المتمردين

العشق المتمرد

#العشق_المتمرد "اختبار"

#جمان_فريد

باقي التكمله..

❤هديكا الليله
طبعا حتكون اجمل ليلة لرباب ومؤنس💓
🍁بس كانت ع باقي الناس غادي مختلفه بإختلاف أحوالهم..
ليلة فيها العاشق المفارق..
متعذب بنار الغيرة والشوق..
وخايف..خايف هلبه..طول الوقت قلبه قابضه..
مايبيش يتخيل ان حب عمره ممكن تكون لغيره..
لايمكن...مستحيل..
باهي علاش مستحيل!؟
كل حد راح في حاله..
يعني طبيعي جدا تشوف حياتها مش حتوقف عنده ولا هي ملك مسجل بإسمه ماحد يحقله ياخده منه..
باهي هو يقدر ينهي هدا كله لو رجع شد يدها وتجاوزوا اللي صار كله مع بعض وينسوا..
لكن هو لو سامحها وعدى اللي داراته حيحس وقتها انه رجع تنازل...
باهي خلاص..
مافيش حل قدامه غير انه ينساها لازم ينساها..
بس كيف ينساها!!؟وهي اشبه بالنفس والدم اللي يجري فالعروق...
مايقدرش ينساها الا فحاله وحده بس لو حول قلبه من صدره ولوحه وراه..
وهدا شي مستحيل..
ومابطلش عقله تفكير طول ماهو واقف ع الجرف ويشوف جهة الأضويه اللي تبان عليه من ورا الوادي..
غمض عيونه وقال:يااارب...💔
تنهد..
بعدين فتح عيونه مرر نظره حواليه..بعدين..
لف ومشي..
فات من حدا الخيمه وكمل طريقه متوجه لفم البوابه..
وصل في الممر..
خشله..
وصل في البوابه..
وخش..
بيمشي الكوجينه وقف لما سمع صوتها وهي تهدرز..
رزان:الله يهبل..
رفقه وهي توريلها في فيديو:معاش يديروا فيها هلبه وفي من قاللها موضتها قديمه الحركه هادي..لكن هي مادورتش خاطرها فيها دارتها..
رزان:في حاجات مفروض يطلعوهن من جو قديم وجديد كيف الحركه هدي..الله..محلاها..عروس وتركب الكروسه مع عريسها وادور في شوارع طرابلس..حاجات كيف هدي فيهن جو خاص ليهن رونق مفروض مايربطوهن بالموضه..
رفقه بإبتسامه:تعرفي زدتي دخلتيها فراسي ..تنهدت وقالت..كان ربي كتبلي نصيب حيكون هدا شرطي الوحيد..
رزان ابتسمت بألم وقالت:اني مش من هل طرابلس حاجه كيف هدي ولت بعيده عني واجد واجد.
رفقه:ماتندريش مرات يجيك نصيب من غادي..
رزان شبحتلها وقالت:مش عارفه كيف انتي وحدهم تحكن هكي عادي وكأن ماصار شي ومافي شي..
رفقه:لا مانحكوش عادي رزونه حني نبوك تنسي وماتوقفيش حياتك عنده..اعتقد ريتي بعينك حاجات تبينلك ان عماد خلاص نساك وطلعك من قلبه..
نزلوا دموع رزان :رفقه!!كلامك سم راهو!..
رفقه :كلامي حق..اني مانبيكش تقعدي تتاملي ع الفاضي لين يجيك نهار وتحصلي منه كف..رزان انسي خلاص ..
ماكانش عند رزان رد ع اللي سمعاته غير انها تبكي وخلاص..
ورفقه حداها تشوفلها وهي تبكي وواجعها قلبها عليها وماقالتلها هالكلام الا لأنها تبيها معاش تتأمل فيه اكثر وتنصطدم بعدين لما يخيب أملها...
💔وهو لأنه مايتحملش يسمعها ولايشوفها تبكي..
قرر ينسحب بهدوء ويطلع دون مايحسوا بيه..
بس لما جي بيطلع ..
سمع اصوات هدرزة خالاته وهما جايات للحوش..
غاليه:حماة عزيزة الكبيرة ولدها كابتن طيار..
حميده:طيار مرة وحده!!عليك حظ عندها هالفرخه..واليوم ياحنه سمعت سدينه بنت رهيما تكلم فسعيده عنها تبيها ليونس ولدها..دكتور فبريطانيا هداكا..
