المتمردين

العشق المتمرد

#رمضان_احلا_مع_جمان_فريد

#العشق_المتمرد
الجزء33

ﺣﺎﺑﻪ ﻧﻌﺘﺬﺭ ﻋﻦ ﺧﻄﺄ ﻓﺎﺩﺡ ﻏﻠﻄﺘﻪ ...
ﻫﺎﻟﻤﺮﺓ ﺳﻘﻂ ﻣﻨﻲ ﺳﻬﻮﺍ ... ﺷﻬﺮ ﺭﻣﻀﺎﻥ ﻣﻔﺮﻭﺽ ﻳﻜﻮﻥ ﺷﻬﺮ 9 ﻭﺍﻧﻲ ﻧﺤﺴﺎﺑﻪ ﻧﺺ ﻋﺸﺮﺓ ... ﻭﻣﻊ ﺍﻷﺳﻒ ﺍﻟﺸﺪﻳﺪ ﻏﻠﻄﺖ ﻫﺎﻟﻐﻠﻄﻪ ﺍﻟﻜﺒﻴﺮﺓ ... ﻧﻌﺘﺬﺭ ﺍﻋﺘﺬﺍﺭ ﺷﺪﻳﺪ ... ﻭﻷﻭﻝ ﻣﺮﺓ ﻧﻀﻄﺮ ﻧﻐﻴﺮ ﺷﻮﻱ ﻭﻧﺘﺨﻄﻰ ﺟﺰﺋﻴﻪ ﻓﻲ ﺗﺴﻠﺴﻞ ﺍﻷﺣﺪﺍﺙ .....
ﻧﺒﻴﻜﻢ ﺗﻌﺘﺒﺮﻭﺍ ﺍﻥ ﺍﻷﺣﺪﺍﺙ ﻫﺎﺩﻱ ﺻﺎﺭﺕ ﺑﻌﺪ ﺭﻣﻀﺎﻥ ...
ﻭﻧﻌﺘﺬﺭ ﻣﺮﺓ ﺗﺎﻧﻴﻪ ﻷﻧﻪ ﺧﻄﺎ ﻓﺎﺩﺡ ﻓﻲ ﺭﻭﺍﻳﻪ ﺍﻫﻢ ﺷﻲ ﻓﻴﻬﺎ ﺍﻟﺘﺴﻠﺴﻞ ﺍﻟﺰﻣﻨﻲ ....
🍃🍃🍃🍃🍃🍃🍃🍃🍃🍃🍃🍃🍃🍃🍃🍃🍃
ﺍﻟﺴﺎﻋﻪ 9:00 ﻟﻴﻼ
ﻛﻴﻒ ﻣﺎﺗﻌﺮﻓﻮﺵ ﻣﻨﻲ؟
ﻧﻌﻴﻤﻪ ﺑﺒﻜﻲ : ﻫﺪﺍ ﺍﻟﻠﻲ ﺻﺎﺭ ﻳﺎﻧﺎﺟﻲ ﻳﺎﻭﺧﻴﻲ ..
ﺩﻻﻝ ﺑﺒﻜﻲ : ﻳﺨﻮﻓﻮﺍ ﻳﺎﻋﻤﻮ ﻳﺨﻮﻓﻮﺍ .... ﻫﻮ ﻓﺘﺢ ﺍﻟﺒﺎﺏ ﻭﻫﻤﺎ ﺷﺪﻭﻩ ﻃﻮﻝ ... ﻭﺩﺧﻠﻮﻩ ﺍﻟﺴﻴﺎﺭﺓ ...
ﻧﺎﺟﻲ : ﺩﻳﻤﺎ ﻧﻘﻮﻟﻪ ﺭﺩ ﺑﺎﻟﻚ ﺩﻳﻤﺎ ﻧﻘﻮﻟﻪ ﻗﺼﺮ ﻟﺴﺎﻧﻚ ﻳﺎﻋﺒﺎﻟﺴﻼﻡ ﺭﺍﻙ ﺿﺎﺑﻂ ﻓﻲ ﺍﻟﺪﻭﻟﻪ ... ﺧﺒﻂ ﻛﻔﻮﻓﻪ ﻓﺒﻌﺾ .. ﻣﺎﻳﺴﻤﻌﺶ ﺑﻜﻞ ..
ﺩﻻﻝ : ﻳﻌﻨﻲ ﺗﻮﺍ ﺷﻦ ﺑﻴﺼﻴﺮ ﻓﻲ ﺑﺎﺑﺎ ! ؟
ﻧﺎﺟﻲ : ﺭﺑﻲ ﻳﺸﺒﺢ ﻓﻴﻪ ﻳﺎﺑﻨﺘﻲ ...
ﺍﻟﺒﻨﺎﺕ ﻭﺍﻣﻬﻢ ﺍﻧﻬﺎﺭﻭﺍ ﺑﺎﻟﺒﻜﻲ ...
🌴🌴🌴🌴🌴🌴🌴🌴🌴🌴🌴🌴🌴
ﻣﺘﻜﻴﺎﺕ ﻓﻲ ﺍﻟﺪﺍﺭ ....
ﻏﺎﻟﻴﻪ : ﻣﺎﻧﻴﺶ ﻋﺎﺭﻓﻪ .. ﺍﻧﺘﻲ ﺷﻦ ﺗﺤﺴﻴﻪ ﻳﺎﺣﻤﻴﺪﻩ ..
ﺣﻤﻴﺪﻩ : ﺍﻧﻲ ﺑﻨﻘﻮﻟﻚ ﺑﺲ ﺭﺩﻱ ﺑﺎﻟﻚ ﻣﻨﻪ .. ﻋﻠﻴﻪ ﻛﻼﻡ ﻃﺎﻟﻊ ﻓﻲ ﺍﻟﻤﺴﺘﺸﻔﻰ ﻭﺍﻧﻲ ﻣﺶ ﻣﺮﻳﺤﻨﻲ ﺑﻜﻞ ﺭﻩ ..
ﺗﻨﻬﺪﺕ ﻏﺎﻟﻴﻪ ﻭﻗﺎﻟﺖ : ﺍﺻﻼ ﺗﻮﻗﻌﺘﻪ ﻭﺍﺿﺢ ﻋﻠﻴﻪ ﻋﻴﻨﻪ ﺯﺍﻳﻐﻪ ..
ﻭﻟﻔﺖ ﻭﺟﻬﻬﺎ ﻟﻠﺘﻠﻔﺰﻳﻮﻥ ...
ﺷﺒﺤﺘﻠﻬﺎ ﺣﻤﻴﺪﻩ ﺑﻀﻴﻖ " ﺍﻟﻠﻪ ﻻﻳﺴﺎﻣﺤﻜﻢ ﻳﺎﺳﻌﻴﺪﻩ ﻭﻳﺎﺣﻤﻴﺪﺍ ..."
ﺭﻥ ﺗﻠﻴﻔﻮﻥ ﻏﺎﻟﻴﻪ ..
ﻧﺎﺿﺖ ﻗﻌﻤﺰﺕ ﻭﺧﺪﺍﺗﻪ ﻣﻦ ﺗﺤﺖ ﺍﻟﻤﺨﺪﺓ ..
ﻏﺎﻟﻴﻪ : ﺩﻻﻝ ...
ﺣﻤﻴﺪﻩ ﺑﺈﺳﺘﻐﺮﺍﺏ : ﺧﻴﺮﻫﺎ ﺯﻋﻤﻪ ..
ﻏﺎﻟﻴﻪ ﺭﺩﺕ : ﻫﺎﻩ ﺩﻟﻮﻟﻪ ....... ﺧﻴﺮﻙ ﺷﻨﻮ ﻓﻲ؟؟ ............!! ﺷﻨﻮﻭﻭﻭ ...
ﺣﻤﻴﺪﻩ ﺑﺨﻮﻑ : ﺷﻦ ﻓﻲ؟ !!
ﻏﺎﻟﻴﻪ : ﺑﺎﻫﻲ ﺑﺎﻫﻲ ..... ﻧﺎﺿﺖ ﻭﻃﻠﻌﺖ ﻣﻦ ﺍﻟﺪﺍﺭ ﺗﺠﺮﻱ ..
ﻭﻧﺎﺿﺖ ﻭﺭﺍﻫﺎ ﺣﻤﻴﺪﻩ : ﺷﻨﻮ ﻓﻲ ....
ﻃﻮﻝ ﺗﻮﺟﻬﺖ ﻏﺎﻟﻴﻪ ﻟﻠﺪﺭﻭﺝ ﻭﺭﻛﺒﺖ ﺗﺠﺮﻱ .... ﻭﻭﺭﺍﻫﺎ ﺣﻤﻴﺪﻩ ..
ﺣﻤﻴﺪﻩ : ﻓﻬﻤﻴﻨﻲ ﺷﻦ ﻓﻲ ...
ﻏﺎﻟﻴﻪ : ﻋﺒﺎﻟﺴﻼﻡ ﺭﺍﺟﻞ ﻧﻌﻴﻤﻪ ﻃﺒﻮﻩ ...
ﺣﻤﻴﺪﻩ ﺷﻬﻘﺖ ﺑﺼﺪﻣﻪ ...
ﻭﺻﻠﻮﺍ ﻓﻲ ﺍﻟﺪﺍﺭ ...
ﻃﻘﺖ ﻏﺎﻟﻴﻪ : ﻫﺎﻧﻴﺒﺎﻝ ..
" ﺧﺸﻲ .."
ﻓﺘﺤﺖ ﺍﻟﺒﺎﺏ ﻭﺧﺸﺖ ﻭﻭﺭﺍﻫﺎ ﺣﻤﻴﺪﻩ ..
ﻟﻘﺎﺗﻪ ﻣﻘﻌﻤﺰ ﻗﺪﺍﻣﻪ ﻭﺭﺍﻕ ﻭﻳﺪﺧﻦ ...
ﻫﺎﻧﻴﺒﺎﻝ : ﺷﻨﻮﻓﻲ ..
ﻏﺎﻟﻴﻪ : ﺭﺍﺟﻞ ﻧﻌﻴﻤﻪ ﻃﺒﻮﻩ ..
ﻫﺎﻧﻴﺒﺎﻝ ﺿﻴﻖ ﻋﻴﻮﻧﻪ ﻭﻗﺮﻥ ﺣﻮﺍﺟﺒﻪ : ﻛﻴﻒ ﻃﺒﻮﻩ؟ !!
ﻏﺎﻟﻴﻪ : ﺩﻻﻝ ﺗﻮﺍ ﺍﺗﺼﻠﺖ ﺑﻴﺎ ﻭﻫﻲ ﺗﺒﻜﻲ ﻗﺎﻟﺖ ﺑﻮﻱ ﺟﻮﻩ ﺭﻓﻌﻮﻩ ﻗﺒﻞ ﺍﻟﻤﻐﺮﺏ ..
ﻧﺎﺽ ﻭﻗﻒ ﻫﺎﻧﻴﺒﺎﻝ : ﺗﻲ ﺣﺘﻰ ﻫﻮ ﺍﻟﺼﺒﺎﺡ ﻫﺪﻯ ﻣﺎﻳﻌﺮﻓﺶ ﻳﺴﻜﺖ .. ﺿﺮﺏ ﻉ ﺭﻗﻢ ﻧﻌﻴﻤﻪ ﺑﺶ ﻳﻜﻠﻤﻬﺎ ﻭﻳﻔﻬﻢ ﻣﻨﻬﺎ ....
......
ﻟﻄﻴﻔﻪ : ﺧﻴﺮﻩ ﻳﺎﻟﻄﻴﻒ؟؟
ﺣﻤﻴﺪ : ﻣﻌﺮﻭﻑ ﻋﺒﺎﻟﺴﻼﻡ ﺭﺍﻳﻪ ﻣﺎﻳﻌﺮﻓﺶ ﻳﺪﺳﻪ .. ﻉ ﻗﺪ ﻣﺎﺣﺬﺭﻧﺎﻩ ..
ﻟﻄﻴﻔﻪ : ﻳﺴﺘﺮ ﺍﻟﻠﻪ ﻉ ﻧﻌﻴﻤﻪ ﻣﺴﻜﻴﻨﻪ ..
ﻟﺒﺲ ﺣﻤﻴﺪ ﻛﻨﺪﺭﺗﻪ ﻭﻃﻠﻊ ﻣﻦ ﺍﻟﺤﻮﺵ ...
ﻭﻟﻄﻴﻔﻪ ﺧﺸﺖ ﺗﺸﻮﻑ ﺻﻐﺎﺭﻫﺎ ﻛﺎﻥ ﺭﻗﺪﻭﺍ ....
.....
ﻣﻴﻼﺩ : ﻋﻠﻴﻚ ﻣﺼﻴﺒﻪ ..
ﻫﺎﻧﻴﺒﺎﻝ : ﻏﻴﺮ ﻛﺎﻥ ﻧﻌﻠﻤﻮﺍ ﻣﻦ ﺍﻟﻠﻲ ﻃﺒﻮﻩ ..
ﺍﻟﻬﺎﺩﻱ : ﻭﺍﺿﺢ ﻳﺎﻫﺎﻧﻴﺒﺎﻝ ﻣﺎﺗﺒﻴﺶ ﺳﺆﺍﻝ ...
ﻫﺎﻧﻴﺒﺎﻝ : ﻳﺴﺘﺮ ﺍﻟﻠﻪ ...
ﺩﺍﺧﻞ ﻓﻲ ﺍﻟﺤﻮﺵ ..
ﻏﺎﻟﻴﻪ : ﻳﺎﻏﺒﻴﻴﻴﻨﻲ ﻋﻠﻴﻬﻢ ...
ﺣﻤﻴﺪﻩ : ﺳﻴﺪﻙ ﻭﺍﻣﻚ ﻏﺪﻭﺓ ﻛﻴﻒ ﺑﻴﻌﻠﻤﻮﺍ ﻛﻴﻒ ﺑﻨﻘﻮﻟﻬﻠﻬﻢ ...
ﻏﺎﻟﻴﻪ ﺭﻓﻌﺖ ﺭﺍﺳﻬﺎ ﻓﻮﻕ : ﻳﺎﺍﺍﺍﺭﺑﻲ ﻓﺮﺝ ..
🍁 ﺣﻤﻴﺪ ﻭﺻﻞ ﻟﺤﻮﺵ ﻧﻌﻴﻤﻪ ...
ﻭﺣﺎﻭﻝ ﺟﻬﺪﻩ ﻳﻌﺮﻑ ﺍﻱ ﺷﻲ ﺑﺲ ﻣﻊ ﺍﻷﺳﻒ ﻣﺎﻗﺪﺭﺵ ﻳﻮﺻﻞ ﻓﻲ ﺍﻱ ﻣﻌﻠﻮﻣﻪ .. ﺗﺒﻴﻨﻠﻬﻢ ﺍﻥ ﺍﻟﺤﻜﺎﻳﻪ ﻣﻦ ﻓﻮﻕ ...
ﻭﻧﻌﻴﻤﻪ ﻭﺑﻨﺎﺗﻬﺎ ﺗﻘﻄﻌﻮﺍ ﻣﻦ ﺍﻟﺒﻜﻲ ...
🍁🍁🍁🍁🍁
ﺳﺮﺕ 💓
ﻣﻘﻌﻤﺰﻳﻦ ﻓﻲ ﺍﻟﺼﺎﻟﻪ ﻳﻬﺪﺭﺯﻭﺍ ....
