مالا هدا يهبل يهبل😍
#العشق_المتمرد
الجزء 28
دارو الغدي...
رز بالبصله..وبازين.."في اللي ماياكلش البازين 😁"
لكن عمار ماكانش منهم...يعشق حاجتين البازين..والعصبان..
بس مع هدا يدوب كلي...مش لأنه ماعجباش لا...
لإن ماعنداش نيه..برغم ان ماكلاش شي من الفطور ونقولوا الضيافه ماتعتبرش ماكله..
يعني مفروض يكون ميت جوع..وقدامه الماكله اللي يحبها معناها مفروض ياكل بشراهه..
بس نية مافيش...
نقوللكم قبل امتي يخش هداكا الشعور للقلب بقوة وفجأة ومش محسوبله حساب..يخلي كل شي فينا ملخبط..
هو مش قادر يحولها من راسه..شكلها..جسمها...حركتها وهي تجري...صوتها...شعرها المظفور...
شعرها المظفور!!
فلاش باك⚡
<< لفها ليه: ربي يحفظك ياسمحه..
باسها ع راسها ووقف: عدي العبي هي..
دلال بإبتسامه طفوليه : طفرة؟! "ظفرة"
عمار ضحك :ايه طفرة ...حلوة..
دلال : ايه..حلوة...>>
الوقت الحاضر⚡
ارتسمت ع وجهه ابتسامه مفاجأة...
استاقض ع صوت هانيبال يقوله..
هانيبال:عمار خيرك ماتاكل..
شبح لهانيبال شويه وع وجهه نفس الإبتسامه وقال بصوت هادي:ناكل 💓..
هانيبال ضيق عيونه بإستغراب وهو يضحك..
وفجأة عمار بدي ياكل ومازالت ع وجهه نفس الإبتسامه...
وهانيبال مركز معاه...ومستغرب..
🍁🍁🍁🍁🍁
تموا الغدي...
وجابوا للمسكينات الماعين وطاحوا فيهم..
اللي تلمهم..اللي تكد اللي تمصمص اللي تمسح..
مابوش يهدرزوا بش يكملوا الماعين بكري...
في الصاله..
كانوا كامله وفاطمه يهدرزوا ...
وكامله مراة متواضعه وطيبه ماعندهاش ع التفخفيح...
والبنات حداها يهدرزوا وتريحوله ع الأخر..
كملوا البنات الماعين وتوجهوا للدار..وكامله بعيونها مع دلال...لين خشت..
كامله شبحت لنعيمه: نعيمه البنيه الشقرا بنتك..
زينب شبحتلها..
نعيمه ابتسمت :ايه بنتي...
كامله :ماشاء الله...مواليد كم..
نعيمه:مواليد 90..
كامله ابتسمت وهزت راسها بإيجاب :ربي يحفظها..
فاطمه؛شن داير عمار مع مرته..
كامله :يافاطمه راهو عمار واخدها عشان ضراري محمود الله يرحمه بس ..يعني مش كيف ماأنتي فاهمه..
فاطمه:قصدك مش عايشين كيف الراجل ومرته ...
كامله:كيف ماقتلك واخدها عشان ضراري خوه وبس..وهو ان شاء الله قريب نزوجه ويدير عويله ع حاله..
استغربوا البنات جرأتها كيف تحكي ع حاجه خاصه هكي قدامهم.
الوحيده اللي كانت شبه فاهمه عليها..زينب...
🍁🍁🍁🍁
متكيات يهدرزوا..
دلال: نقولوا لهاني يرفعنا..
رانيا ؛مرات يقول لا ع خاطر الضيوف اللي جايين..
دلال :خل نجرب..
شبحت لرباب ونور اللي يتفرجوا ع التلفزيون..
دلال: رباب نور ماتبوش تمشوا السوق..
رباب : ماخاطريش ..
نور:لالا..
دلال :باهي..وخدت تليفونها وبعتت رساله لهانيبال..
....
لالالا الموضوع هدى مازااال..
عمار بضحكه:راك خشيت التلاتين..
الهادي :شكلك ناوي.
عمار ابتسم ع جنب :إن شاء الله خير💓
هانيبال ضحك وقال :إن شاء الله...
