#العشق_المتمرد
#جمان_فريد
الجزء79
" ﺭﻣﺰﻱ ﺣﻴﻴﻴﻴﻲ ..."
ﺣﻄﺖ ﺍﻟﻄﺎﺳﻪ ﺍﻟﻠﻲ ﻛﺎﻧﺖ ﺗﻐﺴﻞ ﻓﻴﻬﺎ ﻓﺎﻟﻠﻼﻭﻧﺪﻳﻨﻮ ﻭﻗﻌﺪﺕ ﺗﺴﻤﻊ ﺗﺤﺴﺎﺏ ﺭﻭﺣﻬﺎ ﺗﺘﺨﻴﻞ ..
ﻟﻴﻦ ﺧﺸﺖ ﻋﻠﻴﻬﺎ ﺍﻣﻬﺎ ..
ﺳﻌﻴﺪﻩ ﺑﺼﺪﻣﻪ : ﻫﺪﻱ ﻏﺎﻟﻴﻪ ﻋﻤﺘﻚ !!
" ﺣﻴﻴﻴﻲ ﻳﺎﺳﻌﻴﺪﻩ ... ﺣﻴﻴﻴﻲ ﻳﺎﺭﺯﺍﻥ ..."
ﺳﻌﻴﺪﻩ ﻃﻮﻝ ﻃﻠﻌﺖ ﺗﺠﺮﻱ ..
ﻓﺘﺤﺖ ﺑﺎﺏ ﺍﻟﺤﻮﺵ ..
ﻃﻠﻌﺖ ..
ﺷﺎﻓﺖ ﻏﺎﻟﻴﻪ ﻭﺍﻗﻔﻪ ﻭﺗﻨﺎﺩﻱ ﻓﻲ ﻣﺤﻤﺪ ..
" ﺭﻣﺰﻱ ﺣﻲ ﻳﺎﻣﺤﻤﺪ .."
ﻗﺪﻣﺘﻠﻬﺎ ﻭﺭﺟﻠﻴﻬﺎ ﺑﺎﻟﺴﻴﻒ ﻳﺘﺤﺮﻛﻮﺍ ..
ﺳﻌﻴﺪﻩ : ﻏﺎﻟﻴﻪ ﺧﻴﺮﻙ !!
ﺷﺒﺤﺘﻠﻬﺎ ﻏﺎﻟﻴﻪ ﺟﺘﻬﺎ ﻃﻮﻝ ﻭﻫﻲ ﺗﻘﻮﻝ ﺑﻀﺤﻜﻪ؛ﺭﻣﺰﻱ ﻣﺎﻣﺘﺶ .. ﻣﺎﻣﺘﺶ .. ﻣﺎﻣﺘﺶ ﻳﺎﺳﻌﻴﺪﻩ .. ﻫﻬﻬﻬﻬﻪ .. ﻣﺎﻣﺘﺶ ...
ﺭﺯﺍﻥ ﺑﺼﻮﺕ ﻣﺨﻨﻮﻕ : ﻋﻤﺘﻲ !!
ﻏﺎﻟﻴﻪ ﻻﺣﻈﺖ ﻧﻈﺮﺍﺗﻬﻢ ﻟﻴﻬﺎ .. ﻓﻜﺮﺕ ﺍﻧﻬﻢ ﻳﺤﺴﺎﺑﻮﻫﺎ ﻫﺒﻠﺖ ..
ﻣﺴﺤﺖ ﺩﻣﻮﻋﻬﺎ ﻭﻗﺎﻟﺖ ﺑﻀﺤﻜﻪ : ﻭﺍﻟﻠﻪ ﺍﻟﻌﻈﻴﻢ ﻗﺎﻋﺪﻩ ﺑﻌﻘﻠﻲ ... ﻭﺭﻣﺰﻱ ﺣﻲ .. ﺷﺒﺤﺖ ﻟﺘﻠﻴﻔﻮﻧﻬﺎ .. ﻭﺣﺘﻰ ﺍﻫﻮ .. ﺣﻄﺖ ﺍﻟﺘﻠﻴﻔﻮﻥ ﻉ ﻭﺫﻧﻬﺎ .. ﺍﻟﻮ ﻋﻤﺎﺩ ..
ﺭﺯﺍﻥ ﺣﻮﺍﺟﺒﻬﺎ ﺍﺭﺗﻔﻌﻮﺍ ...
ﻭﻗﻠﺒﻬﺎ ﺗﻠﺨﺒﻄﺘﺖ ﻧﺒﻀﺎﺗﻪ 💓
ﻏﺎﻟﻴﻪ : ﻫﻬﻬﻬﻬﻪ ... ﻗﺎﻋﺪ ﻣﻌﺎﻱ ﻉ ﺍﻟﺨﻂ ... ﻫﺎﻙ .. ﻫﺎﻙ ﺑﺸﺮ ﻣﺮﺕ ﺧﺎﻟﻚ ..
ﻣﺪﺕ ﺍﻟﺘﻠﻴﻔﻮﻥ ﻟﺴﻌﻴﺪﻩ ..
ﻭﺳﻌﻴﺪﻩ ﻭﻫﻲ ﺗﺮﻋﺶ ﻣﻊ ﺑﻌﻀﻬﺎ ﺧﺪﺕ ﺍﻟﺘﻠﻴﻔﻮﻥ ﻣﻦ ﻏﺎﻟﻴﻪ ﻭﻫﻲ ﺗﺸﻮﻓﻠﻬﺎ ﻭﺩﻣﻮﻋﻬﺎ ﻣﻌﺒﻴﺎﺕ ﻋﻴﻮﻧﻬﺎ ..
ﺣﻄﺖ ﺍﻟﺘﻠﻴﻔﻮﻥ ﺑﻴﺪﻫﺎ ﺍﻟﻠﻲ ﺗﺮﺟﻒ ﻉ ﻭﺫﻧﻬﺎ ﻭﻗﺎﻟﺖ ﺑﻨﺒﺮﺓ ﻣﺒﺤﻮﺣﻪ : ﺁﻟﻮ ..
ﻋﻤﺎﺩ : ﻣﺮﺕ ﺧﺎﻟﻲ .. ﻭﻟﺪﻙ ﺣﻲ ﻳﺮﺯﻕ ﻳﺎﻣﺮﺕ ﺧﺎﻟﻲ ﻓﻤﺼﺮﺍﺗﻪ ..
ﺳﻌﻴﺪﻩ ﺣﻄﺖ ﻳﺪﻫﺎ ﻉ ﺻﺪﺭﻫﺎ ... ﻭﻛﺎﻧﺖ ﺗﺘﻨﻔﺲ ﺑﺴﺮﻋﻪ ..
ﻋﻤﺎﺩ : ﻣﺮﺕ ﺧﺎﻟﻲ .. ﺳﻤﻌﺘﻴﻨﻲ؟
ﺳﻌﻴﺪﻩ ﻏﻤﻀﺖ ﻋﻴﻮﻧﻬﺎ ﻭﻗﺎﻟﺖ : ﺳﻤﻌﺘﻚ .. ﺳﻤﻌﺘﻚ ﻳﺎﻭﻟﺪﻱ ﺳﻤﻌﺘﻚ .. ﻓﺘﺤﺖ ﻋﻴﻮﻧﻬﺎ .. ﻳﺒﺸﺮﻙ ﺑﺎﻟﺨﻴﺮ ﻳﺒﺸﺮﻙ ﺑﺎﻟﺠﻨﻪ ﺭﺑﻲ ﻳﻔﺮﺡ ﻗﻠﺒﻚ ﻛﻴﻒ ﻣﺎﻓﺮﺣﺖ ﻗﻠﺒﻲ ﺟﻌﻦ ﺭﺑﻲ ﻳﻔﺘﺤﻬﺎ ﻓﻮﺟﻬﻚ ﻭﻳﻦ ﻣﺎﺗﻘﺒﻞ .. ﺟﻌﻦ ﺭﺑﻲ ﻣﺎﻳﺬﻭﻗﻚ ﺣﺰﻥ .. ﺟﻌﻦ ﺭﺑﻲ ﻣﺎﻳﺨﻠﻲ ﺍﻣﻚ ﺗﺒﻜﻲ ﻋﻠﻴﻚ ﺑﺠﺎﻩ ﺍﻟﻨﺒﻲ ...
ﺣﻮﻟﺖ ﺍﻟﺘﻠﻴﻔﻮﻥ ﻣﻦ ﻉ ﻭﺫﻧﻬﺎ ﻭﻣﺪﺍﺗﻪ ﻟﻐﺎﻟﻴﻪ ..
ﺧﺪﺍﺗﻪ ..
ﻭﻫﻲ ﻟﻔﺖ ﻭﻣﺸﺖ ﺗﺠﺮﻱ ﻟﺤﻮﺵ ﺍﻫﻠﻬﺎ ﺣﻔﻴﺎﻧﻪ ﻭﻫﻲ ﺗﻘﻮﻟﻲ ﺑﺒﻜﻲ : ﻭﻟﻴﺪﻱ ﺣﻲ .. ﻳﺎﺭﺑﻲ ...
ﺗﺠﺮﻱ ﻭﺗﺒﻜﻲ ﻭﻛﺎﻥ ﺗﻠﻘﻰ ﺍﻃﻴﺮ ﻣﻦ ﻓﺮﺣﺘﻬﺎ ..
ﺭﺯﺍﻥ ﺍﻟﻠﻲ ﺣﺎﻟﺘﻬﺎ ﺯﻱ ﺣﺎﻟﺔ ﺍﻣﻬﺎ ﺟﺖ ﺑﺘﻤﺸﻲ ﺗﻠﺤﻖ ﺍﻣﻬﺎ ﻭﻗﻔﺖ ﻟﻤﺎ ﺳﻤﻌﺖ ﻋﻤﺘﻬﺎ ﺗﻘﻮﻝ ..
ﻏﺎﻟﻴﻪ ﺑﻀﺤﻜﻪ ﻭﺩﻣﻮﻋﻬﺎ ﻳﺼﺒﻮﺍ : ﻗﺼﺪﻙ ﺟﺎﻱ ﺍﻧﺖ .......... ﺑﺎﻫﻲ ﺗﻌﺎﻟﻰ ﻳﺎﻭﺟﻪ ﺍﻟﺨﻴﺮ ﺍﻧﺖ ﻭﺍﻟﻠﻪ ﺍﻟﻌﻈﻴﻢ ﺍﻟﻠﻴﻠﻪ ﻟﻤﺎ ﻧﺪﻳﺮﻟﻚ ﻋﺸﻲ ﻣﺎﺻﺎﺭ ﻣﻨﻪ ﺑﻜﻞ ..... ﻫﻬﻬﻬﻬﻬﻬﻬﻬﻪ .... ﺭﺑﻲ ﻳﺤﻔﻈﻚ ﻳﺎﻋﻤﻮﺩﺓ ﻳﺎﺍﺭﺑﻲ ..
ﺍﺑﺘﺴﻤﺖ ﺭﺯﺍﻥ ﻭﻗﻠﺒﻬﺎ ﻣﺎﺑﻄﻠﺶ ﻧﺒﺾ ﻣﺠﻨﻮﻥ ﻣﻦ ﺍﺧﺘﻼﻁ ﺍﻟﻤﺸﺎﻋﺮ ﺍﻟﻠﻲ ﻋﺎﻳﺶ ﻓﻴﻪ ...
ﻟﻔﺖ ﺑﻌﺪﻳﻦ ﻭﻟﺤﻘﺖ ﺍﻣﻬﺎ ...
ﺻﻜﺮﺕ ﻏﺎﻟﻴﻪ ﻣﻦ ﻋﻤﺎﺩ ﻭﻫﻲ ﺗﺸﻮﻑ ﺣﻮﺍﻟﻴﻬﺎ ﺑﻌﺪﻳﻦ ﻗﺎﻟﺖ : ﺣﻴﻲ ﻧﺴﻴﺖ ﻣﻬﻨﺎﻙ ﺣﺪ ﻓﺎﻟﺤﻮﺵ .. ﺿﺤﻜﺖ ﺑﻌﺪﻳﻦ ﻣﺸﺖ ﺧﺸﺖ ﻟﻤﻤﺮ ﻓﻢ ﺍﻟﺒﻮﺍﺑﻪ ..
ﺭﻥ ﺗﻠﻴﻔﻮﻧﻬﺎ .. ﺷﺎﻓﺎﺗﻪ ...
ﻏﺎﻟﻴﻪ : ﺷﻮﺭﻩ ﻣﺎﻋﻨﺪﻙ ﻣﺎﺩﻳﺮ ﻓﺤﻴﺎﺗﻚ ..
ﺻﻜﺮﺕ ﻋﻠﻴﻪ ﺑﺎﻟﺤﻤﺮﺍ .. ﻭﺧﺸﺖ ﻟﻠﻜﻮﺟﻴﻨﻪ ﻭﻫﻲ ﺗﻀﺤﻚ ﻣﻦ ﻓﺮﺣﺘﻬﺎ ..
💓 ﺍﻟﺰﻏﺎﺭﻳﻂ ﻋﻤﺖ ﺍﻟﻘﻄﻌﻪ ﻛﻠﻬﺎ ﻟﻤﺎ ﺳﻤﻌﻮﺍ ﺍﻟﺨﺒﺮ ﻣﻦ ﺳﻌﻴﺪﻩ ..
ﻣﺸﺖ ﻋﺰﻳﺰﺓ ﻣﻊ ﺳﻌﻴﺪﻩ ﻭﻣﻌﺎﻫﻢ ﻛﻨﺘﻬﻢ ﺻﺒﺮﻳﻪ ﻟﺤﻮﺵ ﺍﻟﺤﺎﺝ ﺭﻣﻀﺎﻥ ..
ﻭﻗﻌﺪﻭﺍ ﻳﺴﺄﻟﻮﺍ ﻓﻐﺎﻟﻴﻪ ﻳﺒﻮﺍ ﻳﻔﻬﻤﻮﺍ ﺍﻛﺜﺮ .. ﻭﻫﻲ ﻗﺎﻟﺘﻠﻬﻢ ﺍﻥ ﻋﻤﺎﺩ ﺑﻌﺪ ﺷﻮﻳﻪ ﺟﺎﻱ ﻭﺣﻴﻘﻮﻝ ﺍﻟﺘﻔﺎﺻﻴﻞ ...
🍁🍁🍁🍁🍁
ﻭﺍﻗﻔﻪ ﺗﺤﺮﻙ ﻓﻄﻨﺠﺮﺓ ﺍﻟﺴﺤﻠﺐ ..
ﻭﺍﺧﺘﻬﺎ ﺑﺤﺪﺍﻫﺎ ﺗﻐﺴﻞ ﻓﻲ ﻣﺎﻋﻴﻦ ﺻﻔﺮﺓ ﺍﻟﻘﻬﻮﺓ ﻣﺘﺎﻉ ﺍﻟﻌﺼﺮ ..
ﺷﻮﻳﻪ ﺧﺸﺖ ﻋﻠﻴﻬﻢ ﺍﻣﻬﻢ ﻭﻗﺎﻟﺖ ﺑﺼﻮﺕ ﻣﻠﻬﻮﻑ ..
ﺯﻳﻨﺐ : ﺍﺳﻤﻌﻮﺍ ..
ﺷﺒﺤﻮﻟﻬﺎ ..
ﺯﻳﻨﺐ : ﻭﻟﺪ ﺧﺎﻟﻜﻢ ﺭﻣﺰﻱ ﻃﻠﻊ ﺣﻲ ..
ﺭﺑﺎﺏ ﺷﻬﻘﺖ ﺑﺼﻮﺕ ﻋﺎﻟﻲ ..
ﻭﺭﺍﻧﻴﺎ ..
ﻗﻌﺪﺕ ﺗﺸﻮﻑ ﻷﻣﻬﺎ ﺑﻌﺪﻡ ﺍﺳﺘﻴﻌﺎﺏ ﻭﻫﻲ ﺷﺎﺩﻩ ﻛﺎﺷﻴﻚ ﺍﻟﻠﻮﺡ ﺍﻟﻠﻲ ﻓﻮﺳﻂ ﺍﻟﻄﻨﺠﺮﺓ ..
ﺍﻣﻬﺎ ﺗﺸﺒﺤﻠﻬﺎ ﻭﻫﻲ ﻣﺒﺘﺴﻤﻪ ﺑﻔﺮﺡ ﻭﺩﻣﻮﻋﻬﺎ ﻳﻨﺰﻟﻮﺍ ..
ﺭﺑﺎﺏ ﺑﺼﺪﻣﻪ : ﺍﻣﻲ ﺷﻦ ﺗﻘﻮﻟﻲ ﺑﺎﻟﻠﻪ ﻋﻠﻴﻚ ... ﻛﻴﻒ .. ﻓﻬﻤﻴﻨﻲ !!
ﺯﻳﻨﺐ : ﺗﻮﺍ ﺗﻮﺍ ﺧﺎﻟﺘﻚ ﻏﺎﻟﻴﻪ ﻛﻠﻤﺘﻨﻲ ﻭﻗﺎﻟﺘﻠﻲ ﻋﻤﺎﺩ ﻫﻮ ﺍﻟﻠﻲ ﺧﺒﺮﻫﻢ .. ﻗﺎﻝ ﻣﺎﻣﺎﺗﺶ ﻣﺄﺳﺮﻳﻨﻪ ﻓﻤﺼﺮﺍﺗﻪ ... ﻫﻮ ﻭﺑﻮ ﺳﻤﻴﻪ ﻣﺮﺕ ﺧﺎﻟﻚ ..
ﺭﺑﺎﺏ ﺍﺭﺗﺴﻤﺖ ﻉ ﻭﺟﻬﻬﺎ ﻣﻼﻣﺢ ﺍﻟﻔﺮﺡ .. ﺍﻟﺘﻔﺘﺖ ﻷﺧﺘﻬﺎ ﺷﺒﺤﺘﻠﻬﺎ ﻛﻴﻒ ﻗﺎﻋﺪﻩ ﻭﺍﻗﻔﻪ ﺗﺸﻮﻓﻠﻬﻢ ..
ﺍﻟﺒﻨﺖ ﻣﺶ ﻣﺴﺘﻮﻋﺒﻪ ﺍﻟﻠﻲ ﺗﺴﻤﻊ ﻓﻴﻪ ..
ﻉ ﺑﺎﻟﻬﺎ ﺗﺤﻠﻢ ..... ﻭﺍﺣﻼﻣﻬﺎ ﻭﻟﺖ ﺍﺣﻼﻡ ﻳﻘﻈﻪ ﻟﺠﺎﻧﺐ ﺍﺣﻼﻡ ﺍﻟﻨﻮﻡ ..
ﺭﺑﺎﺏ ﺟﺘﻬﺎ ﺷﺪﺗﻬﺎ ﻣﻦ ﻳﺪﻫﺎ : ﺭﺍﻧﻴﺎ ﺳﻤﻌﺘﻲ ﺍﻣﻲ ﺷﻦ ﻗﺎﻟﺖ ..
