#رمضان_احلا_مع_جمان_فريد
#العشق_المتمرد
الجزء 17
💓بنغازي مافي قلبي غير غلاها.
ولاشي عمره ينسيني ذكراها ..
👐👐👐👐
لالا مامشيناش ل2011...مازااااال...
قاعدين ف1994...تحديدا شهر الحرث"نوفمبر"..
بس توا حني في رباية الذايح💓💓
اول مرة يخشولها هانيبال والهادي ومعاهم سليمان..
طبعا رحلتهم كانت طويله بالسيارة...
وسليمان اللي كان يسوق واخد سيارة خوه خليفه...
اتلاقوا في الطريق مع عمار ومعاه محمود اللي اصروا يترافقوا معاهم في الطريق..برا...
طلعوا من الصبح...ووصلوا الساعه 9ليلا...
واخدين بعين الأعتبار انهم وقفوا في الطريق كذا مرة...
💜المتمردة...
كانت ضاويه ليلتها ...وهانيبال والهادي عجبتهم ع الأخر بإعبتارها منطقه متمدنه وفيها تطور...
عمار: سمحه بنغازي..
هانيبال: ايه بس فجوها سمحه..مش فحاجة تانيه.
ضحك عمار لأنه فهم قصده وماباش يرد...
محمود:طارق يرجى ..
عمار : هي...مشوا ع رجليهم مسافه بعد درسوا سياراتهم بعيد شوي وقعدوا يتمشوا..
وصلوا فالحوش المقصود..
حوش طارق صديق محمود..
اللي اول ماعرف انهم جايين حلف بالطلاق ماضالين الا بايتين عنده ..مع انه مش متزوج😂..
هما وفقوا ع الباب انفتح...
طارق بضحكه: مرحباااااااااا بعرب الغرب والوسطى..
سلم واهل وسهل ورحب..
طارق مواليد 74 شخص فرفوش ودمه خفيف..لكنه راجل فزاع وصاحب كلمه...
طارق : تفضلوا تفضلوا..
دخلهم للمربوعه ...
طارق: انستوا وشرفتوا...
عمار بإبتسامه: الله يأنسك..
قعمزوا كلهم..
طارق: اش حالكم وحال عرب الغرب..
محمود بإبتسامه: الحمد لله فخيار الخير..
هانيبال ركز ع الحوش اللي هما فيه واضح صاحبه من الناس المرتاحه هداكا الوقت..سنين الحصار في اولها...
طارق وهو يشوف لعمار: انت الفارس؟
عمار هز راسه بإيجاب وهو مبتسم..
طارق شبح جهة الهادي وهانيبال: والشباب..
محمود: ولاد عمتي وولد عمهم من ******
طارق برفعة حواجب: ونعم الناس والله..بالجودة..
هانيبال ابتسم : بيك اجود..
الهادي وسليمان : بيك اجود..
وبدوا يتجاذبوا في اطراف الحديث من هني وهني...
هانيبال وسليمان والهادي ارتاحوا هلبه لطارق وانطلقوا معاه فيسع فيسع بسبب تواضعه وروحه الحلوة..
شوي وخشوا خوته الزوز وبوه ورحبوا بيهم احسن ترحيب.
ومافيش داعي نحكي عن الضيافه..بالنسبه ليا في الجود والكرم الشراقه..نمبر ون ..
والخير والبركه في كل مدن ليبيانا💓...
🌴🌴🌴🌴🌴🌴🌴🌴🌴🌴🌴🌴🌴🌴
🍁عروبه خيرك حسستيني انه مات..
عروبه قلبه فز: اعود بالله منك ومن فالك....
عودة: يابنتي امي ركزت عليك راهي معقوله هكي لاماكله لاشراب وفوقها حابسه روحك هنى !!ماعداش عليها كلامي انك ناقصة نوم وتبي ترقدي..