ﻛﺎﻣﻠﻪ : ﺧﻴﺮﻩ؟
ﻣﺨﺘﺎﺭ : ﺍﺧﺮ ﻣﺮﻩ ﺟﻲ ﻓﻴﻬﺎ ﻫﻨﻰ ﻭﺿﻌﻪ ﻣﻮﺵ ﻋﺎﺟﺒﻨﻲ ...
ﻛﺎﻣﻠﻪ ﺗﻨﻬﺪﺕ ﻭﺳﻜﺘﺖ ..
ﻣﺨﺘﺎﺭ : ﺗﻌﺮﻓﻲ ﺣﺎﺟﻪ ..
ﻛﺎﻣﻠﻪ ﺷﺒﺤﺘﻠﻪ ﺷﻮﻳﻪ ﺑﻌﺪﻳﻦ ﻗﺎﻟﺖ : ﻭﻟﺪﻙ ﻣﺶ ﺧﺎﻟﻲ ﻳﺎﻣﺨﺘﺎﺭ ..
ﻣﺨﺘﺎﺭ ﺿﻴﻖ ﻋﻴﻮﻧﻪ ﻭﻗﺎﻝ : ﻛﻴﻒ ﻣﺶ ﺧﺎﻟﻲ؟ !!
ﻛﺎﻣﻠﻪ : ﻛﻴﻒ ﺑﻨﻘﻮﻟﻬﻠﻚ ﻣﺶ ﻋﺎﺭﻓﻪ ..
ﻣﺨﺘﺎﺭ ﺑﺨﻮﻑ : ﺗﻜﻠﻤﻲ ﻳﺎﻣﺮﺍﺓ ﺷﻨﻮﻓﻲ؟ !
ﻛﺎﻣﻠﻪ : ﻭﻟﺪﻙ ... ﻓﻲ ﺧﺎﻃﺮﻩ ﻭﺣﺪﻩ ..
ﻣﺨﺘﺎﺭ ﺯﻓﺮ ﻭﻗﺎﻝ : ﺭﺑﻲ ﻳﻬﺪﻳﻚ ﻳﺎﻣﺮﺍﺓ ﻗﺮﻳﺐ ﺭﺣﺖ ﻓﻴﻬﺎ ..
ﻛﺎﻣﻠﻪ : ﺣﻜﺎﻳﻪ ﺭﺩﺗﻪ ﻟﻤﺮﺕ ﺧﻮﻩ ﺍﻟﻠﻪ ﻳﺮﺣﻤﻪ ﺻﺒﺖ ﻓﻲ ﻭﺟﻬﻪ ..
ﻣﺨﺘﺎﺭ : ﻛﻴﻒ ﻳﻌﻨﻲ ﺧﻄﺐ ﻭﺭﺩﻭﻩ ..
ﻛﺎﻣﻠﻪ : ﺍﻳﻪ ... ﺗﻌﺮﻓﻬﻢ .. ﺑﻨﺖ ﻭﺣﺪﻩ ﻣﻦ ﺑﻨﺎﺕ ﻓﺎﻃﻤﻪ ..
ﻣﺨﺘﺎﺭ ﺍﺗﻔﺎﺟﺄ : ﺣﻔﻴﺪﻩ ﻓﺎﻃﻤﻪ ﻳﻌﻨﻲ ... ﻛﻢ ﻋﻤﺮﻫﺎ ﻫﺪﻱ؟ !
ﻛﺎﻣﻠﻪ 18: ﻋﺎﻡ .. ﻟﻜﻦ ﻣﺎﺷﺎﺀ ﺍﻟﻠﻪ ﻋﻠﻴﻬﺎ ..
ﻣﺨﺘﺎﺭ : ﺑﻨﺖ ﺍﻳﻦ ﻭﺣﺪﻩ ﻓﻴﻬﻦ؟ ...
ﻛﺎﻣﻠﻪ : ﺑﻨﺖ ﻧﻌﻴﻤﻪ ﺍﻟﻜﺒﻴﺮﻩ ..
ﻣﺨﺘﺎﺭ ﺿﻴﻖ ﻋﻴﻮﻧﻪ ﺷﻮﻳﻪ ﺑﻌﺪﻳﻦ ﺗﻮﺳﻌﻮﺍ ﻭﺭﻓﻊ ﺣﻮﺍﺟﺒﻪ ﻭﺿﺤﻚ : ﻻﻻ .. ﺍﻟﻠﻲ ﻣﻨﻴﻦ ﻛﺎﻧﺖ ﺻﻐﻴﺮﻩ ﻛﻴﻒ ﺍﻟﻠﻌﺒﻪ ... ﺷﻦ ﺳﻤﺎﻫﺎ ﺭﺑﻲ . ؟ !!
ﻛﺎﻣﻠﻪ : ﺩﻻﻝ ..
ﻣﺨﺘﺎﺭ : ﺍﻳﻮﻩ ﻫﺪﻱ ... ﻣﺎﺷﺎﺀ ﺍﻟﻠﻪ ... ﻣﺴﺮﻉ ﺍﻟﺴﻨﻴﻦ ﺗﺠﺮﻱ ﻳﺎﻛﺎﻣﻠﻪ ..
ﻛﺎﻣﻠﻪ ﺗﻨﻬﺪﺕ : ﻭﻫﺎﻟﺴﻨﻴﻦ ﺍﻟﻠﻲ ﺗﺠﺮﻱ ﻇﻠﻤﺖ ﻭﻟﻴﺪﻱ ﺍﻟﻤﺴﻜﻴﻦ ﻣﻦ ﻧﻬﺎﺭ ﺭﻭﺣﻨﺎ ﻭﻫﻮ ﺣﺎﻟﻪ ﻣﺘﺒﺪﻝ
ﻣﺨﺘﺎﺭ : ﺭﺩﻭﻩ ﻋﺸﺎﻥ ﺣﻜﺎﻳﺔ ﻫﻨﺪﺍ ﺑﺲ؟ !
ﻛﺎﻣﻠﻪ : ﻭﻋﺸﺎﻥ ﻓﺮﻕ ﺍﻟﻌﻤﺮ ...
ﻣﺨﺘﺎﺭ ﻗﻌﺪ ﻳﺨﻤﻢ ﺑﻌﺪﻳﻦ ﻗﺎﻝ : ﺗﻌﺮﻓﻲ ﻳﺎﻛﺎﻣﻠﻪ ﻭﻛﺎﻥ ﻋﻨﺪﻩ ﻓﻴﻬﺎ ﻧﺼﻴﺐ ﻳﺎﺧﺪﻫﺎ ﻳﺎﺧﺪﻫﺎ ...
ﺗﻨﻬﺪﺕ ﻛﺎﻣﻠﻪ ﺑﻀﻴﻖ ...
🍁🍁🍁🍁🍁
💔 ﻓﻬﺪﻳﻜﺎ ﺍﻟﻠﻴﻠﻪ ....
ﺷﺒﻪ ﻣﺎﺣﺪ ﺭﻗﺪ ....
ﻭﺍﻟﺒﻨﺎﺕ ﻋﻴﻮﻧﻬﻢ ﺩﺍﺑﻮ ﻣﻦ ﺍﻟﺒﻜﻲ ﻉ ﺑﻮﻫﻢ ...
ﺑﺎﻟﺬﺍﺕ ﺩﻻﻝ ... ﺍﻟﻠﻲ ﻓﻮﻕ ﻣﻜﺎﻧﺔ ﺑﻮﻫﺎ ﻋﻨﺪﻫﺎ ... ﺍﻟﻤﻨﻈﺮ ﺍﻟﻠﻲ ﻗﺎﻋﺪ ﺑﻴﻦ ﻋﻴﻮﻧﻬﺎ ﻛﻴﻒ ﺷﺪﻭﻩ ﻭﺣﻄﻮﻩ ﻓﻲ ﺍﻟﺴﻴﺎﺭﺓ ﻣﺶ ﻗﺎﺩﺭﺓ ﺗﺤﻮﻟﻪ ﻣﻦ ﺭﺍﺳﻬﺎ ﻭﺣﺴﺖ ﻟﻴﻠﺘﻬﺎ ﺍﻧﻬﺎ ﺧﻼﺹ ﻣﻌﺎﺵ ﻣﻤﻜﻦ ﺗﺸﻮﻑ ﺑﻮﻫﺎ ...
🍃 ﺗﺎﻧﻲ ﻳﻮﻡ ...
ﺍﻟﻜﻞ ﻛﺎﻧﻮﺍ ﻋﻨﺪﻫﻢ ...
ﻋﻴﻠﺔ ﻋﺒﺪﺍﻟﺴﻼﻡ ﻭﺧﻮﺍﺗﻪ ﻭﺧﻮﺗﻪ ﻭﻧﺴﺎﻭﻳﻨﻬﻢ ..
ﻭﺧﻮﺍﺕ ﻧﻌﻴﻤﻪ ... ﻭﻟﺤﻘﻮﺍ ﻓﺎﻃﻤﻪ ﻭﻫﺎﻧﻴﺒﺎﻝ ﻭﻣﻴﻼﺩ ...
ﺍﻟﺤﺎﺝ ﺣﻤﺪ : ﻳﻬﺪﻳﻪ ﺭﺑﻲ ﻳﻬﺪﻳﻪ ﺭﺑﻲ .. ﺿﻴﻊ ﺭﻭﺣﻪ ﻭﻋﻴﻠﺘﻪ ..
ﻫﺎﻧﻴﺒﺎﻝ : ﺻﻞ ﻉ ﺍﻟﻨﺒﻲ ﻳﺎﺣﺎﺝ ﻣﺎﻓﻲ ﺿﻴﺎﻉ ﺇﻥ ﺷﺎﺀ ﺍﻟﻠﻪ ﺗﻔﺮﺝ ..
ﻓﺎﻃﻤﻪ : ﻣﺎﺗﺨﺎﻓﺶ ﻳﺎﻋﻤﻲ .. ﺣﻨﻲ ﻧﺸﻴﻌﻮﺍ ﺍﻳﺪﻳﻨﺎ ﻟﺮﺑﻲ ﻭﻫﻮ ﻳﺪﻳﺮ ﻃﺮﻳﻖ ...
ﻧﺎﺟﻲ : ﺣﺎﻭﻟﺖ ﻧﻮﺻﻞ ﻓﻲ ﻧﺎﺱ ﻣﻤﻜﻦ ﻳﻌﺮﻓﻮﻟﻨﺎ ﻭﻳﻨﻪ ﺍﻗﻞ ﺷﻲ .. ﻣﺎﻓﻴﺶ ﻓﺎﻳﺪﺓ ... ﻣﺎﻟﻘﻮﺵ ﻣﻌﻠﻮﻣﻪ ..
ﺣﻤﻴﺪ : ﻧﺘﻮﻗﻊ ﺣﺪ ﻛﺎﻳﺪﻟﻪ ...
ﻣﻴﻼﺩ : ﻭﺍﻧﻲ ﻧﻘﻮﻝ ﻫﻜﻲ ...
ﺧﺎﻟﺪ ﺧﻮﻋﺒﺪﺍﻟﺴﻼﻡ : ﺗﺼﻴﺮ ﺍﻟﻤﺆﻣﺮﺍﺕ ﺻﺢ ... ﺑﺎﻟﺬﺍﺕ ﺑﻌﺪ ﺍﻟﺘﺮﻗﻴﻪ ﻫﻠﺒﻪ ﻧﺎﺱ ﺣﻄﻮﺍ ﺭﺍﺳﻬﻢ ﺑﺮﺍﺳﻪ ..
ﻫﺎﻧﻴﺒﺎﻝ ﻳﺴﻤﻊ ﻓﻜﻼﻣﻬﻢ ﻭﻳﺨﻤﻢ ...
ﻟﻌﻨﺪ ﻭﺻﻞ ﻟﺸﻲ .... ﻧﺎﺽ ﻭﻃﻠﻊ ﻣﻦ ﺣﺪﺍﻫﻢ ....
ﻋﻨﺪ ﺍﻟﻨﺴﺎﻭﻳﻦ ..
ﺯﻳﻨﺐ : ﺩﻻﻝ ﻳﺎﺑﻨﺘﻲ ﻛﻮﻟﻲ ﻣﺶ ﺑﺎﻫﻲ ﺍﻟﻠﻲ ﺩﻳﺮﻱ ﻓﻴﻪ ..
ﺍﻣﻨﻪ : ﺗﺒﻲ ﺗﻤﻮﺗﻲ ﻳﺎﺩﻻﻝ ..
ﻋﺒﻴﺮ : ﺍﻣﻚ ﺣﺎﻣﻞ ﻳﺎﺩﻻﻝ ﻣﺎﺗﺰﻳﺪﻫﺎﺵ ﻉ ﻣﺎﺑﻴﻬﺎ ﺳﻠﻢ ﺑﻨﺘﻲ ﻛﻮﻟﻲ ..
ﺩﻻﻝ ﺍﻟﻠﻲ ﻛﺎﻥ ﻭﺟﻬﻬﺎ ﺫﺍﺑﻞ ﻭﻋﻴﻮﻧﻪ ﻣﻨﻔﺨﺎﺕ ﻣﻦ ﺍﻟﺒﻜﻲ .. ﺭﺷﻔﺖ ﻭﻣﺴﺤﺖ ﺩﻣﻮﻋﻬﺎ ﻭﺑﺪﺕ ﺗﺎﻛﻞ ﺑﺎﻟﺴﻴﻒ ...
ﻭﻛﻔﺎﻳﻪ ﻣﻦ ﺟﻬﻪ ﺗﺎﻧﻴﻪ ﻗﺎﻋﺪﻩ ﺣﺪﺍ ﻧﻌﻴﻤﻪ ﺗﻬﺪﻱ ﻓﻴﻬﺎ ... ﻭﺗﻮﻛﻞ ﻓﻴﻬﺎ ...
🍁🍁🍁🍁🍁🍁
ﻓﻲ ﺳﺎﺣﺔ ﺍﻟﻜﻠﻴﻪ ﺍﻟﻌﺴﻜﺮﻳﻪ ...
" ﻣﻼﺯﻡ ﻋﻤﺎﺭ .."
ﻫﻮ ﺍﻟﻠﻲ ﻛﺎﻥ ﻻﺑﺲ ﻋﺴﻜﺮﻱ .. ﻭﻧﻈﺎﺭﺍﺕ ﺍﻟﺘﻔﺖ : ﺷﻨﻮ ..
: ﻳﺒﻮﻙ ﻉ ﺍﻟﻬﺎﺗﻒ ...
ﺍﺑﺘﺴﻢ ﺍﺑﺘﺴﺎﻣﻪ ﺧﻔﻴﻔﻪ ...
ﻓﺎﺕ ﻣﻦ ﺣﺪﺍ ﺍﻟﻀﺎﺑﻂ ﻭﻛﻤﻞ ﻃﺮﻳﻘﻪ ﻟﻴﻦ ﻭﺻﻞ ﻟﻠﻤﻜﺎﻥ ﺍﻟﻠﻲ ﻓﻴﻪ ﺍﻟﺘﻠﻴﻔﻮﻥ ...
ﺭﺩ : ﻧﻌﻢ ...
ﻫﺎﻧﻴﺒﺎﻝ : ﺷﻨﻮﺣﺎﻟﻚ ﻳﺎﻋﻤﺎﺭ ..