ﺭﻣﺸﺖ ﻋﻴﻮﻧﻬﺎ ﻭﻫﻲ ﺗﺸﻮﻑ ﻷﺧﺘﻬﺎ ...
ﺷﺪﺕ ﻳﺪ ﺍﺧﺘﻬﺎ ﺑﺎﻟﻘﻮﺓ ...
ﺑﺪﺕ ﺍﻧﻔﺎﺳﻬﺎ ﺗﺰﻳﺪ ﺗﺴﺮﻉ ...
ﻓﺘﺤﺖ ﻓﻤﻬﺎ ﺗﺤﺎﻭﻝ ﺗﺘﻜﻠﻢ ﻣﺎﻗﺪﺭﺗﺶ ﺍﻃﻠﻊ ﻣﻦ ﻓﻤﻬﺎ ﻛﻼﻡ ..
ﺯﻳﻨﺐ ﺑﺨﻮﻑ : ﺭﺍﻧﻴﺎ !!
ﺭﺑﺎﺏ : ﺭﺍﻧﻴﺎ ﺣﺒﻴﺒﺘﻲ !
ﺭﺍﻧﻴﺎ ﺷﺒﺤﺖ ﻷﺧﺘﻬﺎ .. ﺩﻣﻌﺘﻬﺎ ﻧﺰﻟﺖ ..
ﻋﻴﻮﻧﻬﺎ ﺗﺴﻜﺮﻭﺍ ...
ﻭﻓﻘﺪﺕ ﺍﻟﻮﻋﻲ ...
🍁🍁🍁🍁🍁
ﻛﻴﻒ ...!!!! ﻣﺘﺄﻛﺪ ...!!!!! ﺑﺎﻫﻲ ﺑﻪ .... ﻭﺻﻜﺮ ..
ﻋﺒﺪﺍﻟﺴﻼﻡ ﺑﺈﺳﺘﻐﺮﺍﺏ : ﺷﻦ ﻓﻲ؟
ﻫﺎﻧﻴﺒﺎﻝ : ﻭﻟﺪ ﻣﻴﻼﺩ ﺭﻣﺰﻱ ﻃﻠﻊ ﺣﻲ ..
ﻋﺒﺪﺍﻟﺴﻼﻡ ﺑﺼﺪﻣﻪ : ﻛﻴﻴﻴﻒ !!
ﻫﺎﻧﻴﺒﺎﻝ ﺑﺈﺳﺘﻌﺠﺎﻝ : ﻻﺯﻡ ﻧﻌﺪﻱ ﺗﻮﺍ
ﻋﺒﺪﺍﻟﺴﻼﻡ ﻫﺰ ﺭﺍﺳﻪ ﺑﺈﻳﺠﺎﺏ ﻭﺭﺩ ﻋﻠﻴﻪ ﻭﻫﻮ ﻣﺼﺪﻭﻡ : ﺑﺎﻫﻲ ﺑﺎﻫﻲ ..
ﻭﺻﻞ ﻫﺎﻧﻴﺒﺎﻝ ﻓﻲ ﺍﻟﺒﺎﺏ ﻓﺘﺢ ﻭﻃﻠﻊ ﺑﺴﺮﻋﻪ ..
ﻋﺒﺪﺍﻟﺴﻼﻡ ﺷﺒﺢ ﻟﺒﺎﺏ ﺍﻟﺤﻮﺵ ﺍﻟﺪﺧﻼﻧﻲ ..
ﻗﻌﺪ ﻳﻤﺸﻲ ﻟﻴﻦ ﺧﺶ ﺩﺍﺧﻞ ...
ﻣﻌﺎﺵ ﻳﺴﻤﻊ ﻓﺼﻮﺕ ﺩﻻﻝ ...
ﺧﺎﻑ ..
ﻗﺎﺑﻼﺗﻪ ﻧﻮﺭ ﻭﻫﻲ ﻃﺎﻟﻌﻪ ﻣﻦ ﺍﻟﺪﺍﺭ ...
ﻋﺒﺪﺍﻟﺴﻼﻡ : ﻣﻌﺎﺵ ﺳﻤﻌﺖ ﺣﺴﻬﺎ؟ !
ﻧﻮﺭ : ﺗﺒﻜﻲ ﻓﺤﺠﺮ ﺍﻣﻲ ﻣﻦ ﻏﻴﺮ ﺻﻮﺕ ..
ﺗﻨﻬﺪ ﻋﺒﺪﺍﻟﺴﻼﻡ ﻭﻗﻌﺪ ﺳﺎﻛﺖ ..
ﻧﻮﺭ : ﻭﻳﻦ ﺧﺎﻟﻲ؟
ﻋﺒﺪﺍﻟﺴﻼﻡ : ﻣﺶ ﻋﺎﺭﻑ ﺷﻦ ﺑﻨﻘﻮﻝ .. ﺑﺲ ﺍﻟﺪﻧﻴﺎ ﻫﺎﺩﻱ ﻋﺠﻴﻴﻴﺒﻪ ..
ﻧﻮﺭ ﺷﺒﺤﺖ ﻟﺒﻮﻫﺎ ﺑﺈﺳﺘﻐﺮﺍﺏ ..
ﻋﺒﺪﺍﻟﺴﻼﻡ : ﻭﻟﺪ ﺧﺎﻟﻚ ﺭﻣﺰﻱ ... ﻃﻠﻊ ﺣﻲ ..
ﺣﻄﺖ ﻳﺪﻫﺎ ﻉ ﻓﻤﻬﺎ ﺑﻌﺪ ﺷﻬﻘﺖ ﻣﻦ ﺻﺪﻣﺘﻬﺎ ..
🌴🌴🌴🌴🌴🌴🌴
ﻭﺻﻞ ﺍﻟﺨﺒﺮ ﻟﻌﻤﺮ ﻭﻣﺤﻤﺪ ..
ﺍﻟﻠﻲ ﻫﺪﺍ ﺳﻴﺐ ﺍﻟﻠﻲ ﻋﻨﺪﻩ ﻭﺟﻲ ﺟﺮﻱ ..
ﻣﺤﻤﺪ ﻣﻦ ﺭﺑﻜﺘﻪ ﺿﺮﺏ ﺳﻴﺎﺭﺗﻪ ﺑﺴﻴﺎﺭﺓ ﺣﺪ ﺗﺎﻧﻲ ..
ﻭﻋﻄﺎﻩ ﺍﻟﻠﻲ ﻋﻨﺪﻩ ﻛﻠﻪ ﻭﻗﺘﻬﺎ ﺑﺶ ﻳﺼﻠﺤﻬﺎ .. ﺍﻟﻤﻬﻢ ﻳﻠﺤﻖ ﻳﻮﺻﻞ ﻟﻠﺤﻮﺵ ﻭﻳﻔﻬﻢ ﻣﻦ ﻏﺎﻟﻴﻪ ﺍﻟﻠﻲ ﺻﺎﺭ ..
ﻏﺎﻟﻴﻪ : ﻋﻤﺎﺩ ﺗﻮﺍ ﺑﻴﻮﺻﻞ ﻭﻳﻘﻮﻝ ﻟﻬﻨﺎﻙ ..
ﻣﺤﻤﺪ : ﻭﺍﻟﻠﻪ ﻣﺎﻗﺎﺩﺭ ﻧﺼﺒﺮ ... ﻏﻤﺾ ﻋﻴﻮﻧﻪ ﻭﻣﺴﺢ ﺑﻴﺪﻩ ﻉ ﺷﻌﺮﻩ ...
ﻭﻏﺎﻟﻴﻪ ﻣﺮﻛﺰﺓ ﻋﻠﻴﻪ ﻭﻣﺒﺘﺴﻤﻪ ﻃﻮﻝ ﺍﻟﻮﻗﺖ ..
ﻓﺠﺄﺓ ..
ﺻﻮﺕ ﻛﻼﻛﺴﺎﺕ ﻗﻠﺐ ﺍﻟﺪﻧﻴﺎ ..
ﻏﺎﻟﻴﻪ ﺑﻀﺤﻜﻪ : ﻋﻤﺎﺩ ﺟﻲ ..
ﻃﻠﻊ ﻣﺤﻤﺪ ﺟﺮﻱ ﻣﻦ ﺍﻟﻜﻮﺟﻴﻨﻪ .
ﻭﻣﻦ ﺍﻟﻤﺮﺑﻮﻋﻪ ..
ﻃﻠﻌﻮﺍ ﻋﻤﺮ ﻭﺍﻟﻬﺎﺩﻱ ﻭﺗﻮﻓﻴﻖ ﻭﺳﻠﻴﻤﺎﻥ ﻭﺧﻠﻴﻔﻪ ﻭﺣﺴﻦ ..
ﺍﻣﺎ ﻣﻴﻼﺩ ﻓﻜﺎﻥ ﻳﺮﺍﺟﻲ ﺑﺮﺍ ...
ﺩﺭﺱ ﻋﻤﺎﺩ ﻭﻧﺰﻝ ﻭﻫﻮ ﻳﻀﺤﻚ ..
ﻣﻴﻼﺩ ﻗﺪﻣﻠﻪ ﻭﻫﻮ ﻳﺤﺮﻙ ﻓﺈﻳﺪﻳﻪ ﻭﻳﺴﺄﻝ : ﺷﻨﻮ ﺍﻟﻠﻲ ﺳﻤﻌﻨﺎﻩ ﻳﺎﻭﻟﺪﻱ ..
ﻋﻤﺎﺩ ﻣﺮﺭ ﻧﻈﺮﻩ ﻋﻠﻴﻬﻢ ﻛﻠﻬﻢ ﻭﻫﻮ ﻣﺒﺘﺴﻢ ..
ﻭﻟﻤﺢ ﺍﻟﻨﺴﺎﻭﻳﻦ ﺍﻟﻠﻲ ﻭﺍﻗﻔﺎﺕ ﺣﺪﺍ ﺍﻟﺒﺎﺏ ..
ﻋﻴﻨﻪ ﺭﻛﺰﺕ ﻉ ﻟﻬﻔﺔ ﺳﻌﻴﺪﻩ ..
ﻋﻤﺎﺩ : ﺭﻣﺰﻱ ﺣﻲ ﻳﺎﺧﺎﻟﻲ .. ﻭﻣﺤﺒﻮﺱ ﻓﻤﺼﺮﺍﺗﻪ .. ﻭﺍﻟﻠﻲ ﺧﺒﺮﻧﻲ ﻗﺎﻟﻲ ﺍﻥ ﻣﺎﻓﻴﻪ ﺷﻲ ﻭﺻﺤﺘﻪ ﺗﻤﺎﻡ ... ﺷﺒﺢ ﻟﻠﻬﺎﺩﻱ .. ﻫﻮ ﻭﻋﻤﻲ ﺍﻟﺼﻴﺪ ﺑﻮ ﻣﺮﺗﻚ ﻳﺎﺧﺎﻝ ..
ﻣﺤﻤﺪ : ﻣﺘﺄﻛﺪ !!!
ﻋﻤﺎﺩ ﺑﻀﺤﻜﻪ : ﺟﺎﺑﻮﻟﻲ ﺍﺧﺒﺎﺭﻩ ﺑﺎﻹﺳﻢ ﻣﻦ ﻓﻤﻪ ﻟﻮﺩﻧﻲ ﺍﻟﺮﺍﺟﻞ ﻗﺎﻟﻲ .. ﺍﺳﻤﻪ ... ﺭﻣﺰﻱ ﻣﻴﻼﺩ ﺭﻣﻀﺎﻥ ﺍﻣﺤﻤﺪ ******
ﻛﻠﻬﻢ ﺷﺒﺤﻮﺍ ﻟﺒﻌﺾ ﺑﻨﻈﺮﺍﺕ ﻣﺨﺘﻠﻔﻪ ﺑﻴﻦ ﻋﺪﻡ ﺍﻹﺳﺘﻴﻌﺎﺏ ﻭﻓﺮﺣﻪ ...
ﺍﻣﺎ ﻣﻴﻼﺩ ..
ﺣﻀﻦ ﻭﻟﺪ ﺍﺧﺘﻪ ﺑﻘﻮﺓ ...
ﻓﻨﻔﺲ ﺍﻟﻠﺤﻈﻪ ...
ﺍﻟﺤﺎﺟﻪ ﻓﺎﻃﻤﻪ ﺍﻟﻠﻲ ﻋﻤﺮﻫﺎ ﻓﺤﻴﺎﺗﻬﺎ ﻣﺎﺯﻏﺮﻃﺖ ..
ﻫﺪﻳﻜﺎ ﺍﻟﻠﺤﻈﻪ ﻗﻌﺪﺕ ﺗﺰﻏﺮﻁ ...
ﻛﻠﻬﻢ ﺗﻔﺎﺟﺌﻮﺍ ...
ﺑﺲ ﺳﻌﻴﺪﻩ ﺯﻏﺮﻃﺖ ﻣﻌﺎﻫﺎ ﻃﻮﻝ ...
ﻭﻛﻠﻬﻢ ﺗﺒﻌﻮﻫﻢ ﻭﺯﻏﺮﻃﻮﺍ ..
ﻗﻌﺪﻭﺍ ﺍﻟﺮﺟﺎﻟﻪ ﻳﺸﻮﻓﻮﻟﻬﻢ ..
ﻭﺍﻟﻠﻲ ﻫﺪﺍ ﻳﻀﺤﻚ ﻣﻦ ﺑﻴﻦ ﺩﻣﻮﻋﻪ ..
ﻋﻤﺎﺩ ﻛﺎﻥ ﻣﺮﻛﺰ ﻉ ﺗﻼﺗﻪ ..
ﺳﻌﻴﺪﻩ ﻭﺣﻨﺎﻩ ﻭﻏﺎﻟﻴﻪ ...
ﻛﺎﻥ ﻳﺸﻮﻑ ﻓﻔﺮﺣﺘﻬﻢ .. ﻭﻳﺰﻳﺪ ﻳﻐﻤﺮﻩ ﺷﻌﻮﺭ ﺍﻟﺴﻌﺎﺩﻩ ..
ﺑﻌﺪﻳﻦ ﻗﻌﺪ ﻳﺪﻭﺭ ﺑﻴﻦ ﺍﻟﻮﺟﻮﻩ ..
ﻟﻴﻦ ﺑﺎﻧﺖ ﻋﻠﻴﻪ ... ﺑﻨﻴﺔ ﻗﻠﺒﻪ ..
ﻛﺎﻧﺖ ﺗﺸﺒﺤﻠﻪ ..
ﻟﻤﺎ ﺷﺒﺤﻠﻬﺎ .. ﻏﻴﺮﺕ ﻋﻴﻮﻧﻬﺎ ..
ﺿﺤﻚ ..
ﺷﺒﺤﺘﻠﻪ ﻣﺮﺓ ﺗﺎﻧﻴﻪ ..
ﺷﻘﻠﺐ ﻋﻴﻮﻧﻪ ...
ﻫﻲ ﺷﻘﻠﺒﺖ ﻋﻴﻮﻧﻬﺎ ﻭﻫﻲ ﺷﺎﺩﻩ ﺿﺤﻜﺘﻬﺎ ﻭﻗﻌﺪﺕ ﺗﺸﻮﻑ ﻟﻠﻨﺴﺎﻭﻳﻦ ﻛﻴﻒ ﻳﺤﻀﻨﻮﺍ ﻓﻲ ﺑﻌﺾ ﻣﻦ ﺍﻟﻔﺮﺣﻪ ...
🍁🍁🍁🍁🍁
ﺧﺶ ﻟﻠﺤﻮﺵ ...
ﻛﻤﻞ ﻃﻮﻝ ﻟﻠﻜﻮﺟﻴﻨﻪ ﻟﻘﺎﻫﺎ ﻓﺎﺿﻴﻪ ..
ﺣﻤﺰﺓ : ﻳﻤﺎ ..
" ﺍﻧﻲ ﻓﺪﺍﺭ ﺧﻮﺍﺗﻚ .."
ﻣﺸﻲ ﻟﺪﺍﺭ ﺧﻮﺍﺗﻪ ..
ﻭﻗﻒ ﻓﻲ ﺍﻟﺒﺎﺏ ..
ﻟﻘﻲ ﺭﺍﻧﻴﺎ ﻓﺤﻀﻦ ﺍﻣﻬﺎ ﻭﻉ ﻭﺟﻬﻬﺎ ﺿﺤﻜﻪ ﺣﻠﻮﺓ ﻭﻋﻴﻮﻧﻬﺎ ﻟﻮﻃﺎ ..
ﺣﻤﺰﺓ : ﺷﻦ ﻓﻲ؟
ﺯﻳﻨﺐ : ﺭﻣﺰﻱ ﻭﻟﺪ ﺧﺎﻟﻚ ... ﻃﻠﻊ ﺣﻲ ﻣﺎﻣﺘﺶ ..
ﻋﻴﻮﻧﻪ ﺣﻤﺰﺓ ﺗﻌﺒﻮﺍ ﺩﻣﻮﻉ ﻭﻗﺎﻝ : ﻳﻤﺎ .. ﺷﻦ ﺗﻘﻮﻟﻲ !!
ﺭﺑﺎﺏ : ﻛﻠﻢ ﺧﻮﺍﻟﻲ ﺗﻮ ﺗﻔﻬﻢ ..
ﻏﻴﺮ ﻋﻴﻮﻧﻪ ﻣﻦ ﺭﺑﺎﺏ ﻟﺮﺍﻧﻴﺎ ..
ﺑﻌﺪﻳﻦ ﻃﻠﻊ ﻣﻦ ﺍﻟﺪﺍﺭ ﺑﺶ ﻳﻜﻠﻢ ﺧﻮﺍﻟﻪ ﺑﺮﺍﺣﻪ ..
ﺯﻳﻨﺐ ﺷﺒﺤﺖ ﻟﺮﺍﻧﻴﺎ : ﺷﻨﻲ ﺗﻮﺍ ...
ﺿﺤﻜﺖ ﺑﺨﺠﻞ ..
ﺯﻳﻨﺐ ﺿﺮﺑﺘﻬﺎ ﺑﺨﻔﺔ ﻉ ﻇﻬﺮﻫﺎ : ﺗﻀﺤﻜﻲ ﻳﺎﻣﻌﻔﻨﻪ ..
ﻏﻄﺖ ﻭﺟﻬﺎ ﺑﻴﺪﻫﺎ ﻭﻫﻲ ﻓﺤﻀﻦ ﺍﻣﻬﺎ ﻭﺗﻀﺤﻚ ..
ﻭﺭﺑﺎﺏ ﺗﻀﺤﻚ ﻋﻠﻴﻬﺎ ..
🌴🌴🌴🌴🌴🌴🌴🌴🌴🌴🌴
ﺍﻟﺤﻤﺪ ﻟﻠﻪ ﺗﺮﻳﺤﺘﻮﺍ ﻋﻠﻴﻪ ..
ﻫﺎﻧﻴﺒﺎﻝ : ﺑﺎﻫﻲ ﺍﻧﺖ ﺍﻣﺘﻰ ﺑﺘﻌﺪﻱ ﺗﺸﻮﻓﻪ ..
