#العشق_المتمرد
الجزء الأول
الواحده ظهرا...
🔊🔊🔊🔊
صوت كلاكسات قالب الدنيا...
داخل...
غاليه بضحكه: زينب وكفايه...
نعيمه بضحكه: وشكله حميد معاهم...
فاطمه مبتسمه بفرح...
طلعوا البنات وقفوا في الباب...
والولاد...
هانيبال وعمر ومحمد طلعوا من المربوعه...
نزلوا من السيارات وقعد خيري راجل زينب يكلكس..
حميد بضحكه: تي ياسر ياراجل يجيك سيدي يقلبها ع راسك..
خيري بصوت عالي: فرررح... فرررح...
ضحكت زينب...
جوهم خوتها وقعدوا يسلموا..
وصغار زينب وكفايه خشوا للحوش جري لجداهم..
زينب عندها بنتين ولد...
الولد مواليد 87 هو وخاله محمد اصحاب اسمه حمزة..
والبنت بعده مواليد 89 اسمها رباب..
والبنت الصغيرة مواليد90اسما رانيا هي ودلال انداد..
اما كفايه عندها تلاته ولاد..
عماد مواليد 88..
عبد المالك مواليد 90..
ومروان مواليد92...
......
مشي حميد ومعاه رجالة خواته خيري وسعد يسلموا ع الأولاد وبعدها خشوا للمربوعه..
وعند النساوين ..
سلام حار واحضان وأمهم عيونها يضحكوا من الفرحه لما يلتموا عندها...
البنات جياتهم في المناسبات ومن الصيف للصيف وفي الأعياد بس..
يعني ماتشوفش فيهم هلبه...
بعد السلام قعمزوا...
زينب : دلوله ياسمحه تعالي ...
جتها دلال تجري وزينب تضبط وتبوس...
زينب: ماشاء الله بنتك يانعيمه تكبر وتزيد سماحه..
نعيمه بإبتسامه: سلمك يارب حتى رانيا ورباب ماشاء الله عليهم ..تعالي سلم بنتي رانيا...
جتها رانيا تجري وقعدت خالتها تبوس فيها وتمشي ع شعرها..
نعيمه : ماشاء الله ع الشعيرات ...
كفايه وهي تشوفلهم : ايه شن حالكن ياحناتي..
حميدة من الكوجينه: عشتي فطرابلس يومين بديتي تعجبي ع كلامنا..
ضحكوا كلهم..
كفايه بضحكه: الهي باللي ديري فيه خيرلك..
فاطمه بضحكه وهي توزع فنظرها عليهم: شنو حالكن شن دايرات ياكبداتي..
كلهم بأصوات متقطعه: الحمد لله يمي..
فاطمه : شن حال عربك يانعيمه..
"شيباني نعيمه يكون عم امها واقف"
نعيمه بإبتسامه تخفي ملامح الضيق: الحمد لله يمي كويسين..
فاطمه : وانتي يازينب..
"عزوزة زينب اخت رمضان بوها من أمه..يعني عمتها وعزوزتها فنفس الوقت"
مطت شواربها زينب بإزدراء: مابيهمش..
فاطمه بتضييقة عيون: شنو في!!
زينب : شي يمي كيف قبل..
فاطمه : معليشي تحملي دام راجلك معاك كويس..
زينب: هو هدا...
كفايه تشوفلهم وحاسه انهم الزوز مش مزبوطات حبت تغير الجو: واني يمي ماعنديش عرب تسألي عليييهموو!!
قعدوا يضحكوا..
فاطمه بضحكه: بننشدك عليهم تو يامطيورة..
كفايه بضحكه وهي تشبح لخواتها:الحمد لله يمي كويسين مابيهمش..
ضحكوا خواتها....
طلعت غاليه من الكوجينه وهي تضحك لإنها كانت تسمع فدوتهم..
غاليه شبحت لولد اختها: وراس عموده عدي نادي واحد من خوالك..
كيف جاي بيمشي خش عمر..
غاليه لما شبحاته شقلبت عيونها وخشت تتأفف..
حميده وهي تشوف في الغدي: خيرك؟
غاليه : الفرخ عمر جاي بيرفع الصفرة..
حميده غطت الكسكاس : وووك تو بياكل نص الحلويات في الطريق..
