المتمردين

العشق المتمرد

#العشق_المتمرد

#جمان_فريد

الجزء 102 القسم الثالت

🌟..
من ولد العمة الجارح..
لولد العمه المجروح..
اللي يشوف في بنت خاله كيف واقفه في جنان حوش جدهم تتكلم بالتليفون بحماس وابتسامتها ع وجهها تبان ابتسامة فرح..
رانيا بضحكه:انتي هالمرة فوتيني في المعدل ياصفراء..
دلال بغرور مصطنع :بش تعرفي بس..ام وعندي تلاته صغار نجري فجرتهم ومع هذا معدلي فايتك ب20درجه ياعارك..
رانيا برفعة حواجب:هييييه مااامااا راك تصدقي عمرك هي هالمرة كل عشرين عام ومعاش تتعاود صدقيني..
دلال بضحكه:باهي خليني عايشه الدور شويه ياهنديه..
رانيا :لالا سادك عشتيه بزايد..هي توا افرنقعي نبي نخش نخبر العيله ونتجكتر قدام نجيه وعقربتها هنيده..
دلال بضحكه:باهي عدي تجكتري ياحنه..تصبحي ع خير..سلام..
رانيا بإبتسامه:وانت من اهله..سلام..
صكرت بعدين تنهدت..ولفت بتمشي..شافاته واقف..
تجاهلاته..وكملت طريقها لداخل..
هو وقف قدام وقال:رانيا اعطيني من وقتك خمسة دقايق بس..
شقلبت عيونها بملل وتأففت بعدين شبحتله بحده وقالت:شن تبي فراسك قولي؟!تبي تصير مشكلة تانيه وحني ماصدقنا انها تلايمت؟
اسامه :رانيا اللي داراته امي اني ماليش علاقه بيه..
رانيا :اللي داراته امك انت سبب رئيسي فيه..بالله ياأسامه قولي كم مرة بعتتلي مع اختك..بعتتلي رسايل..حتى فالفيس لحقتني غادي..وفكل مرة نقول لا ورفضي يكون قاطع..اني كنت نبي نحافظ ع الإحترام بيني وبينك لكن انت للأسف معاش خليت فيها احترام..
اسامه:لهالدرجه!!
رانيا بنظرة حاده ممزوجه بالكره:ايه..لهالدرجه..وتوا حول من طريقي خير مانقربعها..
غير عيونه المعبيات دموع عنها ووخر من طريقها..
وهي طول مشت من حداه بعصبيه..
وهو مشي طلع من الحوش مرة وحده..
🍁رانيا خشت داخل..
تحديدا الصاله اللي مقعمزات فيها نساوين العيله..
ابتسمت بفرح وقالت:صفيتهم كلهم..
زينب ورباب ضحكوا بفرح..
حناها مبروكه:ماشاء الله ماشاء الله ع بنية ولدي ماشاء الله..تعالي ياحنينه..فتحت ايديها..
رانيا ضحكت بفرح ومشت لحناها قعمزت حداها وحضنتها..
مبروكه:ماشاء الله ع المهندزة ماشاء الله..
نجية وبنتها هنيده ومعاهم هناء كانوا يشوفوا للمشهد بنظرة كره..
بينما مريم وعمتها صابرين ونساوين عمامها كانوا مبتسمين..
شويه بعدت رانيا عن حناها وقعمزت جنبها والكل بدوا يهنوا فيها..
طلعوا بعدها عن موضوع نجاح رانيا خشوا فموضوع عرس رباب..
زينب:لعند توا مفكرين ان نديروه غادي..
نجيه برفعة حاجب:وشن ماعندكمش وين ديروا عرسكم هني؟!!
رباب ورانيا رفعوا حواجبهم..
زينب بشي من الحده:لاعندنا لكن العريس واهله ماعندهمش كان غادي..واني مانبيش نخلي بنتي تروح فطريق طويله والدنيا ظلام ومافيش امان..وماك غابيه يانجيه فحال البلاد وتسمعي في اللي نسمعوا فيه..
مبروكه:عندها الحق يانجيه واني قلت لخيري وخوته حتى هما قالوله يدير العرس في ***** خير..
هناء:مش حلوة الحق..
رباب:مش بالحلاوة هي..ظروف الحكايه بس..
شبحولها برفعة حواجب..
هنيده :قصدك تتزوجي من غير ماديري حفله فالصاله؟!
زينب ورانيا شبحوا لهنيده بحده..
ونجيه وهناء شبحوا لرباب بنظرة مكر..
رباب جاوبت بكل ثقه:اخر همي ياهنو..المهم الهني والراحه ياما منهم دارو عراسهم فقاعات فنادق ..وحدها سنه تنين واطلقوا..
مريم:كان مش اقل..وبعدين رباب تقدروا اديروا صالة متنقله في غادي..
زينب بإبتسامه:وهدا اللي فكرنا فيه..
مرت مفتاح سلفة زينب:ربي يتمم ع خير ..
الكل ماعدا نجيه وهناء وهنيده:آمين..
وحده من نساوين عمامهم:ايه بالله قولولي سمعتوا بالقسورة..
زينب بخوف:ايه ياوخيتي قالوا بيخشوا الأيام الجايه..
مبروكه :يجيرنا الله ياكبدي..
🍁🍁🍁🍁
نحس فيها دوة فاضيه..
نور وهي تشوف في الفيس:لا يادلال مش دوة فاضيه..
نعيمه:كله ع خاطر مطار الهم هدا..حني مابينا ومابينه شي ..ياواقي..
دلال:معقوله عاصمه البلاد ويديروا فيها حرب؟!!ضيقت عيونها وقالت..تس تس..مايخلوهمش..
نور شبحتلها وقالت:من هما اللي مايخلوهمش..
دلال بتهكم:اسياد الفبراريه..
نعيمه بحده:دلال اوزني كلامك..
دلال شبحت للتلفزيون وقالت:كلامي مش ع بابا واللي زيه..
نور:حتى لو بابا بالذات كلام زي هدا ماتقوليشي قدامه دلال..
