#العشق_المتمرد
الجزء 26
تأكدت انكم ماكنتوش تشوفوا في الصور طول الأجزاء اللي فاتوا...مش جدد اللي نزلتهم اليوم ..الصور مركبتهم ع الشخصيات من الأجزاء الأولى 😁...
وفي اللي يقولي مش راكبات...بش نريحكم حكاية الصورة عندي زي السيناريو لايمكن تتغير...
اللي ماعجبوشي الصور..يقرا ويتخيل الصورة اللي رسمها فراسه ويتجاهل الصور اللي مدايرتهم😘😘😘😘
🌟🌟🌟🌟🌟🌟🌟🌟🌟🌟🌟🌟🌟🌟🌟🌟🌟
يجري بالسيارة وهو في حالة هلع المهم يوصل للمستشفى...
ويسمع في صوت بكي خوه...
عمر اللي ماتحملش يشوف خوه بهالحاله وقعد يبكي بالعبرة..
ميلاد: عمر شد عزمك مش هكي..
عمر قعد يمسح فدموعه اللي كل مايمسحهم ينزلوا..
لعند ماوصلوا للمستشفى..
🍁🍁🍁🍁
ووووك عليا ياربي وووك..وووك عليا..
غاليه ببكي :حميده..هاك اشربي تربحي..
حميدة ببكي : كان شفتيه ياغاليه كان شفتيه..كان شفتيه
غمضت عيونها بشدة..ياااااربيييي..يااااربيييي..
خشوا سعيدة وامال وفجرتهم عزيزة يجروا...
امال تبكي بالعبرة...
سعيده ودموعها ينزلوا:الله يقطعه الله يحرقه اللي دار فيه هكي..
حميده باالعبرة: لو شف..شفتيه ياسعيده...كله مع ...بعضه...دموات..
امال حطت يدها ع فمها وقعدت تشهق بالبكي..
سعيده رشفت وقالت:نبيله الدي الحار اللي دار فيه هكي..
🍁🍁🍁🍁
طرابلس...
مكالمه هاتفيه..
تي غير شن تقول ياميلاد.
ميلاد بلع ريقه وقال:ضاربينه لين قاتيلنه ياحميد..كله مع بعضه دم..
حميد: خلاص صكر توا ياميلاد...
ميلاد سكر السماعه...ومشي من حدا الإستعلامات متوجه للدروج وركب..
وصل وين مافي هانيبال ..شاف عمر مقعمز يبكي...
تنهد بألم.. ع طلعة الدكتور..
الدكتور: جريمه اللي داروها فيه شن الوحشيه هدي..
ميلاد بقلق :شن صاير فيه بالزبط يادكتور..
الدكتور: خسر دم واجد بسبب الجروح وقاعدين نعوضوا فيه عنه..عنده حرق فرقبته من الخلف ناتج عن مية النار انصبت فهديك المنطقه..وعنده كسر في رجله اليسار ووحده من ايديه صار فيها خلع..انضرب بوحشيه ياراجل الشرطه لازم تخش في الموضوع..
ميلاد هز راسه بإيجاب بعدين قال: الجروح شوهن وجهه..
الدكتور: ممكن مايتشهوش واجد مع العلاج..ويقعد أثر بسيط..المهم توا بنعدي نبلغ الشرطه.. ومشي...
وشويه طلعوا الممرضات من الغرفه اللي هو فيها..
وعمر وميلاد معاهم بعيونهم لين اختفوا..
شبحوا لبعض بألم وتنهدوا..
💔💔💔💔💔
حميد بلغ رجالة خواته باللي صار وهما بلغوا نساوينهم اللي قريب هبلوا ع خوهم وطول وتوا رواحهم بش يمشوا للبلاد..
ماعدا خيري..اللي كان كله خوف ع زينب لو تصيرلها حاجه وهي حامل في الشهور الأخيرة وتتعب هلبه وغير عن هكي هي هانيبال بالذات معزته غير من دون خوتها عندها..
يعني لو عرفت ممكن تصيرلها حاجه..
بس لازم يقوللها...بس كيف حيجيبهالها!!
💔💔💔💔💔💔🍁
روحت فاطمه وهي ماتندري ع شي..
وين وصلت الحوش..سمعت اصوات البكي والعياط..
الميه نزلت في ركابها...خشت طول ..حولت جردها ولوحاته..
وسمعت وحده منهم تقول..
"ياناري عليك ياهانيبال..ياناري عليك ياوخيي"..