ﻋﻤﺎﺩ : ﺍﻟﺴﺎﻋﻪ 11 ﺍﻟﺼﺒﺢ ﺑﻨﻄﻠﻊ ﻣﻦ ﻫﻨﻲ ﻟﻤﺼﺮﺍﺗﻪ .. ﻭﺑﻌﺪﻳﻦ ﻧﻮﻟﻲ ﻫﻨﻲ ﺇﻥ ﺷﺎﺀ ﺍﻟﻠﻪ ..
ﻣﺤﻤﺪ : ﺿﺎﻣﻨﻬﻢ ﺍﻧﺖ ﻳﺎﻋﻤﺎﺩ ..
ﻋﻤﺎﺩ ﺑﺈﺑﺘﺴﺎﻣﻪ : ﺯﻱ ﺧﻮﺗﻲ ﻫﺎﺩﻡ ﻳﺎﻣﺤﻤﺪ ..
ﻣﺤﻤﺪ ﻫﺰ ﺭﺍﺳﻪ ﺑﺈﻳﺠﺎﺏ ..
ﻣﺆﻧﺲ : ﻃﺮﻳﻖ ﺍﻟﺴﻼﻣﻪ ..
ﻋﻤﺎﺩ ﺍﺑﺘﺴﻢ ﻭﻗﺎﻝ : ﺗﺴﻠﻢ ..
ﺭﻥ ﺗﻠﻴﻔﻮﻥ ﻣﺤﻤﺪ ﺷﺎﻓﻪ ﻭﻗﺎﻝ ﺑﺈﺑﺘﺴﺎﻣﻪ : ﺣﻤﺰﺓ ..
🍁🍁🍁🍁🍁
ﺍﻟﺴﺎﻋﻪ 9:00
ﺭﺯﺍﻥ ﺷﻦ ﺻﺎﺭ ﻓﻲ ﺍﻟﺒﻴﺘﺰﺍ ..
ﺭﺯﺍﻥ : ﻃﻠﻌﺖ ﺍﻭﻝ ﺍﻟﻄﺎﺟﻴﻦ ﻭﺣﻄﻴﺖ ﺍﻟﺘﺎﻧﻲ ..
ﺣﻤﻴﺪﻩ ﻭﻫﻲ ﺗﺎﻛﻞ ﻓﻲ ﺍﻟﺒﻴﺘﺰﺍ : ﺍﻣﻤﻢ ... ﻋﻄﻴﻚ ﺍﻟﻬﻨﻲ ﻓﺮﺧﻪ ﺭﺯﺍﻥ ﺩﻳﻤﺎ ﻣﺎﻛﻠﺘﻚ ﺳﻤﺤﻪ ..
ﻏﺎﻟﻴﻪ ﺑﺄﺑﺘﺴﺎﻣﻪ : ﻃﻴﺎﺑﻬﺎ ﻛﻴﻒ ﻃﻴﺎﺏ ﻋﻤﺘﻬﺎ ﻧﻌﻴﻤﻪ ..
ﺣﻤﻴﺪﻩ ﺑﻀﺤﻜﻪ؛ﻣﻦ ﻛﻴﻔﻬﺎ ﻛﺎﻥ ﺟﻲ ﻛﻴﻒ ﻃﻴﺎﺏ ﻧﻌﻴﻤﻪ ..
ﺭﺯﺍﻥ : ﻋﻨﺪﻱ ﺍﻧﻲ ﻃﻴﺎﺏ ﻋﻤﺘﻲ ﻏﺎﻟﻴﻪ ﺍﺣﺴﻦ ..
ﻏﺎﻟﻴﻪ ﺍﺑﺘﺴﻤﺖ ..
ﺣﻤﻴﺪﻩ ﺑﺈﺑﺘﺴﺎﻣﻪ : ﺻﺢ ﻧﻌﻤﺔ ﻏﺎﻟﻴﻪ ﺳﻤﺤﻪ ..
ﺧﺸﺖ ﻋﻠﻴﻬﻢ ﺳﻤﻴﻪ : ﺍﻟﺴﻼﻡ ﻋﻠﻴﻜﻢ ..
ﺭﺩﻭﺍ ﻋﻠﻴﻬﺎ ﺍﻟﺴﻼﻡ ..
ﺳﻤﻴﻪ : ﺗﺒﻦ ﻧﻌﺎﻭﻧﻜﻦ ﻓﻲ ﺣﺎﺟﻪ ..
ﺭﺯﺍﻥ ﺷﺒﺤﺘﻠﻬﺎ ﻣﻦ ﻓﻮﻕ ﻟﻠﻮﻃﺎ ..
ﺣﻤﻴﺪﻩ ﺑﻀﺤﻜﻪ : ﻧﺒﻮ ﺳﻼﻣﺘﻚ ﻳﺎﺳﻤﻴﻪ ..
ﺿﺤﻜﺖ ﺭﺯﺍﻥ ...
ﺳﻤﻴﻪ ﻗﻌﺪﺕ ﺗﺸﺒﺢ ﻟﺤﻤﻴﺪﻩ ﺑﺮﻓﻌﺔ ﺣﻮﺍﺟﺐ ..
ﻭﺣﻤﻴﺪﻩ ﺗﺎﻛﻞ ﻭﻣﺶ ﻣﻌﺒﺮﺗﻬﺎ ..
ﻏﺎﻟﻴﻪ ﺑﺘﻨﻘﺬ ﺍﻟﻤﻮﻗﻒ : ﺗﺮﺍ ﺗﻌﺎﻟﻲ ﻃﻴﺒﻲ ﺍﻟﺸﺎﻫﻲ ..
ﺷﺒﺤﺖ ﻟﻐﺎﻟﻴﻪ ﻭﻗﺎﻟﺖ : ﺑﺎﻫﻲ ..
ﻣﺸﺖ ﻭﻭﺟﻬﻬﺎ ﻣﻘﻠﻮﺏ ﻟﻠﺪﻭﻻﺏ ﺑﺶ ﺗﺎﺧﺪ ﻣﻨﻪ ﺍﻟﺒﺮﺍﺩ ..
ﻭﺭﺯﺍﻥ ﻭﺣﻤﻴﺪﻩ ﻳﺸﺒﺤﻮﺍ ﻟﺒﻌﺾ ﻭﻫﻤﺎ ﺷﺎﺩﻳﻦ ﺿﺤﻜﺘﻬﻢ ..
ﻭﻏﺎﻟﻴﻪ ﺗﻔﻨﺺ ﻓﻴﻬﻢ
🍃 ﺳﻤﻴﻪ ﻏﺎﻟﺒﺎ ﺍﺩﻳﺮ ﻫﻜﻲ ﺑﻌﺪ ﻳﻜﻤﻠﻮﺍ ﻋﻮﺍﻟﺘﻬﻢ ﺗﺨﺶ ﻭﺗﻘﻮﻝ ﺑﺎﻟﻚ ﺗﺒﻮﻧﻲ ﻧﺴﺎﻋﺪﻛﻢ ﻓﺤﺎﺟﻪ 🍃...
🍁🍁🍁🍁🍁
ﺑﻌﺪ ﻛﻤﻠﻮﺍ ﻋﻮﺍﻟﺔ ﺍﻟﻌﺸﻲ ..
ﻃﻠﻌﻮﺍ ﻟﻠﺮﺟﺎﻟﻪ ﻭﺍﻟﻨﺴﺎﻭﻳﻦ ﺗﻌﺸﻮﺍ ...
ﻭﻛﺎﻧﺖ ﺍﻻﺟﻮﺍﺀ ﺣﻠﻮﺓ ﻫﻠﺒﻪ ...
ﺍﺟﻮﺍﺀ ﺩﺧﻠﺖ ﻋﻠﻴﻬﻢ ﺍﻟﻔﺮﺡ ﻭﺍﺧﻴﺮﺍ ...
ﺍﺣﻴﻴﺖ ﻫﻠﺒﻪ ﻣﻨﻬﻢ ﻛﺎﻧﻮﺍ ﻣﻴﺘﻴﻦ ﻉ ﻗﻴﺪ ﺍﻟﺤﻴﺎﺓ ...
💓 ﻟﻴﻠﺘﻬﺎ ﻣﺎﻛﺎﻥ ﻓﻲ ﺣﺪ ﻳﺒﻲ ﻳﺮﻗﺪ ..
ﺩﺍﺭﺕ ﻏﺎﻟﻴﻪ ﻓﻄﻴﺮﺓ ﺑﺶ ﻳﺸﺮﺑﻮﻫﺎ ﻣﻊ ﺍﻟﺸﺎﻫﻲ ..
ﻭﺑﻴﻄﻠﻌﻮﻫﺎ ﻣﻊ ﺍﻟﻠﻲ ﻗﻌﺪ ﻣﻦ ﺍﻟﺒﻴﺘﺰﺍ ﺍﻟﻠﻲ ﺩﺍﺭﺗﻬﺎ ﺭﺯﺍﻥ ..
ﻏﺎﻟﻴﻪ : ﺳﺘﻔﻲ ﺭﺯﺍﻥ ﺍﻟﻔﻄﻴﺮﺓ ﻓﺎﻟﺼﻮﻧﻴﻪ ..
ﺭﺯﺍﻥ : ﺑﺎﻫﻲ ..
ﺧﺪﺗﻬﺎ .. ﻭﻗﻌﺪ ﺗﺴﺘﻒ ﻓﻴﻬﺎ ..
ﻭﻏﺎﻟﻴﻪ ﻣﺸﻐﻮﻟﻪ ﺑﺎﻟﺸﺎﻫﻲ ﺗﺨﺪﻡ ﻓﻴﻪ ...
💕 ﻫﻮ ﺟﻲ ﻭﻭﻗﻒ ﻓﻲ ﺍﻟﺮﻭﺷﻦ ...
ﺟﺬﺑﺎﺗﻪ ﺭﻳﺤﺔ ﺍﻟﻔﻄﻴﺮﺓ ﻷﻧﻪ ﻳﻌﺸﻘﻬﺎ ...
ﺑﺲ ﻧﺴﻲ ﻋﺸﻘﻪ ﻟﻠﻔﻄﻴﺮﺓ ﻟﻤﺎ ﺷﺎﻓﻬﺎ ﺗﺴﺘﻒ ﻓﻴﻬﺎ ﻓﻲ ﺍﻟﺼﻮﻧﻴﻪ ..
ﻫﻲ ﻻﻫﻴﻪ .. ﻣﻨﻈﺮﻫﺎ ﺣﻠﻮ ...
ﻭﻫﻮ ﻳﺘﺎﻣﻞ ﻓﻴﻬﺎ ﻭﺑﺲ ...💓
ﻗﻌﺪ ﻫﻜﻲ ﻣﺎﻳﻘﺎﺭﺏ ﺗﻼﺗﻪ ﺩﻗﺎﻳﻖ ..
ﺭﺯﺍﻥ : ﻋﻤﺘﻲ ..
ﻏﺎﻟﻴﻪ : ﺍﻣﻤﻢ ..
ﺭﺯﺍﻥ : ﺗﻮ ﻋﻤﺎﺩ ﻫﻜﻲ ﻣﻦ ﺍﻟﺜﻮﺍﺭ ﺍﻟﻠﻲ ﺷﺎﺩﻳﻦ ﻃﺮﺍﺑﻠﺲ ﻭﻻ؟
ﺍﺑﺘﺴﻢ ﻭﻗﻠﺒﻪ ﺩﻕ ﺑﻘﻮﺓ ﻟﻤﺎ ﺳﻤﻊ ﺍﺳﻤﻪ ﻣﻦ ﻓﻤﻬﺎ ﻷﻭﻝ ﻣﺮﺓ 💓
ﻏﺎﻟﻴﻪ ﺑﻀﺤﻜﻪ : ﻻﻻ ﻋﻤﺎﺩ ﺭﺟﻊ ﻟﺨﺪﻣﺘﻪ ﺍﻻﻭﻟﻰ ﻭﺳﻠﻢ ﺳﻼﺣﻪ ..
ﺭﺯﺍﻥ : ﺑﺲ ﺍﻟﺘﻮﺍﺭ ﺻﺤﺎﺑﻪ .. ﻳﻌﻨﻲ ﻫﻮ ﻛﻴﻒ ﻗﺪﺭ ﻳﻌﺮﻑ ﺭﻣﺰﻱ ﻭﻳﻦ ﻟﻮ ﻣﻌﺎﺵ ﻟﻴﻪ ﺑﻴﻬﻢ ﻋﻼﻗﻪ ..
ﻏﺎﻟﻴﻪ : ﺍﻧﺘﻲ ﻗﻠﺘﻴﻬﺎ ﺻﺤﺎﺏ ..
ﺭﺯﺍﻥ ﺣﻄﺖ ﺍﻟﺼﻮﻧﻴﻪ ﻓﺎﻟﺼﻔﺮﺓ : ﺣﺘﻰ ﺍﻧﻲ ﻗﻠﺘﻬﺎ ﻓﻨﻔﺴﻲ ﻣﺴﺘﺤﻴﻞ ﻳﻜﻮﻥ ﻣﻌﺎﻫﻢ ﻷﻥ ﺑﺪﻳﺖ ﻧﺴﻤﻊ ﻋﻠﻴﻬﻢ ﻓﻲ ﺣﺎﺟﺎﺕ ﺧﻴﻲ .. ﻭﻋﻤﺎﺩ ﻣﺶ ﻫﻜﻲ ..
ﻏﺎﻟﻴﻪ ﺿﺤﻜﺖ ﻭﺗﻠﻔﺖ ﻟﺮﺯﺍﻥ ﺷﺎﻓﺖ ﻋﻤﺎﺩ ﻭﺍﻗﻒ ﻓﺎﻟﺮﻭﺷﻦ ﻳﺸﻮﻑ ﻟﺮﺯﺍﻥ ﻭﻋﻴﻮﻧﻪ ﻗﻠﻮﺏ 💓
ﻏﺎﻟﻴﻪ : ﻫﻬﻬﻬﻬﻬﻬﻬﻬﻬﻬﻬﻬﻬﻪ ..
ﻫﻮ ﺍﺳﺘﺎﻗﺾ ﻭﺷﺒﺢ ﻟﻐﺎﻟﻴﻪ ..
ﻭﺭﺯﺍﻥ ﺷﺒﺤﺘﻠﻬﺎ ﻭﻗﺎﻟﺖ ﺑﺮﺑﻜﻪ : ﻣﺶ ﻗﺼﺪﻱ ﺷﻲ ﺭﺍﻫﻮ ..
ﺍﺷﺮﺗﻠﻬﺎ ﻏﺎﻟﻴﻪ ﺑﺤﻮﺍﺟﺒﻬﺎ ﻉ ﺍﻟﺮﻭﺷﻦ ..
ﺳﻜﺘﺖ .. ﻭﻏﻴﺮﺕ ﻋﻴﻮﻧﻬﺎ ﻟﻠﺮﻭﺷﻦ ...
ﻟﻘﺎﺗﻪ ﻳﺸﺒﺤﻠﻬﺎ ﺑﺈﺑﺘﺴﺎﻣﻪ ...
ﻓﻨﺼﺖ ... ﻭﻃﻮﻝ ﺑﻌﺪﻫﺎ ﻃﻠﻌﺖ ﺟﺮﻱ ﻣﻦ ﺍﻟﻜﻮﺟﻴﻨﻪ ..
ﻏﺎﻟﻴﻪ ﺑﻀﺤﻜﻪ : ﺑﺘﻬﺒﻞ ﺍﻟﺒﻨﺖ ﺭﺍﻙ ..
ﻋﻤﺎﺩ : ﻻ ﻭﺍﻟﻠﻪ ﻳﺎﻏﺎﻟﻴﻪ ﻫﻲ ﺍﻟﻠﻲ ﻫﺒﻠﺘﻨﻲ ..
ﻏﺎﻟﻴﻪ ﺑﻀﺤﻜﻪ : ﺗﺤﺸﻢ ﻳﺎﺩﻋﻮﺓ ..
ﻋﻤﺎﺩ ﺑﻀﺤﻜﻪ : ﻋﻼﺵ ﺑﻨﺘﺤﺸﻢ ﺍﻟﺤﺐ ﻻﻋﻴﺐ ﻻﺣﺮﺍﻡ ﻭﺍﻧﻲ ﻧﺒﻴﻬﺎ ﺑﺎﻟﺤﻼﻝ ﻣﺎﻋﻨﺪﻱ ﻋﻼﺵ ﻧﺴﻜﺖ ﻭﻧﺪﺭﻕ ..
ﻏﺎﻟﻴﻪ ﺑﺈﺑﺘﺴﺎﻣﻪ : ﻣﺎﺯﺍﻝ ﺻﻐﻴﺮﺓ ..
ﻋﻤﺎﺩ ﻭﻫﻮ ﻳﺤﺮﻙ ﻓﺮﺍﺳﻪ ﺍﻳﻤﻴﻦ ﻭﻳﺴﺎﺭ : ﺗﺴﺘﺲ ﻣﺶ ﺻﻐﻴﺮﺓ ... ﺭﺯﺍﻥ ﺍﻛﺒﺮ ﻣﻦ ﻋﻤﺮﻫﺎ ﺑﻬﻠﺒﻪ .. ﻭﺑﻌﺪﻳﻦ ﺍﻧﻲ ﺑﻨﺮﺍﺟﻴﻬﺎ ﻟﻴﻦ ﺗﻄﻠﻊ ﻣﻦ ﺍﻟﺜﺎﻧﻮﻱ .. ﺑﺈﺫﻥ ﺍﻟﻠﻪ ﻃﻮﻝ ﺑﻨﻜﻠﻢ ﺧﺎﻟﻲ ﻭﺑﻴﻦ ﺍﻟﺨﻄﺒﻪ ﻭﺍﻟﻌﺮﺱ ... ﺩﺍﺭ ﺭﻗﻢ ﺑﺼﻮﺍﺑﻌﻪ ... ﺛﻼﺗﻪ ﺷﻬﻮﺭ ﻻﺍﻛﺜﺮ ..
ﻏﺎﻟﻴﻪ : ﻛﻴﻒ ﻗﺼﺪﻙ ﻣﺶ ﻣﺨﻠﻴﻬﺎ ﺗﻜﻤﻞ ﻗﺮﺍﻳﻪ ..
ﻋﻤﺎﺩ ﺑﺠﺪﻳﻪ : ﻭﻋﻼﺵ ﺑﺘﻜﻤﻠﻬﺎ ﻣﺎﻋﻨﺪﻫﺎ ﻣﺎﺩﻳﺮ ﺑﻴﻬﺎ ..
ﻏﺎﻟﻴﻪ : ﻛﻴﻒ؟
ﻋﻤﺎﺩ : ﻫﻮ ﻫﺪﺍ ...
ﻏﺎﻟﻴﻪ ﻗﻌﺪﺕ ﺗﺸﺒﺤﻠﻪ ..