عمار: قولي عبالسلام راجل نعيمه وينه..
هانيبال:روح من امس عنده خدمه..
عمار:فيش يخدم هو؟
هانيبال: *****..
عمار : اهااا...وقعد يفكر..
رن تليفون هانيبال بنغمة رساله..
طلع تليفونه من جيبه..وشاف الرساله ضحك..
عمار بضحكه: خير ياطير..
هانيبال :مش زي ماقالك عقلك..هدين بنات خواتي..
عمار قلبه دق بقوة💓..
الهادي :شن يبن..
هانيبال وهو يشوف للرساله:السوق..
الهادي :ههههه....
هانيبال: وحق الله ماعندي بال لسريبهن..
عمار:ارفعن اكيد يبن حاجه ضروريه..
هانيبال:بنرفعهن من غير كلام مادام طلبن..
كتب رساله وبعتها لدلال ..
وعمار يشبحله..وقلبه قاعد ملخبط تلخبيطه صح..
وإن شاء الله خير😁😂...
....
دلال بفرحه:قال باهي الساعه 6:30يلقانا واتيات..
رانيا بضحكه: تمام...قربت منها وهي تهمس ..شن صار فموضوع الليله..
دلال :بعتت رساله لرمزي وقالي تم..
رانيا بإبتسامه :تسلميلي يارب..
ضحكت دلال..
🍁🍁🍁🍁
واقفة تشوف في حوايجها اللي بتلبسهم فسبوع العرس..
خشت عليها اختها...
فايزة:اطلعي قعمزي معانا..
مرام التفت:بالله عليك قوليلي رايك..اين احلى ..
فايزة:الأزرق الملكي.
مرام:معناها بنلبس الاحمر..
فايزة برفعة حواجب:عليك حقيرة..
ضحكت مرام :الصراحه راحه.
ريشتها فايزة وطلعت..ومرام ضحكت ..
بعدين تنهدت وقالت:اااه ياهانيبال امتى تحس بيا..💓
🍁🍁🍁🍁🍁
الساعه 6:24مساءا..
واقفين ع سياراتهم ويهدرزوا..
هانيبال:تغيرت فيها شويه حاجات..
عمار بإبتسامه :كويس..
طلعت رانيا من الحوش وجتهم كانت لابسه بلوزة طويله ع سروال جينز ووشاح..
هانيبال:تعالي رنرونه تعالي..
قدمت رانيا وهي مبتسمه:هدى خالك عمار اذكرتيه..
عمار :لاخالها لاعمها..
هانيبال ضحك بإستغراب..
عمار وجهه ولااحمر:احمم..مانيش خالها اني ولد خال امها وبس..
هانيبال :هههههه مايبيش يكبر روحه..عنده حق اني بروحي منصدم فيهن امتى كبرن هكي..
ضحكت رانيا: كيف حالك..
عمار ابتسم :الحمد لله...وانتي..
رانيا :الحمد لله..
هانيبال:فله وين..
عمار ركز...
رانيا التفتت:اهيا..
عمار شبح للباب ...وقلبه بدي بالعار💓💕💕💓😂
كانت لابسه عبايه خليجيه بوشاحها..
شبحت جيهتهم..شافت عمار وجهها تغير..
هوطول لبس نظاراته وقعد يشوفلها...وهو مبهور💖..
قدمتلهم...
هانيبال:وهادي دلوله ياعمال..
دلال شبحت لخالها وفنصت..
هانيبال ضحك:تحشمتي...مال كان تعلمي بنهار المكياج..شبح لعمار ..تذكره..
عمار وهو يشوفلها:كويس..
هي نزلت عيونها ووجهها احمر..
عمار:شنو حالك يادلوله..
دلال بحده:دلال...
انصدموا هانيبال ورانيا..وعمار رفع حواجبه..
هي غيرت عيونها:هيا وقت خالو..
عمار ابتسم:صح وقت..
رانيا مركز عليه...
هانيبال قاعد مصدوم:احمم..باهي..
ركبت دلال من القدام وعيون عمار عليها..
وركبت من الخلف رانيا..
وعمار ابتسم وركب سيارته..
هانيبال؛شن الأسلوب هدى..
دلال:اسفه بس حسيته تمادي شن دلوله هادي..
