المتمردين

العشق المتمرد

#العشق_المتمرد"اختبار"

#جمان_فريد

الجزء 114القسم الثاني

🌟..
بنعدوا اني وسعيده توا..
قالت غاليه كلامها هدا للمياء عن طريق التليفون المحطوط ع التلفزيون والمايك متاعه مفتوح...
لانها تلبس فعابيتها..
لمياء:تمام مالا اني وعمتي وحميده بنمشوا لبنت عيلة عبدالمقصود؟
غاليه:ومعاكم رزان..
رفعت لمياء حاجبها وقالت:باهي..
غاليه بإستعجال بعد سمعت صوت الكلاكس:خلاص لمياء توا بنصكر بالسلامه..
لمياء :بالسلامه..
صكرت غاليه وخدت التليفون..
دارت طله ع روحها في المرايه..بعدين خدت شنطتها ومشت طلعت من الدار وهي تقول بصوت عالي:يمي..حميده..اني طلعت..
وصلت فم الحوش من القدام ..لبست كندرتها..
بعدين مشت بسرعه متوجهه لسيارة توفيق اللي كانت راكبه فيها سعيده من القدام..
ركبت من الخلف..
وتحرك توفيق متوجه للزاويه بش بيرفعوا موسم خطيبته
اريج💓..
🍁🍁🍁🍁
الساعه 6:00مساءا..
في المربوعه الخارجيه..
والله ياخال الامور غادي تمام برغم بعض المشاكل اللي تصير بين فتره وفتره لكن ماهيش مأثرة هداك التأثير ع حياة الناس..
هانيبال:مايضايقوش فيكم غادي..
اصيل بإبتسامه:عايشين غادي بخيرنا وفلوسنا ومادام عندك فلوس غادي مايضايقك حد...
محمد:صدقت هدا دينهم ناسها..
اصيل هز راسه بإيجاب..
هانيبال:تو انت ياأصيل ماسك كل شي يخصكم انت وخوتك ورزق جدك وخوالك؟..
اصيل ابتسم وهز راسه بإيجاب..
مؤنس:يحب يتحمل المسؤوليه..برغم المعروف ان المسؤوليه حمل ثقيل وماينحب..لكن خوي هدى عكس الناس..
ضحك اصيل بإحراج وهما ابتسموا..
هانيبال:لأنه راجل يامؤنس كيف خاله عمار بالزبط تحمل مسؤوليات واجده بمبادرة منه هو...
عبدالرزاق:جدي ديما يقوله فيها فيك من خالك واجد..
ابتسم اصيل وقال:الله يرحمه..
كلهم قالوا بعده :الله يرحمه..
وعماد اللي كان مقعمز في الطرف وهو ماد رجليه وحاطهم ع بعض ومشبك صوابع ايديه فبعض وهو يشوفلهم...
مقعمز بالسيف..
ومخنوق...ومكتوم ع نفسه..
وكأن اصيل بثقله قاعد ع صدره..
اصيل شبح لميلاد وقال:مال وين توفيق ياخال..
ميلاد:عدا شور الزاويه..
اصيل:وامتى مروح؟..
ميلاد:إن شاء الله بعد اذان العشي..
هز اصيل راسه بإيجاب..
بعدين..
حرك عيونه جو فعيون عماد ابتسم..
وعماد ردهاله إبتسامه فوق من النفس..
غير عيونه عنه والتفت لمؤنس وقعد يكلم فيه..
وعماد بعد كان يشوفلهم غير عيونه عنهم ووزع نظره ع الحاضرين ..
تبت نظره ع خاله هانيبال اللي كان يهدرز ع ميلاد..
وفعقله كان يدور كلامه..
《 باهي اللي ماصارش منكم..لأن واحد بعقليتك ويتصرف تصرفات كيف تصرفاتك هدي مايتأمن ع مراة غدوة ولابعد غدوة كان تعارك هو وياها يلبز مع هلها ويدير افعال يحشم بيهن روحه وهله》
عماد"الغريب اللي ماعرفوشي الا ولامس بيفضلوه عليك انت ولدهم اللي يعرفوك من لما جت ع الدنيا وربوك ع ايديهم!..
ايه..يفضلوه عليك ليش لا..
ماهو انت اللي ربوك وكأنوا متأملين فيك خير خذلتهم..
وبعدين هو مش غريب..ماسمعتش خالك شن قال عليه!؟
اااخ وخلاص اااخ...شن درت فروحك ياعماد شن درت"..