ﺍﺑﺘﺴﻢ ﻉ ﺟﻨﺐ : ﺍﻟﺤﻤﺪ ﻟﻠﻪ ﺷﻨﻮ ﺣﺎﻟﻚ ﺍﻧﺖ ..
ﻫﺎﻧﻴﺒﺎﻝ : ﺍﻟﺤﻤﺪ ﻟﻠﻪ ﺑﻨﻘﻮﻟﻚ ﻳﺎﻋﻤﺎﺭ .. ﺻﺎﻳﺮﺓ ﻣﺼﻴﺒﻪ ﻓﺮﺟﻬﺎ ﻣﻦ ﺑﻌﺪ ﺭﺑﻲ ﻋﻨﺪﻙ ...
ﻋﻤﺎﺭ ﺭﻓﻊ ﺭﺍﺳﻪ ﺑﻜﺒﺮ ﺑﻌﺪﻳﻦ ﻗﺎﻝ : ﺇﻥ ﺷﺎﺀ ﺍﻟﻠﻪ ﺧﻴﺮ .....
ﻭﺑﺪﻱ ﻫﺎﻧﻴﺒﺎﻝ ﻳﺤﻜﻲ ﻟﻌﻤﺎﺭ ..
ﻭﻋﻤﺎﺭ ﻛﺎﻥ ﻳﺴﻤﻊ ﻓﻴﻪ ﻭﻫﻮ ﻣﺒﺘﺴﻢ .. ﺑﻌﺪ ﻛﻤﻞ ﻫﺎﻧﻴﺒﺎﻝ ﻛﻼﻣﻪ ..
ﻋﻤﺎﺭ : ﻋﻄﻴﻨﻲ ﻣﻦ ﺗﻮ ﻟﺒﻌﺪ ﺍﻟﻈﻬﺮ ﻭﺗﻮ ﻧﻌﺮﻓﻠﻚ ..
ﻫﺎﻧﻴﺒﺎﻝ : ﻧﺮﺍﺟﻲ ﻓﻴﻚ ﻭﻋﻴﻠﺘﻪ ﻛﻠﻬﺎ ﺗﺮﺍﺟﻲ .. ﺍﺧﺘﻲ ﻭﺑﻨﺎﺗﻬﺎ ﻣﻘﻄﻌﺎﺕ ﺍﺭﻭﺍﺣﻬﻦ ﻣﻦ ﺍﻟﺒﻜﻲ ﻭﻻﻛﻠﻦ ﻭﻻﺷﺮﺑﻦ ..
ﻗﻠﺒﻪ ﻭﺟﻌﻪ ﻉ ﺍﻵﺧﺮ ... ﺑﺲ ﻣﻀﻄﺮ ﻳﻜﻤﻞ ﺍﻟﻠﻲ ﺑﺪﻱ ﻓﻴﻪ .. ﺑﺶ ﻳﻮﺻﻞ ﻓﻴﻬﺎ ... ﻭﻧﺎﺭﻩ ﺍﻟﻠﻲ ﻭﻗﺪﺗﻬﺎ ﺑﻨﺖ ﻋﺒﺪﺍﻟﺴﻼﻡ ﺗﻬﺪﺍ 🔥..💓
🍁🍁🍁🍁🍁
ﻓﻲ ﺣﻮﺵ ﺯﻳﻨﺐ ...
ﺍﻣﺘﻰ ﺻﺎﺭ ..
ﺭﺑﺎﺏ : ﺍﻟﺼﺒﺢ ﻗﺒﻞ ﻧﻄﻠﻊ ﻟﻠﺨﺪﻣﻪ ﺍﻣﻲ ﻗﺎﻟﺘﻠﻲ ..
ﺣﻤﺰﺓ : ﺑﺎﻫﻲ ﺍﻧﻲ ﻣﺎﺷﻲ .
ﺭﺑﺎﺏ : ﺭﺍﺟﻲ ﺑﻮﻱ ﻳﺮﻭﺡ ﻣﻦ ﺍﻟﺨﺪﻣﻪ ﻭﻳﻮﻟﻲ ﻭﺍﻧﺖ ﻣﻌﺎﻩ ..
ﺣﻤﺰﺓ : ﻻﻻ ﻣﺎﻧﻘﺪﺭﺵ ﻧﺮﺍﺟﻲ ﺍﻛﺜﺮ ﻣﻦ ﻫﻜﻲ ..
ﻭﻃﻮﻝ ﻃﻠﻊ ﻣﻦ ﺍﻟﺤﻮﺵ .. ﻭﺭﺑﺎﺏ ﻣﺴﺘﻐﺮﺑﻪ ﻓﻲ ﺧﻮﻫﺎ ...
🍁🍁🍁🍁🍁
ﺍﻟﺴﺎﻋﻪ 2:00 ﻇﻬﺮﺍ ...
ﻫﺎﻧﻴﺒﺎﻝ ﺣﺎﻭﻝ ﻳﺘﺼﻞ ﺑﻌﻤﺎﺭ ﺍﻛﺜﺮ ﻣﻦ ﻣﺮﺓ ﻣﺎﺣﺼﻼﺵ ..
ﻭﺍﺳﺘﻨﻰ ﻫﻠﺒﻪ ﺍﺗﺼﺎﻟﻪ ﻭﻣﺎﺍﺗﺼﻠﺶ ...
ﺯﺍﺩ ﺧﺎﻑ ﻫﺎﻧﻴﺒﺎﻝ ﻭﺣﺲ ﺍﻥ ﺍﻟﻤﻮﺿﻮﻉ ﻛﺒﻴﺮ ﻫﻠﺒﻪ .. ﻭﺧﻼ ﺍﺧﺮ ﺣﻞ ﺍﻥ ﺍﻟﻤﻮﺿﻮﻉ ﻳﻮﺻﻞ ﻟﺨﺎﻟﻪ ..
ﺍﺣﺴﻦ ﺷﻲ ﺩﺍﺭﻩ ﻭﻗﺘﻬﺎ ﺍﻥ ﻣﺎﻗﺎﻝ ﻟﺤﺪ ﺍﻧﻪ ﻛﻠﻢ ﻋﻤﺎﺭ ﺑﺶ ﻣﺎﻳﺘﺄﻣﻠﻮﺵ ﻉ ﺍﻟﻔﺎﺿﻲ ..
....🕜🕐🕧🕛
ﻭﻣﺮﺕ ﺍﻟﺴﺎﻋﺎﺕ ....
ﻭﻣﻊ ﺍﻻﺳﻒ ﻣﺎﻓﻴﺶ ﺟﺪﻳﺪﻩ ..
ﻭﺣﺎﻟﺔ ﺍﻟﺤﺎﺝ ﺣﻤﺪ ﻭﻣﺮﺗﻪ ﺍﻣﺒﺎﺭﻛﻪ ... ﻭﻓﺎﻃﻤﻪ ... ﻭﻧﻌﻴﻤﻪ ﻭﺑﻨﺎﺗﻬﺎ ﺍﻟﻨﻔﺴﻴﻪ ﺗﺤﺖ ﺍﻟﺤﻀﻴﺾ ...
ﺍﻟﺴﺎﻋﻪ 7:00 ﻣﺴﺎﺀﺍ ...
ﻃﻖ ﺑﺎﺏ ﺍﻟﺤﻮﺵ ﺍﻟﺨﺎﺭﺟﻲ ...
ﺩﺍﺧﻞ ...
ﻋﺒﻴﺮ : ﺷﻜﻠﻪ ﻧﺎﺟﻲ .. ﺍﻥ ﺷﺎﺀ ﺍﻟﻠﻪ ﺟﺎﻳﺐ ﻣﺎﻳﺴﺮ ...
ﺟﺘﻬﻢ ﻧﻮﺭ ﺗﺠﺮﻱ : ﺑﺎﺍﺍﺍﺑﺎﺍﺍﺍ ﺑﺎﺍﺍﺍﺑﺎ ..
ﻧﺎﺿﺖ ﺩﻻﻝ ﺗﺠﺮﻱ ... ﻭﺍﻟﻜﻞ ﻓﺠﺮﺗﻬﺎ ...
ﻟﻘﻮﻩ ﻭﺍﻗﻒ ﻳﺴﻠﻢ ﻉ ﺍﻟﺮﺟﺎﻟﻪ ..
ﺩﻻﻝ : ﺑﺎﺑﺎ ..
ﻋﺒﺪﺍﻟﺴﻼﻡ : ﺑﻨﺘﻲ .. ﺗﻌﺎﻟﻲ .. ﻣﺸﺘﻠﻪ ﺗﺠﺮﻱ ﻭﺣﻀﻨﺎﺗﻪ ﺑﻘﻮﺓ ﻭﺗﺒﻜﻲ ..
ﻋﺒﺪﺍﻟﺴﻼﻡ : ﺧﻼﺹ ﻳﺎﺑﺎﺑﺎ ﻋﺪﺕ .. ﻋﺪﺕ ...
ﺣﻤﺪ : ﺣﻂ ﻋﻘﻠﻚ ﻓﺮﺍﺳﻚ ﺣﺘﻰ ﺍﻧﺖ ..
ﻧﺎﺟﻲ : ﻏﻴﺮ ﺍﺣﻜﻴﻠﻨﺎ ﺷﻦ ﺻﺎﺭ ﺑﺎﻟﺰﺑﻂ ..
ﻋﺒﺪﺍﻟﺴﻼﻡ : ﺩﻻﻝ ﺑﺎﺑﺎ ﺑﺮﻱ ﺧﺸﻲ ..
ﺩﻻﻝ ﻣﺴﺤﺖ ﺩﻣﻮﻋﻬﺎ ... ﺑﺎﺳﺖ ﺭﺍﺱ ﺑﻮﻫﺎ ﻭﺧﺸﺖ ...
ﺍﺑﺘﺴﻤﻮﺍ ...
ﻭﺧﺶ ﻋﺒﺪﺍﻟﺴﻼﻡ ﻓﻲ ﺍﻟﻤﺮﺑﻮﻋﻪ ﻭﺑﺪﻱ ﻳﺤﻜﻴﻠﻬﻢ ...
🍁🍁🍁🍁🍁
ﺩﻻﻝ : ﺍﺍﺍﺍﻩ ﻳﺎﺭﺑﻲ ﺍﻟﺤﻤﺪ ﻟﻠﻪ ...
ﻣﺒﺮﻭﻛﻪ ﺣﻀﻨﺘﻬﺎ : ﻃﻴﺐ ﻓﻴﻨﺎ ﻳﺎﺩﻟﻮ ..
ﺣﻀﻨﺖ ﺩﻻﻝ ﺟﺪﺍﻫﺎ ...
ﻭﺣﺘﻰ ﻓﺎﻃﻤﻪ ﺣﻀﻨﺖ ﻧﻌﻴﻤﻪ ﺑﻨﺘﻬﺎ ...
ﻭﺍﻟﺒﺎﻗﻲ ﺧﺸﻮﺍ ﻳﺪﻳﺮﻭﺍ ﺍﻟﻌﺸﻲ ...
ﻣﻊ ﺍﻟﻠﻴﻞ ...
ﺟﻮ ﻭﻻﺩ ﻛﻔﺎﻳﻪ ﻭﺭﺍﺟﻠﻬﺎ ... ﻭﺣﻄﻮﻟﻬﻢ ﻋﺸﻲ ﻭﺗﻌﺸﻮﺍ ﻛﻠﻬﻢ ...
ﻭﺍﻟﻠﻲ ﻫﺪﺍ ﺑﺪﻱ ﻳﺮﻭﺡ ...
ﻭﻗﻌﺪﺕ ﺑﺲ ﺍﻣﺒﺎﺭﻛﻪ .. ﻭﻃﺒﻌﺎ ﺍﻫﻞ ﻧﻌﻴﻤﻪ ﺍﻟﻠﻲ ﺟﺎﻳﻴﻦ ﻣﻦ ﺍﻟﺒﻼﺩ ..
ﺍﻟﺴﺎﻋﻪ 1:00 ﻟﻴﻼ ...
ﺩﻻﻝ : ﺗﻘﻮﻝ ﻛﺎﻥ ﻛﺎﺑﻮﺱ ﻭﻓﻘﻨﺎ ﻣﻨﻪ ...
ﻧﻮﺭ : ﺍﻟﺤﻤﺪﻟﻠﻪ ...
ﻓﺠﺄﺓ ﺭﻥ ﺗﻠﻴﻔﻮﻥ ﺩﻻﻝ ..
ﺍﺳﺘﻐﺮﺑﺖ ... ﺷﺎﻓﺎﺗﻪ ﻟﻘﺎﺗﻪ ﺭﻗﻢ ﻏﺮﻳﺐ ..
ﻗﻌﺪﺕ ﺗﺸﻮﻓﻠﻪ .. ﻭﺍﺧﺘﻬﺎ ﺗﺸﺒﺤﻠﻬﺎ ...
ﻧﻮﺭ : ﺧﻴﺮﻙ !. ؟
ﺩﻻﻝ ﺭﻓﻌﺖ ﺣﺎﺟﺒﻬﺎ ﻭﻓﺘﺤﺖ ﺍﻟﺨﻂ ﻭﺣﻄﺖ ﺍﻟﺘﻠﻴﻔﻮﻥ ﻉ ﻭﺫﻧﻬﺎ ..
" ﻋﺎﺭﻑ ﺍﻧﻲ ﻣﺠﻨﻮﻧﻚ .."
ﺩﻻﻝ ﺑﺘﻠﻘﺎﺋﻴﻪ : ﻋﺎﺭﻓﻪ ..
ﻋﻤﺎﺭ : ﻫﻬﻬﻬﻬﻬﻬﻬﻪ .. ﻋﺎﺭﻓﻪ ﺻﺎﺭ؟ !!
ﺩﻻﻝ ﺗﻠﺨﺒﻄﺘﺖ ﻭﻭﺟﻬﻬﺎ ﻭﻻ ﺍﺣﻤﺮ : ﻗﺼﺪﻱ ﻋﺎﺭﻓﻪ ﺍﻧﻚ ﺍﻧﺖ ﻣﺘﺎﻉ ﺣﺮﻛﺎﺕ ﺍﻟﻤﺮﺍﻫﻘﻴﻦ ﻫﺎﺩﻱ ..
ﻋﻤﺎﺭ : ﺑﺎﻫﻲ ... ﺍﻟﺤﻤﺪ ﻟﻠﻪ ﻉ ﺳﻼﻣﺔ ﺑﺎﺗﻚ .
ﺩﻻﻝ : ﻣﺎﻋﻨﺪﻳﺶ ﻭﻗﺖ ﻧﻀﻴﻌﻪ ﻣﻌﺎﻙ .
ﻋﻤﺎﺭ ﺑﻨﺒﺮﺓ ﺣﺎﺩﻩ ﺟﺪﺍ : ﺗﺼﻜﺮﻱ ﺗﻨﺪﻣﻲ ﺍﺷﺪ ﺍﻟﻨﺪﻡ ..
ﺩﻻﻝ ﺧﺎﻓﺖ : ﺗﻬﺪﺩ ﻓﻴﺎ ﻭﻻﻛﻴﻒ؟؟
ﻧﻮﺭ ﺗﺴﻤﻊ ﻭﺧﺎﻳﻔﻪ ..
