#رمضان_احلا_مع_جمان_فريد
#العشق_المتمرد
الجزء43
*****
ﺍﻟﺠﻨﻴﻦ ﻛﺎﻥ ﻋﻤﺮﻩ ﺣﻮﺍﻟﻲ ﺷﻬﺮ ... ﺍﺟﻬﻀﺎﺗﻪ ...
ﺿﺮﺑﺖ ﻛﺎﻣﻠﻪ ﺑﻴﺪﻫﺎ ﻉ ﺧﺪﻫﺎ : ﻳﺎﻏﺒﻴﻨﻲ ...
ﺍﻟﺪﻛﺘﻮﺭﺓ : ﻳﻌﻮﺿﻬﺎ ﺍﻟﻠﻪ ﻳﺎﺧﺎﻟﺘﻲ ﻛﺎﻣﻠﻪ ...
ﻭﻣﺸﺖ ﻣﻦ ﺣﺪﺍﻫﻢ ﺑﻌﺪ ﺷﺒﺤﺖ ﻟﻌﻤﺎﺭ ﺑﻄﺮﻑ ﻋﻴﻨﻬﺎ ...
ﻋﻤﺎﺭ ﺍﻟﻠﻲ ﻛﺎﻥ ﻣﻘﻌﻤﺰ ﻭﺭﺍﺳﻪ ﺑﻴﻦ ﺍﻳﺪﻳﻪ .. ﻭﻟﻬﺎﻟﻠﺤﻈﻪ ﻣﺶ ﻣﺴﺘﻮﻋﺐ ﺍﻟﻠﻲ ﺻﺎﺭ .. ﻣﺶ ﻣﺴﺘﻮﻋﺐ ﺷﻦ ﺩﺍﺭ ... ﻭﻣﺶ ﻋﺎﺭﻑ ﺷﻦ ﺑﻴﺼﻴﺮ ﺑﻌﺪ ﻫﻜﻲ ...
ﺑﻌﺪ ﻫﺎﻟﻴﻮﻡ ﻣﺎﻓﻴﺶ ﺷﻲ ﺣﻴﻘﻌﺪ ﺯﻱ ﻣﺎﻛﺎﻥ ﻗﺒﻠﻪ ...
ﺷﻮﻳﻪ ﻭﺟﻲ ﻣﺨﺘﺎﺭ ..
ﻣﺨﺘﺎﺭ ﻭﻫﻮ ﻣﺨﻠﻮﻉ : ﺷﻨﻮ ﻓﻲ ﺷﻨﻮ ﺻﺎﺭ ﻟﺪﻻﻝ ...
ﻛﺎﻣﻠﻪ ﺍﻟﻠﻲ ﻛﺎﻧﺖ ﺗﺒﻜﻲ ﺷﺒﺤﺖ ﻟﻮﻟﺪﻫﺎ ﺑﻌﺪﻳﻦ ﺷﺒﺤﺖ ﻟﺮﺍﺟﻠﻬﺎ ﻭﺍﺷﺮﺗﻠﻬﺎ ﻳﺠﻴﻬﺎ ....
ﻗﺪﻣﻠﻬﺎ ﻣﺨﺘﺎﺭ ﻭﺗﺒﺎﻋﺪﻭﺍ ﻭﺑﺪﺕ ﻛﺎﻣﻠﻪ ﺗﺤﻜﻴﻠﻪ ..
ﻓﻲ ﺍﻟﺤﻮﺵ ...
ﺍﻣﻴﻨﻪ ﺗﺘﻜﻠﻢ ﺑﺎﻟﺘﻠﻴﻔﻮﻥ : ﻧﺤﻠﻒ ﻉ ﺍﻟﻤﺼﺤﻒ ﻛﻠﻪ ﻣﻦ ﺗﺪﺑﻴﺮ ﻫﻨﺪﺍ ﻳﺎﺳﻠﻴﻤﻪ ..
ﺳﻠﻴﻤﻪ : ﻫﺎﻟﺤﻘﻴﺮﺓﻫﺪﻱ ... ﺣﺘﻰ ﻋﻮﻳﻠﺘﻬﺎ ﺭﺍﻫﻢ ﻣﻮﻟﻴﻴﻦ ﺍﻋﻮﺩ ﺑﺎﻟﻠﻪ ﺑﺎﻟﺬﺍﺕ ﺍﻳﻤﻦ .. ﺍﻧﻲ ﻣﺮﺍﺕ ﻳﺸﺒﺤﻠﻲ ﻓﺸﺒﺤﺎﺕ ﺍﻧﻈﺮ ﻛﻴﻒ ..
ﺍﻣﻴﻨﻪ : ﺻﺪﻗﺘﻲ ﻭﺍﻧﻲ ﻣﻼﺣﻈﻪ .. ﻟﻜﻦ ﻋﻤﺎﺭ ﺧﻮﻙ . ﻓﺴﺪ ﻉ ﺭﻭﺣﻪ ..
ﺳﻠﻴﻤﻪ : ﺣﺘﻰ ﻫﻲ ﺩﻻﻝ ﺭﺑﻲ ﻳﻬﺪﻳﻬﺎ ﻛﻴﻒ ﺗﻤﺪ ﻳﺪﻫﺎ ﻉ ﻭﺍﺣﺪ ﻣﻦ ﺿﺮﺍﺭﻱ ﻣﺤﻤﻮﺩ ﺍﻟﻠﻪ ﻳﺮﺣﻤﻪ ..
ﺍﻣﻴﻨﻪ : ﺍﻟﻮﻟﺪ ﻣﺴﺘﻔﺰ ﻭﺍﺟﺪ ﻳﺎﺳﻠﻴﻤﻪ ﺑﻜﻼﻣﻪ ﻭﻗﻠﺔ ﺍﺩﺑﻪ .. ﻧﺒﻬﺖ ﺍﻣﻲ ﻗﺒﻞ ﻋﻠﻴﻬﻢ ﻗﻠﺘﻠﻬﺎ ﺭﺍﻩ ﺭﺑﺎﻳﻪ ﻋﻮﻳﻠﺔ ﻣﺤﻤﻮﺩ ﻣﺶ ﻋﺎﺟﺒﺘﻨﻲ ﺗﻘﻮﻟﻲ ﻻ ﺻﻐﺎﺭ ﻣﺎﺯﺍﻟﻮﺍ ﺻﻐﺎﺭ ..
ﺗﻨﻬﺪﺕ ﺳﻠﻴﻤﻪ : ﻻﺣﻮﻝ ﻭﻻﻗﻮﺓ ﺇﻻ ﺑﺎﻟﻠﻪ ... ﻣﺎﻧﻲ ﻋﺎﺭﻓﻪ ﻛﻴﻒ ﺑﻴﺼﻴﺮ ﺗﻮ .. ﻳﺴﺘﺮﺍﻟﻠﻪ ﻛﺎﻥ ﻣﺎﺗﻄﻠﻊ ﻛﺎﻳﻨﻪ ﺣﺎﻣﻞ ﻭﺍﺟﻬﻀﺖ ..
ﺍﻣﻴﻨﻪ : ﺍﻛﻴﺪ ﻫﺪﻱ ...
🍁🍁🍁🍁🍁
ﻃﺮﺍﺑﻠﺲ
ﺍﻟﺴﺎﻋﻪ 9:00 ﻟﻴﻼ ..
ﻧﺘﺼﻞ ﺑﺄﺧﺘﻚ ﺍﻛﺜﺮ ﻣﻦ ﻣﺮﺓ ﻣﺎﺗﺮﺩﺵ ...
ﻧﻮﺭ : ﺍﻛﻴﺪ ﻋﻨﺪﻫﺎ ﻣﺎﺩﻳﺮ ..
ﻧﻌﻴﻤﻪ : ﺗﺲ ... ﺍﻟﻤﺸﻜﻠﻪ ﺑﻮﻙ ﻗﺎﻟﻲ ﺷﻮﻓﻴﻬﺎ ﻗﺒﻞ ﻣﺎﻧﻤﺸﻮﺵ ﻣﻦ ﺭﺍﺳﻨﺎ ..
ﻧﻮﺭ : ﻗﺼﺪﻙ ﺑﺎﺑﺎ ﺍﺳﺘﻘﺮ ﻉ ﻳﻮﻡ ﻣﻌﻴﻦ ﻓﻲ ﺍﻟﻤﺸﻴﺔ ﻟﺪﻻﻝ ..
ﻧﻌﻴﻤﻪ : ﺍﻳﻪ ﻗﺎﻝ ﺍﻟﺘﻼﺗﺎﺀ ﺍﻥ ﺷﺎﺀ ﺍﻟﻠﻪ ..
ﻧﻮﺭ ﺑﻔﺮﺣﻪ : ﺍﻟﻠﻪ !!
ﺿﺤﻜﺖ ﻧﻌﻴﻤﻪ : ﺍﻳﻪ ... ﺑﺲ ﻏﻴﺮ ﺗﺮﺩ ﻫﻲ ﺑﺶ ﻧﺸﻮﻓﻮﺍ ﺭﺍﺟﻠﻬﺎ ﻛﺎﻧﻪ ﻓﺎﺿﻲ ﻭﻗﺎﻋﺪ ﻓﻲ ﺍﻟﺒﻼﺩ ﻭﻻﻻ ...
ﻧﻮﺭ : ﻳﺎﺍﺍﺭﺏ ﻳﻄﻠﻊ ﻓﺎﺿﻲ ...
🍁🍁🍁🍁🍁🍁
ﻧﻬﺎﺭ ﺍﺳﻮﺩ ... ﺍﺟﻬﻀﺖ !!!
ﻛﺎﻣﻠﻪ ﻭﻫﻲ ﻣﻘﻌﻤﺰﺓ ﻋﺎﻟﻜﺮﺳﻲ ﻓﻲ ﺍﻟﺼﺎﻟﺔ : ﺍﻳﻪ ..
ﺍﻣﻴﻨﻪ ﻏﻤﻀﺖ ﻋﻴﻮﻧﻬﺎ ﺑﺸﺪﺓ : ﻭﺍﺍﺍﻙ ﻳﺎﺭﺑﻲ ... ﺍﺳﺘﻐﻔﺮ ﺍﻟﻠﻪ ﻭﺧﻼﺹ ..
ﻛﺎﻣﻠﻪ ﺑﺒﻜﻲ : ﻭﻛﺎﻥ ﺗﺸﻮﻓﻲ ﺣﺎﻟﺔ ﺧﻮﻙ ..
ﺍﻣﻴﻨﻪ ﺩﻣﻮﻋﻬﺎ ﻧﺰﻟﻮﺍ ..
ﻛﺎﻣﻠﻪ : ﺣﺴﺒﻲ ﺍﻟﻠﻪ ﻭﻧﻌﻢ ﺍﻟﻮﻛﻴﻞ ﻓﻲ ﺍﻟﻠﻲ ﻛﺎﻥ ﺍﻟﺴﺒﺐ ..
ﺍﻣﻴﻨﻪ ﻣﺴﺤﺖ ﺩﻣﻮﻋﻬﺎ ﻭﻗﺎﻟﺖ : ﺗﻮ ﺍﻧﺘﻲ ﻳﻤﻲ ﻣﺼﺪﻗﻪ ﺍﻥ ﺩﻻﻝ ﺧﻨﺒﺖ .
ﻛﺎﻣﻠﻪ ﺷﺎﻓﺖ ﻷﻣﻴﻨﻪ ﺷﻮﻳﻪ ... ﺑﻌﺪﻳﻦ ﺭﺷﻔﺖ ﻭﺣﺮﻛﺖ ﺭﺍﺳﻬﺎ ﺍﻳﻤﻴﻦ ﻭﻳﺴﺎﺭ ﻧﻔﻴﺎ ...
