⚔️ විහාධීෂ ⚔️ [ Historical ]

විහාධීෂ 9

විහා_ධීෂ

පසුදින උදෑසනම පුහුණු මණ්ඩපයට හේෂව පැමිණෙන විටද ශාක්‍රස කුමරු එහි පැමිණ සිටියේය... අසිපත් සටන් උගැනීමට තිබූ තදියම නිසාවෙන් ඔහු පෙරදින රැය නම් නිදි නොලැබූ තරම්‍ ය... සයනයට ගොඩවූ වේලාවේ පටන් එහි ඒ මේ අත පෙරළෙමින් නුදුරු අනාගතයේ තමා අසිපත හසුරුවන ආකාරය පිළිබඳව ඔහු සිහින මවන්නට විය...

පුහුණු කටයුතු සඳහා හැඳීමට පෙර දින ලැබුණු සලු වලින් වළලුකර තෙක් දිගු දෝතියක් පමණක් ඔහු හැඳ සිටියේය... ඔහුගේ දිගුවූ කෙස්වැටිය ඉහළට ගැට ගැසීමට අනුර නගරයේදී දාසයෙකු වූ තමාට නොහැකි වුවද, මෙහි නම් කිසිදු තහනමක් නොවුණි...

ශාක්‍රස කුමරු පැවසූ පරිදි නම් කායික අභ්‍යාස කිරීමට පෙර මනස හොඳින් නිදහස් විය යුතුය... ඉදින් හේෂව හට නැත්තේද එයමය... මානසික සංයමය... ඉදින් ඔහු නම් එහි අරුත වත් දන්නේද යන්න පුදුමයකි...

ශාක්‍රස කුමරු සිදුකර පෙන්වන පරිදි දෙපා ස්වස්ථිකයක ආකාරයට නවා කඳ හොඳින් කෙලින් කර දෑස්මට්ටමින් ඉදිරිය බලා දෑත් වල පළමු හා දෙවන ආංගුල, තුඩු වලින් එකිනෙක තෙරපෙන පරිදි සැකසිය යුතුය... පසුව පිරමිඩයක හැඩය එන සේ දෑත් වල මැණික් කටු ප්‍රදේශ දණහිස්වල ගෑවෙන පරිදි ඉතිරි ආංගුල තුන හොඳින් දිගහැර ඒවායේ තුඩු පොළොව ස්පර්ශ වන සේ තබාගත යුතු විය...

ඔහු පවසන පරිදි එසේ ආසනයේ සිටියදී එකතු වන විශ්ව ශක්තිය වැඩිමනක් හෘදය ආසන්නයේ පිහිටන්නක් සේම පළමු හා දෙවන ආංගුල වල තුඩු එලෙස තෙරපා තනන මුද්‍රාවෙන් අග්නි හා වායු එකට එක් කිරීම නිරූපනය වන්නේලු... එසේම අග්නි හා වායු එකට එක්වී සෑදෙන මහා ශක්තිය ඕනෑම යහපත් හෝ අයහපත් කාර්‍යයකට එකසේ භාවිතා කරන්නටද හැක්කේලු... එනිසා එම මුද්‍රාවෙන් ධ්‍යාන වැඩීමේදී යහපත් අරමුණකම සිත පිහිටුවිය යුතු වග ඔහු පැවසුවේය...

ප්‍රථමයෙන් හුස්ම ඉහළ පහළ හෙලීම පිළිබඳව පමණක් අවධානය යොමු කරන්නට ඔහුට උපදෙස් ලැබුණි... අනතුරුව පියවරෙන් පියවර එතරම් අපහසු නොවන තරමක් ගැඹුරු මානසික අභ්‍යාසද ශාක්‍රස මුණි ඔහු හට ඉගැන්වූයේය...