ﻋﻤﺎﺩ ﺿﺤﻚ : ﺧﻼﺹ ﻓﻮﺗﻲ ﺗﻮﺍ ﻭﻗﻮﻟﻴﻠﻲ .. ﻏﺪﻭﺓ ﻣﺎﺷﻲ ﻟﻤﺼﺮﺍﺗﻪ ﺑﺈﺫﻥ ﺍﻟﻠﻪ ﺑﻨﺸﻮﻑ ﺭﻣﺰﻱ ..
ﻏﺎﻟﻴﻪ ﺩﻣﻮﻋﻬﺎ ﻧﺰﻟﻮﺍ ﻃﻮﻝ ..
ﻋﻤﺎﺩ ﺍﺑﺘﺴﻢ : ﺗﺒﻴﻨﻲ ﻧﻮﺻﻠﻪ ﺣﺎﺟﻪ ﻛﻼﻡ ﻫﻜﻲ ﻳﻌﻨﻲ ..
ﻏﺎﻟﻴﻪ ﻗﺪﻣﺘﻠﻪ : ﻗﻮﻟﻪ ﻣﺎﻧﺴﻴﻨﺎﻩ ﺑﻜﻞ ﺑﻜﻞ .. ﻭﻗﻮﻟﻪ ﺭﺍﻧﻴﺎ ﻗﺮﻳﺐ ﻣﺎﺗﺖ ﻭﺭﺍﻙ .. ﻭﺻﻠﻬﻠﻪ ﺑﺎﻟﺤﺮﻑ ﻳﺎﻋﻤﺎﺩ ..
ﺍﺑﺘﺴﻢ : ﺭﻳﺘﻲ ﻣﺶ ﻗﺘﻠﻚ ﺍﻟﺤﺐ ﻣﺶ ﻋﻴﺐ ..
ﺿﺤﻜﺖ ﻭﻫﻲ ﺗﻤﺴﺢ ﻓﺪﻣﻮﻋﻬﺎ ...
🍁🍁🍁🍁🍁🍁🍁
ﻭﺍﻟﻠﻪ ﺑﻨﻬﺒﻞ ﻓﺮﺣﺎﻧﻪ ﺑﻨﻬﺒﻞ .... ﻣﺶ ﻋﺎﺭﻓﻪ ﺷﻦ ﻧﺪﻳﺮ ﻳﺎﺭﺑﺎﺏ
ﻭﺣﻀﻨﺘﻬﺎ ﺑﺎﻟﻘﻮﺓ ..
ﺭﺑﺎﺏ ﺗﻀﺤﻚ : ﺍﻧﻲ ﺭﺑﺎﺏ ﻣﺶ ﺭﻣﺰﻱ ..
ﺑﻌﺪﺕ ﺭﺍﻧﻴﺎ ﻭﺿﺮﺑﺘﻬﺎ ﻭﻫﻲ ﺗﻀﺤﻚ ...
ﺭﺑﺎﺏ ﺑﻀﺤﻜﻪ : ﺳﺒﺤﺎﻥ ﺍﻟﻠﻪ ..
ﺭﺍﻧﻴﺎ ﺗﻨﻬﺪﺕ ﺑﺈﺑﺘﺴﺎﻣﻪ : ﺍﺻﻼ ﺍﻧﻲ ﺩﻳﻤﺎ ﻧﺪﻋﻲ ﻟﺮﺑﻲ ﻭﻧﻘﻮﻟﻪ ﺍﺟﻌﻠﻪ ﻣﻦ ﻧﺼﻴﺒﻲ ﻭﺍﺟﻌﻠﻨﻲ ﻣﻦ ﻧﺼﻴﺒﻪ ﺩﻧﻴﺎ ﻭﺁﺧﺮﻩ ..
ﺍﺑﺘﺴﻤﺖ ﺑﻔﺮﺡ ﻭﺣﻄﺖ ﺍﻳﺪﻳﻬﺎ ﻉ ﻓﻤﻬﺎ ﻭﺑﺎﺳﺘﻬﻢ ﻭﺭﻓﻌﺘﻬﻢ ﻭﻫﻲ ﺗﺸﺒﺢ ﻓﻮﻕ : ﻧﺤﺒﻚ ﻳﺎﺭﺑﻲ ..
ﺭﺑﺎﺏ ﺍﺑﺘﺴﻤﺖ : ﺇﻥ ﺷﺎﺀ ﺍﻟﻠﻪ ﺩﻳﻤﻪ ﺗﻀﺤﻜﻲ ﻳﺎﺭﺏ ..
ﺿﺤﻜﺖ ﺭﺍﻧﻴﺎ ﻭﺣﻀﻨﺖ ﺍﺧﺘﻬﺎ ﺑﺎﻟﻘﻮﺓ ﻭﻣﻦ ﻛﺜﺮ ﻓﺮﺣﺘﻬﺎ ﻋﻴﻄﺖ ﻭﻫﻲ ﻣﺼﻜﺮﺓ ﻉ ﺳﻨﻮﻧﻬﺎ ..
ﻭﺭﺑﺎﺏ ﺗﻀﺤﻚ ﻭﺧﻼﺹ ...
🍁🍁🍁🍁🍁
ﺍﻟﺴﺎﻋﻪ 11:30 ﻟﻴﻼ ..
ﻧﻌﻴﻤﻪ : ﺍﻩ ﻫﺎﻟﺒﻨﺖ ﻗﻄﻌﺘﻠﻲ ﻗﻠﺒﻲ ﺗﻘﻄﻴﻊ .. ﻗﻠﻴﻠﺔ ﺑﺨﺖ ..
ﻧﻮﺭ : ﻣﺎﻣﺎ ﻣﻌﺎﺵ ﺗﻘﻮﻟﻲ ﻫﻜﻲ ﻛﻠﻪ ﻗﻀﺎﺀ ﻭﻗﺪﺭ ﻣﻦ ﺭﺑﻲ ﻭﻛﻞ ﺣﺪ ﻭﻧﺼﻴﺒﻪ ﻓﺎﻟﺪﻧﻴﺎ .. ﻭﻛﻠﻪ ﺧﻴﺮ ..
ﻧﻌﻴﻤﻪ : ﻟﻜﻦ ﺍﻟﻠﻲ ﻳﺼﻴﺮ ﻣﻊ ﺍﺧﺘﻚ ﻛﺒﻴﺮ ﻋﻠﻴﻬﺎ ﻳﺎﺑﻨﺘﻲ ﺭﺍﻫﻲ ﻣﺎﺯﺍﻟﺖ ﺻﻐﻴﺮﺓ ﻧﺪﻳﺪﺍﺗﻬﺎ ﺍﻛﺒﺮ ﻫﻤﻬﻢ ﻛﻴﻒ ﻳﺘﺨﺮﺟﻮﺍ ﻣﻦ ﺍﻟﺠﺎﻣﻌﻪ ..
" ﻛﻞ ﻭﺍﺣﺪ ﻫﻤﻪ ﻉ ﻗﻴﺎﺳﻪ "
ﺍﻟﺘﻔﺘﻮﺍ ﺍﻟﺰﻭﺯ ﻟﻠﺒﺎﺏ ..
ﻟﻘﻮﻫﺎ ﻭﺍﻗﻔﻪ ﺗﺸﻮﻓﻠﻬﻢ ﺑﻨﻈﺮﺍﺗﻬﺎ ﺍﻟﺒﺎﻫﺘﻪ : ﻋﻤﺎﺭ ﻣﺮﺓ ﻗﺎﻟﻲ ﺭﺑﻲ ﻳﻨﺰﻝ ﺍﻟﺒﻼﺀ ﺍﻟﻘﻮﻱ ﻟﻠﻌﺒﺪ ﺍﻟﻘﻮﻱ ...
ﻗﺪﻣﺖ ﻷﻣﻬﺎ ... ﻧﺰﻟﺖ ﺭﻗﺪﺕ ﻉ ﻓﺨﺪﺗﻬﺎ ﻭﻫﻲ ﺗﻘﻮﻝ : ﻭﺍﻧﻲ ﺭﺑﻲ ﻳﺸﻮﻑ ﻓﻴﺎ ﻗﻮﻳﻪ ...
ﺍﻣﻬﺎ ﻣﺴﺤﺖ ﻉ ﺷﻌﺮﻫﺎ ...
ﻭﺍﺧﺘﻬﺎ ﻧﻮﺭ ﺍﺑﺘﺴﻤﺖ ﻭﻗﺎﻟﺖ : ﺩﻻﻝ .. ﺭﻣﺰﻱ ﻃﻠﻊ ﺣﻲ ﻣﺶ ﻣﻴﺖ ..
ﻗﺎﻣﺖ ﺭﺍﺳﻬﺎ ﻭﻫﻲ ﺗﺸﻮﻑ ﻟﻨﻮﺭ ﺑﺈﺑﺘﺴﺎﻣﺔ ﻓﺮﺡ ﺍﺭﺗﺴﻤﺖ ﻉ ﻭﺟﻬﻬﺎ ﺍﻟﺬﺍﺑﻞ : ﺳﺒﺤﺎﻧﻚ ﻳﺎﺭﺑﻲ ... ﺍﻟﺤﻤﺪ ﻟﻠﻪ ..
ﺭﺟﻌﺖ ﻧﺰﻟﺖ ﺭﺍﺳﻬﺎ ﻉ ﻓﺨﺪ ﺍﻣﻬﺎ ﻭﻗﺎﻟﺖ : ﻫﺪﺍ ﺣﻠﻢ ﺧﺎﻟﺘﻲ ﻏﺎﻟﻴﻪ ..
ﻧﻌﻴﻤﻪ ﻭﻧﻮﺭ ﺍﺳﺘﻐﺮﺑﻮﺍ ..
ﻧﻌﻴﻤﻪ : ﺍﻳﻦ ﺣﻠﻢ ..!!
" ﺟﻮﺍﺍﺍﺩ ﻣﺠﺪ "
ﺿﺤﻜﺖ ﻧﻮﺭ : ﻫﺒﻠﻮﺍ ﺑﺎﺑﺎ ﺧﻞ ﻧﻮﺽ ﻧﺸﻮﻓﻬﻢ ..
ﻧﺎﺿﺖ ﻭﻃﻠﻌﺖ ﻣﻦ ﺍﻟﺪﺍﺭ ..
ﻧﻌﻴﻤﻪ : ﺍﻳﻪ ﺍﻣﺎ ﺣﻠﻢ ..
ﺩﻻﻝ ﺍﺑﺘﺴﻤﺖ ﺑﺄﻟﻢ ........:
🍁🍁🍁🍁🍁🍁
ﺍﻧﺖ ﺍﻟﻮﺣﻴﺪ ﺍﻟﻠﻲ ﺻﺪﻗﺖ ﺍﻟﺤﻠﻢ ﻛﻴﻒ ﻣﺎﺍﻧﻲ ﺻﺪﻗﺘﻪ ..
ﻋﻤﺎﺩ : ﺣﻠﻢ ﻭﻓﻴﻪ ﺍﻟﺮﺳﻮﻝ ﻃﺒﻴﻌﻲ ﻳﺘﺼﺪﻕ ..
ﻏﺎﻟﻴﻪ : ﺍﻟﻠﻬﻢ ﺻﻞ ﻭﺳﻠﻢ ﻋﻠﻴﻪ ..
ﻋﻤﺎﺩ : ﻋﻠﻴﻪ ﺍﻟﺼﻼﺓ ﻭﺍﻟﺴﻼﻡ ..
ﻏﺎﻟﻴﻪ ﺑﺈﺑﺘﺴﺎﻣﻪ : ﺧﻞ ﻧﺨﺶ ﻧﺠﻴﺒﻠﻚ ﺑﻄﺎﻧﻴﻪ ..
ﻋﻤﺎﺩﺍﺑﺘﺴﻢ : ﺗﻤﺎﻡ ..
ﺧﺸﺖ ﻏﺎﻟﻴﻪ ..
ﻭﻫﻮ ﻗﻌﺪ ﻭﺍﻗﻒ ﻓﻲ ﺍﻟﺒﺎﺏ ﻳﺴﺘﻨﻰ .. ﻉ ﺟﻴﺔ ﻣﺤﻤﺪ ..
ﻣﺤﻤﺪ ﺣﻂ ﻳﺪﻩ ﻉ ﻛﺘﻒ ﻋﻤﺎﺩ : ﻗﺎﻋﺪ ﺗﺮﺍﺟﻲ ﻓﻲ ﺍﻟﺒﻄﺎﻧﻴﻪ ..
ﻋﻤﺎﺩ : ﺍﻳﻪ .. ﻭﺣﺪﻩ ﻣﺎﺗﺴﺪﻧﻴﺶ ﻣﻊ ﺍﻟﺼﻘﻊ ﺍﻟﻠﻲ ﻋﻨﺪﻛﻢ ..
ﻣﺤﻤﺪ ﺑﻀﺤﻜﻪ : ﺻﺪﻗﺖ ... ﺍﺑﺘﺴﻢ ﻭﻗﺎﻝ .. ﻟﻌﻨﺪ ﺗﻮﺍ ﻣﺶ ﻣﺼﺪﻕ ﻳﺎﺭﺍﺟﻞ ﻭﺍﻟﻠﻪ ﺣﺘﻰ ﺍﻟﻨﻮﻡ ﻃﺎﺭ ...
ﻋﻤﺎﺩ ﺑﻀﺤﻜﻪ : ﺳﻴﻢ ﺳﻴﻢ ..
ﻓﻨﻔﺲ ﺍﻟﻠﺤﻈﻪ ...
ﻛﺎﻧﺖ ﺭﺯﺍﻥ ﻣﺘﻮﺟﻬﻪ ﻟﻠﺒﻮﺍﺑﻪ ﺑﺶ ﺑﺘﻄﻠﻊ ﺗﺮﻭﺡ ..
ﻭﺻﻠﺖ ﻓﻴﻬﺎ ..
ﻭﻛﻴﻒ ﺑﺘﻄﻠﻊ ..
ﻣﺤﻤﺪ ﺑﺤﺪﻩ : ﺑﻴﺮﻭﺡ ﺑﻴﻚ ﺗﻮﻓﻴﻖ ﻏﺪﻭﺓ ..
ﺗﺠﺎﻫﻠﺘﻪ ﻭﻛﻤﻠﺖ ﻃﺮﻳﻘﻬﺎ
🍃 ﻣﺎﺗﻜﻠﻤﺶ ﻓﻴﻪ ﻣﻦ ﻳﻮﻡ ﺿﺮﺑﻬﺎ 🍃
ﻋﻤﺎﺩ ﻗﺮﻥ ﺣﻮﺍﺟﺒﻪ ﻭﻫﻮ ﻳﺸﻮﻓﻠﻬﺎ ..
ﻗﺪﻣﻠﻬﺎ ﻣﺤﻤﺪ ﺑﺴﺮﻋﻪ ﻭﺷﺪﻫﺎ ﻣﻦ ﺫﺭﺍﻋﻬﺎ ﺑﺎﻟﻘﻮﺓ : ﻓﻤﻦ ﻧﻜﻠﻢ ﻳﺎﺣﻴﻮﺍﻧﻪ ..
ﺧﻠﻌﺔ ﺭﺯﺍﻥ ﻭﺧﻮﻓﻬﺎ ﺍﻟﺒﺎﻳﻨﺎﺕ ﻓﻌﻴﻮﻧﻬﺎ ..
ﺧﻠﺖ ﻋﻤﺎﺩ ﺗﻠﻘﺎﺋﻴﺎ ﻳﻤﺸﻲ ﻳﻔﻜﻬﺎ ﻣﻦ ﻣﺤﻤﺪ ﻭﻳﺤﻄﻬﺎ ﻭﺭﺍﻩ ..
ﻣﺤﻤﺪ ﺑﻌﺼﺒﻴﻪ : ﻋﻤﺎﺩ ﺣﻮﻝ ..
ﻋﻤﺎﺩ : ﻣﺤﻤﺪ ﻏﻠﻂ ﻫﻜﻲ ﺭﺍﻩ ..
ﻣﺤﻤﺪ : ﻗﻠﻴﻠﺔ ﺍﻷﺩﺏ ﻫﺪﻱ ﻣﺎﺗﺒﻲ ﺍﻻ ﻃﺮﻳﺤﻪ ﺑﺎﺍﺍﻫﻴﻪ ..
ﺭﺯﺍﻥ : ﺍﻧﻲ ﻣﺎﺩﺭﺕ ﺷﻲ ..
ﻋﻤﺎﺩ : ﻭﺍﻟﻠﻪ ﻣﺎﻙ ﻣﺎﺳﻬﺎ ﻳﺎﻣﺤﻤﺪ ..
ﻣﺤﻤﺪ ﺟﻲ ﺑﻴﺸﺪﻫﺎ ﻣﻦ ﻭﺭﺍ ﻋﻤﺎﺩ ..
ﻋﻤﺎﺩ ﺷﺪ ﻳﺪﻩ ﻭﺩﻓﻬﺎ : ﺍﺿﺮﺑﻨﻲ ﻗﺒﻞ ..
ﻣﺤﻤﺪ ﺷﺒﺤﻠﻪ ﺑﺤﺪﻩ .. ﺑﻌﺪﻳﻦ ﻟﻒ ﻭﻣﺸﻲ ﺑﻐﻀﺐ ..
ﺍﻟﺘﻔﺖ ﻋﻤﺎﺩ ﻟﺮﺯﺍﻥ : ﻋﻼﺵ ﺗﺘﺼﺮﻓﻲ ﻫﻜﻲ ﺑﺲ ..
ﺭﺯﺍﻥ ﻭﻋﻴﻮﻧﻬﺎ ﻣﻠﻴﺎﻧﺎﺕ ﺩﻣﻮﻉ : ﺿﺮﺑﻨﻲ ﻛﻒ ﻭﺍﻧﻲ ﺍﻟﻠﻲ ﻳﻀﺮﺑﻨﻲ ﻧﻜﺮﻫﻪ ...
ﻋﻤﺎﺩ : ﻫﺪﺍ ﻋﻤﻚ ﻳﻀﺮﺑﻚ ﻭﻳﻀﺮﺏ ﻋﻠﻴﻚ ... ﻳﺎﻣﺎ ﺍﻧﻀﺮﺑﻨﺎ ﻣﻦ ﻋﻤﺎﻣﻨﺎ .. ﺍﻗﺴﻢ ﺑﺎﻟﻠﻪ ﻋﻤﻲ ﺍﻟﻜﺒﻴﺮ ﻣﺮﺓ ﻣﻠﺤﻨﻲ ﻃﺮﻳﺤﻪ ﺑﺎﻟﺴﺒﺘﻪ ﻭﻳﻦ ﻣﺎﻳﺠﻲ ﻉ ﺧﺎﻃﺮ ﻛﺴﺮﺕ ﻣﺮﺵ ﺳﻴﺎﺭﺗﻪ ... ﺿﺤﻚ ﻭﻗﺎﻝ .. ﻫﻮ ﺍﻧﻲ ﻧﺴﺘﺎﻫﻞ ﺍﻟﺤﻖ ...