هانيبال شبحلها :كيف خالك ره..
دلال:لامش خالي انتم خوالي خوت امي..كل شي ليه حدود..
رانيا مطت شواربها لداخل بضيق..
هانيبال:عقليتك مشكله ره..
دلال تنهدت وقالت:وراس هاني ماتخليناش نتعاركوا ..ضحكت..غيرلنا الجو وحطلنا تامر..
ضحكت رانيا..
هانيبال:نحطلك حسن عبدالله..
رانيا ودلال:هههههههههههههههههههه..
هو ضحك ولبس نظاراته ..وتحرك..ووراه عمار..
🍁🍁🍁🍁
ياوخيتي سلمه ياربي..
كفايه: المانيات ره...
غاليه: ربي يفتح عليه ويعطيه يارب..
كفايه قربتلهم ومدتلهم فلوس:هادوا فلوسكم.
حميده:لاعليش نهاري هدا بضاعه دفع فيها الفلوس..
كفايه:حلف بالطلاق ماواخد فيها قرش..
ضحكوا حميده وغاليه..
حميده بضحكه: انظر من اين وحده فيهن..
كفايه:ايييه عرم..قريب سته ولا سبعه عطاني نكلمهم فأسبوعين..وكل وحده تقولي ياعمتي..
غاليه:وانتي مسايرتيه!!
كفايه؛كل مرة يقولي هادي بنثبت عليها يام واني نصدق..
حميده:ههههههه..يضحك عليك حتى انتي.
ضحكت كفايه..
ع خشة زينب:ع شنو تضحكوا ضحكوني معاكم.
قعمزت وشبحت لباكوات الإستشوار واللاسترا اللي عند حميده وقالت..من محل عماد هادوا..
كفايه :ايه..
🍁🍁🍁🍁
خاشات لوحده من المحلات متاع الإكسسورات ويتفرجوا.
رانيا:حلو هدا دلوله..
دلال :لالا هداكا مازال احلى..
رانيا :ايه صح..
دلال قعدت ادور بعيونها ع المحل..
وصاحب المحل مفنجل عيونه فيها😍...
جت عينها ع الباب..
لقت هانيبال يتكلم بالتلفون..بتغير عيونها جو ع عمار اللي كان متكي ع مقدمة السيارة ويشوفلها..
غيرت عيونهاطول:مصح وجهه..
رانيا :من هو..
دلال:هدا ولد خالهم يحساب روحه صغير..
رانيا بضحكه:لقتيه يشبحلك ولا..
دلال :ع اساس عسكري ورتبه..
رانيا ضحكت وخلاص..
شويه...وخدوا اللي يبوه وطلعوا..
هانيبال:خلاصو..
دلال:لامازال حاجه وحده.
هانيبال:سريبك سريب انتي.
ضحكت دلال....
ورانيا مركزة ع عمار صح لابس نظاراته بس واضح زي عيون الشمس يشبح لدلال..
قدمت دلال وركبت السيارة...من اللتالي ورانيا من القدام..
"هكي متفقات😁"..
هانيبال:سامحنا بنشحطوك ياملازم..
ضحك عمار: مافيش مشكله..شبح لدلال اللي غيرت عيونها مجرد ماشبحلها..
ابتسم ومشي لسيارته..
وركب هانيبال وتحركوا...
هو في السيارة سخن رغم انه فاتح المكيف ..
حول العمامه من ع راسه..وحطها ع الكرسي اللي جنبه..
ووجه مرايه السيارة لوجهه..وقعد يساوي فشعره بأيديه ويشوف لشكله...
عمار:عليك بلي..حتى التجاعيد طلعن واني مش مستاقض لروحي...ضحك بعدين شبح القدام تنهد وقال:غير امتى كبرتي هكي بس 💓...
💕كملوا دورتهم في السوق ولاقدر عمار يحول عيونه عنها وين تجي قدامه..
بس طبعا مش نظرات واحد خفيف..لا نظرات حد رزين وثقيل..ومن تحت النظارات يشبح 😁..
وهي كبدها درهت منه..رسمي مش متقبلاته...اولا لكونه من جماعه القدافي..وهي ورتت هالكره من اكثر من جهه..