عروبه ودموعها ينزلوا: مش قادرة نحوله من بالي استاحشته واجد واجد ياعودة..ورشفت..
عودة: يابنتي كلها تلاته يام ويولي يخنقك مرة تانيه..ماتكلميش هدى ماتصبيش برا ماتلبسيش محرمه لونها فاقع...وااااك عليك تقييد..
عروبه بصوت مخنوق: غير يروح هو خله والله يقيدني لعند يخنقني راضيه.
عودة : لاواااجد هكي هبلت هدى..
عروبه ترشف وهي تشوف للتوكه ودموعها مازالوا ينزلوا💓..
🍁🍁🍁🍁🍁
"دوم معمر هو القايد
من غيره خراف وزايد"
متكيات في الدار قدام التلفزيون ويهدرزوا...
غاليه : هديك بكري جتني تبي تتسلف مكياج..
حميده بتفنيصه : وانتي شن قلتيلها؟!!
غاليه : قلتلها ماعنداش غير اللي راته فعرس حميد..
حميدة : واااك عليك قفاصه الهم ع اساس ماعندهاش بيش تشري وخوتها كل يوم يحطولها فإيديها 20جني..
غاليه تنهدت:متغلا عليها كان الحاجة اللي عندنا...شبحت لحميدة..لكن بنقولك..اني وانتي لازم نسايروها لين ربك يديرلنا طريق مع خوتها..
حميدة تنهدت وهي تشبح فوق :كان حاجتك عند الكلب..
غاليه : قوله ياسيدي...
"زيد تحدا زيد ياصقر الوحيد"..
غاليه وحميده : 😑😑
🍁🍁🍁🍁
وليل الليل...
واللي هدا حط راسه بيرقد...
في اللي راح فسابع حلمه من تعب السفر...
زي هانيبال وعمار والهادي ومحمود وسليمان..
🍁وفي اللي سهران لعيون الناس اللي رقدت..
💔عروبه..
حاطه راسها ع مخده وحاطه يدها ع صدرها ونار شوقها ليه والعه فصدرها..
حاسه بإن في شي منها مشي معاه...
وزي ماقلت قبل مشاعر مرحلة المراهقه ديما بالضعف 💓💓
🍁في مكان تاني..
كانت سميه تبكي ففراشها ...تأنب فروحها هلبه غياب الهادي عنها هاليوم وزيادة الزعل اللي بيناتهم..خلاها تتأكد انها ماتقدرش تعيش من غيره وان حبه مايغلبه شي بالنسبه ليها..
وقالت فنفسها "غير يروح حنراضيه ومستحيل نفرط فيه ولانرخي بيه💓"..
🍁وفي مكان مازال ابعد من هالمكان...
جاك من مصر شن تبي تاني..
هندا تشبحله:باهي مش بطال..
نوريه برفعة حواجب: شن هو اللي مش بطال !؟هدي التفصيله اللي انتي تبيها!
هندا بضحكه: باهي يمي شن قلنا خلاص..
نوريه : اسمعي عرسك معاش مازال عليه واجد..مش عاجبك شي من توا قولي عليه ..
هندا ابتسمت :كله عاجبني خلاص ..
نوريه حركت راسها ايمين ويسار ...
هندا::شنو صار في الفرقة اللي قلت عليها..
نوريه: خوك حجز معاهم ليه وقت..لما كنتي فطرابلس..
هندا : كويس ...قعدت حاجه وحده غير يروح محمود من بنغازي بنقوله يغيرلي حاجه في الحوش مش عاجبتني..
نوريه بصدمه؛ تو مش انتي بروحك اخترتي كل شي فيه؟!!
هندا بضحكه: ايه وفي حاجات معاش عجبتني..
نوريه تشبحلها بتفنيص..
هندا غمزتلها وطلعت لسانها وضحكت..
وامها ضحكت وحركت راسها ايمين : امان ياربي...
🍁🍁🍁🍁🍁
وعدى يوم.....