ﺭﺯﺍﻥ ﻏﻠﺒﺘﻬﺎ ﺍﻟﻀﺤﻜﻪ ..
ﻋﻤﺎﺩ ﺑﻀﺤﻜﻪ : ﻭﺍﻟﻠﻪ ﻧﺴﻴﺖ ﻭﺟﻌﻬﺎ .. ﻭﻗﻌﺪﺕ ﻭﻳﻦ ﻧﺬﻛﺮﻫﺎ ﺍﻧﻲ ﻭﻳﺎﻩ ﻧﻀﺤﻜﻮﺍ ...
ﺭﺯﺍﻥ ﺷﺒﺤﺘﻠﻪ : ﻫﺪﺍﻛﺎ ﺍﻧﺖ ﻣﺶ ﺍﻧﻲ ..
ﻋﻤﺎﺩ ﺑﺮﻓﻌﺔ ﺣﺎﺟﺐ : ﺻﺪﻗﺘﻲ ﺷﻦ ﻳﺠﻴﺐ ﺍﻟﻠﻔﻌﻪ ﻟﻠﺼﻘﺮ ..
ﺭﺯﺍﻥ ﺑﻀﺤﻜﻪ ﺗﻬﻜﻤﻴﻪ : ﻣﺎﻭﺍﻛﻞ ﻓﺮﻭﺣﻚ ﻣﻘﻠﺐ ..
ﻋﻤﺎﺩ ﻗﺮﺏ ﺷﻮﻳﻪ ﻭﻫﻮ ﻳﺸﻮﻑ ﻟﻌﻴﻮﻧﻬﺎ : ﺑﺎﺍﻟﻠﻪ !
ﺭﺯﺍﻥ ﺗﻠﺨﺒﻄﺖ ﻟﻴﻦ ﺧﻼﺹ ..
ﺩﻓﺎﺗﻪ ﻭﻫﺮﺑﺖ ﺗﺠﺮﻱ ..
ﻋﻤﺎﺩ : ﻫﻬﻬﻬﻬﻬﻬﻬﻬﻬﻬﻬﻪ ﺣﻲ ﻛﻴﻒ ﺗﺠﺮﻱ ﺍﻟﻤﻠﻌﻘﻪ ...
ﻫﻲ ﻣﺠﺮﺩ ﻣﺎﺍﺩﺭﻗﺖ .. ﺍﺭﺗﺴﻤﺖ ﻉ ﻭﺟﻬﻬﺎ ﺍﺑﺘﺴﺎﻣﻪ ..
ﻭﻗﻔﺖ ..
ﻭﻗﻌﺪﺕ ﺗﺘﺴﺤﺐ .. ﻭﻳﺪﻭﺏ ﺑﻴﻨﺖ ﺭﺍﺳﻬﺎ ﺑﺶ ﺗﺸﻮﻓﻪ ..
ﻟﻘﺎﺗﻪ ﻭﺍﻗﻒ ﻉ ﻏﺎﻟﻴﻪ ﻭﻳﺎﺧﺪ ﻣﻨﻬﺎ ﻓﻲ ﺍﻟﺒﻄﺎﻧﻴﻪ ..
ﻋﻤﺎﺩ : ﻧﺤﺴﺎﺑﻚ ﺗﺠﻴﺒﻲ ﻓﻴﻬﺎ ﻣﻦ ﺍﻟﻤﺼﻨﻊ ..
ﻏﺎﻟﻴﻪ ﺑﻀﺤﻜﻪ : ﺍﻟﺒﻄﺎﻃﻴﻦ ﻛﻠﻬﻦ ﺧﺪﻭﻫﻦ ﺧﻮﺍﻟﻚ .. ﻫﺪﻱ ﻣﺎﻟﻘﻴﺘﻬﺎ ﻟﻴﻦ ﺧﻠﻴﻨﻲ ﻭﻧﺨﻠﻴﻚ ..
ﺧﺪﺍﻫﺎ ﻣﻨﻬﺎ ﻭﻫﻮ ﻳﻀﺤﻚ : ﺗﻌﺒﻨﺎﻙ ..
ﻏﺎﻟﻴﻪ ﺑﺈﺑﺘﺴﺎﻣﻪ : ﺣﻨﻲ ﺍﻟﻠﻲ ﺗﻌﺒﻨﺎﻙ ..
ﺷﺒﺤﻠﻬﺎ ﺑﺘﻀﻴﻴﻘﺔ ﻋﻴﻮﻥ ..
ﻣﻂ ﺷﻮﺭﺍﺑﻪ ﺑﺈﺯﺩﺭﺍﺀ .. ﻭﻣﺸﻲ ﻭﻫﻮ ﻳﺤﺮﻙ ﻓﺮﺍﺳﻪ ﺍﻳﻤﻴﻦ ﻭﻳﺴﺎﺭ ..
ﻏﺎﻟﻴﻪ : ﻫﻬﻬﻬﻬﻬﻬﻬﻬﻬﻪ ..
ﻭﻣﺸﺖ ﺧﺸﺖ ..
ﺭﺯﺍﻥ ﻛﺎﻧﺖ ﺗﻀﺤﻚ .. ﻗﻌﺪﺕ ﻣﻌﺎﻩ ﺑﻌﻴﻮﻧﻬﺎ ﻟﻴﻦ ﺍﺧﺘﻔﻲ ..
ﺗﻠﻘﺎﺋﻴﺎ ﺗﻨﻬﺪﺕ ..
ﻭﻋﻴﻮﻧﻬﺎ ﺗﻌﺒﻮﺍ ﺩﻣﻮﻉ ... ﺗﻨﻬﺪﺕ ﻣﻦ ﺟﺪﻳﺪ ...
ﺑﻌﺪﻳﻦ ﺗﻠﻔﺘﺖ ﺍﻟﻘﺪﺍﻡ ...
ﻏﻤﻀﺖ ﻋﻴﻮﻧﻬﺎ ﻭﻫﻲ ﺗﺤﺎﻭﻝ ﺗﺘﻤﺎﻟﻚ ﻣﺸﺎﻋﺮﻫﺎ ﺍﻟﻠﻲ ﻋﻤﺎﺩ ﻗﺎﻋﺪ ﻳﻌﺰﻑ ﻉ ﺃﻭﺗﺎﺭﻫﻢ ﺍﻟﺤﺴﺎﺳﻪ ..
ﻓﺘﺤﺘﻬﻢ .. ﻭﻣﺸﺖ ﻛﻤﻠﺖ ﻃﺮﻳﻘﻬﺎ ﻟﻠﺤﻮﺵ ﻭﻗﻠﺒﻬﺎ ﺍﻟﺼﻐﻴﺮﻭﻥ ﻣﺎﺑﻄﻠﺶ ﻗﻮﺓ ﻓﻲ ﺍﻟﻨﺒﺾ ...💓
🍁🍁🍁🍁🍁🍁
ﺍﻟﺴﺎﻋﻪ 2:00 ﻟﻴﻼ ...
ﻣﻘﻌﻤﺰ ﻭﻫﻮ ﺷﺎﺩ ﺗﻠﻴﻔﻮﻧﻪ ﻭﻳﺸﻮﻓﻠﻪ ..
ﻧﺠﻢ ﺍﻟﺪﻳﻦ : ﺧﻠﺘﻨﻲ ﻧﺤﻄﻬﺎ ﻓﺮﺍﺳﻲ ... ﻭﺭﺍﻙ ﻭﺭﺍﻙ ﻟﻴﻦ ﺗﺮﺩﻱ ..
ﺿﺮﺏ ﻉ ﺍﻟﺮﻗﻢ ...
ﻭﺣﻄﻪ ﻉ ﻭﺫﻧﻪ ...
ﻋﻄﺎﻩ ﻣﺸﻐﻮﻝ ..
ﻧﺠﻢ ﺍﻟﺪﻳﻦ ﻗﺮﻥ ﺣﻮﺍﺟﺒﻪ : ﺍﻭﻝ ﻣﺮﺓ ﻳﻜﻮﻥ ﻣﺸﻐﻮﻝ ﻓﻮﻗﺖ ﺯﻱ ﻫﺪﺍ ..
ﻧﺰﻝ ﻋﻴﻮﻧﻪ ﻟﺮﺟﻠﻪ ﻟﻘﺎﻫﺎ ﺗﻬﺰ ... ﺭﻓﻊ ﺣﻮﺍﺟﺒﻪ ﻭﻗﺎﻝ : ﺧﻴﺮ ﺑﻠﻲ ﺃﻣﻲ ﺍﻧﻲ؟؟ ..!!!
.......
ﻳﺎﻣﻬﺒﻮﻟﻪ ﻣﺎﺗﺤﻠﻤﻴﺶ ﻭﺣﻖ ﺍﻟﻠﻪ ﺣﻖ .. ﻏﻴﺮ ﺧﻠﻴﻨﻲ ﻧﺮﻗﺪ ﺗﺮﺑﺤﻲ ﻭﺭﺍﻳﺎ ﻧﻮﺿﻪ ﻣﻦ ﻓﺠﺮ ﺭﺑﻲ ..
ﺭﺍﻧﻴﺎ ﺿﺤﻜﺖ ﺑﻌﺪﻳﻦ ﻗﺎﻟﺖ : ﺑﺎﻫﻲ ﺑﺎﻟﻠﻪ ﻋﻠﻴﻚ ﺭﺍﻙ ﺗﻨﺴﻲ ﺗﻘﻮﻟﻲ ﻟﻌﻤﺎﺩ ﺍﻟﻠﻲ ﻗﺘﻠﻚ ﻋﻠﻴﻪ ..
ﻏﺎﻟﻴﻪ ﻭﻫﻲ ﺷﺒﻪ ﺑﺘﺮﻗﺪ ﺧﻼﺹ : ﺑﺎﻩ .. ﺑﺎﻩ ..
ﺭﺍﻧﻴﺎ : ﻫﻬﻬﻬﻬﻪ .. ﺗﺼﺒﺤﻲ ﻉ ﺧﻴﺮ ﻳﺎﺍﺣﻠﻰ ﺧﺎﻟﻪ ﻓﺎﻟﻌﺎﻟﻢ ..
ﻏﺎﻟﻴﻪ ﺿﺤﻜﺖ : ﺑﺎﻩ .. ﻋﺪﻱ ﺍﺭﻗﺪﻱ .... ﻭﺻﻜﺮﺕ ﻋﻠﻴﻬﺎ ... ﻭﺭﻗﺪﺕ ..
ﺭﺍﻧﻴﺎ : ﻫﻬﻬﻬﻬﻬﻬﻪ .. ﺍﺭﻗﺪﻱ ﻗﺎﻟﺘﻠﻲ .. ﻭﺍﻟﻠﻪ ﻣﺎﻧﻲ ﺭﺍﻗﺪﻩ ﻟﻴﻦ ﻳﺠﻲ ﺍﻟﻴﻮﻡ ﺍﻟﺘﺎﻧﻲ ﻭﻧﻌﺮﻑ ﺍﺧﺒﺎﺭﻩ ﻛﻠﻬﺎ ... ﺍﺍﺍﻩ ﻳﺎﻷﺻﻔﺮ ... ﺯﻋﻤﻪ ﺷﻦ ﺩﺭﺕ ﺍﻟﻤﺪﺓ ﻫﺎﺩﻱ ﻛﻠﻬﺎ ...
ﺩﻣﻮﻋﻬﺎ ﻧﺰﻟﻮﺍ ...
ﺣﻄﺖ ﺍﻳﺪﻳﻬﺎ ﻉ ﻓﻤﻬﺎ ... ﻭﻗﻌﺪﺕ ﺗﺒﻜﻲ ..
ﻭﺭﺑﺎﺏ ﺍﻟﻠﻲ ﻋﺎﻃﻴﺘﻬﺎ ﺑﺎﻟﻈﻬﺮ .. ﺗﻨﻬﺪﺕ ﺑﺄﻟﻢ
🍃 ﺻﺢ ... ﻛﻴﻒ ﺷﻜﻞ ﺣﻴﺎﺗﻪ ﻛﺎﻥ ﺍﻟﻔﺘﺮﺓ ﻫﺎﺩﻱ ﻛﻠﻬﺎ ﻭﺍﻻﻫﻢ ﻣﻦ ﻫﻜﻲ .. ﻫﻞ ﻳﺎﺗﺮﻯ ﺣﻴﻄﻠﻊ ﺑﺎﻟﺴﺎﻫﻞ؟ 🍃
......
ﺭﻥ ﺗﻠﻴﻔﻮﻧﻬﺎ ﻣﺮﺓ ﺗﺎﻧﻴﻪ ..
ﻏﺎﻟﻴﻪ ﻓﺘﺤﺖ ﻋﻴﻮﻧﻬﺎ ﺑﺎﻟﺴﻴﻒ : ﺍﻓﻔﻔﻒ .. ﻳﺎﺭﺍﻧﻴﺎ .. ﺭﺑﻲ ﻳﻬﺪﻳﻚ ..
ﺧﺪﺕ ﺍﻟﺘﻠﻴﻔﻮﻥ .. ﺑﺎﻥ ﻋﻠﻴﻬﺎ ﺭﻗﻢ ﺑﺲ ..
ﻃﺎﺭﺗﻠﻬﺎ ﻟﻴﻦ ﺧﻼﺹ ..
ﻭﻃﻔﺢ ﺍﻟﻜﻴﻞ ..
ﻓﺘﺤﺖ ﻋﻠﻴﻪ ﻭﺍﻧﻔﺠﺮﺕ ﻓﻴﻪ : ﺷﻨﻮ ﺍﻧﺖ ﺷﻨﻮ ﻣﺎﻋﻨﺪﻙ ﻣﺎﺩﻳﺮ ﻏﻴﺮ 24 ﺳﺎﻋﻪ ﻭﺍﻧﺖ ﺷﺎﺩ ﺍﻟﻨﻘﺎﻝ ﻭﺑﺲ .. ﺗﺤﺸﻢ ﻉ ﻭﺟﻬﻚ ﻭﻳﺎﺳﺮ ﻭﻗﺎﺣﻪ ﻭﻗﻠﺔ ﺃﺩﺏ ..
ﻭﺻﻜﺮﺕ ﻋﻠﻴﻪ ﻭﺻﻜﺮﺕ ﺗﻠﻴﻔﻮﻧﻬﺎ ﻣﺮﺓ ﻭﺣﺪﻩ ..
ﻭﺭﻗﺪﺕ ﻭﻫﻲ ﻣﻌﺼﺒﻪ ..
....
ﻋﻨﺪﻩ ﻫﻮ ..
ﻧﺠﻢ ﺍﻟﺪﻳﻦ : ﻫﻬﻬﻬﻬﻬﻬﻬﻬﻬﻪ ... ﺻﻮﺗﻬﺎ ﻓﻀﻴﻊ ﻓﻀﻴﻊ .. ﻭﻟﻜﻨﺘﻬﺎ ﻋﺴﻞ .. ﻣﺶ ﻋﺎﺩﻳﻪ ﺍﻟﺒﻨﺖ ﻫﺎﺩﻱ ..
ﺷﺒﺢ ﻟﻠﺘﻠﻴﻔﻮﻥ ﻭﻗﺎﻝ .. ﻭﺭﺏ ﺍﻟﻌﺰﺓ ﻣﺎﻓﺎﻳﺘﻚ ...
🍁🍁🍁🍁🍁🍁
ﺗﺎﻧﻲ ﻳﻮﻡ ....
ﻣﺼﺮﺍﺗﻪ 💓...
ﻃﻠﻌﻮﺍ ﺍﻟﺘﻼﺗﻪ ﻣﻦ ﻣﻜﺘﺐ ﺍﻣﺮ ﺍﻟﻤﻌﺘﻘﻞ ..
: ﺳﺎﻣﺤﻨﺎ ﻫﺪﻱ ﺗﺪﺍﺑﻴﺮ ﻻﺯﻣﻪ ..
ﻋﻤﺎﺩ : ﻣﺎﻓﻴﺶ ﻣﺸﻜﻠﻪ ..
ﺭﺍﻓﻊ : ﺣﺘﻰ ﺍﻧﻲ ﻓﺘﺸﻮﻧﻲ ﺍﻭﻝ ﻣﺮﺓ ﺟﻴﺖ ﻓﻴﻬﺎ ﻫﻨﻲ ﻧﺰﻭﺭ ﻭﺍﺣﺪ ﻧﻌﺮﻓﻪ ..
ﻋﻤﺎﺩ : ﻳﺎﻭﺩﻱ ﻣﺎﻓﻴﺶ ﻣﺸﻜﻠﻪ .. ﻏﻴﺮ ﺑﺎﻟﻠﻪ ﺍﺳﺘﻌﺠﻠﻮﻟﻲ ﺷﻮﻳﻪ ..
: ﺗﻤﺎﻡ ﺗﻌﺎﻝ ﻣﻌﺎﻱ ..
ﺧﺪﻱ ﻧﻔﺲ ﻋﻤﺎﺩ ﻭﻣﺸﻲ ﻣﻊ ﺍﻵﻣﺮ ...
ﻭﻗﻌﺪ ﺭﺍﻓﻊ ﻳﺴﺘﻨﻰ ..
...
ﻭﺻﻠﻮﺍ ﻟﻠﻤﻜﺎﻥ ﺍﻟﻠﻲ ﺑﺘﺼﻴﺮ ﻓﻴﻪ ﺍﻟﻤﻘﺎﺑﻠﻪ ..
: ﻣﺶ ﺍﻛﺜﺮ ﻣﻦ 10 ﺩﻗﺎﻳﻖ ..
ﻋﻤﺎﺩ ﻫﺰ ﺭﺍﺳﻪ ﺑﺈﻳﺠﺎﺏ .. ﻭﻣﻦ ﺩﺍﺧﻠﻪ ﻣﻠﻬﻮﻑ ﻉ ﺍﻵﺧﺮ ..
ﻓﺘﺢ ﺍﻟﺒﺎﺏ ..
ﺍﺷﺮ ﺍﻷﻣﺮ ﻟﻮﺍﺣﺪ ﻣﻦ ﺍﻟﺤﺮﺱ ﺍﻟﻠﻲ ﻛﺎﻧﻮﺍ ﺩﺍﺧﻞ ﻳﻄﻠﻊ ..
ﻃﻠﻊ ...
: ﺗﻔﻀﻞ ..
ﺧﺪﻱ ﻧﻔﺲ ..
ﻭﺧﺶ ...
ﺑﻴﻦ ﺭﺍﺳﻪ ... ﺑﻌﺪﻳﻦ ﺯﺍﺩ ﺧﺶ ﺩﺍﺧﻞ ..
ﺷﺎﻑ ﻭﺍﺣﺪ ﻻﺑﺲ ﻓﺎﻧﻴﻠﻴﺎ ﺻﻮﻑ ﺳﻮﺩﺍ .. ﻭﺳﺮﻭﺍﻝ ﺗﻮﺗﻪ ﺭﺻﺎﺻﻲ ..
ﻣﻠﺘﺤﻲ .. ﻭﺷﻌﺮﻩ ﻛﺜﻴﻒ ..
