المتمردين

العشق المتمرد

#العشق_المتمرد "اختبار"

#جمان_فريد

الجزء112 القسم الثاني

🌟..
ابتسمت وهي متفاجئة  وقالت:ايه اذكرتك..
ايناروا بضحكه:رقمك جبته من بنت عمتك نور عن طريق اختي تالا تقرا معاها فنفس الكليه..
رزان:اها...
ايناروا:المهم توا شن اخبارك شن دايره..
رزان:الحمد لله ماشي الحال..
ايناروا:شن جو القرايه .
رزان:اهو امتحانات النهائيه توا قرايه وبس..
ايناروا:بالتوفيق إن شاء الله..
رزان:تسلمي ..
ايناروا:ايه..شن جو العيله والبلاد عندكم ..
رزان:الحمد لله كلنا كويسين والبلاد ماشي حالها..انتي شن حال هلك؟
ايناروا:بخير الحمدلله..
رزان؛سمعت انك جبتي وليد ربي يباركلك فيه ويجعله من الذريه الصالحه..
ايناروا بإبتسامه:آمين..نشوفوه عندك..
ابتسمت رزان بضيق وقالت:تسلمي..
ايناروا تنهدت بعدين قالت؛رزان..
رزان رفعت حواجبها وقالت:امم..
ايناروا :نبيك فموضوع...
🍁🍁🍁🍁
مقعمز فالسياره يتكلم بالتليفون..
عماد:رقية الدولار لعبت فينا..
سناء:كيف قصدك البضاعه اللي عندك راحت بخساره..
عماد:مش بالزبط لكن الوضع شوي تلخبط..
سناء :امم..ربك يفرجها..
عماد:إن شاء الله..
سناء:احمم..باهي شن صار في الحوش وين وصلت فيه لتوا..
عماد:حاليا موقف الحق في حاجات موصي عليهم من برا قبل توا بنفوتهم..خل الفلوس يقعدوا لشي أولى..
سناء اضايقت هلبه وردت تقول:امم..كويس..
تنهد عماد وقال:خلاص بنصكر توا عندي خدمه ماتبي شي..
سناء:جهاز الفير اللي وصيتك عليه بس..
عماد:ok..تشاو..
سناء :باي..
صكرت بعد صكر..
وطول بعدها اتصلت بأختها ..
نادى مرة وحده وانفتح الخط..
لمياء:هلا سنسن..
سناء بضيق:هلا..
لمياء ضيقت عيونها وقالت:خيرك؟
سناء:اففف..معاملة عماد بكل يالمياء..
لمياء؛خيرها معاملته مافهمتش!!؟
سناء؛يتعامل معاي برسميه وجفاف..وين نكلمه يجبدلي سيرة الخدمه وازمة الدولار والجو النكدي هدا..لا وقالي الحوش وقفت الخدمه فيه توا...
لمياء:الازمه هادي ع الكل ياسنسن وهو تاجر طبيعي جدا هدا مايفكر فيه توا..انتي سايري وخلاص..
سناء:تس..حاسه انه قاعد يحب هديكا يالميا..
لمياء؛ واني ياغبيه شن فهمتك مش قتلك حتى لو حسيتي بحاجه زي هادي ماتهتميش وحاولي بس تنسيه فيها وتكرهيه يسمع حتى اسمها..
سناء؛ايه واني قاعده ندير هكي لكن مش عارفه كيف نحس انه...تنهدت وقالت..مش عارفه..مش عارفه..
لمياء تنهدت بعصبيه وهي رافعه حاجبها وقالت:اني الأسبوع الجاي بنحول..الأسبوع اللي بعده بندير لمه كبيرة ع خشة الحوش وبنعزمهم كلهم..كلهم..وهداكا الوقت تو نقولك شن اديري...
🍁🍁🍁🍁
تسمع فيها شن تقول وتبكي مش قادرة ترد..
ايناروا:ممكن مش حدي اني ندخل بيناتكم لكن بصراحه اي زوز يحبوا بعض زيكم مانبيهنش يتفارقوا وعماد رغم كل اللي داره يحبك هلبه يارزان غير منقهر منك بس..تيفسا ديما يحكي عنه ويقول عماد من بعد اللي صارله تغير هلبه..حتى بعد خطب قال انه مش متريح مش فرحان..
رزان ببكي:تعرفي..لو يحبني حق..والله مايديرها ويعدي يخطب غيري مايديرها...
ايناروا:هو دار هكي لأنه خاف..خاف تنخطبي لغيره قبل..
رزان قرنت حواجبها بإستغراب وهي تمسح فدموعها قالت:ننخطب قبله؟!
ايناروا:ايه..اللي فهمته من تيفسا ان في حد حواليك..وممكن عن قريب يصيرلك موضوع حتى انتي..
رزان قعدت ساكته وتفكر..
ايناروا:اخر شي بنقوله يارزان حرام تقهروا بعض وانتوا تحبوا بعض..
رزان رجعت تبكي مرة تانيه..
🍃🍃🍃🍃🍃🍃
وتمر الأيام وادور عجلتها..
ولمياء وعمر فيهم انتقلوا لشقتهم الجديده..
كبيره ومفرشه جزئيا يعني في زوز ديار فاضيات ومصكرات..
وبأنتقالهم قعدت الشقه اللي فوق السطح فاضيه..
كان محمد يبي يغير فيها شويه حاجات لأنه بسبب ازمة الدولار شقته هديكا مش حيقدر يكملها في المده اللي حددها لهدا حيطول فقعاده فشقة السطوح..
والعرس ماقدمش التاريخ متاعه قاعد هو هو في شهر 11..
كذلك..
دارو عيت عبودة عرس ولدهم صابر وكان عرس كبير هلبه بإعتبار عرس اول ولد..
مرام ماحضرتش..مش لأنها ماتقدرش تروح هديكا المده لا كانت تقدر تروح..
لكن فضلت انها ماتحضراش اخدا بخاطر هانيبال..
اللي ع خاطرها عرس خوه حتى هو ماحضراش..
كذبت عليه..
قالتله مانقدرش نروح لأني محتاجه نخدم ع الرساله اكثر..
وهو كان حاس بإنها تكذب بس دار اللي هي تبيه وخلاص..
في العرس..
حضور بلقيس طغي ع الجميع..
ناشطه..كانت من ضمن اللي قاموا العرس..
وكانت مميزة فكل طلاتها..
وطول الوقت عيون لمياء عليها..
بتموت حسد..
بالذات وين تشوفها قريبه ع العيله..
واكثر شي لاحظاته حب الحاجه فاطمه ليها..
رزان..
حضرت نهارين من اسبوع العرس بسبب الإمتحانات مشت من باب المجامله ..
ع قد ماحاولوا فيها بلقيس وحدهم تطلع من الجو الكئيب اللي هي فيه لكن للأسف..كانت رافضه تخلع عنها ثوب الحزن..