ﻋﻤﺎﺭ : ﻣﺎﻧﻬﺪﺩ .. ﻟﻜﻦ ﺣﺮﻛﻪ ﻛﻴﻒ ﻫﺪﻱ ﻟﻮ ﻓﻜﺮﺗﻲ ﺍﺩﻳﺮﻳﻬﺎ ﺑﻮﻙ ﻳﺮﺟﻊ ﻭﻳﻦ ﻣﺎﻛﺎﻥ ..
ﺩﻻﻝ ﺍﻧﺼﺪﻣﺖ ... ﻧﺎﺿﺖ ﻗﻌﻤﺰﺕ ..
ﻭﻧﻮﺭ ﺯﺍﺩﺕ ﺧﺎﻓﺖ ...
ﺩﻻﻝ ﺑﺼﺪﻣﻪ : ﻗﺼﺪﻙ ﺍﻧﺖ ﻭﺭﺍ ﺍﻟﻠﻲ ﺻﺎﺭ ﻟﺒﺎﺑﺎ ..
ﺳﻜﺖ ﻭﻣﺎﺭﺩﺵ ..
ﺩﻻﻝ ﺿﺤﻜﺖ ﺑﺼﺪﻣﻪ : ﻣﻔﺮﻭﺽ ﻣﺎﻧﺴﺘﻐﺮﺑﺶ ﻣﻌﺮﻭﻓﻪ ﺍﻟﻤﺪﺭﺳﻪ ﺍﻟﻠﻲ ﻣﺘﺨﺮﺝ ﻣﻨﻬﺎ .. ﺑﺲ ﻧﺰﻳﺪﻙ ﻣﺶ ﺍﻟﺸﻌﺮ ﺑﻴﺖ ﺣﺘﻰ ﺍﻧﻲ ﺯﻱ ﺑﺎﺑﺎ ﻭﺍﺣﺮﻑ .. ﺍﺑﻌﺘﻠﻲ ﻣﻦ ﻳﺮﻓﻌﻨﻲ ﺯﻳﻪ ..
ﻋﻤﺎﺭ ﺑﺈﺑﺘﺴﺎﻣﻪ : ﻧﺠﻴﻚ ﺍﻧﻲ ﺑﺮﻭﺣﻲ ﻧﺮﻓﻌﻚ 💓...
ﺩﻻﻝ : ﺍﻧﺖ ﻭﺍﺣﺪ ﺗﺎﻓﻪ ﻭﻃﺎﻏﻲ ... ﻭﻣﺮﻳﺾ ..
ﻋﻤﺎﺭ : ﻟﻮ ﻛﺎﻥ ﺍﻟﻠﻲ ﻳﻌﺸﻖ ﻳﺴﻤﻮﻩ ﺗﺎﻓﻪ ﻓﺎﻧﻲ ﺳﻴﺪ ﺍﻟﺘﺎﻓﻬﻴﻦ ..
ﻭﻛﺎﻧﻪ ﻣﺮﺽ ﻓﻨﺴﺄﻝ ﺍﻟﻠﻪ ﻣﺎﻳﺸﻔﻴﻨﻲ ...
ﻭﻛﺎﻧﻚ ﻉ ﺍﻟﻄﻐﻴﺎﻥ ... ﺍﻧﺘﻲ ﺍﻟﺴﺒﺐ ﻓﻄﻐﻴﺎﻧﻲ .....
ﺩﻻﻝ ﺑﻨﺮﻓﺰﺓ : ﺗﻌﺮﻑ ﺣﺘﻰ ﺻﻮﺗﻚ ﻳﻨﺮﻓﺰ ...
ﻋﻤﺎﺭ : ﺗﺴﻜﺮﻱ ﺗﺤﻤﻠﻲ ﻣﺎﻳﺠﻴﻚ ﻭﻣﺎﻳﺠﻲ ﻟﺒﺎﺗﻚ ﻣﻦ ﻭﺭﺍ ﻋﻨﺎﺩﻙ ﻫﺪﻯ ..
ﺩﻻﻝ ﺩﻣﻮﻋﻬﺎ ﻋﺒﻮﺍ ﻋﻴﻮﻧﻬﺎ ﻭﻗﺎﻟﺖ : ﺍﻧﺖ ﺷﻦ ﺗﺒﻲ ﻣﻨﻲ ...
ﻋﻤﺎﺭ ﺗﻨﻬﺪ ﻭﻗﺎﻝ : ﻧﺒﻴﻚ ﺍﻧﺘﻲ ... ﺍﻧﺘﻲ ﺍﻟﻠﻲ ﻣﻦ ﺳﺎﻋﺔ ﺭﻳﺘﻚ ﻭﺍﻧﻲ ﻓﺤﺎﻝ ﻣﺎﻋﺎﻟﻢ ﺑﻴﻪ ﻛﺎﻥ ﺭﺑﻲ ..
ﺩﻻﻝ ﺑﺪﺕ ﺗﺒﻜﻲ : ﺣﺮﺍﻡ ﻋﻠﻴﻚ .. ﺍﻧﻲ ﻣﺎﻧﺒﻴﺶ ﻣﺎﻧﺒﻴﺶ ﺍﻓﻬﻢ ...
ﻋﻤﺎﺭ ﻗﻠﺒﻪ ﻭﺟﻌﻪ ﻋﻠﻴﻬﺎ ﻭﻗﺎﻝ : ﻭﺍﻧﻲ ﻭﺍﻟﻠﻪ ﻻﻋﻨﺪﻱ ﻗﻮﺓ ﻧﺘﺤﻤﻞ ﻭﻻﻧﺼﺒﺮ ﻉ ﺍﻟﻌﺬﺍﺏ ﺍﻟﻠﻲ ﻋﺎﻳﺸﻪ ﻣﻦ ﻭﺭﺍﻙ ..... ﺍﺳﻤﻌﻴﻨﻲ ﻳﺎﺑﻨﺖ ﺍﻟﻨﺎﺱ .. ﻭﺍﻟﻠﻪ ﻣﺎﻋﻨﺪﻙ ﻏﻴﺮ ﺍﻧﻚ ﺗﻮﺍﻓﻘﻲ ﻭﺗﺮﺿﻲ ﺑﻨﺼﻴﺒﻚ .. ﻭﺗﻢ ﺍﻟﻜﻼﻡ ... ﻭﺻﻜﺮ ﻋﻠﻴﻬﺎ ..
ﻭﻗﻌﺪ ﻳﺎﺧﺪ ﻓﻲ ﻓﺄﻧﻔﺎﺳﻪ ﺑﺼﻌﻮﺑﻪ ﻣﻦ ﻛﺜﺮ ﻣﺎﺍﺛﺮ ﻓﻴﻪ ﺻﻮﺕ ﺑﻜﺎﻫﺎ ... ﻭﺗﺨﻴﻞ ﺩﻣﻮﻋﻬﺎ ﻣﻦ ﻋﻴﻮﻧﻬﺎ ﻉ ﺧﺪﻭﺩﻫﺎ ﻧﺎﺯﻻﺕ ... ﻏﻤﺾ ﻋﻴﻮﻧﻪ ﻭﺍﺗﻜﺎ ﻉ ﺍﻟﻜﺮﺳﻲ .... ﻭﻗﻠﺒﻪ ﻭﺍﺟﻌﻪ ...
💕 ﻣﺮﻏﻢ ﻷﻧﻪ ﻣﻐﺮﻡ .....💖
🍁 ﺍﻣﺎ ﺩﻻﻝ ﻛﻤﻠﺖ ﻟﻴﻠﻬﺎ ﻛﻠﻪ ﺑﻜﻲ .. ﻭﺍﺧﺘﻬﺎ ﻧﻮﺭ ﻣﻀﺎﻳﻘﻪ ﻉ ﺧﺎﻃﺮﻫﺎ ﻭﻻﻗﺪﺭﺕ ﺗﻮﺍﺳﻴﻬﺎ ﻭﻻ ﺗﻘﻮﻟﻠﻬﺎ ﻛﻠﻤﻪ ﺍﻃﻴﺐ ﺧﺎﻃﺮﻫﺎ ...
🍁🍁🍁🍁🍁
ﻣﻦ ﻫﺪﺍﻛﺎ ﺍﻟﻴﻮﻡ ....
ﻓﺎﺕ ﺍﺳﺒﻮﻉ ﻛﺎﻣﻞ ....
ﻭﻓﻲ ﻳﻮﻡ ...
ﺭﻭﺡ ﻋﺒﺪﺍﻟﺴﻼﻡ ﻣﻦ ﺍﻟﻌﻤﻞ ﻭﻛﺎﻥ ﺑﺎﻳﻦ ﻋﻠﻴﻪ ﺍﻥ ﻓﻴﻪ ﺷﻲ .. ﻣﺎﺗﻜﻠﻤﺶ ﺑﻜﻞ ..
ﺑﺪﻝ ... ﻭﺗﻮﺿﺎ ﻭﺻﻠﻰ .... ﻭﻗﻌﻤﺰ ﻓﺪﺍﺭ ﺍﻟﻨﻮﻡ ..
ﺧﺸﺖ ﻋﻠﻴﻪ ﻧﻌﻴﻤﻪ : ﻋﺒﺎﻟﺴﻼﻡ ﺧﻴﺮﻙ .. ﻧﺤﺲ ﻓﻴﻚ ﻣﺶ ﻣﺰﺑﻮﻁ .
ﻋﺒﺪﺍﻟﺴﻼﻡ ﺷﺒﺤﻠﻬﺎ : ﻋﻤﺎﺭ ﻭﻟﺪ ﺧﺎﻟﻚ ﺗﻜﻠﻢ ﻓﻲ ﺑﻨﺘﻚ ﺩﻻﻝ ﻗﺒﻞ ..
ﻧﻌﻴﻤﻪ ﺑﺮﻓﻌﺔ ﺣﻮﺍﺟﺐ؛ﺍﻳﻪ .. ﻭﺭﺩﻳﻨﺎﻩ ...
ﻋﺒﺪﺍﻟﺴﻼﻡ ﺗﻨﻬﺪ : ﻋﻨﺪﻙ ﻋﻠﻢ ﺍﻥ ﻫﻮ ﺍﻟﻠﻲ ﻃﻠﻌﻨﻲ ﻣﻦ ﺍﻟﻠﻲ ﻛﻨﺖ ﻓﻴﻪ ...
ﻧﻌﻴﻤﻪ : ﺍﻟﻠﻪ ..!
ﻋﺒﺪﺍﻟﺴﻼﻡ : ﺟﺎﻧﻲ ﺍﻟﻴﻮﻡ ﻓﻲ ﻣﻘﺮ ﺍﻟﻌﻤﻞ .. ﻭﻫﺪﺭﺯ ﻣﻌﺎﻱ ﻓﻲ ﺍﻟﻤﻮﺿﻮﻉ .. ﻭﻃﻠﺐ ﻣﻨﻲ ﺍﻟﺒﻨﺖ .. ﺷﺒﺤﻠﻬﺎ ... ﺍﻧﺘﻲ ﺷﻦ ﺭﺍﻳﻚ ..
ﻧﻌﻴﻤﻪ : ﻋﺒﺎﻟﺴﻼﻡ ﺍﻟﻤﻮﺿﻮﻉ ﻣﺎﻓﻴﺸﻲ ﺭﺍﻱ ﺍﻛﺒﺮ ﻣﻨﻬﺎ ﺏ 13 ﺳﻨﻪ ﻭﻓﻮﻕ ﻫﻜﻲ ﻣﺘﺰﻭﺝ ﻗﺒﻠﻬﺎ ..
ﻋﺒﺪﺍﻟﺴﻼﻡ : ﺷﺮﺣﻠﻲ ﻗﺼﺔ ﺯﻭﺍﺟﻪ .. ﻭﺑﺎﻟﻨﺴﺒﻪ ﻟﻔﺮﻕ ﺍﻟﻌﻤﺮ ﻣﺎﻧﻴﺶ ﺷﺎﻳﻔﻪ ﻣﺸﻜﻠﻪ ﻛﺒﻴﺮﺓ ..
ﻧﻌﻴﻤﻪ ﺑﺼﺪﻣﻪ : ﺍﻧﺖ ﺍﻟﻠﻲ ﺗﻘﻮﻝ ﻫﻜﻲ !!! ﺩﻻﻝ ﻫﺎﺩﻱ ﻳﺎﻋﺒﺎﻟﺴﻼﻡ ..
ﻋﺒﺪﺍﻟﺴﻼﻡ : ﻭﻷﻧﻬﺎ ﺩﻻﻝ ﻋﺎﺭﻑ ﺍﻥ ﻣﺎﻓﻴﺶ ﺭﺍﺟﻞ ﻳﺴﺘﺎﻫﻠﻬﺎ ﺯﻱ ﻋﻤﺎﺭ .. ﺍﻟﺸﺎﺏ ﻫﺪﺍ ﻣﻦ ﺯﻣﺎﻥ ﻋﺎﺟﺒﻨﻲ ﻫﻠﺒﻪ .. ﺑﻐﺾ ﺍﻟﻨﻈﺮ ﻋﻦ ﺍﻱ ﺷﻲ ﺗﺎﻧﻲ ..
ﻧﻌﻴﻤﻪ : ﻣﺶ ﻣﺼﺪﻗﻪ !!!
ﻋﺒﺪﺍﻟﺴﻼﻡ ﺗﻨﻬﺪ ﻭﻗﺎﻝ : ﺗﻮ ﻧﺎﺧﺪ ﺭﺍﻳﻬﺎ ﻭﺍﻟﻠﻲ ﺗﺒﻴﻪ ﺑﻨﺘﻲ ﻫﻮ ﺍﻟﻠﻲ ﺣﻴﺼﻴﺮ ....
🍃 ﺑﻨﺘﻪ ﺍﻟﻠﻲ ﻛﺎﻧﺖ ﺭﺍﻗﺪﺓ ﻭﺗﺒﻜﻲ ... ﺣﺎﺳﻪ ﺑﺎﻟﻌﺠﺰ ... ﺑﺄﻧﻬﺎ ﺣﺘﻜﻮﻥ ﺃﺳﻴﺮﺓ ﻟﺸﺨﺺ ﻫﻲ ﻣﺎﺗﺒﻴﺸﻲ ..
ﻫﻲ ﺍﺻﻼ ﻣﺶ ﻣﻔﻜﺮﺓ ﻓﻲ ﺣﻜﺎﻳﺔ ﺍﻟﺰﻭﺍﺝ ... ﻣﺎﺯﺍﻝ ﺍﻟﻮﻗﺖ ﻣﺎﺯﺍﻝ ...
ﻣﺎﺯﺍﻝ ﺗﺒﻲ ﺗﻌﻴﺶ ﺳﻨﻬﺎ .. ﺗﻜﻤﻞ ﻗﺮﺍﻳﺘﻬﺎ ﺗﺤﻘﻖ ﺍﺣﻼﻣﻬﺎ ..
ﺣﺴﺖ ﻭﻛﺄﻧﻪ ﻋﻤﺮﻫﺎ ﺣﻴﺘﺎﺧﺪ ﻣﻨﻬﺎ ﻭﻫﻲ ﻣﺶ ﻗﺎﺩﺭﺓ ﺍﺩﻳﺮ ﺷﻲ ..
ﻭﻋﺎﺭﻓﻪ ﻭﻣﺘﺄﻛﺪﻩ .. ﺍﻥ ﻋﻤﺎﺭ ﻣﺶ ﺣﻴﺘﻮﺍﻧﻰ ﻋﻦ ﺍﻱ ﺷﻲ ﻳﺪﻳﺮﻩ ...