وجي اللي بعده..
يوم السبت ..السباق...
ماكانش في بنغازي ...في مدينه تانيه جنبها...
الساعه4 عصرا..
كانوا الفرسان ع احصنتهم متجهزين..
وكلهم لابسين الزي الوطني بالجرود....
وكان في شخصيات كبيرة حاضرة...
💓عمار وهو راكب ع حصانه ويمسح ع راسه : اليوم يومنا يارفيقي...مانرضوش غير بالفوز يالجموح...
نزل عليه وقرب لودنه ...الفوز وبس يالجموح...
صهل الجموح...
ضحك عمار وباسه ....
علاقه الخيل بصاحبه علاقه فريدة من نوعها..يصير بيناتهم ترابط وحب عجيب ...
لا عجب..سيدنا سليمان كان عاشق للخيل..
وعمار كذلك عاشق للخيل...والجموح بالذات غير الغير عنده...
"وحيجي يوم ويكون الجموح غريمه ع قلب من سيعشق مستقبلا😉"
🔫ضربوا النار ..
اعلانا لبدء السباق....
عند المتفرجين...
طارق: لاقوة الا بالله ع خوك ياليد..
ضحك محمود وهو يتفرج..
هانيبال وهو يشوف : زعييييم..
الهادي ضحك..
سليمان: ماشااء الله...
🍁هو وحصانه كانوا كأنهم واحد ...
عمار كان حاط قدامه خط النهايه وبس..
كان يبي يشوف روحه هو والجموح بس في المقدمه..
اكيد الحكايه مش ساهله اللي معاه فرسان..وليهم خبرة...
بس هو كان واثق من نفسه ومن خيله...
لما يسبقوه مكانش يخاف..او يحبط او يحس انه خلاص ماعنداش امل يفوز بالعكس تماما...
عمار: جمووووح....
والحصان يتأثر هلبه بصاحبه ويفهم عليه...
قعد يجري بأقصى سرعه....
هو طبس راسه عليه وباسه وهو يجري: هيااااااا هياااااااااا
.....
: ماشاء الله على ولدك يامختار
مختار مبتسم بفخر : تسلم..
طبعا السباق كان متصور بكاميرا فيديو📽..
.....
هانيبال : قسما بالله راااجل ...
محمود بحماس : والله ليه مني حاجه كبيرة كانهو دارها وفاز...
🏇كانوا في تلاته يتنافسوا ع خط النهايه...
عمار وزوز تانيين....
عمار وهو قمه في الإصرار والحماس: هااااااااااااع....
الحصان تحمس بزيادة مع صياح صاحبه...
وتقدم اكثر.....
لعند وصل خط النهايه...
......
هانيبال بضحكه فرح : صحة والله صحه ليه..
محمود بضحكه: ولد خالك كان حط حاجه فراسه يوصلها يعني يوصلها...
الهادي بإبتسامه: ماشاء الله...
......
ترجل من ع حصانه..
عمار : ماخذلتنيش...قرب منه وحضنه وبعدين باسه من بين عيونه...وقعد يمسح ع وجهه وهو مبتسم...
جوه قعدوا يهنوا فيه...
بعدين هو شد زمام حصانه ومشي بيه جهة الجمهور..
كان بوه واقف قدمله...
باس عمار بوه ع راسه وبوه ردلهاله....
وكان محمود يصور فيهم بالصوارة...
بعدين الكل باركوله...وهو كان فقمة السعاده انه كسب هالتحدي قدام نفسه اولا قبل اي حد....
🍁🍁🍁🍁🍁
وليش تلبسي فبلوزة سودا...
سعيده: سمحه وتطلع عليا..
امال :لالا وراس سعيده تلبسي البلوزة المشماشيه هي اللي تطلع عليك..
سعيده : اني قلت السودا يعني السودا...
امال :واااك عليك عناد..باهي والحولي..
سعيدة: الأبيض اللي فيه خط اسود..