ﺍﻣﻴﻨﻪ : ﺍﻟﻠﻪ ﻳﻌﻄﻴﻚ ﻣﺎﻳﺮﻓﻌﻚ ﻳﺎﻫﻨﺪﺍ ...
🍁🍁🍁🍁🍁
ﺗﻲ ﻣﺶ ﻛﻒ ﻫﻮ ﻳﺎﺳﻤﺮ ...
ﺳﻤﺮ : ﻫﻨﺪﺍ ﻟﻴﻚ ﻋﻼﻗﻪ ﺑﺎﺍﻟﻠﻲ ﺻﺎﺭ ..
ﻫﻨﺪﺍ ﺑﺮﻓﻌﺔ ﺣﺎﺟﺐ : ﻻﻋﺎﺩ ﻣﺶ ﻟﻬﺎﻟﺪﺭﺟﻪ ...
ﺳﻤﺮ : ﻗﺼﺪﻙ ﺑﺘﻘﻮﻟﻲ ﺍﻥ ﺩﻻﻝ ﺧﻨﺎﺑﻪ ..
ﻫﻨﺪﺍ ﺑﺮﻓﻌﺔ ﺣﻮﺍﺟﺐ : ﻫﺪﺍ ﺍﻟﻠﻲ ﺭﻳﻨﺎﻩ ﺍﻭﻛﻞ .. ﺍﻧﻲ ﻭﻋﻤﺘﻲ ﻭﺍﻣﻴﻨﻪ .. ﻭﺣﺘﻰ ﻣﺨﺘﺎﺭ ﻭﻟﺪﻱ ... ﻭﻗﻌﺪﺕ ﺗﻤﺴﺢ ﻉ ﺷﻌﺮﻩ ﻷﻧﻪ ﺭﺍﻗﺪ ﻉ ﺭﺟﻠﻬﺎ ...
ﺳﻤﺮ ﺗﻨﻬﺪﺕ : ﺑﺎﻫﻲ ﻭﺷﻦ ﺻﺎﺭ ﻓﻴﻬﺎ ..
ﻫﻨﺪﺍ ﺑﺤﻘﺪ : ﺍﻥ ﺷﺎﺀ ﺍﻟﻠﻪ ﻣﻌﺎﺩﺗﻮﻟﻲ ..
ﺳﻤﺮ " ﻣﺎﺗﻄﻠﻊ ﺍﻻﻣﻦ ﺗﺤﺖ ﺭﺍﺳﻚ .."
🍁🍁🍁🍁🍁
ﺷﻦ ﺑﻨﻘﻮﻝ ﺍﻧﻲ ﻷﺧﺘﻲ ﻭﺑﻨﺘﻬﺎ ... ﻗﻮﻝ ...
ﻋﻤﺎﺭ ﻭﻫﻮ ﻣﻘﻌﻤﺰ ﻭﻣﺮﺑﻊ ﺍﻳﺪﻳﻪ ﻭﺳﺮﺣﺎﻥ ﻓﻲ ﺍﻟﻔﺮﺍﻍ ﺑﻘﺮﻧﺔ ﺣﻮﺍﺟﺐ ﻭﻧﻈﺮﺓ ﻋﻴﻦ ﺣﺎﺩﻩ ﻣﻠﻴﺎﻧﻪ ﺩﻣﻮﻉ ... ﻗﻌﺪ ﻳﺴﻤﻊ ﻟﻠﻮﻡ ﺑﻮﻩ ﻭﺳﺎﻛﺖ ﻣﺶ ﻗﺎﺩﺭ ﻳﺘﻜﻠﻢ ﻣﺶ ﻗﺎﺩﺭ ﻳﻘﻮﻝ ﺷﻲ .
ﻣﺨﺘﺎﺭ : ﺗﻌﺮﻑ ﻧﺘﻴﺠﺔ ﻋﻤﻠﺘﻚ ﻫﺪﻱ ..
ﻋﻤﺎﺭ ﺷﺒﺢ ﻟﺒﻮﻩ ﺑﻌﺪﻳﻦ ﺷﺒﺢ ﺍﻟﻘﺪﺍﻡ ﻭﻗﺎﻝ : ﺭﺍﺟﻞ ﻭﺿﺮﺏ ﻣﺮﺗﻪ ﻣﺶ ﺍﻭﻝ ﻭﻻﺍﺧﺮ ﻧﺎﺱ .. ﻭﺑﻌﺪﻳﻦ ﻫﻲ ﻟﺤﻈﺔ ﻏﻀﺐ ﻣﺎﻓﻴﺶ ﺩﺍﻋﻲ ﻟﻠﺘﻬﻮﻳﻞ ..
ﻣﺨﺘﺎﺭ ﺑﺮﻓﻌﺔ ﺣﻮﺍﺟﺐ : ﺗﻬﻮﻳﻞ !! ؟ .. ﻫﺰ ﺭﺍﺳﻪ ﺑﺈﻳﺠﺎﺏ ﻭﻫﻮ ﻳﻘﻮﻝ ... ﺗﻮ ﻧﺸﻮﻓﻮﺍ ...
ﻋﻤﺎﺭ ﻛﺎﻥ ﺣﺎﺱ ﺑﺨﻮﻑ ﺷﺪﻳﺪ ﻣﻦ ﺍﻟﻜﻼﻡ ﺍﻟﻠﻲ ﻗﺎﻟﻪ ﺑﻮﻩ ... ﻳﻌﻨﻲ ﺩﺍﻡ ﺑﻮﻩ ﻫﻜﻲ ﻗﺎﻝ ﺍﻫﻠﻬﺎ ﻫﻲ ﻟﻮ ﻋﺮﻓﻮﺍ ﺷﻦ ﺣﻴﺪﻳﺮﻭﺍ ..
🍃 ﻭﺗﻤﺮ ﻫﺪﻳﻜﺎ ﺍﻟﻠﻴﻠﻪ ...
ﻣﺎﻋﺮﻑ ﻓﻴﻬﺎ ﻻﺭﺍﺣﻪ .. ﻭﻻﻋﻴﻨﻪ ﺑﺖ ﺗﻐﻔﻰ ..
ﺷﻌﻮﺭ ﺧﻮﻑ ﻣﺴﻴﻄﺮ ﻋﻠﻴﻪ ... ﻉ ﻧﺪﻡ ....
ﻭﻗﻠﺒﻪ ﻣﻘﺒﻮﺽ ...
ﻓﺎﺗﺖ ﻟﻴﻠﺘﻪ ﻭﻫﻮ ﻳﻤﺸﻲ ﻭﻳﺠﻲ ﻓﻲ ﺍﻟﻤﻤﺮ ﻭﻻ ﻣﻘﻌﻤﺰ ﻉ ﺍﻟﻜﺮﺳﻲ ﻭﻳﺨﻤﻢ ..
ﻣﺎﺗﺠﺮﺃﺵ ﻳﺨﺶ ﻳﺸﻮﻓﻬﺎ .. ﻣﺎﻻﺵ ﻋﻴﻦ ..
ﻭﻛﺬﻟﻚ ﻣﻘﻬﻮﺭ ﻷﻥ ﺍﻟﻠﻲ ﺻﺎﺭ ﻓﻴﻬﺎ ﺑﺴﺒﺒﻪ ..
ﻛﻴﻒ ﺩﺍﺭ ﻓﻴﻬﺎ ﻫﻜﻲ ... ﺍﻷﻧﺴﺎﻧﻪ ﺍﻟﻠﻲ ﻳﻌﺸﻖ ﺗﺮﺍﺏ ﺭﺟﻠﻴﻬﺎ ..
ﻳﺘﻨﻔﺲ ﻓﻴﻬﺎ ... ﻣﺎﻃﻴﺒﺶ ﻋﻠﻴﻪ ﻋﻴﺸﻪ ﻣﻦ ﻏﻴﺮﻫﺎ ...
ﺍﻟﻠﻲ ﺩﺍﺭ ﺍﻟﻤﺴﺘﺤﻴﻞ ﺑﺶ ﻳﺤﻮﺯﻫﺎ ﻭﻳﻜﺴﺐ ﻗﻠﺒﻬﺎ ﻭﻳﻨﻮﻟﻬﺎ ...
ﻓﻲ ﻟﺤﻈﺔ ﻏﻀﺐ ﺿﻴﻊ ﻛﻞ ﺷﻲ ...
ﻟﺤﻈﺔ ﻏﻀﺐ ﺧﻼﺗﻪ ﻣﻤﻜﻦ ﻳﺨﺴﺮﻫﺎ ﻭﻳﺨﺴﺮ ﻗﻠﺒﻬﺎ ﻧﻬﺎﺋﻲ ..
ﻭﻓﻜﺮﺓ ﺍﻟﺨﺴﺎﺭﺓ ﻋﻨﺪﻩ ﺭﺍﻓﻀﻬﺎ ﺭﻓﺾ ﺗﺎﻡ ....
🍃 ﺗﺎﻧﻲ ﻳﻮﻡ ﺍﻟﺼﺒﺢ ..
ﺍﻟﺴﺎﻋﻪ 9:00 ﺻﺒﺎﺣﺎ ...
ﻣﻘﻌﻤﺰﺓ ﻉ ﺍﻟﺴﺮﻳﺮ ... ﻻﺑﺴﻪ ﻭﺷﺎﺡ ﻟﻮﻧﻪ ﺍﺯﺭﻕ ﻏﺎﻣﻖ ...
ﺳﺮﺣﺎﻧﻪ ﻭﻫﻲ ﺗﺸﻮﻑ ﻟﻠﺮﻭﺷﻦ ﺑﻤﻼﻣﺢ ﺟﺎﻣﺪﻩ ...
ﻃﻖ ﺍﻟﺒﺎﺏ ﻭﺧﺸﻮﺍ ﻋﺰﻭﺯﺗﻬﺎ ﻭﺷﻴﺒﺎﻧﻬﺎ ...
ﻃﻠﻘﻮﺍ ﺍﻟﺴﻼﻡ .. ﺭﺩﺕ ﺑﺼﻮﺕ ﻳﺪﻭﺏ ﻃﺎﻟﻊ ...
ﻛﺎﻣﻠﻪ : ﻛﻴﻒ ﺣﺎﻟﻚ ﺍﻟﻴﻮﻡ ﺑﻨﺘﻲ ..
ﺩﻻﻝ ﺷﺒﺤﺘﻠﻬﺎ ﻭﻃﻮﻝ ﺩﻣﻮﻋﻬﺎ ﻃﺎﺣﻮﺍ ﻭﻫﻲ ﺗﻘﻮﻝ : ﺟﻴﺒﻴﻠﻲ ﺍﻟﻤﺼﺤﻒ ﻳﺎﻋﻤﺘﻲ ﻧﺤﻠﻔﻠﻚ ﻋﻠﻴﻪ ﺍﻥ ﻭﺍﻟﻠﻪ ﺍﻟﺨﻨﺎﻕ ﻻﻣﺴﻴﺘﻪ ﻭﻻﻗﺮﺑﺘﻪ ﻭﻻﻧﻌﺮﻑ ﻛﻴﻒ ﺟﻲ ﻟﺸﻨﻄﺘﻲ ...
ﻛﺎﻣﻠﻪ ﻣﺘﺄﻟﻤﻪ ﻉ ﺧﺎﻃﺮﻫﺎ : ﺑﻨﺘﻲ ﻭﺍﻟﻠﻪ ﻣﺼﺪﻗﺎﺗﻚ ..
ﻣﺨﺘﺎﺭ : ﺍﻟﻤﻮﺿﻮﻉ ﻫﺪﻯ ﺍﻧﺴﻴﻪ ﻳﺎﺑﻨﺘﻲ ﻭﻛﺄﻧﻪ ﻣﺎﺻﺎﺭ ..
