المتمردين

العشق المتمرد

#رمضان_احلا_مع_جمان_فريد

#العشق_المتمرد

الجزء62

" ﺍﻳﻮﻩ .... ﺍﻣﻤﻢ ...... ﻛﻮﻳﺲ ... ﻣﺸﻜﻮﺭ ﻭﺍﺟﺪ ﻳﺎﺩﻛﺘﻮﺭ .... ﺍﻟﺴﻼﻡ ﻋﻠﻴﻜﻢ .."
ﺍﻧﻬﻰ ﺍﻟﻤﻜﺎﻟﻤﻪ .. ﻣﺠﺮﺩ ﻭﺻﻞ ﻓﻲ ﺑﺎﺏ ﺍﻟﺤﻮﺵ ..
ﻓﺘﺤﻪ ﻭﺧﺶ ...
ﺟﺎﺗﻪ ﻧﺴﻤﻪ ﺑﺎﺭﺩﻩ ... ﻭﺷﻢ ﺭﻳﺤﻪ ﺍﺷﺒﻪ ﺑﺮﻳﺤﺔ ﺍﻟﺒﺮﺗﻘﺎﻝ ﻣﻨﻌﺸﻪ ..
ﺗﻌﻮﺩ ﻋﻠﻴﻬﺎ ..
ﺻﻜﺮ ﺍﻟﺒﺎﺏ ...
ﻭﺗﻮﺟﻪ ﻃﻮﻝ ﻭﻳﻦ ﻣﺎﻓﻲ ﺍﻟﻤﻜﻴﻒ .. ﻧﻘﺼﻪ ...
ﺣﻂ ﺍﻟﺮﻳﻤﻮﺕ ..
ﻭﻣﺸﻲ ﻃﻮﻝ ﻟﺤﺠﺮﺓ ﺍﻟﻤﻜﺘﺒﻪ ﻋﺎﺭﻑ ﺍﻧﻬﺎ ﻏﺎﺩﻱ ..
ﻭﻓﻌﻼ ﻣﺠﺮﺩ ﻣﺎﻭﺻﻞ ﻟﻠﺒﺎﺏ ..
ﻟﻘﺎﻫﺎ ﻣﻘﻌﻤﺰﺓ ﻉ ﺍﻟﻜﻨﺒﻪ ﺍﻟﻠﻲ ﺗﺤﺖ ﺍﻟﻤﻜﺘﺒﻪ ﺍﻟﻠﻲ ﻛﺎﻧﺖ ﻻﺻﻘﻪ ﻉ ﺍﻟﺤﻴﻂ ..
ﺍﺑﺘﺴﻢ ﻭﻫﻮ ﻣﺘﻔﺎﺟﺄ ... ﻟﻤﺎ ﻟﻘﺎﻫﺎ ﺗﻘﺮﺍ ﻓﻲ ﻛﺘﺎﺏ ..
ﻷﺣﺪ ﺃﻭﻟﺌﻚ ﺍﻟﺬﻳﻦ ﻻﻳﺆﻣﻨﻮﻥ ﺑﻔﻜﺮ ﻏﻴﺮ ﺍﻟﻔﻜﺮ ﺍﻷﺧﻀﺮ .
ﻛﺎﻧﺖ ﺗﻘﺮﺍ ﺑﺈﻧﺴﺠﺎﻡ ..
ﻗﺪﻣﻠﻬﺎ ﻭﻗﻌﻤﺰ ﺟﻨﺒﻬﺎ ﻭﻫﻮ ﻳﻀﺤﻚ ﻗﺎﻝ :
" ﺭﺟﺐ ﺑﻮ ﺩﺑﻮﺱ .."
ﻫﻲ ﺍﺑﺘﺴﻤﺖ ﻭﺷﺒﺤﺘﻠﻪ : ﻋﺠﺒﻨﻲ ..
ﺭﻓﻊ ﺣﺎﺟﺒﻪ ﻭﻗﺎﻝ : ﻣﻨﻮ؟
ﺿﺤﻜﺖ ﻭﻗﺎﻟﺖ : ﺍﻟﻜﺘﺎﺏ ﺍﻟﻜﺘﺎﺏ ..
ﺭﺩ : ﻧﺤﺴﺎﺍﺍﺏ ..
ﺿﺤﻜﺖ ..
ﺍﺑﺘﺴﻢ ﻭﻗﺎﻝ : ﺷﻦ ﺍﻟﻠﻲ ﺟﺬﺑﻚ ﻓﻴﻪ ..
ﺩﻻﻝ : ﺗﺤﺴﻪ ﻳﺘﻜﻠﻢ ﻉ ﺣﺎﺟﺎﺕ ﻣﻨﻄﻘﻴﻪ .. ﺍﻟﺮﺃﺳﻤﺎﻟﻴﻪ ﻭﻫﻴﻤﻨﺘﻬﺎ ..
ﻫﻴﻤﻨﺔ ﺍﻣﺮﻳﻜﺎ ﻉ ﺍﻟﻌﺎﻟﻢ ﺑﺎﻟﺘﺤﻜﻢ ﻓﻲ ﺍﻹﻗﺘﺼﺎﺩ ﺍﻟﻌﺎﻟﻤﻲ ..
ﺷﺎﻳﻔﻪ ﺍﻥ ﻛﻼﻣﻪ ﻫﺪﺍ ﻓﻴﻪ ﺷﻲ ﻣﻦ ﺍﻟﺼﺤﻪ ..
ﻳﺘﺄﻣﻞ ﻓﻴﻬﺎ ﻭﻫﻮ ﻣﺒﺘﺴﻢ .. ﻗﻠﻴﻞ ﻣﻦ ﺟﻴﻠﻬﺎ ﺍﻟﻠﻲ ﻳﻬﺘﻢ ﺑﺤﺎﺟﺎﺕ ﺯﻱ ﻫﺎﺩﻱ .. ﺍﻟﻠﻲ ﻋﻨﺪﻫﺎ ﻋﻘﻞ ﺗﺤﻠﻞ ﺑﻴﻪ ﻭﺗﻔﻜﺮ ﺑﻴﻪ ﻓﻲ ﺍﻣﻮﺭ ﻋﻤﻴﻘﻪ ﺟﺪﺍ ..
ﺩﻻﻝ : ﺷﻮﻑ ﺍﻟﻠﻲ ﻗﺪﺭﺕ ﻧﻔﻬﻤﻪ ﺑﺸﻜﻞ ﻋﺎﻡ .. ﺍﻥ ﻛﻞ ﺯﻣﺎﻥ ﻭﻟﻴﻪ ﺍﻣﺒﺮﺍﻃﻮﺭﻳﻪ ﺣﻜﻤﺖ ﺍﻟﻌﺎﻟﻢ ﺑﻄﺮﻳﻘﺘﻬﺎ ...
ﻋﻤﺎﺭ : ﺻﺢ .. ﻉ ﻓﻜﺮﺓ ﻫﺪﻱ ﻭﺟﻬﺔ ﻧﻈﺮ ﺍﻟﻘﺎﻳﺪ ..
ﺩﻻﻝ ﺍﺑﺘﺴﻤﺖ ﺑﺘﺸﻘﻠﻴﺒﺔ ﻋﻴﻮﻥ ..
ﻋﻤﺎﺭ : ﺑﺠﺪ ﻧﺤﻜﻲ .. ﻳﻌﻨﻲ ﻣﻌﻤﺮ ﺍﻟﻘﺬﺍﻓﻲ ﺭﺟﻞ ﻣﻨﺎﺿﻞ .. ﺭﻣﺰ ﺩﺍﺭ ﻟﻠﺒﻼﺩ ﺣﺎﺟﺎﺕ ﻭﺍﺟﺪﻩ .. ﺟﻼ ﺍﻟﻘﻮﺍﻋﺪ ... ﺃﻣﻢ ﺍﻟﻨﻔﻂ .. ﻣﺸﺮﻭﻉ ﺍﻟﻨﻬﺮ ..
ﻗﺎﻃﻌﺎﺗﻪ ﺩﻻﻝ : ﺣﺮﺏ ﺗﺸﺎﺩ .. ﺍﻟﺤﺼﺎﺭ ..
ﻋﻤﺎﺭ ﺷﺒﺤﻠﻬﺎ : ﺣﺮﺏ ﺗﺸﺎﺩ ﻟﻴﻬﺎ ﻫﺪﻑ ﻭﻏﺎﻳﻪ ..
ﺩﻻﻝ : ﺑﺎﻫﻲ ﻭﺍﻟﺤﺼﺎﺭ ﺷﻦ ﺳﺒﺒﻪ ﻗﻮﻟﻲ ..
ﻋﻤﺎﺭ : ﺗﻌﺮﻓﻲ ﻛﻮﻳﺲ ﺍﻧﻪ ﺭﺍﻓﺾ ﻟﻸﻧﻈﻤﻪ ﺍﻹﻣﺒﺮﻳﺎﻟﻴﺔ ﺍﻟﺤﺎﻛﻤﻪ ﻓﻲ ﺍﻟﻌﺎﻟﻢ ﻭﺍﻟﻠﻲ ﺍﻧﺘﻲ ﻛﻨﺘﻲ ﺗﺤﻜﻲ ﻋﻠﻴﻬﻦ ﺗﻮﺍ .. ﻭﺍﻟﺤﺼﺎﺭ ﻧﺘﻴﺠﻪ ﻟﻤﻮﺍﻗﻔﻪ ..
ﺩﻻﻝ : ﻣﻮﺍﻗﻔﻪ ﻣﺎﺩﺭﺍﺕ ﺷﻲ ﻟﻠﺒﻼﺩ ﻭﺷﻌﺒﻬﺎ ﻏﻴﺮ ﺍﻧﻬﺎ ﺑﻬﺪﻟﺘﻬﻢ ﻭﻭﺧﺮﺕ ﺑﻴﻬﻢ ﻟﺘﺎﻟﻲ .. ﻣﺎﻧﺒﻴﻜﺶ ﺗﻨﺴﻰ ﻋﻤﺎﺭ .. ﻣﺎﻻﺵ ﻫﻠﺒﻪ ﻣﺘﺼﺎﻟﺢ ﻣﻊ ﺍﻣﺮﻳﻜﺎ ﻭﻣﺴﻠﻤﻬﺎ ﺍﻟﺒﺮﻧﺎﻣﺞ ﺍﻟﻨﻮﻭﻱ ..
ﻋﻤﺎﺭ : ﻣﻦ ﺧﻮﻓﻪ ﻉ ﺍﻟﺒﻼﺩ ﻳﺼﻴﺮ ﻓﻴﻬﺎ ﺯﻱ ﺍﻟﻌﺮﺍﻕ ..
ﺩﻻﻝ : ﻣﻦ ﺧﻮﻓﻪ ﻉ ﻧﻔﺴﻪ ﻳﺼﻴﺮﻟﻪ ﺯﻱ ﻣﺎﺻﺎﺭ ﻟﺼﺪﺍﻡ ...
ﺭﻓﻊ ﺣﻮﺍﺟﺒﻪ .. ﺑﻌﺪﻳﻦ ﻏﻴﺮ ﻋﻴﻮﻧﻪ ﻟﺴﺎﻋﺘﻪ ﻭﻗﻌﺪ ﻳﺤﺮﻙ ﻓﻴﻬﺎ ..
ﺩﻻﻝ : ﺍﻟﻘﺬﺍﻓﻲ ﻣﺎﺩﺍﺭ ﺷﻲ ﻟﻠﻴﺒﻴﺎ ﻭﻻ ﺍﻱ ﺷﻲ .. ﺍﻧﺖ ﺗﻌﺮﻑ ﻭﻛﻠﻨﺎ ﻧﻌﺮﻓﻮﺍ ﺑﻼﺩﻧﺎ ﺷﻦ ﻓﻴﻬﺎ ﻭﺷﻦ ﻋﻨﺪﻫﺎ .. ﻭﻟﻮ ﻫﻮ ﻓﻌﻼ ﻛﺎﻥ ﻳﺒﻲ ﻳﺒﻴﻨﻬﺎ ﺭﺍﻫﻮ ﻟﻴﺒﻴﺎ ﻣﺎﻳﺴﺎﻭﻳﻬﺎ ﺣﺪ ﻓﻲ ﺍﻟﺸﺮﻕ ﺍﻷﻭﺳﻂ ..
ﺻﺢ ﺍﻧﻲ ﺻﻐﻴﺮﻩ ﻟﻜﻦ ﻧﺴﻤﻊ ﻭﻧﺸﻮﻑ ﺭﺍﻫﻮ ﻭﻓﺎﻫﻤﻪ ﻛﻞ ﺷﻲ ..
ﺍﺧﺮ ﻫﻢ ﺍﻟﻘﺪﺍﻓﻲ ﺍﻟﺒﻼﺩ ﻭﺍﻟﺸﻌﺐ .. ﻛﻞ ﻫﻤﻪ ﻛﺮﺳﻴﻪ ﺑﺲ ..
ﻭﺑﺎﻟﺪﻟﻴﻞ .. ﺍﻏﻨﻴﺘﻜﻢ ﺍﻧﺘﻢ ﺍﻟﻌﺴﻜﺮﻳﻪ ..
ﺷﺒﺤﻠﻬﺎ ﺑﺮﻓﻌﺔ ﺣﺎﺟﺐ ..
ﺩﻻﻝ : ﻧﺤﻨﺎ ﺟﻴﻨﺎ .. ﻧﺤﻤﻲ ﺍﻟﻘﺎﻳﺪ .. ﻧﺤﻤﻲ ﺍﻟﺜﻮﺭﺓ ﻧﺤﻤﻲ ﺍﻟﻔﺎﺗﺢ
ﺍﻟﻔﺎﺗﺢ ﺍﺑﺪﺍ ...
ﻭﻳﻦ ﻧﺴﻤﻌﻪ ﻧﻐﻴﺮﻩ ﻭﻧﻐﻨﻴﻪ ﻣﻊ ﺭﻭﺣﻲ ..
ﻧﺤﻨﺎ ﺟﻴﻨﺎ .. ﻧﺤﻤﻲ ﺑﻼﺩﻱ .. ﻧﺤﻤﻲ ﺍﻟﺸﻌﺐ .. ﻧﺤﻤﻲ ﻟﻴﺒﻴﺎ ..
ﻟﻴﺒﻴﺎ ﺍﺑﺪﺍ ..
ﻫﻮ ﻫﺪﺍ ﺷﻌﺎﺭ ﺍﻟﻌﺴﻜﺮﻱ ﺍﻟﻤﻔﺮﻭﺽ .. ﻳﺤﻤﻲ ﺑﻼﺩﻩ ﻭﺷﻌﺒﻬﺎ ... ﻷﻥ ﻫﺎﺩﻡ ﺍﻟﻠﻲ ﺩﺍﻳﻤﻴﻦ ﻣﺎﺩﺍﻣﺖ ﺍﻟﺪﻧﻴﺎ .. ﺍﻣﺎ ﺍﻟﺤﺎﻛﻢ ﻳﺠﻴﻪ ﻳﻮﻡ ﻭﻳﺘﻐﻴﺮ ﺑﺤﻴﻲ ﺍﻭ ﻣﻮﺕ ..
ﻛﻼﻣﻬﺎ ﻣﺶ ﻻﻗﻴﻠﻪ ﺭﺩ ﻣﻨﺎﺳﺐ ..
ﻻﻥ ﻓﻴﻪ ﺷﻲ ﻣﻦ ﺍﻟﺼﺤﻪ .. ﻣﻦ ﻭﺟﻬﺔ ﻧﻈﺮﻩ ...
ﻟﻜﻦ ﻫﻮ ﻳﺤﺒﻪ ﻭﻳﻌﺘﺰ ﺑﻴﻪ ﻭﻳﺸﻮﻑ ﻓﻴﻪ ﺻﺢ ﺍﻟﺼﺢ ..
ﺑﻌﺪ ﺗﻔﻜﻴﺮ ﺭﺩ ﻭﻗﺎﻝ : ﻫﻮ ﻭﻟﻲ ﺍﻣﺮ .. ﻭﻭﻟﻲ ﺍﻷﻣﺮ ﺷﺮﻋﺎ ﻣﻄﺎﻉ ﻭﻭﺍﺟﺒﻪ ﺣﻤﺎﻳﺘﻪ .. ﻭﺍﻟﺪﻋﺎﺀ ﻟﻪ ...
ﺍﺑﺘﺴﻤﺖ ﺩﻻﻝ ..
ﻋﻤﺎﺭ : ﺍﻟﺒﻼﺩ ﻫﺪﻱ ﻣﻦ ﻏﻴﺮﻩ ﺗﻌﺪﻱ ﻓﻴﻬﺎ ..
ﺩﻻﻝ : ﺍﻛﻴﺪ .. ﻣﺎﻫﻮ ﺍﻟﻨﻈﺎﻡ ﺍﻟﻠﻲ ﻣﺎﺷﻴﻪ ﺑﻴﻪ ﻫﺎﻟﺒﻼﺩ ﻣﺎﺗﺨﻠﻲ ﺣﺪ ﻏﻴﺮ ﺍﻟﻘﺬﺍﻓﻲ ﻳﻘﺪﺭ ﻳﺤﻜﻤﻬﺎ ..
ﺷﺒﺤﻠﻪ ﺷﻮﻳﻪ ﺑﻌﺪﻳﻦ ﻗﺎﻝ : ﺍﻓﻜﺎﺭﻙ ﻳﺒﻦ ﺗﺼﺤﻴﺢ .. ﺭﺩﻱ ﺑﺎﻟﻚ ..
ﺩﻻﻝ ﺑﻀﺤﻜﻪ : ﺷﻦ ﻣﺎﻻ ﻧﺎﻭﻱ ﺗﺼﻔﻴﻨﻲ ﻭﻻﺗﻨﻔﻴﻨﻲ ﻛﺎﻥ ﻣﺎﺻﺤﺤﺘﻬﺎﺵ ..
ﻋﻤﺎﺭ ﺿﺤﻚ ﻭﺧﺪﻱ ﻣﻨﻬﺎ ﺍﻟﻜﺘﺎﺏ ﻭﻗﺎﻝ : ﻋﺪﻱ ﺩﻳﺮﻳﻠﻨﺎ ﻏﺪﺍ ﺳﻤﺢ ﻣﻦ ﺍﻳﺪﻳﻚ ﺍﻟﺤﻠﻮﺍﺕ ..
ﺩﻻﻝ : ﻫﻬﻬﻬﻬﻬﻪ .. ﺍﻟﻤﺮﺍﺓ ﻣﺎﻟﻴﻬﺎ ﺍﻻ ﺍﻟﻜﻮﺟﻴﻨﻪ .
ﻫﻮﺿﺤﻚ ﻭﻗﺎﻝ : ﻳﻌﺠﺒﻨﻲ ﺍﻟﻠﻲ ﻳﻔﻬﻤﻬﺎ ﻭﻫﻲ ﻃﺎﻳﺮﺓ ..
ﺿﺤﻜﺖ ﺑﻌﺪﻳﻦ ﺷﺒﺤﺘﻠﻪ ﻭﺍﺑﺘﺴﻤﺖ ..
ﻭﻫﻮ ﻣﺒﺘﺴﻢ 💓..
ﺑﻌﺪﻳﻦ ﻗﺎﻟﺖ ﺑﻀﺤﻜﻪ : ﻣﺎﻋﻨﺪﻳﺶ ﻧﻴﻪ ﻧﺪﻳﺮ ﺷﻲ ﺣﺎﺳﻪ ﺭﻭﺣﻲ ﻛﺎﺭﻫﻪ ﺍﻟﻜﻮﺟﻴﻨﻪ ..
ﻋﻤﺎﺭ : ﺑﻠﻲ .. ﻛﺎﻥ ﻣﺎﻧﻠﺤﻖ ﺍﻟﻜﻮﺟﻴﻨﻪ ﺣﺘﻰ ﺍﻧﻲ ..
ﺷﺪﺕ ﻳﺪﻩ ﻭﻗﺎﻟﺖ : ﺍﻻﺍﺍﺍ .. ﻧﺤﺒﻚ ﺍﻧﻲ ﻫﻠﺒﻪ ..