شبح لأصيل وهو يهدرز ع خواله وبالذات هانيبال اللي كان باينه يبي يتعرف عليه اكثر واكثر..
قعد يراقب فيهم طول الوقت..
وناسي شي مهم...انه مقيد..مقيد...
وهو اللي قيد روحه بروحه...
🍁🍁🍁🍁
تو بالله حاجه زي هادي ينساها ياسعد؟!..
سعد تأفف بتذمر..
كفايه:كيف ندير اني توا؟..
سعد شبحلها شويه وقال؛شن رايك تكلميهم توا تقوليلهم انك بتجيهم غدوة تمام..واني الليله نطلعك تاخديلها موسم..
كفايه مطت شواربها بملل وقالت:ولو اني مانبي ناخدلها شويه ولانختارلها حاجه لكن بش نستر وخيي قدام مرته وماليها نمشي وناخدلها احسن شي..
تنهد سعد وقال:باهي خير بلاه هو كيف نسي حاجه زي هادي؟!!
كفايه:لأنه مايبيش مايبيش ياسعد مايبيهاش..
سعد حرك راسه ايمين ويسار وهو يقول:لاحول ولاقوة إلا بالله..
🌴🌴🌴🌴
وعلاش هديكا حاشية خشمها معاكم؟؟
رزان وهي تحط الطواسي فالصفره:حناي قات لازم وحده من الكناين تعدي..ناضت هي رشحت روحها..
حدهم:تبي تشوف شن خدوا لبلقيس..
رباب وهي اطلع في باكوات العصاير من الثلاجه؛صح..
رزان؛كلكم تقولوا انها حاطه فراسها بلقيس..ليش شن رت منها بش تحطها فراسها..
رباب قدمت وقعدت توزع في الباكوات ع الصفر وهي تقول:حسد يارزان حسد..
رزان:ليش باهي فشن زايده عليها بلقيس؟..
رباب:ماتبيهاش تزيد عليها..ماتبيش تكون في كنه بعدها تبي تكون هي الأخيره والكل فالكل...
حدهم:صح..شوفي رزان عمتي سعيده علاقتها بعيلة جدك شبه محدودة..ونساوين عمك حميد الزوز بعاد...ومرت عمك الهادي سميه ديما جابده روحها...ومرام مش ديما قاعده..وهكي الساحه فاضيه للست لميا...
رباب بإبتسامه:صحه ليك..شبحت لرزان وقالت..بلقيس شهلوليه وتبي العيله ومدخله روحها فيها من قبل ماتوصل..يابال لو وصلت وسكنت فوق حوش العيله بالزبط...
حدهم:هي هكي اقوى منافسه للميا ومش حتخليها توصل في اللي تبيه..
رزان ضحكت بإستغراب:عليك تفكير..شن تستفيد يعني..الوحده تتزوج بش تستقل بنفسها عن عيلتها مش بش تربط روحها بعيله تانيه وتقعد مقيده طول عمرها!
رباب:هلبه هكي ولى تفكيرهم يارزان ومرت خالي عمر وحده منهم..
تنهدت رزان وهي رافعه حواجبها بعدين التفتت تكمل فشغلها ورباب وحدهم كذلك..
"رباب"..
شبحولها البنات..
رباب:جايه هي..
ولفت ومشت طلعت من الكوجينه..
حدهم:ترا بالله رزونه طلعي طاجين البسوسه من الكوشه..
رزان:طايبه ومعسله ولا؟..
رباب:من بكري..
رزان هزت راسها بإيجاب والتفتت للكوشه المحطوطه ع الدولاب..
فتحتها وطلعت منها الطاجين لما شافاته شهقت بصدمه..
حدهم:خيرك؟..
رزان:كلها نمل..
حدهم خبطت بكفوفها خدودها وهي تقول :حييي..
مشتلها تجري وشافت الطاجين..حطت يدها ع فمها..
ع خشة رباب شافتهم واقفات حدا الكوشه قالت:خيركم؟
حدهم:البسبوسه كلها نمل..
حطت رباب ايديها ع راسها وقالت:منين جاها يانهاري!!؟
رزان حطت الطاجين ع الدولاب وقالت :مفروض سلفرتوها..
رباب بتوتر:شن ندير توا اكيد الضي قريب يهرب والمولد متاعنا مايخدمش الكوشه..