هزت راسها بإيجاب وهي تاكل فالمكسرات بعصبيه وحاجبها مرفوع..
ونعيمه ونور شبحوا لبعض..
ع خشة اسيا تجري لأمها :ماما ماما...نكال..ماما..
دلال:عينك امشي..
اسيا بملامح زعل:نكال...زي جواد وعمولي..
دلال بتفنيصه:تمشي من حداي ولا نضربك؟؟
تقوسوا شوارب اسيا ولفت تجري..مشت ورا الباب وخشت فالزوايه..
ضحكوا نعيمه ونور..
بعدين نور قالت:تعااالي خاااتي بيبتي اني نعطيها نكاالي..
شويه وطلعت اسيا من ورا الباب شافت لخالتها..
رفعت نور النقال فوق شويه وهي مبتسمه..
جتها اسيا تجري وخداته..
شبحت لامها وقالت:ماما خييي..
دلال:حتى انتي خيي..
دكت اسيا وجهها فحضن خالتها اللي كانت تضحك..
وامها وحناها ضحكوا..
بعيد عن الدار بمسافه..
في المربوعه..
حداه الصغار يتفرجوا ع التلفزيون وهو يتكلم بالتليفون..
عبدالسلام:محشدين صار؟
ناجي "خوه":ايه بيخشوا مع 20رمضان ياعبالسلام..يبوا يلزوهم...وناويين المطار راهو من توا فكر شن دير ووين تمشي..
عبدالسلام:ع هكي الواحد يتوقع ان حوشه اللي تعب عليه سنين بش يبنيه وعاش فيه عمر..يريح بصاروخ ولاضربة مدفعيه!!
ناجي :إن شاء الله ماتوصلش لهني..باك يسلموا ويطلعوا بدون مقاومه..
عبدالسلام مرر نظره عالصغار بعدين تنهد وقال:مظنش..
🌴🌴🌴🌴🌴
معناها معلومات اكيده..
عماد:ايه..خلال اليومين الجايات بيخشوا هدا علاش روحت توا..
الهادي :معقوله يتقاتلوا في المطار!! ع هكي..معناها عدا فيها..
عماد مط شواربه لداخل بأسف وقال:هدا اللي خايف منه..
محمد:باهي كيف بيصير في الناس اللي ماشيين عمره اللي مسافرين بيروحوا..اللي بيسافروا لضروريات علاج وغيره..شركات الطيران ؟!هدى كله شن بيصير فيه ؟؟
عماد تنهد وقال:فعلم الغيب ياخال..
"عماد"
ناض وقف:هي جاااي..شبحلهم وقال..تسحرتوا؟!
الهادي:قبل تجي بشوي..
عماد:صحتين..
ردوا عليه:سلمك..
مشي طلع من المربوعه..
وخش للحوش لقي غاليه قدامه..
مشوا مع بعض للكوجينه وهما يهدرزوا..
عماد:شن جو..
غاليه بإبتسامه:تمام..انت شن جوك شن داير..
عماد ابتسم وقال:جوي مليح واموري تمام..
غاليه فهمت عليه..وسكتت..
وصلوا للكوجينه..
خشت هي وهو وراها..
غاليه:هي تسحر..
قدم للصفرة وقال:من دايره هدا كله..
غاليه شبحتله شويه بعدين قالت:رزان مادارت منه شي..
وجهه تغير ..
وقلبه قعد يدق بعنف شديد..
هو اصلا لهاللحظه مازال من داخل يرجف مع بعضه من تأثير لقائه بيها..
وموجوع قلبه لين خلاص لأنه اجبر ع تجاهلها..
هو التفت عنها بجسمه وعيونه..
لكن قلبه ماألتفت لغيرها..
اللي وين راها صاباته رعشه💓..
ومش اي رعشه اللي تصيب القلب..
غاليه:عماد..
قاطعها وقال بشي من الغضب وعيونه مركزات ع ااصفرة:ممكن...ممكن...لو سمحتي..اسمها معاش تقوليه قدامي؟!ورفع عيونه فخالته وهو يشوفلها بحده...
غاليه تنهدت بألم وقالت:حاضر..واسفه..كول حبيبي..
بلع ريقه..
ورجع شاف للصفرة..
وخدي الكاشيك وبدي ياكل بشراهه..
وبغل...
وغاليه مشت قعمزت ع الطاوله الصغيرة..وعيونها عليه..
🍁🍁🍁🍁
يارفقه ماشافنيش..ولاكأني موجوده..هواء يارفقه هواء حاسبني!!
رفقه بألم:اهدي روزي اهدي حبيبتي..
رزان ببكي:نهدا؟؟كيف نهدا قوليلي كيف!!تي اني قريب نموت يارفقه بنموت..بلعت ريقها وقالت..تعرفي مافي ولا تعبير ع وجهه لا معصب لامضايق لاشي..مافي شي..تعرفي شن معناه هدى تعرفي؟!!..
رفقه حطت يدها ع فمها ودموعها ينزلوا موجوعه هلبه عليها والإحساس بالذنب زايدها ع مابيها..
رزان بالعبره:مش متعوده..هكي...مش..متعوده...من واني صغيره..صغيره واجد..كنت نهرب منه..نهرب لاني عارفه اني مش حنفوت من يالاه الا وهو مناشبني...يريش شعري..يقولي كلمه تحرق دمي...يناديني ياملعقه...شهقت وقالت..يقولي يالفعه...يديرلي اي شي حتى لو كنت كارهاته..من واني صغيرة لعند ماكبرت...بس توا...توا...أول مرة...اني يفوت مايالاي ولا كأنه شافني!!رفقه...رفقه...عماد..كرهني ولا ؟!!
رفقه وهي تمسح فدموعها قالت:رزان حبيبتي ماديريش فروحك هكي..
رزان بصوت مخنوق:قصدك خلاص يارفقه..خلاص!!معاد في امل ؟!!
رفقه سكتت ماعندهاش رد حاطه يدها ع صدرها المطبق ومازالوا دموعها يصبوا..
رزان غمضت عيونها بشده وقالت:نستاهل...اني نستاهل...نستاهل...صكرت عليها...
