#العشق_المتمرد
باقي الحلقة 68
🍁🍁
ﻃﺮﺍﺑﻠﺲ ..
ﺍﻟﺴﺎﻋﻪ 10:00 ﻟﻴﻼ ..
ﻓﻲ ﺣﻮﺵ ﺳﻴﻔﺎﻭ ﺻﺪﻳﻖ ﻋﻤﺎﺩ ..
ﺳﻴﻔﺎﻭ : ﺧﻼﺹ ﻳﺎﺭﺍﺟﻞ ﺍﻟﻨﺎﺱ ﻓﺪﺕ 41 ﺳﻨﻪ ﺷﻦ ﺩﺍﺭ ﻓﻴﻬﻢ ﻭﻻﺷﻦ ﺭﻳﻨﺎ ﻣﻨﻪ ..
ﻋﻤﺎﺩ : ﺷﻦ ﻧﺎﻗﺼﻚ ﺑﺎﻫﻲ ﻳﺎﺳﻴﻔﺎﻭ ﺭﺑﻲ ﻓﺎﺗﺢ ﻋﻠﻴﻚ ﻣﻦ ﻭﺍﺳﻌﻪ ..
ﺳﻴﻔﺎﻭ : ﻧﺎﻗﺼﻨﻲ ﺑﻼﺩ ﻳﺎﻋﻤﺎﺩ .. ﺑﻼﺩ ﺯﻱ ﺍﻟﻠﻲ ﻧﺸﻮﻓﻮﺍ ﻓﻴﻬﻢ ﻟﻤﺎ ﻧﺴﺎﻓﺮﻭﺍ ... ﺷﻦ ﻧﺎﻗﺼﻬﺎ ﺑﻼﺩﻧﺎ ﺑﺶ ﻣﺎﺗﻮﻟﻴﺶ ﺯﻱ ﺍﻟﻤﺎﻧﻴﺎ ﻭﻻ ﺯﻱ ﺗﺮﻛﻴﺎ .. ﺗﺮﻛﻴﺎ ﺭﻳﺘﻬﺎ ﺗﺮﻛﻴﺎ .. ﺍﺳﻄﻨﺒﻮﻝ ﺍﻟﻠﻲ ﻧﺪﻭﺭﻭﺍ ﻓﻴﻬﺎ ﺑﺄﺳﺒﻮﻉ ﻭﺍﺳﺒﻮﻋﻴﻦ .. ﻫﺎﺩﻱ ﻓﻲ 1996 ﻛﺎﻧﺖ ﻣﺎﺗﻨﺎﺷﻔﺶ ﻣﻦ ﺍﻟﻜﻨﺎﻳﺲ
ﺷﻮﻓﻬﺎ ﺗﻮﺍ ﻛﻴﻒ ﻭﻟﺖ .... ﺍﻟﻤﺸﻜﻠﻪ ﺑﻼﺩﻧﺎ ﻓﻴﻬﺎ ﺧﻴﺮ ﻳﺎﺧﻴﺮ ﻭﺣﺎﻟﻬﺎ ﺯﻱ ﺣﺎﻝ ﺍﻟﺼﻮﻣﺎﻝ ..
ﻋﻤﺎﺩ : ﻻ ﻋﺎﺩ ﻣﺶ ﻟﻬﺎﻟﺪﺭﺟﻪ ﻳﺎﺳﻴﻔﺎﻭ ..
ﺳﻴﻔﺎﻭ : ﻋﻨﺪﻙ ﺣﻖ ﻳﺎﻋﻤﺎﺩ ﻣﻦ ﻳﻮﻡ ﻳﻮﻣﻚ ﻋﺎﻳﺶ ﻓﻲ ﻧﻌﻤﻪ ﻭﻣﺶ ﺷﺎﻳﻒ ﺷﻦ ﻗﺎﻋﺪ ﻳﺼﻴﺮ ﻣﺶ ﻭﺍﻋﻴﻠﻪ ..