ابتسامتها بالزور ترتسم ع وجهها..
هي اللي زادها ع مابيها اتصال ايناروا تفكر فكلامها طول الوقت..
وتزيد تنوجع وين تشوف لمياء كأنها تشوف فأختها سناء🍃
حميده..
ماحضرتش العرس..
لكن بعتت بنتها مع خالتها وهي قعدت في الحوش محبوسه فهديكا الدار وتخمم فجلسة المحكمه..
وجي يوم هالجلسه..
والصديق ماجاش..
حميد وكل محامي يعرف ع قضية اختها بعد تغيب الصديق عن اول جلسه..
وكله توا لأنه ع حسب مافهم من اخته انه يبي يطلق..بس اللي صار في اول جلسه بينلهم ان الصديق في راسه موال ويبي ويغنيه..
ورجعت حاله حميده النفسيه تعبت كان عندها امل انها تخلص بسرعه لكن هالأمل تبدد والخوف حل محله..
الخوف..
الخوف الطبيعي من الإمتحانات..
كانت تحس بيه نور هلبه..
كل ماتتقدم في القرايه تزيد تصعب عليها..
بس مهند كان مسهلها ويعاون فيها..
واكثر ماده خايفه منها قرتها فيها نوميديا وفهمت منها اكثر من استاذ الماده نفسه..
هدا كله كان يدير فيه مالك..
مالك اللي حس ان نور استغنت عن وجوده فحياتها..
بالذات بعد دارت حركه غير متوقعه تانيه..هي انها غيرت شفرتها..
يعني قطعت كل السبل بيناتهم..
يعني نور هالمره نور خلاص كتبت اخر سطر فعلاقتهم وحطت نهاية نقطه..
وهو بطبعه شخص مايحبش التنازل ..
لذلك زي ماهي دارت ظهرها ليه..هو مرغم دار ظهره حتى هو..
🍁بس في من دار عكس مادار مالك..
ورفض يدير ظهره..
بل اختار انه يلفت انتباه الطرف التاني ويخليه يرجع يلتفتله ويشوفله من جديد..
يوم الخميس..
30\4\2015...
الساعه 5:30 عصرا..
خش للحوش فات من حدا الصاله بنته كانت تقرا فيها شافاته لما فات مستعجل..
حميد:لطيفه..لطيفه..
"في الكوجينه يابابا"..
سمع شن قالت بنته وتوجه طول للكوجينه..
خش وتفاجأ لقي لطيفه ادير ففطيرة..
وفاتحه حداها الراديو ع قناة التراتيه..
ادير في الفطيره وتغني..
كان لابسه فوق توتها المريول..
ولامه شعرها فوق..
كان منظرها عفوي للغايه..
ابتسم وقال:لطيفه..
التفتت وشبحتله؛حميد!!خيرك وليت؟
حميد:نبي الورقه متاع الارض اللي قتلك امس طلعهالي اذكرتها فالطريق..
لطيفه :تلقاها ع الزيانه..
حميد:تمام..
لفت وكملت شغلها..
هو شافلها شويه بعدين ضحك ومشي..
توجه لدار النوم..
وصل فيها..
فتح الباب وخش..
مشي للزيانه خدي من عليها الورقه..
ولف بيمشي لمح حاجه ع السرير..
كان البوم صور مفتوح..
قديم هلبه الألبوم هدا ليه هلبه ماشافاش..
قدمله وهو مبتسم بإستغراب..
خداه..
وقعد يتفرج ع الصور ..
كانوا صور ليه هو ولطيفه من ايام علاقتهم..
ضحك..
قعمز..
وهو شاد الألبوم قعد يقلب فصفحات الألبوم..
ويشم فريحة الماضي ويتبنن فيه..
فعز انسجامه خشت لطيفه للدار لماشافاته ابتسمت..
مشتله وقعمزت حداه وهي تشوف..
حميد:هادم في مالطا ولا..
لطيفه بضحكه:مالطا والقونه الحمرا..
حميد بضحكه؛بعد هديكا الطلعه حلفتلك عليها وانتي تبكي وتقولي حرام عليك هادي اكثر قونه نحب نلبسها..
لطيفه؛ههههههه..راضتيني وخديتلي بدله من غادي..عندك علم..لتوا قاعده عندي؟
ضحك حميد وقال:ياااه ع الصورة هادي مذكرة من صورنا..
لطيفه بضحكه؛عزوز مالطيه حرفه..
حميد:ههههههههه..
قعدت تشوفله وهو يضحك عيونها تعبوا دموع ومشاعرها تحركت بقوة اتجاهه..
قالت تلقائيا
"استاحشتك"..
هو وقف ضحك..
وشبحلها نظرات عيونها كانت غريبه عليه..
حس بشعور فيه توتر..
خاف..خاف يلقى روحه مجبر ع خيانة حبه لغزلان..
لطيفه بحب:استاحشت ايام زمان كلها..ايام كنت فيها ماتملش وانت تغازل فيا فكل وقت كنت ماتناديلي الا يالطوفتي..ولا عيوني..مذكر..
هو غير عيونه وشبح للألبوم..
هي حطت يدها ع ذقنها ولفت وجهها ليها..
لطيفه:حميد..اني قاعده نحبك..هلبه..زي زمان واكثر..
هو ارتبك هلبه..
للأسف كلامها مااثرش فيه نهائي..
بس توتر من قربها..كل مالها تقرب لعند مالقاها..
غارقه فقبله هو نفسه مش عارفه كيف سمح انها تصير..
ممكن لأنها وجعاته ولا استحي انه يردها..
اما بش يكون القلب متفاعل معاها التفاعل المعروف لا..
ولأنه بطبيعته كراجل غالبا غريزته تغلبه..
لطيفه عرفت كيف تخليه يبادلها وتعاملت بكيد الأنثى المعروف في الحالات هادي..
وضعف حميد...
واطورت الحكايه بشكل غير متوقع...
🍁🍁🍁🍁
تعطرت..وهي تشوف لشكلها في المرايا..
كعادتها جميله فاتنه..
حطت العطر ع الزيانه..
وخدت تليفونها ومشت طلعت من الدار..
شافت الساعه في التليفون وقالت..
غزلان:عطل..!
اتصلت بيه..
...
تليفونه كان يرن..
ولطيفه اللي كانت راقده ع السرير ومتغطيه بالشرفاف مبتسمه بسعاده...
وزادت سعادتها وهي تسمع فصوت الهاتف يرن وعارفه من المتصل..
اما هو..
فكان واقف تحت الشبشابه ..
حاس روحه زي اللي ارتكب معصيه..
زي اللي اقترف ذنب..
سمع صوت التليفون قال فنفسه"غزلان"..
طول كمل الدوش بسرعه...