وكعادتها..
ارتمت ع مخدتها..دفنت وجهها فيها وقعدت تبكي بالعبرة...
🍁🍁🍁🍁
الساعه 4:00قبل الفجر..
مقعمز ع سياج اسمنتي مقابل الوادي
يتفرج عليه...
ومازال بكل مافيه يتفكر في اللي صار بكري
هي يدوب لمحه اللي شافها فيها..
لكن هاللمحه قدر يركز فيها ع اكثر من شي ..
سامنه..ومزيانه بزايد..
اول مرة وزنها يزيد هكي..
قبل جسمها مثالي بس هالمره لا..
سمنت وحتى من الشدوق دارتهم..
ع قد ماعجباته..
ع قد مازاد حمل فنفسه عليها هلبه..
لأن هالشي يدل ع إن جوها مليح ومرتاحه..
ومش مدورة شي ..
وكل ماله يتأكد ان هو مايسوى عندها حاجه..
🍃نظريه غريبه عند هلبه ناس لما يشوفوا حد زايد وزنه معناها مرتاح !🍃
يعني توا زياده وزن رزان سببها الأكبر حالتها النفسيه السيئة طول الوقت اطيب وتاكل بش تلهى وتلقى فشن تفش غلها..
هلبه ناس هكي لما نفسيتهم تتعب يلجئوا للأكل...
وهادو مصيبتهم مصيبتين..
🍁عماد"آاااه ياربي حتى لما روحت بدال مانمشي لحوشنا جيت هني!!"
تنهد من أعماقه وقال...
"إن شاء الله نبرا"
فجاة..
انحطت يد ع كتفه قال صاحبها بضحكه:من شنو؟!
انحرج ع الآخر لما تلفت ولقاه عمر..
خواله عمر ومحمد زي صحابه..يعرفوا اللي فيه وممكن حاكيلهم من فوق لفوق..بس صعب جدا يتعمق في الحديث معاهم عن مشاعره..يعني فالنهايه هما عمام البنت اللي يعشقها 💓
عماد بضحكه احراج:شن جو..
عمر نزل يده وهو يضحك..
وعماد رجع شاف للوادي ووجهه ألوان..
عمر شبحله وقال بضحكه:والله مسألتكم بسيطه تقدروا تحلوها وتتفاهموا..
ابتسم عماد بتهكم..وقلبه ينبض فنبضات قويه وموجعه..
عمر:مش عارف هي ليش نهتها بسرعه هكي!!برغم اني عارف انها كان تلقى ماتنهي شي...
عماد حرك عيونه للخلف جهة خاله..
عمر:نركزوا في حاجات كيف هدي رانا لكن ع قولتكم نديروا في الحوله..واني عندي احساس كبير ان الموضوع اكبر من حكايه القرايه هدي..
غير عيونه للوادي وماباش يرد..
عمر شبحله بتضييقة عيون وقال:ملبز انت؟
التفتله طول وقال وهو قارن حواجبه:كيف ملبز؟!
عمر:فاهم قصدي..
رفع حواجبه وقال:اقسم بالله..
الله اكبر الله اكبر..
عمر :صدق الحق وزهق الباطل..
عماد اشر بسبابته ع الجامع اللي كان مقابله من الجهة التانيه وقال:نحلف بالله والآذان يذن ان الجو هداك فايته ليا سنين طويله..
عمر:باهي شن اللي صاير؟!!
شبحله شويه..
بعدين..
فات من حداه وهو يمشي قال:ماصار شي..تعال نوتوا ارواحنا بش نمشوا للجامع..
عمر وهو ماشي وراه مط شواربه لداخل بأسف وماباش يقول شي..
🍁اما هي ..
كانت واقفه ورا الروشن..
وهي لابسه ملاية الصلاة وتراقب فيه والدموع ولاقالوا نوقفوا..
بعد مشوا هو وعمها..مسحت دموعها ..ومشت بتصلي الفجر..
ع طلعت توفيق خوها ووراه بوها شاد قصي فيده من الحوش بيمشوا للجامع..
وقفت ع صلايتها...
وجي بين عيونها رمزي..
رفعت ايديها لعند مستوى وذانها وقالت بصوت نبرته ترجف..
"الله اكبر"
نزلت ايديها وحطتهم ع اعلى صدرها...
اليمين فوق اليسار..وبدت تصلي ودموعها ينزلوا...
🍁🍁🍁🍁
السلام عليكم ورحمة الله..
السلام عليكم ورحمة الله..
سلموا جماعة من المصلين ورا الإمام..
وبعدين بدوا مجموعه منهم ينوضوا ويطلعوا..
وفي اللي قعدوا مقعمزين..
منهم هما..
فرج:برا اسأله ..
رمزي:خايف يفسرهلي تفسير مش باهي..
فرج :ومرات يطلع تفسيرها كويس وترتاح..
رمزي قعد يشوف للشيخ شويه..
بعدين ناض ومشاله..
وصل فيه طلق السلام وقعمز..
الشيخ:وعليكم السلام ورحمة الله وبركاته..
رمزي:بنسألك ياشيخ..قالوا تفسر في الحلم..صح؟
ابتسم وقال:بإذن الله..
ابتسم ابتسامه خفيفه وقال:باهي بنحكيلك حلم ..
الشيخ:نسمع فيك..
رمزي :احمم..حلمت بأختي لابسه قفطان اصفر وتاج ذهب ع راسها...وكاينه كيف الحزينه..برغم ان مظهرها مايبين هالشي بس كان الحزن ع وجهها..هكي كيف المهمومه..
الشيخ:وشن تاني؟
رمزي:هدى هو..
الشيخ شبح لشناشيب الصلايه بعدين شبحله وقال:اختك صاير معاها شي مدخل عليها الحزن..ممكن يكون من غيابك عنهم...
عيونه تعبوا دموع..
الشيخ:قديش مازالك يارمزي؟
رمزي:عام ونص..
الشيخ:ربي يعجل بفك كربتك..ماشاء الله عليك شاب اخلاقك حسنه ومارينا منك كان كل طيب خليت اللي هنى كلهم محترمينك..
