#رمضان_احلا_مع_جمان_فريد
#العشق_المتمرد
الجزء63
القسم الثاني
🍃 ﺗﺸﺎﺑﻬﻮﺍ ﻣﺤﻤﻮﺩ ﻭﺍﻟﻬﺎﺩﻱ ﻫﻠﺒﻪ ﻓﻲ ﺷﺨﺼﻴﺎﺗﻬﻢ .. ﻭﻓﻲ ﺣﻴﺎﺗﻬﻢ ﻛﺬﻟﻚ ...
ﻛﻞ ﻭﺍﺣﺪ ﻓﻴﻬﻢ ﺣﺐ ﺍﻹﻧﺴﺎﻧﻪ ﺍﻟﻐﻠﻂ .. ﻭﺗﻤﺴﻚ ﺑﻴﻬﺎ ﺭﻏﻢ ﻛﻞ ﺷﻲ 🍃..
🍁🍁🍁🍁🍁
ﻳﺎﻣﻦ ﻋﺎﺵ ﻟﻴﻦ ﺗﺠﻴﺒﻲ ..
ﺳﻌﻴﺪﻩ : ﺭﺍﻧﻲ ﻓﻲ ﺍﻟﺸﻬﺮ ﺍﻟﺘﺎﻧﻲ .. ﻏﻤﺾ ﻋﻴﻦ ﻭﺍﻓﺘﺢ ﻋﻴﻦ ﺗﻠﻘﺎﻧﻲ ﻓﻲ ﺍﻟﺘﺎﺳﻊ .. ﻭﻓﺠﻴﺎﺑﻲ ﻫﺪﻯ ﺑﻨﺪﻳﺮﻫﺎ ﻟﻤﺔ ﻛﺒﻴﺮﺓ ﺍﻟﺼﺎﻟﻪ ﺍﻟﺨﺎﺭﺟﻴﻪ ﻻﺑﺪ ﻣﻨﻬﺎ ﻳﺎﻣﻴﻼﺩ
ﻣﻴﻼﺩ ﺑﻀﺠﺮ : ﺗﻲ ﻳﺎﻭﺩﻱ ﺑﺎﻫﻲ .. ﺣﺎﺿﺮ .. ﻏﻴﺮ ﺧﻠﻴﻨﻲ ﻧﺮﻗﺪ ﺗﺎﻋﺐ ﻭﻭﺍﺻﻞ ﺣﺪﻱ .
ﺳﻌﻴﺪﻩ ﺑﺘﺸﻘﻠﻴﺒﺔ ﻋﻴﻮﻥ : ﺍﺭﻗﺪ ..
ﻋﻄﺎ ﻫﺎ ﺑﺎﻟﻈﻬﺮ ﻭ ﻭﺗﻐﻄﺎ ..
ﻭﻫﻲ ﻛﺮﻣﺸﺖ ﻭﺟﻬﻬﺎ ﻭﺩﺍﺭﺗﻠﻪ ﺣﺮﻛﻪ ﺑﺈﻳﺪﻳﻬﺎ ..👐
ﻭﺑﻌﺪﻳﻦ ﺭﻗﺪﺕ ﺣﺘﻰ ﻫﻲ ..
🍁 ﻓﻲ ﺩﺍﺭ ﺗﺎﻧﻴﻪ ﻣﻦ ﻧﻔﺲ ﺍﻟﺤﻮﺵ ..
ﺭﻣﺰﻱ : ﺑﻮﻙ ﻋﺮﻑ؟ ..
ﺭﺍﻧﻴﺎ ﺑﺒﻜﻲ : ﺍﻳﻪ .. ﺍﻧﺼﺪﻡ .. ﺗﻌﺎﺭﻙ ﻣﻊ ﺣﻤﺰﺓ ﻭﺍﻣﻲ ﻉ ﺧﺎﻃﺮ ﺩﺭﻗﻮﺍ ﻋﻠﻴﻪ ﻭﺑﻌﺪﻫﺎ ﻃﻠﻊ ﻣﺶ ﻋﺎﺭﻓﻴﻦ ﻭﻳﻦ ﻣﺸﻲ ..
ﺗﻨﻬﺪﺭﻣﺰﻱ ﻭﻗﺎﻝ : ﻻﺣﻮﻝ ﻭﻻﻗﻮﺓ ﺇﻻ ﺑﺎﻟﻠﻪ ..
ﺭﺍﻧﻴﺎ ﺗﻨﻬﺪﺕ ﺑﺤﺮﻗﻪ ﻭﻫﻲ ﺗﺒﻜﻲ : ﺗﻌﺒﺖ ﻳﺎﺭﻣﺰﻱ .. ﺗﻌﺒﺖ ﻧﻔﺴﻴﺘﻲ ﻫﻠﺒﻪ ﻣﺸﺎﻛﻞ ﻭﻫﻤﻮﻡ .. ﺣﺘﻰ ﻗﺮﺍﻳﺘﻲ ﻣﺶ ﻗﺎﺩﺭﻩ ﻧﺮﻛﺰ ﻓﻴﻬﺎ ..
ﻗﻠﺒﻪ ﺗﻘﻄﻊ ﻉ ﺣﺎﻟﻬﺎ .. ﻛﺎﻥ ﻳﺒﻲ ﻳﻬﻮﻥ ﻋﻠﻴﻬﺎ ﻉ ﻗﺪ ﻣﺎﻳﻘﺪﺭ ..
ﺭﻣﺰﻱ : ﺳﻼﻣﺘﻚ ﻣﻦ ﺍﻟﺘﻌﺐ ﻳﺎﻋﻤﺮﻱ .. ﺭﺍﻧﻴﺎ ﺣﺒﻴﺒﻪ ﻗﻠﺒﻲ .. ﺗﻌﻮﺫﻱ ﻣﻦ ﻟﻠﺸﻴﻄﺎﻥ ﺗﺮﺍ ..
ﺗﻨﻬﺪﺕ ﻭﻫﻲ ﻣﻐﻤﻀﻪ ﻋﻴﻮﻧﻬﺎ ﻭﻫﻲ ﺗﻘﻮﻝ : ﺃﻋﻮﺫ ﺑﺎﻟﻠﻪ ﻣﻦ ﺍﻟﺸﻴﻄﺎﻥ ﺍﻟﺮﺟﻴﻢ ..
ﺭﻣﺰﻱ : ﺻﻠﻲ ﻉ ﺍﻟﻨﺒﻲ ..
ﺭﺍﻧﻴﺎ : ﺍﻟﻠﻬﻢ ﺻﻞ ﻭﺳﻠﻢ ﻭﺑﺎﺭﻙ ﻋﻠﻰ ﻧﺒﻴﻨﺎ ﻣﺤﻤﺪ .
ﺭﻣﺰﻱ : ﺍﻟﻠﻬﻢ ﺻﻞ ﻋﻠﻴﻪ .. ﻭﺗﻮﺍ ﻧﺒﻴﻚ ﺗﻌﺪﻱ ﺗﺘﻮﺿﻲ ﻭﺗﺼﻠﻲ ﺭﻛﻌﺘﻴﻦ ﻭﺍﻧﺘﻲ ﺳﺎﺟﺪﻩ ﻛﻞ ﺷﻲ ﻗﻠﺘﻬﻠﻲ ﻗﻮﻟﻴﻪ ﻟﺮﺏ ﺍﻟﻌﺎﻟﻤﻴﻦ ﻛﻠﻪ ﻳﺎﺭﺍﻧﻴﺎ .. ﺍﺩﻋﻲ ﻟﺨﻮﻙ ﻭﻟﻬﻠﻚ .. ﻣﺎﺗﺨﻠﻲ ﺷﻲ ﻓﻘﻠﺒﻚ ﻃﻠﻌﻲ ﻛﻞ ﺷﻲ .. ﺻﺪﻗﻴﻨﻲ ﺣﺘﺮﺗﺎﺣﻲ ﻭﺍﺟﺪ ﻭﺍﺟﺪ .. ﺑﻌﺪ ﺗﻜﻤﻠﻲ ﻋﺪﻱ ﺍﺭﻗﺪﻱ ﻃﻮﻝ ﻣﺎﺗﻔﻜﺮﻱ ﻓﺸﻲ ﺑﻜﻞ .. ﺑﺎﻫﻲ؟ !
ﺍﺑﺘﺴﻤﺖ ﻭﻗﺎﻟﺖ : ﺑﺎﻫﻲ ..
ﺍﺑﺘﺴﻢ ﻭﻗﺎﻝ : ﺧﻼﺹ ﻣﺎﻝ ﺻﺒﻲ ﻧﻔﺬﻱ ﻫﻲ ..
ﺿﺤﻜﺖ ﻣﻦ ﺑﻴﻦ ﺩﻣﻮﻋﻬﺎ ﻭﻗﺎﻟﺖ : ﺣﺎﺿﺮ ..
ﺭﻣﺰﻱ : ﻣﺎﺗﻨﺴﻴﺶ ﺗﺪﻋﻴﻠﻲ 💓
ﺭﺍﻧﻴﺎ ﺑﺈﺑﺘﺴﺎﻣﻪ : ﻣﻦ ﻏﻴﺮ ﻣﺎﺗﻮﺻﻲ ﺩﻳﻤﺎ ﻧﺪﻋﻴﻠﻚ 💓..
ﺍﺑﺘﺴﻢ ﻭﻗﺎﻝ : ﺗﺼﺪﻗﻲ ﻳﺎﻋﻤﺮﻱ ﺍﻏﻠﻰ ﻭﺍﻫﻢ ﺩﻋﻮﺓ ﻋﻨﺪﻱ ﻫﻲ ﺍﻧﻚ ﺗﻜﻮﻧﻲ ﻧﺼﻴﺒﻲ ﻭﻟﻴﺎ ﺍﻧﻲ ﻭﻧﻜﻤﻞ ﻋﻤﺮﻱ ﻛﻠﻪ ﻣﻌﺎﻙ ..
ﺿﺤﻜﺖ ﺑﺨﺠﻞ : ﻭﺍﻟﻠﻪ ﺣﺘﻰ ﺍﻧﻲ ..
ﺗﻨﻬﺪ ﻭﻗﺎﻝ : ﻳﺎﺍﺍﺍﺭﺏ ..💕 ﻫﻴﺎ ﻳﺎﻗﻠﺒﻲ ﺻﺒﻲ ﻫﻲ ..
ﺭﺍﻧﻴﺎ ﻧﺎﺿﺖ ﻭﻫﻲ ﺗﻘﻮﻝ : ﺍﻫﻮ ﻧﻀﺖ .. ﺳﻼﻡ ﻣﻴﺰﻭ ..
ﺍﺑﺘﺴﻢ ﻣﻦ ﻗﻠﺒﻪ ﻭﻗﺎﻝ : ﻓﻲ ﺍﻣﺎﻥ ﺍﻟﻠﻪ ﻳﺎﻋﻤﺮﻱ ..
ﺻﻜﺮﺕ ﻫﻲ ﺍﻷﻭﻟﻰ .. ﻭﻧﺎﺿﺖ ﻣﻦ ﺩﺍﺭ ﺍﻟﻤﻌﻴﺸﻪ ﻭﻃﻠﻌﺖ ﻣﻨﻬﺎ ﻭﺗﻮﺟﻬﺖ ﻟﻠﺤﻤﺎﻡ ﻃﻮﻝ ..
ﺩﺍﺭﺕ ﺯﻱ ﻣﺎﻭﺻﺎﻫﺎ ﺭﻣﺰﻱ ﻛﻞ ﺍﻟﻠﻲ ﻓﻘﻠﺒﻬﺎ ﻃﻠﻌﺎﺗﻪ ﻓﻜﻞ ﺳﺠﺪﻩ ﻣﻦ ﺍﻟﺮﻛﻌﺘﻴﻦ .. ﻭﺣﺴﺖ ﺑﺮﺍﺣﻪ ﺭﻫﻴﺒﻪ ..🌟
ﺑﻌﺪ ﻛﻤﻠﺖ ﻧﺎﺿﺖ ﻣﻦ ﻣﺼﻼﻫﺎ .. ﻭﻣﺸﺖ ﻃﻮﻝ ﻟﻠﺪﺍﺭ ﺧﺸﺖ ﻟﻘﺖ ﺍﺧﺘﻬﺎ ﺭﺑﺎﺏ ﺗﻬﺪﺭﺯ ﻉ ﺧﻄﻴﺒﻬﺎ ﻭﺗﻀﺤﻚ ..
ﺍﺑﺘﺴﻤﺖ ..
ﺳﻤﻌﺖ ﻓﺠﺄﺓ ﺑﺎﺏ ﺍﻟﺤﻮﺵ ﺍﻧﻔﺘﺢ .. ﻋﺮﻓﺎﺗﻪ ﺑﻮﻫﺎ ...
ﻻﻥ ﺧﻮﻫﺎ ﺣﻤﺰﺓ ﺑﺎﻳﺖ ﻋﻨﺪ ﺻﺎﺣﺒﻪ ..
ﺷﺒﺤﺖ ﻣﻦ ﻓﺘﺤﺔ ﺍﻟﺒﺎﺏ ﻓﺎﺕ ﺑﻮﻫﺎ ﻣﻦ ﻗﺪﺍﻣﻬﺎ ﻭﻃﻮﻝ ﺗﻮﺟﻪ ﻟﺪﺍﺭ ﺍﻟﻨﻮﻡ ..
ﺗﻨﻬﺪﺕ ﻭﺳﻜﺮﺕ ﺍﻟﺒﺎﺏ .. ﻭﺣﻮﻟﺖ ﻣﺼﻠﻴﺘﻬﺎ ﻭﻃﻮﻝ ﻣﺸﺖ ﻟﻔﺮﺍﺷﻬﺎ ..
🍁🍁🍁🍁🍁🍁
ﻣﻜﺎﻟﻤﻪ ﻫﺎﺗﻔﻴﻪ ..
ﺗﺘﻌﺎﻣﻠﻲ ﻣﻊ ﺍﺍﻟﺮﺟﺎﻟﻪ ﻭﺍﺟﺪﺷﻜﻠﻚ ..
ﻟﻤﻴﺎﺀ ﺑﺈﺑﺘﺴﺎﻣﻪ : ﺧﺪﻣﺘﻲ ﻫﻜﻲ ﺗﺒﻲ ﻣﻨﻲ ..
ﻋﻤﺮ : ﺗﺒﻲ ﺍﻟﺤﻖ ﺧﺪﻣﺘﻚ ﻫﺪﻱ ﻣﺎﺧﺸﺘﻠﻲ ﺭﺍﺱ ..
ﻟﻤﻴﺎﺀ : ﻫﻠﺒﻪ ﺑﻨﺎﺕ ﻳﺨﺪﻣﻮﺍ ﻓﻲ ﻣﺠﺎﻝ ﺍﻟﺘﻤﺮﻳﺾ ﺑﺈﺣﺘﺮﺍﻣﻬﻢ ﻣﺎﺣﺪ ﻳﻮﺻﻞ ﻓﻴﻬﻢ .. ﻭﺍﺣﻨﻲ ﻓﻲ ﺍﻟﻌﻴﺎﺩﻩ ﺍﻟﻠﻲ ﻧﺨﺪﻣﻮﺍ ﻓﻴﻬﺎ ﻛﻞ ﺣﺪ ﺑﺈﺣﺘﺮﺍﻣﻪ ..
ﻋﻤﺮ : ﺍﻛﻴﺪ ﻋﺎﺭﻑ .. ﻟﻜﻦ ﻣﺨﺎﻟﻄﺔ ﺍﻟﺮﺟﺎﻟﻪ ﻭﺍﺟﺪ ﻏﻠﻂ ..
ﻟﻤﻴﺎﺀ ﺑﺈﺑﺘﺴﺎﻣﻪ : ﻣﺎﻧﺨﺘﻠﻄﻮﺵ ﺑﻴﻬﻢ ﺍﻻ ﻓﻲ ﺣﺪﻭﺩ ﺍﻟﺨﺪﻣﻪ ﻭﺑﺴﺲ ..
ﻋﻤﺮ ﺑﺈﺑﺘﺴﺎﻣﻪ : ﻫﻮ ﻫﺪﻯ .. ﺍﻧﺘﻲ ﺑﺎﻟﺬﺍﺕ ﺩﻳﺮﻱ ﺣﺪﻭﺩ ﻭﺍﺟﺪﻩ ..
ﺭﺩﺕ ﺑﻀﺤﻜﻪ : ﻟﻴﺶ؟
ﺗﻨﻬﺪ ﺑﻌﺪﻳﻦ ﻗﺎﻝ : ﻫﻜﻲ ..
ﺿﺤﻜﺖ ﻭﻗﺎﻟﺖ : ﺣﺎﺿﺮ
ﺍﺑﺘﺴﻢ ﻭﻗﻠﺒﻪ ﻳﺪﻕ ﺑﻘﻮﺓ 💓
🍃 ﻧﺴﺎﺗﻪ ﻟﻴﻠﻰ ﻭﻣﺎﻳﺠﻲ ﻣﻨﻬﺎ ﻧﺴﻲ ﺣﺘﻰ ﺍﻧﻬﺎ ﺗﻘﺮﺑﻠﻬﺎ .. ﺑﺲ ﻣﻊ ﻫﺬﺍ ﻣﺎﺯﺍﻝ ﻣﺎﻳﺒﻴﺶ ﻳﺼﺮﺡ ﺑﻤﺸﺎﻋﺮﻩ ﺍﻟﻠﻲ ﺍﻧﺪﻓﻌﺖ ﺑﻘﻮﺓ ﺍﺗﺠﺎﻩ ﻟﻤﻴﺎﺀ ﻷﻥ ﻳﺸﻮﻑ ﻓﻴﻬﺎ ﺗﺘﻌﺎﻣﻞ ﻣﻌﺎﻩ ﻛﺼﺪﻳﻖ ﻓﻘﻂ ﻻﻏﻴﺮ 🍃
🍁 ﺣﺘﻰ ﺧﻮﻩ
ﺧﻮﻩ ﻛﺬﻟﻚ ﻳﺘﻌﺎﻣﻞ ﻣﻊ ﺍﻹﻧﺴﺎﻧﻪ ﺍﻟﻠﻲ ﻳﻜﻨﻠﻬﺎ ﻣﺸﺎﻋﺮ ﻗﻮﻳﺔ ﻗﺎﻋﺪﻩ ﺗﺸﻌﻞ ﻓﻲ ﻗﻠﺒﻪ ﻧﺎﺭ ﺣﺐ ﻗﺪﻳﻢ .. ﻭﻧﺎﺭﻩ ﺗﻮﺍ ﺯﺍﺩﺕ ﻗﻮﻳﺖ .. ﻛﺼﺪﻳﻘﻪ ..
ﻫﺎﻧﻴﺒﺎﻝ ﻭﻟﺪ 31 ﺳﻨﻪ ... ﻣﺶ ﻫﻮ ﻧﻔﺴﻪ ﻫﺎﻧﻴﺒﺎﻝ ﻭﻟﺪ 17 ﺳﻨﻪ ..
ﻗﻠﺒﻪ ﻟﻴﻦ ﻫﻠﺒﻪ ﻭﻻ ﺣﺴﺎﺱ ﺑﺰﻳﺎﺩﻩ ﺍﺗﺠﺎﻫﻬﺎ .. ﻳﺘﻌﺎﻣﻞ ﻣﻌﺎﻫﺎ ﻏﺎﻳﻪ ﻓﻲ ﺍﻟﻠﻄﻒ .. ﻳﺒﻲ ﻳﺤﻮﻝ ﻣﻨﻬﺎ ﻛﻞ ﺷﻲ ﻟﻴﻪ ﻋﻼﻗﻪ ﺑﺎﻟﺨﻮﻑ ﺍﺗﺠﺎﻫﻪ ﺑﺶ ﺗﺮﺟﻌﻠﻪ ... ﻭﻳﺮﺟﻌﻮﺍ ﻳﻜﻤﻠﻮﺍ ﺣﺐ ﻭﻗﻒ ﻓﻲ ﺑﺪﺍﻳﺔ ﻃﺮﻳﻘﻪ ﺍﻧﺴﺮﻕ ﻣﻨﻬﻢ ﺳﺮﻗﻪ ﻓﻲ ﻟﺤﻈﻪ ..