ﻟﻮ ﻫﻲ ﻗﻌﺪﺕ ﻣﺴﻜﺮﻩ ﺭﺍﺳﻬﺎ ...
ﻟﻸﺳﻒ ﻣﺎﻓﻴﺶ ﻏﻴﺮ ﺍﻧﻬﺎ ﺗﺴﺘﺴﻠﻢ ﻟﻸﺳﺮ ...🍃💝
🍃🍃🍃🍃
ﻭﻛﻠﻤﻬﺎ ﺑﻮﻫﺎ ﻓﻲ ﺍﻟﻤﻮﺿﻮﻉ ... ﻭﺷﺮﺣﻠﻬﺎ ﻛﻞ ﺷﻲ ﻭﺧﻴﺮﻫﺎ ...
ﻭﻫﻲ ﺍﺧﺘﺎﺭﺕ ﺍﻟﺨﻴﺎﺭ ﺍﻟﻤﺮ .. ﺩﺭﺃ ﻟﻸﻣﺮ 🍃....
ﻭﺍﺗﺼﻞ ﺑﻮﻫﺎ ﺑﻌﻤﺎﺭ ﻭﻭﺻﻠﻪ ﺍﻟﻤﻮﺍﻓﻘﻪ ...
💕💕💕💕💕💕💕💕
ﻣﺶ ﻓﺮﺣﺎﻥ ﻫﻮ ....
ﻓﻮﻕ ﺍﻟﻔﺮﺡ ﻓﺮﺣﺎﻥ .... ﻳﻮﻣﺘﻬﺎ ﺧﺪﻱ ﺍﺟﺎﺯﺓ ... ﺣﻀﻦ ﺍﻟﻠﻲ ﻳﺨﺪﻣﻮﺍ ﻣﻌﺎﻩ ﻛﻠﻬﻢ ﻗﺒﻞ ﻳﻄﻠﻊ ﻭﻫﻤﺎ ﻳﻀﺤﻜﻮﺍ ﻭﻣﺼﺪﻭﻣﻴﻦ ﻓﻴﻪ ...
💕 ﻭﺑﻄﺮﻳﻘﻪ ﻟﺴﺮﺕ ....
ﻛﻞ ﻣﺎﻳﺤﺲ ﺭﻭﺣﻪ ﻳﻘﺮﺏ ﺧﻼﺹ ﻷﻣﻨﻴﺘﻪ ﺻﺒﺮ ﻣﻌﺎﺵ ﻳﻄﻴﻘﻪ ..
🍁🍁🍁🍁🍁
ﻛﻴﻒ ﺻﺎﺭ ﻭﻭﺍﻗﻔﺖ !!! ؟
ﻏﺎﻟﻴﻪ : ﺍﻧﻈﺮ ﺷﻦ ﺻﺎﺭ ﺍﻟﻤﺪﺓ ﺍﻟﻠﻲ ﻓﺎﺗﺖ ..
ﺣﻤﻴﺪﺓ ﺿﺤﻜﺖ ﻭﻗﺎﻟﺖ : ﺗﺒﻲ ﺍﻟﺤﻖ ﺭﺍﻫﻲ ﺣﺘﻰ ﻫﻲ ﻓﻴﻬﺎ ﺣﺎﺟﻪ ﻟﻴﻪ ﻏﻴﺮ ﺗﻜﺎﺑﺮ ..
ﻏﺎﻟﻴﻪ : ﻫﻬﻬﻬﻬﻪ .. ﺯﻋﻢ ..
ﺣﻤﻴﺪﻩ ﺍﺑﺘﺴﻤﺖ : ﺗﻮ ﻳﺒﺎﻥ ﺑﻌﺪﻳﻦ .. ﻫﻴﺎ ﻫﻲ ﺍﻋﺠﻨﻲ ﺍﻟﺒﻴﺘﺰﺍ ﺧﻞ ﻧﻌﺪﻱ ﻧﺤﻤﻲ ... ﻭﻃﻠﻌﺖ ﻣﻦ ﺍﻟﻜﻮﺟﻴﻨﻪ ..
ﺍﻣﺎ ﻏﺎﻟﻴﻪ ﺗﻨﻬﺪﺕ ﻭﻗﺎﻟﺖ : ﺣﺘﻰ ﺩﻻﻝ ﻛﺒﺮﺕ ﻭﺑﺘﺘﺰﻭﺝ ... ﺍﺑﺘﺴﻤﺖ ﺑﺄﻟﻢ ... ﻛﻠﻪ ﻧﺼﻴﺐ .. ﻛﻠﻪ ﻉ ﺍﻟﻠﻪ ...
🍁🍁🍁🍁
ﺳﺮﺕ ...💓
ﺑﻨﺖ ﻧﻌﻴﻤﻪ ﺍﻟﻠﻲ ﻛﻴﻒ ﺍﻟﺮﻳﻤﻪ ..
ﺿﺤﻚ ﻋﻤﺎﺭ ﺑﺈﺣﺮﺍﺝ .. ﻭﻧﺰﻝ ﻋﻴﻮﻧﻪ ..
ﻭﺗﻄﻠﻘﻬﺎ ﻛﺎﻣﻠﻪ ﺯﻏﺮﻭﻃﻪ ﻳﻮﺻﻞ ﺻﻮﺗﻬﺎ ﻟﺤﻮﺵ ﻫﻨﺪﺍ ...
ﺍﻟﻠﻲ ﻛﺎﻧﺖ ﺗﺒﻜﻲ ﺑﺎﻟﻌﺒﺮﺓ ... ﻷﻥ ﺍﻟﺨﺒﺮ ﻭﺻﻠﻬﺎ ﻫﻲ ﺍﻷﻭﻟﻰ ...
ﺣﺐ ﻋﻤﺎﺭ ﻳﺒﻠﻐﻬﺎ ﻗﺒﻞ ﺍﻟﻜﻞ ﺯﻱ ﻣﺎﺍﺗﻔﻘﻮﺍ ﻗﺒﻞ ....
ﻛﺎﺑﺮﺕ ﻗﺪﺍﻣﻪ ﻓﺮﺩﺓ ﻓﻌﻠﻬﺎ ﻭﻣﺠﺮﺩ ﻃﻠﻊ ﻣﻦ ﺣﺪﺍﻫﺎ ﺍﻧﻬﺎﺭﺕ ...
🍁🍁🍁🍁🍁
ﻓﺎﺕ ﺍﺳﺒﻮﻉ ﻛﺬﻟﻚ ....
ﻭﺟﻲ ﺍﻟﻴﻮﻡ ﺍﻟﻠﻲ ﺟﻮﺍ ﻓﻴﻪ ﺍﻫﻞ ﻋﻤﺎﺭ ﺑﺶ ﻳﺘﻜﻠﻤﻮﺍ ﻓﻴﻬﺎ ...
ﻛﺎﻧﻮﺍ ﻣﻮﺟﻮﺩﺍﺕ ﺧﺎﻻﺗﻬﺎ .. ﻭﻣﻦ ﻋﻤﺎﺗﻬﺎ ﺧﻮﻟﻪ ﺑﺲ .. ﺍﻟﻠﻲ ﻛﺎﻧﺖ ﻗﺮﻳﺐ ﺗﺘﻔﺠﺮ ...
ﻓﻲ ﺩﺍﺭ ﺍﻟﺒﻨﺎﺕ ...
ﺭﺍﻧﻴﺎ : ﺩﻟﻮﻟﻪ ﻣﺮﺍﺕ ﺧﻴﺮﺗﻚ ﻓﻴﻪ ..
ﺭﺑﺎﺏ : ﻭﺍﻟﻠﻪ ﺣﻖ ﻭﻫﻮ ﻣﺎﺷﺎﺀ ﺍﻟﻠﻪ ﻋﻠﻴﻪ ﻳﺎﺩﻻﻝ ﺭﺍﻫﻮ ﻭﺍﻟﻠﻪ ﺣﺘﺮﺗﺎﺣﻲ ﻣﻌﺎﻩ ...
ﺩﻻﻝ ﺑﻮﺟﻪ ﻋﺎﺑﺲ : ﻣﺎﻓﻴﺶ ﺩﺍﻋﻲ ﻟﻜﻼﻣﻜﻢ ﻫﺪﺍ ﻭﺍﻟﻠﻪ ﻣﻬﻤﺎ ﺗﻘﻮﻟﻮﺍ ﻣﺎﺣﺘﻮﺍﺳﻮﻧﻲ ﻭﻟﻮ ﺷﻮﻳﻪ ...
ﺳﻜﺘﻮﺍ ﻭﺷﺒﺤﻮﺍ ﻟﺒﻌﺾ ...
ﺧﺸﺖ ﻛﻔﺎﻳﻪ : ﺍﻟﻠﻬﻢ ﺻﻞ ﻉ ﺍﻟﻨﺒﻲ ... ﺍﻟﻠﻪ ﻳﺒﺎﺭﻙ ﻋﻠﻴﻚ ..
ﺍﺑﺘﺴﻤﺖ ﺩﻻﻝ ﻣﺠﺎﻣﻠﺔ ....
ﻛﻔﺎﻳﻪ : ﻫﻲ ﻏﺰﻳﻠﻪ ﺍﻃﻠﻌﻲ ....
ﺩﻻﻝ : ﺑﺎﻫﻲ ...
ﻭﺍﻟﺒﻨﺎﺕ ﻳﺸﻮﻓﻮﻟﻬﺎ ﺑﻀﻴﻖ ...
ﻭﺻﻠﺖ ﻓﻲ ﺍﻟﺼﺎﻟﻪ ﻭﺧﺸﺖ ﻋﻠﻴﻬﻢ ...
ﺧﻮﺍﺗﻪ ﺍﻧﺒﻬﺮﻭﺍ ﺑﻴﻬﺎ .... ﻛﺎﻧﺖ ﻻﺑﺴﻪ ﻗﻔﻄﺎﻥ ﻣﻮﻑ ﻏﺎﻣﻖ ﺑﺄﻛﻤﺎﻡ .. ﻭﻃﻮﻟﻪ ﻟﺘﺤﺖ ﺍﻟﺮﻛﺒﻪ ﺑﺸﻮﻳﻪ .. ﻭﻃﺎﻟﻘﻪ ﺷﻌﺮﻫﺎ .. ﻭﺣﺎﻃﻪ ﻟﻤﺴﺎﺕ ﺑﺴﻴﻄﻪ ..
ﻛﺎﻣﻠﻪ : ﺗﻌﺎﻟﻲ ﻳﺎﺳﻤﺤﻪ ... ﻗﻌﻤﺰﻱ ﺣﺪﺍﻱ ...
ﻣﺸﺖ ﻗﻌﻤﺰﺕ ﺣﺪﺍ ﻛﺎﻣﻠﻪ ﺍﻟﻠﻲ ﻛﺎﻧﺖ ﻃﺎﻳﺮﺓ ﺑﻴﻬﺎ ..
ﻭﺧﻮﺍﺗﻪ ﻳﺸﺒﺤﻮﻟﻬﺎ ﻭﻓﺮﺣﺎﻧﺎﺕ ﻉ ﺍﻵﺧﺮ ... ﺻﻐﻴﺮﺓ ﻭﺟﻤﻴﻠﻪ ... ﻭﺑﻨﺖ ﻋﻴﻠﻪ ....
ﻧﻌﻴﻤﻪ ﻛﺎﻧﺖ ﺗﺠﺎﻣﻞ ﻭﺧﻼﺹ ... ﻭﻛﻔﺎﻳﻪ ﻛﺎﻧﺖ ﺍﻛﺘﺮ ﻣﻦ ﻳﻬﺪﺭﺯ ..
ﻭﺯﻳﻨﺐ ﻣﺴﻜﻴﻨﻪ ﺣﺎﺳﻪ ﺑﻐﺼﺔ ...
🍃 ﻏﺼﺔ ﻭﻟﺪﻫﺎ ﺍﻟﻠﻲ ﻣﻦ ﻟﻤﺎ ﺳﻤﻊ ﻣﺴﻜﻴﻦ ﻗﺮﻳﺐ ﻣﺎﺕ ..
ﻗﺎﻝ ﻷﻣﻪ ﺟﻤﻠﻪ ﻣﺶ ﻗﺎﺩﺭﺓ ﺗﻨﺴﺎﻫﺎ ...
" ﻣﺎﺧﺒﺮﺗﻴﻨﻲ ﺧﻴﺮ ﻳﻤﺎ ...."
🍃 ﺍﻟﺤﺐ ﻣﻦ ﻃﺮﻑ ﻭﺍﺣﺪ ... ﺍﺳﻮﺃ ﺍﻧﻮﺍﻉ ﺍﻟﻤﺸﺎﻋﺮ ....
💕💕💕💕💕💕💕💕💕
ﺍﻟﺴﺎﻋﻪ 10 ﻟﻴﻼ ...
ﻣﻘﻌﻤﺰﺓ ﺳﺮﺣﺎﻧﻪ ﻭﻛﺎﻧﺖ ﻗﻤﻪ ﻓﻲ ﺍﻟﺘﻌﺎﺳﻪ ...
ﺭﻥ ﺗﻠﻴﻔﻮﻧﻬﺎ .. ﺷﺎﻓﺘﻠﻪ ﺑﻜﺮﻩ ... ﻭﻃﻮﻝ ﺭﺩﺕ ..
ﺩﻻﻝ : ﻗﺴﻤﺎ ﺑﺎﻟﻠﻪ ﻣﺎﻧﻚ ﻣﺘﻬﻨﻲ ﻣﻌﺎﻱ ﻭﻻﺣﺘﺸﻮﻑ ﻳﻮﻡ ﺣﻠﻮ ﻓﺤﻴﺎﺗﻚ ﻭﺍﻧﻲ ﻗﻠﺘﻬﺎﻟﻚ ..
ﻭﺟﺎﻫﺎ ﺍﻟﺮﺩ ....
ﻟﻮ ﻛﺎﻧﻚ ﻣﻦ ﻧﺪﻱ ... ﻣﺎﻧﺮﺩ ﻣﻦ ﺭﺩﺕ ﺍﻟﺒﺎﺏ ﻧﻌﺪﻱ
ﺍﻧﺨﺒﻂ ﺑﺮﺟﻠﻲ ﻛﻴﻒ ﺗﺒﻄﻞ ﻳﺪﻱ .. ﻟﻴﻦ ﻳﺸﻐﻠﻚ ﻣﻄﺮﺍﻱ ﻭﺗﺤﻠﻴﻠﻲ
ﻛﻴﻒ ﺗﻔﺘﺤﻲ ﻋﻨﺪﻱ ﺍﺳﻠﻮﺏ ﺗﺠﺪﻱ .. ﺿﺮﻭﺭﻱ ﺍﻧﻜﺎﻧﻚ ﻣﺴﻠﻤﻪ ﺗﺮﺗﻴﻠﻲ ..