غاليه:تقول كانوا يراجو فيها تفسخ..
خشوا الزوز..
فاتوا من حدا الكوجينه..
لمحاته حميده واقف فيها ويشرب:عماد..
غاليه خشتله داخل وقالت:تبي حاجه!!
عماد وهو عاطي بالظهر نزل الطاسه حطها وقال:ميه بس..
ومشي من حداهم وطلع من الحوش مرة وحده..
حميده شبحت لغاليه وقالت:ماحد يقعد ع حد..
غاليه قعدت تشوفلها بضيق وساكته..
حميده مشت خشت داخل..
وغاليه تنهدت..
ومشت طلعت من الكوجينه..
خشت داخل..
مشت للدار اللي ترقد فيها بش بتغير..
لما خشت..
لقت رزان ورفقه راقدات فيها..
ابتسمت..
بعدين طلعت وخلتهم..
🍁🍁🍁🍁
تاني يوم..
الساعه 10:00صباحا..
مقعمزين حدا بعض..
حاضنها..
وجهه ووجهها مقابلين بعض..
جبهته ملامسه جبهتها...
وانفه ملامس انفها..
الزوز كانوا ساكتين ومخلين مشاعرهم هي اللي تحكي بس💓
بعد لحظات..
تكلم وقال..
مؤنس بصوت هادي:رباب..
رباب وهي مغمضه عيونها:اممم..
مؤنس ابتسم وقال بهمس:نحبك💓
هي ابتسمت وقالت بنفس الهمس:نموت فيك💓..
مؤنس بضحكه:خاطري فحاجه!..
رباب فتحت عيونها وقالت:اللي هي ؟
مؤنس باس خشمها وقال:تعرفي اديري عصيده!؟
رباب:ههههههههههه..
ومؤنس يضحك..
رباب بضحكه:من لما قتلي ديريلي قهوة واني حسيتك تبي حاجه تانيه..
مؤنس بضحكه:باهي شنو تقدري ديريها؟
باساته من خده وقالت:ايه..
ناضت..
هو شد يدها وباسها..
هي ابتسمت..وقربت باست راسه..
بعدين بعدت ومشت للكوجينه..
تنهد من قلبه وهو يشوفلها بعدين ناض وقال:ايه خل نوريك حاجاتها وين..
رباب من الكوجينه:تو نسكتشف بروحي..
مؤنس:واهي روحك جت تسكتشف معاك..
ضحكت رباب..لما خش عليها..باسها من خدها..
بعدين شبح حواليه تبت انظاره ع واحد من الدواليب وقال:ترا نشوفوا هنى ..
مشت للدولاب وفتحاته لقت قدامها طنجرة ستيل :ايوه هادي اول شي..
حطتها ع الدولاب اللوطاني..حولت المغطى..
لفت انتباهها شي غريب محطوط فيها..
رباب:هدا شنو!؟
حطت يدها فيها وطلعت منها..
زوز تذاكر سفر..
فتحت عيونها ع وسعهم والتفتتله..
مؤنس بضحكه:شور مصر..بنعدوا مع هلي..يعني..شهر عسل..
رباب قعدت تضحك..
مؤنس بضحكه:مفاجأة سمحه!؟
رباب هدت ضحك وقالت:هي سمحه..لكن الطريقه  هههههههه..قامت الطنجره..
مؤنس:ههههههه..كنت نبيها تكون مميزة بس..
رباب بضحكه:مميزة لين فايت فيها...سكتت وقالت برفعة حواجب..مازال تبي عصيده!!
مؤنس ضحك وخداها فحضنه..
وهي حضناته وقالت:نحبك أنوسي 💕💕
مؤنس ضحك برفعة حواجب ع الإسم اللي ناداته بيه...💓
🍁🍁🍁🍁🍁
اهل سرت ناويين يتسقدوا العشيه لمصراته..
بيسافروا صبح السبت عن طريق مصراته..
ايه لاغرابه في الأمر..
عادي جدا...
روابط قديمه تجمعهم..روابط اقوى بهلبه من التوجهات السياسيه هي اللي مخليه الود والمعزة موجودين..
برغم كل شي..
حتى اللي صار توا...
حيجي يوم وهالروابط حتتجاوز كل هالعداء والتشتت..