ﻫﺎﻧﻴﺒﺎﻝ : ﻛﻮﻳﺲ ﺭﺑﻲ ﻳﺘﻤﻢ ﻋﻠﻰ ﺧﻴﺮ ..
ﻋﺮﻭﺑﻪ ﺑﻨﺒﺮﺓ ﺑﺎﻛﻴﻪ : ﻣﻦ ﻫﻸ ﻋﻢ ﻓﻜﺮ ﻛﻴﻒ ﺭﺡ ﻳﻜﻮﻥ ﺍﻟﺒﻴﺖ ﺑﺪﻭﻧﺎ .. ﺷﻮﺑﺪﻱ ﺍﻋﻤﻞ ﻭﻫﻲ ﺑﻌﻴﺪﻩ ﻋﻨﻲ ..
ﺿﺤﻚ ﻭﻗﺎﻝ؛ﻣﺎﻙ ﻗﻌﺪﺗﻲ ﺑﻌﻴﺪﻩ ﻋﻨﻬﺎ 11 ﻋﺎﻡ !
ﻫﻲ ﻗﺎﻟﺖ : ﻭﻣﺎﻋﺎﺩ ﺑﺪﻱ ﺑﻌﺪ ﺍﻛﺜﺮ ﻣﻦ ﻫﻴﻚ ..
ﻫﻮ ﺍﺑﺘﺴﻢ ﺑﺄﻟﻢ ..
ﻛﻤﻠﺖ ﺗﻘﻮﻝ : ﺗﻌﺮﻑ ﻧﺪﻣﺖ ﻛﺜﻴﺮ ﺍﻧﻲ ﺳﻌﻴﺘﻠﻬﺎ ﺑﺘﻌﻴﻴﻦ ﺍﻟﻤﺴﺘﺸﻔﻰ ﻣﺎﺗﻮﻗﻌﺖ ﺍﻧﻮ ﺑﻬﺎﻟﺴﺮﻋﻪ ﻳﺠﻴﻬﺎ ﻋﺮﻳﺲ ..
ﻫﺎﻧﻴﺒﺎﻝ : ﻫﻬﻬﻬﻬﻬﻬﻬﻬﻬﻬﻬﻬﻪ ..
ﺿﺤﻜﺖ ﺑﺈﺣﺮﺍﺝ ﻣﻦ ﺑﻴﻦ ﺩﻣﻮﻋﻬﺎ : ﺧﻼﺹ ﻻﺑﺌﺎ ﺗﻀﺤﻚ ..
ﻭﻫﻮ ﻣﺎﺯﺍﻝ ﻣﻜﻤﻞ ﺿﺤﻚ ..
ﻋﺮﻭﺑﻪ : ﻫﺎﻧﻴﺒﺎﺍﺍﻝ ..
ﻫﺪﺍ ﺿﺤﻚ ﻭﻗﺎﻝ : ﻣﺶ ﻗﺘﻠﻚ ﻗﺒﻞ ﺍﻧﺎﻧﻴﻪ ..
ﻋﺮﻭﺑﻪ : ﻻ ﻣﻮ ﺃﻧﺎﻧﻴﻪ ﺑﺲ ... ﺗﻨﻬﺪﺕ .. ﺑﺲ ﺍﻧﺎ ﻛﺜﻴﺮ ﻣﺸﺘﺎﻗﻪ ﻟﻜﻞ ﺷﻲ ﻫﻮﻥ ﺑﺪﻱ ﻗﻀﻲ ﻭﻗﺖ ﻃﻮﻳﻞ ﻣﻌﻮﻥ ﺑﺪﻱ ﺍﺷﺒﻊ ﻣﻨﻮﻥ ..
ﺗﻨﻬﺪ ﻭﻗﺎﻝ : ﻭﻛﻞ ﺷﻲ ﻫﻨﻰ ﺍﺳﺘﺎﺣﺸﻚ ﻭﻳﺒﻲ ﻳﺸﺒﻊ ﻣﻨﻚ ..
ﻓﻨﺼﺖ ﻭﻗﻠﺒﻬﺎ ﺩﻕ ﺑﺎﻟﻘﻮﺓ ..💓 ﻭﻗﻌﺪﺕ ﺳﺎﻛﺘﻪ ..
ﻫﺎﻧﻴﺒﺎﻝ : ﻣﺎﻧﺒﻴﻜﺶ ﺗﺮﺩﻱ ﻋﻠﻴﺎ .. ﻧﺒﻴﻚ ﺗﺴﻤﻌﻲ ﻭﺑﺲ ..
ﺑﻠﻌﺖ ﺭﻳﻘﻬﺎ ﻭﺩﻣﻮﻋﻬﺎ ﺯﺍﺩﻭ ﻧﺰﻟﻮﺍ ...
ﺍﺑﺘﺴﻢ ﻭﻗﺎﻝ : ﻋﺎﺭﻓﻚ ﺗﺒﻜﻲ .. ﻭﻋﺎﺭﻓﻚ ﺧﺎﻳﻔﻪ .. ﻭﻋﺎﺭﻑ ﺍﻧﻚ ﻣﻠﺨﺒﻄﻪ .. ﻋﺎﺭﻑ ﻭﻓﺎﻫﻢ ﻛﻞ ﺷﻲ .. ﻋﺎﺭﻑ ﺍﻟﻠﻲ ﻓﻘﻠﺒﻚ ﻣﻦ ﻋﻴﻮﻧﻚ ﻧﻌﺮﻓﻪ ﻣﻦ ﻧﺒﺮﺓ ﺍﻟﺼﻮﺕ ﻋﺎﺭﻓﻪ .. ﻭﻧﺒﻴﻚ ﺍﻧﺘﻲ ﺗﻌﺮﻓﻲ ..
ﻫﻲ ﺗﺴﻤﻊ ﻭﺩﻣﻮﻋﻬﺎ ﺳﻴﻞ ..
ﺗﻨﻬﺪ ﻭﺣﻂ ﻳﺪﻩ ﻉ ﺟﺒﻬﺘﻪ ﺑﻌﺪﻳﻦ ﻧﺰﻟﻬﺎ ﻭﻗﺎﻝ : ﻧﺒﻴﻚ ﺗﻌﺮﻓﻲ ﺍﻥ ﻋﻤﺮﻱ ﻣﺎﻧﺴﻴﺖ .. ﻋﻤﺮﻱ ..
ﺭﺷﻔﺖ .. ﻭﺣﻄﺖ ﻳﺪﻫﺎ ﻉ ﻓﻤﻬﺎ ﺑﺶ ﺗﻜﺘﻢ ﻋﺒﺮﺗﻬﺎ ..
ﺑﻠﻊ ﺭﻳﻘﻪ ﻭﻗﺎﻝ : ﺗﺼﺒﺤﻲ ﻉ ﺧﻴﺮ ... ﻭﺻﻜﺮ ﻫﻮ ﻫﺎﻟﻤﺮﻩ ..
ﺯﻓﺮ ﺑﻘﻮﺓ ... ﻭﺭﻓﻊ ﺭﺍﺳﻪ ﻓﻮﻕ ﻏﻤﺾ ﻋﻴﻮﻧﻪ .. ﻭﻛﺎﻧﺖ ﻧﺒﻀﺎﺕ ﻗﻠﺒﻪ ﻗﻮﻳﻪ ﻭﻣﻮﺟﻌﻪ ..
ﻛﺎﻥ ﺧﻮﻩ ﻣﻦ ﻓﻮﻕ ﺍﻟﺴﻄﺢ ﻳﺸﻮﻓﻠﻪ .. ﻭﻫﻮ ﻳﺨﻤﻢ ﻓﻴﻪ ..
ﻋﻤﺮ " ﻭﺍﻟﻠﻪ ﻣﺎﺣﺘﺠﻨﻲ ﺣﺎﺟﻪ ﻏﻴﺮ ﻭﺟﻊ ﺍﻟﻘﻠﺐ ﻋﻤﺮﻫﺎ ﻣﺎﺣﺘﻜﻮﻥ ﻟﻴﻚ .."
🍁🍁🍁🍁🍁
ﻣﺮﺍﻡ ... ﻳﺎﻣﺮﺍﻡ ..
ﻗﺎﻣﺖ ﺭﺍﺳﻬﺎ ﻣﻦ ﻛﺮﺍﺳﻪ ﺍﻟﺘﺤﻀﻴﺮ ﻭﺷﺒﺤﺖ ﻟﻠﺒﺎﺏ : ﺧﺸﻲ ﻳﻤﻲ ..
ﻓﺘﺤﺖ ﺍﻟﺒﺎﺏ ﺍﻣﻬﺎ ﻭﺧﺸﺖ :. ﻗﺎﻋﺪﻩ ﺳﺎﻫﺮﻩ ..
ﻣﺮﺍﻡ : ﻧﺤﻀﺮ ﻓﻲ ﺍﻟﺪﺭﺱ ﻣﺎﺯﻟﺖ ..
ﻣﺮﺿﻴﻪ : ﺑﺎﻫﻲ ﺭﺑﻲ ﻳﻌﺎﻭﻧﻚ ... ﺍﻳﻪ ﺷﻦ ﺗﺒﻴﻨﻲ ﻧﻘﻮﻝ ﻏﺪﻭﺓ ﻛﺎﻥ ﺗﻼﻗﻴﺖ ﻣﻊ ﺍﻟﺤﺎﺟﻪ ﻓﻄﻴﻤﻪ ﻓﻲ ﺣﻮﺵ ﺍﻟﺤﺎﺟﻪ ﺳﻠﻴﻤﻪ ﻭﻧﺸﺪﺗﻨﻲ ..
ﺗﻨﻬﺪﺕ ﻭﻗﺎﻟﺖ : ﻣﺎ ﻓﻴﺶ ﻧﺼﻴﺐ ﻳﻤﻲ ..
ﺷﺒﺤﺘﻠﻬﺎ ﺍﻣﻬﺎ ﺷﻮﻳﻪ ﻭﻗﺎﻟﺖ : ﺑﺎﻫﻲ ﻟﻌﻨﺪ ﺍﻣﺘﻲ .. ﻣﺎﻧﻜﺶ ﺻﻐﻴﺮﺓ ﻳﺎﺑﻨﺘﻲ ..
ﻣﺮﺍﻡ ﺑﻀﺤﻜﻪ : ﺭﺍﻧﻲ ﻣﺶ ﻛﺒﻴﺮﺓ ﻭﺍﺟﺪ .. ﺍﺑﺘﺴﻤﺖ ﻭﻗﺎﻟﺖ .. ﻣﺎﻧﺒﻴﺶ ﺗﻮﺍ ﻳﻤﻲ ﻣﺎﺯﺍﻝ ﺑﻜﺮﻱ ..
ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻧﺎﺿﺖ : ﺭﺑﻲ ﻳﺠﻴﺒﻠﻚ ﺍﻟﻠﻲ ﻓﻴﻪ ﺍﻟﺨﻴﺮ ..
ﻣﺮﺍﻡ ﺑﺈﺑﺘﺴﺎﻣﻪ : ﻳﺎﺭﺏ ..
ﻣﺮﺿﻴﻪ : ﺗﺼﺒﺤﻲ ﻉ ﺧﻴﺮ ..
ﻣﺮﺍﻡ : ﻗﺪﺍﻣﻚ ﻛﻞ ﺧﻴﺮ ..
ﻣﺸﺖ ﺍﻣﻬﺎ ﻃﻠﻌﺖ ﻣﻦ ﺍﻟﺪﺍﺭ ﻭﺳﻜﺮﺕ ﺍﻟﺒﺎﺏ ..
ﺗﻨﻬﺪﺕ ﺑﻀﻴﻖ ﻭﻗﺎﻟﺖ ﻓﻨﻔﺴﻬﺎ " ﻛﺎﻥ ﻓﻴﻪ ﺍﻟﺨﻴﺮﻩ ﻟﻴﻚ ﺭﺑﻲ ﻳﺠﻌﻠﻪ ﻣﻦ ﻧﺼﻴﺒﻚ ﻳﺎﺑﻨﺘﻲ "
🍃 ﺍﻡ ... ﻭﻓﺎﻫﻤﻪ ﻉ ﺑﻨﺘﻬﺎ ﻛﻮﻳﺲ .. ﻏﻴﺮ ﻛﺎﻧﺖ ﺍﺩﻳﺮ ﻓﺮﻭﺣﻬﺎ ﻣﺶ ﻓﺎﻫﻤﻪ .. ﻣﺮﺿﻴﻪ ﻳﻌﺰ ﻋﻠﻴﻬﺎ ﻫﺎﻧﻴﺒﺎﻝ ﻭﻛﺎﻧﺖ ﺗﺘﻤﻨﺎﻩ ﻳﺎﺧﺪ ﻭﺣﺪﻩ ﻣﻦ ﺑﻨﺎﺗﻬﺎ .. ﺑﺲ ﺟﺎﻫﻢ ﻛﻠﻬﻢ ﺍﻟﻨﺼﻴﺐ ﻣﻊ ﻏﻴﺮﻩ .. ﺍﻻ ﻣﺮﺍﻡ .. ﺍﻟﻠﻲ ﺑﺪﺕ ﺗﻼﺣﻆ ﻋﻠﻴﻬﺎ ﺍﻧﻬﺎ ﻣﻴﺎﻟﺔ ﻟﻴﻪ ﻫﻠﺒﻪ .. ﻭﻳﺘﻠﺨﺒﻂ ﺣﺎﻟﻬﺎ ﻭﻳﻦ ﺗﺠﻲ ﺳﻴﺮﺗﻪ .. ﻭﻟﻤﺎ ﻋﻘﺪ ﻗﺮﺍﻧﻪ ﻉ ﻣﺠﺪﻭﻟﻴﻦ ﻛﺎﻧﺖ ﺣﺎﺳﻪ ﺑﻮﺟﻊ ﺑﻨﺘﻬﺎ ..
ﺑﺲ ﺻﻌﺐ ﺗﻮﺍﺳﻴﻬﺎ .. ﻓﻲ ﺣﺪﻭﺩ ﺑﻴﻦ ﺍﻷﻡ ﻭﺑﻨﺘﻬﺎ ﻓﻬﺎﻟﻤﻮﺍﻗﻒ ..
ﺑﻨﺘﻬﺎ ..
ﺍﻟﻠﻲ ﻛﺎﻧﺖ ﺗﻜﻤﻞ ﻓﻲ ﺗﺤﻀﻴﺮ ﺍﻟﺪﺭﺱ ﻭﺩﻣﻮﻋﻬﺎ ﻳﻨﺰﻟﻮﺍ ﻭﺗﻤﺴﺢ ﻓﻴﻬﻢ 💔..
🍃🍃🍃🍃🍃
ﻋﺪﻭﺍ ﺍﻷﻳﺎﻡ .. ﻭﺧﺶ ﺫﻭﺍﻟﺤﺠﻪ ..
ﻭﺍﻟﻨﺎﺱ ﺑﺪﺕ ﺗﺴﺘﻌﺪ ﻟﻌﻴﺪ ﺍﻷﺿﺤﻰ ....
ﻭﺳﻮﻕ ﺍﻟﺴﻌﻲ ﺑﺪﻱ ﺑﻨﺸﺎﻃﻪ .. ﻭﺍﺳﻌﺎﺭ ﺍﻷﺿﺎﺣﻲ ﺍﻟﻮﻃﻨﻴﻪ ﺑﺪﺕ ﺗﻐﻼ ﻭﻓﻮﻕ ﻣﻘﺪﺭﺓ ﻫﻠﺒﻪ ﻧﺎﺱ ..
ﻭﺧﺶ ﻟﻠﺴﻮﻕ ﺍﻟﺨﺮﻭﻑ ﺍﻷﺟﻨﺒﻲ ..
" ﺍﺳﺒﺎﻧﻲ .. ﺭﻭﻣﺎﻧﻲ "...
ﻭﻋﺎﺩ ﺑﺪﻳﻨﺎ ﺑﺎﻟﺘﻄﻮﻳﻖ ﻉ ﺑﻌﻀﻨﺎ ﺣﺘﻰ ﻓﺎﻟﻌﺒﺎﺩﺍﺕ ﻭﺍﻟﺸﻌﺎﺋﺮ ..
ﺍﻟﻠﻲ ﻳﺸﺮﻱ ﺍﻹﺳﺒﺎﻧﻲ ﻳﻬﺰﻭﺍ ﻋﻠﻴﻪ ..
ﻟﺴﺒﺒﻴﻦ ..
ﺍﻭﻟﻬﻢ ﺍﻟﻔﺮﻕ ﺑﻴﻦ ﺷﻜﻞ ﺍﻟﺨﺮﻭﻑ ﺍﻟﻮﻃﻨﻲ ﻭﺍﻟﺨﺮﻭﻑ ﺍﻷﺟﻨﺒﻲ ..
ﻭﺗﺎﻧﻴﻬﻢ ﻓﺮﻕ ﺍﻟﺴﻌﺮ ..
ﺑﺮﻏﻢ ﺍﻥ ﺻﺤﻴﺎ ﻭﻓﻲ ﺍﻟﻨﻈﺎﻓﻪ ﺍﻹﺳﺒﺎﻧﻲ ﻣﺎﺯﺍﻝ ﺧﻴﺮ ﺑﻬﻠﺒﻪ ﻣﻦ ﺍﻟﻮﻃﻨﻲ ....
🍃 ﻻﺍﺧﻔﻴﻜﻢ ﺳﺮﺍ ..
ﻗﻌﺪﻧﺎ ﺳﻨﻮﺍﺕ ﻧﻀﺤﻮﺍ ﺑﺎﻹﺳﺒﺎﻧﻲ .. ﻭﻳﺎﻗﺪﺍﺵ ﺗﻌﺮﺿﻨﺎ ﻟﻠﺴﺨﺮﻳﻪ ﻭﺍﻟﺘﻬﻜﻢ ﻣﻦ ﻛﻞ ﺍﻟﻠﻲ ﺣﻮﺍﻟﻴﻨﺎ ..
ﺍﻳﻪ ﻭﺍﻟﻠﻪ ﺳﺨﺮﻳﻪ ﻭﺗﻬﻜﻤﺎﺕ .....
ﻛﻨﺎ ﻧﺘﻮﺟﻌﻮﺍ ﻣﻦ ﺍﻟﻠﻲ ﻧﺴﻤﻌﻮﻩ ﻟﻜﻦ ﺳﺮﻋﺎﻥ ﻣﺎﻧﺘﺠﺎﻫﻠﻮﺍ ﻭﻧﻌﻴﺸﻮﺍ ﺍﺟﻮﺍﺀ ﺍﻟﻌﻴﺪ ﻭﺭﺏ ﺍﻟﻌﺎﻟﻤﻴﻦ ﻳﺒﺎﺭﻛﻠﻨﺎ ﻓﻴﻪ ﻫﻠﺒﻪ ..
🍁 ﺑﺲ ﻓﻲ ﻣﻦ ﻛﺎﻥ ﻳﻬﺘﻢ ﻫﻠﺒﻪ ﻟﻨﻈﺮﺓ ﺍﻟﻨﺎﺱ ﻓﻲ ﺣﺎﺟﻪ ﺯﻱ ﻫﺎﺩﻱ ..
ﺯﻳﻨﺐ : ﻻ ﻭﺍﻟﻠﻪ ﻣﺎﻧﻘﺪﺭ .. ﻧﻬﺎﺭﻱ ﻋﻘﺎﺑﻬﺎ ﻧﻀﺤﻮﺍ ﺑﺈﺳﺒﺎﻧﻲ ﻻ ﻭﺍﻟﻠﻪ ﻣﺎﺻﺎﻳﺮﺓ ..
ﺧﻴﺮﻱ : ﻭﺍﻟﻠﻪ ﻭﻻ ﺍﻧﻲ ﻧﺒﻴﻪ ﻟﻜﻦ ﻣﺎﻋﻨﺪﻳﺶ ﻛﻴﻒ ﻳﺎﺯﻳﻨﺐ ﻣﺶ ﺧﺎﻓﻲ ﻋﻠﻴﻚ ..