امال بإزدراء: اخيييي ياسعيده خييي..
سعيده : ترا خيطيلي فمك..
وقعدت سعيدة اطلع فحاجتها اللي بتحضر بيهم كسوة بنت عيت رحومه...
امال :تلبسي هنى ولا عندنا ..
سعيده: لالا عندكم الذهب غادي ...
امال :باهي..
"يمييي"..
سعيده طلعت من الدار...
رمزي : خودي ..
امال : ليش طالع وشعرك مبلول الجو صقع تمرض..
سعيده: يموت فحاجه اسماها دوش لازم بعديروح من المدرسه يخش يدير دوش..
رمزي : عمي هانيبال هكي يدير حتى هو...
ابتسمت امال وتنهدت بهيام...
سعيده:😒...
فهاللحظه خشت غاليه:سعيده..
سعيده : اهو تو بنعدي نلبس..
غاليه:الساعه6توصل كسوتهم قالت امي..
سعيده:عندي علم هي..
خشت للدار...وغاليه مشت...
امال :ايه رمزي وشن يدير تاني عمك هانيبال...
رمزي بتعجب : شي..
"أماااال"..
امال:😨...جاياتك...وخشت لأختها..ورمزي مشي...
🍁🍁🍁🍁
طرابلس...
الساعه 6:30مساءا...
هي اقعدي دلو خن نديرلك التوكه كويس...
أمباركه: بالشويه عليها...
خوله:حتى اني بالشوية يما شن ندير تشوفي فيا..
نعيمه تراقب وساكته وفي غمرها بنتها نور ترقد فيها...
شويه وجت من الكوجينه حماتها عبير..وقعمزت حداها...
عبير وهي تشوف لنور: ربي يحفظها الحلوه الدبدوبه راحت زي الفازو...
امباركه : قولي ماشاء الله..
عبير :ههههههههههه..
نعيمه تضحك مجامله وتقول فخاطرها"انتي عينك ضربه ضربه ربي يلطف ببنيتي 😣"...
عبير: نعومه سمعتي بالناس اللي جوني..
نعيمه :ايه توا عمتي حكتلي..
عبير: ناس عز فوق الريح..
امباركه: اكبرمنك ب18عام..
عبير: مش باين فيه الكبر بكل...وبعدين المهم الأخلاق..
نعيمه"المهم تتزوجي وخلاص 😏"
امباركه:والله ذنبك ع جنبك..
خوله : يما ناس حالتها مرتاحه ومتسميين ومعروفين وهو ماشاء الله دكتور..
نعيمه انصدمت المعلومه هادي ماقالتهاش عزوزتها وغير هكي كيف عبير اللي مبطله من تالته اعدادي تاخد دكتور!!
"طبعا عبير مبطله بإرادتها لأنها ماتنفعش في القرايه"...
امباركه وهي تخدم في الشاهي:بينها بينها ربي يهنيها اني امها مانودلها كان الباهي..
نعيمه: ربي يتمم ع خير...
عبير: تسلمي...ايه وبنطلب منك طلب صغير..
نعيمه : تفضلي..
عبير: نبي ناخد منك اللبسه اللي جابهالك خوك من سوريه بنلبسها لما بيجوا خواته ياخدوا القياسات..
نعيمه فداخلها ضحكت بتهكم ع عبير اللي ديما هازيه عليها وع اهلها..توا جايه تطلب منها فلبسه جايبهالها خوها...
نعيمه ابتسمت: حاضر...
عبير: ايه قوليلي فرحوا خواتك بالحوايج اللي بعتناهولهم..
"عطوها حوايج قدم ليهم وقالولها ارفعيهم لخواتك طبعا تعمدا اهانتها.. وكانوا يديروا فيها بطريقه قدام خوهم تبين انهم يديروا هكي بحسن نيه"...
نعيمه :لالا تفلوشت ونسيتهم مارفعتهمش معاي...