ابتسم بإحراج وقال:بارك الله فيك..
الشيخ بإبتسامه :فيك بارك الله..
رمزي:يعني ياشيخ هو هدى تفسير الحلم؟
الشيخ هز راسه بإيجاب بعدين قال:والله أعلم..
هز رمزي راسه بإيجاب..وناض وهو يقول:السلام عليكم..
الشيخ :وعليكم السلام..
قعد معاه بعيونه لين وصل في فرج..
وناضله ومشوا الزوز مع بعض طلعوا من المصلى بعد طلق فرج السلام..
ورد الشيخ:وعليكم السلام...تبدلت ملامح وجهه للضيق وقال..إن شاء الله المرض اللي بيجي لأخته مايكون خطير بس !!ربي يفرج عليهم جميعا..
🍃🍃🍃🍃
هو حتى العشق مرض عضال..
يعذب الروح والقلب..
وهالعذاب النفسي طبيعي جدا يأثر ع الجسد ويتعبه حتى هو..
المهم..
فاتوا تلاته ايام..
كانوا فيهم اهل طرابلس يترقبوا بخوف الحرب اللي جايه..
هالحرب هادي كانت اول حرب تقوم فالعاصمه..
وقتها الناس بين المصدق وبين المكذب يعني عاصمه وحتصير فيها حرب !!؟
الطرفين مدججين بالأسلحه والطرفين يعتبروا اقطاب الثورة آنذاك..
يعني اكيد هالحرب حتكون كبيرة..
وفي عائلات بدت تنزح فعلا..
الساعه 12:00قبل الظهر..
قدام وحده من براريك الخضرة
يتكلم بالتليفون..
خيري:حقك ياولدي..
مؤنس:معليش سامحني مرة تانيه لكن مراتي ياعمي هدي لايمكن نسمحلها تبات فحوش عمة ولا خاله وحوشهم معبي شباب..مع احترامي ليكم...مانقصد شي غلط بكلامي..اكيد انت فاهم عليا..
خيري هز راسه بإيجاب وقاله:فاهم عليك ياولدي ونرجع ونقول هدا حقك..وزع نظره ع المكان وقال..تم اليوم خوها بيمشي ل***** يرفعها معاه..
مؤنس:واني نعاهدك ياعمي لاتشوفني ولانشوفها كان نهار العيد..
خيري:لاتعاهدني ولا غيره..مرتك وحقك تشوفها زي قبل فحوش خوالها..واني عارفك كويس وعارف تربيتك وتربية بنتي وواثق فيكم زين..
ابتسم مؤنس وقال:بارك الله فيك..
........
كيف نخليكم ونمشي !!؟
خيري؛يابنتي راجلك هكي يبي بعد عرف ان بنمشوا لحوش عمتك صابرين مارضهاش..
رباب سكتت وعيونها لوطا وهي مضايقه..
زينب؛راجلك عنده حق..
رباب شبحت لأمها..
زينب:اني عارفه ان خالتك نعيمه وخالك حميد احتمال كبير يمشوا غادي طول..واني مانبيش نثقلها ع ماليا وحني ماناش عارفين هالحرب هادي كان بدت امتى اتم..لولا هكي كنت اول مكان مشيتله غادي..
رباب:باهي كيف نمشي بروحي ونخليكم ؟!!
خيري بضحكه: اللي يسمعك يقول بنقعدوا في الشارع! ابتسم وقال..هيا سلم بنتي بري وتي روحك بسرعه وارفعي معاك المهم المهم..
زينب:ايه اعطيها حاجات مهمه ترفعهم معاها..
خيري:صح مزبوط غادي آمان اكثر..
مشي طول لدار النوم..
زينب بعد كانت تشبحله التفتت لبنتها ..رباب طول حضنت امها ودموعها ينزلوا..
زينب بضحكه:توقعتك تفرحي يامنجوهه.
ضحكت رباب من بين دموعها..
في الدار ..
رانيا:ايه بتمشي غادي..
دلال:حتى اني كان نلقى نمشي غادي خير من حوش عمي ناجي..كلهم بيمشوا غادي وخليقتي تقعد فخليقة خوله..
رانيا:بتقعدوا كلكم مع بعض؟!
دلال:ايه عمي عطانا الدور الثالت..
رانيا :حتى حني عمتي صابرين عطتنا الدور التاني..بنقعدوا فيه حني وحناي..
دلال:ونجيه؟؟!!
رانيا:بتهج لتونس..
دلال:سعدووودكم..
رانيا:هههههههه.
🌴🌴🌴🌴🌴
في الليل..
الساعه 10:30..
طلعوا التلاته..
وهما لابسات عبايات..واوشحه..
غاليه عنابي..
وحميده فوشي..
ورباب اخضر زيتي..
غاليه:الاول ناخدوا لبلقيس وبعدين اريج..
حميده:هادي المرة العاشرة اللي تقولي فيها نفس الكلمه..
غاليه شبحتلها بربع عين..
ورباب تضحك..
بعد طلعوا من ممر فم البوابه وصلوا سيارة عمر..
والست لمياء طبعا واكيد متسندرة القدام..
انفتحوا البيبان الزوز وركبوا غاليه ورباب ..
اما حميده شبحت جهة حوش خوها ميلاد وقالت:وراس رزونه ردي بالك عليها..
رزان وهي مبتسمه هزت راسها بإيجاب..
بعدين طبست ع حنين وقالت:قولي لماما باي..
ابتسمت حنين وقعدت تأشر بيدها لأمها وهي تقول :باي..
وحميده ردت عليها..وهي تضحك..بعدين ركبت السيارة..
عمر:هي نمشوا..
الاربعه بصوت واحد:امشي..
ضحكوا وهو ضحك معاهم..
وطول تحرك..
رزان قامت حنين فغمرها وقعدوا الزوز يشوفوا للسيارة لين مشت..
شبحت رزان لحنين وقالت:هي نعدوا؟
حنين :هيااا..
ضحكت رزان..
شمرت شويه من عبايتها..
ونزلت من الدروج ومشوا لحوش جدها عبدالله..