ويرجع العدو حبيب..
حيجي هاليوم حتى لو بعد مية عام مؤمنه إيمان تام انه حيجي..
🍁🍁🍁
احسن..
ضحك مالك..
عماد غير عيونه عنه وهو شاد ضحكته وملامح الحده مازال ع وجهه..
مالك:هي نمشوا نسلموا عليهم..
شبحله وقال:هما المروحين هما اللي يجوا يسلموا..
مالك بإبتسامه وهو يشوف لخوه ع جنب:لا مش لهالدرجه..
ومشي جيهتهم..
عماد ماباش يتزحزح خطوة وحده..
واقف وحاط ايديه ورا ظهره وهو يشوفلهم كيف يسلموا ع بعض..
غير عيونه جهة باب العماره..
لقي النساوين طالعات..
وحناه معاهم ويهدرزوا..
شويه وطلعوا خالاته وامه ومرت خاله والبنات من الحوش..
ومن بينهم رزان..
نزلوا ومشوا يسلموا ع النساوين..
قعد بعيونه يراقب فرزان وأصيل..
اصيل كان لاهي مع رجاله يسلم..
فجأة..
عيونه جو فعيون عماد..
عماد طول غيرهم وشبح لرزان..
ابتسم اصيل..
وانسحب من حدا الرجاله وتوجه لعماد..
عماد شبح بطرف عينه جيهتهم لقاه جاي..
رقتله ..
وصل فيه اصيل..
اصيل بتضييقة عيون وهو مبتسم وقال:خيرك مصبي بعيد!؟ان شاء الله غير مش مزعلينك ولا دايرلك حاجه ضايقاتك بس!؟
عماد ضيق وعيونه وقال بشي من الكبر:تس..
اصيل بضحكه:ياودي حتى كان انتي ماتبي تسلم حني نسلموا عليك مهما كان ليك عندنا جميل ماينتسى...مد يده وقال..هي بالسلامه..
شبحله عماد بحده ومد يده وصافحه...
ابتسم اصيل ابتسامه جانبيه..
عماد وقتها كان خاطره يعطيه بوني ع فمه بش يفش غله كله ..
ولانه شي زي هدا صعب..فقرر يدير حركه غيرها..
شد ع يد أصيل بقوة..
اصيل شد ع يده وهو مبتسم بإستفزاز...
ينجح في استفزازه ويزيد عماد يشد ع يده..
واصيل يزيد يشد اكثر وابتسامته مازالت ع وجهه..
من بعيد شوي..
حمزه بضحكه:لصقوا ايديهم فبعض..
عمر بضحكه:شن القصه..
مالك بصوت واطي:ابو الحروف تجاوز حده..
شبحوا عمر وحمزة لمالك وهما يضحكوا بإستغراب..
اصيل:سلامك حار..
عماد ابتسم سخرية وقال:بش تزيد تتأكد انكم مازعلتوناش..
طلق عماد يد اصيل..
اصيل حط يده فجيبه وقال بإبتسامه جانبيه:ريحتني..
تلفت جهة النساوين لقي رزان تشوفلهم..
ابتسم..
ومشي بطريقه للرجاله..
عماد قعد معاه بعيونه اللي يقدحوا شرار..
شبح لرزان لقاها مغيره عيونها عنه..
غمض عيونه بعصبيه بعدين فتحهم ومشي للرجاله..
فات من حدا اصيل..
اصيل شبحله ع جنب برفعة حاجبه اليسار..
وعماد شبحله بنظرة غضب كلها وعيد..
بعدين شبح القدام..
ضحك اصيل نص ضحكه..
رجع شاف جهة النساوين..
شبح لرزان وهي تسلم ع امه..وقف وهو يشوفلهم بإبتسامه..
وفي من يسرقله في نظرات الإعجاب..
رانيا:مريومه..
مريم شبحتلها؛هااه..
رانيا ضحكت..
مريم وجهها ولا احمر وابتسمت بخجل..
...
اسمعي كلميني فكل وقت ايوه..
رباب بضحكه وهي شاده دموعها:حاضر زنوبتي..
زينب ضحكت وهي شاده دموعها..
من بعيد شويه..
مختار:هي ياعيله..
كامله :هي هي...باست اسيا..وعطتها لأمها وقالت..ان شاء الله ع العام الجديد في العطله نجوا ونقعدوا..
