#رمضان_احلا_مع_جمان_فريد
#العشق_المتمرد
الجزء24
GomanFared
ﺍﻟﻴﻮﻡ ﺍﻟﺘﺎﻧﻲ ...
ﺟﻮ ﺍﻟﺒﻨﺎﺕ ﻛﻠﻬﻢ ﻷﺧﺘﻬﻢ ﻣﻊ ﺃﻣﻬﻢ ﻣﻦ ﺍﻟﺼﺒﺢ ..
ﻓﻲ ﻏﺮﻓﻪ ﻣﻮﺟﻮﺩ ﻓﻴﻬﺎ ﻫﻠﺒﻪ ﺣﺎﻻﺕ ... ﺍﻟﻔﺎﺻﻞ ﺑﻴﻨﺎﺗﻬﻢ ﺳﺘﺎﺋﺮ ..
ﺯﻳﻨﺐ : ﻋﻮﻳﻨﻪ ..
ﺣﻤﻴﺪﻩ ﺗﻨﻬﺪﺕ ﺑﺄﻟﻢ : ﺍﻟﺤﻤﺪ ﻟﻠﻪ ...
ﻓﺎﻃﻤﻪ : ﻛﻠﻴﺘﻲ ..
ﺣﻤﻴﺪﻩ : ﺍﻳﻪ ﻳﻤﻲ ﺟﺎﺑﻮﻟﻲ ﻣﺎﻧﺎﻛﻞ ..
ﻛﻔﺎﻳﻪ : ﻭﻛﻴﻒ ﻛﻠﻴﺘﻲ ..
ﺣﻤﻴﺪﻩ ﺍﺑﺘﺴﻤﺖ : ﻫﺎﻧﻴﺒﺎﻝ ﻃﻌﻤﻨﻲ ..
ﺍﺑﺘﺴﻤﻮﺍ ﺍﻟﺒﻨﺎﺕ ﻭﺍﻣﻬﻢ ..
ﻉ ﺧﺸﺘﻪ : ﺍﺭﺣﻢ ﻣﻦ ﺯﺍﺭ ﻭﺧﻔﻒ ..
ﻛﻔﺎﻳﻪ : ﻭﺍﺍﻙ ﻳﺎﺭﺑﻲ ﺣﺘﻰ ﻫﻨﻲ ﺑﺘﺨﻨﻘﻨﺎ ..
ﻫﺎﻧﻴﺒﺎﻝ 😒:
ﻧﻌﻴﻤﻪ ﺑﻀﺤﻜﻪ : ﺗﻄﻠﻊ ﻏﺪﻭﺓ ﻭﻻ .
ﻫﺎﻧﻴﺒﺎﻝ : ﺍﻳﻪ ﺇﻥ ﺷﺎﺀﺍﻟﻠﻪ ..
ﻓﺎﻃﻤﻪ : ﻣﻔﺮﻭﺽ ﺗﻘﻌﺪ ﻣﻌﺎﻫﺎ ﻭﺣﺪﻩ ﻣﻦ ﺧﻮﺍﺗﻬﺎ ..
ﻫﺎﻧﻴﺒﺎﻝ : ﻭﺍﻟﻠﻪ ﻣﺎﻟﻴﻪ ﺩﺍﻋﻲ ﻳﻤﻲ ﻫﻲ ﻟﻴﻠﻪ ﻭﻓﺮﺍﻗﻬﺎ ﺻﺒﺢ ..
" ﺍﻟﺴﻼﻡ ﻋﻠﻴﻜﻢ "
ﻫﺎﻧﻴﺒﺎﻝ ﻓﻨﺺ ...
ﺍﻟﺒﻨﺎﺕ ﻳﺸﺒﺤﻮﻟﻬﺎ ﻭﻫﻤﺎ ﻣﺴﺘﻐﺮﺑﺎﺕ ..
ﻋﺮﻭﺑﻪ : ﺍﺣﻤﻢ .. ﻻﺑﺎﺱ ﻋﻠﻴﻚ ﺣﻤﻴﺪﻩ ..
ﻫﺎﻧﻴﺒﺎﻝ ﻣﺼﺪﻭﻡ ﻓﺠﺮﺃﺗﻬﺎ ..
ﻛﻔﺎﻳﻪ ﺍﺑﺘﺴﻤﺖ ﺑﺈﺳﺘﻐﺮﺍﺏ؛ﺗﻌﺮﻓﻴﻨﺎ ..
ﻋﺮﻭﺑﻪ ﻭﺟﻬﻬﺎ ﺍﺣﻤﺮ : ﻧﻘﺮﺍ ﻣﻊ ﻫﺎﻧﻴﺒﺎﻝ ..
ﻫﻮ ﻗﺮﻳﺐ ﺗﺒﺨﺮ ﻣﻦ ﺍﻟﺤﺸﻢ .. ﻃﻮﻝ ﺍﻧﺴﺤﺐ ... ﻭﻫﻲ ﻣﻌﺎﻩ ﺑﻌﻴﻮﻧﻬﺎ ..
ﺍﻟﺘﻔﺘﺖ ﻟﺨﻮﺍﺗﻪ ﻟﻘﺘﻬﻢ ﻳﺸﺒﺤﻮﻟﻬﺎ ﺑﻨﻈﺮﺍﺕ ﻣﺘﻔﺤﺼﻪ ﻭﻫﻤﺎ ﻣﺒﺘﺴﻤﺎﺕ ﻭﻫﻲ ﺭﺩﺕ ﺍﻹﺑﺘﺴﺎﻣﻪ ﺑﺨﺠﻞ .
ﻭﻓﺎﻃﻤﻪ ﺗﺸﺒﺤﻠﻬﺎ ﺑﺮﺑﻊ ﻋﻴﻦ ..
ﺑﺮﺍ ..
ﻭﻳﻦ ﺗﺤﺴﺎﺏ ﺭﻭﺣﻬﺎ ﻫﺪﻱ !!
ﺍﻟﻬﺎﺩﻱ : ﻣﺎﻗﺪﺭﻧﺎ ﻧﻜﻠﻤﻮﻫﺎ ..
ﻋﻤﺎﺭ : ﺟﺮﻳﺌﻪ ﻳﺎﻫﺎﻧﻴﺒﺎﻝ ..
ﺍﻟﻬﺎﺩﻱ : ﻋﻦ ﺣﺴﻦ ﺍﻟﻨﻴﻪ ..
ﻋﻤﺎﺭ : ﻣﻌﺎﻙ .. ﻟﻜﻦ ﻣﻬﻤﺎ ﻛﺎﻥ ﺣﺮﻛﺘﻬﺎﺧﻄﺎ ﻭﻳﻦ ﻋﺎﻳﺸﻴﻦ ﻧﺤﻨﻰ ...
ﻫﺎﻧﻴﺒﺎﻝ ﺯﺍﺩ ﺍﺿﺎﻳﻖ ﻟﻤﺎ ﺳﻤﻊ ﻛﻼﻡ ﻋﻤﺎﺭ .. ﻣﺸﻲ ﻭﺧﻼﻫﻢ ..
ﺍﻟﻬﺎﺩﻱ : ﻛﺎﻥ ﻫﺪﻳﺘﻪ ﻣﺶ ﺧﻴﺮ؟ !
ﻋﻤﺎﺭ ﺑﻘﺮﻧﺔ ﺣﻮﺍﺟﺐ : ﺣﻨﻲ ﺑﺪﻭ ﻳﺎﻟﻬﺎﺩﻱ ﻭﻛﻞ ﺷﻲ ﻋﻨﺪﻧﺎ ﺑﺄﺻﻮﻟﻪ .. ﺣﺮﻛﺎﺕ ﻛﻴﻒ ﻫﺎﺩﻳﻦ ﻣﺎﻳﻤﺸﻨﺶ ﻣﻌﺎﻧﺎ ..
ﺍﻟﻬﺎﺩﻱ ﺗﻨﻬﺪ ﻭﺳﻜﺖ ﻭﻏﻴﺮ ﻋﻴﻮﻧﻪ ﻋﻦ ﻋﻤﺎﺭ ﻭﺍﻟﻜﻼﻡ ﻣﺶ ﻋﺎﺟﺒﻪ ...
🍁🍁🍁🍁
ﺣﺒﻴﺒﻲ ﺍﻧﺖ ﻣﺶ ﺑﻘﺼﺪﻙ ..
ﺭﻣﺰﻱ : ﻭﺣﻖ ﺍﻟﻠﻪ ﻳﺎﻋﻤﺘﻲ ﻧﺸﺘﻬﺎ ..
ﺭﺑﺎﺏ : ﺍﻋﻤﻰ ..
ﺣﻤﺰﺓ : ﺭﺑﺎﺍﺍﺏ ..
ﺳﻜﺘﺖ ﻭﻃﻠﻌﺖ ﻣﻦ ﺣﺪﺍﻫﻢ ..
ﻋﻤﺎﺩ : ﺭﺑﺎﺏ ﺑﻜﻞ ﺭﺍﻫﻮ ..
ﻏﺎﻟﻴﻪ ﺗﻨﻬﺪﺕ : ﺍﻟﻤﻬﻢ ﺭﻣﺰﻱ ﺣﺒﻴﺒﻲ ﺍﻧﺖ ﻣﺎﺩﺧﻠﻜﺶ ﺑﺸﻲ ﻭﻛﺎﻥ ﻫﻨﺎﻙ ﻣﻦ ﺩﺍﺭ ﻓﻴﻬﺎ ﻫﻜﻲ ﺣﻖ ﻫﻮ ﺍﻟﻤﻀﻠﻮﻝ ﻋﻤﺮ ..
ﻃﻠﻌﻠﻬﺎ ﻣﻦ ﺍﻟﺮﻭﺷﻦ : ﺷﻦ ﺗﻘﻄﻔﻲ ﻳﺎﺻﺒﺎﺡ .
ﻏﺎﻟﻴﻪ : ﻋﺪﻱ ﺍﻗﻠﺐ ﺯﻭﻣﺘﻚ ..
ﻋﻤﺮ : ﺧﺰﺯﺯﻳﻴﻴﻲ ﺻﺒﺎﺡ .
ﻏﺎﻟﻴﻪ ﺳﻜﺮﺕ ﻓﻮﺟﻬﻪ ﺍﻟﺮﻭﺷﻦ ..
ﻭﺍﻟﺼﻐﺎﺭ ﻗﻌﺪﻭﺍ ﻳﻀﺤﻜﻮﺍ ﻭﻫﻲ ﺿﺤﻜﺖ ﻟﻀﺤﻜﺔ ﺭﻣﺰﻱ ..
ﻉ ﺧﺸﺖ ﺭﺍﻧﻴﺎ ﻭﺩﻻﻝ ..
ﺩﻻﻝ : ﻧﺒﻲ ﻣﺤﻠﺒﻴﻪ ..
ﺭﺍﻧﻴﺎ : ﻣﺤﻠﺒﻴﻪ ﻭﻟﻮﺯ ..
ﺿﺤﻜﺖ ﻏﺎﻟﻴﻪ : ﺑﺎﻫﻲ ﻳﺎﻣﺤﻠﺒﻴﺎﺕ ﺍﻧﺘﻦ ..
ﺿﺤﻜﻮﺍ ...
ﺭﻣﺰﻱ ﻳﺸﻮﻑ ﻟﺮﺍﻧﻴﺎ ﻭﻫﻲ ﺗﺘﻜﻠﻢ ﻣﻊ ﺩﻻﻝ ..