ﻋﻤﺎﺩ : ﺳﻴﻔﺎﻭ ﺳﺎﻣﺤﻨﻲ ﺍﻧﺖ ﻭﺍﺧﺪ ﺍﻟﻤﻮﺿﻮﻉ ﺑﺤﺴﺎﺳﻴﻪ ..
ﺳﻴﻔﺎﻭ ﺍﺑﺘﺴﻢ : ﻗﺼﺪﻙ ﻹﻧﻲ ﺍﻣﺎﺯﻳﻐﻲ .. ﺍﻳﻪ ﺻﺢ ﻫﺎﺩﻱ ﻭﺣﺪﻩ ﻣﻦ ﺍﻻﺳﺒﺎﺏ .. ﻃﻤﺲ ﻫﻮﻳﺘﻨﺎ ﻭﻟﻐﻲ ﺛﻘﺎﻓﺘﻨﺎ .. ﻟﻜﻦ ﻣﺶ ﻫﺪﺍ ﺳﺒﺒﻲ ﺍﻟﻮﺣﻴﺪ .. ﺍﻧﻲ ﺣﻘﺎﻧﻲ ﻳﺎﻋﻤﺎﺩ ﺑﻼﺩﻧﺎ ﻣﺎﺭﺗﺶ ﺧﻴﺮ ﻣﻊ ﺍﻟﻘﺬﺍﻓﻲ ..
ﻋﻤﺎﺩ ﺍﺑﺘﺴﻢ ﺑﺘﻬﻜﻢ ﻭﻗﺎﻝ : ﻳﺎﻭﺩﻱ ﺑﺎﻫﻲ ... ﻧﺎﺽ ..
ﻭﺳﻴﻔﺎﻭ ﻧﺎﺽ ﻣﻌﺎﻩ : ﻋﻤﺎﺩ !!
ﻋﻤﺎﺩ : ﻫﻲ ﺗﺼﺒﺢ ﻉ ﺧﻴﺮ ..
ﻭﻟﻒ ﻭﻣﺸﻲ ...
ﺳﻴﻔﺎﻭ ﻣﺸﻲ ﻭﺭﺍﻩ ﻭﻗﺎﻝ : ﺑﺮﺍﺣﺘﻚ ﻳﺎﻭﻟﺪ ﺍﻣﻲ ..
ﻭﺻﻠﻮﺍ ﻓﻲ ﺍﻟﺒﺎﺏ ﺍﻟﺒﺮﺍﻧﻲ .. ﻓﺘﺢ ﻋﻤﺎﺩ ﺍﻟﺒﺎﺏ ﻭﻃﻠﻊ ..
ﻭﺳﻴﻔﺎﻭ ﺻﻜﺮﻩ ﻭﺭﺍﻩ ..
ﺣﺮﻙ ﺭﺍﺳﻪ ﺍﻳﻤﻴﻦ ﻭﻳﺴﺎﺭ ... ﻭﺧﺶ ﺩﺍﺧﻞ ..
🍃 ﻛﺎﻥ ﻋﺎﺭﻑ ﺳﻴﻔﺎﻭ ﺍﻥ ﻋﻤﺎﺩ ﺧﺎﻳﻒ ﻟﻮ ﺻﺎﺭ ﺷﻲ ﻓﻲ ﺍﻟﺒﻼﺩ ﻣﺼﺎﻟﺤﻪ ﻭﺧﺪﻣﺘﻪ ﻳﻮﻗﻔﻮﺍ 🍃
🍁🍁🍁🍁🍁
ﻭﺗﻮﺍﻟﺖ ﺍﻷﻳﺎﻡ ..
ﻭﺍﻟﺤﻜﺎﻳﻪ ﺗﻜﺒﺮ ﻣﺎﺗﺼﻐﺮﺵ ..