ﻫﻮ ﺿﺤﻚ ﻭﺷﺪ ﻉ ﻳﺪﻫﺎ ﻭﻫﻮ ﻳﻘﻮﻝ : ﺗﻌﺮﻓﻲ ﺍﻧﻲ ﻣﺠﻨﻮﻥ ﺑﻴﻚ ﻭﻣﻴﺖ ﻋﻠﻴﻚ ﻣﻮﺕ .. ﻭﻛﺎﻥ ﻧﻠﻘﻰ ﻧﺤﻄﻚ ﻓﻲ ﻭﺳﻂ ﻗﻠﺒﻲ ﻣﻦ ﺩﺍﺧﻞ ﻧﺤﺒﺴﻚ ﺑﻴﻦ ﺿﻠﻮﻋﻲ ..
ﻫﻲ ﻗﻠﺒﻬﺎ ﻳﺪﻕ ﺑﻜﻞ ﻗﻮﺓ ..💓 ﻗﺎﻟﺘﻠﻪ : ﻋﺎﺭﻓﻪ .. ﻭﺍﻧﻲ ﻣﻦ ﻛﺘﺮ ﻣﺎﻧﺤﺒﻚ ﻭﻟﻴﺖ ﻋﺎﻳﺸﻪ ﻉ ﺣﺴﻚ ..
ﺍﺑﺘﺴﻤﻮﺍ ﻟﺒﻌﺾ ﺑﺤﺐ ﻭﻗﻌﺪﻭﺍ ﻳﺘﺒﺎﺩﻟﻮﺍ ﻓﻲ ﻧﻈﺮﺍﺕ ﺗﻌﺒﺮ ﺍﻛﺜﺮ ﻛﻼﻡ ﻟﺴﺎﻥ 💗💗💗💗
ﺑﻌﺪﻳﻦ ﺿﺤﻜﺖ ﻭﻗﺎﻟﺖ ..
ﺩﻻﻝ : ﻋﻤﺎﺭ ﺩﻳﺮﻟﻨﺎ ﺑﻜﺒﻮﻛﻲ ﺧﺎﻃﺮﻱ ﻧﺬﻭﻗﻬﺎ ﻣﻜﺮﻭﻧﺘﻚ ..
ﺑﺎﺱ ﺭﺍﺳﻬﺎ ﻭﻗﺎﻝ : ﻣﺎﻳﻘﻌﺪ ﺷﻲ ﻓﻲ ﺧﺎﻃﺮ ﻋﻤﺮﻱ ﺍﻧﻲ ... ﺍﺑﺘﺴﻢ ﻭﻗﺎﻝ ﺗﺤﺒﻴﻬﺎ ﺣﺎﺭﺓ .. ﻭﺳﺒﻴﻘﻪ .
ﺿﺤﻜﺖ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﺑﺎﺳﻬﺎ ﺭﺍﺳﻬﺎ ﺗﺎﻧﻲ ... ﻭﻧﺎﺽ ..
ﻋﻤﺎﺭ : ﺧﻞ ﻧﻌﺪﻱ ﻧﺒﺪﻝ ﻗﺒﻞ ..
ﻫﻲ ﻧﺎﺿﺖ ﻭﻗﺎﻟﺖ : ﻟﺒﻴﻦ ﻣﺎﺑﺪﻟﺖ ﺧﻞ ﺍﻧﻲ ﻧﻮﺗﻴﻠﻚ ﺣﺎﺟﺎﺗﻬﺎ ..
ﻋﻤﺎﺭ ﻭﻫﻮ ﻣﺎﺷﻲ ﺣﺮﻙ ﺻﺒﻌﻪ ﻧﺎﻓﻲ :. ﻻ ﻣﺎﺗﺪﺧﻠﻲ ﻓﺸﻲ .. ﻭﻃﻠﻊ ﻣﻦ ﺣﺠﺮﺓ ﺍﻟﻤﻜﺘﺒﻪ ..
ﻫﻲ ﻟﺤﻘﺎﺗﻪ ﻭﻫﻲ ﺗﻀﺤﻚ ..
🍁🍁🍁🍁🍁
ﻭﺍﻟﻠﻪ ﻣﺎﻧﻌﺮﻑ ﻛﻴﻒ ﻭﻻﺷﻦ ﺻﺎﺭ ﻗﺎﻝ ﻛﻼﻣﻪ ﻭﻃﻠﻊ ﻳﺎﻛﻔﺎﻳﻪ ..
ﻛﻔﺎﻳﻪ ﺑﻀﻴﻖ : ﻻﺣﻮﻝ ﻭﻻﻗﻮﺓ ﺇﻻﺑﺎﻟﻠﻪ .. ﻫﻮ ﺣﻤﺰﺓ ﻫﺎﺩﻱ ﻭﻣﺶ ﻣﺘﺎﻉ ﻣﺸﺎﻛﻞ .. ﻋﻼﺵ ﻳﻔﺼﻠﻮﻩ ..
ﺯﻳﻨﺐ ﺑﺒﻜﻲ : ﻣﺎﻧﻲ ﻋﺎﺭﻓﻪ ﻳﺎﻭﺧﻴﺘﻲ .. ﺍﻧﻲ ﺗﻮﺍ ﻧﺒﻲ ﻧﻌﺮﻑ ﻭﻳﻦ ﻣﺸﻲ ﻭﺍﻟﻠﻪ ﺧﺎﻳﻔﻪ ﻳﺪﻳﺮ ﻟﺮﻭﺣﻪ ﺣﺎﺟﻪ ﻳﺎﻳﺎﻣﻲ ..
ﻛﻔﺎﻳﻪ : ﺗﻮ ﻧﻜﻠﻢ ﻋﻤﺎﺩ ﻳﺸﻮﻓﻪ ..
🍁🍁🍁🍁🍁
ﻫﻮ ﻛﺎﻥ ﻫﺎﻳﻢ ﻉ ﻭﺟﻬﻪ ﻳﻤﺸﻲ ﻭﺧﻼﺹ ﻭﻣﺶ ﻋﺎﺭﻑ ﻭﻳﻦ ..
ﺣﻤﺰﺓ ﻗﺮﺍﻳﺘﻪ ﻣﻬﻤﻪ ﺟﺪﺍ ﻋﻨﺪﻩ .. ﺑﺮﻏﻢ ﺍﻥ ﻇﺮﻭﻓﻬﻢ ﻣﻮﻟﻴﻪ ﺻﻌﺒﻪ ..
ﻟﻜﻦ ﺧﺪﻡ ﺑﺶ ﻳﺼﺮﻑ ﻉ ﻗﺮﺍﻳﺘﻪ ﻭﺍﻟﻜﻮﺭﺳﺎﺕ ﻭﻣﺎﺇﻟﻰ ﺫﻟﻚ ..
ﺍﻟﻤﻬﻢ ﻣﺎﻳﺴﻴﺒﻬﺎﺵ ..
ﺗﻮﺍ .. ﺣﺲ ﻛﻞ ﺍﻟﻠﻲ ﺩﺍﺭﻩ ﺭﺍﺡ ﻉ ﺍﻟﻔﺎﺿﻲ ... ﻣﺴﺘﻘﺒﻠﻪ ﻓﻲ ﻟﺤﻈﻪ ﺿﺎﻉ ..
ﻓﻲ ﻧﻔﺲ ﺍﻟﻮﻗﺖ ﻫﻮ ﻋﺎﺭﻑ ﻛﻮﻳﺲ ﻣﻦ ﺍﻟﻠﻲ ﻭﺭﺍ ﺣﻜﺎﻳﺔ ﻓﺼﻠﻪ ..
> : ﺑﺎﻙ ﺗﺤﺴﺎﺑﻨﻲ ﻋﺪﻳﺘﻬﺎ .. ﻭﺣﻖ ﺍﻟﻠﻪ ﻟﻤﺎﻧﺪﻣﻚ ﺍﺷﺪ ﺍﻟﻨﺪﻡ .. <<
ﺣﻂ ﻳﺪﻩ ﻉ ﺫﻗﻨﻪ ﻭﻫﻮ ﻓﻲ ﻗﻤﺔ ﺍﻟﻐﻀﺐ ..
ﻣﺎﻳﻘﺪﺭ ﻳﺪﻳﺮﻟﻪ ﺷﻲ .. ﻭﻻ ﺍﻱ ﺷﻲ .. ﻻﻋﻨﺪﻩ ﺍﻟﻘﻮﺓ ﻭﻻﺳﻠﻄﻪ ﺯﻳﻪ ﺑﺶ ﻳﺮﺩ ﻋﻠﻴﻪ .. ﻭﻻ ﻳﺪﻳﺮ ﺣﻞ ﻟﻤﺸﻜﻠﺘﻪ ﻉ ﺍﻷﻗﻞ ..
ﻣﻦ ﻏﻴﻈﻪ ﺣﻂ ﺻﺒﻌﻪ ﻓﻔﻤﻪ ﻭﻋﻀﻪ ﻭﺩﻣﻮﻋﻪ ﻃﻮﻝ ﻧﺰﻟﻮﺍ ...
ﻭﺗﻠﻴﻔﻮﻧﻪ ﻳﺮﻥ ﻓﻲ ﺟﻴﺒﻪ .. ﺷﺒﻪ ﻣﺎﻳﺴﻤﻌﺶ ﻓﻴﻪ ..
🍁🍁🍁🍁
ﻳﺤﺮﻙ ﻓﻲ ﺍﻟﻄﻨﺠﺮﺓ ﻭﻳﻘﻮﻝ : ﺍﻫﻢ ﺷﻲ ﺗﺤﺮﻗﻲ ﺍﻟﻄﻤﺎﻃﻢ ﻭﺍﻟﺪﺑﺎﻳﺮ ﺯﻳﻦ ﺑﻴﺶ ﺗﺠﻴﻚ ﺑﻨﺘﻬﺎ ﻣﻠﻴﺤﻪ ..
ﺿﺤﻜﺖ ﻭﻗﺎﻟﺖ : ﻋﺎﺩ ﺭﺩ ﺑﺎﻟﻚ ﺗﻮﻟﻲ ﺳﻮﺩﺍ ﻣﺎﻧﺤﺒﻬﺎﺵ ﻫﻜﻲ ﺍﻧﻲ ..
ﻋﻤﺎﺭ ﺑﻀﺤﻜﻪ : ﺗﺲ .. ﻣﺎﺗﻮﻟﻴﺶ ﺳﻮﺩﺍ ..
ﺳﻜﺖ ﻭﻛﻤﻞ ﺷﻐﻠﻪ ..
ﻭﻫﻲ ﺗﺘﺄﻣﻞ ﻓﻴﻪ ﺑﺤﺐ ..
ﻓﻲ ﻣﻦ ﺭﺟﺎﻟﻪ ﻭﻗﻔﺘﻬﻢ ﻓﻲ ﺍﻟﻜﻮﺟﻴﻨﻪ ﺗﺰﻳﺪﻫﻢ ﺭﺟﻮﻟﻪ ﺑﺎﻟﺬﺍﺕ ﻟﻤﺎ ﻳﺒﺪﺍ ﻏﺮﺿﻪ ﻣﻨﻬﺎ ﻫﻮ ﺍﻧﻪ ﻳﺴﺎﻋﺪ ﺍﻫﻞ ﺑﻴﺘﻪ .. ﺯﻭﺟﺘﻪ .. ﺍﻣﻪ .. ﺍﺧﺘﻪ ..
ﺑﺎﻟﺬﺍﺕ ﻟﻤﺎ ﻳﻜﻮﻥ ﺭﺍﺟﻞ ﺯﻱ ﻋﻤﺎﺭ ...
ﺍﻟﻤﺸﻜﻠﻪ ﺍﻥ ﻓﻲ ﻧﻤﺎﺫﺝ ﻣﻦ ﺭﺟﺎﻟﻪ ﻣﺎﻳﺴﻮﻭﺵ ﺯﻱ ﻣﺎﻳﻘﻮﻟﻮﺍ ﺭﺍﺱ ﺑﺼﻠﻪ .. ﺍﻫﻞ ﺑﻴﺘﻪ ﻳﻜﻮﻧﻮﺍ ﻣﺮﺿﻰ .. ﻭﻻ ﺗﺎﻋﺒﻴﻦ ﻣﻦ ﺷﻐﻞ ﺍﻟﺤﻮﺵ ﺍﻟﻠﻲ ﻳﻬﺪ ﺍﻟﺤﻴﻞ .. ﺳﻮﺍﺀ ﻛﺎﻥ ﺿﻤﺎﻥ ﻭﻻﻏﺴﻞ ﺣﻮﺍﻳﺞ ﺍﻭ ﻏﻴﺮﻩ ..
ﻭﻣﻌﺎﻧﺎﺓ ﺻﻐﺎﺭ ﺯﻳﺎﺩﻩ ...
ﻣﺎﻳﻬﺘﻤﺶ ﻟﻬﺪﺍ ﻛﻠﻪ .. ﺍﻟﻤﻬﻢ ﻏﺪﺍﻩ ﻭﻻﻋﺸﺎﻩ ﻳﻜﻮﻥ ﻭﺍﺗﻲ ...
ﻭﻟﻮ ﻗﺎﻟﺖ ﺗﻌﺒﺎﻧﻪ ... ﺣﻲ ﻋﻠﻴﻬﺎ ... ﻳﺎﺑﺘﺴﻤﻊ ﻣﻨﻪ ﻛﻼﻡ ... ﺳﻢ ..
ﺯﻱ ﺍﻧﻚ ﻣﻌﺎﺵ ﺗﻨﻔﻌﻲ .. ﻭﻻ ﺍﻧﻲ ﺧﺪﻳﺖ ﻭﺣﺪﻩ ﻣﺮﻳﻀﻪ .. ﻭﻻ ﻳﻘﻮﻝ ﺧﻼﺹ ﻛﺒﺮﺗﻲ ﺗﺒﻲ ﻧﺠﻴﺒﻠﻚ ﻣﻦ ﻳﺴﺎﻋﺪﻙ .. ﻭﻫﻮ ﻫﻨﻲ ﻣﺎﻳﻘﺼﺪﺵ ﺧﺪﺍﻣﻪ ﺣﺸﺎ ﻟﻠﻪ ... ﻳﻘﺼﺪ ﻣﺮﺍﺓ ﺗﺎﻧﻴﻪ ﻃﺒﻌﺎ 🍃
ﻋﻤﺎﺭ ﻭﻫﻮ ﻳﺤﻂ ﻓﻲ ﺍﻟﺪﺟﺎﺝ : ﻭﺍﻟﻠﻪ ﺑﻨﺘﻬﺎ ﺳﻤﺤﻪ ﺑﻠﺤﻢ ﺍﻟﺨﺮﻭﻑ ..
ﺩﻻﻝ : ﻻﻻ ﻣﺎﻧﺤﺒﻬﺎﺵ ﺑﻴﻪ .. ﻧﺤﺴﻬﺎ ﺯﻱ ﺍﻟﻤﻜﺮﻭﻧﻪ ﺑﺎﻟﻘﺪﻳﺪ ..
ﺿﺤﻚ ﻭﻫﻮ ﻳﻐﻄﻲ ﻓﻲ ﺍﻟﻄﻨﺠﺮﻩ ﻭﻗﺎﻝ : ﺑﺮﻏﻢ ﺍﻧﻚ ﺩﻳﺮﻱ ﻓﻲ ﻗﺪﻳﺪ ﻻﻗﻮﺓ ﺍﻻ ﺑﺎﻟﻠﻪ ..
ﺩﻻﻝ ﺑﻀﺤﻜﻪ : ﺍﻳﻪ ﻧﺪﻳﺮﻩ ﻟﻜﻦ ﻣﺎﻧﺤﺒﺎﺵ ..
ﻋﻤﺎﺭ ﺿﺤﻚ ﻭﺟﺎﻫﺎ .. ﻗﻌﺪ ﻳﻮﺧﺮ ﻓﻲ ﺷﻌﺮﻫﺎ ﻣﻦ ﻉ ﻋﻴﻮﻧﻬﺎ ﻭﻫﻮ ﻳﻘﻮﻝ : ﺟﺎﻳﻚ ﺍﻟﻌﻴﺪ ﺍﻟﻜﺒﻴﺮ ﻭﺍﻟﺪﻭﺍﺭﺓ ..
ﺩﻻﻝ ﺑﻀﺤﻜﻪ : ﺷﻦ ﺗﺤﺴﺎﺑﻨﻲ ﻣﺎﻧﻌﺮﻓﺶ ﺍﻧﻈﻔﻬﺎ ﻣﺎﻻ .. ﺍﻣﺘﻰ ﺗﻔﻬﻢ ﻳﺎﺣﻀﺮﺓ ﺍﻟﻤﻼﺯﻡ ﺍﻭﻝ ﺍﻧﻚ ﻭﺍﺧﺪ ﻣﺮﺍﺓ .. ﻓﺎﻟﺤﻪ .. ﺣﺮﺭﺭﺓ ..
ﻫﻮ ﺿﺤﻚ ﺑﺼﻮﺕ ﻋﺎﻟﻲ .. ﺑﻌﺪﻳﻦ ﻗﺎﻝ ...
ﻋﻤﺎﺭ : ﺍﺣﻠﻰ ﺣﺎﺟﻪ ﻣﻠﻜﺘﻬﺎ ﻓﺤﻴﺎﺗﻲ ﻫﻲ ﺍﻧﺘﻲ .. ﻣﺎﻧﻨﻼﻣﺶ ﻉ ﺍﻱ ﺷﻲ ﻧﺪﻳﺮﻩ ﻉ ﺧﺎﻃﺮﻙ ..
ﺩﻻﻝ ﺑﻐﺮﻭﺭ ﻣﺼﻄﻨﻊ : ﺍﻛﻴﺪ ﻣﺎﺗﻨﻼﻣﺶ ﻭﻟﻴﻚ ﻋﺬﺭﻙ ..
ﺿﺤﻚ ﺗﺎﻧﻲ ﺑﻌﺪﻳﻦ ﻗﺮﺏ ﻭﺑﺎﺳﻬﺎ ﻉ ﺭﺍﺳﻬﺎ ﻭﻃﻮﻝ ..
ﺑﻌﺪ ﻟﻤﺎ ﺳﻤﻊ ﺻﻮﺕ ﺍﻵﺫﺍﻥ ..
ﻋﻤﺎﺭ : ﺻﺪﻕ ﺍﻟﺤﻖ ... ﺍﻟﺼﻼﺓ ﺍﻟﺼﻼﺓ ﻭﻣﺎﻣﻠﻜﺖ ﺍﻳﻤﺎﻧﻜﻢ ..
ﺍﺑﺘﺴﻢ ﻭﻣﺸﻲ ..
ﻫﻲ ﺿﺤﻜﺖ ﻭﻫﻲ ﺗﺸﻮﻓﻠﻪ ﻗﺎﻟﺖ : ﻧﻤﻮﺕ ﻋﻠﻴﻚ ﻣﻮﻭﺕ 💓
🌴🌴🌴🌴🌴🌴🌴🌴🌴🌴🌴
ﻣﻜﺎﻟﻤﻪ ﻫﺎﺗﻔﻴﻪ ..
ﻓﺼﻠﻮﻩ !! ؟
ﻋﻤﺎﺩ : ﺍﻳﻪ ... ﺷﻲ ﻣﺎﻳﺘﺼﺪﻗﺶ ﻳﺎﺭﺍﺟﻞ ..
ﻫﺎﻧﻴﺒﺎﻝ : ﻣﻌﻘﻮﻝ ﻫﻜﻲ ﻣﻦ ﻏﻴﺮ ﺳﺒﺐ ..
ﻋﻤﺎﺩ : ﻣﺶ ﻋﺎﺭﻑ ... ﺍﺳﺎﺳﺎ ﻟﻮ ﻫﻮ ﺩﺍﻳﺮ ﺷﻲ ﻋﺎﺭﻑ ﺍﻥ ﻫﺎﺩﻱ ﺣﺘﻜﻮﻥ ﻧﺘﻴﺠﺘﻪ ﻋﻼﺵ ﻳﻘﺮﺍ ﻭﻳﺘﻌﺐ ﻓﺮﻭﺣﻪ ..
ﻫﺎﻧﻴﺒﺎﻝ ﺑﺘﻔﻜﻴﺮ : ﺻﺢ ..