بوها..جدها حمد..خالها هانيبال..
وغير هكي عندها وجهة نظر برغم صغر سنها الا انها بانيه وجهة نظر معينه حول وضع البلاد..وليها في السياسه...
وتاني شي مهضمتاش..
وصلوا للحوش..
طول نزلوا من السيارة..
كانوا رمزي وحمزة واقفين حدا مستراح الحوش الاول..
حمزة فلستوا بيه..
دلال بضحكه:هو كريم وحتي نستاهلوا..
ضحك حمزة💓..
وعمار يشوف...وجوه انقلب..وجاته رغبه وقتها يعطي حمزة بوني ع وجهه يطيحله سنونه..
عسكري هدا مايعرفش يتعامل غيرهكي😁..
المهم...
تبادلوا رمزي ورانيا النظرات 💕...
وبعدين خشوا البنات داخل..لقوا مبروكه ونجيه وصابرين داخل..
سلمت عليهم رانيا بعدين دلال..
شبحت رانيا فم البوابه لقت سند مشتله تجري...
ودلال لحقتها..
صابرين:بنتك نعيمه.
نعيمه ابتسمت :ايه..
نجيه:تبارك الرحمن..
وزينب تشوفلهم بغيظ...
🍁🍁🍁🍁
ويفوت باقي اليوم.....
وفي ناس ع غير حالها الأول...
مش قادر يحولها من باله..
ومضايقه نكرانها ليه...كبرت وتغيرت في كل شي..ماعدا طول لسانها..
مع الرجاله ومش معاهم...هو كان متصدر التقعميزة لكن عقله شبه غايب عنه..
اماقلبه هدا غايب من وقت..
ماهي رفعاته مع سلسلتها💓...
اما هي فكانت لاهيه مع خالاتها وبنات خالاتها في تستيف الحلويات فبكواتهم...
ويسمعوا في مغامرات رباب..
رباب:قالي بالله عليك يابنيه رقمك قلبي يبي انعاش..
غاليه بضحكه:وانتي شن درتي..
رباب : هربت..الباين علي دماغه واخد لفه...
دلال بضحكه:جو عليك..
رباب:اييييه..مانطيح كان في العاهه وخوه..
حميده :واللي كنتي تكلمي فيه البارح عاهه..
رباب:ايه عاهه المهم تشد فواحد..
ضحكوا...
جت نور:رانيا هانيبال قال نبوا شاهي..
غاليه:شاهي شنو الواحد في الليل..
نور: هو هكي يبي وقال رانيا ديره شاهيها قنين..
شبه فهموا حميده وغاليه النعته..
ناضت رانيا :باهي..
ومشت طلعت ووراها نور..
وصلت في الكوجينه..
لقت رمزي واقف في الروشن..
وقعدت نور تحرسلهم😁...
رمزي :دلال هدي زعيمه.
رانيا ابتسمت؛شجو..
رمزي:وحق الله مايولي حلو غير لما نشوف عيون القضوم هدين..
رانيا ابتسمت بخجل :رمزي..
رمزي :ياقلب رمزي..ياروح رمزي..ياعمر رمزي..ياكل شي فرمزي...اااااه ياني يارمزي..💓
رانيا :هههههههههه..
رمزي :مستاحشك يافرخه والله تعبت تعبت واجد من غيرك.
رانيا : بابا عطاني وعد بعد تطلع النتيجه يجيبلي تليفون..
رمزي بجديه. : ايه كويس جبتي سيرة الجامعه...اسمعيني كويس..رانيا..سريب بنات الجامعه اللي نشوف ونسمع عنه مانبيشي..اللبس البايخ والمكياج لا..زملاء ودفنقي فارغ لا..تعدي تقري قرايتك وتروحي وتمت.
رانيا بنظرة حب:حاضر..💓
رمزي:يحضرلك الخير ياقلب قلبي انتي💓
رانيا ضحكت بخجل:خلاااص 💓
رمزي : هههههههه...طلع من جيب الشورت متاعه طرف شكلاطه..هاكي ياسمحه..
رانيا :سنكررس😍 ...جت بتاخدها...
رمزي قرن حواجبه : راجي...
ضحكت...فتحلها الغلاف وعطهالها...