مااستوعبتش اللي سمعاته..مشت بخطوات ثقيله وصلت في الدار...
فاطمه :خيره خوكن...
شبحولها بخوف ومعاش عرفوا شن يقولوا..
كلهم قعدوا ساكتين....ويشبحولها وخلاص..
غمضت عيونها وقالت بصوت مخنوق:خيره...هانيبال..
ع خشة الحاج رمضان اللي حتى هو ماكانش موجود: ضاربينه يافاطمه...
التفتت وشبحتله شويه..مالت ع الباب وشدت فيه بش ماطيحش..
وعياط بناتها سبق خطواتهم ليها..
🍁💔🍁💔🍁💔
بعد ساعتين مع المغرب..وصلوا البنات..ولحق مختار اللي لما سمع حتى مرته كامله مشت معاه..وطبعا ولاده عمار ومحمود..
طول توجهوا للمستشفى....
عمار بغضب :غير ينوض منها ويقول منهما وحق من خلق الحق رقابهم اطير..
الهادي بصدمه:مني حاقد عليه لهالدرجه!!.
ميلاد: يعني ماحكالكش ع مشاكل صايره معاه..
الهادي :ولا مرة حكالي عن عراك ومشاكل هانيبال ع حاله ياميلاد..
حميد: غير ينوض تو نفهموا منه..
محمود: ماقالوش امتى ينوض؟
ميلاد: غدوة الصبح بالكثير..
.....
من بعيد شوي...
عبدالله : انظر هو مني متعارك..
رمضان:هانيبال نعرفه لسانه كي..
مختار :حتى لو كيف ماقلت..ماينضربش هكي..هديما كانوا ناويين قتلته...غير ينوض منها ويقول من واني نعرف شنو ندير..
ولأن الممر زحم.طلب منهم الدكتور ينزلوا لوطا..
نزلوا ..وفي من روح....
وماقعد حد غير الهادي وعمار وحميد..
🍁🍁🍁🍁🍁🍁🍁🍁🍁🍁🍁🍁
وين عروبه من هدا كله؟!!
كلكم اكيد سألتوا هالسؤال....
🍁💔
طرابلس..
الساعه9:00ليلا...
خشت للمربوعه...
كان فيها امها..وخوها وعمها صبري...
قدمت وهي مستغربه : شنو في ليش تبوني؟!
سامي بحده: هو سؤال تجاوبي عليه بإيه ولالا؟
عروبه بخوف :شن هو؟!
امها تشوفلها بخوف...وعمها بتوعد..
سامي : تعرفي واحد اسمه هانيبال..
رعشت مع بعضها من الخوف..وعيونها اللي توسعوا تعبوا دموع...
سامي :معناها تعرفيه..
ساكته ولاكلمه...تفكر شن اللي خلاهم يسألوها عنه..شن صاير..
امانه: بنتي عندك بيه علاقه..
عروبه شبحت لأمها ..وطاحت من عينها الإيسار دمعه وقعدت صبري: الولد هدى اليوم هايل كان حيقتله..
انصدمت..
سامي :ليش ياعروبه هكي ليش..وانتي عارفه كل شي ليش...
"يقصد انها مستحيل تتزوج من غير اصلها "
صبري: تعرفي لو الولد قال من اللي ضاربه تأكدي ضراري عمه وقبيلته حيهجموا علينا وع ارازقنا..حيصير فيها موت ودم ياعروبه...شبح لأمانه..جيتي لكلامي..اللي سمعته عنها ماهوش كذب..
امانه قعدت ساكته ودموعها نزلوا..
سامي بحزم:اسمعي جاي..قعاد هنى معاش في...
شبحوله ...
صبري: شن قصدك..
سامي :مسافر سوريا وبنقعد غادي 7سنين..عروبه حتعدي معاي..
عروبه دموعها طاحوا: سامي!!!
امانه بنبرة باكيه:شن تقول ياسامي..
غمض عيونه بنفاد صبر: يمي..ارجوك..خلاص ساد ماجانا ...وبعدين اني خوها الكبير وان كان في حد ملزوم يحاسبها هو اني...
صبري شبحله برفعة حواجب..
سامي :خلال اسبوعين نتملك اجرائتك...
صبري: كويس..وحني قاعدين فترة فطرابلس لين يهدا الوضع وعمامك الأخرين كل واحد فيهم بيعدي لتركينه..لين تموت الحكايه...
هي توزع فنظرها عليهم وحاسه بتوهان..حاسه كأنها فدوامه مش فاهمه شي من شي..