ﺷﺎﻑ ﻟﻌﻴﻮﻧﻪ ﺍﻟﻤﻠﻮﻧﻪ ﻟﻘﺎﻫﻢ ﻣﻠﻴﺎﻧﺎﺕ ﺩﻣﻮﻋﻪ ..
ﺳﻤﻌﻪ ﻗﺎﻝ ..
" ﻋﻤﺎﺩ .."!
ﻣﺸﺎﻟﻪ ﻃﻮﻝ ..
ﻭﺣﻀﻨﻪ ﺑﻘﻮﺓ ...
ﻭﺍﻧﻬﺎﺭ ﺑﺎﻟﺒﻜﻲ ...
ﺭﻣﺰﻱ ﻣﺎﺗﺤﻤﻠﺶ ﺣﺘﻰ ﻫﻮ ﺍﻧﻬﺎﺭ ﻣﻌﺎﻩ ..
ﻃﻠﻊ ﺍﻟﺮﺍﺟﻞ ﻭﺧﻼﻫﻢ ﻭﻗﻌﺪ ﻭﺍﻗﻒ ﻗﺪﺍﻡ ﺍﻟﺒﺎﺏ ...
🍁🍁🍁🍁🍁
ﻣﺎﻧﺬﻛﺮ ﺷﻲ ﻣﻦ ﺑﻌﺪ ﻣﺎﺍﻧﺼﺒﺖ .. ﻏﻴﺮ ﻟﻤﺎ ﺣﻠﻴﺖ ﻋﻴﻮﻧﻲ ﻓﻲ ﺍﻟﻤﺴﺘﺸﻔﻰ ..
ﻋﻤﺎﺩ : ﻗﺼﺪﻙ ﺩﺍﺭﻭﻟﻚ ﺍﻟﻌﻤﻠﻴﻪ ﻫﻨﻲ ..
ﺭﻣﺰﻱ : ﻫﺪﻯ ﺍﻟﻠﻲ ﻗﺎﻟﻬﻮﻟﻲ ﻭﺍﺣﺪ ﻣﻨﻬﻢ .. ﺍﻧﻲ ﺍﻟﻠﻲ ﻣﺶ ﻓﺎﻫﻤﻪ ﻟﺘﻮﺍ ﺷﻦ ﺍﻟﻠﻲ ﺧﻼﻫﻢ ﻳﺴﺎﻋﺪﻭﻧﻲ ﻣﺶ ﻋﺎﺭﻑ ..
ﻋﻤﺎﺩ : ﺗﺬﻛﺮﻩ ﻃﺎﺭﻕ ...
ﺭﻣﺰﻱ : ﻣﻦ ﻃﺎﺭﻕ .. ﻏﻴﺮ ﺩﻗﻴﻘﻪ .. ﺍﻟﺸﺮﻗﺎﻭﻱ ..
ﻋﻤﺎﺩ : ﺍﻳﻪ ... ﻛﺎﻥ ﻳﻤﺸﻂ ﻓﻲ ﺍﻟﻤﻜﺎﻥ ﺍﻟﻠﻲ ﻛﻨﺖ ﻓﻴﻪ ﻟﻤﺎ ﺭﺍﻙ ﻋﺮﻓﻚ ﻃﻮﻝ ... ﻭﺗﺮﺟﺎ ﺍﻟﻠﻲ ﻣﻌﺎﻩ ﻳﺴﻌﻔﻮﻙ .. ﻭﻫﻤﺎ ﺧﺪﻭﺍ ﺑﺨﺎﻃﺮﻩ ﻭﺳﻌﻔﻮﻙ ﻃﻮﻝ ... ﻗﺎﻟﻲ ﻭﺍﺣﺪ ﺳﻤﺎﻩ ﻭﺍﺋﻞ ﺗﻼﻗﻴﺖ ﺍﻧﻲ ﻭﻳﺎﻩ ﻟﻤﺎ ﻗﻌﺪﺕ ﻧﺪﻭﺭ ﻭﺭﺍﻙ .. ﻗﺎﻟﻲ ﻃﺎﺭﻕ ﻫﺪﺍ ﻣﺎﺧﻼﺷﻲ ﺑﻜﻞ ﻟﻴﻦ ﺍﻃﻤﻦ ﻉ ﺣﺎﻟﺘﻪ ﺑﻌﺪﻳﻦ ﻭﻻ ﻟﻠﺸﺮﻕ ..
ﺭﻣﺰﻱ ﺗﻨﻬﺪ ﻭﻗﺎﻝ : ﻣﺶ ﻋﺎﺭﻑ ﺷﻦ ﻧﻘﻮﻝ ..
ﻋﻤﺎﺩ : ﺑﺎﺭﻙ ﺍﻟﻠﻪ ﻓﻴﻪ ﻭﺭﺑﻲ ﻳﻮﻗﻔﻠﻪ ﺍﻟﻨﺎﺱ ﺍﻟﻠﻲ ﺯﻳﻪ ..
ﻃﻖ ﺍﻟﺒﺎﺏ ..
ﻣﻂ ﻋﻤﺎﺩ ﺷﻮﺍﺭﺑﻪ ﺩﺍﺧﻞ ﺑﻀﻴﻖ؛ﺍﺳﻤﻊ ﺭﻣﺰﻱ ﺍﻧﻲ ﺑﻨﺤﺎﻭﻝ ﺟﻬﺪﻱ ﺍﻟﻠﻲ ﻧﻘﺪﺭ ﻋﻠﻴﻪ ﺑﻨﺪﻳﺮﻩ ﺑﺶ ﻳﻄﻠﻌﻮﻙ ..
ﺭﻣﺰﻱ ﺑﺈﺑﺘﺴﺎﻣﻪ : ﻋﺎﺭﻑ ﺍﻟﻤﻮﺿﻮﻉ ﺻﻌﺐ ﻭﺍﺟﺪ ﻣﺎﺗﻜﻠﻔﺶ ﻧﻔﺴﻚ ﻓﻮﻕ ﻃﺎﻗﺘﻬﺎ ..
ﻋﻤﺎﺩ : ﻣﺎﺩﻭﺭﺵ .. ﺍﻥ ﺷﺎﺀ ﺍﻟﻠﻪ ﻣﺶ ﺣﻄﻮﻝ ﻫﻨﻲ ..
" ﺧﻼﺹ ﻳﺎﺧﻮﻱ .."
ﻋﻤﺎﺩ : ﺭﻣﺰﻱ ﺑﻨﻘﻮﻟﻚ .. ﺿﺤﻚ .. ﺭﺍﻧﻴﺎ ﻗﺎﻟﺘﻠﻚ ﺍﻟﺨﺎﺗﻢ ﻣﺎﺣﻮﻟﺘﺎﺵ ﻣﻦ ﺻﺒﻌﻲ ..
ﺍﺑﺘﺴﻢ ﻭﻧﺰﻟﺖ ﻣﻦ ﻋﻴﻨﻪ ﺩﻣﻌﻪ ﻃﻮﻝ ﻣﺴﺤﻬﺎ .. ﺑﻌﺪﻳﻦ ﺿﺤﻚ ﻭﻗﺎﻝ : ﻗﻮﻟﻠﻬﺎ ... ﻋﻤﺮﻙ ﻣﺎﻏﺒﺘﻲ ﻋﻦ ﺑﺎﻟﻲ .. ﺧﻠﻴﻨﻲ ﺩﻳﻤﺎ ﻓﺒﺎﻟﻚ ..
ﻋﻤﺎﺩ ﺿﺤﻚ ﻭﻫﺰ ﺭﺍﺳﻬﺎ ﺑﺈﻳﺠﺎﺏ ..
ﺑﻌﺪﻳﻦ ﺣﻀﻨﻪ ﺑﻘﻮﺓ ...
ﺧﺶ ﺍﻟﺮﺍﺟﻞ ..
ﻫﻤﺎ ﺗﺒﺎﻋﺪﻭﺍ ...
ﺷﺪ ﻋﻤﺎﺩ ﻉ ﻛﺘﻒ ﻋﻤﺎﺩ ﺑﻘﻮﺓ ..
ﻓﻴﺴﻊ ﻣﺎﺣﻮﻝ ﻳﺪﻩ ﻭﻃﻠﻊ ﻃﻮﻝ ..
ﻭﻭﺭﺍﻩ ﺍﻟﺮﺍﺟﻞ ..
ﻭﺧﺶ ﺑﻌﺪﻩ ﻭﺍﺣﺪ ..
ﺭﻣﺰﻱ ﺷﺒﺤﻠﻪ ﺑﻜﺒﺮ ..
ﺷﺪﻩ ﻣﻦ ﺫﺭﺍﻋﻲ ﻭﻃﻠﻌﻪ ...
ﻭﺭﻣﺰﻱ ﺭﺍﻓﻊ ﺭﺍﺳﻪ ﺑﻜﻞ ﻋﺰﺓ 💕....
🍁🍁🍁🍁🍁🍁🍁
ﻣﻘﻌﻤﺰﺓ ﻓﺎﻟﺪﺍﺭ ﻭﻫﻲ ﺷﺎﺩﻩ ﻓﻴﺪﻫﺎ ﺍﻟﺘﻠﻴﻔﻮﻥ ﻭﻫﻲ ﺗﻮﻣﻲ ...
ﺗﺸﻮﻓﻠﻪ ﻭﺗﺴﺘﻨﻰ ..
ﻭﺃﻣﻬﺎ ﺗﺸﻮﻓﻠﻬﺎ ﺑﺨﻮﻑ ...
ﺭﺍﻧﻴﺎ ﻣﺎﺭﻗﺪﺗﻬﺎ ﻏﻤﻀﻪ ....
ﻭﺣﺎﻟﺘﻬﺎ ﻫﺎﺩﻱ ﻣﺨﻮﻓﻪ ﺍﻣﻬﺎ ﻋﻠﻴﻬﺎ ...
🍁🍁🍁🍁🍁
ﻧﺰﻟﺖ ﻣﻦ ﺳﻴﺎﺭﺓ ﺧﻮﻫﺎ ..
ﺗﻮﻓﻴﻖ : ﺍﻭﻝ ﻣﺎﺗﻮﺻﻞ ﺍﻷﺧﺒﺎﺭ ﻋﻦ ﺭﻣﺰﻱ ﻛﻠﻤﻴﻨﻲ ..
ﺭﺯﺍﻥ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺻﻜﺮﺕ ﺑﺎﺏ ﺍﻟﺴﻴﺎﺭﺓ ..
ﻭﻣﺸﺖ ﻭﻫﻮ ﻣﺸﻲ ﻃﻮﻝ ..
ﻭﺻﻠﺖ ﻓﺎﻟﺪﺭﻭﺝ ..
ﺭﻛﺒﺖ ﺗﺠﺮﻱ ...
ﻭﺧﺸﺖ ﻟﻠﺤﻮﺵ ...
ﺭﺯﺍﻥ : ﻣﺎﺍﺍﺍﻣﺎﺍ ..
ﻋﺰﻳﺰﺓ ﻣﻦ ﺍﻟﺪﺍﺭ : ﻓﺎﻟﺪﺍﺭ ﻳﺎﺭﻭﺯﻱ ...
ﺣﻮﻟﺖ ﻛﻨﺪﺭﺗﻬا
ﻭﻣﺸﺖ ﻟﻠﺪﺍﺭ ...
ﻭﺻﻠﺖ ﻭﺧﺸﺖ : ﻫﺎﻩ ﻣﺎﻣﺎ ﻣﺎﺳﻤﻌﺘﻲ ﺷﻲ
ﺳﻌﻴﺪﻩ؛ﻟﻌﻨﺪ ﺗﻮﺍ ﻣﺎﺭﻭﺣﺶ ﻭﻟﺪ ﻋﻤﺘﻚ ..
ﻋﺰﻳﺰﺓ : ﺍﻛﻴﺪ ﻗﺮﻳﺐ ﻳﺮﻭﺡ ﻭﻳﺠﻴﺐ ﺍﺧﺒﺎﺭ ﺗﺒﺸﺮ ..
ﺳﻌﻴﺪﻩ : ﻳﺎﺍﺍﺍﺭﺏ ..
ﺳﻤﻌﻮﺍ ﺻﻮﺕ ﺳﻴﺎﺭﺓ ..
ﺭﺯﺍﻥ ﻃﻠﻌﺖ ﺗﺠﺮﻱ ...
ﻭﺻﻠﺖ ﻓﻲ ﺍﻟﻔﻢ ..
ﺷﺎﻓﺖ ﻋﻤﺎﺩ ﻧﺎﺯﻝ ﻣﻦ ﺍﻟﺴﻴﺎﺭﺓ ..
ﻧﺰﻝ ﺑﺮﻧﻮﺳﻪ ﺍﻟﻠﻲ ﻛﺎﻥ ﺣﺎﻃﻪ ﻉ ﺭﺍﺳﻪ ..
ﺻﻜﺮ ﺍﻟﺒﺎﺏ ..
ﺟﺎﻱ ﺑﻴﻤﺸﻲ ..
ﺷﺒﺤﻬﺎ ..
ﻭﻗﻒ ..
ﺭﻓﻊ ﻧﻈﺎﺭﺍﺗﻪ ..
ﻣﺮﺭ ﻧﻈﺮﻩ ﻋﻠﻴﻬﺎ ﻭﻫﻲ ﻻﺑﺴﻪ ﺣﻮﺍﻳﺞ ﺍﻟﻤﺪﺭﺳﻪ ﻭﺍﻟﺸﻨﻄﻪ ﻉ ﻇﻬﺮﻫﺎ .. ﻟﻜﻦ ﻣﻦ ﻏﻴﺮ ﺣﺠﺎﺏ ...
ﺗﻜﻨﻄﻰ ...
ﻃﻠﻌﺖ ﺍﻣﻬﺎ .. ﻧﺰﻟﺖ ﺗﺠﺮﻱ ﻟﻌﻤﺎﺩ ..
ﻭﻋﺰﻳﺰﺓ ﻗﻌﺪﺕ ﻭﺍﻗﻔﻪ ﻉ ﺭﺯﺍﻥ ..
ﻋﺰﻳﺰﺓ : ﻫﺪﻯ ﻭﻟﺪ ﻛﻔﺎﻳﻪ ﺍﻟﻜﺒﻴﺮ ..
ﺭﺯﺍﻥ ﻭﻫﻲ ﺗﺸﺒﺤﻠﻪ ﻛﻴﻒ ﻳﻜﻠﻢ ﻓﻲ ﺍﻣﻬﺎ ؛ﺍﻳﻪ ..
ﻋﺰﻳﺰﺓ : ﻋﻄﻴﻪ ﻧﻘﻄﻪ ﺷﻦ ﺍﻟﺴﻤﺎﺣﻪ ﻫﺪﻱ .
ﺭﺯﺍﻥ ﺷﺒﺤﺘﻠﻬﺎ ﺑﺤﺪﻩ : ﺍﺻﻐﺮ ﻣﻨﻚ ﺭﺍﻫﻮ ..
ﺿﺤﻜﺖ ﻋﺰﻳﺰﺓ ﺑﺈﺳﺘﻐﺮﺍﺏ ..
.....
ﺳﻌﻴﺪﻩ؛ﻳﻌﻨﻲ ﻛﻮﻳﺲ ﻣﺎﺑﻴﺸﻲ .. ﻛﺎﻣﻞ ﻣﺎﻧﺎﻗﺼﻪ ﺷﻲ ..
ﻉ ﺟﻴﺔ ﻓﺎﻃﻤﻪ ﺗﺠﺮﻱ ﻭﻭﺭﺍﻫﺎ ﻏﺎﻟﻴﻪ ..
ﻋﻤﺎﺩ ﺑﺈﺑﺘﺴﺎﻣﻪ : ﻭﺍﻟﻠﻪ ﺍﻟﻌﻈﻴﻢ ﺻﺎﻍ ﺳﻠﻴﻢ ﻭﺍﻗﻒ ﻗﺪﺍﻣﻲ ..
ﻭﻗﺎﻟﻲ .. ﻗﺪﻡ ﻛﺐ ﻉ ﺭﺍﺱ ﺳﻌﻴﺪﻩ .. ﻭﻭﺧﺮ .. ﺑﻮﺱ ﺭﺍﺱ ﺍﻣﻲ ..
ﺑﻌﺪﻳﻦ ﻛﺐ ﻉ ﺭﺍﺱ ﺣﻨﺎﻩ ... ﻭﺑﻮﺳﻠﻲ ﺭﺍﺱ ﺣﻨﺎﻱ ﻭﻗﻮﻟﻠﻬﺎ ﻋﻈﻢ ﺍﻟﻠﻪ ﺍﺟﺮﻙ ﻓﺴﻴﺪﻱ ..
ﻭﻛﺐ ﻉ ﺭﺍﺱ ﻏﺎﻟﻴﻪ .. ﻭﺑﻮﺳﻠﻲ ﺭﺍﺱ ﻏﺎﻟﻴﻪ ﻭﻗﻮﻟﻠﻬﺎ ﻗﺎﻝ ﺭﻣﺰﻱ ﻣﻌﺎﺵ ﺗﺒﻜﻲ ...
ﺣﻄﺖ ﻏﺎﻟﻴﻪ ﺍﻳﺪﻳﻬﺎ ﻉ ﻭﺟﻬﻬﺎ ﻭﻗﻌﺪﺕ ﺗﺒﻜﻲ ..
ﺣﻀﻨﻬﺎ ﻋﻤﺎﺩ؛ﺷﻦ ﻗﻠﻨﺎ ﺗﻮﺍ ﺣﻨﻲ ..
ﻓﺎﻃﻤﻪ ﺑﻌﻴﻮﻥ ﻣﺪﻣﻌﻪ : ﺑﺎﻫﻲ ﺍﻣﺘﻲ ﻳﻄﻠﻊ ..
ﻛﻠﻬﻢ ﺷﺒﺤﻮﻟﻪ ﺑﻠﻬﻔﻪ ..
ﻋﻤﺎﺩ ﻭﻫﻮ ﻳﻮﺯﻉ ﻓﻨﻈﺮﻩ ﻉ ﺍﻟﻤﻜﺎﻥ : ﺍﻟﺤﻜﺎﻳﻪ ﺗﺒﻲ ﺻﺒﺮ ...
ﺗﻼﺗﻪ ﻧﻈﺮﺗﻬﻢ ﺗﻐﻴﺮﺕ ﻟﻨﻈﺮﺓ ﺍﺣﺒﺎﻁ ..
ﻋﻤﺎﺩ ﻃﻠﻊ ﻏﺎﻟﻴﻪ ﻭﻗﺎﻟﻠﻬﻢ : ﻻﻻﻻﺍ .. ﺣﻨﻲ ﻧﺤﻤﺪﻭﺍ ﺭﺑﻲ .. ﺍﻟﻠﻲ ﻃﻠﻊ ﺣﻲ ﻭﻣﺎﻓﻴﻪ ﺷﻲ .. ﻭﺯﻱ ﻣﺎﺭﺑﻲ ﺑﺪﺍﻟﻨﺎ ﺑﺎﻟﻔﺮﺡ ﺣﻴﺘﻤﻪ ..