ﻋﻤﺎﺩ ﺗﻨﻬﺪ ﻭﻗﺎﻝ : ﺍﻟﻤﺸﻜﻠﻪ ﻣﺎﺣﺼﻠﺘﺎﺵ ﺑﻜﻞ .. ﻧﺘﺼﻞ ﺑﻴﻪ ﻣﺎﻳﺮﺩﺵ ﻗﻠﺒﻨﺎ ﺍﻟﺪﻧﻴﺎ ﺍﻧﻲ ﻭﻣﺎﻟﻚ ﻋﻠﻴﻪ ﻣﺎﻟﻘﻴﻨﺎﺵ ﺍﺛﺮﻩ ..
ﺗﺄﻓﻒ ﺑﻀﻴﻖ .. ﺑﻌﺪﻳﻦ ﻗﺎﻝ : ﺟﺎﻱ ﻟﻄﺮﺍﺑﻠﺲ ..
ﻋﻤﺎﺩ : ﺗﻢ ..
ﻫﺎﻧﻴﺒﺎﻝ : ﺗﺼﻴﺮ ﺣﺎﺟﻪ ﺑﻠﻐﻨﻲ ..
ﻋﻤﺎﺩ : ﺍﻛﻴﺪ .. ﺳﻼﻡ .. ﻭﺻﻜﺮ ...
ﻭﺻﻞ ﻟﻤﺤﻠﻪ ... ﺩﺭﺱ ﻭﻧﺰﻝ .. ﻭﺧﺸﻠﻪ : ﺍﻟﺴﻼﻡ ﻋﻠﻴﻜﻢ ..
ﺭﻭﺍﺩ : ﻭﻋﻠﻴﻜﻢ ﺍﻟﺴﻼﻡ ... ﺷﻦ ﺻﺎﺭ ..
ﻋﻤﺎﺩ ﻣﻂ ﺷﻮﺍﺭﺑﻪ ﻟﺪﺍﺧﻞ ﺑﺄﺳﻒ ﻭﻫﻮ ﻳﺤﺮﻙ ﻓﺮﺍﺳﻪ ﺑﺎﻟﻨﻔﻲ ..
ﺗﻨﻬﺪ ﺭﻭﺍﺩ ﻭﻗﺎﻝ : ﻗﺼﺔ ﻳﺎﺭﺍﺟﻞ .. ﻭﺍﻟﻠﻪ ﻭﺟﻌﻨﻲ ..
ﻋﻤﺎﺩ ﻭﻫﻮ ﻳﺒﺮﺑﺶ ﻓﻲ ﺗﻠﻴﻔﻮﻧﻪ : ﻳﺴﺘﺮ ﺍﻟﻠﻪ ﻭﺧﻼﺹ .. ﺷﻮﻳﻪ ﻭﺭﻥ ﺗﻠﻴﻔﻮﻧﻪ .. ﻛﺎﻥ ﻣﺎﻟﻚ ﺭﺩ ﻃﻮﻝ ..
ﻋﻤﺎﺩ : ﻟﻘﻴﺘﻪ ..
ﻣﺎﻟﻚ : ﺍﻳﻪ ..
ﺗﻨﻔﺲ ﺑﺮﺍﺣﻪ ﺑﻌﺪﻳﻦ ﻗﺎﻝ : ﻭﻳﻦ؟
ﻣﺎﻟﻚ : ﻣﻘﻌﻤﺰ ﺣﺪﺍ ﺍﻟﻜﻠﻴﻪ ..
ﻏﻤﺾ ﻋﻴﻮﻧﻪ ﺑﻀﻴﻖ ﻭﻓﺘﺤﻬﻢ ﻭﻗﺎﻝ : ﺧﺒﺮﺕ ﺍﻣﻲ ..
ﻣﺎﻟﻚ : ﺍﻳﻪ ..
ﻋﻤﺎﺩ : ﺗﻤﺎﻡ .. ﺍﺭﻓﻌﻪ ﻟﺤﻮﺷﻨﺎ ﺷﻮﻳﻪ ﻭﺟﺎﻱ ..
ﻣﺎﻟﻚ : ﺗﻢ ... ﺗﺸﺎﻭ .. ﺻﻜﺮ .. ﻭﺍﻟﺘﻔﺖ ﻣﺸﻲ ﻟﺤﻤﺰﺓ ﻭﻗﻌﻤﺰ ﺣﺪﺍﻩ ..
ﻭﻗﺎﻝ : ﺧﻴﺮ .. ﺧﻴﺮ ﺇﻥ ﺷﺎﺀ ﺍﻟﻠﻪ ﺧﻴﺮ ..
ﺣﻤﺰﺓ ﻳﺸﻮﻑ ﻟﻠﻜﻠﻴﻪ ﻭﺩﻣﻮﻋﻪ ﻓﻌﻴﻮﻧﻪ ..
ﻣﺎﻟﻚ : ﻣﺘﺄﻛﺪ ﺍﻧﻚ ﻣﺶ ﺩﺍﻳﺮ ﺷﻲ .. ﻣﺶ ﻗﺎﻳﻞ ﺷﻲ ..
ﺣﺮﻙ ﺭﺍﺳﻪ ﺑﺎﻟﻨﻔﻲ ﻭﻋﻴﻮﻧﻪ ﻉ ﺍﻟﻜﻠﻴﻪ ..
ﺷﺒﺢ ﻣﺎﻟﻚ ﺟﻬﺔ ﻛﻠﻴﺔ ﺍﻟﺼﻴﺪﻟﻪ ﺑﻌﺪﻳﻦ ﺭﺟﻊ ﺷﺎﻓﻠﻪ ﻭﻗﺎﻝ : ﺑﺎﻫﻲ ﻧﻮﺽ ﻣﻌﺎﻱ ﻧﻤﺸﻮﺍ ﻟﻠﺤﻮﺵ ..
ﺣﻤﺰﺓ؛ﺣﻮﺷﻨﺎ ﻻ ..
ﻣﺎﻟﻚ : ﺣﻮﺷﻨﺎ ﺣﻨﻲ .. ﺣﻮﺵ ﺧﺎﻟﺘﻚ ..
ﺣﻤﺰﺓ ﺑﺘﻬﻜﻢ : ﻭﺷﻦ ﺍﻣﻲ ﻭﺷﻦ ﺧﺎﻟﺘﻲ ..
ﻣﺎﻟﻚ ﺳﻜﺖ ﺷﻮﻳﻪ ﺑﻌﺪﻳﻦ ﻗﺎﻝ : ﺑﺎﻫﻲ ﻧﻘﻮﻟﻚ ﻧﻤﺸﻮﺍ ﻟﻠﻔﺮﻭﺳﻴﻪ .. ﺍﻧﻲ ﻭﻳﻦ ﻳﻀﻴﻖ ﺧﺎﻃﺮﻱ ﻧﻤﺸﻲ ﻏﺎﺩﻱ ﻧﻘﻌﺪ ﻧﺠﺮﻱ ﻧﺠﺮﻱ ﻟﻴﻦ ﻳﻨﻬﺪ ﺣﻴﻠﻲ .. ﻭﻧﺮﻭﺡ ﻃﻮﻝ ﻟﻠﺤﻮﺵ ﻧﺮﻗﺪ ...
ﺷﺒﺤﻠﻪ ﺣﻤﺰﺓ ﺷﻮﻳﻪ ﺑﻌﺪﻳﻦ ﻗﺎﻝ : ﺑﺎﻫﻲ ..
🍃 ﻭﻣﺸﻮﺍ ﻟﻠﻔﺮﻭﺳﻴﻪ ..
ﻗﻌﺪﻳﺠﺮﻱ ﻭﻳﺠﺮﻱ ... ﻭﻛﺎﻥ ﻛﺘﻠﻪ ﻣﻦ ﺍﻟﻐﻀﺐ ﺍﻟﺸﺪﻳﺪ ..
ﻫﻮ ﻛﺎﻥ ﻋﺎﺭﻑ ﻛﻮﻳﺲ ﺍﻥ ﻋﻤﺎﺭ ﺣﻴﺪﻳﺮﻟﻪ ﺷﻲ .. ﻛﺎﻥ ﻃﻮﻝ ﺍﻷﻳﺎﻡ ﺍﻟﻠﻲ ﻓﺎﺗﻮﺍ ﻣﻦ ﻟﻤﺎ ﺻﺎﺭ ﺍﻟﻠﻲ ﺻﺎﺭ ﻭﻫﻮ ﻳﺮﺍﺟﻲ ﻓﺮﺩﺓ ﻓﻌﻞ ﻋﻤﺎﺭ ..
ﺗﻮﻗﻊ ﻫﻠﺒﻪ ﺣﺎﺟﺎﺕ .. ﻟﻜﻦ ﻟﻤﺎ ﺍﻟﻤﺪﻩ ﻃﻮﻟﺖ .. ﻣﻌﺎﺵ ﻗﺪﺭ ﻳﺘﻮﻗﻊ ﺷﻲ .... ﻗﻌﺪ ﻋﺎﻳﺶ ﺣﻴﺎﺗﻪ ﻭﺧﻼﺹ ﻭﻣﺮﺓ ﻣﺮﺓ ﻳﻨﺘﺎﺑﻪ ﺧﻮﻑ ﻟﻤﺎ ﻳﺘﻔﻜﺮ ﺍﻟﻤﻮﺿﻮﻉ ..
ﻭﺍﻫﻮ ﺟﻲ ﺍﻟﻴﻮﻡ ﺍﻟﻠﻲ ﺭﺩ ﻓﻴﻪ ﻋﻠﻴﻪ ﻋﻤﺎﺭ ﺭﺩ ﻏﻴﺮ ﻣﺘﻮﻗﻊ ﺑﺎﻟﻨﺴﺒﺔ ﻟﺤﻤﺰﺓ .. ﻛﺎﻧﺖ ﺿﺮﺑﻪ ﻓﻲ ﻣﻘﺘﻞ ..
ﻛﺎﻥ ﻳﺮﺍﻗﺐ ﻓﻴﻪ ﻣﺎﻟﻚ ﻭﻻﺣﻆ ﻋﻠﻴﻪ ﺍﻹﺟﻬﺎﺩ ﻷﻧﻪ ﺟﺮﻱ ﻫﻠﺒﻪ ﻭﺑﻌﺼﺒﻴﻪ ﻭﺍﺿﺤﻪ ..
ﻧﺎﺽ ﻭﻣﺸﺎﻟﻪ ﻃﻮﻝ ..
ﻣﺎﻟﻚ : ﺣﻤﺰﺍﺍﺍﺍﺍﺍ ..
ﻭﻫﻮ ﺣﻤﺰﺓ ﻳﺠﺮﻱ ﻭﻣﺶ ﻣﺪﻭﺭ ...
ﺭﺟﻊ ﻧﺎﺩﺍﻩ ﻭﻫﻮ ﻳﻘﺪﻡ : ﺣﻤﺰﺍﺍﺍﺍﺍ .. ﺧﻼﺍﺍﺍﺹ ﻳﺎﺣﻤﺰﺍﺍﺍ ..
ﻗﺮﺑﻠﻪ : ﺣﻤﺰﺓ ..
ﻭﻗﻒ ﻭﻫﻮ ﻣﻐﻤﺾ ﻋﻴﻮﻧﻪ ﺑﺸﺪﻩ ﻭﻛﺎﻥ ﺩﺍﻫﺶ ﻭﻳﻘﻄﺮ ﻋﺮﻕ ..
ﺣﻂ ﻭﻟﺪ ﺧﺎﻟﺘﻪ ﻳﺪﻩ ﻉ ﻛﺘﻔﻪ ﻭﻗﺎﻝ : ﻫﻴﺎ ﻧﺮﻭﺣﻮﺍ ﺧﻼﺹ ﺳﺎﺩ ..
ﻫﺰ ﺭﺍﺳﻪ ﺑﺈﻳﺠﺎﺏ .. ﻭﻣﺸﻲ ﻫﻮ ﻭﻟﺪ ﺧﺎﻟﺘﻪ .. ﻭﻛﺎﻥ ﺣﺲ ﺭﻭﺣﻪ ﻣﻬﺪﻭﺩ ﻣﻦ ﺑﺮﺍ ﻭﻣﻦ ﺩﺍﺧﻞ 🍃
🍁🍁🍁🍁🍁
ﺍﻟﺴﺎﻋﻪ 2:30 ﺑﻌﺪ ﺍﻟﻈﻬﺮ ...
ﺍﻣﻤﻤﻢ ﺗﻬﺒﻞ ﺗﻬﺒﻞ .. ﻣﺎﺗﻤﻨﻴﺘﻬﺎ ﺗﻢ ..
ﻋﻤﺎﺭ ﺑﻀﺤﻜﻪ : ﺻﺤﺘﻴﻦ ﻉ ﻗﻠﺒﻚ ﻭﻗﻠﺐ ﺍﻟﺒﻄﻞ ..
ﺿﺤﻜﺖ ﻭﺣﻄﺖ ﻳﺪﻫﺎ ﻉ ﺑﻄﻨﻬﺎ ﻭﻗﺎﻟﺖ : ﻳﺎﻧﺎﺭﻱ ﻉ ﻭﻟﻴﺪﻱ ﺗﺒﻠﻔﻂ ﺩﺍﺧﻞ ﻣﻦ ﻣﻜﺮﻭﻧﻪ ﺑﻮﻩ ﺍﻟﻤﺤﺮﺣﺮﻩ ..
ﺿﺤﻚ ﻋﻤﺎﺭ ﻭﻫﻮ ﻳﻠﻢ ﻓﻲ ﺍﻟﻤﺎﻋﻴﻦ ..
ﺿﺤﻜﺖ ﺗﺎﻧﻲ ﻭﻗﺎﻟﺖ : ﺻﺪﻗﺖ ﺣﺘﻰ ﺍﻧﻲ ﺍﻧﻪ ﻭﻟﺪ .. ﺷﺒﺤﺘﻠﻪ ﻭﻧﺎﺿﺖ ﻓﻴﺴﻊ ﻭﺟﺎﺗﻪ .. ﻻﺧﻼﺹ ﺣﺒﻴﺒﻲ ﺳﺎﺩ ﺍﻧﺖ ﻃﻴﺒﺖ ﺑﺮﺍ ﺗﺮﻳﺢ ..
ﻋﻤﺎﺭ : ﻻﻳﺎﺳﻤﺢ ﺧﻠﻴﻨﻲ ﻧﻜﻤﻞ ﺍﻟﻠﻲ ﺑﺪﻳﺘﻪ ..
ﺑﺎﺳﺎﺗﻪ ﻣﻦ ﺧﺪﻩ .. ﺑﻌﺪﻳﻦ ﻗﻌﺪﺕ ﺍﺩﻑ ﻓﻴﻪ ﻣﻦ ﻇﻬﺮﻩ ﻭﻫﻲ ﺗﻘﻮﻝ : ﻧﻜﻤﻠﻪ ﺍﻧﻲ .. ﺑﺮﺍ .. ﺍﺭﺗﺎﺡ
ﻋﻤﺎﺭ : ﻫﻬﻬﻬﻬﻬﻬﻬﻬﻬﻪ .. ﺗﻲ ﺑﺎﻫﻲ ﻳﺎﻭﺩﻱ ﻫﺎﻧﻲ ﻣﻌﺪﻱ ..
ﺑﻌﺪﺕ ﻭﻫﻲ ﺗﻀﺤﻚ ﻭﻟﻔﺖ ﻉ ﺍﻟﻼﻭﻧﺪﻳﻨﻮ ﻭﺑﺪﺕ ﺗﻐﺴﻞ ..
ﻣﺎﺣﺴﺘﺶ ﺍﻻ ﻭﻫﻲ ﺗﺴﻤﻊ ﻓﻬﻤﺴﻪ ﻓﻮﺫﻧﻬﺎ : ﻧﻌﺸﻘﻚ ﻳﺎﻋﺴﻞ ..
ﺍﺑﺘﺴﻢ ﻭﻟﻒ ﻭﻣﺸﻲ ﻃﻠﻊ ﻣﻦ ﺍﻟﻜﻮﺟﻴﻨﻪ ..
ﻭﺧﻼﻫﺎ ﻫﻲ ﻣﻊ ﺩﻗﺎﺕ ﻗﻠﺒﻬﺎ ﺍﻟﻄﺎﺭﺑﻪ .. ﻭﺗﻨﻬﻴﺪﺍﺗﻬﺎ 💓💓💓
🍁🍁🍁🍁🍁
ﻗﺎﻣﺖ ﺑﻨﺘﻬﺎ ﺻﻔﺮﺓ ﺍﻟﻐﺪﻱ ﻣﻦ ﻗﺪﺍﻡ ﺑﻮﻫﺎ ﻭﺗﺸﺒﺢ ﻷﻣﻬﺎ ..
ﺍﻣﻬﺎ ﺷﺒﺤﺘﻠﻬﺎ ﺑﻌﺪﻳﻦ ﺷﺒﺤﺖ ﻟﻠﺘﻠﻔﺰﻳﻮﻥ .
ﻭﺍﻟﺒﻨﺖ ﻛﻤﻠﺖ ﻃﺮﻳﻘﻬﺎ ﺑﺎﻟﺼﻔﺮﺓ ﻟﻠﻜﻮﺟﻴﻨﻪ ..
ﺣﻄﺘﻬﺎ ﻋﺎﻟﺮﺧﺎﻣﻪ ﻭﻗﺎﻟﺖ ﻷﺧﺘﻬﺎ ﺍﻟﻠﻲ ﻛﺎﻧﺖ ﺗﻐﺴﻞ ﻓﻲ ﺍﻟﻤﺎﻋﻴﻦ ..
ﺭﺍﻧﻴﺎ : ﺯﻋﻤﻪ ﺑﺎﺑﺎ ﺷﻦ ﺑﻴﺪﻳﺮ ﻟﻤﺎ ﻳﻌﺮﻑ ..
ﺭﺑﺎﺏ ﻭﻫﻲ ﺗﻐﺴﻞ ﻓﻲ ﺍﻟﺼﻮﻧﻴﻪ : ﺭﺑﻲ ﻳﺴﺘﺮ .. ﻭﺍﻟﻠﻪ ﺣﺘﻰ ﺻﺪﺭﻱ ﺍﻃﺒﻖ ﻭﻃﺎﺭﺗﻠﻲ ﺍﻟﻨﻴﻪ ﻣﻦ ﺍﻟﻤﺸﻴﻪ ﻟﻠﺪﻭﺭﺓ .
ﺭﺍﻧﻴﺎ : ﻻﺭﺩﻱ ﺑﺎﻟﻚ ﺭﺑﺎﺏ ﻻﺯﻡ ﺗﻤﺸﻲ ﻛﻠﻬﻢ ﺗﻼﺗﻪ ﺷﻬﻮﺭ ﺗﻜﻤﻠﻴﻬﻢ ﻭﺗﺨﺪﻣﻲ ﻓﻲ ﺍﻟﻤﺪﺭﺳﻪ .. ﺗﻐﻤﻀﻲ ﻋﻴﻦ ﻭﺗﻔﺘﺤﻲ ﻋﻴﻦ ﻭﺗﻠﻘﻲ ﺭﻭﺣﻚ ﻓﺸﻬﺮ ﺳﺘﻪ ..
ﺗﻨﻬﺪﺕ ﺭﺑﺎﺏ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﻭﺭﺍﻧﻴﺎ ﺷﺒﺤﺘﻠﻬﺎ ﺷﻮﻳﻪ .. ﺑﻌﺪﻳﻦ ﻟﻔﺖ ﻭﻃﻠﻌﺖ ﻣﻦ ﺍﻟﻜﻮﺟﻴﻨﻪ ..
🍃 ﺭﺑﺎﺏ ﺧﺸﺖ ﺩﻭﺭﺓ ﺣﺎﺳﻮﺏ ﺩﺧﻠﺘﻬﺎ ﻓﻴﻬﺎ ﻭﺣﺪﻩ ﻣﻦ ﺟﺎﺭﺍﺗﻬﻢ
ﺑﺶ ﺑﻌﺪ ﺗﻜﻤﻠﻬﺎ ﺗﺨﺪﻡ ﻓﻲ ﻣﺪﺭﺳﺔ ﺧﺎﺻﻪ ﻣﺪﻳﺮﺗﻬﺎ ﻧﻔﺲ ﺍﻟﺠﺎﺭﻩ ..