هانيبال ضاربه هايل..
وهي حتسيب البلاد كلها بعد اسبوعين وتعيش فبلاد تانيه سنين طويله..بعيد كل احبابها...
كيف صار هكي...وليش صار هكي...
ليش محكوم عليها كل ماقلبها يتعلق بحد...يتاخد منها..
اول شي بوها...
وتاني شي الإنسان اللي حباته بنفس درجة الحب لبوها..واللي بنسبه ليها اهم راجل في الدنيا..اللي بدت تحلم معاه بهلبه حاجات...
اتاخد منها ...وحيفرقوها عنه...
ليش هكي...ليش...
استاقضت ع صوت خوها وهو يقول...
"تحركي اطلعييي"..
شبحتله شويه...بعدين لفت وطلعت بسرعه والدموع سيل..ومازالت في حالة التوهان...
لقت اختها ومرت خوها قدامها والزوز دموعهم تنزل..
دفتهم ومشت للدار..وهما الزوز طول لحقوها...
💔💔💔💔💔💔
تاني يوم ...
الساعه 8:30 صباحا...
آااااااااااااه...خوووووويييييييي
خاش بيها للمستشفى وهي بتموت من وجاعها..
وجع اللي سمعت بيه عن خوها..ووجع الولادة المبكرة..
لما سمعت ماتحملتش...
جوها الممرضات وهما جايبين كروسه..حطوها عليها وهي تعيط وتبكي...وتقول"خوي" بأعلى حسها..
وخيري مسكين قريب يموت من خوفه عليها...
🍁🍁🍁🍁🍁🍁
فاق....
كان وجهه ملفوف...ايديه...ورجله المكسورة معلقه قدامه..
ويحس بجلده يوزوز فيه..
كان يشوفلهم بتعب...يسألوا فيه مايردش...
قاعد يذكر في اللي صار...
ودمه يفور ويغلي...قاعده هي بين عيونه...
اخر مرة كانوا فيها مع بعض في طرابلس...
فلاش باك⚡
هانيبال بضحكه:نموت ومانفارقك..
عروبه بضحكه:وحق ربي قلبي بيوقف شن جاك كيف ولى لسانك هكي..
هانيبال بضحكه:غير مستاحشك ياعنز بس طاهق شويه..
عروبه :هههههههههه....شبحتله بإبتسامه..حتى اني مستاحشاتك واااجد💓..
ابتسم وقلبه يضرب بعنف...وزع نظره ع المكان..
وهي تشبحله..
"عروووبه...هايل..هايل"
التفتت لأختها بخوف...
هانيبال: عدي بسرعه..
عروبه : باهي...هانيبال..
شبحلها :همم..
عروبه: نحبك موووت💓..ولفت ومشت تجري...
هانيبال وقلبه يخبط خبط 💓: هرااابه...
الوقت الحاضر⚡
كانت راقدة ففراشها وتذكر فنفس الموقف...
سمعت بيه شن صارله وهايل شن دار فيه من امها...
ليلتها كلها تبكي بتموت بالبكي...ومازالت تبكي لعند هاللحظه..
تأكدت ان الخطر حيكون ديما محاوط بهانيبال لو قعدت معاه...
ممكن يموت ....
حست روحها لو سيباته حتكون خاينه لوعد بيناتهم انهم حتى لو بعدوا عن بعض..اخرهم يولوا...
بس هي حتبعد هلبه هالمرة...وممكن مستحيل تولي...
عروبه ببكي : مستعده نفديك بعمري بش تكون سعيد..لو ع حساب سعادتي...نفارقك بالحيي ولاتفارقني بموت...وقعدت تبكي بالعبرة...💔
🍃🍃🍃🍃🍃
مروا اسبوعين بالزبط...
هانيبال رفض رفض تام يقول مني اللي دار فيه اللي داره..
اخطى انه قال للشرطه انهم مخانب...ومايعرفهمش
برغم ان حتى الشرطة ماصدقتش اقواله..بس هو رافض يقول غير هالكلام وهما مايقدروا يديروا شي مادام هادي اقواله...
طلع من المستشفى...
وكانت نفسيته مدمرة تماما
هي ضاعت...
وامتحاناته فاتت والسنه كلها راحت عليه....
اصلا معاش عنده رغبه فشي....
...قعد اغلب الوقت بروحه..
ومايكونش بين الناس الا لما يجوا يتحمدوله بالسلامه..