خش: هاتوا الصفرة...
غاليه التفتت وقالت : بتقلهم انت؟
عمر : مال علاش جاي..
التفتت وهي تشقلب فعيونها خدت الصفرة وجاته: اسمع ياولد ماتمدش عليهن يدك..
عمر خدي الصفرة وهو يشبحلها بإزدراء: هاتي جاي هاتي..
خدي الصفرة ومشي..
زينب: عمورة شن جو..
عمر بضحكه : مليح..
طلع ....
كفايه : بيوصلهم المترد ممسوح..
زينب : هههههه...
برا...
ماشي عمر بالصفرة..
وقف في التركينه...
عمر: هدوما حلويات كفايه...خدي مقروضه كلاها ففم واحد...
من روشن الكوجينه..
غاليه : هيييي ريتي الحقير..
جتها حميده: سمسام...
خدي كعكه حلوه...
غاليه : يارب يطلع هانيبال ...
حميده بضحكه: جاه سيدك..
غاليه شبحت وين ماتشبح اختها لقت بوها جاي من ورا عمر..
رمضان وقف وبنتورة قال: شنو دير..
عمر😨بلع اللي ياكل فيه :احمم.. لاشي بنعدي للمربوعه...امم احمم..حميد في المربوعه والنسايب..
رمضان بتفنيصه: .. تحرك قدامي..
عمر مشي ووجهه اصفر للمربوعه وبوه لحقه وخش ع نساباته..
وبدي يأهل ويسهل ...
رمضان عنده النسابات خير حتى من ولاده...
عقلية "الصهر حامي العرض"..
معروفه في أغلب المجتمعات الشرقية المحافظه...
وهالشي زايد مضايق ولاده منه ومقوي روس نساباته ومخليهم مش قادرين ياخدوا حق خواتهم لما تصير معاهم مشاكل ديما يجي مع نساباته...
لهالسبب البنات بطلوا يشكوا ولا يحكوا..
في حوش ميلاد...
الكوجينه..
مرت ميلاد واقفه مع اختها ويهدرزوا...
مرت ميلاد "سعيده"..بنت عم ميلاد....
عبدالله خو رمضان...
يسكنوا فقطعه وحده كلهم حدا بعض..ومافيش بيناتهم سور ...
حوش عبدالله ورا حوش خوه...
حوش ميلاد الحالي هو حوش بوه في الأصل بانيه بني جديد ولما زوج ميلاد حطه فيه لين يبني ع حاله...
وقاعد هو وعيلته في الحوش القديم...
حالة عبدالله الماديه خير من خوه رمضان وولاده خدامين ع حالهم في التجارة....
وفي الحقيقة ولاد عبدالله فالحين مش زي ولاد رمضان..
في الكوجينه...
سعيدة مرت ميلاد: حصلت في سمسام رجلاتهم..
اختها امال: الله غالب بتتحملي الحوش حوش عمي رمضان..
سعيده بإستياء:الله يلعن هديك الساعه الحرفه ..
امال فنصت :اسكتي مرات يسمعوك الصغار ويعاودوا...
حطت سعيده المغطى ع الطنجرة : خل يعاودوا...
"سعييييدة..ياسعيييده"
سعيده بهمس : حديدة ع راسك..
امال ضحكت بتفنيصه: تعالى ياميلاد ماهناك حد..
خش ميلاد: شنو حالك ياامال ..
امال : الحمد لله ..شنو حالك انت..
ميلاد: الحمد لله..شبح لمرته..شن مازال الغدي..
سعيده شبحتله: مازال عشرة دقايق..
امال بتساؤل: قديش هما؟
ميلاد يحسب: النسابات 3 وسيدي وحميد وهانيبال..
امال لما سمعت اسمه قلبها رعش💓..
شبحتلها اختها بعدين شبحت لراجلها وقالت: باهي اني دايرة بزايد..
ميلاد : كويس...
وطلع من حداهم..
التفتت سعيده ع اختها لقتها سرحانه :امااااال ياهوووو..
امال استاقضت: همم..
قدمتلها سعيده وهي تشوفلها برفعة حاجب: اللي سماه هانيبال طلعيه من راسك ..ساد طياح سعدي اني..