ﻭﻧﺴﻴﻞ ﺍﻥ ﺳﺎﻟﺘﻴﻨﻲ ﻓﻴﻪ ﻧﺒﺪﻱ .. ﺳﺮﻳﺐ ﺳﺮﺩ ﺳﻬﺮﺍﻳﻪ ﺳﺒﺐ ﺗﺴﻮﻳﻠﻲ
ﻧﻴﻦ ﺍﻟﻐﻼ ﻳﺪ ﺍﻟﻴﻤﻴﻦ ﺍﺗﻤﺪﻱ ... ﻭﺍﺑﻬﺎ ﺗﻌﺰﻗﻲ ﺣﺴﻨﺎﺕ ﻓﻲ ﻣﻨﺪﻳﻠﻲ ..
💓 ﻫﻲ ﻣﺎﺗﻌﺮﻓﺶ ﺷﻦ ﻳﺼﻴﺮﻟﻬﺎ ﻏﻴﺮ ﺗﺴﻤﻌﻪ ﺑﺲ ﻳﻘﻮﻝ ﻓﻲ ﺍﻟﺸﻌﺮ ... ﺗﻨﺴﺤﺮ ... ﻭﻣﺎﺗﻘﺪﺭﺵ ﺍﺩﻳﺮ ﺍﻱ ﺭﺩﺓ ﻓﻌﻞ ..
ﻋﻤﺎﺭ : ﺑﻌﺪ ﺍﻟﻌﻴﺪ ﺍﻟﻜﺒﻴﺮ ﺍﻟﻌﺮﺱ
ﺩﻻﻝ ﻗﻌﺪﺕ ﺳﺎﻛﺘﻪ ..
ﻋﻤﺎﺭ : ﻭﻣﻦ ﻫﺎﻟﻠﺤﻈﻪ ﻧﺒﺪﺍ ﻧﺤﺴﺐ ﺑﺎﻟﺴﺎﻋﻪ ﻟﻌﻨﺪ ﻳﺠﻲ ﻧﻬﺎﺭ ﻭﺗﻮﺻﻠﻲ ﻓﻴﺎ .....
ﺩﻻﻝ : ﺣﺴﺒﻲ ﺍﻟﻠﻪ ﻭﻧﻌﻢ ﺍﻟﻮﻛﻴﻞ ﻓﻴﻚ ... ﻭﺻﻜﺮﺕ
ﻋﻠﻴﻪ ...
ﻫﻮ ﻏﻤﺾ ﻋﻴﻮﻧﻪ ﻭﺍﺑﺘﺴﻢ ﻭﻗﺎﻝ : ﻣﻌﻠﻴﺸﻲ ﻣﻌﻠﻴﺶ 💖...
🍃🍃🍃🍃🍃🍃
ﻭﺗﻤﺮ ﺍﻷﻳﺎﻡ ....
ﻭﻛﺎﻧﺖ ﻓﻴﻬﻢ ﺩﻻﻝ ﺣﺎﺳﻪ ﺭﻭﺣﻬﺎ ﺗﻤﻮﺕ ﻳﻮﻡ ﻋﻦ ﻳﻮﻡ ...
ﻛﻞ ﺷﻲ ﺻﺎﺭ ﺑﺴﺮﻋﻪ ﻭﻟﻶﻥ ﻣﺎﺯﺍﻟﺖ ﻣﺎﺍﺳﺘﻮﻋﺒﺖ ... ﻭﺑﺎﻹﺟﺒﺎﺭ ....
ﻓﺮﺣﺔ ﻋﻤﺮ ... ﻛﺎﻧﺖ ﺑﺎﻟﻨﺴﺒﺔ ﻟﻴﻬﺎ ﻗﻬﺮﺓ ﻋﻤﺮ 🍃...
🍃 ﻭﺣﺴﺮﺓ ﻋﻤﺮ ... ﺑﺎﻟﻨﺴﺒﻪ ﻟﺤﻤﺰﺓ ﺍﻟﻠﻲ ﻛﺎﻥ ﻛﺎﺭﻩ ﻛﻞ ﺷﻲ ﻭﻣﺎﻳﺘﻌﺎﻣﻞ ﻣﻊ ﺍﻱ ﺣﺪ .. ﻣﻨﻌﺰﻝ ﺍﻏﻠﺐ ﺍﻟﻮﻗﺖ ...
ﻭﺍﻣﻪ ﻣﻨﻘﻬﺮﻩ ﻋﻠﻴﻪ ... ﻭﺧﻮﺍﺗﻪ ﺍﻧﺼﺪﻣﻮﺍ ﺑﻌﺪ ﻋﺮﻓﻮﺍ ﺣﻘﻴﻘﺔ ﻣﺸﺎﻋﺮ ﺧﻮﻫﻢ ﻭﺍﻧﻮﺟﻌﻮﺍ ﻋﻠﻴﻪ ...
🔥 ﺑﺲ ﺣﺮﻗﺔ ﻗﻠﺐ ﻫﻨﺪﺍ ... ﻣﺨﻠﻴﺘﻬﺎ ﻣﻦ ﺗﻮﺍ ... ﺗﻌﻠﻦ ﺍﻟﺤﺮﺏ ﻉ ﺿﺮﺗﻬﺎ ... ﻭﺗﻔﻜﺮ ﻓﻲ ﻫﻠﺒﻪ ﺣﺎﺟﺎﺕ ﺣﺪﻳﺮﻫﻢ ... ﻏﻴﺮ ﻳﻔﻮﺕ ﻋﺮﺱ ﺭﺍﺟﻠﻬﺎ ...
ﺍﻟﻮﺣﻴﺪ ....
ﺍﻟﻠﻲ ﻛﺎﻥ ﻓﻘﻤﺔ ﺍﻟﺴﻌﺎﺩﻩ ... ﻋﻤﺎﺭ ...
ﺍﻟﻠﻲ ﻛﺎﻥ ﻣﺠﻬﺰ ﻓﻴﻼ ... ﻗﺮﻳﺒﻪ ﻉ ﺣﻮﺵ ﺍﻫﻠﻪ ﻓﻲ ﺣﻲ ﺍﻟﺪﻭﻻﺭ .. ﻭﻛﺎﻧﺖ ﺍﺷﺒﻪ ﺑﺎﻟﻘﺼﺮ ﺍﻟﻤﺼﻐﺮ ..
ﻣﺎﺧﻼ ﻣﺎﺩﺍﺭ ﻓﻴﻬﺎ ... ﻛﻠﻪ ﻣﻦ ﺍﻟﻐﺎﻟﻲ ﻭﺍﻟﻌﺎﻟﻲ ...
ﻟﻌﻴﻮﻥ ﺍﻟﺪﻟﻮﻟﻪ ...💖
ﻋﺎﺭﻑ ﺍﻥ ﺍﻟﻮﺿﻊ ﺣﻴﻜﻮﻥ ﺻﻌﺐ ﻓﻲ ﺍﻟﺒﺪﺍﻳﺔ ..
ﺑﺲ ﻣﺎﺩﺍﻡ ﻭﺻﻞ ﻟﻬﻨﻲ ... ﺍﻟﺒﺎﻗﻲ ﺍﻛﻴﺪ ﻣﻘﺪﻭﺭ ﻋﻠﻴﻪ ....💓
🍃🍃🍃🍃
ﻭﺟﻲ ﺍﺳﺒﻮﻉ ﺍﻟﻌﻴﺪ ﻭﻋﺪﺍ ....
ﻭﺟﻲ ﺑﻌﺪﻩ ﺍﺳﺒﻮﻉ ﺍﻟﻌﺮﺱ ....
ﺍﻟﻌﺮﺱ ﺍﻟﻠﻲ ﺩﺍﺭﻩ ﺑﻮﻫﺎ ﻛﺎﻣﻞ ..
ﻓﻲ ﺩﺍﺧﻞ ﻋﺒﺪﺍﻟﺴﻼﻡ ﻛﺎﻧﺖ ﻓﻲ ﺿﻴﻘﺔ ﻣﻦ ﺍﻟﻤﻮﺿﻮﻉ ﺑﺲ ﺧﺎﻑ .. ﻷﻥ ﻋﻤﺎﺭ ﻓﻲ ﻃﻴﺎﺕ ﻛﻼﻣﻪ ﻟﻴﻪ ﺣﺲ ﺑﺸﻲ ﻣﻦ ﺍﻟﺘﻬﺪﻳﺪ ...
ﻭﺍﻟﺒﻨﻲ ﺁﺩﻡ ﻣﻬﻤﺎ ﻛﺎﻥ ﺟﺮﺉ ... ﺍﻟﺨﻮﻑ ﻓﻲ ﺑﻌﺾ ﺍﻟﻤﻮﺍﻗﻒ ﻳﻐﻠﺒﻪ ...
ﻭﻗﻌﺪ ﻳﺪﻋﻲ ﻓﻨﻔﺴﻪ ﻟﺮﺑﻲ ﺍﻧﻪ ﻳﺤﻤﻲ ﺑﻨﺘﻪ .. ﻭﻣﺎﻳﻜﻮﻧﺶ ﺟﻨﻲ ﻋﻠﻴﻬﺎ ...
ﻳﻮﻡ ﺍﻟﻜﺴﻮﺓ ﺍﻟﺼﺒﺢ ...
ﻃﻠﻌﺖ ﺑﺎﻟﺒﺪﻟﻪ ﺍﻟﺒﻮﺩﺭﻳﻪ ﻟﺨﺎﻟﻬﺎ ..
ﻫﺎﻧﻴﺒﺎﻝ ﺧﺪﺍﻫﺎ ﻓﺤﻀﻨﻪ : ﺩﻟﻮﻟﻪ ﻣﺠﺒﻮﺭﺓ ﺍﻧﺘﻲ؟ !
ﺩﻻﻝ ﺑﻌﺪﺕ ﻭﺷﺒﺤﺘﻠﻪ ﻭﺍﺑﺘﺴﻤﺖ ﺑﻌﻴﻮﻥ ﻣﺪﻣﻌﻪ : ﻻﻻ ... ﺳﺎﺩ ﻣﻮﻗﻔﻪ ﻣﻊ ﺑﺎﺑﺎ ...
ﻫﺎﻧﻴﺒﺎﻝ : ﻛﻴﻒ ﻳﻌﻨﻲ ﺧﺪﻳﺘﻴﻪ ﻷﻧﻪ ﺳﺎﻋﺪ ﺑﻮﻙ؟ !
ﺩﻻﻝ : ﺍﺣﻤﻢ .. ﻻ .. ﺍﻧﻲ ﻗﺼﺪﻱ ﻣﻮﻗﻔﻪ ﺑﻴﻨﻠﻲ ﻗﺪﺍﺵ ﻫﻮ ﺭﺍﺟﻞ ﻛﻮﻳﺲ ...
ﻫﺎﻧﻴﺒﺎﻝ ﺷﺒﺤﻠﻬﺎ ﺷﻮﻳﻪ ﺑﻌﺪﻳﻦ ﻗﺎﻝ : ﺧﻮﺍﻟﻚ ﻭﺭﺍﻙ ﻳﺎﺩﻻﻝ .. ﺍﻧﻲ ﻭﺭﺍﻙ .. ﻣﺎﻳﺨﻮﻓﻜﺶ ﻫﻮ ﻣﻦ ﻳﻜﻮﻥ .. ﻭﺣﻖ ﺍﻟﻠﻪ ﻭﻗﺖ ﻳﺠﺪ ﺍﻟﺠﺪ ﻣﺎﻧﻌﺮﻑ ﻓﻴﻬﺎ ﻭﺍﻟﻲ ..
ﺣﻀﻨﺎﺗﻪ ﺩﻻﻝ : ﺍﻧﺖ ﺗﻌﺮﻓﻪ ﻛﻮﻳﺲ ... ﻳﻌﻨﻲ ﻣﻤﻜﻦ ﻳﻨﻮﺍﻟﻲ ﺍﻟﺸﺮ ..
ﻫﺎﻧﻴﺒﺎﻝ : ﻭﻷﻧﻲ ﻧﻌﺮﻓﻪ ﻛﻮﻳﺲ ﻣﺎﺍﺩﺧﻠﺘﺶ ﻓﻲ ﺍﻟﻤﻮﺿﻮﻉ ...
ﺩﻻﻝ ﺑﻌﺪﺕ : ﺧﻼﺹ ﻣﻌﻨﺎﻫﺎ .. ﺍﺑﺘﺴﻤﺖ ..
ﺑﺎﺱ ﻉ ﺭﺍﺳﻬﺎ ﻫﺎﻧﻴﺒﺎﻝ : ﺭﺑﻲ ﻳﻬﻨﻴﻚ ﻭﻳﺴﻌﺪﻙ ..
ﺩﻻﻝ ﻫﺰﺕ ﺭﺍﺳﻬﺎ ﺑﺈﻳﺠﺎﺏ ﻭﺍﺑﺘﺴﻤﺖ ﻣﺠﺎﻣﻠﻪ ...
ﻣﺸﻲ ﻫﺎﻧﻴﺒﺎﻝ ﻟﻠﺮﺟﺎﻟﻪ ﺍﻟﻠﻲ ﺗﺴﻘﺪﻭﺍ ﻟﻠﺠﺎﻣﻊ ﺑﺶ ﻳﻘﺮﻭﺍ ﺍﻟﻔﺎﺗﺤﻪ ..
ﻭﻫﻲ ﺣﺎﺳﻪ ﺭﻭﺣﻬﺎ ﻛﺎﻥ ﺗﻠﻘﻰ ﺗﻬﺮﺏ ...
🍁🍁🍁
ﻭﺍﻧﻘﺮﺕ ﻓﺎﺗﺤﺘﻬﺎ ... ﻭﺍﻟﻜﻞ ﻳﻬﻨﻲ ﻭﻳﺴﻠﻢ ﻭﻳﺒﺎﺭﻙ .. ﻭﻫﻲ ﺣﺎﺳﻪ ﺭﻭﺣﻬﺎ ﻛﺎﻥ ﺗﻠﻘﻰ ﺗﻌﻴﻂ ﻉ ﻃﻮﻝ ﺣﺴﻬﺎ ...🍃💔
ﻭﺑﺪﻭﺍ ﻳﺪﺭﺑﻜﻮﺍ ﻭﻳﻐﻨﻮﺍ ﻭﻳﺮﻗﺼﻮﺍ ﺣﻮﺍﻟﻴﻬﺎ ...
ﻫﻲ ﻫﺪﺍ ﻭﻳﻦ ﺍﺳﺘﻮﻋﺒﺖ ﺣﻖ ﺍﻟﻠﻲ ﺻﺎﺭ ﻭﺍﻧﻬﺎ ﺧﻼﺹ ...
ﻭﻗﻌﺖ ﻓﻲ ﺍﻷﺳﺮ 🍃....
💕 ﻫﻮ ﻣﺶ ﻻﻗﻲ ﻓﺮﺣﺘﻪ ﻭﻳﻦ ﻳﺤﻄﻬﺎ .....
ﻣﺎﻓﻜﺮﺵ ﻳﻜﻠﻤﻬﺎ ﻧﻬﺎﺋﻲ .... ﻭﻫﻲ ﺍﺻﻼ ﻃﻮﻝ ﺻﻜﺮﺕ ﺗﻠﻴﻔﻮﻧﻬﺎ ...
🌸 ﺑﻌﺪ ﺍﻟﻔﺎﺗﺤﻪ ...
ﺟﺖ ﺍﻟﻜﺴﻮﺓ ...
ﻭﻛﺎﻧﺖ ﻛﺴﻮﺓ ﺍﺳﻄﻮﺭﻳﻪ ....