🍁اهله شبه عرفوا السبب لأن عمر لمح وماباش يقولها صريحه..
خواته كرهوا عروبه ع الآخر..ووين يدعوا ع ولد عمها يدعوا عليها معاه..
بالذات زينب ..
جابت ولد...وحطوه في الحضانه لانه طفل خديج انولد قبل وقته..
ومع هدا حالته الصحيه كويسه سموه سند
💔🍁
قعد باله عندها...ياترى عارفه باللي صار معاه ولالا
طلب من سليمان يسأله...
🍁🍁🍁🍁
مطار طرابلس العالمي...
الساعه 5:30عصرا...
حاضنتها امها بقوة..واختها واقفه تشوفلهم وتبكي..
امانه بعدت وقالت بدموع:ردي بالك من روحك يمي
عروبه تهز فراسها بإيجاب وهي تبكي...
قربت منها عودة وحضنتها وقعدت تبكي ....
سامي :خلاص هي معاش في وقت..
بعدوا عن بعض بالسيف..
قربت مناسك منها..وهي شاده ولدها ..
والبنت مع بوها..
مناسك رشفت وقالت:يللا حبيبتي..
التفتت عروبه لمناسك...
امانه: مانوصيكش عليها يابنتي..
مناسك بدموع: ولو..هي اختي الصغيرة..
نداء الرحله🔊...
سامي :بالسلامه يمي..ومشي ببنته هارب...
مناسك شدت ذراع عروبه : يللا حبيبتي
هزت راسها بإيجاب...
بدت تخطي فخطواتها بالسيف...
مش قادرة تستوعب اللي صار لهاللحظه وكأنه كابوس...
وتتمنى كل لحظه انها تفيق منه...
امها واختها كل ماتبعد يبكوا اكثر واكثر..
هي مابتش تتلفت بكل...
لعند ماطلعت من صاله الإنتظار مرة وحده...
حضنت امانه عودة وقعدوا يبكوا..
🍁هي كانت تمشي وخلاص...
تشبح في روحها كيف قاعدة تقرب من الطيارة...
وصلوا في سلم الطيارة..
حطت رجلها ع اول درجه ..دموعها نزلوا مطر...
ركبت...ووراها مرت خوها...وخوها قدامها..
لعند ماوصلت في الباب...وخشت للطيارة..
ركبوا كل الركاب..
وتسكر باب الطيارة...
وشويه شويه...بدت تتحرك الطيارة....
بدت تقلع.....
وطارت....تعلت ...ارتفعت...
وبعدت هلبه....
وبعدت معاها عروبه...
اللي خلت قلبها في البلاد اللي خلتها💔🍁
🍁🍁🍁🍁🍁🍁🍁🍁🍁🍁🍁💔
كيييف؟!!
سليمان مط شواربه لداخل بضيق: سالم قالي اخته هكي قالتله...سافرت...وبتقعد سنين فسوريا...ومرات معاش تولي..
هو وخر خطوتين...
ونزل...محدر للوادي..
وسليمان يشبحله وموجوع عليه...
🍃🍃🍃🍃🍃💔
ماكانتش المرة الأخيرة اللي يعتزل فيها عن الكل بعيد ..
استمر ع هالحال...
شهور.....
فهالشهور....
جابت سعيده بنيه....
وكانت غايه في الجمال ..خدت زين بوها وخوها..وعمتها نعيمه..
كانوا طايرين بيها..بالذات عمامها...
الهادي هو اللي سماها ...اختارلها اسم رزان...لأن كان معجب بالمذيعة رزان المغربي وقتها..
سعيده عجبها الإسم واعتمداته...
وسبحانك ياربي...هالبنت ذابت في قلب عمتها غاليه ماتت عليها وتعاني فيها اكثر من امها...
لطيفه جابت بنيه واختارتلها اسم مميز اكثر...رفقة...
وكانت حلوة حتى هي وملايكتها تهبل..
رزان ورفقه...
هما اللي طلعوا هانيبال من حالته....
مات عليهم الزوز...وكان يمشي لطرابلس مرة مرة بش يشوف رفقة....
ظاهريا...
تعدى الأوجاع....
وعاود السنه مرة تانيه...بس المدرسه بالنسبه ليه كانت اشبه بالقصور المهجورة موحشه هلبه...
ماقعدش معاه من اللي كانوا يقروا معاه حد غيرضو...
اللي سقط وعاود السنه...وتقاربوا هلبه هو وهانيبال من بعض...
🍁🍁🍁🍁
الحلوات...