ﻭﻛﺘﻴﺒﺔ ﺍﻟﻔﻀﻴﻞ ﺍﻟﻠﻲ ﺑﺎﻳﻦ ﺍﻥ ﺍﻓﺮﺍﺩﻫﺎ ﺧﺪﻭ ﺍﻭﺍﻣﺮ ﺑﻜﺒﺢ ﺟﻤﺎﺡ ﺍﻟﺤﺮﺍﻙ .. ﻭﻗﺘﻠﻪ ﻓﻲ ﻣﻬﺪﻩ ..
ﻏﻀﺐ ﺍﻫﻞ ﺍﻟﻤﺪﻳﻨﻪ ﺧﻼﻫﻢ ﻳﻜﺒﺤﻮﺍ ﺟﻤﺎﺣﻬﻢ ﻫﻤﺎ ..
ﻭﺍﻗﺘﺤﻤﻮﺍ ﺍﻟﻜﺘﻴﺒﻪ ...
ﻭﻷﻥ ﻓﻲ ﻧﺎﺱ ﺩﺧﻴﻠﻪ ﻛﺎﻧﺖ ﺗﺮﺍﺟﻲ ﻓﻲ ﺍﻟﻔﺮﺻﻪ ﺍﻟﺴﺎﻧﺤﻪ ﺑﺶ ﺗﺨﺶ ﻓﻲ ﺍﻟﺤﺮﺍﻙ ..
ﺣﻮﻟﺖ ﺍﻟﺤﺮﺍﻙ .. ﻟﻤﻮﺍﺟﻬﺎﺕ ﻣﺴﻠﺤﻪ ..
ﻭﺍﻟﻤﻮﺍﺟﻬﺎﺕ ﻫﺎﺩﻱ ﺍﺳﻔﺮﺕ ﻋﻦ ﺳﻘﻮﻁ ﺿﺤﺎﻳﺎ ...
ﻭﻳﻮﻡ 2011\2\18 ﺍﻧﺘﻬﻲ ﺑﺨﺮﻭﺝ ﺑﻨﻐﺎﺯﻱ ﻋﻦ ﺳﻴﻄﺮﺓ ﺍﻟﻘﺬﺍﻓﻲ ..
ﺑﻌﺪ ﻃﺮﺩ ﺍﻟﺴﺎﻋﺪﻱ ﺍﻟﻘﺬﺍﻓﻲ ﻣﻨﻬﺎ ﻉ ﺃﻣﻞ ﺍﻧﻬﺎ " ﻳﺤﺰﻫﺎ "
ﺑﺲ ﻃﺒﻌﺎ ﺍﻟﺨﺮﻭﺝ ﻋﻦ ﺍﻟﺴﻴﻄﺮﺓ ﻫﺪﺍ ﻛﺎﻥ ﺗﻤﻮﻳﻪ ..
ﻷﻥ ﻓﻲ ﻫﻠﺒﻪ ﻧﺎﺱ ﺗﻨﺘﻤﻲ ﻟﻠﻔﻜﺮ ﺍﻷﺧﻀﺮ ﺗﺤﻮﻟﺖ ﻟﺨﻼﻳﺎ ﻧﺎﺋﻤﻪ ﺍﺧﺘﺎﺭﺕ ﺍﻧﻬﺎ ﺗﻄﻠﻊ ﻣﻦ ﺍﻟﻤﺸﻬﺪ ﻟﻐﺮﺽ ﻓﻲ ﻧﻔﺲ ﺳﺎﺩﺗﻬﻢ ..
ﻭﺑﺪﺕ ﺍﻋﻼﻧﺎﺕ ﺍﻹﻧﺸﻘﺎﻕ ﺗﺘﻮﺍﻟﻰ ...
ﻭﺑﺪﻱ ﺍﻟﻠﻌﺐ ﻉ ﺍﻟﻤﻀﻤﻮﻥ ﻣﻦ ﺩﺍﺧﻞ ﻭﻣﻦ ﺑﺮﺍ ..
ﻣﻦ ﺑﻨﻲ ﺟﻠﺪﺗﻨﺎ ﻭﻏﻴﺮﻫﻢ ..