ﺭﺍﻧﻴﺎ : ﻋﻄﻴﻨﻲ ﻗﻔﻄﺎﻥ ﻟﻌﺒﺘﻚ ﻧﻌﻄﻴﻚ ﻗﻔﻄﺎﻥ ﻟﻌﺒﺘﻲ ..
ﺩﻻﻝ : ﺑﺎﻫﻲ ...
ﻭﻃﻠﻌﻮﺍ ﺍﻟﺰﻭﺯ ﻣﻊ ﺑﻌﺾ ..
💕💕💕💕💕💕💕
ﻫﺎﻧﻴﺒﺎﻝ ﻣﻦ ﻛﺜﺮ ﻣﺎ ﻃﺎﺭﺗﻠﻪ ﻣﻦ ﺣﺮﻛﺔ ﻋﺮﻭﺑﻪ ﺭﻭﺡ ﻫﻮ ﻭﻋﻤﺎﺭ ﻭﻗﻌﺪﻭﺍ ﺍﻟﻬﺎﺩﻱ ﻭﻛﻔﺎﻳﻪ ﻣﻊ ﺣﻤﻴﺪﻩ ﻓﻲ ﺍﻟﻤﺴﺘﺸﻔﻰ .
🍁 ﻋﺮﻭﺑﻪ ﺑﻨﺖ ﻣﻨﻔﺘﺤﻪ ﺑﺤﺪﻭﺩ .. ﺍﻧﻔﺘﺎﺣﻬﺎ ﻫﺪﺍ ﻣﺎﻳﻤﺸﻴﺶ ﻣﻊ ﻧﺎﺱ ﻋﻨﺪﻫﺎ ﻋﻘﻠﻴﺔ ﺯﻱ ﻋﻘﻠﻴﻪ ﻫﺎﻧﻴﺒﺎﻝ ..
ﺍﻧﻲ ﻣﺎﻧﺴﻤﻴﺶ ﺍﻟﺮﺟﺎﻟﻪ ﺍﻟﻠﻲ ﺯﻱ ﻫﺎﻧﻴﺒﺎﻝ ﻣﺘﺨﻠﻔﻴﻦ ..
ﻻ ﻧﻘﻮﻝ ﻋﻠﻴﻪ ﺭﺍﺟﻞ ﺣﺰﺍﺭ ﻣﻐﻴﺎﺭ ﺭﺍﺟﻞ ﻋﻨﺪﻩ ﻫﻮﻳﻪ ﻭﻣﺤﺎﻓﻆ ﻋﻠﻴﻬﺎ ﻭﺍﺻﻮﻝ ﻭﻣﺘﺮﺑﻲ ﻋﻠﻴﻬﺎ ...
ﺍﻟﻠﻲ ﺯﻱ ﻫﺎﻧﻴﺒﺎﻝ ﻳﻘﻮﻟﻮﺍ ﻋﻠﻴﻪ ﺭﺟﻞ ﺷﺮﻗﻲ .. ﻉ ﺍﺳﺎﺱ ﻣﺴﺒﻪ .. ﻟﻜﻦ ﻫﻲ ﻫﻮﻳﻪ ﻭﺍﻟﻤﻔﺮﻭﺽ ﻧﻌﺘﺰﻭﺍ ﺑﻴﻪ ﺍﻟﺮﺍﺟﻞ ﺍﻟﺸﺮﻗﻲ ..
ﻭﺑﺎﻟﺬﺍﺕ ﺍﻟﺒﺪﻭﻱ ...💖
🍁🍁🍁🍁
ﺍﻟﺴﺎﻋﻪ 6:00 ﻣﺴﺎﺀﺍ ..
ﻓﻲ ﺩﺍﺭﻫﻢ ..
ﻋﻮﺩﺓ : ﺍﻧﺘﻲ ﺗﺘﺼﺮﻓﻲ ﺑﻄﺮﻳﻘﻪ ﻏﺒﻴﻪ ..
ﻋﺮﻭﺑﻪ : ﻭﻟﻴﺶ ﻳﻌﻨﻲ ! ؟
ﻋﻮﺩﺓ : ﻳﺎﺑﻨﺘﻲ ﺍﻧﻲ ﺍﻟﻠﻲ ﻋﻤﺮﻱ ﻣﺎﺣﻜﻴﺖ ﻣﻌﺎﻩ ﻛﺎﻥ ﻛﻠﻤﻪ ﻭﺣﺪﻩ ﻓﺎﻫﻤﺎﺗﻪ ﺍﻛﺜﺮ ﻣﻨﻚ ... ﻫﺎﻧﻴﺒﺎﻝ ﻣﺘﻌﺼﺐ ﻭﻣﺘﺰﻣﺖ ﻭﺣﺮﻛﻪ ﻛﻴﻒ ﺍﻟﻠﻲ ﺩﺭﺗﻴﻬﺎ ﺑﺎﻟﻨﺴﺒﻪ ﻟﻴﻪ ﻏﻠﻄﻪ ﻛﺒﻴﺮﺓ ﻓﺤﻘﻪ .
ﻋﺮﻭﺑﻪ ﻣﻦ ﺩﺍﺧﻞ ﺧﺎﻳﻔﻪ ﺑﺲ ﺗﺤﺎﻭﻝ ﺗﻈﺎﻫﺮ ﺑﺎﻟﻌﻜﺲ : ﻻﻏﻠﻄﺔ ﻭﻻﺷﻲ ﻣﺎﺗﻜﺒﺮﻳﻬﺎﺵ ..
ﻋﻮﺩﺓ : ﺑﺎﻫﻲ ﻉ ﻛﻴﻔﻚ ... ﺑﻨﻌﺪﻱ ﻧﺸﻮﻑ ﺍﻣﻲ ..
ﻭﻣﺸﺖ ﻃﻠﻌﺖ ﻣﻦ ﺣﺪﺍﻫﺎ ..
ﻭﺧﻠﺖ ﻋﺮﻭﺑﻪ ﺗﻔﻜﺮ ﻓﻜﻼﻣﻬﺎ ﻭﻣﻨﺘﺎﺑﻬﺎ ﺧﻮﻑ ﻛﺒﻴﺮ ..
🍃 ﻓﺎﺕ ﺑﺎﻗﻲ ﺍﻟﻴﻮﻡ ..
ﺣﺮﻕ ﺩﻡ ﻓﺤﺮﻕ ﺩﻡ ﻉ ﻫﺎﻧﻴﺒﺎﻝ ﺑﺮﻏﻢ ﻣﺤﺎﻭﻻﺕ ﻋﻤﺎﺭ ﺍﻧﻪ ﻳﻐﻴﺮﻟﻪ ﺟﻮﻩ ﺑﺲ ﺑﻼ ﻓﺎﻳﺪﻩ ..
🍁🍁🍁
ﺳﻤﺤﺔ !!
ﺯﻳﻨﺐ : ﻫﺎﻧﻴﺒﺎﻝ ﻭﻣﺎﻳﻄﻠﻊ ﻣﻨﻪ ﻏﺰﺍﻟﻪ ﺍﻟﺒﻨﻴﻪ .
ﻧﻌﻴﻤﻪ : ﻟﻜﻦ ﺭﻩ ﻃﺎﺭﺗﻠﻪ ﻫﻠﺒﻪ ﻣﻦ ﺣﺮﻛﺘﻬﺎ .
ﻏﺎﻟﻴﻪ : ﺻﺢ ﺣﺮﻛﻪ ﺟﺮﻳﺌﺔ ﻭﻗﺪﺍﻡ ﺍﻣﻲ !!
ﺯﻳﻨﺐ ﺑﻀﺤﻜﻪ : ﺍﻣﻲ ﻭﺟﻬﻬﺎ ﻗﻌﺪ ﻣﻘﻠﻮﺏ ﻟﻴﻦ ﻣﺸﺖ ..
ﻏﺎﻟﻴﻪ : ﻣﺎﻗﺎﻟﺖ ﺷﻲ؟ !
ﻧﻌﻴﻤﻪ : ﻻﻻ ﻗﻌﺪﺕ ﺳﺎﻛﺘﻪ ﻟﻜﻦ ﻳﺒﺎﻥ ﻋﻠﻴﻬﺎ ﻣﺶ ﻋﺎﺟﺒﻬﺎ ..
🍁🍁🍁🍁🍁
ﺭﺍﻧﻴﺎ ..
ﺳﻴﺒﺖ ﻟﻌﺒﺘﻬﺎ ﻭﺷﺒﺤﺘﻠﻪ ﻓﺮﺣﺖ ﻟﻤﺎ ﺷﺎﻓﺖ ﺷﻦ ﻓﻲ ﻓﻴﺪﻩ ﻭﻗﻔﺖ ﻭﺧﺪﺗﻬﺎ ..
ﻃﺮﻑ ﺷﻜﻼﻃﻪ ﻓﺘﺤﻪ ﻗﺒﻞ ﻳﻌﻄﻴﻬﻮﻟﻬﺎ ..
ﺩﻻﻝ : ﻭﺍﻧﻲ ..
ﻣﺪﺕ ﺭﺍﻧﻴﺎ ﺍﻟﺸﻜﻼﻃﻪ ﻟﺪﻻﻝ : ﺍﻗﺴﻤﻲ ..
ﺩﻻﻝ ﻭﻗﻔﺖ ﻭﻗﺴﻤﺖ ﻣﻦ ﺍﻟﺸﻜﻼﻃﻪ ..
ﻭﺭﻣﺰﻱ ﻳﺸﺒﺢ ﻟﺮﺍﻧﻴﺎ : ﺣﻠﻮﺓ ..
ﺭﺍﻧﻴﺎ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻫﻲ ﺗﺎﻛﻞ ..
ﻉ ﺟﻴﺔ ﻋﻤﺮ : ﺷﻦ ﻗﺼﺔ ﺍﻟﺸﻜﺎﻟﻴﻂ ﻳﺎﺭﻣﺰﻱ ..
ﺭﻣﺰﻱ ﺍﻧﺤﺮﺝ : ﺷﻲ .. ﻭﺍﻧﺴﺤﺐ ﻭﻣﺸﻲ ...
ﻋﻤﺮ ﺑﻀﺤﻜﻪ ﻣﺘﻬﻜﻤﻪ : ﻳﺎﻭﺍﻟﻠﻪ ﺣﺎﻟﻪ ﻭﺧﻼﺹ .. ﺷﺒﺤﻠﻬﻢ .. ﻋﻄﻴﻨﻲ ﻳﺎﻓﺮﺧﻪ ..
ﺭﺍﻧﻴﺎ ﻣﺪﺗﻠﻪ ﺍﻟﺸﻜﻼﻃﻪ .. ﻛﻼﻫﺎ ﻛﻠﻬﺎ ﻭﻣﺸﻲ ..
ﻭﺑﺪﺕ ﻋﻤﺘﻚ ﺭﺍﻧﻴﺎ ﺗﻌﻴﻂ ﻭﺗﺒﻜﻲ ﻉ ﻃﻮﻝ ﺭﻗﺒﺘﻬﺎ ...
ﻟﻴﻦ ﺑﻌﺘﻮﺍ ﺧﻮﻫﺎ ﺟﺎﺑﻠﻬﺎ ﻃﺮﻑ ﺷﻜﻼﻃﻪ 🍫..
🍀🍀🍀🍀🍀🍀
ﺗﺎﻧﻲ ﻳﻮﻡ ﺭﻭﺣﻮﺍ ﺑﺤﻤﻴﺪﻩ ..