ﺍﻧﺒﻬﺮﺕ ﺑﻴﻬﺎ ﺍﻟﻌﻴﻮﻥ .... ﻭﻓﻲ ﺍﻟﻠﻲ ﺍﻟﺤﺴﺪ ﻗﺎﺗﻠﻪ ... ﺯﻱ ﻋﻤﺘﻬﺎ ﺧﻮﻟﻪ ..
ﻭﻓﻲ ﺍﻟﻠﻲ ﻣﻨﻘﻬﺮ ﺯﻱ ﺯﻳﻨﺐ ....
ﺣﺎﻭﻟﻮﺍ ﺑﻨﺎﺕ ﺧﺎﻻﺗﻬﺎ ﻭﺍﺧﺘﻬﺎ ﻳﻐﻴﺮﻭﻟﻬﺎ ﺟﻮﻫﺎ ...
ﻭﻫﻲ ﻗﻌﺪﺕ ﺗﺠﺎﻣﻞ ﻭﺗﺴﺎﻳﺮ ﻭﺧﻼﺹ ....
ﻭﻓﺎﺗﺖ ﻫﺪﻳﻜﺎ ﺍﻟﻠﻴﻠﻪ .....
ﻭﺟﻲ ﺍﻟﻴﻮﻡ ﺍﻟﻤﻨﺘﻈﺮ ....
ﻟﻌﻤﺎﺭ ﻃﺒﻌﺎ .... ﺍﻟﻠﻲ ﻋﻤﺮﻩ ﻣﺎﻃﻤﺢ ﻟﺤﺎﺟﻪ ﻭﺍﺻﺮ ﻳﻨﻮﻟﻬﺎ ﺍﻻ ﻭﻧﺎﻟﻬﺎ ﻧﺎﻟﻬﺎ .....
💖💖💖💖
ﺩﺍﺭﻭﺍ ﺍﻟﺤﻔﻠﻪ ﻓﻲ ﺻﺎﻟﺔ ﺑﺎﺏ ﺍﻟﻬﻨﺎﺀ ..
ﻭﻛﺎﻧﺖ ﺣﻔﻠﻪ ﻣﺶ ﻋﺎﺩﻳﻪ ....
ﻭﻫﻴﺠﻮﺍ ﻓﻴﻬﺎ ﻛﻠﻬﻢ ....
ﺳﻌﻴﺪﻩ ﻣﺎﺣﻀﺮﺗﺶ ﻟﻜﻦ ﺑﻌﺘﺖ ﺭﺯﺍﻥ ﻣﻊ ﻋﻤﺎﺗﻬﺎ .... ﻣﺎﻻ ﻓﻜﻪ..😂
ﺍﻟﻤﻬﻢ ...
ﺩﻻﻝ ﻃﻠﻌﺖ ﻣﻠﻜﺔ ﺟﻤﺎﻝ ...
ﺑﺲ ﻋﺮﻭﺱ .. ﺗﻌﻴﺴﻪ ... ﺟﺎﻣﻠﺖ ﺍﻟﻨﺎﺱ ﺳﺎﻳﺮﺕ ﻭﺍﺑﺘﺴﻤﺖ .. ﻟﻜﻦ ﻣﻦ ﺩﺍﺧﻠﻬﺎ ﺣﺎﺳﻪ ﺑﺼﺪﺭﻫﺎ ﻣﻄﺒﻖ ﻉ ﺍﻵﺧﺮ ...
ﻃﺒﻌﺎ ﺍﻟﺤﻔﻠﻪ ﺩﺍﺭﻭﻫﺎ ﺑﻜﺮﻱ ...
ﻷﻥ ﻋﻤﺎﺭ ﻳﺒﻲ ﻳﺪﺧﻞ ﻓﻲ ﺳﺮﺕ .....
ﻣﻊ ﺍﻝ 9:30 ﺗﻤﺖ ﺍﻟﺤﻔﻠﻪ ...
ﻭﺟﻲ ﻣﻊ ﺧﻮﺍﺗﻪ ﻭﻣﻮﻛﺐ ﺍﺳﻄﻮﺭﻱ ﺑﺶ ﻳﺮﻭﺣﻮﺍ ﺑﻴﻬﺎ ....
ﻭﺑﻴﻤﺸﻮﺍ ﻣﻌﺎﻫﺎ ﺧﻮﺍﻟﻬﺎ
ﻃﻠﻌﻮﺍ ﻣﻦ ﺍﻟﺼﺎﻟﻪ ﻭﺭﻛﺒﻮﻫﺎ ﺍﻟﺴﻴﺎﺭﺓ ﺟﻨﺒﻪ ..
ﻭﻣﺎﻛﺎﻥ ﻓﻴﻬﺎ ﺣﺪ ...
ﻫﻲ ﻛﺎﻧﺖ ﺗﺮﺟﻒ ﺭﺟﻒ ...
ﻗﺪﺍﻡ ﺍﻟﺴﻴﺎﺭﺓ ...
ﻋﺒﺪ ﺍﻟﺴﻼﻡ ﻭﻋﻴﻮﻧﻪ ﻣﻠﻴﺎﻧﺎﺕ ﺩﻣﻮﻉ : ﺑﻨﺘﻲ ﺍﻣﺎﻧﻪ ﺭﻩ ﺍﻣﺎﺍﻧﻪ ﻳﺎﻋﻤﺎﺭ .. ﺍﻟﻠﻪ ﻻﻳﺴﺎﻣﺤﻚ ﻟﻮ ﺧﻨﺖ ﻫﺎﻷﻣﺎﻧﻪ ...
ﻋﻤﺎﺭ : ﺍﻟﻠﻪ ﻻﻳﺴﺎﻣﺤﻨﻲ ﻟﻴﻮﻡ ﺍﻟﺪﻳﻦ ﻛﺎﻥ ﻣﺎﺻﻨﺘﺶ ﺍﻣﺎﻧﺘﻚ ..
ﺍﺑﺘﺴﻢ ﻋﺒﺪﺍﻟﺴﻼﻡ : ﺭﺑﻲ ﻳﻬﻨﻴﻜﻢ ...
ﻋﻤﺎﺭ : ﺗﺴﻠﻢ ﻳﺎﻋﻤﻲ ... ﺗﺼﺒﺢ ﻉ ﺧﻴﺮ ...
ﻋﺒﺪﺍﻟﺴﻼﻡ : ﻗﺪﺍﻣﻜﻢ ﻛﻞ ﺧﻴﺮ ....
ﻭﻣﺸﻲ ﻋﻤﺎﺭ ﻟﻠﺴﻴﺎﺭﺓ ﻭﺭﻛﺐ ...
ﺩﻻﻝ ﺭﻋﺸﺖ ﻣﻊ ﺑﻌﻀﻬﺎ ...
ﻋﻤﺎﺭ : ﺍﻟﺴﻼﻡ ﻋﻠﻴﻜﻢ ..
ﻣﺎﺑﺘﺶ ﺗﺮﺩ ..
ﻋﻤﺎﺭ : ﺍﻛﺴﺒﻲ ﺣﺴﻨﺎﺕ ﻭﺭﺩﻱ ﺍﻟﺴﻼﻡ ..
ﻣﺎﺑﺘﺶ ﺗﺘﻜﻠﻢ ...
ﻫﻮ ﺗﻨﻬﺪ ﻭﻗﺎﻝ : ﻣﻌﻠﻴﺶ .. ﻣﻌﻠﻴﺶ 💖.
ﺷﻐﻞ ﺍﻟﺴﻴﺎﺭﺓ ﻭﺩﺍﺭ ﻛﻼﻛﺲ ... ﻭﺗﺤﺮﻙ ... ﻭﺗﺤﺮﻙ ﻭﺭﺍﻩ ﺍﻟﻤﻮﻛﺐ ...
ﻭﺧﻠﻮﺍ ﻭﺭﺍﻫﻢ ...
ﻧﻌﻴﻤﻪ ﺍﻟﻠﻲ ﻓﻘﺪﺕ ﺍﻟﻮﻋﻲ ﻓﻲ ﺍﻟﺼﺎﻟﻪ ﻭﺧﻮﺍﺗﻬﺎ ﺣﺼﻠﻮﺍ ﻓﻴﻬﺎ ﻭﺣﺘﻰ ﻫﻤﺎ ﻳﺒﻜﻮﺍ ....
ﻭﻧﻮﺭ ﺍﺧﺘﻬﺎ ﺍﻟﻠﻲ ﻛﺎﻧﺖ ﺗﺒﻜﻲ ﺑﺎﻟﻌﺒﺮﺓ ..
ﻭﻋﺒﺪﺍﻟﺴﻼﻡ ﺍﻟﻠﻲ ﺧﺎﻧﻮﻩ ﺩﻣﻮﻋﻪ ... ﻏﺼﺐ ﻋﻨﻪ ...
ﻭﺣﻤﺰﺓ ﺍﻟﻠﻲ ﻛﺎﻧﺖ ﺩﻣﻮﻉ ﻗﻠﺒﻪ ﺣﺎﺭﻗﻪ ﻟﻴﻦ ﺧﻼﺍﺍﺹ ... ﺍﻟﺒﻨﻴﺔ ﺍﻟﻠﻲ ﻳﺒﻴﻬﺎ ﺍﻟﻴﻮﻡ ﺗﻮﻟﻲ ﺣﻼﻝ ﻏﻴﺮﻩ 🍃💔
💔 ﻭﺍﻋﺮﻩ 💔
🍁🍁🍁🍁🍁🍁🍁🍁🍁🍁🍁🍁🍁🍁🍁🍁🍁
ﺍﻟﺴﺎﻋﻪ 11:00 ﻭﺻﻠﻮﺍ ﻟﺴﺮﺕ ...
ﻭﺍﺳﺘﻘﺒﻠﻮﻫﻢ ...
ﺑﺎﻷﻟﻌﺎﺏ ﺍﻟﻨﺎﺭﻳﻪ .. ﻭﺿﺮﺏ ﺍﻟﺮﺻﺎﺹ ...
ﻭﺍﻟﻌﺮﻭﺳﻪ ﺧﺪﻭﻫﺎ ﺧﻮﺍﺗﻪ ﻭﺩﺧﻠﻮﻫﺎ ﻟﺼﺎﻟﺔ ﻛﺒﻴﺮﺓ ﻋﻨﺪﻫﻢ ﻓﻴﻬﺎ ﺍﻟﻤﻌﺎﺯﻳﻢ ...
ﺍﻧﺒﻬﺮﻭﺍ ﺑﻴﻬﺎ ... ﻛﺎﻧﺖ ﺗﺒﺎﻥ ﺻﻐﻴﺮﺓ .. ﻭﺁﻳﺔ ﻣﻦ ﺍﻟﺠﻤﺎﻝ ..💖
ﺍﻧﺼﻤﺘﺖ ﻫﻨﺪﺍ ﻟﻤﺎ ﺷﺎﻓﺘﻬﺎ .. ﻗﺮﻳﺐ ﻣﺎﺗﺖ ....
ﻭﻣﺶ ﻫﻲ ﺑﺲ ... ﺣﺘﻰ ﻏﺎﺩﻩ ﺑﻨﺖ ﺧﺎﻟﺘﻪ ﺍﻟﻠﻲ ﻋﺎﺷﺖ ﻋﻤﺮﻫﺎ ﺗﺴﺘﻨﻰ ﻓﻌﻤﺎﺭ ...
ﺭﻓﻀﺖ ﻫﻠﺒﻪ ﺟﻮﻫﺎ ﻉ ﺧﺎﻃﺮﻩ .. ﻭﻣﻊ ﺍﻷﺳﻒ ﺍﻟﻨﺘﻴﺠﻪ ﺗﺸﻮﻑ ﻓﻴﻬﺎ ﻗﺪﺍﻣﻬﺎ ..
ﻏﻨﻮﺍ ﻋﻠﻴﻬﺎ .. ﻭﺷﺘﻮﺍ ...
ﻭﺍﻟﻔﺮﺣﻪ ﺑﺎﻳﻨﻪ ﺗﺘﻨﻄﺮ ﻣﻦ ﻋﻴﻮﻥ ﻛﺎﻣﻠﻪ ﻭﺑﻨﺎﻭﻳﺘﻬﺎ ..
ﺑﻴﻨﻤﺎ ﺩﻻﻝ ﻓﻜﺎﻧﺖ ﺣﺎﺳﻪ ﺑﺮﻫﺒﻪ ﺷﺪﻳﺪﻩ ... ﻧﺎﺱ ﺟﺪﻳﺪﻩ .... ﻭﺟﻮﻩ ﻣﺎﺗﻌﺮﻓﻬﺎﺵ ... ﻭﻻﺗﻌﺮﻑ ﻛﻴﻒ ﻣﻤﻜﻦ ﺗﻜﻮﻥ ﺣﻴﺎﺗﻬﺎ ﻣﻌﺎﻫﻢ ... ﺍﺫﺍ ﻭﻟﺪﻫﻢ ﻧﻔﺴﻪ ﻣﺶ ﺭﺍﺿﻴﻪ ﺑﻴﻪ 🍃...
ﻭﺑﻌﺪ ﺩﻭﺷﻪ ﻃﻮﻳﻠﻪ ﻋﺮﻳﻀﻪ ...
ﺟﺖ ﺍﻫﻢ ﻟﺤﻈﻪ ...
ﺍﻣﻴﻨﻪ ﺟﺘﻬﺎ : ﻫﻲ ﻳﺎﻋﺮﻭﺱ .. ﻋﺮﻳﺴﻚ ﻳﺴﺘﻨﻰ ﻓﻴﻚ ..
ﺣﺴﺖ ﺍﻟﻤﻮﺕ ﺟﺘﻬﺎ ... ﻧﺎﺿﺖ ﺑﺎﻟﺴﻴﻒ ....
ﻟﺒﺴﻮﻫﺎ ﻛﺎﺑﻬﺎ ....
ﻭﻃﻠﻌﻮﻫﺎ ﻭﻫﻤﺎ ﻳﺪﻳﺪﺷﻮﺍ ﻓﻴﻬﺎ .... ﻭﺣﻨﺎﻫﺎ ﻓﺎﻃﻤﻪ ﺗﺸﻮﻓﻠﻬﺎ ﻭﺗﺪﻋﻴﻠﻬﺎ ... ﺑﺎﻟﺘﺒﺎﺕ ﻭﺍﻟﻬﻨﻲ .....
🌸🌸🌸🌸🌸
ﻭﺭﺟﻌﺖ ﺭﻛﺒﺖ ﻣﻌﺎﻩ ﺍﻟﺴﻴﺎﺭﺓ ﻣﺮﺓ ﺗﺎﻧﻴﻪ ...
ﻫﻮ ﻛﺎﻥ ﻳﺮﺍﺟﻲ ﻓﻴﻬﺎ ﻫﺎﻟﻤﺮﺓ ...
ﻗﻠﺒﻪ ﺑﻴﻔﺮ ﻓﺮﺍﻥ ....💓💓💓💓
ﺍﻣﺎ ﻫﻲ ﻛﺎﻥ ﻗﻠﺒﻬﺎ ﻣﻘﺒﻮﺽ ...
ﻣﺎﺑﺎﺵ ﻳﻜﻠﻤﻬﺎ ﺑﻜﻞ .... ﻃﻮﻝ ﺍﻟﻄﺮﻳﻖ ﺳﺎﻛﺘﻴﻦ .. ﻭﻣﺤﻤﺪ ﺣﺴﻦ ﻛﺎﻥ ﻛﺎﺳﺮ ﻫﺎﻟﺼﻤﺖ ﺑﺄﻟﺤﺎﻧﻪ ﺍﻟﺤﻠﻮﺓ ...
