في اللي قدره بالعين ينشاف من ناسه واحبابه..
الساعه 5:30عصرا...
في الصاله..
كلهم مقعمزين وفي اللي واقفين..
محمد فصدر الصاله مقعمزشاد تليفونه ويشبحله ويراجي زي ماهما يراجو..
محمد:الخمسه ونص..
شبحوله..
رن التليفون..
محمد بضحكه:انجليز
ضحكوا..
فتح الخط والمايك وقال:ايواااه..
هانيبال:مرحبا..وينك تو..
خواته والبنات مجرد سمعوا صوته عيونهم دمعت..
محمد :في الحوش حدا العيله..المايك مفتوح
هانيبال:اهاا...كل عام وانتم بخير ياااا..
ضحكوا..
وردوا بأصوات متقطعه:كل سنه وانت طيب..
هانيبال بضحكه:بما إني كلمت امي بكري..توا بنبدا باللي تجي بعدها...
زينب ابتسمت ودموعها ينزلوا..
هانيبال:زنوبياااا..شن جو..
ضحكوا..
زينب :الحمد لله..انت كيف حالك شن داير..
هانيبال:اني كويس مابياش...خبريني انتي شن تسمعوا عن اللي خليتوه وراكم..
وقعدت زينب تحكيله وهو يسأل فيها..
وبعد كمل معاها...كلم نعيمه وسألها حتى هي نفس الأسئله..
وكذلك كفايه..وبعدين كلم غاليه..
بعد غاليه..
هانيبال:وين صغيرتكن؟اجلت اتصالي لليوم ع خاطرها..
كلهم وجوههم تغيرت..
فاطمه شبحت لحميده اللي دموعها ينزلوا..
مسحتهم وقدمت وقعمزت حدا محمد:شنو حالك ياهانيبال..
هانيبال:اني حالي باهي انتي شنو حالك وشن حال حننو والصديق إن شاء الله طيبين؟!
امها حداها شدت ع ذراعها..
حميده غمضت عيونها بشده وفتحتهم وهي تقول:الحمد لله كلنا كويسين..شنو حال مرام وشنو دايره فقرايتها؟
هانيبال بضحكه:بنت عبوده..اهي معاكن..
محمد عطي تليفونه لغاليه شداته وناض طلع من حداهم..
مرام:السلام عليكم..
هانيبال:خشي طول فالموضوع..عيدي عيدي..
مرام:هههههههه..باااهي..
فاطمه:خلي المراة..
هانيبال:ههههههه..
كلهم ضحكوا..
عيدت عليهم وهدرزوا شويه بعدين قالت:عمتي بيان صابر رابع يوم العيد قالتلك امي ولا..
فاطمه بإبتسامه:ايه ياحنه قالتلي وبنعدي معاها..
مرام؛ياريت حتى غاليه تمشي معاك..
شبحوا لغاليه اللي ابتسمت..
فاطمه شبحت لغاليه وقالت:هاه بتعدي؟
غاليه :باك ندير زحمه يامرام..
مرام:زحمة شنو؟امي واختي فايزة واختي خديجه ووحده من خالاتي ووحده من عماتي ..
قاطعها هانيبال:وجمعيه الكدرونيه وسليمه الدايريه..
مرام:ههههههههههه..
فاطمه بضحكه:الله يرحمهن..تجبد في الميتين ليش تو..
كلهم:هههههههههههههه..
مرام بضحكه:المهم ياغاليه..ماقعد كان عمتي وانتي بس..
غاليه بضحكه:باهي تمام..
غزلان وهي تسمع في المكالمه حبت جو هانيبال مع مرته وحبت مرام اكثر اللي مدايرة قدر كبير لعزوزتها وحمواتها..من البدايه نظرتها لمرام كانت حلوة والوحيده اللي ارتاحتلها من بين كل سلفاتها..
🍁سأل هانيبال ع رزان..
اللي بعتوا خوها يناديها..
وهي ع خاطر عمها جت..
لما خشت عليهم كلهم ركزوا ع شكلها كيف رايح..
عيونها حمر منفخات..ووجهها شاحب..تكلم فعمها بصوت مبحوح..
سألها خيرها..هي قالت محصلة بردة..
وحناها تشوفلها بنظرات وجع...
بعدها كمل هانيبال المكالمه..
هانيبال:هي مالا انستوا بعض وان شاءالله تولوا لحياشكم طيبين وحياشكم سليمه مافيهم شي..
كلهم:آااامين..
هانيبال:بالسلامه..
كلهم ردوا بأصوات متقطعه:بالسلامه..في أمان الله..
وصكر..
🍃تنهد وشبحلها..
هي شدت يده وقالت؛تمنيت لو قدرت ناخد اجازة حتى اسبوع..
قام يدها وباسها ..بعدين شبحلها وقال:انتي توا الهي بقرايتك وبس وارفعي راسي..ماتفكري فشي غير هكي..
ابتسمت بحب وخشت لحضنه..وهو لف ذراعه عليها وباس راسها..
💕💕💕💕💕💕
🍁🍁🍁🍁🍁🍁
الساعه 6:15مساءا..
كان الجو لطيف..نسمته بارده..
مقعمزين في المستراح اللي قدام الحوش..
نعيمه اطيب فشاهي العاله..
وهما حداها يهدرزوا..وأغلب الهدرزة ع عرس رباب..
بس في حد كان ناقص..
🍁رانيا..
اللي كانت تتمشى في القطعه..
شبه مختليه بنفسها وتفكر في كل اللي صار معاها..
تذكرت استاذها زين..واخته..
قعدت تبكي..
ولما حاولت تهدي نفسها وتكف بكاء..
رجع من جديد خطر عليها اللي ديما فبالها..
لما وقفوا رجليها حدا الفاسكيه الكبيرة العاليه اللي جايه بين الحوش القديم وحوش خالها ميلاد..