دلال بدموع:نراجو فيكم...
كامله:ردي بالك من عويلتك وقرايتك بنتي..
دلال هزت راسها بإيجاب وقالت:حاضر..
حضنتها كامله واسيا تشبحلهم..
وخرت كامله وقالت بدموع:هي بالسلامه يافاطمه ويامبروكه وياحدهم..بالسلامه يابنات..
كلهم قالوا بأصوات متقطعه:بالسلامه..فامان الله..
مشت كامله ووراها بناتها وهندا ورباب والصغار..
قعدوا واقفين يشوفولهم..
وفاطمه معاهم تسقد فيهم..
وصلوا للسيارات وبدوا يركبوا..
زينب حاسه قطعه من روحها مشت معاهم..
تبلع فريقها وتحاول تتماسك..
بعد ركبوا كلهم..
النساوين مشوا لدروج حوش ميلاد وركبوا...
والسيارات تحركت..
اصيل دار كلاكس..
كلهم دارو معاهم..
مشت سيارة مختار الاولى وتبعوها الباقي..
اصيل لما جي فايت شبح لعماد ابتسم ورفع يده لمستوى جبهته حياه..
عماد ابتسم من فوق نفسه..
حط يده ع الدومان وهو يضحك..
وكانت مريم مركزة عليه تركيز تام لعند مافاتت سيارته من قدامها..
مريم"يجنن💓"..
🍁طلعوا السيارات برا القطعه من الخلف...
سند:ماقعدتش بروحك راهو..
توفيق:في المحل يوماتي تعال..
ايمن ضحك وهز راسه بإيجاب..
وحدهم.تشوفله وهي مبتسمه..
🍃قعد ع خاطر قرايته🍃
🍃🍃🍃🍃
وع خاطر القرايه..
كلهم روحوا اليوم اللي بعده العشيه بعد ضموا لسعيده حوشها كله...
قبل لتركب زينب السيارة...
كانت واقفه ع خوها ومرته..
زينب:لاخر يوم فعمري ماناسيتلكم هالجميل..
ميلاد شبح لسعيده وقال:نضربها!
سعيده:تبيها..
زينب:ههههههه..
حضنها.ميلاد وقال:اختي راك وبنتك بنتي..
سعيده:وهدى حوشه هو لو في من ليه عليك جميل فهو خوك مش اني..
شدت زينب يده سعيده وهي مبتسمه...
بعدها ميلاد وقال:هي عدي خيري يراجي..
ابتسمت باست يدها وحطتها ع جبهته..
هو ضحك..
زينب بضحكه بعيون مدمعه:نردهولكم ففرح رمزي..
ميلاد:فرحنا جميع هداك..قولي في الأخرين..
ضحكوا سعيده وزينب..
بعدين قالت زينب:إن شاء الله..هي بالسلامه..
ولفت ومشت وهي تسمع في ميلاد وسعيده يقولوا :في امان الله...
زينب وهي تمرر فنظرها ع خوتها"عزوة ربي مايحرمني منكم"
ركبت السيارة..
وتحرك خيري..
وبعده سعد..
وبعده عبدالسلام..
وبعده حميد...
وبعدهم الولاد..
وخوت خيري...
وفاطمه وولادها ماشيين وراهم يسقدوا فيهم..
لعند ماطلعوا من القطعه...
فاطمه:استودعناكم ربي...
لفت ومشت للزريبه..
وولادها كل واحد مشي فجهة...
فم الحوش..
لمياء:خيي مانحبش الكساد بعد اللمه والدوشه..
سميه:زيك..
غاليه بضيق:من يحبهن..تنهدت وقالت..تعالن خشن..
خشت غاليه وخشوا وراها..
مشوا للدار..
وغاليه وهي ماشيه للكوجينه شافت لحميده اللي كانت مقعمزة فالدار وسارحه..
قلبها انقبض..
طول غيرت عيونها وكملت طريقها...
🍃🍃🍃
وعدوا يومين..
هاديين..
هدوء مش طبيعي..
هدوء!!
تس...القلب انقبض.!!
🍁يوم الآثنين..
الساعه 5:30عصرا..
قدام مستراح الحوش القديم..
خليفه:محاميه ممتازة يالهادي..
ميلاد:وبعدين قضايا كيف هدي النساوين فيها خير من التريس..