شبحوا لبعض البنات ..
وامهم شبحت لنعيمه...
امباركه :ترفعيهم في العيد ..يفرحوا بيهم غادي..
عبير : مش غير يفرحوا...
نعيمه دايرة روحها لاهيه ببنتها وقاعده تسحن من داخل...
🍁يكون في علمكم ان اهل راجل نعيمه اصلهم من نفس المدينه اللي تنتميلها نعيمه...غير هما لإنهم عايشين فطرابلس من سنين دارو روحهم منها🍃
🍁🍁🍁🍁🍁🍁
في الشرق💓
وفي حوش طارق
وهديكا الزردة الكبيرة اللي دارها لعمار...
والموائد العامرة...والرجاله اللي عبوا المربوعه ...
وزي ماقلت قبل كرم اهل الشرق فريد من نوعه...
ذبحوا لعمار وفرحوا بيه تقول ولدهم....
هانيبال عز عليه طارق لين خلاص خلال يومين تقاربوا من بعض هلبه..
طارق: والله انت الزعيم ياهانيبال..
ضحك هانيبال: مكمل قراية قتلي..
طارق :لا مازلت ..تقول سنتين هك.
هانيبال:محمود قالي تقرا اقتصاد ..
طارق:اها..ناوي تخش اقتصاد..
هانيبال:كان سخر الله..
طارق؛ خش تخصص كويس وينفعك..ماتحقش وضع البلاد تو مرات مع الوقت تتغير حاجات واجده..
هانيبال هز راسه بإيجاب: إن شاء الله..
عمار جاهم: وسعوا بالله..
هانيبال: تو من المكانات هدين كلهن مالقيت الا هالمكان..
عمار بتكشيخه مع ضحكه: تي وسع انت وياه..
ضحكوا الزوز ووسعوا...
قعمز بيناتهم: ااااه...
طارق:فرحان يافارس..
هانيبال:كان مش عيب ره ناض يهوس..
عمار ضحك: غير نبي نخش عسكريه ومانبيش الهيبه اطيح راني درتها..
طارق: مازلت ع موالك..
عمار شبحله: محمود مايدرق عليك شي..
ضحك طارق بعدين قال:هو خايف عليك..
عمار: هو في حد يخش عسكريه ويخافوا عليه..
هانيبال: هو اللي ينخاف عليه..
عمار: لالا الحمد لله ماهناك شي يخوف الامور تمام ولافي حروب ولا تجينا إن شاء الله...
طارق بضحكه:مال ليش خاش عسكريه...
عمار ابتسم: لغرض فنفس يعقوب...
"يبي يكون مقرب من القيادة"..
هانيبال كان فاهم عليه وابتسم بتهكم: ربي يكفينا شر الحروب ولايجينا نهار نخافوا فيه عليك ياولدخالي...
عمار شبحله شويه وبعدين ابتسم...
🍃ممكن هداكا الوقت لايمكن يخطر ع بال حد ان حيجي نهار ونخشوا حروب بعد هزيمة تشاد المرة...والغارة والحصار....كانوا الناس يشوفوا فيهم اكبر المصايب زي مايقولوا...ماكناش نعرفوا ان في القدر مازال مدسوسه مصايب اكبر من هكي بمليون مرة🍃
🌵تقول هناك من داعي عليك يابلادي🌵
🌴🌴🌴🌴🌴🌴🌴🌴🌴🌴🌴🌴🌴
الساعه9:30مساءا
ع الأول ماتبدينا ع محمد صلينا....
مقعمزين في حوش العرس..
كانوا لابسات اللبسات اللي جابتهم كفايه ومكيجات مكياج خفيف...
ومدايرات قصة ملفوفه...وشعرهم مفرود..بالدوامه والحديد😁
وطالعات حلوات هلبه وملفتات...
بس العيون كانت ع حميده اكثر بإعتبارها الصغيرة...وفي نساوين كلموا فاطمه عنها....