ﺯﻳﻨﺐ : ﺧﻼﺹ ﻣﺶ ﻻﺯﻡ ﺧﺮﻭﻑ ﺟﻴﺐ ﺣﺘﻰ ﺳﻘﻴﻄﻪ ﻭﺧﻼﺹ .. ﻭﻻ ﻧﻀﺤﻮﺍ ﺑﺎﻹﺳﺒﺎﻧﻲ ﺍﻟﻤﻌﻔﻦ ﻫﺪﺍ ..
ﺗﻨﻬﺪ ﻭﻫﺰ ﺭﺍﺳﻪ ﺑﺈﻳﺠﺎﺏ ..
🍁🍁🍁🍁
ﺧﺪﻳﺖ ﻭﺍﺣﺪ ﻟﻴﻨﺎ ﻭﻭﺍﺣﺪ ﻷﻣﻲ ..
ﻧﻌﻴﻤﻪ : ﺭﺑﻲ ﻳﺒﺎﺭﻙ ﻓﻴﻚ ..
ﺍﺑﺘﺴﻢ ﻭﻗﻌﻤﺰ ﺑﺤﺪﺍﻫﺎ .. ﻭﺣﺎﻭﻃﻬﺎ ﺑﻴﺪﻩ ﻭﺧﺪﺍﻫﺎ ﻓﺤﻀﻨﻪ ..
ﻧﻌﻴﻤﻪ ﺑﻀﺤﻜﻪ : ﺷﻦ ﺟﺎﻙ .
ﻋﺒﺪﺍﻟﺴﻼﻡ : ﻧﺤﻀﻦ ﻓﻲ ﻣﺮﺗﻲ ﺣﺒﻴﺒﺘﻲ .. ﻋﻴﺐ ﻭﻻ ﺣﺮﺍﻡ ..
ﻧﻌﻴﻤﻪ : ﻫﻬﻬﻬﻪ .. ﺣﻲ ﻋﻠﻴﻨﺎ ﺭﺍﻫﻲ ﻧﻮﺭ ﻓﻲ ﺍﻟﺤﻮﺵ ..
ﻋﺒﺪﺍﻟﺴﻼﻡ ﺑﻀﺤﻜﻪ؛ﻋﺎﺭﻑ ﺧﻠﻴﺘﻬﺎ ﺍﺩﻳﺮ ﻓﻲ ﺍﻟﻘﻬﻮﺓ ..
ﺿﺤﻜﺖ ﻭﺳﻜﺘﺖ ..
ﺗﻨﻬﺪ ﻭﻫﻮ ﻳﺬﻛﺮ ﻓﻴﻬﺎ ﺍﻣﺲ ..
ﻛﻴﻒ ﻛﺎﻧﺖ ﻛﻞ ﺩﻗﻴﻘﻪ ﺗﻨﻮﺽ ﺗﺸﻮﻑ ﻓﻴﻪ ..
ﻭﻳﻦ ﻳﻨﻔﺰﻉ ﻓﻨﻮﻣﻪ ﺗﻨﻮﺽ ﺍﻃﺒﻄﺐ ﻋﻠﻴﻪ ﻭﺗﻬﺪﻳﻪ ..
ﺑﻌﺪ ﻣﻮﺕ ﺑﻮﻩ ﺑﺪﻱ ﻳﺸﻮﻑ ﻓﻲ ﻛﻮﺍﺑﻴﺲ ﻫﻠﺒﻪ .. ﻭﻧﻔﺴﻴﺘﻪ ﺗﻌﺒﺖ
ﻭﻳﻦ ﻳﺬﻛﺮ ﻓﻴﻪ ﻟﻤﺎ ﻛﺎﻥ ﺟﺜﺔ ﻫﺎﻣﺪﻩ ﻓﻲ ﺳﻴﺎﺭﺗﻪ ﻳﺨﺶ ﻓﻨﻮﺑﺔ ﺑﻜﺎﺀ ..
ﻛﺎﻧﺖ ﻧﻌﻴﻤﻪ ﺗﺤﺘﻮﻱ ﻓﻴﻪ ﻭﺗﻬﺪﻳﻪ ﻭﺗﻘﺮﺍ ﻟﻴﻪ ..
ﺑﺮﻏﻢ ﺍﻧﻬﺎ ﻗﻌﺪﺕ ﺑﻴﻦ ﻃﻔﻠﻬﺎ ﺍﻟﺮﺿﻴﻊ ﻭﺑﻴﻨﻪ ﻫﻮ .. ﺗﻌﺐ ﻭﺷﻘﺎ ﻭﻗﻠﺔ ﻧﻮﻡ ﻭﺭﺍﺣﻪ ..
ﻟﻜﻦ ﻭﻻﻣﺮﺓ ﺗﺬﻣﺮﺕ ﻭﺷﻜﺖ ..
ﻋﺒﺪﺍﻟﺴﻼﻡ : ﺗﻌﺮﻓﻲ ﺷﻦ ﺧﺎﻃﺮ ﻋﻠﻴﺎ .
ﻧﻌﻴﻤﻪ : ﺷﻨﻲ ..
ﻋﺒﺪﺍﻟﺴﻼﻡ : ﻧﺎﺧﺪ ﺍﺟﺎﺯﺓ ﻓﻌﻄﻠﺔ ﻧﺺ ﺍﻟﺴﻨﻪ ﻭﻧﻤﺸﻮﺍ ﻟﺘﻮﻧﺲ ..
ﻧﻌﻴﻤﻪ : ﻭﻳﻌﻄﻮﻙ ﺍﺟﺎﺯﺓ ﻋﺎﺩﻱ ﻗﻌﺪﺕ ﻓﺘﺮﺓ ﻏﺎﻳﺐ ..
ﻋﺒﺪﺍﻟﺴﻼﻡ؛ﻟﻴﺎ ﻋﺬﺭﻱ .. ﻭﺍﻧﻲ ﺍﺳﺎﺳﺎ ﻣﺎﺧﺪﻳﺘﺶ ﺍﺟﺎﺯﺍﺕ ﻣﻦ ﻟﻤﺎ ﺑﺪﻳﺖ ﺧﺪﻣﻪ .. ﻫﺎﺩﻱ ﺍﻭﻝ ﺍﺟﺎﺯﺓ ﻟﻴﺎ ..
ﺍﺑﺘﺴﻤﺖ ﻭﻗﺎﻟﺖ : ﻛﺎﻥ ﻫﻜﻲ ﺑﺎﻫﻲ ..
ﻉ ﺧﺸﺔ ﻧﻮﺭ ﻟﻤﺎ ﺷﺎﻓﺘﻬﻢ ﻫﻜﻲ ﺍﻧﺼﺪﻣﺖ ..
ﻃﻮﻝ ﻭﺧﺮﺕ ﻭﻫﺮﺑﺖ ..
ﺍﻣﻬﺎ ﺑﻌﺪﺕ ﻭﻫﻲ ﺗﻀﺤﻚ ﺑﺈﺣﺮﺍﺝ ..
ﻭﻋﺒﺪﺍﻟﺴﻼﻡ ﻗﻌﺪ ﻳﻀﺤﻚ ﻭﻫﻮ ﻳﻨﺎﺩﻱ : ﺗﻌﺎﻟﻲ ﺑﺎﺑﺎ ﻧﻮﻭﻭﺭ .. ﻫﻬﻬﻬﻪ ..
🍁🍁🍁🍁🍁
ﺑﺮﺍ ﺍﺭﻓﻌﻪ ﻭﻗﻮﻟﻠﻬﺎ ﻫﺪﻳﻪ .
ﺳﻌﺪ : ﻣﺎﻧﻘﺪﺭﺵ ﺭﺍﺟﻠﻬﺎ ﻳﺘﺤﺴﺲ ﻳﺎﻛﻔﺎﻳﻪ ..
ﻛﻔﺎﻳﻪ : ﺍﻋﺮﻑ ﻛﻴﻒ ﺗﺘﺼﺮﻑ ﻳﺎﺳﻌﺪ .. ﻣﻌﻘﻮﻟﻪ ﻧﻌﻴﺪﻭﺍ ﻋﺎﺩﻱ ﻭﺍﺧﺘﻚ ﻣﺴﻜﻴﻨﻪ ﺗﻘﻌﺪ ﻫﻜﻲ ﻭﺻﻐﺎﺭﻫﺎ ﻣﺘﺸﻮﻓﻴﻦ .. ﻭﺍﻟﻠﻪ ﺍﻣﺲ ﻗﻠﺒﻲ ﺗﻘﻄﻊ ﻭﻫﻤﺎ ﻳﻬﺪﺭﺯﻭﺍ ﻣﻊ ﺻﻐﺎﺭ ﺧﻮﺍﻟﻬﻢ ﻉ ﺍﻟﺨﺮﻓﺎﻥ ﻭﻳﻘﻮﻟﻮﺍ ﺣﻨﻲ ﻣﺶ ﺷﺎﺭﻳﻴﻦ .. ﻭﺧﻮﺍﻟﻬﻢ ﻛﻞ ﻭﺍﺣﺪ ﺭﺑﻲ ﻣﻮﺳﻊ ﻋﻠﻴﻪ ﻭﻋﺎﻃﻴﻪ .. ﺭﺍﻫﻮ ﺍﻟﻌﻴﺐ ﻳﺮﻛﺒﻚ ﺍﻧﺖ ﺍﻛﺜﺮ ﻭﺍﺣﺪ ﻷﻧﻚ ﺧﻮﻫﺎ ﺍﻟﻜﺒﻴﺮ ..
ﺳﻌﺪ ﻫﺰ ﺭﺍﺳﻪ ﺑﺈﻳﺠﺎﺏ ﻭﻗﺎﻝ : ﻏﺪﻭﺓ ﺇﻥ ﺷﺎﺀ ﺍﻟﻠﻪ ﻧﺎﺧﺪﻟﻬﺎ ..
ﻛﻔﺎﻳﻪ ﺑﻀﺤﻜﻪ : ﺍﻳﻮﻩ ﻫﻮ ﻫﺪﺍ ﺳﻌﺪﻭ ﺭﺍﺟﻠﻲ ﺍﻟﻠﻲ ﻣﺎﻓﻴﺶ ﻣﻨﻪ ..
ﺳﻌﺪ؛ﻫﻬﻬﻬﻬﻬﻬﻬﻬﻪ ..
🍁🍁🍁🍁
ﺍﻟﻴﻮﻡ ﺍﻟﺜﺎﻣﻦ ﻣﻦ ﺫﻱ ﺍﻟﺤﺠﻪ ..
ﻛﺎﻧﻮﺍ ﺍﻫﻞ ﻃﺎﺭﻕ ﺟﺎﻳﻴﻦ ﻭﺟﺎﻳﺒﻴﻦ ﻛﺒﻴﺮﺓ ﺭﺑﺎﺏ ..
ﻣﺎﺧﻠﻮﺍ ﻣﺎﺟﺎﺑﻮﺍ ﻣﻦ ﻛﻞ ﺷﻲ ﺗﻘﻮﻝ ﺟﺎﻳﺒﻴﻦ ﺳﺒﻴﺰﺓ ﻋﺮﺱ ..
ﻭﻣﻌﺎﻫﻢ ﻛﺒﺶ ﺍﻣﻠﺢ ..
ﻓﺮﺣﻮﺍ ﺑﻴﻪ ﻣﻦ ﺩﺍﺧﻠﻬﻢ ﻓﺮﺣﻪ ﻻﺗﻮﺻﻒ ..
ﺍﻟﺴﺎﻋﻪ 11:00 ﻟﻴﻼ ..
ﺭﺑﺎﺏ : ﻣﺪﺍﻳﺮﻳﻦ ﻉ ﻗﺮﻭﻧﻪ ﻧﺴﺘﺮﻭﺍﺕ ..
ﻃﺎﺭﻕ ﺑﻀﺤﻜﻪ : ﻫﺬﻳﻦ ﺧﻮﺍﺗﻲ ﻭﺍﺗﻴﻜﻴﺘﻬﻦ ..
ﺭﺑﺎﺏ : ﻫﻬﻬﻬﻬﻬﻬﻪ .. ﺑﻌﺪﻳﻦ ﺍﺑﺘﺴﻤﺖ ﻭﻗﺎﻟﺖ .. ﺭﺑﻲ ﻣﺎﻳﺤﺮﻣﻨﻲ ﻣﻨﻜﻢ ﻭﺍﻟﻠﻪ ﺑﺪﻳﺖ ﻧﺤﺲ ﺍﻧﻬﻢ ﻋﻴﻠﺘﻲ ﺍﻟﺘﺎﻧﻴﻪ .. ﻭﻋﻤﺘﻲ ﺟﻠﻴﻠﻪ ﻭﺍﻟﻠﻪ ﺗﻘﻮﻝ ﺍﻣﻲ ..
ﻃﺎﺭﻕ ﺑﻀﺤﻜﻪ : ﻛﻠﻨﺎ ﻋﻴﻠﻪ ﺣﻨﻴﻨﻪ ﻭﺍﻧﺎ ﺍﻛﺜﺮﻫﻢ ..
ﺿﺤﻜﺖ ﻭﻗﺎﻟﺖ : ﻳﺎﺣﻨﻴﻦ ﺍﻧﺖ ﻗﻮﻟﻲ ﺍﻣﺘﻰ ﺗﺴﺎﻓﺮ ﺑﻌﺪ ﺍﻟﻌﻴﺪ؟
ﻃﺎﺭﻕ : ﻣﻤﻜﻦ ﺑﻌﺪﻩ ﺑﻴﻮﻣﻴﻦ ﺗﻼﺗﻪ ﻫﻚ ..
ﺭﺑﺎﺏ : ﺗﻤﺸﻲ ﻭﺗﺠﻲ ﺳﺎﻟﻢ ﻳﺎﺭﺏ 💕..
🍁🍁🍁🍁🍁
ﺍﺻﻴﻴﻴﻞ ..
ﺧﺶ ﻟﻠﺤﻮﺵ : ﻧﻌﻢ ﻳﻤﻲ ..
ﺍﻣﻴﻨﻪ : ﻋﺜﻤﺎﻥ ﺭﻭﺡ ﻣﻌﺎﻙ ..
ﺍﺻﻴﻞ؛ﻻﻗﻌﺪ ﻋﻨﺪ ﺑﺎﺗﻲ ﺷﺪﻩ ﻳﺒﺎﺕ ..
ﺷﺒﺤﺖ ﺷﻮﻳﻪ ﻟﻮﻟﺪﻫﺎ ﺑﻌﺪﻳﻦ ﻗﺎﻟﺖ : ﺑﺎﻫﻲ ﻣﺎﺭﻳﺘﺶ ﻣﺆﻧﺲ ..
ﺍﺻﻴﻞ : ﻗﺎﻝ ﺑﻴﺒﺎﺕ ﻓﻲ ﺍﻟﻤﺰﺭﻋﻪ ..
ﺗﻨﻬﺪﺕ ﺑﻀﻴﻖ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻣﺸﺖ ﻃﻮﻝ ﻟﺪﺍﺭﻫﺎ ..
🍁 ﻓﻲ ﺍﻟﻤﺰﺭﻋﻪ ..
ﻛﺎﻥ ﻳﻠﻬﺪ ﺑﺤﺼﺎﻧﻪ ﻭﻳﺠﺮﻱ .. ﻭﻳﺠﺮﻱ .. ﻭﻳﺬﻛﺮ ..
> ﺍﻧﻲ ﺍﺳﻤﻲ ﺭﺑﺎﺏ .. ﻣﺨﻄﻮﺑﻪ ﻭﻋﺮﺳﻲ ﺍﻟﺼﻴﻒ ﺍﻟﺠﺎﻱ <<..
ﺿﺮﺏ ﺑﺎﻟﺰﻣﺎﻡ ﻇﻬﺮ ﺍﻟﺤﺼﺎﻥ ....
ﻭﺯﺍﺩ ﺍﻟﺤﺼﺎﻥ ﺍﻟﺴﺮﻋﻪ ﺍﻛﺜﺮ ...
ﻣﺮﻭﺍ ﻓﻲ ﺣﻴﺎﺗﻪ ﺑﻨﺎﺕ ﺻﺢ .. ﻟﻜﻦ ﻣﺎﻛﺎﻧﺶ ﻣﻦ ﺍﻟﻠﻲ ﺧﺎﺿﻮﺍ ﺗﺠﺎﺭﺏ ﻓﻲ ﺍﻟﺤﺐ ﻭﺍﻟﻌﻼﻗﺎﺕ ..
ﺑﺤﺪﻭﺩ ﺧﺪﻣﺘﻪ ﻭﺑﺲ ﻷﻧﻪ ﻛﺎﻥ ﻣﺎﺳﻚ ﻣﻨﺼﺐ ﻓﻲ ﺃﻣﺎﻧﺔ ﺍﻟﻌﺪﻝ ﺑﺮﻏﻢ ﺻﻐﺮ ﺳﻨﻪ .. ﻣﺶ ﺑﺲ ﺍﻟﻮﺍﺳﻄﻪ ﺍﻟﻠﻲ ﺧﻼﺗﻪ ﻳﻤﺴﻚ ﺍﻟﻤﻨﺼﺐ ﻫﻮ ﻛﺎﻥ ﺟﺪﻱ ﻭﻓﻌﻼ ﻳﺨﺪﻡ ﺑﻀﻤﻴﺮ .. ﻭﻟﻴﻪ ﺍﺣﺘﺮﺍﻣﻪ ﺍﻟﻠﻲ ﻛﺎﻥ ﻓﺎﺭﺿﻪ ﺑﺤﺴﻦ ﺃﺧﻼﻗﻪ ﻣﺶ ﺑﺎﻟﺨﻮﻑ ..
ﺗﻌﺮﻑ ﻉ ﻣﺤﺎﻣﻴﺎﺕ ﻭﻉ ﺑﻨﺎﺕ ﺧﺪﻣﻮﺍ ﻓﻲ ﺍﻷﻣﺎﻧﻪ ..
ﻛﺎﻥ ﻭﺍﺿﺢ ﻣﻨﻬﻢ ﺍﻹﻋﺠﺎﺏ .. ﻭﻫﻮ ﻛﺎﻧﺖ ﻓﻲ ﺷﺨﺼﻴﺎﺕ ﻟﺒﻨﺎﺕ ﻋﺠﺒﻮﻩ .. ﺑﺲ ﻭﻻ ﻭﺣﺪﻩ ﻓﻴﻬﻢ ﺧﻼﺗﻪ ﻳﺘﻤﻨﺎﻫﺎ ﺍﻭ ﻳﻜﻮﻥ ﻋﻨﺪﻩ ﻓﻴﻬﺎ ﺭﻏﺒﺔ ﺻﺎﺩﻗﻪ ..
ﺑﺲ ﻣﺶ ﻋﺎﺭﻑ ﺷﻦ ﺟﺎﻩ ﻟﻤﺎ ﺟﺖ ﻋﻴﻨﻪ ﻉ ﺭﺑﺎﺏ ﺍﻭﻝ ﻣﺮﺓ ..
ﻣﻤﻜﻦ ﻷﻥ ﺷﺎﻓﻬﺎ ﻋﻔﻮﻳﻪ ﻃﺒﻴﻌﻴﻪ ﻭﻟﻤﺲ ﻓﻴﻬﺎ ﺭﻭﺡ ﺍﻟﻤﺮﺡ
ﻟﻤﺎ ﻛﺎﻧﺖ ﺗﻨﺸﺮ ﻓﻲ ﺍﻟﺤﻮﺍﻳﺞ ﻭﻫﻲ ﺗﻐﻨﻲ ..
ﺣﺎﺟﺎﺕ ﻣﻤﻜﻦ ﺗﻜﻮﻥ ﻋﺎﺩﻳﻪ ﺟﺪﺍ .. ﺑﺲ ﻟﻔﺘﺎﺗﻪ ﻓﻴﻬﺎ ﻫﻠﺒﻪ ..