🍁وهو اللي كان مدرق ورا شجرة السرول فالظلام..كان يشوفلهم..
تنهد بألم...بعدين مشي..💔
🍁🍁🍁🍁🍁
خشت رزان لحوش جدها داخل..
خالاتها كانوا موجودات مع أمها حدا حناها اللي كانت مريضه شوي الصيام مولي عليها..
وحداهم الحفيده..
مدايرة صونيه كبيرة فيها عجينه..
وصونيه جنبها اصغر بشويه فيها حلقوم معجون..
قدامها طواجين..
وحدهم مقعمزة تنقش في الغريبه اللي دارتها..
رزان :مازال..
حدهم؛مش هلبه..
عزيزة شبحتلها وقالت:من امتى متعلمه ديريها..
امال:خلطتها برزان خلتها فالحه..
حدهم شبحتلهم بحده..
سعيده:من نهار جتنا وهي فالحه..والغريبه تعرفها قبل رزان..
رزان:هي اللي علمتهلي..
حدهم برفعة حاجب:واني تعلمتها من امي..
سعيده شبحت لامها..
حدهم الجده بتكشيخه:شنو تبن تو؟
امال وعزيزة شبحولها..
عزيزة:شي..نهدرزوا بس..
حدهم الجده:ترا اقطعن الهدرزة والهن بالتلفزيون..
شبحوا لحدهم..
اللي كانت تنقش وهي مبتسمه بمكر..
رفعت كل وحده فيهم حاجبها وشبحوا للتلفزيون..
ضحكت رزان وقالت:نعاونك..
حدهم بهمس :لالا قلت لأيمن كله بنديره بروحي..
ضحكت رزان..
ضحكت حدهم بعدين شبحت لحنين اللي تشوف للعجينه..
ابتسمت خدتلها منها شويه ومدتهالها وقالت:هاك العبي عسوله..
ابتسمت حنين بفرح وخدت العجينه وقعدت تلعب بيها..
شبحت مرة تانيه لرزان لقتها سارحه فالطواجين وعيونها معبيات دموع..
اضايقت هلبه بعدين قالت:رزونه جيبي منقشه وتعالي كملي معاي..هلبه هدا امت بنكمله؟!
رزان شبحتلها ابتسمت بألم بعدين ناضت ومشت للكوجينه..
تنهدت حدهم وكملت شغلها..
🍃الحلو اللي دير فيه حدهم مش للعيد..
ادير فيه لحفلة الختمه اللي بيديرها مؤنس لأيمن لأنه حفظ كتاب الله كامل..🍃
هههههههههههههههه..
ايمن بإحراج:شن يضحك فيك؟!
مؤنس بضحكه:نتخيل فردة فعل امك لما تسمع شن قلت تبي..
ايمن:مش عيب..صح مازال لكن الحق مايجيش حافظ قرآن ونكلم في البنت من غير رابط رسمي  بيني وبينها ..
مؤنس بإبتسامه:باهي ع حسب كلامك البنت لعند تو ماعندها علم..
ايمن ووجهه أحمر :وشن تبيني يعني نقوللها نحبك ومش عارف شنو؟!تعرف بالطريقه هدي افضل..
مؤنس:وكان تطلع ماتبيكش؟!
ايمن بضحكه فيها شي من الغرور:تس..واثق ومتأكد انها تبيني..
مؤنس:ههههههههه...
ايمن دفه بيده ومشي وهو يضحك بإحراج ومؤنس كملها ضحك وخلاص
🍁🍁🍁🍁
واليوم  اللي بعده جي..
ودارو حفلة الختمه..
اللي تصورت بكاميرا الفيديو..
وحضروها ناس هلبه من معارف العيلتين واللي ربطتهم بأيمن ومؤنس علاقه حلوه...
قعدوا للسحور..
والنساوين فحوش عبدالله ماعدا حميده..
وتوا السحور مع بعض...
وكان اكثر من متحمس في العواله..
حدهم💓
🍁🍁🍁
الساعه 3:30صباحا..
حميده:وخيرك مارتيه غادي..
رباب:بوي قاله مايشوفنيش الا هني..
غاليه:ايه هكي احسن..
"ههههههههه"
رباب:خوالي مايرقدوش بكل شورهم..
غاليه بضحكه:دركت لبعد الفجر بساعه..
رباب:لكن غريبه حكاية خالي الهادي معقوله لتوا مرته قاعده حرجانه؟!
حميده:وشن نسيتي المرة اللي قعدت فيها قريب 6شهور!!
رباب :لكن توا رمضان قصدي مفروض الشيطان مدحور وتحط عقلها فراسها وتولي لحوشها..
غاليه:هو اللي رفعها هو اللي يروح بيها...
حميده:والباين انه مايبيش يروح بيها..
غاليه:لا إن شاء الله ..
رفعت حميده حواجبها وسكتت..
"غاليه"
غاليه:هيا يمي جايه.. ناضت وطلعتلها..
وصلت الدار التانيه..
خشت..
غاليه:نعم يمي..
فاطمه:اقربي..
استغربت غاليه وقربت لأمها وقعمزت..
فاطمه:قولي لخوك الهادي غدوة يعدي يرد مرته وصغاره..
تنهدت غاليه وقالت:حاضر..
فاطمه بنرفزة:ياسرهم عاد من الهبال..ليهم ست سنين وهما ع هالحال امتى بيعقلوا ماني عارفه..وحطت راسها ع المخده..
ناضت غاليه وهي مضايقه..
فاطمه:نوضيني لما يذن..
غاليه طفت الضي وقالت:حاضر..وطلعت من حدا امها..
🍁🍁🍁
كلمت غاليه الهادي..
وهو مسايرة قال حاضر..
استغربت غاليه انها مازادش ع هالكلمه غير كلمة تصبحي ع خير..
حست هني ان في شي مش مزبوط..
وتأكدت أكثر اليوم اللي بعده لما مشي وروح..
وقال انها تبيه يولي بعد يومين لأن امها مريضه وتبي تطمن عليها قبل بعدين تروح..
