#رمضان_احلا_مع_جمان_فريد
#العشق_المتمرد
الجزء السابع ..
الساعه2:30 بعد الظهر
سرت💓
كامله : والله كله بتساخير الله وباته وباتها هكي يبوا..
الساكته "أختها": ربي يتمم على خير..
من جهة تانيه في نفس الصالون..
سلوى "بنت الساكته": كيف بديروا معاها هدي الخشم فوق ومش اي شي يعجبها..
أصاله: الله غالب خوي ويبيها ماعندنا مانديروا..المهم فحوش بروحها..
سلوى : بيعدوا للتشيك قالوا..
أصاله: محمود بيقرا فيها ..
سلوى :اها...
انفتح الباب وخش..
اتفاجأ بالضيوف ...بعد صكر الباب نزل عيونه وخش..
عمار:السلام عليكم..
الساكته بفرح: عماااار ..وينك ياعمااار وينك لاعاد شفناك ولاعاد جيت ولاعاد تسأل ولا تقول عندي خالات ننشد عنهن..
عمار ضحك بإحراج؛ شنو حالك ياخالتي..
الساكته بعتب:خالتك !؟ كان خالتك حق ره تنشد عليا ودورني وتجيني والله اني وخالاتك زعلات منك واجد..تقولك امك..
كامله بضحكه: معليشي ياساكته الولد كبر ولى يتحشم يخش حياشكن البنات كبرن وهو حشومي شوي..
عمار شبح لأمه وضحك وحرك راسه يمين ويسار..
الساكته؛كيف خواته البنات ياكامله..
عمار ابتسم و حط يده ع راسه : حقك ع راسي ياخالتي انتي وخالاتي كلهن...وتوا شدن ارواحكن كل خميس بنتغدا عند وحده..
ضحكوا...
الساكته بضحكه:مرحبتين ومرحبا..
ضحك وقال : هي نستأذن..
الساكته :اذنك معاك حبيبي...
مشي لجهة الديار ..
وسلوى معاه بعيونها: ماشاء الله كبر واجد وتغير..
اصاله بضحكه: والله اللي يعرفه ويحكي معاه يحسابه اكبرنا ..
سلوى: كويس بس لازم يعيش سنه مايكبرش قبل وقته..
اصاله:عمار من يوم يومه هكي عقله كبير ومرافق باتي وين مايعدي تحسي خلطة الكبار هي اللي ينسجم معاها..طبعا بإستثناء ولاد عمتي في *******..
سلوى: ايييه حق..بتعزموهم ..
اصاله : اكيد حكم باتي ياحنه..
سلوى: ليش ماتحبيهمش..
اصاله بتضييقه عيون:متخلفين وقدم واجد..
سلوى :صح غادي مازالوا متزمتين وعقليتهم قديمه..
🌴🌴🌴🌴🌴🌴🌴🌴🌴🌴🌴🌴🌴🌴🌴🌴
غير ياامي قولولي خيركن بس..
عودة وعيونها حمر: تعاركنا مع بنات في المدرسه..
امانه: امتى بديتن قرايه بش تتعاركن!!
عودة : تعاركنا وخلاص يمي بالله خليني نرقد...
وعطتها بظهرها...
اما عروبه كانت رايحه في النوم من كثر مابكت..
امانه تنهدت :ربي يهديكن ..ره بعد تنوضن غصب عنكن بتاكلن...
ولفت وطلعت من الدار...
عودة التفتت شبحت لأختها دموعها نزلوا من جديد ولفت وجهها :الحقير هدى الواااطي...
*****
الساعه 6مساء..
الهادي يوكل في السعي ويشبح لخوه..
اللي مقعمز ع المرشبيدي اللي يطل ع الوادي وسارح ويبان جوه ملخبط هلبه..
كمل وطلع من الزريبه ومشاله..
وصل فيه ..
الهادي : هانيبال..
استاقض وتلفت...