ﺍﻟﻠﻲ ﺧﻠﻮﻫﺎ ﺭﺍﻗﺪﺓ ﻓﻲ ﺍﻟﺪﺍﺭ ﻭﺍﻟﺤﺮﻕ ﻛﺎﻥ ﻣﺪﺍﻳﺮ ﺯﻱ ﻛﻴﺎﺱ ﺍﻟﻤﻴﻪ ..
ﻣﻊ ﺍﻟﻌﺸﻴﻪ ..
ﺗﺴﻘﺪﻭﺍ ﺍﻟﻜﻞ ..
ﻣﺨﺘﺎﺭ .. ﻭﺍﻟﺒﻨﺎﺕ .. ﺍﻟﻠﻲ ﻟﺴﺮﺕ .. ﻭﺍﻟﻠﻲ ﻟﻄﺮﺍﺑﻠﺲ ﻭﺭﺟﻌﺖ ﻓﻀﺖ ﻣﺮﺓ ﺗﺎﻧﻴﻪ ..
ﺑﻌﺪ ﻫﺎﻟﻴﻮﻡ ... ﺗﻤﺮ ﺍﻷﻳﺎﻡ ..
ﻭﻛﺎﻧﺖ ﺍﺟﺎﺯﺓ ﺍﻟﻌﻴﺪ ﺗﻤﺖ ﻭﻭﻟﻰ ﺍﻟﻬﺎﺩﻱ ﻟﻠﻌﻤﻞ ..
ﻭﻛﺎﻥ ﻣﺴﺘﺎﺣﺶ ﺳﻤﻴﻪ ﻟﻴﻦ ﺧﻼﺹ .. ﺍﻭﻝ ﻳﻮﻡ ﻣﺸﻲ ﺍﻏﻠﺒﻪ ﻫﺪﺭﺯﺓ ﻫﻮ ﻭﻳﺎﻫﺎ ﻭﻛﺎﻥ ﺑﺎﻟﻨﺴﺒﻪ ﻟﻴﻪ ﻭﻟﻴﻬﺎ ﺍﺣﻼ ﻳﻮﻡ 💖
💔🍁
ﻭﻓﻲ ﺍﻟﻠﻲ ﻫﻨﺎﻙ ﻣﺎﺯﺍﻝ ﻳﻔﻮﺭ ﻭﻳﻐﻠﻲ .. ﺑﺮﻏﻢ ﺍﻥ ﻣﺴﺘﺎﺣﺶ ﻟﻜﻦ ﻗﺎﻋﺪ ﻣﻌﺼﺐ ﻣﻦ ﺣﺒﻴﺒﺘﻪ ﻟﻴﻦ ﺧﻼﺹ ..
ﺍﻟﻤﻮﻗﻒ ﺍﻟﻠﻲ ﺻﺎﺭ ﺧﻼﻩ ﻣﻌﺎﺵ ﻳﺘﻘﺎﺑﻞ ﻫﻮ ﻭﺍﻣﻪ ﻣﻦ ﺍﻹﺣﺮﺍﺝ ﺍﻟﻠﻲ ﺗﺴﺒﺒﺘﻠﻪ ﻓﻴﻪ ﻋﺮﻭﺑﻪ ..
💕 ﻋﺮﻭﺑﻪ ﺍﻟﻠﻲ ﺑﺮﻏﻢ ﺷﻮﻗﻬﺎ ﺍﻟﺸﺪﻳﺪ ﻟﻬﺎﻧﻴﺒﺎﻝ ﺑﺲ ﻛﺎﻧﺖ ﺧﺎﻳﻔﻪ
ﻟﻮ ﻓﻌﻼ ﺣﺮﻛﺘﻬﺎ ﺯﻋﻼﺗﻪ ... ﻭﻫﻲ ﺗﻌﺮﻑ ﺍﻥ ﻫﺎﻧﻴﺒﺎﻝ ﻣﺎﻳﺮﺿﺎﺵ ﺑﺴﻬﻮﻟﻪ ..
ﻣﻦ ﺟﻬﺔ ﺗﺎﻧﻴﻪ ﻭﺿﻊ ﺍﻣﻬﺎ ﻣﺶ ﻋﺎﺟﺒﻬﺎ ﺩﻳﻤﺎ ﺗﺨﻤﻢ ﻭﺗﺴﺮﺡ ﻭﻣﻌﺎﺵ ﺯﻱ ﻗﺒﻞ ...
ﺑﺮﻏﻢ ﺍﻧﻬﻢ ﻫﻲ ﻭﺍﺧﺘﻬﺎ ﺣﺎﻭﻟﻮﺍ ﻳﻌﺮﻓﻮﺍ ﻣﻨﻬﺎ ﺷﻨﻮ ﺻﺎﻳﺮ ﺑﺲ ﻣﺎﻗﺎﻟﺖ ﻭﻻﻟﻤﺤﺖ ﺑﺄﻱ ﺷﻲ ..
🍃🍃🍃🍃
ﻭﻳﻤﺮﻭﺍ ﺍﻷﻳﺎﻡ ..
ﻭﺗﻜﻤﻞ ﻋﻄﻠﺔ ﻧﺺ ﺍﻟﺴﻨﻪ ... ﻭﺗﺒﺪﺍ ﺍﻟﻤﺪﺭﺳﻪ ...
ﺍﺳﺒﻮﻉ ﻳﻘﺮﻭﺍ ﻓﻴﻪ ﻋﺎﺩﻱ ﻭﺍﻟﻠﻲ ﺑﻌﺪﻩ ﺍﻣﺘﺤﺎﻥ ..
ﻓﻲ ﺃﻭﻝ ﻳﻮﻡ ..
ﻫﺎﻧﻴﺒﺎﻝ ﺍﻟﻠﻲ ﻣﺎﺯﺍﻝ ﻃﺎﻳﺮﺗﻠﻪ ﻣﻦ ﻋﺮﻭﺑﻪ ﻣﺎﺑﺎﺵ ﻳﺸﻮﻓﻬﺎ ﺟﻲ ﺑﻜﺮﻱ ﻭﺧﺶ ﻃﻮﻝ ...
ﻭﻫﻲ ﻓﻲ ﺍﻷﻭﻝ ﺗﺤﺴﺎﺑﻪ ﻏﺎﻳﺐ ﻟﻜﻦ ﺻﺎﺣﺒﺎﺗﻬﺎ ﻗﺎﻟﻮﻟﻬﺎ ﺍﻧﻪ ﺟﻲ ..
ﺳﺎﻟﻤﻪ :. ﻋﻠﻴﻚ ﺟﺮﺃﺓ ﻳﺎﺑﻨﺘﻲ ..
ﻏﺰﺍﻟﻪ : ﺗﻮ ﺍﻧﻲ ﻣﺎﻧﻲ ﻋﺎﺭﻓﻪ ﻛﻴﻒ ﺗﻔﻜﺮﻱ .. ﻫﺎﻧﻴﺒﺎﻝ ﻭﺍﻟﻤﻔﺮﻭﺽ ﺗﻌﺮﻓﻴﻪ ﺍﻛﺜﺮ ﻭﺣﺪﻩ ﺩﻳﺮﻟﻪ ﺣﺮﻛﻪ ﻛﻴﻒ ﻫﺪﻱ ﻗﺪﺍﻡ ﺍﻣﻪ ﻳﺎﺑﻨﺘﻲ !!
ﻋﺮﻭﺑﻪ ﺑﻀﻴﻖ : ﺍﻧﻲ ﺣﺒﻴﺖ ﻧﺘﻌﺮﻑ ﻉ ﻫﻠﻪ .. ﺣﻜﺎﻟﻲ ﻭﺍﺟﺪ ﻋﻦ ﺧﻮﺍﺗﻪ .. ﻭﺍﻧﻲ ﺗﺸﻮﻗﺖ ﻧﺸﻮﻓﻬﻦ .. ﻭﺍﻟﺤﻖ ﺣﺒﻴﺖ ﻫﻠﻪ ﻣﻦ ﺣﺒﻲ ﻟﻴﻪ ﻭﻧﺒﻲ ﻧﻌﺮﻓﻬﻢ ﻭﻧﻌﺮﻑ ﺍﻱ ﺣﺪ ﻳﻌﺮﻓﻪ 💔..
ﺳﺎﻟﻤﻪ : ﺑﺲ ﻛﻞ ﺷﻲ ﺑﺤﺪﻭﺩ ﻳﺎﻋﺮﻭﺑﻪ ..
ﻋﺮﻭﺑﻪ ﺑﻀﻴﻖ : ﺑﺎﻟﻠﻪ ﻏﻴﺮﻥ ﺍﻟﺴﻴﺮﺓ ..
ﻏﺰﺍﻟﺔ ﺑﻀﺤﻜﻪ : ﻧﻐﻴﺮﻭﻫﺎ ﺑﺲ ﻣﺶ ﻭﺍﺟﺪ ..
ﺳﺎﻟﻤﻪ : ﻛﻴﻒ ؟ !
ﻏﺰﺍﻟﺔ : ﻣﺶ ﻗﻠﺘﻠﻜﻢ ﻗﺒﻞ ﺍﻥ ﺳﺎﻟﻢ ﻣﺘﻐﻴﺮ ﻭﻣﻌﺎﺵ ﻋﺪﻝ ﻋﻠﻴﺎ ..
ﺳﺎﻟﻤﻪ : ﺍﻳﻪ ! ؟
ﻏﺰﺍﻟﺔ : ﻃﻠﻊ ﻣﺪﺍﻳﺮ ﻋﻼﻗﻪ ﻣﻊ ﺑﻨﺖ ﻋﻢ ﻫﺎﻧﻴﺒﺎﻝ .
ﻋﺮﻭﺑﻪ ﺭﻓﻌﺖ ﺣﻮﺍﺟﺒﻬﺎ : ﻭﺧﻮﻫﺎ ﻭﻭﻟﺪ ﻋﻤﻬﺎ ﻳﻘﺮﻭﺍ ﻣﻌﺎﻫﺎ ﻓﻨﻔﺲ ﺍﻟﻤﺪﺭﺳﻪ ..
ﺳﺎﻟﻤﻪ : ﻣﻨﻮ ﻗﺎﻟﻚ ..
ﻏﺰﺍﻟﻪ : ﻟﻴﻠﻰ ﺍﻟﻠﻲ ﺗﻘﺮﺍ ﻣﻌﺎﻫﺎ ..
......
ﻧﺎﺩﻣﻪ ﺑﻨﻤﻮﺕ ﻳﺎﺭﻳﺘﻨﻲ ﻣﺎﻛﻠﻤﺘﻪ ﻃﻮﻝ ﺍﻟﻌﻄﻠﻪ ﻭﻗﻠﺒﻲ ﻭﺍﺟﻌﻨﻲ ..
ﻟﻴﻠﻰ : ﻻﻳﻮﺟﻌﻚ ﻻﺳﻮ ﻫﻜﻲ ﺍﺣﺴﻦ ﻭﻧﻘﻮﻟﻬﺎﻟﻚ ﻣﺮﺓ ﺗﺎﻧﻴﻪ ﺍﻟﻠﻲ ﻳﺤﺒﻚ ﺧﻴﺮ ﻣﻦ ﺍﻟﻠﻲ ﺗﺤﺒﻴﻪ ..
ﺍﻣﺎﻝ ﺗﻤﺴﺢ ﻓﺪﻣﻮﻋﻬﺎ ﺍﻟﻠﻲ ﻧﺰﻟﻮﺍ ﻭﺗﺤﺎﻭﻝ ﺗﻘﺘﻨﻊ ﺑﻜﻼﻡ ﻟﻴﻠﻰ ..