ماحد مشي عليه كلامه..وفكروا ان سميه هي اللي ماتبيش تروح...
🍃فاليوم نفسه
بدت عملية "القسورة"..
وباقي ايام رمضان مشت نكد فنكد..
عيلة عبدالسلام اللي مشوا لحوش خوه من اول الأيام خوله ماهنتهمش ..
حاطه راسها براس نعيمه وسلفتها ودلال وصغارها ويومك وتاليك مدايرة مشكله..
كذلك زينب
هناء ماريحتش روحها بكل وهي قريب كل يوم غادي قعدتلهم ع الحركه..
ونجيه بإتصالاتها تحرك في المشهد من بعيد..
في مرة..
رانيا قربعتها لما وحده من بنات عمتها صابرين الصغيرات قعدت تعزر فأختها روان "يابكوشه"..
ومسكينه البنيه تأثرت هلبه وقعدت تبكي..
ولعوا فرانيا عماتها وهي ولعت فيهم..جبدت القديم والجديد وطلعت اللي فقلبها كله...
ويومها زينب ببناتها  مشت لحوش اختها كفايه خلاص معاش فيها..
بينما حميد..
فاعيلاته الزوز قعدوا فحياشهم لأن ماوصل فيهم شي ومنطقتهم زي منطقة كفايه بعيده عن الإشتباكات..
🌴🌴🌴🌴
27رمضان...
مشوا غاليه ورباب ولمياء وفاطمه لحوش بلقيس رافعين موسمها
لبسة سروال راقيه وحلوة بوشاحها..
كندرة..
سابات عطور ومكياج..
ومعاهم طورطة..وزوز صناديق عصير راوخ..
طبعا لمياء لما طلعوا يشروا كانت تحاول تأثر ع اختياراتهم للحاجات تبيهم ياخدوا ارخص شي لكن هما ماعبروهاش..
محمد عطاهم مبلغ وقدره وقال كان نقص عليكم قولولي نزيد وهالشي قهرها...
🍃حسد🍃
طول الوقت عيونها ع بلقيس.
خفيفة الدم اللي جوها مليح اللي دايرة زي المغناطيس جاذبه افراد العيله ليها بدون ماتعسل فالكلام ولاتمسح جوخ..
كرهتها من قبل ماتوصل..
وهالشعور وصل بلقيس اللي حست ان لمياء من نظراتها مش طايقتها وهي كذلك بدت بالفعل تبغضها..
🍁في اليوم نفسه..
من قبل العصر..
كانوا سعيده ورزان ومعاهم امها واختها امال ماشيين للزاويه
رافعين موسم أريج..
زي موسم بنت خالتها بالزبط..
مايبوش الفرق..
المهم فطروا العيله غادي..وبعد العشي بساعه روحوا طول..
كانت الطريق آمنه وسالكه امورها..
🍁🍁🍁🍁
اتفقنا معاهم ياسيدي الفاتحه فعرس رباب..
محمد وهو يشوفلها بطرف عينه:وفهمتوهم ان العرس في 11 السنه اللي بعدها؟
غاليه بملل:ايه..
محمد بقرنة حواجب:وخيرك تدوي هكي انتي؟
غاليه :ماك من بكري تسأل في نفس الأسئله ..
محمد بإزدراء:باهي عدي خشي عدي..
غاليه رفعت حواجبها بعدين نزلتهم وقالت بمكر:مالا والله فطور غدوة ماضاله الا مطيباته لميا باهي!!..
وخشت جري..
محمد بتفنيصه:مش بعيد في الأخيرناخد بنت الناس فالمربوعه هدي!!
🍁🍁🍁🍁
رباب:ووك عليا اليوم قريب متت هدا شنو..الشربه غساله..الكسكسي مازال ناشف والبصله مالا حيه حيه البصل مازال حي..ولا الطاجين 7دحيات فالطاجين 7 !!؟لا وبعدين ضبرتله زوز تانيات بش تحطهم فوقه لما قريب يطيب!!كرهتني فالطاجين مرة وحده..
حميده بضحكه:كان نحكيلك ع نهار دارت فاصوليا بالكرشه..
غاليه:اسكتيي اصصص ماصدقت نسيت الطعمه..
رباب ضحكت بتفنيصه:لهالدرجه!!
حميده بضحكه:واكثر...تعرفي ريحتها كيف شنو؟!
غمضت غاليه عيونها بشده وقالت بعياط:حمييييييييده!!
حميده :هههههههههههههه
رباب:ههههههه...زبطت زبطت...هههههههههه
غاليه ناضت وهي تقول:اقعدن فيها...وطلعت تجري..
وهما مازال يضحكوا..
🍁🍁🍁🍁
مش لازم؟!!
عمر:ليش؟!
لمياء قربتله وقعمزت حداه ع السرير:عندي هلبه لبس جايباته معاي مافيش داعي تشري زياده..بزعقه ع الفاضي..
عمر برفعة حواجب:ع راحتك..
ابتسمت وحطت راسها ع كتفه..
هو ضحك..
لمياء؛عموري..اني حامل..
عمر بضحكة فرح:بالله!
لمياء:هههههههه..والله..
عمر:كيف عرفتي؟؟
رفعت راسها وقالت:درت تحليل منزلي...وغدوة إن شاء الله نمشوا نتأكدوا ..
عمر بإبتسامه :إن شاء الله يطلع حق..
لمياء بضحكه:قداش تحب الصغار!
عمر:حتى انتي..
حطت يدها ع بطنها وقالت:اكيد بالذات لما يكونوا صغاري..خبطت بيدها ع بطنها بخفه..طالعين من هني..
هو حط يده ع يدها..وقربلها..
وهي قربتله..
وراحوا فعالمهم الخاص 🍃
🍁🍁🍁🍁
يوم 29|رمضان..
كفايه:دارت عركه لقلب السمي..اخر شي عبالسلام خداهم ورفعهم لحوش اخته...
زينب:تعرفي مالينا غير *****..
كفايه:خيرك زينب مضايقه عندي؟؟!!