ﻟﺘﺼﺒﺢ 17 ﻓﺒﺮﺍﻳﺮ ... ﺣﻖ ﺍﺭﻳﺪ ﺑﻴﻪ ﺑﺎﻃﻞ 🍃
🍁🍁🍁🍁
ﺑﻌﻴﺪ ﻋﻦ ﺍﻟﻠﻲ ﻗﺎﻋﺪ ﻳﺤﺎﻙ ..
ﺍﻟﺠﻤﺎﻝ ﻓﻴﻤﺎ ﻳﺤﺪﺙ ﻳﻜﻤﻦ ﻓﻲ ﻫﺒﺔ ﺍﻟﺨﻮﺕ ﻟﺒﻌﺾ ..
ﻫﺒﺖ ﺍﻟﻌﻨﻴﺪﻩ ﻟﻨﺼﺮﺓ ﺍﻟﻤﺘﻤﺮﺩﺓ ..
ﻣﺼﺮﺍﺗﻪ ...
ﺍﻟﻠﻲ ﺗﺤﺮﻛﻬﺎ ﻛﺎﻥ ﺻﺎﺩﻡ ... ﻟﻜﻞ ﺭﻣﻮﺯ ﺍﻟﻨﻈﺎﻡ ..
ﻣﻦ ﺻﻐﻴﺮﻫﻢ ﻟﺮﺍﺱ ﺍﻟﻬﺮﻡ ...
🍃 ﺻﺪﻡ ﻋﻤﺎﺭ ...
ﻋﻤﺎﺭ ﺍﻟﻠﻲ ﻛﺎﻥ ﻳﻌﺰﻫﺎ ﻫﻠﺒﻪ ..
ﺍﻟﻠﻲ ﻛﺎﻧﺖ ﻓﻴﻬﺎ ﺍﺟﻤﻞ ﺫﻛﺮﻳﺎﺗﻪ ..
🍃 ﺻﺪﻡ ﺩﻻﻝ ...
ﺩﻻﻝ ﺍﻟﻠﻲ ﻛﺎﻧﺖ ﺑﺘﻤﻮﺕ ﻣﻦ ﺧﻮﻓﻬﺎ ﻉ ﺭﺍﺟﻠﻬﺎ ﺍﻟﻠﻲ ﻗﺎﻋﺪ ﻓﻲ ﻃﺮﺍﺑﻠﺲ ﻣﻦ ﻟﻤﺎ ﺑﺪﻱ ﺍﻟﺤﺮﺍﻙ ..
ﺩﻻﻝ : ﻋﻼﺵ ﺑﺎﻫﻲ ﻣﺼﺮﺍﺗﻪ ﺷﻦ ﻧﺎﻗﺼﻬﺎ !!
ﺍﻣﻴﻨﻪ : ﺍﻧﺼﺪﻣﺖ ﺣﺘﻰ ﺍﻧﻲ ..
ﻛﺎﻣﻠﻪ : ﻳﺴﺘﺮ ﺭﺑﻲ ﻣﺎﺑﻴﻨﺎ ﻭﺑﻴﻨﻬﺎ ﺷﻲ ﻣﺼﺮﺍﺗﻪ ﻳﺎﺧﻮﻓﻲ ﻣﻦ ﺍﻟﻠﻲ ﺟﺎﻱ ..
ﺩﻻﻝ ﺯﺍﺩﺕ ﺧﺎﻓﺖ ﺍﻛﺜﺮ ﻭﺍﻛﺜﺮ ﻗﺎﻟﺖ؛ﻣﺎﺗﺨﺎﻓﻲ ﻣﻦ ﺷﻲ ﻣﺎﺻﺎﻳﺮ ﺷﻲ ﺗﻮ ﺗﺸﻮﻓﻲ ﻛﻠﻪ ﺗﻮ ﻳﻤﻮﺕ ﻓﻲ ﺍﺭﺿﻪ ﻭﻳﺮﺟﻊ ﻛﻞ ﺷﻲ ﺯﻱ ﻣﺎﻛﺎﻥ .. ﺣﺘﻰ ﺍﻟﺸﺮﻕ ﺗﻮ ﻳﻮﻟﻲ ...