ﺗﻨﻬﺪﻭﺍ ﺳﻌﻴﺪﻩ ﻭﻏﺎﻟﻴﻪ ..
ﻋﻤﺎﺩ : ﻭﺍﻟﻠﻪ ﻣﺎﺿﺎﻝ ﺍﻻ ﻃﺎﻟﻊ ﻭﺍﻧﻲ ﺑﻨﺠﻴﺒﻪ ﻣﻦ ﻏﺎﺩﻱ ﻟﻬﻨﻲ ... ﺑﺎﻟﻨﻮﺑﻪ ... ﻭﺍﺫﻛﺮﻭﺍ ﻛﻼﻣﻲ
ﺍﺑﺘﺴﻤﻮﺍ .
ﻋﻤﺎﺩ : ﺍﻳﻮﻩ ﻫﻮ ﺩﻩ ...
ﺿﺤﻜﺖ ﺳﻌﻴﺪﻩ ﻭﻗﺎﻟﺖ : ﺭﺑﻲ ﻳﺨﻠﻴﻚ ﻷﻣﻚ ..
ﻋﻤﺎﺩ ﺑﺈﺑﺘﺴﺎﻣﻪ : ﻭﻟﻨﺴﻴﺒﺘﻲ ﺇﻥ ﺷﺎﺀ ﺍﻟﻠﻪ ..
ﺿﺤﻜﺖ ﻏﺎﻟﻴﻪ ﻭﻫﻲ ﺣﺎﻃﻪ ﻳﺪﻫﺎ ﻉ ﻓﻤﻬﺎ ..
ﻓﺎﻃﻤﻪ ﺑﻀﺤﻜﻪ : ﺑﻄﻴﺮ ﻉ ﺍﻟﺰﻭﺍﺯ ﺍﻛﺜﺮ ﻣﻦ ﺧﻮﺍﻟﻚ ..
ﻋﻤﺎﺩ ﺷﺒﺢ ﻟﺮﺯﺍﻥ : ﺧﻮﺍﻟﻲ ﺑﺎﻟﻬﻢ ﻭﺍﺍﺍﺍﺍﺳﻊ .. ﻭﺍﻧﻲ ﻣﺶ ﺯﻳﻬﻢ ..
...
ﻋﺰﻳﺰﺓ؛ ﻫﺪﻯ ﻳﺸﺒﺤﻠﻚ ..
ﺭﺯﺍﻥ ﺑﺮﺑﻜﻪ : ﻳﺸﺒﺢ ﻋﺎﺩﻱ ..
ﻋﺰﻳﺰﺓ ﻭﻫﻲ ﺗﺸﻮﻑ ﻟﺮﺯﺍﻥ ﺑﺮﺑﻊ ﻋﻴﻦ : ﺍﻣﻤﻤﻤﻤﻢ ..
ﺭﺯﺍﻥ .. ﻟﻔﺖ ﻭﺧﺸﺖ ﺩﺍﺧﻞ ﻃﻮﻝ ﻭﻫﻲ ﻣﺘﺤﺸﻤﻪ ..
....
ﻛﻴﻒ ﺟﺎﻳﻪ ﺳﻌﻴﺪﻩ ﺑﺘﻤﺸﻲ ﻟﺤﻮﺷﻬﺎ ..
ﻋﻤﺎﺩ : ﻣﺮﺕ ﺧﺎﻟﻲ
ﺳﻌﻴﺪﻩ : ﻧﻌﻢ ..
ﻋﻤﺎﺩ : ﺭﺯﺍﻥ ﻣﺎﺗﻠﺒﺴﺶ ﻓﻲ ﺣﺠﺎﺏ
ﺳﻌﻴﺪﻩ ﺷﺒﺤﺖ ﻟﻌﺰﻭﺯﺗﻬﺎ ﻭﺣﻤﺎﺗﻬﺎ ﺑﻌﺪﻳﻦ ﺷﺒﺤﺘﻠﻪ :. ﻻﻻ ..
ﻏﺎﻟﻴﻪ ﻣﺮﻛﺰﺓ ﻣﻊ ﻋﻤﺎﺩ
ﻋﻤﺎﺩ ﺑﺠﺪﻳﻪ : ﻟﺒﺴﻴﻬﺎ ﻳﺎﻣﺮﺕ ﺧﺎﻟﻲ ﻟﺒﺴﻴﻬﺎ .. ﺍﻟﻮﻗﺖ ﻫﺪﺍ ﻣﺶ ﻣﺰﺑﻮﻁ ﻋﻴﻮﻧﻚ ﻋﻠﻴﻬﺎ ﻭﻉ ﻟﺒﺴﻬﺎ ﺑﺎﻟﺬﺍﺕ .. ﺳﺎﻣﺤﻴﻨﻲ ﺍﺩﺧﻠﺖ ﻓﺸﻲ ﻳﺨﺼﻚ ﻟﻜﻦ ﺭﺯﺍﻥ ﺑﻨﺖ ﺧﺎﻟﻲ ..
ﻓﺎﻃﻤﻪ : ﻋﻨﺪﻩ ﺍﻟﺤﻖ .. ﻭﺭﺯﺍﻥ ﻣﻠﻴﺤﻪ ﻭﻳﻨﺨﺎﻑ ﻋﻠﻴﻬﺎ ﻭﻛﻼﻡ ﻋﻤﺎﺩ ﻣﻦ ﺧﻮﻓﻪ ﻋﻠﻴﻬﺎ .. ﻛﻴﻒ ﺧﻮﻫﺎ ﻫﻮ ..
ﻋﻤﺎﺩ : ﻛﻨﺎ ﻣﺎﺷﻴﻴﻦ ﺗﻤﺎﻡ ﻓﻄﻮﻣﻪ !!..
ﻏﺎﻟﻴﻪ ﻓﻨﺼﺖ ﺑﻀﺤﻜﻪ ..
ﻓﺎﻃﻤﻪ ﺍﺳﺘﻐﺮﺑﺖ ..
ﺳﻌﻴﺪﻩ ﺍﺑﺘﺴﻤﺖ؛ﺣﺎﺿﺮ ﻭﻟﺪﻱ .. ﻭﺑﺎﺭﻙ ﺍﻟﻠﻪ ﻓﻴﻚ ..
ﻋﻤﺎﺩ ﺑﺈﺑﺘﺴﺎﻣﻪ : ﻭﻓﻴﻚ ﺑﺎﺭﻙ ﺍﻟﻠﻪ ..
ﻟﻔﺖ ﺳﻌﻴﺪﻩ ﻭﻣﺸﺖ ﻭﻫﻲ ﻓﺮﺣﺎﻧﻪ ...
ﺍﻭﻻ ﻉ ﺧﺎﻃﺮ ﻭﻟﺪﻫﺎ ..
ﻭﺗﺎﻧﻴﺎ ﻷﻧﻬﺎ ﺷﺒﻪ ﻓﻬﻤﺖ ﻉ ﻋﻤﺎﺩ ..
ﻭﻓﺮﺣﺖ ﺑﻴﻪ ﻫﻠﺒﻪ ... ﻣﺶ ﺩﻳﻤﺎ ﺍﻟﻮﺣﺪﻩ ﺗﻠﻘﻰ ﺭﺍﺟﻞ ﺑﺎﻫﻲ ﻟﺒﻨﺘﻬﺎ ..
🍃 ﻭﺭﺯﺍﻥ ﺑﻨﺘﻬﺎ ﺍﻟﻮﺣﻴﺪﻩ ﻭﻋﻤﺎﺩ ﺭﺍﺟﻞ ﻣﺎﻓﻴﺶ ﻣﻨﻪ 🍃💓
....
ﻣﺸﺖ ﻓﺎﻃﻤﻪ ﻗﺪﺍﻡ ﻏﺎﻟﻴﻪ ﻭﻋﻤﺎﺩ ..
ﻏﺎﻟﻴﻪ ﻭﻫﻲ ﺷﺎﺩﻩ ﺫﺭﺍﻋﻪ : ﺍﺛﻘﻞ ﺷﻮﻳﻪ ﻋﻤﻮﺩﻩ ..
ﻋﻤﺎﺩ : ﻻﻧﺜﻘﻞ ﻻﻧﺨﻒ .. ﻣﺎﺩﺭﺗﺶ ﻋﻴﺐ ..
ﻏﺎﻟﻴﻪ ﺿﺤﻜﺖ ﻭﺣﻄﺖ ﺭﺍﺳﻬﺎ ﻉ ﺫﺭﺍﻋﻪ ..
ﻫﻮ ﻟﻒ ﺫﺭﺍﻋﻪ ﻋﻠﻴﻬﺎ ﻭﺧﺪﺍﻫﺎ ﻓﺤﻀﻨﻪ ﻭﻗﻌﺪ ﻳﻀﺤﻚ ..
🍁🍁🍁🍁🍁
ﻣﺎﺷﻲ ﻓﺎﻟﻄﺮﻳﻖ ﻭﻫﻮ ﻳﺘﻜﻠﻢ ﺑﺎﻟﺘﻠﻴﻔﻮﻥ ..
ﻫﺎﻧﻴﺒﺎﻝ : ﺑﻌﺘﻬﺎ ﻭﺍﻓﺘﻜﻴﺖ ﻣﻨﻬﺎ ..... ﻻﻏﺪﻭﺓ ﺇﻥ ﺷﺎﺀ ﺍﻟﻠﻪ ﻣﻌﺪﻱ ﻟﻄﺮﺍﺑﻠﺲ ﺑﻨﺎﺧﺪ ﻏﻴﺮﻫﺎ ......... ﺍﻳﻪ ...... ﺧﻼﺹ ﻓﺘﻴﺢ ﻧﺸﻮﻓﻚ ﻏﺎﺩﻱ ....... ﺗﻢ ... ﺑﺎﻟﺴﻼﻣﻪ ...
ﺣﻂ ﺗﻠﻴﻔﻮﻧﻪ ﻓﺠﻴﺒﻪ ﻭﻛﻤﻞ ﻃﺮﻳﻘﻪ ..
ﻟﻘﺪﺍﻡ ﺷﻮﻳﻪ ...
ﻣﺮﻭﺣﻪ ﻣﻦ ﺧﺪﻣﺘﻬﺎ ﻭﻛﺎﻧﺖ ﺗﻤﺸﻲ ﺑﺴﺮﻋﻪ ..
ﻷﻥ ﻓﻲ ﻭﺭﺍﻫﺎ ﺯﻭﺯ ﻳﻀﺎﻳﻘﻮﺍ ﻓﻴﻬﺎ ..
: ﺷﻮﻓﻬﺎ ﻛﻴﻒ ﺗﻤﺸﻲ ..
: ﻣﺶ ﻭﺍﻛﻠﻴﻨﻚ ﻳﺎﻫﻮﻭﻭﻭ ..
ﻣﺮﺍﻡ " ﻳﺎﺭﺑﻲ ﺧﻴﺮﻧﻲ ﻣﻌﺎﺵ ﺑﻴﺖ ﻧﻮﺻﻞ .."
: ﺟﻴﺘﻚ ﺟﻴﺘﻚ ﺟﻴﺘﻚ ﺟﻴﺘﻚ ..
ﻗﺮﺑﻮﺍ ﻣﻨﻬﺎ ﺍﻛﺜﺮ ..
ﻭﻫﻲ ﺗﺰﻳﺪ ﻓﻲ ﺍﻟﺴﺮﻋﻪ ....
ﻭﺍﺣﺪ ﻣﻨﻬﻢ ﺳﺒﻘﻬﺎ ﻭﺟﻲ ﻗﺪﺍﻣﻬﺎ ﻭﺍﻟﺘﺎﻧﻲ ﻭﺭﺍﻫﺎ ..
ﻫﻲ ﻣﻦ ﺧﻮﻓﻬﺎ ..
ﺷﺪﺕ ﻳﺪ ﺷﻨﻄﺘﻬﺎ ﻭﻫﺒﻜﺖ ﺍﻟﻠﻲ ﻗﺪﺍﻣﻬﺎ ﺑﻴﻬﺎ ﻉ ﺭﺍﺳﻪ ..
ﻣﺮﺍﻡ : ﻋﺪﻱ ﻳﺎﺣﻘﻴﺮ ﻋﺪﻱ ..
: ﻳﺎ ...&%%$
ﺣﺎﻭﻟﺖ ﺗﻬﺮﺏ ﺣﺎﺻﺮﻭﻫﺎ ...
ﻣﺮﺍﻡ ﺣﺴﺖ ﺭﻭﺣﻬﺎ ﺑﺘﻤﻮﺕ ...
ﺻﻜﺘﻬﺎ ﻋﻴﻄﻪ ﻉ ﻃﻮﻝ ﺭﻗﺒﺘﻬﺎ ...
" ﻳﺎﺑﻬﺎﺍﺍﻳﻢ ﺷﻦ ﺩﻳﺮﻭﺍ .."
ﻭﺍﺣﺪ ﻣﻨﻬﻢ ﻗﺎﻝ : ﻋﺪﻱ ﻓﺤﺎﻟﻚ ..
ﻫﺎﻧﻴﺒﺎﻝ ﻗﺪﻣﻠﻪ .. ﺷﺤﻪ ﻣﻦ ﻛﺒﻮﻃﻪ ﻭﺣﺪﻓﻪ ﻉ ﺍﻟﺘﺎﻧﻲ ﻭﻗﺎﻝ ﻟﻤﺮﺍﻡ : ﺍﻧﺘﻠﻔﻲ ﺭﻭﺣﻲ ..
ﻣﺮﺍﻡ ﺍﻧﻐﺎﺿﺖ ﻫﻠﺒﻪ ﻣﻦ ﺍﺳﻠﻮﺑﻪ ..
ﺑﺲ ﻣﻊ ﻫﺪﺍ ﺳﻤﻌﺖ ﻛﻼﻣﻪ ..
ﻣﺸﺖ ﺧﻄﻮﺗﻴﻦ ..
ﺑﻌﺪﻳﻦ ﻭﻗﻔﺖ ﻭﺍﻟﺘﻔﺘﺖ ﻟﻤﺎ ﺷﺎﻓﺘﻬﻢ ﺍﻟﺘﻤﻮﺍ ﻋﻠﻴﻪ ﺑﻴﻀﺮﺑﻮﻩ ..
ﺷﻬﻘﺖ ﻭﺣﻄﺖ ﻳﺪﻫﺎ ﻉ ﻓﻤﻬﺎ ..
ﻭﻫﻮ ﻧﺎﺯﻝ ﻓﻴﻬﻢ ﺑﻮﻧﻲ .. ﻉ ﺟﺒﺪ ﻭﺗﺨﺒﻴﻂ ...
ﻭﻫﻤﺎ ﻳﺤﺎﻭﻟﻮﺍ ﻳﻀﺮﺑﻮﺍ ﺯﻋﻤﻴﺘﻬﻢ ....
ﻭﺍﺣﺪ ﻣﻨﻬﻢ ﺗﻠﻮﺡ ..
ﻭﺍﻟﺘﺎﻧﻲ ﺷﺤﻪ ﻭﻋﻄﺎﻩ ﺧﺒﻄﻪ ﺑﺮﺍﺳﻪ ﻉ ﺟﺒﻬﺘﻪ ..
ﻣﻦ ﻛﺜﺮ ﻣﺎﻭﺟﻌﺎﺗﻪ ﻗﺮﻳﺐ ﺩﺍﺥ ..
ﺩﻓﻪ .. ﻭﺷﺒﺢ ﺟﻨﺒﻪ : ﻣﺎﺯﻟﺘﻲ ﻣﺼﺒﻴﻪ ﺍﻧﺘﻲ .. ﻋﺪﻱ ﺭﻭﻭﻭﺣﻴﻴﻲ ..
ﻫﻲ ﺍﻧﺨﻠﻌﺖ ..
ﻭﻟﻔﺖ ﺗﺠﺮﻱ ...
ﺑﻌﺪﻳﻦ ﻭﻗﻔﺖ ..
ﻣﺶ ﻗﺎﺩﺭﻩ ﺗﻤﺸﻲ ﻋﻨﻪ ﻭﺗﺨﻠﻴﻪ ..
ﻉ ﺧﻄﻤﺔ ﺳﻴﺎﺭﺓ ﺻﺎﺣﻴﻬﺎ ﻭﻗﻒ .. ﻧﺰﻝ ﻣﺮﺵ ﺍﻟﺴﻴﺎﺭﺓ ..
ﺳﻠﻴﻤﺎﻥ : ﺧﻴﺮﻙ !!
ﻣﺮﺍﻡ ﺑﻬﻠﻊ؛ﻭﻟﺪ ﻋﻤﻚ ﻳﺘﻌﺎﺭﻙ ﻣﻊ ﺯﻭﺯ ﺣﻴﻮﺍﻧﺎﺕ ..
ﺳﻠﻴﻤﺎﻥ ﻃﻮﻝ ﻗﺪﻡ ﺑﺎﻟﺴﻴﺎﺭﺓ ..
ﻟﻘﻲ ﻫﺎﻧﻴﺒﺎﻝ ﻭﺍﻗﻒ ﻳﻀﺎﺭﺏ ﻣﻊ ﺯﻭﺯ ..
ﻭﻗﻒ ... ﻭﻧﺰﻝ ﻣﻦ ﺍﻟﺴﻴﺎﺭﺓ ﻃﻮﻝ ﻣﺸﺎﻟﻪ ﺟﺮﻱ ..
ﻭﺍﺣﺪ ﻣﻨﻬﻢ ﻃﻠﻊ ﻣﻮﺱ ﺑﻴﻀﺮﺏ ﺑﻴﻪ ﻫﺎﻧﻴﺒﺎﻝ ..
ﻣﺎﻟﺤﻘﺶ ..
ﻷﻧﻪ ﺳﻠﻴﻤﺎﻥ ﺿﺮﺑﻪ ﺑﺮﺟﻠﻪ ﻉ ﻳﺪﻩ ..
ﻳﺪﻭﺏ ﺷﺒﺤﻠﻪ ﻫﺎﻧﻴﺒﺎﻝ
ﻭﻛﻤﻠﻮﺍ ﺍﻟﺰﻭﺯ ﻋﺮﻛﺘﻬﻢ ... ﻭﻣﺮﺍﻡ ﻛﺎﻧﺖ ﺗﺸﻮﻑ ﻣﻦ ﺑﻌﻴﺪ ﺑﺨﻮﻑ ﺷﺪﻳﺪ ..
ﻣﺮﺍﻡ؛ﻛﺎﻥ ﻣﺎﻳﻄﻠﻊ ﻭﺍﺣﺪ ﻓﻴﻬﻢ ﻋﻨﺪﻩ ﺳﻼﺡ ..
ﺳﻠﻴﻤﺎﻥ ﻭﻫﻮ ﺩﺍﻫﺶ : ﻋﺮﻓﺘﻜﻢ ﺿﺮﺍﺭﻱ ﻋﻴﺖ ... ﻣﻦ ..