ﻭﺯﺍﺩﺕ ﺷﺪﺍﺗﻪ ﻟﻴﻬﺎ ﺍﻛﺜﺮ ﺑﻌﺪ ﺍﻟﺤﻮﺍﺭ ﺍﻟﻠﻲ ﺻﺎﺭ ﺑﻴﻨﺎﺗﻬﻢ
ﻟﻬﺠﺘﻬﺎ ﺍﻟﺠﺎﺩﻩ .. ﻭﻧﻈﺮﺓ ﻋﻴﻨﻬﺎ ﺍﻟﺤﺎﺩﻩ .. ﻭﺍﻟﻨﺒﺮﺓ ﺍﻟﻠﻲ ﻗﺎﻟﺖ ﺑﻴﻬﺎ .. ﺍﻧﻬﺎ ﻣﺨﻄﻮﺑﻪ ﻭﻋﺮﺳﻬﺎ ﺍﻟﺼﻴﻒ ﺍﻟﺠﺎﻱ ..
ﺣﺲ ﻣﻦ ﻫﺎﻟﻨﺒﺮﺓ ﺍﻥ ﺗﺤﺐ ﺧﻄﻴﺒﻬﺎ ﻭﻣﺶ ﺃﻱ ﺣﺐ ..
ﻭﻗﻒ ﺑﺤﺼﺎﻧﻪ .. ﻭﻫﻮ ﺩﺍﻫﺶ ﻗﺎﻝ : ﻋﻠﻴﻚ ﺣﻆ .. ﺣﺘﻰ ﻣﻨﻴﻦ ﺟﺎﻧﺎ ﻳﻮﻡ ﻭﻓﻴﻪ ﻃﺤﻨﺎ .. ﻣﺎﺟﺖ ﺍﻟﻌﻴﻦ ﻛﺎﻥ ﻉ ﺍﻟﻠﻲ ﻏﻴﺮﻧﺎ ﺣﺎﻳﺰﻫﺎ ..
ﻭﺯﻉ ﻧﻈﺮﻩ ﺣﻮﺍﻟﻴﻪ ﻭﻗﺎﻝ : ﺍﻷﻗﺴﺎﻡ ﻉ ﺍﻟﻠﻪ ..
ﺑﻌﺪﻳﻦ ﻟﻒ ﺑﺤﺼﺎﻧﻪ ﻭﻣﺸﻲ ﺑﻴﻪ ﺟﻬﺔ ﺍﻹﺳﻄﺒﻞ ..
🍁🍁🍁🍁🍁
ﺍﻟﺘﺎﺳﻊ ﻣﻦ ﺫﻱ ﺍﻟﺤﺠﻪ ..
ﺑﻌﺪ ﺍﻟﻤﻐﺮﺏ ..
ﻛﺎﻧﻮﺍ ﻣﻘﻌﻤﺰﻳﻦ ﻳﺘﻌﺸﻮﺍ ﺑﻌﺪ ﻳﻮﻡ ﺻﻴﺎﻡ ..
ﻃﻖ ﺑﺎﺏ ﺍﻟﺤﻮﺵ ..
ﺯﻳﻨﺐ : ﺯﻋﻤﻪ ﻣﻨﻮ ..
ﺧﻴﺮﻱ : ﺇﻥ ﺷﺎﺀ ﺍﻟﻠﻪ ﺧﻴﺮ ..
ﺣﻤﺰﺓ ﺍﻟﻠﻲ ﻛﺎﻥ ﻳﺎﻛﻞ ﺑﺮﻭﺣﻪ ﻓﻲ ﺍﻟﻤﺮﺑﻮﻋﻪ ﻧﺎﺽ ﻭﺗﻮﺟﻪ ﻟﻠﺒﺎﺏ ..
ﻓﺘﺤﻪ .. ﻟﻘﻲ ﺭﺍﺟﻞ ﻋﻤﺘﻪ ﻭﻣﻊ ﻭﻟﺪﻩ ﺍﺳﺎﻣﻪ ﻧﺠﻴﻪ ﻭﻭﺭﺍﻩ ﺳﻴﺎﺭﺓ ﺩﺑﻞ ﻗﺎﺑﻴﻨﻪ ..
ﺭﺍﺟﻞ ﻧﺠﻴﻪ " ﻣﺴﻌﻮﺩ :" ﺍﻭﻭﻭﻭ ﺣﻤﺰﺓ .. ﻭﻣﺪ ﻳﺪﻩ ..
ﺻﺎﻓﺤﻪ ﺣﻤﺰﺓ ﻭﻫﻮ ﻣﺒﺘﺴﻢ : ﻛﻞ ﺳﻨﺔ ﻭﺍﻧﺖ ﻃﻴﺐ ..
ﻣﺴﻌﻮﺩ : ﻛﻞ ﻋﺎﻡ ﻭﺍﻧﺖ ﺑﺨﻴﺮ .. ﺍﻟﻮﺍﻟﺪ ﻗﺎﻋﺪ ..
ﺣﻤﺰﺓ : ﺍﻳﻪ ﺗﻔﻀﻠﻮﺍ ﺧﺸﻮﺍ ..
ﻣﺴﻌﻮﺩ : ﻻ ﻧﺎﺩﻳﻪ ﻣﺴﺘﻌﺠﻞ ..
ﺣﻤﺰﺓ ﻭﻫﻮ ﻳﺴﻠﻢ ﻉ ﺍﺳﺎﻣﻪ : ﺍﻥ ﺷﺎﺀ ﺍﻟﻠﻪ .. ﻃﻠﻖ ﻳﺪ ﺍﺳﺎﻣﻪ .. ﻭﺧﺶ ﻃﻮﻝ ..
ﺣﻤﺰﺓ ﻭﻫﻮ ﻣﻮﺍﻃﻲ ﻋﻴﻨﻪ : ﺑﻮﻱ ﻳﺒﻴﻚ ﻋﻤﻲ ﻣﺴﻌﻮﺩ ..
ﺧﻴﺮﻱ : ﺭﺍﺟﻞ ﻋﻤﺘﻚ؟
ﻫﺰ ﺭﺍﺳﻪ ﺑﺈﻳﺠﺎﺏ ..
ﻧﺎﺽ ﺧﻴﺮﻱ ﻃﻮﻝ ﻭﻣﺸﺎﻟﻪ ..
ﺭﺑﺎﺏ : ﺷﻦ ﻳﺒﻲ ﻓﻬﺎﻟﻤﻐﺎﺭﻳﺐ ..
ﺯﻳﻨﺐ : ﺇﻥ ﺷﺎﺀ ﺍﻟﻠﻪ ﺧﻴﺮ ..
🍃 ﻭﻓﻌﻼ ﻛﺎﻥ ﺧﻴﺮ ..
ﺟﺎﺑﻠﻬﻢ ﺿﺤﻴﺔ ﺍﻟﻌﻴﺪ .. ﺍﺧﺘﻪ ﻫﻲ ﺍﻟﻠﻲ ﺣﻜﺖ ﻟﺮﺍﺟﻠﻬﺎ ﻋﻦ ﻇﺮﻭﻑ ﺧﻮﻫﺎ ﻭﻫﻮ ﺑﻜﻞ ﻧﻴﻪ ﺻﺎﻓﻴﻪ ﺩﺍﺭ ﻫﺎﻟﻤﺒﺎﺩﺭﺓ ..
ﺍﻟﻠﻲ ﻭﺟﻌﺖ ﺧﻴﺮﻱ ﻣﺎﻓﺮﺣﺘﺎﺵ .. ﺑﺲ ﻗﺒﻠﻬﺎ ﻣﻨﻪ ﻷﻥ ﻋﺎﺭﻑ ﻧﻴﺘﻪ ﺍﻟﻄﻴﺒﻪ ...
ﺯﻳﻨﺐ ﻭﺍﻟﺒﻨﺎﺕ ﻟﻤﺎ ﺷﺎﻓﻮﺍ ﺍﻟﺨﺮﻭﻑ ..
ﺍﺿﺎﻳﻘﻮﺍ ﻉ ﺍﻵﺧﺮ ﻟﻬﻠﺒﻪ ﺍﺳﺒﺎﺏ ..
ﺍﻭﻟﻬﻢ .. ﻟﺤﺎﻟﺘﻬﻢ ﻭﻳﻦ ﻭﺻﻠﺖ ..
ﻭﺗﺎﻧﻲ ﺷﻲ .. ﻷﻧﻬﻢ ﻋﺎﺭﻓﻴﻦ ﻧﺠﻴﻪ ﻛﻮﻳﺲ ..
ﻧﺠﻴﺔ ﻣﻨﺎﻧﻪ ﺗﺤﺐ ﺗﻤﻦ ﻉ ﺍﻟﻨﺎﺱ ﻟﻤﺎ ﺍﺩﻳﺮ ﻓﻴﻬﻢ ﺧﻴﺮ ﻭﺫﻟﻬﻢ ﺑﻴﻪ ﻓﻲ ﻛﻞ ﻭﻗﺖ ..
ﺳﻨﺪ : ﻣﺎﺷﺎﺀ ﺍﻟﻠﻪ .. ﺑﺪﺍﻝ ﺍﻟﻮﺍﺣﺪ ﺑﻨﻀﺤﻮﺍ ﺑﺰﻭﺯ ..
ﺷﺒﺤﻮﻟﻪ ﻭﺍﺑﺘﺴﻤﻮﺍ ﺑﺄﻟﻢ ..
ﻟﻔﺮﺣﺔ ﺳﻨﺪ ﺑﺎﻷﺿﺎﺣﻲ ..
ﺻﺢ ﻭﻟﺪ 13 ﺳﻨﻪ ﺑﺲ ﺣﺎﺟﺎﺕ ﺯﻱ ﻫﺎﺩﻱ ﻣﺎﺯﺍﻝ ﺗﻔﺮﺡ ﻓﻴﻪ ..
🍃🍃🍃🍃🍃
ﺍﻟﻠﻪ ﺍﻛﺒﺮ .. ﺍﻟﻠﻪ ﺍﻛﺒﺮ ... ﺍﻟﻠﻪ ﺍﻛﺒﺮ ..
ﻻﺇﻟﻪ ﺇﻻ ﺍﻟﻠﻪ .. ﺍﻟﻠﻪ ﺍﻛﺒﺮ .. ﻭﻟﻠﻪ ﺍﻟﺤﻤﺪ ..
ﻭﺟﻲ ﻳﻮﻡ ﺍﻟﻌﻴﺪ ..
ﻭﺍﻟﻌﻴﺪ ﻫﺪﺍ ﻏﻴﺮ ﺑﻜﻞ ﺍﺟﻮﺍﺋﻪ ..
ﺻﺢ ﻣﺘﻌﺐ .. ﺑﺲ ﻓﻴﻪ ﻫﻠﺒﻪ ﺣﺎﺟﺎﺕ ﺣﻠﻮﺓ ..
🍁 ﺍﻟﻌﻴﺪ ﺍﻟﻜﺒﻴﺮ ...
ﻓﻲ ﺣﻮﺵ ﺍﻟﻤﺮﺣﻮﻡ ... ﺍﻟﺤﺎﺝ ﺣﻤﺪ ..
ﻣﺎﻳﻔﺮﻗﺶ ﻋﻦ ﺣﺎﻟﻪ ﻓﻲ ﺍﻭﻝ ﻳﻮﻡ ﺭﻣﻀﺎﻥ ﻭﺍﻭﻝ ﻋﻴﺪ ﺻﻐﻴﺮﺓ ..
ﻣﺸﻲ ﺑﺎﻟﺪﻣﻮﻉ ..
ﻣﻌﺮﻭﻑ ﺍﻟﺤﺎﺝ ﺣﻤﺪ ﻋﻨﺪﻫﻢ ﺑﺎﻟﺠﻮ ﺍﻟﺤﻠﻮ ﺍﻟﻠﻲ ﻳﺪﻳﺮ ﻓﻴﻪ ﺍﻭﻝ ﻳﻮﻡ ..
ﻭﻫﺎﻟﻤﺮﺓ ﻫﻤﺎ ﻓﻘﺪﻭﺍ ﻫﺎﻟﺠﻮ .. ﻟﻸﺑﺪ 🍃..
🌴🌴🌴🌴🌴🌴
ﺍﻟﺠﻮ ﻛﺬﻟﻚ ﻓﻲ ﺣﻮﺵ ﺭﻣﻀﺎﻥ ..
ﻣﺶ ﺯﻱ ﺍﻻﻋﻴﺎﺩ ﺍﻟﻠﻲ ﻓﺎﺗﻮﺍ ..
ﻷﻥ ﻋﻤﺮ ﻛﺎﻥ ﻣﺴﻜﺖ .. ﻭﻫﺎﻧﻴﺒﺎﻝ ﻛﺬﻟﻚ ..
ﻣﺸﻲ ﻋﺎﺩﻱ ﺟﺪﺍ ..
ﺑﻌﺪ ﺍﻟﻤﻐﺮﺏ ..
ﻣﺤﻤﺪ : ﻧﺮﺍﺟﻲ ﻏﻴﺮ ﺍﻣﺘﻰ ﻳﺠﻲ ﻏﺪﻭﺓ ..
ﺭﻣﺰﻱ : ﻋﻨﺪﻙ ﺣﻖ ﺟﻮ ﺍﻟﻴﻮﻡ ﻣﺎﻋﺠﺒﻨﻲ ..
ﻣﺤﻤﺪ : ﺍﻟﻠﻲ ﻫﺪﺍ ﻗﺎﻳﻢ ﺧﺸﻤﻪ ﻉ ﺍﻟﺘﺎﻧﻲ ﺣﺘﻰ ﻓﻲ ﻋﻴﺪ ﺍﻹﺳﻼﻡ .. ﻣﺎﺗﻮﻗﻌﺘﻬﺎﺵ ﻣﻨﻬﻢ ﻫﻤﺎ ﺍﻟﺰﻭﺯ ..
ﺭﻣﺰﻱ : ﻋﺎﺫﺭﻫﻢ .. ﻣﻌﺮﻭﻓﻴﻦ ﻫﺎﻧﻴﺒﺎﻝ ﻭﻋﻤﺮ ﻣﻊ ﺑﻌﻀﻬﻢ ﻛﻴﻒ .. ﻳﻘﺴﻤﻮﺍ ﻣﻊ ﺑﻌﻀﻬﻢ ﻛﻞ ﺷﻲ ﺣﺘﻰ ﺍﻟﻤﺎﻛﻠﻪ ﻳﻌﺰﻭﺍ ﻉ ﺑﻌﻀﻬﻢ ﻭﺍﺟﺪ ﺻﺤﺎﺏ ﻣﺶ ﻏﻴﺮ ﺧﻮﺕ .. ﻭﺍﻟﺰﻋﻞ ﻉ ﻗﺪ ﺍﻟﻤﻮﺩﺓ ..
ﻣﺤﻤﺪ : ﻫﺪﻯ ﻋﻴﺪ ﻳﺎﺭﻣﺰﻱ ﻋﻴﺪ ﻣﻔﺮﻭﺽ ﻛﻞ ﺍﻟﺰﻋﻞ ﻳﻨﺴﻮﻩ ..
ﺭﻣﺰﻱ ﺗﻨﻬﺪ ﻭﻗﺎﻝ : ﻣﺎﺍﻋﻨﺪ ﻣﻦ ﻫﺎﻧﻴﺒﺎﻝ ﻛﺎﻥ ﻋﻤﺮ ﻣﺎﻓﻴﺶ ﻭﺍﺣﺪ ﻓﻴﻬﻢ ﻳﻌﺮﻑ ﺍﻟﺘﻨﺎﺯﻝ ..
ﻉ ﺟﻴﺔ ﺭﺯﺍﻥ : ﻭﻳﻦ ﺍﻟﺸﻮﺍ ..
ﺭﻣﺰﻱ : ﺗﻌﺎﻟﻲ ﻗﻠﻲ ﺍﻟﺼﻮﻧﻴﻪ ﻫﺪﻱ ..
ﻗﺪﻣﺖ ﻭﺟﺖ ﺧﺪﺕ ﺍﻟﺼﻮﻧﻴﻪ ﻭﻗﺎﻟﺖ : ﺳﻘﺪﻭﺍ ﺍﺭﻭﺍﺣﻜﻢ .. ﻭﻟﻔﺖ ﻭﺧﺸﺖ ..
ﻣﺤﻤﺪ : ﻣﻮﻟﻲ ﻟﺴﺎﻧﻬﺎ ﻃﻮﻳﻞ ﺍﺧﺘﻚ ﻫﺪﻱ ﺳﻤﻌﺘﻬﺎ ﻳﻮﻣﻬﺎ ﺗﻌﻠﻲ ﻓﺼﻮﺗﻬﺎ ﻉ ﻏﺎﻟﻴﻪ ..
ﺭﻣﺰﻱ ﺑﺘﻔﻨﻴﺼﻪ : ﻧﻬﺎﺭﻫﺎ ﺍﺳﻮﺩ !!
ﻣﺤﻤﺪ : ﺷﺪﻟﻬﺎ ﻳﺎﺭﻣﺰﻱ ..
ﻫﺰ ﺭﺍﺳﻪ ﺑﺈﻳﺠﺎﺏ ﻭﻫﻮ ﻛﺎﻥ ﻓﻲ ﻓﻘﻤﺔ ﺍﻟﻐﻀﺐ ..
🍃 ﺧﻄﻮﻁ ﺭﻣﺰﻱ ﺍﻟﺤﻤﺮﺍ .. ﻏﺎﻟﻴﻪ ﺍﻭﻟﻬﻢ 🍃
🍁🍁🍁🍁🍁
ﺳﺮﺕ 💓
ﻛﺎﻧﺖ ﺩﻻﻝ ﻣﻘﻌﻤﺰﺓ ﻓﻲ ﺍﻟﻜﻮﺟﻴﻨﻪ ﺗﺎﻛﻞ ﻓﻲ ﺍﻟﻠﺤﻢ ﺍﻟﻤﺸﻮﻱ ﺑﺸﺮﺍﻫﻪ ..
ﻭﺣﻤﺎﺗﻬﺎ ﺍﻣﻴﻨﻪ ﺣﺪﺍﻫﺎ ...
ﺍﻣﻴﻨﻪ ﺑﻀﺤﻜﻪ : ﺍﻧﻲ ﺗﻮﺣﻤﺖ ﻉ ﺍﻟﻜﺒﺪﻩ ﻟﻤﺎ ﻛﻨﺖ ﺣﺎﻣﻞ ﺑﻤﺆﻧﺲ .. ﺟﺎﺭﻩ ﻟﻴﺎ ﺩﺍﺭﺗﻬﺎ ﻣﺮﺓ ﻭﺍﻧﻲ ﺷﻤﻴﺘﻬﺎ ﻭﺟﺖ ﻓﺨﺎﻃﺮﻱ ﻭﻣﺎﻛﻠﻴﺘﻬﺎﺵ ..
ﺩﻻﻝ : ﺍﻣﻤﻢ .. ﺭﺍﻙ ﺗﻘﻮﻟﻲ ﻃﻠﻌﺖ ﻓﻴﻪ ..
ﺍﻣﻴﻨﻪ : ﺍﻳﻪ ﻓﺠﻨﺒﻪ .. ﺟﻨﺐ ﻣﺆﻧﺲ ﻟﻮﻧﻪ ﻣﻦ ﻟﻮﻥ ﺍﻟﻜﺒﺪﻩ .. ﻛﻴﻒ ﺍﻟﺒﻘﻌﻪ ﻛﺒﻴﺮﺓ ..
ﺩﻻﻝ ﺑﺘﻔﻨﻴﺼﻪ : ﺣﻴﻲ .. ﻭﻭﻟﺖ ﺗﺎﻛﻞ ﻓﻲ ﺍﻟﻠﺤﻢ
ﻭﺃﻣﻴﻨﻪ ﺗﻀﺤﻚ ..
ﻉ ﺟﻴﺔ ﻛﺎﻣﻠﻪ : ﻫﻲ ﺗﻌﺎﻟﻦ ﺍﻟﻌﺸﻲ ﻭﺗﻲ " ﻳﻄﻴﺒﻮﺍ ﺑﺮﺍ "
ﺍﻣﻴﻨﻪ : ﻫﺎﻧﺎ ﺟﺎﻳﻴﻦ ..
ﺿﺤﻜﺖ ﻛﺎﻣﻠﻪ ﻭﻫﻲ ﺗﺸﻮﻑ ﻟﺪﻻﻝ .. ﺑﻌﺪﻳﻦ ﻣﺸﺖ ..