ﻏﺮﺽ ﺭﺑﺎﺏ ﺍﻧﻬﺎ ﺗﻠﻘﻂ ﺍﻟﻘﺮﺵ ﻉ ﺍﻟﻘﺮﺵ ﻟﻌﺮﺳﻬﺎ ﻣﺎﺗﺒﻴﺶ ﺗﺤﻤﻞ ﺍﻫﻠﻬﺎ ﻓﻮﻕ ﻃﺎﻗﺘﻬﻢ 🍃..
🍁🍁🍁🍁🍁🍁
ﺍﻟﺴﺎﻋﻪ 4:30 ﻋﺼﺮﺍ ..
ﻣﻘﻌﻤﺰﻳﻦ ﻓﻲ ﺍﻟﺼﺎﻟﻪ ﻳﻬﺪﺭﺯﻭﺍ ..
ﻣﻦ ﻟﻤﺎ ﺟﺎﺑﻪ ﻣﺎﻟﻚ ﺧﺶ ﻃﻮﻝ ﺗﻠﻮﺡ ﻭﺭﻗﺪ .. ﺣﺘﻰ ﻟﻠﻐﺪﻱ ﻣﺎﻧﻮﺿﻨﺎﺷﻲ ..
ﺣﺮﻙ ﺭﺍﺳﻪ ﺍﻳﻤﻴﻦ ﻭﻳﺴﺎﺭ ﻭﻳﻘﻮﻝ : ﻻﺣﻮﻝ ﻭﻻﻗﻮﺓ ﺇﻻﺑﺎﻟﻠﻪ ..
ﺗﻨﻬﺪ ﻋﻤﺎﺩ ﻭﻧﺎﺽ : ﻣﺎﺷﻲ ﻟﻠﻤﺤﻞ ﻣﺎﺗﺒﻮﺍ ﺷﻲ ..
ﻛﻔﺎﻳﻪ : ﺯﻳﻨﻪ ﻭﻟﺪﻱ ..
ﺷﺒﺢ ﻟﺨﺎﻟﻪ ﻭﻗﺎﻝ : ﺗﺴﺎﻳﺮﻧﻲ ﺧﺎﻝ ...
ﻫﺎﻧﻴﺒﺎﻝ : ﻻﻻﺑﻨﺮﺍﺟﻲ ﺣﻤﺰﺓ ﻟﻴﻦ ﻳﻨﻮﺽ ﻭﻧﻔﻬﻢ ﻣﻨﻪ ..
ﻋﻤﺎﺩ ﻫﺰ ﺭﺍﺳﻪ ﺑﺈﻳﺠﺎﺏ ﻭﻗﺎﻝ : ﺍﻟﺴﻼﻡ ﻋﻠﻴﻜﻢ ..
ﻭﻟﻒ ﻭﻣﺸﻲ ...
ﺗﻨﻬﺪﺕ ﻛﻔﺎﻳﻪ ﻭﻗﺎﻟﺖ : ﻋﻠﻴﻚ ﻣﺼﻴﺒﻪ ﻭﺧﻼﺹ ﺍﻟﻮﻟﻴﺪ ﻣﺴﺘﻘﺒﻠﻪ ﺿﺎﻉ .. ﻭﺯﻳﻨﺐ ﻣﺴﻜﻴﻨﻪ ﻗﺮﻳﺐ ﺗﻬﺒﻞ .. ﻗﺎﻟﺘﻠﻲ ﺣﺘﻰ ﺧﻴﺮﻱ ﻣﺎﻋﺮﻓﺘﺶ ﻛﻴﻒ ﻧﺨﺒﺮﻩ ﻗﺎﻟﺖ ﺳﺄﻟﻨﻲ ﻋﻨﻪ ﻗﺘﻠﻪ ﻣﺎﺯﺍﻝ ﻣﺎﺟﺎﺵ ﺷﻮﺭﻩ ﻣﺸﻲ ﻟﻠﻤﺤﻞ ﻣﻨﻪ ﻏﺎﺩﻱ ..
ﻫﺎﻧﻴﺒﺎﻝ ﺳﻜﺖ ﺷﻮﻳﻪ ﺑﻌﺪﻳﻦ ﻗﺎﻝ : ﺧﻞ ﻧﻔﻬﻢ ﻣﻨﻪ ﻗﺒﻞ .. ﻭﺑﻌﺪﻳﻦ ﻧﺘﺼﺮﻑ ..
ﻓﻲ ﺍﻟﻮﻗﺖ ﺍﻟﻠﻲ ﻛﺎﻧﻮﺍ ﻫﻤﺎ ﻓﻴﻪ ﻓﻲ ﺍﻟﺼﺎﻟﻪ ﻳﻬﺪﺭﺯﻭﺍ ..
ﺣﻤﺰﺓ ﻛﺎﻥ ﻧﺎﻳﺾ .. ﺧﺶ ﻟﻠﺤﻤﺎﻡ ﺗﻮﺿﻰ ﻭﺻﻠﻰ .. ﺑﻌﺪﻳﻦ ﻃﻠﻊ ﻭﻫﻮ ﻣﺎﺷﻲ ﻟﻠﺼﺎﻟﻪ .. ﺳﻤﻊ ﺍﻟﺪﻭﺓ ﺍﻟﻠﻲ ﺻﺎﺭﺕ ﺑﻴﻦ ﺧﺎﻟﺘﻪ ﻭﺧﺎﻟﻪ ..
ﻭﺍﻛﺜﺮ ﺷﻲ ﺣﺮﻗﻪ ﻛﻼﻡ ﺧﺎﻟﺘﻪ ﻋﻦ ﺍﻣﻪ ﺯﺍﺩ ﺍﻧﻘﻬﺮ ﺍﻛﺜﺮ ..
ﻛﻤﻞ ﻃﺮﻳﻘﻪ ﻃﻮﻝ ﻟﺒﺎﺏ ﺍﻟﺤﻮﺵ .. ﻭﻫﻮ ﻣﺎﺷﻲ ﻟﻤﺢ ﺗﻠﻴﻔﻮﻥ ﺧﺎﻟﺘﻪ ﻉ ﺍﻟﻤﺪﺧﻞ .. ﻋﺮﻓﻪ ﻟﺨﺎﻟﺘﻪ ﻷﻥ ﻧﻮﻋﻪ ﻛﺎﻥ ﺑﻴﻼ ﻣﺘﻄﻮﺭ ..
ﻗﻌﺪ ﻳﺸﺒﺤﻠﻪ ﻭﻫﻮ ﻳﻔﻜﺮ ...
ﻟﻌﻨﺪ ﻣﺎﺧﻄﺮﺕ ﻓﻲ ﺑﺎﻟﻪ ﺣﺎﺟﻪ ..
🍁🍁🍁🍁🍁
ﻛﺎﻧﺖ ﻓﻲ ﺩﺍﺭﻫﺎ ﺗﺤﺪﺩ ﻓﺤﻮﺍﻳﺞ ﺭﺍﺟﻠﻬﺎ ..
ﺗﻌﻮﺩﺕ ﺗﺤﺪﺩﻟﻪ ﺣﻮﺍﻳﺠﻪ ﻛﻠﻬﻢ ﺑﻌﺪ ﺗﻐﺴﻠﻬﻢ ﻭﺗﻌﻄﺮﻫﻢ ﻭﺗﻌﻠﻘﻬﻢ 💕
ﻗﻄﻊ ﻋﻠﻴﻬﺎ ﺻﻮﺕ ﺗﻠﻴﻔﻮﻧﻬﺎ ﺍﻟﻠﻲ ﺭﻥ ..
ﺣﻄﺖ ﺍﻟﺤﺪﺍﺩ ﻓﻤﻜﺎﻧﻪ ﻭﻣﺸﺖ ﻟﺘﻠﻴﻔﻮﻧﻬﺎ ﺍﺳﺘﻐﺮﺑﺖ ﻟﻤﺎ ﺷﺎﻓﺖ ﺍﺳﻢ ﺧﺎﻟﺘﻬﺎ ﻛﻔﺎﻳﻪ ..
ﻓﺘﺤﺖ ﺍﻟﺨﻂ ﻃﻮﻝ ﻭﺭﺩﺕ ..
ﺩﻻﻝ : ﻳﺎﻫﻼ ﺑﻜﻴﻔﻮ ..
ﺭﺩ ﺑﻐﻀﺐ ﺷﺪﻳﺪ : ﻗﻮﻟﻲ ﻟﺮﺍﺟﻠﻚ ﺍﻟﻠﻲ ﺩﺍﺭﻩ ﻓﻴﺎ ﺣﺘﺮﺩﻩ ﻛﻠﻤﺔ ﺣﺴﺒﻲ ﺍﻟﻠﻪ ﻭﻧﻌﻢ ﺍﻟﻮﻛﻴﻞ ..
ﺍﻧﺼﺪﻣﺖ .. ﺧﺎﻓﺖ .. ﺭﻋﺸﺖ ..
ﻗﺎﻟﺖ ﺑﺼﻮﺕ ﻣﺮﻋﻮﺵ : ﺣﻢ .. ﺯﺓ ..
ﺣﻤﺰﺓ : ﺍﻳﻪ ﺣﻤﺰﺓ ﺍﻟﻠﻲ ﺭﺍﺟﻠﻚ ﺍﻟﻤﺘﻐﻄﺮﺱ ﺩﻣﺮ ﻣﺴﺘﻘﺒﻠﻪ ﻭﺧﻼﻫﻢ ﻳﻔﺼﻮﻟﻪ ﻣﻦ ﻛﻠﻴﺘﻪ .. ﻟﻜﻦ ﻭﻳﻦ ﺑﻴﻤﺸﻲ ﻣﻦ ﺭﺑﻲ ﻭﻳﻦ ﻳﺎﻭﻳﻠﻪ ﻳﺎﻭﻳﻠﻪ ... ﻭﺻﻜﺮ ﻋﻠﻴﻬﺎ ...
ﻭﻭﻻ ﺧﺶ ﻟﻠﺤﻮﺵ ﺣﻂ ﺍﻟﺘﻠﻴﻔﻮﻥ ﻓﻤﻜﺎﻧﻪ ..
ﻭﻃﻠﻊ ﻭﺻﻜﺮ ﺍﻟﺒﺎﺏ .. ﺑﻌﺪﻳﻦ ﻃﻠﻊ ﻣﻦ ﻓﻴﻼ ﻛﻔﺎﻳﻪ ﻣﺮﺓ ﻭﺣﺪﻩ ..
ﻭﻫﺪﺍ ﻛﻠﻪ ﻭﻫﺎﻧﻴﺒﺎﻝ ﻭﻛﻔﺎﻳﻪ ﻳﻬﺪﺭﺯﻭﺍ ﻭﻣﺎﺣﺴﻮﺍ ﺑﺸﻲ ﻧﻬﺎﺋﻲ ..
ﻫﺎﻧﻴﺒﺎﻝ : ﻛﻔﺎﻳﻪ .. ﻛﻔﺎﻳﻪ ... ﺍﺳﻤﻌﻲ .. ﺍﻟﺘﻠﻤﻴﺤﺎﺕ ﺍﻧﻲ ﻣﺎﻧﺤﺒﻬﻦ .. ﻭﺣﻴﺎﺗﻲ ﻣﺎﻧﺤﺐ ﺣﺪ ﻳﺪﺧﻞ ﻓﻴﻬﺎ ﻋﻘﻠﻲ ﻓﺮﺍﺳﻲ ﻭﻧﻌﺮﻑ ﺧﻼﺻﻲ .. ﺗﻤﺎﻡ ..
ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻫﻲ ﺗﻘﻮﻝ : ﺭﺑﻲ ﻳﻘﺪﻣﻠﻚ ﺍﻟﻠﻲ ﻓﻴﻪ ﺍﻟﺨﻴﺮ ..
ﺍﺑﺘﺴﻢ ﻭﻗﺎﻝ : ﺍﻳﻮﻩ ﻫﺪﻯ ﺍﻟﻜﻼﻡ ﺍﻟﻠﻲ ﻣﻔﺮﻭﺽ ﻳﻨﻘﺎﻝ ﻣﻦ ﺍﻟﺒﺪﺍﻳﻪ ..
ﻫﻲ ﺭﺩﺕ ﻋﻠﻴﻪ ﺑﺈﺑﺘﺴﺎﻣﺔ ﺃﻟﻢ ..
🍁🍁🍁🍁🍁
ﻓﻲ ﻧﻔﺲ ﺍﻟﻮﻗﺖ ..
ﺑﻌﺪ ﺍﻧﻬﻰ ﻭﻟﺪ ﺧﺎﻟﺘﻬﺎ ﺍﻟﻤﻜﺎﻟﻤﻪ ..
ﺑﺪﺕ ﺷﻴﺌﺎ ﻓﺸﻴﺌﺎ ﺗﺴﺘﻮﻋﺐ ﻭﺗﻔﻬﻢ ﺍﻟﻠﻲ ﺳﻤﻌﺎﺗﻪ ..
ﺗﺒﺪﻟﺖ ﻣﻼﻣﺢ ﻭﺟﻬﻬﺎ ﻣﻦ ﺍﻟﺼﺪﻣﻪ ﻟﻠﺤﺪﻩ ...
ﻭﻃﻮﻝ ﻃﻠﻌﺖ ﻣﻦ ﺍﻟﺪﺍﺭ ﻣﺘﻮﺟﻬﺔ ﻟﻐﺮﻓﺔ ﺍﻟﻤﻜﺘﺒﻪ ..
ﻭﺻﻠﺖ ﻓﻴﻬﺎ ﻭﻗﻔﺖ ﻓﻲ ﺍﻟﺒﺎﺏ ﻭﻫﻲ ﺗﺸﻮﻓﻠﻪ ..
ﻫﻮ ﻛﺎﻥ ﻣﻘﻌﻤﺰ ﻳﻜﺘﺐ ﻭﺍﻟﺒﺎﻳﻦ ﺷﻌﺮ ..
ﺣﺲ ﺑﻮﺟﻮﺩﻫﺎ ﺑﺲ ﻣﺎﺑﺎﺵ ﻳﺒﻴﻦ ﺯﻱ ﺍﻟﻠﻲ ﺣﺲ ﺑﺄﻧﻬﺎ ﻋﺮﻓﺖ ..
ﻗﺎﻟﺖ ﺑﺤﺪﻩ : ﺍﻧﺖ ﻭﺭﺍ ﺍﻟﻠﻲ ﺻﺎﺭ ﻟﺤﻢ ...
ﻗﺎﻃﻌﻬﺎ ﺑﺼﻮﺕ ﻋﺎﻟﻲ ﻭﻫﻮ ﻣﻐﻤﺾ ﻋﻴﻮﻧﻬﺎ ﺑﺸﺪﻩ : ﻣﺎﺗﻘﻮﻟﻴﻴﺶ ﺍﺳﻤﻤﻪ ..
ﻫﻲ ﺍﻧﺘﻔﻀﺖ ﻣﻦ ﺍﻟﻔﺰﻋﻪ ...
ﺑﻌﺪﻳﻦ ﻗﺎﻝ ﺑﻬﺪﻭﺀ : ﺧﺪﻱ ﺍﻟﻠﻲ ﻳﺴﺘﺤﻘﻪ ..
ﺩﻻﻝ ﺑﺮﻓﻌﺔ ﺣﻮﺍﺟﺐ : ﻗﺼﺪﻙ ﻋﺎﺩﻱ ﻋﻨﺪﻙ ﺍﻟﻠﻲ ﺩﺭﺗﻪ ﺍﻧﻚ ﺩﻣﺮ ﻣﺴﺘﻘﺒﻠﻪ ﺳﺎﻫﻞ ﻋﻠﻴﻚ ﻟﻠﻬﺪﺭﺟﻪ ..
ﺭﻓﻊ ﻋﻴﻮﻧﻪ ﺑﻨﻈﺮﺓ ﺣﺎﺩﻩ ﻭﻗﺎﻝ : ﻭﺍﻧﺘﻲ ﻋﺎﺩﻱ ﻋﻨﺪﻙ ﺍﻟﻠﻲ ﺩﺍﺭﻩ ﻫﻮ؟
ﺷﺒﺤﺘﻠﻪ ﺷﻮﻳﻪ ﺑﻌﺪﻳﻦ ﻗﺪﻣﺖ ﻭﻫﻲ ﺗﻘﻮﻝ : ﺗﺒﻲ ﺗﻌﺎﻗﺒﻪ ﺿﺮﺑﺘﻪ ﺧﺒﺮﺕ ﺍﻫﻠﻪ .. ﺧﻮﺍﻟﻲ ﺑﺎﻟﻠﻲ ﺩﺍﺭﻩ .. ﺍﻱ ﺷﻲ ﺍﻻ ﻫﻜﻲ ﻳﺎﻋﻤﺎﺭ ﻫﺪﺍ ﻇﻠﻢ ﺭﺍﻫﻮ ..
ﺿﻴﻖ ﻋﻴﻮﻧﻪ ﻭﻗﺎﻝ : ﺩﻻﻝ ﺗﺮﺍ ﺍﻃﻠﻌﻲ ﻗﺒﻞ ﻟﻨﻄﻠﻊ ﻋﻦ ﻃﻮﺭﻱ ..
ﺩﻻﻝ : ﻻ ﻣﺎﻧﻴﺶ ﻃﺎﻟﻌﻪ ﻗﺒﻞ ﻟﺘﺼﻠﺢ ﺍﻟﻠﻲ ﺩﺭﺗﻪ ..
ﺷﺒﺤﻠﻬﺎ ﺑﺮﻓﻌﺔ ﺣﻮﺍﺟﺐ .. ﺑﻌﺪﻳﻦ ﻧﺎﺽ ﻣﻦ ﻣﻜﺎﻧﻪ ﻭﺟﺎﻫﺎ ..
ﻫﻲ ﻛﺎﻧﺖ ﺧﺎﻳﻔﻪ ﻫﻠﺒﻪ ﻷﻥ ﻣﻼﻣﺤﻪ ﻓﻬﺪﻳﻜﺎ ﺍﻟﻠﺤﻈﻪ
ﻛﺎﻧﺖ ﺗﺨﻮﻑ ..
ﻭﺻﻞ ﻓﻴﻬﺎ ﻭﻗﺎﻝ ﻭﻫﻮ ﻳﺄﺷﺮ ﺑﺼﺒﻌﻪ ﻋﻠﻴﻬﺎ : ﺍﻧﺘﻲ ﺑﺎﻟﻨﺴﺒﻪ ﻟﻴﺎ ﺍﻧﻲ ﺧﻂ ﺍﺣﻤﺮ .. ﻭﺍﻟﻠﻲ ﻳﻔﻜﺮ ﻫﺎﻩ .. ﻳﻔﻜﺮ ﺑﺲ .. ﻳﻘﺮﺏ ﻣﻦ ﺧﻄﻮﻃﻲ ﺍﻟﺤﻤﺮ ﻧﺪﻣﺮﻩ ﻳﺎﺩﻻﻝ .. ﺳﻤﻌﺘﻲ .. ﻧﺪﻣﺮﻩ ..
ﻗﻌﺪﺕ ﺗﺸﺒﺤﻠﻪ ﺑﻨﻈﺮﺍﺕ ﻣﺴﺘﻨﻜﺮﻩ ﻭﻣﺘﻔﺤﺼﻪ ﻟﻤﻼﻣﺢ ﻭﺟﻬﻪ ﺣﺴﺖ ﺍﻧﻬﺎ ﻣﺎﺗﻌﺮﻓﺎﺵ ﻭﻗﺘﻬﺎ ﻗﺎﻟﺖ ﺑﺄﻟﻢ : ﺗﻌﺮﻑ ﻣﻦ ﺷﻦ ﻛﻨﺖ ﻧﺨﺎﻑ .. ﻧﺨﺎﻑ ﻣﻦ ﺍﻥ ﺣﺒﻚ ﻟﻴﺎ ﻳﻄﻠﻊ ﻣﺠﺮﺩ ﺣﺐ ﺗﻤﻠﻚ ﻻﺃﻛﺜﺮ ..
ﺣﺎﺟﻪ ﻋﺠﺒﺎﺗﻚ ﻭﻋﺼﺖ ﻋﻠﻴﻚ ﻭﺗﺒﻲ ﺗﻤﻠﻜﻬﺎ ﻭﻣﻠﻜﺘﻬﺎ ﻭﺗﺒﻲ ﺗﺤﺎﻓﻆ ﻋﻠﻴﻬﺎ ﻷﻧﻬﺎ ﻣﻠﻜﻚ ﻭﺑﺲ ..