اتفاجأ لما شاف عيونه محبوسات فيهم الدموع..
الهادي : صاير معاك شي !!
هانيبال رجع شاف القدام وحرك راسه ايمين ويسار...
الهادي هز راسه بإيجاب : براحتك...
شبحله شويه..بعدين لف ومشي..
لقي سليمان جاي..
سليمان : هانيبال هنى..
الهادي هز راسه بإيجاب وكمل طريقه..
وسليمان كمل طريقه لهانيبال...
وصل فيه
سليمان قعمز جنبه:زعيم...
هانيبال ماردش ...
سليمان تنهد وشبح القدام : نادم..
هانيبال:مشكلتي لساني مانعرفش نسيطر عليه مرات..
سليمان : بالذات لما تزعل ولا طيرلك..
هانيبال تنهد وسكت..
سليمان : اعتذر منهن وخلاص..
هانيبال شبحله : نعتذر!!!!شبح القدام ...مازالت هدي بس!!
سليمان : ههههههه...باهي لعند امتى بتقعد عايش الحاله هدي..
هانيبال ناض: لا حاله لاحالات...هي تعال نعدوا للجامع المغرب قريب..
ناض سليمان يضحك: هي..
ومشوا مع بعض..
هانيبال" نعتذر!!عقابها نعتذر من بنت!!"...
ضحك بتهكم وحرك راسه ايمين ويسار...
سليمان: ههههههههه..قاعد تفكر فيها..
هانيبال بتفنيص:وطي حسك ياكلب سيدي..
شد ضحكته سليمان وهو يشوف لعمه سابقهم بيمشي للجامع..
طلعوا كلهم من القطعه
"الله أكبر...الله أكبر"..
سليمان : ميلاد يأذن..
هانيبال :ايه صوته..
"ميلاد مؤذن في في الجامع اللي حداهم"...
داخل في الحوش...
خشت حميده بصونيه خبزة الفرن اللي دارتها...
لقت امها طالعه من الحمام كانت تتوضا..
حميده: يمي جتني امال بكري شوي قالتلي كفايه جايه الخميس..
فاطمه :باهي..باهي...
ومشت للمكان تصلي فيه خطرت عليها زينب واضايقت...
خشت حميده للكوجينه جتها غاليه..
غاليه : كفايه جايه؟..
حميده بهمس: ايه حتى زينب جايه لكن قالت ماتقولوش...
غاليه بضحكه: مفاجأة قصدك !؟
حميده : هههههه ايه...
وقعدت تستف في الخبزة...
****
مقعمزة حدا شيبانيها في الصاله يهدرزوا...
جتها حماتها وقعمزت حداها:نعيمه ماقلتليش شن لبستي فعرس خوك...
حماتها الصغيرة جتهم: اكيد ردي ههههههههه...
الحاج حمد:وخيره الردي مش خير من اللبس المعفن اللي يلبسوا فيه هالوقت...
خوله حماتها الصغيره: انبصر يابوي عادي هي خدت ع بصارتنا..
ابتسمت نعيمه مجامله: ايه خديت عليها..
حماتها عبير: باهي قوليلي مرت خوك الجديده انسجمت مع ماليك وجوهم..
خوله : عايشه هني حماتها طرابلسيه ماه..
عبير:وانتي منين تعرفي قداش ليها ماجتناش..
خوله: عبدالسلام حكالنا ..
"عبدالسلام كل شي يعاود فيه لأمه مايدس فشي ويدوي قدام ماليه فكل شي"..
نعيمه عيونها في التلفزيون وساكته...
عبير: مادام طرابلسيه اكيد بتعيش هني من يتحمل العيشه في هديكا الصحرا...
نعيمه تسحن من داخل وساكته..
خوله : ايه نعيمه مشيتوا للبحر غادي ؟!!ههههههههه
عبير: ههههههههههههه....