امال شبحتلها شويه ..بعدين فاتت من حداها ومشت للدولاب بش طلع منه القعاد وطنشت كلامها ومازال تفكر في هانيبال..
******
بتعدي ؟!!
مختار وهو يقيم فكمامه: ايه بنعدي اختي دير فرح ولدها تبيني نقعد عنه؟!!
كامله مرته: ياراجل حكايه******مازال مابردت وانت بتعدي غادي!!!؟
مختار: مش شغلك انى ادرى باللي ندير فيه...
كامله: باهي بنقولك ره اختك كلمتني ع موعد فرح محمود وهندا ...
مختار : اني وبوها قلنا بعد شهرين وتم...
وخش للحمام..
كامله تنهدت بضيق: هادا بيودرنا وبيودر روحه...
طلعت من الدار ...
لقت عمار كيف خاش..
كامله: عمار ترا تعال شوي..
عمار استغرب ولحقها...
وقفوا في الممر اللي يفتح ع الديار الدخلانيه..
عمار وهو مضيق عيونه وقارن حواجبه: خير يمي..
كامله : تو منكم جد بتعدوا لعرس ولد عمتك؟
عمار حك خشمه بعدين حط ايديه فنصه: ايه..علاش..
كامله: كيف علاش ؟!!!ماكش فالبلاد؟!!وبعدين انت بالذات كيف تعدي..
عمار: يمي مادخليش الامور فبعضها اللي صار يخص افراد محددين وتم...
كامله تنهدت: ماأحرف من بوك إلا انت ..لفت ومشت..
وعمار قرن حواجبه وحرك راسه ايمين ويسار ولف ومشي متوجه لداره..
****
اطلعن فيييسع..
زينب وكفايه ونعيمه يلبسوا فردواتهم بش يطلعوا يسلموا ع بوهم..
وفاطمه تسقد فيها..
حطوا طروف ردواتهم ع راسهم وطلعوا يجروا وامهم طالقه فيهم النار..
وصلوا برا...
زينب: كيف حالك سيدي..مدت يدها.
رمضان ابتسم ابتسامه خفيفه وصافحها بأيديه الزوز:الحمد لله.. شنو حالك انتي وشنو حال عربك؟
زينب: الحمد لله ياسيدي عمتي تسلم عليك..وراهي جايه بعد تلاته ايام
رمضان هز راسه بإيجاب: باهي باهي.
سحب يده وسلم ع كفايه وسألها نفس الأسئله...
بعدها سلم ع نعيمه وشد ع يدها في السلام..قامت عيونها فبوها: شنو حالك انتي خير من قبل؟
تعبوا عيون نعيمه دموع: ايه ياسيدي الحمد لله..
رمضان كان حاس ببنته ماخدة نعيمه مش زي خواتها راجلها نافخ روحه وراجل اناني بطبعه برغم صلة القرابه لكن كان ديما شايف روحه عليهم وعليها...
بتقولوا علاش خداها؟
خداها ع خاطر بنت دواخر ع باله ماتعرف شي وماتفهم فشي ومش حتكثر عليه بالطلبات والرفوع والجياب زي بنات طرابلس..
بس صار العكس..ويااما صار بيناتهم مشاكل وفي منهم كان ممكن تطلق لولا تدخل راجل حماتها..
وحتى متاعينها أعوذ بالله منهم...
مع الأسف هو ديما كان واقف مع النسيب ..وياما دار بش ماتطلقش ..ع هذاكا الوقت عيبه كبيرة الطلاق...
🍁فك رمضان يده من يدها بعدين قال: بعد الغدي ديروا الشاهي..ولف ومشي..
والبنات خشوا مع بعض....
****
الساعه 2:30بعد الظهر
تغدي عروبه..تغدي عودة..
عروبه وعوده: ناكلوا..
مرت عمهم: شاديه قريبلهم السلاطه..
شاديه قربتهالهم:خودوا..
عروبه ابتسمت مجامله:صحيتي..
برا...
صبري بعصبيه: ديرله هكي معقوله؟؟!!
هايل : يبيها ..تي غير مش تعوذت من الشيطان راني ذبحته..
صبري بغضب: اسمع يافرخ فكني من المشاكل وشد العصابه الوسخه متاعك ولا وحق الله نشكي فيكم ومش تقول بوي مايديرهاش..