نشف..لبس الدشمبر وطلع..
ماباش يشبح للطيفه نهائي..
ولطيفه معاه بعيونها..
توجه للدولاب..
طلع حوايج..
لبس ع السريع ..
خدي الورقه من ع الزيانه وطلع بسرعه من الدار..
لطيفه اضايقت هلبه..
لدرجة نزلت دموعها مسحتهم بعدين ناضت..
🍁🍁🍁🍁
كمل مشواره بسرعه..
بعدين توجه لحوشه التاني..
اول ماوصل ودخل سيارته..
نزل..وطول توجه للباب..
فتحه وخش..
شاف صغاره مقعمزين يتفرجوا ع التلفزيون في الصاله..
حميد:وين ماما..
رمضان:ركبت فوق..
هز راسه بإيجاب ومشي طول ركب فوق..
لقي باب الشقه مردود..
فتحه وخش..
قعد يدور عليها..
لقاها تزين فوحده من الطورطات..
وكانت منسجمه ع الآخر..
قدمله...
جي جنبها ضمها وباسها من خدها بعمق..
ضحكت وقالت:خيرك عطلت وماتردش ع مكالماتي..
بعد وقال:كان عندي مشوار مهم انشغلت بيه...
شبحتله وقالت:امورك كلها تمام..
هو قال بصوت هادي:ايه..وقرب وباسها..
كانت قبله اعتذار طويله هلبه..
بعدها..خداها من يدها طول ومشي بيها لوحده من الديار ضمها وهو يشوف لعيونها:نحبك هلبه..
هي ضحكت..
وهو راح فيها وريحها معاه💓💓..
كان حاس بأنه خان....
🍃لما تزوج ع لطيفه ماحسش بأنه خان كان يشوف ان هدا حق ليه...تزوج عليها لما العلاقه بيناتهم خيم عليها جوي شتوي قارس برده..معاش في اي رابط عاطفي يجمعهم..
كل المساحه العاطفيه ملتها غزلان وخلاته يعشقها بقوة..
ومافيش فقلبه غيرها..
يعني اللي صار بينه وبين لطيفه رغما انه شرعي ومن حقها لكن حسه خيانه هالمره لأنه قلبه مليان بغيرها..
راهو الراجل لما يحب من قلبه حب حقيقي..يولي مرغم ع الوفاء ارغام...🍃
🌴🌴🌴🌴🌴
بس حالة الهادي غريبه شوي..
ايه هو الماضي خلاه يحن..لكن مادامش الشعور هدا..
ايه علاقته بسميه تحسنت..بس الراجل قاعد يحس ان في شي غلط شي مش مفهوم قاعد يصير معاه..
فوسط عاصفة الذكريات اللي استرجعوها هو وسميه قبل كانت في مجموعه مشاهد حديثه تخش ع هالذكريات..
فضيله..
فضيله وتصرفاتها..فضيله واسلوبها..فضيله ومعاملتها فضيله..
هالكم موقف اللي جمعوه بيها غلبوا ذكريات 11عام..
هو كله من القلب راهو..
القلب مسيطر القلب ديما صاحب الكلمه الأقوى والأخيره..
مافيش مرة العقل سيطر الا والقلب كان سامحله..
اما لضعف..او ان شغافه مالمسها شي خلاته يستخدم القوة ويفرض كلمته..
💓💔
بس لما يكون مجروح يضعف ويستسلم للوجع وممكن العقل وقتها يتخد قرارات قاسيه بش ينتقمله.
هما الزوز زي صحاب اللي ديما يتعاركوا...
لأن واحد فيهم يبي بس مصلحة التاني..
العقل..
والتاني رافض يدير عكس رغبته القلب..
ولما تجي ع راس القلب..
العقل بعد مايهزبه لين يشبع يبدا يتصرف هو..
الكلام ع عماد..
ع اللي عايشه عماد ليه وقت..
عماد اللي توا يسوق فسيارته متوجه بطريقه للبلاد..
هو سابق باقي العيله..
اللي ناويين الجية اليوم اللي بعده بش يحضروا لمة لمياء..
💓وهو يسوق توا ملهوف امتى يوصل..
علاش..
اااخ وخلاص..يبي يشوفها..استاحشها..
الله غالب القلب ومايريد..
القلب المرمد ااخ منك ياقلب..
خش للبلاد..
وقف ع محل فيها..
خش بيجيب حاجات ..
وهو يدور ويختار وياخد..
جو عيونه ع شمعدان..
ابتسم تلقائيا لما شافه..
⚡فلاش باك..
شتاء..سنه 2006..
سرت كبوطه وهو ماشي مع خاله للسيارة ..
عماد وهويرجف:ارررررر...الصقع عندكم في العظم يوصل..
عمر بضحكه:البس برنوسك..
ضحك عماد ولبسه..
شويه شافوا سيارة ميلاد خاشه للقطعه من القدام..
وقف..
انفتح الباب اللي جنب السواق..
نزلت منه رزان..
كان بوها مروح بيها من المدرسه..
لابسه فوق قرمبيولها كبوط لونه وردي..
مسرته السوسته متاعه وحتى بطمه مصكرات..
وبرنوسها ع راسها مقنط تقنيطه صح بالخيط..
يدوب باين وجهها..
الشنطه اللي لابستها وقتها شنطة "باربي" وسروال جينز مرسوم عليه" باربي"..
كانت تقرا خامس ابتدائي..
حطها بوها ومشي..
كانت تمشي وتاكل فالشمعدان ومش معبره حد..
لين قال عمر..
عمر:فكرونه عطيني نتشه..
وقفت وحطت يدها فجيبها وطلعت منه طرف وعطاته لعمها..
عمر خداه وقال:زعيمه..
عماد وهو يشوفلها برفعة حواجب وابتسامته ع وجهه حاط ايديه فجيوبه ويرعش من الصقع قال:وحني... يابازوزة..
يدوب شبحتله بطرف عينها ومشت كملت طريقها ولاحاسباته موجود..
عماد بتفنيصه:ريت البازوزة ريت!!
عمر بضحكه:عارفها تكره الكلمه اللي تقوللها فيها..
عماد ضحك وقال:لالا مش هكي..الشبير هادي وحده مسمومه هو هدا..
ضحك وعمر وقال:تعال اركب تعال..
عماد وهو يضحك مشي للباب وهو يقول:باهي عطيني شويه انت..
عمر ركب السيارة وهو يقول:لااااا تحرج البازوزة بعدين..
عماد ركب وهو يقول:سمممم..
⚡الوقت الحاضر..
ابتسامته كانت ابتسامه حزن ..
خدي ستيكه الشمعدان وهو يحاول يشد دمعته...وحطها مع باقي الحاجات اللي خداهم..ومشي لمولى المحل..
🍁🍁🍁🍁
ماعندي نيه نعدي..