رباب..رانيا...دلال...خشوا للمدرسه...
سنة اولى ابتدائي...
رانيا ودلال شاطرات...لكن رباب هي والحيط سوا😂...
🍃🍃🍃🍃
سنه '1996...
عيد الفطر...
معاش تمشي حفيانه صقع...
رانيا :باهي وين الشكلاطه..
رمزي :ههههه..هاك ياهامعه..
خدتها منه :هامعه عينك يااصفر..
رمزي : ههههههههه...
من فوق...
عمر: بلي...شكلاطه ومواعيد ...من تو..
عمار بضحكه:نظف عقلك ياراجل..
هانيبال : عقله خارب من الأصل..
عمار ضحك وقال: اما دلال اللي بدت تتحشم ومعاش نشوفوا فيها..
عمر: متغيرة عن قبل حشوميه موليه..لكن لسانهامازال هو هو..
عمار ضحك:ربي يحفظها...
....
دلال ماما مدي لحمزة الصفرة...
خدت دلال الصفرة وعطتها لحمزة..
حمزة كان يشبحلها...
كل ماتكبر جمالها يزيد..
خدي منها الصفرة ووجهه مولي احمر...وطلع من الكوجينه...
ع خشة رانيا..
دلال: جابلك شكلاطه..
ضحكت رانيا:ايه...
.....
وديني يافرخه ماضال الا عادمك..
وقعد يجري فجرتها وهي تجري وتضحك..
لين شدها..وخدي طاسة ميه وبزعها عليها وهي ميته بالضحك..
محمد:تستاهلي ياكلبه..
رباب : هههههههههه..
محمد وحمزة ورباب...صحاب ..
ووين يتلاقوا يديروا فمقالب وكلها من تخطيط السكوتي حمزة...
واكبر ضحيه ليهم..عمر...
ياما كلوا منه طرايح ياطرايح...
🍃🍃🍃🍃🍃
هديكا الفترة كانت الحياة ماشيه بهدوء...وكلهم تخطوا هلبه اوجاع...
مرالشتي..بعده ربيع...بعده صيف..بعده خريف...
ويرجع الشتي من جديد...
ويصير فيه شي يأكد ان الهدوء اللي يمر هالعيله...
هو نفسه الهدوء القاتل..
ماقبل العاصفه..
🍁🍁🍁🍁
منوووو!!؟؟؟؟؟
فاطمه:حسن ولد عمك..
حميده قعدت مصدومه..
غاليه بصدمه:حسن يمي متأكده..
فاطمه:شنو مانعرفه ؟!!حسن..
حميده بصوت مرعوش: وسيدي شن قاله..
فاطمه : رده بالك بيقوله باهي...هدى اللي ناقص..
ومشت وخلتهم..وماهيش عارفه..بمدى الوجع اللي صاب قلب حميده...
طول انسحبت وخشت للدار وغاليه اللي دموعها نزلوا لحقتها..
🍁🍁🍁🍁🍁
كيف هكيييي...كييييف..
حدهم: وطي حسك ..وكانك تبيها راك عديت خطبتها مش لين سبقك خوك..
خليفه بصدمه: واني كنت نستنى فخوي هدى...اللي قلنا عليه كبير ومانبوش ناخدوا قبله!!
حدهم: هدى اللي صار توا...انسى حكايتها مرة وحده...ولو تبي اني نخطبلك اللي تفوتها في الزين ...
هو انسحب من حدا امه وكان فقمة الغضب...وطول ركب سيارته وتحرك...
🍁🍁🍁🍁
تاكل في البرتقال هي واختها..
سعيده: تو ينسى..
امال : اممم..بنقولك بتعدي مع امي لطرابلس..
سعيده : اكيد ياحنه من غيري مايصير شي..
امال:هههههههه...شبحت جنبها...روزي تعالي هنى ..
🍁💔🍁💔🍁💔
فات شهر ع جرح جديد انفتح...
حميدة كانت فاقده بنة كل شي...كانت عابسه وتعيسه لين خلاص..
وغاليه واجعتها اختها...وفنفس الوقت قلبها كان مقبوض...
وهالقبضه ماكانتش من فراغ..
🍁🍁🍁
فليلة شتويه...
في اخر ايام شهر 1 "أي النار" ف سنه 1997...
فاطمه متكيه : قبل رمضان بيعرسوا لولاد عبدالله..
غاليه وحميده اللي كانوا لاهيين بالتلفزيون شبحولها وقلوبهم ترعش..