ﺩﻻﻝ ﺿﻴﻘﺖ ﻋﻴﻮﻧﻬﺎ ﻭﻫﻲ ﺗﻤﺴﺢ ﻓﺪﻣﻮﻋﻬﺎ ﻗﺎﻟﺖ : ﺷﻦ ﻧﻨﺴﻰ ﻳﺎﻋﻤﻲ ... ﺍﻹﻓﺘﺮﺍﺀ ... ﻭﻻ ﺍﻹﻫﺎﻧﻪ ... ﻭﻻ ﺍﻟﻀﺮﺏ .. ﻭﻻﻋﻴﻠﻲ ﺍﻟﻠﻲ ﺧﺴﺮﺗﻪ ... ﻓﻨﻈﺮﻙ ﻫﺎﺩﻱ ﺣﺎﺟﺎﺕ ﺗﻨﺘﺴﻰ ﻳﺎﻋﻤﻲ !!!
ﺳﻜﺖ ﻣﺨﺘﺎﺭ ﻭﻏﻴﺮ ﻋﻴﻮﻧﻪ ﻋﻨﻬﺎ ﻣﺎﻟﻘﺎﺵ ﺭﺩ ﻣﺎﻋﻨﺪﻩ ﻣﺎﻳﻘﻮﻝ ...
ﻛﺎﻣﻠﻪ ﻭﺩﻣﻮﻋﻬﺎ ﻳﻨﺰﻟﻮﺍ : ﻋﻨﺪﻙ ﺣﻖ ﻭﺻﺎﺩﻗﻪ ﻓﻜﻼﻣﻚ ﻟﻜﻦ ﺭﺍﻫﻮ ﻋﻢ ...
ﺣﻄﺖ ﺍﻳﺪﻳﻬﺎ ﻉ ﻭﺩﺍﻧﻬﺎ ﻭﻏﻤﻀﺖ ﻋﻴﻮﻧﻬﺎ ﺑﺸﺪﺓ : ﻣﺎﻧﺒﻴﺶ ﻧﺴﻤﻊ ﺍﺳﻤﻪ ...
ﺍﻧﺼﺪﻣﻮﺍ ﻛﺎﻣﻠﻪ ﻭﻣﺨﺘﺎﺭ ﻭﺷﺒﺤﻮﺍ ﻟﺒﻌﺾ ...
ﻫﻨﻲ ﺍﻧﻔﺘﺢ ﺍﻟﺒﺎﺏ ... ﻭﻫﻮ ﺧﺶ ..
ﻟﻤﺎ ﺷﺎﻓﺎﺗﻪ ﺩﻻﻝ ﻫﺴﺘﺮﺕ ﻭﻗﻌﺪﺕ ﺗﻌﻴﻂ : ﻃﻠﻌﻮﻭﻭﻭﻩ ﻃﻠﻌﻮﻭﻭﻭﻭﻩ ... ﻣﺎﻧﺒﻴﺸﺸﺸﺶ ﻧﺸﻮﻓﻪ ﻃﻠﻌﻮﻭﻭﻭﻭﻩ ..
ﻫﻮ ﻣﺼﺪﻭﻭﻭﻡ ﻷﺑﻌﺪ ﺣﺪ ..
ﺩﻓﻪ ﺑﻮﻩ ﻭﻃﻠﻌﻪ ﻭﻃﻠﻊ ﻣﻌﺎﻩ ﻭﺻﻜﺮ ﺍﻟﺒﺎﺏ ..
ﻉ ﺟﻴﺔ ﺍﻟﻤﻤﺮﺿﺎﺕ ﻭﺍﻟﺪﻛﺘﻮﺭﺓ ﻭﺧﺸﻮﻟﻬﺎ ﻃﻮﻝ ...
ﻋﻄﻮﻫﺎ ﻣﻬﺪﺉ ﻭﺭﻗﺪﺕ ﻭﺩﻣﻮﻋﻬﺎ ﻣﺎﺯﺍﻟﻮﺍ ﻳﻨﺰﻟﻮﺍ ....
🍁 ﺍﻣﺎ ﻫﻮ ﻃﻮﻝ ﻃﻠﻊ ﻣﻦ ﺍﻟﻤﺴﺘﺸﻔﻰ ﻭﻣﺎﺯﺍﻝ ﻣﺶ ﻣﺴﺘﻮﻋﺐ ﺍﻟﻠﻲ ﺻﺎﺭ ﻧﻬﺎﺋﻲ ...
ﺭﻛﺐ ﺳﻴﺎﺭﺗﻪ ﻭﺗﺤﺮﻙ ﻃﻮﻝ ...
ﻳﺴﻮﻕ ﻭﻳﺬﻛﺮ ﻓﻲ ﻛﻞ ﺷﻲ ﺻﺎﺭ ... ﺗﻤﻨﻰ ﻟﻮ ﻛﺎﻥ ﻛﺎﺑﻮﺱ ...
ﺟﺘﺎﻣﻪ ... ﺍﻱ ﺷﻲ ﺍﻱ ﺷﻲ ﻳﻘﻮﻝ ﺍﻥ ﺍﻟﻠﻲ ﺻﺎﺭ ﻛﻠﻪ ﻣﺶ ﺣﻘﻴﻘﻲ ..
🍃 ﺗﺼﻴﺮ ﻣﻌﺎﻧﺎ ﻣﺮﺍﺕ ...
ﻳﺼﻴﺮﻟﻨﺎ ﺷﻲ ﺍﺷﺒﻪ ﺑﺎﻟﻔﺎﺟﻌﻪ ... ﻧﺒﺪﻭﺍ ﻓﻲ ﺍﻟﺒﺪﺍﻳﻪ ﻣﺶ ﻣﺴﺘﻮﻋﺒﻴﻦ ﺍﻟﻠﻲ ﺻﺎﺭ .. ﻧﺤﺴﻮﻩ ﻛﺬﺏ .. ﻣﺶ ﺣﻘﻴﻘﻲ ... ﻭﻛﻞ ﻣﺎﻟﻨﺎ ﺗﺼﻴﺮ ﻣﻌﺎﻧﺎ ﺣﺎﺟﺎﺕ ﺗﺨﻠﻴﻨﺎ ﻧﺘﺄﻛﺪﻭﺍ ﺍﻧﻬﺎ ﺣﻘﻴﻘﻪ ﻣﺶ ﻭﻫﻢ ﻭﻻﺣﻠﻢ ... ﻭﻻﻛﺎﺑﻮﺱ ...
ﻭﻗﺘﻬﺎ ﺷﻌﻮﺭﺍﻷﻟﻢ ﻳﻀﺎﻋﻒ ....
🍃🍃🍃🍃
ﺩﻭﺭ ﻓﻲ ﺍﻟﺠﻨﺎﻥ ﻭﻫﻲ ﺷﺎﺩﺓ ﺗﻠﻴﻔﻮﻧﻬﺎ ...
ﺍﺗﺼﻠﺖ ﺑﺒﻨﺘﻬﺎ ﺍﻛﺜﺮ ﻣﻦ ﻣﺮﺓ ﻭﻣﺎﺭﺩﺗﺶ .. ﻭﺍﺧﺮ ﺷﻲ ﻋﻄﺎﻫﺎ ﻣﻘﻔﻞ
ﻧﻌﻴﻤﻪ ﺑﻘﻠﻖ : ﻳﺴﺘﺮ ﺍﻟﻠﻪ ﻣﻌﻘﻮﻟﻪ ﻣﻦ ﺍﻣﺲ ﻟﻠﻴﻮﻡ ﻣﺎﺗﺮﺩﺵ .. ﻭﻻﺗﻌﺎﻭﺩ ﻋﻠﻴﺎ؟ !
ﺷﻮﻳﻪ ﻭﺧﺶ ﻋﺒﺪﺍﻟﺴﻼﻡ ...
ﺍﻟﺘﻔﺘﺖ ﺷﺎﻓﺎﺗﻪ ﺧﺎﺵ ﻣﻦ ﺑﺎﺏ ﺍﻟﺤﺪﻳﺪ ...
ﻗﺪﻣﻠﻬﺎ : ﺧﻴﺮﻙ ﺑﺮﺍ ﺍﻟﺠﻮ ﺻﻘﻊ ..
ﻧﻌﻴﻤﻪ : ﻧﺘﺼﻞ ﺑﺪﻻﻝ ﻣﻦ ﺍﻣﺲ ﻟﻠﻴﻮﻡ ﻣﺎﺗﺮﺩﺵ ..
ﻋﺒﺪﺍﻟﺴﻼﻡ ﺑﺨﻮﻑ : ﻣﺎﺗﺮﺩﺵ؟ ...!
ﻧﻌﻴﻤﻪ : ﺍﻳﻪ .. ﺗﺮﺍ ﻛﻠﻢ ﻋﻤﺎﺭ ﻭﺷﻮﻓﻪ ..
ﻋﺒﺪﺍﻟﺴﻼﻡ ﻃﻠﻊ ﺗﻠﻴﻔﻮﻧﻪ ﻣﻦ ﺟﻴﺒﻪ ﻭﻃﻮﻝ ﺿﺮﺏ ﻉ ﺭﻗﻢ ﻋﻤﺎﺭ ...
🍁🍁🍁🍁
ﻛﺎﻥ ﻣﺪﺭﺱ ﺑﺴﻴﺎﺭﺗﻪ ﻓﺘﺮﻛﻴﻨﻪ ﻓﺎﺿﻴﻪ ...
ﺣﺎﻁ ﻳﺪﻩ ﻉ ﺭﺍﺳﻪ ﻭﺳﺎﺭﺡ .....
ﻓﺰ ﻟﻤﺎ ﺳﻤﻊ ﺍﻟﺘﻠﻴﻔﻮﻥ ﺭﻥ ..
ﻃﻠﻌﻪ ﻣﻦ ﺟﻴﺐ ﺍﻟﺒﺎﻟﻄﻮ ... ﻟﻤﺎ ﺷﺎﻑ ﺍﻟﻤﺘﺼﻞ ﻗﻠﺒﻪ ﻗﻌﺪ ﻳﺪﻕ ﺑﻘﻮﺓ ﻣﻦ ﺍﻟﺨﻮﻑ ..
ﺧﺪﻱ ﻧﻔﺲ .... ﻭﺭﺩ ...
ﻋﻤﺎﺭ : ﺍﻳﻮﻩ ﺍﻟﺴﻼﻡ ﻋﻠﻴﻜﻢ ...
ﻋﺒﺪﺍﻟﺴﻼﻡ : ﻭﻋﻠﻴﻜﻢ ﺍﻟﺴﻼﻡ .. ﺗﻲ ﺷﻦ ﺣﺎﻟﻚ ﻳﺎﻣﻼﺯﻡ ﺍﻭﻝ ..
ﺍﺭﺗﺎﺡ ﺷﻮﻳﻪ ﻻﻥ ﻋﺒﺪﺍﻟﺴﻼﻡ ﻳﺘﻜﻠﻢ ﻋﺎﺩﻱ : ﺍﻟﺤﻤﺪ ﻟﻠﻪ ﻳﺎﻓﻨﺪﻱ ... ﺍﻧﺖ ﺷﻨﻮ ﺣﺎﻟﻚ ﻭﺣﺎﻝ ﻋﻤﺘﻲ ﻭﺍﻟﻌﻴﻠﻪ ..
ﻋﺒﺪﺍﻟﺴﻼﻡ : ﺍﻟﺤﻤﺪ ﻟﻠﻪ .. ﺷﻦ ﺣﺎﻝ ﺍﻟﺤﺎﺝ ﻣﺨﺘﺎﺭ ﻭﺍﻟﺤﺎﺟﻪ ﻭﺍﻻﺳﺮﺓ ﺍﻟﻜﺮﻳﻤﻪ ..