ابتسمت بين دموعها وين خطرت عليها وحده من اهم الذكريات..
⚡فلاش باك..
عيد الفطر سنة 2005..
ماشيه تعبي في ميه من الفاسكيه..
فتحتها..نزلت الدلو متاعها..عباته بعدين رقاته..
خدت الدلو بعد رقاته وقعدت تصب منه في البرميل..
بعد كملت نزلاته من جديد..
"هاتي نكمل عنك"
جمدت فمكانها...بعدين التفتت..
لقاته يشوفلها بإبتسامه حلوه..
ابتسمت بخجل بعدين وخرت..
هو قدم وكمل باقي تعباية البرميل..
هي تتأمل فيه بإبتسامة حب..💕
هدا كان اول لقاء بيناتهم بعد اعترافه ليها بحبه..
والزوز كان حالهم احرف من بعض..💓
كمل ..
وصكر البرميل..
والتفتلها..
هي قعدت تشبحله..
وهو يشبحلها..
رمزي:ماجاني رد..
هي نزلت عيونها وهي بتموت من الخجل..
رمزي:رانيا..
قامت عيونها فعيونه..
اللي كانت نظراتهم تعبر عن هلبه حاجات حلوة💓
رمزي حرك راسه متسائل "بمعنى شنو"..
هي ابتسمت بعدين شبحت للبرميل وقالت:ايه..
ولفت ومشت بسرعة وخلاته..
مشي وراها خطوة وقال وهو قارن حواجبه :تي غير شنهو اللي إيه؟!..
هي قعدت تجري ..لعند مااختفت من قدامه وخشت ممر فم البوابه..
ضحك وحرك راسه ايمين ويسار وخدي البرميل ومشي بيه لحوش جده..
⚡الوقت الحاضر..
رانيا بألم:آااه يارمزي آاااه..غير امتى تجي امتى؟!!
فجأة..
فتحت عيونها ع وسعهم..
لما بانت عليها رزان جايه من ورا الحوش القديم واضح انها كانت فم بوابته..
كانت تمشي مشية حد منهك وتعبان..
وتبكي..
رانيا قعدت مركزة عليها..
ورزان وهي ماشيه قامت راسها جو عيونها فعيون رانيا..
وقفت..
قعدت تشبحلها..
ورانيا من بين دموعها تبدلت ملامح وجهها الحزينه للكره..
خطر عليها كل شي عاشاته والحاله اللي كانت فيها لما تفارقوا هي ورمزي..وشن صار فيها وفيه..
وتشوف حاليا فوضع الإنسانه اللي كانت سبب في اللي عاشاته كله..
تلقائيا ..ارتسمت ع وجهها ملامح ابتسامة شماته خفيفه..
رزان لاحظتها وفهمتها..
بس ماكانش عندها طاقه بش تتأثر بأي شي تاني غير اللي هي فيه..
نزلت عيونها ...وكملت طريقها لحوشهم..
"ربك ماينسى شي"
وقفت..
رانيا:ذوقي من اللي ذوقتيهولي اني وخوك..
نزلوا دموع سخان حرقوا جفون رزان..
رانيا بحقد:ربي يزيدك..
ومشت فاتت من حداها بعد خبطتها بكتفها قصدها..
رزان كان حيلها مهدود بكل معنى الكلمه..
فقدت توازنها من الخبطه لكن شدت روحها..
بعدين شبحت ايسارها..لقت رانيا اللي كانت تمشي بعصبيه كيف خشت ممر فم البوابه..
مسحت دموعها ..شبحت القدام وكملت طريقها للحوش وخشت..
🍁🍁🍁🍁
الساعه 10:00ليلا..
حدا الجرف..
والله احسن شي اديره..
ابتسم مالك وقال:وهكي هي تكمل قرايتها..واني نكون منظم اموري من جميع النواحي...
محمد:وتخلي الكبار يمشوا في موضوعك امك وبوك..
مالك بضحكه:برغم انك مادرتش هكي..
شبح محمد للوادي وهو يضحك قال:في فرق..شبحله..في حالات كيف الوقت الضايع فمباراة كان استغليته صح تفوز..غير هكي تخسر..وتمتلك..
ضحك مالك وقال:مزبوط عندك حق..هدا ضحك بعدين قال..خال..
محمد ضيق عيونه..
مالك:تعرف شن صار بالزبط مع عماد؟..
رجع محمد غير عيونه للوادي وهو يقول:ماتفاهموش بس..
فهم مالك ان حتى خاله محمد يعرف شي مايبيش يحكيه..
الليله اللي قبلها عماد قاله كل شي..بس مع هدا في حاجات مش فصالح رزان ماقالهمش..خاف عليها منه..لذلك اكتفي بكون رزان وصلتها معلومه عنه غلط وهي صدقتها وسيباته ع خاطرها ولما تأكدت تبي تصلح غلطها وتولي لكن هو صكر عليها الطريق..
هو محمد ماحسش ان في حلقه مفقودة..يعني يكفي الراجل البنت اللي يحبها تظلمه وتسيبه بش تنجرح كرامته وينهان كبريائه..
🍁🍁🍁
حرقتني ياتيفسا حرقتني..فوق كل اللي راته مني كذبتني وصدقت فيا..
تيفسا:بصراحه وماتزعلش مني..الراجل لما يبدا عنده ماضي ساهل جدا يصدقوا فيه..
شبحله وقال بعصبيه:يادي الماضي اللي انذليت بفية اصله..اول ولا اخر واحد كان عنده ماضي لبز فيه!؟تي ياراجل في اللي لتوا يلبزوا ومتزوجين راهو ونساوينهم قايمنهم من ع الوطا قيمان الزفت..
تيفسا :اللي ادير هكي صدقني ماتحبش راجلها..اللي دير هكي وحده تبي تقعد عايشة في استقرار حتى لو كان وهمي..بعدين قولي..يعني لو هي ماغارتش عليك كنت حتفرح؟!