💔🍁
ﻫﺎﻧﻴﺒﺎﻝ ﻳﻮﻣﻬﺎ ﻣﺎﻛﺎﻧﺶ ﻉ ﺑﻌﻀﻪ ﻧﻬﺎﺋﻲ ﻭﻃﻮﻝ ﺍﻟﻮﻗﺖ ﺳﺎﻛﺖ ﻭﻉ ﺍﻋﺼﺎﺑﻪ ﺗﺠﻨﺒﻮﺍ ﺳﻠﻴﻤﺎﻥ ﻭﺳﺎﻟﻢ ﻳﻜﻠﻤﻮﻩ ...
🍃🍃🍃🍃🍃
ﻭﻋﺪﺕ ﺍﻷﻳﺎﻡ ....
ﻭﺑﺪﺕ ﺍﻷﻣﺘﺤﺎﻧﺎﺕ ﻣﺘﺎﻉ ﺍﻟﻔﺘﺮﻩ ﺍﻷﻭﻟﻰ .. ﻫﺪﺍﻛﺎ ﺍﻟﻮﻗﺖ ﻣﺎﻛﺎﻧﺶ ﻓﻲ ﻧﻈﺎﻡ ﺍﻟﻔﺼﻞ " ﺍﻟﺴﻤﺴﺘﺮ " ﻛﻞ ﺍﻟﺴﻨﻮﺍﺕ ﻋﻨﺪﻫﻢ ﻓﺘﺮﺍﺕ ﺍﻷﻭﻟﻰ ﻭﺍﻟﺘﺎﻧﻴﻪ ﻭﺍﻟﺘﺎﻟﺘﻪ ...
ﻭﻫﺎﻧﻴﺒﺎﻝ ﻟﻬﻰ ﺭﻭﺣﻪ ﺑﺎﻟﻘﺮﺍﻳﻪ ﻭﻗﺎﻋﺪ ﻣﻨﺎﻓﺲ ﻋﺮﻭﺑﻪ " ﻣﺨﺎﺻﻤﻬﺎ .."
ﻭﻫﻲ ﻣﺴﻜﻴﻨﻪ ﺣﺎﻟﻬﺎ ﺑﺎﻟﻮﻳﻞ ﺫﺑﻠﺖ ﻣﻦ ﺍﻟﺒﻜﻲ ﻭﺣﺘﻰ ﺍﻟﻘﺮﺍﻳﻪ ﻣﺶ ﻗﺎﺩﺭﺓ ﺗﻘﺮﺍ ﺗﺨﺶ ﻟﻺﻣﺘﺤﺎﻥ ﺑﺎﻟﺒﺮﻛﻪ ..
ﺍﻛﺜﺮ ﺷﻲ ﻳﻘﻬﺮ ﻓﻴﻬﺎ ﻟﻤﺎ ﺗﺸﻮﻓﻪ ﻳﺪﻳﺮ ﻓﺮﻭﺣﻪ ﻣﺎﻳﻌﺮﻓﻬﺎﺵ ..
ﺑﺎﻫﻲ ﻳﻜﻠﻤﻬﺎ .. ﻳﻬﺰﺑﻬﺎ ﻳﻮﺭﻳﻬﺎ ﻏﻠﻄﻬﺎ ﻣﺎﻳﺨﻠﻴﻬﺎﺵ ﻫﻜﻲ ﻣﺶ ﻓﺎﻫﻤﻪ ﺷﻦ ﻭﺿﻌﻬﺎ ﻣﻌﺎﻩ !!
🍁🍁🍁
ﺍﻟﺴﺎﻋﻪ 7 ﻣﺴﺎﺀﺍ ...
ﻭﺍﻗﻔﻴﻦ ﻭﻻﺑﺴﻴﻦ ﻛﺒﺎﺑﻴﻂ ﻭﻣﻘﺎﺑﻠﻴﻦ ﺍﻟﻮﺍﺩﻱ ..
ﺧﻄﺎ ﻳﺎﻫﺎﻧﻴﺒﺎﻝ ﺍﻧﺖ ﻫﻜﻲ ﻭﻛﺎﻧﻚ ﺳﻴﺒﺘﻬﺎ ...
ﻫﺎﻧﻴﺒﺎﻝ : ﻧﺄﺩﺏ ﻓﻴﻬﺎ
ﺍﻟﻬﺎﺩﻱ : ﺍﺳﻤﻊ ﻧﻘﻮﻟﻚ ﺍﻟﻤﻌﺎﻣﻠﻪ ﻫﺪﻱ ﺣﺘﺨﻴﻠﻚ ﺗﺨﺴﺮﻫﺎ ﺻﺪﻗﻨﻲ ..
ﻭﻣﺸﻲ ﻭﺧﻼﻩ ..
ﺧﻼﻩ ﻭﻗﻠﺒﻪ ﻣﻌﺼﻮﺭ ...💔 ﻫﻮ ﻳﻤﻮﺕ ﻋﻠﻴﻬﺎ .. ﻟﻜﻦ ﻓﻨﻔﺲ ﺍﻟﻮﻗﺖ ﻳﻤﻮﺕ ﻉ ﻣﺒﺎﺩﺋﻪ ﻣﺎﻳﻘﺪﺭﺵ ﻳﺘﻨﺎﺯﻝ ﻋﻨﻬﻢ ...
ﻫﻮ ﻣﺎﻳﺒﻴﺶ ﻳﻮﺍﺟﻬﻬﺎ ﻟﺴﺒﺐ ﻭﺍﺣﺪ ..
ﻻﻧﻪ ﻣﺶ ﺿﺎﻣﻦ ﺭﻭﺣﻪ ﻭﻻﻟﺴﺎﻧﻪ 🍃..
🍁🍁🍁🍁🍁
ﻓﻲ ﻧﻔﺲ ﺍﻷﺳﺒﻮﻉ ﻓﻄﺮﺍﺑﻠﺲ ..
ﻛﺎﻥ ﻋﺮﺱ ﻋﺒﻴﺮ ﺣﻤﺎﺓ ﻧﻌﻴﻤﻪ ..
ﻭﺩﺍﺭﺗﻪ ﻋﺮﺱ ﻛﺎﻣﻞ ... ﺍﺻﻼ ﻋﺮﺍﺱ ﻫﺪﺍﻛﺎ ﺍﻟﺰﻣﺎﻥ ﺍﻏﻠﺒﻬﺎ 7 ﺍﻳﺎﻡ ﻭ 7 ﻟﻴﺎﻟﻲ .. ﻭﻃﺒﻌﺎ ﻛﻞ ﻭﺍﺣﺪ ﻣﻈﺎﻫﺮ ﻓﺮﺣﻪ ﻉ ﻗﺪ ﻣﻘﺪﺭﺗﻪ ...
ﻧﻬﺎﺭ ﺍﻟﺤﻔﻠﻪ .
ﺍﻟﻠﻲ ﺩﺍﺭﻭﻫﺎ ﻓﺨﻴﻤﻪ ﺗﺤﺖ ﺍﻟﻌﻤﺎﺭﺓ ..
ﻭﻃﺒﻌﺎ ﻛﺎﻧﺖ ﻓﺎﻃﻤﻪ ﻣﻌﺰﻭﻣﻪ ﻭﺣﻤﻴﺪ ﻫﻮ ﺍﻟﻠﻲ ﺟﺎﺑﻬﺎ ...
ﻷﻧﻬﺎ ﺗﻌﺘﺒﺮ ﺑﻨﺖ ﻋﻢ ﺍﻟﻌﺮﻭﺳﻪ ﻭﺍﻗﻒ ..
ﻛﺎﻧﺖ ﻧﻌﻴﻤﻪ ﻻﺑﺴﻪ ﻋﺮﺑﻲ ﺑﺪﻟﻪ ﻛﺒﻴﺮﺓ ﻭﻃﺎﻟﻌﻪ ﻓﻴﻬﺎ ﺁﻳﻪ ﻣﻦ ﺍﻟﺠﻤﺎﻝ ﻭﻟﻔﺘﺖ ﺍﻻﻧﺘﺒﺎﻩ ﺑﻤﻼﻣﺤﻬﺎ ﺍﻟﺸﻘﺮﺍ ﻭﺍﻟﻌﻴﻮﻥ ﺍﻟﺨﻀﺮ ..
ﺑﺲ ﺍﻟﻠﻲ ﻟﻔﺖ ﺍﻷﻧﺘﺒﺎﻩ ﺍﻛﺜﺮ ﺩﻻﻝ 💖
ﺍﻟﻨﺎﺱ ﻋﻴﻮﻧﻬﻢ ﻓﻴﻬﺎ ﻭﻗﺮﻳﺐ ﻫﺒﻠﻮﺍ ﻋﻠﻴﻬﺎ ﻭﻉ ﺟﻤﺎﻟﻬﺎ ﻭﺑﺮﺍﺋﺘﻬﺎ ﻭﻟﺴﺎﻧﻬﺎ ﻭﻫﺪﺭﺯﺗﻬﺎ ..
ﻓﺎﻃﻤﻪ ﻭﺍﻣﺒﺎﺭﻛﻪ ﺧﺎﻓﻮﺍ ﻋﻠﻴﻬﺎ ﻫﻠﺒﻪ ..
ﻭﺯﻋﻤﻴﺘﻚ ﺍﻣﺒﺎﺭﻛﻪ ﻟﻮﺩﺕ ﻋﻠﻴﻬﺎ ﺑﺎﻟﻤﻐﺮﻑ ﺑﺶ ﺗﻄﻴﺮ ﺍﻟﻌﻴﻦ ..
ﺗﻤﺖ ﺍﻟﺤﻔﻠﻪ ﺑﻌﺪ ﺟﻮ ﺭﻭﺣﻮﺍ ﺑﻌﺒﻴﺮ ...
ﻟﻴﻠﺘﻬﺎ ﺑﺎﺗﺖ ﻓﺎﻃﻤﻪ ﻓﺤﻮﺵ ﻋﻤﻬﺎ .
ﻟﻜﻦ ﻧﻌﻴﻤﻪ ﺍﺻﺮ ﻋﺒﺪﺍﻟﺴﻼﻡ ﻳﺮﻭﺡ ﺑﻴﻬﺎ ..
ﻧﻌﻴﻤﻪ ﻭﻫﻲ ﺗﺤﻮﻝ ﻓﺎﻟﺤﻮﻟﻲ : ﺣﺸﻤﻪ ﻭﺍﻟﻠﻪ ﺣﺸﻤﻪ ..
ﻋﺒﺪﺍﻟﺴﻼﻡ ﺷﺪﻫﺎ ﻣﻦ ﺧﺼﺮﻫﺎ ﻭﻗﺮﺑﻬﺎ ﻟﻴﻪ : ﻻﺣﺸﻤﻪ ﻭﻻﺳﻮ ... ﻭﺗﻮﺍ ﻧﺒﻴﻚ ﺗﻘﻮﻟﻴﻠﻲ ﻣﻦ ﻭﻳﻦ ﺗﺠﻴﺒﻲ ﻓﻴﻪ ﺟﻤﺎﻟﻚ ﻗﻮﻟﻴﻠﻲ ..
ﺍﺑﺘﺴﻤﺖ ﻧﻌﻴﻤﻪ ﺑﺨﺠﻞ ...
ﻭﺑﻌﺪ ﻫﺎﻷﺑﺘﺴﺎﻣﻪ ﺭﺍﺣﻮ ﻓﻲ ﻋﺎﻟﻢ ﺗﺎﻧﻲ 💕
🍃 ﺍﻟﻴﻮﻡ ﺍﻟﻠﻲ ﺑﻌﺪﻩ ...