حميدة بصوت مخنوق :منو منهم يمي..
فاطمه: حسن..وخليفه وحميدا...
نزل الخبر زي الصاعقه علي غاليه..
مش صدمه هي حصلتها...صدمه قويه...
ناضت طول وطلعت من الدار...وحميده لحقتها..
وفاطمه شبه فاهمه اللي هناك وقلبها وجعها ع بناتها..
....
خشت غاليه للدار التانيه ..ووراها حميده.
حميده: الله غالب نصيب وهالكلاب والله مايستاهلونا.
غاليه حولت محرمها من ع راسها وهي تقول:عليك غبييينه
اااه ياناري...ياغبيني ياطياح سعدي..ياقلة بختي..
وقعدت تندت وتخبط ع وجهها..
شدتها حميده بالقوة وحضنتها وغاليه تلهت في حضن اختها وتقول : ياقلة بختي اني وياك..
قعدت تبكي حميده وغاليه تدعي :الله لايربحك ياحميدا اللي درته فيا تلقاه...💔
🍃🍃🍃🍃
وبدي العرس..
اللي وين سمعوا بيه البنات انصدموا صدمه قويه..وولا وحده فيهم بت تحضره..برغم انهم عزموهم..
واكثر من يسحن وياكل فروحه...زينب...
اللي عزوزتها وحمواتها مشوا كلهم...
اصلا غاليه وحميده كانوا من العواله..
لسببين عفسوا ع كرامتهم ومشوا..
بش مايتكلموش عليهم الناس ويبدوا يطلعوا القصص..
والسبب التاني بش مايشمت فيهم حد...
مثلوا بكل قوة...وتمثيلهم كان محترف....
🍁لعند جي يوم الدخله....
لبست وميكجت ..والتفتت لأختها..
حميده:هيا صبي..البسي ومكيجي ..صبي اقهريهن صبي..وريهن ان الحياة ماتوقفش ع خوتهن...صبي..
غاليه تشبح لأختها كيف تتكلم وخانقتها العبرة..
حطت ايديها ع وجهها وقعدت تبكي..
حميده دموعها طاحوا:صبي امك تراجي فينا قالت الحقني
قربتلها وقعمزت ع ركابها تحول في ايدين اختها...ماتبكيش والله ربي لما ياخد حقنا والله ...ماتبكيش...ماتبكيش...
حضنتها بقوة وقعدت تبكي وتقول: ماتبكيش...ماتبكيش..
"ياليلة ياليله ياليله....
ياليله ياليله ياليله"..
قعدوا يسمعوا فأصوات اللي قايمات العرس الخوات وبنات خالات والجارات..وهما يغنوا فيها بصوت واحد ...بعد ماكل عريس..رفع عروسته لشقته...
"بانيين جنب حوش ماليهم حوش ع تلاته دوار"..
"حبيني وانا حبك خبيني جوا قلبك ليل شتا طويل
ليل الشتا طويل"..
يسمعوا ويبكوا بالعبرة وهما حاضنات بعض..
🖤واللي كانوا سبب في هالقهرة وهالدموع
يصفقوا ويغنوا وهما فقمة الفرح..
سعيده...وامال..
🍃ياقداش من ناس رقصت وغنت..ع دموع واوجاع تسببتها لناس تانيه 🍃
🍁🍁🍁🍁🍁🍁
جي رمضان....وفات...
وجي العيد....
تاني يوم...
لما جو البنات وشافوا خواتهم كيف راحو...
اشبه بالهياكل العظميه..وعيونهم لين صغروا من كثر البكي والدموع...
قريب ماتوا ...
وزينب تركب وتنزل...قريب تهبل..
زينب: الله لايهنيهم بجاه ربي ..
.....
بحدا البوابه..
ماهو انت غبي..
رمزي :غبي عينك يابقرة..
دلال:ههههه..ايه وليتي سمينه يارانيا..
رانيا:بري يامشدقه شوفي روحك..
محمد:هيا ريشن بعضكن..
حمزة ورمزي ضحكوا...
ع خشة سعيده...وشاده فيدها رزان اللي كانت تمشي...
سعيده :السلام عليكم..
زينب ناضتلها.:مصح وجهك ياكلبه ياحقيرة مازال ليك عين انتي وتجي هني..
سعيده :خيرك انتي ناضت عليك الهبله...
زينب : وحده زيك انتي اكبر غلط درناه فحياتنا ان لميناك وخديناك لخونا..مفروض قعدتي زي الكلبه تكدي فطناجركم المصديه..
