Dragon's Blade [ Season-2 ]

DB-85(မီးအိမ်ရှင်မိဖုရားလောင်း-၄)

ထိုက်ချီပြည်မကြီးသို့ စစ်၏ အငွေ့အသက် များနှင့် တောက်လောင်နေသော စစ်သင်္ဘောကြီးများ ဆိုက်ကပ်လို့လာချေပြီ။ စစ်သင်္ဘောကြီးများ အစင်းငါးရာ ကျော်သည် တောင်ပိုင်းအင်ပါယာ၏ လက်ရွေးစင် တပ်မတော်များ ငါးသောင်းမျှ လိုက်ပါလာလျှက် စစ်နတ်ဘုရားခေါ် ဧကရာဇ်ကြီးက ဦးဆောင်လာတာ ဖြစ်သည်။

ဆိပ်ကမ်းကပ်တာနှင့် ဝမ်ယောလ်သည် သင်္ဘောဦးထိပ်ပိုင်းတွင် မတ်မတ်ရပ်လျက် စိတ်ကို အတော်အတန် လျော့ထားရသည်။ သူ့နောက်တွင် အနီသံချပ်ကာနှင့် အပြာသံချပ်ကာဝတ် စစ်သည်နှစ်ဦးက တူညီစွာ ရပ်နေသေးသည်။ ငယ်ရွယ်သော စစ်သည်တော်များ အသွင်ရှိသည့် မင်းသားငယ်များသည် ပျော်ရွှင်တက်ကြွသည့် စရိုက်ရှိသည့်တိုင် ယခုတွင်တော့ ကွဲပြားစွာ တည်ငြိမ်နေလျက်။

ဝမ်ယောလ်သည် စိတ်မာထန်နေသည့်တိုင် ဘတ်ဟျွန်းလက်လေးကို အသာကိုင်လျက် သင်္ဘောတံတားပေါ်က ငြိမ်ငြိမ်သက်သက် ဆင်းနေလေသည်။ သင်္ဘောနှင့် ဆိပ်ခံတံတားတို့ ဆက်ထားသော တံတား ဖြစ်ပြီး အများအားဖြင့် ဖြုတ်ရတပ်ရလွယ်သော တံတားဖြစ်သည်။

ဆိပ်ကမ်းမှသည် နန်းတော်ရှိရာသို့ ငါးမိုင်မျှ ခရီးဆက်ရပေဦးမည်။ ထိုက်ခွန်း ခရီးဦးကြို လွှတ်လိုက်သည့် နန်းတွင်းပုရောဟိတ်များ၊ သံတမန်များအပြင် စစ်သူကြီးများက ရိုရိုသေသေ ဂါရဝပြုကြလေသည်။ ဝမ်ယောလ်က သံတမန်အရ လာသည်မဟုတ် တာကြောင့် သာကြောင်းမာကြောင်းပင် မပြောချင်။

သူ၏ ကြင်ယာတော် အဆင်ပြေ၊ မပြေကိုသာ စစ်ဆေးပြီး ချက်ချင်း ခရီးပြန်ထွက်တော် မူသည်။ နည်းနည်းလေးမှ အချိန်မဆိုင်းချင်။

အချိန်ဆိုင်းလို့လဲ မရတော့။ သူတို့တွင် အချိန်သုံးရက်သာ ရှိတော့သည်။ ယခုတွင်ပင် လက်ဆက်ကာလ ဖြစ်သော ဒုတိယအပတ် ကာလ၏ အန္တရာယ်ကာလအတွင်း ကျရောက်နေပြီ ဖြစ်သည်။

လမ်းတစ်လျောက်ရှိ မြို့ရွာများသည် စစ်သည်အင်အားများကို ကြည့်ပြီး ကြောက်ဒူးတုန်လျက် ရှိနေကြသည်။ နှစ်ပေါင်းကြာညောင်းမှ တစ်ခါသာ ကျရောက်သော ကြယ်တာရာ ပွဲတော်၏ လက်ဆက်ကာလမှာ ယခုထိ မပြီးမြောက်သေး။ ယခုလို စစ်ဘုရင်ကြီး၏ စစ်သည်အင်အားကို ကြည့်ပြီး ထိုက်ချီ ပြည်သူတွေသည် ပြားပြားဝပ်လျက် တောင်းပန်ခစားနေကြသဖွယ်။