خدتها...وهي حطت يدها في جيب فانيلية التوته وطلعت الحديده وعطتهاله...وقالت...مبروك النجاح💖
رمزي بضحكه: شنو هدي ؟!
رانيا: هادي نبيك ديما لابسها بالذات لما تمشي للجامعه بش لو...لوووو..عقلك مشي هني ولاهني..ولاعيونك مشوا هني ولاهني..تذكرني ويرجعلك عقلك..
رمزي: ههههههههههه...هبله هبله ومتلفه..تواني نسيتك بش نذكرك...ولانقدر نشوف لغيرك؟ تي وربي يشهد عيوني ماقابلات يشوفن غيرك والله..
رانيا ابتسمت برفعة حاجب؛انتم كلكم تقولوا هكي وبعدين يتغير الكلام..
رمزي بجديه :اول شي حبي..اني ماتحطيني مع حد...تاني شي اني معاك راجل..واللي فقلبي من عمر راهو وايام شكلاطة الورد يشهدن..
ابتسمت..
رمزي :واني وياك حنكونوا كيف عمي الهادي وسميه..كان مش خير منهم...
ضحكت رانيا: يااااه يارمزي...كل ماتخطر عليا قصتهم تعطيني امل فيا اني وياك..
رمزي ملامح وجهه تغيرت: رانيا...اسمعيني جاي...بيني وبينك مايخش شي..اني والله ماضال الا واخدك غصب عن امي وامك..وسيدي وسيدك...مازلتي ماتعرفي رمزي يارانيا وحق الله مانسلم فيك لو كان نموت..
رانيا:بعيد السو عليك حبيبي💓..
رمزي ضحك: عاوديها عاودي..توا تعاوديها تو..
رانيا :ههههههههه...
"اااي خالو رقبتي"..
رانيا بفزع تأشر بإيديها:برا برا برا..
رمزي تكنطا لين خلاص ومشي وهو طايرتله..
اماهي بدون وعي دكت الشكلاطه فجيبها..وقفت ع الشيشمه وخدت طاسه من الشباك زعمتيها تغسل فيها..
خش هانيبال: شن موقفك هنى..
نور بربكه:ماهو في تغطيه هني...
شبح القدام شبح رانيا تشرب فميه..شبح للروشن بعدين رجع شبحلها..وقال..شن ديري هنى؟
رانيا التفتت وهي مرتبكه: نشرب..وابتسمت..
شبح للروشن وهز راسه بإيجاب...
تنحنحت وجايه بتطلع فاتت من حداه وشدها من رقبتها هي ضحكت...
هانيبال؛عدي ارقدي مش باهي ليك السهر مازلتي صغيرة..
رانيا شبه فهمت قصد خالها...
طلقها ...وطلعت وهي تقول:تصبح ع خير خالو...
هانيبال؛قدامك كل خير..
شبح لنور:ايه انتي قوليلي شن عندك في تليفونك هدى..
نور: نيم بز..
هانيبال: ياعيني ...هاتي جاي التليفون يافرخه.
عطتهوله وهي تضحك..بربشه ولقاها تكلم في بنات مدهولها...
هانيبال:عليك جيل احرف..عدي ارقدي انتي التانيه عدي...
مشت نور وهي تضحك بعد ريشها من شعرها...
هو ضحك بعدين تنهد...ورجع شاف للروشن وقال:
"مازلتوا صغار ع وجع القلب 💔"
🍁🍁🍁🍁🍁🍁🍁🍁
ليلتها كانت ليلة سهر للأغلبيه...
رمزي اللي يشوف للحديده وقلبه كل ماله يزيد يعشقها كل يوم فعمره حبه ليها يكبر ..حب بدي معاه من نعومة اظفاره زي مايقولوا..وكبر معاه يوم عن يوم....💖
وهي تراجع في كلامه وهي مغمضه عيونها وكأنها ترجع تسمع فيه من جديدبنبرة صوته وبلكنته البدويه اللي تعشقها...فارس احلامها من صغرها وليلها ونهارها تدعي ربي يوصلهم للمرحله اللي وصلولولها ...