كفايه؛زينب..
سعيده:وحده مريضه اللي يديرنه فيك نجيه وهناء تردي فيها عليا...
زينب ضربتها كف..وشدتها من شعرها...
وسعيده تريش فيها وقعدوا يضاربوا..
الصغار مصدومييين...
رانيا ودلال قعدوا يبكوا..
امارباب كانت تضرب مع امها..
والبنات يحزوا فيهم عن بعض...
ع خشة هانيبال ومعاه الهادي...سمعوا الدوشه وجوهم
انصدموا باللي شافوه..
جي هانيبال لزينب جبدها وبعدها عن سعيدة.
هانيبال بتخشي:عدي روحي انتي..
سعيده وهي تبكي ومريشه ومخبشه وصوابع زينب معلمات ع خدها..
خدت صغارها وطلعت ورمزي لحقها..
هانيبال: هبلتي انتي خلاص...مافيكش عقل بكل ...
زينب دفاته...ومشت خشت الدار...
ع خشة فاطمه اللي كانت حدا خوها تهدرز عليه..سمعت الدوشه جتهم..
فاطمه: خيركم ياكبدي خيركم..
البنات قعدوا ساكتات ولا كلمه...
الهادي :خلاص يمي فضت..
هانيبال طلع من حداهم وهو متكنطي..
واساسا اليوم كله مشي نكد فنكد...
غير العار اللي دار ميلاد وماخلا ماسمع اخته يومها..
من غدويتها الصبح روحت زينب ع طول...
وكان هداكا العيد...أسوأ عيد يمر عليهم...
الحاج مختار مازبطش اللي صار لأنه في المربوعه اللي برا لكن عارف ان في شي...
هداكا العيد جي بروحه...
لأن محمود قعد مع مرته قريب تجيب..
وطبعا هدا تاني حمل لهندا الأول ..جابت تواما ولاد..وحملها التاني بولد حتى هو..
اما عمار اللي حقق حلمه وخش الكليه العسكريه بدي مكرس كل وقته ليها..وتعرف ع هلبه ضباط كبار..وقوى علاقته بيهم وبناس من المقربين
المقربين للنظام...حتى اجازاته ماياخدش فيهم...
وشويه شويه...
شخصيه عمار بدت تتغير..ولا جلف ..وقاسي..وواعر بزياده...
الا انه علاقته بولاد عمته ماتغيريتش بكل حتى لو ماراهمش..يتواصلوا بالتليفون..وبالذات مع هانيبال..
هانيبال اللي تخرج من الثانويه..وسجل انتساب فكلية الإقتصاد..لأنه كان يخدم...
برغم مرور السنين...الاانه الجرح اللي فقلبه مازال مابري 💔
ولاقدر ينسى شجرة الدر🍃
🍃🍃🍃🍃🍃🍃
وتمر السنين...
ويمر معاها العمر...
وكل حد ربي كاتبله يكمل في الدنيا تكيف وتعود يعيش فيها ويقبلها زي ماهي..
بما تخفيه اقدارها...اللي مقدرها الله عز وجل..
سنه 2000
شهر 4 "الطير"....
سرت💔....
خش يجري للحوش وهو يسمع فصوت العياط ..
تلقاه بوه...اللي كان يبكي اول مرة يشوف دموعه..
حضنه وهو مازال مش مستوعب اللي صار..
مختار ببكي :اني بعته...اني..اني قتله يعدي يجيب عمته..عدى ومعاش ولا..
فهم عمار وقتها ان خوه دار حادث ومات في طريق بلاد عمته..
طلعت اصاله تعيط:هنداااا هنداااا طاحت معاد ناضت..
طول بسرعة طلع لسيارة ودخلها داخل..
نزل منها..وشافهم كيف مسندين هندا وهي فاقدة الوعي وحطوها في السيارة..
جت عينه ع ولاد خوه اللي كانوا يبكوا قلبه وجعه ع الأخر..
ركب السيارة بعد ركبت اخته..
عمار : امي شنو حالها..
اصاله ببكي : صابرة...
تحرك بالسيارة طول....
🍁🍁🍁🍁
هندا جاها انهيار عصبي وقعدت في المستشفى تلاته ايام بعدين طلعت...
ماشافتش راجلها قبل يندفن...انقهرت هلبه ودارته عزي تاني...
🍁فاطمه مشت للعزي هيا وبناتها...
ولحقت زينب وكفايه..
لكن نعيمه....