ﺍﻣﻴﻨﻪ ﺑﻘﻠﻖ : ﺇﻥ ﺷﺎﺀ ﺍﻟﻠﻪ ...
🍁🍁🍁🍁🍁
ﺑﺲ ﻟﻸﺳﻒ ﻣﺎﻓﻲ ﺷﻲ ﻗﺎﻋﺪ ﻳﻮﻗﻒ ﺍﻟﺤﻜﺎﻳﻪ ﻛﺒﺮﺕ ﺍﻛﺜﺮ ..
ﻭﺍﻟﻌﻨﻘﺎﺀ ﻟﺤﻘﺖ ﺑﺎﻟﺮﻛﺐ ...
ﻭﻛﺬﺍ ﻣﺪﻳﻨﻪ ﻣﻦ ﻣﺪﻥ ﺍﻟﻐﺮﺏ ﺍﻟﻠﻴﺒﻲ ..
ﻭﻃﺮﺍﺑﻠﺲ ﻣﺶ ﺑﻤﻨﺊ ﻋﻦ ﻫﺪﺍ ﻛﻠﻪ ...
ﻭﻛﺎﻧﺖ ﺍﻟﺒﺪﺍﻳﻪ ﻣﻦ ﺳﻮﻕ ﺍﻟﺠﻤﻌﻪ ..
" ﻭﻳﻦ ﺗﺮﻳﺲ ﺳﻮﻕ ﺍﻟﺠﻤﻌﻪ ..
ﺑﻨﻐﺎﺯﻱ ﺗﺒﻜﻲ ﺑﺎﻟﺪﻣﻌﻪ "
ﻛﺎﻥ ﺍﻟﻌﺪﺩ ﻣﺶ ﻛﺒﻴﺮ ﺑﺲ ﻛﺎﻧﻮﺍ ﻳﻬﺘﻔﻮﺍ ﺑﺼﻮﺕ ﻭﺍﺣﺪ ﻭﻛﺄﻧﻬﻢ ﺭﺍﺟﻞ ﻭﺍﺣﺪ ..
ﻭﻣﻦ ﺿﻤﻦ ﺍﻟﻨﺎﺱ ﺍﻟﻠﻲ ﻛﺎﻧﺖ ﺗﻬﺘﻒ ...
ﺳﻴﻔﺎﻭ ﻭﺭﻭﺍﺩ ...
ﻛﺎﻥ ﻳﻮﻡ ...2011\2\20
ﺷﻮﻳﻪ ﻭﺍﻛﺜﺮ ﻣﻦ ﻣﻨﻄﻘﻪ ﺗﺤﺮﻛﺖ ﻓﻲ ﻃﺮﺍﺑﻠﺲ ..
ﻭﻛﻠﻬﻢ ﺗﻼﻗﻮﺍ ﻓﻲ ﻧﻘﻄﺔ ﺍﻟﺘﻘﺎﺀ ﻭﺣﺪﻩ ..
ﺍﻟﺴﺎﺣﻪ ﺍﻟﺨﻀﺮﺍ ...
ﺍﻟﻠﻲ ﻛﺎﻧﻮﺍ ﻣﺠﺘﻤﻌﻴﻦ ﻓﻴﻬﺎ ﺍﻧﺼﺎﺭ ﺍﻟﻘﺬﺍﻓﻲ ﻳﻐﻨﻮﺍ ﻭﻳﻬﺘﻔﻮﺍ ...
ﻟﻌﻨﺪ ﺧﺸﻮﺍ ﻋﻠﻴﻬﻢ ﻣﻨﺎﻭﺋﻴﻪ ...
