Dragon's Blade [ Season-2 ]

DB-70

" ငါကိုယ်တော် ကလေးငယ်ငိုသံကြားနေရတယ်.. ဟိုဘက်ကျွန်းကို သွားကြမယ်.. အသံက အဲ့ဘက်က "

ဝမ်ယောလ်၏ အသိစိတ်အာရုံက ပြင်းထန်စွာ လှုပ်ရှားနေသည်။ ကလေးငယ်၏ ငိုသံက သိပ်ကို သနားဖို့ကောင်းတာမို့ ထိုကလေး၏ အခက်ခဲကို ကူညီချင်ရုံဖြစ်သည်။

သို့သော် သူ့ရဲ့ စစ်သူကြီးနဲ့ စစ်သားတွေမှာ မကြားရ၍ ယုံရခက်ဖြစ်နေသည်။ စစ်သားတွေက အမိန့်ပေးသည်နှင့် ချက်ချင်း လမ်းကြောင်းပြောင်းပြီး လိုက်ရှာဖို့ ပြင်တော့သည်။

မထင်မှတ်ပဲ သူတို့ လမ်းကြောင်းတည့်တည့် ပြေးဝင်လာသော အရာတစ်ခုကြောင့် စစ်သားတွေ ရုတ်ရုတ်သဲသဲ ဖြစ်သွားရသည်။ ထိုအရာမှာ လူတစ်ယောက်ဖြစ်နေခဲ့ပြီး အလျင်လိုစွာ တွန်းတိုက်ရင်း ရန်ပြုလာခဲ့သည်။

ဝမ်ယောလ်က ထိူလူကို မြင်တာနဲ့ ချက်ချင်း မှတ်မိကာ သူ့ကြာပွတ်နဲ့ ဆွဲယူလိုက်သည်။

" ဆူး... ဘယ်လိုဖြစ်လာတာလဲ"

ဆူးက ကြာပွတ်နဲ့ ခါးမှာချိတ်မိနေပြီး အဆွဲခံလိုက်ရမှ အသိပြန်ဝင်လာသည်။

" အရှင်မင်းကြီး... "

ဆူးက အဝတ်ဖြူစစ်သားတစ်စုနဲ့ တိုက်ခိုက်ရင်း ပြေးလာတာမို့ ရုတ်တရက် သူ့ရှေ့ရောက်လာသည့် စစ်သားတွေကိုလည်း သေချာမကြည့်ပဲ တိုက်ခိုက်မိတာ ဖြစ်သည်။

ဆူးက ဝမ်ယောလ်ကို မြင်ပြီး ဝမ်းသာစွာ မျက်ရည်များ ကျလာရသည်။ ဝမ်ယောလ်က ကြာပွတ်ကို ဖြေပေးပြီး အလျင်လိုစွာ မေးတော့သည်။

" ဝမ်အွန်း.. ဝမ်အွန်းနဲ့ အတူရှိနေခဲ့လား"

" ဟိုဘက်.. ဟိုဘက် စိမ့်တောကျွန်းမှာ.."

ဒုတပ်မှုးသည် ဆူးထံ ပြေးလာပြီး ထကူရပ်ပေးသည်။ သူက မေးခွန်းများစွာ မေးနေချင်ပေမဲ့ အရေးကြီးသည့် ကိစ္စရှိနေသေးတာမို့ သူက ဆူး သက်ရှိထင်ရှားရှိနေသေးတာကိုပဲ ကျေးဇူးတင်မိသွားသည်။ 

ဝမ်ယောလ်က ကျောက်တောင်ကြီး ရှိနေသည့် ကျွန်းကို ကြည့်လိုက်သည်။ ဘတ်ဟျွန်းက သူနဲ့ နီးနီးနားနားမှာ ရောက်နေခဲ့ပြီ ဆိုတာ အတိအကျ သိလိုက်ရသည်။