هايل نزل عيونه وهز راسه بإيجاب ومش عاجبه الكلام..
صبري جاي بيمشي للحمام بعدين ولا : اسمع..
هايل رفع عيونه:نعم!
صبري: اطلع بعدين مع بنات عمك بيعدن للسوق يدبشن للمدرسه..
ابتسم بعيون لامعه من فرحته : حاضر..
شبحله بوه بنص عين بعدين لف ومشي..
اما هايل : هههههه..واخيرا يابنت عمي ااااه مستاحشك الزفت...
*****
الساعه 4:00 قبل العصر..
الجو كان حمو برا..
داخل..
هانيبال حدا خواته و يلعب في الصغار..
حميده نخصت زينب...
زينب بهمس :ايه حطوها فراسي..
نعيمه بنفس الصوت؛مايردكش انتي ..
كفايه :هيا وراس زنوبه..
غاليه تشوفلهم وتشوف لهانيبال...
بعدين قعدو الخمسه يشوفوله..
هانيبال : تبي حمسيه وقريصه..
رانيا: حميثة..
هانيبال بضحكه: ايييين..
رانيا ضحكت وحطت يدها تحت فانيلتها..
هانيبال : هي توا...طاب الفروج..
دلال: ماذاااال..
هانيبال بضحكه: طااب الفروج..
رباب: يطيبوا فيه..
هانيبال: طاب الفروج..
شبحوا لبعض..
رباب: طاااب..
طلعوا ايديهم ومشوله بالوحده.
وقعد هانيبال يتلمس فيهم : سخينات ناخدوا منهن بوسه..
باس ايدين رباب ..
ودار نفس الشي مع رانيا ودلال...
هانيبال: وتوا عدن قيلن بش العشيه نجيبلكن حلوة لحاسه..
دلال: نبي حلوة..
هانيبال ضحك وباسها :عدي قيلي قبل..
التفت ع خواته بش بيقوللهم يرقدوا البنات لقاهم يشبحوله..
هانيبال برفعة حاجب: خيركن..
زينب فمرة وحده قالتها : ترفعنا للسوق العشيه..
هانيبال؛غير والله اعبن..
كفايه: علاش بس ياهنيوة؟!
نعيمه: وراس هنيوه ترفعنا ..
هانيبال: انسي..
رباب : نبوا نمشوا السوق..
زينب: اسكتي انتي..غير هي وراس هنيوه فحاجات ناقصه ناخدهم فيسع فيسع ونروحوا..
هانيبال يشبح لدلال: عارف بدرلي سريب..
نعيمه: وراس دلوله مرة وحده اليوم وبس..
ابتسم هانيبال وهو يشوف لدلال بعدين شاف لرانيا ورباب: هاه قولن نعدوا للسوق ولالا..
الثلاته بصياح: ايه..اييييه..ايييه
قعدوا يضحكوا..
هانيبال : خلاص لكن من تو وحق الحاج امحمد غير هاليوم ماني متحركها لسوق..
ناضوا المتزوجات يتجاروا بش يوتوا ارواحهم..
وحميده وغاليه يضحكوا...بعدين شبحوله..
حميده؛ احمم هانيبال نعطوك تشريلنا توكات..
هانيبال بقرنة حواجب : هدا اللي مازال!!
غاليه ؛ غير اسمع حني مانبوش نعطوا البنات تعرفهن تو بياخدن من فلوسهن..
هانيبال فكر في كلامهم ناض وقال: باهي..وخلن فلوسكن عندكن..
ولف وطلع...
ابتسموا حميده وغاليه بفرح..
توجه هانيبال لحوش عمه بش ياخد السيارة من ولد عمه سليمان..
وهو ماشي..
طلعت امال واختها عزيزةمن الحوش بش يضموا المربوعه شافوه..
امال قريب هبلت😍💓💓💓
هو نزل عيونه وقال : خير..وفات من حداهم..
عزيزة: خير..
امال : واااك ياربي ثقيل لين يقهر..😣
عزيزة : هيا تعالي قبل يجونا خوتك وياكلونا..
تنهدت امال من اعماقها ومشت مع اختها..
*****
كان ماعديتيش مش حيجوا فعرس محمود..
كامله شربت القهوة وسكتت..