ماكانش عندها علم...
لان راجلها ماقالش...بش ميوحلش فمشوار لسرت...
هي مشية حوش اهلها وواحل فيها...
🍃مر شهر ...
وفي يوم....
قررت نعيمه تمشي تزور زينب بعد عراك هي وعبدالسلام
وهو رفعها ويفكر شن بيصير..
اول ماوصلت حوش اختها..
طقت فتحتلها رباب وخشت هي وبناتها دلال ونور...
وين قدمت تفاجئت بالناس اللي كانت عند اختها..
وهما تفاجئوا بيها كيف جايه مكيجه...وهما جايين يعزوا في ولد خالها..
نعيمه:إن شاء الله خير شن في!!؟
زينب بصدمه :كيف؟؟قصدك ماتعرفيش ان ولد خالك مختار توفى..
انصدمت نعيمه..
زينب:حميد خبر عبد السلام...
🍁🍁🍁🍁
ايه ايه عرفت ومابيتش نقول شن بديري ترا..
نعيمه ببكي :معاد قاعدتلك فيه خلاااااص عيييت فدييييت فاض بيا...طلقني طلقني..
هو فاتها..ومشي طلع من الحوش.
وخلاها تعيط وتبكي وتدعي عليه وبناتها يبكوا...
🍁بعد هدت خدتها بناتها بعد لبست جلابيه ومرحمه ومشت لحوش اماليه..
وخبرت بوه بكل شي...
والحاج حمد ماخلا ماقاله...وحلف ايمين يرفعها للبلاد اقلها تعزي حتى امها..
وفعلا...
رفعها...
وصارت نقاشات ومشاكل..
هانيبال ماباش يشوف عبدالسلام بكل..
لكن عمر طلعله وتعاركوا الزوز وعمر ماخلا ماسمعه..
بس مع الأسف..
الحاج رمضان وقف مع النسيب وقال: مادخلكمش مرته وهو حر فيها يجيبها ولا مايجيبها..
هالكلمه كبرت راس عبدالسلام اكثر واكثر..
وعطاته الضي الأخضر بش يزيد يتمادى مع نعيمه اكثر واكثر...🍁
🍃🍃🍃🍃🍃🍃🍃
فات ع وفاة محمود 5شهور...
رمت فيهم هندا عدتها...
في يوم...
هندا بصدمه شديدة : عماااار!؟
بوها: هو اولى بيك من الغريب..واولى بضراري خوه...
هندا دموعها نزلوا:باتي مستحيل..لالا مستحيل..
بوها :هي كلمه ...سلفك يردك يعني يردك...
وطلع وخلاها مصدومه ودموعها سيل..
شبحت لأمها اللي كانت تشبحلها بنظرات عاجزة...
وقعدت تبكي بالعبرة...
🍁🍁🍁🍁🍁🍁
اليوم التالي ...
الساعه 5:مساءا...
حقها هدى..
عمار : اكيد ياحاج...
طلع بو هندا من المربوعه....
شويه وخشت هندا...
كانت لابسه عبايه سودا ووشاح اسود..
قعمزت ...
هو بدون مايشوفلها :شنو حالك..
هندا : الحمد لله..اسمعني..نبي نخش فالموضوع طول...اني وافقت مجبورة عشان عويلي بس..نبي نكمل عمري فتربيتهم وبس وانت عمهم كيف بوهم الله يرحمه.....ماتطمع مني بشي تاني...
عمار : كويس اختصرتي عليا ..الكلام اللي قلتيه هو اللي كنت ناوي نقوله...وحاجة اخرا...حيجي نهار ونقرر نتزوج فعليا غيرك..يعني من توا حطي فراسك الحاجه هدي..
هندا ببرود : واني قتلك قبل نبي نربي عويلتي وبس..
عمار هز راسه بإيجاب:متفقين معناها..
ناض: خشي نادي باتك بنطلع..
هي شبحتله شويه بعدين ناضت وطلعت..
هندا"فرق السمي عن الأرض بينه وبين محمود الله يرحمه"..
🍁🍁🍁🍁🍁
بعد اسبوع...
انقرت فاتحة هندا ع عمار..وولت لحوشها الأول..
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
وفات صيف..تبعه خريف تبعه شتي..
وربيع...
بعده صيف وخريف وشتي وربيع...
وتوالت فصول السنه...
والحياة ماشيه في احداثها مختلفه كإختلاف فصول السنه عن بعض...
لعند ماجي ....
صيف 2007....
...يتبع....