غاليه:لازم تعدي ياغبيه..ياسرك ضعف وينها رزات هديك وين عدت
نزلت دمعتها وقعدت ساكته
مسحت غاليه دمعتها وقالت:ساد بكي ساد تربحي مافي حد يستاهل يصير فيك هكي ع شانه..عدي غدوة عدي..عدي وانتي لابسة ومتأنقه وواثقه من روحك قوي نفسك رزونه بالله عليك..
تنهدت وقالت:باهي..نحاول..
ع جية قصي:فسيارة لونها ابيض جت..
ضيقوا عيونهم بإستغراب..
غاليه:مافي حد نعرفوه يجينا سيارته بيضا؟!
مشت غاليه طلعت من الكوجينه فحوش خوها..
ووراها رزان
وصلوا فالروشن وقفوا وهما يشوفوا فالسيارة نوعها "كيا سيراتو "..
انفتح الباب..
ونزل
عماد
غاليه شبحت لرزان
تنهدت بضيق لما شافت الدموع يصبوا
غاليه:مايصدقن عيونك..
لفت ومشت بسرعه لدارها..
غاليه :عليك حال حالها...
رجعت شافت للروشن لقاته جايب معاه حاجات ومتوجه للممر..
غاليه بغضب:مانيش ماشيه الحوش..
وفعلا..
قعدت غاليه فحوش خوها..
وهو استقبلوه حميده وحناه اللي كانوا في الكوجينه..
هدرز عليهم شويه..
بعدين مشي للمربوعه..
لقي خاله محمد لابس بيطلع..
سلموا ع بعض..
بعدين اتفقوا يسايره عماد للقهوة..
وهما طالعين تلاقوا مع الهادي..
سلم عماد وكمل طريقه لخاله محمد..
محمد:مليحه السيارة..مبارك..
عماد:الله يبارك فيك..
محمد:تعال اركب معاي..
عماد :تم..
ومشي ركب مع خاله وتحرك محمد..
في الطريق..
محمد:غدوة ان شاء الله بنعدوا اني وحمزة وسند ومالك خوك الزيارة تعدي معانا؟
عماد:تس..
محمد:عماد ..شن دخل رمزي وخالك وتوفيق في اللي صار ترا قولي..
عماد:محمد لو مصر تدوي في الموضوع هدا درس ع اليمين خل ننزل..
محمد بإصرار:ياراجل...تو مش انت خلاص خطبت وشوفت حالك خلاص تمت الحكايه..طيح حبال السو في بير ماتخلي بينك وبينهم حساسيات..القصة قصة نصيب رزان مافيش بينك وبينها نصيب هي هدي ليش تعطوا للموضوع اكبر من حجمه..
عماد وهو يشوف للروشن خايف دموعه يخونوه قال مسايرة:عندك حق...
محمد:تعدي معانا غدوة..
غمض عماد عيونه بنفاد صبر وقال:باهي باهي تو نمشي صكر ع الموضوع خلاص..
محمد شبح القدام بضيق وقال :تمام..
🍁🍁🍁🍁
شن رايك دلوله في اللبسه هادي؟
دلال وهي تحط فحوايج صغارها فصاكو:حلوة..
نور:تمام..
شويه رن تليفون نور..
خداته من فوق التلفزيون وفتحت الخط طول:هلا روفي..
رفقه:هلا نونو قوليلي شن بتلبسي غدوة..
نور:بلوزة وسروال..
رفقه:عاديات ولا فيهم لقطه..
نور:البلوزة فيها لقطه بيضاء ومن جهة الصدر ع يمين نقشة فراشه معدسه..
رفقه:سروالك جينز..
نور:لا ..
رفقه:امم..تمام..
نور:شن قررتي تلبسي..
رفقه :قفطان قصير..
نور:امم حلو..
رفقه:تمام خل نمشي نشوف روزي شن بتلبس..
نور:زعمه تمشي رزان..
شبحت دلال لأختها.
رفقه:تمشي غصب عنها ..يللا باي..
نور:باي..صكرت وردت تليفونها فمكانه وولت اللي دير فيه..
🍁🍁🍁
يوم التلات استاذ..
زين:تمام يوم التلات..احمم..رانيا نطلب منك طلب..
ابتسمت وقالت:تفضل..
زين:عندكم معلم تاريخي اسمه*******..نبيله صورة ..
رانيا بضحكه:عرفته..حاضر..
زين بإبتسامه:اسف لو ثقلت عليك..
رانيا بإبتسامه:ابدا استاذ اني اللي مثقله عليك ومشيطه ريقك..
ضحك وقال؛باهي اللي حاسه..
ضحكت رانيا..
زين بإبتسامه:تمشوا وتروحوا سالمين..
رانيا:آمين تسلم..مع السلامه..
زين:سلام..
صكرت رانيا ومشت حتى هي توتي فحوايجها وتغني
💖زي الوردة اللي تستنى تمر النسمه ع أغصانها..
مستنيك تجيبلي الجنه ونعيش انت وانت فأحضانها..
زي الورده..زي الوردة..زي الورده اللي تستنى..💖
🍁🍁🍁🍁
بتمشي انتي..لطيفه ولمياء مايتحابوش..
غزلان:اممم..
حميد:مش ناقصك شي..
ابتسمت وقالت:لا..
ابتسم بعدين خدي يدها وباسها.. وصغارهم يشوفولهم..وهي تضحك بخجل..
🍁🍁🍁🍁
زينب ونعيمه وكفايه..
كل وحده فيهم دارت نوع من الحلويات الزمنيه بش يخشوا بيهم لحوش خوهم..
الي جانب..
زينب دارت كعك مالح بالتمر..وشرت مالقي بطواسيه كريستال..
نعيمه..
غريبه باللوز..وغريبة قصب..
وطقمين فنجانين قهوة وطواسي شاهي..
كفايه..
مقروض...ومزهريه غاليه بعض الشي..
كفايه كان قدرها تاخد خير من هكي لكن مابتش تفوت خواتها هلبه بش ماينحطوش فمقارنه معاها..
🍃وعدا هاليوم..
وجي اللي بعده..
💓من صبح ربي فايق..
لا هو مارقدش بش يفيق..
ليله كله يتقلب وخلاص..ماشافهاش بكل ..
وقلب زاد عذابه وزادت لهفته..
هو مايبي شي غير انه يشوفها بس..💔
بعد فاق..
توضا وصلى..ونزل لوطا..
مشي قعمز فم البوابه..
عارف  حتجي تسلم ع عماتها اكيد..
ويجوا عماتها وحده ورا التانيه..
ورزان مابانتش نهائي..
بعد وصلوا خالاته وامه...
قعد مقعمز معاهم فالصاله وهما يهدرزوا عيونه مرة مرة ع فم البوابه وين يخش حد منها قلبه ينتفض لكن ع الفاضي ..