ﻋﻤﺎﺭ : ﺍﻟﺤﻤﺪ ﻟﻠﻪ ﺍﻟﺤﻤﺪ ﻟﻠﻪ ..
ﻋﺒﺪﺍﻟﺴﻼﻡ ﺷﺒﺢ ﻟﻨﻌﻴﻤﻪ : ﺑﻨﻘﻮﻟﻚ ﻳﺎﻋﻤﺎﺭ .. ﻧﻜﻠﻤﻮﺍ ﻓﻲ ﺩﻻﻝ ﻣﻦ ﺍﻣﺲ ﻟﻠﻴﻮﻡ ﻣﺎﺗﺮﺩﺵ ...
ﺗﻠﺨﺒﻂ ﻋﻤﺎﺭ .. ﺑﻠﻊ ﺭﻳﻘﻪ ﻭﻗﺎﻝ : ﺗﻠﻴﻔﻮﻧﻬﺎ ﺭﺍﻳﺢ ..
ﻋﺒﺪﺍﻟﺴﻼﻡ ﻭﻫﻮ ﻳﺸﻮﻑ ﻟﻨﻌﻴﻤﻪ : ﺭﺍﻳﺢ ...
ﻧﻌﻴﻤﻪ ﺭﻓﻌﺖ ﺣﻮﺍﺟﺒﻬﺎ ...
ﻋﺒﺪﺍﻟﺴﻼﻡ : ﺑﺎﻫﻲ ﺍﻧﺖ ﻓﻲ ﺍﻟﺤﻮﺵ ﻋﻄﻴﻬﺎﻟﻲ ﻧﻜﻠﻤﻬﺎ ﻛﺎﻧﻬﺪﺍ ..
ﻋﻤﺎﺭ ﻭﺯﻉ ﻧﻈﺮﻩ ﺣﻮﺍﻟﻴﻪ ﺑﻌﺪﻳﻦ ﻗﺎﻝ : ﺍﻧﻲ ﺑﺮﺍ ﺗﻮﺍ ..
ﻋﺒﺪﺍﻟﺴﻼﻡ : ﺑﺎﻫﻲ ﻟﻤﺎ ﺗﺮﻭﺡ ﺍﺗﺼﻞ ﺑﻴﺎ ...
ﻋﻤﺎﺭ : ﺣﺎﺿﺮ ﺇﻥ ﺷﺎﺀ ﺍﻟﻠﻪ ...
ﻋﺒﺪﺍﻟﺴﻼﻡ : ﻫﻲ ﻣﺎﻧﻌﻄﻠﺶ ﻋﻠﻴﻚ ... ﺳﻠﻢ ﻉ ﺟﻤﻴﻊ ... ﺗﺤﻴﺎﺗﻲ ..
ﻋﻤﺎﺭ : ﺑﺎﻟﺴﻼﻣﻪ ... ﻭﺻﻜﺮ ..
ﻟﻮﺡ ﺍﻟﺘﻠﻴﻔﻮﻥ ﻉ ﺍﻟﻜﺮﺳﻲ ﺍﻟﻠﻲ ﺟﻨﺒﻪ ﻭﻗﺒﻀﺔ ﻗﻠﺒﻪ ﺯﺍﺩﺕ ﻗﻮﺕ ...
🍃🍃🍃🍃
ﺍﻟﺴﺎﻋﻪ ﺍﻟﺘﺎﻟﺜﻪ ﻇﻬﺮﺍ ...
ﺣﺎﻟﻚ ﺑﺎﻫﻲ ﺗﻮﺍ ..
ﺩﻻﻝ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﻗﺎﻟﺖ : ﺍﻳﻪ ﺍﻟﺤﻤﺪ ﻟﻠﻪ ...
ﻣﺨﺘﺎﺭ : ﻫﻲ ﺷﻮﻳﻪ ﺗﺎﻧﻴﻪ ﻭﺗﻄﻠﻌﻲ ...
ﺩﻻﻝ : ﻋﻤﻲ ﻣﻤﻜﻦ ﺗﻌﻄﻴﻨﻲ ﺗﻠﻴﻔﻮﻧﻚ ..
ﻣﺨﺘﺎﺭ ﻗﻌﺪ ﻳﺸﻮﻓﻠﻬﺎ ﺷﻮﻳﻪ ... ﺑﻌﺪﻳﻦ ﻃﻠﻊ ﺍﻟﺘﻠﻴﻔﻮﻥ ﻣﻦ ﺟﻴﺐ ﻛﺒﻮﻃﻪ ﻭﻋﻄﺎﻩ ﻟﺪﻻﻝ ..
ﺧﺪﺍﺗﻪ ﻭﻣﺨﺘﺎﺭ ﺍﻧﺴﺤﺐ ﻣﻦ ﺍﻟﻤﻜﺎﻥ ﻭﻃﻠﻊ ﻭﻫﻮ ﻣﺘﺄﻛﺪ ﺍﻥ ﺍﻟﻤﻜﺎﻟﻤﻪ ﺍﻟﻠﻲ ﺣﺪﻳﺮﻫﺎ ﺩﻻﻝ ﻣﺎﻓﻴﺶ ﻣﻦ ﻭﺭﺍﻫﺎ ﺧﻴﺮ ...
ﺩﻻﻝ ﻗﻌﺪ ﺗﻀﺮﺏ ﻉ ﺭﻗﻢ ﻣﻌﻴﻦ ﻭﻫﻲ ﺗﺮﻋﺶ ﻭﺩﻣﻮﻋﻬﺎ ﻳﻨﺰﻟﻮﺍ ...
ﻟﻌﻨﺪ ﻣﺎﻣﺸﻲ ﺍﻹﺗﺼﺎﻝ .. ﺣﻄﺎﺗﻪ ﻉ ﻭﺩﻧﻬﺎ ...
🌴🌴🌴🌴🌴🌴🌴🌴🌴🌴
ﻓﻲ ﻣﻜﺘﺐ ﺍﻟﺒﺮﻳﺪ ..
ﺗﻤﺎﻡ ﺍﻟﺨﻤﻴﺲ ﺇﻥ ﺷﺎﺀ ﺍﻟﻠﻪ ﻧﻌﺪﻭﺍ ..
ﻫﺎﻧﻴﺒﺎﻝ : ﻛﻮﻳﺲ ..
ﻣﺤﻤﺪ : ﻛﺎﻥ ﺗﺮﻓﻌﻮﻧﻲ ﻣﻌﺎﻛﻢ ..
ﻋﻤﺮ : ﻭﺩﻳﻦ ﺍﻟﻠﻪ ﻣﺎﻧﺎ ﻣﺎﺷﻴﻴﻦ ﻧﺰﺭﺩﻭﺍ ..
ﻣﺤﻤﺪ 😒:
ﻫﺎﻧﻴﺒﺎﻝ : ﻳﻌﺪﻱ ﻣﻌﺎﻧﺎ ﻭﻳﻦ ﺍﻟﻤﺸﻜﻠﻪ ..
ﻣﺤﻤﺪ 😌:
ﻋﻤﺮ ..😑:
ﺭﻥ ﺗﻠﻴﻔﻮﻥ ﻫﺎﻧﻴﺒﺎﻝ ...
ﻗﺎﻣﻪ ﻣﻦ ﻉ ﺍﻟﻄﺎﻭﻟﻪ .. ﻟﻤﺎ ﺷﺎﻑ ﺍﻟﻤﺘﺼﻞ ﺍﺳﺘﻐﺮﺏ ﺭﺩ ﻃﻮﻝ ..
ﻫﺎﻧﻴﺒﺎﻝ : ﺍﻳﻮﻩ ﻳﺎﺧﺎﻟﻲ ..
ﺩﻻﻝ ﺑﺒﻜﻲ : ﺧﺎﻟﻲ ... ﺗﻌﺎﻻﻟﻲ ﻳﺎﺧﺎﻟﻲ ﺗﻌﺎﻟﻰ ..
ﻫﺎﻧﻴﺒﺎﻝ ﺍﻧﻔﺠﻊ : ﺩﻻﻝ ﺧﻴﺮﻙ ..
ﻣﺤﻤﺪ ﻭﻋﻤﺮ ﺍﻧﻔﺠﻌﻮﺍ ﺣﺘﻰ ﻫﻤﺎ ..
ﺩﻻﻝ ﺗﺒﻜﻲ ﻭﺗﺸﻬﻖ : ﺗﻌﺎﺍﺍﻟﻰ ﻳﺎﺧﺎﺍﺍﻟﻲ ﺗﻌﺎﻻﻟﻲ ﺧﻮﺩﻧﻲ ﻣﻦ ﻫﻨﻲ ..
ﻫﺎﻧﻴﺒﺎﻝ ﻣﻌﺎﺵ ﻓﻴﻪ ﻋﻘﻞ : ﺟﺎﻳﻚ ﻳﺎﺧﺎﻟﻲ ﺗﻮﺍ ﺟﺎﻳﻚ ..
ﺻﻜﺮ ﻭﺧﺪﻱ ﻣﻔﺘﺎﺡ ﺍﻟﻤﻜﺎﻥ ..
ﻋﻤﺮ : ﺧﻴﺮﻫﺎ ﺩﻻﻝ ..
ﻫﺎﻧﻴﺒﺎﻝ : ﻣﻦ ﺟﻴﺘﻬﺎ ﺍﻻﺧﻴﺮﺓ ﺣﺴﻴﺘﻬﺎ ﻣﺶ ﻣﺰﺑﻮﻃﻪ .. ﻫﻴﺎ ﺍﻃﻠﻌﻮﺍ ..
ﻃﻠﻊ ﻭﻫﻤﺎ ﻭﺭﺍﻩ .
ﻣﺤﻤﺪ : ﻋﻤﺎﺭ ﺩﺍﻳﺮﻟﻬﺎ ﺣﺎﺟﻪ !!
ﻫﺎﻧﻴﺒﺎﻝ : ﻭﺣﻖ ﺍﻟﻠﻪ ﻳﻄﻠﻊ ﺩﺍﻳﺮﻟﻬﺎ ﺷﻲ ﻧﻨﺴﻰ ﺍﻧﻪ ﻭﻟﺪ ﺧﺎﻟﻲ ﻭﻻﺗﺮﺑﻄﻨﻲ ﺑﻴﻪ ﺣﺎﺟﻪ .
ﺳﻜﺮ ﺍﻟﻤﻜﺎﻥ ... ﻭﻣﺸﻲ ﻃﻮﻝ ﻟﻠﺴﻴﺎﺭﺓ ..
ﺭﻛﺒﻮﺍ ﻣﺤﻤﺪ ﻭﻋﻤﺮ ..
ﻫﺎﻧﻴﺒﺎﻝ : ﻭﻳﻦ ﺍﻧﺖ ﻭﻳﺎﻩ ..
ﻋﻤﺮ ﺑﻌﺼﺒﻴﻪ : ﺣﺘﻰ ﺣﻨﻲ ﺧﻮﺍﻟﻬﺎ ..
ﺷﺒﺤﻠﻪ ﺷﻮﻳﻪ ... ﺑﻌﺪﻳﻦ ﺷﺒﺢ ﺍﻟﻘﺪﺍﻡ ﺷﻐﻞ ﺍﻟﺴﻴﺎﺭﺓ ﻭﺗﺤﺮﻙ ...
🍁🍁🍁🍁🍁🍁
ﻭﻻ ﺧﺶ ﻣﺨﺘﺎﺭ ﻣﺮﺓ ﺗﺎﻧﻴﻪ ﻟﺪﻻﻝ ...
ﻟﻘﺎﻫﺎ ﺗﻤﺴﺢ ﻓﺪﻣﻮﻋﻬﺎ ...
ﻣﺨﺘﺎﺭ : ﺷﻨﻮ ﺑﻨﺘﻲ ..