زينب بإبتسامه:بكل والله انتي قريب تحطينا ع راسك..لكن ساد..عندك ولاد يبوا ياخدوا راحتهم وراجلك حتى هو..
كفايه :بالعكس والله مامضايقينهم فحاجه..
زينب :حتى لو قعادنا فحوش النسيب مش لايق بكل...
....
خالك توا مكلمني ياعماد وقالي كيف نعيمه كيف زينب لازم يقعدوا عند.هلهم دام هدى حالهم..
تنهد عماد وهو يشوف للبحر من طرف البلاكونه ويسمع فصوت ضرب جاي من بعيد:باهي مادام خالي هانيبال قال هكي..كلامه يمشي
🌴🌴🌴🌴🌴
نعيمه وزينب؟!!
غاليه برفعة حواجب:ايه نعيمه وزينب!
حميده بتهكم:وبعدهم حميد وقبيلته..والله أعلم لعند امتى يقعدوا..
ضيقت غاليه عيونها وقالت:شن قصدك؟!
حميده رفعت حواجبها وتنهدت وهي تقول:شي..
ومشت طلعت من حداها ع خشة رباب..
رباب:خل نوتوا الصفر المغرب قريب..
غاليه هزت راسها بإيجاب..ووقفت ع طنجرة الشربه تشوف فيها
ورباب مشت خدت سفرة مسنده ع الحيط وهي تشوف لخالتها بإستغراب لأنها لاحظت ملامح الضيق ع وجهها..
🍃وعدا هاليوم...
وجي اللي بعده..
أول يوم العيد..
اول يوم عيد الفطر سنه 2014..
مستحيل ننساه..إلى الآن محفور فذاكرتي..
ممكن ابشع من عيد 2020..
هكي حسيت..
ولا ممكن لأن عيد 2014كان البدايه..
وماجي عيد 2020الا وحني متعودين خلاص..
صح..صح..
تعودنا...
عادي...
تنهيده ألم من الأعماق...
🍁🍁🍁🍁
ايوه عمي عبالسلام قريب نخشوا تاجوراء توا.......ايه بوي وعمي خيري وراي......وقفنا نستنوا فيك.......تم...تم...في الإنتظار...السلام عليكم..
صكرعماد..
جنبه مالك سأله:وينهم توا..
عماد وهو يشوف جنبه في الطريق جايين توا.....رفع حواجبه وقال...اهم جو...
شبح طول مالك جنبه وابتسم..
عماد تحرك..
بعده سعد..
وراهم خيري..
وبعده عبدالسلام...
كلهم ورا بعض..
وكل واحد يتفقد اللي وراه من المرايه..
طالعين من طرابلس..
اللي صبح العيد متاعها..
بدال مايبدا بتكبيرات..
بدي باصوات الإنفجارات..
وصفير صواريخ..
كلهم كانوا يمرروا في انظارهم حواليهم..
اعمده الدخان..
الطريق اللي شبه فاضيه تقول خلت من ناسها..
ومرة مرة صوت انفجار قوي يخلعهم ويهز الأرض تحتهم ..
وصلوا تاجوراء..
خشولها..
فاحت عليهم ريحة البحر..
كلهم شافوله..
انشرحت صدورهم بعض الشي وارتسمت ابتسامه خفيفه ع الوجوه..
معمر: بحر بحر..
اسيا:بحل بحل..
ضحكوا..
باستها امها من خدها وقالت:نجيلي الببغاء ياربي..
مجد:بوي..تو احني معاش نروحوا لحوشنا؟
شبحوله..
ونعيمه شبحت لعبدالسلام..
عبدالسلام:لا بإذن الله مروحين..
جواد:بعد ماتم الحرب؟
عبدالسلام ابتسم بمجامله وقال:ايه..
مجد :باهي امتى اتم..
نعيمه:لما يسخر ربي..انتوا بس ارفعوا ايديكم واشبحوا فوق وقولوا يارب اتم الحرب..
مجد وجواد ومعمر دارو زي ماقالت نعيمه وقالوا بصوت واحدوبتوسل طفولي وهما يشوفوا فوق
"يارب اتم الحرب"
نعيمه:ونروحوا لحوشنا..
التلاته قالوا:ونروحوا لحوشنا..
ابتسم عبدالسلام..
دلال بضحكه:شوفوا اسيا..
شبحولها..
وعبدالسلام عين فالطريق وعين في المرايه..
اسيا كانت دايرة زيهم وتحرك فشواربها بهمس..
نور بضحكه:غير شن تقولي ياطبوشه..
اسيا شافتهم لقتهم يشبحولها..
تحشمت غطت وجهها المنفج بإيديها الصغيرونات..
كلهم:ههههههههههههه💕
🌴🌴🌴🌴🌴🌴🌴
طلعوا 11:00..
وصلوا 1:30..
من طريق مختصرة غير اللي صكروها واللي كان يعرفها عماد..
خشوا القطعه من فتحتها القداميه..
كان وقتها حميد كيف واصل بسيارته العائليه..
جايب معاه غزلان..ورفقه والولاد والبنيه الصغيره..
ماصدقت رفقه وصلت..
سلمت ع حناها وعمامها..
بعدين مشت تجري بطريقها لحوش عمها ميلاد...
الباقي نزلوا من سياراتهم..
عيدوا ع بعض..
بعدين النساوين خشوا..
والرجاله الكبار مشوا مع بعضهم للمربوعه الخارجيه..
اما الشباب قعدوا واقفين يهدرزوا ع الأوضاع..
حمزة:عنصريه ولت ياراجل..تارات..انتقامات..
محمد:لاحول ولاقوة الا بالله..
عمر:خلاص المطار راح؟!
مالك:سلامتك..
عماد تنهد وقال:تقول كابوس ياراجل..مش مصدق لتوا مع بعضهم كانوا يحاربوا مع بعضهم.خشوا طرابلس وحرروها كانوا مع بعض في كل شي..كانوا هكي..ضم كفوفه لبعض...وتو ولوا هكي..شبك سبابتيه فبعض..
محمد :مانبيش نقول كلام يزعلك..
عماد:اللي صاير كله يزعل مش غير كلامك ولا كلام غيرك..
