Dragon's Blade [ Season-2 ]

DB-106

ဧကရာဇ်ဝမ်ဂျွန် နန်းတက်ပြီး ခြောက်နှစ်အကြာတွင်မူ တစ်ခါလေးတောင်မှ အိမ်ပြန်မလာကြသည့် အမွှာမင်းသားနှစ်ပါးက ပြန်လာဖို့ ဆုံးဖြတ်ခဲ့ကြသည်။

မင်းသားနှစ်ပါးက လက်ထပ်ကြတော့မည်ဟု အသိပေးပြီး ပြန်လာကြတာဖြစ်သည်။ ဒါက ဝမ်ယောလ်တို့ တစ်မိသားစုလုံးကို နောက်ထပ် သတင်းကောင်းပါးလိုက်တာ ဖြစ်သည်။

ဝမ်ယောလ်နဲ့ ဘတ်ဟျွန်းတို့က အိမ်တော်ရာမှာပဲ မင်းသားနှစ်ပါးကို စောင့်နေကြမည် ဖြစ်ပြီး ဝမ်ဂျွန်နဲ့ ဗြောလေးတို့ကလည်း အိမ်တော်ရာမှာပဲ လာတွေ့ကြမည်။

အိမ်တော်ရာမှာ ခြံပတ်ပတ်လည်က နှစ်ရှည်ပင်ကြီးတွေ ဖြစ်ထွန်းနေပြီမို့ ပန်းပင်တွေ အုပ်မိုးနေကြပြီဖြစ်သည်။ အလုပ်တာဝန်တွေ ပေါ့လျော့သွားပြီဖြစ်တဲ့ ဧကရာဇ်ဟောင်း ဝမ်ယောလ်အတွက် အချိန်တိုင်းက ပေါ့ပါး လန်းဆန်းလို့နေသည်။ အထူးသဖြင့် နွေဦးမှာ လန်းဆန်းပွင့်လန်းနေသည့် ပွင့်ဝါဝါတွေ။

ထိုပွင့်ချပ်ဝါဝါတွေက မြေပြင်မှာလည်း အဝါရောင် အခင်းကြီးသဖွယ် ရှိနေစေသည်။ မြေပြင်နဲ့ မိုးပေါ်မှာ အဝါရောင် ပန်းပွင့်တွေချည်း အုပ်မိုးထားရာ တစ်ခါတစ်ရံ ဝမ်ယောလ်အတွက် ရင်မောစရာဖြစ်လာတက်သည်။ တစ်ခါတစ်ရံ ဘတ်ဟျွန်းလက်ကို တွဲလို့ အတူလမ်းလျှောက်နေရင်းတောင် ဘတ်ဟျွန်း သူ့အနားက ပျောက်သွားမည်ကို ကြောက်လန့်လာမိသည်။

တစ်ခါတစ်ရံလည်း နစ်မြောဖွယ် အတွေးလေးတွေ ပေါ်တက်လာသေးသည်။ ဆံပင်ငွေဖြူရောင်နဲ့ ဘတ်ဟျွန်းကို တွဲမြင်မိတာမျိုး။ ဒါက သူ့ငယ်ငယ် မင်းသားဘဝက သူ့နောက်ကို တောက်လျှောက်လိုက်လာ တက်တဲ့ အရိပ်ဖြူလေးအတိုင်းပဲ။ အရိပ်ဖြူလေး ဘယ်ချိန်က ပျောက်သွားရတယ် ဆိုတာကိုတောင် သူမမှတ်မိတော့ပဲ တိုင်းပြည်ရေး၊ သားရေးသမီးရေး ကိစ္စတွေနဲ့ လုံးပန်း ခဲ့ရတာ ဖြစ်သည်။

" ယောလ် ..."

ဝမ်ယောလ် အတွေးများနေရာက ဘတ်ဟျွန်းကို လှည့်ကြည့်လာမိသည်။ အကြင်သူသည် အဝါရောင် ပန်းတွေအောက်မှာ တက်ကြွနေဆဲ။ နန်းတော်ကလို ဝတ်ရုံရှည်တွေ မရှိတော့။ ပေါ့ပါးသည့် ဝတ်စုံဖြင့်၊ တစ်ခါတစ်ရံ ဘောင်းဘီရှည်များနှင့် ဆံပင်များကို မြှောက်ပင့်ချီလျက် အမြဲပေါ့ပါးနေဟန်ကိုသာ တွေ့ရသည်။