ع جية عزوزتها ؛ مالا بتعوم في الوادي؟
عبير : في الفاسكيه يما ههههههههه
خوله :هههههههههههه حيوانه ياعبير..
عزوزتها قعمزت..
شيبانيها ناض وخلاهم..شد روحه هلبه وداسها لبناته لين تروح كنته..
نعيمه معاش قدرت تتحمل دموعها نزلوا....
خوله : حييييي تبكي؟؟؟
عبير : لالا...من جدك نعومه نبصروا ره...وانتي من زبيبه تسكري..
عزوزتها امباركه :يبصروا عليك علاش تسحسحي في دميعاتك توا...
عبير: بكل انتي يانعيمه بكايه..
خوله :قالها عبدالسلام مرتي نكد..
انصمتت نعيمه وفنصت.
امباركه فنصت فبنتها..
خوله : ههههههههههههه انبصر عليك ماقالهاش هو يئدر...
عبير : هيا خلاص عاد ره والله ماعاد نبصروا عليك...
طق باب الحوش...
واحد من سلافها فتح الباب..
"مروانو"...
ابتسمت بإرتياح لما سمعت صوت حماتها الكبيرة آمنه....
خشت عليهم..
آمنه؛ كيف حالكم ياعيله...اوووو مرت خوي الباهيه هني..
ابتسمت نعيمه وهي تشوفلها..
دلال سمعت صوتها طلعت من دار اللي كانت تلعب فيها وجتها تجري..
آمنه : دلولتي ..وقامتها وقعد تبوس فيها..
"آمنه ماعندهاش صغار تحب الصغار بزياده وديما اطفطف ع صغار خوتها وخواتها وطيبه هلبه "..
*****
كان تشوفنه كيف ولى!!
غادة: لهالدرجه !!
سلوى : فيه من القايد ايام شبابه..
ريمه : ياريتيني عديت معاكن..
سلوى :وحشومي واجد مارفعش عيونه فيا ولاكلمني سلم ع امي بس..
هما يتكلموا وغادة سرحانه تذكر لما كانوا صغار كيف كانوا يتلاقوا فحوش الجد ويلعبوا مع بعض..
بس من سنين طويله معاش شافاته وكلامهم عليه دغدغ مشاعرها..
سلوى: قال بيجي الخميس يتغدا ..
غادة برفعة حواجب :لحوشنا!!!
سلوى : ايه..
غادة ابتسمت بفرح..
ريمه : عاد حني اكبر منه راحت علينا ...خليك فالحه وجيبيه..
سلوى : ايه والله ياغاده يابختها اللي تاخد واحد كيف عمار...
غادة ابتسمت بخجل وقلبها بدي يدق بقوة وهي تسمع في كلامهم💓...
*****
في الليل...
مقعمزين فم بالبوابه..
مفرشين حصير ونطوع"النطع"...
ميلاد:قالوا يمي ضاربه بالموس..
فاطمه بصدمه: يارسوول!!
الهادي: معقوله!!
ميلاد:قلوه لطرابلس اولامس..
فاطمه : وليش ماقلتوا ياكبدي راهو عدينا..
ميلاد: لاردي بالك تعدي هما داسينها اني جبت نباهم من ولد خاله عقيله وقالي راك تقول..
فاطمه : وهي الوطا لعبدالمقصود حق!؟
ميلاد: يقولوا لعبد المقصود وخوه زور وكلي حقه فيها...
الهادي :لاحول ولاقوة إلا بالله...
طلعت غاليه وحطت صفرة العشي..
ميلاد؛ غاليه..
غاليه :نعم..
ميلاد: شن صار في دورة الخياطه؟
غاليه :سجلنا فيها وبنبدوا من الأسبوع الجاي...
ميلاد: مالا خل تعدي سعيده تسجل..
شبحوله..
فاطمه : وليش تسجل كان تقعد مع ضراريها مش خيرلها!!