بنتها اصاله: احسن خير مايحشمونا..
كامله : شن القطاف اللي تقطفي فيه هدي عمتك ..
أصاله:😒
سليمه: خليك معاي يمي مش حلوة كان ماعديناش..
كامله: خالكم نبهني معاش نمشي بعد اللي صار لين تهدي شويه..
سليمه تنهدت: ربي يهديه بوي وخلاص..ايه امي اتصلت عمتي نوريه.؟
كامله : ايه اتصلت واتفقنا العرس شهر 12..
اصاله: وووه عراس الشتي كلها مرض
كامله رشفت من القهوة: هذا عقل بوك وعمك..
سليمه: لكن من توا لازم نديروا اللي يسكر فم هندا عارفتيها كيف شايفة روحها يمي..
اصاله تعجب ع هندا:اني خوالي قذاذفه واني واني وننننن...
كامله: بتبدلي من توا ؟!!
سليمه واصاله: 😑😑..
كامله :😒
.....
هندا خطيبة محمود..هيا وياه بياخدوا بعض ع علاقه حب..
محمود بيهبل عليها وعلى جمالها وغرورها..وهندا تحبه حتى هيا بش شايفة ان زواجها منه يزيد يزين برستيجها قدام العيله كلها لإن محمود هلبه بنات تمنوه وهي الوحيده اللي كسبت قلبه..
عمار كان عكس محمود يتجنب التواجد في تجمعات العيله النسائيه مايحبش الإختلاط نهائي وممكن بالصدفه يتلاقى مع بنات العيله..وفالمده الأخيره معاش شافوه لين نسوا حتى شكله...
عمار كان ديما يحب يخالط الرجال الكبار..وعلاقته قويه بالعسكريين من اقاربه وهما معجبين بيه هلبه يبان اكبر من عمره بكبر عقله وقوة شخصيته..
معلومه مهمه ..عمار حافظ كتاب الله...ومحافظ هلبه هلبه...
****
6العشيه..
كيف باديه الدنيا تبرد..
رفع هانيبال خواته المتزوجات للسوق ومعاه الصغار..
وصل بيهم السوق نزلوا ...
وهو قعد مع الصغار في السيارة...
.....
عطيك مايكسر رقبتك..
عودة: هالمصيبه السودا لاصق فينا لصوق..
عروبه التفتت: ممكن تتباعد شويه.
هايل ابتسم وحط ايديه ورا ظهر ووخر خطوات...
التفتت القدام عروبه وقالت بإزدراء: مقرف..
عودة ضحكت بعدين قالت: اهي البدله هدي ليك شن رايك فيها....
من جهة تانيه..
زينب: كله دوشة المدراس وقجقجها..
كفايه : ع الفاضي الطلعه...
نعيمه: خل نزيدوا ندوروا..
كملوا دورانهم..
من برا..
هانيبال: شدي فرانيا زين يارباب..
خشوا للسوق وهانيبال كان يدور ع مكان يبيع فتوكات...
قعد يدور لين وصل في المحل اللي فيه خواته...
شافهم..
كان المكان معبي بنات ونساوين ...
هانيبال بإستغراب: امتى ولن يطلعن السوق!!البلاد انفتحت مرة وحده واني اخر من يعلم!.
قدم هانيبال لخواته : مازلتن..
زينب التفت: علاش نزلت.
هانيبال بنرفزة: تي هيا سقدني..
شبحوله خواته وتأففوا وهو مشي وفغمره دلال وحداه رانيه ورباب..
قعد يدور ع توكات لين لقي...
حط يده ع وحده...بياخدها انجبدت...
"معليش اني شفتها الأول"
شبحلها من فوق للوطا شبحة زي السم...
عروبه انحرجت وحست حركتها بايخه لفت ومشت والتوكه فيدها..
هانيبال بغضب: تافهات...حط يده ع زوز تانيات خداهم وهو يغلي
من بعيد شوي..
عروبه تشبح للتوكه ووجهها احمر من الحركه..
عودة شبحتلها : خيرك عروبه..
التفتت عروبه جهة هانيبال لقاته واقف ع نساوين..
بعدين التفتت وراها لقت ولد عمها برا المحل يهدرز ع واحد...
فاتت اختها ومشت..
هانيبال: توا تطلعن ساد
زينب: غير امتى جينا..