ﻣﺪﺗﻠﻪ ﺩﻻﻝ ﺍﻟﺘﻠﻴﻔﻮﻥ : ﺻﺤﻴﺖ ﻋﻤﻲ ..
ﺧﺪﺍﻩ ﻣﻨﻬﺎ ﻭﻫﻮ ﻣﻀﺎﻳﻖ ﻉ ﺍﻷﺧﺮ : ﻫﻴﺎ ﺑﻨﺘﻲ ﺻﺒﻲ ﻭﺗﻲ ﺭﻭﺣﻚ ..
ﺩﻻﻝ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ..
ﻣﺸﻲ ﻃﻠﻊ ﻣﺨﺘﺎﺭ ﻣﻦ ﺍﻟﻐﺮﻓﻪ .. ﻭﻃﻮﻝ ﺷﺎﻑ ﺳﺠﻞ ﺍﻟﻤﻜﺎﻟﻤﺎﺕ ﻓﺘﻠﻴﻔﻮﻧﻪ ﺷﺎﻑ ﺭﻗﻢ ﻫﺎﻧﻴﺒﺎﻝ ... ﻣﻂ ﺷﻮﺭﺍﺑﻪ ﻟﺪﺍﺧﻞ ﺑﺄﺳﻒ ..
🍁🍁🍁🍁🍁
ﻓﻲ ﺍﻟﻜﻮﺟﻴﻨﻪ ...
ﺗﻌﺮﻓﻲ ﺣﺎﺳﺎﺗﻪ ﺭﻗﻤﻪ ...
ﻏﺎﻟﻴﻪ : ﺑﺎﻫﻲ ﺭﺩﻱ ..
ﺣﻤﻴﺪﻩ : ﻻﻻ ﻣﺮﺍﺕ ﻳﻄﻠﻊ ﻳﺠﺮﺏ .. ﻧﺮﺍﺟﻲ ﻛﺎﻥ ﺑﻌﺖ ﺭﺳﺎﻟﻪ ﺑﺎﻫﻲ ﻛﺎﻧﻬﺪﺍ ﺧﻠﻴﻪ ﻭﺍﻟﻠﻪ ﻳﺘﺼﻞ ﻟﻐﺪﻭﺓ ...
ﺿﺤﻜﺖ ﻏﺎﻟﻴﻪ ﻭﻗﺎﻟﺖ : ﻣﺎﺑﻌﺪﻩ ﻣﺴﻜﻴﻦ ..
ﺷﻘﻠﺒﺖ ﻋﻴﻮﻧﻬﺎ ﺣﻤﻴﺪﻩ ﻭﻫﻲ ﻣﺒﺘﺴﻤﻪ ﺑﻐﺮﻭﺭ ...
🍁🍁🍁🍁
ﻣﺘﻜﻴﻪ ﺑﺘﺎﺧﺪ ﻏﻔﻮﺓ ﺑﻌﺪ ﺭﻭﺣﺖ ﻣﻦ ﺍﻟﺠﺎﻣﻌﻪ ﻫﻠﻜﺎﻧﻪ ..
ﺷﺒﺤﺖ ﺟﻨﺒﻬﺎ ﻟﻘﺖ ﺍﺧﺘﻬﺎ ﺗﻬﺪﺭﺯ ﻉ ﻃﺎﺭﻕ ﻭﺗﻀﺤﻚ ﻭﻣﻨﺴﺠﻤﻪ ..
ﺗﻨﻬﺪﺕ ﺑﺄﻟﻢ ...
ﺣﺎﻟﻪ ﺍﺧﺘﻬﺎ ﻫﺎﺩﻱ ... ﺩﻓﻌﺖ ﻫﻲ ﺛﻤﻨﻬﺎ ﻏﺎﻟﻲ ...
ﺷﻮﻳﻪ ﺭﻥ ﺗﻠﻴﻔﻮﻧﻬﺎ ...
ﻟﻘﺎﺗﻪ ﺭﻗﻢ ﻏﺮﻳﺐ ... ﻣﺎﺑﺘﺶ ﺗﺮﺩ ..
ﻋﺎﻭﺩ ﺍﻛﺜﺮ ﻣﻦ ﻣﺮﺓ ..
ﻓﺘﺤﺖ ﺍﻟﺨﻂ ﻣﻦ ﻏﻴﺮ ﻣﺎﺗﺘﻜﻠﻢ ..
" ﺷﻨﻮ ﺣﺎﻟﻚ ..."
ﻫﻲ ﺍﻧﺼﺪﻣﺖ ﻟﻤﺎ ﺳﻤﻌﺖ ﺻﻮﺗﻪ .. ﻭﻗﻠﺒﻬﺎ ﺍﻟﻠﻲ ﻛﺎﻧﺖ ﺩﻗﺎﺗﻪ ﺍﻗﻮﻯ ﻣﻦ ﺿﺮﺑﺎﺕ ﺍﻟﻤﺪﺍﻓﻊ .. ﺧﻼﻫﺎ ﺗﺮﺩ ﻭﺗﻘﻮﻝ ..
ﺭﺍﻧﻴﺎ : ﻛﻮﻳﺴﻪ ..
ﺭﻣﺰﻱ : ﺑﺎﻫﻲ .. ﻭﺻﻜﺮ ﻋﻠﻴﻬﺎ
ﻫﻲ ﻣﺼﺪﻭﻣﻪ ﻭﻣﻦ ﺩﺍﺧﻠﻬﺎ ﻓﺮﺣﺎﻧﻪ ﺑﻄﻴﺮ ... ﺣﻄﺖ ﺍﻟﺘﻠﻴﻔﻮﻥ ﺟﻨﺒﻬﺎ ﻭﻫﻲ ﺗﺒﺘﺴﻢ ﺑﺮﻭﺣﻬﺎ ﺯﻱ ﺍﻟﻌﺒﻴﻄﻪ ...💓😁
ﺍﻣﺎ ﻫﻮ ﺣﻂ ﺗﻠﻴﻔﻮﻧﻪ ﻓﺠﻴﺒﻪ ﻭﻛﻤﻞ ﺧﺪﻣﺘﻪ ﻭﻫﻮ ﻣﺒﺘﺴﻢ ﺑﻘﺮﻧﺔ ﺣﻮﺍﺟﺐ ...
ﻗﺼﺪﻱ ﺭﺍﻫﻮ ﺍﻟﻌﺸﻖ ... ﺣﺎﺟﻪ ﻉ ﻗﺪ ﻣﺎﻫﻲ ﻣﻠﻴﺎﻧﻪ ﺗﻨﺎﻗﺾ ﻉ ﻗﺪ ﻣﺎ ﺣﻠﻮﻭﻭﻭﻭﺓﺓﺓﺓ 💓💓💓💓💓💓💓
💔 ﻭﻉ ﻗﺪ ﻣﺎﻭﺍﻋﺮ ﻋﺬﺍﺑﻪ ...
ﻋﺬﺍﺏ ﺍﻟﻌﺸﻖ ﻳﻨﺨﺮ ﺍﻟﺮﻭﺡ ﻣﻦ ﺩﺍﺧﻞ ...
🍃 ﻣﻘﻌﻤﺰ ﻓﺎﻟﺴﻴﺎﺭﺓ ﻭﻫﻮﻳﺸﻮﻑ ﻟﺮﻭﺣﻪ ...💓
ﻛﻴﻒ ﻃﺎﻟﻌﻪ ﻣﻊ ﺍﻣﻪ ﻭﺑﻮﻩ ﻣﻦ ﺍﻟﻤﺴﺘﺸﻔﻰ ...
ﺑﻴﻬﺒﻞ ﻋﻠﻴﻬﺎ .. ﻳﻤﻮﺕ ﻭﻳﻜﻮﻥ ﻣﻜﺎﻥ ﺑﻮﻩ ﻭﻻﺍﻣﻪ ﺍﻟﻠﻲ ﻭﺍﻗﻔﻴﻦ ﺟﻨﺒﻬﺎ ..
ﻣﺸﻜﻠﺘﻪ ﺍﻧﻪ ﻛﺎﻥ ﻭﺍﺛﻖ ﺍﻧﻬﺎ ﻣﻤﻜﻦ ﺗﺮﻛﺐ ﻣﻌﺎﻩ ﺍﻟﺴﻴﺎﺭﺓ ..
ﺍﻳﻪ ﻣﺎﻫﻮ ﻳﺮﺍﺟﻲ ﻓﻴﻬﺎ ...
ﺩﻻﻝ : ﻋﻤﻲ ﺭﻭﺡ ﺑﻴﺎ ﺍﻧﺖ ﻟﺤﻮﺷﻜﻢ ..
ﻛﺎﻣﻠﻪ ﺷﺒﺤﺖ ﻟﻤﺨﺘﺎﺭ ..
ﻣﺨﺘﺎﺭ : ﺑﺎﻫﻲ ﻳﺎﺑﻨﺘﻲ ﺑﺮﻱ ﻟﺴﻴﺎﺭﺗﻲ ..
ﺷﺎﻓﻬﻢ ﻛﻴﻒ ﻣﺎﺷﻴﻴﻦ ﻫﻤﺎ ﻭﻳﺎﻫﺎ ﻟﺴﻴﺎﺭﺓ ﺑﻮﻩ ..
ﻏﻤﺾ ﻋﻴﻮﻧﻪ ﺑﺄﻟﻢ ... ﻭﻟﺒﺲ ﻧﻈﺎﺭﺍﺗﻪ ﻭﺷﻐﻞ ﺍﻟﺴﻴﺎﺭﺓ ﻭﻟﺤﻘﻬﻢ ﺑﻌﺪ ﺗﺤﺮﻛﻮﺍ ..
ﻓﻲ ﻧﻔﺲ ﺍﻟﻮﻗﺖ ..
ﻫﺎﻧﻴﺒﺎﻝ ﻣﺎ ﻭﻗﻔﺶ ﻧﻬﺎﺋﻴﺎ ﻭﻻﻓﻜﺮ ﻳﺮﺗﺎﺡ ﻳﺒﻲ ﻳﻮﺻﻞ ﺳﺮﺕ ﺑﺄﺳﺮﻉ ﻭﻗﺖ ﺻﻮﺕ ﺩﻻﻝ ﻗﺎﻋﺪ ﻓﻮﺫﻧﻪ ...
ﺧﻮﺍﻟﻬﺎ ﺍﻟﺘﻼﺗﻪ ﻳﻐﻠﻮﺍ ﻏﻠﻲ ...
ﻭﻛﺎﻥ ﻳﻠﻘﻮﺍ ﻳﻄﻴﺮﻭﺍ ﺑﺶ ﻳﻮﺻﻠﻮﺍ ﻓﻴﻬﺎ ...
🍁🍁🍁🍁🍁
ﻫﻲ ﻭﺑﻨﺘﻬﺎ ﻣﺘﻜﻴﺎﺕ ﻓﻲ ﺍﻟﺪﺍﺭ ﻳﺘﻔﺮﺟﻮﺍ ﻉ ﺍﻟﺘﻠﻔﺰﻳﻮﻥ ..
ﻧﻮﺭ : ﻣﺎﻣﺎ ﻣﺎﺣﺼﻠﺘﻮﺵ ﺩﻻﻝ ..
ﺗﻨﻬﺪﺕ ﻧﻌﻴﻤﻪ ﻭﻗﺎﻟﺖ : ﻭﺍﻟﻠﻪ ﻣﺎﻧﻲ ﻋﺎﺭﻓﻪ ﺧﻴﺮﻫﺎ ﺩﻻﻝ .. ﺣﺘﻰ ﻟﻤﺎ ﺑﻮﻙ ﻛﻠﻢ ﺭﺍﺟﻠﻬﺎ ﻭﻗﺎﻟﻪ ﺗﻠﻴﻔﻮﻧﻬﺎ ﺭﺍﻳﺢ ﻭﺻﺎﻩ ﻟﻤﺎ ﻳﺮﻭﺡ ﻳﺘﺼﻞ ﺑﻴﻪ ﺑﺶ ﻧﻜﻠﻤﻮﻫﺎ ... ﻭﺍﻟﺤﻜﺎﻳﻪ ﻣﻦ ﺍﻟﺴﺎﻋﻪ 11 ﻭﺍﻫﻲ ﺍﻟﺴﺎﻋﻪ ﻗﺮﻳﺐ 4 ﻭﻻ ﻣﻦ ﺍﺗﺼﻞ ﻭﻻﻣﻦ ﺩﻭﺭ ..