غير عيونه للبحر وماباش يرد..
تيفسا:ع العموم ياصاحبي..البنيه راهي تحبك من قلبها ممكن ماعرفتش تتصرف..وغلطت صح..لكن صدقني تحبك..
تنهد تنهيده طالعه من القلب وقعد ساكت..
وتيفسا ابتسم وقعد يشبح للبحر حتى هو بعدين :باهي اللي تاجوراء بعيده ع حرب البسوس..
ضحك عماد وقال:قصدك حرب المطار..
تيفسا بضحكه:وسجل ياتاريخ..
🌴🌴🌴🌴🌴
تاني يوم ..
الساعه 9:00صباحا..
بيتسقدوا سعد وحميد بعايلاتهم..
ومعاهم عبدالسلام وخيري برواحهم
كل واحد فيهم خلا لزوجته مبلغ تصرف منه لفتره لين يدبروا وين يقعدوا في حال طولت الحرب
كل وحده ودعت راجلها ومخليه قلبها عنده وعارفين انهم لابد وحيمشوا للحياش يشوفوهم في حال لقوا كيف..
في الحوش..
كانت غاليه تكنس في الصاله..
عيونها  جو ع حنين وهي واقفه برا..
تبان البنيه مركزة فشي..
غاليه وقفت اللي ادير فيه..وقدمتلها بخطوات بطيئة بعض الشيء..
وصلت فيها لقتها تشوف لخيري كيف يلاعب فروان ويهدرز عليها ويبوس فيها..
نظره عيون حنين كانت زي اللي تخوف..
غاليه كلمتها:حننو ندوشلك..
شبحتلها حنين وقالت:وين بابا؟
صدم السؤال غاليه هلبه..بس حاولت تجاوب:بابا عدا للعمل  وتو يروح..
حنين:امتى؟!
غاليه ابتسمت بألم وقالت:قريب..احم..هي تعالي ندوشلك هي..
شدت حنين يد خالتها..
غاليه قامتها فغمرها وباستها من خدها وخشت بيها داخل..
🍁🍁🍁🍁
الساعه 12:00قبل الظهر...
مقعمزات في الدار حدا امهم بيبلغوها بخبر مهم..
وسلموا المهمه لنعيمه..
نعيمه بإندفاع من التوتر:يمي..الهادي طلق سميه..
شبحولها خواتها بصدمه..
فاطمه:خلها..تبيها..
شبحوا لأمهم وزادو انصدموا..
فاطمه:نبيهلها من قبل بش تربى..
زينب:وكان ماتربتش!!؟
فاطمه:لاتتربى ..سميه تخاف من الطلاق..ديما تحكي ع اختها كيف اللي خايفه تعيش زيها..لاتطلع لاتخش لاتلبس لادير شي وكل حاجه محسوبه عليها..واللي كيفها الطلاق يأدبهن..
شبحوا البنات لبعض وكأنهم اقتنعوا بكلام امهم..
ماعدا حميده اللي خوفها الكلام اللي سمعاته عن حال اخت سميه المطلقه..يعني هي حيصير فيها هكي وممكن احرف!؟
وهالخوف اللي تسلل لقلبها خلاها ترجع تعيد حساباتها..
🍃🍃🍃🍃🍃
ويمروا الأيام..
ومازالت الأخبار تتوارد ع حال طرابلس والحرب فيها وكل مرة يطلع خبر جديد..
ناهيك عن الإشاعات اللي تطلع بين الوقت والتاني..
الحياش كلهم انخنبوا..في المنطقة الفلانيه
حولوا الحياش لتلاجه موتي..في المنطقه العلانيه..
وزي هالاخبار واكثر اللي خلت البنات ع اعصابهم..
واللي زاد زينب بالذات ع مابيها مرواح حمزة وسند بش يشوفوا اشغالهم..
برغم ان سند حيقعد ماشي جاي..مش زي حمزة اللي بيروح ومعاش بيولي..
وكله كوم..
وتصرفات حميده كوم...
🍁🍁🍁🍁
فتحت رباب التلاجه بش بطلع طرف جبنه بديره نص لأختها روان..
ع خشة حميده للكوجينه..
حميده:الجبنه هدي جايبها محمد امس ولا..
رباب شبحت لطرف الجبنه وقالت:مش عارفه؟!
حميده:لاياحنه لازم تعرفي..خالك ماهو راقد ع بنك بش يقعد كل يوم يكركر ويجيب ..اقتصدوا..
ولفت ومشت طلعت من الكوجينه.
رباب بغيظ:والله لما انديره باهي...!
🍃وولأسف ماوقفتش عند هني..
مجد كان واقف ع الطرمس المحطوط في الممر صب ميه وقعد يشرب..
جاته طول وقالت:هيي بالشوي ع الميه خوالكم يشروا فيها بالفلوس راهي..
مجد اتكنطا حط الطاسه بقوة ع الطاوله ومشي..
حميده:إن شاء الله تنفجر..
🍃وكل مالها تزيد تمادي..
غاليه:زيت يمي ناقص بكل بنوقف قلي ..
فاطمه:باهي..
نعيمه:غير كان يفتحوا علينا حتى من مصراته راهي خشتلنا البضاعه والغاز..
محمد:قالوا الغاز بيجي من مصراته الأيام الجايه..
زينب:إن شاء الله..
حميده:ايه عاد كان جي ساعدوا عليه مش كل ساعه قهوة شاهي سبول فطيرة ..انظر شنو ..
غاليه فنصت..
ومحمد استغرب فكلامها..
فاطمه:ايه هو هدى ساعدوا ع كل شي..
نعيمه وزينب شبحوا لبعض..
الزوز حسوا انهم ثقلوا هلبه خصوصا اللي عندهم من فلوس خلاص قريب يتم..
في الدار..
رانيا :نفسيتي تعبت..
رباب:احرف منك..
دلال:اني التلقيح مانتحملاش..