هانيبال بعصبيه:وحق الحاج امحمد ماتطلعن توا ماظال الا مسيبكن ومروح..
خواته خافوا وتحشموا لأن صوته كان عالي شويه..
نعيمه بضيق: هي هانا طالعين..
وكيف جاي بيمشي
"عفوا لحظه"...
شبحوا خواته لصاحبة الصوت وهو شافلها..
عروبه بإبتسامه مدتله التوكه: اني اسفه ..تفضل..
قرن حواجبه وشبحلها بإحتقار بعدين شبح لخواته: هيااا...
وطلع بالصغار..
خواته شبحولها شويه وطلعوا وراه...
وعروبه مسكينه تقول من صب عليها مية مصقعة..
موقف خييييي بكل...
عروبه بصوت يدوب طالع وجهها احمر : الواطي..
جتها عودة اللي شافت الموقف: شنو صار عروبه..
عروبه عيونها تعبوا دموع وبلعت ريقها اول مرة يصير معاها موقف بايخ هكي...
شدت روحها وقالت: مافي شي..هيا نكملوا بسرعه بش نروحوا ليل...
فاتت من حدا اختها وعودة ع راسها علامات استفهام..
******
الساعه7:30مساءا..
مقعمزات ع جذع شجره طايح حدا أمهم اللي كانت تحمي في الخبزة ومعاهم مرت ميلاد ويهدرزوا..
كفايه: والله وجعتني..
غاليه: معروف هانيبال مع البنوت والنسون كيف عقلية سيدي..
نعيمه: صدقتي ياغاليه سيدي وهانيبال نسخه وحده..
حميده؛ ياناري ع اللي بتاخده..
زينب : قولي ياسعدها راجل سمح ومصنع منع تحمد ربها اللي بتاخده..
نعيمه بضحكه: طقينا في اللحم الحي ياكبدي..
سعيده " طياح سعدكم وسعد اللي ينلم عليكم"..
زينب شبحت لسعيده: جاياتك سلفه ياسعسع..
سعيده ابتسمت بالسيف:إن شاء الله تجي بالخير..
زينب تشبحلها برفعة حاجب"إن شاء الله تجي خير منك":إن شاء الله..
حميده: بنت طرابلس اشبح كيف يدير معاها حميد...
كفايه: تبيه ويبيها ياحنه مازروشي عليها في الجردينه..
زينب :ههههههههههههه..
باقي البنات شدوا ضحكتهم...
وسعيده ابتسمت مجامله وهي مش فاهمه شي ولابت تسأل
"ميلاد ماكانش يبي ياخد وحده من بنات عمه لكن الحاح امه وخواته قعد وراه..لدرجة زينب لحقاته للجردينه لما طلع من حداهم بعد نقاش طويل..وقعدت وراه لين اقنعاته..
كانوا يبوا العيلتين ياخدوا من بعض....والبنات مايطلعوش برا ..
بس اللي صار بعد خدي ميلاد سعيده خو سعيده الكبير خطب كفايه رده عمه لإن سمع عليه دوة انه يشرب وبعدها تأكد بروحه ...
غاليه وحميده يبوا ولاد عمهم وولاد عمهم كذلك بس مافيش بيناتهم شي بالعيون وبس..
لكن سعيده وامها بعد اللي صار حلفوا لاعاد يعطوهم ولا ياخدوا منهم..
وغاليه وحميده مسكينات مش عارفات ..."
🍃🍃🍃🍃
فاتوا يومين...
روح فيهم راجل نعيمه اللي مكانش يحب القعده في البلاد وقال ع اساس بيجي يوم الدخول..
وبدت الإستعدادات لأسبوع العرس...
الساعه العاشره ليلا..
درست سيارة مرسيدس سودا..
اللي يسوق دار كلاكسات...
حميده: خالي مختار..
نعيمه : الله!..
فاطمه ناضت طول وطلعت لخوها...
وبناتها وراها..
هي طلعت برا الحوش وبناتها قعدوا فم الباب..
لقت الحاج رمضان وولادها واقفين ع خوها وولاده يسلموا...
هانيبال حاضن عمار:كان مافيش مناسبه ماتجي..
عمار بضحكه: وانتم خيركم ماتجوا ..