مش هي..
شويه واضطر ينوض مع خاله ويمشوا للمربوعه برا وين مافي الرجاله والشباب ..
كانوا ناويين يتسقدوا لمصراته لزيارة رمزي..
في الكوجينه..
غاليه:صدقيني حيعرف بنتها من بين كل اللي بعته..
رانيا:تقولي هكي؟
دلال؛حبيبتي من غير كلام شن جاب تمزريطك لماكلة خالتي..
ضحكوا...
رانيا:هاهاهاهاهاها...
ضحكت دلال...
رباب بضحكه:والله صدقت..
رانيا:انتي تسكتي خيرلك..
كلهم:هههههههههههه..
في الصاله...
مقعمزه بنت اختها فحجرها وتمسح ع شعرها وهي تقول:سلم شعيراتها ياربي..
ابتسمت حنين..
نعيمه حطت يدها ع يد اختها:شن جوك..
حميده ابتسمت؛بشوفتكم ولا كويس..
ابتسمت نعيمه..
زينب وكفايه ابتسموا..
حنين:نبي نلعب..
حميده:عدي العبي..
كفايه باستها من خدها وقالت:سلمها ياربي..
ومشت حنين طلعت بش تلعب مع الصغار..
لقت اسيا وروان يلعبوا بلعبات جايبينهم معاهم..
جت حداهم وقعدت واقفه تشوفلهم..
روان:عطيتي بنتك رضاعه..
اسيا:ايه..
وحنين تشوفلهم..
من جهة تانيه...
الولاد كانوا يلعبوا مع بعض بلعبة"البلابل"
جواد:هي دورك قصي..
قصي بدي يلعب..
جواد شبح للبناويت يشوف فأخته..
لفت نظره شكل حنين وهي واقفه تشبحلهم..
جواد:اسيا خلي حنين تلعب معاك..
روان ووآسيا شبحوا لحنين..
الزوز مع بعض مدولها لعباتهم..
هي قعمزت وخدت اللعبه اللي عند آسيا..
روان:هاكي اسيا..عندي..وحده..تا..تانيه..
خدت اسيا لعبة روان..
وروان ناضت تجري وخشت داخل..
شويه وطلعت بلعبه تانيه عطتهالها رانيا وقعدوا يلعبوا مع بعض..
🍁🍁🍁🍁
بعد حوالي نص ساعه ..
جي حميد بغزلان وصغاره كلهم..
اول حاجه دارتها رفقه بعد سلمت ع العيله..
توجهت طول لحوش عمها حميد بش تشوف بنت عمها..
في دار رزان..
بلوزة بلون دم غزال انحطت ع السرير..
وصوت يقول"هادي"..
وسروال كاجوال لونه اسود انحط جنبة ع السرير..
وصوت يقول"وهدا"
رزان بملامح مترددة:مش اوفر شوي!
رفقه بتفنيصه:أوفر عينك..
بعدين مشت للقجر متاع الزيانه وفتحاته..
قعدت تقربج في الإكسسورات ..
ورزان تشوفلها..
شويه وطلعت خاتم..وسلسله..وخراص
الخاتم لونه ذهبي فصه لونه من لون البلوزة..
وسلسله رقيقة لونها ذهبي فيها تعليقه بشكل الدمعه من نفس اللون..
وخراص صغار فصهم بنفس اللون..
التفتت رفقه وقالت:اعتقد شارتيهم مع بعض صح!؟
رزان هزت راسها بإيجاب..
رفقه بضحكه:ديمه ذوقك حلو..
شقلبت رزان عيونها وقالت:ثانكس..
رفقه:هههههه...
🍁🍁🍁🍁
في الكوجينه..
نعيمه وهي متكيه ع دولاب الكوجينه:من بيجي كله؟..
غاليه وهي تحبب في المكرونه المبوخه قالت:طبعا امها وخواتها وخالاتها..
زينب:لاحظت ان علاقتهم بعيلة بوها مش أوي..
غاليه حطت الكسكاس ع الطنجرة وقالت:حتى اني حسيت..
ع خشة كفايه..
كفايه :فمن تقرمن؟
شبحت غاليه لزينب..
زينب:نحكوا ع كنة عيت عبوده..
كفايه:ايه شن جوها..
غاليه:ندى من قبل معروفه ماشاء الله لأولامس امي تلاقت هي و خالتي مرضيه فحوش عيت عبدالواحد قات تشكر فيها وتحط..
كفايه:هما كلهم كويسات..كان تشوف وحده تانيه منهم لولدها الكبير..
ع خشة دلال..
غاليه:صح وصال تناسبه..
دلال:من هو؟
نعيمه:ضو خو مرام..
دلال برفعة حواجب:اها بيخطبوله؟
غاليه:لالا حني نخمموا عليه بس..
ضحكوا..
دلال بضحكه:هو راجل ماشاء الله عليه الحق يابختها اللي تاخده..
كفايه:علاش لتوا ماتزوجش..
غاليه:مرام قالت لايعجبه العجب ولا الصيام فالرجب..
دلال ابتسمت وسرحت بتفكيرها فيه..
يبان شخص بسيط مش صعب هلبه ماتوقعتش ان عنده شروط وذوقه صعب من هالناحيه..
🍁🍁🍁
في الدار..
لالا مرت خالي حرام..شعرك ماتقصيشي..
رانيا:حتى اني نقول هكي..لكن مافيهاش باس لو نقصتي شويه وصبغتي..
غزلان وهي شاده شعرها وتشوفله:هكي تقولوا..
رباب؛ايه والله هكي احسن..
شبحتلهم وابتسمت وهي تقول:باهي..
رباب:نفكر بعد نجيب نقصه ونصبغه بلون مفاجأة..
رانيا بضحكه:لا مفاجاة لاعيني لون المتزوجات حديثا معروف الأصفر ولاخوته..
ضحكوا..
ورباب تشوف لرانيا من فوق للوطا..ورانيا تضحك عليها..
اما حميده فكانت مستمعه لااكثر..
صارلها شي من النفور جهة غزلان..لأنها زوجه ثانيه..
وين شافتها تلقائيا خطرت عليها حليمه..
🍁🍁🍁🍁
عصرا..
مصراته..
مقعمزين يهدرزوا بشوق والضحكات مافارقتش وجوههم..
حمزة بضحكه:ياكلب ياكلب ..
سند :قصده قلب غير بالعراقي يقولك فيها..
كلهم:ههههههههه..
ماعدا عماد اللي كان طول الوقت يلعب بخاتمه..
ومحمد مركز معاه..
مالك بضحكه:خلاص هانت ماقعدش اكثر من اللي راح..
ابتسم رمزي وهز راسه بإيجاب..
محمد شبحله وقال:هديم حاجات جبناهلك من عمتك..