رانيا:بالذات تلقيح خالتك حميده..تحسب علينا في النفس الهم..
نور:راسها وراس الصغار.. اولامس شافت مجد مطلع حكة الحليب يومها صب منها ع القهوة..امشي بعدها دسيها ودسي حتى المصكرات..
دلال بتفنيصه:واني نقول وين مشي؟!
رباب بغضب:هلبه هكي هلبه..حسبي الله ونعم الوكيل في اللي شردنا وخلانا ننذلوا..
رانيا:رباب!!
دلال :فكينا..
ناضت رباب وهي معصبه قالت:والنبي انتم اللي فكوني ترا..
مش طلعت من حداهم وهي تقول:تمرمدنا ..اتشردنا ..انذلينا..
كلهم شبحولها بإستغراب..
زينب:رباب؟!
فتحت باب الدار التانيه وهي تقول:يما والنبي خليني فحالي..
خشت وقربعاته وراها..
حميده:هيي الباب بالشويه عليه..
كلهم اللي فالصاله واللي فالدار فهاللحظه تمنوا يخرسوا لسان حميده للأبد..
اما رباب داخل انهارت بالبكي..
النفسيه مضغوطه..والوضع مزري..صعب ع البنادم يتظاهر بالبرود طول الوقت..
محمد ناض من حداهم وهو يقول :لاحول ولاقوة إلا بالله..
🍃🍃🍃🍃
ومازالت تعدي الأيام..
وكل ماله الوضع يزيد يتأزم..
كل شي نقص بزايد...
حتى لما تخشلهم حاجه من المدن المجاورة التجار يغلوا فيها فالسعر...
جي فيوم عبدالسلام..ماخلا ماجاب من بضاعه..
من كل شي..خضرة..لحم..دجاج..معلبات واجبان وحليب وعصاير..
وسند كذلك في اخر جية جاب معاه مبلغ باهي من حسابه الخاص وقعدوا يصرفوا منه..
بس مع هذا ماحد سلم من حميده..اللي ماتبي حد غيرها يقعد في الحوش..
🍁طق قوي ع باب الحمام..
حميده:تي هيااا عاد حتى ع الحمام مالحقنا الهم!!
في الدار..
لمياء:تس تس تس...
نعيمه:هادي شن تبي فراسها بالزبط..
زينب:مش عارفه لوين تبي توصل..
دلال:معاش تبينا نقعدوا واضحه..
رانيا:وعلاش ؟!قاعدين ع قلبها حني؟!
دلال :ايه..
برا...
انفتح باب الحمام طلعت منه نور وهي تكشخ:عليك عيشة سودا مغبرة..
وفاتت من حدا حميده اللي كانت تمتم وتقول:ع راسك ياحقيرة..
وخشت للحمام..
اما نور مشت للدار التانيه خشت وسكرتها عليها..
هدا كله وغاليه في الكوجينه كيف باديه اطيب في العشي وهي مضايقه ع الآخر من تصرفات حميده اللي ولت بدون مبرر..
في اليوم نفسه..
خوتها الهادي وعمر كانوا ماشيين للصديق اللي سمعوا بيه روح بش يتفاهموا معاه ع موضوع الطلاق..
الصديق:مانيش مطلق..
عمر بتضييقة عيون:كيف؟؟
الهادي بحده :قلنالك هي تبي الطلاق..
الصديق بإستفزاز :واني..قلت..مانيش..مطلق..
عمر شبح للهادي وهو فقمة الغضب..
الهادي:اسمع ياولد الناس خلينا كيف ماخشينا بالمعروف نطلعوا بالمعروف..
الصديق:اني قلت مانيش مطلق..مرتي مازلت نبيها..
الهادي ناض وناض معاه خوه..
الهادي بحزم :وهي قالت تبي تطلق وهدى اخر كلام عندها..
ومشي وعمر وراه..
هو ناض ومشي وراهم وهو يقول:تقعد معلقه ..
عمر وقف والتفتله وقال بحده:تقعد معلقه عمرها كله ولا تويللك..
رفع الصديق حاجبه..
الهادي:هيا عمر..
شبحله عمر من فوق للوطا بعدين تلفت لخوه وطلعوا الزوز مع بعض..
الصديق قدم بسرعه للباب وقربعه بقوة..
"طلقتها وفكيتنا "
التفت لحليمه..
حليمه:اني مستعده نعطيك مؤخرها تلوحه فخليقتها هالعزوز المخمجه..
الصديق قعد يشبح لحليمه...
للحظه نساها..
قعد يشوفلها بإستغراب...
حليمه:صديق!
غمض عيونه بشده بعدين فتحهم وقعد يشوفلها..
حليمه قدمتله لين وقفت قدامه وقالت:خيرك ساكت؟!
ارتسمت ع وجهه ابتسامه وقال:انتي فوتيه الموضوع هدى وخليه عليا..اني مطلقها مطلقها غير قبل نبي نربي هالكلاب اللي نافخين ارواحهم ع الفاضي..
ضحكت وقالت؛صدقت..
🍁🍁🍁🍁
الساعه 8:30مساءا
في المربوعه..
يطلقها وكرعيه فوق راسه الوسخ هدى..
فاطمه:وباهي كان يبي يردها وين بيحطها ؟!!
عمربنفاذ صبر : احني مش فهدى يمي..شبح لخوته وقال..كان يبيها بالمحاكم نخلوها بالمحاكم..
الهادي:خل في الاول ندخلوا كبار القبيله قبل ونشوفوا شن يصير..
محمد:تكبروله فقدره الخسيس هدى..
فاطمه بإنزعاج:ماهوش هكي..هدى المعروف عندنا من قبل يخشوا فيها كبار القبيله..وكان فيها كيف المزلس "المجلس" وبعدين تجي المحاكم..
🍁برا..
كانت حميده واقفة تتصنت..
فهمت من عدم قبول الصديق طلب الطلاق..هو تمسك بيها..وهالشي خلاها تفرح..