ميلاد: هيا كلها سويعتين ولاتلاثه عندلاش ماشيه لهلها ولاجايتكم..
خشت غاليه تمتم: عليك غبارة طحنا فيها...
خشت للكوجينه وبدت تقربع..
حميدة وقفتلها فروشن الكوجينه اللي يفتح عالصاله من داخل : شنو في ؟
غاليه بصوت واطي : سعيده بتخش معانا دورة الخياطه..
حميده : ووووووه..
وولت قعمزت...
وغاليه كملت تقربيع ماعين..قصدي غسل اماعين😂
*****
خشت اختها للدار لقتها فاتحه كتاب دراسي وتقرا فيه..
عودة: صبي هايل يبيك ع الهاتف..
عروبه غمضت عيونها بشده : افففففففف..قوليله راقدة ولا نقولك قوليله ماتت..
عودة : بعيد السو عليك ريتها فهداك الحقير..
عروبه بألم: إن شاء الله يموتوا كلهم...ودموعها نزلوا..
تنهدت عودة بألم وطلعت من الدار...
وعروبه مسحت دموعها وقالت بصوت مخنوق : بعيد السو عليه 💓💔...
*****
بيخش شهر 10تو..
فاطمه؛ سيدك كل يوم يعدي يتوق في النخل في الوادي..
ميلاد ناض : كويس..هي مالا يمي بنعدي توا وغدوة كان حيانا الله بنرقى للسوق ماتبي شي..
فاطمه : جيب العشب والخضرة للعصبان وقرصتين مشروب...
ميلاد : حاضر..تصبحوا ع خير..
ردوا باصوات متقطعه :قدامك كل خير..
قعدوا معاه بعيونهم لين مشي..
الهادي : غدوة مرات نعطل ..
فاطمه : ليش؟
الهادي : ساعات خدمه زايدة...
عمر: تتبرع غدوة تجيبلنا تيلجا "جيلاطي"...
فاطمه:ماتفسدش فلوسك ع كلام فاضي..
الهادي : تي عادي يمي تيلجا مش حاجه كبيرة...
يهدرزوا حداه...
وهو مش معاهم ساااارح وخلاص..
لدرجه انه ماركزش ع الخطر اللي كان يقرب منه خلسه...
لولا ربي طلع حميده فهالحظه...
حميده : يمي بسبوسه ولاباسطي..
فاطمه ؛ اللي بديره باهي..
عمر : خليلي الصونيه..
شبحتله بتقزز..
وكيف جايه بتخش شافت جهة هانيبال..
حميده بعياط: هاااانيبال عقرب حداا رجلك...
انفجعوا كلهم
الهادي طول شافها خدي العصا اللي حداه وحدفها ناض هانيبال خدي العصا منه ومشالها وين طاحت وقعد يضرب فيها بغل غله لين هرسها هرس..
لوح العصا ع طول يده ومشي..
فاطمه مخلوعه :سيدي عبدالسلام حضر...
"عارفه انها شركيات بس اني قاعدة ننقل في الواقع وهكي كانت معتقدات الناس وقتها ولازالت عند البعض "...
جتها غاليه تجري عطتها حبيبات كصبر غزتهم"تمضغ فيهم"
فاطمه :كان ماريتها يابنيتي ره انظر شنو صارله توا عقرب كبيرة هدي..
الهادي :خلاص يمي صبي خشي..شبح لخواته ..خششنها..
شدوها نوضوها ودخلوها...
والهادي مشي....
🍁🍁🍁🍁⛼⛼⛼
وليل عليك الليل ودمعك تحدر سيل..
وليل الليل عليهم..
وعروبه دمعها تحدر سيل..
الكلمه قاعده ترن في وذنها...
وديما نقول لما الكلمه الجارحه تجي من حد القلب يوده يكون وقعها اقوى وموجعه اكثر...
اما هو رقد مش مارقدش لكن ملامح الغضب كانت باديه ع وجهه وهو راقد وهذا اللي يبين انه راقد وهو مضايق..