قعدوا يفكروا وهما يشوفوا لبعض..
بعدين قالت رزان:عندك جوز هند وشوفان وكاكاو؟
رباب:ايه التلاته عندي!..
رزان:نعرف نوع حلو لايبي تلاجه لاكوشه..طريقته عندي في اللاب اصبري عليا نعدي نجيبه ونجي..
رباب:تمام..بسرعه بسرعه رزونه..
رزان :باهي..شوفيلي الطريق..
رباب: مؤنس طلع ..
رزان :تمام..
مشت طول طلعت من الكوجينه خدت عبايتها ووشاحها من ع الشماعه ..
لبست العبايه وسرتت السوسته متاعها بسرعه وحطت الوشاح حط..
وصلت في الباب فتحاته وطلعت وصكراته وراها...
🍁🍁🍁🍁
خيرك ماعديتي معاهن..
سميه:مش بترفعني للسوق؟..
الهادي:ياودي عديتي اليوم وغدوة نرفعك السوق..
سميه:خلاص توا ياهادي لميا بتعدي..اني ماعندي ليش ماشيه مش حفله هي موسم بيرفعوه ويروحوا..
الهادي تنهد وقال:باهي باهي..
توجه للباب بيفتحه ويطلع..
سميه:ماتنساش تصلي العشي وتجي طول..
هز راسه بإيجاب وطلع ..
بعد طلع مشي طول للمربوعه لمح وهو ماشي رزان راكبه دروج حوشهم..
غير عيونه عنها..فتح باب المربوعه لما وصل فيها..
طلع قدامه اصيل..
الهادي؛جو تمام؟..
اصيل بإبتسامه:مليح
ابتسم الهادي وخش..
واصيل توجه لسيارته..
وصل فيها..
فتح بابها..
وكيف جاي بيركب..
"وين تحط فيها لما تسافر"..
ارتسمت ع وجهه ابتسامه جانبيه..
وقف ع حيله والتفت وقال..
اصيل:عند صديق ليا فمصراته..
رفع عماد حواجبه وقال وهو ماط شواربه للأسفل:اممم..
اصيل:صداقه مالهاش علاقه باللي صار واللي قاعد يصير..
ضيق عيونه وكمل يقول..كيف علاقتك بخوالك تو..
عماد رفع حاجبه وقال:حلو..
اصيل هز راسه بإيجاب وهو مبتسم..
عماد:بنسألك..
اصيل:اسال..
عماد:الشركه اللي عندكم غادي شن هي؟
اصيل:استثماريه..
عماد:امم..وتتعامل مع اجانب هلبه غادي صح؟
اصيل:اكيد..
عماد ابتسم ع جنب وقال:وياترى تتعامل معاهم غادي زي ماتتعامل مع الناس هني ووتتكلم بنفس الاسلوب؟
ضحك اصيل وقال:ولو ان سؤالك غريب لكن عادي مافيش مشكله..نجاوبك..ابتسم وقال..ايه..لأن اسلوبي هدى تربيت عليه..يجري فدمي..كلنا هك حني....معتزين بأنفسنا ع طول الخط..
عماد يبي يستفزه بأي شكل..
ابتسم متهكما وقال:طبيعي هدا يكون حال اللي يجي ع الدنيا وكل شي متوفرله...وكل شي تحت امره...
اصيل بضحكه:مالاش علاقه بكل..ياما منهم متوفرلهم ع قولتك كل شي..وتلقاهم لاقيمه ولاقدر..التربيه التربيه ياولد الخاله..في اللي يربوه رباية رجاله من حيش هو عيل..وفي  اللي يقعد مطلوق.. يعيش عيل ويموت عيل...
عماد لقي روحه هو اللي قاعد يستفز "بضم الياء"...
لذلك ماكانش يبي ينهي هالحديث الا لما يوصل لهدفه...
واصيل فاهم عليه زين...
عماد بكبر: بس في فرق كبير بين اللي بني روحه بذراعه ولا دور بوه ولاامه وبين اللي جاته واتيه..
اصيل بثقه:هو اكيد في فرق بس حتى اللي تجيه واتيه لو كان خايب حيضيع تعب سنين فشهر واحد بس..لكن اني مثال قدامك ..تعب جدي وخوالي اني اللي ندير فيه كله توا كبرته فتلات سنين اضعاف مضاعفه..
عماد برفعة حاجب:ع حسب علمي متخرج من القانون..
