Dragon's Blade [ Season-2 ]

DB-81

မနက်စောစောဟု မဆိုသာသော်လည်း နေမွန်းတည့်ချိန်လည်း မဟုတ်။ စိစစ်စရာ ကိစ္စတွေ များပြားလှပါသော ဧကရာဇ်လောင်းမှာ တစ်ပြည်သူ ဘုရင်တစ်ပါး၏ ဆွဲခေါ်ခြင်း ခံလိုက်ရပေသည်။  သူသည် စိတ်သဘောထား ပြည့်ဝသည့်တိုင် အရာအားလုံးကို ခွင့်လွတ်သည့် အနေအထားတော့ မဟုတ်။

ယခုလို လုပ်စရာတွေ ပုံနေသော ကာလမှာ ထိုက်ခွန်းက သူ့ကို အတင်းအကြပ်နီးပါး ဆွဲခေါ်သွားလေတော့သည်။ အကြောင်းမှာ သူ့ညီမဖြစ်သူ အဆောင်တော်သို့ ဝင်ရောက် လို၍။ ဝင်ရောက်လိုခြင်း အကြောင်းမှာလဲ ဗြောလေးအတွက် နောက်ဆုံး လက်ဆောင် ပေးချင်သည် ဟူ၍။

ဗြောလေးအဆောင်တော်သို့ တော်ဝင်မိသားစုများ၏ အနွယ်တော်များသာ ဝင်ရောက်ခွင့်ရှိသည်။ တစ်စိမ်းအမျိုးသားတို့မှာ အဆောင်ရိပ်ပင် မနင်းနိုင်အောင် အစောင့်အကြပ် ပေါပေါများများ ချထားပေ၏။  သို့သော် အတွင်း‌ဆောင်နား ရောက်လေ လုံခြုံရေးက ပိုလို့ လျော့နည်းသွားသည်ကို ထိုက်ခွန်း သိပြီးသား ဖြစ်သည်။

သို့သော် တရားဝင် ဝင်ဖို့ကျ အာဏာကြီးလှသည့် တော်ဝင်အနွယ်တော်၏ ခွင့်ပြုချက် ပါမှသာ ရပေလိမ့်မည်။ ဤသို့နှင့် ဝမ်ဂျွန်သည် ဗြောလေး အဆောင်တော်သို့ ပါလာခဲ့ရသည်။ ဝမ်ဂျွန် ကိုယ်တိုင်လည်း စိတ်မချ၍ စိတ်ပါလက်ပါ လိုက်လာ ခဲ့ခြင်းမျိုးဖြစ်သည်။

ဗြောလေးသည် မနက်ခင်း တေးသီငှက်မျိုးစုံကို အစာပက်ကြွေးနေပါ၏။ သူ့ ဘေး ပတ်ပတ်လည်တွင် အရောင်စုံသော ငှက်ကလေးတို့ ဝန်းရံနေသည်။ အစောင့်အကြပ် များသည် နီးနီးကပ်ကပ်မဟုတ်။ မင်းသမီးငယ်၏ ပေါ့ပါးလန်းဆန်းမူကို ခပ်ဝေးဝေးကသာ ကြည့်ရှုနေပြီး ဆော တစ်ယောက်သာ အနားမှာ အစာဗူးကို ကိုင်ထားပေးတာ ဖြစ်သည်။

" ဗြောလေး အိမ်ရှေ့စံ လာပါတယ် "

ဆောသည် ဗြောလေးအား နာမည် တပ်ခေါ်လို့ ရသည့် အနည်းငယ်သော ဝန်ထမ်းများထဲမှ ဖြစ်သည်။

မနက်ခင်းနေရောင်က သိပ်မပြင်းသေးတာမို့ ဗြောလေးက အဆောင်တော်ထဲ ဝင်ဖို့ မပြင်သေးဘူး။ မြင့်မားသော အရပ်တွေနဲ့ တူညီစွာ လျှောက်လမ်းလာသော အစ်ကို နှစ်ဦးအား ဆီးကြိုနေလိုက်သည်။