🍃وتفوت ساعاتك ياليل...
وتعدي...
ويطلع خيط الصبح الأبيض...🌄
كان صبح هادي كالمعتاد..
تتخلله اصوات العصافير..والديك يصيح...
وبعيع الخرفان😂...
المهم...
🍁ماشي للمدرسه وشاد شنطته ورا كتفه.. ويده التانيه في جيبه ويمشي وخلاص ولا كلمه..
وسليمان ساكت معاه..ومرة مرة يتنهد لكن هانيبال مادروش..
لعند وصلوا للمدرسه..
شاف جهة الباب متاعهم لقي صاحباتها كيف خشوا...
هانيبال:خش تو نلحقك..
سليمان تنهد و خش...
داخل
عمر التفت : هانيبال وين؟!
سليمان: برا..
عمر شبح القدام ومشي هو وصاحبه...
برا..
قعد يراجي ويراجي...
ومرت 10دقايق
شبه خلاص كل الطالبات جو...
تنهد بضيق..
قعد يشبح للطريق شويه وبعدين خش..
*****
امانه : اكيد ياامي مشكله عاديه ولا كبيرة..
عروبه : ماتخافيش يمي والله عاديه بس نفسياتنا تعبت شوي منها...
عودة : هو اصلا مافي شي مهم واجد بيريح علينا مازلنا في اول اسبوع..قلنا اليوم نقعدوا معاك ونقلبوا الحوش..
امانه بضحكه :يافالحه انتي..
ضحكت عروبه: حتى اني استغربت...
عودة: انققققق..
عروبه: قققققق..
امهم تضحك عليهم وخلاص...
🍁🍁🍁🍁
وفات باقي الدوام وهو ع أعصابه وشبه ماتكلمش بكل ولاقدر يركز ع حرف من الشرح..
لعند جي وقت المرواح...
طلع وقال لخوه وولد عمه يسبقوه..
استنى لين طلعوا صاحباتها شبحوه كيف واقف يشوفلهم..
شبحوله شبحات كره ومشوا روحوا...
هو تنهد بضيق ..عرف انها ماجتش لاهي ولااختها..
وزاد كره روحه اكثر واكثر...
في الطريق..
سليمان :خوك طاح في البنت ياعمورة..
عمر : قديمه .
سليمان :لكن ماظني بعد الكلمه اللي قالها مازال تشبح فوجهه..
عمر : يستاهل هو ولسانه اللي زي السراق "المنشار"..
تلفت سليمان : ورانا..
تلفت عمر شافله كيف شاد شنطته ورا كتافه ويمشي وهي يشبح لوطا ويبان عليه مضايق هلبه من قرنة حواجبه...
****
الساعه 2ظهرا
ياعرووووبه..
طلعت من الكوجينه :نعم يمي ..
امانه وهي جايه : سالمه ع هاتف...
وكملت للكوجينه .
وهي مشت لمكان التليفون ..
قامت السماعه: الو سالمه..
سالمه : وينك اليوم ان شاء الله مش مريضة!؟
عروبه : لالا ماخاطريش نعدي..
سالمه :لازم غدوة تجي في مراجعه منهج السنه اللي فاتت عليها درجات..
عروبه :مراجعه شني؟؟
سالمه: استاذ الكيمياء قال بنبدا من تو نرصد الدرجات..
عروبه تأفف بضيق..
سالمه : عروبه..
عروبه :اممم..
سالمه؛ بنقول....
عروبه بحده:اي شي يخص هداك الحقير ماتقوليلش عنه ارجوك
سالمه تنهدت :باهي حبيبتي خلاص..المهم ماتنسيش غدوة مراجعه لازم تجي..
عروبه تنهدت ؛ باهي بالسلامه...
سالمه ؛ بالسلامه ....
صكرت عروبه...