ابتسم بغرور وقال:اني خريج هندسة نفط..وقانون دولي وقاعد توا نحضر في الماجستير..ومع هدا تمرست في مجال التجارة وادارة الأعمال لأني تحملت مسؤوليه فعمر صغير..وع فكرة العلم ليه دور كبير راهو..
عماد مش قادر يرد بكلمه حاس بشي فداخله انهز...
فجأة انفتح باب حوش خاله ميلاد ..
الزوز التفتوا لقوا رزان طالعه منه باللاب متاعها..
ماشبحتهمش طول نزلت من الدروج وكملت طريقها لحوش جدها عبدالله..
عماد غير عيونه عنها وشبح لأصيل لقاه يشوفلها بإبتسامه جانبيه والإعجاب واضح ع وجهه..
وصلت حدها عند عماد..
وصلت لوين ووين...
رفع حاجبه وقال بنبرة تهكميه:واكيد اللي زيك مايحبوش يعقبوا الغير ع حاجتهم...
اصيل صدمه الكلام...
بس فهم منه انه استفز عماد هلبه..
التفتله وهو مبتسم قال:اكيد..بس في حاجه مهمه نبي نوضحهلك..حني ناس نوعنا نقدروا الحاجه الغاليه واجد..ونديروا المستحيل بيش نحوزوها...
مش مهم لو كانت عند غيرنا يوم ما وفرط فيها..العيب فيه مش فينا..هو اللي يجهل قيمتها هدى ليش فرط فيها..
ماقدرش يخفي عماد ملامح الغضب اللي ارتسمت غصبا ع وجهه..
اصيل:وهدى اثبات لشي مهم..انها مش له من البدايه..نصيب غيره..
نظرات عماد لأصيل كانت مخيفه..
ولو النظرات تقتل..كان اصيل لقي مصرعه فهاللحظه..
بس نظرات اصيل كانت بارده..
وابتسامته كانت مستفزة لأبعد حد..
كمل كلامه وهو بقول بنبرة فيها شي من تهكم وبلغة غير لغته الأم:
"استمعت في حديثي معك "..
باللغة الإنجليزيه قالها..ضحك وترجم اللي قاله..قصدي عجبتني هدرزتك...ممتعه..وتوا نستأذنك ياولد الخاله عندي حاجه ضروريه نبي نديرها بسرعه بش نلحق ع الفطور..
ابتسم عماد بعد بلع ريقه وقال؛صح فطورك مسبقا..
اصيل ركب السيارة وهو يقول:سلمك..
فتح القجر وطلع منه حاجات..
عماد شافله شويه..
وهو يغلي مع بعضه غلي..
بعدين هز راسه بإيجاب محاوله منه لتهدئة نفسه..
وطول لف ومشي...
وهو يفتح فيده ويرجع يسكرها من العصبيه...
اما اصيل..
خدي الحاجات اللي طلعهم من القجر..
ونزل من السيارة ..صكر بابها بالمفتاح...
شبح ايمينه شاف عماد وهو ماشي ..
ضحك..
بعدين شبح القدام وكمل طريقه للعمارة...
🍁🍁🍁🍁
آذن المغرب..
وكل اهل القطعه فطروا..
كان الفطور فشقة مؤنس اجوائه حلوة..
هدرزة وضحك بين احفاد مختار في المربوعه..
وكذلك بين رباب وحدهم ورزان..
بس كان جو الفطور هادي..
بين ميلاد والهادي ومحمد وعمر في المربوعه الدخلانيه متاع الحوش..
لكن عند النساوين..
ماشاء الله مرام من لما جت وهي من عزومه لعزومه
حميده:اقاربها وناسها
لمياء:امم..اليوم عزمتها مرت خوها
حميده؛امم..عروس راهي مفروض يعزموها لكن هي اللي عزمت
سميه بضحكه: الحمد لله حتى حني عزمنا..وبعدين خيرنا لما كنا عرايس ماحد عزمنا كان العروس مفروض يعزموها!
رفعت لمياء حواجبها.
فاطمه:عزموك نعيمه وكفايه لكن الهادي ماباش يعدي نسيتي لما تعاركتي انتي وياه ع خاطرهن
سميه بلعت وقالت:امم..عندك حق ياعمتي ماشاء الله ذاكرتك ناشطه..الله غالب تمرميد الحياة يذهب الشيرة
حميده شبحتلها وهي تاكل
لمياء:هو اني الحق انعزمت لكن مابيتش نكلف ع البنات وقتها..