وتحديدا مراة من اقارب العروس جايه من مصراته وتبان مبسوطه زي مايقولوا...
سعيده وحدهم مركزين مع المراة كيف تكلم ففاطمه ع حميده...
المراة: والله كامل والكمال لربي وصدقيني حتى كان بعيده عنك حنديرها كيف بنتي..
فاطمه شبحتلها هزت راسها بأيجاب وقالت: نشوف سيدها قبل...
سعيده شبحت لحميده بنظرة كلها حقد وحسد...ومن داخلها تسحن سحن...
🍃في هلبه ناس هكي لايرحموا ولايبوا رحمة ربي تنزل...
🍁🍁🍁🍁🍁
سلملي عليه وقلوا اني بسلم عليه...
بوسلي عينيه وقلوا اني ببوس عينيه..
انت يلي بتفهم عليه....
سلملي عليه سلم...
كانت تكمل فالرسمة متاعه...ودموعها كانوا يطيحوا ع ورقه اللي ترسم فيها..
كانت حاسه روحها ناقصة من غيره ومافيش لشي طعم بدونه..
قليل ماتاكل وديما فدارها وفي المدرسه شبه مطفيه...لاتهدرز ولاتضحك...
🍁اما هو...
عمار: ههههههههههه...
هانيبال :بلاش ضحك...وقولي شن رايك..
عمار هدا ضحك:سمحه.
هانيبال:مش عارف نحسها حاجه مش من قيمتها..
عمار:قيمتها من قيمتك انت عندها..
هانيبال شبحله وابتسم...بعدين شبح للتوكه اللي شراها لعروبه هديه....
عمار: هانيبال..
هانيبال :همم.
عمار: مافكرتش فبعدين؟
هانيبال شبحله :كيف بعدين..
عمار: يعني انت والبنت هدي..راك تنسى هي مش منا..
هانيبال:لكن انولدت هنى وتربت هنى ومسلمه كيفنا كيفها..
عمار:يعني مع الوقت..لما يجي نهار وتبي تخطبها مش حيعارضك سيدك هانيبال قلبه انقبض رجع شاف للتوكه وقال:خلي بعدين لبعدين..
عمار ركز ع وجهه كيف تغير سكت...
طارق:تعالوا ياهووووو كنكم متباعدين...
شبحوله وضحكوا...وهانيبال دس التوكه في جيبه وقدمولهم وكملوا دهورتهم في السوق...
🍁🍁🍁🍁
الساعه11:30....
يمسحوا فوجوههم من المكياج ومسكرين عليهم الدار...
حميده:لكن مش حلوة حفله بالأحد...
غاليه:بتسافر الإثنين ماهي..
حميده :ايه عارفه لكن مش حلوة...كان هنى تراهي دارته كيف البنات دارته بالإربعاء..والخميس جو عربها ورفعوها..
"طبعا غادي كانوا يديروا حفله يوم الإربعاء تلبس الفيلو العروسه وتمشي للمزين وليلتها ماتروحش لراجلها..اليوم اللي بعده ترجع تلبس الفيلو ويميكجوها ومع العشيه تروح لحوش راجلها"
✋مايجيني حد ويقولي وين..ومافيش منها الدوة هادي وعمرنا ماسمعنا بيها وبلا بلابلا بلا...لأخر مرة نقولها مانجيب فشي من راسي"...
المهم...
غاليه:ركزتي ع المراة اللي كانت مقعمزة حدا امي...
حميده:خيرها..
غاليه :كانت تكلم فيها وتشبح يالاك..
حميده: تشبح ولا تنحرق...ومشت طلعت من الدار بش تغسل وجهها...
وغاليه تضحك...
🍁🍁🍁🍁
هديكا مش قادرة تقيم ايدها من الذهب اللي لابساته..
امال: عليك حظوظ حظوظهن..