ﺿﻴﻖ ﻋﻴﻮﻧﻪ ﻫﻠﺒﻪ ﻭﻫﻮ ﻳﻘﻮﻝ : ﺩﻻﻝ ﻋﺪﻱ ﻣﻦ ﻗﺪﺍﻣﻲ ﺗﻮﺍ ﺍﺣﺴﻨﻠﻚ ..
ﺍﺑﺘﺴﻤﺖ ﺑﺘﻬﻜﻢ ﻭﻗﺎﻟﺖ : ﺷﻦ ﺑﺪﻳﺮ ﻳﻌﻨﻲ ﺑﺘﻀﺮﺑﻨﻲ ﺩﺭﺗﻬﺎ ﻭﻣﺶ ﺑﻌﻴﺪ ﺗﻌﺎﻭﺩﻫﺎ .. ﻳﺎﻭﺩﻱ ﻛﺎﻥ ﺑﺘﻀﺮﺑﻨﻲ ﺍﺿﺮﺏ ﻟﻜﻦ ﻭﻟﺪ ﺧﺎﻟﺘﻲ ﺧﻠﻴﻪ ﻓﺤﺎﻟﻪ ..
ﻭﺻﻠﺖ ﻋﻨﺪﻩ ﺣﺪﻫﺎ ﺍﻧﻔﺠﺮ ﻓﻴﻬﺎ ﺑﻌﺼﺒﻴﻪ ﻭﻫﻮ ﻳﻘﻮﻝ : ﻣﻌﺎﺵ ﺗﺘﻜﻠﻤﻲ ﻋﻠﻴﻪ .. ﻻﺗﻨﻄﻘﻲ ﺍﺳﻤﻪ .. ﻻ ﺗﻨﺴﺒﻴﻪ ﻟﻨﻔﺴﻚ ﻭﻻﺑﺄﻱ ﺷﻜﻞ ..
ﻭﻓﺤﺎﻟﻪ ﻣﺎﻧﻴﺶ ﻣﺨﻠﻴﻪ ﻟﻴﻦ ﻳﺘﺮﺑﻰ ﻭﻳﻌﺮﻑ ﻋﻮﺍﻗﺐ ﺍﻟﺘﻌﺪﻱ ﻉ ﺍﻋﺮﺍﺽ ﻏﻴﺮﻩ .. ﻳﺤﻤﺪ ﺭﺑﻪ ﺍﻟﻠﻲ ﻣﺎﻗﺘﻠﺘﺎﺵ ﻭﻻ ﺣﺒﺴﺘﻪ ﻳﺤﻤﻤﻤﺪ ﺭﺑﻪ ..
ﺩﻻﻝ ﺑﺼﺪﻣﻪ : ﻗﺘﻞ ... ﺣﺒﺲ ...!!! ﺑﺼﺮﺍﺣﻪ ﻣﻔﺮﻭﺽ ﻣﺎﻧﺴﺘﻐﺮﺏ ﻣﻨﻚ ﺷﻲ ﺩﺍﻣﻚ ﻣﻨﻬﻢ .. ﻫﺎﻟﻤﺠﺎﺭﻡ ﺍﻟﻤﺘﺠﺒﺮﻳﻦ ..
ﻛﻼﻣﻬﺎ ﻛﺎﻥ ﺍﺷﺒﻪ ﺑﻮﻗﻊ ﺍﻟﺼﺎﻋﻘﻪ ﻋﻠﻴﻪ .. ﻣﺎﺗﺤﻤﻼﺵ ﻧﻬﺎﺋﻲ ..
ﺭﻓﻊ ﻳﺪﻩ ﻭﻛﺎﻥ ﺣﻴﻨﺰﻟﻬﺎ ﻉ ﻭﺟﻬﻬﺎ ..
ﻟﻜﻦ ﻧﻈﺮﺓ ﻋﻴﻮﻧﻬﺎ ﺍﻟﻠﻲ ﺯﺍﺩﻭﺍ ﺟﺤﻈﻮﺍ ﻭﻗﻔﻮﻩ ﻓﻲ ﺍﺧﺮ ﻟﺤﻈﻪ ..
ﻛﺎﻥ ﻓﻲ ﻗﻤﺔ ﺍﻟﻐﻀﺐ ﻭﻳﺘﻨﻔﺲ ﺑﺎﻟﻘﻮﺓ ﻣﻦ ﺷﺪﺓ ﻏﻀﺒﻪ ﻛﺎﻥ ﺟﺴﻤﻪ ﻳﻠﻬﺐ ﻣﻊ ﺑﻌﻀﻪ ..
ﺍﻧﻄﻔﻲ ﺍﻟﻠﻬﻴﺐ ﻓﺠﺄﻩ .. ﺧﺮﺱ ﺍﻟﻐﻀﺐ ... ﺑﺲ ﺍﻷﻧﻔﺎﺱ ﺯﺍﺩﺕ ﺗﺴﺎﺭﻋﺖ ..
ﻟﻤﺎ ﺷﺎﻓﻬﺎ .. ﺍﻧﻬﺎﺭﺕ .. ﻃﺎﺣﺖ ﻣﻦ ﻃﻮﻟﻬﺎ ..
🍁🍁🍁🍁🍁
ﺍﻟﺴﺎﻋﻪ 7:30 ﻣﺴﺎﺀﺍ ..
ﺍﻧﻔﺘﺢ ﺑﺎﺏ ﺍﻟﺤﻮﺵ ﻭﺧﺶ ..
ﺧﻄﻢ ﻉ ﺍﻟﻤﺮﺑﻮﻋﻪ ﻟﻘﻲ ﺧﻮﻩ ﺍﻟﺼﻐﻴﺮ ﻳﻘﺮﺍ ﻓﻴﻬﺎ ..
ﺍﺑﺘﺴﻢ ﺑﺘﻬﻜﻢ ﺑﻌﺪﻳﻦ ﻛﻤﻞ ﻭﺧﺶ ﻟﻠﺼﺎﻟﻪ ..
ﻟﻘﻲ ﺍﻣﻪ ﻃﺎﻟﻌﻪ ﻣﻦ ﺍﻟﺪﺍﺭ ﺷﺒﺤﺎﺗﻪ ﺟﺎﺗﻪ ﻃﻮﻝ ﻭﺷﺪﺕ ﻳﺪﻩ : ﺣﻤﺰﺓ ...
ﻫﻮ ﻃﻠﻖ ﻳﺪﻫﺎ ﻭﻗﺎﻝ : ﺑﻨﺨﺶ ﻧﺮﻗﺪ ﻣﺎﻧﺒﻲ ﺣﺪ ﻳﻨﻮﺿﻨﻲ .. ﻭﻣﺸﻲ ﻟﺪﺍﺭﻩ ..
ﺯﻳﻨﺐ ﺑﺄﻟﻢ : ﺣﻤﺰﺓ ..
ﺧﺶ ﺩﺍﺭﻩ ﻭﺻﻜﺮ ﺍﻟﺒﺎﺏ ..
ﻃﻠﻌﺖ ﺭﺍﻧﻴﺎ ﻣﻦ ﺩﺍﺭﻫﻢ ﻭﺷﺒﺤﺖ ﻷﻣﻬﺎ ﺗﻨﻬﺪﺕ ﺑﻀﻴﻖ ﻭﻗﺎﻟﺖ : ﺍﺣﺴﻦ ﺷﻲ ﻧﺨﻠﻮﻩ ﺑﺮﻭﺣﻪ ﻣﺎﺩﺍﻡ ﺭﻭﺡ ...
ﻭﻟﺖ ﺯﻳﻨﺐ ﻟﺪﺍﺭﻫﺎ ﻃﻮﻝ ﻭﻫﻲ ﺗﺒﻜﻲ ..
ﻭﺭﺍﻧﻴﺎ ﻭﻟﺖ ﻟﺪﺍﺭﻫﺎ ﻭﺩﻣﻮﻋﻬﺎ ﻳﻨﺰﻟﻮﺍ ..
🍁🍁🍁🍁
ﻻ ﺍﻟﺤﻤﺪ ﻟﻠﻪ ﻭﺿﻊ ﺍﻟﺠﻨﻴﻦ ﺳﻠﻴﻢ .. ﺑﺲ ﻫﻲ ﺻﺎﺭﻟﻬﺎ ﻫﺒﻮﻁ ﻓﻲ ﺍﻟﻀﻐﻂ .. ﻭﺣﺎﻟﻬﺎ ﺗﻮﺍ ﻛﻮﻳﺲ ..
ﻋﻤﺎﺭ ﺑﺨﻮﻑ : ﻳﻌﻨﻲ ﻣﺎﻓﻴﺶ ﻋﻠﻴﻬﺎ ﺧﻄﺮ ..
ﺍﻟﺪﻛﺘﻮﺭﺓ : ﻻ .. ﻻﻫﻲ ﻭﻻ ﺍﻟﺠﻨﻴﻦ ..
ﺗﻨﻔﺲ ﺑﺈﺭﺗﻴﺎﺡ ﻭﻫﺰ ﺭﺍﺳﻪ ﺑﺈﻳﺠﺎﺏ ..
ﺍﻟﺪﻛﺘﻮﺭﻩ : ﻻﺑﺎﺱ .. ﻭﻣﺸﺖ ..
ﻭﻫﻮ ﻣﺸﻲ ﻗﻌﻤﺰ ﻉ ﻭﺍﺣﺪ ﻣﻦ ﺍﻟﻜﺮﺍﺳﻲ .. ﺍﺗﻜﻰ ﺑﻤﺮﺍﻓﻘﻪ ﻉ ﺭﻛﺎﺑﻪ ﻭﻫﻮ ﻳﻔﻜﺮ ..
ﺷﻌﻮﺭ ﺍﻟﺨﻮﻑ ﻣﺘﻤﻠﻜﻪ ﻷﻥ ﺍﻟﻤﻮﻗﻒ ﺗﻜﺮﺭ .. ﻭﺧﺎﻳﻒ ﻫﻠﺒﻪ ﺗﺘﻜﺮﺭ ﻣﻌﺎﻩ ﺣﺎﺟﺎﺕ ﺗﺎﻧﻴﻪ
🍃 ﺗﺮﻛﻴﺒﺔ ﺷﺨﺼﻴﺘﻪ ﻣﺎﺗﺨﻠﻴﺸﻲ ﻳﻌﺮﻑ ﻳﻌﺸﻖ ﻏﻴﺮ ﻫﻜﻲ ..
ﻋﺸﻖ ﻗﺎﺳﻲ ﺑﻌﺾ ﺍﻟﺸﻲ ... ﻛﻘﺴﻮﺗﻪ ﻫﻮ ﺑﺎﻟﺰﺑﻂ ..
ﻳﻐﺎﺭ ﺑﻘﻮﺓ ﻭﺑﻘﺴﻮﺓ ... ﻳﺸﺘﺎﻕ ﺑﻘﻮﺓ ..
ﻋﺎﺷﻖ ﺑﻘﻮﺓ ..
ﻋﺸﻖ ﻗﻠﻴﻞ ﺍﻟﻨﺎﺩﺭ ﻣﺎﻳﺼﺎﺩﻓﻨﺎ .. ﻷﻥ ﺗﻮﺍ ﺍﻏﻠﺒﻬﻢ ﻳﺤﺐ ﺣﺴﺐ ﺍﻟﻈﺮﻭﻑ ﻭﻳﺴﻠﻢ ﺑﺎﻟﺴﺎﻫﻞ ﻓﻲ ﺍﻟﻠﻲ ﻳﺤﺒﻬﺎ ..
ﺣﺒﻴﺒﺘﻪ ﻛﺎﻧﺖ ﺍﻭ ﺧﻄﻴﺒﺘﻪ ﺍﻭ ﻣﺮﺗﻪ ..
ﻣﺶ ﺷﺎﻳﻔﻬﺎ ﺣﺎﺟﻪ ﻏﺎﻟﻴﻪ ﻟﺪﺭﺟﺔ ﺍﻧﻪ ﻣﺴﺘﻌﺪ ﻳﺤﺎﺭﺏ ﻉ ﺧﺎﻃﺮﻫﺎ ..
ﺍﻟﻌﺸﻖ ﺍﻟﻠﻲ ﻣﻦ ﻫﺎﻟﻨﻮﻉ .. ﻋﺸﻖ ﺳﻼﻃﻴﻦ ﻭﻣﻠﻮﻙ ..
ﻋﺸﻖ ﻓﺮﺳﺎﻥ ﻭﻣﺤﺎﺭﺑﻴﻦ
ﺗﺘﺤﻮﻝ ﺍﻟﻤﺤﺒﻮﺑﻪ ﻋﻨﺪﻫﻢ ﻟﻮﻃﻦ ﺛﺎﻧﻲ ﻳﻤﺘﻠﻜﻮﻩ ﻳﻌﻴﺸﻮﺍ ﻓﻴﻪ ﻭﻳﻌﻴﺶ ﻓﻴﻬﻢ ﻳﻤﻮﺗﻮﺍ ﻉ ﺧﺎﻃﺮﻩ ﺣﺘﻰ ﺍﻟﻤﻮﺕ ﻋﺎﺩﻱ ...
ﻋﺸﺎﻕ ﺯﻱ ﻫﺎﺩﻡ ﻣﻬﺪﺩﻳﻦ ﺑﺎﻹﻧﻘﺮﺍﺽ .. ﺍﻭ ﻓﻲ ﺍﻟﻐﺎﻟﺐ ﻳﻜﻮﻧﻮﺍ ﻗﺪ ﺍﻧﻘﺮﺿﻮﺍ ﻓﻌﻼ 🍃...
🍃 ﻭﻻ ﻧﺴﻴﺖ .. ﻻ ﻓﻲ ﺑﺎﻟﻔﻌﻞ
ﺯﻱ ﻫﺎﻧﻴﺒﺎﻝ .. ﺍﻟﻠﻲ ﻣﺠﺮﺩ ﻣﺎﺷﺎﻓﻬﺎ .. ﻧﺴﻲ ﻛﻞ ﺷﻲ ﻭﺍﺫﻛﺮﻫﺎ ﻫﻲ .. ﺍﺫﻛﺮ ﺍﻧﻪ ﻳﻨﺘﻤﻴﻠﻬﺎ ﻫﻲ
ﺗﻤﺮﺩﻉ ﻛﻞ ﺷﻲ ﺑﺴﺒﺒﻬﺎ ... ﺗﻤﺮﺩ ﺍﻳﻪ ﻭﻣﺴﺘﻌﺪ ﻳﺪﻳﺮ ﺍﻟﻤﺴﺘﺤﻴﻞ ﺑﺶ ﻳﺮﺟﻌﻬﺎ ﻟﻴﻪ ﻭﻣﺎﻳﺨﺴﺮﻫﺎﺵ ﻣﺮﺓ ﺗﺎﻧﻴﻪ 🍃
💕 ﻭﺍﻗﻒ ﻓﻲ ﺍﻟﺒﻼﻛﻮﻧﻪ ﻳﺘﻜﻠﻢ ﺑﺎﻟﺘﻠﻴﻔﻮﻥ : ﺑﺎﻫﻲ ﺍﻃﻠﻌﻲ ﻳﺎﻫﺒﻠﻪ ..
ﺷﺒﺢ ﺟﻴﻬﺔ ﺑﻼﻛﻮﻧﺘﻬﺎ ...
ﺍﻧﻔﺘﺢ ﺍﻟﺒﺎﺏ ﻭﻃﻠﻌﺖ .. ﻛﺎﻧﺖ ﻻﺑﺴﻪ ﻣﺎﻟﻴﻪ ﻃﻮﻳﻠﻪ ﻉ ﺍﻟﺘﻮﺗﻪ ﻭﻭﺷﺎﺡ ﻉ ﺭﺍﺳﻬﺎ ...
ﺷﺒﺤﺘﻠﻪ ﻭﻫﻲ ﺷﺎﺩﻩ ﺿﺤﻜﺘﻬﺎ ﺑﻌﺪﻳﻦ ﻏﻴﺮﺕ ﻋﻴﻮﻧﻬﺎ ﻋﻨﻪ : ﻟﻴﻜﻨﻲ ﻃﻠﻌﺖ ﺍﻧﺒﺴﻄﺖ ﻫﻸ ..
ﻫﺎﻧﻴﺒﺎﻝ ﻭﻫﻮ ﻳﺸﻮﻑ ﻟﻠﻄﺮﻳﻖ : ﻧﻨﺒﺴﻂ ﺣﻖ ﻟﻮ ﺭﺟﻊ ﻟﺴﺎﻧﻚ ﺍﻷﻭﻝ ..
ﺗﻨﻬﺪﺕ ﻭﻗﺎﻟﺖ : ﻟﻴﺶ ﻣﺼﺮ ﻉ ﺍﻟﻤﻮﺿﻮﻉ ﻳﻌﻨﻲ ﻣﺎﻋﻢ ﺗﻔﻬﻢ ﻋﻠﻲ ﻭﺍﻧﻲ ﺑﺤﻜﻲ ﺳﻮﺭﻱ .. ﻋﻢ ﺗﻔﻬﻢ؟
ﻣﻂ ﺷﻮﺍﺭﺑﻪ ﺩﺍﺧﻞ ﺑﻌﺪﻳﻦ ﻗﺎﻝ : ﻧﺴﺄﻟﻚ ﻭﺗﺠﺎﻭﺑﻲ ﺑﺼﺮﺍﺣﻪ ﻟﻴﺶ ﻣﺎﺗﺒﻴﺶ ﺗﺘﻜﻠﻤﻲ ﺑﻠﺴﺎﻧﻨﺎ ..
ﺳﻜﺘﺖ .. ﺷﺒﺤﺘﻠﻪ .. ﻭﻫﻮ ﺷﺒﺤﻠﻬﺎ ..
ﻗﻌﺪﻭﺍ ﻳﺸﺒﺤﻮﺍ ﻟﺒﻌﺾ ..
ﻫﻲ ﻓﻲ ﺍﻟﺤﻘﻴﻘﻪ ﻛﺎﻧﺖ ﺗﺨﺎﻑ ﺗﺘﻜﻠﻢ ﻣﻌﺎﻩ ﺑﺎﻟﻠﻴﺒﻲ ﻟﺴﺒﺐ ﻭﺍﺣﺪ ﻛﺎﻧﺖ ﺗﺬﻛﺮ ﻓﻲ ﺍﻳﺎﻡ ﺯﻣﺎﻥ ﻭﺗﺬﻛﺮﻫﺎ ﻷﻳﺎﻡ ﺯﻣﺎﻥ ﻣﺆﻟﻢ ﻟﻴﻬﺎ ﻷﻧﻬﺎ ﻻﺑﺪ ﺗﺬﻛﺮ ﻛﻴﻒ ﺗﻔﺎﺭﻗﻮﺍ ﻭﺗﻨﻘﻬﺮ ..
ﻫﻮ ﺷﻲ ﺍﺷﺒﻪ ﺑﺎﻟﻬﺮﻭﺏ ﻣﻦ ﺃﻟﻢ ﻣﺎ ﻭﺧﻼﺹ ..
ﺗﻨﻬﺪ ﻭﻗﺎﻝ ﻭﻫﻮ ﻳﺸﻮﻓﻠﻬﺎ : ﺗﻤﺎﻡ ﻣﺎﻧﺒﻴﺶ ﻧﻀﻐﻂ ﻋﻠﻴﻚ ﻉ ﺭﺍﺣﺘﻚ
ﻏﻴﺮﺕ ﻋﻴﻮﻧﻬﺎ ﻭﻗﺎﻟﺖ : ﻃﻴﺐ ﻗﻠﻲ ﺷﻮ ﺻﺎﺭﺑﺈﺑﻦ ﺯﻳﻨﺐ
ﺍﺑﺘﺴﻢ ﻭﻏﻴﺮ ﻋﻴﻮﻧﻪ ﻭﻗﺎﻝ : ﺑﺎﻳﻦ ﺍﻧﻪ ﻋﻠﻢ ﺍﻧﻲ ﻫﻨﻰ ﻫﺮﺏ .. ﻟﻜﻦ ﻣﺎﻋﻨﺪﻩ ﻭﻳﻦ ﻳﻌﺪﻱ .. ﺷﺒﺤﻠﻬﺎ ﻭﻫﻮ ﻳﻘﻮﻝ .. ﻭﺭﺍﻩ ﻭﺭﺍﻩ ﻻﺣﻘﻪ ﻭﻳﻦ ﻣﺎﻫﻮ ﻟﻴﻦ ﻧﻔﻬﻢ ﻣﻨﻪ ﻛﻞ ﺷﻲ ..