سميه شبحتلها ع جنب..
فاطمه مطت شواربها بملل بعدين ناضت وهي تقول؛سقدن رواحكن صلن وحطن الشربه للرجاله قبل يعدوا للتراويح..
ولفت ومشت للحمام..
وحميده ناضت ببنتها للكوجينه..
سميه بهمس:تو مش هي اللي بدت..
لمياء:خلاص فوتي ونوضي ارفعي معاي..
رفعت لمياء الصفرة ومشت للكوجينه..
وسميه لمت المفرش ومن داخلها تسب فحميده..
🍁🍁🍁🍁
بعد صلوا رباب ورزان وحدهم..
بعدوا يوتوا فصفر الشربه مع بعض..
رباب:صوت المولدات قلبلي راسي..
حدهم:بالذات مولد حوش جدي ..
رباب:صح صوته مزعج ع الآخر..
رزان:رباب ليم العصر وين؟..
رباب:في قجر التلاجه من لوطا..كثري منه سلفي اصيل يحبه هلبه..
حدهم شبحت لرباب وغمزت..
رباب هزت راسها بإيجاب..
حدهم:رباب هلبه خبزة الشعير..
رباب:اصيل ماياكلش الشربه الا بيها..
رزان تقص في الليم ومش منتبهه هلبه لدوتهم..
حدهم بضحكه:شكله عنده طقوس خاصه في الماكله..
رباب:بكل..لايمكن ياكل من غير مايشرب عصير..المشروب مستحيل يشربه..وجبة الفطور عنده اهم وجبه..وهو والقهوة مش صحاب..يحب الحلو بس مش هلبه..ومش وكال..
حدهم:قصدك مش متعب من ناحية الماكله..
رباب:عمتي قالت الوحيد اللي مايدورش في الماكله هلبه الفطور اهم شي عنده والباقي تحصيل حاصل..
رزان:وتوا الصفر..
رباب:باهي ترا جبيلي طنجرة الشربه..
رزان :باهي..
خدت فوطتين ومشت للغاز .
وحدهم ورباب يشوفوا لبعض..
ع جيتها هي بالطنجره..
حولت الغطا...
رزان:الله محلا ريحة النعاع فالشربه..
رباب بإبتسامه:اصيل يحبه هلبه..
شقلبت رزان عيونها وخدت فنجان شربه ومداته لرباب..
ضحكوا رباب وحدهم..
رباب:والله ماهو عادي يارزونه..
حدهم:كامل ومكمل يارزونه داعيتلها امها فليلة مباركه اللي بتاخده..
رزان:ربي يهنيها بيه..وهي صبي راجلك قريب يناديك..
شبحولها الزوز بضيق وبعدها بدت رباب تصب فالشربه
🍁🍁🍁🍁
امتى تجيب ربوبه..
رانيا:موعدها فشهر 9..
مريم بضحكه:مازال شهرين وتولي خاله..
رانيا ابتسمت بحماس:الله..احلى شعور..
مريم بإبتسامه:بجديات شعور يهبل يارنوشه..
"مريم"..
مريم ناضت:هيا يام هاني جايه..ومشت للكوجينه...
اما رانيا لهت بتليفونها..
خشت ع الفيس..
قابلها منشور نازل فصفحة استاذها زين..
فيه صورة للكيكه الروسيه ومكتوب فوقها باللغه الإنجليزيه..
"أظلمت حياتي من بعدك"..
هي مافهمتش كويس المكتوب..
راجت لين جتها مريم قعمزت حداها..
رانيا:ترا مريم شوفيلي الكلام هدا شن معناه؟
(خريجة لغات" الانجيلزيه")
شافت مريم الجمله وقالت..
اظلمت... حياتي من...بعدك
ضيقت عيونها وقالت:هادي الكيكه الروسيه
رانيا قعدت تشوف لصورة الكيكه وهي تفكر..
كيف استاذها عايش اجواء رمضان بروحه؟؟
اكيد في كل وقت شبح الذكريات يحوم حواليه..
والوحده للإنسان عذاب كبير...
تنهدت بألم...
مريم:تعرفي اللي منزلها؟..
رانيا هزت راسها بإيجاب وملامح الحزن ع وجهها
ع جية عمتها نجيه:هيا نوضوا طلعوا البخش
والصفر..تحركوا..
ناضوا رانيا ومريم ومشوا للكوجينه..