🍃 ﻃﺒﻌﺎ ﻛﻠﻬﻢ ﻛﺎﻧﻮﺍ ﻓﻲ ﺣﻮﺵ ﻋﺒﺪﺍﻟﻘﺎﺩﺭ ..
ﻭﺍﻏﻠﺐ ﺍﻷﻗﺎﺭﺏ ﺟﻮ ﺑﺈﻋﺘﺒﺎﺭ ﺍﻭﻟﻪ ﻋﻴﺪ ﺣﺘﻰ ﻫﻮ ..
ﻭﻛﺎﻧﺖ ﺍﻟﺴﺎﻛﺘﻪ ﻣﻮﺟﻮﺩﻩ ﻳﻮﻣﻬﺎ ﻣﻊ ﺑﻨﺘﻬﺎ ﻣﻦ ﺑﺎﺏ ﺍﻟﻮﺍﺟﺐ ..
ﺟﻮ ﻉ ﺍﻟﻌﺸﻲ 🍃..
ﺩﻻﻝ ﻭﻫﻲ ﺗﻐﺴﻞ ﻓﻲ ﺍﻳﺪﻳﻬﺎ : ﺍﻣﺸﻲ ﺍﻣﻴﻨﻪ ﺗﻮ ﻧﻠﺤﻘﻚ ﻋﺎﺩﻱ ..
ﺍﻣﻴﻨﻪ ﺑﺈﺑﺘﺴﺎﻣﻪ : ﺑﺎﻫﻲ ..
ﻣﺸﺖ ﺍﻣﻴﻨﻪ ﻃﻠﻌﺖ ..
ﻭﺩﻻﻝ ﻃﻮﻝ ﻃﻠﻌﺖ ﻣﻦ ﺍﻟﻜﻮﺟﻴﻨﻪ ﺑﻌﺪ ﻃﻠﻌﺖ ﺍﻣﻴﻨﻪ .. ﻭﻣﺸﺖ ﻟﻠﺤﻤﺎﻡ ..
ﺑﺮﺍ ..
ﺍﻟﺴﺎﻛﺘﻪ : ﻭﻳﻦ ﻛﻨﺘﻚ ﻳﺎﻛﺎﻣﻠﻪ ..
ﻫﻨﺪﺍ ﺷﺒﺤﺖ ﻟﻠﺴﺎﻛﺘﻪ ..
ﻛﺎﻣﻠﻪ ﺷﺒﺤﺖ ﻷﻣﻴﻨﻪ ..
ﺍﻣﻴﻨﻪ : ﺷﻮﻳﻪ ﻭﺟﺎﻳﻪ ..
ﻏﺎﺩﺓ ﻛﺎﻧﺖ ﺗﺸﻮﻓﻠﻬﻢ ﺑﻌﺪﻳﻦ ﻧﺎﺿﺖ ..
ﺍﻟﺴﺎﻛﺘﻪ : ﻭﻳﻦ ..
ﻏﺎﺩﻩ : ﺍﻟﺤﻤﺎﻡ ..
ﺳﻤﺮ : ﺗﻮ ﻧﻌﺪﻱ ﻣﻌﺎﻙ .
ﻏﺎﺩﻩ ﺑﻀﺤﻜﻪ : ﺳﻤﺮ ﻗﻌﻤﺰﻱ ﻭﺍﺭﺗﺎﺣﻲ ﻧﻌﺮﻓﻪ ﺭﺍﻩ ﻣﺶ ﺍﻭﻝ ﻣﺮﺓ ﻧﺠﻴﻜﻢ ..
ﺳﻤﺮ ﺑﺈﺑﺘﺴﺎﻣﻪ؛ﺑﺎﻫﻲ ﻋﺪﻱ ..
ﻣﺸﺖ ﻏﺎﺩﻩ ...
ﺍﻡ ﺳﻤﺮ : ﻫﻲ ﺑﺪﻭﺍ .. ﺗﻌﺸﻮﺍ .. ﺗﻮ ﻳﻠﺤﻘﻦ .. ﺍﻟﺨﻴﺮ ﻭﺍﺟﺪ ..
ﺑﺪﻭﺍ ﺍﻟﻀﻴﻮﻑ ﻳﺎﻛﻠﻮﺍ ..
ﻭﻫﻨﺪﺍ ﻣﻨﻬﻢ ﺗﺎﻛﻞ ﺑﺎﻟﺴﻴﻒ ..
ﺩﺍﺧﻞ ..
ﻃﻠﻌﺖ ﺩﻻﻝ ﻣﻦ ﺍﻟﺤﻤﺎﻡ ..
ﻭﻣﺸﺖ ﻛﻤﻠﺖ ﻃﺮﻳﻘﻬﺎ ﻟﻠﺼﺎﻟﻪ .. ﻗﺎﺑﻠﺘﻬﺎ ﻏﺎﺩﻩ ..
ﻏﺎﺩﻩ : ﺩﻻﻝ ﻭﻳﻨﻚ .. ﻣﺪﺕ ﻳﺪﻫﺎ ﻭﺳﻠﻤﺖ ﻋﻠﻴﻬﺎ ﺑﺎﻟﺨﺪ .. ﻛﻞ ﻋﺎﻡ ﻭﺍﻧﺘﻲ ﺑﺨﻴﺮ ..
ﺩﻻﻝ ﻣﺠﺎﻣﻠﻪ : ﻛﻞ ﺳﻨﻪ ﻭﺍﻧﺘﻲ ﻃﻴﺒﻪ ..
ﺑﻌﺪﺕ ﻏﺎﺩﻩ ﻭﻗﺎﻟﺖ : ﺷﻦ ﺍﺧﺒﺎﺭﻙ ﺷﻦ ﻣﺪﺍﻳﺮﺓ ..
ﺩﻻﻝ : ﺍﻟﺤﻤﺪ ﻟﻠﻪ ..
ﻏﺎﺩﻩ : ﻭﺷﻦ ﺩﺍﻳﺮﺓ ﻣﻊ ﺍﻟﺤﻤﻞ ..
ﺩﻻﻝ ﺍﺑﺘﺴﻤﺖ ﻣﺠﺎﻣﻠﻪ ﻭﻗﺎﻟﺖ : ﺍﻟﺤﻤﺪﻟﻠﻪ ..
ﻏﺎﺩﺓ ﺑﻀﺤﻜﻪ : ﻗﺪﻳﺶ ﻟﻴﻨﺎ ﻧﺮﺟﻮ ﺍﻣﺘﻰ ﻋﻤﺎﺭ ﻳﺘﺰﻭﺝ ﻭﻳﺪﻳﺮ ﻋﻮﻳﻠﻪ .. ﻭﺍﻟﺒﺎﻳﻦ ﺗﻮﺍ ﺑﻴﺠﻮﻩ ﺍﻟﺰﻭﺯ ﻭﺭﺍ ﺑﻌﻀﻬﻢ ﻣﺎﺷﺎﺀ ﺍﻟﻠﻪ ..
ﺩﻻﻝ ﺿﺤﻜﺖ ﺑﺈﺳﺘﻐﺮﺍﺏ : ﻣﺎﻓﻬﻤﺘﺶ؟
ﻏﺎﺩﻩ ﺑﻀﺤﻜﻪ : ﻗﺼﺪﻱ ﺿﺮﺗﻚ ﻳﺎﺣﻨﻪ ..
ﺍﻧﺼﺪﻣﺖ ﺩﻻﻝ ...
ﻏﺎﺩﻩ : ﻟﻴﻠﺘﻬﺎ ﻟﻘﻴﺖ ﻋﻤﺎﺭ ﻃﺎﻟﻊ ﻣﻦ ﺣﻮﺷﻬﺎ ... ﻟﻤﺎ ﻛﻨﺎ ﻣﺮﻭﺣﻴﻦ ﻣﻦ ﺣﻮﺵ ﺧﺎﻟﺘﻲ ..
ﺩﻻﻝ ﻭﻫﻲ ﺗﺮﺟﻒ ﻣﻦ ﺻﺪﻣﺘﻬﺎ ﻗﺎﻟﺖ : ﺍﻳﻪ ﻳﻤﺸﻲ ﻏﺎﺩﻱ ﻳﺸﻮﻑ ﻓﺼﻐﺎﺭ ﺧﻮﻩ ..
ﻏﺎﺩﻩ ﻭﻫﻲ ﺭﺍﻓﻌﻪ ﺣﺎﺟﺒﻬﺎ : ﻟﻴﻠﺘﻬﺎ ﻛﺎﻧﻮﺍ ﻋﻨﺪ ﺟﺪﻭﺩﻫﻢ ﻫﻞ ﻫﻨﺪﺍ ..
> . ﺗﺼﺪﻳﻨﻲ ﻳﺎﺑﻨﺖ ﺍﻟﻨﺎﺱ ... ﻗﺎﺳﻢ ﺑﺎﻟﻠﻪ ﺍﻟﻌﻈﻴﻢ ﻧﻌﺪﻱ ﻟﻬﻨﺪﺍ ﻓﻬﺎﻟﻠﺤﻈﻪ ﻭﻧﺨﻠﻴﻬﺎ ﻣﺮﺗﻲ ﻗﻮﻝ ﻭﻓﻌﻞ . <<
ﻣﻦ ﺩﺍﺧﻞ ﻗﻠﺒﻬﺎ ﻳﻨﺤﺮﻕ ﺣﺮﻕ .. ﺑﺲ ﻗﺪﺍﻡ ﻏﺎﺩﻩ ﺗﻤﺎﺳﻜﺖ ﻭﻗﺎﻟﺖ ..
" ﺣﺘﻰ ﻫﻲ ﻣﺮﺗﻪ ﻣﺶ ﺍﻧﻲ ﺑﺮﻭﺣﻲ .."
ﺗﻔﺎﺟﺌﺖ ﺑﺮﺩﻫﺎ ﻭﻗﺎﻟﺖ : ﺍﻳﻪ ﻣﺮﺗﻪ .. ﺷﺒﺤﺘﻠﻬﺎ ﻣﻦ ﻓﻮﻕ ﻟﻠﻮﻃﺎ ﻭﻛﻤﻠﺖ ﻃﺮﻳﻘﻬﺎ ﻟﻠﺤﻤﺎﻡ ..
ﺩﻻﻝ ﻭﻫﻲ ﺗﺸﺪ ﻓﻲ ﺑﻜﺎﻫﺎ ﺑﺎﻟﺴﻴﻒ : ﺧﺴﺎﺭﺓ ﻭﺧﻼﺹ ..
ﻗﻌﺪﺕ ﺗﻤﺴﺢ ﻓﺪﻣﻮﻋﻬﺎ ﺑﻌﻨﻒ .. ﺑﻌﺪﻳﻦ ﻣﺸﺖ ﻟﻠﺼﺎﻟﻪ ..
ﻣﺸﺖ ﺳﻠﻤﺖ ﻉ ﺍﻟﺴﺎﻛﺘﻪ ... ﻭﻫﻲ ﺗﺤﺎﻭﻝ ﺗﺘﻤﺎﻟﻚ ﻧﻔﺴﻬﺎ ..
ﺑﻌﺪﻳﻦ ﻗﻌﻤﺰﺕ ﺣﺪﺍ ﺣﻤﺎﺗﻬﺎ ..
ﻗﺎﻣﺖ ﻋﻴﻮﻧﻬﺎ ﻓﻬﻨﺪﺍ ﻟﻘﺘﻬﺎ ﺗﺎﻛﻞ ..
ﻧﺰﻟﺖ ﻋﻴﻮﻧﻬﺎ ﻭﻛﺎﻧﺖ ﺗﺸﺪ ﻓﺪﻣﻮﻋﻬﺎ ﺑﺎﻟﺴﻴﻒ ..
ﻓﺠﺄﺓ ..
ﻫﻨﺪﺍ ﺣﻄﺖ ﻳﺪﻫﺎ ﻉ ﻓﻤﻬﺎ ﻭﻧﺎﺿﺖ ﺗﺠﺮﻱ ..
ﻛﻠﻬﻢ ﺍﻧﺨﻠﻌﻮﺍ ..
ﻧﻮﺭﻳﻪ ﺍﻣﻬﺎ : ﻫﻨﺪﺍ .. ﺧﻴﺮﻙ .. ﻧﺎﺿﺖ ﻟﺤﻘﺘﻬﺎ ..
ﻉ ﺟﻴﺔ ﻏﺎﺩﺓ ..
ﺳﻤﺮ : ﺷﻜﻠﻬﺎ ﻛﺘﺮﺓ ﺍﻳﻜﺎﻝ ﻟﺤﻢ ..
ﺍﻟﺴﺎﻛﺘﻪ : ﻣﺎﺗﺤﺒﺎﺵ ﻭﺍﺟﺪ ﻫﻲ ..
ﻛﺎﻣﻠﻪ : ﺍﻳﻪ ﺻﺢ ..
ﻏﺎﺩﺓ ﺷﺒﺤﺖ ﻟﺪﻻﻝ : ﻣﺮﺍﺕ ﺣﺎﺟﻪ ﺍﺧﺮﻯ .. ﺣﻤﻞ ﻣﺜﻼ ..
ﺍﻧﺼﺪﻣﻮﺍ ﺍﻣﻴﻨﻪ ﻭﻛﺎﻣﻠﻪ ﻭﻃﻮﻝ ﺷﺒﺤﻮﺍ ﻟﺪﻻﻝ ..
ﺍﻟﻠﻲ ﻛﺎﻧﺖ ﺗﺸﺒﺢ ﻟﻠﺼﻔﺮﺓ ﻭﻫﻲ ﺷﺎﺩﻩ ﺩﻣﻌﺘﻬﺎ ...
ﺍﻟﺴﺎﻛﺘﻪ : ﺯﻋﻢ ..!!
ﻛﺎﻣﻠﻪ ﺷﺒﺤﺖ ﻷﺧﺘﻬﺎ ﻭﻗﺎﻟﺖ : ﻣﺎﻧﺪﺭﻱ ..
ﻉ ﺧﺸﺔ ﻫﻨﺪﺍ ﻭﺍﻣﻬﺎ ..
ﺳﻤﺮ : ﺷﻦ ﻳﺎﻫﻨﺪﺍ ﺧﻴﺮﻙ ..
ﻫﻨﺪﺍ : ﻛﺒﺪﻱ ﺯﺍﻋﻤﻪ .. ﻭﻣﺸﺖ ﻗﻌﻤﺰﺕ ﺑﺮﻭﺣﻬﺎ ..
ﻭﺣﺪﻩ ﻣﻦ ﻗﺮﻳﺒﺎﺗﻬﻢ : ﺣﺎﻣﻞ ﻭﻣﺎﺗﺒﻴﺶ ﺗﻘﻮﻟﻲ ..
ﺍﻣﻬﺎ ﺷﺒﺤﺘﻠﻬﺎ ﺑﺘﻀﻴﻴﻘﺔ ﻋﻴﻮﻥ ..
ﻫﻨﺪﺍ ﺿﺤﻜﺖ ﺑﺈﺣﺮﺍﺝ : ﻣﺶ ﻋﺎﺭﻓﻪ ..
ﻗﻌﺪﻭﺍ ﻳﺸﺒﺤﻮﻟﻬﺎ ﻋﺰﻭﺯﺗﻬﺎ ﻭﺣﻤﺎﺗﻬﺎ ﺑﺮﺑﻊ ﻋﻴﻦ ﻭﻣﺎﺑﻮﺵ ﻳﻌﻠﻘﻮﺍ ﺑﻜﻞ ..
ﺑﻌﺪﻳﻦ ﻭﻟﻮﺍ ﻛﻠﻬﻢ ﻳﻜﻤﻠﻮﺍ ﻓﻌﺸﺎﻫﻢ ...
ﻭﺩﻻﻝ ﺗﺎﻛﻞ ﺑﻐﻴﻆ .. ﻓﺸﺖ ﻏﻠﻬﺎ ﻓﻲ ﺍﻟﻤﺎﻛﻠﻪ ﺍﻟﻤﻬﻢ ﻣﺎﺗﺒﻜﻴﺶ ..
ﻭﻫﻨﺪﺍ ﺗﺸﻮﻓﻠﻬﺎ ﻭﻫﻲ ﻣﺒﺘﺴﻤﻪ ﺑﺨﺒﺚ ..
🍃 ﺍﻟﻠﻲ ﺻﺎﺭ ﺍﻥ ﻫﻨﺪﺍ ﺧﺸﺖ ﺑﻌﺪ ﻏﺎﺩﻩ ﺑﺸﻮﻳﻪ ..
ﻭﻛﺎﻧﺖ ﻧﺎﻭﻳﻪ ﺩﻻﻝ .. ﺑﺲ ﺍﻟﻠﻲ ﺻﺎﺭ ﻓﺎﺟﺌﻬﺎ ﻭﺧﻼﻫﺎ ﺗﻮﺻﻞ ﻟﻤﺮﺍﺩﻫﺎ ﺑﺪﻭﻥ ﺗﻌﺐ ﻣﻨﻬﺎ ... ﻭﺑﻌﺪ ﺳﻤﻌﺖ ﻛﻼﻡ ﻏﺎﺩﻩ ﺧﻄﺮ ﻓﺒﺎﻟﻬﺎ ﺷﻲ ﺗﺎﻧﻲ ﺑﺶ ﺗﻜﻤﻞ ﺑﻴﻪ ﻉ ﺩﻻﻝ ﻭﻧﻔﺪﺍﺗﻪ ...🍃
🍁🍁🍁🍁
ﺑﻌﺪ ﺳﺎﻋﻪ ﺑﺎﻟﺰﺑﻂ ..
ﺟﻮﺍ ﺍﺻﻴﻞ ﻭﻋﻤﺎﺭ ﻭﺭﻭﺣﻮﺍ ﻛﺎﻣﻠﻪ ﻭﺑﻨﺘﻬﺎ ﻭﻛﻨﺘﻬﺎ ...
🍁🍁🍁
ﺑﻌﺪ ﻭﺻﻠﻮﺍ ﻟﻠﺤﻮﺵ ..
ﺍﻣﻴﻨﻪ ﻭﻫﻲ ﺗﺤﻮﻝ ﻓﻌﺒﺎﻳﺘﻬﺎ : ﻫﻨﺪﺍ ﻫﺪﻱ ﻣﺶ ﻋﺎﺭﻓﻪ ﻟﻮﻳﻦ ﺗﺒﻲ ﺗﻮﺻﻞ ..
ﻛﺎﻣﻠﻪ ﺑﻘﻠﻖ : ﻭﺍﻟﻠﻪ ﻣﺎﻧﻲ ﻋﺎﺭﻓﻪ ﻛﻴﻒ ﺑﻴﺼﻴﺮ ﺗﻮ ..
ﺍﻣﻴﻨﻪ : ﻳﺴﺘﺮ ﺍﻟﻠﻪ ﻭﺧﻼﺹ ... ﺣﻄﺖ ﺍﻟﻌﺒﺎﻳﻪ ﻉ ﻳﺪﻫﺎ ﻭﻣﺸﺖ ﻟﺪﺍﺭﻫﺎ ..
ﻭﻛﺎﻣﻠﻪ ﻗﻌﻤﺰﺕ ﻓﻲ ﺍﻟﺼﺎﻟﻪ ﻭﻫﻲ ﺗﺨﻤﻢ ..
🍁🍁🍁🍁🍁🍁
ﺧﺸﺖ ﻟﻠﺪﺍﺭ ...
ﻭﻫﻲ ﺗﺎﻛﻞ ﻓﻲ ﺑﻌﻀﻬﺎ ..
ﻗﻌﺪﺕ ﺗﻔﻜﺮ ﻫﻠﺒﻪ ﻗﺒﻞ ﻟﺪﻳﺮ ﺍﻱ ﺷﻲ ...
ﺷﻮﻳﻪ ﻭﺧﺶ ﻟﻠﺪﺍﺭ ..
ﻣﺸﻲ ﻟﻠﺪﻭﻻﺏ ﻳﻄﻠﻊ ﻓﻲ ﺣﻮﺍﻳﺠﻪ ..
ﻣﺠﺮﺩ ﺻﻜﺮﻩ ﻭﺗﻠﻔﺖ .. ﻟﻘﺎﻫﺎ ﻭﺍﻗﻔﻪ ﻗﺪﺍﻣﻪ ..