ﻣﺎﻛﺎﻧﺘﺶ ﺍﻟﻤﺴﺎﻓﻪ ﻃﻮﻳﻠﻪ ...
ﻭﺻﻞ ﺑﻴﻬﺎ ﻟﻠﺤﻮﺵ ...
ﻧﺰﻝ ﻣﻦ ﺍﻟﺴﻴﺎﺭﺓ ... ﻭﺟﻲ ﺟﻴﻬﺘﻬﺎ .. ﻓﺘﺢ ﺍﻟﺒﺎﺏ ..
ﺳﺎﻋﺪﻫﺎ ﻓﻲ ﺍﻟﻨﺰﻭﻝ ﺑﺪﻭﻥ ﻣﺎﻳﻘﺮﺑﻬﺎ ...
ﺻﻜﺮ ﺍﻟﺒﺎﺏ ...
ﺗﻨﻬﺪ ﻭﻫﻮ ﻳﺸﻮﻓﻠﻬﺎ ...💓
ﻗﺮﺏ ﻣﻨﻬﺎ ... ﺣﺎﻭﻃﻬﺎ ﻭﻗﻌﺪ ﻳﻤﺸﻲ ﻓﻴﻬﺎ ... ﻭﻫﻲ ﺣﺎﺳﻪ ﺭﻭﺣﻬﺎ ﺑﺘﻤﻮﺕ ﻣﻦ ﺍﻟﺨﻮﻑ ... ﺑﺎﻟﺬﺍﺕ ﻟﻤﺎ ﻗﺮﺏ ﻣﻨﻬﺎ ﻫﻜﻲ ..
ﻭﺻﻠﻮﺍ ﻓﻲ ﺍﻟﺒﺎﺏ ﻭﻓﺘﺤﻪ ...
ﻋﻤﺎﺭ : ﺑﺎﻟﻴﻤﻴﻦ ...
ﺧﺸﺖ ﻭﻣﺎﻋﺒﺮﺗﺎﺵ ....
ﻫﻮ ﺻﻜﺮ ﺍﻟﺒﺎﺏ ﻭﻫﻮ ﻣﺒﺘﺴﻢ ....
ﻫﻲ ﺑﺪﺕ ﺗﻔﻚ ﻓﻲ ﺍﻟﻜﺎﺏ ﻷﻧﻬﺎ ﺍﻧﺨﻘﺖ ﻫﻠﺒﻪ ...
ﻭﺧﺮﺍﺗﻪ ﻋﻦ ﻭﺟﻬﻬﺎ ﺑﺲ ﻗﻌﺪ ﻉ ﺭﺍﺳﻬﺎ ...
ﻋﻤﺎﺭ : ﻭﻫﺪﻯ ﺣﻮﺷﻚ ..
ﺩﻻﻝ : ﻗﺼﺪﻙ ﻗﺒﺮﻱ ..
ﻋﻤﺎﺭ ﻗﻠﺒﻪ ﺍﻧﻘﺒﺾ ﻣﻦ ﻛﻠﻤﺘﻬﺎ ... ﺳﻜﺖ ﺷﻮﻳﻪ ﺑﻌﺪﻳﻦ ﻗﺎﻝ : ﺗﻌﺎﻟﻲ ... ﻣﺸﻲ ..
ﺗﺄﻓﻔﺖ ﻭﻣﺸﺖ ﻭﺭﺍﻩ ...
ﻫﻮ ﻛﺎﻥ ﻳﺤﺎﻭﻝ ﺿﺒﻂ ﻧﻔﺴﻪ ﻉ ﻗﺪ ﻣﺎﻳﻘﺪﺭ ...
ﻭﺻﻠﻮﺍ ﻟﺪﺍﺭ ﺍﻟﻨﻮﻡ ....
ﻋﻤﺎﺭ : ﺧﺸﻲ ..
ﺩﻻﻝ ﺧﺪﺕ ﻧﻔﺲ ﻭﺧﺸﺖ "... ﺗﻮﺍ ﺍﻧﺘﻲ ﻣﺮﻏﻤﻪ ﺍﻧﻚ ﺗﻜﻮﻧﻲ ﻣﺮﺗﻪ .. ﺍﻧﺤﻜﻢ ﻋﻠﻴﻚ ﺗﻨﺬﻟﻲ ﻋﻨﺪﻩ ... ﻭﻻ ﺍﻋﺘﺮﺍﺽ ﻉ ﺣﻜﻢ ﺍﻟﻠﻪ .."
ﺣﻮﻟﺖ ﺍﻟﻜﺎﺏ ... ﻭﻗﻌﺪﺕ ﺗﻘﺪﻡ ﺑﺨﻄﻮﺍﺕ ﺛﻘﻴﻠﻪ ﻟﻠﺴﺮﻳﺮ ...
ﻭﻗﻌﻤﺰﺕ ...
ﻫﻮ ﻟﻤﺎ ﺷﺎﻓﻬﺎ .... ﺯﺍﺩ ﻓﻴﻬﺎ ﻫﺒﺎﻝ ﻉ ﻫﺒﺎﻟﻪ 💓💓💓💓💓....
ﻟﻘﻲ ﺧﻄﻮﺍﺗﻪ ﻳﺎﺧﺪﻭﺍ ﻓﻴﻪ ﻟﻴﻬﺎ ....
ﻗﻌﻤﺰ ﺟﻨﺒﻬﺎ .. ﻭﻗﻌﺪ ﻳﺘﺄﻣﻞ ﻓﻴﻬﺎ 💖..
ﻫﻲ ﻋﻴﻮﻧﻬﺎ ﻟﻮﻃﺎ ﻭﺍﻳﺪﻳﻬﺎ ﺗﻔﺮﻙ ﻓﻴﻬﻢ ﺑﺒﻌﺾ ...
ﻗﺮﺏ ﻣﻨﻬﺎ ... ﺣﺎﻭﻃﻬﺎ ﺑﺈﻳﺪﻳﻪ ... ﻗﺮﺏ ﺍﻛﺘﺮ ... ﻗﻌﺪ ﻳﺸﻢ ﻓﺮﻳﺤﺘﻬﺎ ﻭﻫﻮﻣﻐﻤﺾ ﻋﻴﻮﻧﻪ 💓💓💓
ﻭﻫﻲ ﻛﺎﻧﺖ ﺗﺮﺟﻒ ..
ﻗﺮﺏ ﺍﻛﺜﺮ ... ﻭﻃﺒﻊ ﻉ ﺧﺪﻫﺎ ﺑﻮﺳﻪ ... ﻃﻮﻭﻭﻭﻭﻭﻝ ﻫﻠﺒﻪ ﻓﻴﻬﺎ ...
ﻫﻲ ﺩﻣﻮﻋﻬﺎ ﻃﺎﺣﻮﺍ ...
ﻭﻫﻮﺣﺲ ﺑﻴﻬﻢ .... ﻭﺧﺮ .... ﻭﻫﻮ ﻣﺎﺯﺍﻝ ﺗﺤﺖ ﺗﺄﺛﻴﺮ ﻣﺨﺪﺭﻫﺎ 💖
ﺍﺑﺘﺴﻢ ﺑﻬﻴﺎﻡ ﻟﻤﺎ ﺷﺎﻑ ﺩﻣﻮﻋﻬﺎ ....
ﺷﺒﺢ ﻹﻳﺪﻳﻬﺎ ﻟﻘﺎﻫﻢ ﻣﺤﻨﻴﺎﺕ ﻭﻃﺎﻟﻌﻪ ﻓﻴﻬﻢ ﺍﻟﺤﻨﻪ ﺗﻬﺒﻞ ...
> ﻋﻤﺎﺭ ﺍﺑﺘﺴﻢ : ﺑﻨﺖ ﻣﻦ ﻣﻦ ﺧﻮﺍﺗﻚ؟
ﻫﺎﻧﻴﺒﺎﻝ ﺷﺒﺤﻠﻪ ﻭﺿﺤﻚ : ﺑﻨﺖ ﻧﻌﻴﻤﻪ ..
ﻋﻤﺎﺭ : ﻣﺎﺷﺎﺀ ﺍﻟﻠﻪ .. ﻛﻢ ﻋﻤﺮﻫﺎ ..
ﻫﺎﻧﻴﺒﺎﻝ : ﻳﺎﺗﻼﺕ ﻳﺎﺍﺭﺑﻊ ﺳﻨﻴﻦ ..
ﺩﻻﻝ : ﺗﻼﺗﻪ ﻭﺑﻨﺨﺚ ﺍﻟﺒﻌﻪ ... ﻭﺩﺍﺭﺕ ﺍﺷﺎﺭﺍﺕ ﺍﻷﺭﻗﺎﻡ ﺑﺼﻮﺍﺑﻌﻬﺎ ..
ﺿﺤﻜﻮﺍ ﻋﻤﺎﺭ ﻭﻫﺎﻧﻴﺒﺎﻝ ..
ﻗﺪﻡ ﻋﻤﺎﺭ ﻭﻗﺎﻟﻠﻬﺎ : ﺗﺮﺍ ﻫﺎﺗﻲ ﻳﺪﻙ ﻳﺎﺳﻤﺤﻪ ..
ﺩﻻﻝ ﺧﺎﻓﺖ ﻣﻨﻪ ﻭﺷﺒﺤﺖ ﻟﻬﺎﻧﻴﺒﺎﻝ ..
ﻫﺎﻧﻴﺒﺎﻝ ﺑﺈﺑﺘﺴﺎﻣﻪ : ﻫﺪﺍ ﺧﺎﻟﻮ ﻋﻤﺎﺭ ﺩﻟﻮﻟﻪ ﺳﻠﻤﻲ ﻋﻠﻴﻪ ..
ﺩﻻﻝ ﺭﺟﻌﺖ ﺷﺒﺤﺖ ﻟﻌﻤﺎﺭ ﺷﻮﻳﻪ ﺑﻌﺪﻳﻦ ﻣﺪﺕ ﻳﺪﻫﺎ ..
ﺧﺪﻱ ﻳﺪﻫﺎ ﻭﺑﺎﺳﻬﺎ ﻭﻗﺎﻝ : ﺳﻤﺤﻪ ﺍﻟﺤﻨﻪ .. <<
ﻫﻮ ﺍﺑﺘﺴﻢ ﻟﻤﺎ ﺧﻄﺮﺕ ﻉ ﺑﺎﻟﻪ ﻫﺎﻟﺬﻛﺮﻯ ..
ﻗﺮﺏ ﻳﺪﻩ ﻣﻦ ﺍﻳﺪﻳﻬﺎ ﺷﺪﻫﻢ ﺍﻟﺰﻭﺯ ﻭﻗﺮﺑﻬﻢ ﻟﻴﻪ ... ﻭﺑﺎﺳﻬﻢ ﻭﻗﺎﻝ : ﺳﻤﺤﻪ ﺍﻟﺤﻨﻪ ...💓💓💓
ﻭﺩﻣﻮﻉ ﺩﻻﻝ ﻣﺎﺑﻄﻠﻮﺵ ﻧﺰﻭﻝ ...
ﻧﺰﻝ ﺍﻳﺪﻳﻬﺎ ﻭﻗﻌﺪ ﺷﺎﺩﻫﻢ ﻭﻗﺎﻝ : ﻟﻴﺶ ﻛﺎﺭﻫﺘﻴﻨﻲ ﻫﻜﻲ ... ﺷﻦ ﺭﻳﺘﻲ ﻣﻨﻲ ﻗﻮﻟﻴﻠﻲ ... ﻣﺤﻼﻙ ﻣﻨﻴﻦ ﻛﻨﺘﻲ ﺍﻟﺪﻟﻮﻟﻪ ﺍﻟﺼﻐﻴﺮﺓ ﺍﻟﻠﻲ ﻣﻨﻴﻦ ﺗﺸﻮﻑ ﻋﻤﺎﺭ ﺗﺠﻴﻪ ﺟﺮﻱ ... ﻛﻨﺘﻲ ﺗﺤﺒﻲ ﺗﻘﻌﻤﺰﻱ ﻉ ﻛﺮﺍﻋﻲ ﻫﺪﻱ .. ﻭﺣﻂ ﻳﺪﻩ ﻉ ﻓﺨﺪﻩ ... ﻛﻨﺖ ﺗﻠﻌﺒﻲ ﻣﻌﺎﻱ ﻭﺗﻐﻨﻲ ﻣﻌﺎﻱ .. ﺣﺘﻰ ﻣﻦ ﺷﻌﺮﻙ ﺑﺈﻳﺪﻳﺎ ﻇﺎﻓﺮﻩ ....
ﺧﺪﻳﺘﻲ ﻗﻠﺒﻲ ﻣﻦ ﺻﻐﺮﻙ ... ﻭﻭﻳﻦ ﻛﺒﺮﺗﻲ ﺳﻠﺒﺘﻲ ﻣﻨﻲ ﻋﻘﻠﻲ ﻭﺭﺍﺣﺘﻲ ﻭﻫﻨﺎﻱ ... ﻓﻌﻤﺮﻱ ﻣﺎﺭﻳﺖ ﻗﺴﻮﺓ ﻣﻦ ﺣﺪ ﻛﻴﻒ ﻣﺎﺭﻳﺘﻬﺎ ﻣﻨﻚ ....
ﺩﻻﻝ .... ﺩﻟﻮﻟﻪ .... ﻭﺣﻖ ﻣﻦ ﺧﻠﻖ ﺍﻟﺤﻖ ... ﻣﺎﺣﺘﻠﻘﻲ ﺑﻨﺎﺩﻡ ﻓﻲ ﺍﻟﺪﻧﻴﺎ ﻳﺤﺒﻚ ﻛﻴﻒ ﻣﺎﺍﻧﻲ ﻧﺤﺒﻚ .... ﻭﻣﺶ ﺣﺘﻨﺪﻣﻲ ﻟﻠﺤﻈﻪ ﺍﻧﻚ ﺍﺗﺰﻭﺟﺘﻴﻨﻲ ..
ﺩﻻﻝ .... ﻏﻤﻀﺖ ﻋﻴﻮﻧﻬﺎ .. ﻭﺍﻧﻬﺎﺭﺕ ﺑﺎﻟﺒﻜﻲ ﻭﻗﺎﻟﺖ :. ﻣﺶ .. ﻃﺎﻳﻘﺎﺗﻚ ..
ﻫﻮ ﻫﻨﻲ ﻭﺧﺮ ﻋﻨﻬﺎ ....
ﻧﺎﺽ ﻭﻗﻒ .... ﺷﺒﺤﻠﻬﺎ ﺷﻮﻳﻪ ... ﺑﻌﺪﻳﻦ ﻭﺧﺮ ﺧﻄﻮﺗﻴﻦ ﻭﻟﻒ .. ﻭﻃﻠﻊ ﻣﻦ ﺍﻟﺪﺍﺭ ...
ﻭﻫﻲ ﺣﻄﺖ ﺍﻳﺪﻳﻬﺎ ﻉ ﻭﺟﻬﻬﺎ ﻭﻗﻌﺪﺕ ﺗﺒﻜﻲ ﺑﺎﻟﻌﺒﺮﺓ ....
... ﻳﺘﺒﻊ .