حدهم: تلاته في طرابلس ووحده اهي بتعدي لمصراته وراحت كان ع بنتي اللي خدت خوهن طايح السعد..
امال : تو انتي من قالك يمي حميده بتوافق..
حدهم :وليش ماتوافق ياحنه..وكان اني وطلبوك مني ناس كيفهم راني خليتهم يروحوا بيك..
امال: لهالدرجه يمي...
حدهم : ماك ماريتهاش...ناضت..خل نخش نبدل ونرقد تعبت وانحرق دمي..
امال جت بتنوض وراها
"امااال"..
امال تاففت ومشت طلعت لخوها..
خليفه بعصبيه: عدي جيبلي الحداد ..
امال ركزت عليه رفعت حاجبها ولفت ومشت..
خليفه: حميده والله ماكاسبها راجل غيري..
🍁🍁🍁🍁🍁
متكي ع السرير ويشوفلها..
ميلاد: ماتمسحيش وجهك..
شبحتله سعيده وابتسمت برفعة حاجب وقالت بصوت فيه دلع :باهي...
ميلاد بإبتسامه: عدي سكري الضي وتعالي بسرعه...
ضحكت ومشت جهة مفتاح الضي...
وكانت فرحانه ...مش للهفه ميلاد عليها...لا لشي تاني حتعرفوه....
🍃وعدت ليله بطولها...لإن الشتي قرب يجي..والليالي بدوا ياخدوا من ساعات النهار استعداد لقدومه...
وجي اليوم اللي بعده....
في المدرسه..
في الحصة الأخيرة....
اللي كانت رياضه...
عروبه كانت مقعمزة تتفرج ع المباراة ومابتش تلعب...
غزاله:ملاحظين سالم..
سالمه: خيره ..
غزاله:معاش مدروني..
سالمه: مش هدى اللي تبيه..
غزاله ضحكت: ايه بس يعني حلو لما يكون في حد مهتم بيك...
سالمه :ههههههه عليك تفكير...
شبحت لعروبه لقتها سرحانه والدموع معبيات عيونها..
سالمه تنهدت :انتي الحب هدى بيقتلك..
عروبه شبحتلها: امتى يجي غدوة بس..
غزاله:حتى كان روح غدوة ماهو جاي للمدرسه..
عروبه طاحت من عينها دمعه ..لفت وجهها ومسحتها..
والبنات تنهدوا بضيق وهما يشوفولها...
🍁🍁🍁🍁🍁🍁
💓سرت...
موجودة فحوش خالها...
هندا : عيت امي وهي تحكي عنه وشن قاللها خالي ع السباق وشن دار فيه عمار .
سمر بإبتسامه:طبيت فيه من قبل مانشوفه..
هندا: مزال لين تشوفيه...امي قالتلي حوش خالي يوتوا لعزومه كبيرة لما يروح....شدي حيلك سمر...الفتي انتباهه بس برزن...
سمر ابتسمت برفعة حاجب: اني عرفت شخصيته من كلامك عنه وتو نعرف كيف نجيبه نجيبه..
هندا بضحكه:تعجيبني ياسمورة..
ضحكت سمر:تربيتك ...
ضحكوا الزوز....
🍁🍁🍁🍁🍁🍁
الساعه6:00مساءا...
مشت فاطمه للعرس...
وكانت تراجي امتى تجيها المصراتيه تكلمها في الموضوع مرة تانيه..لأنها خدت شور رمضان الصبح ورمضان وافق..
لكن المراة كانت متجنبه تشبح لفاطمه طول الوقت وفاطمه استغربت فيها...
وهدا كله كان ع عيون سعيده اللي كانت طول الوقت مبتسمه وتصفق وتغني..
فلاش باك..
الليله اللي قبلها...
ناضت فاطمه والبنات بش بيروحوا..
فاطمه: هي ياسعيده وحدهم..
سعيده:روحوا ديداي تو نلحقوا حني..