برغم انها مش طايقه تسمع اي شي عنه...بس قلبها كان يدق بقوة..تمنت لو خلت سالمه تكمل كلامها بس صعب اللي قاله مش قادرة تنساه للحظه...
🍁🍁🍁
اما هو فات يومه قمه في الكآبه
طول الوقت بروحه...في القايله راقد..
والعشيه في الجردينه..
الهادي كان يبخبخ برا في الميه بش تبرد شويه لأنه كان يوم صيفي بإمتياز..
يشبحله وخلاص...
الهادي "هو معقدها مايبيش يتنازل ويستسلم لمشاعره يتعب فروحه وخلاص"...
هو مقعمز وسارح وخلاص..
ويفكر في حالها كيف يكون اللي حتى المدرسه ماجتها...
مسح بيده ع وجهه وناض...
طلع من الجردينه ومشي طلع برا القطعه بش يمشي للجامع يراجي المغرب..
*****
بين الهوا والنار ..
لازم ماتختار ..
يابتختار الجنه يابتختار النار..
" ناااار تاكلك"
😨😨😨😨😨😨😨...
خشت تجري للدار وسكرت ع روحها الباب..
قدم للباب وقعد يضرب فيه بالعكوز: يامسخه...ياحمااارة...عنابوك وبو اصلك ..
داخل..
غاليه تندب :ياغبيني ياغبيني مالقي مايخش كان توا..
"رصاااصه يامسخه"...
حميده لبدت حدا الثلاجه..
ماهو عارفه كان بيشوفها بيصير فيها تحديد الكل😂..
ع خشة فاطمه بخبزة الفرن: خيرك شنو في؟.
رمضان ؛ الشقفه ..الطرفزيون "هو يقوله هكي 😂"..مانعرفاش هنايا ياتحولوه يانكسره...
ولف وطلع : مسخين...عنبوووكم وبو اصلكم....وغفه عقاب ليل والدفينه في الضحى...
وطلع برا الحوش..
فاطمه خشت للكوجينه: عطيكن ماينزعكن ليش تعلن صوته..
حميده ترعش : يمي ..هو كان مسكر...بنت غاليه غنت بصوت عالي وهو خش وسمعها...
فاطمه وهي طالعه من الكوجينه :مس وقطع الحس...
وتوجهت للحمام...
شويه وانفتح باب الدار وطلعت غاليه : وووه عليا جاني الموت..
حميده : ههههههه تستاهلي ..
غاليه رمت الشبشب وعطتها بيه
نزلت راسها ..
يطلع من الروشن ويطب في...
ميلاد وهو حاط يده ع خده: ياكلبات...
غاليه وحميده الزوز هربوا للدار وخشوا وصكروا الباب..
ولا مرة تانيه للحوش بش يغسل وجهه وهو يسب فيهم...
*****
في الليل..
طرابلس...
زينب تحط في الحوايج في الساكوات..
وخيري حداه : نروحوا السبت العشيه..
زينب : باهي...
خيري : زينب ...
التفتت ..
خيري : بالله عليك شدي روحك وابعدي عن المشاكل...
صكري وذانك يازينب وصكري عيونك..
زينب تنهدت ورجعت شافت للساكو: حاضر..
خيري بإبتسامه :يحضرلك الخير زنوبيا..
ضحكت وهي تسرت في الساكو..
.....
السبت العشيه..
سعد: كويس...شريت صندوق كوثر ومرادة...
كفايه : واستيكة لوقا"اكيد تذكروها كنت نموت فيها😍"
سعد بضحكه: حاضر يالوقا انت ياحبي..
كفايه : هههههههه ...سعد بالله شوف الولاد رقدوا ولا لا..
سعد : تعطيني بوسه قبل..
ضحكت ومدتله خدها ...باسه بقوة...
سعد: ااااااه ياقلبي...💓
وطلع من حداها وهي تضحك وخلاص
......
حبيبي هلبه السبت...