ﺍﻟﺰﻭﺯ ﺷﺒﺤﻮﺍ ﻟﺒﻌﺾ ﻭﻃﻮﻝ ﻃﻠﻌﻮﺍ ﻳﺠﺮﻭﺍ ..
ﻫﺎﻧﻴﺒﺎﻝ : ﺧﺰﺯﺯﻳﻴﻲ ﻣﺴﺨﻴﻦ ..
ﺳﻠﻴﻤﺎﻥ : ﻋﺮﻓﺘﻬﻢ ﻟﻤﻦ ﻭﻻ ..
ﻫﺎﻧﻴﺒﺎﻝ ﻫﺰ ﺭﺍﺳﻪ ﺑﺈﻳﺠﺎﺏ ..
ﺳﻠﻴﻤﺎﻥ : ﻛﺎﻧﻮﺍ ﻻﺣﻘﻴﻦ ﺍﺧﺖ ﺿﻮ ..
ﻫﺎﻧﻴﺒﺎﻝ : ﺿﻮ ﻫﺪﻯ ﻫﻮ ﻭﺻﺎﺑﺮ ﻳﺒﻮﺍ ﺑﻄﺤﻪ ﺳﻤﺤﻪ .. ﻛﻴﻒ ﻣﺨﻠﻴﻴﻦ ﺍﺧﺘﻬﻢ ﻣﺮﻭﺣﻪ ﻉ ﻛﺮﻋﻴﻬﺎ ﻓﻮﻗﺖ ﻛﻴﻒ ﻫﺪﻯ ..
ﺳﻠﻴﻤﺎﻥ : ﻳﺮﻭﺣﻦ ﺍﻟﺒﻨﺎﺕ ﻭﺍﻻﺑﻼﺕ ﻣﻦ ﺍﻟﻤﺪﺭﺳﻪ ﻉ ﻛﺮﻋﻬﻴﻦ ﻗﺒﻞ ﻭﻣﺎﺻﺎﺭ ﺷﻲ ..
ﻫﺎﻧﻴﺒﺎﻝ : ﻫﺪﺍﻙ ﻗﺒﻞ ﻣﺶ ﺗﻮﺍ .. ﺗﻲ ﺍﻧﻲ ﺣﻠﻔﺖ ﻉ ﺭﺯﺍﻥ ﻣﺎﻗﺎﺻﺘﻬﺎ ﺧﻄﻮﺓ ﻟﻠﻤﺪﺭﺳﻪ ﻉ ﻛﺮﻋﻴﻬﺎ ﻓﺎﻟﻮﻗﺖ ﻫﺪﻯ ..
ﺳﻠﻴﻤﺎﻥ : ﻋﻨﺪﻙ ﺣﻖ ..
ﻗﺪﻣﻠﻪ ﻫﺎﻧﻴﺒﺎﻝ ﻭﺣﻂ ﻳﺪﻩ ﻉ ﻛﺘﻔﻪ : ﻋﺪﻱ ﻛﻤﻞ ﻃﺮﻳﻘﻚ ..
ﺳﻠﻴﻤﺎﻥ ﺍﺑﺘﺴﻢ ﻭﻫﺰ ﺭﺍﺳﻪ ﺑﺈﻳﺠﺎﺏ ..
ﻣﺸﻲ ﻭﻫﻮ ﻳﻘﻮﻝ؛ﻧﻮﺻﻠﻚ؟
ﻫﺎﻧﻴﺒﺎﻝ : ﺗﻮﻛﻞ .. ﺻﺤﻴﺖ ..
ﻫﺰ ﺭﺍﺳﻪ ﺳﻠﻴﻤﺎﻥ ﺑﺈﻳﺠﺎﺏ ﻭﻣﺸﻲ ﺭﻛﺐ ﺳﻴﺎﺭﺗﻪ ..
ﻭﺗﺤﺮﻙ ﻭﻳﻦ ﺧﻄﻢ ﺣﺪﺍ ﻫﺎﻧﻴﺒﺎﻝ ﻛﻠﻜﺲ ..
ﻭﻫﺎﻧﻴﺒﺎﻝ ﺭﻓﻌﻠﻪ ﻳﺪﻩ ﻳﺤﻴﻪ ..
ﻛﻤﻞ ﻃﺮﻳﻘﻪ ﻫﺎﻧﻴﺒﺎﻝ ﻭﻫﻮ ﻳﺸﻮﻑ ﻟﻜﺒﻮﻃﻪ ﺍﻟﻠﻲ ﺗﻤﺰﻕ .. ﻣﻂ ﺷﻮﺭﺍﺑﻪ ﻟﺪﺍﺧﻞ ﺑﻀﻴﻖ ..
ﺑﻌﺪﻳﻦ ﺷﺒﺢ ﺍﻟﻘﺪﺍﻡ ﻭﻓﻨﺺ : ﻣﺎﺯﺍﻟﺖ ﻫﻨﻰ ﻫﺪﻱ ..
💓 ﻛﺎﻧﺖ ﺗﺮﺍﻗﺐ ﻓﻴﻬﻢ .. ﻟﻌﻨﺪ ﻣﺎﻣﺸﻲ ﺳﻠﻴﻤﺎﻥ ﻫﻲ ﻣﺸﺖ ..
ﻣﺮﺍﻡ " ﻋﻠﻴﻚ ﻣﻮﺍﻗﻒ ﻳﺼﻴﺮﻥ ﻟﻴﺎ ﻣﻌﺎﻩ ﻛﻞ ﻭﺍﺣﺪ ﺍﺣﺮﻑ ﻣﻦ ﺍﻟﻠﻲ ﻗﺒﻠﻪ ..."
ﻫﻮ ﻗﻌﺪ ﻣﺎﺷﻲ ﻭﺭﺍﻫﺎ ..
ﺑﺲ ﻫﻲ ﻓﻄﺮﻑ ﻣﻦ ﺍﻟﻄﺮﻳﻖ ﻭﻫﻮ ﻓﻄﺮﻑ ..
ﻣﺮﺓ ﻣﺮﺓ ﻳﺸﻮﻓﻠﻬﺎ ..
ﻭﻫﻲ ﻛﺎﻧﺖ ﺗﻤﺸﻲ ﻭﻣﺶ ﻋﺎﺭﻓﻪ ﻛﻴﻒ ﺗﻤﺸﻲ ..
ﺑﺲ ﻛﺎﻧﺖ ﻣﺘﻤﺎﺳﻜﻪ ...
ﻗﻌﺪﻭﺍ ﻫﻜﻲ ..
ﻟﻌﻨﺪ ﻣﺎﻭﺻﻠﺖ ﻟﻠﺤﻮﺵ ..
ﻫﺎﻧﻴﺒﺎﻝ : ﺟﺎﻳﻪ ﺿﻮ ﺍﻟﻠﻴﻠﻪ ﻧﺘﻔﺎﻫﻢ ﻣﻌﺎﻩ ..
ﻫﻲ ﺍﻟﺘﻔﺘﺖ ﺷﺒﺤﺘﻠﻪ ..
ﻟﻘﺎﺗﻪ ﻣﻜﻤﻞ ﻃﺮﻳﻘﻪ ﻟﻘﻄﻌﺘﻬﻢ ..
ﻗﻌﺪﺕ ﺗﺸﻮﻓﻠﻪ ...
ﻣﺘﻜﺒﺮ .. ﻓﻴﻪ ﻏﻄﺮﺳﻪ ..
ﺑﺲ ﻳﻘﻌﺪ ﺍﻟﺮﺍﺟﻞ ﺍﻟﻮﺣﻴﺪ ﺍﻟﺒﻄﻞ ﻓﻌﻴﻮﻧﻬﺎ ﺍﻟﻠﻲ ﻋﻤﺮﻫﻢ ﻣﺎﺷﺎﻓﻮﺍ ﺭﺍﺟﻞ ﻏﻴﺮﻩ 💓..
ﺧﺸﺖ ﻭﺻﻜﺮﺕ ﺍﻟﺒﺎﺏ ﻭﻫﻲ ﻣﺒﺘﺴﻤﻪ ...
ﻭﻫﺎﻳﻤﻪ ﺑﻜﻞ ﻣﺎﻓﻴﻬﺎ ﻣﻌﺎﻩ ..
🍃 ﺻﻌﺐ ﺗﻤﻨﻊ ﻗﻠﺒﻬﺎ ﻣﻦ ﺣﺒﻪ ﺻﻌﺐ ﻫﻠﺒﻪ 🍃
🍁🍁🍁🍁🍁🍁🍁🍁
ﺯﻱ ﻣﺎﻛﺎﻥ ﺻﻌﺐ ﻋﻠﻴﻪ ﻳﻨﺴﺎﻫﺎ ..
ﺑﺮﻏﻢ ﺍﻥ ﻫﻮ ﺍﻟﻠﻲ ﺧﻼﻫﺎ ..
ﻟﻜﻦ ﺍﻟﻨﺪﻡ ﻣﺎﻓﺎﺭﻗﺎﺵ ﻟﺤﻈﻪ ﻉ ﺍﻛﺒﺮ ﻏﻠﻄﻪ ﺍﺭﺗﻜﺒﻬﺎ ﻓﺤﻴﺎﺗﻪ ﺑﺎﻟﻨﺴﺒﻪ ﻟﻴﻪ ...
ﺷﺎﻓﻬﺎ ﻃﺎﻟﻌﻪ ﻣﻦ ﺍﻟﻤﺪﺭﺳﻪ ..
ﻣﺸﻲ ﻭﺭﺍﻫﺎ ﻃﻮﻝ ..
" ﺭﺑﺎﺏ ..."
ﻫﻲ ﻣﺶ ﻣﺼﺪﻗﻪ ﺍﻟﺼﻮﺕ ﺍﻟﻠﻲ ﺳﻤﻌﺎﺗﻪ ...
ﺻﻮﺗﻪ ..
ﺑﻠﻜﻨﺘﻪ ﺍﻟﻤﻌﺮﻭﻓﻪ ...
ﺍﻟﺘﻔﺘﺖ ﺑﺶ ﺗﺘﺄﻛﺪ ..
ﻭﻓﻌﻼ ....
ﻛﺎﻥ ﻫﻮ ...
ﻗﺪﻣﻠﻬﺎ ..
ﻃﺎﺭﻕ : ﻛﻴﻒ ﺣﺎﻟﻚ ﺭﺑﺎﺏ ..
ﺭﺑﺎﺏ ﺗﺒﺪﻟﺖ ﻧﻈﺮﻩ ﺍﻟﺼﺪﻣﻪ ﻓﻲ ﻋﻴﻮﻧﻬﺎ ﻟﻨﻈﺮﻩ ﺗﻬﻜﻢ ..
ﻃﺎﺭﻕ ﻣﻂ ﺷﻮﺍﺭﺑﻪ ﻟﺪﺍﺧﻞ ﻭﻫﻮ ﻳﻮﺯﻉ ﻓﻨﻈﺮﻩ ﺣﻮﺍﻟﻴﻪ ﻭﻗﺎﻝ : ﻋﺎﺭﻑ ﺍﻧﻚ ﻣﺶ ﻃﺎﻳﻘﻪ ﺗﺤﻘﻲ ﻭﺟﻲ .. ﻋﺎﺭﻑ ﺭﻭﺣﻲ .. ﺷﺒﺤﻠﻬﺎ .. ﻋﺎﺭﻑ ﺍﻧﻲ ﻣﺎﻧﺴﺘﺎﻫﻠﺶ ﺣﺘﻰ ﺍﻧﻚ ﺗﺴﻤﻌﻴﻨﻲ ..
ﺑﺲ ﻣﻦ ﺑﻌﺪ ﺳﻴﺒﺘﻚ ﻳﺎﺭﺑﺎﺏ ﺍﻗﺴﻢ ﺑﺎﻟﻠﻪ ﻣﺎﺗﺮﻳﺤﺖ ..
ﺭﺑﺎﺏ ﺍﺑﺘﺴﻤﺖ ﺑﺘﻬﻜﻢ : ﺃﻧﺒﻚ ﺿﻤﻴﺮﻙ؟ !
ﻃﺎﺭﻕ : ﻻ ﻣﺶ ﻫﻜﻲ ... ﺗﻌﺬﺑﺖ ... ﻏﻠﻄﺖ ﻏﻠﻄﻪ ﻣﺎﻓﻬﻤﺘﺶ ﺍﺻﻼ ﻛﻴﻒ ﻏﻠﻄﺘﻬﺎ .. ﺭﺑﺎﺏ ﺍﻧﺎ ﻭﻗﺘﻬﺎ ﻛﻨﺖ ﻣﻠﺨﺒﻂ .. ﺗﺨﻠﻄﺖ ﻋﻠﻴﺎ ﻣﻦ ﻛﻞ ﺍﻟﺘﺮﺍﻛﻴﻦ ... ﻭﺍﻟﻠﻪ ﺍﻟﻌﻈﻴﻢ ﻛﻨﺖ ﻛﻴﻒ ﺍﻟﻠﻲ ﻓﻐﻴﺒﻮﺑﻪ ﺑﻌﺪ ﻓﻘﺖ ﻣﻨﻬﺎ ﻛﻤﻠﺖ ﺑﺎﻗﻲ ﺍﻳﺎﻣﻲ ﻧﺎﺩﻡ ..
ﺭﺑﺎﺏ : ﺍﻣﻤﻢ .. ﺑﺎﻫﻲ ﻓﻬﻤﺖ ﺍﻧﻚ ﻧﺎﺩﻡ ... ﺑﺲ ﺍﻷﻫﻢ ﺗﻮﺍ .. ﺷﻦ ﺗﺒﻲ ﻣﻦ ﻭﺭﺍ ﺟﻴﺘﻚ ﻫﺎﺩﻱ ؟
ﻃﺎﺭﻕ ﻗﻌﺪ ﻳﺸﻮﻑ ﻟﻌﻴﻮﻧﻬﺎ : ﻧﺒﻴﻚ ... ﺧﺪﻱ ﻧﻔﺲ ﻭﻛﻤﻞ ... ﺗﺴﺎﻣﺤﻴﻨﻲ ... ﻭﺗﻌﻄﻴﻨﻲ ﻓﺮﺻﻪ ...
ﻭﻧﺮﺩﻭﺍ ...
ﺍﺑﺘﺴﻤﺖ ﺑﺮﻓﻌﺔ ﺣﻮﺍﺟﺐ : ﻭﺭﺑﺎﺏ ﻋﺎﺷﺖ ﺍﻟﻔﺘﺮﺓ ﺍﻟﻠﻲ ﻓﺎﺗﺖ ﻫﺎﺩﻱ ﻛﻠﻬﺎ ﺗﺮﺍﺟﻲ ﻓﻴﻚ ﺗﺠﻴﻬﺎ ﺑﺶ ﺗﻘﻮﻟﻠﻬﺎ ﺳﺎﻣﺤﻴﻨﻲ ﻭﺍﻧﻲ ﻧﺎﺩﻡ ﻭﻫﻴﺎ ﻧﺮﺟﻌﻮﺍ ...
ﺗﻨﻮﺽ ﻫﻴﺎ ﻣﺎﺗﺼﺪﻕ ﺍﻃﻴﺮ ﻣﻦ ﻓﺮﺣﺘﻬﺎ .. ﻭﺗﻘﻮﻟﻚ ﺑﺎﻫﻲ !!
ﻣﻼﻣﺢ ﻭﺟﻬﻪ ﺗﺒﺪﻟﺖ ﻟﻸﻟﻢ .
ﺭﺑﺎﺏ ﺍﺷﺮﺕ ﺑﺼﺒﻌﻬﺎ ﻉ ﻣﻜﺎﻥ ﻭﻗﺎﻟﺖ : ﻣﺬﻛﺮ ﺍﻟﺘﺮﻛﻴﻨﻪ ﻫﺪﻳﻜﺎ .. ﺍﻟﻠﻲ ﺳﻴﺒﺘﻨﻲ ﻓﻴﻬﺎ ﻭﻣﺸﻴﺖ ﻭﺍﻧﺖ ﻭﻻﻫﻤﻚ ﺷﻦ ﻣﻤﻜﻦ ﻳﺼﻴﺮ ﻓﻴﺎ ... ﻣﻦ ﻫﺪﻳﻜﺎ ﺍﻟﻠﺤﻈﻪ ﻳﺎﻃﺎﺭﻕ ..
ﻃﺤﺖ ﻣﻦ ﻋﻴﻨﻲ ...
ﺍﻟﻜﻠﻤﻪ ﻛﺎﻧﺖ ﻣﻮﺱ ﻭﺧﺶ ﻟﻘﻠﺒﻪ ..
ﺭﺑﺎﺏ : ﻣﻌﺎﺵ ﻧﺸﻮﻑ ﻓﻴﻚ ﺯﻱ ﻗﺒﻞ ﻳﺎﻃﺎﺭﻕ ﺧﻼﺹ .. ﻭﻻﻳﻤﻜﻦ ﻣﺎﺯﺍﻝ ﻧﺮﺟﻊ ﻧﺸﻮﻓﻠﻚ ﺯﻱ ﻗﺒﻞ .. ﻭﻟﻲ ﻭﺍﺭﺟﻊ ﻛﻤﻞ ﺣﻴﺎﺗﻚ ﻣﻦ ﻭﻳﻦ ﻣﺎﺑﺪﻳﺖ ﻓﻴﻬﺎ ﺑﻌﺪ ﻫﺪﺍﻛﺎ ﺍﻟﻴﻮﻡ .. ﻷﻥ ﺻﻔﺤﺘﻚ ﺑﺎﻟﻨﺴﺒﻪ ﻟﻴﺎ ﻣﻄﻮﻳﻪ ﻣﻦ ﺯﻣﺎﻥ ...
ﻭﻓﺘﺤﺖ ﻏﻴﺮﻫﺎ ...
ﻫﻮ ﻛﺎﻥ ﻣﺪﻣﺮ ﻣﻦ ﺩﺍﺧﻞ ﻭﻫﻮ ﻳﺸﻮﻓﻠﻬﺎ ﻛﻴﻒ ﻟﻔﺖ ﻭﻣﺸﺖ ﻭﺧﻼﺗﻪ ... ﻭﺍﻟﻨﺪﻡ ﺳﻴﻄﺮ ﻋﻠﻴﻪ ﺳﻴﻄﺮﻩ ﺗﺎﻣﻪ ...
ﺍﻣﺎ ﻫﻲ ﺩﻣﻮﻋﻬﺎ ﺍﻟﻠﻲ ﻧﺰﻟﻮﺍ ﺑﻌﺪ ﻣﺸﺖ ﻓﻴﺴﻊ ﻣﺴﺤﺘﻬﻢ ..
ﻭﻛﻤﻠﺖ ﻃﺮﻳﻘﻪ ﻭﻫﻲ ﺣﺎﺳﻪ ﺑﺮﺍﺣﻪ ﺗﺎﻣﻪ ...
.... ﻳﺘﺒﻊشض