الهادي:مش مهم مراه ولا راجل المهم محامي كويس يخلصنا بسرعه ويجيبلها حقوقها كلهن..
خليفه:اطمن من الناحيه هدي..خلال سنه بس يكون كل شي منتهي..
الهادي:إن شاء الله...
🍃ع خشة سيارة الصديق من فم القطعه..
التفتوا وشبحولها..
الهادي :شن جاي يبي هدى..
ميلاد قدمله..
درس الصديق..
فتح الباب..
ونزل...
شبح لخوتها ..
حول نظاراته وقال:ترا قالوا لحميده اني جيت خل تسقد روحها..
الهادي جمد فمكانه..
ميلاد بتضييقه عيون قال وهو مزردي:شن تخترف!!
ع جية عمر ومحمد..
محمد طول قدمله وقال بغضب:شن جاي تبي ياكلب انت!!
ميلاد:محمد!!
محمد بعصبيه:ماتسكتنيش..الكلب هدى شن عنده هنى!!
ابتسم تهكما وقال:عندي مراة وبنت..
قدمله محمد بكل غضب..
شده عمر:محمد..
محمد:خلوني عليه الوسخ هدى نوريه مرته وبنته شن شكلهن..
خليفه بحده:من الأخير ليش جاي!
شبحله برفعة حواجب ..
داخل..
غاليه بتوسل:حميده تربحي ياحميده..وخيتي ماديرها فعمرك وخوتك..
حميده:والنبي خليني..خلوني..نبي نربي بنتي مع بوها خلوني..
غاليه بدموع وهي شاده يدها:تربيها هنى احسن تربيه..
جبدت حميده بقوة..
وشدت بنتها ومشت طلعت بسرعه..
"تحملي اللي اخترتيه "
وقفت شويه لما سمعت كلمة امها..
بعدين مشت فيسع..
برا..
الصديق بعد ماشبح لخليفه..
غير عيونه للباب لما سمع صوت بنته تقول ..
"بابا"..
ضيق عيونه..
وقلبه انتخص بقوة..
البنت مشتله تجري...
وامها وراها..
تمشي بسرعه وهي شاده شنطتها وعيونها لوطا...
تفوت من حدا خوتها..
وخوتها في هالحاله  كانوا وكأنهم أعمده كانت قويه متينه..
وهي المعول اللي قعد يهد فيها..
عمر ..
كان يشوفلها بأسف...وحاس روحه فشل تماما..
ميلاد..
وجهه تجعد..لما حس بوجع فقلبه..
من طعنه اخته القاضيه..
اما محمد..
وهو مصدوم مشالها شدها وقال بصوت مبحوح:وين ماشيه!!
حميده وهي ترعش قالت بكلام سريع:نبي نربي بنتي بنتي نبي نريبها..
جبدت يدها بقوة من يد خوها اللي كانت من هول الصدمه ترجف..
وكملت طريقها وهي تجري..
وصلت في الباب قامت عيونها جو فعيون خليفه اللي كان يشوفلها بألم..
شبحتله بحقد..
فتحت الباب وركبت..
الصديق وهو حاضن بنته..
مرر نظره عليهم وهو مبتسم بشماته..
ركز بنظره ع الهادي ..
بعدين لبس نظاراته..
وركب ببنته...
صكر الباب..
عطاها لأمها..
وشغل السيارة..
وتحرك طول وهو فقمة نشوة الإنتصار..
وخر بالسيارة ولف وطلع من القطعه..
ميلاد بغضب:معاد عندي اخت اسمها حميده..
لو نشوفها قدامي والعه فيها النار نغير عيوني عنها ونعدي..
مشي طول وهو يبلع فريقه وحاط يده  ع صدره لانه يتوجع..
اما عمر من سكات لف ومشي بطريقه لسيارته..
محمد...
نزلت من عينه دمعه..
قعد يمشي..
ويمشي ويمشي..
لعند ماطلع من القطعه وهو مش حاس بروحه..
اما خليفه..
مشي من الجهة التانيه وهو موجوع..
متوجه لحوش اهله...
ماقعد حد غير...
الهادي...
اللي مازال قاعد واقف فمكانه ومصدوم..
وعيونه مازالوا ع بوابه القطعه اللي طلعت منها حميده بعد كسرتهم واحد واحد...

...يتبع...