خداهم وهو يضحك ويوزع فنظره عليهم لين جو عيونه ع عماد..
وجهه تغير بعدين رد انظاره لعمه وهو يقول :سلملي عليها واجد وع امي وع اختي...
محمد:بعتتلك حاجه حتى هي..
ابتسم رمزي...
وعماد قلبه قاعد يوجع فيه..يوجع هلبه 💔
🍁في نهاية الزيارة سلم ع الشباب..
بعدين..
شد رمزي عمه وقال:غصب عنه ماتخلوه يجي..
محمد قعد يشوفله شويه بعدين قال:باهي..
الحارس:هيا ..
شد محمد ع ذراع رمزي ..
رفعه الحارس وطلعه ومحمد طلع وراه...
🍁🍁🍁🍁
طول الطريق...
كان محمد متكنطي وساكت...
وعماد ساكت حتى هو..
ومالك وسند وحمزة يهدرزوا...
بعد قطع مسافه لابأس بيها
وصلوا للبلاد..
وشويه..
للقطعه..
خشوا...
درس سند
نزلوا كلهم...
ومحمد جي لعماد شده ذراعه وخداه ع تركينه وعماد مشي معاه
وقفوا..
عماد بحده:خير..
محمد:انت خيرك هكي وليت خيرك
عماد:قتلك مانبيش نمشي..انت تكعبشت فمشيتي..سايرتك ومشيت..
محمد شبحله بإزدراء..بعدين دفه بقبضه يده من كتفه ومشي وخلاه..
من بعيد شويه كانوا الولاد يراقبوا في المشهد..
حمزة:حسيته ماشي بالسيف..
مالك قعد يشوف لخوه بضيق وماعلقش نهائي..
أما عماد..
التفت لحوش خاله شافله شويه..
بعدين مشي لسيارته...
ركبها وقعد فيها..
🍁🍁🍁🍁
الساعه 8:00مساءا..
انفتح باب الكونشيلو..
وخشوا السيارات ورا بعض..
كانوا البنات يتفحصوا بنظرهم..
في العماره كانت كبيرة..
مساحه الجنان متاعها كبيره..
نزلوا من سيارتهم..
عمر كان في إستقبالهم..
خشوا داخل العماره..
ميلاد:سعيده هدي شقة رمزي..
سعيده شافت للباب وابتسمت بعيون ملينات دموع..
ورزان كذلك..
غاليه شبحت لرانيا..
ورانيا ابتسمت بخجل..
وصلوا في الدور التاني شقة عمر..
فتح عمر الباب..
دخل الرجاله للمربوعه..
بعدين نادى:لميا..
شويه وجت لمياء وهي مبتسمه:انستونا انستونا..
ابتسم عمر وخش المربوعه..
ولمياء استقبلت النساوين وسلمت عليهم ودخلتهم داخل..
خشوا سلموا ع قريباتها الموجودات..
عيون رزان جو ع سناء حست بنار وولعت فيها غيرت عيونها عنها طول..
وسناء كانت تشوفلها برفعة حاجب..
كفايه لما جت عينها ع سناء انصدمت..
كانت لابسه عفريته امريكانه ع كت ابيض من غير اكمام
ومادايره شعرها قرنين ملفوفات...ومدايره غرة نازله ع جبهتها
ومكياج ملفت
في انفها مدايره اكسسوار وودانها
وايديها وصوابعها معبيات اكسسوارات..
سناء جتها تجري:عمتي شن حالك..
سلمت عليها بالأحضان..
ورزان قريب تموت متمالكه نفسها بالسيف..
رانيا وهي تهمس فوذن دلال؛هدا شنو..
دلال:ع قولت السوريين ياضيعانك ياعماد..
رانيا حركت راسها ايمين ويسار..
نور:بنضحك..
رفقه ضحكت بكتمان ونور ضحكت معاها..
بعد سلموا ع الموجودات..
جت سناء لرزان مدت يدها وقالت :هلا..
رزان ابتسمت بكبر وصافحتها..
يدوب سناء سلمت بروس صوابعها ومشت..
قعمزت رزان وهي تبلع فريقها وتحاول تظاهر بالقوة ولا مبالاة ع قد ماتقدر...
🍁🍁🍁🍁
ورتهم لمياء الحوش كله...
بعدين ولوا للصاله اللي كانت كبيره..
بشكل عام الشقه كانت قنينه وديكورها قنين..
والصاله كانوا فيها جلستين افرنجيه وعربيه..
وهالشي استغربوله البنات ماقالتش عليها لمياء..
نادره:هديه من خوها الدكتور ابراهيم..
حميده خطر عليها شكله شدت ضحكتها..
وغاليه ركزت عليها وشدت ضحكتها هي التانيه..
فاطمه بإبتسامة مجامله:ربي يحفظ وخيها..
وسميه تفصل في الأثاث بعيونها...
🍁بعد هدا كله..
قعمزوا فالصاله متوزعين..
البنات فتركينه والنساوين الكبار فتركينه..
رباب:قنينه الشقه ..زعمه شقتك حتى انتي هكي فرخه رانيا؟
رانيا ضحكت وقالت:الله محلاها الكلمه اللي قلتيها توا ترا عاوديها عاودي..
دلال:شقتك انتي وسي ميزوا ياحنه..
غمضت رانيا عيونها وهي تضحك بخجل..
وهما يضحكوا عليها..
ورزان تشوفلها وهي مبتسمه...
"مرحبا صبايا"..
تلاشت ابتسامة رزان..
ردوا عليها بأصوات متقطعه:هلا..
سناء:حلوة الشقه والعمارة فمكان حلو..
رانيا؛ايه المكان حي وفيه حركه..
سناء:ايه...امم..اقترحت ع عماد ياخدلنا شقه هني بش لما نجوا نقعدوا فيها..
رزان كانت تظاهر بالتجاهل ومن داخل ربي بس اللي يشوف فحالة قلبها التعبان 💔..
رباب وهي تشوف لسناء بإمتعاض:اممم..
سناء:عماد يحب البلاد هلبه وحاساته في الاخير بكل بيقولي بنسكنوا هني..
دلال برفعة حاجب:وانتي تبي تعيشي هني ولا لا..
سناء بضحكه:اني بصراحه يعني وين مايبي عماد يعيش نعيش معاه ماتفرقش ..المهم هو...
ورزان مازال دايره روحها مش مهمته تشوف لعمتها غاليه كيف تهدرز
خاطرها تمشيلها وتخش فحضنها وتهرب من ألم العذاب اللي قاعده تحس بيه
ورفقه تشوفلها وحاسه بيها هلبه..
فجأة ناضت وقفت:تمشي معاي رزان نطلعوا للبلكونه اللي هني..
رزان شبحتلها بعدين ناضت وهي تقول؛هي تعالي..
خدت رفقه من يدها ومشت بيها للبالكونه..
