Dragon's Blade [ Season-2 ]

DB-88 ( မီးအိမ်ရှင်မိဖုရားလောင်း-၇)

စေ့စပ်ပွဲအပြီး၌ ဓလေ့ထုံးတမ်းများအတိုင်း ထိုက်ခွန်းနဲ့ ဗြောလေးတို့ဟာ ကြာကန် အလယ်က အဆောင်ငယ်လေးမှာ အတူ ရှိနေကြတာ ဖြစ်သည်။

ရှုခင်းကြည့် အဆောင်ဖြစ်တာမို့ လေးဘက် လေးတန်မှာ နံရံမရှိပါပဲ ပုဝါပါး ဖြူဖြူတို့သာ လေအရှိန်နဲ့ လွင့်မျောနေတာပဲရှိသည်။

ကြာကန်နှင့် မလှမ်းမကမ်းရှိ အဆောင်ကြီး တစ်ခုတွင် အနီးကြည့် မှန်ပြောင်းကြီး ကိုယ်စီနှင့် ဧကရာဇ်၏ မိသားစုကို တွေ့ရပါလိမ့်မည် ။ သားအဖလေးယောက် ထိုင်ပင်မထိုင်နိုင်ပဲ ကြာကန်အလယ်က အဆောင်ကို ကြည့်နေကြပါ၏။

ဘတ်ဟျွန်းမှာ တားလို့မရသည့် ယောက်ျားသား လေးဦးကြောင့် တစ်ဖက်က မိဘများဖြစ်သော ထိုက်ခွန်း၏ ခမည်းတော် နှစ်ပါးကို မျက်နှာပူနေရသည်။ စားပွဲရှိ ကြာပန်းလက်ဖက်ရည်နွေးတောင် သူ့မျက်နှာလောက် ပူနိုင်စွမ်းမရှိ။

ကျေးဇူးတင်စွာ တာခွန်းနဲ့ နျဉ်ရီရှောင်းတို့က နားလည်ပေးပါ၏။ ဧကရာဇ်ကြီးက ချွေးမရဖို့ အားခဲထားပါမှ မရချင်တဲ့ သားမက်လာရနေ၍ မည်မျှ စိတ်ထိခိုက်မည် ဖြစ်ကြောင်း နားလည်ထားကြသည်။

အဆုံး၌မူ ဘတ်ဟျွန်းသည် အသံကျယ်ကျယ်ဖြင့် ဆော်သြလိုက် တော့သည်။

" ထိုင်ကြဖို့ အချိန်ရောက်ပြီ !"

ဧကရာဇ်နှင့် သားသုံးဦးက လှည့်ကြည့် လာပါ၏။ သူ့တို့ အကြည့်တွင် မထိုင် ချင်သေးသည့် အရိပ်အယောင်များ တွေ့နေရသည်။

ဘတ်ဟျွန်း လေသံပြတ်ပြတ်နှင့် ပြန်ပြောသည်။

" ထိုင် !!!"

ဤမျှ အသံနှုန်းဆိုလျှင် အင်မတန် ဒေါသထွက်နေပြီမှန်း ရိပ်မိကြသည့် သားအဖလေးဦးမှာ ချက်ချင်း ကိုယ်စီ နေရာယူလိုက်ကြသည်။

ဘတ်ဟျွန်း၏ အကြည့်စူးစူးကြောင့် သားအဖလေးဦးမှာ မျက်လုံးများပင် လှန်မကြည့်ရဲ ။ ရေနွေးခွက် ကိုယ်စီငှဲ့၍ သောက်သုံးနေကြပါ၏။

တာခွန်းနှင့် နျဉ်ရီရှောင်မှာ တော်ဝင် ကြင်ယာတော်၏ သြဇာထိရောက်ပုံကို ကြည့်၍ ကြက်သီး မထပဲ မနေရဲ ။ ကြီးမြတ်လှပါသည့် ဧကရာဇ်မင်းတောင် စကားနားထောင်နေရသည်။ သားသုံးဦးဆို ပြောမနေပါနှင့် ။