ع طلعة زينب وسلفتها منها..
زينب بهمس:حشوة العصبان مش طايبه زين..
نجمه بنفس الهمس:اسكتي فكينا..
ضحكت زينب بكتمان..
ومشوا للصاله..
🌴🌴🌴🌴
بعد روحوا الرجاله من التروايح
حطولهم عشاهم..
وبعد تعشوا..
تعاونوا لمياء وحميده ع غسل الماعين بسرعه بش يكملوا بكري ويوتوا ارواحهم..
نفس الشي دارت رزان فحوش رباب..
رزان؛خلاص حدهم اطلعي درتيه كله انتي..
حدهم بضحكه:باهي..
ومشت طلعت..
ورزان قعدت تكنس فالكوجينه..
طلعت اللي كنساته للبلاكونه..
وقعدت تكنس فيها حتى هي..
البلاكونه يطلعولها من جيهتين..
جهة الكوجينه...
وجهة الممر اللي يرفع للمربوعه...
رزان:تهبل البلاكونه مخليينها مش كيف ماكانت ع ايام صبريه..
لوطا...
تحديدا حدا المربوعه الخارجيه..
عماد؛خلاص يام نسينا توا واللي صار صار دبريها بمعرفتك...
كفايه:تي باهي علاش ماقلتليش لااني ولابوك ولاخوتك انك روحت من تركيا ع ***** طول..
عماد بملل؛هاك عرفتي شن صار يعني..
كفايه تنهدت وسكتت..
اما هو حرك راسه ايمين ويسار وهو يوزع فنظره حواليه..
وطب عينه عليها وهي طالعه تكنس في البلاكونه ومش حاطه شى ع راسها...
رزان:بتغيب علينا وتهجرنا وبنستناك...
طاربه وهي تكنس ع اقل من مهلها..
داخل...
اصيل فم المربوعه:مافي حد؟
مؤنس وهو خاش :كلهن في الصاله..
هز راسه بإيجاب وقال:تمام..
وكمل طريقه في الممر متوجه للبلاكونه بش بيجري مكالمه عمل...التغطيه داخل مش مساعداته..
وصل في البلاكونه..
طلعلها ..
وقف فمكانه لما شافها اطبق في المفارش بعد نفضتهم وهي تغني:رمضااان جانا اهلا رمضان..تنهدت وقالت..وين جانا عدا خلاص...ديما الحاجات الحلوة فيسع ماتم...
وهو مازال واقف يشوفلها وابتسامه الإعجاب الشديد ع وجهه..
من بعيد شوي..
تي ياعن شيطان جدك ..خشييي..
كفايه:شن هي!!؟
عماد بعصبيه :فوتيني يام بالله عليك...وصكر فوجهها..
وهو عيونه معلقات في البلاكونه كان يلقى يطير بش يوصل غادي ويحدف اصيل من فوق..
رزان :تمام هكي..
التفتت بش بتحط المكنسه فمكانها...
شهقت من الخلعه شهقه قويه لماشافاته..
اصيل:اسف..اسف جدا...مش قصدي..
رزان بعصبيه:تنحنح دير صوت ..
ضحك ع نبرة صوتها لما كشخت..
هي طول خشت داخل تجري بعد طلقت المكنسة وطاحت قدامه...
ضحك تاني ..بعدين قدم للمكنسه ..طبس ورفعها..
وهو مبتسم ..
بعدين قدم للسياج..
شاف عماد...
رفع حواجبه..
ومدله يده يحي فيه..
وبعدها حط ايديه  الزوز ع السياج وهو يشوف لعماد..
عماد رفع يده اللي فيها التليفون وهو يقول:الله ياخدك..
اصيل قاعد بنفس وضعيته..
وعماد اعصابه تلفوا..
مشي طول جهة الجرف وادرق عن اصيل.
اصيل ضحك..بعدين وخر ع السياج وطلع تليفونه بش يجري مكالمته...
🍁🍁🍁🍁
الساعه 11:30ليلا...
نزلوا الحاجه فاطمه وحميده بنتها ولمياء ورزان من سيارة عمر..
بعدين نزل عمر..
طق ع الباب..
فتح خو بلقيس الكبير وهو يرحب بيهم..
دخلهم..
النساوين توجهوا لباب الحوش الدخلاني..
وخو بلقيس وعمر للمربوعه الخارجيه..
فم باب الحوش..