ﻓﺎﻃﻤﻪ ﺟﺎﺑﻬﺎ ﻋﺒﺪﺍﻟﺴﻼﻡ ﺑﺶ ﺗﺘﻐﺪﺍ ﻋﻨﺪ ﺑﻨﺘﻬﺎ ﻭﺍﻟﻌﺸﻴﻪ ﺑﺘﺘﺴﻘﺪ ﻫﻲ ﻭﺣﻤﻴﺪ ﻣﺮﻭﺣﻪ ﻟﺒﻼﺩﻫﺎ ..
ﺗﻐﺪﺕ ﻭﺑﺤﺒﺤﺖ ...
ﻭﻛﺎﻧﺖ ﺗﺮﺍﺟﻲ ﻓﻲ ﺍﻟﻌﺼﺮ ..
ﻭﻧﻌﻴﻤﻪ ﺑﻌﺪ ﻏﺴﻠﺖ ﺍﻟﻤﺎﻋﻴﻦ ﺣﻄﺖ ﺷﻘﻔﺔ ﺑﺨﻮﺭ ﻉ ﺍﻟﺒﺮﻳﻤﺲ " ﻏﺎﺯ ﺍﻟﺸﺎﻫﻲ ﺍﻟﺼﻐﻴﺮ .." ﻭﺣﻄﺖ ﻓﻴﻪ ﺍﻟﺒﺨﻮﺭ ... ﻭﻗﻌﺪﺕ ﺗﺒﺨﺮ ﻓﻲ ﺍﻟﺤﻮﺵ ﺣﻄﺖ ﺍﻟﻐﺎﺯ ﻓﻲ ﺍﻟﺼﺎﻟﻪ ﻭﻣﺸﺖ ﻟﻠﻜﻮﺟﻴﻨﻪ ﺗﺸﻮﻑ ﺍﻟﺸﺎﻫﻲ ..
ﺩﻻﻝ ﺧﺸﺖ ﺍﻟﺼﺎﻟﻪ ﻭﻗﻌﺪﺕ ﺗﻠﻌﺐ ﻭﺗﺠﺮﻱ ﻓﻴﻬﺎ ..
ﻭﺧﻄﺮ ﻋﻠﻴﻬﺎ ﺍﻟﺠﺮﻱ ﺣﻮﺍﻟﻴﻦ ﻏﺎﺯ ﺍﻟﺸﺎﻫﻲ ..
ﺩﺍﺭﺕ ﻋﻠﻴﻪ ﺩﻭﺭﺗﻴﻦ ..
ﻓﻲ ﺍﻟﺘﺎﻟﺘﻪ ﺭﻛﺒﺖ ﻓﻲ ﻗﻔﻄﺎﻧﻬﺎ ﺍﻟﻨﺎﺭ ..
ﻉ ﻃﻠﻌﺔ ﺍﻣﻬﺎ ﻣﻦ ﺍﻟﻜﻮﺟﻴﻨﻪ ﻭﺗﺼﻜﻬﺎ ﻋﻴﻄﻪ ..
ﻭﺗﺠﺮﻱ ﻟﺒﻨﺘﻬﺎ ﺍﻟﻠﻲ ﻛﺎﻧﺖ ﺗﺒﻜﻲ ﻭﺗﻌﻴﻂ ...
ﻃﻔﺖ ﺍﻟﻨﺎﺭ ﻉ ﺟﻴﺔ ﺍﻣﻬﺎ ﺍﻟﻠﻲ ﻛﺎﻧﺖ ﻃﺎﻟﻌﻪ ﻣﻦ ﺍﻟﺤﻤﺎﻡ ﻣﺨﻠﻮﻋﻪ ..
ﺩﻻﻝ ﻣﺎﺯﺍﻝ ﺗﺒﻜﻲ ﻭﺍﻣﻬﺎ ﺷﺎﻓﺖ ﺭﺟﻠﻬﺎ ﻟﻘﺘﻬﺎ ﺍﻧﺤﺮﻗﺖ ﻣﻦ ﺟﻬﺔ ﺭﻛﺒﺘﻬﺎ ..
ﻧﻌﻴﻤﻪ ﺗﻨﺪﺏ : ﻳﺎﻏﺒﻴﻨﻲ ﻳﺎﺑﻨﺘﻲ ﻳﺎﻏﺒﻴﻨﻲ ..
ﻓﺎﻃﻤﻪ ﺑﺨﻠﻌﻪ : ﻛﻴﻒ ﺗﺨﻠﻲ ﺍﻟﻐﺎﺯ ﻣﻮﻟﻮﻉ ﻓﻮﺳﻂ ﺍﻟﺤﻮﺵ ﻭﺍﻧﺘﻲ ﻋﻨﺪﻙ ﻋﻴﻞ ﺗﺘﺤﺮﻙ ﻭﺗﻠﻌﺐ ﻛﻴﻒ ...
ﻭﺍﻧﻔﺘﺢ ﺑﺎﺏ ﺍﻟﺤﻮﺵ .
ﻭﺧﺶ ﻋﺒﺪﺍﻟﺴﻼﻡ ..
ﻗﻠﻮﺏ ﻧﻌﻴﻤﻪ ﻭﺍﻣﻬﺎ ﻃﺎﺣﻮﺍ ...
ﻓﻨﺺ ﻟﻤﺎ ﺷﺎﻑ ﺑﻨﺘﻪ ﺷﺒﻪ ﺩﺍﻳﺨﻪ ﻣﻦ ﺍﻟﻌﻴﺎﻁ ..
ﺟﺎﻫﺎ ﻳﺠﺮﻱ ﺟﺒﺪﻫﺎ ﻣﻦ ﺍﻣﻬﺎ : ﺧﻴﺮﻙ ﺑﺎﺑﺎ ..
ﺩﻻﻝ ﺑﺪﻣﻮﻉ : ﻟﺮﺟﻠﻲ ..
ﺷﺎﻑ ﻋﺒﺪﺍﻟﺴﻼﻡ ﻭﻳﻦ ﺗﺄﺷﺮ ﺩﻻﻝ ﻗﺮﻳﺐ ﻣﺎﺕ : ﻛﻴﻒ ﻫﻜﻲ ﻛﻴﻒ .. ﻛﻴﻒ ﻳﺼﻴﺮ ﻟﻠﺒﻨﺖ ﻫﻜﻲ ﻭﺍﻧﺘﻲ ﻗﺎﻋﺪﻩ .
ﻗﺎﻡ ﺑﻨﺘﻪ ﻓﻐﻤﺮﻩ : ﻭﻳﻦ ﻳﺠﻮﻙ ﻣﺎﻟﻴﻚ ﺗﻨﺴﻲ ﻛﻞ ﺷﻲ ...
ﻭﻣﺸﻲ ﻃﻠﻊ ﺑﺒﻨﺘﻪ ﺑﺮﺍ ﺍﻟﺤﻮﺵ ..
ﻧﻌﻴﻤﻪ ﺷﺒﺤﺖ ﻷﻣﻬﺎ ﻭﺩﻣﻮﻋﻬﺎ ﻳﻨﺰﻟﻮﺍ ..
ﻭﻓﺎﻃﻤﻪ ﺍﻟﻜﻠﻤﻪ ﻭﺟﻌﺘﻬﺎ ﻫﻠﺒﻪ ..
🍃 ﺍﻟﻠﻪ ﺃﻛﺒﺮ ... ﺍﻟﻠﻪ ﺍﻛﺒﺮ ...
ﺳﻤﻌﺖ ﺻﻮﺕ ﺍﻵﺫﺍﻥ
ﻣﺸﺖ ﻭﻗﻔﺖ ﻉ ﺍﻟﺼﻼﻳﻪ ﺍﻟﻤﻄﺮﻭﺣﻪ ... ﻭﻫﻲ ﺗﺪﻋﻲ ﻣﻦ ﺩﺍﺧﻠﻬﺎ ﻳﺠﻲ ﺣﻤﻴﺪ ﺑﻌﺪ ﺍﻟﺼﻼﺓ ...
ﺍﻣﺎ ﻧﻌﻴﻤﻪ ﻣﺴﻜﻴﻨﻪ ﺣﺴﺖ ﺭﻭﺣﻬﺎ ﺑﺘﻤﻮﺕ .. ﺍﻣﻬﺎ ﻗﻠﻴﻞ ﺍﻟﻨﺎﺩﺭ ﻣﺎﺗﺠﻴﻬﺎ ﻭﻭﻳﻦ ﺗﺠﻲ ﻻﺯﻡ ﻋﺒﺪﺍﻟﺴﻼﻡ ﻳﺘﺼﺮﻑ ﺑﻄﺮﻳﻘﻪ ﻓﻴﻬﺎ ﺍﻫﺎﻧﻪ ..
🍁 ﻣﺎﺗﺴﺘﻐﺮﺑﻮﺵ ﺣﺎﻝ ﻋﺒﺪﺍﻟﺴﻼﻡ .. ﻛﻴﻒ ﻣﺎﺗﺒﻲ ﺭﻭﻳﺤﺘﻪ ﻭﻉ ﺣﺴﺐ ﺟﻮﻩ ﻳﺘﻌﺎﻣﻞ ﻣﻊ ﺍﻟﻠﻲ ﺣﻮﺍﻟﻴﻪ .. ﻧﺎﻫﻴﻚ ﻋﻦ ﺍﻧﻪ ﺭﺍﺟﻞ ﻳﻌﻄﻲ ﻓﻮﺩﺍﻧﻪ ﻷﻣﻪ ﻭﺧﻮﺍﺗﻪ ﻭﻗﺒﻞ ﻳﺠﻲ ﻟﻠﺤﻮﺵ ﻛﺎﻥ ﻣﺸﺤﻮﻥ ﻣﻨﻬﻢ 🍁
ﻓﻌﻼ ..
ﺑﻌﺪ ﺍﻟﻌﺼﺮ ﺟﻲ ﺣﻤﻴﺪ ... ﻭﺭﻭﺡ ﺑﺄﻣﻪ ﺍﻟﻠﻲ ﺭﻭﺣﺖ ﻣﻦ ﺣﻮﺵ ﺑﻨﺘﻬﺎ ﺑﻮﺟﻴﻌﻪ ..
ﺑﻌﺪ ﺳﻘﺪﺗﻬﺎ .. ﻗﻌﺪﺕ ﻧﻌﻴﻤﻪ ﺗﺒﻜﻲ ﺑﺎﻟﻌﺒﺮﺓ ...
ﻭﺑﻌﺪ ﺣﻮﺍﻟﻲ ﺳﺎﻋﺘﻴﻦ ﺭﻭﺡ ﻋﺒﺪﺍﻟﺴﻼﻡ ﺑﺪﻻﻝ ﺍﻟﻠﻲ ﺩﺍﻭﻭ ﺣﺮﻗﻬﺎ ..
ﺩﺧﻠﻬﺎ ﺍﻟﺪﺍﺭ ﺭﻗﺪﻫﺎ ... ﻭﻓﺎﺕ ﻧﻌﻴﻤﻪ ﻭﻣﺎﺑﺎﺵ ﻳﻌﺒﺮﻫﺎ ﺑﻜﻞ ... ﻭﻫﻲ ﺍﺳﺎﺳﺎ ﻣﺎﻛﺎﻧﺘﺶ ﺗﺒﻲ ﺗﺸﻮﻑ ﺷﺒﺢ ﻭﺟﻬﻪ ..