ﻫﻲ ﺍﺑﺘﺴﻤﺖ ﻭﻗﺎﻟﺖ : ﺍﻟﻠﻪ ﻳﺨﻠﻴﻚ ﻟﻜﻞ ﺍﺣﺒﺎﺑﻚ ﻳﺎﺭﺏ ..
ﻗﻌﺪ ﻳﺸﺒﺤﻠﻬﺎ ﻭﻫﻮ ﺳﺎﻛﺖ ..
ﺍﻣﺎﻫﻲ ﻣﺎﺑﺘﺶ ﺗﺸﺒﺤﻠﻪ ﻟﻤﺎ ﻗﺎﻟﺖ : ﻫﻸ ﻻﺯﻡ ﻓﻮﺕ ﻭﺳﻜﺮ ﻛﻤﺎﻥ .. ﺳﻼﻡ ..
ﻟﻔﺖ ﻭﺧﺸﺖ ﻭﻫﻲ ﺗﺴﻜﺮ ﻋﻠﻴﻪ
ﻛﺎﻥ ﻗﻠﺒﻬﺎ ﻣﻮﺟﻮﻉ ﻫﻠﺒﻪ ﺧﺎﻳﻔﻪ ﻣﻦ ﺍﻟﻠﻲ ﻫﻴﺎ ﻓﻴﻪ ﻣﻌﺎﻩ .. ﺣﺎﺳﻪ ﺑﺎﻟﺨﻮﻑ ﺍﻟﺸﺪﻳﺪ
ﻣﺎﺗﻨﻼﻣﺶ 🍃
ﻭﻫﻮ ﻛﺎﻥ ﻓﺎﻫﻢ ﻋﻠﻴﻬﺎ ﻛﻮﻳﺲ ﻭﻋﺎﺫﺭﻫﺎ .. ﻭﻣﺎﻳﺒﻴﺶ ﻳﻀﻐﻂ ﻋﻠﻴﻬﺎﺑﺶ ﻣﺎﺗﻨﻔﺮﺵ ﻣﻨﻪ ﻭﻣﻜﺘﻔﻲ ﺑﻌﻼﻗﺔ ﺍﻟﺼﺪﺍﻗﻪ ﺍﻟﻤﺰﻳﻔﻪ ..
🌴🌴🌴🌴🌴🌴🌴🌴🌴🌴🌴
9:00 ﻟﻴﻼ ..
ﻛﺎﻧﺖ ﺗﺒﻜﻲ ﻟﻤﺎ ﺳﻤﻌﺎﺗﻪ ﺻﻜﺮ ﺑﺎﺏ ﺍﻟﺤﻮﺵ ..
ﻃﻮﻝ ﻣﺴﺤﺖ ﺩﻣﻮﻋﻬﺎ .. ﻭﻧﺎﺿﺖ ﻭﻃﻠﻌﺘﻠﻪ ..
ﺣﻤﻴﺪﻩ : ﺣﻤﺪ ﻟﻠﻪ ﻉ ﺳﻼﻣﺘﻚ ..
ﺍﻟﺼﺪﻳﻖ ﺑﺈﺑﺘﺴﺎﻣﻪ : ﺍﻟﻠﻪ ﻳﺴﻠﻤﻚ ..
ﺧﺪﺕ ﻣﻨﻪ ﺍﻟﺸﻜﺎﻳﺮ ﻭﻫﻲ ﺗﻘﻮﻝ : ﺳﻠﻤﻚ ﺟﻴﺎﺏ ..
ﺭﺩ ﻋﻠﻴﻬﺎ ﻭﻗﺎﻝ : ﺗﺴﻠﻤﻲ ﺣﺒﻴﺒﺘﻲ .. ﺑﻨﺨﺶ ﻧﺪﻭﺵ ﻭﺑﻌﺪﻫﺎ
ﻧﺼﻠﻲ .. ﻭﺗﻴﻠﻲ ﺍﻟﻌﺸﻲ
ﺣﻤﻴﺪﻩ : ﺣﺎﺿﺮ .. ﻭﻣﺸﺖ ﻃﻮﻝ ﻟﻠﻜﻮﺟﻴﻨﻪ ﻭﺣﻄﺖ ﺍﻟﺤﺎﺟﺎﺕ ﻉ ﺍﻟﺮﺧﺎﻣﻪ ...
ﻧﺰﻟﻮﺍ ﺩﻣﻮﻋﻬﺎ ﻣﺮﺓ ﺗﺎﻧﻴﻪ ﻣﺠﺮﺩ ﺍﻧﻬﺎ ﺍﺫﻛﺮﺕ ﻛﻼﻡ ﺍﻣﻪ ﻟﻴﻬﺎ ..
ﻓﻼﺵ ﺑﺎﻙ ..
ﺣﻤﻴﺪﻩ : ﻋﻤﺘﻲ ﻣﺎﺳﻜﺮﺗﺶ ﺷﻬﺮﻳﻦ ﺭﺍﻧﻲ ..
ﺳﺎﻟﻤﻪ : ﻓﻲ ﺍﻟﻠﻲ ﺣﻤﻠﻦ ﻓﻲ ﻋﺸﺮﻳﻦ ﻳﻮﻡ ﻭﺍﺳﺒﻮﻋﻴﻦ ..
ﺣﻤﻴﺪﻩ : ﻭﻓﻲ ﺍﻟﻠﻲ ﺑﻌﺪ ﺳﻨﻪ ﻭﺍﺗﻨﻴﻦ ..
ﺳﺎﻟﻤﻪ : ﻻﻭﻳﻦ ﻳﺎﻛﺒﺪﻱ ﺷﻦ ﺳﻨﻪ ﻫﺪﻱ ﻭﺳﻨﺘﻴﻦ .. ﺗﺤﺴﺎﺑﻲ ﺭﻭﺣﻚ ﺻﻐﻴﺮﻩ .. ﻣﻈﻨﻲ ﺑﻌﺪ ﺳﻨﺘﻴﻦ ﻣﻌﺎﺵ ﻳﺼﻴﺮ ﻣﻨﻚ ﺑﻜﻞ !!
ﻃﺎﺣﻮﺍ ﺩﻣﻮﻉ ﺣﻤﻴﺪﻩ ..
ﺳﺎﻟﻤﻪ : ﺍﺳﻤﻌﻲ ﺍﺟﺮﻱ ﻉ ﺭﻭﺣﻚ ﻭﻋﺪﻱ ﻋﺎﻳﻨﻲ ﻭﺷﻮﻓﻲ ﺧﻴﺮ ﺑﻼﻙ .. ﺭﺍﻫﻮ ﻛﺎﻥ ﺭﺍﺣﺖ ﻋﻠﻴﻚ .. ﻧﺎﺧﺪﻭﻟﻪ ﺍﺻﻐﺮ ﻣﻨﻚ ﺗﻌﺒﻲ ﺍﻟﺤﻮﺵ ﺿﺮﻳﺮﻳﻪ ...
ﺍﻟﻮﻗﺖ ﺍﻟﺤﺎﺿﺮ ..
ﺣﻤﻴﺪﻩ ﺑﺒﻜﻲ : ﺣﺴﺒﻲ ﺍﻟﻠﻪ ﻭﻧﻌﻢ ﺍﻟﻮﻛﻴﻞ ..💔
🍁🍁🍁🍁🍁
ﻣﺘﻜﻲ ﻭﻳﺤﺴﺐ ﺑﺎﻵﻟﻪ ﺍﻟﺤﺎﺳﺒﻪ ﻓﺸﻮﻳﺔ ﺣﺴﺎﺑﺎﺕ ﻋﻨﺪﻩ ..
ﺭﻥ ﺗﻠﻴﻔﻮﻧﻪ ﻓﺘﺢ ﺍﻟﺨﻂ ﻭﻫﻮ ﻣﺮﻛﺰ ﻉ ﺍﻵﻟﻪ ﺍﻟﺤﺎﺳﺒﻪ ﻗﺎﻝ 5150: ﺩﻳﻨﺎﺭ ..
" ﻫﻬﻬﻬﻬﻬﻬﻬﻪ .."
ﺍﺳﺘﺎﻗﺾ ﻟﻤﺎ ﺳﻤﻊ ﺻﻮﺕ ﺍﻧﺜﻮﻱ ﻳﻀﺤﻚ ﻗﻌﻤﺰ ﻉ ﺣﻴﻠﻪ ﻭﻗﺎﻝ : ﺍﻳﻮﺍﺍ ...
" ﺍﻟﺒﺎﻳﻦ ﻣﺸﻐﻮﻝ "
ﻋﻤﺮ ﺑﻀﺤﻜﻪ : ﻭﻭﺍﺟﺪ ...
" ﺍﻣﻢ .. ﺭﺑﻲ ﻳﻌﺎﻭﻧﻚ .. ﺑﺲ ﻧﻘﺪﺭ ﻧﺎﺧﺪ ﻣﻦ ﻭﻗﺘﻚ ﺷﻮﻳﻪ "
ﺿﺤﻚ ﻭﻗﺎﻝ : ﺗﻲ ﻏﻴﺮ ﻣﻦ ﺍﻧﺘﻲ ﻗﺒﻞ ..
ﺿﺤﻜﺖ ﻭﻗﺎﻟﺖ : ﺑﻨﺖ ﻋﻤﻚ .. ﻟﻤﻴﺎﺀ ..
ﺍﺗﻔﺎﺟﺄ ﻭﺍﺿﺎﻳﻖ ﻓﻨﻔﺲ ﺍﻟﻮﻗﺖ ﻹﻥ ﻟﻴﻠﻰ ﺧﻄﺮﺕ ﻋﻠﻴﻪ ..
ﻟﻤﻴﺎﺀ : ﺷﻜﻠﻚ ﺍﺫﻛﺮﺕ ﻟﻴﻠﻰ ..
ﺗﻨﻬﺪ ﻭﻗﺎﻝ : ﻣﺘﺼﻠﻪ ﺑﻴﺎ ﻉ ﺧﺎﻃﺮﻫﺎ؟
ﻟﻤﻴﺎﺀ : ﺑﺼﺮﺍﺣﻪ .. ﺇﻳﻪ .. ﺳﺎﻣﺤﻨﻲ ﻓﻲ ﺍﻟﻠﻲ ﺑﻨﻘﻮﻟﻪ ﺑﺲ ﻣﻌﻘﻮﻟﻪ ﺍﺩﻳﺮ ﻫﻜﻲ ﺗﺴﻴﺒﻬﺎ ﺑﺴﺮﻋﻪ ﻫﻜﻲ ﻭﻛﺄﻧﻚ ﻣﺎﺻﺪﻗﺖ ﻭﻻﻛﺄﻥ ﻛﺎﻥ ﻓﻲ ﺑﻴﻨﺎﺗﻜﻢ ﺣﺐ ﻣﻦ ﺍﺻﻠﻪ ﺣﺮﺍﻡ ﻋﻠﻴﻚ ﺍﻟﻠﻲ ﺩﺭﺗﻪ ﻓﻴﻬﺎ ..
ﻋﻤﺮ ﻗﺎﻝ ﺑﺄﻟﻢ : ﻣﺎﺩﺭﺕ ﺷﻲ .. ﻟﻜﻦ ﻫﻲ ﻟﻸﺳﻒ .. ﺑﻴﻨﺘﻠﻲ ﺍﻧﻬﺎ ﺯﻳﻬﺎ ﺯﻱ ﻏﻴﺮﻫﺎ .. ﻻﻗﺪﺭﺕ ﻇﺮﻭﻓﻲ ﻭﻻ ﺭﺍﻋﺘﻨﻲ .. ﺗﻘﻮﻟﻲ ﺗﻮ ﺗﺒﻌﺖ ﻫﻠﻚ ﻭﺗﻬﺪﺩﻧﻲ ﻭﺗﺨﻴﺮﻧﻲ ﻓﻮﻗﻬﺎ .. ﻃﺎﺣﺖ ﻣﻦ ﻋﻴﻨﻲ ﻭﺍﻟﺤﻖ ﻋﻔﺘﻬﺎ ﺧﻼﺹ ..
ﺍﺑﺘﺴﻤﺖ ﻭﻫﻲ ﺗﻘﻮﻝ : ﺍﻧﺖ ﻣﺎﺻﺪﻗﺖ ..
ﻋﻤﺮ : ﻻﻻ ﻭﺍﻟﻠﻪ ﻻ .. ﺑﺲ ﻣﺎﻧﺤﺒﺶ ﻣﻦ ﻳﺘﻌﺎﻣﻞ ﻣﻌﺎﻱ ﺑﺎﻷﺳﻠﻮﺏ ﻫﺪﻯ ﺍﻧﻲ ﺍﻟﻠﻲ ﻳﺘﻌﺎﻣﻞ ﻣﻌﺎﻱ ﻫﻜﻲ ﻳﻨﺴﺎﻧﻲ ﻣﻦ ﺣﻴﺎﺗﻲ ﻧﻄﻠﻌﻪ ﻃﻮﻝ ...
ﺗﺼﻨﻌﺖ ﺗﻨﻬﻴﺪﻩ ﺃﻟﻢ ﻭﻗﺎﻟﺖ : ﻳﻌﻨﻲ ﺧﻼﺹ ..
ﻋﻤﺮ : ﺧﻼﺹ ..
ﻟﻤﻴﺎﺀ : ﻛﻠﻪ ﻧﺼﻴﺐ ﻓﻲ ﺍﻟﻨﻬﺎﻳﻪ .. ﺍﻟﻤﻬﻢ ﺗﻮﺍ .. ﺍﺣﻨﻲ ﻣﺎﻧﺨﺴﺮﻭﻛﺶ ..
ﺍﺑﺘﺴﻢ ﻭﻗﺎﻝ : ﻟﻴﺶ ﺗﺒﻲ ﺗﻜﺴﺒﻴﻨﻲ ..
ﻟﻤﻴﺎﺀ ﺑﻀﺤﻜﻪ : ﺍﻳﻪ ..
ﺿﺤﻚ ﻭﻫﻮ ﻳﻘﻮﻝ : ﻳﺎﻭﺩﻱ ﻛﺴﺒﺘﻲ ﺧﻼﺹ ..
ﻟﻤﻴﺎﺀ : ﻫﻬﻬﻬﻬﻬﻬﻬﻬﻪ
🍃 ﻋﺰﻳﺰ ﻣﺼﺮ ﻗﺎﻟﻬﺎ ... ﺍﻥ ﻛﻴﺪﻛﻦ ﻋﻈﻴﻢ
ﻳﺎﺑﺎﻝ ﻣﻊ ﺭﺟﺎﻟﻪ ﺯﻱ ﻋﻤﺮ 🍃
🍁🍁🍁🍁🍁🍁
ﺗﺎﻧﻲ ﻳﻮﻡ ﺍﻟﺼﺒﺢ ..
ﺍﻟﺴﺎﻋﻪ 10:00 ﺻﺒﺎﺣﺎ ..
ﻓﻲ ﺍﻟﻄﺮﻳﻖ .
ﻣﺮﻭﺡ ﺑﻴﻬﺎ ﻣﻦ ﺍﻟﻤﺴﺘﺸﻔﻰ ﻟﻠﺤﻮﺵ ..
ﻛﺎﻧﺖ ﻃﻮﻝ ﺍﻟﻮﻗﺖ ﺗﺸﺒﺢ ﺍﻟﻘﺪﺍﻡ ﺑﻤﻼﻣﺢ ﺟﺎﻣﺪﻩ ..
ﻭﻫﻮ ﻣﺮﺓ ﻣﺮﺓ ﻳﺴﺮﻗﻠﻬﺎ ﻓﻲ ﺍﻟﻨﻈﺮ ..
ﻭﺻﻠﻮﺍ ﻟﺤﻮﺷﻬﻢ ..
🍁 ﺍﻭﻝ ﻣﺎﺧﺸﻮﺍ ﻟﻠﺤﻮﺵ ﻃﻮﻝ ﻣﺸﺖ ﻟﺪﺍﺭ ﺍﻟﻨﻮﻡ ..
ﻭﻫﻮ ﻛﺎﻥ ﻣﺎﺷﻲ ﻭﺭﺍﻫﺎ ﺑﻬﺪﻭﺀ .. ﺧﺶ ﺑﻌﺪﻫﺎ ﻟﻤﺎ ﻟﻘﺎﻫﺎ ﺍﺩﻭﺭ ﻓﻲ ﺍﻟﺪﺍﺭ ..
ﻗﺎﻝ : ﺗﻠﻴﻔﻮﻧﻚ ﺍﻧﺴﻴﻪ ﺣﺎﻟﻴﺎ ..
ﺷﺒﺤﺘﻠﻪ ﻭﻗﺎﻟﺖ : ﺧﺎﻳﻒ ﻧﻬﺮﺏ ﻭﻻﻳﺎﺧﺪﻭﻧﻲ ﻣﻨﻚ ..
ﻋﻤﺎﺭ : ﻳﺲ ..
ﺩﻻﻝ : ﻣﺎﺗﺨﺎﻓﺶ ﻣﺶ ﺣﻨﻌﺮﺽ ﺣﺪ ﻣﻦ ﻋﻴﻠﺘﻲ ﻟﻠﺨﻄﺮ ﻹﻧﻲ ﻣﺎﻧﻀﻤﻨﻜﺶ .. ﺍﻧﻲ ﺑﺲ ﻧﺒﻲ ﻧﺴﺄﻝ ﻉ ﺧﺎﻟﺘﻲ ..
ﻫﻮ ﻗﺪﻡ ﻭﻗﺎﻝ ﺑﻀﻴﻖ ﻭﺻﻮﺗﻪ ﻋﺎﻟﻲ ﺑﻌﺾ ﺍﻟﺸﻲ : ﺩﻻﻝ ﻣﺶ ﻣﻼﺣﻈﻪ ﺍﻥ ﻛﻼﻣﻚ ﻣﻮﻟﻲ ﻛﻴﻒ ﺍﻟﺴﻢ .. ﻛﻼﻣﻚ ﺟﺎﺭﺡ ﻭﺍﺟﺪ ﻳﺎ
ﺩﻻﻝ ﻭﺍﺟﺪ ..
ﻫﻲ ﻗﻠﺒﻬﺎ ﻭﺟﻌﻬﺎ ﻭﻗﺎﻟﺖ ﺑﺄﻟﻢ : ﻣﺎﻫﻮ ﻣﻦ ﺧﻮﻓﻲ ﻋﻠﻴﻚ .. ﻣﻦ ﺧﻮﻓﻲ ﻳﺪﻋﻮﺍ ﻋﻠﻴﻚ ﺩﻋﻮﺓ ﺩﻳﺮ ﻓﻴﻚ ﺷﻲ .. ﺷﻦ ﻧﺪﻳﺮ ﺍﻧﻲ ﺑﻌﺪﻳﻦ ﻗﻮﻟﻲ ﺷﻦ ﻳﺼﻴﺮ ﻓﻴﺎ ﻓﻬﻤﻨﻲ .. ﻧﺰﻟﻮﺍ ﺩﻣﻮﻋﻬﺎ
ﻭﻫﻮ ﻳﺸﻮﻓﻠﻬﺎ ﺑﺄﻟﻢ ﻭﻗﻠﺒﻪ ﻳﻨﻌﺼﺮ ﻋﺼﺮ : ﺍﻧﻲ ﻣﺎﻇﻠﻤﺖ ﺣﺪ ﺻﺪﻗﻴﻨﻲ ﺍﻟﻠﻲ ﺩﺭﺗﻪ ﻫﻮ ﺍﻟﺼﺢ .. ﻭﺍﺣﺪ ﻏﻴﺮﻱ ﻳﺎﺩﻻﻝ ﻗﻄﻌﻪ ﺗﻘﻄﻴﻊ ﻭﻟﻮﺣﻪ ﻟﻠﻜﻼﺏ ﺗﻨﻬﺸﻪ .. ﻣﻦ ﻳﺮﺿﺎﻫﺎ ﻉ ﻋﺮﺿﻪ ﻣﻦ ﻳﺮﺿﺎﻫﺎ ﻉ ﻧﻔﺴﻪ .. ﺍﻟﺪﻳﻮﺙ ﺑﺲ ﻫﻮ ﺍﻟﻠﻲ ﻳﻔﻮﺕ ﺣﺎﺟﻪ ﻛﻴﻒ ﺍﻟﻠﻲ ﺻﺎﺭﺕ ﻫﺪﻱ .. ﺷﺪ ﻳﺪﻫﺎ ﻭﻗﺎﻝ ... ﻟﻤﺲ ﻳﺪﻙ ﻭﺍﻧﺘﻲ ﻣﺮﺍﺗﻲ .. ﻛﻠﻤﻚ ﻉ ﻫﺎﺗﻔﻚ ﻭﺍﻧﺘﻲ ﻣﺮﺍﺗﻲ ﻭﻗﺎﻟﻚ ﻛﻼﻡ ﺍﻗﺴﻤﻠﻚ ﺑﺎﻟﻠﻪ ﺭﺍﺟﻞ ﺗﺎﻧﻲ ﻏﻴﺮﻱ ﻛﺎﻥ ﻗﻄﻌﻠﻪ ﻟﺴﺎﻧﻪ ﻣﻦ ﻣﻨﺒﺘﻪ .. ﻟﻜﻦ ﺍﻧﻲ ﻛﻨﺖ ﺭﺣﻴﻢ ﺑﻴﻪ ﻭﺍﺟﺪ ..