بشني تفرح؟!
بكون انها ماتلقبش بالمطلقه..
عادي جدا تعيش مع ضرة ولاتطلق..
زي هلبه..
شايفات ان الطلاق عيب..وعار..
مستعدات يقبلوا بكل شي ..
تعيش مذلوله بلاقيمه..ولا تطلق..
برغم ان الطلاق..شرع..حلال..حل..
نهاية لحياة اشبه بالجحيم..الموت..
لكن مع الأسف..
🍃نظرة المجتمع هي الشرع والقانون 🍃
🍃🍃🍃🍃
بعد اربعة أيام..
نزلت من الدروج..
وخشت للحوش..
كان شبه هادي..
استغربت..
شافت ايسارها لقت حميده تتفرج ع التلفزيون..
ابتسمت ومشت خشتلها..
لمياء:السلام عليكم.
حميده شبحتلها وقالت :وعليكم السلام..
شبحت لمياء وهي تقعمز للتلفزيون لقت حميده حاطه ع قناة ليبية اخباريه..
لمياء:خلاص الحرب شبه تمت..حتى ماليا روحوا اليوم..
توسعوا عيون حميده وهي تقول:روحوا؟؟
لمياء:ايه روحوا خلاص جيهتهم معاش فيها شي..
رفعت حميده حاجبها وولت تشبح للتلفزيون..
ابتسمت لمياء بشيء من الخبث بعدين قالت:ايه حميده بنسألك؟
شبحتلها وقالت:شني؟
لمياء:مازال مصرة ع الطلاق؟
حميده تنهدت بعدين غيرت عيونها للتلفزيون..
ضيقت لمياء عيونها وهي تشوفلها بعدين قالت:لو منك نعد للمليون قبل لنفكر نطلق..ونخليلها راجلي..
حميده حست بنار وولعت فيها..
لمياء:انتي الاولى وانتي الأحق بيه..تي انتي لازم تطيريها مرة وحده..
كلام لمياء نخر مخها نخر..شجعها اكثر ع فكرة الرجعه..
لمياء:خليك فالحه وفكيك من جو كرامتي ماكرامتي ومش عارفه شني..خيابه هادي..
تنهدت حميده وسرحت بتفكيرها..
ولمياء تشبحلها..
🍃وجود حميده موتر لمياء مخليها متاكده ان حميده حتولي عليها حتى هي واحتمال تخليها غصب عنها تقسم لهدا تبي تتخلص منها بأي طريقه..ومافيش انسب من هالطريقه 🍃
فجأة..
خشت عليهم حنين تبكي..
شعرها مريش ومخبشه..
حميده بخلعه:من دار فيك هكي!!؟
حنين وهي تبكي بالعبرة:روا..ن..
فنصت حميده...ضمت شواربها لداخل بغضب شديد..
وناضت وطلعت طول من الدار..
لمياء:حيه حيه..
وناضت لحقتها والبنيه وراهم تبكي..
وصلت فم البوابه ..
لقت زينب واقفه ع بنتها وتهزب فيها..
بدون وعي جبدت حميده روان ..وضربتها كف..
زينب ورباب ورانيا عيطوا..
ع طلعة غاليه من الحمام ...كانت دوش..
قدمت رانيا لحميده دفتها بيدها وقالت بغضب شديد:كيف اديري هكي ياحيوااانه
كلهم انصدموا فرانيا
دفتها حميده وقالت:ماشاء الله ع الربايه..كلكن شلولحات كيف بعضكن..
زينب بغضب:حميده صكري فمك احسلك راني ليا وقت ساكتتلك..
حميده:لااا ياحنه ماتسكتي طلعي اللي عندك طلعيه..
غاليه جبدتها وقالت:خشي داخل بلاعار..
دفت غاليه وقالت:لا مانيش خاشه..شبحتلهم بكره وقالت..علاش مازلتوا قاعدين لتوا هااا علاش..الحرب وتمت عدوا روحوا ووسعوا علينا شوي..
زينب دموعها نزلوا شبحت لغاليه وقالت:سكتيها ياغاليه مانبيش نغلط في الكلام غاليه ببكي:خشوا ياعاري خشوا داخل..
رباب :وحده مريضه اقسم بالله مريضه..
حميده:ماناقص الا وحده كيفك انتي..خليني ساكته خير..
فنصوا وهما يشوفولها
رانيا بعصبيه شديده:يماا..حوش المخلوقه هادي فوسطه  ماناش قاعدين فيه
حميده بتهكم:غير شن ريتي منها المخلوقه هااادي!!مادرت فيكن ربع اللي دايراته نجيه وهناء اللي مقطرات فعيونكن التوم
لمياء جبدتها وهي تقول:تعالي خشي ياسر الناس شهدت علينا
حميده:والله لو فيكم ذرة دم ماتقعدوا..
لمياء وهي تجبد فيها:اسكتي خلاص اسكتي ..ودفتها وخششتها داخل..
غاليه كانت ترعش مع بعضها ومش مصدقه اللي صار..
زينب بصدمه:اني والله الليله مابايتتها هني..
رباب بصوت عالي:العرس اللي تبوني نديره هني والله ماني دايراته..
زينب تبكي هي ورانيا..
وغاليه تبكي وتندب وتقول:حي ع العار...
ع جية ميلاد من الجامع كان يصلي في المغرب..
سمع الدوشه..
ضيق عيونه وقرن حواجبه بإستغراب..
كيف قرب من فتحة الممر..
طلعت سعيده من الحوش جايه تجري..
كانت تصلي في دار رمزي وسمعت كل اللي صار .
وصلت في الممر وقالت:تعالي زينب..
ميلاد شبحلها وقال:شنو في؟
زينب تبكي وخلاص..
والبنات يشوفوا لخالهم ومرت خالهم..
قدم ميلاد وهو مستغرب ع خايف يسأل:خيركم شنو في..