حدهم: مازال بنقعد شوي..
فاطمه :ع كيفكم...
مشت فاطمه هي وبناتها وطلعوا...
شويه ..
وسعيده ناضت وهي تشوف لأمها كيف منشغله بالهدرزة...
وصلت في المراة وقعمزت حداها..
بعد سألتها ع حالها وحوالها وهدرزوا شويه..
سعيده: اني كنتها...
المراة: اها بنت خو رمضان انتي..
سعيده: ايه واخده ولد عمي...وحتى بنات عمي متسميات ع خوتي..
المراة استغربت:قصدك في بنات لفاطمه غير الخمسه اللي نعرفهن..
سعيده دارت روحها مستغربه:لا مافيش غيرهن..اني قصدي الزوز اللي كانن هنى..
المراة تفاجئت هلبه...
سعيده؛ ماه عمي وسيدي متفقين ياخدوا من بعضهم ..قسم البنات الأولات جاهن مع غيرنا...لكن الصغيرات الزوز شديناهن لخوتي.
المراة وهي مصدومه هزت راسها بإيجاب وقعدت ساكته..
وسعيده تراقب فردة فعلها وحست انها وصلت للي تبيه..
الوقت الحاضر...
سعيده تصفق وتغني: الدنيا واسعه وعريضه..ياسعد اللي نيته بيضا...
🍁🍁🍁🍁🍁🍁🍁
الساعه 11ليلا...
غاليه ادوم فشعرها:امي من لما روحت من العرس مش عاجبتني..
حميده:تلقي ديداك ولا بنت عمك سمعنها كلام زي
عادتهن..
غاليه : سحيقه تسحقهن كانهو هكي..
"غااااليه...حمييده"..
الزوز وهما متفاجئات: هانيبال!!!
🍁🍁🍁🍁🍁🍁
تاني يوم
الساعه 8:00
هايل بيجي يروح بيكن اليوم اني مشغول واجد..
عروبه تقول من يخنق فيها: باهي...
عودة كانت نازله قبلها..
هي نزلت وصكرت الباب..وكانت طايرتلها....
مشت السيارة...
شدتها اختها من ذراعها:عروبه شوفي..
شبحتلها بعدين شبحت وين ماتشبح...
توسعوا عيونها...وارتسمت ع وجهها ابتسمت فرح حلوة 💖
وقلبها يرقص رقيص من الفرحه💓💓💓💓💓💓💓
كانت واقفه في مكانها جامده وتشوفله وخلاص💖💓...
هو ضحك...لبس طاقيته..واشرلها بيده تخش..
هي ضحكت من بين دموعها...
ودارت اللي قاللها عليه..شدت يد اختها ومشوا للباب..وقاعده تشوفله وتضحك بفرح...
لحقوا صاحباتها عليها قبل لتخش..
سالمه بضحكه: طيب فيك ياحنه...
غزاله : واخيرا شفناك تضحكي..
"خشيي فيسع" ..
شبحتله ابتسمت خجل وخشت..
واختها وصاحباتها وراها ويضحكوا..
وهو ابتسم ع جنب وخش....💖
وهدا كله كان ع عيون امال اللي قريب تنحرق....
خشت بعد خش وهي بتموت...وبالذات انه متجاهلها تماما..
🍁🍁🍁🍁
الساعه10:00
في المصنع...
مش ع كيفك اني راهو..
سميه بدموع؛قتلك كنت مضايقه من مشاكل صايرات عندنا في الحوش..
الهادي بعصبيه: باهي باهي عدي من حداي تو وخليني نخدم ع راسي..
هي اضايقت...شبحتله شويه بعدين لفت ومشت..
هو كان ينظف في وحده من الآلات...
وكان بحداه شيشة اشيدو...
من كثر مكان معصب كان يرجف وقتها..
شد شيشه بيصبها انطلست منه وتبزعت ع سرواله...
....يتبع.....