الهادي وسميه...💕
اللي يهدرزوا مع بعضهم بالتليفون والزوز فقمة الفرح ومش مصدقين انهم واخيرا ولوا لبعض بعد صبر سنين ياما صار فيهم..💓🍃
اما الملازم عمار مختار 💓..
لأول مرة فحياته يلهم ابيات شعر غزلي...كل مايجي يرتب افكاره ويستلهم ابيات شعر في الفخر والوطن يلقى روحه يستلهم شعر فيها هي..يتغزل فوجهها وعيونها وطولها وقدها...وغرورها💕....ومش عارف شن دارت فيه فنهار...
قلبت كيانه قلب...دلوله💓...
اللي كانت راقدة فسابع حلمه وماتندري عليها منين زارقه..
وغير عمار يسهر فليلها ويفكر هل ياخد موقف في العرس..لأنه اكثر مناسبه ممكن يحصل فيها معاها فرصه...
وقعد اغلب ليله يفكر لين خداه النوم..
🌟بينما غيرهم عاد سهران في التشليط ع قولت الشراقه 😁 يكلموا وحده التانيه تخش عليهم انتظار😂...
نحكي ع عمر وعماد....
اما الباقي فهم يغطون في نوم عميييق..😴...
🍁🍁🍁🍁🍁
صباح الخير ياوطنا يسير بمجده العالي..
إلى الأعلى..
🌸هدا صوت حميده وهي تغني الصبح لما تخلص في الخبزة من الفرن للفطور..
لإن غاليه لاهيه توتي فيه...
"حميدة..حميدة"...
انصدمت لما سمعت الصوت..
شبحت من ورا السور لقاته هو...
حميده بصدمه :مصح وجهك والله ماتحشم..
وخدت الصونيه متاع الخبزة ومشت بسرعه وعيونها معبيات دموع وهي ترعش...
بينما خليفه تنهد بضيق شديد وولا من جديد متوجه لحوشه🍁...
الساعه وقتها كانت 9...
وبرغم السهر كلهم فقعوا من الصبح😁...
في الحوش القديم...كانت غاليه اطيب في المعاليق اللي خدوهم من الخرفان اللي ذبحوهم...
وفم الباب كانوا واقفات رانيا ودلال يهدرزوا ع اللي صار امس..
فوق السطح..
ركب عماد المنظومه.. وكان ناوي يستفتح بيها اول واحد..
شبح لبنات خالته من فوق...
عماد:دلوله..
شبحتله...
عماد بأبتسامه:هادي ليك هاه..
ضحكوا دلال ورانيا...
ع خطمه عمر من حداهم مالاش هلبه نايض..
ويفتح عمكم عماد هديكا المنظومه ع الصبح...
غ أغنية صابر الرباعي..."يادلوله💖"
دلال قعدت تضحك منين سمعت المقدمه زبطتها..
تلقائيا عمر بدي يرقص..
عماد:ايه ايه ايه..وقعد يرقص في ايديه...
والبنات يضحكوا...وغاليه تضحك..
جاها عمر...شدها من ايديها يرقص فيها..
يادلوله عليك نموت...يااحلى من طعم التوت..
يادلوله عليك نموت ..والضحكه تلمع ياقوت..
حمزة طلع من الدار...وجي وقف حدا عماد وهو يشوف لعمر كيف يرقص فدلال وهي ميته بالضحك...ابتسم...💕
من الجهة التانيه
وين مافي المربوعه الخارجيه البعيده ع الحوش...
كانوا هانيبال وعمار نايضين...
وعمار اخر انسجام مع الأغنيه...
هانيبال:عليك متلفين ع صبح ربي..باهي اللي سيدي راقي للسوق بكري..
عمار ابتسم...وهو يسمع في مقطع..
يادلوله عليك نموت...ياأحلى من طعم التوت...
يادلوله عليك نموت ..والضحكه تلمع ياقوت 💕
تنهد..💓..
شبحله هانيبال...هو ارتبك..
عمار :احمم..ايه قتلك الفرقه توصل التلات ان شاء الله..
هانيبال؛متعبين ارواحكم ديما..
عمار :عليك قطاف 😑..
هانيبال ضحك: ايه وطارق يوصل العشيه..
ضحك عمار:قديش ليا عليه...
...يتبع.....