ﻧﻮﺭ : ﺑﺎﻟﻚ ﺍﻧﺸﻐﻠﻮﺍ ...
ﻧﻌﻴﻤﻪ ﺑﻘﻠﻖ : ﻳﺴﺘﺮ ﺍﻟﻠﻪ ..
ﻧﻮﺭ ﺑﺨﻮﻑ : ﺧﻴﺮﻙ ﻣﺎﻣﺎ ..
ﻧﻌﻴﻤﻪ : ﺍﺧﺘﻚ ﻣﺶ ﻋﺎﺟﺒﺘﻨﻲ ﻳﺎﻧﻮﺭ .. ﻣﻦ ﻟﻤﺎ ﺭﻳﺘﻬﺎ ﺍﺧﺮﻣﺮﺓ ﻛﻴﻒ ﺿﺎﻋﻔﻪ ﻭﻣﺮﺓ ﻣﺮﺓ ﺗﺴﺮﺡ ﺣﺎﺳﻪ ﻓﻲ ﺷﻲ
ﻧﻮﺭ ﺧﺎﻓﺖ : ﺇﻥ ﺷﺎﺀ ﺍﻟﻠﻪ ﻣﺎﻓﻲ ﻏﻴﺮ ﺍﻟﺨﻴﺮ
ﻧﻌﻴﻤﻪ ﺗﻨﻬﺪﺕ ﻭﻗﺎﻟﺖ : ﺇﻥ ﺷﺎﺀ ﺍﻟﻠﻪ ...
🍁🍁🍁🍁🍁🍁🍁
ﻭﺻﻞ ﻣﺨﺘﺎﺭ ...
ﻭﻧﺰﻟﺖ ﻛﺎﻣﻠﻪ ﻭﻧﺰﻟﺖ ﺩﻻﻝ .. ﻭﺧﺸﻮﺍ ﺩﺍﺧﻞ ...
ﻛﻴﻒ ﻭﺻﻞ ﻋﻤﺎﺭ ﺩﺭﺱ ﻭﻧﺰﻝ ﺑﻴﺨﺶ ﻭﺭﺍﻫﻢ ﺑﻮﻩ ﺷﺪﻩ ..
ﻣﺨﺘﺎﺭ : ﻣﺶ ﻭﻗﺘﻪ ﻳﺎﻋﻤﺎﺭ ..
ﻋﻤﺎﺭ : ﻣﺎﻝ ﺍﻣﺘﻰ ﻭﻗﺘﻪ !!
ﻣﺨﺘﺎﺭ : ﺭﺍﻫﻮ ﺭﺩﺓ ﻓﻌﻠﻬﺎ ﺣﺘﻜﻮﻥ ﻫﻲ ﻧﻔﺴﻬﺎ .. ﺗﻌﺎﻝ ﺧﺶ ﻟﻠﻤﺮﺑﻮﻋﻪ ﺗﻮﺍ ﻟﺒﻴﻦ ﻣﺎﺗﻜﻠﻤﻬﺎ ﺍﻣﻚ ﺑﺎﻟﻚ ﺗﻠﻴﻨﻬﺎ .. ﻫﻲ ﺧﺶ ..
ﺑﻠﻊ ﺭﻳﻘﻪ ﻭﻉ ﻭﺟﻬﻪ ﺑﺎﺩﻳﻪ ﻋﻼﻣﺎﺕ ﺍﻟﻌﺼﺒﻴﻪ ﻭﻣﺸﻲ ﻟﻠﻤﺮﺑﻮﻋﻪ ﻭﺑﻮﻩ ﻭﺭﺍﻩ ..
🍁🍁🍁🍁
ﺩﺍﺧﻞ ...
ﺍﻣﻴﻨﻪ : ﻋﻤﺎﺭ ﻫﻮ ﻭﻣﺤﻤﻮﺩ ﺍﻟﻠﻪ ﻳﺮﺣﻤﻪ ﻛﺎﻧﻮﺍ ﻛﻴﻒ ﺍﻻﺻﺤﺎﺏ ﻣﺶ ﺑﺲ ﺧﻮﺕ ﻭﻫﺪﻭﻣﺎ ﻋﻮﻳﻠﺘﻪ ﻫﻮ ﺣﺎﺱ ﺍﻥ ﺑﺎﺗﻬﻢ ﻣﺶ ﺑﺲ ﻋﻤﻬﻢ .. ﻭﻳﻦ ﺷﺎﻓﻚ ﺿﺮﺑﺘﻴﻪ ﻣﻌﺎﺵ ﺷﺎﻑ ﻗﺪﺍﻣﻪ ﻣﻌﺬﻭﺭ ..
ﺩﻻﻝ ﺍﺑﺘﺴﻤﺖ ﺑﺘﻬﻜﻢ ﻭﻋﻴﻮﻧﻬﺎ ﻣﻠﻴﺎﻧﺎﺕ ﺩﻣﻮﻉ : ﻭﺍﻟﻠﻲ ﺍﺟﻬﻀﺘﻪ ﺍﻣﺲ ﻳﺎﺃﻣﻴﻨﻪ ﻣﻦ ﻳﻜﻮﻥ؟ ..!
ﺍﻣﻴﻨﻪ ﻣﻌﺎﺵ ﻗﺪﺭﺕ ﺗﺘﻜﻠﻢ ﻭﻗﻠﺒﻬﺎ ﻭﺟﻌﻬﺎ ﻫﻠﺒﻪ ..
ﻛﺎﻣﻠﻪ ﺗﻤﺴﺢ ﻓﺪﻣﻮﻋﻬﺎ ﻭﺗﻘﻮﻝ : ﺑﺎﻫﻲ ﺑﻨﻴﺘﻲ ﺗﻮﺍ ﺻﻠﻲ ﻉ ﺍﻟﻨﺒﻲ ﻭﺍﺳﺘﻬﺪﻱ ﺑﺎﻟﻠﻪ .. ﻭﺭﻩ ﺗﺼﺮﻑ ﻋﻤﺎﺭ ﻛﺎﻥ ﻓﻠﺤﻈﻪ ﻏﻀﺐ ﺑﻨﺘﻲ ﻭﻳﺎﻣﺎ ﺣﺎﺟﺎﺕ ﻛﻴﻒ ﻫﺪﻱ ﺗﺼﻴﺮ ﺑﻴﻦ ﺍﻱ ﺍﺗﻨﻴﻦ ﻣﺘﺰﻭﺟﻴﻦ ... ﻭﺭﺍﺱ ﺑﻨﺘﻲ .. ﺻﺒﻲ ﻏﻴﺮﻱ ﺩﺑﺸﻚ ﻭﺍﺭﻗﺪﻱ ﻓﺪﺍﺭﻛﻢ ﻭﻫﻮ ﻭﺍﻟﻠﻪ ﻣﺎﺧﺎﺵ ﻋﻠﻴﻚ ﻟﻴﻦ ﺗﺮﺿﻲ ﻋﻨﻪ ..
ﺩﻻﻝ ﻭﻫﻲ ﻣﺮﺑﻌﻪ ﺍﻳﺪﻳﻪ ﻭﺩﻣﻮﻋﻬﺎ ﻳﻨﺰﻟﻮﺍ : ﺍﻧﻲ ﻳﺎﻋﻤﺘﻲ ﺧﻼﺹ ﻋﻤﺎﺭ ﻋﻔﺘﻪ ﻣﻌﺎﺵ ﻧﺒﻴﻪ ..
ﺷﺒﺤﻮﺍ ﻛﺎﻣﻠﻪ ﻭﺍﻣﻴﻨﻪ ﻟﺒﻌﺾ ..
ﺍﻣﻴﻨﻪ : ﻻﺣﺒﻴﺒﺘﻲ ﻣﺎﺗﻮﺻﻠﺶ ﻟﻬﻨﻰ ..
ﻛﺎﻣﻠﻪ : ﺍﻧﺘﻲ ﺗﻘﻮﻟﻲ ﻫﻜﻲ ﻷﻧﻚ ﻣﺎﺯﻟﺘﻲ ﺣﺎﻣﻘﻪ ﺑﺲ .. ﻏﻴﺮ ﺻﺒﻲ ﺳﻠﻢ ﺑﻨﺘﻲ ﻭﻋﺪﻱ ﺍﺭﻗﺪﻱ ﺷﻮﻳﻪ ﻭﺍﺭﺗﺎﺣﻲ ..
ﺩﻻﻝ ﻣﺎﺯﺍﻟﺖ ﻉ ﻧﻔﺲ ﻭﺿﻌﻴﺘﻬﺎ ...
ﻭﺍﻣﻴﻨﻪ ﻭﻛﺎﻣﻠﻪ ﻳﺸﻮﻓﻮﺍ ﻟﺒﻌﺾ ﻭﻫﻤﺎ ﺷﺒﻪ ﺃﻳﺴﻮﺍ ﻣﻨﻬﺎ ..
ﻓﺠﺎﺓ ...
" ﺩﻻﺍﺍﺍﻝ .."
ﺩﻻﻝ ﺑﻔﺰﺓ : ﺧﺎﻟﻲ ..!!
ﺑﺮﺍ ...
ﻃﻠﻌﻮﺍ ﻣﺨﺘﺎﺭ ﻭﻋﻤﺎﺭ ﻣﻦ ﺍﻟﻤﺮﺑﻮﻋﻪ ...
ﻟﻘﻮﺍ ﻫﺎﻧﻴﺒﺎﻝ ﻭﻣﻌﺎﻩ ﻋﻤﺮ ﻭﻣﺤﻤﺪ ..
ﻫﺎﻧﻴﺒﺎﻝ : ﻭﻳﻦ ﺩﻻﻝ ...
ﻋﻤﺎﺭ ﻳﺸﻮﻓﻠﻪ ﺑﺤﺪﻩ ..
ﻣﺨﺘﺎﺭ : ﻏﻴﺮ ﺳﻠﻢ ﻗﺒﻞ ..
ﻫﺎﻧﻴﺒﺎﻝ ﺑﻌﺼﺒﻴﻪ : ﻻﺳﻼﻡ ﻭﻻﻛﻼﻡ ﻗﺒﻞ ﻟﺘﻄﻠﻊ ﺑﻨﺖ ﺍﺧﺘﻲ ﺗﻮ ..
ﻋﻤﺎﺭ : ﻭﻟﻴﺶ ﺇﻥ ﺷﺎﺀ ﺍﻟﻠﻪ ..
ﻫﺎﻧﻴﺒﺎﻝ : ﺍﻧﺖ ﺑﺎﻟﺬﺍﺕ ﻣﺎﻧﺒﻴﺶ ﻧﺴﻤﻌﻠﻚ ﺣﺲ .. ﺧﺴﺎﺭﺓ ﻣﺎﻭﺻﻴﺖ ﻭﻋﺒﻴﺖ ..
ﻋﻤﺎﺭ ﺑﺘﻀﻴﻴﻘﺔ ﻋﻴﻮﻥ : ﺑﺘﻘﻌﺪ ﺗﻘﻄﻒ ﻓﻘﻄﺎﻑ ﻓﺎﺭﻍ ... ﺍﻃﻠﻊ ﺍﺣﺴﻦ ..