ﺭﻓﻊ ﺣﻮﺍﺟﺒﻪ ﻭﻫﻮ ﻳﺸﻮﻓﻠﻬﺎ .. ﻛﻴﻒ ﻋﻴﻮﻧﻬﺎ ﺑﻨﻈﺮﺍﺗﻬﻢ ﺍﻟﺤﺎﺩﻩ ﻣﻌﺒﻴﺎﺕ ﺩﻣﻮﻉ ﻭﻭﺟﻬﻬﺎ ﺍﺣﻤﺮ ...
ﻗﺎﻟﺖ ﺑﺤﺪﻩ ﻭﻫﻲ ﺭﺍﻓﻌﻪ ﺳﺒﺎﺑﺘﻬﺎ : ﻫﻮ ﺳﺆﺍﻝ ﻭﺍﺣﺪ ﻧﺒﻴﻚ ﺗﺠﺎﻭﺑﻨﻲ ﻋﻠﻴﻪ ..
ﻧﺰﻝ ﺣﻮﺍﺟﺒﻪ ﻭﻗﺎﻝ : ﺍﻟﻠﻲ ﻫﻮ؟
ﻧﺰﻟﺖ ﻳﺪﻫﺎ ﻭﻗﺎﻟﺖ : ﺍﻧﺖ ﻭﻫﻨﺪﺍ ﺻﺎﺭ ﺑﻴﻨﺎﺗﻜﻢ ﺷﻲ ..
ﻋﻤﺎﺭ ﺑﺒﺮﻭﺩ : ﻛﻴﻒ ﻳﻌﻨﻲ؟
ﺩﻻﻝ ﻏﻤﻀﺖ ﻋﻴﻮﻧﻬﺎ ﺑﻨﻔﺎﺩ ﺻﺒﺮ : ﻓﺎﻫﻢ ﻗﺼﺪﻱ ﻛﻮﻳﺲ ..
ﻋﻤﺎﺭ : ﻻ ﻣﺶ ﻓﺎﻫﻢ ..
ﺗﺄﻓﻔﺖ ﻭﻫﻲ ﺗﻮﺯﻉ ﻓﻨﻈﺮﻫﺎ ﻉ ﺍﻟﺪﺍﺭ : ﻋﻤﺎﺭ ﺍﻋﺼﺎﺑﻲ ﺗﺎﻋﺒﻪ ﺭﺍﻫﻮ ﻣﺶ ﻧﺎﻗﺼﻪ .. ﺷﺒﺤﺘﻠﻪ .. ﺻﺎﺭ ﺑﻴﻨﻚ ﻭﺑﻴﻦ ﻫﻨﺪﺍ ﺯﻱ ﻣﺎﻳﺼﻴﺮ ﺑﻴﻦ ﺍﻟﻤﺮﺍﺓ ﻭﺭﺍﺟﻠﻬﺎ ..
ﻋﻤﺎﺭ : ﻭﻫﺎﻙ ﻗﻠﺘﻴﻬﺎ ﻣﺮﺍﺓ ﻭﺭﺍﺟﻠﻬﺎ ..
ﺗﻮﺳﻌﻮﺍ ﻋﻴﻮﻧﻬﺎ ﺑﺼﺪﻣﻪ ﻭﻫﻲ ﺗﺸﻮﻓﻠﻪ ﻓﻤﻬﺎ ﻛﻴﻒ ﺑﺎﺩﻱ ﻳﺘﻘﻮﺱ ﺑﺲ ﻛﺎﻧﺖ ﺗﻘﺎﻭﻡ ﺍﻟﻤﻬﻢ ﻣﺎﺗﺒﻜﻴﺶ .. ﻗﺎﻟﺖ ﺑﻨﺒﺮﺓ ﻣﺨﻨﻮﻗﻪ : ﺣﻘﻚ ﻭﺣﻘﻬﺎ ..
ﻭﺟﺖ ﺑﺘﻤﺸﻲ ﻭﺗﺨﻠﻴﻪ ..
ﺷﺪﻫﺎ ﻣﻦ ﻳﺪﻫﺎ ﻭﺟﺒﺪﻫﺎ ﻟﻴﻪ ﺑﺎﻟﻘﻮﺓ ..
ﺣﺎﻭﻃﻬﺎ ﺑﺈﻳﺪﻳﻪ ﻭﻗﻌﺪ ﻳﻤﺮﺭ ﻓﻨﻈﺮﻩ ﻉ ﻣﻼﻣﺤﻬﺎ : ﻫﻜﻲ ﺑﻜﻞ ﺳﻬﻮﻟﻪ .. ﻋﺎﺩﻱ ﻋﻨﺪﻙ ..
ﻫﻲ ﺩﻣﻮﻋﻬﺎ ﻧﺰﻟﻮﺍ ﻃﻮﻝ ﻗﺎﻟﺖ : ﻣﺮﺗﻚ .. ﺣﺘﻰ ﻫﻲ ..
ﺯﺍﺩ ﺣﺎﻭﻃﻬﺎ ﺑﺘﻤﻠﻚ ﻭﻗﺮﺏ ﻭﺟﻬﻪ ﻟﻮﺟﻬﻬﺎ ﻭﻫﻮ ﻳﻘﻮﻝ : ﺍﻧﻲ ﻣﺮﺗﻲ ﻭﺣﺪﻩ ﺑﺲ .. ﺑﺴﺲ .. ﺍﻧﺘﻲ ﻣﺎﻓﻴﺶ ﻏﻴﺮﻙ ..
ﺩﻻﻝ ﻭﻫﻲ ﺗﺸﻮﻑ ﻟﻌﻴﻮﻧﻪ : ﻫﻲ ﻗﺎﻟﺖ ﺍﻧﻬﺎ ﺣﺎﻣﻞ ﻣﻨﻚ .
ﺿﺤﻚ ﻭﻗﺎﻝ : ﻭﺍﻧﺘﻲ ﺻﺪﻗﺘﻲ !! ﺍﺑﺘﺴﻢ ﻭﻗﺎﻝ ... ﻋﻨﺪﻙ ﻋﻠﻢ ﺍﻧﻬﺎ ﺑﻌﺪ ﺍﺳﺒﻮﻉ ﺣﺘﻄﻠﻊ ﻣﻦ ﺫﻣﺘﻲ ..
ﺷﺒﺤﺘﻠﻪ ﺑﺬﻫﻮﻝ ....
ﻋﻤﺎﺭ ﺑﻨﻈﺮﺍﺕ ﻋﺸﻖ : ﻭﺣﻖ ﺍﻟﻠﻲ ﻭﻫﺒﻚ ﻟﻴﺎ ﻣﺎﻟﻤﺴﺖ ﻭﻻﺣﻨﻠﻤﺲ ﻓﺤﻴﺎﺗﻲ ﻣﺮﺍﺓ ﻏﻴﺮﻙ ..
ﺩﻻﻝ ﺑﺪﻣﻮﻉ : ﻳﻌﻨﻲ ﺍﻧﻲ ﺑﺲ ﺣﻨﻜﻮﻥ ﺍﻡ ﺻﻐﺎﺭﻙ ..
ﻋﻤﺎﺭ ﺿﺤﻚ ﻭﺯﺍﺩ ﻗﺮﺏ ﻣﻨﻬﺎ ﻭﻫﻮﻳﻘﻮﻝ ﺑﺼﻮﺕ ﻫﺎﺩﻱ : ﺍﻧﺘﻲ .. ﺑﺲ ﺑﺲ .. ﻭﺑﺎﺳﻬﺎ ﺑﺸﻮﻕ ﺷﺪﻳﺪ ﻭﻟﻬﻔﻪ ..
.. ﺷﺪﺕ ﻭﺟﻬﻪ ﺑﺈﻳﺪﻳﻬﺎ ﻭﺑﺎﺩﻻﺗﻪ ﺑﻜﻞ ﺷﻮﻕ .. ﻋﺸﻖ .. ﻟﻔﺖ ﺍﻳﺪﻳﻬﺎ ﻭﺭﺍ ﺭﻗﺒﺘﻪ ﻭﻛﺎﻧﺖ ﺗﺒﺎﺩﻝ ﻓﻴﻪ ﺑﺘﻤﻠﻚ ﻭﺑﺸﻐﻒ 💕..
ﻗﻌﺪﻭﺍ ﻟﺤﻈﺎﺕ ...
ﺑﻌﺪﻳﻦ ﺑﻌﺪﻭﺍ ﻋﻦ ﺑﻌﺾ ﻭﻋﻴﻮﻧﻬﻢ ﺗﺸﻮﻑ ﻟﺒﻌﺾ ﺑﻌﺸﻖ 💓
ﺩﻻﻝ : ﺍﻧﺖ ﻟﺪﻟﻮﻟﻪ ﻭﺑﺲ ﺑﺲ ..
ﺿﺤﻚ ﻭﻗﺎﻝ : ﺍﻧﺨﻠﻘﺖ ﺑﺶ ﻧﻜﻮﻥ ﻟﺪﻟﻮﻟﻪ ﻭﺩﻟﻮﻟﻪ ﺍﻧﺨﻠﻘﺖ ﺑﺶ ﺗﻜﻮﻥ ﻟﻴﺎ ..
ﺍﺑﺘﺴﻤﺖ ﻭﻗﺎﻟﺖ : ﺑﺎﻫﻲ ... ﻉ ﺧﺎﻃﺮ ﺩﻟﻮﻟﻪ ... ﻟﻴﻦ ﻗﻠﺒﻚ ..
ﻓﻬﻢ ﻗﺼﺪﻫﺎ ﻣﻼﻣﺢ ﻭﺟﻬﻪ ﺗﻐﻴﺮﺕ ﻭﺑﻌﺪﻫﺎ ﺑﺎﻟﺸﻮﻳﻪ ﻭﻫﻮ ﻳﻘﻮﻝ : ﻛﻼﻡ ﻓﻲ ﺍﻟﻤﻮﺿﻮﻉ ﻫﺪﻯ ﻣﺎﻧﺒﻴﺶ ..
ﻫﻲ ﺍﺿﺎﻳﻘﺖ ﻉ ﺍﻵﺧﺮ ﻭﻭﺧﺮﺕ ﻋﻨﻪ ..
ﻫﻮ ﻃﺒﺲ ﻭﺧﺪﻱ ﺣﻮﺍﻳﺠﻪ ﻭﻭﻗﻒ ﻉ ﺣﻴﻠﻪ ﺑﻴﻤﺸﻲ ﻟﻠﺤﻤﺎﻡ ..
ﻭﻗﻔﺎﺗﻪ ﻟﻤﺎ ﻗﺎﻟﺖ
" ﺣﻘﻪ ﻛﻨﺖ ﻓﻲ ﺣﻮﺵ ﻫﻨﺪﺍ ﻓﻠﻴﻠﻪ ﻭﺻﻐﺎﺭﻫﺎ ﻣﻬﻨﺎﺵ .."
ﺍﻟﺘﻔﺖ ﻭﺷﺒﺤﻠﻬﺎ : ﺍﻳﻪ .. ﻭﻓﻲ ﻫﺪﻳﻚ ﺍﻟﻠﻴﻠﻪ ﺣﻜﻤﺖ ﻫﻨﺪﺍ ﻉ ﻧﻔﺴﻬﺎ ﺑﺎﻟﻄﻼﻕ ..
ﻭﻟﻒ ﻭﻣﺸﻲ ﺧﺶ ﻟﻠﺤﻤﺎﻡ ..
ﻫﻲ ﺗﻨﻬﺪﺕ ... ﺑﻌﺪﻳﻦ ﺑﺪﺕ ﺗﺮﺗﺴﻢ ﻉ ﻭﺟﻬﻬﺎ ﺍﺑﺘﺴﺎﻣﻪ ﺣﻠﻮﺓ 💗
🍁🍁🍁🍁🍁
ﻭﻣﺮﺕ ﻫﺪﻳﻜﺎ ﺍﻟﻠﻴﻠﻪ ...
ﻭﺟﻲ ﺍﻟﻴﻮﻡ ﺍﻟﻠﻲ ﺑﻌﺪﻩ ...
ﻭﺍﺳﺘﻘﺒﻞ ﺣﻮﺵ ﺍﻟﺠﺪ ﺍﺣﺒﺎﺑﻪ ..
ﺭﻣﻀﺎﻥ .. ﻛﺎﻥ ﻓﺮﺣﺎﻥ ﺑﺠﻴﺘﻬﻢ ﻉ ﺍﻵﺧﺮ ..
ﺑﺪﻱ ﻳﺤﺲ ﺑﺎﻟﻮﺣﺸﻪ ﻭﻣﻌﺎﺵ ﻳﺤﺐ ﻳﻘﻌﺪ ﺑﺮﻭﺣﻪ ﺍﻻ ﻗﻠﻴﻞ ﺍﻟﻨﺎﺩﺭ ..
ﻓﺎﻃﻤﻪ : ﻳﺒﻲ ﺍﻟﺪﻭﺷﻪ ﺣﺪﺍﻩ ﻓﻲ ﻛﻞ ﻭﻗﺖ ﻳﻘﻮﻝ ﻣﻌﺎﺵ ﻧﺤﺐ ﻧﻘﻌﺪ ﺑﺮﻭﺣﻲ .. ﻧﺸﻮﻑ ﻓﺨﻴﺎﻻﺕ ﻭﺍﻧﻈﺮ ﺷﻨﻮ ...
ﺍﻟﺒﻨﺎﺕ ﺷﺒﺤﻮﺍ ﻟﺒﻌﺾ ..
ﻟﻄﻴﻔﻪ : ﻃﺒﻴﻌﻲ ﻓﻲ ﻫﻠﺒﻪ ﻭﻳﻦ ﻳﺘﻘﺪﻣﻮﺍ ﺑﺎﻟﺴﻦ ﻳﺴﺘﺎﺣﺸﻮﺍ ﻭﻳﺒﺪﻭﺍ ﻳﻔﻀﻠﻮﺍ ﺍﻟﻠﻤﻪ ﺣﺎﺟﻪ ﻋﺎﺩﻳﻪ ﺭﺍﻫﻮ ..
ﻛﻔﺎﻳﻪ ﺑﺨﻮﻑ : ﺑﺎﻫﻲ ﺷﻦ ﻗﺼﺔ ﺍﻟﺨﻴﺎﻻﺕ ..
ﻟﻄﻴﻔﻪ : ﻧﻔﺴﻴﺎ ﻫﻮ ﻟﻤﺎ ﻛﺎﻥ ﺑﺼﺤﺘﻪ ﺷﺒﻪ ﻣﺎﻳﻘﻌﺪﺵ ﻓﻲ ﺍﻟﺤﻮﺵ ﺑﻜﻞ .. ﻋﺰﺍﻳﻢ ﺍﺟﺘﻤﺎﻋﺎﺕ .. ﻻﻫﻲ ﺑﺎﻷﺭﺽ ﺑﺎﻟﺨﺪﻣﻪ ... ﺍﻣﺎ ﺗﻮﺍ ﻣﻌﺎﺵ ﻋﻨﺪﻩ ﻫﺪﻳﻜﺎ ﺍﻟﺼﺤﻪ ﻭﺑﺪﻱ ﻳﻘﻌﺪ ﻓﻲ ﺍﻟﺤﻮﺵ ﻭﺑﺮﻭﺣﻪ ﺍﻏﻠﺐ ﺍﻟﻮﻗﺖ ﻫﺪﺍ ﻋﻼﺵ ﺑﺪﻱ ﻳﺤﺲ ﺑﺎﻟﻮﺣﺸﻪ ..
ﺯﻳﻨﺐ ﺗﻨﻬﺪﺕ ﻭﻗﺎﻟﺖ : ﺑﻌﺪﻳﻦ ﻧﻤﺸﻮﻟﻪ ﻧﻬﺪﺭﺯﻭﺍ ﻋﻠﻴﻪ ..
ﻓﺎﻃﻤﻪ : ﺍﺣﺴﻦ ﻣﺎﺩﻳﺮﻥ ...
ﺗﻨﻬﺪﻭﺍ ﻭﺳﻜﺘﻮﺍ ..
ﺷﺒﺤﺖ ﻓﺎﻃﻤﻪ ﻟﺰﻳﻨﺐ ﻭﻗﺎﻟﺖ : ﺷﻨﻮ ﺣﺎﻝ ﺣﻤﺰﺓ ..
ﺯﻳﻨﺐ ﺑﺄﻟﻢ : ﺍﻫﻮ ﻳﻤﻲ ﻋﺎﻳﺶ ﻭﺧﻼﺹ ..
ﻧﻌﻴﻤﻪ : ﺍﻧﻲ ﺑﻨﻘﻮﻝ ﻟﺪﻻﻝ ﺗﻜﻠﻢ ﻋﻤﺎﺭ ﻳﺎﺯﻳﻨﺐ ﻭﻫﻮ ﻳﺘﺼﺮﻑ ..
ﻛﻔﺎﻳﻪ : ﺍﻳﻪ ﻭﻣﺎﺗﻌﺪﻟﻴﺶ ﻋﻠﻴﻪ .. ﺷﻨﻮ ﻣﺎﻧﺒﻲ ﺣﺪ ﻳﺪﺧﻞ ﻓﻴﺎ ﻫﺎﺩﻱ ..
ﺯﻳﻨﺐ : ﻻﺑﺎﻟﻠﻪ ﻻ .. ﺣﺎﻟﻒ ﺑﺎﻟﻠﻪ ﻣﺎﻋﺎﺩ ﻳﺨﺶ ﺣﻮﺵ ﻟﻮ ﻛﻠﻤﺖ ﺧﺎﻟﻲ ﻭﻻ ﻋﻤﺎﺭ .
ﺣﻤﻴﺪﻩ ﺑﺈﺳﺘﻐﺮﺍﺏ : ﻭﻋﻼﺵ؟
ﺯﻳﻨﺐ : ﻗﺎﻝ ﻣﺎﻧﺒﻴﻜﻢ ﺍﺫﻟﻮﺍ ﺍﺭﻭﺍﺣﻜﻢ ﻟﺤﺪ ..
ﻓﺎﻃﻤﻪ : ﺫﻝ ﺷﻨﻮ ﻳﺎﻛﺒﺪﻱ؟؟ ..!!
ﺯﻳﻨﺐ : ﻫﻮ ﻫﻜﻲ ﻳﻔﻜﺮ ﺷﻦ ﺑﻨﺪﻳﺮﻟﻪ ..... ﺗﻨﻬﺪﺕ ﺑﻀﻴﻖ ﻭﻗﺎﻟﺖ .. ﺍﺻﻼ ﻣﺎﺻﺪﻗﺖ ﺗﺼﺎﻓﻮﺍ ﻫﻮ ﻭﺑﻮﻩ ﻓﻲ ﺍﻟﻌﻴﺪ .. ﻭﺍﻟﻠﻪ ﻗﺒﻞ ﻧﺎﻭﻱ ﻳﺴﻴﺐ ﺍﻟﺤﻮﺵ ﻳﺴﻴﺒﻪ ..
ﻛﻔﺎﻳﻪ : ﻻﺣﻮﻝ ﻭﻻﻗﻮﺓ ﺇﻻ ﺑﺎﻟﻠﻪ ..
ﻏﺎﻟﻴﻪ : ﺭﺑﻲ ﻳﺼﻠﺢ ﺍﻟﺤﺎﻝ ... ﻭﺍﻧﺘﻲ ﻛﻔﺎﻳﻪ .. ﻭﻳﻨﻪ ﻋﻤﺎﺩ ..
ﺣﻤﻴﺪﻩ : ﺍﻳﻪ ﻋﻼﺵ ﻣﺎﺟﺎﺵ ..
ﻛﻔﺎﻳﻪ : ﻭﺍﺣﺪ ﺟﺒﺎﻟﻲ ﺻﺎﺣﺒﻪ ﺣﻠﻔﻠﻪ ﺑﺎﻟﻄﻼﻕ ﻳﺠﻲ ﻟﺤﻮﺍﺯﺗﻪ ﺩﺍﻳﺮ ﺯﺭﺩﺓ ..