🌴🌴🌴🌴🌴🌴🌴🌴
ﻓﻲ ﻫﺪﻳﻜﺎ ﺍﻟﺒﻼﺩ ..
ﻗﺎﻋﺪﻩ ﺍﺩﻭﺭ ﻋﺠﻠﻪ ﺍﻷﻳﺎﻡ ...
ﻓﻬﺪﻭﺀ ﻇﺎﻫﺮﻱ ... ﻉ ﻋﻜﺲ ﻣﺎﻳﺪﻭﺭ ﻓﻲ ﺩﻭﺍﺧﻞ ﺍﻫﻠﻬﺎ ..
ﻏﺎﻟﻴﻪ ﺍﻟﻠﻲ ﺭﺳﻤﻲ ﻧﻔﺴﻴﺘﻬﺎ ﺗﻌﺒﺖ ﻣﻦ ﻣﻌﺎﻣﻠﻪ ﺣﻤﻴﺪﺍ ﻟﻴﻬﺎ ﻭﻣﺶ ﻓﺎﻫﻤﻪ ﺷﻲ ..
ﺗﺤﺎﻭﻝ ﺗﺘﻘﺮﺏ ﻣﻦ ﺳﻌﻴﺪﻩ ﻭﺗﺴﺎﻋﺪ ﻓﻴﻬﺎ ﺣﺘﻰ ﻓﺪﺭﻭﺱ ﺩﻭﺭﺓ ﺍﻟﺨﻴﺎﻃﻪ .. ﻟﻜﻦ ﻣﺎﺃﺳﺘﻔﺎﺩﺕ ﺷﻲ ....
ﻋﻜﺲ ﺣﻤﻴﺪﻩ ﺍﻟﻠﻲ ﻛﺎﻧﺖ ﻋﺎﺩﻱ ﺟﺪﺍ ﻭﻣﺶ ﻣﺪﻭﺭﺓ ﺑﻌﺪ ﺷﺒﻪ ﺷﻔﺖ ﻣﻦ ﺍﻟﺤﺮﻕ ﺭﺟﻌﺖ ﻟﺤﻴﺎﺗﻬﺎ ﺍﻟﻄﺒﻴﻌﻴﻪ ﻭﻣﺎﻛﺎﻧﺘﺶ ﺗﺨﻤﻢ ﻫﻠﺒﻪ ﻓﻤﻮﺿﻮﻋﻬﺎ ﻫﻲ ﻭﺧﻠﻴﻔﻪ .. ﻷﻧﻬﺎ ﺿﺎﻣﻨﻪ ﺍﻧﻪ ﻳﺒﻴﻬﺎ ﻭﻋﺎﺟﻼ ﺍﻭ ﺍﺟﻼ ﺣﺘﻜﻮﻥ ﻟﻴﻪ ..
💔🍁
ﺑﻴﻨﻤﺎ ﺍﻳﺒﻚ ﻭﺷﺠﺮﺓ ﺍﻟﺪﺭ ... ﺍﻟﻠﻲ ﻫﻤﺎ ﺣﺎﻟﻴﺎ ﻓﻲ ﺍﻭﻝ ﺑﺮﻭﻓﺎ ﺑﻌﺪ ﺍﻹﻣﺘﺤﺎﻧﺎﺕ ..
ﻛﺎﻥ ﻣﺘﺠﺎﻫﻠﻬﺎ ﺗﻤﺎﻣﺎ .. ﻭﺗﺠﺎﻫﻠﻪ ﺣﺮﻗﻬﺎ ... ﻓﻘﺮﺭﺕ ﺗﺤﺮﻗﻪ ..
ﻋﺮﻭﺑﻪ : ﺟﻤﺎﻝ ... ﻣﻤﻜﻦ ﺗﺴﻤﻊ ﻋﻠﻴﺎ ..
ﺟﻤﺎﻝ ﺍﺑﺘﺴﻢ : ﺑﺎﻫﻲ .. ﻭﺑﺪﻱ ﻳﺴﻤﻊ ﻉ ﻋﺮﻭﺑﻪ ﻓﺪﻭﺭﻫﺎ ..
ﻫﻮ ﻗﺎﻡ ﺭﺍﺳﻪ ﺑﻌﺪ ﻛﺎﻥ ﻏﺎﻃﺴﻪ ﻓﻲ ﺍﻟﻨﺺ .. ﻭﻓﺘﺢ ﻋﻴﻮﻧﻪ ﺑﺼﺪﻣﻪ ... ﻭﺑﺪﺕ ﺣﺮﺍﺭﺗﻪ ﺗﺮﻛﺐ .. ﻭﺍﻟﺪﻡ ﺭﻗﻲ ﻟﺮﺍﺳﻪ ..
ﺟﻤﺎﻝ : ﻣﺎﺷﺎﺀ ﺍﻟﻠﻪ ﺻﻢ ﺣﻔﻈﺘﻴﻪ ..
ﺿﺤﻜﺖ ﻋﺮﻭﺑﻪ .. ﻭﺷﺒﺤﺖ ﺟﻬﺘﻪ ﻟﻘﺎﺗﻪ ﻳﺸﻮﻓﻠﻬﺎ ﺑﻨﻈﺮﺓ ﺗﺨﻮﻑ ...
ﻫﻲ ﻣﻦ ﺩﺍﺧﻠﻬﺎ ﺧﺎﻓﺖ .. ﻟﻜﻦ ﺷﺒﺤﺘﻠﻪ ﺑﺮﻓﻌﺔ ﺣﺎﺟﺐ ﻭﺑﻌﺪﻳﻦ ﺭﺟﻌﺖ ﺗﻬﺪﺭﺯ ﻉ ﺟﻤﺎﻝ ..
ﻭﻫﻮ ﻳﻨﺤﺮﻕ ﺣﺮﻕ ...
ﺷﻮﻳﻪ ﻭﺟﺖ ﺍﻷﺑﻠﻪ ... ﻭﺑﺪﻭﺍ ﺍﻟﺒﺮﻭﻓﺎ ...
ﻭﻟﻤﺎ ﺟﻲ ﺩﻭﺭﻩ ﻭﺩﻭﺭﻫﺎ ﻣﺜﻠﻮﺍ ﺑﺘﻌﺎﺑﻴﺮ ﻭﺟﻪ ﺻﺎﺩﻗﻪ ﻫﺎﻟﻤﺮﻩ ..
ﺍﻷﺑﻠﻪ : ﺑﺮﺍﺍﺍﺍﻓﻮ ﻫﺎﻧﻴﺒﺎﻝ ﻭﻋﺮﻭﺑﻪ ..
ﻫﻤﺎ ﺷﺒﺤﻮﺍ ﻟﻸﺑﻠﻪ ﻭﺍﺑﺘﺴﻤﻮﺍ ﻣﺠﺎﻣﻠﻪ ..
ﻭﻛﻞ ﻭﺍﺣﺪ ﻣﻨﻬﻢ ﻉ ﻳﺴﺎﺭ ﺻﺪﺭﻩ ﺟﻤﺮﺓ ﺗﻠﻬﺐ ﻟﻬﺐ ...🔥💓...
ﺑﻌﺪ ﻛﻤﻠﻮﺍ ..
ﺟﻲ ﺟﻨﺒﻬﺎ ؛ ﻧﺒﻴﻚ ﻓﻲ ﺍﻹﺳﺘﺮﺍﺣﻪ ..
ﻓﺎﺕ ﻣﻦ ﺣﺪﺍﻫﺎ ﻭﻃﻠﻊ ﻭﻫﻲ ﺧﺎﻓﺖ ﻫﻠﺒﻪ ...
💔🍃
ﺣﻀﺮﻭﺍ ﺣﺼﺔ ﻗﺒﻞ ﺍﻹﺳﺘﺮﺍﺣﻪ ...
ﻭﺟﻲ ﻭﻗﺖ ﺍﻹﺳﺘﺮﺍﺣﻪ ﻭﻃﻠﻌﻮﺍ ...
ﻫﻲ ﻛﺎﻧﺖ ﺧﺎﻳﻔﻪ ﻫﻠﺒﻪ ... ﻟﻴﻦ ﺟﺎﻫﺎ ﻣﻐﺺ ﻣﻦ ﺍﻟﺨﻮﻑ ..
ﻣﺸﺖ ﻟﻠﺠﻬﺔ ﺍﻟﻠﻲ ﻳﺘﻼﻗﻮﺍ ﻓﻴﻬﺎ ﻭﺧﻄﻮﺍﺗﻬﺎ ﻣﺘﺮﺩﺩﺓ ﻟﻘﺎﺗﻪ ﻳﺮﺍﺟﻲ ﻓﻴﻬﺎ ﻭﻳﺪﻩ ﻓﻨﺼﻪ ..
ﻗﺪﻣﺘﻠﻪ ﻭﻫﻲ ﻣﻈﺎﻫﺮﺓ ﺑﺎﻟﻘﻮﺓ ...
ﻋﺮﻭﺑﻪ : ﻧﻌﻢ ..
ﻫﻮ ﻗﺪﻣﻠﻬﺎ : ﻟﻲ ﻭﻳﻦ ﺗﺒﻲ ﺗﻮﺻﻠﻲ؟ !
ﻋﺮﻭﺑﻪ ﺑﺮﻓﻌﺔ ﺣﻮﺍﺟﺐ : ﺗﺴﺄﻝ ﻓﻴﺎ ﺍﻧﻲ ﺍﻟﺴﺆﺍﻝ ﻫﺪﻯ ! ؟ﺍﺳﺄﻝ ﺭﻭﺣﻚ ﺍﻷﻭﻝ ..
ﻫﺎﻧﻴﺒﺎﻝ ﻭﻫﻮ ﻣﻀﻴﻖ ﻋﻴﻮﻧﻪ : ﻗﺼﺪﻙ ﻟﻌﻨﺪ ﺗﻮﺍ ﻣﺎﻋﺮﻓﺘﻴﺶ ﻏﻠﻄﻚ ﻻﻭﺗﺰﻳﺪﻱ ﻓﻴﻬﺎ !!
ﻋﺮﻭﺑﻪ : ﺍﻧﻲ ﻣﺎﻏﻠﻄﺖ ﻓﺸﻲ !! ﺗﺼﺮﻓﻲ ﻋﺎﺩﻱ ﺟﺪﺍ ﺣﺒﻴﺖ ﻧﺘﻌﺮﻑ ﻉ ﻫﻠﻚ ﺷﻦ ﻫﻲ ﺍﻟﺠﺮﻳﻤﻪ ﺍﻟﻠﻲ ﺍﺭﺗﻜﺒﺘﻬﺎ !!
ﻫﺎﻧﺒﻴﺎﻝ ﺿﺤﻚ ﺑﺘﻬﻜﻢ : ﻳﺎﻋﻠﻴﻚ ﺣﺎﻟﻪ ﺣﺎﻟﺘﻚ .. ﺗﻲ ﻭﻳﻦ ﺗﺤﺴﺎﺑﻲ ﺭﻭﺣﻚ ﻭﻳﻦ ... ﻓﻲ ﺣﺎﺟﺎﺕ ﺍﺳﻤﻬﻦ ﻋﻴﺐ ﺣﺸﻢ .. ﺍﻛﺜﺮ ﺣﺎﺟﺘﻴﻦ ﺗﺮﺑﻴﻨﺎ ﻋﻠﻴﻬﻦ ﻫﻨﻰ ..