والبنات معاهم بعيونهم..
وسناء ابتسمت بعدين قالت؛ايه نور شن جو القرايه..
🍁🍁🍁🍁
في البلاكونه..
رزان بغيظ :قريب التفت عليها وخنقتها ..
رفقه بإزدراء :وحده مقرفه..
فجأة
سمعوا الباب انفتح وخرت رفقه لأنها كانت لابسه قفطان قصير..
اما رزان قعدت واقفه وشبحت لوطا..
شافت عماد خاش وهو يتكلم بالتليفون..
عماد وهو يوزع فنظره ع المكان:ايه توا كيف خشيت..
شبح فوق..
جمد ...
وقلبه يدق بقوة يدق يدق يدق يدق💓..
تنهد تلقائيا تنهيده من الاعماق طالعه..
اما هي..
كانت تشوفله بنظرات كلها لهفه وشوق وألم..
دموعها ع وشك النزول خلاص..
"وينك عمادي"..
التفتت رزان شبحت لسناء بحده..
وسناء رفعت حاجبها وهي تشبحلها..
بعدين مشت وقفت ع السياج وشبحت لعماد...
اشرتله بيده وهي تقول :استاحشتك..
رزان معاش تحملت طول خشت داخل ورفقه لحقتها..
سناء:شن جو ..
عماد بلع ريقه ونزل عيونه وقال:تمام..
سناء تنهدت بضيق وقالت:خليك شويه عماد ماتخشش طول..
عماد:علاش؟!
سناء بنبرة حزن مصطنعه:بصراحه التقعميزة داخل خنقتني..
عماد:خنقاتك؟..
سناء عصرت عيونها وبدت ادمع وتتكلم بنبرة مرتجفه:عماد..الحق ماكنتش نبي نجي لما عرفت ان بنت خالك موجوده..بس غصبت روحي ع خاطر اختي..جيت..وتوقعت يصير اللي كنت خايفه منه..
عماد بتضييقه عيون:اختصري سناء..
سناء بنبرة باكيه:بنت خالك حرقتلي دمي..من اول ماقعمزت وهي تهدرز ع معجيبنهاع اساس..هداكا دارلي هداكا حطلي.. وبعدين تكلمت عليك..
عماد وعيونه متوسعات من الغضب قال:شن قالت؟
سناء رشفت وقالت:دوة تحرق دم..ايام عماد ماايام عماد كان يجيبلي كان يديرلي..كان بيموت عليا ومش عارفه شني..تصدق وبكل وقاحه تقولي فيها ما استمريناش مع بعض بسبب الفرق العلمي بيني وبينه.....
عماد غصب عنه صدق كلامها...
مش بعيد ع رزان التباهي واستحقار اللي قدامها..
ومش بعيد ع رزان يكون هدا تفكيرها..
هو هكي بدي يشوف فيها
لهدا طول صدق فيها اللي انقال..
عماد:احمم..فوتيها ماتعدليش عليها..تجنبيها وخلاص..
يقول فالكلام وقلبه قاعد ينحرق حرق..
سناء مسحت دموعها وقالت:ايه هدا اللي درته..
🍁🍁🍁
فوحده من الممرات..
رفقه:وراس رزان شدي روحك..
رزان من بين دموعها قالت بغضب:والله ماني مخليتهلها الله..كان خليته لغيري نموت خيرلي يارفقه..
رفقه بتوسل:باهي بالله عليك بالله توا امسحي دموعك وشدي روحك ماتشمتيهاش فيك..
رزان خدت نفس...ومسحت دموعها وقالت:نولي كلبة مانسوى...رجف صوتها وهي تقول..كان خليت عماد لغيري..
رفقه:رزان..
شدت دموعها وهزت راسها بإيجاب ..
خدتها رفقه من يدها ومشوا للصاله..
💔
كيف فاتت هديكا الساعات عليهم هما الزوز...
هي طول الوقت مخنوقه بدمعتها وعبرتها..
ع صدرها غمه..
وقلبها في حالة احتراق مستمر..
ونار الغيرة ....مقواها...
اما هو..
بين الموجودين..
موجود جثه بس..
مقهور يحاول يكتم قهرته..
كلام سناء يرن فوذانه ...
مش قادر يطلعه من عقله..
تعرفوا فشن كان خاطره.
يمشي لمكان مافيه حد غيره هو..
ويصرخ بأعلى صوته..
يطلع شويه من الألم والغمه اللي فداخله..
💔💔💔💔💔
عدت هديكا العزومه كيف ماعدت...
واللي هدا روح ع حاله..
ماعدا ام لمياء وخواتها قعدوا بايتين عندها..
🍁🍁🍁🍁
ريتن اختها من امها..
كفايه:تحسيها طيبه هلبه..
حميده:حتى اني حسيتها هكي..
زينب:برغم انها الكبيرة لكن لمياء هي المسيطره..
غاليه؛لمياء مسيطره على عيلتها اوكل..عندكن علم سيدها مرات يكلم فيها وياخد فشورها..
تفاجئوا..
غاليه:والله قدامي مواقف رايتهن..هدي امها ماتتحرك لمكان ولادير حاجه من غير ماتخبرها..
نعيمه:احسن حاجه صارت انها حولت..لاحظتها راهو حاولت ادير هكي حتى هني..
غاليه:حتى محمد لاحظها...
زينب؛الا ع سيرة محمد ريتيها لما شكرنا بلقيس شن قالت عليها..مطيفشه شوي..
غاليه:قريب تموت منها هي ومرام ياناس ماطيق تسمع سيرتهن..
نعيمه:ايه لما تكلمنا ع مرام وقلنا بلعاني ماروحتش لعرس خوها ع خاطر هانيبال..وجهها تغير..
زينب:كلا مرام هادي نية خوي الباهيه..
غاليه بإبتسامه:صح..رغم ان وقت عرس خوها كانت اجازتها راهو تقدر تروح..
نعيمه:هانيبال بصفه عامه طاح في عيله ماشاء الله..
زينب بضيق:ناري عليك ياعمر..
كفايه تسمع فيهم ..خلوقها اطبقوا وزادت انوجعت ع ولدها..
وحميده تسمع ومش قادره تعلق..لانها سبب من اسباب وصول علاقه عمر ولمياء للزواج وساعدت هلبه بش هالزواج يتم..وياما دافعت عنها..
مالهاش عين تقول شي..
في الدار التانيه..
صكرت دلال الضي ع صغارها وغزلان والبنات اللي كانوا فسابع حلمه..
وطلعت من الدار بطريقها للكوجينه بش تشرب ميه..
وقفت في السقيفه لما شافت رزان مقعمزة فم البوابه وتبكي..
مشت طلعتلها وقال :رزان!..
رزان رفعت راسها وهي تشوف لدلال بعيون نظرتهم كلها الم ودموع..