ﺿﺤﻜﺖ ﺯﻳﻨﺐ : ﻳﺤﻠﻒ ﺑﺎﻟﻄﻼﻕ ﻫﻠﺒﻪ ﺷﻜﻠﻪ ..
ﻛﻔﺎﻳﻪ ﺑﻀﺤﻜﻪ : ﻣﺎﻳﺤﻠﻔﺶ ﺑﻐﻴﺮﻩ ..
ﺿﺤﻜﻮﺍ ﻛﻠﻬﻢ ..
🍁🍁🍁🍁🍁
ﻃﺎﺑﺖ ﺧﻼﺹ ..
ﺩﻻﻝ : ﺍﻳﻪ ... ﻗﺮﺑﻴﻠﻲ ﺍﻟﺼﻮﺍﻧﻲ .
ﻗﺮﺑﺖ ﺭﺑﺎﺏ ﻟﺪﻻﻝ ﺍﻟﺼﻮﺍﻧﻲ ﻭﺑﺪﺕ ﺩﻻﻝ ﺗﻔﺮﻕ ﻓﻴﻬﻢ ﺍﻟﻘﻼﻳﻪ ..
ﺭﺍﻧﻴﺎ ﻭﻫﻲ ﺗﻘﺴﻢ ﻓﻲ ﺍﻟﺨﺒﺰﺓ : ﻳﻌﻨﻲ ﺧﻼﺹ ﺑﻴﻄﻠﻘﻬﺎ ﺭﺳﻤﻲ ..
ﺩﻻﻝ ﻭﻫﻲ ﺗﺼﺐ : ﺍﻳﻪ ..
ﻧﻮﺭ ﻭﻫﻲ ﺗﺎﺧﺪ ﻓﻲ ﺍﻟﺼﻮﺍﻧﻲ ﻭﺗﺤﻂ ﻓﺎﻟﺼﻔﺮﺓ : ﺍﻟﺤﻤﺪ ﻟﻠﻪ ﻳﺎﺭﺏ ..
ﺭﺑﺎﺏ ﻭﻫﻲ ﺗﺤﻂ ﻓﻲ ﺍﻟﻤﻨﺎﺷﻒ : ﺗﻜﻤﻠﻲ ﺣﻤﻠﻚ ﻭﺗﺠﻴﺒﻲ ﻭﺍﻧﺘﻲ ﻣﺮﺗﺎﺣﻪ ..
ﺩﻻﻝ ﺣﻄﺖ ﺍﻟﺴﺎﻗﻢ ﻓﻲ ﺍﻟﻼﻭﻧﺪﻳﻨﻮ .. ﻭﻗﺎﻟﺖ : ﻟﻜﻦ ﺍﻟﺤﻖ ﺧﺎﻳﻔﻪ .. ﺧﺎﻳﻔﻪ ﺍﺩﻳﺮﻳﻠﻲ ﺷﻲ .. ﺧﺎﻳﻔﻪ ﻫﻠﺒﻪ ﻣﻦ ﺭﺩﺕ ﻓﻌﻠﻬﺎ ..
ﺭﺑﺎﺏ : ﻣﺎﻋﻨﺪﻫﺎ ﻣﺎﺩﻳﺮ ﺻﺪﻗﻴﻨﻲ .. ﻣﻌﺎﺵ ﺗﺨﻤﻤﻲ . ﺍﻓﺮﺣﻲ ﻭﺑﺲ ﺗﻮﺍ ..
ﺭﺍﻧﻴﺎ ﺑﻀﺤﻜﻪ ﻏﻨﺖ : ﺍﻧﻲ ﻳﻠﻲ ﺑﺤﺒﻚ ﻭﺣﺪﻱ ﺍﻧﺎ ...
ﺍﻧﺎ ﻳﻠﻲ ﺑﺮﻳﺪﻙ ﻟﻴﺎ ﺍﻧﺎ ..
ﻏﻨﻮﺍ ﻣﻊ ﺑﻌﻀﻬﻢ ..
ﺍﻧﺎ ﺍﻟﻠﻲ ﻳﻠﻲ ﺑﻌﻤﺮﻱ ﺑﺒﻘﻰ ﺍﻧﺎ ..
ﻉ ﻭﻋﺪﻱ ﻳﺎﻭﻋﺪﻱ ﻳﺎﻭﺣﺪﻱ ﺍﻧﺎ ..
ﻉ ﺧﺸﺔ ﻋﻤﺮ : ﻣﺎﺷﺎﺀ ﺍﻟﻠﻪ ﻣﺎﺷﺎﺀ ﺍﻟﻠﻪ .. ﻣﻦ ﺑﻜﺮﻱ ﻭﺣﻨﻲ ﻧﺮﺍﺟﻮ ﻭﺍﻧﺘﻦ ﺩﺍﻳﺮﺍﺕ ﻋﺮﺱ ﻫﻨﻰ ﻳﺎﺻﺒﺎﺣﺎﺕ ..
ﺿﺤﻜﻮﺍ ..
ﺧﺪﻱ ﺍﻟﺼﻔﺮﺓ ﺍﻟﻠﻲ ﻭﺗﻮﻫﺎ ﻭﻃﻠﻊ ﻭﻫﻮ ﻳﺤﺮﻙ ﻓﺮﺍﺳﻬﺎ ﺍﻳﻤﻴﻦ ﻭﻳﺴﺎﺭ ..
ﺷﺒﺤﺖ ﺭﺍﻧﻴﺎ ﻟﺪﻻﻝ ﺑﻌﺪﻳﻦ ﻗﺎﻟﺖ : ﺩﻻﻝ ﺣﻤﺎﺗﻚ ﻣﺎﺿﺎﻳﻘﺘﺶ ﻉ ﺧﺎﻃﺮ ﺭﺩﻳﺖ ﻭﻟﺪﻫﺎ ..
ﺭﺑﺎﺏ ﺗﻠﺨﺒﻄﺖ ﻭﻟﻮﻥ ﻭﺟﻬﻬﺎ ﺍﻧﺨﻄﻒ ..
ﺩﻻﻝ : ﻻﻻ ﻋﺎﺩﻳﻪ ﺟﺪﺍ .. ﻓﻲ ﺍﻟﻨﻬﺎﻳﻪ ﻛﻞ ﺷﻲ ﻗﺴﻤﻪ ﻭﻧﺼﻴﺐ ﻭﺍﻣﻴﻨﻪ ﻣﺮﺍﺓ ﻣﺘﻔﻬﻤﻪ ﻫﻠﺒﻪ ..
ﺭﺍﻧﻴﺎ ﺍﺑﺘﺴﻤﺖ ﻭﻗﺎﻟﺖ : ﻛﻮﻳﺲ ﺍﻟﺤﻤﺪ ﻟﻠﻪ ﻧﺤﺴﺎﺑﻬﺎ ﺑﺘﺎﺧﺪ ﻣﻨﻚ ﻣﻮﻗﻒ ..
ﺿﺤﻜﺖ ﺩﻻﻝ ﻭﻗﺎﻟﺖ : ﻻﻻ ..
ﻭﺭﺑﺎﺏ ﺗﺴﻤﻊ ﻓﻲ ﺩﻭﺗﻬﻢ ﻭﻫﻲ ﺗﻐﺴﻞ ﻓﻲ ﺍﻟﻤﺎﻋﻴﻦ ﻭﻗﻠﺒﻬﺎ ﻣﻘﺒﻮﺽ ....
🍁🍁🍁🍁🍁🍁
ﻭﻋﺪﺍ ﻫﺎﻟﻴﻮﻡ ...
ﻭﺍﻟﻴﻮﻡ ﺍﻟﻠﻲ ﺑﻌﺪﻩ ﻛﻠﻬﻢ ﺭﻭﺣﻮﺍ ...
ﺑﺤﻜﻢ ﺍﻹﻟﺘﺰﺍﻣﺎﺕ ﺍﻟﻠﻲ ﻋﻨﺪﻫﻢ ﻭﺍﻟﻘﺮﺍﻳﻪ
ﻭﺑﺤﻜﻢ ﺍﻟﻌﻄﻠﻪ ﺍﻟﻠﻲ ﻛﺎﻧﺖ ﻣﺤﺪﻭﺩﻩ ﺑﺘﻼﺗﻪ ﺍﻳﺎﻡ ﻓﻘﻂ ﻓﻲ ﻋﻴﺪ ﺍﻷﺿﺤﻰ ..
🍃🍃🍃🍃🍃
ﻭﻛﻠﻬﻢ ﻛﻤﻠﻮﺍ ﺣﻴﺎﺗﻬﻢ ﻛﻴﻒ ﻣﺎﻫﻲ ..
ﻓﺎﺕ ﺷﻬﺮ ...
ﺍﺗﻨﻴﻦ ... ﺗﻼﺗﻪ .... ﺍﺭﺑﻌﻪ ...
ﺧﻤﺴﻪ ...
ﺳﺘﻪ .....
ﺳﺘﻪ ﺷﻬﻮﺭ ﺑﺎﻟﺰﺑﻂ ...
ﻣﺮﻭﺍ ﻉ ﺣﻤﻴﺪﻩ ﻓﻲ ﺣﺮﻕ ﺍﻟﺪﻡ ..
ﺗﻌﺒﺖ ﻧﻔﺴﻴﺘﻬﺎ ﻣﻦ ﺗﺴﻠﻂ ﻋﺰﻭﺯﺗﻬﺎ ﻋﻠﻴﻬﺎ ... ﻭﺯﺍﺩﺕ ﺗﻌﺒﺘﻬﺎ ﺣﻜﺎﻳﺔ ﺍﻟﺤﻤﻞ .. ﻭﻟﺴﺎﻧﺎﺕ ﺍﻟﻨﺎﺱ ﻣﺎﺗﺮﺣﻤﺶ ..
ﻭﻳﻦ ﺗﺴﻤﻊ ﺑﻮﺣﺪﻩ ﺗﺰﻭﺟﺖ ﺑﻌﺪﻫﺎ ﺣﻤﻠﺖ ﺗﺰﻳﺪ ﺗﺘﻌﺐ ..
ﺑﺎﻟﺬﺍﺕ ﺑﻌﺪ ﺣﻤﻠﺖ ﺍﻣﺎﻝ ..
ﺗﻼﻗﺖ ﻫﻲ ﻭﻳﺎﻫﺎ ﻓﻲ ﺍﻛﺜﺮ ﻣﻦ ﻣﻨﺎﺳﺒﻪ ﻭﻛﺎﻧﺖ ﺗﺸﻮﻑ ﻓﻴﻬﺎ ﻛﻴﻒ ﺑﻄﻨﻬﺎ ﻗﺎﻋﺪﻩ ﺗﻜﺒﺮ .. ﻭﺗﺒﺎﻥ ﻣﺮﺗﺎﺣﻪ ﻉ ﺍﻵﺧﺮ ..
ﻭﻋﻴﻠﺔ ﺳﺎﻟﻢ ﻛﻴﻒ ﻳﺪﻟﻠﻮﻫﺎ ﻓﻴﻬﺎ ..
ﻭﻛﻴﻒ ﻋﺰﻭﺯﺗﻬﺎ ﺗﺸﻜﺮ ﻓﻴﻬﺎ ﻭﺗﺤﻂ ..
ﻋﻜﺲ ﺳﺎﻟﻤﻪ ﺍﻟﻠﻲ ﻛﺎﻧﺖ ﺗﻠﻘﺢ ﻋﻠﻴﻬﺎ ﻗﺪﺍﻡ ﺍﻟﻨﺎﺱ ﻭﻫﻲ ﻣﻘﻌﻤﺰﺓ ..
ﻭﺍﻟﻤﻮﻗﻒ ﺻﺎﺭ ﻗﺪﺍﻡ ﺍﻣﺎﻝ ﺍﻟﻠﻲ ﻛﺎﻧﺖ ﺗﺸﺒﺤﻠﻬﺎ ﻓﻲ ﺷﺒﺤﺎﺕ ﺗﻘﻬﺮ ..
ﻭﻣﻊ ﻫﺪﺍ ﻣﺎﺯﺍﻝ ﺗﻜﺘﻢ ﻭﺗﺴﻜﺖ .. ﻣﺎﺗﺒﻴﺶ ﺗﻘﻮﻝ ﻟﺮﺍﺟﻠﻬﺎ ﺗﺨﺎﻑ ﻟﻮ ﺩﺧﻼﺗﻪ ﻓﻲ ﻣﺸﺎﻛﻠﻬﺎ ﻫﻲ ﻭﺍﻣﻪ ﺗﻔﺴﺪ ﻋﻼﻗﺘﻬﺎ ﺑﻴﻪ ..
ﻭﻹﻥ ﻣﻮﺿﻮﻉ ﺍﻟﺤﻤﻞ ﻣﺄﺭﻗﻬﺎ .. ﻣﺸﺖ ﻋﺎﻳﻨﺖ ﻓﻲ ﻃﺮﺍﺑﻠﺲ ﻭﻣﺼﺮﺍﺗﻪ ﻫﻲ ﻭﻳﺎﻩ ... ﻭﻛﻞ ﺍﻟﺪﻛﺎﺗﺮﻩ ﻗﺎﻟﻮﺍ ﺍﻥ ﻣﺎﻓﻴﻬﺎ ﺷﻲ ﻭﻻﻫﻮ ﻓﻴﻪ ﺷﻲ ﻣﺴﺄﻟﺔ ﻭﻗﺖ ﻻﺃﻛﺜﺮ ...
🍁 ﺧﻮﺍﺗﻬﺎ ﻳﺨﻤﻤﻮﺍ ﻓﻴﻬﺎ ﻫﻠﺒﻪ ﻭﺩﻳﻤﺎ ﻳﺪﻋﻮﻟﻬﺎ ..
ﺍﻛﺜﺮ ﺩﻋﻮﺓ ﻣﺘﻤﺴﻜﻴﻦ ﺑﻴﻬﺎ ﻫﻲ ﺍﻥ ﺍﺧﺘﻬﻢ ﺣﻤﻴﺪﻩ ﺭﺑﻲ ﻳﺮﺯﻗﻬﺎ ﺑﻌﻴﻞ ﻳﻔﺮﺡ ﻗﻠﺒﻬﺎ ...
ﺑﺮﻏﻢ ﺍﻟﻬﻤﻮﻡ ﺍﻟﻠﻲ ﻣﺮﺍﻓﻘﻪ ﻟﺰﻳﻨﺐ ..
ﺑﺲ ﻛﺎﻧﺖ ﺗﺨﻤﻢ ﻓﺨﻮﺍﺗﻬﺎ ﻫﻠﺒﻪ ﻣﻊ ﻭﻟﺪﻫﺎ .. ﺍﻟﻠﻲ ﻭﻻ ﻣﻨﻌﺰﻝ ﻗﻠﻴﻞ ﺍﻟﻜﻼﻡ ﻭﻏﺎﺭﻕ ﻓﻲ ﺍﻟﺨﺪﻣﻪ ﻭﺧﻼﺹ ..
🍁 ﺯﻱ ﺍﺧﺘﻪ ...
ﺍﻟﻠﻲ ﺑﻌﺪ ﺗﺨﺮﺟﺖ ﻣﻦ ﺍﻟﺪﻭﺭﺓ ﺑﺪﺕ ﺗﺨﺪﻡ ﻓﻲ ﺍﻟﻤﺪﺭﺳﻪ ﺑﺠﺪ ﻭﺍﺟﺘﻬﺎﺩ ﺑﺮﻏﻢ ﺍﻧﻬﺎ ﻓﻲ ﺍﻟﺒﺪﺍﻳﺔ ﺗﻌﺒﺖ ﺷﻮﻳﻪ ﻣﻊ ﺍﻟﺼﻐﺎﺭ ﺑﺲ ﺑﻌﺪﻳﻦ ﺧﺸﺖ ﺍﻟﺠﻮ ﻭﺍﻧﺪﻣﺠﺖ ..
ﻭﻛﺎﻧﺖ ﺗﺎﺧﺪ ﻓﻲ ﻣﻌﺎﺵ ﻛﻮﻳﺲ .. ﺗﺼﺮﻑ ﻓﺮﺑﻌﻪ ﻭﺍﻟﺒﺎﻗﻲ ﺍﺩﺱ ﻓﻴﻪ ..
🍁 ﺭﺍﻧﻴﺎ ﻛﺎﻧﺖ ﻣﺘﻔﻮﻗﻪ ﻓﻘﺮﺍﻳﺘﻬﺎ ﻭﺗﺼﻔﻲ ﺑﻤﻌﺪﻝ ﻋﺎﻟﻲ ..
ﻭﺗﻮﺍ ﻫﻲ ﺍﺩﻳﺮ ﻓﺈﻣﺘﺤﺎﻧﺎﺗﻬﺎ ﺍﻟﻨﻬﺎﺋﻴﻪ ﻟﻠﺴﻤﺴﺘﺮ ﺍﻟﺘﺎﻟﺖ ..
🍁🍁🍁🍁
ﺍﻣﺎ ﻋﻤﺮ ﻭﻟﻤﻴﺎﺀ ..
ﻫﺎﻧﻴﺒﺎﻝ ﻭﻋﺮﻭﺑﻪ ...
ﻓﺤﺎﻟﻬﻢ ﻫﻮ ﻫﻮ ﻣﺎﺗﻐﻴﺮﺵ ..
ﺍﺻﺪﻗﺎﺀ ﻇﺎﻫﺮﻳﺎ .. ﺑﺲ ﻗﻠﻮﺑﻬﻢ ﺣﺒﺎﻳﺐ 💕..
🍁🍁🍁🍁🍁
ﺳﺮﺕ ..
ﺍﻭﺍﺧﺮ ﻣﺎﻳﻮ " ﺍﻟﻤﺎﺀ " ..2009
ﻣﻘﻌﻤﺰ ﻓﻲ ﺍﻟﺼﺎﻟﻪ ﻳﺘﻔﺮﺝ ﻉ ﺍﻟﺘﻠﻔﺰﻳﻮﻥ ..
ﻏﻴﺮ ﻋﻴﻮﻧﻪ ﺟﻴﻬﺘﻬﺎ ﻟﻤﺎ ﻟﻘﺎﻫﺎ ﻃﺎﻟﻌﻪ ﻣﻦ ﺍﻟﺪﺍﺭ ﻣﺘﻮﺟﻬﻪ ﻟﻠﻜﻮﺟﻴﻨﻪ ..
ﻻﺑﺴﻪ ﻗﻔﻄﺎﻥ ﺣﻮﺍﻣﻞ ﺻﻴﻔﻲ ﻟﻮﻧﻪ ﺳﻤﺎﻭﻱ ...
ﻭﺭﺍﻓﻌﻪ ﺷﻌﺮﻫﺎ ﻛﻌﻜﻪ ﻣﺒﻌﺜﺮﺓ ..
ﻭﺑﻄﻨﻬﺎ ﻗﺪﺍﻣﻬﺎ ..
ﺿﻢ ﺷﻮﺍﺭﺑﻪ ﻟﺪﺍﺧﻞ ﻳﺤﺎﻭﻝ ﻳﺸﺪ ﺿﺤﻜﺘﻪ ﻭﺭﺟﻊ ﺷﺎﻑ ﻟﻠﺘﻠﻔﺰﻳﻮﻥ ..
ﺷﺒﺤﺘﻠﻪ ﺑﻄﺮﻑ ﻋﻴﻨﻬﺎ ﻭﻫﻲ ﺗﻤﺸﻲ ﻗﺎﻟﺖ : ﺍﺿﺤﻚ ﺍﺿﺤﻚ ﻟﻴﺶ ﺷﺎﺩﻫﺎ .
ﻋﻤﺎﺭ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻪ ...
ﺷﺪﺕ ﺿﺤﻜﺘﻬﺎ ﻭﻣﺎﺯﺍﻟﺖ ﻣﺤﺎﻓﻈﻪ ﻉ ﻣﻼﻣﺢ ﻭﺟﻬﻬﺎ ﺍﻟﻐﻀﺒﺎﻧﻪ ..
ﺑﻌﺪﻳﻦ ﻗﺎﻟﺖ : ﻣﺎﻓﻲ ﺷﻲ ﻳﻀﺤﻚ ﺭﻩ ..