حميد: مش هلبه لطوف معقوله تبيني نمشي الخميس نروح الجمعه لالا...
لطيفه تنهدت : باهي..خودلي اجازة..
حميد بضحكه :خديتها...
وهي صكري الضي وتعالي ورانا نوضه من الصبح..
لطفيه بضحكه : انت قلتها ورانا نوضه من الصبح معناها بنررررقد..
حميد ضحك وقال: غير صكري الضي وتعالي نتفاهموا💕
🌴🌴🌴🌴🌴🌴🌴🌴🌴🌴🌴🌴🌴🌴🌴🌴🌴
نداء الرايه الأحرف هدى ماحفظت منه حرف..
هانيبال وهو يشبح للسمي :قصدك غدوة طالع في الأداعه..
عمر : ايه...بندير العار وننزل..
هانيبال ضحك وقال : تنزل تاكل فلقة ...
عمر: الهم ع خاطر هالقطاف ناكل فلقه..
الهادي: مدراء المدارس كلهم من اللجان الثوريه..
هانيبال بتهكم : مانا مرتدين يبوا يردونا للدين متاعهم..
الهادي : اسكت...الليل يقل في الكلام...
ابتسم بتهكم ..
سكتوا التلاته..
وشويه شويه بدي صوت الشخير يعلا..
عمر..وبعدين الهادي..
هو من غير شي مش قادر يرقد..
قعد حاط ذراعه ع جبهته ويشبح للنجوم....
ويفوت الوقت بصعوبه غمض عيونه ورقد....
🍁🍁🍁🍁
وفي صباح اليوم التالي🌄..
في الطريق..
إن الألوان الحمراء والزرقاء والخضراء لاتبعت في الإنسان روح الامل..
سليمان : انت اليوم بيعدموك في الساحه..
هانيبال : الحمراء والزرقاء والسوداء ياغبي...
عمر: نهار اسود من اوله خلاص واتي للفلقه وامري لله..
وصلوا للمدرسه..
وقف فمكانه لما شاف سيارة عمها درست.
وقفوا معاه ولد عمه وخوه وقعد يراقبو في الوضع..
انفتحوا البيبان متاع السيارة..
ونزلوا الزوز..
هي كانت لامه شعرها...
مشت هي واختها...
ووصلوا في الباب..
عودة شافاته...
عطاته شبحه زي السم...
اما عروبه كملت طول بدون تشوف للجيهة هديكا من الأساس..
وخشوا الزوز..
هو كان يشد بيده ع يد الشنطه متاعه بقوة بعدين خش وهما لحقوه....
******
الساعه 9:30صباحا..
في الطريق..
فاتح اغاني ليبيه ومقويها والجو مليح ويغني هو وولاده وكفايه معاهم...
وقدامهم..
سيارة خيري وزينب...
كذلك فاتحين اغاني وتصفق هي وبناتها..
و خيري ابتسامته ع وجهه طول الوقت...
وراهم بمسافه طويله بعض الشي..
لطيفه : بكل حبيبي طريق طويله وياريتها حتى طريق مقومه من بكري واني نخضخض..
حميد : الله غالب هدا الموجود..
لطيفه: كان حملت مستحيل نجي من توا نقولهالك..
حميد بضحكه : غير احملي قبل..
🍁🍁🍁🍁🍁
الساعه 11صباحا
في الإستراحه..
كانوا صحابه واقفين يهدرزوا..
وهو يمشي ويجي...
يمشي ويجي...
يمشي ويجي....
يمشي ويجي..
وهما معاه بعيونهم ....
وقف....فتح بطم السوريه العسكريه كلهم.
كان لابس تحتها تيشرت قهوي...
كان يمشي بيده ع ذقنه...
قام راسه شبح للسور شويه..
حول الطاقيه..
وسليمان وسالم يشبحوله....
زفر بقوة...
وطول توجه للصور الفاصل..
....يتبع.....