قعمزت حداها دلال وقالت:الله غالب رزان نصيب..
رزان ببكي؛لا مش نصيب غباء مني..حقارة مني..كله مني يادلال كله مني..اني اللي ريحته من بين ايديا اني اللي سلمت لغيري بإيديا اني..عطيني مايرفعني..
شدت دلال ايديها وقالت؛اششش رزان ..علاش تقولي ع روحك هكي شن درتي بش تلومي نفسك هكي!!قوليلي؟
بلعت رزان ريقها وشبحت لدلال...
🍁🍁🍁🍁
احسن بعد..هكي نبيك...
سناء:يعني مااوفرتش..
لمياء:بالعكس.. المهم..توا التفتي ع امه وخالاته وحاولي تكسبيهم راهو حوش جدوده من امه ماعنداش معاهم الروح..
سناء بتفكير:تمام...
لمياء بإبتسامه: ايه..قوليلي..شن رايك فالضيافه والعشي ..
سناء بضحكه:روووعه..حاجه صح من الاخير..
🍁🍁🍁🍁
رزان ببكي:عارفه روحي إني غلطت عارفه ونعترف ..بس أني انحرقت يادلال انحرقت..حطي نفسك فمكاني يادلال يوصلك كلام زي اللي وصلني شن ممكن يطلع منك شن ممكن اديري..
دلال بأسف والدموع معبيات عيونها:انتي زادك الكلام المسموم اللي سمعتيه يارزان واني نلومك ومانلومكش..وفي نفس الوقت هو معذور..
شدت يد دلال وقالت بالعبرة:باهي دلال..ارجوك كلميه..ارجوك يحترمك واجد هو..وضحيله فهميه... بالله عليك يادلال بالله عليك..بنموت والله بنموت خلاص ..
دلال تأثرت ع الأخر وحضنتها وقالت:خلاص حبيبتي خلاص تو نكلمه تو ندير جهدي...خلاص..
🍁🍁🍁🍁
تاني يوم..
الساعه 11:00صباحا..
فم البوابه..
عماد:خير دلال ..
دلال:خير..
عماد:تفضلي بنت خالتي ..
تنهدت دلال وقالت:ارجوك عماد اسمعني للأخير تمام..
رفع حواجبه وقال:امممم..هز راسه بإيجاب وقال:تمام..نسمع فيك..
🍁🍁🍁🍁
كانت تنشف في الدروج زي ماقالتله امها..
وصلت في الدرجه الأخيره سمعت صوت حد نازل..
رفعت راسها وانصمتت..
مالك وقف فمكانه وقعد يشوفلها..
هي طول غيرت عيونها عنه خدت السياقه بالنشافه وطول مشت خشت للحوش..
تنهد مالك بألم...بعدين نزل...
وقف في الباب وهو يشوفلها كيف ماشيه الكوجينه قال:يام..
هي خشت للكوجينه..
حطت سياقه وقعدت واقفه فيها..
شويه وسمعت صوت عماد وهو يقول..
"قوليلها والنبي دوري ع من تمشيه"
دلال:عماد..
قاطعها وقال:دلال المخلوقه هادي اني معاش نبي نسمع عنها شي...تصدقي بديت ننقرف وين نسمع اسمها..
دلال:حرام عليك مش لهالدرجه...
عماد بملل:والنبي صكريلي ع هالسيرة بالله عليك..معاش تهمني فشي نادمه ولا بتموت..معاش تعنيلي شي مية مرة قلتها قبل...
دلال:اني والله مصدومه فيك مش مصدقه ان انت دير هكي..البنت بتموت وانت عادي عندك ..
عماد بتضييقة عيون:علاش اللي دارته فيا هيا شويه يادلال..دلال انتي ماتندري ع شي..
دلال:لانندري ونعرف كل شي هي حكتلي بالتفصيل...
عماد بتهكم:كذب فكذب وانتي صدقتي..
دلال برفعة حواجب:والله مامصدقه انت هكي وليت!!..نزلت حواجبها وقالت..تمام..دير اللي يعجبك ومبروك عليك سناء
وربي يتتم ع خير..
وخشت داخل وهي فقمة الغضب..
وهو غمض عيونه بشده..
بعدين عض ع شاربه ..
فتح عيونه..
ولف ومشي لسيارته..
قبل يوصلها رن تليفونه..
تأفف ووقف..
طلعه من جيبه..
شاف المتصل رقم..
فتح الخط ورد:آلو..
رزان بنبرة حاده ممزوجه فالبكي:والله ماتقدر تحب غيري والله ولاتقدر تشوف غيري..عدي برا اخطب بدال الوحده عشرة عدي..سيورك مولي..ووالله حتولي..
وصكرت فوجهه التليفون..
🍃سمعت حديثه مع دلال من روشن دار رمزي🍃
وصلاته لاقصى مراحل الغضب...
وحتخليه يدير شي لاتحمد عقباه...
في نفس الوقت..
في الكوجينه..
كانوا موجودات..
الحاجه فاطمه وغاليه وزينب وسعيده...
كانوا يهدرزوا عادي..
فجأة ...
خش عليهم هو وكان فقمة العصبيه..
شبح لغاليه وقال:راهو اني سكتت ومشيت هلبه وبنت خوك بتصرفاتها هي اللي وصلتني لهني..قوليلها تخطى امي..اني راجل خاطب مانبيش تصيرلي مشاكل من وراها..
قوليلها تعاود تبعتلي حد ولاتتصل بيا مرة تانيه قسما بالله ماضال الا ماشي طول لبوها..
غاليه وفاطمه يشوفوله بصدمه..
وزينب تشوف لسعيده..
اللي كانت مصدومه اكثر منهم..
عماد ورافع سبابته تهديدا:واهو قد اعذر من انذر..
ولف ومشي طول طلع من حداهم..
فاطمه:قسما بالله ماتبي الا طريحه باهيه الفرخه هدي..
ومشت طلعت من حداهم وزينب لحقتها..
غاليه بعيون معبيات دموع كانت تشوف لسعيده..
وسعيده شبحتلها بنفس النظره..
رمشت عيونها ببطئ بعدين مشت طلعت ...
وصلت للحوش وخشت..
مشت طول للدار فتحتها..
لقت بنتها متكمشه فبعضها فسريريها وتبكي..
سعيده سكت غضبها فجأة..
مشتلها..
وقعمزت حداها وحاوطت بنتها وحضنتها..
ورزان مازال تبكي بالعبرة...
🍃ماحد يقول مبالغه اللي داراته رزان اللي مجربش يحب من قلبه مايحكمش ع شي مايعرفاش..اللي ماعرفش يعشق فحياته مايفتيش فشي مايفهماش..
ماحد حيحس ولايفهم اللي تمر بيه رزان غير حد عاش نفس اللي عاشاته🍃

...يتبع...