زينب شبحتله وقالت ودموعها ينزلوا:تخليني نقعد فحوشك الليله بس..
غاليه غمضت عيونها بشده..تاسفا.
ميلاد جي لزينب وخداها فحضنه وقال:اقعدي ليالي مش ليلة وحده..
هي شدت فيه..
قعد يمشي هو وياها..
هو شبح للبنات وقال:هي تعالوا خالي..
قامت رباب اختها روان فغمرها..
ورانيا مسحت دموعها..
ومشوا مع بعضهم ورا خالهم وامهم..
وغاليه واقفه تشوف فيهم لعند ماادرقوا..
سعيده شبحتلها بأسف بعدين مشت حتى هي..
غاليه بألم:اخييي ع الوقت اخييي..
🍃مش الوقت اللي اخيي عليه..احني اللي اخيي علينا🍃
🍁🍁🍁🍁
هداكا اليوم ..
كان محمد طالع بأمه ونعيمه وبناتها والصغار للوادي يغيروا جو..
زي ماليوم اللي قبله رفع اخته زينب وصغارها..
مروحين وجوهم كان حلو بالمرة..
وتقابلهم الصدمه..
نعيمه:معقوله!!؟
لمياء:والله زي مانحكيلكم..
دلال:قصدك توا خالتي وبناتها فحوش خالي ميلاد!
لمياء:ايه..
نعيمه بصدمه:لاحول ولاقوة الا بالله..
نور:لو كنا هني راهو لحقتنا بيهم..
لمياء:حمدت ربي اللي ماكنتوش هني..
ع خشة غاليه..
شبحتلها لمياء وقالت:شن صار فيها؟
غاليه:رقدوا هي وبنتها..
نعيمه:معقوله ياغاليه لزان مرة وحده؟!
غاليه بضيق:حميده نفسيتها تاعبه واجد يانعيمه قاعده تفش غلها في اللي حداها وخلاص مادير فشي من قلبها..
دلال غمضت عيونها بملل وفتحتهم..
نعيمه:باهي فاهمين ان نفسيتها تاعبه وعندها مشاكل لكن مش لهالدرجه ياوخيتي..
لمياء:صادقه..مزودتها ياغاليه..
شبحتلها غاليه بطرف عينها بعدين شبحت لنعيمه وقالت:تعشوا؟
نعيمه فهمت ع غاليه ليش غيرت الموضوع فردت تقول:ايه..
غاليه:باهي..
لفت ومشت بتطلع..
لمياء ناضت:خل نمشي نعاونها..
ومشت طلعت من حداهم..
نعيمه:اني بنكلم بوكم يجي يروح بينا خلاص حتى بيصين الحوش يصينه وحني فيه..
دلال:احسن شي..
سكتوا شويه بعدين قالت نور:نمشي نجيب اسيا
دلال:باهي
ناضت نور
ومشت..
طلعت من الحوش من جهة القداميه لقت مؤنس وأيمن وحداهم الاولاد يهدرزوا مع سند اللي قايم اسيا فغمره..
ضحكت وقالت:ماعندهاش الروح مع سند البطشه هادي..
مشت وقفت حدا السروله ..
شويه ونزل سند وشدها من يدها وقعد يمشي بيها لممر فم البوابه..
ضحكت ومشت خشت للحوش من القدام..
في الممر..
س..ند
اسيا:س..ند..
سند بضحكه:باهي قولي..سند..
اسيا:ثند..
سند:ههههههه..توا بس نطقتي السين صح يابطه..
ع طلعة نور من فم البوابه:بيبة خاتي..هي تعالي..
اسيا:لا...س..ند.
الزوز:ههههههههه..
قامها فغمره من جديد وقال:ربي يحفظها..
نور:تسلم..
ضيق عيونه وهو يشوف لنور قال:قوليلي شن صاير..
نور:كيف شن صاير؟
سند:توا واني نهدرز ع مؤنس..قالي صارت دوشه بكري سمعناها..خاف لو كان في حد صايرتله حاجه..حتى يكلم فرباب ماتردش عليه..
تنهدت نور وقعدت تشوف لآسيا اللي تلعب بسلسله سند..
سند:معناها في حاجه..
نور شبحتله وهزت راسها بإيجاب..
سند قرن حواجبه وقال:ترا ناديلي امي..
مطت شواربها لداخل بأسف وقالت:خالتي فحوش خالي ميلاد..
رفع حواجبه..بعدين وزع نظره حواليه وقال:تمام..
شبح لآسيا:هيا آسو بري لخالتك..
نزلها..
اسيا قعدت واقفه تشوفله كيف مشي من حداهم بطريقه لحوش ميلاد..
شبحت لخالتها وقالت:امشي معاه..
ضحكت نور وقالت:تمشي مع عينك تعالي نخشوا لماما..
اسيا بغضب:انتي خي..
نور:هههههههه..
وخشت هيا وياها داخل..
🍁🍁🍁
هديكا الليله ماتحركش سند من حوش خاله ميلاد..
قعد طول الوقت مع توفيق..وبالمرة حصلوها فرصه يتناقشوا ع امور متعلقه بالمحل..
كذلك..
استضافت سعيده حماتها وبناويتها احسن استضافه..
حاولت تهديها وادور مبررات لحميده ع قد ماتقدر..
اما رزان فتعاملها مع البنات احسن مايكون..
رباب معاها كويسه..لكن رانيا مش طايقتها بالمره..
🍁🍁🍁
ليلتها رقدوا في دار رزان..
حلفت رانيا ترقد ع الأرض..
مابتش رزان تحاول معاها هلبه..
بينما رباب رقدت معاها فنفس السرير..
وقعدوا الزوز يهدرزوا لوقت متأخر..
رباب:حاولي بدال المره 10مش خسارة فعماد يارزان..
رزان بدموع:باهي هو زعم كرهني؟
رباب:انتي توا قلتي قاعد يحبني؟!