طقت حميده..
شويه انفتح الباب..
بلقيس بإبتسامه حلوة؛مرحبتين مرحبتين..
فاطمه بإبتسامه:مرحب بيك ياحنه مرحب بيك..
وسلمت عليها بلقيس وكبت ع راسها وهي تقول:تفضلي عمتي تفضلي..
خشت فاطمه ع جية ام بلقيس من بعيد وهي تمشي بسرعه وترحب وصلت في الحاجه فاطمه وسلمت عليها..
وبلقيس تسلم ع حميده وتاهل وتسهل...
وباست حنين ورحبت بيها حتى هي..
بعدين سلمت ع رزان بالأحضان..
والبصارة والضحك...ودخلتها..
لما جي دور لمياء..
بلقيس:مرحبتين..
لمياء مدت يدها:اهلا..
بلقيس شدت ع سنونها وهي مبتسمه سحبتها بقوة وسلمت عليها بالخد وتقول:شنو حالك ياحنه..
لمياء:فخيار خيري..
بعدوا عن بعض..
بلقيس بإبتسامة غيظ:دوم..
خشت لمياء وفاتتها...
تلاشت ابتسامه وبلقيس وحاجبها ارتفع بروحه..
وصكرت الباب وخشت..
🍁طول التقعميزة وبلقيس واكله الجو بهدرزتها وبصارتها..
ومنسجمه معاها عزوزتها آخر انسجام..
ولمياء قنبله نوويه ع وشك الإنفجار..
شويه
وجابولهم السحور..
تسحروا..
وبعد السحور..خشوا فالجديات..
فاطمه:انتم ادرى بظروف البلاد يانجاة بابنتي..
نجاة:هي الكسوة ياحاجه ليكم وللبنت..والكلام فيها بينكم وبينها..
شبحوا لبلقيس..
بلقيس ابتسمت وقالت:والله ياعمتي وربي شاهد ان حتى جيبة الموسم فهالظروف مانبيها يابال الكسوة..متنازله عنها مش حينقص مني شي لو ماجتني الكسوة....فلوسهن ينحطن فشي يقعدلنا..
حميده: متأكده يابلقيس..مش بعدين يتغير الكلام..
لمياء ووجهها تغير..
بلقيس:كان غيرته معناها اني مش بنت اصل وردوا بالكم تخلوا ولدكم يكمل معاي..
ابتسمت فاطمه..
وحميده ابتسمت برفعة حاجب وهي تشوف للمياء اللي كانت تشوف لبلقيس بحده..
اما رزان فكانت تشوف لبلقيس بإعجاب..
نجاة بإبتسامه:ولااني ولاسيدها نرضوها ادير حركه كيف هدي..حاجه فاطمه..البنت بنتكم وشن ماتبوا اديرولها ماشي...
فاطمه:هدى من طيب اصلكم يانجاة...
نجاة بإبتسامه:تسلمي...
🍁🍁🍁🍁
خشوا لممر فم البوابه
البوابه وهما يهدرزوا..
حميده بضحكه:وصلت حتى فالبرك التركية عمتك بلقيس!
رزان بضحكه:توصل حتى فالسوشي الياباني بلقيس هدي..
ع طلعة غاليه من فم البوابه وهي تتاوب بإبتسامه وتلم فشعرها ..
رزان:روحتن من عند كنتنا..
غاليه بضحكه:ايه ياحنه روحنا..ونزلت ايديها وقالت..شن جو عيت عبدالمقصود..
حميده:ماشاء الله..خل نخش نحط حنين ففراشها ونجي..
خشت حميده..
ورزان قالت:شن دارولكم عرب الزاويه؟..
غاليه بإبتسامه:كل خير ياحنه..
في اخر الممر ع يسار..
عماد:برا انت اني نراجي فيك هني..
محمد هز راسه بإيجاب ومشي لرزان وغاليه ع طلعة حميده من فم البوابه..
محمد:روحتن تو انتن..
غاليه:ليش ماعديت انت..
محمد:مانبيش نديره عليهم سريك مريك..
ضحكوا..
رزان بضحكه:مفروض تجيبلي هديه..
محمد برفعة حواجب :ليش ياحنه!
رزان بغرور مصطنع :لولاي ماحصلت مراة كيف ذهب زي بلقيس صاحبتي..
محمد وجهه ولااحمر:كيف عينك..
غاليه بضحكه:والله عندها الحق..