ﻫﺎﻧﻴﺒﺎﻝ : ﻣﺎﻧﻴﺶ ﻃﺎﻟﻊ ﻣﻦ ﻫﻨﻰ ﻗﺒﻞ ﺍﻻ ﻭﺑﻨﺖ ﺍﺧﺘﻲ ﻣﻌﺎﻱ .
ﻋﻤﺎﺭ ﺑﻨﻔﺎﺩ ﺻﺒﺮ : ﺑﺎﺍﺗﻲ .. ﺗﻔﺎﺍﺍﻫﻢ .. ﻣﻊ ﻭﻟﺪ ﺍﺧﺘﻚ ..
ﻋﻤﺮ : ﺩﻻﺍﺍﺍﺍﻝ ....
ﻫﺎﻧﻴﺒﺎﻝ : ﺩﻻﺍﺍﺍﺍﺍﻝ ...
ﻓﻲ ﻫﺎﻟﻠﺤﻈﻪ ...
ﻃﻠﻌﺖ ﺩﻻﻝ ﺗﺠﺮﻱ ﻟﺨﺎﻟﻬﺎ
ﺷﺎﻓﻬﺎ ﻋﻤﺎﺭ ﻗﺮﻳﺐ ﻫﺒﻞ .. ﻣﺸﻲ ﺑﻴﻠﺤﻖ ﻋﻠﻴﻬﺎ ﻳﺸﺪﻫﺎ ..
ﻳﻮﺻﻞ ﻓﻴﻬﺎ ﻋﻤﺮ ﻗﺒﻠﻪ ﻭﻳﺎﺧﺪﻫﺎ ﻓﺤﻀﻨﻪ .. ﻭ
ﻳﺠﻲ ﺑﻴﻨﺎﺗﻬﻢ ﻫﺎﻧﻴﺒﺎﻝ ﻭﻳﺪﻑ ﻋﻤﺎﺭ ﺑﻜﻞ ﻗﻮﺗﻪ ..
ﻭﺧﺮ ﻋﻤﺎﺭ ﻭﻋﻴﻮﻧﻪ ﻉ ﺩﻻﻝ ﻭﻫﻲ ﺗﻄﻠﻊ ﻣﻊ ﺧﻮﺍﻟﻬﺎ ﻣﻦ ﺍﻟﺒﺎﺏ ..
ﻗﺪﻡ ﻳﺠﺮﻱ ﻣﺮﺓ ﺗﺎﻧﻴﻪ ﺑﺶ ﻳﻠﺤﻘﻬﻢ ...
ﻳﺠﻲ ﻗﺪﺍﻣﻪ ﻫﺎﻧﻴﺒﺎﻝ ..
ﺿﺮﺑﻪ ﻋﻤﺎﺭ ﺑﻮﻛﺲ ﺑﻜﻞ ﻗﻮﺗﻪ ...
ﺧﻼ ﻫﺎﻧﻴﺒﺎﻝ ﻳﻮﺧﺮ ... ﻭﻻﻟﻪ ﻭﻗﻌﺪﻭﺍ ﻳﻀﺮﺑﻮﺍ ..
ﻭﻓﻜﻬﻢ ﻣﺨﺘﺎﺭ ﻭﻟﺤﻘﻮﺍ ﻭﻻﺩﺍﻣﻴﻨﻪ ﺍﻟﻠﻲ ﻛﺎﻧﻮﺍ ﻛﻴﻒ ﺧﺎﺷﻴﻦ ﻟﻠﺤﻮﺵ ..
ﺑﻌﺪ ﺑﻌﺪﻭﻫﻢ ﻋﻦ ﺑﻌﺾ ..
ﻣﺨﺘﺎﺭ ﺑﻐﻀﺐ : ﻫﺎﻧﻴﺒﺎﻝ ﻋﺪﻱ ﺍﻃﻠﻊ ﺍﻗﻠﺐ ﻭﺟﻬﻚ ..
ﻭﺷﺒﺢ ﻟﻮﻟﺪﻩ .. ﻋﺪﻱ ﺧﺶ ﺩﺍﺧﻞ ..
ﻋﻤﺎﺭ ﺑﻌﺼﺒﻴﺔ ﻣﻤﺰﻭﺟﻪ ﺑﺎﻟﺠﻨﻮﻥ : ﺗﻲ ﻭﻳﻦ ﻧﺨﺶ ﻭﻳﻦ ﻣﺮﺗﻲ ﺍﻟﻠﻲ ﺧﺪﻭﻫﺎ ... ﻗﺪﻡ ﻳﺠﺮﻱ ﻟﻬﺎﻧﻴﺒﺎﻝ ﺷﺪﻭﻩ ﻭﻻﺩ ﺍﺧﺘﻪ ﺑﺼﻌﻮﺑﻪ ..
ﻋﻤﺎﺭ : ﻭﺩﻳﻨﻲ ﻭﺩﻳﻨﻲ ﻣﺎﺿﺎﻝ ﺍﻻ ﻣﻨﺪﻣﻜﻢ ﻭﺍﺣﺪ ﻭﺍﺣﺪ ﻛﺎﻥ ﻃﻠﻌﺘﻮﺍ ﺑﻴﻬﺎ ﻣﻦ ﻫﻨﻰ ..
ﻫﺎﻧﻴﺒﺎﻝ : ﺍﻋﻠﻰ ﻣﺎﻓﻲ ﺧﻴﻠﻚ ﺍﺭﻛﺒﻪ ... ﻭﻃﺰﺯﺯ ...
ﻭﻟﻒ ﻭﻃﻠﻊ ....
ﻭﻋﻤﺎﺭ ﺑﻴﻨﺠﻦ ﺷﺎﺩﻳﻨﻪ ﻭﻻﺩ ﺍﺧﺘﻪ ﺑﺎﻟﺰﻭﺭ ...
ﺩﺍﺧﻞ
ﻛﺎﻣﻠﻪ ﻭﺍﻣﻴﻨﻪ ﻳﺒﻜﻮﺍ ﺑﺎﻟﻌﺒﺮﺓ ....
ﺑﻴﻨﻤﺎ ﻓﻲ ﺍﻟﺤﻮﺵ ﺍﻟﻠﻲ ﻓﺠﻨﺒﻬﻢ ﻫﻨﺪﺍ ﻛﺎﻧﺖ ﺗﺮﺍﻗﺐ ﻣﻦ ﺍﻟﺮﻭﺷﻦ ﻭﻣﺼﺪﻭﻣﻪ ﻭﻓﻲ ﻧﻔﺲ ﺍﻟﻮﻗﺖ ﻓﺮﺣﺎﻧﻪ ﺑﺎﻟﻠﻲ ﺻﺎﺭ
🍁 ﻋﻤﺎﺭ ﻧﻔﺾ ﻭﻻﺩ ﺍﺧﺘﻪ ﻭﻗﺎﻝ : ﺗﻮ ﻧﺘﺼﺮﻑ ﺑﻄﺮﻳﻘﺘﻲ ..
" ﻗﺴﻤﺎ ﺑﺎﻟﻠﻪ ﺍﺩﻳﺮ ﺷﻲ ﻟﻮﻻﺩ ﻋﻤﺘﻚ ﻻﺍﻧﺖ ﻭﻟﺪﻱ ﻭﻻﻧﻌﺮﻓﻚ ﻭﻧﺤﻠﻒ ﺑﺎﻟﻄﻼﻕ "
ﺷﺒﺢ ﻋﻤﺎﺭ ﻟﺒﻮﻩ ﺍﻟﻠﻲ ﻛﺎﻥ ﺑﺎﻳﻦ ﺍﻧﻪ ﺟﺎﺩ ﻓﻲ ﺗﻬﺪﻳﺪﻩ ﻭﻭﻋﻴﺪﻩ ...
ﻗﻌﺪ ﻭﺍﻗﻒ ﻳﺸﻮﻓﻠﻪ ﻫﻠﺒﻪ ...
ﻭﺑﻮﻩ ﻳﺸﺒﺤﻠﻪ ..
ﻏﻴﺮ ﻋﻴﻮﻧﻪ ﻋﻤﺎﺭ ﻟﻠﺒﺎﺏ ...
ﺷﺒﺤﻠﻪ ﺷﻮﻳﻪ ... ﺑﻌﺪﻳﻦ ﻭﺧﺮ ﺧﻄﻮﺓ ... ﻟﻒ ... ﺷﺒﺢ ﻟﻠﻜﺮﺍﺳﻲ ﻭﺍﻟﻄﺎﻭﻟﻪ ﺍﻟﻠﻲ ﺣﺪﺍﻩ ...
ﻗﺪﻡ ﺧﻄﻒ .. ﻗﺎﻡ ﺍﻟﻜﺮﺳﻲ ﻭﺣﺪﻓﻪ ﻉ ﻣﺮﺵ ﺑﺎﺏ ﺍﻟﻔﻴﺮﻧﺪﺍ ﺗﻜﺴﺮ ﻛﻠﻪ .. ﻭﺍﻣﻪ ﻭﺍﺧﺘﻪ ﻋﻴﻄﻮﺍ ﻉ ﻃﻮﻝ ﺭﻗﺒﺘﻬﻢ ..
ﻗﺎﻡ ﻭﺍﺣﺪ ﺗﺎﻧﻲ ﺭﻓﻌﻪ ﻓﻮﻕ ﻭﺣﺪﻓﻪ ﻟﻮﻃﺎ ﻟﻴﻦ ﺗﻜﺴﺮ ..
ﺑﻮﻩ ﻳﺸﻮﻓﻠﻪ ﺑﺼﺪﻣﻪ ... ﻭﻭﻻﺩ ﺍﺧﺘﻪ ﻣﺶ ﻣﺼﺪﻗﻴﻦ ﺍﻟﺤﺎﻟﻪ ﺍﻟﻠﻲ ﻭﺻﻠﻠﻬﺎ ﺧﺎﻟﻬﻢ ..
ﻛﺎﻣﻠﻪ ﻣﻦ ﺩﺍﺧﻞ ﻭﻫﻲ ﺗﻌﻴﻂ ﺑﺒﻜﻲ : ﻳﺎﻋﻤﺎﺍﺍﺭ ﺗﺮﺑﺢ ﻳﺎﻋﻤﺎﺍﺍﺭ ..
ﻋﻤﺎﺭ ﻭﻻ ﻣﺪﻭﺭ ...
ﻳﺎﺧﺪ ﻭﻳﻜﺴﺮ ﻭﺩﻣﻮﻋﻪ ﻳﻨﺰﻟﻮﺍ ...
ﻟﻌﻨﺪ ﻣﺎﺟﻲ ﺑﻮﻩ ﻭﺷﺪﻩ : ﺧﻠﻴﻚ ﺭﺍﺟﻞ .. ﺧﻠﻴﻚ ﺭﺍﺟﻞ ﺷﻦ ﺍﻟﻌﻤﻞ ﺍﻟﻠﻲ ﺩﻳﺮ ﻓﻴﻪ ﻫﺪﻯ ﻣﻦ ﺍﻣﺘﻰ ﻭﺍﻧﺖ ﻫﻜﻲ ...
ﻋﻤﺎﺭ ﺣﺎﺱ ﺍﻧﻪ ﻳﺒﻲ ﻳﺒﻜﻲ ﻣﻦ ﻋﺠﺰﻩ ﻷﻭﻝ ﻣﺮﺓ ﻳﺤﺲ ﺍﻧﻪ ﻣﺶ ﻗﺎﺩﺭ ﻳﺪﻳﺮ ﺷﻲ ... ﻭﺍﻟﺨﺴﺎﺭﺓ ﺍﻟﻠﻲ ﺧﺴﺮﻫﺎ ﻫﺎﻟﻤﺮﺓ ﺑﺎﻟﻨﺴﺒﻪ ﻟﻴﻪ ﻛﺒﻴﺮﺓ ﻫﻠﺒﻪ 🍃💔...