ﺍﻟﺘﻔﺖ ﻭﻗﺎﻝ : ﻗﺼﺪﻱ ﻣﻨﻈﺮﻙ ﺧﻴﺎﺍﺍﺍﺍﻝ ... ﻓﻴﻠﺔ ﺻﻐﻴﺮﺓ ﺭﺍﻳﺤﻪ ..
ﺩﻻﻝ ﻭﻗﻔﺖ ﻓﻢ ﺍﻟﻜﻮﺟﻴﻨﻪ ﺍﻟﺘﻔﺘﺖ ﺷﺒﺤﺘﻠﻪ ﺑﺎﻟﺘﻔﻨﻴﺼﻪ ﻭﻗﺎﻟﺖ : ﻫﻴﻴﻴﻴﻴﻴﻴﻴﻴﻴﻴﻴﻲ ﻓﻴﻠﻪ !!!!
ﻫﺰ ﺭﺍﺳﻪ ﺑﺈﻳﺠﺎﺏ ﻭﻫﻮ ﻣﻴﺖ ﺑﺎﻟﻀﺤﻚ ..
ﺩﻻﻝ : ﺗﻮ ﺗﺸﻮﻑ ﻳﺎﻋﻤﺎﺭ ﺗﻮ ﺗﺸﻮﻑ ﺑﻌﺪ ﻧﺠﻴﺐ .. ﻧﻌﻠﻦ ﻋﻠﻴﻚ ﺣﺮﺏ ﺍﻧﺖ ﻣﺶ ﻗﺪﻫﺎ ﻳﺎﺣﻀﺮﺓ ﺍﻟﻤﻼﺯﻡ ﺍﻭﻝ .. ﻗﺎﻟﺖ ﻛﻼﻣﻬﺎ ﻭﻫﻲ ﺗﺄﺷﺮ ﻋﻠﻴﻪ ﺑﺴﺒﺎﺗﻬﺎ ..
ﻋﻤﺎﺭ ﺑﻀﺤﻜﻪ : ﺗﻌﻮﺩﺕ ﻉ ﺍﻟﺠﻔﺎ ﺧﻼﺹ ﻟﻴﻚ 6 ﺷﻬﻮﺭ ﻟﻌﻨﺪ ﺗﻮ ..
ﺩﻻﻝ ﺑﺮﻓﻌﺔ ﺣﺎﺟﺐ : ﺗﻮ ﻧﺸﻮﻓﻮﺍ ..
ﺭﻓﻊ ﺣﻮﺍﺟﺒﻪ ﺑﻌﺪﻳﻦ ﺭﺟﻊ ﺷﺒﺢ ﻟﻠﺘﻠﻔﺰﻳﻮﻥ ﻭﺣﻂ ﺭﺟﻞ ﻉ ﺭﺟﻞ ﻭﻗﺎﻝ : ﻛﺎﻥ ﺣﺎﺭﺕ ﻭﺑﺎﺭﺕ ﻧﻄﺒﻘﻮﺍ ﺍﻟﺸﺮﻉ ..
ﺩﻻﻝ ﺑﺘﻔﻨﻴﺼﻪ : ﻧﺬﺑﺤﻚ ﺫﺑﺢ ﺑﻌﺪﻳﻦ ﺍﻧﻲ ﻣﺎﺻﺪﻗﺖ ﺍﻓﺘﻜﻴﺖ ﻣﻦ ﻫﺪﻳﻜﺎ ...
ﻋﻤﺎﺭ ﺿﺤﻚ ﻭﻫﻮ ﻳﺸﺒﺢ ﻟﻠﺘﻠﻔﺰﻳﻮﻥ ..
ﻫﻲ ﺯﺍﺩﺕ ﻓﻨﺼﺖ ﻭﻗﺎﻟﺖ : ﻋﻤﺎﺭ ...
ﻣﺎﺑﺎﺵ ﻳﻌﺪﻝ ﻋﻠﻴﻬﺎ ﻳﺒﻲ ﻳﺤﺮﻗﻠﻬﺎ ﺩﻣﻬﺎ ﺑﻠﻌﺎﻧﻲ .. ﻳﺤﺒﻬﺎ ﻟﻤﺎ ﺗﻌﺼﺐ ..
ﺑﺼﻮﺕ ﺍﻋﻠﻰ : ﻋﻤﺎﺍﺍﺭ .... ﻋﻤﺎﺍﺍﺍﺍﺍﺍﺍﺍﺭ ..
ﺍﻟﺘﻔﺖ ﻃﻮﻝ ﺷﺎﻓﻬﺎ ﻟﻘﺎﻫﺎ ﺣﺎﻃﻪ ﻳﺪﻫﺎ ﻉ ﺑﻄﻨﻬﺎ ﻭﻳﺎﻳﻦ ﻋﻠﻴﻬﺎ ﺗﺘﻮﺟﻊ ..
ﺩﻻﻝ : ﻋﻤﺎﺍﺍﺍﺍﺍﺭ ... ﻭﻭﻭﻭﻭﻭﻩ ﻋﻠﻴﺎ ﻋﻤﺎﺍﺍﺍﺭ ...
ﺟﺎﻫﺎ ﻃﻮﻝ ﻳﺠﺮﻱ :. ﺩﻟﻮﻟﻪ ...
ﺩﻻﻝ ﺑﺄﻟﻢ : ﻋﻤﺎﺍﺍﺭ .. ﻋﻤﺎﺍﺍﺍﺭ ... ﻭﺍﺍﺍﺍﺍﺍﺍﺍﺍﻙ ..
ﺗﻔﻠﻮﺵ ﻣﺴﻜﻴﻦ ..
ﻣﺸﻲ ﻳﺠﺮﻱ ﻃﻮﻝ ﻟﺘﻠﻴﻔﻮﻧﻪ ..
ﺍﺗﺼﻞ ﺑﻮﻟﺪ ﺍﺧﺘﻪ ﺍﺻﻴﻞ ﻳﺠﻲ ﻳﺮﻓﻌﻬﻢ ﻟﻠﻤﺴﺘﺸﻔﻰ ﻭﻳﺠﻴﺐ ﻣﻌﺎﻩ ﺍﻣﻪ ...
🍁🍁🍁🍁🍁🍁
ﻃﻠﻌﺖ ﺗﺠﺮﻱ ﻣﻦ ﺍﻟﻜﻮﺟﻴﻨﻪ ﻭﺻﻠﺖ ﻓﻲ ﺍﻟﺪﺍﺭ ..
ﻧﻌﻴﻤﻪ ﺑﻔﺮﺣﻪ : ﺩﻻﻝ ﺟﺎﺑﺖ ﻭﻟﻴﺪ ..
ﻧﻮﺭ ﺷﻬﻘﺖ ﺑﻔﺮﺡ ...
ﻣﺠﺪ ﺟﻲ ﻷﻣﻪ ﻳﻤﺮﺩ ..
ﻃﺒﺴﺖ ﻗﺎﻣﺘﻪ ﻭﻫﻲ ﺗﻘﻮﻝ : ﻭﻟﻴﺖ ﺧﺎﻝ ﻳﺎﻣﻌﻔﻦ ...
ﻧﻮﺭﺿﺤﻜﺖ ﺑﻔﺮﺡ : ﻭﺍﻧﻲ ﻭﻟﻴﺖ ﺧﺎﻟﻪ .. ﻳﺎﺭﺑﻲ ﻣﺶ ﻣﺼﺪﻗﻪ ..
ﻧﻌﻴﻤﻪ ﺑﻀﺤﻜﻪ : ﻭﻻ ﺍﻧﻲ ﻣﺼﺪﻗﻪ ﺍﻧﻲ ﻭﻟﻴﺖ ﺟﺪﻩ ..
ﻧﻮﺭ ﺑﻀﺤﻜﻪ : ﺑﺎﺑﺎ ﻋﺮﻑ ..
ﻧﻌﻴﻤﻪ : ﻫﻮ ﺍﻟﻠﻲ ﻗﺎﻟﻲ ﺍﺻﻼ ﻓﺮﺣﺎﻥ ﻗﺮﻳﺐ ﻳﻄﻴﺮ ..
ﻧﻮﺭ : ﺑﺎﻫﻲ ﺍﻣﺘﻰ ﺑﻨﻤﺸﻮﻟﻬﺎ ..
ﻧﻌﻴﻤﻪ ﺗﻨﻬﺪﺕ ﺑﻀﻴﻖ ﻭﻗﺎﻟﺖ : ﺑﻌﺪ ﻳﻮﻣﻴﻦ ﻟﻤﺎ ﻳﺮﻭﺡ ﻫﻮ ﻣﻦ ﻣﻬﻤﺘﻪ ...
ﻧﻮﺭ ﺑﺤﺰﻥ : ﻫﻠﺒﻪ ..
ﻧﻌﻴﻤﻪ : ﺍﻟﻠﻪ ﻏﺎﻟﺐ ..
💕💕💕💕💕💕💕💕💕
ﺍﻟﻴﻮﻡ ﺍﻟﻠﻲ ﺑﻌﺪﻩ ..
ﻓﻲ ﺍﻟﻄﺮﻳﻖ ...
ﻋﻤﺎﺭ : ﺑﻨﺤﻄﻚ ﻳﺎﺳﻤﺢ ﻓﻲ ﺍﻟﺤﻮﺵ .. ﺍﺩﻭﺷﻲ ﺗﺎﺧﺪﻱ ﺍﻟﺪﺑﺶ ﺍﻟﻠﻲ ﺗﺒﻴﻪ ﺍﻧﺘﻲ ﻭﺍﻟﻔﺎﺭﺱ ... ﻭﺍﻧﻲ ﺑﻨﻌﺪﻱ ﻣﺸﻮﺍﺭ ﺳﺎﻋﺔ ﺯﻣﺎﻥ ﻭﻧﺠﻴﻚ ..
ﺩﻻﻝ : ﺑﺘﻌﻄﻞ؟ ..
ﻋﻤﺎﺭ ﺗﻨﻬﺪ ﻭﻗﺎﻝ : ﺍﻳﻤﻦ ﻋﻨﺪﻩ ﻣﺸﻜﻠﻪ ﻓﻲ ﺍﻟﻤﺪﺭﺳﻪ ﻛﻠﻤﻨﻲ ﻭﻗﺎﻟﻲ ﺗﻌﺎﻝ ﺿﺮﻭﺭﻱ ..
ﺩﻻﻝ ﻫﺰﺕ ﺭﺍﺳﻬﺎ ﺑﺈﻳﺠﺎﺏ .. ﺑﻌﺪﻳﻦ ﺷﺒﺤﺖ ﻟﻮﻟﺪﻫﺎ ﻭﻗﻌﺪﺕ ﺗﻐﻨﻴﻠﻪ : ﻏﻴﺮ ﺍﻛﺒﺮ ﺑﺲ ... ﻏﻴﺮ ﺍﻛﺒﺮ ﺑﺲ ﻧﺪﻳﺮﻭﻟﻚ ﻋﺪﺓ ﻭﻓﺮﺱ ..
ﻋﻤﺎﺭ : ﻫﻬﻬﻬﻬﻬﻬﻬﻬﻬﻬﻪ ..
ﺷﺒﺤﺘﻠﻪ ﺩﻻﻝ ﻭﺍﺑﺘﺴﻤﺖ ﺑﺤﺐ ..💕
🍁 ﺣﻄﻬﺎ ﻓﻲ ﺍﻟﺤﻮﺵ ..
ﻭﻃﻮﻝ ﻣﺸﻲ ﻟﻤﺪﺭﺳﺔ ﺍﻳﻤﻦ ...
💕 ﺩﻭﺷﺖ .. ﻭﻟﺒﺴﺖ ... ﻭﺗﻌﻄﺮﺕ ..
ﺑﻌﺪﻳﻦ ﻭﺗﺖ ﺣﻮﺍﻳﺞ ﻟﻴﻬﺎ ﻭﻟﻮﻟﺪﻫﺎ ..
ﺑﻌﺪ ﻛﻤﻠﺖ ..
ﻣﺸﺖ ﻟﺴﺮﻳﺮﻩ ﻭﻗﺎﻟﺖ : ﺣﺒﻴﺐ ﻣﺎﻣﺎ ﻣﺎﻧﻘﺪﺭﺵ ﻧﺪﻭﺷﻠﻚ ﺍﻧﻲ ﺭﺍﺟﻲ ﻟﻴﻦ ﻧﻤﺸﻮﺍ ﻟﺤﻮﺵ ﺣﻨﻴﻨﻪ ﻛﺎﻣﻠﻪ ﻭﻫﻲ ﺍﺩﻭﺷﻠﻨﺎ ﻳﺎﻋﻤﺮﻱ ..
ﺳﻤﻌﺖ ﺑﺎﺏ ﺍﻟﺤﻮﺵ ﺍﻧﻔﺘﺢ ..
ﺩﻻﻝ : ﺍﻫﻮ ﺑﺎﺑﺎ ﺍﻟﺤﻠﻮ ﺟﺎﻧﺎ ﻭﺗﻮﺍ ﺑﻨﻤﺸﻮﺍ ﻟﺤﻨﻴﻨﻪ ﺳﻤﻮﺣﻲ ﺗﺮﺍﺟﻲ ﻓﻴﻨﺎ ..
ﻭﺧﺮﺕ .. ﻭﺍﻟﺘﻔﺘﺖ ﺑﺶ ﺗﻄﻠﻊ ..
ﺟﻤﺪﺕ ﻓﻤﻜﺎﻧﻬﺎ ....
ﻋﻴﻮﻧﻬﺎ ﺗﻮﺳﻌﻮﺍ ﺑﺼﺪﻣﻪ ﻭﻫﻲ ﺗﺸﻮﻑ ﻗﺪﺍﻣﻬﺎ ..
ﻗﻌﺪﺕ ﺗﺮﺟﻒ ﻣﻊ ﺑﻌﻀﻬﺎ ..
" ﺗﻀﺤﻜﻲ ﻭﻓﺮﺣﺎﻧﻪ ﻭﻋﺎﻳﺸﻪ ﺣﻴﺎﺗﻚ ﺑﻌﺪ ﺧﺮﺑﺘﻲ ﻋﻴﺸﺘﻲ ﻭﺩﻣﺮﺗﻴﻬﺎ "
ﺩﻻﻝ ﻭﻫﻲ ﺗﺮﺟﻒ : ﺍﻧﺘﻲ .. ﻛﻴﻒ .. ﺧﺸﻴﺘﻲ ..
ﻫﻨﺪﺍ ﺑﺤﻘﺪ : ﻛﻴﻒ ﻣﺎﺍﻧﺘﻲ ﺧﺸﻴﺘﻲ ﺣﻴﺎﺗﻲ ﻭﻗﻠﺒﻴﺘﻬﺎ ﻗﻠﺐ ﻭﺩﻣﺮﺗﻴﻬﺎ ﻳﺎﻟﻔﻌﻪ ..
ﺩﻻﻝ ﻭﻫﻲ ﺗﺮﻋﺶ : ﺍﻧﻲ ﻣﺎﺩﺭﺗﻠﻚ ﺷﻲ ... ﺍﻧﺘﻲ .. ﺧﺮﺑﺘﻲ ﻉ ﺭﻭﺣﻚ ..
ﻫﻨﺪﺍ : ﻳﺎﺣﻘﻴﺮﺓ ﻳﺎﻛﻠﺒﻪ ... ﺍﻧﻲ ﺍﻟﻠﻲ ﺧﺮﺑﺖ ﻉ ﺭﻭﺣﻲ !!
ﺩﻻﻝ : ﺍﻳﻪ ﺍﻧﺘﻲ ... ﺍﻧﺘﻲ .. ﻛﺎﻥ ﻗﻌﺪﺗﻲ ﻋﺎﻗﻠﻪ ﻭﻟﻬﻴﺘﻲ ﺑﺼﻐﺎﺭﻙ ﺭﺍﻫﻮ ﻣﺎﺻﺎﺭﺵ ﻓﻴﻚ .. ﻫﻜﻲ ..
ﻫﻨﺪﺍ : ﻳﺎﻣﺴﺨﻪ ... ﻳﺎ ﺑﻨﺖ ..*^%@$
ﺩﻻﻝ : ﺳﻜﺮﻱ ﻓﻤﻚ ﻳﺎﻭﺍﻃﻴﻪ ..
ﻗﺪﻣﺘﻠﻬﺎ ﻫﻨﺪﺍ .. ﻭﺿﺮﺑﺘﻬﺎ ﻛﻒ ﺑﺄﻗﻮﻯ ﻣﺎﻋﻨﺪﻫﺎ ..
ﻣﺎﻟﺤﻘﺘﺶ ﺩﻻﻝ ﺗﺘﻠﻔﺖ ﻭﺍﻻ ﻭﻳﺠﻴﻬﺎ ﺍﻟﺘﺎﻧﻲ ...
ﻭﺑﺪﺕ ﻫﻨﺪﺍ ﺯﻱ ﺍﻟﻤﺠﻨﻮﻧﻪ ﺗﻀﺮﺏ ﻓﻲ ﺩﻻﻝ ..
ﻭﺩﻻﻝ ﺗﻌﻴﻂ .. ﺗﺤﺎﻭﻝ ﺗﻘﺎﻭﻡ ﺑﺲ ﻣﺶ ﻗﺎﺩﺭﺓ ...
ﺍﻟﻤﺮﺍﺓ ﻧﺎﻓﺲ ﻭﻛﻴﻒ ﺟﺎﻳﺒﻪ ﻭﺟﺴﻤﻬﺎ ﻣﻨﻬﻚ ...
ﻭﻣﺎﺯﺍﻟﺖ ﻫﻨﺪﺍ ﺯﻱ ﺍﻟﻮﺣﺶ .. ﺗﻀﺮﺏ ﻓﻴﻬﺎ ﺑﻐﻞ ﻏﻠﻬﺎ ..
ﻃﻴﺤﺘﻬﺎ ﻭﺑﺮﻛﺖ ﻓﻮﻗﻬﺎ ﻭﺷﺪﺕ ﺷﻌﺮﻫﺎ ﻭﻗﺎﻟﺖ : ﺣﻼﻝ ﺍﻟﻘﺘﻞ ﻓﻲ ﻛﻠﺒﻪ ﻛﻴﻔﻚ .....
ﺭﻥ ﺗﻠﻴﻔﻮﻥ ﺩﻻﻝ ...
ﻫﻨﺪﺍ ﺷﺒﺤﺖ ﻟﻠﺘﻠﻴﻔﻮﻥ ... ﺧﺎﻓﺖ .. ﻃﻠﻘﺘﻬﺎ ﻭﻧﺎﺿﺖ ...
ﺩﻓﻠﺖ ﻋﻠﻴﻬﺎ .. ﻭﻭﺧﺮﺕ ﺧﻄﻮﺗﻴﻦ ﺑﻌﺪﻳﻦ ﻟﻔﺖ ﻭﻃﻠﻌﺖ ﺗﺠﺮﻱ ﻣﻦ ﺍﻟﺤﻮﺵ ...
ﻭﺧﻠﺖ ﺩﻻﻝ ﻓﺎﻗﺪﻩ ﻟﻠﻮﻋﻲ ﺗﻤﺎﻣﺎ ..
ﻭﺟﻮﺍﺩ ﻭﻟﺪﻫﺎ ﺣﺪﺍﻫﺎ ﻳﺒﻜﻲ ﺑﺸﺪﻩ ...
🍁🍁🍁
ﻃﻠﻌﺖ ﺗﺠﺮﻱ ﺑﺮﺍ ﺍﻟﺤﻮﺵ .. ﻭﺻﻠﺖ ﻓﻲ ﺍﻟﺒﺎﺏ ﺷﺒﺤﺖ ﻟﻠﺤﺎﺭﺱ ..
ﻓﺘﺤﺖ ﺍﻟﺸﻨﻄﻪ ﻭﻃﻠﻌﺖ ﺍﻟﻔﻠﻮﺱ ﻭﻣﺪﺗﻬﻮﻟﻪ ﺧﺪﺍﻫﻢ ..
ﻭﻫﻲ ﻃﻮﻝ ﺭﻛﺒﺖ ﺳﻴﺎﺭﺗﻬﺎ ﻭﺗﺤﺮﻛﺖ ﺑﺴﺮﻋﻪ ...
... ﻳﺘﺒﻊ .