رزان:تنازلت ع الكسوة..
محمد بتفنيصه:شنووو؟..
حميده استغربت..
رزان بإبتسامة استغراب:الكسوة قالت مانبيهاش!..
محمد بتضييقة عيون:ليش؟ شن قلتلولها ترا؟..
رزان شبحت لغاليه..
غاليه غمضت عيونها وفتحتهم وهي تقول:امي تبي تساعدك..فكرت وقالت نقوللهم يفوتوا الكسوة لأنك مش فبابها..
محمد غمض عيونها بشده وقال:ربي يهديك يمي ربي يهديك..
ولف ومشي بعصبيه..
وعيونهم معاها..
رزان لما قعدت تشوفله..
عماد اللي كان واقف يتملا منها..ادرق هديكا اللحظه بش ماتشوفاش وتهرب..
حميده:حسبته هو اللي قال لأمي تقول هكي..
رزان:حتى اني!..
تنهدت غاليه وقالت:امي واجعها حاله نهارتها لقاته مقعمز في الجردينه بروحه قالت يحسب ويعاود وكل مرة يفوت حاجه ويقول مش لازم منها بعدين يرجع يحطها من جديد ويلقى فروحه واحل..
تنهدت رزان بضيق بعدين شبحت للجهة اللي مشي منها عمها..
لمحت خيال حد ادرق..
قلبها دق بقوة💓..
طول زبطاته شبحت طول لعماتها وقالت بربكه:هي..تصبحن ع خير..
حميده وغاليه:قدامك كل خير..
وطول رزان مشت من الجهه التانيه لحوشهم وهي شاده دمعتها بقوة...
وصلت في الباب خشت وصكراته..
اما هو ..
كان متكي ع الحيط..
تنهد من قلبه..
بعدين مشي للمربوعه..
وهو ماشي شبح جهة العمارة..
لقي اصيل وتوفيق قدامها يهدرزوا..
غمض عيونه بشده من العصبيه بعدين فتحهم  وسرع خطواته بش يوصل للمربوعه..
وصل فيها فتح الباب وخش وصكره وراه بقوة...
🍁🍁🍁
هي هني وصياحها فالوادي..
مرام بضحكه:امتى يتمن فوازير رمضان متاعك..
هانيبال بإبتسامه :لما اتم الطريق..واهي قريب اتم هي جاوبي هي..
مرام:ههههههه..البندقيه..
هانيبال؛البندقه البندقه..
مرام:هههههههه..
خدي يدها وهو يضحك وباسها..
هي شهقت وقالت:وكان شافنا حد!
هانيبال:طززززززززززززززززززززز..
مرام:ههههههههههه..بطني هانيبال خلاص..
هانيبال شبح لبطنها وقال:شن بتجيبي!!ردي بالك تجيبيه فالسيارة..بعدين اول مايخش المدرسه يتعلم يخنبها ويفن بيها..
ومرام تضحك وخلاص💕..
خشوا للقطعه..
درس..
بعدين نزل ومشي نزلها...
وقعد يديدش فيها لين وصلها لفم الحوش..
وهدا كله كان ع عيون سميه...
اللي كانت تسحن من مرام بتموت حسد..
سميه:من دون خوته يانجاح من دون خوته..
نجاح:تو مش قلتي خدالك انتي والصغار اللي تبوه..
سميه؛ايه وهو قالب زومته ومش عاجبه..
نجاح:كلهم يقلبوا فزموماهم لما يطلعوا للسوق..
سميه بغيظ؛لا...طياح السعد اللي عندي اني بسس بس بس..
نجاح:لاحول ولاقوة الا بالله..
🍁🍁🍁🍁
مانيش فاهمه خيرك ؟..
محمد:الكسوة بنديرهلك يعني بنديرها..
بلقيس بضحكه:واني قلت مانبيهاش....
محمد؛اسمعي المعامله هدي اني مانحبها هي كلمه واني قلتها كسوتك تجيك وبعون الله ماتنقصك حاجه..هي عدي ادمدري..
وصكر عليها..
بلقيس ضحكت بصدمه بعدين قالت:والله عسل ياناس نحبه 💕💕💕💕
🍁🍁🍁🍁
بكل اليوم ماردش عليك ولاكلمك؟؟..
سناء ببكي:ايه..
لمياء بحقد:كل منها العقرب هادي بنت الشيطانه سعيده..لكن باهي تو تشوف..باااهي...

...يتبع...