البنات من بعيد يشبحوا لخالهم وولاده كيف لابسين عربي وزمالاتهم ع روسهم..
كفايه: من هو اللي لابس زبون اسود..
زينب؛ هدا محمود...والتاني مظنه عمار..
غاليه : واضح من سلامه هو وهانيبال..كبر...ليه واجد ماجانا..
حميده: هيا خشن وتن معاي الضيافه والعشي..
زينب: شويه اللقطه هادي بس ..
حميده: تتفرجي ع مسلسل انتي😑
كفايه: غير شوفي..
شبحوا امهم وخالهم كيف حاضنين بعض وكيف مختار باس ع راس اخته واخته باست ايديه..
نعيمه بدموع: مافيش عزوة زي الخوت..
كفايه وهي ترشف: صدقتي..
حميده: تي هيا انتي وياها امكن تجي تاكلنا هيا..
تأففوا وخشوا وراها...
💕🍃💕🍃💕💕🍃
باتوا الولاد فمربوعه الحوش القديم والهدرزة للصبح..
الهادي ومحمود كانوا قراب لبعض هاديين ورومانسيين
ديما مع بعض لما يتلاقوا ...
محمود: ربي يجمعكم بالحلال..
الهادي : اللهم آمين..ويتمملك ع خير..
محمود: تعرف كان ماتجي ياهادي لاعاد تعرفني لانعرفك.
ضحك الهادي: إن شاء الله...
....
هانيبال: اسمع انت هدي معاش تحكي في الموضوع لين ينساه خل اتم السنه هدي ويصير خير.
عمار: حتى اني هدا رايي..ايه وانت شن ناوي؟
هانيبال: الإقتصاد ان شاء الله..
عمار ابتسم :كويس...
داخل..
غاليه وحميده بعد ماحنوا خواتهم..
بدوا يحنوا في البنات الصغار...
حميده: تجيني وحده تقولي بنعدي الحمام نبطحها..
زينب :تبطحي عينك..
حميده:اسكتن ولا نسمعلكن حس..
ضحكوا خواتها..
غاليه غطت دلال بعد حنتها وهي راقده: خلاص وحق الله ماعاد فيا حيل...
كفايه: بري ارقدي تو غدوة امى تنوضك من قبل الفجر..
شويه والكل رقدوا وعم السكون في هالليله الصيفيه الهاديه..
🌅تاني يوم..
غاليه مطلعه دلال من الحمام: هي خلاص توا عدي وريها لخالو..
ضحكت دلال بفرح وطلعت تجري..
برا في المربوعه..
كان بس عمار موجود يمسح فوجهه بالفوطه..
خشت دلال وقعدت ادور..
هو حول الفوطه شافها..
بنيه صغيره شقرا ودبدوبه لابسه قفطان قهوي من غير كمام..
ابتسم ع جنب..
عمار: شنو ياحلوة..
دلال لما شافاته خافت منه قعدت واقفه في الباب تشبحله بريبه ومابتش تخش وهو يضحك..
ع جية هانيبال: دلوله...قامها فغمره..
هانيبال: شنو ياسمحه..
دلال بإبتسامه طفوليه مدت ايديها: ثوف..
هانيبال: مااااشااااء الله ..باس يدها ..مسمحها حنة دلوله..
عمار ابتسم :بنت من من خواتك؟
هانيبال شبحله وضحك : بنت نعيمه..
عمار : ماشاء الله..كم عمرها..
هانيبال: ياتلات يااربع سنين..
دلال: تلاته وبنخث البعه...ودارت اشارات الأرقام بصوابعها..
ضحكوا عمار وهانيبال..
قدم عمار وقاللها : ترا هاتي يدك ياسمحه..
دلال خافت منه وشبحت لهانيبال..
هانيبال بإبتسامه: هدا خالو عمار دلوله سلمي عليه..
دلال رجعت شبحت لعمار شويه بعدين مدت يدها..
خدي يدها وباسها وقال : سمحه الحنه..وحط فيها فلوس..
هانيبال:تي غير علاش ياراجل..
عمار : طالع للجردينه مع الأولاد قالوا بنفطروا فيها..
ابتسم هانيبال: باهي..
طلع عمار..وهانيبال خدي بنت اخته ودخلها للحوش...
....يتبع.