ﻋﺮﻭﺑﻪ : ﺑﻜﻞ ﻳﺎﻫﺎﻧﻴﺒﺎﻝ ﺍﻧﺖ .. ﻋﻘﻠﻴﺘﻚ ﻗﺪﻳﻤﻪ ﻣﺘﺤﺠﺮﺓ ﻣﺘﺨﻠﻔﻪ ﻭﺍﺟﺪ ..
ﻫﺎﻧﻴﺒﺎﻝ ﻭﺻﻠﺖ ﻋﻨﺪﻩ ﻟﻮﻳﻦ ﻭﻳﻦ : ﺍﻫﺎ ... ﻃﺒﻌﺎ ﺗﺒﻲ ﻣﻦ ﻳﻀﺤﻚ ﻭﻳﺘﺴﻬﻮﻙ ﻣﻌﺎﻙ .. ﻣﺶ ﺍﻟﻠﻲ ﻳﻌﺪﻟﻚ ﻭﻳﻠﻤﻚ ..
ﻋﺮﻭﺑﻪ ﺑﺼﺪﻣﻪ : ﻳﻠﻤﻨﻲ !!!! ؟ﺷﻦ ﺷﻔﺘﻨﻲ ﺩﺍﻳﺮﺓ ﺍﻫﺎﺍﺍ .. ﺻﻮﺗﻬﺎ ﻗﻌﺪ ﻳﺮﻋﺶ .. ﺍﺧﺮﺗﻬﺎ ﻧﻄﻠﻊ ﻭﺣﺪﻩ ﻣﻔﻠﻮﺗﻪ ﻓﻨﻈﺮﻙ ﻭﺍﻧﺖ ﺑﺘﻠﻤﻨﻲ !!!
ﻫﻮ ﺍﻟﻠﻲ ﺧﺎﻑ ﻣﻨﻪ ﺻﺎﺭ ﻟﺴﺎﻧﻪ ﺳﻴﻒ ﻃﻌﻨﻬﺎ ﺑﻜﻼﻣﻪ ﺍﻟﺠﺎﺭﺡ ..
ﺗﺒﺪﻟﺖ ﻣﻼﻣﺢ ﻭﺟﻬﻬﺎ ﻟﻠﺤﺪﻩ ﻭﺩﻣﻮﻋﻬﺎ ﺗﻨﺰﻝ : ﺍﻧﻲ ﺍﻟﺤﻤﺪ ﻟﻠﻪ ﻣﺘﺮﺑﻴﻪ ﺍﺣﺴﻦ ﺗﺮﺑﻴﻪ ﻭﻟﻮ ﻣﺎﻛﻨﺘﺶ ﻫﻜﻲ ﻣﺎﻛﻨﺘﺶ ﻗﺒﻠﺖ ﺗﻌﺮﻓﻨﻲ .. ﻭﺑﻌﺪﻳﻦ ﺑﺪﺍﻝ ﻣﺎﺩﻳﺮ ﺭﻭﺣﻚ ﺭﺍﺟﻞ ﻋﻠﻴﺎ ﻭﺗﺒﻲ ﺗﻠﻤﻨﻲ ﻋﺪﻱ ﺩﻳﺮ ﺭﻭﺣﻚ ﺭﺍﺟﻞ ﻉ ﺑﻨﺖ ﻋﻤﻚ ﺍﻟﻠﻲ ﺗﻜﻠﻢ ﻓﻲ ﺍﻷﻭﻻﺩ ﻭﻟﻤﻬﺎ ..
ﻛﻠﻜﻢ ﻣﺘﻮﻗﻌﻴﻦ ﺭﺩﺓ ﻓﻌﻠﻪ ... ﺍﻧﻲ ﻣﺘﺄﻛﺪﻩ ﺍﻥ ﺍﻏﻠﺒﻜﻢ ﺗﻮﻗﻌﻬﺎ ﺻﺢ ..
ﻋﻄﺎﻫﺎ ﻛﻒ ﻭﻫﺎﻟﻤﺮﺓ ﺑﻘﺼﺪ ﻛﻒ ﺧﻼ ﻋﺮﻭﺑﻪ ﻣﻌﺎﺵ ﺣﺴﺖ ﺑﺨﺪﻫﺎ ﻣﻦ ﻗﻮﺗﻪ ..
ﺷﺨﺼﺖ ﺑﺼﺮﻫﺎ ﺑﺼﺪﻣﻪ ...
ﻭﺭﺟﻠﻴﻬﺎ ﻃﻮﻝ ﺗﺤﺮﻛﻮﺍ ﻭﺭﻓﻌﻮﻫﺎ ﺑﻌﻴﺪ ﻋﻨﻪ ...
ﺍﻣﺎ ﻫﻮ ﻗﻌﺪ ﺟﺎﻣﺪ ﻓﻤﻜﺎﻧﻪ ﻭﻣﻌﺎﺵ ﺣﺲ ﺑﺸﻲ .. ﻏﻴﺮ ﺑﻴﺪﻩ ﺍﻟﻠﻲ ﺗﻮﺟﻊ ﻓﻴﻪ ﻣﻦ ﺍﻟﺠﺮﻳﻤﻪ ﺍﻟﻠﻲ ﺍﺭﺗﻜﺒﻬﺎ ﻓﺤﻖ ﺍﻟﺒﻨﺖ ﺍﻟﻮﺣﻴﺪﻩ ﺍﻟﻠﻲ ﺣﺮﻛﺖ ﻗﻠﺒﻪ ...💔
ﻋﺮﻭﺑﻪ ﺍﻟﻠﻲ ﻛﺎﻧﺖ ﺗﻤﺸﻲ ﺑﺨﻄﻮﺍﺕ ﺳﺮﻳﻌﻪ ﻭﺩﻣﻮﻋﻬﺎ ﻳﻨﺰﻟﻮﺍ ﻣﻦ ﻋﻴﻮﻧﻬﺎ ﺍﻟﺠﺎﺣﻈﺎﺕ ....
ﻭﻗﻔﺖ ﻓﺠﺄﺓ ﻓﻨﺺ ﺍﻟﺴﺎﺣﻪ ﻭﻓﻘﺪﺕ ﺍﻟﻮﻋﻲ ...
🍃🍃🍃🍃🍃🍃🍃🍃
ﻣﻦ ﻫﺪﺍﻛﺎ ﺍﻟﻴﻮﻡ ...
ﻓﺎﺗﻮﺍ ﺑﺎﻟﺰﺑﻂ ...
ﺷﻬﺮﻳﻦ 🍃...
ﺍﻧﻔﺼﻠﻮﺍ ﻓﻴﻬﻢ ﻫﺎﻧﻴﺒﺎﻝ ﻭﻋﺮﻭﺑﻪ ﻋﻦ ﺑﻌﺾ ﺧﻼﺹ ...
ﻭﺍﻟﺰﻭﺯ ﻛﺎﻧﻮﺍ ﻣﻦ ﻇﺎﻫﺮﻫﻢ ﺻﻜﺮﻭﺍ ﺻﻔﺎﺣﻲ ﺑﻌﺾ ..
ﺑﺲ ﺍﻟﻘﻠﻮﺏ ﻛﺎﻧﺖ ﺗﺤﺐ ﺑﻜﻞ ﻗﻮﺗﻬﺎ ...💓
ﻭﺗﺒﺪﺍ ﻣﺠﻨﻮﻧﻪ ﻭﻳﻦ ﺗﺘﻼﻗﻰ ﻓﺒﺮﻭﻓﺎﺕ ﺍﻟﻤﺴﺮﺡ ﻭﺣﺼﺔ ﺍﻟﺮﻳﺎﺿﻪ ..
🍁 ﺍﻣﺎﻝ ﺑﻌﺪ ﻛﻠﻤﻬﺎ ﻫﺎﻧﻴﺒﺎﻝ ﻋﻦ ﺍﻟﻠﻲ ﺳﻤﻌﻪ ﻣﻦ ﻋﺮﻭﺑﻪ ﻭﻧﻜﺮﺕ ﻭﺣﻠﻔﺘﻠﻪ ﻭﻫﻮ ﺻﺪﻗﻬﺎ ﻟﻜﻦ ﻫﺪﺩﻫﺎ ﺑﺴﻠﻴﻤﺎﻥ ﻭﻗﻌﺪ ﻣﺮﻛﺰ ﻣﻌﺎﻫﺎ .
ﻣﻌﺎﺵ ﺩﻭﺭﺕ ﺳﺎﻟﻢ ﺑﻜﻞ ...
ﺑﺮﻏﻢ ﺍﻥ ﺳﺎﻟﻢ ﺧﺸﺖ ﺩﻣﺎﻏﻪ ﺑﻘﻮﺓ ﻭﺃﺻﺮ ﻳﻘﻌﺪ ﻭﺭﺍﻫﺎ ...
🍃 ﻭﺍﻟﺤﻴﺎﺓ ﻛﺎﻧﺖ ﻣﺎﺷﻴﻪ ﻋﺎﺩﻳﻪ ﻉ ﻏﻴﺮﻫﻢ ﻭﻟﻢ ﻳﻄﺮﺃ ﻋﻠﻴﻬﺎ ﺍﻱ ﺟﺪﻳﺪ ...
ﻏﻴﺮ ﺍﻧﻪ ...
ﺳﻌﻴﺪﻩ ﻭﺯﻳﻨﺐ ﻭﻟﻄﻴﻔﻪ ﻋﺮﻓﻮﺍ ﺟﻨﺲ ﺍﻟﺠﻨﻴﻦ ..
ﺯﻳﻨﺐ .. ﻭﻟﺪ ..
ﺳﻌﻴﺪﻩ .. ﺑﻨﺖ ...
ﻟﻄﻴﻔﻪ .. ﺑﻨﺖ ...
ﺗﻼﻗﻮﺍ ﻓﻲ ﻋﻴﺪ ﺍﻷﺿﺤﻰ ...
ﻭﻫﺎﻟﻤﺮﺓ ﺍﻷﺟﻮﺍﺀ ﻛﺎﻧﺖ ﺍﺭﻳﺤﻴﻪ ﺍﻛﺜﺮ ...
ﻭﺷﻮﻱ ﺷﻮﻱ ﺑﻴﻦ ﺯﻳﻨﺐ ﻭﺳﻌﻴﺪﻩ ﺑﺪﺕ ﺍﻟﻤﻌﺎﻣﻠﻪ ﺗﻮﻟﻲ ﻟﻄﻴﻔﻪ ﺑﻌﺾ ﺍﻟﺸﻲ ..
🍃 ﻭﺍﻫﻲ ﺍﻟﺤﻴﺎﻩ ﻣﺮﺓ ﻫﻜﻲ ﻭﻣﺮﺓ ﻫﻜﻲ ... ﻣﺮﺓ ﺍﺟﺒﺪ ﻭﻣﺮﺓ ﺍﺭﺧﻲ 🍃...
ﺑﻌﺪ ﺍﻟﺸﻬﺮﻳﻦ ...
ﺟﻲ ﺍﻷﺳﺒﻮﻉ ﺍﻟﺜﻘﺎﻓﻲ ..
ﻓﻲ ﺍﺧﺮ ﻳﻮﻡ ﻓﻴﻪ ﺟﻲ ﻳﻮﻡ ﻋﺮﺽ ﺍﻟﻤﺴﺮﺣﻴﻪ ..
ﺍﻟﺪﻳﻜﻮﺭ ﻛﺎﻥ ﻣﻘﺒﻮﻝ .. ﻭﻣﻼﺑﺲ ﻛﺬﻟﻚ ﺗﻔﻲ ﺑﺎﻟﻐﺮﺽ ...
ﺑﺪﻱ ﺍﻟﻌﺮﺽ ...