ﻣﺴﺤﺖ ﺩﻣﻮﻋﻬﺎ ﻭﻗﺎﻟﺖ : ﺍﻧﻲ ﻣﻌﺎﻙ ﻫﻮ ﻳﺴﺘﺎﻫﻞ ﻭﻳﺴﺘﺎﻫﻞ ﻣﺎﺍﻛﺜﺮ .. ﻟﻜﻦ ﺧﻼﺹ ﻫﻮ ﺍﻧﻘﺮﺹ ﻣﻦ ﻭﺩﻧﻪ ﺗﻮﺍ .. ﺭﺩﻩ ﻟﻘﺮﺍﻳﺘﻪ .. ﺭﺩﻩ ﻉ ﺧﺎﻃﺮ ﻋﻤﺘﻚ ﻭﺑﻨﺘﻬﺎ ... ﻭﺍﻟﻠﻪ ﺍﻧﻲ ﻣﺎﻗﺎﻫﺮﻧﻲ ﻛﺎﻥ ﻫﻤﺎ ..
ﺷﺒﺤﻠﻬﺎ ﺷﻮﻳﻪ ﺑﻌﺪﻳﻦ ﻃﻠﻖ ﻳﺪﻫﺎ ﻭﻗﺎﻝ : ﺍﻋﺬﺭﻳﻨﻲ .. ﻻﻳﻤﻜﻦ ..
ﺷﺒﺤﺘﻠﻪ ﺷﻮﻳﻪ ﺑﻌﺪﻳﻦ ﻗﺎﻟﺖ ﺑﺤﺪﻩ : ﺑﺎﻫﻲ .. ﺯﻱ ﻣﺎﺗﺒﻲ ..
ﻣﺸﺖ ﻟﻠﺪﻭﻻﺏ ﻭﻫﻲ ﺍﻃﻠﻊ ﻟﺮﻭﺣﻬﺎ ﻓﺤﻮﺍﻳﺞ
ﺧﺪﺗﻬﻢ ﻭﻣﺸﺖ ﻃﻮﻝ ﻟﻠﺤﻤﺎﻡ ﺧﺸﺖ ﻭﺻﻜﺮﺕ ﺑﺎﺑﻪ ﺑﺎﻟﻘﻮﺓ ..
ﻫﻮ ﺗﻨﻬﺪ ﺑﻀﻴﻖ .. ﻭﻃﻠﻊ ﻃﻮﻝ ﻣﻦ ﺍﻟﺪﺍﺭ ﻣﺸﻲ ﻟﻐﺮﻓﺔ ﺍﻟﻤﻜﺘﺒﻪ ..
🍁🍁🍁🍁
ﺍﻟﺴﺎﻋﻪ 12 ﻗﺒﻞ ﺍﻟﻈﻬﺮ ..
ﻳﻌﻨﻲ ﻣﺘﺄﻛﺪ ﻣﺎﺩﺭﺕ ﺷﻲ ..
ﺣﻤﺰﺓ ﻭﻫﻮ ﻳﺸﺒﺢ ﻓﻲ ﺍﻟﻔﺮﺍﻍ : ﺍﻳﻪ ..
ﻫﺎﻧﻴﺒﺎﻝ : ﺗﻤﺎﻡ .. ﺗﻮ ﻧﺘﺼﺮﻑ ..
ﺷﺒﺤﻠﻪ ﻭﻗﺎﻝ ﺑﺤﺪﻩ : ﻛﻴﻒ؟ !!
ﺭﻓﻊ ﻫﺎﻧﻴﺒﺎﻝ ﺣﻮﺍﺟﺒﻪ ﻭﻫﻮ ﻳﻘﻮﻝ : ﺑﻨﻜﻠﻢ ﻋﻤﺎﺭ ﻭﻻ ﺧﺎﻟﻲ ﻫﻤﺎ ﺑﺲ ﺍﻟﻠﻲ ﻳﻘﺪﺭﻭﺍ ﻳﺘﺼﺮﻓﻮﺍ ..
ﺣﻤﺰﺓ ﺑﻌﺼﺒﻴﻪ : ﺍﺭﺟﻮﻙ ﻣﺎﺗﻜﻠﻢ ﺣﺪ ﻳﺎﺧﺎﻝ ﻭﻻﺗﻘﻮﻝ ﻟﺤﺪ ﺣﺎﺟﻪ ..
ﻫﺎﻧﻴﺒﺎﻝ : ﺍﺳﻜﺖ ﺍﺹ ..
ﺣﻤﺰﺓ ﺑﺤﺪﺓ ﺍﻛﺒﺮ : ﺭﺟﺎﺀﺍ ﻳﺎﺧﺎﻝ ﻣﺎﺗﺪﺧﻠﺶ ..
ﺷﺒﺤﻠﻪ ﺷﻮﻳﻪ ﻭﻗﺎﻝ : ﻳﺎﻭﺩﻱ ﺑﺮﺍﺣﺘﻚ .. ﺩﻳﺮ ﻣﺎﻳﻌﺠﺒﻚ .. ﻭﺳﺎﻣﺤﻨﺎ ﺍﻟﻠﻲ ﺍﺩﺧﻠﻨﺎ ﻓﻴﻚ ..
ﻭﻧﺎﺽ ﻭﻃﻠﻊ ﻣﻦ ﺣﺪﺍﻩ .. ﻭﻣﺸﻲ ﻃﻮﻝ ﻟﻠﺒﺎﺏ ﻟﺒﺲ ﻛﻨﺪﺭﺗﻪ ﻭﻃﻠﻊ .. ﻭﺳﻜﺮ ﺍﻟﺒﺎﺏ ﻭﺭﺍﻩ ..
ﻉ ﻃﻠﻌﺔ ﺯﻳﻨﺐ ﻭﺍﻟﺒﻨﺎﺕ ﻣﻦ ﺍﻟﻜﻮﺟﻴﻨﻪ ..
ﺯﻳﻨﺐ : ﺧﻴﺮﻩ !! ؟ .
ﺭﺑﺎﺏ : ﺍﺷﺒﺢ ﺷﻦ ﻣﻠﺒﺰ ﻣﻌﺎﻩ ﻭﻟﺪﻙ ﻓﻲ ﺍﻟﺪﻭﺓ ﻭﻣﻌﺮﻭﻑ ﺧﺎﻟﻲ ﻣﺎﻳﺘﺤﻤﻠﺶ ..
ﺭﺍﻧﻴﺎ : ﻋﻠﻴﻚ ﻫﻢ ﻭﺧﻼﺹ
ﺯﻳﻨﺐ ﺗﻨﻬﺪﺕ ﺑﺄﻟﻢ ﻭﻭﻟﺖ ﺧﺸﺖ ﻟﻠﻜﻮﺟﻴﻨﻪ .. ﺩﺳﺖ ﺍﻟﻤﻔﺮﻭﻡ ﺍﻟﻠﻲ ﺟﺎﻳﻪ ﺑﺪﻳﺮﻩ ﺑﻴﻪ ﺍﻣﺒﻄﻦ ﻟﻠﻐﺪﻱ ﻭﻗﺎﻟﺖ ﻟﺮﺍﻧﻴﺎ : ﺧﻮﺩﻱ ﺷﻮﻳﻪ ﻣﻦ ﺍﻟﻠﺤﻢ ﻭﺩﺳﻲ ﺍﻟﺒﺎﻗﻲ .. ﻭﺩﻳﺮﻱ ﻣﺒﻜﺒﻜﻪ ﺑﺪﺍﻝ ﺍﻟﻤﺴﻘﻴﻪ ..
ﻭﻃﻠﻌﺖ ﻣﻦ ﺣﺪﺍﻫﻢ ﻭﺩﻣﻮﻋﻬﺎ ﻳﻨﺰﻟﻮﺍ ﻭﻣﺸﺖ ﻟﻠﺪﺍﺭ .
ﺭﺑﺎﺏ : ﺻﺪﺭﻱ ﻣﻄﺒﻖ ﻭﻛﺎﺭﻫﻪ ﻫﺎﻟﻌﻴﺸﺔ ﺍﻟﺴﻮﺩﺍ ﻭﻛﺎﺭﻫﻪ ﺭﻭﺣﻲ ..
ﺭﺍﻧﻴﺎ ﻗﺎﻟﺖ ﺑﺄﻟﻢ : ﺭﺑﻲ ﻳﻔﺮﺝ ..
🌴🌴🌴🌴🌴🌴🌴🌴🌴🌴
ﺧﻼﺹ ﻋﺮﺳﻚ 11\5 ﺭﺍﻫﻮ ..
ﺍﻣﺎﻝ : ﺗﺰﻳﺪﻱ ﺗﻮﺗﺮﻱ ﻓﻴﺎ ..
ﺳﻌﻴﺪﻩ : ﻧﺒﻴﻚ ﺗﺴﻘﺪﻱ ﺭﻭﺣﻚ ﻓﻲ ﺣﺎﺟﺎﺕ ﻭﺍﺟﺪﻩ ﻧﺎﻗﺼﻪ .. ﺷﺒﺤﺖ ﻟﻌﺰﻳﺰﺓ .. ﺍﻛﺘﺒﻲ ﻳﺎﻋﺰﻳﺰﺓ .. ﺯﻭﺯ ﻃﻮﺍﻗﻢ ﻛﻴﺴﺎﻥ ﻛﺮﻳﺴﺘﺎﻝ ..
ﻭﻛﻤﻠﺖ ﺳﻌﻴﺪﻩ ﺗﻤﻞ ﻓﻲ ﺍﻟﻠﻲ ﻧﺎﻗﺺ ﻉ ﻋﺰﻳﺰﺓ ﻭﻋﺰﻳﺰﺓ ﺗﻜﺘﺐ ..
ﺍﻣﺎﻝ ﻧﺎﻭﻳﻪ ﺗﺮﻓﻊ ﻣﻌﺎﻫﺎ ﻓﻲ ﺑﺘﺎﺗﻬﺎ ﺍﻣﺎﻋﻴﻦ .. ﻭﺧﻠﻴﻔﻪ ﺧﻮﻫﺎ ﻫﺪﺍﻟﻬﺎ ﻃﻘﻢ ﻛﻨﺎﺑﺎﺕ .. ﻭﺳﻠﻴﻤﺎﻥ ﺟﻠﺴﻪ ﻋﺮﺑﻴﻪ ﻓﺮﺷﺘﻬﺎ ﻓﻲ ﻭﺣﺪﻩ ﻣﻦ ﺍﻟﺪﻳﺎﺭ ﻓﺤﻮﺷﻬﺎ ...
ﺍﻟﺤﻮﺵ ﻛﺎﻥ ﺣﺎﺟﻪ ﺻﺢ . ﺑﺲ ﻣﺎﻛﺎﻧﺶ ﻛﻠﻪ ﻣﻔﺮﺵ ﻫﺪﺍ ﻋﻼﺵ ﺳﺎﻋﺪﻭﻫﺎ ﺧﻮﺗﻬﺎ ..
ﻭﻋﺪﺕ ﺍﻷﻳﺎﻡ 🍃🍃
ﻭﺧﺶ ﺷﻬﺮ ﺍﻟﺤﺮﺙ 2008
ﻭﺑﺪﻱ ﻋﺮﺱ ﺍﻣﺎﻝ ..
ﻭﻛﺎﻥ ﻋﺮﺱ ﻛﺒﻴﺮ ﺳﺒﻊ ﺍﻳﺎﻡ ﻭﺳﺒﻊ ﻟﻴﺎﻟﻲ ..
ﻣﺎﺩﻳﺎ ﺍﻓﺨﻢ ﻣﻦ ﻋﺮﺱ ﺣﻤﻴﺪﻩ ﺑﻬﻠﺒﻪ ... ﺑﺲ ﻣﺶ ﺑﻔﺨﺎﻣﺔ ﺍﺟﻮﺍﺋﻪ ..
ﺣﻀﺮﺕ ﺍﻟﻌﺮﺱ ﻋﻤﺘﻬﻢ ﻣﺒﺮﻭﻛﻪ ﻭﺑﻨﺎﺗﻬﺎ ﻛﻠﻬﻢ ..
ﻭﻣﻦ ﺑﻨﺎﺕ ﻋﻤﻬﻢ ﻣﺎﺟﻲ ﺣﺪ ﻏﻴﺮ ﻏﺎﻟﻴﻪ ﻭﺣﻤﻴﺪﻩ ..
ﺣﻤﻴﺪﻩ ﺍﻟﻠﻲ ﺍﻟﻨﺎﺱ ﻣﺎﺑﻄﻠﻮﺵ ﻭﻫﻤﺎ ﻳﺴﺄﻟﻮﺍ ﻓﻴﻬﺎ ..
" ﺷﻨﻮ ﻣﺎﻓﻴﺶ ﺣﻮﻳﺠﻪ .."
ﻫﻤﺎ ﻫﻜﻲ ﻣﺎﻫﻮ ... ﻣﺠﺘﻤﻌﻨﺎ ﻫﻜﻲ .. ﻻﺯﻡ ﻳﺤﺴﺲ ﺍﻟﻤﺮﺍﺓ ﺑﺎﻟﻨﻘﺺ ..
ﻭﻫﻲ ﻋﺰﺑﺎﺀ .. ﻭﻫﻲ ﻣﺘﺰﻭﺟﻪ .. ﻭﻫﻲ ﻣﻄﻠﻘﻪ ﻭﻫﻲ ﺃﺭﻣﻠﻪ ...
ﻭﻏﻴﺮﻩ ﻭﻏﻴﺮﻩ .. ﺍﻟﻤﻬﻢ ﺍﻟﻤﺮﺍﺓ ﻓﻲ ﻣﺠﺘﻤﻊ ﺯﻱ ﻫﺪﺍ ﻻﺯﻡ ﺗﺮﻛﺒﻬﺎ ﺍﻷﻣﺮﺍﺽ ﺍﻟﻨﻔﺴﻴﻪ ..
ﺑﺲ ﺗﻌﺮﻓﻮﺍ ﺷﻨﻮ ﻫﻮ ﺍﻟﻌﺠﺐ ﺍﻟﻌﺠﺎﺏ ﻓﻲ ﺍﻟﺤﻜﺎﻳﻪ ﻫﺎﺩﻱ ..
ﺍﻥ ﺍﻟﻠﻲ ﻳﺤﺴﺲ ﺍﻟﻤﺮﺍﺓ ﺑﺎﻟﻨﻘﺺ ﻓﻤﺠﺘﻤﻌﻨﺎ .. ﻣﺮﺍﺓ ﺯﻳﻬﺎ 🍃!...
ﺍﻟﻤﻬﻢ ..
ﺍﻣﺎﻝ ﻃﻠﻌﺖ ﺣﻠﻮﺓ ﻫﻠﺒﻪ ﻟﻴﻠﺔ ﺣﻔﻠﺘﻬﺎ ... ﻭﺩﺍﺭﺕ ﻧﻔﺲ ﺍﻟﻨﻈﺎﻡ ﻣﺘﺎﻉ ﺣﻤﻴﺪﻩ .. ﻭﺗﻬﻨﺖ ﻭﺑﺪﺕ ﺣﻴﺎﺓ ﺟﺪﻳﺪﻩ ...
🍁🍁🍁🍁
ﺧﻼﻝ ﻫﺎﻟﻔﺘﺮﺓ ..
🍁 ﻋﻼﻗﻪ ﻫﺎﻧﻴﺒﺎﻝ ﺑﻌﺮﻭﺑﻪ ﻛﺎﻧﺖ ﻋﻼﻗﻪ ﺻﺪﺍﻗﻪ ﻇﺎﻫﺮﻳﺎ .. ﻓﻲ ﺑﻴﻨﺎﺗﻬﻢ ﻣﺴﺎﻓﺔ ﺃﻣﺎﻥ ..
ﺍﻟﻮﺿﻊ ﺻﻌﺐ ﺷﻮﻳﻪ .. ﻣﺶ ﺑﺎﻟﺴﺎﻫﻞ ﻳﺮﺟﻌﻮﺍ ﻃﻮﻝ ..
ﻫﻤﺎ ﺗﻮﺍ ﻓﻲ ﺳﻦ ﻧﻀﻮﺝ .. ﻋﻜﺲ ﺍﻳﺎﻡ ﺍﻟﻤﺮﺍﻫﻘﻪ .. ﻣﺎﻛﺎﻧﺶ ﻓﻲ ﺣﺴﺎﺑﺎﺕ ﻟﻠﻤﺸﺎﻋﺮ ...
ﺑﺲ ﻓﻲ ﻫﺎﻟﻤﺮﺣﻠﻪ ﺍﻟﺤﺎﻟﻴﻪ ﻟﻴﻬﻢ ﻣﻊ ﺑﻌﺾ ﻓﻲ ﻫﻠﺒﻪ ﺣﺴﺎﺑﺎﺕ ﻟﻠﻤﺸﺎﻋﺮ ..
🍁 ﻋﻼﻗﻪ ﺍﻟﺼﺪﺍﻗﻪ ﺑﻴﻨﺎﺗﻬﻢ ﻣﺶ ﺯﻱ ﻋﻼﻗﻪ ﺍﻟﺼﺪﺍﻗﻪ ﺍﻟﻠﻲ ﺑﻴﻦ ﻋﻤﺮ ﻭﻟﻤﻴﺎﺀ ﺍﻟﺰﻭﺯ ﺍﻧﺴﺠﻤﻮﺍ ﻣﻊ ﺑﻌﺾ ﻫﺪﺭﺯﺓ ﻭﺿﺤﻚ ﻭﺑﺼﺎﺭﺓ
ﻭﺑﺪﻱ ﻋﻤﺮ ﻳﺎﺧﺪ ﻉ ﻟﻤﻴﺎﺀ ﻫﻠﺒﻪ ﻫﻠﺒﻪ .. ﻣﺎﻳﻤﺮﺵ ﻳﻮﻣﻪ ﺩﻭﻥ ﻣﺎﻳﻜﻠﻤﻬﺎ ﻭﻟﻮ ﻏﺎﺑﺖ ﻳﺪﻭﺭﻫﺎ ﺯﻱ ﺍﻟﻤﻬﺒﻮﻝ ﻟﻴﻦ ﻳﺤﺼﻠﻬﺎ ..
ﻛﺎﻧﺖ ﻟﻤﻴﺎ ﻓﻨﻈﺮﻩ ﻣﻤﻴﺰﺓ ﺍﻟﻮﺣﻴﺪﻩ ﻣﻦ ﺑﻴﻦ ﻛﻞ ﺍﻟﻠﻲ ﻋﺮﻓﻬﻢ ﺭﻛﺒﺖ ﻉ ﺟﻮﻩ ..
ﻟﻶﻥ ﻫﻮ ﻣﺶ ﻓﺎﻫﻢ ﻣﺸﺎﻋﺮﻩ .. ﻣﺎﺯﺍﻝ ﺑﻜﺮﻱ ..