رزان بنبرة باكيه:اني نهون ع روحي بالكلام هدى..نبي يقعد عندي امل بس..
رباب شبحتلها وقالت:تحبيه هلبه يارزان شكلك..
نزلوا دموع رزان بدون رد بأي كلمه او حركه..
تنهدت رباب وقالت:حاولي حاولي..ياما هو دار ع خاطرك..زي مادار ديري..حسسيه بقيمته عندك..ومعاش تكابري رزان..ماضيعك شي غير المكابرة الفاضيه..
رشفت رزان وقالت:صح..
هدا كله ورانيا كانت تسمع فيهم..
مرة توجعها..ومرة تشمت فيها..وقعدت مشاعرها هكي تجاه رزان طول هديكا الليله تتناقض وبس..
🍁🍁🍁🍁
يس دارلي لايك ..
هادي سناء كعادتها كل ماتنزل منشور يحكي عن الألم والجرح والغدر وعماد يقراه يحسه يعبر عنه يديرله لايك وخلاص بدون مايركز من اللي منزله اصلا..
سناء :تس..لكن لميا عندها الحق..لأمتى بنقعد هكي..مافيش خطوة تانيه القدام.!؟لازم نتصرف..
خشت ع الخاص وبعتتله رساله..
هو شاف اشعار الرساله..ماعبرهاش بكل وخلاها من ضمن اكثر من 120رساله واصلينه من حسابات مايعرفهمش ماباش يفتحهم..
جاي بيطلع من الفيس..
لكن صوابعه كانوا ياكلوا فيه..
يبوه يخش يشوف حسابها..
او بالأحرى قلبه 💓
قاوم..قاوم..لكن ماقدرش يمنع نفسه..
طول مشي لحسابها وشافه..
لقي اخر حاجه منزلتها..
قلب مكسور..💔
قلبه وجعه هلبه..بعدين قال:الكسر فقلبي مش فقلبك..هدا اذا كان عندك قلب اصلا..
طول طلع من الفيس..
وحط تليفونه ع الكامدينو..
بعدين غمض عيونه..
شويه..
ولف ذرعانه ع عيونه...
لحظات..وحولهم..
بعدين فتح عيونه..
شبح جهة الكامدينو..
تنهد بألم..
ناض قعمز..
حط يده ع مقبض القجر..
فتحه..بانت عليه صورتها..
طلعها من القجر وهي مقلوبه ع وجهها..
قعد ببطئ يلف فيها لعند مابان وجه الصورة كامل..
عيونه تعبوا دموع...
قعد يتأمل فيها...
يشوف لعيونها...لتفاصيل وجهها..
اذكر خجلها منه لما شافها بالمنظر هدا..
خطرت عليه هلبه حاجات تانيه تخص خجلها..
يعني البنت غالبا ماترتبكش وتخجل الا قدام الراجل اللي يأثر فيها فعلا بالذات وحده بقوة شخصية رزان..
معاش عرف..يصدق حبها ليه ولايكذبه..معاش عرف..
عماد بنبرة ألم:وكانك تحبيني حق مارضتيش فيا دقة الشوكه..كانك تحبيني حق راك راعيتي قلبي اللي يموت عليك تراك ماقلتيش ايه لما سألتك لو بتسيبني حق..قلتيها وانتي حاطه عينك فعيني.. انتي ماتحبي حد غير نفسك نفسك وبس..
نزلت من عينه دمعه وهو يرد في الصورة لمكانها..
صكر القجر..
ورجع تمدد ع السرير..
ورجع لنفس وضعيته الأولى...
وقلبه مازال ينزف فدموعه دم💔
🍁🍁🍁🍁
تاني يوم..
من الصبح ..
روح سند بأمه وخواته..
بعد ودعتهم الحاجه فاطمه وعييت وهي تستسمح من بنتها وتحط لحميده فأعذار محاولة منها لتليين قلب اختها عليها..
بعدت مشت السيارة وادرقت من قدامها..
تنهدت بألم ولفت ومشت وولت للحوش وهي تدعي
"يفرج الله صاحب الفرج"..
ع خشتها هي للحوش
وصلت سيارة حسن..كان مروح بحدهم اللي رفعها لأمها في اواخر ايام رمضان بش تكمل الشهر معاها وتعيد
وبسبب الحرب طولت فترة قعادها لمدة شهر..
وبعد ماشبه انتهت الحرب مشالها بوها روح بيها
🍁نزلت من السيارة..
لاقت جدها..
عبدالله:حدود روحتي؟!
حدهم بضحكه:ايه..روحت..كبت ع راسه وقالت..شن حالك جدي..
عبدالله :الحمد لله الحمد لله..خشي لحناك من بكري تراجي..
حدهم بضحكه:حاضر..ومشت طول خشت داخل..
في حوش ميلاد..
كانت رزان في الكوجينه ادير في الفطور..
بعد وتاته وكملت..
كيف جايه بترفع الصفرة انخلعت لما انحطوا زوز ايدين ع كتافها..
التفتت تفاجئت وقالت بضحكه:حدووود..
حدهم بتشقليبة عيون:دووودووو..
ضحكوا الزوز وحضنوا بعض..
🍃🍃🍃🍃
بعد يومين...
الساعه 5:00عصرا..
بعد فترة من الهدوء الحذر..
في وحده من الديار..
كانت دلال تغير لآسيا..
وحميده واقفه ع الروشن تراجي فالصغار امتي يروحوا من الدكان وبنتها جنبها تزن عليها تبي"تشيبس"
حميده:اهم تو يجيبوا..
بانوا عليها مجد ومعمر في إيديهم كياس الشيبس تبان شبه فاضيه..
حميده بإزدراء:اللطف..مجد ومعمر صموتهن الزوز..اعوذ بالله..