ﻭﻛﺎﻧﻮﺍ ﺣﺎﺿﺮﻳﻨﻪ ﻃﻠﺒﻪ ﻭﻃﺎﻟﺒﺎﺕ ﻭﺍﻟﻤﺪﻳﺮ ﻭﺍﻋﻀﺎﺀ ﻫﻴﺌﺔ ﺍﻟﺘﺪﺭﻳﺲ ..
ﺟﻤﺎﻝ : ﻣﺎﺗﺘﻮﺗﺮﻳﺶ ﺍﻧﺘﻲ ﻗﺪﻫﺎ ..
" ﺧﻠﻴﻚ ﺍﻧﺖ ﻗﺪ ﺩﻭﺭﻙ ﻣﺎﺩﺧﻠﻜﺶ ﺑﻴﻬﺎ ."
ﻫﻲ ﺭﻓﻌﺖ ﺣﺎﺟﺒﻬﺎ ﻭﻣﺸﺖ ﻭﺧﻠﺘﻬﻢ ..
ﻭﻫﻮ ﻣﻌﺎﻫﺎ ﺑﻌﻴﻮﻧﻪ ... ﻭﻗﻠﺒﻪ ﺑﻴﻬﺒﻞ ﻋﻠﻴﻬﺎ ...💓
ﺷﻮﻳﻪ ﻭﺑﺪﺕ ﻣﺴﺮﺣﻴﺘﻬﻢ ...
ﻛﺎﻥ ﺍﻻﺩﺍﺀ ﺣﻠﻮ ... ﺑﺲ ﺻﺎﺭﺕ ﻓﻲ ﺭﺑﻜﻪ ..
ﻫﺎﻧﻴﺒﺎﻝ ﻛﺎﻥ ﺣﺎﻥ ﻫﻠﺒﻪ ﻟﻌﺮﻭﺑﻪ ﻭﺑﻴﻤﻮﺕ ﻋﻠﻴﻬﺎ ﻭﻳﺒﻴﻬﺎ ﺗﻮﻟﻴﻠﻪ ..
ﻧﻈﺮﺍﺗﻪ ﻟﻴﻬﺎ ﺍﻟﻠﻲ ﻛﺎﻧﺖ ﺣﻠﻮﺓ ﺑﺎﻟﻤﺮﺓ ... ﻣﺨﻠﻴﺘﻬﺎ ﺗﺘﻤﺎﺳﻚ ﻗﺪﺍﻣﻪ ﺑﺎﻟﺴﻴﻒ 💓...
ﺗﻢ ﺍﻟﻌﺮﺽ
ﻭﺍﺻﻮﺍﺕ ﺍﻟﺘﺼﻔﻴﻖ ﻛﺎﻧﺖ ﺣﺎﺭﺓ ...
ﻭﻫﻮ ﻳﺸﺒﺤﻠﻬﺎ ﻭﻫﻲ ﺗﺸﺒﺢ ﻟﻠﺠﻤﻬﻮﺭ ﻭﻋﺎﺭﻓﻪ ﺍﻧﻪ ﻳﺸﺒﺤﻠﻬﺎ ..💗
🍁🍁🍁🍁🍁
ﻃﻠﻌﺖ ﺧﻴﺮ ﻣﻦ ﺳﻠﻮﻡ ﺣﺪﺍﺩ ..
ﺳﺎﻟﻢ ﺑﻀﺤﻜﻪ : ﺗﻲ ﺍﻳﻦ ﺳﻠﻮﻡ ﺣﺪﺍﺩ ﺍﻟﻠﻲ ﺗﺤﻜﻲ ﻋﻠﻴﻪ ﻗﺪﺍﻡ ﻫﺎﻧﻴﺒﺎﻝ .
ﻫﺎﻧﻴﺒﺎﻝ : ﺑﺎﻫﻲ ﻳﺎﺳﺮﻛﻢ ﻣﻦ ﺍﻟﻘﻄﺎﻑ ﺍﻟﻔﺎﺭﻍ ﻭﻫﻴﺎ ..
ﺿﺤﻜﻮﺍ ﻋﻠﻴﻪ ....
🍁 ﻃﻠﻌﻮﺍ ﻣﻦ ﺍﻟﻤﺪﺭﺳﻪ .. ﺷﺒﺢ ﺟﻬﺔ ﺍﻟﺒﻨﺎﺕ ﻟﻘﺎﻫﺎ ﻭﺍﻗﻔﺔ ﺗﻬﺪﺭﺯ ﻣﻊ ﺻﺎﺣﺒﺎﺗﻬﺎ ..
ﺗﻨﻬﺪ ... ﻭﺷﺒﺢ ﺍﻟﻘﺪﺍﻡ ﻭﻛﻤﻞ ﻃﺮﻳﻘﻪ ﻣﻊ ﻭﻟﺪ ﻋﻤﻪ ﻭﺻﺎﺣﺒﻪ ﺍﻟﻠﻲ ﻛﺎﻧﻮﺍ ﻣﺮﻛﺰﻳﻦ ﻣﻌﺎﻩ ..
ﺳﻠﻴﻤﺎﻥ : ﻧﻌﺪﻭﺍ ﻟﻠﻮﺭﺷﻪ ..
ﻫﺎﻧﻴﺒﺎﻝ : ﻳﺎﺭﻳﺖ ..
ﺳﺎﻟﻢ : ﻫﻲ ﻣﺎﻝ ﺍﻧﻲ ﻧﺨﻠﻴﻜﻢ ... ﺍﻟﺴﻼﻡ ﻋﻠﻴﻜﻢ ...
ﺍﻟﺰﻭﺯ ﺭﺩﻭﺍ : ﻭﻋﻠﻴﻜﻢ ﺍﻟﺴﻼﻡ ....
ﻭﻛﻤﻠﻮﺍ ﻃﺮﻳﻘﻬﻢ ﻟﻠﻮﺭﺷﻪ ...
🍁🍁🍁🍁🍁
ﻣﺮﻭﺣﺎﺕ ﺑﻄﺮﻳﻘﻬﻢ ﻟﻠﺤﻮﺵ ...
ﻏﺎﻟﻴﻪ : ﻳﺎﺭﻳﺘﻬﺎ ﻣﺎﻛﻤﻠﺖ ﻳﺎﻗﻌﺎﺩﻧﺎ ﻣﻜﺴﺪﻳﻦ ..
ﺣﻤﻴﺪﻩ ﺗﻨﻬﺪﺕ : ﺻﺢ .. ﻟﻜﻦ ﺗﻌﺮﻓﻲ ﺍﺣﺴﻦ ﺣﺎﺟﻪ ﺍﻓﺘﻜﻴﻨﺎ ﻣﻦ ﺳﻌﻴﺪﻩ ﻓﻬﺎﻟﺸﻬﺮﻳﻦ ﻭﻛﻤﻠﻨﺎﻫﺎ ﻣﻦ ﻏﻴﺮ ﻣﺸﺎﻛﻞ .
ﺣﻤﻴﺪﻩ : ﺯﻋﻢ ﺣﻖ ﺣﻤﻠﻬﺎ ﻫﺪﻯ ﻭﺍﻋﺮ ﻭﻻﻏﻴﺮ ﺗﺒﻠﻌﻂ ..
ﺣﻤﻴﺪﻩ : ﺍﻟﺤﻖ ﻳﺎﺭﺑﻲ ﺣﺴﻴﺘﻪ ﻭﺍﻋﺮ ﻭﺟﻬﻬﺎ ﺩﻳﻤﻪ ﺍﺻﻔﺮ ﻭﻳﺒﺎﻥ ﻋﻠﻴﻬﺎ ﺍﻟﺘﻌﺐ ..
ﻭﻫﻤﺎ ﻣﺎﺷﻴﺎﺕ ﻓﺎﺗﺖ ﻣﻦ ﺣﺪﺍﻫﻢ ﺍﻟﺴﻴﺎﺭﻩ ﺍﻟﻠﻲ ﻓﻴﻬﺎ ﻛﺎﻥ ﻣﺮﻛﺰ ﺑﻨﻈﺮﻩ ﻉ ﺣﻤﻴﺪﻩ ..
ﻏﺎﻟﻴﻪ : ﺣﺴﻦ ﻭﻟﺪ ﻋﻤﻚ ﻭﻻ ..
ﺣﻤﻴﺪﻩ : ﺍﻳﻪ ﻫﻮ ...
🍁🍁🍁
ﺍﻟﺴﺎﻋﻪ 2 ﻇﻬﺮﺍ ..
ﻛﺎﻥ ﻭﺍﻗﻒ ﻳﺼﻠﺢ ﻓﻮﺣﺪﻩ ﻣﻦ ﺍﻟﺴﻴﺎﺭﺍﺕ ..
ﻛﺎﻥ ﻻﻫﻲ ﺑﻴﻬﺎ .. ﺑﺲ ﻣﺮﺓ ﻣﺮﺓ ﺗﺨﻄﺮ ﻋﻠﻴﻪ ﻭﻳﻘﻌﺪ ﻏﻴﺮ ﻳﺘﻨﻬﺪ 💓..
ﺷﻮﻳﻪ ..
ﻭﺧﺸﺖ ﺳﻴﺎﺭﺓ ﺩﺭﺳﺖ ﺟﻨﺒﻪ ...
ﻧﺰﻝ ﻣﻨﻬﺎ ﺻﺎﺣﺒﻬﺎ ﻭﻃﻠﻖ ﺍﻟﺴﻼﻡ ...
ﺟﺎﻩ ﺻﺎﺣﺐ ﺍﻟﻮﺭﺷﻪ ...
: ﺗﻔﻀﻞ ﺷﻦ ﻣﺸﻜﻠﺘﻬﺎ ...
ﺻﺎﺣﺐ ﺍﻟﺴﻴﺎﺭﺓ ﻭﺯﻉ ﻧﻈﺮﻩ ﻋﻠﻰ ﻣﻜﺎﻥ ﻭﺟﺖ ﻋﻴﻨﻪ ﻉ ﻫﺎﻧﻴﺒﺎﻝ ﻗﺎﻝ ﺑﺼﻮﺕ ﻣﺴﻤﻮﻉ : ﺍﻧﻲ ﺟﺎﻱ ﻟﻠﺸﺎﺏ ﻫﺪﺍﻙ ..
ﺳﻠﻴﻤﺎﻥ ﻭﻫﻮ ﻳﺼﻠﺢ ﻓﺴﻴﺎﺭﺓ ﺗﺎﻧﻴﻪ ﻗﺎﻡ ﻋﻴﻮﻧﻪ ﻭﺍﻧﺼﺪﻡ ﻟﻤﺎ ﺷﺎﻑ ﺍﻟﻠﻲ ﻳﺘﻜﻠﻢ .
ﺻﺎﺣﺐ ﺍﻟﻮﺭﺷﻪ : ﻫﺎﻧﻴﺒﺎﻝ ..
ﻫﺎﻧﻴﺒﺎﻝ ﺭﻓﻊ ﻋﻴﻮﻧﻪ .... ﺍﻟﻠﻲ ﺗﻮﺳﻌﻮﺍ ﺑﺼﺪﻣﻪ ﻟﻤﺎ ﺷﺎﻑ
ﻫﺎﻳﻞ ﻭﻟﺪ ﻋﻢ ﻋﺮﻭﺑﻪ ....
..... ﻳﺘﺒﻊ ....
ﺍﻟﺠﺰﺀ ﺍﻟﺠﺎﻱ ﺑﺈﺫﻥ ﺍﻟﻠﻪ 🔥🔥