ﻟﻜﻦ ﻫﻲ ﺯﺍﺩﺕ ﺗﻌﻠﻘﺖ ﺑﻴﻪ .. ﻗﻄﻌﺖ ﺭﺟﻠﻬﺎ ﻣﻦ ﺣﻮﺵ ﻭﻟﺪ ﻋﻤﺘﻬﺎ " ﺍﺏ ﻟﻴﻠﻰ .." ﻭﺑﺪﺕ ﺗﺘﻬﺮﺏ ﻣﻨﻬﺎ ﻭﺗﻄﻠﻊ ﻣﻦ ﺣﻴﺎﺗﻬﺎ ﺑﺎﻟﺘﺪﺭﻳﺞ 🍃..
🍁 ﻭﻓﻲ ﻭﺳﻂ ﻟﻴﺒﻴﺎﻧﺎ ..
ﻛﺎﻧﻮﺍ ﻋﺸﺎﻕ ﺳﺮﺕ .. ﻓﻲ ﻗﻄﻴﻌﻪ ﺗﺎﻣﻪ ..
ﺑﺪﺗﻬﺎ ﺩﻻﻝ ﺍﻟﻠﻲ ﻛﺎﻧﺖ ﺗﺒﻴﻪ ﻳﺘﺮﺍﺟﻊ ﻋﻦ ﺍﻟﻠﻲ ﺩﺍﺭﻩ ..
ﻟﻜﻦ ﻫﻮ ﺯﺍﺩ ﻳﺒﺲ ﺭﺍﺳﻪ ﺍﻛﺜﺮ ﻭﺍﻛﺜﺮ ..
ﺣﺘﻰ ﻗﻴﺪﻫﺎ ﻭﻗﻔﻬﻮﻟﻬﺎ ..
ﺍﻟﻤﺸﻜﻠﻪ ﺍﻥ ﺩﻻﻝ ﻭﺣﻤﻬﺎ ﻛﺎﻥ ﺑﺎﻟﺤﺐ ..
ﻛﺎﻧﺖ ﺗﺘﻌﺬﺏ ﻫﻠﺒﻪ ﻣﺴﻜﻴﻨﻪ ..
ﻛﺎﻧﺖ ﻭﻫﻮ ﻣﺶ ﻣﻮﺟﻮﺩ ﺍﻃﻠﻊ ﻓﺤﻮﺍﻳﺠﻪ ﺗﺤﻀﻦ ﻭﺗﺒﻮﺱ ﻓﻴﻬﻢ ﻭﻫﻲ ﺗﺒﻜﻲ ..
ﻭﻋﻄﺮﻩ ﺗﻘﻌﺪ ﺯﻱ ﺍﻟﻤﺪﻣﻨﻪ ﺗﺸﻢ ﻓﻴﻪ ..
ﻭﻟﻮ ﺟﺖ ﺗﺮﻗﺪ .. ﻻﺑﺪ ﻭﺣﺎﺟﻪ ﻣﻦ ﺣﻮﺍﻳﺞ ﻋﻤﺎﺭ ﻓﺤﻀﻨﻬﺎ ﻭﻫﻲ ﺭﺍﻗﺪﻩ ..
ﻛﺬﺍ ﻣﺮﺓ ﻫﻮ ﺷﺎﻓﻬﺎ ﺭﺍﻗﺪﻩ ﺑﺤﻮﺍﻳﺠﻪ ﻛﺎﻧﺖ ﺗﻠﺒﺲ ﻓﻴﻬﻢ ﻣﺮﺍﺕ ..
ﻛﺎﻥ ﻳﻜﺘﻔﻲ ﺑﺎﻟﻀﺤﻚ ﻭﺧﻼﺹ .. ﻭﻓﻲ ﻧﻔﺲ ﺍﻟﻮﻗﺖ ﻳﺘﺤﺴﺐ ﻉ ﺣﻤﺰﺓ ..
🍁 ﺣﻤﺰﺓ ﺍﻟﻠﻲ ﺭﺟﻊ ﻟﺨﺪﻣﺘﻪ .. ﻭﻣﻌﺎﻩ ﺣﺼﻞ ﺧﺪﻣﻪ ﻓﻲ ﻣﻜﺎﻥ ﺗﺎﻧﻲ ﻓﺼﻴﺪﻟﻴﻪ ﻟﻮﺍﺣﺪ ﻳﻌﺮﻓﻪ ﻭﻗﻌﺪ ﻏﺎﺭﻕ ﻓﻲ ﺍﻟﺨﺪﻣﻪ ﻭﺧﻼﺹ ..
ﻭﻟﻌﻨﺪ ﻫﺎﻟﻠﺤﻈﻪ .. ﺧﻴﺮﻱ ﻣﺎﻳﻨﺪﺭﻱ ﻉ ﺷﻲ ﻭﻻ ﺑﻲ ﺣﺪ ﻳﻘﻮﻟﻪ ..
🍁 ﺭﺍﻧﻴﺎ ﻭﻟﺖ ﻟﻠﻘﺮﺍﻳﻪ ﺍﻟﺴﻤﺴﺘﺮ ﺑﺪﻱ ﺍﺧﺮ ﻋﺸﺮﺓ .. ﻭﻣﺎﻛﺎﻥ ﻣﺼﺒﺮﻫﺎ ﺣﺪ ﻉ ﻣﺮﺍﺭ ﺍﻟﺤﻴﺎﺓ ﻏﻴﺮ ﺍﻷﺻﻔﺮ 💕
🍁 ﺭﺑﺎﺏ ﻛﺎﻧﺖ ﺷﺎﺩﻩ ﺣﻴﻠﻬﺎ ﻓﺪﻭﺭﺓ ﺍﻟﺤﺎﺳﻮﺏ .. ﻭﻧﺎﻭﻳﻪ ﺗﺘﺨﺮﺝ ﻣﻨﻬﺎ ﺑﺘﻘﺪﻳﺮ .. ﺍﻭﻝ ﻣﺮﺓ ﺗﺴﻌﻰ ﻓﺤﻴﺎﺗﻬﺎ ﻟﺸﻲ ﺑﺎﻟﺸﻜﻞ ﻫﺪﺍ ..
ﻭﻛﻠﻪ ﻉ ﺧﺎﻃﺮ ﻣﺼﺎﺭﻳﻒ ﻋﺮﺳﻬﺎ ﻭﻃﺒﻌﺎ ﻫﻲ ﻣﻔﻬﻤﻪ ﻃﺎﺭﻕ ﺍﻧﻬﺎ ﺧﺎﺷﺘﻬﺎ ﺗﺴﻠﻴﻪ ﻭﺧﻼﺹ ...
ﻛﺎﻧﺖ ﺗﻤﺸﻲ 4 ﺗﺮﻭﺡ ..7 ﻭﻛﺎﻥ ﺑﻮﻫﺎ ﻳﺮﻭﺡ ﺑﻴﻬﺎ ..
ﻓﻲ ﻳﻮﻡ ..
ﺍﻟﺴﺎﻋﻪ 6:30 ﻣﺴﺎﺀﺍ ..
ﺭﺑﺎﺏ : ﻗﺎﻟﻲ ﻣﺎﻧﻘﺪﺭﺵ ﻧﺠﻴﻚ ﺍﻻ 7
ﺯﻣﻴﻠﺘﻬﺎ : ﺧﻠﻴﻚ ﻓﻲ ﺍﻟﻤﺒﻨﻰ ﻣﺎﺗﻄﻠﻌﻴﺶ ..
ﺭﺑﺎﺏ : ﺍﻳﻪ ﻫﻮ ﻫﺪﺍ ..
ﺯﻣﻴﻠﺘﻬﺎ : ﺗﻤﺎﻡ .. ﻫﻲ ﺳﻼﻡ ﺗﻮﺍ .. ﺳﻠﻤﺖ ﻋﻠﻴﻬﺎ ﺑﺎﻟﺨﺪ ﻭﻃﻠﻌﺖ ﺍﻟﺒﻨﺖ .. ﻭﻫﻲ ﻣﺸﺖ ﻗﻌﻤﺰﺕ ﻉ ﻭﺣﺪﻩ ﻣﻦ ﺍﻟﻜﺮﺍﺳﻲ .. ﻭﺑﺪﺕ ﺗﻠﻌﺐ ﺑﺘﻠﻴﻔﻮﻧﻬﺎ ...
ﻛﺎﻧﺖ ﺍﻟﺪﻧﻴﺎ ﻫﺎﺩﻳﻪ ﻭﻫﻲ ﻣﻨﺴﺠﻤﻪ ﻣﻊ ﺍﻟﻠﻌﺒﻪ ..
ﻟﻌﻨﺪ ﻣﺎ ...
" ﺭﺑﺎﺏ .."
ﻗﺎﻣﺖ ﻋﻴﻮﻧﻬﺎ ﻟﻤﺎ ﺳﻤﻌﺖ ﺍﺳﻤﻬﺎ ﺍﺳﺘﻐﺮﺑﺖ ﻫﻠﺒﻪ ﻓﻲ ﺍﻟﻠﻲ ﺷﺎﻓﺘﻪ ..
ﺷﺎﺏ ﻭﺳﻴﻢ ﻭﺍﻧﻴﻖ ﻭﺍﻗﻒ ﺣﺎﻁ ﺍﻳﺪﻳﻪ ﻓﺠﻴﻮﺑﻪ ..
ﻫﻲ ﺭﺩﺕ ﻭﻗﺎﻟﺖ : ﻧﻌﻢ !
ﻫﻮ ﻭﺯﻉ ﻧﻈﺮﻩ ﻉ ﺍﻟﻤﻜﺎﻥ ﻭﻗﺎﻝ : ﻧﻘﻌﻤﺰ ﻋﺎﺩﻱ ...
ﺭﺑﺎﺏ : ﻗﻌﻤﺰ ﺍﻧﺖ ﺣﺮ ﺍﻟﻤﻜﺎﻥ ﻟﻠﺠﻤﻴﻊ ..
ﻫﻮ ﺍﺑﺘﺴﻢ ... ﻭﻣﺸﻲ ﻗﻌﻤﺰ ﻭﺧﻼ ﺑﻴﻨﻬﺎ ﻭﺑﻴﻨﻪ ﻛﺮﺳﻲ ﻓﺎﺿﻲ ..
ﻫﻲ ﺭﺟﻌﺖ ﻟﻬﺖ ﺑﺘﻠﻴﻔﻮﻧﻬﺎ ﻭﻣﺎﺍﻫﺘﻤﺘﺶ ﻷﻣﺮﻩ ﺗﺤﺴﺎﺑﻪ ﻭﺍﺣﺪ ﻣﻦ ﺍﻟﻠﻲ ﻳﻘﺮﻭﺍ ﻣﻌﺎﻫﺎ ..
ﻫﻮ ﺷﺒﺤﻠﻬﺎ ﺷﻮﻳﻪ ﻭﺍﺑﺘﺴﻢ ﻭﻫﻮ ﻳﻘﻮﻝ : ﺍﺣﻤﻢ .. ﺍﻟﻌﻔﻮ ..
ﺷﺒﺤﺘﻠﻪ ﻟﻘﺎﺗﻪ ﺣﺎﻁ ﺭﺟﻞ ﻉ ﺭﺟﻞ ﻭﻳﺸﻮﻓﻠﻬﺎ ﻭﻫﻮ ﻣﺒﺘﺴﻢ ﺑﻜﺒﺮ ﻗﺎﻟﺖ : ﻧﻌﻢ ..
ﻫﻮ ﻗﺎﻝ : ﻣﺎﻋﺮﻓﺮﺗﻴﻨﻲ ﺷﻜﻠﻚ ..
ﺿﻴﻘﺖ ﻋﻴﻮﻧﻬﺎ ﺑﺈﺳﺘﻐﺮﺍﺏ ..
ﻫﻮ ﺍﺑﺘﺴﻢ ﻭﻗﺎﻝ : ﻣﻌﺎﻙ ﻣﺆﻧﺲ .. ﻭﻟﺪ ﺍﺧﺖ ﻋﻤﺎﺭ ﻣﺨﺘﺎﺭ .. ﻭﻟﺪ ﺧﺎﻝ ﺍﻣﻚ ..
ﻫﻲ ﺍﻧﺼﺪﻣﺖ ... ﻃﻮﻝ ﺍﺫﻛﺮﺕ ﻣﻮﻗﻒ ﺍﻟﺠﺮﺩﻳﻨﻪ ..
ﻛﺎﻥ ﻻﺑﺲ ﻭﻗﺘﻬﺎ ﻋﺮﺑﻲ ﻭﺯﻣﺎﻟﻪ ﻉ ﺭﺍﺳﻪ ﻭﻧﻈﺎﺭﺍﺕ ﺳﻮﺩ .. ﻣﺎﻛﺎﻧﺶ ﺷﻜﻠﻪ ﻭﺍﺿﺢ ﻫﻠﺒﻪ ..
ﻏﻴﺮﺕ ﻋﻴﻮﻧﻬﺎ ﻭﻫﻲ ﻣﺤﺮﺟﻪ ﻭﻗﺎﻟﺖ : ﺍﻫﻼ ..
ﻫﻮ ﺍﺑﺘﺴﻢ ﻭﻗﺎﻝ : ﺩﺍﻡ ﻋﺮﻓﺖ ﺑﻨﻔﺴﻲ ﻧﺒﻲ ﻧﺤﻜﻲ ﻃﻮﻝ ﺑﺪﻭﻥ ﻣﻘﺪﻣﺎﺕ ﻣﺎﻟﻴﻬﺎﺵ ﺩﺍﻋﻲ ... ﺑﺼﺮﺍﺣﻪ ﺍﻟﻮﺍﻟﺪﺓ ﻭﻳﻦ ﻓﺘﺤﺖ ﻣﻌﺎﻱ ﻣﻮﺿﻮﻉ ﺍﻟﺨﻄﺒﻪ ﺍﻧﻲ ﻣﺎﻛﻨﺘﺶ ﻣﺘﺤﻤﺲ ﻭﺍﺟﺪ ﻟﻌﻨﺪ ﻣﺎﻋﺪﻳﺖ ﻣﻌﺎﻫﺎ ﻓﻲ ﺍﻟﻌﻴﺪ ﻭﺗﻌﺮﻓﺖ ﻉ ﺍﻟﻌﻴﻠﻪ ﻣﻦ ﻗﺮﻳﺐ ﻋﺠﺒﻮﻧﻲ ﻭﺍﺟﺪ ﻭﺍﺭﺗﺤﺘﻠﻬﻢ .. ﻭﺳﺒﺤﺎﻧﻪ ﺻﺎﻧﻊ ﺍﻟﺼﺪﻑ .. ﺧﻼﻧﻲ ﻳﻮﻣﻬﺎ ﻧﺸﻮﻓﻚ ..
ﻏﻴﺮ ﻋﻴﻮﻧﻪ ﺍﻟﻘﺪﺍﻡ ﻭﻗﺎﻝ .. ﺯﺩﺕ ﺗﺤﻤﺴﺖ ﻟﻠﻤﻮﺿﻮﻉ ﻭﻗﺒﻠﺖ ﺑﻴﻪ ﻭﺍﺻﺒﺤﺖ ﺭﺍﻏﺒﻪ ﺑﺸﺪﻩ .. ﺑﺲ ﺻﺪﻣﺘﻨﻲ ﺣﻜﺎﻳﺔ ﺍﻧﻚ ﺭﻓﻀﺘﻲ ﺑﺴﺒﺐ ﺍﻟﻘﺮﺍﻳﻪ .. ﻭﺍﻟﻠﻲ ﺻﺪﻣﻨﻲ ﺍﻛﺜﺮ ﺍﻧﻲ ﺍﻛﺘﺸﻔﺖ ﺍﻥ ﻫﺎﻟﻘﺮﺍﻳﻪ ﺩﻭﺭﺓ ﻣﺪﺗﻬﺎ ﺗﻼﺗﻪ ﺷﻬﻮﺭ ﻻﺍﻛﺜﺮ .. ﻳﻌﻨﻲ ﺍﻧﺘﻲ ... ﺭﺍﻓﻀﺘﻴﻨﻲ ﻷﺳﺒﺎﺏ ﺗﺎﻧﻴﻪ .. ﺷﺒﺤﻠﻬﺎ .. ﺣﺎﺑﺐ ﺑﺸﺪﻩ ﺍﻧﻲ ﻧﻌﺮﻓﻬﺎ ..
ﻫﻲ ﺍﺑﺘﺴﻤﺖ ﺑﺘﻬﻜﻢ ﻭﻗﺎﻟﺖ : ﻛﻤﻠﺖ؟ !
ﻫﻮ ﺍﺑﺘﺴﻢ ﺑﺈﺳﺘﻐﺮﺍﺏ ﻭﻗﺎﻝ : ﺍﻳﻪ ..
ﺭﺑﺎﺏ : ﻫﻮ ﻭﺍﺿﺢ ﺍﻧﻚ ﻣﺘﻌﺐ ﺭﻭﺣﻚ ﻫﻠﺒﻪ ﻭﻣﺪﻭﺭ ﻭﺭﺍﻱ ﻭﻭﺭﺍ ﻋﻴﻠﺘﻲ .. ﺑﺲ ﺍﻟﻈﺎﻫﺮ ﻛﻨﺖ ﺍﺩﻭﺭ ﻣﻦ ﻏﻴﺮ ﺗﺮﻛﻴﺰ
ﻭﻣﻤﻜﻦ ﺧﺎﻟﺘﻲ ﺍﻣﻴﻨﻪ ﻣﺎﻋﻄﺎﺗﻜﺶ ﺍﻹﺳﻢ ﺻﺢ .. ﺍﻟﻠﻲ ﻛﺎﻧﺖ ﺗﺒﻲ ﺗﺨﻄﺒﻬﺎﻟﻚ ﺍﻣﻚ ﺍﺧﺘﻲ ﺭﺍﻧﻴﺎ ﻃﺎﻟﺒﻪ ﻓﻲ ﺍﻟﻬﻨﺪﺳﻪ ﻭﺭﻓﻀﺖ ﺑﺴﺒﺐ ﻗﺮﺍﻳﺘﻬﺎ .. ﻣﺶ ﺍﻧﻲ .. ﺍﻧﻲ ﺍﺳﻤﻲ ﺭﺑﺎﺏ .. ﻣﺨﻄﻮﺑﻪ ﻭﻋﺮﺳﻲ ﺍﻟﺼﻴﻒ ﺍﻟﺠﺎﻱ ..
ﻫﻮ ﻭﺟﻬﻪ ﺗﻐﻴﺮ ﻗﻌﺪ ﻳﺸﺒﺤﻠﻬﺎ ﻭﻫﻮ ﺷﺒﻪ ﻣﺼﺪﻭﻡ ..
ﺭﻥ ﺗﻠﻴﻔﻮﻧﻬﺎ ﺷﺎﻓﺖ ﺍﻟﺸﺎﺷﻪ ﻟﻘﺎﺗﻪ ﺑﻮﻫﺎ ..
ﻧﺎﺿﺖ ﻃﻮﻝ ﻭﻃﻠﻌﺘﻠﻪ ﺑﺪﻭﻥ ﻣﺎﺗﺴﻠﻢ ﺣﺘﻰ ...
ﻫﻮ ﻗﻌﺪ ﻳﻮﺯﻉ ﻓﻨﻈﺮﻩ ﻉ ﺍﻟﻤﻜﺎﻥ ﻭﻳﺤﺎﻭﻝ ﻳﺴﺘﻮﻋﺐ ﺍﻟﻤﻮﻗﻒ ﺍﻟﻤﺤﺮﺝ ﺍﻟﻠﻲ ﺍﻧﺤﻂ ﻓﻴﻪ ..
ﺯﻓﺮ ﺑﻘﻮﺓ .. ﺑﻌﺪﻳﻦ ﻧﺎﺽ ... ﻭﻃﻮﻝ ﻣﺸﻲ ﻭﻃﻠﻊ ﻣﻦ ﺍﻟﻤﺒﻨﻰ ﻭﻫﻮ ﻣﻀﺎﻳﻖ ﻫﻠﺒﻪ ..
ﺍﻛﺜﺮ ﺷﻲ ﺿﺎﻳﻘﻪ ﺍﻥ ﺭﺑﺎﺏ ﺯﺍﺩﺕ ﺧﺸﺖ ﺭﺍﺳﻪ ﺍﻛﺜﺮ ﺑﻌﺪ ﺍﻟﻠﻲ ﺻﺎﺭ .. ﻭﻷﻭ