محمد:مش شماته راهي..
عماد:غباء الشماته في وضع زي هالوضع كلنا فنفس المركب..
توفيق:صدق كلنا فنفس المركب..كان يغرق بيغرق بينا كلنا..
عمر تنهدوقال:باهي فكونا من الدواوي هدين وخشوا عيدوا ع خالاتكم..
حمزة:تمام..
مشي هو ومالك ومروان وتوفيق ومعاهم عمر خشوا داخل.
اما عماد فكان ينزل فحاجه من سيارته..
محمد:غير راك تكون زعلت..
عماد صكر باب السيارة وهو يضحك:تعرفني حساس انت ؟!
محمد:ههههههه...حيط مولي..لف ومشي ..
وعماد بيلحقه..
سمع باب حوش خاله ميلاد انفتح..
لا إراديا شبحله..
لقي رفقه واقفه قدامه تهدرز وتضحك..
طلعت رزان..
اول مرة يشوفها هكي..
كانت لابسه قفطان ابيض فيه ورود تركواز كبار..كم..
ضيق لعند تحت الصدر بشويه مزينه حزام لونه تركواز حلو...والباقي واسع..
ووشاح تركواز ع راسها..
كانت ملفته هلبه هلبه..
شدت فيد بنت عمها ومشوا مع بعض وهما يهدرزوا..
لعند ماوصلوا فتحة الممر وخشولها..
مالاحظوش وجوده نهائي..
هو بلع ريقه..
شد ع قبضة يده  بقوة...
ومشي وهو يحاول يتمالك نفسه بالسيف بش يبان عادي..
برغم ان قلبه جن جنونه💓..
خش للحوش وقف في الباب..
لقاها تسلم ع عمتها نعيمه..
امه طول شبحتله بحزن..
وغاليه كذلك..
هو قدم لخالته حميده وسلم عليها وعيد..
هي حست بوجوده..
ورفقه تسلم وتشوفلها وتشوفله..
وصلت فعمتها كفايه كانت متحشمه منها شويه..
لكن كفايه سلمت عليها عادي جدا ولاكأن صايرة حاجه وهالشي ريح رزان..
هو وقف ع مرت خاله غزلان سلم عليها وعيد..
ويحاول يكون قوي يبان عادي ع قد مايقدر..
المشكله انها زادت قربت..
الفاصل بينه وبينها غاليه..
كانت تعيد ع لمياء..
بعدين مشت لغاليه فالوقت نفسه اللي وقف فيه هو ع غاليه..
الزوز حالتهم يرثى لها..
غاليه تمرر فعيونها عليهم...
وهما الزوز يشبحولها...
والكل مركزين ع الموقف..
الزوز فكروا بسرعه..
وفيسع نفدوا..
فاتوا غاليه..
هو خطم من حداها مشي للمياء..
وهي فاتت من جنبه ومشت لغزلان اللي كانت فاهمه كويس اللي صار..
والباقي قعدوا يشوفوا لبعض..
ماعدا دلال اللي كانت تشوفلهم بضيق..
لمياء:الطريق امان؟
عماد وهو يمسح بيده فلحيته من التوتر:ايه..
لمياء:اماليا اليوم بيجوا لحوش خالتي..
نعيمه:نازحين حتى هما؟
لمياء بأسف :ايه...تعرفي وين يسكنوا..
زينب :وين كانوا المده اللي فاتت..
لمياء قالت وهي تشوف لرزان كيف فاتت من ورا عماد ومشت خشت الدار:كل مرة عند حد من العيله..اخر شي كلمهم راجل خالتي زي ماتعرفوا هو عضو في المجلس..دبرلهم حوش يقعدوا فيه..
نعيمه:كويس..
غاليه وهي ماشيه:ترا تعال عماد ارفع الصفرة..
حك مقدمة انفه بصبعه ومشي وراها..
كفايه قعدت معاه بعيونها..بعدين تنهدت و شبحت لبنت خوها ابتسمت وقالت:تعالي سهى حبيبتي..
غزلان:بري لعمتك.
ناضت سهى ومشتلها تجري..
كفايه:تبارك الرحمن ع هالسمحه..
غزلان بإبتسامه:تسلمي.
ابتسمتلها كفايه..
زينب بإبتسامه:شن اخبارك غزلان..
غزلان:تمام ..
لمياء وهي تشوفلها بربع عين"ماحاسبه فروحها وهي ماعندها كان العيون بلاهم راحت ليل"
في الكوجينه..
حطت مترد الحلويات وقالت:عماد بعدين نبيك في موضوع فالحوش القديم..
تنهد بضيق وقال :حاضر..
خدي الصفرة وطلع بيها...
وغاليه وهي معاه بعيونها حركت راسها ايمين ويسار بأسف..
🍁🍁🍁🍁
الساعه 2:00ظهرا..
في الكوجينه..
هارب الكلب...
غاليه:ايه..
زينب:شن يبي فراسه المسخ؟
غاليه:ماني عارفه شن يبي يقهرها يذلها ولا يذلنا حني مش عارفه..
كفايه بغضب:والله عماد لأمس بس قالي كان تخلوني نخش في الموضوع نربيه..
غاليه:لالا حاجات كيف هدي يتكلموا فيها الكبار بالعقل..
زينب:اما عقل تحكي عنه ياغاليه بس خلا فيها عقل التافه هدا..
غاليه:امك هكي تبي..
تنهدوا البنات وسكتوا بعدين كفايه تكلمت..
كفايه؛ايه..وسميه شن صار فيها؟!!
زينب :ايه حقه؟؟!
غاليه:موال تاني هدى ..حاسه في حاجه كبيره..
ع خشة الهادي..
الهادي؛مازال الغدي؟!
غاليه :مازال شويه بس..
الهادي:تمام..
كفايه:هويدي..
الهادي رفع حواجبه وقال:نعم..
كفايه:مرتك وين؟..
وجهه تغير..
زينب:الصغار هني وهي لا..شن في شن صاير..
الهادي شبح للروشن شويه بعدين قال
"طلقتها"..

....يتبع...