ﺩﻑ ﺑﻮﻩ ﻭﺗﻮﺟﻪ ﻃﻮﻝ ﻟﻠﺒﺎﺏ ﻭﻃﻠﻊ ﺑﺮﺍ ﺍﻟﺤﻮﺵ ﺑﺪﻭﻥ ﺳﻴﺎﺭﺓ ...
🍁🍁🍃
ﻗﻌﺪ ﻳﻤﺸﻲ ﻭﻳﻤﺸﻲ ﻭﺭﺟﻠﻴﻪ ﻳﺎﺧﺪﻭﺍ ﻓﻴﻪ ﻟﻄﺮﻳﻖ ﺣﻮﺷﻬﻢ ﺍﻟﻠﻲ ﻣﻜﺎﻧﺶ ﺑﻌﻴﺪ ﻫﻠﺒﻪ ..
ﺑﻴﻦ ﻋﻴﻮﻧﻪ ﻛﻴﻒ ﻃﺎﻟﻌﻪ ﺗﺠﺮﻱ .. ﻭﻛﺄﻧﻬﺎ ﻫﺎﺭﺑﻪ ﻣﻨﻪ ..
ﺧﻼﺹ ﻫﻮ ﺧﺴﺮﻫﺎ ﺗﻢ ... ﺑﻌﺪ ﺷﺎﻑ ﺍﻟﻠﻲ ﺷﺎﻓﻪ .. ﻃﻠﻌﺖ ﻭﺣﺘﻰ ﻟﻮﺭﺍﻫﺎ ﻣﺎﺑﺘﺶ ﺗﻠﺘﻔﺖ ..
ﺑﺮﻏﻢ ﺩﻣﻮﻉ ﻋﻴﻮﻧﻪ ﺍﻟﻠﻲ ﻛﺎﻧﺖ ﺗﻨﺰﻝ ﺍﻻ ﻣﻼﻣﺢ ﻭﺟﻬﻪ ﻛﺎﻧﺖ ﻫﻲ ﻫﻲ ﺍﻟﻤﻼﻣﺢ ﻣﻼﻣﺢ ﺍﻟﻜﺒﺮﻳﺎﺀ ﺍﻟﻠﻲ ﻭﻟﺖ ﺟﺰﺀ ﻣﻦ ﺗﻘﺎﺳﻴﻢ ﻭﺟﻬﻪ ...
ﻟﻘﻲ ﺭﻭﺣﻪ ﻗﺪﺍﻡ ﺍﻟﺤﻮﺵ ...
ﺧﺶ ﻭﻭﺻﻞ ﻓﻲ ﺍﻟﺒﺎﺏ ﻓﺘﺤﻪ .... ﻭﺧﺶ ﻟﻠﺤﻮﺵ ...
ﻧﺴﻤﺘﻬﺎ ....
ﺭﻳﺤﺘﻬﺎ ﻓﻴﻪ ...
ﺳﻜﺮ ﺍﻟﺒﺎﺏ ﻭﺍﻟﺪﻣﻮﻉ ﺑﻐﺰﺍﺭﺓ ﺑﺪﻭﺍ ﻳﻨﺰﻟﻮﺍ ..
ﻛﻞ ﻣﺎﻳﻤﺸﻲ ﺧﻄﻮﺓ ﻳﺸﻮﻑ ﻃﻴﻔﻬﺎ ﻓﺘﺮﻛﻴﻨﻪ ...
ﻭﻳﺰﻳﺪ ﻳﻤﻮﺕ ﻣﻦ ﺩﺍﺧﻞ ﺍﻛﺜﺮ ﻭﺍﻛﺜﺮ ...
ﻟﻌﻨﺪ ﻣﺎﺧﺪﻭﻩ ﺭﺟﻠﻴﻪ ﻟﺪﺍﺭ ﺍﻟﻨﻮﻡ ..
ﺣﻮﻝ ﺍﻟﺒﺎﻟﻄﻮ ...
ﻭﻟﻮﺣﻪ .. ﻭﺷﺒﺢ ﻟﻠﺰﻳﺎﻧﻪ ﺷﺎﻑ ﺣﺎﺟﺎﺗﻬﺎ ﻗﺎﻋﺪﺍﺕ ...
ﻣﺸﻲ ﻟﻠﺨﻠﻒ ﻟﻴﻦ ﻭﺻﻞ ﻓﻲ ﺍﻟﺴﺮﻳﺮ ﻭﻗﻌﻤﺰ ... ﻗﻌﺪ ﻳﺸﻮﻑ ﻉ ﻛﺎﻣﺪﻳﻨﻮﺍ ...
ﻓﻲ ﺑﺎﻛﻮﺍ ﺗﻠﻴﻔﻮﻥ ﺟﺪﻳﺪ ... ﻭﺑﺎﻛﻮ ﻃﺎﻗﻢ ﺫﻫﺐ .. ﻭﺗﺬﺍﻛﺮ ﺳﻔﺮ ...
ﺷﺒﺢ ﻟﻮﻃﺎ ﻟﻜﻴﺴﺔ ﻛﺒﻴﺮﺓ ﻓﻲ ﻣﺬﻛﺮﺍﺕ ﻭﺍﺩﻭﺍﺕ ﺩﺭﺍﺳﻪ .. ﻭﺍﺩﻭﺍﺕ ﺗﺨﺺ ﻃﻠﺒﺔ ﺍﻟﻬﻨﺪﺳﻪ ..
ﺍﻟﺤﺎﺟﺎﺕ ﻫﺎﺩﻱ ﻛﻠﻬﺎ ﻛﺎﻥ ﻧﺎﻭﻱ ﻳﻔﺎﺟﺌﻬﺎ ﺑﻴﻬﻢ ..
ﻫﺪﺍﻛﺎ ﺍﻟﻮﻗﺖ ﻛﺎﻥ ﻣﺎﺷﻲ ﺑﻴﺮﻭﺡ ﺑﻴﻬﺎ ﺑﺶ ﺗﺸﻮﻑ ﺷﻦ ﺩﺍﺭ ﺑﺶ ﻳﺴﻌﺪﻫﺎ ....
ﻟﻜﻦ ﺍﻟﻠﻲ ﺻﺎﺭ ﺍﻟﻌﻜﺲ ﺗﻤﺎﻣﺎ ...
ﺷﻲ ﻣﺎﻛﺎﻧﺶ ﺧﻄﺮ ﻉ ﺑﺎﻟﻪ ﺣﺘﻰ ﺍﻟﺨﻄﻮﺭ ... ﺣﺘﻰ ﻓﻲ ﺍﻟﺤﻠﻢ ..
ﺟﻲ ﺑﻴﻦ ﻋﻴﻮﻧﻪ ﻛﻴﻒ ﺿﺮﺑﻬﺎ ...
ﻧﻈﺮﺗﻬﺎ ﻟﻴﻪ ﻭﻗﺘﻬﺎ ...
ﻛﻴﻒ ﻃﺎﺣﺖ ﻓﺎﻗﺪﺓ ﻭﻋﻴﻬﺎ ﻭﻫﻲ ﺗﻨﺰﻑ ...
ﻛﻴﻒ ﺭﻓﻀﺖ ﺗﺸﻮﻓﻪ ﻟﻤﺎ ﺟﺎﻫﺎ ﻓﻲ ﺍﻟﻤﺴﺘﺸﻔﻰ ...
ﻭﻛﻴﻒ ﻃﻠﻌﺖ ﻫﺎﺭﺑﻪ ﻣﻨﻪ ﻣﻊ ﺧﻮﺍﻟﻬﺎ ..
ﺣﻂ ﻳﺪﻩ ﻉ ﻭﺟﻬﻪ ﻭﺑﺪﻱ ﻳﺒﻜﻲ ﻭﻳﺒﻜﻲ ..
ﻣﻦ ﺍﻟﻘﻬﺮﺓ ﻭﺍﻟﺤﺴﺮﺓ ﻭﺍﻟﻨﺪﻡ ...
.🍁🍁🍁🍁🍁
ﺍﻧﻲ ﻭﺍﻟﻠﻪ ﻣﺎﻧﻲ ﻣﺴﺎﻣﺤﺘﻚ ﻳﺎﻫﻨﺪﺍ ﻛﻴﻒ ﻣﺎﻗﻬﺮﺗﻴﻪ ﻭﻗﻬﺮﺗﻲ ﺧﻮﻩ ﻗﺒﻠﻪ ...
ﻫﻨﺪﺍ ﺑﻌﻴﺎﻁ : ﺷﻦ ﺗﻘﻮﻟﻲ ﺍﻧﺘﻲ ﺷﻦ ﺗﻘﻮﻟﻲ ﻓﺸﻦ ﻗﻬﺮﺗﻪ ﻣﺤﻤﻮﺩ ﻗﻮﻟﻲ ... ﻭﻻ ﻋﻤﺎﺭ ﻣﻦ ﻣﻔﺮﻭﺽ ﻳﻜﻮﻥ ﻗﻬﺮ ﺗﺎﻧﻲ ..
ﻛﺎﻣﻠﻪ ﺑﺼﻮﺕ ﻋﺎﻟﻲ : ﺍﺳﻤﻌﻴﻴﻴﻲ ﻛﻞ ﺷﻲ ﻛﺎﻥ ﻗﺪﺍﻣﻚ .. ﻗﺎﻟﻚ ﻳﺎﺑﻨﺖ ﺍﻟﻨﺎﺱ ﺭﺍﻧﻲ ﻭﺍﺧﺪﻙ ﻋﺸﺎﻥ ﻋﻴﺎﻝ ﺧﻮﻱ ﻭﺭﺍﻧﻲ ﺑﻨﺘﺰﻭﺝ ﻭﺍﻧﺘﻲ ﻣﺎﻋﺎﺭﺿﺘﻴﺶ ﻭﺭﺿﻴﺘﻲ .. ﺷﻦ ﺟﺪ ﻋﻠﻴﻚ ﺗﻮﺍ ﻗﻮﻟﻲ ...
ﻫﻨﺪﺍ ﺳﻜﺘﺖ ﻭﻗﻌﺪﺕ ﺗﺸﺒﺢ ﻟﻌﺰﻭﺯﺗﻬﺎ ﺑﺤﻘﺪ ..
ﻛﺎﻣﻠﻪ ﺑﺤﺰﻡ : ﺗﺒﻲ ﺗﻄﻠﻘﻲ .... ﻋﺪﻱ ﺍﻃﻠﻘﻲ ﻣﺎﺯﺍﻟﺖ ﺍﻟﺤﻴﺎﺓ ﻗﺪﺍﻣﻚ ﻭﺿﺮﺍﺭﻳﻨﺎ ﻳﻘﻌﺪﻭﺍ ﺿﺮﺍﺭﻳﻨﺎ ﻻﺑﻨﻨﻀﺎﻓﻮﺍ ﻣﻨﻬﻢ ﻭﻻﺑﻴﻨﻀﺎﻓﻮﺍ ﻣﻨﺎ ...
ﺍﻫﻮ ﻛﻼﻣﻲ ﻗﻠﺘﻪ ﻭﻭﺻﻠﻚ ... ﻭﻟﻔﺖ ﻭﻣﺸﺖ ﻣﺘﻮﺟﻬﻪ ﻟﺒﺎﺏ ﺍﻟﺤﻮﺵ ﺑﺶ ﺗﻄﻠﻊ ...
ﻫﻨﺪﺍ ﺑﺤﻘﺪ " ﻋﻤﺎﺭ ﻣﺴﺘﺤﻴﻞ ﻧﺘﻨﺎﺯﻝ ﻋﻨﻪ ﻟﻮ ﺷﻦ ﻳﺼﻴﺮ "
.... ﻳﺘﺒﻊ