دلال رفعت حواجبها وقالت:ع مااعتقد اني بعتتهم يشروها لرواحهم
التفتت حميده وقالت:وخيرك ماقتيلهم يحسبوا بنت خالتك مليكه..
دلال:ماقلتيش..
حميده:هي بالقولان!!ماتسمعيش فيها تقول نبي بطاطا؟؟!
دلال بحده:وكان سمعتها نراجيك لين تقولي؟!
حميده بقرف:لسان طويل وسم كيف بوك بالزبط..
دلال ولعت فيها النار وقفت وقالت:مصمصي فمك بمية الزهر قبل تتكلمي ع بااابااا..
حميده خدت بنتها وهي طالعه تقول:ريت هالبابا..نسكت خير..
طلعت ودلال من غضبها لحقتها:اسمعي راك حمضيتها خلاص وصلتيها لهني..واشرت بصبعها ع خشمها..
التفتت حميده وقالت:ان شاء الله تنفجري..
ع خشة نعيمه ونور وغاليه ومعاهم لمياء من فم البوابه كانوا حدا الفرن..
وخشة الحاجه فاطمه من فم الحوش..

دلال:ياسرك هبال ساد فيقي لروحك راهو تصرفاتك هادي قاعده تكره فيك اللي حواليك بدال مايوقفوا معاك يجوا ضدك..كلنا مرينا بظروف وعانينا..انتي لاك اول ولااخر وحده راجلها ياخد عليها ويصير فيها هكي..في الاحرف منك مليون مرة وماداروش ديرك....حطي عقلك فراسك يامراة سادك اللي انتي فيه..صفيها مع العباد يصفيهالك ربهم..
حميده بعياط:تعايري فيا اهاا..تعايري فيا..متشمة فخالتك يادلال!!حسبي الله ونعم الوكيل فيك حسبي الله ونعم الوكيل فيك..
وقعدت تخبط وتعيط..
وامها جتها تجري تشد فيها..
وغاليه شدت حنين اللي كانت تبكي ودخلتها وحده من الديار وصكرت عليها..
وهدا كله ودلال وامها واختها يتفرجوا ع المشهد بصدمه..
حميده ببكي:ريتي يمي ريتي..
فاطمه:خلاص يمي خلاص..شبحت لنعيمه وقالت..بقولي خلاص يانعيمه يابنتي ساد..
رفعت لمياء حواجبها وهي تشوف لنعيمه..
وخدت فاطمه حميده مشت خشت بيها لدارها..
البنات وجعتهم من حناهم ع الآخر بس مش زي ماوجعت امهم اللي قالت:ايه صدقتي يمي ساد هلبه..ساااد..
ومشت خشت للدار واتصلت بعبدالسلام يجيها الصبح تحججت بالصغار "قلقوا.."
وهو قال انه بيجيهم من 7الصبح..
فاتت هديكا الليله سودا بكل معنى الكلمه..
واليوم التاني من الفجر كانوا واتيين مابو يحطوا ففامهم شي حتى الميه..
قعدوا واقفين يراجوا فم البوابه..لين بانت عليهم سيارة عبدالسلام..
طول مشولها يجروا..
وركبوا ع الفور..
عبدالسلام كان حاس ان في شي بس ماباش يسأل بكل..
طول تحرك بيهم..
🍁مع الساعه 8:30
ناضت غاليه..استغربت هدوء الحوش..
مشت طول للدار اللي تبات فيها اختها مع البنات والصغار
مالقت حد..
شافت مكان شناطيهم فاضي..
حطت يدها ع فمها ونزلوا دموعها وقلبها موجوع ع حالهم اللي وصلوله...
🍁يومها..
الحاجه فاطمه مشي نهارها كله نكد..
مضايقه من روحها كيف دارت هكي..
مش منها وجعتها حميده وتكلمت تلقائيا بدون ماتحسب حساب للكلام اللي انقال..
بينما حميده..
ابدا مااهتمت بشي..
بالعكس فرحت اللي افتكت منهم كلهم واخيرا قعدت تبرطع بروحها هي وبنتها..
وفي نفس الوقت تفكر شن بدير بش تولي لراجلها..
🍃🍃🍃🍃
بعد اسبوع..
الساعه 11:30صباحا..
تتكلم بالتليفون وهي ادور في الكوجينه..
لمياء:لالا هدوء بعد لزت خواتها شدت شرها..
نادره:المهم انتي ردي بالك خليك كاسبه الكل..
لمياء :ماتوصيش حريص..
وخرت الكرسي وقعمزت وهي تقول:ايه مافيش اخبار عن بنت يونس؟
نادره:حالتها بالهون..مظنها معاش طول..
لمياء:مانبيش نتشمت لكن ربي قاعد يشفيلي فغليلي..
نادرة: اللي من ايده ربي يزيده..المهم توا قوليلي امتى بتجي بش تعايني وتشوفي وضع العيل..
لمياء بضحكه: غدوة إن شاء الله..
نادره:وهدا وين تقولي يازوفريه!
لمياء:هههههههه..
نادره بضحكه:خلاص غدوة نراجو فيك.
لمياء بإبتسامه؛باهي..هي بالسلامه توا رصيدي بيصفر..
نادرة ؛باهي ياقفاصه..بالسلامه..
لمياء ضحكت بعدين صكرت..
حطت التليفون ع الطاوله وخدت فنجان القهوة رشفت منه..بعدين قعدت تغني..
حبيبي ع نياتو كل البنات اخواتو..
رشفت تاني من القهوة وكملت تغني..
ده ماكانش كده بس انا غيرت ..
سكتت ..
توسعوا عيونها..
وقعدت ترمش بسرعه...
حطت الفنجان ببطء ع الطاوله..
نزلت عيونها لوطا..
حطت ايديها الزوز ع القفطان شمراته بالشويه وهي تبلع فريقها..
شافت..
سيقانها نازل عليهم دم من الجيهتين
دار بقعة تحت الكرسي اللي هي مقعمزة عليه..

...يتبع...