ﻭﻛﺎﻧﻮﺍ ﻳﻬﺘﻔﻮﺍ ﺑﺼﻮﺕ ﻭﺍﺣﺪ ...
" ﺑﺎﻟﺮﻭﺡ ﺑﺎﻟﺪﻡ ﻧﻔﺪﻳﻚ ﻳﺎﺑﻨﻐﺎﺯﻱ "
ﻭﺳﻴﻔﺎﻭ ﻭﺭﻭﺍﺩ ﻳﻬﺘﻔﻮﺍ ﺑﺤﺮﺍﺭﺓ ..
ﻭﺍﻟﻮﻃﻨﻴﻪ ﻭﺭﻭﺡ ﺍﻻﺧﻮﺓ ﺑﻴﻦ ﺍﺑﻨﺎﺀ ﺍﻟﻮﻃﻦ ﺍﻟﻮﺍﺣﺪ ﻣﺘﻤﻠﻜﺘﻬﻢ ﺯﻱ ﻣﺎﻣﺘﻤﻠﻜﻪ ﻛﻞ ﺍﻟﻤﻮﺟﻮﺩﻳﻦ ...
ﻓﻌﺰ ﺍﻟﻬﺘﺎﻑ ...
ﺍﺧﺘﺮﻗﺖ ﺍﺻﻮﺍﺕ ﺍﻟﺮﺻﺎﺹ ﺍﻷﺫﺍﻥ ..
ﻣﺶ ﺑﺲ ﺍﻷﺫﺍﻥ ..
ﺣﺘﻰ ﺍﻷﺟﺴﺎﺩ ...
ﻭﻣﻦ ﺑﻴﻨﻬﻢ ...
ﺟﺴﺪﻱ ...
ﺳﻴﻔﺎﻭ ﻭﺭﻭﺍﺩ 🍃🍃...
🍁🍁🍁🍁🍁
ﻓﻤﻜﺎﻥ ﻗﺮﻳﺐ ..
ﻛﺎﻧﺖ ﺗﺠﺮﻱ ﺑﺴﻴﺎﺭﺗﻬﺎ ..
ﺳﻤﻴﺮﺓ ﺑﺨﻮﻑ : ﺍﻟﻄﻒ ﻳﺎﺭﺑﻲ ..
ﻋﺮﻭﺑﻪ ﺑﺨﻮﻑ : ﺻﻮﺕ ﺭﺻﺎﺹ ..
ﺳﻤﻴﺮﺓ : ﺑﺴﺮﻋﻪ ﻭﺍﻟﻨﺒﻲ ..
ﻋﺮﻭﺑﻪ : ﻣﺎﺗﻮﺗﺮﻧﻴﺶ ﻳﺎﺳﻤﻴﺮﺓ ..
ﻭﺑﻌﺪ ﻭﻳﻦ ...
ﺑﺶ ﻭﺻﻠﺖ ﻋﺮﻭﺑﻪ ﺳﻤﻴﺮﺓ ﻟﺤﻮﺷﻬﻢ .. ﻭﻣﻨﻬﺎ ﻃﻮﻝ ﻟﺤﻮﺷﻬﺎ ﻭﻫﻲ ﺑﺘﻤﻮﺕ ﻣﻦ ﺍﻟﺨﻮﻑ ...
ﻭﺻﻠﺖ ﻟﻠﺤﻮﺵ ..
ﻃﻮﻝ ﻧﺰﻟﺖ ﻣﻦ ﺍﻟﺴﻴﺎﺭﺓ ...
ﻭﺧﺸﺖ ﻟﻠﺤﻮﺵ ..
ﻭﺻﻜﺮﺕ ﺍﻟﺒﺎﺏ ..
ﻋﺮﻭﺑﻪ ﺑﺼﻮﺕ ﻳﺮﻋﺶ : ﻳﺎﺭﺑﻲ ﺍﺳﺘﺮ ﻳﺎﺭﺏ ...
.... ﻳﺘﺒﻊ
